Select Section Type

1.0
šnāyišn ī dādār_ohrmazd
2.0
pad =iz wābarīgānīh ī dēn ī mazdēsnān =iz pōryōtkēšān dād kerdag
3.0
šašom abar nihang =ēw ī az pōryōtkēšān kird ud dāšt wābar
4.0
gōwišn ī dēn ī mazdēsn
5.0
pōryōtkēšān ī dānāgān pēšēnīgān ōwōn dāšt kū mardōmān
6.0
andar ox menišn =ēw ast yazad ī gāh dārēd ud ast druz ī rāh dārēd
7.0
ud andar menišn gōwišn =ēw ast yazad ī gāh dārēd ud ast druz ī rāh dārēd
8.0
ud andar gōwišn kunišn =ēw ast yazad ī gāh dārēd ud ast druz ī rāh dārēd
9.0
ud andar ox wārom =ēw wahuman gāh dārēd ud akōman rāh dārēd
ud andar wārom kāmag =ēw srōš gāh dārēd ud xešm rāh dārēd
ud andar kāmag menišn =ēw spandarmad gāh dārēd ud druz ī tarōmad rāh dārēd
ud andar menišn gōwišn =ēw xrad gāh dārēd ud waran rāh dārēd
ud andar gōwišn kunišn =ēw dēn gāh dārēd ud xwad_dōšagīh rāh dārēd
ud druz kōšišn abāg mardōmān pad ēn and rāh ud widarg
ud kē pad ēn and rāh ud widarg bōxt az harw gyāg bōxt
ud kē ānōh frēft ēg ō dast ī druzān rasēd
ud az ān frāz xwad nē pādixšāy bē ka ān kunēd ī =š druz framāyēnd
ud amāh mardōmān ōšyār bawišn kū tā az ān ī yazadān rāh bē nē ēstēm ud az pas ī druzān nē šawēm
u =šān ēn =iz ōwōn dāšt kū
xēm ēw ān weh kē ān čē pad xwēš nē nēk pad ōy ī did nē kunēd
ud xrad =ēw ān weh kē nēkīh ī mad ēstēd bar dānēd xward
ud anāgīh ī nē mad ēstēd rāy wahāg nē barēd
ud wīr =ēw ān weh kē ān čē nē dānēd dānēd kū nē dānam
u =šān ēn =iz ōwōn dāšt kū
harw kas dōst bāš u =t ēd xēm
u =šān pad wehīh abar bar u =t ēd xrad
u =šān pad xwēš dār u =t ēd dēn
u =šān nēkīh pad =iš kun u =t ēd ruwān
u =šān ēn =iz ōwōn dāšt kū
xēm ān kē kas nē frēbēd
ud xrad ān kē xwad nē frēbēd
ud dēn ān kē ān čē dānēd kū kirbag kunēd
u =šān ēn =iz ōwōn dāšt kū
kē ān čē dānēd kū kirbag ud nē kunēd
ān tar_menišnīh tar_menišnīh xēm petyārag
ud kē ān čē dānēd kū wināh ud kunēd ān waranīgīh ud waranīgīh xrad petyārag
ud kē ān čē nē dānēd kū kirbag ayāb wināh ud pēš tā ō dānišn rasēd kunēd ān xwad_dōšagīh ud xwad_dōšagīh dēn petyārag
u =šān ēn =iz ōwōn dāšt kū
xēm xrad andar nēst
ud xrad xēm andar
ud dēn harw dō andar xrad ud xēm
tis ī mēnōy pad xēm wirāstan dānīhēd
tan pad xrad dārīhēd
ruwān pad hamīh ī harw dō bōzīhēd
u =šān ēn =iz ōwōn dāšt kū
šarm ān bawēd kē wināh nē hilēd kirdan
ud nang ān bawēd kē kirbag nē hilēd kirdan
u =šān ēn =iz ōwōn dāšt
kū pōryōtkēšīh mādayān tis awināhīh
u =šān ēn =iz ōwōn dāšt kū
xwēš_kārag pad ōy bawēd kē šnāsag
u =šān ēn =iz ōwōn dāšt kū
uskārišn ī pad dēn hāmōyēn kirrōgīh
bē kē and_čand dānēd pad kunišn hamē kunēd
u =šān ēn =iz ōwōn dāšt kū
ohrmazd ī xwadāy ēn dām pad xēm dād ud pad xrad dārēd ud pad dēn abāz ō xwēš kunēd
u =šān ēn =iz ōwōn dāšt kū
ahriman harw tis =ēw pad zyān ī ohrmazd kird
u =š ka kird būd ēg xwad zyān ud ohrmazd sūd
ud ohrmazd harw tis pad sūd ī xwēš kunēd
u =š ka kird bawēd ēg xwad sūd ahriman zyān
u =šān ēn =iz ōwōn dāšt kū
mardōmān se tis ēn xwēš_kārīhātom
čašm ō gēhān dāštan
ud ān ī wināhgār pad wināh ī ǰahišnīg pēšār bawēd nē āwēnīdan
ud kirbag pāddāšn az mēnōyān xwāstan
u =šān čašm ō gēhān dāštan ēn guft kū kē ō xwēš tan nigerēd kū =m čē kāmēd ud čē hamē kunam
u =šān ēn =iz ōwōn dāšt kū se tis ī abēr dušwār kirdan ēn =iz ēdon
ēk ān ī wināhgār pad wināh nē āwēnīdan
ud ēk ān ī drōzan_dādestān mard xwadāyīh ud xwāstag rāy nē burzēnīdan
ud ēk kirbag pāddāšn az mēnōyān xwāstan nē az gētī
u =šān ēn =iz ōwōn dāšt kū
ān ī aboxšāyišn nē āwēnišn ud ān ī āwēnišn nē burzišn
u =šān ēn =iz ōwōn dāšt kū
kadāmiyān =iz mardōm andar harw gāh ud zamān tis ī mēnōy pad ayād dārišn
ud nēkīh ī wahišt ud anāgīh ī dušox andar ān gāh ka āsānīh ud nēkīh ud rāmišn awiš mad ēstēd
ēn =iz handēšišn kū nēk =iz hād ānōh pad wahišt ka ēdar =iz ēdōn nēk
ka az was anāgīh ī ahriman ī =š abāg nēkīh ānōh nē āmēxt ēdar =iz ēdōn nēk
andar ān hangām ka =š tangīh bēš ud anāgīh awiš mad ēstēd ēn =iz ēdōn handēšēd kū
wad =iz hē ānōh pad dušox ka ēdar ōwōn anāg ka az was nēkīh ī ohrmazd ī =š abāg anāgīh ī ānōh rāy ka ēdar =iz ēdōn anāg
u =šān ēn =iz ōwōn dāšt kū
mardōm ān farroxtom kē andar tan_druyistīh ud ǰuwānīh tis ān grift ud kird ēstēd
ī abdom rōz ka az ēn gēhān bē šawēd ēg =iš kāmag ōwōn kū =m kāč wēš kird hē
ud az ān tis wēš bē pahrēzišn ī =š abdom rōz kāmag ēn bawēd kū =m kāč ma grift ud kird hē
u =šān ēn =iz ōwōn dāšt kū
ahlāyīh pad rāyēnišn ud bazag pad ranǰ_spōz dārīšn
u =šān ēn =iz ōwōn dāšt kū
ahlāyīh ī mādayān ān tis ī harw kas tuwān kirdan ud ohrmazd =iz ī xwadāy az harw kas xwāhēd
ud kē nē kunēd ērangīhā
u =šān ēn =iz ōwōn dāšt
ān tis ēn guft
kē yazadān dōst bawēd hagriz menišn az dōstīh ī yazadān bē nē wisinnēd
u =šān ēn =iz ōwōn dāšt kū
ahlomōγīh bun_xān wišuft ēstēd
ud ka naxust ō gēhān rasīd mardōmān frāyist pad ruwān wurrawēnīd
ud ēd rāy čē ō pādixšāyīh nē mad ēstēd abzāyīd
ud ka ō pādixšāyīh mad frāyist ān kē wurrawišn bē šud
ud abāg =iz xwadāyīh ud pādixšāyīh ī =š abāg
pas =iz ēd rāy čē mardōmān az wurrawišn šud ēstēd nē abzāyēd
u =šān ēn =iz ōwōn dāšt kū
wehīh az harw kas gīrišn ud wattarīh az harw kas =iz nē gīrišn
u =šān ēn =iz ōwōn dāšt kū
andar dēn panǰ tis ī pahlom ēn =iz ēdōn
rāstīh ud rādīh ud hunarāwandīh ud tuxšāgīh ud ǰādag_gōwīh
rāstīh ēd pahlom kē andar dām ī ohrmazd ān kunēd ī ōy kē pad =iš kunēd ōwōn sūdōmandtar ka =š pad =iš kunēd
rādīh ēd pahlom kē dāšn ō kas kunēd kē az ōy kē pad =iš kunēd pad gētī tis =iz pāddāšn nē ēmēd kū =š awiš rasēd
u =š ēn =iz andar nēst kū ōy kē pad =iš kunēd wēšīgān pad spās ud ābādīh dārēd
ud hunarāwandīh ēd pahlom kē abāg druz ī mēnōy kōšēd
ud kadāmī =iz druz nāmčišt ēn panǰ druz andar ō tan nē hilēd
āz ud arešk ud waran ud xešm ud nang
tuxšāgīh ēd pahlom kē kār ī abar ēstēd pad kirdan ōwōn kird ēstēd kū
harw gāh pad tan ī xwēš abēgumān kū
agar pad ham zamān bē mīrēd ēg =iz =iš tis =iz ǰuttar nē abāyēd kirdan kū ān ī =š kird ēstēd
ǰādag_gōwīh ēd pahlom kē ōy kas rāy saxwan gōwēd ī agōw u =š must ud gilag ī xwēš guftan nē tuwān
ud ān kas ēwāz ī ruwān ī xwēš ud ān ī driyōš nā_kas mardōm ī gētī ud ēn šaš amahrspand rāy gōwēd
u =šān ēn =iz ōwōn dāšt kū
xrad andar kār ud xēm andar pādixšāyīh ud dōst andar widang paydāg
u =šān ēn =iz ōwōn dāšt kū
xrad ī xradān pahlom ān kē tuwān kū ēn tan ēdōn dārēd kū ruwān rāy tis =iz anāgīh ō tan nē rasēd
ud ruwān ōwōn dārēd kū tan rāy tis =iz anāgīh ō ruwān nē rasēd
ud ka ǰuttar ōwōn nē tuwān kirdan tan hilēd ud ruwān dārēd
u =šān ēn =iz ōwōn dāšt kū
xwadāyīh magind ī xwāstag xwāstag magind ī tan ud tan magind ī ruwān
ud mardōmān kē anāgīh awiš rasēd ī ēn čahār tis ēdōn az =iš appār būd bīm xwadāyīh bē ēw hilēd
ud ka pad xwadāyīh nē wizīrēd xwāstag =iz abāg bē ēw hilēd
ud ka pad xwāstag =iz nē wizīrēd tan =iz abāg bē ēw hilēd
ud pas ō ruwān ma ēw spōzēd
u =šān ēn =iz ōwōn dāšt kū
ahlāyīh ud dēn mehmānīh ēd ’wŷ’lsny ud hubahrīh ud hunsandīh
u =šān ēn =iz ōwōn dāšt kū
harw kas tan ī xwēš ustōfrīd bē kunišn ud ō yazadān abespārišn
ud az ān frāz wistāx bawišn kū hagriz tis awiš nē rasēd ī awiš madan rāy zyān
u =šān ēn =iz ōwōn dāšt kū
gilag_ōbār ud wīdwar pad kirbag tuxšāg ud wistāx bawišn ud spās az mēnōyān xwāhišn
u =šān ēn =iz ōwōn dāšt kū
ox ōwōn pad xwadāy dārišn ud framān_burdār bawišn čiyōn ān ī xwadāy ud dahībed
bē az ox dastwar tis =iz kār nē kunišn
u =šān ēn =iz ōwōn dāšt kū
ohrmazd az mardōmān xwāyišn ēn kū =m šnāsēd
čē ēn dānēd kū =m agar šnāsēnd harw kas pas ī man bawēd
ud ahriman xwāyišn ēn kū =m ma šnāsēd
čē ēn dānēd kū =m agar šnāsēnd kas =iz az pas man nē bawēd
u =šān ēn =iz ōwōn dāšt kū
ohrmazd az mardōmān ēn xwāhēd kū
harw čē kunēd xwēš rāy kunēd u =tān čand kāmag kunēd
ud ahriman ēn xwāhēd kū
xwēš rāy ma kunēd u =tān čand kāmag kunēd
u =šān ēn =iz ōwōn dāšt kū
harw kas tis =ēw ast ī =š az abārīg tis āzarmīgtar ud garān_māyagtar
ud ka ān tis hamahl dārēd ka abārīg tis mānd ud nē pad mayān ēg =iz pad rāmišn
u =š ān tis dēn
u =šān ēn =iz ōwōn dāšt kū
dēn ān ī hamē kunēd
u =šān ēn =iz ōwōn dāšt kū
kē ruwān rāy ǰādag_gōwīh wurrawēd kam wattar ast kū kē tis =iz nē wurrawēd
u =šān ēn =iz ōwōn dāšt kū
dēn ān bawēd kē pad harw dām xwārīh kunēd
u =šān ēn =iz ōwōn dāšt kū
bazag ān bawēd ī pad dād
ud wināh ān bawēd ī pad sūdagīh
ud tar_menišnīh ud māndag ān bawēd ī bē mānād
u =šān ēn =iz ōwōn dāšt kū
wināh mādayān frāybūd ud aibībūd
ud kirbag mādayān paymān
u =šān ēn =iz ōwōn dāšt kū
dēn paymān
u =šān ēn =iz ōwōn dāšt kū
harw tis anāhōgīh ī paymān
ud az ēn dēn ōwōn paydāg kū mahist paymān kirbag
ud paymān ēn humat ud hūxt ud huwaršt
u =šān ēn =iz ōwōn dāšt kū
harw kē ahlaw bawēd pad dēn ahlaw bawēd
u =šān ēn =iz ōwōn dāšt kū
frāybūd ēd kē ān ī nē menišn ud gōwišn ud kunišn menēd gōwēd kunēd
ud aibībūd ēd kē ān ī menišn ud gōwišn ud kunišn nē menēd ud gōwēd kunēd
ud paymān ēd kē ān menēd ud gōwēd kunēd ī menišn ud gōwišn ud kunišn
u =šān ēn =iz ōwōn dāšt kū
andar dēn se tis ēn mādagwartar hamīh ud paymān ud wizīhīdagīh
hamīh ēd bawēd kē pad menišn ud gōwišn ud kunišn pad harw frārōnīh abāg yazadān ud wehān ham bawēd ān hamīh hagriz nē wišōbēd
ud wizīhīdagīh ēd bawēd kē pad harw abārōnīh ud wināh az ahriman ud dēwān ud wattarān ǰud bawēd
ud paymān ēd bawēd kē ōy hamīh ud wizihīdagīh abar pānag bawēd hagriz nē wišōbēd
u =šān ēn =iz ōwōn dāšt kū
mardōmān pahrēz was ēwēnag
ud ān ī mahist ēd kē yazadān andar xwēš tan ōwōn wistāx ud abēbīm kunēd kū harw čē kāmēnd awiš nimāyēnd
u =šān ēn =iz ōwōn dāšt kū
ātaxš pahrēz was ēwēnag ud pahrēz dō ēn meh
ēk ka =š abēwināhīhā ud rāstīhā pahrēzēnd
ud ēk ēn ka ān ī pad =iš kunīhēd arzānīg
u =šān ēn =iz ōwōn dāšt kū
pad kār ī frāz rasēd mehgārīh nigerišn
ud kē mehgārīh nē dānēd mih_kārīh nigerišn
u =šān ēn =iz ōwōn dāšt kū
ka ahriman az ēn čahār rang ēk abar abganēd ēg =iš bē ō xwēš barēd
xwadāy_dēnīh ayāb xwāstag_dēnīh ayāb pwč_abāyistīh ayāb ahlomōγīh
u =šān ēn =iz ōwōn dāšt kū
az_mehān =iš tarsagāhy ud az_kehān =iš dāštār bawišn
ud ō hamahlān sōg dahišn
ud az ēn se ēk ēn weh kē ō hamahlān sōg dahēd
čē kē ō hamahlān sōg nē dahēd ān paydāg kū =š sāzišn ī abāg az_mehān =iš andar ud bīm rāy ud az =iš kehān gung tarsagāhīh rāy
u =šān ēn =iz ōwōn dāšt kū
pad dārišn ī tan tis =ēw ēn weh kē az_keh =iš pad hamahl ud hamahl pad az_meh =iš ud az_meh =iš pad xwadāy dārēd
u =šān ēn =iz ōwōn dāšt kū
az petītīgīh rāh ī ō dušox nēst
ud az apetītīgīh rāh ī ō wahišt nēst
ud petītīgīh ēd kē az wināh ī kird abaxš ud pad_petīt bawēd ud did ān wināh nē kunēd
u =šān ēn =iz ōwōn dāšt kū
se kas pad ahlāyīh ēn arwandtar
ēk kē andar gursagīh =ēw rad
ud ēk kē andar garān_menišnīh =ēw rāst_guftār
ud ēk kē andar ōy zadag nē zanēd
u =šān ēn =iz ōwōn dāšt kū
harw mardōm ka murd ēstēd u =š xwēš tan aziš pahrēzīhēd kū tā =š pad =iš nē pahikōbam ud rēman nē bawam
ud ka =š pad =iš pahikōbēd xwēš tan pad rēman dārēd
zīndag =iz mardōm az āzār ud bēš ī ōy ī did mardōm ōwōn bē pahrēzišn čiyōn pad murd az nasāy ī ōy mard
u =šān ēn =iz ōwōn dāšt kū
harw mardōm dānag ī kirbag bē xwāyišn
u =š ka dānag =ēw kirbag pad mayān kird az ān frāz kirbag was ud wināh nihang bawēd
u =šān kirbag dānag ī ēd guft
dēn dastwar ī dānāg ud hamīh ī frārōn ī grift
u =šān ēn =iz ōwōn dāšt kū
kē kirbag pad ēn čahār tis rāy kunēd ēg =iš nē kirbag bawēd
nām ī abārōn ayāb waran ayāb nang ayāb tars ī ōy ī did rāy
u =šān ēn =iz ōwōn dāšt kū
wāzag ō awestwārān gōwišn
ud dēn andar hamdēnān uskārišn
ud kirbag ud bazag ō harw kas gōwišn
u =šān ēn =iz ōwōn dāšt kū
wāzag ōy gōwišn kē wīr ōwōn kū frāz kunēd
ud ōš ōwōn kū bē nē ǰōyēd
ud xrad ōwōn kū ōy did weh tuwān kirdan
u =šān ēn =iz ōwōn dāšt kū
tis ān ast ī
ān kē andar ēstēd az =iš bē nē ayāsēd
ud ān kē andar nē ēstēd aw =iš ayāsēd
u =šān ēn =iz ōwōn dāšt kū
harw kē pad dēn ēstēd az ānōh ī ēstēd bē nē ayāsēd
u =šān ēn =iz ōwōn dāšt kū
mardōmān ōšyār bawišn ud az ān druz abēr pahrēzišn ī ēmēdag ud wistāxwīh ud dastwarīh ast ī harw wināh
ud ān druz ēd drōzanīh
čē frāyist ān wināh ī mard ka kunēd pad ēmēdag ud wistāxwīh ud dastwarīh kunēd kū kas nē dānēd ud an nē gōwam
ud agar kas dānēd pad =iš nakkīrā bawam
ud agar bōxt =am ēnyā abar ēstam ud gōwam kū =m ōh abāyist kirdan
u =šān ēn =iz ōwōn dāšt kū
agar uzwān adrō hād ka ō kōf =ēw rōn gōwē kū frāz raw ēg frāz rawēd
u =šān ēn =iz ōwōn dāšt kū
hamē ka ēw gām padīrag ī dēn frāz šawēd ēg dēn hazār gām padīrag ō abāz āyēd
u =šān ēn =iz ōwōn dāšt kū
bē kē xwad ayāb niyāgān kirbag =ēw ī pad nāmčišt kird ēstēd ēnyā =š sar ō pōryōtkēšīh nē bawēd
u =šān ēn =iz ōwōn dāšt kū
kē rōy ō dēn kunēd ud xēm ī xwēš wirāyēd ēg dēn hazār dranǰišn nimāyēd ī =š hagriz az kas nē āšnūd
ud ka abāg dastwarān ud dānāgān uskārēd rāst
u =šān ēn =iz ōwōn dāšt kū
wīr kār ēd
tis xwāst
ud ōš kār ēd
ganǰwarīh kirdan ud tis ī wīr xwāhēd nigāh dāštan
ud xrad kār ēd
wizīdārīh kirdan ud weh ud wattar šnāxtan
ud ān ī weh griftan ud ān ī wattar hištan
u =šān ēn =iz ōwōn dāšt kū
harw tis ōy rāy bawēd kē rāy kunēnd
ud mizd ud pāddāšn az ōy abāz windēnd kē rāy kunēnd
ud mardōmān abēr tuxšāg bawišn kū tā kirbag kunēm kū tā_ =mān mizd az ohrmazd ī xwaday bawēd
čē kē mizd az ahriman ēg =iš mizd anāgīh
u =šān ēn =iz ōwōn dāšt kū
kē dānēd ēn and darag ī abar ēn nāmag nibišt ēstēd nigerīdan ud xwēš tan ud ōy ī did weh šnāsēd
u =šān ēn =iz ōwōn dāšt kū
tis ī mādayān ēn panǰ gōhr ud kālbod ud kirrōg ud ātaxš ud kadāmagān =iz gōhr
u =šān ēn =iz ōwōn dāšt kū mardōmān gōhr se ēwēnag
ēk hutōhmagīg ēk duštōhmagīg
ud ēk sidīg
ud ān ī hutōhmagīg ka =š ōh frahang awiš nē barēnd ēg =iz bawēd
ud ān ī duštōhmagīg ka =š was frahang abar barēnd ēg =iz nē bawēd
ud ān ī sidīg pad frahang weh ud wattar bawēd
pad frahang ī frārōn weh ud pad ān ī abārōn wattar bawēd
ast az =iš kē ān =iz ī frārōn frahang pad abārōnīh ō kār barēnd čiyōn ahlomōγān ōšmurišn ī dēn
u =šān ēn =iz ōwōn dāšt kū
nē handēšišn ud nē tarsišn rāy mard čār xwāyišn az abārōnīh
u =šān ēn =iz ōwōn dāšt kū
handēšišn ī mēnōyīg az druwandīh gāhānīgān
ud ān ī gētīyīg az dusrawīh hāda_mānsrīgān
ud tars ī az puhl ud pazd ī pādixšāy dādīgān
az wināh bē pāyēnd
u =šān ēn =iz ōwōn dāšt kū
mard bē ka pad mādayān tis wizōyīhēd ud šnāsīhēd ēnyā =š
ēwāz tuwāngarīh ud was_xwāstagīh rāy az wehīh bē nē ōgārišn
ud nē andak_xwāstagīh ud niyāzōmandīh rāy pad wehīh ōh stāyišn
čē ka mādayān nē wehīh ud wattarīh ī mard bē andak_xwāstagīh ud was_xwāstagīh kunīhēd
ēg andar gēhān bawēd kū was_abzār mardōm ī wad_čihrag pw w č_bāyist
ud wināhgār ud abārōn nām_kāmag kē ān nām_kāmagīh rāy xwāstag ī kam dārēd
ud ān ī niyāzōmand ka pad ahunsandīh ud āzār andar škōhīh zīyēd
ud ān ī wanīgar kē ān dārēd bē abesīhēnēd
ud ān aǰgahān kē xwāstag nē kunēd
ud anīz was_ēwēnag wadag mardōm stāyēd
ud ān ī angad xwāstag ud rād mard tar menēd
ud ōy ī škōh xwēš tan andar ōy ī angad wirāstag paydāg kunēd
ud ān āhōg ī =š ast kam bē wirāyēd
ud az ān bahr ōy ī angad ud rād mard ast ī pad ān ī hamē kunēd pašēmān bawēd
ud ōy kē ān stāyišn kunēd pad bahr ī xwēš rādīh az gēhān kāst
ud ān and āhōg ī andar gēhān stāyēd mehmān kird bawēd
u =šān ēn =iz ōwōn dāšt kū
kē zan ī šōyēndag marzēd/gāyēd ka =iz ōh wināh ī anābuhlagān andar nē bawēd
ēg =iz az kunišn ī ōy mard anāštīh ud dardagīh andar gēhān bē abzāyēd
ud pad anāštīh ud dardagīh ī az kunišn ī ōy mard andar gēhān bē abzāyēd
pad ān mard ōh tōzēnīdag
u =šān ēn =iz ōwōn dāšt kū
hupattūg bawēd pad astānag ud škeftīh ī awiš rasēd
čē abēastānag mard dēwān xwēš bawēd
u =šān ēn =iz ōwōn dāšt kū
tis =iz az dēn sūdōmandtar nēst
čē ān ī xwarrah ī dēn abar abganēd hagriz az mardōmān appār nē bawēd
u =šān ēn =iz ōwōn dāšt kū
kas =iz az tištar rādtar nēst
čē kas =iz nēst kē rādīh ōwōn weh ud abēragānīhā ud bowandag kunēd čiyōn tištar
u =šān ēn =iz ōwōn dāšt kū
pad hāmōyēn ēn dēn wāzag ī hamē ēk ēn kū
harw kas čim ī nē hamē ēkānag ud ān hamē ēkānag abāyēd pursīdan
u =šān ēn =iz ōwōn dāšt kū
kas =iz mardōm nēst kē az mād zāyēd u =š ēn šaš mēnōy abar nē kōšēnd
wahuman ud akōman
ud srōš ud xešm
ud spandarmad ud druz ī tarōmad
u =šān ēn =iz ōwōn dāšt kū
kē wahuman pad tan mehmān ēg =iš ēn daxšag kū
taftīg bawēd pad kirbag
ud hupaywand bawēd abāg wehān
ud hugar bawēd pad āštīh
ud waxšēnīd_yazadān ud ǰādag_gōw
xwad rād bawēd
ud kē akōman pad tan mehmān ēg =iš ēn daxšag kū
afsard bawēd pad kirbag
ud dušpaywand bawēd abāg wehān
ud dušwār bawēd pad āštīh kirdan
ud waxšēnīd_petyārag xwad pen bawēd
ud kē srōš pad tan mehmān ēg =iš daxšag ēn kū
andar harw gāh saxwan abāg šāyēd guftan
ud ka gōwēnd ōh niyōšēd
ud ka āhōg abāz gōwēnd padīrēd ud wirāyēd
ud kasān rāy drō nē gōwēd
ud ān ī abēwināh nē zanēd
ud ān ī wināhgār pad paymān zanēd
ud kē xešm pad tan mehmān ēg =iš daxšag ēn kū
harw gāh tis nē šāyēd abāg guftan
ud ka gōwēnd nē niyōšēd
ud ka kōdag =iz āhōg gōwēnd ēg =iš āhīd bawēd ud nē wirāyēd
ud kasān rāy drō was gōwēd
ud ān ī abēwināh was zanēd
ud kē spandarmad pad tan mehmān ēg =iš daxšag ēn kū
bowandag_menišn bawēd
u =š ka sārēnēnd nē sārīhēd
u =š ka was =iz pad xīr ī gētīyān bahr abar rasēd ēg =iz az xīr ī yazadān bē nē wardēd
