Select Section Type

1.0
pad nām ī yazadān
2.0
ud ǰahišn nēk bawād ān weh tan_drustīh ud dagr_zīyišnīh ud ābād_xīrīh ī harw wehān frārōn_kunišnān nāmčištīg ōy kē rāy nibēsīham
3.0
čiyōn az abestāg paydāg
4.0
pad ǰud_dēw_dād guft ēstēd kū ēn haft pāyag ī wināh pad dēn guft ēstēd
5.0
ast ī framān āgrift awōrišt arduš ud xwar ud bāzā ud yād tanāpuhr
6.0
framān =ēw čahār stēr ud harw stēr =ēw čahār drahm sang
7.0
āgrift awōrišt ān ī kehist tāwān u =š arz pad nāmčišt
8.0
būd kē wēšist drahm =ēw guft
9.0
arduš šašt sīh xwar stēr šašt
bāzā stēr nawad ud yād stēr sad ud haštād
ud tanāpuhr stēr se_sad
pad dād ī pōryōtkēšān ast kē pad =iš ǰud_dādestān būd hēnd
čē gušasp az čāštag ī ādurohrmazd
sōšyans az čāštag ī ādurfarnbāgnarsē
mēdōmāh az čāštag ī gōgušasp
ud abarg az čāštag ī sōšyans bē guft
ud hamāg pōryōtkēšān pad ēn se čāštag ēstēnd
ud az =iš ast ī susttar ud ast ī saxttar ēstēnd
čē pad sidīgar pargard ī ǰud_dēw_dād ī mēdōmāh paydāg kū andar ān zamān ka gyān bē šawēd ka =š sag =ēw andar pāy bast ēstēd
pas =iz nasuš abar ōh dwārēd
ud pas ka =š dīd ā =š nasuš ōh zad
ēn kū sag kē nasuš zanēd kadār
pasušhorw ud wišhorw ud wohunazg ud tarrōg ī rōγnīg
pad rōγnīg ǰud_dādestān būd hēnd
windohrmazd az čāštag ī abarg bē guft kū nē zanēd
sag nasuš pad ān zamān zanēd ka gōšt wēnēd
ud ka mōy ayāb nāxun wēnēd nē zanēd
sag =iz ī kōr pad ān zamān zanēd ka pōzag abar nasā nihēd
ud ka abar mōy ayāb nāxun nihēd nē zanēd
murwag kē nasuš zanēd se hēnd
sārīgar ud warāγ ī syā ud kargas
murwag =iz pad ān zamān zanēd ka =š sāyag abar abganēd
andar āb ud ābgēnag ēwēnag ka wēnēd nē zanēd
zan ī ābestan windohrmazd guft kū pad dō mard barišn ud harw dō pad baršnūm bē šōyišn
ud nisēy ka bē barēd sar ō hazzān rōn kunišn
ud padwēšag rāy dō pad ēk bār nē barišn
ud dō pad ēk mardōm nē šāyēd
sag =ēw ud mardōm =ēw šāyēd
harw kē pahrēz ī nasā dānēd šāyēd
kōdag dō ī hašt_sālag kē pahrēz dānēd šāyēd
zan dō ī daštān ayāb dō ī nisēy
ayāb mard =ēw ud zan =ēw ud aburnāyīg =ēw ī hašt_sālag šāyēd
hamāg nihuftag nē barišn čē nasā_nigānīh
pad wārān burdan margarzānīg
ka abr hāmōn būd ēstēd az xānag bē burdan pādixšā
ud ka pad rāh wārān gīrēd abāz ō xānag āwurdan nē pādixšā
ud ka pēš dahlīz =ēw ast ānōh bē ēw nihēd
ān kē =š dahlīz xwēš ka bīm pādixšā ka andar nē hilēd
u =š pas bē_ō gyāg barišn
ka āb =ēw nēzag_bālā andar ēstēd pas =iz bē nihēd bē āwarēd
mēdōmāh guft kū hād warr =ēw azabar ān gyāg bē ēw bandēd azēr hušk bē ēw kunēd
ud nasā azēr ī ān warr bē ēw nihēd
ud warr stānēd bē āwarēd
az panǰom pargard ī ǰud_dēw_dād mēdōmāh ēdōn gōwēnd kū ān gyāg kū =š gyān bē šawēd
ka abar wistarg =ēw bē mīrēd ud mōy =ēw ayāb handām =ēw ō bālēn_gāh ud zamīg ēstēd hambun =iz
hamgōnag rēmanīh ī zamīg tā_ō āb frōd barēd
ud ka abar taxt ud pāyag abāg zamīg nē ēw_kardag
ka =š mōy =ēw ayāb handām =ēw abāz ō taxt ēstēd frōd nē barēd
ka abar zamīg ī gač_kird bē mīrēd gač rēman
ud ka ān gač bē kanēnd ud did abāz rēzēnd pāk
ka abar sang =ēw bē mīrēd sang abāg zamīg ēw_kardag
sang pad sāl_drahnā abāg zamīg pāk bē bawēd
ud ka ān gyāg bē kanēnd sang rēman ud andar zamān ōh šōyišn
ka sang abāg zamīg ast ī ēw_kardag ud ast ī ǰud_kardag ud abar bē mīrēd
sang ān_and gyāg čand nasā abar mad rēman
ka =š bē hilēnd pad sāl_drahnā abāg zamīg pāk bē bawēd
ud ka bē kanēnd sang hamāg rēman andar zamān ōh šōyišn
ka sang abāg zamīg nē grift ēstēd azabar zamīg sang hamāg rēman
andar zamān ōh šōyišn
sargen ud ādurestar
ka =š nisēy ud zan ī daštān handām abar rasēd harw dō rēman
ud namak ud gač ī pad kardag šōy ī ēdōn čiyōn sang
agar abar bān =ēw bē mīrēd
ka =š handām =ēw ayāb mōy =ēw abāz ō kanār ī bān ēstēd bān tan_masā tā ō tuhīg ud zamīg tā_ō āb rēman
ud hamāg barsom ī andar ān xānag az ān gyāg kū rēmanīh frōd barēd tā_ō barsom
sīh gām ī se pāy ast ā barsom nē rēman
ud ka =š mōy ayāb handām ō pillagān nē mad ēstēd bān tā_ō tuhīg rēman
ud ka abar yyy =ēw bē mīrēd tan_masā tā_ō āb rēman
pad sāl_drahnā abāg zamīg pāk bē bawēd
puhl ī bastag ēdōn bawēd čiyōn bān
ka abar bān ī warm =ēw bē mīrēd ān =iz ēdōn bawēd čiyōn bān
ka andar warm =ēw bē mīrēd
ka =š handām =ēw ayāb mōy =ēw ō pillagān abāz nē ēstēd rēmanīh frōd nē barēd
ud ka abāz ēstēd frōd barēd pādixšā ka bē kanēnd
ud did =iz abāz rēzēd pāk
ka pad xafag ay rasan andar galōg bē mīrēd ka =š bē ōbastan bīm [punct] nēst frōd nē barēd
ud ka =š bē ōbastan bīm ka =š ān bīm az kust =ēw pad ān kust frōd barēd
ud ka bē ōbast ān_and frōd barēd čand ōbast
ka rāst nišast ēstēd bē mīrēd ka =š az kust =ēw ōbastan bīm ān kust =ēw
ud ka az harw čahār kust bīm [punct] pad harw čahār kust frōd barēd
ud ka bē ōbast ān_and gyāg čand ōbast frōd barēd
ka abar draxt =ēw bē mīrēd
ka =š pōst tarun ud az bē ōbastan bīm nēst frōd nē barēd
ud ka =š bīm tan_masā frōd barēd
ud ka draxt pōst hušk
ka =š bīm ud ka =š nē bīm frōd barēd
ka abar tāg =ēw draxt bē mīrēd ī tarun
ka =š az bē ōbast bīm nēst frōd nē barēd
ud ka =š bīm ayāb tāg =ēw draxt ī hušk
ka =š hambun =iz mōy =ēw ayāb handām =ēw abāz ō draxt ī mādagwar ēstēd
tan_masā frōd barēd
ud ka =š abāz ō draxt ī mādagwar nē ēstēd
bē ka =š az bē ōbastan bīm tā frōd nē barēd
ka nasā =ēw az bērōn pad xumb =ēw abāz ēstēd kē =š may andar ā xumb rēman may pāk
ud ka andarōn andar xumb andar may bē mīrēd
agar =iš hambun =iz mōy =ēw ayāb yyy =ēw pad xumb abāz nē ēstēd
may rēman ud xumb nē rēman
ka xumb =ēw rōγn andar
u =š az bērōn nasā pad =iš abāz ēstēd ēč ka =š andarōn ēstēd ēd rāy čē rōγn bērōn āyēd ud abāz ō andarōn šawēd
harw dō rēman xumb ud rōγn ud hambun =iz pad huškkar tis andar kird nē šāyēd
ka garzag =ēw andar xumb =ēw kē may andar harw dō akār ud rēman čē padwēšag kunēd
ud ka ǰōrdā andar ā xumb rēman ud ǰōrdā pāk
