pad nām ī dādār ohrmazd

pad nām ī yazadān ohrmazd xwadāy ī dādār ī weh ī kirbakkar ī menōyān mahist amahraspandān ud abārīg yazadān mēnōyān ud yazadān gētīyān ud ǰadag ī nēk ud farroxīh ud pērōzgarīh ud drustīh ud bēšāzišnīh ud hubāmīh ud xwārīh ud nēkīh ī harw wehān

šnāyišn ud azbāyišn ud ōz ud nērōg ud amāwandīh ud pērōzgarīh ī dādār ohrmazd xwadāy ī kirbakkar ī mēnōyān gētīyān mahist ud abzōnīgtom ud amahraspandān ī huxwadāyān ī hudahāgān ud dēn ī weh ī mazdēsnān ud ahlawān ī wehān ī abzārān ī abzōnīgān frawahr ud hamāg yazadān mēnōyān ud gētīyān

ābādīh ī weh dādār ud ahlaw hēnd

ud zadārīh ud bēšīdārīh ud tarwēnīdārīh ud akārīh ud abesīhēnīdārīh ahreman ī druwand ud dēwān ud druzān ǰādūgān =iz ud parīgān ud sāstārān ud kayagān ud karabān ud wattarān ud harw wināhgārān

ud čiyōn ohrmazd ī xwadāy ī mēnōyān mahist ud abzōnīgtom pad bundahišn pad dād ud rawāg būd ī dām ī xwēš ud abāz dāštan ī ēbgad ud petyārag az dām ī xwēš ud apaydāg kirdan abesīhēnīdan ī ahreman ud dēwān ud harw druzīh ud wattarīh ud kirdan ī ristāxēz ī ud tan ī pasēn rāy amahraspand ud hamāg dād

ud dēn ī weh ī mazdēsnān az tan ī xwēš tāšīd ud āfrīd ud pad abēzagīh frāz brēhēnīd

ēwarīgīh ud ēdōnīh xwēš pad abēzag weh dēn ī mazdēsnān rōšn paydāgēnīd

pad čāšišn ō zarduxšt spitāmān guft ud az zarduxšt spitāmān ōrōn ō pōryōtkēšān dastwarān ud az pōryōtkēšān dastwarān pad paywand ō dastwarān amāh =iz mardōmān mad ēstēd

harw kē az weh dēn ī mazdēsnān ud fradom =iz āgāhīh wēš

pad ān čē =š āgāhīh wēš az =iš ōy dānišn ud āgāhīh ī kadāriz =ēw kē pad yazadān dēn wurrawēd rāy guft paydāgēnīdan nibištan =iz dastwarīhā

ōh =iz abar ān tis kē dādārīh pērōzgarīh ohrmazd ud amahraspandān ud tagīgīh ud ōzōmand nisāgīh ī hāmōyēn yazadān ud abēzag dēn ī weh ī mazdēsnān pad nāmčišt az =iš paydāg

ud hamčim rāy ī nibišt pad hamuskārišnīh pērōzgarīh

man dēnbandag hōšang siyāwaxš šahryār baxtāfrīd šahryār az paččēn hērbed mihrābān spandyād mihrābān ōy az paččēn hērbed māhpanāh ī āzādmard ī panāh ī az bīšābuhr awestān ī az kāzrōn rōdestāg čandīn mard nēk abarmāndīg pad dēn ud ruwān abēgumān

u =š kāmag frārōn ō yazadān wehān

rōstahm ī dādohrmazd nōg draxt az farrox būm ī spahān az rōddašt rōdestāg

az wlčwk deh abestāg az paččēn ī yyy ud zand az paččēn ī anōšagruwān farnbay ī srōšayār xwēš rāy nibišt ēstād

ǰādag anōšagruwān māhayār ī farroxzād ī az ham bīšābuhr awestān az kāzrōn rōdestāg

anōšag ī man māhwindād ī narmāhān ī wahrāmmihr az ham paččēn ī az xwāyišn pērōzgar abūnasr mardšād ī šābuhr ī az farrox būm ī šīrāz

abzāyišn ī mānsrspand ud rawāgīh ud wābarīgānīh wehdēn ī mazdēsnān

ud amāwandīh ud pērōzgarīh ohrmazd ud amahraspandān ud abārīg yazadān mēnōyān gētīyān ud frawahr ī ahlawān

ud āyaftxwāyišnīh ī abar druyistīh ī tan ud dagrzīyišnīh ī gyān farroxīh ud nām ud frazend ud paywand

ud burzišn ud nēkīh ī gētī ud ahlawīh ī ruwān ī xwēš

ud ayārīh ī harw wehān arzānīgān

ud āgāhīh ud dānišn ī kadāriz =ēw az tagīgīh ud abarwēzīh ud pērōzgarīh ī ohrmazd ud amahraspandān ud abārīg yazadān abēzag weh dēn ī mazdēsnān rāy

abestāg ud zand yašt čiyōn andar abestāg mādagwar

ud abd ud sahīg az =iš was tis ī abar abdīh sahīgīh ud tagīgīh ud pērōzgarīh ud ōz ud nērōg ud amāwandīh ī ohrmazd ud amahraspandān ud dēn ud ruwān az =iš paydāg

pad gōkān hād hād ud kardag kardag pad abestāg čiyōn xūbtar ud weh šāyēd nibišt

ud abar =iz ēn kū harw wehān ī yazadān xwēšān dīd ud xwānd ud kār az =iš kirdan

ud astīh ī yazadān ud dēn ud ruwān

ud frasāwandīh ī xīr ī gētī ud afrasāwandīh ī xīr ī mēnōy

ud āmār ī sešabag widarg ī činwadpuhl ud ristāxēz ud tan ī pasēn

ud wiyābānīh ud harw bazagīh az ahreman ud dēwān ud nēstīh ī ahreman ud dēwān

pad daxšag ayād dāštan ī ēn ī frazām xwārīh ud āsānīh ud nēkīh pad wahišt rāy

čand gōwizārīhātar dānist nibišt

pad handarz ō tō kē =t ēn daftar xwēš gōwam

u =m ohrmazd ud amahraspandān ud mihr ud srōš ud rašn yazad ī kirbakkar ud dēn ī weh mazdēsnān ud harw mēnōy ī weh abar

ud man =iz ōh āgāh kird hē kū ēn abestāg ud zand ǰud ō ōy kē pad xwēškārīh ud dēndōstīh ud dēnwarzīdārīh passandišnīg ud āšnāg ēnyā ō kas ma dah

čē mard ī kē pad xīr ī yazadān awestwār dwyʾnyh ʾtww

pad abestāg paydāg kū ma ō ōy ī afranāftār ahlomōγ mānsr čāšād ī arawāgdahišn dēn ī mazdēsnān

ud ma ō gurg yyyʾn dahē kū dandān ī gurg rōyēnē

kū ka ō mard ī pad xīr ī yazadān nē awestwār mānsr čāšēd ēdōn bawēd čiyōn ka =t ō gurg dandān rōyēnīd hē

ud ka pad ān ēwēnag abēr pahrēzišn pad yākand bawēd

ud xīr ī yazadān ud dēn ud ruwān andar ayāstan kār dārišn

kū tā wizend ō tan ud rēš ud yākand ō ruwān nē bē rasēd

ō tan rāmišn ud āsānīh ō frazendān ud paywandān nāmburzišn ud farroxīh ō ruwān husrawīh ud xwārīh ud ahlawīh rasād