ud kirbag pāddāšn az mēnōyān xwāhēd nē az gētī
ud kē druz ī tarōmad pad tan mehmān ēg =iz daxšag ēn kū
sabuk_menišn bawēd
u =š ka sārēnēnd sārīhēd
u =š ka andak =iz pad xīr ī gētī bahr rasēd ēg =iz az xīr ī yazadān bē ēstēd
ud kirbag pāddāšn az gētīyān xwāhēd nē az mēnōyān
u =šān ēn =iz ōwōn dāšt kū
ardwahišt haft māh pad gētī ud panǰ māh pad mēnōy
ud pad panǰ māh ka pad mēnōy andar tan ī urwarān mēnōyīhā nišīnēd
urwarān bun pāyēd parwarēd ud abzāyēnēd
ud pad ān panǰ mah urwar bē dahēd
ud pad ān haft māh ka pad gētī ō bērōn tan ī urwarān āyēd
ud urwar spīzēd ud wiškōbēd
ud bar dahēd
ēd rāy ka rapiϑwin ī ardwahišt yazad gāh andar sāl haft māh paydāgīh ud panǰ nē
u =šān ēn =iz ōwōn dāšt kū
kē harg ud ranǰ ī dēn ēwēn kāmīhā ō grīw padīrēd
ēg =iš ǰud az ān kirbag ī šāyēd dānist ēn =iz kirbag az =iš wēš bawēd kū
pad =iz wināh ī kunīhēdud bīm ī az ān harg ud ranǰ rāy bē ō mrčynk’nyh/mltynk’nyh ud anī wināh ī ēwēn ī kird ēstēd nē wardēd
čē pad bahr ī xwēš harg ud ranǰ ī andar gēhān nē wizīrēd bē ka barīhēd ō grīw padīrift ēstēd
u =šān ēn =iz ōwōn dāšt kū
harw kē pad gētī harg ud ranǰ ī pad ān ēwēnag ō grīw padīrēd
ēg ǰud =iz az kirbag ī az dīd ī ān harg ud ranǰ
pad mēnōy mēnōyān pad =iz =iš ī burd dārēnd ud az abārīg wināh ī kird ōgārēnd
u =šān ēn =iz ōwōn dāšt kū
būd kē ēn pursīd kū
kadām ān mēnōy kē mard az frārōnīh ō abārōnīh ud az abārōnīh ō frārōnīh barēd
ud hērbedān guft kū
ragīh
ud wehān pursīd kū
ragīh andar tan ī mardōmān čē ast dil/sar ayāb čašm ayāb gōš
ud hērbedān guft kū
ragīh =iz tis ī andar tan ī mardōmān
ud wehān nē dānist kū ragīh čē ast
ud pas dānāg mad hēnd kē pad =iš guft kū
ragīh pad harw mardōm kird ēstēd
čē ān ragīh ast kē ohrmazd xwānēd ud ahriman =iz xwānēd
ud ka kāmēd az pasī ohrmazd ī xwadāy šawēd
ud ka kāmēd az pas ī ahriman šawēd
u =šān pad gētī handāzag ēd guft kū
mardōm ān tis ī ǰuttar nē kāmēd kirdan
ka =š was weh ud was wattar ǰuttar kirdan awiš gōwēnd pas =iz ǰuttar nē kunēd
u =šān ēn =iz ōwōn dāšt kū
kē abar ān dō tis ēstēd kas nēst kē =š abāyist ō ēk
ud didīgar ēdōn bawēd kū =š nē tuwān dānist kū čiyōn weh ud frārōntar
čē az ēn dō ēwēnag ēk bawēd
ayāb xwad pad xrad ī xwēš ō dānišn rasēd
ayāb =iš dānāg ān awiš rasēd ī az =iš āgāh bawēd
u =šān ēn =iz ōwōn dāšt kū
ēn hērbedestān =ēw frāz gīrēd u =š abar tuxšāg bawēd
bē kunēd abēgumānīh ī pad dēn ī yazadān ēg =iš tuwān ruwān bōxtan
u =šān ēn =iz ōwōn dāšt kū
abar bōzišn ī ruwān pad hangirdīgtom tis ēn kū ōwōn kunēd kū yazad_yašt bawēd nē dēw
u =šān ēn =iz ōwōn dāšt kū
kē zan ī ’ww’č’y gāyēd pad tōm wanī kirdan ēraxt ēstēd
u =šān ēn =iz ōwōn dāšt kū
mardōmān ōšyār bawišn kū tā =šān bēš abar pādixšāy nē bawēd
čē kē bēš pad tan pādixšāy bawēd ēg akōman andar ō tan nišīnēd
ud čiyōn akōman andar ō tan nišast ēg wahuman az tan bē šawēd
ud čiyōn wahuman az tan bē šawēd ēg harw tis pad akōman wēnēd
akōman harw tis ān ī wattar nimāyēd
ud kē akōman parwānag ēg =iš rāh ō dušox
ud kē ō dušox šawēd ast ī abāz āyēd ud ast ī abāz nē āyēd
u =šān ēn =iz ōwōn dāšt kū
gētī amahrspandān pahrēz ī mahist ēn
ka =šān ān kas xwarēd dārēd ī pad ān ī xwarēd ud dārēd arzānīg
u =šān ēn =iz ōwōn dāšt kū
mardōmān kāmag ī tan abārīg tis ī gētī ī awiš rasēd
ka ō kāmag ī tan nē sāzēd pad ruwān sūdōmandtar
ēg čārag ēn abērtar ka ōwōn nimāyēd kū im rōz nē bē fradāg kunam
ud pas rōz ī didīgar ud az ān frāz ān tis pad ēmēd ī frāz ō pēš spōzēd
ud kē ōwōn ǰahēd kū =š tuwān rōz rōz pad ān ēwēnag spōxtan ud nē kirdan
ēg ān mardōm ka az ēn gēhān bē šawēd dēwān druzān abēr tund ud dušrām bawēd
ud ēn drāyēnd kū =š kirrōgīhā =iz kird ka amāh tis pad =iš nē tuwān būd kirdan
u =šān ēn =iz ōwōn dāšt kū
mehīh az was ud az ēd =iz paydāg kū
ēdōn ka andar gēhān asp ud gāw ud mēš ud buz ud abārīg sardag ī gōspandān
harw čē gušn meh mādag bar weh dahēd
ud čiyōn zarrēn ud semēn ud abārīg ayōxšustīg ǰāmag
harw čē pāktar ud anāhōgtar ēg =iš wāng xwaštar
ōwōn mardōm =iz kē pākīzagtar andar xīr ī yazadān ud anāhōgtar pad xwēš tan ud ōy ī keh weh dānēd dāštan
ēg =iš srōš wāng ī pahlom barēd ud pad mehīh arzānīgtar bawēd
u =šān ēn =iz ōwōn dāšt kū
panǰ ēn tis ī abēr nēk
ēn =iz ēdon
rādīh ud rāstīh ud mardābūgīh ud gōwāgīh ud frazānagīh
rādīh ēd bawēd kē tan bē ō yazadān dahēd ēwāz ruwān dōšāram ud dēn rāy
ud rāstīh ēd bawēd kē harw ī gōwēd ān gōwēd ī abāyēd guftan
ud ōwōn pad nigerišn gōwēd čiyōn ka =š yazad amahrspand wēnābdāg pēš abāz ēstēnd
ud mardābūgīh ēd bawēd āstawānīh
ud āstawānīh dēn pad tan ī xwēš mehmān kirdan ud druz az tan ī xwēš stōw kirdan
ud gōwāgīh ēd bawēd kē ōy kas rāy ǰādag_gōwīh kunēd ī ka =š ān nē ǰādag_gōw kas =iz ǰādag_gōw nēst
ud ān kas ruwān ī xwēš rāy ǰādag_gōwīh kirdan
frazānagīh ēd bawēd kē tis ān bun kunēd ī ō sar dānēd āwurd
u =šān ēn =iz ōwōn dāšt kū
kē pad ēn se paywand ud pad ēk wināhgār druwand bawēd
ēk paywand ī gēhān ud ēk paywand ī dēn ud ēk paywand ī fraškerd
paywand ī gēhān ēd bawēd ayārōmandīh ud wišād_darīh ī ēk abāg ōy ī did paywastan
paywand ī dēn ēd bawēd kē dastwar ī frārōn pad zamān gīrēd ud az dastwar bē nē wardēd
paywand ī fraškerd ēd bawēd kē zan pad zamān kunēd ud frazend xwāhēd ud paywand rāyēnēd
u =šān ēn =iz ōwōn dāšt kū
zan kē ēn and daxšag pad =iš ast nārīg bawēd
šōy_wirāyīh ud sūr_wirāyīh ud dar_pānagīh ud pšmwlyh
ud tan ī xwēš ud gyāg pāk dāštan
ud kē ēn and daxšag pad =iš bawēd ǰeh bawēd
ǰādūgīh ayāb zamanīh ayāb uzdēs_paristīh ayāb dušram_gōwišnīh ayāb rōspīgīh ayāb ǰud_wastarīh
ud tan ī xwēš ud gyāg pāk nē dāštan
u =šān ēn =iz ōwōn dāšt kū
kē may sagr xwarēd ēn and daxšag pad =iš bawēd ahlāyīh ast
ka rādtar ud wahuman_menišntar ud bowandag_menišntar ud dānāg_gōwišntar bawēd
u =šān ēn =iz ōwōn dāšt kū
ast ān kirbag ī kē ān kirbag pad =iš mehmān
ēg ān kirbag ī xwad kunēd ud ān ī andar gēhān kunēnd hāmōyēn xwēš bawēd
ud ān kirbag ēn hampursagīh ī wehān
čē az hampursagīh ī wehān mard yazad šnāsēd ud dēw =iz bē šnāsēd
ud ka =š yazad bē šnāxt hēnd hagriz az yazad bē nē wardēd
ud ka =š dēw bē šnāxt hēnd az pas dēwān nē bawēd
u =šān ēn =iz ōwōn dāšt kū
čē duzd kunēd warz =ēw ēn weh
kē pad xēm yazadān andar gēhān bē menēd
u =šān ēn =iz ōwōn dāšt kū
šnāyišn ī tan ī wehān rāmišn ud niyāyišn ī yazadān
ud mardōmān abēr tuxšāg bawišn
kū tā ēdar =iz abēzag bē bawēm
čē ka amāh pad gētī ēdōn bē bawēm kū yazadān abar tan ī amāh ō gētī āyēnd
pas tan =iz ī amāh rāmišn bawēd
u =šān ēn =iz ōwōn dāšt kū
hērbedestān kirdan bē nē hilišn
čē ka was sāl hērbedestān abar ēn wāzag =ēw kunēd kū
pad yazadān abēgumān bawēd kū yazad hēnd ud dēw nē hēnd
ēg =iz ohrmazd ī xwadāy puhl nē zanēd
u =šān ēn =iz ōwōn dāšt kū
abar ēn se tis abēr tuxšāg bawišn
abar rāstīh ud paymān ud wizīdārīh
ud az ēn se tis abēr bē wardišn
az drōzanīh ud awizīdārīh ud apaymānīh
u =šān ēn =iz ōwōn dāšt kū
pad ačār ud nē wizīrēd ast kē rāy wināh kunišn
ud pad wināh ī pad ačār ud nē wizīrēd kunišn dānistan abāyēd kū kadām
čē ēn čē ačār ud nē wizīred kē wyhyyt/pk ud wuzurgīh ud kāmag_rawāgīh ī pad xīr ī gētī nē rasēd ayāb rasēd u =š ačār bawēd
u =š anīz was anāgīh ī pad gētī rasēd
ud ačār ud nē wizīrēd tis ān bawēd ī ka ǰuttar nē kunīhēd
ēg =iš ēn bīm aziš kū tan ī xwēš zīndag ud druyist dāštan nē tuwān
ud wināh ī pad ačār ud nē wizīrēd kunišn ān nē anābuhlagān ēnyā
wināh ī anābuhlagānīh pad =iz ačār ud nē wizīrēd nē kunišn
u =šān ēn =iz ōwōn dāšt kū
kāmag frārōn bē kunišn ud pas gōwišn =iz ud kunišn =iz ī šāyēd abāg kāmag frārōn dārišn
ud kē ōwōn kunēd ka =š ǰahēd ēn farroxīh kū pad =iz gōwišn ud kunišn tis ī ǰuttar pēšār nē bawēd
ēg pad ahlaw dārišn
ud ka =š ōwōn ǰahēd kū tis ī ǰuttar pēšār bawēd ēg =iš pad petīt bawišn
ud pas =iz yazad ōy mard ī pad ān ēwēnag pad āmār ī mēnōyān pad dēwān nē hilēnd
bē ēn gōwēnd kū amāh xwēš
čē ān mēnōy ī amāh dād ēg =iš amāh menīd ud burzīd hēm
ud wināh ōy druz kird ī tō dād
u =š pad ān čim ud bōzišn bē ō xwēš nayēnd
u =šān ēn =iz ōwōn dāšt kū
mēnōy_wurrawišnīh was_ēwēnag
ud ēn =iz mēnōy_wurrawišnīh bawēd
kē mēnōy pad ēd =iz wurrawēnd
kū =šān nēkīh ī gētī bē ō mardōmān dād tuwān
u =šān nēkīh ī gētī aziš xwāhēnd
u =šān ēn =iz ōwōn dāšt kū
tan ī mardōmān mādayān tis gōhr ud pas abārīg abzār
ud abzār pad ēd kār andar abāyēd čānd gōhr paydāg kunēnd ud bē ō kār āwarēnd
u =šān ēn =iz ōwōn dāšt kū
tis nēst ī dušwārtar šāyēd šnāxtan kū gōhr ī mardōmān kū nēk ayāb wad
čē was ān mardōm kē gōhr ōwōn wināhīd wišuft ēstēd kē
pad =iz abēr kōdag dādestān abzār ud frahang was andar abāyēd
tā ō paydāgīh šāyēd āwurdan kū nēk ayāb wad
ud ān ī was ān ī xwār uzmūdan ud dānistan
u =šān ēn =iz ōwōn dāšt kū
gōhr ī mardōmān tis =ēw ēn abērtar šayēd šnāxtan kū
ka frahang abar barīhēd pad tis ī frārōn āšnāg kunīhēd wābarīgānīh dahīhēd
kirbag kunēd ayāb wināh
ud ka pad uzmūd ēg gōhr paydāg bawēd
u =šān ēn =iz ōwōn dāšt kū
mard ka pad dēn ī yazadān ēstēd ēg =iš yazad ranǰagīh ī andar ēn gēhān wēnēd
tā =iz bē ō ranǰ ī āmad ī pad pāy warzišnīh pad dast abar dādīhā zīyēd
anāsānīh gursagīh =iz ud tišnīh ud andōh wēmārīh ī awiš rasēd pad āmār ī mēnōyān pad =iz =iš barēnd dārēnd
u =šān ēn =iz ōwōn dāšt kū
wehīh ī wehān ōy abāyēd kē wehīh pāddāšn kunēd
gētī wehīh ān az weh kāmag
u =šān ēn =iz ōwōn dāšt kū
mardōmān čahār tis abēr nēk
ēn =iz ēdōn
hōm_xwārišnīh ud may_xwārišnīh ud kustīg_barišnīh
hōm_xwārišnīh ēd ka abar hāwan ēstēd
ud may_xwārišnīh ēd ka abar āštīh ēstēd
ud kustīg_barišnīh ēd ka az wattarān ǰud bawēd
u =šān ēn =iz ōwōn dāšt kū
wehān ast ī pursīd kū parwand ī tan čē ud parwand ī ruwān čē parwand ī xwarrah čē
pōryōtkēšān guft kū
parwand tan anhanbasānīh
ud parwand ī ruwān awināhīh
ud parwand ī xwarrah pēš_niyāyišnīh
u =šān ēn =iz ōwōn dāšt kū
mardōmān and tis ī pahlom
ēn =iz ēdōn
ōbārīh ud wīdwarīh ōbārīh ud nang ōbārīh ud wizīdārīh
ud kirbag pāddāšn az mēnōyān xwāstan
ud hāwištīh kirdan
čē andar ēn tis tis =ēw ēn weh hāwištīh kirdan
čē harw ān =iz panǰ pad hāwištīh kirdan šāyēd šnāxtan
u =šān ēn =iz ōwōn dāšt kū
ka mard dō pad wehīh hamtāg hēnd
ud ēk wēš wurrawēd kū ān ī did
az ēd ī ka āgenēn ǰud_gōhr hēnd bē
ēd bē abāyēd nigerīdan kū čē rāy ēdon
čē ka nē nigerēd ēg =iš xīr ī mēnōy padiš bē kāhēd
ēd rāy čē ān ī did kam menēd
u =šān ēn =iz ōwōn dāšt kū
ǰastag mard xwad kunēd
čē agar mard kunišn frārōn ēg =iš yazad abar rasēnd
ud ōwōn dārēnd čiyōn ān ī pad ōy mard nēktar
u =šān ēn =iz ōwōn dāšt kū
mardōmān haft tis ī pahlom
ēn =iz ēdōn
husrawīh ud ahlāyīh ud ābādīh ud xwadāyīh ud pādixšāyīh ud druyistīh ud šnāyišn
husrawīh ēd bawēd kē bāstān dar abar wehān wišād dārēd
ahlāyīh ēd bawēd kē kirbag ruwān rāy kunēd
ābādīh ēd bawēd kē dāšn ō wehān ud arzānīgān kunēd
xwadāyīh ēd bawēd kē tan az wināh kird abāz dārēd
pādixšāyīh ēd bawēd kē dārišn ī wehān ud arōyišn ī wattarān kunēd
ud druyistīh ēd bawēd kē tan ud ruwān az anōdag ud ǰud_gōhr ǰudāg abāg xwēš hamgōhr ham dārēd
šnāyišn ēd bawēd kē pad nēkīh ī mad ěstēd mēnōyān ud yazadān bowandag menēd
u =š yazad šnāyišn ī nē mad ēstēd abar ōy barēnd
ud anāgīh ī abar mad ēstēd az =iš bē barēnd
u =š bāstān az anī nēk āyēd
u =šān ēn =iz ōwōn dāšt kū
mardōmān tis =ēw ēn pahlom
mardōm_dōstīh ud āšt_xwāhīh
ud rāstīh ud xwēšāwand_dārīh
bowandag_menišnīh ud ēr_tanīh
ud rādīh ud huspāsīh
ud hampursagīh ud paymānīgīh
ud dād ī ohrmazd mardōm_dōstīh
ud dād ī wahuman āšt_xwāhīh
dād ī ašawahišt rāstīh
ud dād ī xšahrewar xwēšāwand_dārīh
dād ī spandarmad bowandag_menišnīh ud ēr_tanīh
ud dād ī hordad rādīh ud huspāsīh
ud dād ī amurdad hampursagīh ud paymānīgīh
u =šān ēn =iz ōwōn dāšt kū
mardōmān ēn and tis ī abēr nēk
ēn =iz ēdōn
dēn ud xēm ud xrad hunar ud xwarrah
u =š ka abzār ī xwēš nē abāg ō tis =iz mar nē rasēnd
dēn abzār ēd bawēd kē āstawān
ud āstawānīh ēd
kē dōst ī huxēm ī pāk ī weh_mard =ēw pad tan ī xwēš pādixšāy kunēd
ud gōwēd kū
āhōg čē dānē gōw tā wirāyēm
ud čē gōwēd tēz ud pad kāmag niyōšēd ud framān_burdār bawēd
xēm abzār ēd bawēd
hōg ī frārōn
ud abāg wehān raftan
ud wehīh az harw kas griftan
ud wattarīh az harw kas =iz nē griftan
xrad abzār ēd bawēd
dārišn ud tarsagāhīh ī wehān
hunar abzār ēd bawēd
xwēš_kārīh ud tuxšāgīh
xwarrah abzār ēd bawēd
rāstīh ud humihrīh
u =šān ēn =iz ōwōn dāšt kū
mēnōyān yazadān se tis ī abēr nēk
ēn =iz ēdōn
dōšāram tarsagāhīh ud ēmēdag
u =šān ēn =iz ōwōn dāšt kū
mardōmān abzār dō ēn pahlom
xwad weh būd ud ōy ī did weh kirdan
u =šān ēn =iz ōwōn dāšt kū
mehān ud pādixšāyān dō tis pahlom
ēn =iz ēdōn
dārišn ī wehān ud arōyišn ī wattarān kirdan
u =šān ēn =iz ōwōn dāšt kū
ēkānag tis ēn weh
āškārīh ī pad menišn ud gōwišn ud kunišn
ēd rāy čē wināh ī pad nihān kunīhēd nē kirbag
u =šān ēn =iz ōwōn dāšt kū
ruwān pad čahār tis abēr šayēd bōxtan
ēn =iz ēdōn
pad spāsdārīh ud nihādagīh ud waran_waštārīh ud āhōg_ōgārīh
u =šān ēn =iz ōwōn dāšt kū
ruwān pad hōg ī frārōn
ud xwāstag pad spihr
ud hunar pad tuxšāgīh
u =šān ēn =iz ōwōn dāšt kū
pad dēn ēn_ōwōn uskārd
ēk dōšāram yazadān
ud ēk dōšāram dahībedān
ud ēk ēn kē tan andar āmār ud rāmišn ud az wināh pāk dārēd
ud ēzišn ī yazadān pad škōyišn ud dastwar kunēd
u =šān ēn =iz ōwōn dāšt kū
kē az māndag garzēd ohrmazd ī xwadāy ud amahrspandān ud dahībedān ud ahlawān ud wehān kē zād kē zāyēd āfrīn kunišn
ahriman ud dēwān ud wattarān nifrīn kunišn
u =šān ēn =iz ōwōn dāšt kū
ohrmazd ī xwadāy pahlomtom xēm ud dēn dād
kē xēm nēst ōy dēn nēst
ud kē weh_dōstīh nēst ōy wehīh nēst
kē wehīh rāy wehān dōst ōy wehīh ast
¬
u =šān ēn =iz ōwōn dāšt kū
kāmēd ud xwarrahōmand bawēd xwaršēd gōwizār ēw yazēd
kē kāmēd kū yazišn ī kunēd ō yazadān abērtar rasēd dast pāk ēw šōyēd
ud xwēš tan ud wastarg pākīzagīhā ēw dārēd
ud kē kamēd kū čē =š az yazadān xwāhēd abērtar windēd yazišn ī yazadān gōwizār ēw kunēd
ud kē xwāhēd kū andar hanǰaman saxwan weh rasēd abestāg ī pad čamišn gōwizār ēw gōwēd
u =šān ēn =iz ōwōn dāšt kū
kē škeftīh ī mad ēstēd ud ān =iz kē nē mad ēstēd rāy andar yazadān tarsagāy bawēd
ān kē mad ēstēd aziš bōzēnd
ud ān kē nē mad ēstēd fradom awiš nē rasēd
u =šān ēn =iz ōwōn dāšt kū
andar zīndagīh ī mardōmān šnāyišn ī weh
andar šnāyišn tan_druyistīh weh
didīgar xēm weh
ud andar xēm āstawānīh ī abar rāst dēn ī weh
sidīgar xrad weh
ud andar xrad burdīh ud nihādagīh weh
čahārom tuwānīgīh weh
ud andar tuwānīgīh hunsandīh ud arzānīgīh weh
panǰom rāmišn weh
ud andar rāmišn zan ī kadag_bānūg ī tarsagāy ud šōy dōst weh
šasom dōstīh weh
ud andar dōstīh ēkānagīh weh
haftom rādīh pad rāstīh weh
ud andar rādīh ī pad rāstīh meh_sūd_dahišnīh weh
haštom ǰud =iz az bōzišn ī xwēš ruwān abar bōzišn ī ruwān ī kasān tuxšīdan weh
ud andar kirbag kirdan az wināh pahrēxtan
kirbag ī meh_dādestānīhā abērtar kirdan
ud az wināh ud az wināh grāyīd wēš pahrēxtan weh
dahom nēk_ _frazāmīh weh
ud andar nēk_frazāmīh bōzišn ī ruwān az dušox weh
u =šān ēn =iz ōwōn dāšt kū
ahlomōγīh az =iz zamān abēr bē pahrēzišn
ud ōy =iz ī abēr nigerīdār ud dānāg mard wistāx nē bawišn kū =m ādug hēnd bastan
čē ēn xāk ī ōwōn xwurd ud narm hāmōyēn az sag ī saxt ī stabr bē kird ēstēd
u =šān ēn =iz ōwōn dāšt kū
druz pad kadag ī xwēš xwāyišn nē pad ān ī kārān
čē kē pad ān ī xwēš xwāhēd windēd
ka =š kāmēd tuwān az kadag bē kirdan
ud kē pad ān ī kārān xwāhēd nē windēd
u =šān ēn =iz ōwōn dāšt kū
druz az ān gyāg bē kunišn ī ka az ān gyāg bē kird
az hamāg ēn gēhān bē kird bawēd
ud yazad =iz pad ān gyāg mehmān kunišn hēnd ī ka pad ān gyāg mehmān kird
pad hamāg ēn gēhān mehmān kird hēnd
ud ān gyāg ēd tan ud dūdag ī xwēš
u =šān ēn =iz ōwōn dāšt kū
kas gyāg ēw nay abar ēstēd pad wirāstan
ud ka ān gyāg ēw nay wirāst ēg =iš hamāg gēhān wirāst bawēd
ud kē ān gyāg ēw nay nē wirāst ēg =iš tis =iz gyāg ī wirāstag nēst
u =šān ān gyāg ēw nay tan ī xwēš guft
u =šān ēn =iz ōwōn dāšt kū
mardōmān čahār tis ī abēr nēk
ēn =iz ēdōn
nān ī xwēš ud saxwan ī xwēš ud kār ī xweš ud zan ī xwēš
nān ī xwēš ēd bawēd
kē bahr ī xwēš xwarēd ud dārēd ōwōn xwarēd ud dārēd čiyōn kār kunēd
saxwan ī xwēš ēd bawēd
kē ruwān ī xwēš ǰādag_gōw
kār ī xwēš ēd bawēd
kē abāg druz ī xwēš kōšēd nē abāg druz ī kārān
čē ardīg_kāmag bawēd kē abāg druz ī kārān kōšēd
ud zan ī xwēš ēd bawēd
kē pad harw ahlāyīh hamkāmag
u =šān ēn =iz ōwōn dāšt kū
kē ēdar abāg wehān ānōh abāg yazadān
ud kē ēdar abāg wattarān ānōh abāg dēwān
ud ēdar abāg wehān ud wattarān būd ēd būd ī guft
kē pad menišn ud gōwišn ud kunišn abāg ham
u =šān ēn =iz ōwōn dāšt kū
ohrmazd ī xwadāy harw zīndag mardōm pad ēn and tis andar ōh abāyēd
pad gung ud wāng wēnišnīh ud madagīh
u =šān ēn =iz ōwōn dāšt kū
ohrmazd ī xwadāy harw dām ēn =iz dō sūd rāy dād
ēbgad pad =iš abesīhēnīdan
gugāyīh ī xwēš rāy
u =šān ēn =iz ōwōn dāšt kū
andar harw gāh kāmag ī xwēš bē wizīnišn
abāg ān tis ī andar šahr pad frārōnīh ud abārōnīh ēwar kird ēstēd bē handāzišn kū
frārōn_kāmag ayāb abārōn_kāmag ham
u =š ādūg_kāmag ī xwēš frārōn hamgōnag abar estišn
ud agar ǰuttar ēg az =iš bē wardišn
u =šān ēn =iz ōwōn dāšt kū
harw kas xwāyišn xīr ī yazadān
čē harw kē xwāhēd windēd
u =šān ēn =iz ōwōn dāšt kū
ēn and tis abēr nigāh dārišn
mard ī husraw
rōz ī husraw