ud ka andarōn ī xumb hambun =iz abāz ō xumb nē ēstēd ǰōrdā ān_and gyāg čand garzag šēbēnīd mālišn ī garzag abar šud ēstēd ay mālišn ī garzag šusr ast
ān mālišn bē stānišn bē abganišn
ud ka mōy ayāb nasā hambun =iz abāz ō xumb ēstēd
xumb rēman bē pad huškkar šāyēd
xišt ud xāk ud čārōg pad tis ī xwēš ǰud_kardag ud abāg zamīg ēw_kardag
ud pad tis ī xwēš ǰud_kardag būdan
ēd kū ān_and gyāg čand nasā abar rasēd rēman
abāg zamīg ēw_kardag būdan ēd kū rēmanīh tā_ō āb frōd barēd
sargen ud ādurestar ud ārd ud abārīg tis ī ārdag pad tis ī xwēš ēw_kardag ud abāg zamīg ǰud_kardag
pad tis ī xwēš ēw_kardag būdan
ēd kū ka =š nasā abar rasēd hamāg rēman
ud abāg zamīg ǰud_kardag būdan
ēd kū ka =š nasā abar rasēd zamīg rēman nē kunēd
ud xānag =ēw kē yazišn andar sāxt ēstēd
u =š sag ayāb mardōm andar bē widerēd
naxwist kār ēn kunišn kū ātaxš az anāgīh bē bōxtišn
agar =iz ātaxš ēdōn bē tuwān burdan kū pad se gām ī nasā bē barēd
pas =iz bē barišn
dēwār nē burrišn
rōšn guft ay gilēn ōh brīnišn
ud gačēn nē brīnišn
ud azēr ud azabar_pad bōdōzedīh ī dēwār nē āmār
ātaxš andar se gām ī nasā burdan tanāpuhr =ēw wināh
ud ka tābišn ō nasā rasēd margarzān
xwarišn ī sāxtag andar ān xānag hamāg akār
ud ān ī nē sāxtag nō šab māh_drahnā andar abāyēd
wastarg =iz hamgōnag bē ān ī pad tan dārēd
ān =iz ī andar ān zamān nē pāk čē andar kār ēstēd
ud zōhr =iz ī stad ēstēd ud ān gyāg ēstēd zamānīg bē_ō āb barišn
ǰīw =iz ǰum hamgōnag
yašt ǰāmag
windohrmazd guft kū nō_šabag māh_drahnā andar abāyēd
dibīr guft kū hād ka dast_šōy kunēnd ud bē šōyēnd andar zamān pāk bē bawēd
agar andar xānag =ēw ast ay ganǰēnag =ēw ud andar dargāh bē mīrēd
agar ēdōn kū dar frāz kunēd ud nasā ō ēn kustag āyēd
tuhīg ī ēn kustag rēman
ud agar nasā ō ān kustag āyēd
tuhīg ī ān kustag rēman
ka ō harw dō kustag āyēd
ēwāz tuhīg ī dargāh tanīhā rēman
ganǰēnag ud xānag harw dō pāk
ud gumbad ī ātaxšān ī wahrām tuhīg rēman nē bawēd
agar pad wiškar bē mīrēd
xwarišn ī sāxtag ī andar se gām hamāg akār
ud bē az čahār gām nē rēman
xwarišn ī sāxtag ēn čiyōn nān ud gōšt ī puxtag ud brištag ud xwardīg ī kardag
ud warr ī ātaxš ī wahrām pad paymānag rēman ōh bawēd
ātaxš ī pad ān xānag andar barēd
kē nō_šabag ud māh_drahnā pad pāk būdan andar abāyēd
pad andar burdan tanāpuhr =ēw wināh
ud pad abrōxtan tanāpuhr =ēw
ud harw xwarg ī bē mīrēd bē mānēd tanāpuhr =ēw wināh
āb =iz pad andar burdan framān =ēw wināh
ud pad ān gyāg kū =š gyān bē šawēd āb rēxtan tanāpuhr =ēw wināh
ud pad ǰud_gyāg rēxtan yād =ēw wināh
ud pādyābīh pad andar burdan hamāg apādyāb
ud kē axwēškārīhā andar aw =iš šawēd
harw bār =ēw tan wastarg bē šōyišn
u =š tanāpuhr =ēw wināh
ud ka xwēškārīhā andar šawēd
nē kirbag ud nē wināh
ud ēn rēmanīh hamāg andar ān tāyag āmār ī ka gyān bē šawēd
tuhīg rēman
ham_karzagīh ī pad gōšt ud pad =iz mōy ud nāxun ōh bawēd
ham_karzagīh ī pad abestāg paydāg az kust =ēw āmār
ud hamē ōh kunēd
pih ī pad abestāg paydāg az harw čahār kust ōh bawēd
sōšyans guft hād
tā =š sag bē nimāyišn ēdōn čiyōn andar ān zamān bawēd ka =š gyān bē šawēd
āsrōn artēštār wāstaryōš kār nēst čē ēwāz sag paydāg
kayādurbōzēd guft hād
andar ān zamān āmār ka =š gyān bē šawēd
ud mādagwar ān ī kayādurbōzēd guft
ka =š tis =ēw andarg rēmanīh tā_ō ān gyāg kū ān tis ēstēd
ud ka sag =ēw ayāb gōspand =ēw ayāb xūg =ēw dārnā bawēd šāyēd
čē ānōh frāz nē pahikōbēd
ud aburnāyīg ī andar aškomb rēmanīh abāg mād
zūzag hamrēh ōh kunēd ud padrēh nē
hamrēh ān bawēd ka tan abāg nasā ham_karzag bawēd
ud padrēh ān kē abāg ān kē pad nasā pahikōft ham_karzag bawēd
ud az ham_karzagīh ī abāg ōy ī yāzdahom hamgōnag padrēh ōh kunēd
kabīg ud daštān padrēh ham nē kird ēstēd
sag ī pasušhorw ud ān =iz ī wišhorw ud abārīg =iz hamgōnag ham_karzagīh hašt ōh barēd
ud ka pad zamīg frōd barēd andar ham zamān pāk
ān =iz ī pad aškōb mīrēd tā_ō tuhīgīh frōd barēd sāl_drahnā rēman
kē nasā pad tan =ēw barēd margarzān
ay margarzān pad ān zamān bawēd
ka nasā sag nē dīd
ud pad čār ud tuwān
ud axwēškārīhā ǰumbēnēd
ud ēw_kardagīhā ǰumbēnēd
ud dānēd kū wināh ī margarzān
ud nasā ī sag dīd ud sag nē dīd
ēdōn weh āmār dānišn
ud mard ī nizār tuwān margīh ud rištagīh
abarg guft hād
čār ud tuwān āmār nēst
čē wināh ī margarzān pad margīh ud rištagīh nē pādixšā kirdan
ud nasā ī sag nē dīd ka pad hazār mārd ǰumbēnand pas =iz hāmōyēn tan rēman
u =šān pad pixag ōh šōyišn
ud ān ī sag dīd bē ān ēwtom ka mard ēw_kardagīhā hamāg bē ǰumbēnēd ēnyā
pad pixag nē šōyišn
ud ka ham_karzag bawēd nē ǰumbēnēd ā =š pad gōmēz āb šōyišn
ud ka nasā =ēw sag nē dīd pad dār =ēw bē ǰumbēnēd bē ān ēwtom ka hamāg bē ǰumbēnēd tā =š pad pixag nē šōyišn
ud ka nasā =ēw ī sag nē dīd mard =ēw pad dast ī anī mard =ēw bē ǰumbēnēd
kē az dast ī mard kē ǰumbēnēd ān =iz kē dast xwēš nērōg andar
harw dō_ān tan rēman u =š tanāpuhr =ēw xwad ud tanāpuhr =ēw ōy ī did rāy ō bun
ēd rāy čē =š tan ī xwēš ud ān =iz ī ōy harw dō pad wināhgārīh rēman kird
ud ka =š nērōg ī ōy kē =š dast xwēš hambun =iz andar nēst ēdōn bawēd čiyōn ka =š pad dār =ēw ǰumbēnīd hē
ud ōy kē =š pad dast dāšt pad rāh ī ham_karzagīh pad pixag šōyišn
u =š tanāpuhr =ēw ōy rāy kē dast xwēš
ud xwar =ēw xwad rāy ō bun
ka pad dast ī mard =ēw nasā bē ǰumbēnēd ud nasā az ān ī sag dīd
bē ān ēw_tōm ka =š hamāg bē čandēnīd tā =š pad pixag nē šōyišn
ud ka pad šab gyāg =ēw hamē šawēd ud fradāg ānōh abāz āyēd ud nasā =ēw ānōh nibayēd nē dānēd kū dōš ka man bē mad ham ānōh būd ayāb nē ā =š pad ēd dārišn kū nē ānōh būd
ramag =ēw kē gōspand =ēw andar kē =š nasā xward ēstēd
ud wēšāg =ēw kē draxt =ēw andar kē nasā andar gumēxt ēstēd
ud esm_dān =ēw kē esm =ēw tāg andar kē čarbišn andar gumēxt ēstēd
abarg guft
ēw ramag ud wēšāg warōmand kirdan nē šāyēd ud esm akār
