Dk3-B-01_sentence_1071

ud ēn =iz bawišn xwad ast tōhmagān tōhmag ī gētī bun būdag ī az rah čiyōn dēn gōwēd kū az rah bē bawišn frāz būd ud bawišn_rawišnīh wimandīg dēsag ī andar tōhmag parwastag čiyōn tis andar ast ud čihrīg škōy andar zahāg čiyōn ristagān andar bunān kirrōgīg dēsag ī kirrōgīg dārēd pad mādī čiyōn abesar ud ǰām az dēsag kē kirrōgīg zarrīgar dārēd abar zarr ī =š mādī ud bēl ud tiš dēsag kē kirrōg āhengar dārēd abar dār ī =š mādī ēn bawišn_rawišnīh dēsag ud tōhmagān dēsag ī tōhmagān tōhmag ī =š azēr fradom būdag ī az bawišnān x čiyōn dēn gōwēd kū az bawišn bē bawišn_rawišnīh frāz būd ud bawišn_ēstišnīh wimandīg ēwāz parwastag ī andar tōhmagān ī =š azabar xwēš čiyōn kas andar tis ud čihrīg tōhm andar zahāg dištagīh čiyōn mardōm tōhm andar mādar zahr ud kirrōgīg dast_kārīh ī kirrōg abar mādī čiyōn ayōšust ī tābišn widābišn ud kōwišn dār burrišn ud tāšišn bawišn_ēstišnīh būdag ud ast ī az bawišn_rawišnīh čiyōn dēn gōwēd kū az bawišn_rawišnīh bē bawišn_ēstišnīh frāz būd ud stī wimandīg ēw_tāyag tanān čiyōn wāhmān tis ud wāhmān kas ud čihrīg čiyōn bowandag nigārdagīh ī zahag andar burdār uruspar ud kirrōgīg nāmčištīg abesar ud sem kirrōg ud zarrīgar az zarr nāmčištīg taxt dar ī kirrōg durgar az dār kunēd ud stī_būdag ast ī az bawišn_ēstišnīh bē stī frāz būd ud az stī nāmčištīg tis ud kas kār ī ān tis ud kas čiyōn bawēd kū az stī bē ān ī andar harw dō mēnōy ō_ham būd frārōnīh abārōnīh