ud kār ī husraw
u =šān ēn =iz ōwōn dāšt kū
ahlāyīh daxšag =ēw ēn abērtar paydāg
husrawīh wēš
u =šān ēn =iz ōwōn dāšt kū
harw kas az husrawīh wēš gōwēnd kū ān ī pad kunišn wehīh paydāg
az ēd bawēd ka frārōnīh čand tuwān kunēd
u =š pad kāmag ōwōn kū =m kāč wēš tuwān hē
ud harw mardōm kē dusrawīh wēš gōwēnd kū ān ī pad kunišn wattarīh paydāg
az ēd bawēd kū anāgīh čand tuwān kunēd
u =š pad kāmag ōwōn kū kāč wēš tuwān hē kirdan
ud pad hanǰaman ī mēnōyān ōy mardōm ī pad ān ēwēnag ān nēkīh ud anāgīh ī =š nē kird kāmag rāy kird hangārēnd
ud andar gēhān pad dahān ī mardōmān bē srāyēnd
u =šān ēn =iz ōwōn dāšt kū
pad handarz ō mardōmān ēdōn guft ēstēd kū
driyōšīh pahlom ud pad mayān kunēd
u =š saxt abar driyōšīh pahlom tis
ud kē nē ačārīh bē ēwāz wehīh ud burzišn ī driyōšīh rāy pad driyōšīh nē ēstēd
ōy ahriman abāg māzanīgān az gēhān bē kird bawēd
harw kirbag ī andar gēhān pad ōy dārišn šawišn čiyōn rōd ī hamēšag nāw
ēd =iz ōwōn kū
pad driyōšīh ōy ul tuwān ēstād kē pad čē pad ēn tan andar abāyēd
az ān ī xwār_mādītar rāmišn wēš kū az ān ī wēš_mādītar
ud kē ōwōn kunēd ōy pad driyōšīh farg tuwān ēstād
ud kē ǰuttar kunēd ōy az driyōšīh ym’n bē kird bawēd
u =šān ēn =iz ōwōn dāšt kū
āzād_mardīh ēd bawēd kē tuwān_abzārīh gētī padēx bowandag ud andar kār ud sūd dārēd
ud dānēd xwarēd dahēd tuwān_abzār ī ōy rāy
kasān nē anāg bē pad čē rasēd driyōšān ǰādag_gōw u =šān nēkīh pad =iš kunēd/gīrēd
ōy ī driyōš ōh burzēd ī ōwōn kunēd kū harw mardōm čašmagīh ud xwāstag_tuwānīh ōy rāy wišād ud pad xwēš dārēnd
ud wistāx hēnd kū agar =imān anāgīh ud škeftīh awiš rasēd ēg ān ī čārag xwāhēd bē barēd
u =šān ēn =iz ōwōn dāšt kū
driyōšīh ēd bawēd kē tuwān ī xwāstag ī gētī rāy tan padēx bowandag
ox az =iš āhangīg menišnīg pad =iš hunsand ud widang nē andar bawēd
ud andar ōy ī čašmag tuwānīg nē tar_menišn
bē ōwōn kunēd kū abāg čašmagīh ud tuwānīgīh ī ōy driyōšīh ī man pas =iz ān ham kū an ham
u =šān ēn =iz ōwōn dāšt kū
karbīh ēd bawēd kē tuwān_abzār ī gētī ud bowandag mad ēstēd
apaymānīhā xwarēd dārēd
čašmagīh ud tuwānīgīh ōy rāy kasān anāg andar ōy ī driyōš
ud hunsand mardōm tar_menišn u =šān xwār ud sabuk kunēd
driyōšīh pad anāgīh dārēd
mardōmān ēn ēmēd awiš nēst kū agar =imān anāgīh ud škeftīh awiš rasēd
ēg ān čārag xwāst bē barēd
u =šān ēn =iz ōwōn dāšt kū
škōhīh ēd bawēd kē tuwān xwāstag ī gētī bowandag nēst
pad =iš anhunsand xwēš tan pad dušfarg dārēd
ud andar ōy ī tuwānīg čašmag tar_menišn
xwad hamēšag ō čašmagīh ud tuwānīgīh kōšēd
u =šān ēn =iz ōwōn dāšt kū
petyārag čahār ast
dō āzād_mardān tuwānīgān
ud dō ī driyōšān kam_tuwān_xīrān
ka ān petyārag nē hē
āgenēn pad kirbag hamtāg bawēnd āzād_mardān driyōšān
petyārag ī āzād_mardān ud tuwānīgān
ēk driyōšīh nē burzīdan
ud ēk driyōšān must nē wizārdan
ud ān driyōšān
ēk tar_menišnīh rāy nē hamōxtan ī mehān pad tis ī ruwān
ud ēk gilag_menišnīh
u =šān ēn =iz ōwōn dāšt kū
agar driyōšān ēn tis =ēw bē wirāyēnd
tar_menišnīh ī andar mehān tuwānīgān
ēg pad sadōzim =ēw ēk ō dušox nē rasēd
u =šān ēn =iz ōwōn dāšt kū
andar ēn gēhān kas =iz nēst kē xwadāyīh ud xwāstag āzarmīg
ān ī farrox pad frārōnīh
ud ān ī dušfarg harw rāh abāyēd
u =šān ēn =iz ōwōn dāšt kū
xīr ī gētī apaymān nē ārāyišn
čē gētī_a_paymān_ārāy mard mēnōy_wišōb bawēd
u =šān ēn =iz ōwōn dāšt kū
xīr ī gētī and ārāyišn čand xīr ī mēnōy nē wišōbēd
u =šān ēn =iz ōwōn dāšt kū
xīr ī [K43_202 bis r] gētī ōwōn pad āwām kunišn čiyōn ka dānē kū hazār sāl zīyam
ud čē im rōz nē kunam ēg =iš fradāg kunam
ud tis ī mēnōy ōwōn hamēšag menišnīhā ud tuxšāgīhā kunišn čiyōn ka dānē kū ēk rōz zīyam
ud čē im rōz nē kunam ēg =im pas nē tuwān kirdan
u =šān ēn =iz ōwōn dāšt kū
pad xīr ī gētī wēšīgān wistāx ud ruzd nē bawišn
čē xīr ī gētī kas =iz bowandagtar nē bawēd kū yim
ud yim =iz harw rōz ī raft kam būd
ud abdom hāmōyēn xīr ī gētī az =iš appār
ud abestān ēwāz ō ruwān būd
u =šān ēn =iz ōwōn dāšt kū
ēn se xēm garōdmānīg
ēk ēn kē ka was =iz zyān ud anāgīh az kas dīd ēstēd
ēg =iz ōy mard dušmen ud anāgīh_kāmag nē bawēd
ud ēk ēn kē xwarišn =ēw pēš mad ēstēd ud wēš nēst
ud frāz ō pēš ēmēd nē dārēd kū =m awiš rasēd
agar =iš mard kē fradom xwarišn nēst awiš rasēd ēd pih čiyōn šāyēd bahr kunēd
ud ēk ēn ka zan =ēw mard =ēw pad wiškar gyāg mad ēstēnd
u =šān xwarišn xward sagr ud hurām ēstēnd
u =šān ēk ō did abēr kāmag bawēd
ka kāmag bē rāyēnēnd ēg =iz kas =iz nē dānēd
ud ōy mard ān zan ēwāz ruwān rāy nē gāyēd
u =šān ēn =iz ōwōn dāšt kū
xēm ān bawēd kē wināh nē kāmēd kirdan
ud xrad ān bawēd ī ka kāmēd ēg =iz nē hilēd
ān =iz xēm bawēd kē ān ī nē dānēd nē gōwēd
ud ān =iz xrad bawēd ī ka nē dānēd ōh pursēd
u =šān ēn =iz ōwōn dāšt kū
yazad harw kas =ēw pad tis ī xwēš ēmēd awiš dārēnd bē ōy kē xrad nēst
u =šān ēn =iz ōwōn dāšt kū
kē xwadāyīh ud xwāstag xwāhēd ud awiš rasēd andar sūd ud nēkīh ī mardōmān dārēd
ān yazadān andar gēhān pādixšāy kunēd
ud kē pad driyōšīh ud hukārīh ī ul ēstēd padiš pad_rāmišn
ān yazadān ō gēhān ēstēnēd
u =šān ēn =iz ōwōn dāšt kū
mard kē kaygīh ud karbīh andar nēst ēg čand xwadāytom weh
u =šān ēn =iz ōwōn dāšt kū
kōdag kirbag wēšīgān nē kunišn
čē kē kōdag kirbag wēšīgān kunēd ēg wuzurg kirbag az =iš appār bawēd
u =šān ēn =iz ōwōn dāšt kū
ahlomōγīh daxšag ēw
kē wuzurg kirbag kōdag kōdag kirbag wuzurg uskārēd
u =šān ēn =iz ōwōn dāšt kū
kirbag ī kōdag nihumb ī bazag
čē stabr bazag ī kunīhēd kōdag kirbag rāy kam paydāg
ō wirāyišn kam rasēd
u =šān ēn =iz ōwōn dāšt kū
was ān kirbag ī ōwōn kōdag ī ka abēr abzār mard =ēw bē kunēd pad =iš ahlaw nē šāyēd būd
ud wāzag ān ī ōwōn wuzurg ī ka ēk mard =ēw kunēd ēg pad =iš ahlaw bawēd
ud abāg mardōmān abēr tuxšāg abāyēd būd kū tā =mān kirbag ī wuzurg xwēš bawēd
u =šān ēn =iz ōwōn dāšt kū
harw kas ox ēw ast
ud ka ōy kas ox druyist ud abēwizend ēstēd
ēg ān tispad mayān
ud ka ǰuttar ka =iz tis ī abērēman ud abēr xūb gōwēd ud kunēd
ēg ān tis wišuft bawēd
u =šān ēn =iz ōwōn dāšt kū
dēn ahū zarduxšt
ahlāyīh ahū mānsr
ud ērīh ahū dahībedīh
u =šān ēn =iz ōwōn dāšt kū
harw tis zrēy =ēw ast
dānišn zrēy xēm
ud rōšnīh zrēy xwaršēd
ud āb zrēy wōrukaš –
ud ruwān zrēy ox
u =šān ēn =iz ōwōn dāšt kū
abēr xwāyišn dōst ī pad dēn
čē dōst ī hamē abāg ān ī pad dēn dōst
čē ān kē pad dēn dōst ēdar ud ānōh harw dō abāg
u =šān ēn =iz ōwōn dāšt kū
harw kas dēn ān kē pad =iš wurrawēd tan bē abespārdan
ud bē nigerišn andar kāmag ī xwēš kū ān tis kē tan_abespār pad =iš wurrawēd kirdan čē
ud dēn čand tis andar kē tan_abespār pad =iš kunišn
ud ōy kas pad dēn ōstīgān kē pad harw tis ī tan_abespār pad =iš kunišn ka rasēd tan abespārēd
ān and tis kē tan_abespār pad =iš kunišn wināh ī anābuhlagān nē kirdan
ay kē dēn ud zan ud frazend ud ahlawān hērbedān abārīg wehān rāy ka rasēd tan abespārēd
u =šān ēn =iz ōwōn dāšt kū
pad ēn dēn wāzag =ēw ī abēr mādayān
ēn =iz ēdōn
abēgumānīh ī pad dēn yazadān
ud abēgumānīh pad dēn ī yazadān ēd kē agar bazag pad bazag bē brīnēnd
ēg =iz az xīr ī yazadān bē nē ēstēnd
u =šān ēn =iz ōwōn dāšt kū
ka mard =ēw hazār mardēn bē kunēd ud pad =iš abaxš ud pad petīt hē ud ōwōn gōwēd kū
pas =iz ahriman xwēš nē bawam bē ōwōn kunam kū ohrmazd xwēš bawam
ēg ahriman kam pad xwēš dārēd ud kam ō xwēš tuwān hē kirdan
čiyōn mard =ēw wināh =ēw ī abēr xwurdag pēšār bawēd
ud ōy wināh rāy ēn kirbag stōw bawēd
ud gōwēd kū
man nūn kirbag čē
ka pas =iz ahriman xwēš ham
u =šān ēn =iz ōwōn dāšt kū
mard =ēw hāmōyēn mardōm ī andar ēn gēhān pad druwand
bē xwēš tan nē pad druwand bē pad ahlaw
ud ōwōn dārēd kū ohrmazd xwēš ham
ēg ahriman kam ō xwēš barēd
čiyōn mard =ēw ī ačār andak_wināh ī xwad gōwēd kū an druwand ham
čē pad gētī ka was =iz mard pad wattarīh mard =ēw hamēmāl hēnd
ēg =iz hagriz wattarīh ī ōy kas ēdōn spurrīg nē šāyēd dānist
čiyōn ka mard =ēw xwad wattarīh ī xwēš gōwēd
u =šān ēn =iz ōwōn dāšt kū
kē pad zyān ud anāgīh mad ud ōy did az yazadān āyaft xwāstār bawēd
ēg mēnōy_wurrawišnīhā
ēd rāy čē agar =iz kār adānīhā ud nē frārōn
ēg =iz yazad wurrawēnd kū =šān tis ī weh ud wattar tuwān kirdan
u =šān ēn =iz ōwōn dāšt kū
ēn andak ud was
ud nazdīk ud dūr
ud xwār ud dušwār
ud ān ī frazānag weh dānēd
u =šān ēn =iz ōwōn dāšt kū
rāh ī ō garōdmān dēn paymān
ka ohrmazd ān rāh wirāst ēg =iš ahriman dō rāh abāg frāz nihād
ēk frāybūd ēk aibībūd
u =š ēn harw dō tā ō tam wirāst
ud az ān wēš nē tuwān wirāstan
u =šān ēn =iz ōwōn dāšt kū
farrox ōy mard kē pad rāh ī šāh rawēd
čē kē =iz abēr nihānīhā rawēd ēg =iz pad zamān ō xān rasēd
ud dušfarg ōy mard kē pad rāh ī abērāh rawēd
čē čand tuxšāgīhātar ēg ō xān dūrtar
ud rāh ī šāh dēn ud xān wahišt
u =šān ēn =iz ōwōn dāšt kū
ruwān paymān tuwān nē tuwān
xwāstag paymān wizīristan ud nē wizīristan
u =šān ēn =iz ōwōn dāšt kū
wizīristan ud nē wizīristan tis ud kasīhā wardēd
ast ī nē wizīrēd bē ka weh_sazag ud astgen ud zarrēn ud asēmēn ud abārīg xwāstag bowandag dārēd
ast kē wizīrēd ka tar gāw ēw_tāg ārzōg =ēw frāz nē šawēd
u =šān ēn =iz ōwōn dāšt kū
dēn hāmōyēn wizīristan nē wizīristan
čē wizīrēd ka wināh nē kunēnd
ud nē wizīrēd bē ka kirbag kunēnd
u =šān ēn =iz ōwōn dāšt kū
pad =iz xwāstag kirdan tis =ēw ēn weh
kē tuxšāg hangār hunsand bawēd
u =šān ēn =iz ōwōn dāšt kū
mardōm čahār ēwēnag hēnd
dō uzmāyišn
ud dō nē uzmāyišn
ān dō ēwēnag uzmāyišn
ēk ān ī abāg wehān weh ud ēk ān ī abāg wattarān wattar
čē šāyēd bawēd ka ān kē abāg wehān būd ēstēd ka ō wattarān rasēd wattar
ud ān kē abāg wattarān būd ēstēd ka ō wehān rasēd weh
ud dō ēwēnag ī nē uzmāyišn
ēk ān ī abāg wehān būd ud pas =iz wattar
ud ēk ān ī abāg wattarān būd ud pas weh
u =šān ēn =iz ōwōn dāšt kū
mardōm tis ī abēr nēk hōg ī frārōn
čē hōg xēm bē bawēd ud xēm dēn bawēd
u =šān ēn =iz ōwōn dāšt kū
mard ān farroxtar kē ēn xīr ī gētī ī ēdōn frasāwand andar ō ān ī afrasāwand gumēzēd
kū ka az gētī sazēd pad mēnōy bawēd
u =šān ēn =iz ōwōn dāšt kū
pad dēn wāzag čahār ī abēr mādayān
ēn =iz ēdōn
ān ī wināhgār pad wināh nē āwēnīdan
ud ān ī drōzan_dādestān mard xwadāyīh ud xwāstag rāy nē burzīdan
ud kirbag pāddāšn az mēnōyān xwāstan
ud hāwištīh kirdan
ud mādagwar hāwištīh kirdan
čē ān =iz harw pad hāwištīh kirdan bē šnāsīhēd
u =šān ēn =iz ōwōn dāšt kū
ēn se wāzag ōstag wēš abāyēd kū hāmōyēn abestāg zand
ēk ān ī wināhgār pad wīnāh nē āwēnīdan
ud ēk ān ī drōzan_dādestān mard xwadāyīh ud xwāstag rāy nē burzīdan
ud ēk kirbag pāddāšn az mēnōyān xwāstan nē az gētī
u =šān ēn =iz ōwōn dāšt kū
kē wāzag ēw ī nē dānēd rāy gōwēd kū dānam
ēg ōy wāzag guharīg rāy hazār wāzag ī dānēd az =iš bē šawēd
u =šān ēn =iz ōwōn dāšt kū
ān kē nēst agar dānē kū nē ham hē
u =šān ēn =iz ōwōn dāšt kū
arzānīg bawišn čē farrox ān ī arzānīg ēnyā dēn dānēd kū tis kū ō kē barišn
čē harw dō dēn xwēš hēnd mēnōy ud gētī
ud weh_oxtar =iz bawēd ka tis ō arzānīgān dahēd
az spenāgīh ud dānāgīh ud šādīh ud ābādīh ud padēx ī pad dēn
u =šān ēn =iz ōwōn dāšt kū
andar tan ēw xēm wēš kū harw zāz ī pad kōf ud dašt andar =iz ān tan
ēg ān xēm ī ka ōy xēm pēšobāy kunēd ēg hāmōyēn xēm bē ō frārōnīh wardēd
u =šān ēn =iz ōwōn dāšt kū
mardōmān rāy dar wišād dārišn
čē kē mardōmān dar wišād nē dārēd ēg =iš mardōm ō xānag nē rasēnd
ud kē mardōm ō xānag nē rasēnd ēg =iš yazadān dārišn ō xānag nēst
ud kē yazadān rasišn ō xānag nēst ēg =iš xwarrah nē bawēd
čē mardōm az pas ī nān hēnd
ud yazadān az pas mardōm hēnd
ud xwarrah az pas ī yazad ast
u =šān ēn =iz ōwōn dāšt kū
abēr tuxšišn ō hamrasišnīh ud hamxwarišnīh ī abāg wehān
čē agar dānē kas kū čiyōn nēk hamrasišnīh ud hamxwarišnīh ī abāg wehān
ka tis ī ōwōn nē mad ēstēd ī ō wehān šāyēd dād
ēg =iz nān ī xwēš stānē ud andar ō wehān šawē ud abāg wehān bē xwarē
u =šān ēn =iz ōwōn dāšt kū
rāmišn ōwōn pad niwāzišn dārišn čiyōn rahīg ēw ī aburnāyīg
ud ōwōn abar tuxšišn kū hagriz rāmišn az tan bē nē šawēd
ud ka rāmišn ān tis xwāhēd ī =š ka ō kāmag sāzēnd wināh
ēg ān tis nē bē anī tis ī ka kunēnd rāmišn abzāyēd
ud nē wināh kunišn ud pas =iz rāmišn az tan bē hilēd
čē rahīg =iz ī aburnāyīg was ān ī ka ān tis xwāhēd ī ka =š ō kāmag sāzēnd wināh ī abēr stabr aziš bawēd
u =š pad guharīg ī ān tis ōwōn xwālēn tis čiyōn xurmāg ēw ayāb gōz ēw ayāb anī tis dahēnd
ud pad =iš hunsand ud pad_rāmišn bawēd
u =šān ēn =iz ōwōn dāšt kū
mardōmān ōšyār bawišn tā =šān rāmišn andar tan mehmān bawēd
čē xwāstan ud wizōstan andar dēn ud kirbag ān ī rāmišn nām
u =šān ēn =iz ōwōn dāšt kū
šnāyišn ān kē bēš az pas nēst
u =šān ēn =iz ōwōn dāšt kū
šnāyišn ī yazadān rāmišn ī tan ī wehān
u =šān ēn =iz ōwōn dāšt kū
tan andar rāmišn ud dast az wināh abāz dārišn
čē tan andar rāmišn ēg wahuman pad tan mehmān
čiyōn wahuman pad tan mehmān ēg wināh dušwār kirdan
ud az bēš abēr pahrēzišn
čē kē bēš andar ō tan hilēd ēg =iš akōman andar ō tan šawēd
kē akōman andar ō tan šawēd ēg tis ī frārōn dušwār kirdan
u =šān ēn =iz ōwōn dāšt kū
dō ī nēk
ēn =iz ēdōn
āhōg_wirāyīh ud waran_waštārīh
u =šān ēn =iz ōwōn dāšt kū
harw wehīh bar rāmišn
ud harw anāgīh bar bēš
u =šān ēn =iz ōwōn dāšt kū
rāmišn mādayān hunsandīh
ud bēš mādayān anhunsandīh
čē ka ohrmazd ī xwadāy pad nēkīh ī =š ast nē hunsand hād ēg =iš nē nēkīh hād
ud agar ahriman pad anāgīh ī xwēš nē anhunsand hād ēg =iš nē anāgīh hād
u =šān ēn =iz ōwōn dāšt kū
hunsand_xīrān anhunsand_xrad ud dānišn
u =šān ēn =iz ōwōn dāšt kū
mard kē mēnōy ī āz ārzōg ō tan rasēd u =š xīr ī gētī kāmag nimāyēd
ēg čārag ēn abērtar ka mard frasāwandīh ī tan xīr ī gētī ō xwēš nimāyēd
ud ēn menēd kū
hangār kū =m kird
bē čē kunam ka zūd bē hištan abāyēd
az nūn frāz nē kunam kū =m tā duššarmīh ī az ān bē ēstēd awiš nē rasēd
čē xīr ī gētī nē kird was xwārtar kū bē hištan
u =šān ēn =iz ōwōn dāšt kū
purr_xrad mard ān ī harw gāh frazām ī gētī ayād ēstēd
u =šān ēn =iz ōwōn dāšt kū
xwār xīr ī gētī
čē andar ēw rōz šāyēd būd
ka mard fradāg drust ud kārīgar ud dūr_ēmēd
ud pēš az šaš zaman wēmār ud akārag ud anēmēd ēstēd
ud pēš az šabān mīrēd
ud ast =iz ī rōz ī didīgar nē bawēd ka bē zamīg gumēxtēd xāk bawēd
mardōmān ōwōn handēšišn kū
šāyēd būd ka ān mard man ham
u =m pad ān ēwēnag awiš rasēd
ud pas =iz xīr ī gētī čē rāy frāybūdīhā abar tuxšēm
u =šān ēn =iz ōwōn dāšt kū
ka ēw drahm dārēd bē ān dārīhēd ī nē dārišn
ēg =iz abdom ān mard pad rēšišn ī kārān tōzēd
u =šān ēn =iz ōwōn dāšt kū
xwāstag and dārišn čand xwēš_kārīh pad =iš nē mānēd
u =šān ēn =iz ōwōn dāšt kū
pad ēw drahm ayāb nān =ēw šāyēd būdan
ka mard apaymān dāštan ī ān ēw drahm nān =ēw rāy bē ō marg_arzānīh rasēd
čē šāyēd būd ka ōy kē xwāstag ān ēw drahm nān =ēw az =iz ān ēw [K43_210r_next_201r_6 243] drahm nān ast ī bē frēbēd arzānīgīh rasēd
kē =š dāšn az =iš nē dahēd ud pad =iš ēraxtēd
u =šān ēn =iz ōwōn dāšt kū
mardōm se ēwēnag
ēk bōxt ēk anēraxt ēk ēraxt
bōxt ān kē tis az yazadān xwarēd ud pad kār dārēd
anēraxt ān kē az pas ōy kē tis āšnūd
u ēraxt ān kē az dastwarān bē wardēd
u =šān ēn =iz ōwōn dāšt kū
mardōm ēn se ēwēnag ō wahišt rasēnd
ēk ān ī dānāg ēk ān ī dānāg_ayyār ēk ān ī dānāg nē hamēmāl
u =šān ēn =iz ōwōn dāšt kū
mardōm ēn se ēwēnag
ēk gāhānīg ēk hādmānsrīg ēk dādīg
ōy ī gāhānīg hamīh abāg yazadān u =š wizīhīdagīh az dēwān druzān
u =š xwāstag paymān az šām ud sūr
ud pad wināh ī kunēd šarm ud āwēnišn pādifrāh
ud ān ī hādmānsrīg hamīh abāg ahlawān u =š wizīhīdagīh az druwandān
u =š xwāstag paymān ān ī frārōn kunīhēd
ud pad wināh ī kunēnd aštar ī srōšōčarnām ud xrafstar ōzadan
ud wad_axwān tōxtan pādifrāh
ud ān ī dādīg hamīh abāg ērān u =š wizīhīdagīh az anērān
u =š xwāstag paymān az ān dar kū dādīhā šāyēd kirdan
pad wināh ī kunēnd kūk zīyišn nihang rōz pādifrāh
u =šān ēn =iz ōwōn dāšt kū
farrox mard ruwān pahrēzēd
dušfarg nē ruwān bē tan pahrēzēd
u =šān ēn =iz ōwōn dāšt kū
ēn tan gawr bē kunišn nē čagād
abar gawr āb ī =š wārēd hāmōyēn abar pāyēd
ud ān =iz ī pad čagād abārīg kē =š bulandtar wārēd hāmōyēn az =iš bē šawēd
ud ān ī =š abar nē wārēd ēg =iš fradom awiš nē rasēd
u =šān gawr ēd guft weh_dōstīh
wehīh ōy ī did abāyēd pad xwēš dāštan
pad =iš pad_rāmišn būd
u =šān čagād ēd guft weh_dušmenīh
wehīh ōy did nē abāyēd pad xwēš nē dāštan
pad =iš bišt būdan
u =šān ēn =iz ōwōn dāšt kū
weh_dōst mard az hamāg ēn gēhān kirbag abar rasēd az ān ī xwad kunēd hammis
pad =iš ōwōn ul ēstēd čiyōn gawr āb ī abar wārēd ēd čē az anī gyāg awiš rasēd
weh_dušmenīh mard az hamāg ēn gēhān kirbag ōwōn nihang bawēd
čē ān ī xwad kunēd ōwōn az =iš bē šawēd
az abārīg gyāg ōwōn awiš nē rasēd čiyōn čagād āb
u =šān ēn =iz ōwōn dāšt kū
kē ēwāz yazadān ruwān rāy pad wurrawišn abar ul ēstēd
ōh =iz ān tis kē abar ul ēstēd nē dēn ud rāh ī yazadān
ēg =iz yazad kunēnd ēn =iz ābādīh pad =iš kū =š sar ō dēn ud ristag ī yazadān kunēnd
u =šān ēn =iz ōwōn dāšt kū
tuxšāg bawišn pad ahlāyīh ud hudār ud hubār bawišn pad xwarišn dārišn
čē ān =iz ī tuxšāgtom kirbagtom hudārtom ud andak_ōzagtar mardōm
ka ō āmār ī mēnōyān rasēd
ēg =iš kāmag ōwōn bawēd kū =m kam xward hē ud kam dāšt ud wēš kird hē
u =šān ēn =iz ōwōn dāšt kū
harw kas ēwēnag dō bē kunišn ud andar nigerišn
u =š andar ēk =ēw āhōg ī xwēš nigerišn čand tuwān pad wirāyišn abar tuxšišn
u =š andar ān ī didīgar wehīh ī kārān nigerišn ud pad xwēš dārišn