dar =ēw kē nasā =ēw pad =iš pahikōbēd
pad dar ī deh ud šahrestān hamdādestān būd hēnd kū pad hamkār bē hilišn
pad dar ī bēdom ǰud_dādestān būd hēnd
ud nēwgušasp guft ay pad ham kār bē hilišn čē šāyēd
ud sōšyans guft ay nē šāyēd
pad abārīg dar hamdādestān būd hēnd kū nē šāyēd
dar ī xwēšīhā_gāh pad ān ī daštānestān šāyēd
ud ān ī daštānestān pad ān ī hazzān šāyēd
ān ī hazzān pad tis =iz kār nē šāyēd
ān ī xwārtar pad ān ī garāntar šāyēd
kas kē pad wināhgārīh nasā =ēw ō āb abganēd pad gyāg margarzān
ka ēk =ēw abganēd margarzān ēk
ka dah pad ēw bār abganēd ēg margarzān ēk
ud ka ǰud_ǰud abganēd harw ēk rāy margarzān =ēw
āb kē nasā aw =iš abganēd handāzag ī rēmanīh
se gām ī se pāy pēš ī āb
ud nō gām ī se pāy azabar ī āb
ud šaš gām ī se pāy az kustag ī āb
ud šaš gām ī se pāy pad zofā āb
ud 3 gām ī 3 pāy pad āb abar nasā zahyā zofā rēman
ka mayān ī āb =ēw ī wuzurg ī ēstādag abgand ēstēd ā =š paymānag hamgōnag
čand hamē āyēd šawēd paymānag abāg hamē barēd
ud ka mard =ēw frāz rasēd ud nasā =ēw andar āb nibayēd ka =š bē tuwān āwurd u =š az =iš zyān =ēw nēst nē pādixšā bē hištan bē ka bē āwarēd
sōšyans guft kū ka zyān ast pādixšā ka bē nē āwarēd
ud ka zyān nēst nē āwarēd ā =š tanāpuhr =ēw wināh
kayādurbōzēd guft kū pad =iz zyān nē pādixšā bē hištan bē ka bē āwarēd
ka nē āwarēd margarzān
ud gōgušasp guft kū hād pad =iz zyān nē pādixšā bē ka bē āwarēd
ud ka pad zyān bē nē āwarēd ā =š tanāpuhr =ēw wināh
ud ka =š zyān nēst ud nē āwarēd margarzān
ud ka bē kāmēd āwurdan ā =š wastarg bē nihišn
čē wastarg rēman kunēd
ud harw čē pēš tuwān ud weh tuwān ā =š bē āwarišn
ka =iz =iš pad pahnā ī āb bē tuwān āwurdan ēg =iz =iš bē āwarišn
ud ka nē tuwān pad drahnā ī āb bē āwarišn
ud sag nimūdan dō_mardīh rāy nē pāyišn
u =š az nazdīk ī āb ēdōn bē barišn kū ka bē nihēd āb ī yyy az nasā bē āyēd abāz ō āb nē rasēd
čē ka āb ī az nasā bē āyēd ēw_kardagīhā abāz ō āb rasēd margarzān
u =š az ān frāz sag nimāyišn ud pad dō mard bē barišn
ud ka az āb bē abgandan kāmēd
mardbūd guft
hād ēdōn bē abgandan pādixšā kū āb ī yyy az nasā ēw_kardagīhā abāz ō āb nē rasēd
rōšn guft
hād dūr bē abgandan pādixšā
kešīdan ī abar āb pādixšā
stadan ud nihādan nē pādixšā
ud ka ēdōn tuwān kirdan kū az āb =ēw ī meh ō āb =ēw ī keh barēd
ka āb ēw_kardag pādixšā ud ka ǰud_kardag nē pādixšā
abarg guft
hād pad āb frōd kešīdan pādixšā ud abar kešīdan nē pādixšā
čē ēn ān āb ī bīm mad ēstēd ān ān ī bīm abar nē mad ēstēd
mēdōmāh guft
hād ul kešīdan pādixšā frōd kešīdan nē pādixšā
čē ān āb tar bīm bē šud ēstēd u =š nūn bīm abar nē barišn
ud ān ī azēr kē ān bīm nē mad ēstēd abdom ān bīm abar bē rasēd
ud ka andar āb šawēd u =š pad ēn menišn andar šawišn kū ka azēr/abēr was
ā =iz pas =iz hamāg bē āwaram
čē kē nē pad ēn menišn andar šawēd ud ēk =ēw ī did ānōh nibayēd bē ǰumbēnēd ā rēman bē bawēd
ud agar nasā garān ud pad tan =ēw bē āwurdan nē tuwān
pad ēn menišn bē šawēd kū šawam ud abzār sāzam ud ēn nasā az āb bē āwaram
ud ka pad wināhgārīh abāz nē šawēd ā =š tan rēman margarzān
ud ka pad abāz šudan atuwānīg nē rēman
ka nasā ēdōn pūdag ī ka =š ēdōn bē tuwān āwurdan ī ka kardag kardag bē brīnēd ā pas =iz bē brīnēd bē āwarišn
u =š harw kardag rāy dast ud kārd pad gōmēz šōyišn ud pad xāk ud nam pāk az =iš bē wēzišn
ud harw kardag =ēw rāy ī bē āwarēd ā =š tanāpuhr =ēw kirbag
ud ka wārān hamē wārēd ud nasā andar āb nibayēd az ān āb stadan ō wārān nihādan nē pādixšā
wastarg ī akār ēn
ān kē nasā pad =iš barēd ud ān ka =iz abēr was hamāg akār
ud ān kē abar bē nihumbēnd
ud ān kē hixr ī murdagān abar rasīd
ān_and gyāg bē brīnišn ud abārīg pad xšwaš_mānghō bē šōyišn
ān kē zan ī daštān pad mehmānīh dārēd pad hamkār bē hilišn
wastarg ī pad xšwaš_mānghō šōyišn
ēdōn čiyōn az abestāg paydāg
agar ǰāmag pōstēn bawēd
se bār pad gōmēz bē šōyišn harw bār =ēw pad xāk hušk bē kunišn
ud se bār pad āb bē šōyišn
ud se māh pad gyāg ī xwaršēd_nigerišn bē nihišn
ud pas pad armēšt =ēw šāyēd
kē yašt nē kird ēstēd ayāb pad zan ī daštān šāyēd
abārīg wastarg ka mōy abar ēdōn bawēd čiyōn tadag
pašm ud kaǰ ud abrēšom ud mōy ud uštar pašm hamāg šōy ēdōn bawēd čiyōn tadag
wastarg ī tadag šaš bār ō šōyišn
pašm ī ēw_kardag ka ēk abar didīgar pēčīd ēstēd u =š nasā abar pahikōbēd ēw_kardagīh rāy hamāg rēman
ud ka mišmiš bē ēstēd ēg ān_and gyāg čand nasā abar pahikōft rēman
ka abar bōb =ēw bē mīrēd
ka bōb abar namad ēw_kardag kird ēstēd namad ud bōb harw dō rēman
ud ka ǰud_kardag namad pāk
ud ka bālišn ēw_čand ēk abar didīgar nizīd ēstēd ēw_kardag nē kird ēstēd u =š nasā abar rasēd hamdādestān būd hēnd kū ān ēw tāg rēman kē =š nasā abar mad
ud bālišn abāg pašm ēdōn bawēd čiyōn bōb abāg namad
u bālišn ēw_čand kē pad ham frōd bast ēstēd
ka nasā ō band rasēd harw dō rēman rasan ud bālišn
ud ka nasā ō bālišn rasēd ud ō band nē rasēd bālišn ēw_kardagīh rāy hamāg rēman ud band pāk
zan ī ābustan kē nasā pad wināhgārīh =iz ǰōyēd rēman ud margarzān u =š šōy nēst
ud aburnāyīg ka pixag_šnās bē bawēd ā =š warr ud gōmēz ōh xwarišn u =š ōh šōyišn
aburnāyīg ī az ēk_barān zāyēd ka =š pid ud mād harw dō nasā pad wināhgārīh ǰūd ēstēd ān ī zāyēd pad gyāg pāk čē zāyišn rēman nē bawēd
rōšn guft ay harw kē pad wināhgārīh nasā rāy rēman būd ēstēd margarzān u =š tan rēman
hagriz pāk nē bawēd
čē xwārtar ēn kū rōbāh ī zīndag andar āb abganēd ud andar āb bē mīrēd
margarzān hagriz pāk nē bawēd
ēk_bar az pādyābīh pad sīh gām dārišn
gōspand_sardagān harw čē =šān nasā xward ēstēd ā =š šīr ud sargen ud mōy pašm sāl_drahnā rēman
ud ābustan ka xward ēstēd waččag =iz xward bawēd
ud waččag ī sāl_drahnā az mādar bē zāyēd frāz pāk
ka gušn xward ēstēd abar mādag šawēd mādag nē rēman
ka =š nasā xward ud ahanūz nē gugārd ēstēd bē mīrēd ēdōn bawēd čiyōn hambān =ēw kē nasā andar
