pad nōgnāwar naxust patitīg bē gōwišn ud az ohrmazd tā daypadādur ēk =ēw ud az ādur tā daypadmihr ēk =ēw ud az mihr tā daypaddēn ēk =ēw ud az dēn tā anagrān ēk =ēw yazad =ēw pad pušt ud panāh frāz gīrišn

hērbed =ēw pad hudēnīh ud pēšōbāyīh bē padīrišn ud hērbed ī wahmān pad radīh ud dastwarīh bē padīrišn

harw kār ī kāmēd kirdan pad dastwarīh ī hērbed kunišn

ka ādurgāh kāmēd šustan naxust dast pad pādyāb bē kunišn

u =š ātaxš ud barsom bē nigerišn u =š yatāahūwayryō haft bē gōwišn

u =š az nōg dast pad pādyāb abāz kunišn u =š xṣ̌naoϑra ahurahe mazdā̊ tarōidite tā fəraṣ̌ōtəməm bē gōwišn

u =š az nōg dast pad pādyāb abāz kunišn ud ašemwohū se frauuarāne čē gāh dārēd

āϑrō ahurahe mazdā̊ puϑra tauua ātarš puϑra ahurahe mazdā̊ xṣ̌naoϑra tā gyāg pad mān ī ātaxšān ud ka mān ī wēhān bawēd tauua ātarš puϑra ahurahe mazdā̊ xṣ̌naoϑra tā gyāg

u =š wāz az ān ī =š parāhōm kird frāz gīrišn u =š ādurgāh pad se ašemwohū frāz šōyišn

u =š yašt gōwizārīhā xwāndan ud ka pardāxt ham zamān drōn pad ham ātaxš pad ham šnūman ī nāwar yaštan

ud ka pad gāh ī hāwan nē tawān yaštan bē spōzīhēd ud bē hilišn tā pad gāh ī uzayrin andar rasēd

drōn pad barsom ī hafttāg abāyēd yaštan

drōn ī nōgnāwar ēdōn abāyēd čiyōn srōšdrōn gāh gāh hamāg bē abāyēd guftan barəsmana daϑuṣ̌ō … māhiiaēibiiō … yāiriiaēibiiō čiyōn pad srōšdrōn ud xᵛarata narō guftan

ud ka āfrīnagān kāmēd kirdan rōz ī fradom yatāahūwayryō haft ud ašemwohū se frauuarāne hāuuanə̄e ud raϑβąm

u =š rōz ud šab nē āmār

u =š šnūman ohrmazd ī xwadāy u =š kardag ahurəm mazdąm tā hama at̰ zaiiane u =š āfrīnagān pad sar

rōz ī didīgar ka yašt ī srōš kunēd pēš az ādurgāh šustan yatāahūwayryō panǰ bē gōwišn

u =š ādurgāh šustan ud hōm ud urwarām pad hāwan sāxtīhā drōn hamčiyōn gāh ī hāwan yaštan pad barsom ī hafttāg

ud pad āfrīnagān yaϑāahūvairiiō panǰ ud gāh ǰuttarīh nēst

rōz ī sidīgar pēš az ādurgāh šustan yaϑāahūvairiiō dō guftan ud sāzišn hamčiyōn yašt ī srōšdrōn pad šnūman ī sīhrōzag pad barsom ī hafttāg

ud pad āfrīnagān yaϑā dō ud gāh ǰuttarīh nēst āfrīnagān ī dahmān

rōz ī tasōm ka wisperad kunēd pēš az ādurgāh šustan yaϑā haft guftan ud sāzišn hamčiyōn yašt ī srōšdrōn

pad šnūman ī ohrmazd ī xwadāy pad barsom ī hafttāg ud pad āfrīnagān yaϑā dō ud gāh ǰuttarīh nēst āfrīnagān ī dahmān

frazaft pad drōd ud šādīh