pad =iš pad_rāmišn bawišn u =š abar hammōxtišn
u =šān ēn =iz ōwōn dāšt kū
ruwān ī mardōmān hagriz abar gyāg ēw nē ēstēd čē ēwāz hamē abzāyēd ayāb hamē kāhēd
u =šān abzūdan kāstan ēd guft kū
tā mard ruwān kāmag hamē ruwān abzāyēd
čiyōn tan kāmag ēwāz ruwān kāhēd
u =šān ēn =iz ōwōn dāšt kū
arzānīg bawišn pad harw rāz pahikār ī yazad ud yazadān ’sn’y
čiyōn ka mard arzānīg bawēd ēg =išān xwad az rāz pahikār ī xwēš āgāh kunēnd
čē yazad ganǰwar ī awestwār xwāhēnd ēnyā =šān rāz pahikār ī xwēš az kas =iz nihān nēst
čē dānē kū čand mardōm wēš dānēnd ud yazad pāduxšāytar bawēnd
u =šān arzānīgān būd ēd guft
ēdōn weh mard bawēd kū =šān yazadān rāh ō tan bawēd rāz xīr ī xwēš awiš nimāyēnd
u =šān ēn =iz ōwōn dāšt kū
dēn haft parisp ast u =šān ān ī bēdom mānsr ud zand guft
u =šān ēn =iz ōwōn dāšt kū
kas =iz nēst kē ēn dēn petyāragtar hēnd čiyōn ān ī ahlomōγ
čē yyyt az ān ī ahlomōγān kas =iz petyār nēst kē tar parisp
ī ast kē bē =iz ō dēn bēdom andar tuwān āmadan
ōy ī ahlomōγ pad nām ī mānsr_barīh tar parisp ī bēdom andar āyēd
ast kē bē =iz ō dēn xwadīh nazdīh rasēd
u =šān ēn =iz ōwōn dāšt kū
sīh tōhmag wīr ī mardōmān
ēw tōhmag ēn xwārtar ī pad abestāg ud zand hammōxt ud dānist andar abāyēd
u =šān ēn =iz ōwōn dāšt kū
kas =iz nēst kē tis ī dārēd pad gētī az =iš bar nē hamē windēd
ranǰagīh ī andar rāy az =iš bē nē ayāsēd
ud ka ō driyōšīh pad gētī rasēd harw kas az =iš bē ayāsēd
ka ō āmār ī mēnōyān rasēd ōy =iz ī driyōštom mardōm kāmag ōwōn kū
kāč driyōštar būd hē u =m nūn āmār andak ud xwārtar abar būd hē
u =šān ēn =iz ōwōn dāšt kū
mardōm pad āmār ī mēnōyān abārīg =iz kirbag ī pad gētī šāyīd hē kirdan nē kird
nē kirdan rāy abaxš ud pašēmānīh ōwōn awiš rasēd čiyōn =iš ēn abar rasēd kū
kāč kē rām ī mardōmān and_čand kōf =ēw bālāy pad ātaxš bē sōzēd ud pad āb bē hilēd
ēg pad ruwān puhl kam
čiyōn ka ēw drahm az kas =ēw bē duzīd ayāb appurd ēstēd
u =šān ēn =iz ōwōn dāšt kū
kē zan ī rōspīg marzēd pad =iz daštān_marzīh ēraxt ēstēd
u =šān ēn =iz ōwōn dāšt kū
yazad ōy ī yazadān_xēm mardōm nē ōwōn dārēnd andar ēn gēhān
čiyōn xwad kāmag u =š pad tan =iz nēktar
bē ōwōn dārēnd ud pahrēzēnd
čiyōn ān ī pad ruwān sūdōmandtar
u =šān ēn =iz ōwōn dāšt kū
yazad ōy ī yazadān_xēm mardōm ōwōn pahrēzēnd
u =š pad kāmag ī tan ēdōn awiš nē sāzēnd nē hilēnd rāyēnīdan
čiyōn mard =ēw kē frazend =ēw wašt xwarišn =ēw xwāhēd ī =š pad xwad abēr mizagōmand sahēd ud ka xwarēd bē mīrēd ayāb ān waštīh garāntar bawēd
ān mard ōy frazend pad ān xwarišn ō kāmag nē sāzēd
u =šān ēn =iz ōwōn dāšt kū
pad hammōzišn ī ōy ī did tis =ēw ēn weh ka xēm ī xwēš bē wirāyēd
ud xwēš tan ēwēnag bē kunēd ud pēš ōy ī did dārēd
ud ōy ī did andar nigerēd wēnēd u =š abar ham wāzēd
u =šān ēn =iz ōwōn dāšt kū
bē xwēš tan bē wirāyēd pad wehīh ī =š ast kārān hāzēd ēnyā =š kas nē hamōxtēd az =iš weh nē bawēd
ēd rāy čē kas =iz āhōg az handāz ī ōy wēnēd kē dādestān wirāst ēstēd
čē pad gētī xwēš tan andar ān tis wēnēd ī az xwēš tan rōšntar ud tābīgtar
was zamān mard =ēw ǰāmag ī dōsēn hamē nīšēd xwēš tan nē wēnēd
ka ō ēwēnag ī pāk nīšēd xwēš tan wēnēd
ēd rāy čē ayōxšust pad dīdan az mardōmān rōšntar ud dōsēn ǰāmag tārīktar
u =šān ēn =iz ōwōn dāšt kū
tuxšāg bawišn kadāmagān =iz kas pad srišwādag ī mayān šab pad ātaxš abrōxt
harw kū was dēw az =iš zad bawēnd
ud and zamān tā ātaxš abrōxt ēstēd harw kū ōy ātaxš padīrag rasēd
tam ud tārīkīh bē brīnēd ud wanī apaydāg kunēd
ān kunišn bē =iz ō ayyārīh ī ō mēnōy rasēd kē pad brīd apaydāg kirdan ī tam gumārd ēstēd
ud ān rōšnīh tārīkīh wanī apaydāg kunēd
pad mēnōy pēš ruwān ī ōy mard kē rāy ān rōšnīh bawēd ul ēstēd
ruwān ī mardōm rōšn nēk āsān kunēd
u =šān ēn =iz ōwōn dāšt kū
pad hangird wāzag =ēw ī abēr mādayān
ēn =iz ēdōn
kē pāyrōzīg ān kunišn kunēd ī
ka ō āškāragīh paydāgīh wēnišn ī was kas rasēd
ēg mardōm pad ēn nē āwēnēnd kū =t abārōn wad kird
u =šān ēn =iz ōwōn dāšt kū
harw mardōm harw rōz se bār ka xwaršēd xēzēd
ēg xwēš tan bē ō yazadān dahišn
ud astagīh dēn yazadān ud anastagīh ahriman dēwān bē gōwišn
pad harw wināh menēd ī ān rōz ī pēšār bawēd pad menišn gōwišn kunišn az =iš abaxš ud andar yazadān pad_petit bawēd
u =š harw ǰār xwēš tan pad āmārēnišn kū =m im rōz čē xward dāšt u =m čē kird
ud ōwōn čiyōn kār kird im rōz yazadān abzār būd ham ayāb dēwān
u =šān ēn =iz ōwōn dāšt kū
mardōmān se tis pad kirdan xwēš_kārīh
ud kē nē kunēd ērangīhā
ēk xēm ī xwēš bē wirāstan
ud ēk pad āhōg ī did nē nigerīdan
ēk čašm ō gēhān dāštan
u =šān ēn =iz ōwōn dāšt kū
xīr ī gētī bar sūr
ud sūr bar tan dāštan
tan bar
ruwān ud ruwān bar tan pasēn
tan ī pasēn bar rāmišn ī afrasāwand ud hamē ast hamē bawēd
u =šān ēn =iz ōwōn dāšt kū
mēnōyān yazadān āyišn ī az mēnōy ō gētī nazdist ātaxš ī warhrān pas abārīg gyāg
u =šān ēn =iz ōwōn dāšt kū
ka ahlomōγān ō dēn āyēnd ud abar astīh ud anastīh ī dēn ī yazadān pahikār kunēnd
ēg bē ōy ī āsrōn kē xwēškārīh ān ast u =š tuwān bōzišn ī xwēš ērangīh ī ahlomōγ guft ēnyā
abārīg y’wt’y bē ka xwāhēnd az =iš pursēnd ēnyā =šān xwad pad pēšobāyīh xwēš ō pahikār nē šawišn tis nē gōwišn
kē gōwēd rištagīh az =iš rasēd ud xwad tōzēd
bē ka xwāhēnd pursēnd tā =iz bē ō y’wlčk =ēw tis ī rāst gōwišn
kē nē gōwēd ērangīhā
u =šān ēn =iz ōwōn dāšt kū
ān =iz ī mahist kirbag ka =š ōy dahībed xwadāy pad nē kirdan framān dād ēstēd ēg =iz nē kunišn
ud kē kunēd hil kūnē kirbag bē stabr wināh bawēd
pad bahr ī xwēš ērangīhā ud dehbedīh wišuft bawēd
u =šān ēn =iz ōwōn dāšt kū
ān ī ka dahībed
pursēd kū drōn yazišn ayāb nē
ēg ka bazag pad bazag brīnēnd ēg =iz nē gōwišn kū nē yazišn
bē ka ān ī dahībed mard =ēw framān dād kū drōn ma yaz
ka yazēd nē ēzišn bē wināh bawēd
ōwōn čiyōn drōn abārīg =iz harw kirbag
ka ān ī dahībed pad ēn pursēd kū kunišn ayāb nē ōwōn abar estišn
ka ān ī dahībed framān dahēd kū ma kun ōwōn bē estišn
u =šān ēn =iz ōwōn dāšt kū
harw čē kē andar ān tis ēstēd ī dahībed pad nē kirdan framān abar dād ēstēd
ka rēš awiš rasēd ōwōn tōzēd čiyōn kē az dušmen abīm ud pad kām ī xwēš
ud nē ō šahrestān diz ī darbušt ud ābādān
bē ō diz ī kahwan awērān kē kas andar nēst šawēd mīrēd ayāb zad bawēd
pad margīh zad ī xwēš xwad tōzēd
u =šān ēn =iz ōwōn dāšt kū
wišōbišn ī dūdag ast ī pad petyārag ast ī mihrōdruzīh bawēd
dānāg ān bawēd ī ka dō dūdag ī wišuft wēnēd dānēd kū
kadām ān ī pad petyārag kadām ān ī az mihrōdruz wišuft
u =šān ēn =iz ōwōn dāšt kū
xīr ī yazadān hagriz pad menišn aziš bē nē ēstēd
ōwōn abar estišn kū ān ī abārōn tis hagriz pad menišn nē menēd
čē ōš ī mardōmān andar harw zaman zaman frāz rasēd
bīm ēwāz pad ān gāh ī ka ōš frāz rasēd ēg mard tis ī abārōn hamē menēd
ōh =iz pēš az ān ī mard frārōn_kunišn bawēd ēg ruwān dušmen bē bawēd
čē hamē tā mard kirbag ahlāyīh menēd ēg yazad andar tan mānēnd
ud dēwān stōw bawēnd bē šawēnd
ud ka tis abārōn menēd ēg dēw andar ō tan dwārēnd
ud agar ka mard bē mīrēd ān zaman druz andar tan bawēd ēg pad ruwān stahmagtar bawēd
ud pas yazadān dušwārtar bawēd ān tan az dast druz bē stadan
čiyōn kē pad gētī xwad druz az tan stōw kird hē
u =šān ēn =iz ōwōn dāšt kū
abd =iz hād ān yazad ī harw panāh awiš kunēd paristēd tarsagāy bawēd
ēg az anāgīh bē bōzēd
u =š ōy yazad rāy guft ēd bawēd ruwān ī xwēš
u =šān ēn =iz ōwōn dāšt kū
az harw tis rāmišn padīriftan abāyēd
az ān ī nēk pad ēn padīriftan abāyēd kū man =iz andar bahr ham čē =m xwēš
ud az ān wad pad ēn padīrišn kū nēk =iz ǰast kū =š an andar nē ham u =m nē xwēš
u =šān ēn =iz ōwōn dāšt kū
ruwān zīndagīh az hōg ī frārōn
ud hōg zīndagīh az xēm
xēm zīndagīh az mardōmān dōstīh
ud ka mard pad abārīg tis weh abzārōmand bē =š xēm wad
ēg az kunišn ī ōy mard ruwān ī ōy mard zīndagīh nēst
u =šān ēn =iz ōwōn dāšt kū
xrad zīndagīh az burdīh
dēn zīndagīh az rāstīh
ud ōš zīndagīh az ēzišn ī yazadān pad škōy kirdan
ud ēzišn zīndagīh az nērang
nērang zīndagīh az dastwar
ud dastwar zīndagīh az paywand ī dēn pad mihr
u =šān ēn =iz ōwōn dāšt kū
abēr ērangīhā kē tis mēnōy nē wurrawēd
čē kē andar ēn gēhān tis =iz nē āšnūd ēstēd ēg =iš nē bōzāgīh
bē kē pad kamist pad xīr ī mēnōy pad ēn and gumān nē bawēd kū harw gōnag tis =ēw ast
u =šān ēn =iz ōwōn dāšt kū
mihr dōstīh ī ēk abāg did abzāyēd ān ī ka mard ēk abāg did nē wēnēd bē nām āšnawēd
ān =iz ī abēr abzārōmand mard mihr ō rōz kū ēk abāg did ō wēnišn rasēnd
sad and abzāyēd čiyōn ān ī pēš
ud ka ō hampursagīh rasēnd sad and abzāyēd čiyōn ān ī pēš
ka ō hamxwarišnīh rasēnd was was bē abzāyēd čiyōn ān ī pēš
ud pas rōz rōz ōh abzāyēd
mardōmān ranǰ abēr burdan kū pad ān and mihr ud dōstīh ōh abzāyēm
čē abdom =iz harw druz pad ēn mihr ud dōstīh bē šāyēd abesīhīdan
u =šān ēn =iz ōwōn dāšt kū
kas =iz mardōm wināh kunēd rāy dušmen anāg_kāmag nē bawišn
pad wināh ī pēšār bawēd ōh abaxšāyišn
ēn =iz handēšišn kū
must =iz ast ka ahriman ēdōn bē frēft ud wiyābān kird
u =šān ēn =iz ōwōn dāšt kū
kas =iz mardōm nēst kē tis =ēw kunēd u =š ān tis nē xwad rāy kird bawēd frārōn ayāb abārōn
čē harw kē andar kunēd ruwān ī xwēš abzāyēd ayāb kāhēd
u =šān harw ēwēnag pad ruwān ī xwēš kird bawēd
ud abāg mardōmān abēr tuxšāg abāyēd būd kū xwēš ruwān rāy nēkīh xwāhēm nē anāgīh
u =šān ēn =iz ōwōn dāšt kū
frāybūd ud sāstārīh petyārag ī dahībedān
ud aibībūd ud ahlomōγīh petyārag ī āsrōnān
u =šān ēn =iz ōwōn dāšt kū
dēn petyārag ag_dēnīh ud anērīh u =š brādarōd ahlomōγīh
xrad petyārag drōzanīh u =š brādarōd waranīgīh
xēm petyārag tar_menišnīh u =š brādarōd xwad_dōšagīh
u =šān ēn =iz ōwōn dāšt kū
dah tis ēn homānāgtar
čiyōn rādīh ud wanīgarīh
rāst_gōwišnīh halag_gōwišnīh
ud tuxšāgīh ud widangīh
ud wistāxwīh ud wastārīh
ud āwāmīh ud aǰgahānīh
ud mard bē abāyēd dānist kū čē ān ast ud čē ān
u =šān ēn =iz ōwōn dāšt kū
kas =iz dām abēwēnābd tis =ēw nē kunēd
bē pēš_wēnābd rāy kunēd ī afrasāwand
u =šān ēn =iz ōwōn dāšt kū
ohrmazd ud ahriman harw dō abar kāmag ī mardōmān nišīnēnd
ud kē ohrmazd burdār ēg =iš mizd az ohrmazd
ud kē ahriman burdār ēg =iš mizd az ahriman
ud mardōmān abēr tuxšāg bawišn kū tā ohrmazd burdār bawēm
kū =mān mizd az ohrmazd ī xwadāy bawēd
čē kē ahriman burdār ēg =iš mizd anāgīh aziš
u =šān ēn =iz ōwōn dāšt kū
kē kamēd kū dānāg bawēd fradom tis =ēw ēn ēw kunēd kū
yazadān tarsagāh ēw bawēd
ud abāg dānāgān ēw rawēd
ud bāstān menišnīh xwēš bowandag bē ēw kunēd
čiyōn ka =š xwaš xwardīg xward ēstēd
ud bāstān tan ī xwēš pad pahrēz ēw dārēd kū =š druz pad tan abarwēz ud pādixšāy nē bawēd
u =šān ēn =iz ōwōn dāšt kū
tarsagāy ī yazadān ēd bawēd
kē nē ān ī kōdag ud nē ān ī wuzurg tis =iz tis ǰud az hampursagīh ī wehān nē kunēd
u =šān ēn =iz ōwōn dāšt kū
dōst ēw ān pahlomtom kē ruwān xwēš pad dōstīh kunēd u =š hagriz az dōstīh bē nē hilēd
nē pad frāxwīh ud nē pad tangīh
dastwar =ēw ān pahlomtom kē ox ī xwēš pad dastwar kunēd ud hagriz az dastwarīh bē nē hilēd
panāh =ēw ān weh kē xēm ī xwēš panāh kunēd ud hagriz az panāh bē nē hilēd
u =šān ēn =iz ōwōn dāšt kū
wehīh =ēw nēst ī mardōmān mēnōyīhā hē u =š gētīyīhā nē paydāg hē
čē gētī abzār xēm
ud xēm abzār hōg ī frārōn
hōg abzār xrad
xrad abzār hampursagīh ī wehān
ud hunar abzār tuxšāgīh
ud xwarrah abzār rāstīh
ud ruwān abzār yazišn ī yazadān
u =šān ēn =iz ōwōn dāšt kū
āštīh ud mihr andar harw dām dārišn
ud kirbag ō harw kas gōwišn
ud zand pad šabestān čāšišn
ud rāz ō awestwārān gōwišn
ud srōšīgīh ud dādestānīgīh andar hanǰaman dārišn
ud rāmišn andar myazd gāh ud ēzišn ī yazadān pad škōyišn kunišn
u =šān ēn =iz ōwōn dāšt kū
kas nēst kē ēn pad gōhr nē būd hē
marīh ud ǰehīh ud ǰādūgīh ud anērīh
ud kas =iz wirāstan nē tuwān bē kē pad dēn ud hampursagīh ī wehān wirāyēd
u =šān ēn =iz ōwōn dāšt kū
marīh ēd bawēd stahmagīh ud zadārīh
ud ǰehīh ēd bawēd zamanīh ud purr_bēšīh
ud ǰādūgīh ēd bawēd nihān_xēmīh ud tan ī xwēš ǰuttar nimūdan kū ān ī ast
anērīh ēd bawēd kē harw kē aziš čēr zanēd ud apparēd
u =šān ēn =iz ōwōn dāšt kū
tā mow_mardān pad barsom ī wišādag yazišn nē kunēnd ǰehān zan nasāy abēr huzārag bawēd
u =šān tā barsom ēw apahrēxtag nē hišt ǰuwān mard margīh abēr andak būd
u =šān ēn =iz ōwōn dāšt kū
ahriman ka dām_dahišnīh ī ohrmazd dīd az pāy bē ōbast
ud ka fraškerd_kirdārīh dīd pad šnūg andar ōbast
ud ka rist_āxēz dīd stard ōbast ud 3000 sāl nibast
u =šān ēn =iz ōwōn dāšt kū
harw čē =š zrēy ast
ērīh ud šāhān šāh zrēy bowandagīh
ud dēn zrēy mānsr
rōšnīh zrēy xwaršēd
u =šān ēn =iz ōwōn dāšt kū
ka tis pad xēm ī frārōn nigerīhēd ēg hamāg ’wnd wahānag bē wēnīhēd
ud xēm ī frārōn wahuman_dārīh
ka tis pad waran nigerīhēd ēg tis =iz wehīh nē wēnīhēd
u =šān ēn =iz ōwōn dāšt kū
dēn gōhr čiyōn ēwēnag ka andar nigerīhēd xwēš tan andar wēnīhēd
ud ēd =iz ōwōn kū
kē dānēd nigerīd ēg hamāg wehīh ud wattarīh andar bē wēnīhēd
u =šān ēn =iz ōwōn dāšt kū
narīh ud mādagīh was ēwēnag
ēn =iz narīh ud mādagīh ast
āsn_xrad ud gōšōsrūd_xrad
čē gōšōsrūd_xrad pad narīh gāh kird ēstēd
ud āsn_xrad pad mādagīh gāh kird ēstēd
ud āsn_xrad andar tan ēw harw čand ast ast
ud harw čē dānīhēd pad āsn_xrad dānīhēd
ud kē gōšōsrūd_xrad abar nē rasēd ēg tis =iz nē dānēd
ud ka abar mad pas and čand dānīhēd pad xēm ud āsn_xrad dānīhēd
ud āsn_xrad kē gōšōsrūd_xrad abāg nēst ēdōn čiyōn mādag kē gušn abāg nēst
ud ābestan nē bawēd ud bar nē dahēd
ud ān kē xrad āsn_xrad nē bowandag ēdōn homānāg čiyōn mādag kē gušn nē padīrēd
čē mādag kē gušn nē padīrēd bar ōwōn nē dahēd
čiyōn ka pad bun gušn nēst
u =šān ēn =iz ōwōn dāšt
kū pahlom tis hampursagīh ī wehān
čē hampursagīh ī wehān šnāyišn ī yazadān
u =šān ēn =iz ōwōn dāšt kū
ahriman az gēhān ēdōn bē šāyēd kirdan kū harw kas pad bahr ī xwēš az tan bē wāzēd
čē ahriman andar gēhān mānišn pad tan mardōmān ast
ēg =iš čiyōn pad tan ī mardōmān mānišn nē bawēd ēg az hamāg gēhān bē abesīhēd
čē tā andar ēn gēhān pad kas =iz mardōmān kōdag druz =ēw mehmānīh ēg ahriman andar gēhān
u =šān ēn =iz ōwōn dāšt kū
yazad pad ān gyāg mehmān kunišn hēnd ī
ka pad ān gyāg mehmān kird hēnd pad hamāg ēn gēhān mehmān kird hēnd
čē ka ahriman az tan ī mardōmān bē kird az hamāg gēhān bē abesīhēd
yazad =iz ka pad tan mardōmān pādixšāy kird hēnd pad hamāg gēhān pādixšāy
u =šān ēn =iz ōwōn dāšt kū
pad uskārišn ī dēn tuxšāgtar bawišn kū pad abestāg ud zand
čē uskārišn ī dēn ǰuwānīh ī ruwān
u =šān ēn =iz ōwōn dāšt kū
wehān ast ī pursīd ud ast ī wizārd
pursīd kū
čē ahlāyīh ud čē ahlawīh ud čē kirbag ud čē pākīh
ud čē xwēškārīh ud čē wizīdārīh ud čē abēzagīh ud čē dādārīh
ud čē rāstīh ud čē amargīh ud čē tan ī pasēn
ud ahlawīh ēd bawēd ahlāyīh_paymōgīh
kirbag ēd bawēd kār ī yazadān kirdan
pākīh ēd bawēd ǰudāgīh az druz
ud āškāragīh ēd bawēd awināhīh
wizīdārīh ēd bawēd menišn ud gōwišn ud kunišn az anōdagān nērōg ō xwēšān ayyārīh wizīdan
abēzagīh ēd bawēd ēkānagīh
ud dādārīh mādayān ān ī ō harw ud ēd bawēd harw kas rāy nēkīh abāyistan
ud rāstīh hangirdīg ēd bawēd nē druxt ī pad ēč abar ēč
ud amargīh čiyōn būd abāz būd
ud tan ī pasēn čiyōn zād abāz zād bawēd
u =šān ēn =iz ōwōn dāšt kū
druz abēr kōšēd ud stōw nē bawišn
čē druz ka wizend ō abesīhišn mad ēg kōšēd
u =šān ēn =iz ōwōn dāšt kū
az ēn] panǰ ēwēnag abēr wardišn
az anāg_menišnīh ud duzīh ud apparīh ud āzwarīh ud ag_ruwānīh
anāg_menišnīh ēd bawēd kē wehān ud ahlawān weh_dōstān rāy anāg handēšēd
ud duzīh ēd bawēd kē xwēš tan ǰuttar nimāyēd kū ān ī ast
ud apparīh ēd bawēd kē xwāstag ī nē xwēš rāy gōwēd kū kāč ka man xwēš hē
āzwarīh ēd bawēd kē hunar ī anī kas nē kāmēd
ag_ruwānīh ēd bawēd kē gōwēd ān ī rāst xwad nē kunēd
u =šān ēn =iz ōwōn dāšt kū
ka tuwān ud wizīrēd nē xwāyišn tis az kārān
čē kē pad čār tis az kārān xwāhēd
kē pad ačār xwāhēd nē windēd
u =šān ēn =iz ōwōn dāšt kū
harw tis ī ēdōn weh čiyōn ān ī hamē y’wyčyt
čē anāgīh =iz harw pad bē būd abāyēd abesīhīd
u =šān ēn =iz ōwōn dāšt kū
kē pad wināh ī mānēd ī pēšār bawēd xwēš tan az xwēšīh ī yazadān bē nē barišn ud ō dēwān nē dahišn
ud ēn nē handēšišn kū man ēd rāy ka wināh pēšār būd dēwān_xwēš ham
čē ahriman ud dēwān ka mard wināh ī anābuhlagān kird ēstēd ud xwad tan ō dēwān nē dahēd
ēg kem pad xwēš dārēnd čiyōn mard =ēw kē srōšōčarnām wināh kird ēstēd
ud xwad tan ō dēwān dahēd ud pad xwēšīh ī dēwān dārēd
u =šān ēn =iz ōwōn dāšt kū
kē harw čē kunēd ēwāz yazadān rāy kunēd harw čiyōn kunēd pad =iš ahlaw bawēd
u =šān ēn =iz ōwōn dāšt kū
mardōm ī nē pad dēn ī yazadān ēstēnd dō ēwēnag
ēk frēftār
ēk frēftag
frēftār ān bawēd kē ān ī hamē kunēd xwad dānēd kū nē kunišn
ud waran ud tan_kāmagīh rāy kunēd
ud frēftag ān bawēd kē ān ī hamē kunēd pad frārōnīh wurrawēd ēstēd
ud ruwān rāy hamē kunēd
harw kē frēftār druwand ud frēftag ahlaw =iz bawēd
u =šān ēn =iz ōwōn dāšt kū
ka uzdēs_paristišnīh bē abesīhīhēd mēnōy_wurrawišnīh andak abāg bē šawēd
ud ka wisāndagīh ud asruštīh bē zanīhēd rāmišn andak abāg bē šawēd
ud ka šēwangarīh bē zanīhēd ēg mihr andak abāg bē šawēd
pas ēdōn weh ka ēn se wināh čand ahī az gēhān bē barīhēd
u =šān ēn =iz ōwōn dāšt kū
urwar_xwarišn bawēd šmāh mardōmān kū dagr_zīyišn bawēd ud az tan ī gōspandān pahrēzēd čē āmār was
ēg ohrmazd ī xwadāy ayyārīh ī gōspandān rāy urwar was dād
u =šān ēn =iz ōwōn dāšt kū