zarr ka =š nasā abar rasīd ēk bār pad gōmēz bē šōyišn ud ēk bār pad xāk hušk bē kunišn ud ēk bār pad āb bē šōyišn ud pāk
asēm dō bār pad gōmēz bē šōyišn ud pad xāk hušk bē kunišn ud dō bār pad āb bē šōyišn ud pāk
ud āhen se bār
pōlābdēn čahār bār ud sang šaš bār
abarg guft
hād ābgēnag ēdōn bawēd čiyōn zarr ud kahrubā ēdōn bawēd čiyōn sang ud gōhr hamāg ēdōn bawēd čiyōn āhen
murwārīd ud kahrubā ud yāgand gōhr yyy ud šabag was_sadēn sag ast
abārīg gōhr ī nāmčištīg nē guft ēstēd
šōyišn ēdōn bawēd čiyōn dār
ud ka andar_ō kār kird ēstēd šōy nēst
ud ka nē kird ēstēd ā =š šōy ēw_bār
zamīgēn ud srūwēn šōyišn nēst
ud abārīg gōhr ī ō kār nē kird ēstēd ā =š šōyišn ēw_bār ud az kār paydāg
esm ka tarun ēk_ēk and_čand bawēd widest_drahnā bē brīnišn
ud ka hušk ēw widest ud dō angust
sāl_drahnā gyāg =ēw bē nihišn ud āb abar nē hilišn
ud uzīd sāl_drahnā
sōšyans guft kū pad esm ī ātaxšān šāyēd
ud kayādurbōzēd guft kū ēdōn čiyōn az abestāg paydāg šust
pas =iz pad ǰāmag ī huškkar šāyēd
pad ǰōrdāg hamdādestān būd hēnd kū ān_and gyāg rēman čand =iš nasā abar rasīd
ud ān ī andar gōbān parwastag ayāb xwast ud ān ī ō anī gyāg yyy ēstēd ǰud_dādestānīh
sōšyans guft
hād ān_and gyāg rēman čand =iš nasā abar mad
ud gōgušasp guft
hād hamāg rēman
kāh hamāg rēman
gōz pad rāh ī ēw_kardagīh hamāg rēman
u =š pōst ud mazg harw dō šōy ēdōn čiyōn dār
anār =iz ōwōn čiyōn gōz
xormā ka =š abāg kulāčag nē ēw_kardag xormā rēman ud kulāčag astag pāk
xormā šōy ēdōn čiyōn ǰōrdāg
ud ka pad kulāčag pahikōft ka kulāčag ud astag ud xormā ēw_kardag hamāg rēman
xormā ka abāg kulāčag nē ēw_kardag ō kulāčag pahikōft xormā pāk
kulāčag ud astag šōy ēdōn čiyōn dār
anār ud wādrang ud bīh ud seb ud ambrōd ud abārīg mēwag
ka pad_bar u =š pazzāfišn abar paydāg ka =š nasā abar rasīd ā =š rēmanīh =ēw nēst
ud ka =š pazzāmišn abar nē paydāg ā =š šōy ēdōn bawēd čiyōn ǰōrdāg
ud wādrang hamē pazzāfišn abāg
gōšt ud rōγn ud pēm ud panīr ud rēčār šōy nēst
zan ī daštān wastarg ī =š nōg ō dārišn kunēd rēman
ud ān ī andar dārišn nē rēman
ka šādurwān =ēw wistard ēstēd u =š bōb =ēw ud bālišn dō abar nihād ēstēd ud zan =ēw abar nišīnēd ud daštān bē bawēd
ka az bālišn pāy abar_ō bōb ud az bōb bē_ō šādurwān nihēd bōb ud šādurwān harw dō rēman
čē =š nōg ō dārišn kird/grift
bālišn ēd rāy čē andar dārišn rēmanīh =ēw nēst
ud ka ō bālišn ēdōn nišīnēd ī =š bōb ud bālišn harw dō andar dārišn ā šādurwān pad tan =ēw rēman
ud ka harw se andar dārišn ā ēč rēman nē bawēd
hamčiyōn dānēd kū daštān ā =š pad gyāg andar_ō kār
fradom gardan_band ud pas gōšwār ud pas čambar ud pas ǰāmag bē nihišn
ka pad gyāg andar_ō kār ēstēd ka =iz abēr dagr zamān andar ān kār ēstēd
ā pas =iz ǰāmag pāk
mēxag ud šarm_gāh kār nēst
ka ēwar dānēd kū daštān tā ǰāmag hamāg bē guharīdan ud pad gyāg ī daštān bē nišast
āwāz dārišn
ka yašt kird ēstēd wāz dārišn
ud daštān bē bawēd ā =š wāz bē gōwišn
ud ka andar wāz guftan ā daštān bē bawēd
pas =iz ka ān zamān abēgumān būd nūn =iz abēgumān
ka wāz dārēd ud pēšyār bē āyēd ā =š wāz guftan kār nēst čē =š nask ī pad čamišn gōwišn
dast ī pad_pādyāb ī āwāsīdag ka zan ī daštān wēnēd pad wēnišn apādyāb bē bawēd
ud ka =iz zūd wēnēd ud barsom nē wēnēd hamgōnag
ud xānag ēw_dar ka =š daštān azabar ud barsom azēr rāst ēstēd
agar =iz pānzdah gām azēr bowandag ēg =iz barsom apādyāb
ud ka nē rāst pānzdah gām was
xwarišn ī sāxtag ī =š andar se gām ī zan ī daštān rēman
ud xwarišn ī =š az čāšt bē pardazēd pad šām ud ān ī =š az šām bē pardazēd pad čāšt nē šāyēd
ud pad =iz ham zan nē šāyēd
ud āb ī =š andar se gām ka andar_ō gawr ayāb pādyāb_dān kunēd ā dast kunēd dast pad_pādyāb ōh bawēd
kas ka ō wastarg ud ǰāmag pahikōbēd
sōšyans guft ay ān_and gyāg pad gōmēz ud āb šōyišn ka wastarg ī =š ō wastarg ī kas pahikōbēd rēman nē kunēd
zan =ēw ī daštān kē andar se_šabag pāk bawēd tā rōz panǰom nē šōyišn
ud az rōz ī panǰom frāz tā rōz ī nohom hamē ka pāk bawēd
ā =š ēw rōz tāyag rāy pad pākīh bē nišīnišn
pas ōh šōyišn
ud pas az nō_šabag tāyag kār nēst
zan ī zādag ayāb nisēy tā čēhel rōz hamē ka rēman wēnēd
bē ka ēwar dānēd kū az daštān tā =š pad ān ham dārišn
ud az čēhel rōz frāz bē ka ēwar dānēd kū az ān tā =š pad daštān dārišn
zan ī daštān ka ēw māh pad daštān nišast ud rōz ī sīhom nē pāk bawēd
ka =iz pad ham zamān pāk bē būd ud pas =iz daštān bawēd
ā =š tāyag az bun ud tā rōz ī panǰom šustan nē pādixšā
ud ka az daštān šustan se rōz pad pākīh nišast ud did daštān bawēd
čiyōn az bunīh čahār rōz bē pāyišn ud rōz ī panǰom ōh šōyišn
ka az did daštān_būdīh nō rōz_šabān nēst pad pākīh =ēw rōz_šabān ōh pāyišn pas šōyišn
ud ka nō_rōz_šabān bowandag būd pad ham rōz šustan xūb
čihrag ka gōn bē wašt ān ī pēš ān =iz ī pas az daštān bē āyēd rēmanīh ēdōn bawēd čiyōn daštān
ka az daštān ēdōn pāk bē būd kū =š šust dastwarīhā barsom abārīg =iz tis bē az se gām rēman nē kunēd
sarmāg ī saxt rāy frāz ō bun ī ātaxš nišastan pādixšā
ud tā šōyēd ā =š wāz ōh gīrišn u =š dast šustan bē pad gōmēz tā nē šāyēd
ud ka =š šust ā =š xrafstar dewīst wināh wizārišn rāy bē ōzanišn
zan ī kē daštān az gāh ul šawēd ud pas rēman wēnēd ud ka =š ābestanīh ēwar
bē ka =š nisēy būdan paydāg ēg =iš pad gōmēz ud āb šōyišn
ka =š ābestanīh nē ēwar pad daštān dārišn
ast kē ēdōn gōwēd ay bē ka nisēy būdan ēwar paydāg tā =š pad daštān dārišn
ast kē ēdōn gōwēd ay ka pad nisēy būdan gumānīg ā =š pad pixag šōyišn
kas kē pad zan ī daštān ayāb ō ōy kas pahikōbēd kē =š pad āb ud gōmēz abāyēd šustan
ā =š wināh šašt stēr ō bun
ud kē pad dānišn zan ī daštān marzēd pānzdah tanāpuhr ud šašt stēr wināh ō bun
daštān kē ātaxš wēnēd framān =ēw wināh
ud ka andar se gām šawēd tanāpuhr =ēw wināh
