Select Section Type

1.0
ābādīh az yazadān ud wehān andar harw gāh zamān guftan ud hangārdan sazāgwār pad nāmčišt andar rōzgār =ēw ī pad ēn ēwēnag
2.0
gōš andar dārēd ašmāh wehān
3.0
ēdar mad ēstēm tā abar_stāyēnīdārīh ī ēn sūr āfrīn az yazadān ud spās_dārīh ī ēn mēzdbān rāy saxwan gōwēm
4.0
hamāg zōhr bawēd hamāg zōhr ohrmazd ī xwadāy kē pad mēnōyān ud gētīyān mahist kē hamāg ēn dām ud dahišn dād padiš pānag dāštār būd ēstēd
5.0
hamāg zōhr ēn haft amahrspand ī pad garōdmān hēnd
6.0
ohrmazd wahman ud urdwahišt ud šahrewar ud spandarmad ud hordad ud amurdad
7.0
hamāg zōhr ēn haft wahišt kē pad wīrōg bālāy
8.0
ēk pad mīharg_pāyag
9.0
dō pad star_pāyag
se pad māh_payag
čahār pad xwaršēd_pāyag
panǰ pad harburz_pāyag
šaš
haftum pad rōšn garōdmān ī was_rōšnīh ī hučihr brāzāgtom ī purr_hu’īh ī purr_nēkīh
kē pēš_gāh ī ohrmazd ī xwadāy xwad pad mēnōyān xwadāyīh
kē ēn 78762 amahrspand arzah sawah ud fradadafš ud wīdadafš wōrubaršt wōruǰaršt
kē pad mayān xwanīrah ī bāmīg ī was_hambār ī mardōm ī purr_nēkīh
hamāg zōhr ādur farnbay ud ādur gušnasp ud ādur ī burzēnmihr ud abārīg ādurān ātaxšān ī pad dād_gāh nišāst ēstēnd čand ahītar hamēšag_sōz hamēšag_yazišn ud hamēšag_zōhr bawānd
hamāg zōhr mihr ī frāx_gōyōd ud srōš ī tagīg ud rašn ī ristag warahrām ī amāwand ud wāy ī weh ud weh dēn ī māzdēsnān ud aštād ī freh_dādār gēhān ud frawahr ī ahlawān
hamāg zōhr hamāg mēnōy ī meh ud weh kē pad _rōzag gāh paydāgēnīd ēstēd
hamāg zōhr šāhān šāh ī mardān pahlom
hamāg zōhr pus ī wāspuhr ī šāhān farroxtom ī dāmān pahlomtom andar gēhān abāyišnīgtom
hamāg zōhr wuzurg framādār kē pad wuzurgīh wuzurg ud pad pādixšāyīh pādixšāy ud pad =iz dahišnān meh ud weh
hamāg zōhr xwarāsān spāhbed
hamāg zōhr xwarbarān spāhbed
hamag zōhr nēmrōz spāhbēd
hamāg zōhr dādwar ī dādwarān
hamāg zōhr mowān handarzbed
ud hamāg zōhr hazārbed
hamāg zōhr drōn_yaz
hamāg zōhr meh ud weh kē yazadān pad ēn mēzd arzānīg kird dahād
zūd pad xwadāyīh ērān_šahr ud abrang pad mayān bawād
čiyōn pad xwadāyīh ī ǰam ī šēd ī huramag rōzgār farrox wehān xwēšīhā rāyēnīd yazadān ēk hazār padīrād
ud āfrīn pad ham mērag ī mēzdbān kunād
pad nāmčištīg āfrīn ēn kunād kū abāg mardōmān ī xwad tan_drust ud dagr_zīyišn ud xwāstag pad abzōn ēdōn bawād čiyōn az abēstāg paydāg
ka =mān nēk stāyēnd hāmōyēn gētī xwaštar ud hamwār āfrīn pad ēn mān kunād
kū was bawād pad ēn mān was asp ī rahī
ud dast mard ī ǰuwān šāyendag ī hanǰamanīg guftār abāg wehān ayād
was zarr abāg asēm was ǰaw abāg gandum was hambār purr_nēkīh ud huram ud huniyāg bawēd
nēk zamān ud nēk sāl ud nēk māh ud nēk rōz ud nēkīh az ēn mēzdbān rāy was nēktar
spās ī ohrmazd spās ī amahrspandan
ud spās āsrōnān ud spās artēštārān ud spās wāstaryōšān ud spās hutuxšān
ud spās ātaxšān ī pad gēhān
spās xwangarān ud spās huniyāgarān
ud spās darbān ī pad dar
spās ēn mēzdbān kē ēn rōzgār handāxt ud sāxt kird ud rāyēnīd
nēk =mān fšūnist_framān sūr ī pahlom mān hamrasišnīh
ud stāyīšnīg ud menišnīg gōwišnīg ud kunišnīg spāsdār ī azabar spāsdārīh anī tis nēst
bē man saxwan wēš abāyēd guftan pēš ī ašmāh wehān kū sagr ham az xwarišn ud purr ham az may ud huram ham az rāmišn
bē ašmāh wehān stāyišn ī yazadān ud āfrīn ī wehān bowandag guftan nē šāyēd ašmāh wehān ēdar mad ēstēd
harw čē wehtar dānēd guft gōwēd
čē man harw čē farroxīhātar az man ārd ud †sang ud may azabar xward ēstēd
xwaš xufsēd ud yazadān pad xwamn wēnēd ud drust āxēzēd ud pad kār ud kirbag kirdan tuxšāg bawēd
čē az bun_dahišn tā frazām_kārīh ōy farroxīhātar kē yazadān ōy pad frārōnīh_tuxšāgīh arzānīg dārēd
āfrīn čiyōn =am guft bē rasād
zamīg_pahnāy ud rōd_dranāy ud xwaršēd_bālāy bē rasād
ēdōn bawād
ēdōntar bawād
frazaft pad drōd šādīh ud rāmišn harw wehān ud frārōn kunišnān