ohrmazd pad tis =iz tis atuwāngar nē bawēd ud nē būd
u =šān ēn =iz ōwōn dāšt kū
ahriman hamē nē būd ud nē bawēd
u =šān ēn =iz ōwōn dāšt kū
ohrmazd harw dām ī =š bē dād abdom abāz ō xwēš kunēd
u =šān ēn =iz ōwōn dāšt kū
āmār ī mēnōyān abar ēn se wāzag
kū =t čē kāmist u =t kird u =t kē burzīd
u =šān ēn =iz ōwōn dāšt kū
ān =iz ī wuzurg pad wināh =ēw ēn abērtar druwand bawēd
ka ān ī driyōš tar menēd
u =šān ēn =iz ōwōn dāšt kū
ān ī was_xwāstagtom mardōm ka dānēd xward dāšt
ēg was_xwāstagīh rāy wināh abar nē šawēd
ud ān =iz ī driyōštar mardōm ka nē dānēd xward ud dāšt
pad xwāstag drahm =ēw šāyēd bē margarzānīh bē madan
u =šān ēn =iz ōwōn dāšt kū
was mardōm kē harw ahlāyīh ī =š ast az was_xwāstagīh
ud was mardōm kē harw druwandīh ī =š ast driyōšīh rāy
u =šān ēn =iz ōwōn dāšt kū
bē az wehān ēg didīgar az wattarān weh šāyēd būd
pad ān kē az wehān wehīh wēnēd hammōxtēd
ud az wattarān wattarīh wēnēd ud az =iš bē pahrēzēd
u =šān ēn =iz ōwōn dāšt kū
mardōmān tuxšāg bawišn kū tā kāmag ī tan abāg ruwān bē kunēnd
čē kē kāmag ī tan abāg ruwān ēg dēn abāg tan
ud kē kāmag ī ruwān abāg tan ēg druz abāg ruwān
u =šān ēn =iz ōwōn dāšt kū
az wehān ābādīh spās gōwišn
ud az wattarān gilag nē gōwišn
u =šān ēn =iz ōwōn dāšt kū
az dušox rāh =ēw ō wahišt šawēd
pad harw gāh ān rāh hubōytar kū harw hubōy =iz ī pad gēhān
ud pad ān rāh awēšān rawēnd kē pad wināh tis barēnd ud az dušox bē ō wahišt šawēnd
u =šān ēn =iz ōwōn dāšt kū
ag_dēnān ud abārīg =iz harw mardōm kē zandīg dārišn
gētī amahrspandān pad xwardan ud dāštan az =iš abāz nē gīrišn
u =šān ēn =iz ōwōn dāšt kū
kē hazār mard ī druwand stāyēd ud andar wābarīgānīh dāšt ēstēd
ēg pad ruwān puhl kam čiyōn kē moγ_mard =ēw ī ahlaw pad druwand bē abespārd ēstēd
u =šān ēn =iz ōwōn dāšt kū
hamē ka mard tis ī frārōn ul menēd ud gōwēd ud kunēd
ēg abāg rōšnīh ī az =iš ul waxšēd u =š parwānag bawēd andar ō dēn
ud hamē ka mard tis abārōn ul menēd ud gōwēd ud kunēd
ēg tam =ēw az =iš ul āyēd ud andar mard ud dēn ul ēstēd ud mard dēn kam wēnēd
u =šān ēn =iz ōwōn dāšt kū
ohrmazd ī xwadāy ka =š fradom mardōm kird ēg =iš framān ōwōn dād kū
pad ēn tuxšāg bawēd kū ruwān bōzēd
ēg =itān xīr ī tan amāh pad mayān kunēm čē ruwān bōxtan ǰud az ašmāh nē wizīrēd
ud mardōm ōwōn wiyābān hēnd kū xīr ī gētī xwad abar tuxšēnd
ud xīr ī ruwān abestān ō yazadān kunēnd
u =šān ēn =iz ōwōn dāšt kū
ān driyōš mardōm agar ōh ag_dēn ayāb nē frārōn_rawišn ēg =iz =iš tis awiš dahišn
ud kē dahēd pad bahr ī xwēš ān druz ī niyāz xwānēnd az gēhān bē kird
u =š petyārag ud wizend az xwad spōxt bawēd
ud az =iz tan ī ōy nē zāyēd ān kas ī ō niyāzōmandīh rasēd
u =šān ēn =iz ōwōn dāšt kū
ādur ī farnbay pad āsrōnān gāh kird ēstēd
ud ādur ī gušnasp pad artēštārān gāh kird ēstēd
ud ādur ī burzēnmihr pad wāstaryōšān gāh kird ēstēd
u =šān ēn =iz ōwōn dāšt kū
tuxšag bawišn pāyrōzag pad hampursagīh ī abāg wehān kū tā ān ī āšnawēd bē nē ǰōyēd
čē āšnīdag az hampursagīh ī pāyrōzag andar nēst abērtar gugārīhēd kū hordad ud amurdad
u =šān ēn =iz ōwōn dāšt kū
frawahr ī zardušt ī spitāmān pad hōm barsom tay ēstēd
u =š niyāyišn pad ātaxš ī warahrān
u =šān ēn =iz ōwōn dāšt kū
myazd stūrīh ī yazadān
ud gāhānbār stūrīh ī dēn
ud ātaxš ī warahrān stūrīh ī gayōmard
u =šān ēn =iz ōwōn dāšt kū
wihēzag pad ēn čim kird ēstēd kū ohrmazd ō pēš bawēd ahriman ō pas kird
ahriman pad xīr ī ohrmazd abar ēstēd ud nē tuwān bawēd
ud abdom ahriman bē abesīhēd
u =šān ēn =iz ōwōn dāšt kū
harw mardōm ēn panǰ tis dānistan xwēš_kārīh ud kē nē dānēd ērangīhā
ēk ēn kū čē ham mardōm ham ayāb dēw
ud ēk ēn kū az kū āmad ham az garōdmān ayāb az dušox
ud ēk ēn kū abar čē ēstam abar tis ī yazadān ayāb abar tis ī dēwān
ud ēk ēn kū pas ī kē ham pas ī wehān ayāb pas ī wattarān
ud ēk ēn kū abāz ō kū šawam abāz ō wahišt šawam ayāb abāz ō dušox šawam
u =šān ēn =iz ōwōn dāšt kū
kē abestāg xwahēd ud huxēmtar nē bawēd
ud zand pursēd ud dānāgtar nē bawēd
ud māndag garzēd ud awināhtar nē bawēd
ān did pad kār nē uzmāyišn
u =šān ēn =iz ōwōn dāšt kū
ahriman pad ēn se tis abar kas =iz ōst nē bawēd bē ka xwad abar rasēd
ēk menišn ī dahībedān
ud ēk hamrasišnīh ī wehān
ud ēk zāyišn ī zarduxštrōdomān
u =šān ēn =iz ōwōn dāšt kū
mard čand wēšist ō mān ī ātaxšān šawišn ud ātaxš niyāyišn tarsagāhīhā kunišn
čē harw rōz amahrspandān se bār andar mān ī ātaxšān hanǰaman kunēnd
ud kirbag ud ahlāyīh ānōh bē hilēnd
ud kē wěš ō ānōh šawēd ud ātaxš niyāyišn tarsagāhīhā wēš kunēd
ēg ān kirbag ud ahlāyīh ī yazadān ānōh bē hilēnd pad tan mehmāntar bawēd
u =šān ēn =iz ōwōn dāšt kū
čē kunēd se tis ēn weh
ēk ēn kē ēwāz =ēw wehīh rāy frāz ō hampursagīh ī wehān šawēd
ud ēk ēn kē arz ud spās ud ābādīh ī wehān čand bowandag menēd ud gōwēd
ud ēk ēn kē pad kamist harw rōz se bār pad tan ī xwēš nigerēd kū =m yazad abāg hēnd ayāb dēw
u =š agar yazad abāg hēnd andar tan mehmāntar bē kunēd
u =š agar dēw abāg hēnd az tan ī xwēš apādixšāy kunēd
u =šān ēn =iz ōwōn dāšt kū
pad hangird tis dō w’t’t ast
kas kē pahikārēd kū wēš ast =iz ēg =iz ēk =ēw ast se
tis ēk ēn kū harw kas wināh ī xwad dānēd kū wināh
ud andar =iz šahr pad pāyram dusrawēnīd ēstēd
ud agar kas ast kē kunēd puhl =iz zanēnd čand tuwān az =iš bē wardēd ud nē kunēd
ud ēk ēn kū harw kas ān kirbag ī xwad dānēd kū kirbag
andar šahr pad pāyram husrawēnīd ēstēd
ud agar kas kunēd pāddāšn =iz paydāg čand tuwān pad =iš tuxšāg
ud ēk ēn kū harw kas ān tis ī nē dānēd kū kirbag ayāb wināh
ud andar šahr mardōm pad frārōnīh ud abārōnīh nē hamdranǰišn hēnd
pad gumānīh abar ēstēd abāg wehān uskārēd
ud ōwōn čiyōn wehān dastwar bawēnd kunēd
ud ǰud az hampursagīh ī wehān fradom nē kunēd
u =šān ēn =iz ōwōn dāšt kū
kas =iz mardōm nēst kē ēn se tis ka andar ēstēd az =iš pad gētī bar nē wēnēd
ranǰ =iz ī andar rāy az =iš nē ayāsēd
ēk wafr ud wārān
ēk diz ī kōšk ud drubuštīh kirdan ud diz hambār dāštan
ēk driyōšīh
čē ān =iz ī xradōmandtom mardōm ēd rāy čē sūd ī frāz ō pēš nē wēnēd was ī ka anāgīh ōwōn wēnēd kū az driyōšīh bē ayāsēd
ud ka ranǰagīh ī rasēd rāy wārān ī pad abzārīh nē kāmēd frayist ān ī ka pad kōšk ud diz ud diz hambār dāšt nē pad kām
ud az ān se tis
dō tis ī pad gētī bar wēnīhēd šāyēd dānistan
ud ēk tā ō āmār ī mēnōyān rasēd nē wēnīhēd
ud ān dō tis ī pad gētī bar wēnīhēd ēk wafr ud wārān guft
čē wārān ka wārēd frayist ān ī ka pad ān gāh ī ka hamē wārēd sūd tis nē paydāg
ud ranǰ ī andar rāy harw kas az =iš bē ayāsēd pad abēsūd dārēd
ud ka ō frawardīn māh ud ardwahišt māh mad ud ǰōrdāy giyāhag xurmāg rōyīhēd ud bar ī wārān bē ō paydāgīh āyēd
harw mardōm kāmag ōwōn kū
kāč pad ēn zamestān wārān wēš būd hē
u =mān ān ranǰagīh ī az wārān wēš būd hē
u =mān nūn ēn ābādānīh ud nēkīh ud padēxwīh ud huzīyišnīh ī az bar ī wārān wēš dīd hē
ud ēk diz ud kōšk ud diz hambār guft
ēd rāy čē frayist ān ī ka kunīhēd ud sāzīhēd sūd ī pad nāmčišt nē paydāg
ud uzēnag ī was abar bawēd
ud pas ka ēdōn ǰahēd kū dušmen ō šahr rasēnd ud pānagīh
ud āšārišn ī mardōmān rāy diz pad kār andar abāyēd
ud mardōm pad hambōh andar ō diz šawēnd
ud abēbīmīh ī =šān az kirdan ī ān diz az dušmenān
ud tangīh ud anāgīh ī az wasīh abzārīh ī mardōm ī andar ān diz wēnīhēd rāy
frayist ān mardōm kē kāmag ōwōn
kū =m kāč xwēš ud mānīgān rāy diz =ēw pad uzēnag ī az xwēš kird ēstē
u =š an tanīhā andar mānē ayāb =im andar ēn diz uzēnag az harw kas wēš kird ēstē
kū pad =iš pādixšāytar ham
u =m az harw kas gyāg frāxtar hē
ud ān ēk ī pad gētī bar nē wēnīhēd driyōšīh guft
čē driyōšīh pad gētī harw kas az =iš bē ayāsēd
ud ka mad ō āmār ī mēnōyān ōy =iz ī driyōštom mardōm kāmag ōwōn kū
kāč driyōštar būd hē u =m anāgīh ī az driyōšīh wēš dīd ud burd hē
ud nūn āmār andak ud xwārtar abar būd hē
u =šān ēn =iz ōwōn dāšt kū
mard ān farroxtar kē čand šāyēd dušox pad gētī bē barēd bē ō ruwān nē spōzēd
u =šān pad gētī burd ēd guft kū
andar gēhān harg ud ranǰ ī mad nē wizīrēd bē ka ōh kunīhēd
ud mardōm pad čār kāmagīhā awiš nē šawēnd ǰud az frēzwān
pad kām ī xwēš kāmagīhā ul ō grīw padīrēd ud tuxšāgīhā kunēd
u =šān ōy harg ud ranǰ rāy guft kū
ēn =iz bawēd ayārīh ud paygīh ud nān_xwarīh ud xān_kār ud band_kār ud gāzarīh ud pōstgarīh ud abārīg kār ī kirrōgīhā ud rēman ud gyāg mardōmān kirdan pad bār bawēd
u =šān ēn =iz ōwōn dāšt kū
dard =iz ud anāgīh pad gētī az dēw ud waštīh ud wēmārīh awiš rasēd
kē ōy kē awiš rasēd and kunēd kū ōy anāgīh rāy yazadān kam nē menēd
bē ōwōn dārēd kū ǰuttar nē šāyēd būd čiyōn ān ī hamē wīdwar ud hunsand bawēd
ēg yazad dard anāgīh ī az waštīh ud wēmārīh awiš rasēd pad āmār ī mēnōyān pad =iz =iš ī barēnd ud dārēnd ud az wināh ī kird bē hangārēnd
u =šān ēn =iz ōwōn dāšt kū
kōdag =iz anāgīh ud zyān ī ahriman ud dēwān pad dāmān ī ohrmazd kāmēnd kirdan
ud ka ōwōn čiyōn kāmēnd mēnōyīhā ārāyēnd ēg =išān ō gētī tuwān hē āwurd
ēg hāmōyēn dām ī ohrmazd pad =iš bē abesīhēnd
bē ōwōn abarwēzīhā kunēnd kū ān =iz ī garāntar pad mēnōy ōwōn ō rāh ud widarg rasēnd
ud čārag xwāhēnd kū ka bē ō gētī mad tis ī abēr xwār abāz mānēd ud kam zyān bawēd
u =šān ēn =iz ōwōn dāšt kū
tuxšāg ud xwāstār bawišn pad rūrag rūrag ud darmān dānist
čē az hušnāsīh ī rūrag ud darmān
ka andar gēhān waštīh ud wēmārīh ast ī čārag nē šāyēd xwāst ī bē burdan
ēnyā ohrmazd ī xwadāy waštīh ud wēmārīh ī ahriman ō gēhān āwurd harw ēk ēw rāy dārūg dād
ī waštīh ud wēmārīh ōwōn bē zanēd čiyōn nān ud āb gursagīh ud tišnagīh zanēd abāz dārēd
u =šān ēn =iz ōwōn dāšt kū
abdom =iz tis ī pad amarg kirdan ī dāmān andar abāyēd rūrag ud darmān
u =šān ēn =iz ōwōn dāšt kū
andar dēn harw kas tuwān ēstādan bē šudan nē bōzāgīhā
čē harw čiyōn mard kāmēd ō kāmag šāyēd sāxtan
čē agar mard tis az kāmag ōwōn kū abēr āzād_mard wuzurg_xwāstag bawam
ēg ka ēn abāg kunēd kū rād ud was_ēzišn pādixšāy tuwān xwāstag ī was dāšt
ēg pad ān ham tis ahlaw bawēd
ud agar mard tis az kāmag ōwōn kū abēr driyōš ud xwār_xwardīg ud xwār_wastarg ud andak_ _uzēnag bawam
ēg ka ēn abāg kunēd kū kē nē ōwōn nē āwēnēnēd ud tar nē menēd
ēg pad ān ham tis ahlaw bawēd
ud agar mard tis az kāmag ēn kū was_abestāg ud was_zand ud kird_ _hērbedestān bawam
ēg ka ēn abāg kunēd kū čāšīdār ud was_abzōn bawēd
ēg pad ān ham tis ahlaw bawēd
ud agar mard tis az kāmag ōwōn kū was_abastāgīh ud was_zandīh nē kunam
ēg ka ēn abāg kunēd kū kār pad framān ī radān kunēd
ēg pad ān ham tis ahlaw bawēd
u =šān ēn =iz ōwōn dāšt kū
ohrmazd ī xwadāy ēn gēhān pad dānāgīh kird ud pad frazānagīh ud mardābūgīh dārēd
ud abdom pad =iš šād bawēd
u =šān ēn =iz ōwōn dāšt kū
dānāgān ōwōn guft kū
tis ī xrad frazānagīh ud mardābūgīh ud ēmēdag ī fraškerd
u =šān ēn =iz ōwōn dāšt kū
xrad gōhr ēdōn čiyōn ātaxš
čē andar ēn gēhān tis nēst ī ēdōn bē bawē čiyōn ān tis ī pad xrad kunīhēd
ātaxš =iz harw kū abrōzēnd kē az dūr wēnēd bōxt ud ēraxt paydāg kunēd
ud kē pad ātaxš bōxt ǰāwēdān bōxt
ud kē pad ātaxš ēraxt ǰāwēdān ēraxt
u =šān ēn =iz ōwōn dāšt kū
ān xēm kē xrad andar nēst ēdōn homānāg čiyōn xānīg ēw ī rōšn ud anāhōg kē bast ēstēd
ud ō kār nē hamē šawēd
ud ān xēm kē xrad abāg ōwōn mānāg čiyōn xānīg ēw ī rōšn anāhōg kē tuxšāg mard abar ēstēd
ud andar ō kār kunēd ud bē ō warz bandēd ud bar ō gēhān dahēd
u =šān ēn =iz ōwōn dāšt kū
ka mard dādestān bē wirāst ud pad kirdan andar ō kār kunēd
ēg ān druz kē pēš wināh kird az tan ī ōy mard ēstēd ud bē barēd
ud bē ō druz ī mēnōy dwārēd ud pēš ī druz ī mēnōy plw ēstēd
az ānōh abar ōy mard kē az tan bē dwārist wardēd ud xwānēd ud wāng kunēd
ud ēn nimāyēd kū pad ān ī =t kird abaxš bāš ud az nūn frāz ma kun
čē drōzanīhā kirdan abāyēd
ayāb ōwōn nimāyēd kū čiyōn ān ī =t kirdan kun
ud agar pad ān ī kird ud ān =iz ī kāmēd kirdan mard az =iš abaxš bawēd
ēg druz abāz ō tan dwārēd
ud pas ān tan abardar wināhēd ud wattar kunēd čiyōn ān ī pēš
ud agar kē xwānēd pas =iz mard az xīr ī yazadān bē nē ēstēd
ēg ān druz pad ham druz ī mēnōy gīrīhēd ud škast ud wanī ud apaydāg bawēd
u =šān ēn =iz ōwōn dāšt kū
hērbedestān kirdan nē wad men
čē hērbedestān kirdan zīndagīh ī mardōmān
u =šān ēn =iz ōwōn dāšt kū
mardōmān ēn se tis harw rōz ōh kunišn
nasuš az tan bē kirdan ud pad dēn āstawān būdan ud kirbag kirdan
nasuš az tan bē kirdan ēd
pēš az xwaršēd ul āmad dast ud rōy šustan
ud āstawānīh ēd xwaršēd yaštan
ud kirbag kirdan ēd xrafstar ēw_čand bē ōzad
u =šān ēn =iz ōwōn dāšt kū
andar gēhān abēwināh ud anhambast rawišn
čē tis ēn dō ēk tan ud ēk ruwān
u =šān ēn =iz ōwōn dāšt kū
sūr stabr xwarišn ud pāk xwarišn ud čābuk sāzišn
ud pad arzānīgīh xwarišn ud pad huniyāgīh xwarišn ud bowandag xwarišn
ud abāg yazadān xwarišn ud az kas =iz nē tarsišn
sūr stabr xward ēd guft kū pad ān ī mad ēstēd hunsand
pāk xward ēd kū az ān ī dādīhā bahr ud niyābag ī xwēš ud pad ēwēn xwarēd
čābuk sāxtan ēd pad ēwēn ārāstan
pad arzānīgīh xward ēd nērōg_abzōn ī pad xwēškārīh rāy xward xwēškārīh pad =iš kirdan
ud pad huniyāgīh xward ēd frāxw_menišnīhā xwardan ud dādan
ud bowandag xward ēd bawēd tan hambār ī ruwān hamdahišnīhā xwardan
abāg yazadān xward ēd bawēd abāg wehān xwardan
u =šān az kas =iz nē tarsīdan ēd guft abēwināh būd
čē ka mard abēwināh bawēd ēg az kas =iz nē tarsišn
u =šān ēn =iz ōwōn dāšt kū
hamīh mādayān ēd bawēd
kū menišn ud gōwišn ud kunišn āgenēn rāst dārēd
ud wizihīdagīh ēd bawēd
kē harw druz az tan bē kird bawēd abāz ō tan nē hilēd
u =šān ēn =iz ōwōn dāšt kū
ān ī yahūd ēwāz yahūdīh ud abārīg ag_dēn ēwāz ag_dēnīh rāy druwand nē bawēnd
u =šān ēn =iz ōwōn dāšt kū
mardōmān se xwēškārīh ī mahist
ēn =iz ēdōn
ān ī dušmen dōst kirdan ud ān ī druwand ahlaw kirdan ud ān ī dušāgāh dānāg kirdan
dušmen dōst kirdan ēd kē xīr ī gētī pēš dārēd u =š pad menišn dōst bawēd
ud druwand ahlaw kirdan ēd kē wināh kē pad =iš druwand bawēd az =iš bē wardēnēd
dušāgāh dānāg kirdan ēd kē xwēš tan ōwōn bē wirāyēd kū =š ān ī dušāgāh abar hammōxtēd
u =šān ēn =iz ōwōn dāšt kū
mardōm ruwān ō ēn se gyāg abērtar kunišn
ō dar ī hudānāgān ud ō dar ī wehān ud ō dar ī ātaxšān
ud ō dar ī dānāgān pad ēn kū tā dānāgtar ud dēn pad tan mehmāntar bawēd
ud ō dar ī wehān pad ēn kū tā pad wehīh ud wattarīh āgāh bawēd
ud wattarīh az =iš bē barēd
ud ō dar ī ātaxšān pad ēn kū tā druz ī mēnōy az =iš bē wardēd
u =šān ēn =iz ōwōn dāšt kū
dēn abāg mānsr ōwōn paywast ud anhambast ēstēd čiyōn gōšt abāg pōst rahag abāg čarm
u =šān ēn =iz ōwōn dāšt kū
nē hērbed bawēd ī ka mard xwēš tan bē awiš dahēd ēg pad gētī ahlaw nē kunēd
ēn =iz guft kū
kē tis az yazadān aboxšāyēd ō dēwān
ud kē az wehān aboxšāyēd ō wattarān
ud kē az xwēš tan aboxšāyēd ō dušmenān rasēd
ud ēn =iz guft kū
kē kunišn ō ruwān ēg =iš gētī xwēš ud mēnōy xwēštar
ud kē kunišn ō tan mēnōy pad kām hilēd ud gētī akāmōmandihā az =iš stānēnd
ud ēn =iz guft kū
harw kas driyōš =ēw pad dāšt ō bun
ud ān driyōš ruwān ī xwēš
baxt_āfrīd guft kū
harw dahišn =ēw ī ohrmazd ō hamēstārīh ī ēk petyārag
ud petītīgīh ō hamēstārīh ī harw druz dād ēstēd
ādurbād ī māraspandān guft kū
hagriz ēč anāgīh ō man nē mad kē =m pad šaš dar rāmišn az =iš nē padīrift
fradom ēn kū =m ābādīhā kū =m anāgīh ēn čē az ēn wattar šāyēd būd
didīgar ēn kū az anāgīh ī man rāy dāšt ēstēd ēk widārd
sidīgar ēn kū =m anāgīh nē ō ruwān bē ō tan mad
čē pad tan widārdan xwārtar šāyēd kū pad ruwān
čahārom ēn kū =m ābādīhā kū man mard =ēw ēdōn nēk ham kū
gizistag ahriman ēn anāgīh pad man wehīh ī man rāy kird
panǰom ēn kū harw wadīh =ēw ayāb anāgīh =ēw ī kunīhēd ō xwad ayāb ō frazendān rasēd
ud ō man mad ud ō frazendān ī man nē rasēd
šašom ēn kū ganǰ ī ahriman purr az anāgīh wehān rāy dāšt ēstēd
ud harw čē ō man mad az ganǰ ī ahriman kast u =š pad weh =ēw ī did kirdan nē tuwān
ud ēn =iz guft kū
gētī rāy wāhag nē barišn ud pad tis =iz nē dārišn ud az dast nē hilišn
ud wāhag ēd rāy nē barišn čē harw ān ī brēhēnīd ēstēd bē rasēd
ud pad tis =iz ēd rāy nē dārišn čē wardišnīg ast ud bē hištan abāyēd
ud az dast ēd rāy nē hilišn čē mēnōy pad gētī ō xwēš šāyēd kirdan
ud abar =iz ēn nigerišn mardōmān
čē harw tis čār ast bē margīh
harw tis bē wizīrēd bē druwandīh
ud harw tis bē sazēd bē ahlāyīh
ud harw tis wirāstan šāyēd bē gōhr
ud harw tis wardēnīdan šāyēd bē baγōbaxt
ud mardōmān xwāstag xrad ud pānag xēm ud hambār kirbag weh
čē ēdar drang andak ēwarz zūd
ānōh dādwar rāst ud abām nē windēd
ud abēr tuxšāg bawišn pad ābādīh ud padēxwīh ud ahlāyīh ud kirbag
čē kē ēdar abāg ānōh
ānōh abāg ānōh
ham paččēn ī az nāmag ī ādurbād ī māraspandān bawēd
ī pad hampursagīh ī pōryōtkēšān mad ēstād hēnd kirdan
paydāg kū
harw nēkīh ohrmazd ud ud harw anāgīh ahriman dād
ēn =iz paydāg kū
ohrmazd ud dāmān ī ohrmazd harw nēkīh ī =šān ast az dahišn ī ohrmazd
ud harw anāgīh ī =šān ast az ahriman
ud ēn =iz paydāg kū
ahriman ud dāmān ī ahriman and nēkīh ī =šān ast az dahišn ī ohrmazd
ud and anāgīh ī =šān ast az xwēš
ud ēn =iz paydāg kū
frēdōn az ī dahāg ōzad kāmist
ohrmazd guft kū =š nūn ma ōzan čē purr ēn zamīg xrafstar bawēd
ud ēn =iz paydāg kū
zarduxšt ahōšīh xwāst
ohrmazd guft
ka tō nūn ahōš kunam fraškerd kirdan nē šāyēd
ud ēn =iz paydāg kū
fraškerd zamān rāy būd ka az ī dahāg ī ēdōn margarzān rāy
ohrmazd guft kū =š ma ōzan