ud ka dast abar tan ī ātaxš nihēd pānzdah tanāpuhr wināh
ud warr ud gawrag hamgōnag
ka ō āb nigerēd framān =ēw wināh
ud ka andar āb nišīnēd pānzdah tanāpuhr wināh
ud ka pad tar_menišnīh andar wārān bē rawēd ā =š harw srešk =ēw pānzdah tanāpuhr wināh
u =š ō xwaršēd abārīg rōšnīh nē nigerišn
u =š ō gōspand ud urwar nē nigerišn
u =š abāg mard ī ahlaw hampursagīh nē kunišn
čē druz ī ēdōn stahmag ān druz ī daštān kū kū abārīg druz pad aš tis nē zanēd
ōy pad aš zanēd
xānag =ēw kē ātaxš andar zan ī daštān andar ān xānag ātaxš nē abrōzišn
xwarišn ī az pēš ī zan ī daštān bē pardazēd pad ham zan nē šāyēd
xwān ud ǰāmag ī pēš ēstēd ka =š abāg ham_karzag nē bawēd nē rēman
padišxwar ka ǰud az rān ud ham_karzag nē bawēd šāyēd
ka drōn kāmēd yaštan ka barsom az barsom_dān abar dārēd daštān bawēd hamčiyōn ō dānišn mad barsom bē nihēd bē šawēd barsom nē rēman
u =š andar daštān ēdōn nišīnišn kū az tan ī ōy pānzdah gām se pāy ō āb ud pānzdah gām ō ātaxš ud pānzdah gām ō barsom
ud se gām ō mard ī ahlaw bawēd
u =š xwarišn pad āhenēn ayāb srubēn frāz barišn
ōy kē xwarišn frāz barēd ā =š andar se gām abāz ēstēd
ka yašt kird ēstēd harw bār =ēw drōn yašt pad šnūman ī srōš ul gōwišn
ast kē iϑā aṣ̌əm_vohū gōwēd
kustīg ka az piring kird ēstēd nē šāyēd
buz_pašmēn ud pašmēn uštar_pašm šāyēd
ud az mōyēn pad naxēzīg šāyēd
kamist pahnā se angust drust ōh abāyēd
ka az kust =ēw sar_ā_sar se angust drust
abārīg ka brīd ēstēd šāyēd
ka wāz dārēd u =š kustīg bast ēstēd ud ēk =ēw did abāz bandēd ud ān ī bast ēstēd bē wišāyēd nē šāyēd
wastarg ī dēbāg ud stabrag ud piring ud parnīgān pad aybyānghanīh nē xūb
ud pōstēn ka mōy az =iš rūd ēstēd ud pašmēn ud mōyēn ud pambagēn ud šanēn ud abrēšomēn ud dārēn pad šabīgīh šāyēd
čahār angust ī šabīg handāz ī pahnā az kust ud kust az gardan tā frēg
ud drahnā az pēš ud pas and čand abar bastan šāyēd xūb
and čand drahnā ud pahnā
ka dō_tōg ayāb ast ī brīd ēstēd nē šāyēd
ka az kust =ēw pad yyy ī dō_tōg paymōxt ēstēd ka =iz kustīg dārēd
ud ka kustīg nē dārēd ēg =iz wišādagīh nē bawēd
ka šabīg =ēw ī ēw_tāg paymōxt frēg harw dō kust nihuft ēstēd ā =š kustīg abar bast ēstēd šāyēd
ka šabīg dō paymōxt ēstēd ud kustīg abar ān ī azabar bandēd ēg =iš wišād_dwārišnīh rāy wināh ō bun
mard ud zan tā _sālag ēg =iš wišād_dwārišnīh nē kunišn
wināh ī drāyān_ǰōyišnīh pas az _sālag ōh bawēd
wināh ī wišād_dwārišnīh tā se gām
harw gām =ēw framān =ēw
pad čahārom gām tanāpuhr =ēw
kustīg kē =š rēšag nēst šāyēd
ud ka zan grih bandēd nē šāyēd
ēw_mōg_dwārišnīh tā čahār gām tanāpuhr =ēw ka pad ēw rawišn
ud pas az čahārom gām and čand bē rawēd tanāpuhr =ēw
ud ka bē nišīnēd frāz rawēd wināh ān ham ī =š az bunīh
ud būd kē harw frasang =ēw rāy tanāpuhr =ēw guft
pad šab ka bē xufsēnd šabīg kustīg dārišn
čē pad tan pāsbāntar ud pad ruwān weh
ka abāg šabīg ud kustīg frōd xufsēnd ud pēš az xwamn aṣ̌əm_vohū =ēw bē gōwēd
pad harw wēn āyišn ud barišn =ēw kirbag se srōšōčarnām
ud agar andar ān xwamn widerān bawēd ā =š patitīgīh kird bawēd
drāyān_ǰōyišnīh ān ī aburnāyīgān ī panǰ_sālag ō bun nēst
ud az panǰ_sālag tā haft_sālag ka =š pid pad hammōxtārīh awināh ā =š ō bun nēst
ud ka wināhgār ō bun ī pidar
ud az hašt_sālag tā _sālag mard ud zan agar =iz pad yašt kirdan awināh bē_šiϑāu aṣ̌əm_vohū tuwān guftan ud nē gōwēd ā =š drāyān_ǰōyišnīh ō bun
ud ka =š yašt warm tuwān kirdan ud iϑā aṣ̌əm_vohū gōwēd būd kē guft kū ēdōn bawēd čiyōn ka =š yašt nē kird ēstēd gaētōxrīd nē bawēd
ud būd kē guft kū drāyān_ǰōyišnīh nē bawēd
drāyān_ǰōyišnīh harw pih =ēw ōh bawēd
ud ōy kē yašt kird ēstēd tanāpuhr =ēw
ōy kē yašt nē kird ēstēd kem bawēd
būd kē se srōšōčarnām guft
drāyān_ǰōyišnīh paymānag tanāpuhr =ēw
ēn kū harw pih =ēw ayāb harw pārag =ēw ayāb harw mizag =ēw ā =m nē grift ēstēd
drāyān_ǰōyišnīh ān kē yašt nē kird ēstēd abarg ēw_pāyag xwārtar guft
mēdōmāh harw dō ēk guft
u =š az ēd bē guft čē ān kē yašt nē kird ēstēd u =š itā ud ašem_wohū nē wurrawēd guftan =iš garāntar =iz ast čiyōn ān kē yašt kird ēstēd u =š drōn nē wurrawēd yaštan
mēdōmāh guft ay gētōxrīd nē bawēd
abarg guft ay gētōxrīd pad harw kas ōh bawēd
bē pad ān kas kē yašt warm ud pad wināhgārīh bē nē kunēd
ud pad ān zamān bawēd ka andar zīndagīh ī ōy pad framān ī ōy pad ēn menišn kū kāmam kirdan ā =m āstawānīh ī pad dēn guft bawēd
karr ud gung ka =š ašem =ēw nē tuwān guftan ā =š drāyān_ǰōyišnīh nē kunēd
ud ka =š ašem =ēw tuwān guft u =š aṣ̌əm_aṣ̌əm_aṣ̌əm se bār bē gōwēd
ud agar =iš iϑā ud ašem_wohū tuwān guftan xūb
ud ka =š iϑā tanīhā tuwān guftan ā =š kār nēst
karr ud gung ud armēšt ka abēzag_dād ud frārōn_menišn ud pad kirbag kirdan atuwānīg
ud az ān ka bē zāyēd tā ān ka bē mīrēd harw ān kār ud kirbag ī andar gēhān kunēd
ōy ēdōn xwēš bawēd čiyōn ōy =iz kē =š kird
ast kē ēdōn gōwēd ay and čand zarduxšt ōh bawēd
ka =š kirbag hambun =iz nē kird ud wināh hambun =iz nē kird weh čiyōn ka =š kirbag hambun =iz tuwān kirdan ud nē kunēd ud wināh hambun =iz kunēd
ud ka pas bē widerēd pas =iz pad wināh ud kirbag āmār ōh bawēd
ud ka =š kirbag hambun =iz wēš pad wahišt
ud ka wināh hambun =iz wēš pad dušox
ud ka harw dō rāst pad hamēstagān
ka se srōšōčarnām kirbag wēš pad wahišt
ka tanāpuhr =ēw kirbag wēš kū wināh ō pahlom axwān rasēd
ud ka =š yašt kird ēstēd u_š tanāpuhr_ēw kirbag wēš kū wināh garōdmān
sōšyans guft ay pad ān ī pahlom axwān madan yašt kirdan nē abāyēd
čē ka =š kirbag =ēw tanāpuhr wēš kū wināh ō pahlom axwān rasēd
u =š yašt kirdan nē āmār čē pad garōdmānīgīh yašt kirdan nē abāyēd
čē pad wēš_kirbagīh ō garōdmān šāyēd madan
čiyōn sōšyans guft pad wahišt ān ī azēr ō ān ī azabar burzēd
gōwēd kū nēk =iz tō mard kē čēgāmiz =ēw nazd hē ō ān ī aseǰ ox
kayādurbōzēd guft kū ag_dēn ka tanāpuhr =ēw kirbag wēš kū wināh az dušox bōxtēd
