Select Section Type

šnāyišn dādār ī ohrmazd rāyōmand xwarrahōmand mēnōy abzōnīg
āsn_xrad nēst u gōšōsrūd xrad az frazānagān dānāgān āšnūd ēstēd ēg ast nēst dānēd
ka ast nēst dānēd weh ud wattar dānēd
ka weh ud wattar dānēd sūd zyān šnāsēd
ud ka sūd ud zyān šnāsēd čār ud ačārag dānēd
ka čārag ud ačār xwēš dānēd druz az xwēš tan kirdan šāyēd
ud ka druz az xwēš tan kirdan šāyēd ō ān ī pahlom axwān rasēd
ka ō ān ī pahlom axwān rasēd az hamāg nēkīh ī gētī ud mēnōy ǰudāg bawēd
āsn xrad abzāyišn az gōšōsrūd xrad
āsn xrad ast u gōšōsrūd nēst āsn y xrad kār šāyēd burdan
ka āsn xrad nēst ēg gōšōsrūd xrad abar bawēd
dānāgān ēd =iz nibišt
ān āzādīh šnāsēd ēg nēkīh ī padiš kunēd spās dānēd dāštan
pad wizīdārīh paydāg pad wuzurg wuzurg dānāgīh āšnāg
pad xrad bowandag ud pad wehīh passandišnīg
pad hunar stāyišnīg ud pad nām burzīsnīg
ud pad nēkīh spāsdār pad dōstīh ēkānag ud pad nigerīdār
pad tuwāngārīh ud pādixšāyīh xwābar
pad pāddāšn spāsdār
pad dōšāram mihrābān būdan šāyēd
čē ka pad nēkīh ī mad ēstēd spāsdār ēg pad ān ī wēš mad arzānīg bawēd
ēd =iz nibišt
abzār ī mad ō dānāgān
hunar mad ō hunarāwandān
frahang mad ō frahang_šnāsīdārān
nigerīdārīh mad ō nigerīdārān
xwābarīh mad ō frahang hupādixšān
hučašmīh mad ō weh dōstān
dādwarīh mad ō čimīg_kunišnān
rādīh mad ō tuwāngarān
dāšn_kirdārān kirbag mad ō ruwān_dōstān
tēmār mad ō anast_gōwišnān
hešm mad ō hešmenān
tarmenīšnīh mad ō wad_gōhrān
stēz_kārīh mad ō dušāgāhān
anespāsīh mad ō mihrōdruzān
spazgīh mad ō weh_dušmenān
areškenīh mad ō duščašmān
wad_frahangīh mad ō aǰgahānān
ranǰ ud tars mad ō anabzārān
penīh mad ō xwurdag_nigerišnān
āzwarīh mad ō ’wrw’tārān
rōz pad rōz abzāyēd ud meh bawēd ēdōn čiyōn māh az ēk pānzdah
ēd =iz ōwōn nibišt
purr_šnāsag bawēd ān ī dānāg
ud xīr_āgāh bawēd ōy xrad_xwāstār
ud abāyišnīg bawēd ān ī čimīg_kunišnān
’’wk bawēd ān ī ’w’ṗ
abēniyāz bawēd ān ī hunsand
abīm bawēd ān ī awināh
huram bawēd ān ī abēš
atīmār ud nāmīg bawēd pad gētī
bahrwar bawēd pad mēnōy ān ī rād
burzišnīg bawēd ān ī xwābar
pad pādixšāy wābar bawēd ān ī rāst_guftār
stāyišnīg bawēd ān ī nēkīh_kāmag
awestwār bawēd ān ī huxēm
druyist_kār bawēd ān ī nigerīdār
druyist_tan bawēd ān ī paymān_xwarišn
sūdōmand bawēd ān ī paymānīg
nēkīh_arzānīg bawēd ān ī spāsdār
abāyišnīg bawēd ān ī hučašm
āzarmīg bawēd ān ī ērmenišn
was_ayāsag bawēd ān ī humihr
was_dōst bawēd ān ī čarb_ēwāz
was_kirbag bawēd ān ī āštīh_xwāh
ahlaw bawēd ān ī kerbakkar
ēn hamāg hunar burzišn
stāyišnīg andar xrad
pōryōtkēšān ī dēn_āgāhān ī pēšēnīgān ōwōn dāšt
andar ox menišn =ēw ast ud yazad =ēw ī gāh dārēd ast druz =ēw ī rāh dārēd
ud andar menišn gōwišn =ēw ast yazad gāh dārēd ast druz rāh dārēd
andar gōwišn kunišn =ēw ast yazad gāh dārēd ast druz rāh dārēd
andar ox wārom wahuman gāh dārēd akōman rāh dārēd
ud andar wārom kāmag srōš gāh dārēd hešm rāh dārēd
ud andar kāmag menišnīh spandarmad gāh dārēd druz ī tarōmad rāh dārēd
andar menišnīh gōwišnīh xrad gāh dārēd waran rāh dārēd
andar gōwišnīh kunišnīh dēn ī weh gāh dārēd ud xwad_dōšagīh rāh dārēd
hamōyēn mardōmān abēr w hōšyār bawišn az ān rāh ēstēd ān rāh ī dēwān ud druzān šawam
čē kōšišn ī mardōmān pad ēn se rāh ud widarg