zarduxšt ī ēdōn weh wirāstag būd ahōš nē kird
ud ēn =iz paydāg kū
pahlom tis rāstīh ud wattom tis drōzanīh
ud ēn =iz paydāg kū
ast kē rāst gōwēd pad =iš druwand bawēd
ud ast kū drō gōwēd pad =iš ahlaw bawēd
ud ēn =iz paydāg kū
kē ātaxš ōzanēd wināh
ud ast kē ōzanēd weh
ud ēn =iz paydāg kū
tis ō wattarān nē abāyēd dādan
ud ast ka ān ī pahlom ud xwaštar xwardīg ō wattarān dahišn
ud ēn =iz paydāg kū
kirbag kirdan wināh pādifrāh hangām ud zaman ān weh dānēd
kē pad āsn_xrad ud gōšōsrūd_xrad abar nigerīdan dānēd
ud ēn =iz paydāg kū
harw kē pad āsn_xrad abar dānēd nigerīdan ēg ān tis ī az abestāg ud zand paydāg weh dānēd
ud harw kē pad gōšōsrūd_xrad paydāg weh dānēd
ud ēn =iz paydāg kū
kē pad harw dō xrad dānēd nigerīdan harw tis ī būd bawēd weh dānēd
ud ēn =iz paydāg kū
bē kē dānēd kū čē wehīh ud čē petyārag ēnyā wināh bē nē dānēd burdan
čē rādīh wehīh u =š wanīgarīh petyārag
wistāxwīh wehīh u =š wastārīh petyārag
yazišn ī yazadān wehīh u =š dēw_ēzagīh petyārag
ud ātaxš ī warahrān wehīh u =š uzdēs petyārag
rāmišn ī mardōmān ud niwāxtag ī yazadān wehīh u =š asrušt wisāndagīh petyārag
mēnōy_wurrawišnīh wehīh u =š uzdēs_paristīh petyārag
tuxšāgīh wehīh u =š ahunsandīh ud widangīh petyārag
bowandagīh wehīh u =š frāybūd petyārag
fšūnišn wehīh u =š penīh petyārag
weh_dēnīh wehīh u =š ag_dēnīh petyārag
ud dōstīh wehīh u =š waranīgīh petyārag
ud dil_dardīh wehīh u =š sturgīh petyārag
hušarmīh ud huškōyīh wehīh u =š awistāxwīh petyārag
āsrōnīh wehīh u =š ahlomōγīh petyārag
sālārīh wehīh u =š dušpāduxšāyīh petyārag
hunsandīh wehīh u =š aǰgahānīh petyārag
mihr ud dil_sōzag ud abaxšāyišn wehīh u =š šēwan ud mōyag petyārag
ud šādānīgīh ud xurramīh wehīh u =š afsōsgarīh petyārag
ud pākīzagīh wehīh u =š tan_čīnagīh petyārag
dōstīh ī zan ī xwēš wehīh u =š ǰeh_marzīh petyārag
wuzurg_menišnīh wehīh u =š abar_tanīh petyārag
nihādagīh wehīh u =š ōbastīh petyārag
ud gōwāgīh wehīh u =š nāzēnagīh petyārag
dast_kirrōgīh wehīh u =š abēsūd_kārīh petyārag
pāduxšāyīh ī wehān wehīh u =š ahmār_xwadāyīh petyārag
pādufrāh ī wināhgārān wehīh u =š abārōn_zadārīh petyārag
dādestānīgīh wehīh u =š ahmār_kešīh ud wad_xwāhīh petyārag
ērīh ud dahībedīh wehīh u =š harg ud bār ī škōhān petyārag
frahang kirdan ī pad pēšag pēšag wehīh u =š pādārīh pādifrāh petyārag
zanišn ī mardōm dušmenān ud wināhgārān kirdan wehīh
u =š kēnwarīh ud xešmenīh petyārag
āzād_mardīh ud meh_mardīh wehīh u =š sāstārīh petyārag
ud xwarišn ud dārišn ī mardōmān wehīh u =š apaymān_xwarišnīh ud apaymān_dārišnīh petyārag
ud ka ēn ud abārīg ī pōryōtkēšān abar =iz ēn dar gōwišn ud kardag
hangāmīg čiyōn awēšān ēwēn kunēd ud rāyēnēd
ēk ēn kū wināh az gēhān bē barēd
ud didīgar ēn kū =š wehīh abāg bē nē šawēd
čē ēn =iz paydāg kū wanīgarīh az gēhān bē barišn
bē ēdōn bē barišn kū rādīh bē nē kāhēd
ud ēn =iz paydāg kū wastārīh az gēhān bē barišn
bē ēdōn barišn kū wistāxwīh bē nē kāhēd
ud ēn =iz paydāg kū dēw_ēzagīh az gēhān bē barišn
bē ēdōn barišn kū yazišn ī yazadān bē nē kāhēd
ud ēn =iz paydāg kū uzdēsīh az gēhān bē barišn
bē ēdōn barišn kū ātaxš ī warahrān bē nē kāhēd
ud ēn =iz paydāg kū asrušt wisāndagīh az gēhān bē barišn
bē ēdōn barišn kū rāmišn ī mardōmān niwāxtag ī wehān bē nē kāhēd
ud ēn =iz paydāg kū uzdēs_paristīh az gēhān bē barišn
bē ēdōn barišn kū mēnōy_wurrawišnīh bē nē kāhēd
ud ēn =iz paydāg kū ahunsandīh ud widangīh az gēhān bē barišn
bē ēdōn barišn kū tuxšāgīh bē nē kāhēd
ud ēn =iz paydāg kū frāybūd az gēhān bē barišn
bē ēdōn barišn kū bowandagīh bē nē kāhēd
ud ēn =iz paydāg kū penīh az gēhān bē barišn
bē ēdōn barišn kū fšūnišn bē nē kāhēd
ud ēn =iz paydāg kū ag_dēnīh az gēhān bē barišn
bē ēdōn barišn kū weh_dēnīh bē nē kāhēd
ud ēn =iz paydāg kū waranīgīh az gēhān bē barišn
bē ēdōn barišn kū dōstīh bē nē kāhēd
ud ēn =iz paydāg kū sturgīh az gēhān bē barišn
bē ēdōn barišn kū dil_dardīh bē nē kāhēd
ud ēn =iz paydāg kū sam ud bīm az gēhān bē barišn
bē ēdōn barišn kū huškōyīh ud hušarmīh bē nē kāhēd
ud ēn =iz paydāg kū ahlomōγīh az gēhān bē barišn
bē ēdōn barišn kū āsrōnīh bē nē kāhēd
ud ēn =iz paydāg kū dušpāduxšāyīh az gēhān bē barišn
bē ēdōn barišn kū sālārīh bē nē kāhēd
ud ēn =iz paydāg kū aǰgahānīh az gēhān bē barišn
bē ēdōn barišn kū hunsandīh bē nē kāhēd
ud ēn =iz paydāg kū šēwan ud mōyag az gēhān bē barišn
bē ēdōn barišn kū mihr ud dil_sōzag ud abaxšāyišn ī mardōmān bē nē kāhēd
ud ēn =iz paydāg kū afsōsgarīh az gēhān bē barišn
bē ēdōn barišn kū šādānīgīh ud hurāmīh bē nē kāhēd
ud ēn =iz paydāg kū tan_čīnagīh az gēhān bē barišn
bē ēdōn barišn kū pākīzagīh bē nē kāhēd
ēn =iz paydāg kū ǰeh_marzīh az gēhān bē barišn
bē ēdōn barišn kū dōstīh ī zan ī xwēš bē nē kāhēd
ud ēn =iz paydāg kū abar_tanīh az gēhān bē barišn
bē ēdōn barišn ī wuzurg_menišnīh bē nē kāhēd
ud ēn =iz paydāg kū ōbastīh az gēhān bē barišn
bē ēdōn barišn kū nihādagīh bē nē kāhēd
ud ēn =iz paydāg kū nāzēnagīh az gēhān bē barišn
bē ēdōn barišn kū gōwāgīh ud rāst_gōwišnīh bē nē kāhēd
ud ēn =iz paydāg kū abēšūd_kārīh az gēhān bē barišn
bē ēdōn barišn kū dast_kirrōgīh bē nē kāhēd
ud ēn =iz paydāg kū hāmahl_xwadāyīh az gēhān bē barišn
bē ēdōn barišn kū pāduxšāyīh wehān bē nē kāhēd
ud ēn =iz paydāg kū abārōn_zadārīh az gēhān bē barišn
bē ēdōn barišn kū pādifrāh wināhgārān kirdan bē nē kāhēd
ud ēn =iz paydāg kū ahmār_kešīh ud wad_xwāhīh az gēhān bē barišn
bē ēdōn barišn kū dādestānīgīh bē nē kāhēd
ud ēn =iz paydāg kū harg ud bār škōhān az gēhān bē barišn
bē ēdōn barišn kū ērīh ud dahībedīh bē nē kāhēd
ud ēn =iz paydāg kū pādārīh pādufrāh az gēhān bē barišn
bē ēdōn barišn kū frahang kirdan ī pad pēšag pēšag bē nē kāhēd
ud ēn =iz paydāg kū kēnwarīh ud xešmenīh az gēhān bē barišn
bē ēdōn barišn kū zanišn ī dušmenān wattarān bē nē kāhēd
ud ēn =iz paydāg kū sāstārīh az gēhān bē barišn
bē ēdōn barišn kū āzād_mardīh ud meh_mardīh bē nē kāhēd
ud ēn =iz paydāg kū apaymān_xwarišnīh apaymān_dārišnīh az gēhān bē barišn
bē ēdōn barišn kū xwarišn ud dārišn ī mardōmān bē nē kāhēd
ud ēn =iz paydāg kū ka =iz ōh nē hamāg ruwān bē dārišn ī tan rāy
āwāmīhā andar gēhān ōwōn pad nigerišn abāyēd raft
čiyōn ka mard =ēw ī abēkafš hē
ud hamāg ēn gēhān mār ud gazdom ud xrafstar ud xār purr hē
u =š ōwōn bīm kū ma =m xrafstar gazēd ayāb xār padiš andar šawēd
ud ēn =iz paydāg kū
ō spazgān ud zanān rāz nē barišn
čē rāz āškārag bawēd ud ō pašēmānīh rasēd kē ō spazgān ud zanān rāz barēd
ud ēn =iz paydāg kū
abāg halag ud xwad_dōšag ud waranīg mard hamkār ud hamwāzīg nē bawišn
čē bāstān sabukīh ud anāyuxtagīh rasēd
kē abāg halag ud xwad_dōšag ud waranīg mard hamkār ud hamwāzīg bawēd
ud ēn =iz paydāg kū
abāg sāstār mard nē kōxšišn
čē zanišn ud pādufrāh windēd kē abāg sāstār kōxšēd
ud ēn =iz paydāg kū
abāg afsōsgar mard spaxr nē kunišn ud hamxwaran nē bawišn
čē bāstān ō šarm rasēd
kē abāg afsōsgar mard spaxr kunēd ayāb hamxwaran bawēd
ud ēn =iz paydāg kū
az pen ud wad_čihrag tis nē xwāhišn
čē xwēš tan duščihr kunēd ud ō pašēmānīh rasēd
kē az pen ud wad_čihr mard tis xwāhēd
ēn =iz paydāg kū
zan ud rahīg ī xwēš nēk abāyēd dāšt ud abēfrayād nē abāyēd hištan
čē bāstān pad xweš tan ranǰag bawēd ud xwarišn mizag kam dānēd
kē zan ud rahīg nē nēk dārēd ayāb afrayād hilēd
ud ēn =iz paydāg ēdōn kū
xwāstag ī az wināh nē kunišn ud ō kadag nē barišn
čē ān =iz ī kird ud pad kadag ēstēd bē wišōbēd kē xwāstag ī az wināh kunēd ud ō kadag barēd
ēn =iz ēdōn kū
tis and gōwišn čand ān ī dānēd
čē kē tis wēš gōwēd kū ān ī dānēd ān =iz ī dānēd mardōmān kam wurrawēd
ud ēn =iz ēdōn kū
xward may hangārišn ud pahikār nē kunišn
čē bāstān xešm ud ǰang az =iš bawēd kē xward may hangārišn ud pahikār kunēd
ud ēn =iz ēdōn kū
afsōsgar mard pad nazdīk nē dārišn ud saxwan az =iš nē padīrišn
čē bāstān mardōmān pad ān hunar ī =šān nēst gumān kunēd
ud dast/xwarrah kāhēd kē afsōsgar mard pad nazdīk dārēd u =š saxwan aziš padīrēd
ēn =iz ēdōn kū
xwēš tan wēš nē menišn kū =š ān ī wehīh ud hunar ast
čē bāstān pad xwēš tan ranǰag abāg wehān pahikafānag
kē xwēš tan wēš menēd kū =š ān ī wehīh ud hunar ast
ud ēn =iz ēdōn kū
wehīh ī wehān pad xwēš dārišn u =š padiš šād bawišn
čē bāstān pad duščašmīh ud weh_dušmenīh pad =iš gumān bawēnd
kē wehīh ī wehān pad xwēš nē dārēd ud pad =iš šād nē bawēd
ud ēn =iz ēdōn kū
pad pāduxšāyīh ud tuwāngarīh mast nē bawišn
čē =š bāstān weh abar wardēnd u =š wizend ud astānag abērtar awiš rasēd
kē andar pāduxšāyīh ud tuwāngarīh mast bawēd
ud ēn =iz ēdōn kū
andar xwadāy ud pāduxšāy mard aburd_framān wistāx nē bawišn
čē bāstān ō pazd ud pādufrāh rasēd
kē andar xwadāy ud pāduxšāy mard aburd_framān wistāx bawēd
ēn =iz ēdōn kū
andar riftagīh ud ōrēb wad_zārag wanī_xradag nē bawišn
čē ān ī mad ēstēd čārag ī kam dānēd u =š nōg nōg škeftīh wēš rasēd
kē andar riftagīh ud ōrēb wad_zārag wanī_xradag bawēd
ēn =iz ēdōn kū
tis ī nē mad ēstēd rāy bēš ud zarīg nē barišn
čē bāstān andar bēš ud gumānīh zīyēd kē tis ī nē mad ēstēd rāy bēš ud zarīg barēd
ud ēn =iz ēdōn kū
wād wēšīh nē kunišn
čē mardōmān pad =iš kam wistāx bawēnd
ud xwad ka hamptwyyh rasēd ayār kam windēd kē wād wēšīh kunēd
ēn =iz ēdōn kū
nihān_xēmīh nē kunišn
čē mardōmān pad =iš wistāx kam bawēnd
ud āhōg ī ast kam šāyēd wirāstan kē nihān_xēmīh kunēd
ud ēn =iz ēdōn kū
dōyīh nē kunišn
čē =š andar šahr pad frēftār dārēnd xwad dōst kam windēd kē dōyīh kunēd
ēn =iz ēdōn kū
tundīh ud duščašmīh nē kunišn
čē andar šahr pad xešmen dārēnd ud xwad bāstān ēw_tāg
kē tundīh ud duščašmīh kunēd
ēn =iz ēdōn kū
xwarišn abēgāh ud apaymān nē xwarišn
čē xwarišn mizag kam dānēd ud xwad =iz wēmār bawēd
kē xwarišn abēgāh ud apaymān xwarēd
ēn =iz ēdōn kū
ranǰ ī apaymān nē barišn
čē =š bāstān was wēmārīh rasēd kē ranǰ ī apaymān barēd
ēn =iz ēdōn kū
pad ān ī baγō_baxt hunsand bawišn
čē bāstān andar ahunsandīh ud bēš zīyēd kē pad ān ī baγō_baxt nē hunsand
ud ēn =iz ēdōn kū
ō ōy ī wad_xrad ud xwad_dōšag mard āhōg ī =š ast nē gōwišn
čē āhōg bē nē wirāyēd ud dušmen hangēzēnēd
kē ō ōy ī wad_xrad ud xwad_dōšag mard āhōg ī =š ast gōwēd
ēn =iz ēdōn kū
dāšn ō anespās ud wattarān nē kunišn
čē =š pad xwāstag zyān u =š pad ruwān druwandīh
kē dāšn ō anespāsān wattarān kunēd
ēn =iz ēdōn kū
ōy kē ōrēbīh mad ēstēd nē zanišn u =š nē āwēnišn
čē =š bāstān ōrēbīh wēš rasēd u =š ka rasēd ayār kam windēd
kē ōy kē ōrēbīh rasīd zanēd ayāb āwēnēd
ud ēn =iz ēdōn kū
pad xwadāyīh ud xwāstag apaymān waranīg nē bawišn
čē =š nēkīh ī mad ēstēd mizag kam dānēd ud xwad =iz andar ahunsandīh ud anāsānīh zīyēd
kē pad xwadāyīh ud xwāstag apaymān waranīg bawēd
ēn =iz ēdōn kū
ka wizīrēd abāg wattarān hamkunišn ud hambarišn nē bawišn
čē ka ān ī wattar ō kunišn rasēd ōy =iz bē dusrawēnēnd
ud ka ōy wizend rasēd ōy ī wattar ayār nē bawēd
kē abāg wattarān hamkunišn ud hambarišn bawēd
ēn =iz ēdōn kū
xwēš_wizāyīh ud škōhīh ud anādānīh rāy ōy ī did kam nē menišn
u =š wehīh kam nē wēnišn kū ān ī ast
čē bāstān mardōmān pad kēnwarīh ud xwad_dōšagīh pad =iš gumān bawēnd
xwad =iz āhōg ī xwēš kam wēnēd
kē xwēš wizāyīh ud škōhīh ud anattānīh rāy ōy ī did kam menēd
u =š wehīh kam wēnēd kū ān ī ast
ēn =iz ēdōn kū
hušnūdīh ī xwēš tuwāngarīh ud pāduxšāyīh rāy ōy ī did wehīh wēš nē wēnišn kū =š ān ī ast
čē bāstān mardōm pad āzwarīh ud waranīgīh ud kōdag_nigerišnīh padiš gumān bawēnd
kē ōy ī did hušnūdīh ī xwēš tuwāngarīh ud pāduxšāyīh rāy wehīh wēš wēnēd kū =š ān ī ast
ēn =iz ēdōn kū
wad_āmār ud wad_hangār nē bawišn
čē =š kas tis aziš pad_bīmtar xwāhēd ud padīrēd ud xwad kam windēd
kē wad_āmār ud wad_hangār bawēd
ud ēn =iz ēdōn kū
zand ud kār ud dādestān ǰuttar nē gōwišn ud kunišn ud rāyēnišn
čiyōn ān ī pōryōtkēšān guft ud kird ud čāšt ud ul āwurd
čē =š ahlomōγīh padiš ō gēhān āyēd
kē zand ud kār ud dādestān ǰuttar čāšēd ud gōwēd ud kunēd
čiyōn ān ī pōryōtkēšān guft ud kird ud čāšīd ud ul āwurd
ēn =iz ēdōn kū
ka wizīrēd hērbedestān ī pad abestāg ud zand ud abārīg =iz frahang ī pad pēšag pēšag az wattarān nē kunišn
čē =š frahang wattar ud xwad ag_ruwāntar bawēd
kē hērbedestān ī pad abestāg ud zand ud abārīg =iz frahang ī pad pēšag pēšag az wattarān kunēd
ēn =iz ēdōn kū
ō wattarān ud ahlomōγān zand ud abestāg nē čāšišn
čē wināh andar gēhān rawāgīh wēš bawēd
kē ō wattarān ud ahlomōγān zand abestāg čāšēd
ud ēn =iz ēdōn kū
xwad uzwān ō drō nē frahenǰēnišn
čē ān =iz ī rāst gōwēd pad wizurd kam dārēnd kē uzwān ō drō frahenǰēnēd
ud ēn =iz ēdōn kū
anast ud drō abar kas nē gōwišn
čē pad menišn ī mardōmān zad bāstān ō kunišn abērtar rasēd
u =š xwad =iz anast ud drō wēš abar kunēnd
kē abar kasān anast ud drō gōwēd
ēn =iz ēdōn kū
ēmār_kešīh ud wad_xwāhīh nē kunišn
čē pas ka pad =iz ān ī rāst dādestān xwāhēd
mardōm pad =iš gumān ud bāstān wizīr kam windēd
kē ēmār_kešīh ud wad_xwāhīh kunēd
ēn =iz ēdōn kū
pad nēkīh ī =š ast dušpadēxwīh nē kunišn
čē andar gēhān pad pen dārēnd u =š xwad =iz ka andar abāyēd kam windēd
kē pad nēkīh ī =š ast dušpadēxwīh kunēd
ēn =iz ēdōn kū
zan ud rahīg ī xwēš rāy bāstān pad āhōg tis nē gōwišn
čē =š mardōm pad dušāgāh dārēnd
u =š zan =iz ud rahīg ī xwēš pad dušmen dārēnd
kē zan ud rahīg ī xwēš rāy bāstān pad āhōg tis gōwēd
ēn =iz ēdōn kū
az xwēš_kārīh ud pēšag xwēš bē nē estišn
čē ān frahang ī ast wanī kunēd
u =š mardōm pad wad_hunarīh padiš gumān bawēnd
kē az xwēš_kārīh ud pēšag ī xwēš bē ēstēd
ēn =iz ēdōn kū
kas rāy afsōs tis nē gōwišn u =š pas_gōwišnīh nē kunišn
čē =š pad mardōm_dušmenīh padiš gumān bawēnd
ud xwad =iz dušmen ō xwēš tan xwāhēd
kē abar kas afsōs kunēd ayāb =iš pad pas_gōwišnīh tis gōwēd
ēn =iz ēdōn kū
ān ī hamēmāl hamēmāl menišn u =š abāg wastār nē bawišn
čē xwāhišn ī xwēš kam wēnēd ud xwad =iz pad dādestān wēš ēraxtēd
kē hamēmāl hamēmāl nē menēd ayāb =iš abāg wastār bawēd
ud ēn =iz ēdōn kū
pēš ī ōy ī az =iš meh ud dānāgtar bāstān saxwan was nē gōwišn
čē ōy ī pēš_gāh abārīg mardōmān kam abāyēd
ud xwad =iz ān ī gōwēd kār aziš kam kunēnd
kē bāstān pēš ī ōy ī meh ud dānāgtar saxwan was gōwēd
ēn =iz ēdōn kū
zan ud rahīg ī xwēš dōst bawišn bē apaymān waranīg pad =iš nē bawišn
čē ō wehīh ud hunar kam frahenǰēd
kē ō zan ud rahīg ī xwēš nē dōst ayāb apaymān waranīg pad =iš bawēd
ēn =iz ēdōn kū
pad zan ī kārān waranīg nē bawišn
čē dōšāram ī zan ī xwēš bē kāhēd ud xwad =iz ō ǰeh_marzīh wardēd
kē pad zan ī kārān waranīg bawēd
ēn =iz ēdōn kū
pad nēkīh ud tis ī xwāhēd apaymān waranīg nē bawišn
čē pas ka ān ī xwāhēd nē windēd ēg =iš bēš wēš bawēd
kē pad nēkīh ud tis ī xwāhēd apaymān waranīg bawēd
ēn =iz ēdōn kū
xwēš tan ēdōn dārišn kū ān ī mardōmān nēktar pad dēm bawēd
nē ēdōn kū =š ān ī xwad weh sahēd
čē bāstān andar šahr pad abar_tan dārēnd ud mardōmān abērtar bē bēzēd
kē xwēš tan nē ēdōn dārēd kū ān ī mardōmān nēktar sahēd
čē ēdōn dārēd kū ān ī xwad weh sahēd
ud ēn =iz ēdōn kū
tis tis ō wattarān pad čār nē dahišn
čē pad xwāstag zyān ud pad ruwān druwandīh kē tis ō wattarān pad čār dahēd
ēn =iz ēdōn kū
saxwan abēgāh ud apaymān nē gōwišn
čē mardōmān kam abāyēd ud ān ī gōwēd kam padīrēnd u =šān xwārtar pad dēm bawēd
kē saxwan abēgāh ud apaymān gōwēd
ud ēn =iz ēdōn kū
rāz ō was kas nē barišn
čē rāz āškārag bawēd ud was kas pad rāz abāyēd dāštan u =š az was kas bīm
kē rāz ō was kas gōwēd
ēn =iz ēdōn kū
andar yazadān mardōmān anespās nē bawišn
čē nēkīh ī ast az =iš bē šawēd ud ān ī nēst aw =iš nē rasēd
kē andar yazadān mardōmān anespās bawēd
ēn =iz ēdōn kū
az bēš ud āzār ud ōrēb ī mad ēstēd was kas āgāh nē kunišn
čē mardōmān pad =iš wēš andar ayārand ud dušmen pad =iš ayārandtar bawēnd
kē az bēš ud āzār ud ōrēb ī mad ēstēd was kas āgāh kunēd
ēn =iz ēdōn kū
mihrān_druzīh nē kunišn
čē wanī_būdīh az =iš bawēd kē mihrān_druzīh andar
ēn =iz ēdōn kū
ēn and tis ud abārīg wehīh ud āhōg ud tis ī az and tis bawēd
az xēm ud xrad ud hōg ud frahang waranīgīh
ud ēn =iz ēdōn kū
az frahang ī nēk xrad ī nēk bawēd
ud az xrad ī nēk hōg ī nēk bawēd
az hōg ī nēk xēm ī nēk bawēd
ud az xēm ī nēk kunišn ī frārōn bawēd
ud pad kunišn ī frārōn druz az gēhān bē kird bawēd
ud ēn =iz ēdōn kū
az frahang ī wad xrad wad
ud az xrad ī wad hōg ī wad
az hōg ī wad xēm ī wad
ud az xēm ī wad kunišn abārōn bawēd
ud kunišn ī abārōn rāy druz andar gēhān wēš
ēn =iz ēdōn kū
az spāsdārīh xwarrahōmandīh
ud az xwarrahōmandīh wahuman_dārīh bawēd
ud az wahuman_dārīh āštīh
ud az āštīh wistāxwīh
ud az wistāxwīh dōstīh
ud az dōstīh mihr
ud az mihr andar gēhān dārišn ud parwarišn ī mardōmān paywandīhēd
ēn =iz ēdōn kū
az anespāsīh xwarrah ī xwēš kāhēd
ud az xwarrah ī xwēš kāstan dušmenīh
ud az dušmenīh anāštīh
ud az anāštīh awistāxwīh
ud az awistāxwīh dušmenādīh
ud az dušmenādīh dardīh ud mihrōdruzīh bawēd
ud pad dardīh ud mihrōdruzīh ēk az did bē wisānēnd mardōm
ēn =iz ēdōn kū
az bowandag_menišnīh yazadān_šnāsīh bawēd
ud az yazadān_šnāsīh mēnōy_wurrawišnīh bawēd
ud az mēnōy_wurrawišnīh ruwān_dōstīh bawēd
ud az ruwān_dōstīh huāmārīh bawēd
ud az huāmārīh kirbag kirdan bawēd
ud az kirbag kirdan ruwān bōzīhēd
ud ēn =iz ēdōn kū
az tar_menišnīh yazadān anešnāsīh bawēd
ud az yazadān anešnāsīh amēnōy_wurrawišnīh