abēzag_dād ud weh_dēn amāh hēm ud pōryōtkēš hēm
ud gumēzag_dād senīg_škuftīh hēnd
ud wattar_dād zandīg ud tarsāg ud yahūd ud abārīg ī az ēn šōn hēnd
xwaršēd ī bāmdād abāyēd yaštan tā nēm_rōz
ud ān ī nēm_rōz abāyēd yaštan tā ēwārag_gāh
ud ān ī ēwārag_gāh abāyēd yaštan tā šab
hamē ka xwēškārīh rāy bē sezīhēd ud pas yazēd ā šāyēd
ud ka tis az ān rasēd ī ka dast šustan nē šāyēd
pad ēd dārēd kū ka xwaršēd nē yazēd bē mānēd
ud ka gāh ī pēš pad =iš andar āyēd ā =š xwaršēd bē yazišn
ud pas ka dast šust abāz yazišn
ud ka nē yazēd bē ka pad nē yaštan awināh ēnyā xwaršēd nē yašt bawēd
xwaršēd ān xūbtar ka harw bār pad gāh ī xwēš yazēd
ka ēw_bār nē yazēd sīh stēr wināh
xwaršēd yaštan harw bār =ēw tanāpuhr =ēw kirbag
ud māh ud ātaxš hamgōnag
ka abr rāy xwaršēd nē paydāg ud bē yazēd šāyēd
ud tā xwaršēd nē yazēd kirbag ī ān rōz kunēnd xwēš nē bawēd
ast kē ēdōn gōwēd ay kirbag ī andar dād ī weh_dēnīh kunēnd ōy bahr nē bawēd
tā dast šabīg nē šōyēnd ēč kirbag ī kunēnd xwēš nē bawēd
čē tā nasuš bē nē zanēd ā =š yazadān rasišn ī ō tan nē bawēd
ud ka =š yazadān rasišn ī ō tan nēst ā =š āstawānīh ī pad dēn nē bawēd
ud ka =š āstawānīh ī pad dēn nē bawēd ā =š kirbag =iz abar nē rasēd
ka =š šnūman ī ātaxš kāmēd kirdan āϑrō
pad tan ēw
ud ka dō mat̰_vīspaēibiio_ātərəbiiō ēn se
ēdōn harw gyāg šnūman pādixšā kirdan
ast kē ēdōn gōwēd
ēw bē ān ī ǰud_ristagān šāyist tā pādixšā kirdan
kē ātaxš =ēw bē ōzanēd ā =š dah ātaxš bē čīnišn
u =š dah pādifrāh bē barišn
u =š mōrčag dah bē ōzanišn
u =š zōhr ō ātaxš ī wahrām dahišn
wināh ī hamēmālān andar hamēmālān wizārišn
ud ān ī ruwānīg andar radān wizārišn
ud ka =iz ī dēn_radān framāyēnd kunēnd wināh bē šawēd
ud kirbag ī az ān frāz kunēd uspurrīg bē rasēd
ōy ī margarzān wināh andar radān garzišn tan bē abespārdan
ǰud az radān tan bē abespārd nē bawēd
aswārān frahang rāy nē naxčīr kirdan xwēškārīh
ud abārīg kas bē kē xwāstag se_sad stēr kem naxčīrīh rāy naxčīr nē pādixšā kirdan
yazišn ī margarzānān ī nē pad patit rāy kunēnd ān yazišn dēw_ēzagīh
ud ka hērbed nē dānēd kirbag ī yazišn ō ganǰ ī yazadān šawēd
ud rāmišn ī az ān kirbag pad mēnōy ō ruwān ī ōy kas dahēnd kē pad menišn ēwāz ahlaw būd
margarzān ka =š tan ud xwāstag ēwāz ō radān abespārd ud pad wināh ī ǰastag menišnīg pad patit bawēd u =š radān pad kār ud kirbag dastwarīh dahēnd ā =š kār ud kirbag ī pēš kird abāz rasēd
ud ka andar se_šabag pādifrāh kunēnd ō dušox nē rasēd
ud agar rad sar brīdan framāyēd pad gyāg ahlaw
ud sidōš ōh yazišn u =š āmār ī sidōš abar nē bawēd
ud agar nē pad patit tā tan ī pasēn pad dušox
ud pad tan ī pasēn az dušox bē āwarēnd
ud harw margarzān =ēw rāy ēk bār sar bē brīnēnd u =š bār ī abdom zīndag abāz kunēnd
ud se_šabag pādifrāh ī garān bē nimāyēnd
mard harw čiyōn az wināh pad patit bē bawēd ā =š patitīh kār
u =š āškāragīhā ud menišnīhā pad patit bawišn
ud āškārag kār ēd kū wināh ī dānēd kū =m ǰast ā =š nāmčištīg bē gōwišn
menišnīg kār ēd bawēd kū pad ēd menišn pad patit bawēd kū az nūn frāz wināh nē kunam
ud ān kē pēš patit bawēd ā =š xūb bē niyōšišn u =š nē āwēnišn u =š rāz bē nē barišn
čē ka pad wināh ī kird bē āwēnēd ayāb rāz bē barēd ā =š hāwand bawēd
ast kē se srōšōčarnām gōwēd
u ast kē ēdōn gōwēd ay ka pad se srōšōčarnām wināh rāz bē barēd margarzān
ud ast kē hāwand =iš gōwēd
ādurbād ī zarduštān hāwišt =ēw pad ēn kār paydāgēnīd ēstād kū patitīgīh padīr
u =š ēw bār rāz bē burd u =š framūd kū az nūn frāz pad ēn kār hagriz paydāg ma bāš
u =š pas az ān abar ān hāwišt abaxšīh ud pašēmānīh ī was dīd u =š ēg =iz abar dastwarīh nē būd
ēn kū pad ēn dastwarīh kē šāyēd
se ān kas šāyēd kē dād ud zand warm
u =š wināh pādifrāh warm u =š xwēš tan wirāst ēstēd
ast kē ēdōn gōwēd ay kē =š hērbedestān kird ēstēd
u =š wināh pādifrāh warm u =š xwēš tan wirāst ēstēd šāyēd
ud ka andar bīm pēš ī zan =ēw ī daštān pad patit bawēd šāyēd
nēryōsang guft ay škofttom sahē kū patitīgīh pad tuwānīgīh ā =š kār čē hād
ēdōn hamdādestān būd hēnd kū patitīgīh hamē ka kunēnd harw čiyōn kunēnd ud pēš ī harw kē kunēnd hamē ka =š menišnīg hambun =iz ast ā =š patitīh kird bawēd
ud ka =š margarzān abēr was kird ēstēd ud az harw ēk menišnīg ǰud_ǰud pad patit bawēd ā =š az patitīgīh rāh ī ō dušox nēst
ud agar ēk ast ī az =iš nē pad patit ā =š rāh ī ō dušox nē bast bawēd
čē nē pad sūd ī ohrmazd ēstēd
u =š rad tōzišn abar pādixšāy brēhēnīdan bē wizārdan
ud ka rad tōzišn abar brēhēnē ud bē nē wizārē pad rāst drō pādixšāy kirdan
ka =š wināh andar hamēmālān kird ēstēd
ud ēdōn bē šāyēd kirdan kū mērag dušmenišn bē nē bawēd zan az zanīh bē nē hilēd u =š andar bē nē dārēd
ā =š pēš hamēmālān pad patit bawišn
ud ka nē pēš ī radān pad patit bawišn ud ābāmīhā bē bawēd ud abām mard druwand nē kunēd
u =š kār ēd bawēd kū pad tan ī pasēn ān bē hilēd ud im šarm =ēw garān bawēd ōy rāmišn kāfēnd
wināh ī hamēmālān ka =š mādag wizārd ā =š pāyag wizārd
ast kē ēdōn gōwēd ay pāyag =iš ō bun nēst
ast kē ēdōn gōwēd ay ēdōn čiyōn draxt =ēw kē warg bē ōsānēd
wināh ruwānīg ka pad patit bawēd ā =š abāz ēstēd
ud ka bē wizārēd ā xūb
ud ka bē nē wizārē ā =š pad sidōš pādifrāh bē kunēnd ahlaw
kayādurbōzēd guft ay ān =iz ī hamēmālān ka pad patit bawēd ā =š abāz ēstēd
narsēburzmihr ēn wāzag se guft kū xwēdōdah margarzān bē kanēd
ud barsom ka =š pādyābīh čiyōn esm ā šāyēd
ud mard ka zan ī xwēš ābestan
kē wināh andar āb kunēd wazaγ ud abārīg xrafstar ī ābīg ōzanēd ā =š wizārd bawēd
ud ka =iz ān ī āb andar ātaxš wizārē šāyēd
ka ān ī ātaxš andar āb wizārē šāyēd
ast kē ēdōn gōwēd ay gazdom =iz šāyēd
ud ka =š wināh =ēw tanāpuhr kird ēstēd drōn =ēw bē yazēd ayāb kirbag =ēw tanāpuhr bē kunēd ā =š wizārd bawēd