pad ēn se rāh ud widarg bōxt az harw gyāg bōxt
ānōh frēft ēg ō druz rasēd
az ān frāz xwad pādixšāy ka ān kunē ī druz framāyēnd
amāh mardōmān hōšyār bawišn az ān ī yazadān rāh ēstam az pas drōzišn šawam
čē kōšišn ī mardōmān pad ēn se rāh ud widarg
pad ēn se rāh ud widarg bōxt az harw gyāg bōxt
ānōh frēft
ohrmazd gāh ud dēn ud wyspyšm pad zanišn ī hešm xrudruš
ardwahišnt ādur srōš warahrām pad zanišn ī āz ī dēwān_dād
šahrewar xwar ud mihr asmān ud anagrān pad zanišn damestān dēwān_dād
spandarmad ud ābān ud dēn ard mānsrspand pad zanišn ī būšāsp ī dērang_gaw
hordad tīr ud wād frawardīn pad zanišn ī seǰ ī nihān_rawišn
amurdad rašn aštād zāmyād pad zanišn ī nō_sad ud nawad ud 9000 dēw pad pēšī az dušox dwārist hēnd
ō dast ī dēwān druzān rasēd az ān frāz ī xwad pādixšāy ān kunēd ī druz framāyēnd
u =šān ēn =iz ōwōn dāšt
xēm =ēw ān weh ka ān =iz ī pad xwēš nēkīh pad ān ī did kunēd
ud xrad =ēw ān weh ka nēkīh mad ēstēd bar dānēd xwardan anāgīh ī mad ēstēd wahāg barēd
ud wīr =ēw ān weh ān ī dānēd dānēd dānam
u =šān ēn =iz ōwōn dāšt ud guft
harw kas dōst bawišn u =t ēd wurraw
u =šān pad wehīh abar niger u =t ēd xrad
u =šān pad xwēš dār u =t ēd dēn
u =šān nēkīh padiš kun u =t ēd ruwān
u =šān ēn =iz ōwōn dāšt
ān ī danēd wināh ī kunēd ān tar_menišnīh xēm y petyārag
ān =iz dānēd kirbag kunād ān waranīgīh ud waranīgīh xrad petyārag
ān =iz ī dānēd kirbag ayāb wināh ud ō dānišn rasēd ān kunēd ān xwad_dōšagīh ud xwad_dōšagīh dēn y petyārag
u =šān ēn =iz ōwōn dāšt
ahriman harw tis pad zyān ī ohrmazd kunēd ka kird bawēd ēg =iš xwad zyān bēd ud ohrmazd sūd
ohrmazd harw tis ī pad sūd xwēš kunēd kird bawēd ēg =iš xwēš sūd ī ahriman zyān
u =šān ēn =iz ēdōn paydāg
ohrmazd xwadāy andar gētīyīhā pad tan mard ī ahlaw ud nāyrīg ī harw gāh pad mazg ī sar
ud wahuman gāh andar gōš
ud ardwahišt gāh pad čašm ī hōy
šahrewar gāh pad wēnīg
ud spandarmad gāh pad čašm ī dašn
hordad gāh pad dahan
amurdad gāh pad lyš paydāgēnīd ēstēd
ōwōn čiyōn haft amahrspand gāh pad ān haft handām ud pad ēwēnag paydāg
dar =ēw ēn dēwān az warzišn ī dēwān ī ahlāyīh bēšišn čim
anōšag bawēd
srāyišn parwarišn ī mard ī ahlaw ud abārīg dām ī weh aziš būdan rāy
ohrmazd guft =m az mardōmān xwāyišn ēn =m šnāsēnd čē =m šnāsēnd az pas ī man āyēnd
ud ahriman =m ma šnāsēd čē čē ka šnāsēd az pas ī man āyēd
pad nām ī yazad ī dādgar
weh mard ud wattar mar
ān wehān sar ī ān ī wattarān kamāl bawēd
wehān čašm ī wattarān
wehān gōš wattarān karrag
dahan
zafar
dast gaw ud pāy zbār
rawišn
dwārišn
xwarišn ǰōyišn
kunišn
dwyynšn
gōwišn
drāyišn
paristišn
frēbišn
xāzišn
wwy’yyčšn
zīrīh
čaštagīh
xānag gilistag
hamrasišn
hamdwārišnīh
zīyišn
’čšn
ayārīh
afsōs
ahlawīh
druwandīh
wahišt
dušox
āfurišn =iz
ān ī wehān dahišn
ān ī wattarān kirrēnišn
ǰud_čiyōnīh pad =iz nām nišān hēnd
kas =ēw paydāg čē rōz ud čē māh murd ā māhīgān māh ī ādur ud rōzgār frawardīn
rōz
ka māh dānēd rōzgār paydāg u rōzgār frawardīn
māhīgān paydāg
ka rōz paydāg māh paydāg ā rōz ān ī paydāg māhīgān māh ī ādur
ka ēwar dānēd ādur māh ēwar dānēnd frawardīn rōz widard
ā māh ī day rōz ī warahrān abāyēd dāštan
ēn wizīrīhā ī dēn ī weh ī mazdēsnān nibišt ham