ud az mēnōy awurrawišnīh aruwānīh
ud az aruwānīh anāmārīh
ud az anāmārīh bazag wināh kirdan
ud az bazag wināh kirdan rāy mardōm druwand bawēnd
ud ēn =iz ēdōn kū
az tuxšāgīh hunarōmandīh
ud az hunarōmandīh wehīh_dōstīh
ud az wehīh_dōstīh pēšag ī xwēš šnāxtan
ud az pēšag ī xwēš šnāxtan xwēš_kārīh ī xwēš kirdan
ud az xwēš_kārīh ī xwēš kirdan ābādānīh
ud az ābādānīh rāy mard zan ud rahīg dāštan ud burzišn pāduxšāyīh wēš bawēd
ēn =iz ēdōn kū
az aǰgahānīh ahunarīh
ud az ahunarīh weh_dušmenīh
ud az weh_dušmenīh axwēš_kārīh
ud az axwēš_kārīh škōhīh
ud az škōhīh dušburdīh ud anādānīh ī xwēš tan ud zan ud rahīg bawēd
ud ēn =iz ēdōn kū
az xwēš tan andar abzāyišn ud kār dāštan baγōbaxt ī xwēš šnāxtan
ud az baγōbaxt ī xwēš šnāxtan hunsandīh
ud az hunsandīh xwārīh ud āwāmīh
ud xwārīh ud āwāmīh rāy burzišnōmandīh bawēd
ud az burzišnōmandīh rāy mard andar =it šahr pad pāduxšāyīh dārēnd u =š wēš menēnd
ēn =iz ēdōn kū
az apaymānīh wanīgarīh
ud az wanīgarīh abowandagīh
ud az abowandagīh margīh bawēd
ēn =iz ēdōn kū
az paymānīgīh fšūnišn
ud az fšūnišn tis ī xwēš nigāh dāštan
az tis ī xwēš nigāh dāstan bowandagīh
ud az bowandagīh rādīh
ud az rādīh frāxwīh
ud az frāxwīh zīndagīh bawēd
ēn =iz ēdōn kū
az baγōbaxt ī xwēš nē šnāxtan anhunsandīh
ud az anhunsandīh anāsānīh ud anāwāmīh
ud az anāsānīh ud anāwāmīh aburzišnīgīh bawēd
ud aburzišnīgīh rāy mardōm andar gēhān kam menēnd
ēn =iz ēdōn kū
az hunar ud wehīh ī xwēš pad paymān menīdan bowandag_mēnīdan ī wehān bawēd
ud az bowandag_mēnīdan ī wehān was dōst xwāstan
ud az was dōst xwāstan gund ud ayār ī was bawēd
ud gund ud ayār ī was rāy mardōm pad_ _rāmišntar ud abēbīmtar zīyēnd
ēn =iz ēdōn kū
hunar ud wehīh ī xwēš az paymān wēš menīdan rāy
tar_menišnīh ī andar wehān
ud az tar_menišnīh ī andar wehān dušmen ī was kird bawēd
ud was dušmenīh rāy mard andar_bīmtar ud arāmišntar zīyēd
ud ēn =iz ēdōn kū
az wiyāxanīh hangāmīg_saxwanīh
ud az hangāmīg_saxwanīh pad_xrad_gōwišnīh
ud az pad_xrad_gōwišnīh pad_gāh_gōwišnīh bawēd
ud az saxwan ī pad gāh ud hangām guftan mard xwarrah ī xwēš abzāyēd
ēn =iz ēdōn kū
az tundīh halagīh
ud az halagīh akirdār_gōwišnīh
ud az akirdār_gōwišnīh abēgāh_gōwišnīh bawēd
ud abēgāh_gōwišnīh rāy mard xwarrah ī xwēš kāhēd
ēn =iz ēdōn kū
az anāzīh pākīzagīh
ud az pākīzagīh padīruftagīh
ud az padīriftagīh dil_dardīh
ud dil_dardīh rāy mard wistāxtar bawēd ud kirbag weh ayārēd kirdan
ēn =iz ēdōn kū
az āzwarīh rēmanīh
ud az rēmanīh škeftīh ud wad_dilīh bawēd
ud škeftīh ud wad_dilīh rāy mard andar gēhān kam menēnd
ēn =iz ēdōn kū
az frārōn_ _tuxšāgīh frārōn_kunišnīh bawēd
ud az frārōn kunišnīh mard xwāstag dagrtar pattāyistan xwārtar dāštan
ēn =iz ēdōn kū
az abārōn tuxšāgīh abārōn kunišnīh bawēd
ud az abārōn kunišnīh rāy mard xwāstag ī xwēš bē wišōbēd
ēn =iz ēdōn kū
az rāstīh rāst_gōwišnīh ī pad xrad xwarrahōmandīh abzāyēd
ud abzāyīd ī mardōmān pad =iš bawēd
ud az xwarrahōmandīh ud abzāyīd ī mardōmān pad =iš
mard ō burzišn ud pāduxšāyīh ud kār ī šahr rasēd
ēn =iz ēdōn kū
az drōzanīh zad_brāhīh ud nē abzāyīd ī mardōmān
nē abzāyīd ī mardōmān rāy mard nēkīh ī ast appār bawēd
ud ēn =iz ēdōn kū
az waranīgīh nē kirdan nihād_snehīh ud ǰang bē nihād
ud az nihād_snehīh ud ǰang bē nihād ēr_menišnīh
ēr_menišnīh rāy mard wehīh ī xwēš pad paymān ud ōy ī did wēš menēd
ēn =iz ēdōn kū
az waranīgīh mard snehōmand ud dušframān bawēd
ud az snehōmandīh ud dušframānīh anēr_menišnīh
ud az anēr_menišnīh xwēš tan wēš ud ōy ī did kam menīd bawēd
ēn =iz ēdōn kū
kē xwēš tan pad dādwarīh ud dādestān dārēd
ēg sūd ī xwēš rāy ōy ī did zyān ud ān =iz ī =š pad_dād nē nēk sahēd pad kasān nē kunēd
ēn =iz ēdōn kū
kē xwēš tan pad dādwarīh ud dādestān nē dārēd
ēg ka =š xwad nē sūd pad ōy ī did zyān ēg =iz =iš rāmišn
ud ēn =iz ēdōn kū
az šnāsīh ī dēn mānsr_ōšmurišnīh bawēd
ud az mānsr_ōšmarišnīh pēšag ī dēn ud yazišn ī yazadān abzūd bawēd
ud az pēšag ī dēn ud yazišn ī yazadān abzūdan druz bē kirdan ī az gēhān
ud az druz bē kirdan ī az gēhān anōšagīh ud fraškerd ud rist_āxēz bawēd
ēn =iz ēdōn kū
az anešnāsīh ī dēn mardōm bē ō dēw_ēzagīh ud uzdēs_paristīh wardēnd
ud dēw_ēzagīh ud uzdēs_paristīh rāy druz andar gēhān
ud az druz andar gēhān margīh ud anāgīh bawēd
ēn =iz ēdōn kū
kē xwēš tan ō yazadān ud wehān dahēd ēg =iš ān and wehīh pad tan mehmān
u =š āhōg ud wattarīh pad ǰastag pēšār bawēd
ēn =iz ēdōn kū
kē xwēš tan ō dēwān wattarān dahēd ēg =iš ēn and āhōg pad xwēš tan mehmān
u =š wehīh pad ǰastag
ēn =iz ēdōn kū
ēn and wehīh ud āhōg pad ēw tan ud ēw āwām nē
bē pad harw tan ud harw āwām bawēd
ēn =iz ēdōn kū
tis ast ud tis nēst
ud tis ī ast ān kē ruwān pad =iš bōzīhēd
ud tis ī nēst ān kē ruwān pad =iš druwand kunīhēd
ēn =iz ēdōn kū
ruwān zīndagīh az xēm
ud xrad zīndagīh az burdīh
ud xwarrah zīndagīh az rāstīh
ud harw se gōkān_šnāsīh pad hērbedestān nām ēr_menišnīh
ēn =iz ēdōn kū
ka myazd ud gāhānbār ud dāšn ud ayārīh ī ō wehān bē kāhēd
dušpāduxšāyīh mardōmān ud dardīh ī ǰōrdāyān
dušwarzīh ud kam_barīh zamīg dušwārānīh bē abzāyēd
ud ka kirbag ī xwēdōdah bē kāhēd ud tārīkīh bē abzāyēd ud rōšnīh bē kāhēd
ud ka yazišn ī yazadān ud panāhīh ud ǰādag_gōwīh ī ō wehān bē kāhēd
dušpāduxšāyīh ī pādixšāyān ud adādestān_kunišnīh bē abzāyēd
ud wattarān abar wehān abarwēz bawēnd
ēn =iz paydāg kū
ēdōn čiyōn zamīg kadag ī āb
ud āb pērāyag ī warz
ud warz abzāyišn ī gēhān az =iš
bē bar dāštārīh ī kišwar
ēdōn =iz dānāgīh xānag ī wehīh
ud wehīh tan ī xrad
ud xrad abzāyēnīdār ī gēhān
gētī pad ēn šaš tis rāyēnīhēd
pad zamān ud ǰahišn ud dānišn ud ayār ud abzār ud tuxšāgīh
ud dānāg wizīrēnīd kū az ēn šaš se mēnōyīg ud se gētīyīg
zamān ud ǰahišn ud dānišn mēnōyīg
ud ayār ud abzār ud tuxšāgīh gētīyīg
ēn =iz čahār āhōg andar mardōm dušmenīh būd guft ēstēd
gilag ud afsōs ud āwēnišn ud penīh
ahlomōγ se ēwēnag
frēftār ud frēftag ud xwad_dōšag
xwad_dōšag ān bawēd ī ka gōwēd kū sen weh bawēd az ādurbād
ud xwad_dōšagīhā ān sen kunēd
ud frēftag ān bawēd čiyōn hāwištān ī sen
frēftār čiyōn xwad sen
kē tis az ān ī čiyōn pōryōtkēšān ī pēšēnīgān čāšīd pad nigerišn bē wardēnēd
kē tis šaš ēč ēk andar nēst ān ī abāyišnīgtar ī az nēmag ī yazadān andar nēst
šarm ud škōy ud bīm ud mihr ud spās ud ēmēd
šarm az yazadān
ud škōy az mardōmān
ud bīm az dušox
ud mihr abāg ruwān ī xwēš
ud spās andar yazadān ud mardōmān
ud ēmēd ō tan ī pasēn
ud gōwēnd kū
hufraward ādurbād ī māraspandān xīr ī gētī pad wīst_panǰ dar nihād būd
panǰ pad brēh ud panǰ pad kunišn ud panǰ pad hōg ud panǰ pad gōhr ud panǰ pad abarmānd
zīndagīh ud zan ud frazend ud xwadāyīh ud xwāstag abērtar pad brēh
ahlawīh ud druwandīh ud āsrōnīh ud artēštārīh ud wāstaryōšīh abērtar pad kunišn
xwardan ud raftan ud ō zanān šudan ud būšāsp kirdan ud kār wizārdan abērtar pad hōg
xēm ud mihr ud wehīh rādīh ud rāstīh abērtar pad gōhr
ōš ud wīr ud tan brāh ud dīdan abērtar pad abarmānd
kē yazišn ī yazadān agumānīh ī pad yazadān ud astīh ī tis rāy kunēd
ān yazadān frazend u =š gāh pad garōdmān
ud kē yazišn ī yazadān astīh ī yazadān ud gumānīgīh ī pad tis rāy kunēd
ān yazadān brād u =š gāh pad wahišt
kē yazišn ī yazadān gumānīgīh ī pad yazadān ud gumānīgīh ī pad tis rāy kunēd
ān yazadān bandag u =š gāh pad hammistagān
ka yazišn ī yazadān pad anast_menišnīh ī yazadān pad nēst_dārišnīh ī tis kunēd
ān yazadān dušmen u =š gāh pad dušox
mard ōy farrox_gāh kē =š ēn panǰ gāh srūd ēstēd
ud ēn panǰ gāh ōy srūd ēstēd kē panǰ tis ast
xēm ud xrad ud āštīh ud paymān ud dādestān
xēm ān bawēd kē xwad ō kas nē frēbēd
ud xrad ān bawēd kē kas ō ōy frēftan nē tuwān
ud āštīh ān bawēd kē abāg ruwān ī xwēš āšt
ud paymān ān bawēd kē frāybūd ud aibībūd nē kunēd
ud dādestān ān bawēd kē abar dēn ī ohrmazd ēstēd
gōwēnd kū
hērbed mard ēk ādur_narsē ud ēk ādur_mihr nām būd
harw dō kird_hērbedestān abzārōmand
ud kār ud dādestān xwāstan rāy ō dar hamē šud hēnd
ud ēdōn handāxt kū =šān pad xān =ēw tōšag ēdōn hanzaft ī =šān tis =iz tis nē būd
ud ō gyāg =ēw mad hēnd kū tarrag ī daštag āb ī xwaš mad ēstād
az awēšān ēk drōn yašt ud ēk tarrag čīd
ud az ān tarrag ud āb sagr xward hēnd
ud pas ādur_narsē ō ādur_mihr guft kū
hērbed druz =ēw kadām stahmagtar ud xwarišn =ēw kadām xwārtom
ud ādur_mihr guft kū
druz =ēw āz stahmagtar ud xwarišn =ēw hamēn xwārtom ī amāh nūn xward
ud pas ādur_narsē guft kū
ka ān ī stahmagtar druz pad ān ī xwārtom xwarišn bē šāyēd zad
amāh xwēš tan ō ēmārōmandīh ī gētī dād ud pad wināhgārīh warōmand būd čē abāyēd
ud pad ān uskār az ānōh wašt abāz ō xwēš xānag šud hēnd
ud pad xwēš_kārīh ud wirāstagīh raft hēnd
gōwēnd kū
hērbed mard dō ī abzārōmand kē āgenēn hamkār ud wirāstagīhā ud pahrēxtagīhā raft hēnd
rōz =ēw ka =šān āb az čāh hamē āhaxt ud warz ī kird ēstād āb hamē dād
abestāg ud zand pad āgenēn hamē guft
handāzišn ōwōn būd kū mowbedān mowbed pad ān nazdīkīh andar rāh ī šahr hamē widard
ud gōwišn ī awēšān āšnūd ud dānist kū abzārōmand hēnd
ud xīr ud rāyēnišn ī awēšān wizōst ud kār bār aw =išān handāxtan kāmist
mard =ēw pad paygām ō awēšān frēstīd kū
agar =itān nē ranǰagīhā sahēd frāz awar
ud awēšān paygām passox ēn guft kū
amāh kār =ēw pad dast ud ka bē āyēm kār bē mānēd
ud hērbed pad stōr nišīnēd ud frāz āmadan nē ōwōn ranǰagihā ud amāh =iz kār bē nē mānēd
ud mowbedān mowbed ka ān saxwan āšnūd handēšīd kū dānāgīhā gōwēnd ud xwad frāz šud
ud abāg awēšān guftan rāyēnīd ud ō kār ud bār niwēy ī ābādīhā dād
awēšān guft kū
amāh ān tis andar nē abāyēd
u =mān ōwōn weh sahēd ka ham tis dast_ranǰ xwēš zayēm
bē čiyōn =imān āšnūd huniyāg_ib =ēw sar andar ō xānag ī hērbed šād ēstēd
ud ēdōn kund kū hērbed az was_ābīh ud kasān az tang_ābīh nē mīrēnd
ud ōy dānist kū ēn saxwan was_xwāstagīh ī man rāy gōwēnd ud ō xwēš xānag šud
u =š ō awēšān ǰud ǰud drahm 2000 frēstīd
ud awēšān harw mard =ēw bē dō drahm frāy tis nē stad ud abārīg abāz frēstīd
u =šān pad paygām passox ēdōn guft kū
amāh ēn nē guft kū ’w ’y’č šyyč ō xān ī amāh kun
ud amāh ān ī abāyist stad ud abārīg abāz frēstīd
tō ō ōy kas dah kē az amāh wēš_uzēntar u =š pad kār abērtar andar abāyēd
gōwēnd kū
husrōy anōšag_ruwān guft kū
ēn se wāzag wāzag xwadāyān pāduxšāyān tuwānīgān
abārīg =iz harw kas bē šnāxtan ud kār az =iš kirdan awizīrišnīgīhā andar abāyēd
ēk frasāwandīh bē šnāxtan ud ēk ēr_menišnīh ud ēk hunsandīh
čē pad šnāsagīh ī frasāwandīh ī xwēš
bē šnāxtan ī ān ī andar =iz ēk rōz_šabān bē šāyēd madan
ud pad ēr_menišnīh xwēš menišn pad ēn warm bē kunēd kū
ān =iz ī duščihrtom anāgīh ī andar gēhān ast wsm šāyēd burdan
ō =iz man šāyēd madan
pad hunsandīh ka =š anāgīh ī pad ān ēwēnag awiš rasēd ī čārag xwāstan nē šāyēd
kāmagīhā pad =iš hunsand bawēd ud wad dōgānag bē nē kunēd
ēk ān ī az anāgīh ī frāz rasēd ud ēk ān ī az ahunsandīh
guft ēstēd kū
kē pad ān ī mad ēstēd hunsand ēg =iš niyāz nē paydāg
čē kē hunsand tuwānīg ud kē pen_āmār ačārag
ud gōwēnd kū
wehdād ī ādur_ohrmazdān ī mowbedān mowbed būd
ud frāz ō gyāg =ēw mad u =š hērbed mard dō dīd kē esm az kōf pad pušt ī xwēš hamē kašīd
ud ranǰag būd hēnd
u =šān abestāg zand pad āgenēn hamē guft
u =š az awēšān pursīd kū
ka ašmāh kerdgār ud abzārōmand paydāg hēd čē čim rāy kār ī pad ēn ēwēnag hamē kunēd
ud awēšān pad passox guft
kū =mān āšnūd ēstēd kū anāgīh ī ahriman bē dād pāyagīhā harw kas gyāg ēw widārdan abāyēd pad gētī ayāb pad mēnōy
ud amāh ōwōn weh sahēd ka bahr ī xwēš pad gētī bē widāram
kū abāg anāgīh_widārišnīh rōšnīh =iz ī xwaršēd māh wēnēm
ud xwarišn dārišnīh ud darmān ud čārag ī anāgīh ud abārīg was nēkīh windēm
u =mān pad ān xīr spās =iz ēw hangārd
ud passand =ēw ī az mēnōyān ud gētīyān bawēd
ud nē =iz mēnōyīhā pad dušox widārēm kē tis =iz nēkīh pad_gumēzag nēst
ud hangārd ud passand ī az kas fradom nēst
ud az =iz gyāg =ēw ī ōwōn abd čiyōn wahišt ǰudāg bawēm
gōwēnd kū
ham wehdād guft kū kē
dagrand zamān az pas dānāgān raft ēstēd
ud xwad =iz dānāg ēg =iz =iš dānišn =ēw ēn sūdōmandtar
ka bāstān andar ō tan ī xwēš nigerēd kū čē ham ud abar čē ēstam ud az pas čē ham
u =š ēn =iz guft wehdād kū
yazadān tis =ēw pākīh wēš andar abāyēd ud pākīh =ēw xēm ī nēk weh
ud kē xēm nē wirāst ēstēd rasišn ī yazadān ō tan kem bawēd
gōwēnd kū
ādurbād ī māraspandān guft kū
mardōmān xēm ī wad bē šnāsišn ud dūr az =iš pahrēzišn
čē ka xēm ī wad šnāxt ud az =iš pahrēxt druz škast ud mard bōxt
ādurbād ēn =iz guft kū
hagriz anāgīh =ēw ō man nē mad kē =m ēn se āsān_menišnīh andar nē būd
ēk ēn kū az abzār ī ahriman kast ud pad man bē sazist
ēk ēn kū ābādīhā čē wattar šāyist hē būd
ud ēk ēn kū =m anāgīh =ēw ō tan ī frasāwand mad nē ō ruwān ī hamēyīg
ādurbād ēn =iz guft kū
hagriz man kas rāy nēk ud kas man rāy wad pad mādagwarīhā nē kird
čē =mān ǰud ǰud mādagwarīhā pad xwēš tan kird
ādurbād ēn =iz guft kū
awarēd tā xwēš tan arzānīg bē kunēd čē farrox ōy ī arzānīg
ēnyā yazadān sūd_šnās hēnd ud dānēnd kū
nēkīh ī pad kas kunīhēd čiyōn abāyišnīgtar pad gētī ayāb pad mēnōy
ud nigerēnd ud handāzēnd ud pāddāšn ī arzānīgān ō ānōh kū burdan weh šāyēd barēnd
čē harw dō awēšān xwēš mēnōy ud gētī
ud pad ān bahrag ōy ī arzānīg hamē šnāyišn bawēd
fradāg =iz wēnam ud dānam u =m pad daxšag u =m tuwān kirdan
dēw =ēw ast ī frēftār ī spōzgār ī wiyābāngar ī garān_wināh
ud gōwēnd kū
ādurbād ī zarduxštān ēn dēw spurrīg zad ēstād
čē hamē harw kirbag ī frāz mad ī bē rāyēnīdan šāyist
pad xwēš hangām bē rāyēnīd ud ō zamān ī wēš nē spōxt
ham ādurbād rāy gōwēnd kū =š guft kū
harw kas bē abāyēd dānistan kū
az kū āmad ham ud čim ēdar ham abāz ō kū šawam
ud man pad bahr ī xwēš dānam
čē az ohrmazd ī xwadāy āmad ham
ud apāduxšāy kirdan ī druz rāy ēdar ham
ud abāz ō ohrmazd šawam
gōwēnd kū
ādurfarnbay ud ādurbōzēd čiyōn abāg wehdād pad mowbedān_mowbedīh hamkār būd hēnd ō wehdād pursīd kū
ka amāh =iz abestāg zand warm ud mowbedān mowbed ham
tō čē rāy pad hērbedīh nām wēš barēnd kū amāh
ud wehdād pad passox guft kū
ma agar az ēn hād kū agar ēw_bār ō ahlāyīh taft ham hagriz bē nē absard ham
gōwēnd kū
mard =ēw frāz ō kōf =ēw mad ud mard =ēw dīd ī andar ān kōf mānist az =iš pursīd kū
čē nām hē u =t čē kār ud čē xwarišn
ud mērag guft kū
ranǰ_spōz nām ham
u =m xwarišn bar ī draxtān
u =m kār ēn kū wināh nē kunam
ud ān mard guft kū
nēk =iz ēd nām ud nēk =iz ēd kār ud nēk =iz ēd xwarišn
ud mērag guft kū
az tō kē bē stānēnd
ud ān mard guft kū
ahunsandīh az man bē stānēnd
gōwēnd kū
ohrmazd ī sagzīg andar bē_widerišnīh =ēw pad handarz ō hāwištān ī xwēš guft
kū =tān se wāzag gōwam
ud agar tay andar kār dārēd ēg =itān nēkīh ī mēnōy xwār ō xwēš kirdan
hamē ēdōn dārēd
kū sīh sāl ast tā bē murd ham
u =mān kāmag ud ārzōg ī tan rāy ō wināh kirdan tis =iz kār nēst
ud zan ud frazend ī xwēš rāy ēdōn menēd kū =šān nān az kasān abāyēd xwāstan
ud xwāstag xwēš rāy ēdōn dārēd čiyōn ward ī pad dašt abgand ēstēd
kār ud kirbag ī kirdan šāyēd abar tuxšēd ud frāz ō pēš ma spōzēd
guft ēstēd kū
mard ka =š xwēš xēm wirāst ud xwēš tan ēkānagīhā ō yazadān abespārēd
az ān frāz yazadān ōy ēdōn pahrēzēnd dārēnd čiyōn mard =ēw kē gawdar =ēw ēmēdwār ast
u =š rasan ēw ō srūw bandēd ud andar ō warz ud kišwān nayēd
ud ō ānōh kū čarag frāz dārēd az ānōh kū wināh abāz dārēd
guft ēstēd kū
harw kas harw rōz kamist se bār pad xwēš tan abāz nigerišn
kū =m kē abāg yazad ayāb dēw
ud agar =iš yazad abāg ēg =iš pad xwēš tan mehmāntar bē kunišn
ud agar =iš druz abāg az xwēš tan apāduxšāy bē kunišn
guft ēstēd kū
harw kas =ēw harw rōz āmār ī tan ud ruwān bē kunišn
kū =m im rōz ān ī xward az kū xward
u =m čē kird
ud az bunīh kū būd ham ud kay mad ham ud ēdar čē kunam
ud kay bē šawam ud čim bē šawam ud ka bē šawam ō kū šawam
guft ēstēd kū
mēnōy_wurrawišn mard bāstān mēnōyān ud gētīyān ī weh rāy menēd
az anī menišn ranǰag ud gursag bawēd daxšag ī mēnōy_wurrawišnīh
guft ēstēd kū
mēnōy dōst ān bawēd kē kirbag ī kunēd mēnōyān rāy kunēd
ud mizd az mēnōyān xwāhēd nē az gētīyān
guft ēstēd kū
rād ān bawēd kē az xwēš gīrēd ud ō wehān dahēd
ud ruwān dōšāram rāy dahēd
guft ēstēd kū
wistāxwīh ī pad kas ān weh ī pad yazadān
wistāxwīh pad xwēš ān weh ī pad ruwān
ud wistāxwīh ī pad tis ān weh ī pad kunišn ī frārōn dārēd
guft ēstēd kū
xēm ī abēzag ān ī ēwāz ka āz ārzōg
ud xrad ī abēzag ān ī ka xešm ud waran
ud dēn ī abēzag ān ī ka šarm ud nang frāz rasēd bē spōxtan ud zadan tuwān
ud ka xēm wirāst xrad mad
ud ka xrad mad dēn mad
ud ka dēn mad wināh nē kunēd
ud ka wināh nē kunēd ēg =iš hagriz anāg nē bawēd
guft ēstēd kū
kē pad_hunar abestān abāz ō tan ī xwēš kunēd
ud pad menišn az wizāy ī ōy ī did bē wardēd
ud abar rāstīh ul ēstēd
ōy bāstān yazad pad tan hēnd
guft ēstēd kū
dar wišād dārišn kū tā =š mardōm ō xānag rasēnd
čē kē mardōm ō xānag nē rasēnd ēg =iš yazadān ō xānag nē rasēnd
čē hamē yazadān rasišn ō ānōh wēš kū mardōm rasišn wēš
mardōm rasišn ō ānōh wēš kū xwarišn ud dārišn windēnd
guft ēstēd kū
kē may xwarēd u =š ēn panǰ tis ō paydāgīh āyēd ī =š daxšag ī ahlawīh
bowandag_menišnīh ud wahuman_dārīh ud mardōm_dōstīh ud rādīh ud āšt_xwāhīh
ud kē ēn panǰ tis ō paydāgīh āyēd ī =š daxšag ī druwandīh
tar_menišnīh ud anāštīh ud mardōm_dušmenīh ud xešmenīh ud penīh