ka margarzān =ēw kird ēstēd ud menišnīg pad patit bawēd ud rad dānēd kū ka =š tan bē abāyēd dādan ā bē dahēd pādixšā ka =š bē ōzanēd
hād čē pad sūd ī ohrmazd ēstēd
az čimnkiizimnkat̰_nā_hakat̰ paydāg
u =š dast pad_pādyāb ōh bawēd ud kahwan kirbag hamāg ōh bawēd
u =š yazišn ī yazadān ōh kunišn
ādurbād ī māraspandān guft kū =š pad yazišn ī yazadān kirdan hagriz ān zamān tuxšāgtar abāyēd būdan kū ka margarzān ēw_čand kird ēstēd
pad patit wināh hamāg pādixšā ka purr_yyy wizārē ay ka az bun wināh pad patit bawēd az wināh ī =š wināh pad patit būd bawēd
čē ohrmazd dām ī xwēš bē pad rāh ī apatitīgīh tā pad gannāg_mēnōy bē nē hilēd
hāsr ī aγrī rōz_šabān pad dwāzdah bahr ēw bahr
ud hāsr ī keh pad haštdah bahr ēw bahr
āsrō ka pad uzdehīgīh bē widerēd pad garān dāšt ēstē
ud ast dastwar kē ǰud_dādestān
ast kē šahr ī anērān gōwēd
paydāg kū ka zarduštōdom =ēw pad uzdehīgīh bē widerēd ahlomōγ =ēw andar ān mān bē zāyēd
ud ēn garānīh ēwāz pad zarduštōdom guft ēstēd
āstawān būdan ī pad weh_dēnīh rāy abāg hērbedān dastwarān ōh pahikārišn
ud ka nē pahikārēd pādixšā ka =š nē čāšēd
yazišn ī andar mān ī ātaxšān kunēnd ka nē xūb ō dēwān nē rasēd
ud ān ī abārīg gyāg kunēnd ka nē xūb kunēnd ō dēwān rasēd
čē yazišn mayānag nē bawēd ayāb ō yazadān ayāb ō dēwān rasēd
mard =ēw kē nihādag =ēw nihād ēstēd ud pad hutuwānīh ī ōy bē pattāyēd
tā tan ī pasēn ān kirbag ōh rawēd
kas kē andar kaštīg bē mīrēd bīm ī padwēšag rāy ō āb pādixšā abgandan
ast kē ēdōn gōwēd ā hazzān =iš xwad āb
ēn =iz ka pad tārīgīh xwarišn nē pādixšā xwardan
čē kē pad tārīgīh xwarišn xwarēd ā =š dēw ud druz xrad ud xwarrah se ēk =ēw bē apparēd
ud az ān gyāg paydāg ī ohrmazd ō zarduxšt guft kū ma pas az rōšnīh frāz_rasišnīh afrāz_šust dast frāz xwarād hordād ud amurdad āb ud urwar
čē agar pas az rōšnīh frāz_rasišnīh afrāz_šust dast frāz xwarāy hordād ud amurdad āb ud urwar
bē az tō druz apparēd dō srišwadag ān ī āsn_xrad
bawēd ī ka bē apparēd xwarrah ud dēn kē ō tō ān rōz wanī bawēd
kū xwēškārīh ēd rōz appār bawēd
pad panǰom pargard ī pāzen gyāg =ēw paydāg kū ēn yazišn ī yazadān čahār ēwēnag daxšag gōwēd
ēk ān kē abestāg rāst mard wad
didīgar ān kē abestāg zēfān mard nēk
sidīgar ān kē abestāg rāst mard nēk
tasom ān kē abestāg zēfān mard wad
kē abestāg rāst ud mard wad amahraspand bē rasēnd ud bē niyōšēnd ud nē padīrēnd
kē abestāg zēfān mard nēk amahraspandān ud yazad bē rasēnd ud nē niyōšēnd bē padīrēnd
kē abestāg rāst mard nēk amahraspandān ud yazad bē āyēnd ud rasēnd bē niyōšēnd ud bē padīrēnd
kē abestāg zēfān mard wad nē rasēnd ud nē niyōšēnd ud nē padīrēnd
pad hamāg yazišn pad bun ī yazišn ud bun ī drōn yazadān ud ahlawān frawahr bē_ō yazišn niwēyēnišn
ka =šān xwānēnd yazišn bē padīrēnd
ud ka =šān nē xwānēnd pad stāumi bun ī hamāg ahlawān frawahr bē xwānišn
ud ka nē tā_ō frašočarəϑrąm_saōšiiantąm pāyēnd
ud ka =šān ānōh bē xwānēnd yazišn bē padīrēnd
ud ka nē tā_ō vīspā̊_frauuaṣ̌aiiō_aṣ̌āunąm_yazamaidē bē pāyēnd
ka ānōh bē xwānēnd yazišn bē padīrēnd
ud ka nē tā_ō tā̊sčā_yazamaidē aṣ̌əm_vohū se_gānag ud dāmanąm dō bār aōxtō nāmanō ud aṣ̌āt̰_hačā u yātumanahe_ǰasaiti
ka =šān xwānēnd bē padīrēnd
ud ka nē ēw nēzag_bālā ul šawēnd ud bē ēstēnd
ud ēdōn gōwēnd kū ēn mard nē dānēd kū man =iz az gētī bē abāyēd šudan
u =mān abestān ō ayādēnišn ī mardōmān bawēd
hād nē =mān dušxwārīh az ēd kū =mān ō yazišn ī ōy niyāz
bē =mān dušxwārīh az ēd kū ka =mān nē yazēnd ud nē xwānēnd ka =šān anāgīh abar rasēd ā =mān abāz dāštan nē tuwān
dādār
čand drahnā ast andarg zīndag ōy ī rist
u =š guft ohrmazd kū čand ān ī maxš parr spitāmān zardušt ayāb čand ān ī šawāg parr andarg awēnāg
ēk ēn kū ka kustīg pad dō se angust ast pad hamāg čāštag šāyēd
ud ka kem ast ī nē šāyēd
ēk ēn kū pad frawardīgān šnūman ī šud bē nihādag gāhānbār ud nōg nāwar ud sidōš ud hōm drōn abārīg ardā_fraward kunišn
ud ka nē kunēd pad ast čāštag ī nē šāyēd
pad nask ī nigādom čāštag gōwēd kū mard =ēw ō duzdīh kirdan hamē šawēd
dēwār =ēw pad =iš andar ōftēd ā =š ēbgad
ka =š mard =ēw ōh zanēd ā =š petyārag
ud harw dō pad wināhgārīh
ka ō yazišn ī yazadān kirdan hamē šawēd ā =š harw dō pad awināhīh
ēk ēn kū zan ka ābestan bawēd tā šāyēd ātaxš xūb_pahrēzīhā andar mān dārišn
čē pad spand paydāg kū dugdōw ī zarduxšt mād ka pad zarduxšt ābestan būd
se šab harw šab =ēw dēw =ēw abāg 150 ǰeh ō wināstan ī zardušt dwārist hēnd
ud ātaxš andar mān būdan rāy čārag kirdan nē dānist hēnd
ēk ēn kū hēnd az =iz hāwištān ī ka ō yazišn ī yazadān kirdan hamē šawēnd mēwag hamē āwāsēnd
ud agar ān āwāsišn namb =ēw az =iš bē burdan rāy kunēd nišīnān kunišn
čē pad ǰud_dēw_dād az pāy_mēzišnīh rāy dastwarān čāšt kū paymānag hambun =iz ud ō harw čē rasēd ōh bawēd
ud ōy kē mēzēd ā =š abestāg ī pad čamišn bē gōwišn ud pas tanāpuhr =ēw wināh ō bun
ud ka nē gōwēd garān_wināhtar
ēk ēn kū gāhān abar widirdagān guftan pad sūdag nē dārišn
čiyōn ēn se hād ī bun ī uštawayt_gāh ka =iz pad rāh gōwēd nē šāyēd
ka =iz mard =ēw andar xānag abar gōwēd bēšāz
ēk ēn kū pad šab may ud spram ud ēč xwarišn =ēw tis ō abāxtar rōn nē rēzišn
čē druz ābus bawēd
ud ka rēzēd yatā_ahū_wayryō =ēw bē gōwišn
ēk ēn kū škoft pahrēzišn az adādīhā kuštan ī gōspand_sardagān
čē pad sūdgar abar awēšān kē gōspand adādīhā kušt pādifrāh ōwōn guft ēstēd kū mōy awēšān gōspandān tēx ī tēz homānāg bawēd ōy ī adādīhā kuštār ōzanīhēd
az kuštan ī gōspand warrag ud wahīg ud gāw ī warzāg ud asp ī kārēzārīg ud xar_gōš ud yyy ud xrōs ud wahman murw ud murwag ī kāsagēnag ud az murw ī sār ud humāy ud parastūg wēš pahrēzišn
zan ī ābestan kē bē widerēd pad kem az čahār mard ī =š hamwār pad hamzōrīh andar hēnd nē stānišn
čē abārīg nasā pas az sag dīdan ka pad dō mard pad hamzōrīh abar stānēnd rēman nē bawēnd
ud zan ī ābustan dō sag andar abāyēd kē hamzōrīhā bē nimāyišn