guft ēstēd kū
ōy ī druwand mardōm fradom šēwan ī pad ruwān bawēd
ud pas dānēd kū frēft ēstam
guft ēstēd kū
ēk nē andak ud hazār nē was
ēk xīr ī mēnōy ud hazār ān ī gētī
guft ēstēd kū
pad gētī_rāyēnišnīh nērang hazār nē tis
ud pad mēnōy_rāyēnišnīh nērang ēk tis ān
guft ēstēd kū
hazār mard ō mard =ēw pad gōwišn ēdōn nē šāyēnd wurrawēnīdan
čiyōn mard =ēw ō hazār mard pad kunišn
guft ēstēd kū
gētī_frāybūd_ārāy mard mēnōy_wišuft bawēd
ud ān rāy gētī paymānīg and frāz abāyēd grift čand ān ī mēnōy nē wišōbēd
ka =šān nigerīd dānāgān ī šnāsagān pēšēnīgān
dīd frasāwandīh ī xīr ī gētī ud hamēyīgīh ī xīr ī mēnōy
ud ān ī ka gētī_rāyēnišnīh bē ān ī paymānīg ēdōn nē šāyēd rāyēnīdan
ud ka ō mēnōy nē wizandgār ud wišuftār
ān =išān čimīg sahist
ud xīr ī gētī ān ī frāy az paymān frāz hištan
kū tā gētī rēbagīh rāy ān ī weh kū gētī az =iš appār ma bawād
guft ēstēd kū
dārūg ēk ud wāzag ēk
dārūg paymān_xwarišnīh
ud wāzag hamēšag_menīdārīh ī ahlāyīh
guft ēstēd kū
paymān_xwarišnīh pad tan weh
ud paymān_gōwišnīh pad ruwān
guft ēstēd kū
gugārišn ī xwarišn pad tan weh
ud gugārišn ī xešm pad ruwān
guft ēstēd kū
az abar_tanīh wanī_būdagīh
ud az xwad_dōšagīh zyān ī garān
ud az nang_paristišnīh rāh ī dušox
kēnwar mard ruwān nē bōzēd
guft ēstēd kū
nē kas tis grift kē nē ruwān grift tā nūn
ud nē kas tis gīrēd kē nē ruwān gīrēd az nūn frāz
gōwēnd kū
baxt_āfrīd guft kū
tā fraškerd zamān harw kē andar gētī ranǰ_spōz nām gētī ka grift hilēnd
ud ka hilēnd grift
u =š ēn =iz guft kū
kē ēn nē sūyēd ān nē gīrēd ud kē ān nē wēnēd ēn nē sūyēd
ēn gētī ud ān mēnōy
u =š ēn =iz guft kū
abēnām bawēd kē nām xwāhēd
abdom =iz nām ōy xwēš kē nām andar nē abāyēd
u =š ēn =iz guft kū
rištag ēw_tāg ka sar =ēw harw kē andar gēhān pad dast ud sar =ēw man
ēg =išān bē wisāndan nē tuwān
čē ka awēšān frāz āhenǰēnd man frāz sūyam
u =š ēn =iz guft
kū =m āwām_menišnīh nē būd tā ān ī ka =m abēzagīh az xwad ud passand az yazadān xwāst
u =š ēn =iz guft kū
harw kas abar menišn ī xwēš kār ī kūrwārgarīh ud durgarīh ud gāzarīh ud āhengarīh kirdan abāyēd
čē ōwōn čiyōn kūrwārgar pōst az gard xwahēd ud narm kunēd
hamgōnag harw mardōm menišn ī xwēš xwastan ud narm kirdan abāyēd
ud ēdōn =iz durgar dār ī xwahl rāst bē kunēd
hamgōnag mardōm menišn ī xwēš ō frārōnīh rōn āhaxtan ud rāst dāštan abāyēd
ud ōwōn čiyōn gāzar ǰāmag šōyēd ud az rēm pāk bē kunēd
hamgōnag mardōm menišn ī xwēš az xēm ī wad ud wināhgārīh šustan ud pāk dāštan abāyēd
ud ōwōn čiyōn āhengar āhen tābēd ud garm kunēd
hamgōnag mardōm menišn ī xwēš ō kirbag xīr tāftan ud garm dāštan abāyēd
guft ēstēd kū
rād ān bawēd kē xwāstag az arzānīgān nē abaxšāyēd
ud xwāstag ī mard pad anōšag dārišn ān ast ī sazāgīhā bē dahēd tā
abārīg xwāstag ō mard ayāb mard ō xwāstag hilēd
guft ēstēd kū
wanīgar ān bawēd kē ō wattarān tis dahēd
guft ēstēd kū
mard az ān ī wehān dōšāram ud abāgīh ud hampursagīh wirāst_xēm bawēd
husrawīh abzāyēd ud gāh ī mēnōyīg
guft ēstēd kū
kē abāg wattarān rawēd pad xēm wattar bawēd
ud ōy =iz kē abāg ōy kas rawēd kē abāg wattarān rawēd pad xēm wattar bawēd
gōwēnd kū
ruwān az ambōh ōwōn tarsēd čiyōn tan az wiyābān
pad ēn čim čē andar ambōh frāyist ān ī ka rasišn ī wattarān bawēd
ānōh kū rasišn ī wattarān zyān ī pad ruwān was_ēwēnag šāyēd būd
gōwēnd kū
dastwar =ēw guft kū
ōwōn čiyōn petītīgīh ruwān az harw wināh pāk kunēd
ōwōn hunsandīh frāyist druz ī stahmag az ruwān abāz dārēd
guft ēstēd kū
rād ān burzišnīgtar ī pad harg ud ranǰ ī andar ādān_handōzišnīh pattūg xwāhēd ud ō arzānīgān dahēd
guft ēstēd kū
gilag_ōbār ud wīdwar ud pad kirbag kirdan tuxšāg bawišn
spās az mēnōyān xwāhišn nē az gētīyān
ka tis ān rasēd ī ruwān dōšāram rāy pad driyōšīh farg ēstādan čārag
kāmagīhā pad driyōšīh ul estišn
čē āsānīh ī tan ud abēbīmīh ud abēēmāragīh ī pad ruwān az =iš
ud pad driyōšīh ōy ul tuwān ēstādan kē ān ī pad dāštan ī tan andar abāyēd
az ān ī kem_mādītar rāmišn wēš kū az ān ī wēš_mādītar
ud kē nē ēdōn ōy pad driyōšīh ul ēstād nē tuwān
ud kē nē ačāragīhā bē sūd ī az driyōšīh rāy pad driyōšīh ul ēstēd
ēg =iš pad bahr ī xwēš ahriman abāg wišūdagān az gēhān bē kird bawēd
andar harw gāh az ān tis kē ērangīh ī ruwān ud dusrawīh ī tan az =iš būd nē šāyēd
xwēš tan pad_rāmišn dārišn
rāmišn az ān ī frārōn tis ōwōn pad niwāzišn dārišn čiyōn ān ī aburnāyīg
ud ōwōn pad =iš tuxšišn kū tā =š rāmišn hagriz az tan bē nē šawād
ud ka rāmišn ān tis xwāhēd ī ka =š ō kāmag sāzēnd wināh az =iš bē šāyēd būd
ān tis nē bē anī tis =ēw ī ka kunīhēd rāmišn abzāyēd wināh būd nē šāyēd kunišn
ud pad ēč ēwēnag rāmišn az tan bē nē hilišn
čē aburnāyīg was ka tis ān xwāhēd ī ka =š ō kāmag sāzēnd wināh az =iš šāyēd būd
ka pad guharīgīh ī ān tis xwāhēd
ōwōn xwālēn tis čiyōn xurmāg =ēw ayāb gōz =ēw dahēnd hunsand ud pad_rāmišn bawēd
ud dānāgān rāmišn ī ōwōn arzōmand hunsandīh rāy guft ēstēd
guft ēstēd kū
andar pādixšāyīh xešm zan ud andar apāduxšāyīh bēš kū =t wahuman andar tan gāh gīrād
čē kē wahuman andar tan gāh nē gīrēd ēg =iš ruwān andar garōdmān gāh nē gīrēd
az āzār ud bēš ī pad kasān kirdan dūrtar pahrēz kū az nasāy ī mardōmān
čē ālūdagīh ud rēmanīh ī ō tan rasēd šustan ud pāk kirdan xwārtar šāyēd
kū ān ī ō ruwān rasēd ī bē pad petītīgīh ud puhl ud pazd ī garān ud dušwār ēnyā
šustan ud pāk kirdan nē šāyēd
harw rōz se bār xwaršēd yazišn xwēš tan bē ō yazadān abespārišn
ud astīh ud hamēyīgīh ī yazadān
ud anastīh ud abesīhišnīgīh ī ahriman ud dēwān bē gōwišn
kū abdom bē ō anastīh ud zadagīh rasēnd
ud harw wināh ud māndag ī andar rōzgār pēšār būd pad ēn menišn kū did nē kunam
az =iš abaxš ud pad_petīt bawišn
ud harw rōz kamist se bār xwēš tan pad =iz ēn bē āmārēnišn
kū =m im rōz čē xward čē dāšt
u =m bōzišn ī ruwān rāy čē kird
ud čiyōn =im xward kird ayāb nē
ud im rōz yazadān ayār būd hēnd ayāb dew
ud ka waran ī tan frāz rasēd ud pad burzišn ud nēkīh ī frāy az paymān sazāgīhā aweštābēd
ēg čār ēn weh ka =š frasāwandīh ī tan ud xīr ī gētī ō padīrag barēnd
ud ēn handēšānd kū
ēdōn hangār kū =m guft ēstēd ud kird ud ō xwēš xwāst ēn burzišn ud nēkīh
pas =iz čē sūd ka =m hišt ud bē šud abāyēd
ud ka ēdōn ēg frāz nē gīram kū =m dard ī az bē hišt ud šud awiš nē rasēd
ud mardōmām ēn se tis dušwār kirdan ka kunēnd pad =iš ahlawtar bawēd
ēk ān ī ka =š was =iz tars ud zyān az mard =ēw dīd ēstēd pad =iš nē kēnīg
ud ān mard dušmen anāg_kāmag nē bē dōst ud nēkīh_kāmag bawēd
ēk ān ī ka bē ō gyāg =ēw rasēd kū =š xwarišn wēš kū ēw pih abāg nēst
ud pad =iz wēš awiš mad ēmēd nē dārēd
u =š mardōm kē xwarišn nēst abar frāz rasēnd čand šāyēd bahr dahēd
ēk ān ī ka mard ī ǰuwān abāg zan ī ǰuwān ī hudīdag ī nē xwēš pad wiškar gyāg ō āgenēn rasēnd
u =šān xwarišn xward ud ser ud xurram ēstēnd ud ēk ō did abēr kāmag
ud pas =iz ān mard ruwān dōšāram rāy abāg ān zan nē xufsēd ud kāmag nē rāyēnēd
guft ēstēd kū
pad ān ī pad zīndagīh andar abāyēd tuxšāgīh
ud pad ān ī pad ruwān andar xwēš_kārīh
ud pad ān ī pad bē_widerišnīh andar weh_kirdārīh sūdōmandtar
ud pad zīndagīh druyistīh ud padēxwīh ud āsānīh ud abēbīmīh ud rāmišn
ud pad ruwān tuxšāgīh ī pad kirbag
ud pahrēz ī az wināh
ud pad bē_widerišnīh nām ud husrawīh abāyišnīg
ēn and tis ān weh ī az ēn and tis bawēd
druyistīh az paymān
ud padēxwīh az adēn
ud rāmišn az frārōnīh
ud āsānīh az hunsandīh
ud abēbīmīh az awināhīh
ud tuxšāgīh ī pad kirbag
ud az wināh pahrēxtan az šnāsīh
ud nām ud husrawīh ī wuzurg az kunišn ī nēk
guft ēstēd kū
pad mardōmān se tis ēn hučihrtar
burdīh ī nē az nidagīh
ud rādīh ī nē pāddāšn
ud tuxšišn ī nē az mizd ī gētī rāy
guft ēstēd kū
pāsdārīh ēd bawēd
kē ēn tan diz mānāg bē kird u =š pās abar frāz gīrēd
u =š yazad andar dārēd ud dēw andar awiš nē hilēnd
kē mardōmīh ast ēg =iš az pas ī ōy abāyēd būd kē =š bōzišn ī ruwān nimāyēd
pad ast hangām ka xwēš tan karr ud kōr ud gung homānāg bē kunišn
čē kōrīh weh čiyōn ān tis nigerīdan ud ārzōg pad =iš būd ī ō ruwān wizend
ud karrīh weh čiyōn ān tis āšnūd ī āmār ud pursišn ī pad ruwān az =iš šāyēd būd
ud gungīh weh čiyōn ān tis guftan kē abdom pad =iš ēraxtag ud abōzišnīg bawēd
guft ēstēd kū
kē husrawīh az dusrawīh
ud passand ī wehān az wattarān
ud stāyišn az nikōhišn
dōšāram ī ruwān az ān ī tan
ēmēd ī mēnōy az ān ī gētī nē weh sahēd
ud pad ō xwēš kirdan nē tuxšēd
ān ī pad ān ēwēnag azād weh
čē ōy kē pad čim kē rāy dād ēstēd nē tuxšēd
nēst tis ī ka =š abar rasēd weh kū nihang_zīyišnīh
mardōmān xwēš tan nē čagād bē gawr bē kunišn
čē gawr harw āb ī abar wārēd pad =iš bē ēstēd
ud ān =iz ī pad čagād wārēd nišēb awiš bawēd
ān ī ō čagād =iz wārēd pad =iš bē nē ēstēd
ud ān =iz ī abārīg gyāg wārēd awiš nē rasēd
ud gawr ēd bawēd
ēr_menišnīh ud weh_dōstīh ud nēkīh ī ōy ī did abāyistan
ud pad =iš šād būd ud pad xwēš tan dāštan
ud čagād ēd bawēd
abar_menišnīh ud weh_dušmenīh ud nēkīh ōy ī did nē abāyistan
ud pad =iš bišt būdan ud pad xwēš nē dāštan
kas pad kas ān tarīh kirdan nē tuwān
ī ēdōn čiyōn weh_dušmen mardōm pad xwēš tan kunēd
čē hamē ka frāzīh ud wehīh ud abzōn ī pad nēkīh ī wehān wēnēd
bišt ud tarīhōmand bawēd
ud ābādīh ī yazadān rāy frāzīh ud wehīh ud abzōn pad nēkīh ī wehān andar gēhān hamē ast
guft ēstēd kū
abardom dānišn ān bawēd ī ō tis ayābēd
ud ayābišn =ēw ān weh kē ān ī nē dānēd dānēd kū nē dānam
guft ēstēd kū
dušāgāh ka nē huniyōšīdār nē hamāg_abzār
guft ēstēd kū
pad mardōmān tis ī abēr nēk dēn ud xēm ud xrad ud hunar ud xwarrah
xēm abzār hōg ī frārōn ud abāg wehān raftan wehīh az =iš griftan
ud wattarīh ī pad xwēš tan wēnēd az tan ī xwēš bē kirdan
ud xrad abzār tarsagāhīh ī andar yazadān ud dārišn ī nēkīh ī pad wehān
hunar abzār xwēš_kārīh ud tuxšāgīh
xwarrah abzār rāstīh ud humihrīh
ud dēn abzār ēd āstawānīh
āstawānīh ēd bawēd kū dōst ī huxēm ī pāk ī weh_mard pad tan ī xwēš pādixšāy kunēd
gōwēd kū
āhōg čē dānē gōw tā wirāyēm
ud ka =š gōwēd niyōšēd ud framān_burdār bawēd
ēkānagīhā ēn weh āškāragīh ī pad menišn ud gōwišn ud kunišn
ruwān pad ēn and tis abērtar šāyēd bōxtan
pad spāsdārīh ud hunsandīh ud nihādagīh
yazadān tarsagāy bawišn kū ka škeftīh mad ēstēd az =iš bōzēnd
ud ka nē mad ēstēd awiš kem rasēd
yazadān ēd rāy hamē bawēnd čē ēk ōy ī did sūdēnēnd
ud dēw ēd rāy wanī bawēnd čē ēk ōy ī did frēbēnd
gannāy mēnōy nazdist xwad frēft ud pas dāmān ī xwēš
čē =š ān menīd ud kird ud hamē kunēd
ī =š frazām xwēš ud damān wanī_būdagīh az =iš bawēd
mardōm harw ān ī kunēnd ka nē ruwān abzāyēd ayāb ruwān nē kāhēd hamāg ’’wyišn_tisīh
awēšān kē asrōš_ahlī gētī hēnd kē pad framān ī ohrmazd rawēnd ud pad ērān šahr xwadāy hēnd pad framān ī ohrmazd ān ēstēd
bawēd kē pad dastwarīh_āgāhīh ī pad mānsr_spand menēd ud gōwēd kunēd
srōš_ahlī rāy az abestāg gyāg =ēw paydāg kū =š gētī ēn hambarišnīh ī kārān hampahikārišnīh ī xrad ī sūdīmandān
ēn pad xwadāyān šāyēd
čē hērbedān ud xwāristān kārezār ī abāg anērān ud abārīg =iz warzišn ī meh ǰud az xwadāyān nē bawēd
ud ēd rāy xwadāy ī nēk srōš_ahlī gētī ast
u =š framān_burdārīh srōš_ahlī framān_kirdārīh bawēd
wehān pad yazadān wistāx abāyēd būd
kū tā =šān az dēwān ud wattarān abēwizend ud ka ǰuttar kem wizend dārēnd
ud ka =iz dēwān stahmag bawēnd wišōbišn abar barēnd pad abāz ārāstan abar tuxšēnd
čē =šān tis ī xwēš ast
ud ēdōn pāyēnd čiyōn mard xwēš kadag
guft ēstēd kū
harw kas ān wēnēd ī ōh nigerēd
ud ān āšnawēd ī ōh niyōšēd
ud ān windēd ī ōh xwāhēd
ān ī mēnōy_nigerišn ka =š gētī_kārīh dast
bē gyāg gyāg ēk =ēw ēnyā =š mēnōy abēkār
guft ēstēd kū
ahriman hambandišn az xwad_dōšagīh ud aniyōšīdārīh
u =š tan ud gyān_menīh az dušāgāhīh ud rasišn ō xešmenān
ud padēxwīh az rēmanīh ud ēmēd az anāštīh aburd_framānīh
guft ēstēd kū
āzwarīh bar niyāzōmandīh
ud waranīgīh bar pašēmānīh
ud xwad_dōšagīh bar wiyābānīh
ud tar_menišnīh bar anāštīh
ud anāštīh bar wanī_būdagīh
guft ēstēd kū
dānāg ān dušmen ī dānēd kū dōst kirdan nē tuwān pad ēn nē tuxšišn
kū tā =š zyān ī man nē abāyād
bē pad ēn abērtar tuxšišn
kū =š pad man zyān kirdan ma tuwān bawād
guft ēstēd kū
wistāx bandag xwadāy bandag ud dušmen xwadāy bawēd
ēd rāy čē az wistāxwīh wastārīh
ud az wastārīh wastār_kunišnīh
ud az wastār_kunišnīh was rēftagīh
ud az was rēftagīh ī bandagān āzārišn ud xešm ī xwadāyān sālārān
az =iš uzīhēd
ud āzārišn ud xešm ī xwadāyān pazd ud pādufrāh ī bandagān
ud ast ka wanī_būdagīh =iz az =iš bawēd
ān ī pahlom hunar ud abzār ī pad paristišn ud nazdīk_mānīh ī xwadāyān ud sālārān andar abāyēd ēkānag_menišnīh ud rāz nihuftārīh
čē rāz ī sālārān xwēšīhātar sazēd dāštan kū wēmārīh ud āhōg ī nihānīg
čē wēmārīh ud āhōg ī nihānīg ka =iz ō tan wizāyēd ud ō ruwān nē wizāyēd
ud rāz ī sālārān xūb nē dāštan
ō ruwān wizend ī garān
ast ī ka wanī_būdagīh ī tan az =iš pad =iš wināhgār bawēd
ān kē ō xwadāyān ud sālārān nē dōst ud andar nē ēkānag
ayāb xwadāyān ud sālārān pad =iš āzard ēstēnd az =iš dūr
pad ēč ēwēnag abāg nē rawišn ud awiš nē rasišn
čē ka ǰuttar sālārān pad frōd_mānd ī garān dārēnd ud gumānīgīh ī ērmānīh ō menišn nišīnēd
zyān ī garān az =iš madan šāyēd
windišn ī az sālārān nē andar zamān bē pad rōzgār
ud nē pad xwāstan bē pad arzānīgīh ēmēdēnišn
ēr_menišnīh ud čarb_ēwāzīh ud awestwārīh ud frahangīgīh ud wirāst_xēmīh
ud pahrēxtagīh ī az āhōg ud husāzagīh ī abāg mardōmān
ud sāxtārīh ī ō ān ī sālārān menišn ud sahišn
frārōn mard ō wuzurg gāh ud burzišn ud abrāz paywandēd
guft ēstēd kū
dānišn =ēw ān weh ka ān ī dānēd purr_bōzišnīhā dānēd
ud pad ān ī dānēd nimāyišn nē kunēd
ud pad ān ī nē dānēd stēzag nē barēd
guft ēstēd kū
ast saxwan kē apassaxwīh passox
ud ast kār kē akirdārīh pērōzīh
pōryōtkēšān ēn panǰ tis ī xēm čāšid u_šan hērbedestān nēk abar kird
xwēš tan pad_dād dāštan ud ōy ī did pad_dēn
pad xwēš tan dušdār būd ud pad ōy ī did hudār
āhōg bērōn dāštan wināhīh andarōn
āhōg ī xwēš dīd wināhīh ī ōy ī did
pad kār ud dādestān ī frāz mad bār ō xwēš kirdan ud nīrmad ō ōy ī did
kē hamāg abestāg abāg zand warm ud ēn panǰ nērang nē dānēd
pad =iz hutuxšīh nē šāyēd hišt pad āsrōnān gāh nišastan ud framān dādan
ulīh frōdīh ī xīr ulīh mēnōy_nigerišnīh
frōdīh gētī_nigerišnīh
ud pēšīh ud pasīh ī tis pēšīh xēm wirāstan
ud pasīh xrad pursīdan
mehīh ud kehīh ī kār mehīh dēn_hambārīh kehīh kerbakkarīh
rāh ud widarg ī dranǰ rāh hampursagīh widarg niyōšīdārīh
čārag ud ačārag driyōšīh čār tuxšāgīh ud paymānīgīh
ačār hunsandīh ud bowandag_menišnīh
kē dah tis nē pad āgenēn bē pad ǰudāgīh uskārēd
nē pōryōtkēš bē ahlomōγ bawēd
mēnōy ud gētī
ud tan ruwān
ud āsn_xrad ud gōšōsrūd_xrad
kunišn baγōbaxt
ud dēn ud mānsr
hamāg gētī harg hamāg dām hamharg hēnd
bē kē pad ēd dārēd kū
agar az ēn mardōm ī pad gētī ēk =ēw kam man harg ī xwēš burdan nē tuwān
ēnyā =š mardōm_dōst būd nē tuwān
xēm mardōm_dōstīh
ud bar ī xēm mardōm_dōstīh
ud mardōm_dōstīh awināhīh
čē ēn nē šāyēd būd kū
kirdan ī mard =ēw rāy druz andar gēhān wināh kunēd ud ān mard mardōm_dōst
spāsdārīh yazadān šnāxtan
ud yazadān šnāxtan framān_burdārīh ī yazadān
ud framān_burdārīh ī yazadān awināhīh
ud awināhīh az druz ǰud būdan
az druz ǰud būdan bōxtagīh ī ruwān
dēn bun hangirdīg ēn kū
bun ohrmazd ud harw nēkīh az ōy
šnāsag ōy kē hamē pad_šnāyišn
ud ōy hamē pad_šnāyišn ī hamē pad ōš
ud ōy hamē pad_ōš kē harw čē menēd ud gōwēd kunēd az yazadān bē
mardōmān ēn and tis ī abēr pahlom
ēn =iz ēdōn
mardōm_dōstīh ud āšt_xwāhīh ud rāstīh ud xwēšāwand_dārīh
ud ēr_menišnīh ud bowandag_menišnīh
ud rādīh ud spāsdārīh ud hampursagīh ud paymānīgīh
dād ī ohrmazd mardōm_dōstīh
ud dād ī wahuman āšt_xwāhīh
ud dād ī ardwahišt rāstīh
ud dād ī šahrīwar xwēšāwand_dārīh
ud dād ī spandarmad ēr_menišnīh ud bowandag_menišnīh
ud dād ī hordad rādīh ud spāsdārīh
ud dād ī amurdad hampursagīh ud paymānīgīh
hamāg ēn dām abzāyišn ud w’’yšn
az ōy kē hamēšag pad_šnāyišn bē ka =š bēšēnēnd
ud hamāg ēn dām ud dahišn kāhišn ud nirfsišn
az ōy kē hamēšag pad_bēš bē ka =š šnāyēnd
abzār dō ēn weh
xwad weh būd ud ōy ī did weh kirdan
harw kas ēn čahār kirdan
xwēš_kārīh fraškerd ud dām_dahišnīh ud rist_āxēz ud tan ī pasēn
fraškerd ēd bawēd kē az druz ǰud bawēd
dām_dahišnīh ēd bawēd kē ēn tis menišn ud gōwišn ud kunišn weh bē kunēd
rist_āxēz ēd bawēd kē ān ī az =iš appurd ēstēd abāz dānēd āwurd
ud tan ī pasēn ēd bawēd kē abāz ō ānōh dānēd šudan kū bē āmad
ka hamēšag az ēn panǰ tis ēk nē hamē nigerēd trift ēstēd ōš ud xrad az =iš appurd ēstēd
ristag
abdīh ī yazadān kū tā spāsdār bawād
wehīh ī wehān kū tā abar wurrawēnād
āhōg ī xwēš kū tā bē wirāyād
wāzag ī pōryōtkēšān kū tā ruwān pad =iš bōzīhād
āsrōnīh ud artēštārīh ud wāstaryōšīh ud hutuxšīh kū tā nān pad =iš xwāhād
az ēn se tis ma mōšēd
az yazišn ī yazadān myazd ud hanǰaman
kē nē dānēd šud nē šud weh kū šud
kē andar ō yazišn ī yazadān šawēd pad mēnōy_wurrawišnīh andar šawišn
ud frārōn_nērangīh abāg dārišn ud ahlāyīh abāg bē āwarišn
kē ō myazd ī wehān šawēd pad ēr_menišnīh andar šawišn
ud hunsandīh abāg dārišn ud šnāyišn abāg bē āwarišn
kē ō hanǰaman šawēd pad mardōm_dōstīh andar šawišn
ud rāstīh_gōwišnīh abāg dārišn ud āštīh abāg bē āwarišn
pursīd kū wehīh weh ayāb abzār
guft hād
ka abzār wehīh rāy andar abāyēd sazēd dānistan kū