ud ka pad čahār mard hamzōrīhā abar stānēnd rēman nē bawēnd
ud ka pad dō mard abar stānēnd pad pixag šōyišn
ēk ēn kū ka mardōm ī widirdag rāy āmurzišn xwāhēnd
ōwōn čimīgtar ka gōwēd kū hamē ka wināh ī man andar ōy bē ǰast abāg ān ī ōy andar man ǰast bē āmārēnēd
ud wināh ēk pad did bē šud
u =š wināh ī frāy ī ōy andar man ǰast ēg =im ahlawdād kird
ēk ēn kū abēmōzag nē rawēd
u =š sūd ēn =iz az =iš kū ka mōzag pad pāy ud pāy abar nasā nihēd ud nasā bē nē ǰumbēnēd rēman nē bawēd
ud ka mōzag nē pad pāy ud pāy abar nasā nihēd ud nē ǰumbēnēd bē ka ēwar dānēd kū sag dīd ayāb nē pad sag nē dīd dārišn
ēk ēn kū az/pad duzd_sar_nizad paydāg kū andar sāl rōz =ēw nimūd ēstēd kū harw kē az čahārdah sāl se māh rōz =ēw frāy āš kustīg frāz bandišn
ōwōn xūbtar kū ka andar pānzdah sāl ēstēd kustīg bē bandēd
ud kē pahrēzōmandtar ōwōn kū nō māhīgān ī andar aškomb ī mādar abar kunēd
ēk ēn kū ka wāz dārēd wād =ēw ī azēr bē āyēd wād =ēw az dahan bē āyēd harw dō ēk
ēn =iz kū zan kē zāyēd dah zan ayārīh kirdan rāy andar abāyēd
panǰ zan pad gawārag kār framāyišn
ud zan =ēw padīrag ī suft ī hōy ud ēk suft ī dašn griftan
ud zan =ēw dast andar gardan ī ōy abgandan ud zan =ēw mayān ī ōy griftan
ud zan =ēw ka kōdag bē zāyēd abar dāštan ud nāfag brīdan
ātaxš buland kirdan
se rōz ud se šab mayān ī ātaxš ud aburnāyīg kas nē widaštan
ud aburnāyīg ō mard ud zan ī wināhgār nē nimūdan
gōgird andak =ēw sūdan pad āb ī urwar abar aburnāyīg handūdan
fradom xwarišn parāhōm ud šabyār dādan
ēk ēn kū ka kas =ēw mard ī abēwināh rāy bē zanēd tā dard bē nišīnēd harw rōz tanāpuhr =ēw wināh ō bun bawēd
ēk ēn kū andar šahr ka dādwar ī drōzan gumārēnd ud pad wābarīgān dārēnd az wināh ud mihrōdruǰīh ī ān dādwar kunēd andar ān šahr abr wārān kem
ud šīrēnīh ud čarbīh ud bēšāzišnīh ī pēm gāwān ud gōspandān bē kāhēd
ud aburnāyīg andar aškomb mādar wēš tabāh bawēd
ēk ēn kū mard ka zan nē kunēd margarzān nē bawēd
ud zan ka šōy nē kunēd margarzān ōh bawēd
čē zan bē pad hamgumēzišnīh ī abāg mardān frazend nē bawēd ud paywand az =iš nē rawēd
ud mard ǰud az zan ka abestāg čiyōn pad ǰud_dēw_dād guft ēstēd bē gōwēd paywand tā tan ī pasēn frāz rawēd
ēk ēn kū dandān_friš pōst pāk bē tāšišn
čē dastwarān čāšt kū ka dandān_friš pad pōst ō dahan kird ud bē ōbadēd ud zan ī ābestan ka =š pāy abar nihēd pad wisē būdan bīmōmand
ēk ēn kū pad frazend ī čagar padīriftan nigerišn kunišn
čē pad čahārdahom nask ī huspārom dastwarān čāšt kū man pus tō =iz pus šāyēd ud man duxt tō =iz duxt nē šāyēd
ēk ēn kū abēr tuxšēd pad frazend_zāyišnīh ēwāz frāy kirbag_handōzīh rāy
čē pad nask nigādom dastwarān čāšt kū kār ud kirbag ī pus kunēd pid ēdōn bawēd čiyōn ka =š pad dast ī xwēš kird hē
ud pad dāmdād paydāg kū ham =iz kirbag ham handāzag ī pid ō xwēšīh rasēd
ēk ēn kū tis ī bē_ō arzānīgān dahēnd čand šāyēd ō xwarišn handāzišn
čē pad nigādom dastwarān čāšt kū mard =ēw gursnag nān dahēd
abēr was ā =iz harw ān kirbag ī ōy pad ān sagrīh bē kunēd ōy ēdōn bawēd čiyōn ka =š pad dast ī xwēš kird hē
ēk ēn kū ka xufsēd pad frārōnīh ud abēwināhīh xuftišn ud ašem_wohū =ēw bē gōwišn
ud ka wigrād ēstēd hamgōnag
ka ēdōn kunēd harw wēn āwarišn =ēw se srōšōčarnām kirbag ast dah drahm sang ud dāng čahār purr_sang bawēd
ēk ēn kū ka kār =ēw ayāb dādestān =ēw frāz rasēd ud nē dānēd kū wināh ayāb kirbag
ud ka =š tuwān ā =š bē hilišn nē kunišn
čiyōn gōwēd pad sagādom kū nē čēgāmiz =ēw zardušt az harwist
bē se bār pad zarduxšt pad =ēw kār abar burd kū_tā abāg wuzurg_wizīnišnīh wizīnišn
ud ka nē dānēd kū wināh ayāb kirbag franāmišn kū nē kunišn
ēk ēn kū tis pad hampursagīh ī abāg wehān kunišn
ud handāzag ī ān =iz pad čihrdād paydāg kū spandarmad ō mānuščihr guft kū ān =iz tēztar asp tāzānag andar abāyēd
ud ān ī tēztar kārd ī pōlābdēn afsān andar abāyēd
ud ān ī dānāgtar mard hampursagīh andar abāyēd
ēk ēn kū abestāg ud zand ka bē xwast bē nē ǰōyišn
čē abestāg zand ka =š warm bē kird ōh gōwišn ud bē nē ǰōyišn
čē pad ǰūdan baγān ud ahunawar garātar
čiyōn gōwēd pad baγ kū kē ān ī man zarduxšt baxtārīh ī az ahunawar dranǰēnēd kū warm bē kunēd
ud abāz bē rānēnēd kū bē ǰōyēd
čand nēmag ayāb srišwadag ayāb čahrušwadag ayāb panǰwadag
bē ōy widerēnam man kē ohrmazd ham ruwān az ān ī pahlom ox
kū =š abāz dāram pad ān_and zahā čand pahnā ī ēn zamīg
ēk ēn kū ohrmazd xrad harwisp_āgāh kirbagīh wuzurg_kunišnīh ī rādīh ast
bē abēr pahrēzišn az awizīdār_dahišnīh
čē pad ratuštāytī abar garān pādifrāh ī awizīdār_dahišnān pad mēnōy was tis duǰwār guft ēstēd
ēk ēn kū ast az =iz weh_dēnān anāgāhdēnīh rāy ka mādag pad ēwēnag xrōs wāng kunēd karg bē ōzanēnd
pōryōtkēšān ōwōn guft kū wināstārīh ast ī az ǰādūgān andar ān mān ud xrōs pad abāz_dārišnīh apattūg
ud mādag ān wāng ayārōmandīh ī xrōs rāy kunēd
ud hamē ka abāyēd xrōs =ēw ī did andar ān mān āwarišn
ēk ēn kū zūzag ka wēnēd ēg abāg ō dašt gyāg ī abēbīm pahrēzišn
čē pad ǰud_dēw_dād dastwarān čāšt kū zūzag ka harw rōz andar mōr_āšyānag =ēw mēzēd ast ī ka hazār mōr bē mīrēd
ēk ēn kū andar ǰud_dēw_dād haft ēwēnag tis guft ēstēd
ka mard wihān ī margīh ān bawēd tā gāh ī pēš pad =iš andar āyēd nasrušt abar nē dwārēd
ud pad ēn čim ēn =iz wehān nēk kū hammis nasā pad gāh ī pēš sag xūbīhā abāz nimūdan
ēk ēn kū awēšān kē nasā pad pākān pahrēzēnd ēg =išān sag ō nasā nigerišntar nimāyišn
čē nasā ī sag nē dīd ka =iz hazār tan abar stānēnd hamāg rēman hēnd
ēk ēn kū gōšt ka hambun =iz gandagīh ayāb waštagīh ast nē yazišn
drōn ud gāwšudāg ān ī az duzz ud appar nē yazišn
zan pad zōtīh zanān šāyēd
ud ka drōn hamē yazēd u =š ašem_wohū dō guft ud barsom abāz ō barsom_dān nihēd abāz āwarēd
ud ēk ī did bē gōwēd xūb
ud ka pēš az čāšnīg kirdan nē pad nigerišn māwāg gōwēd šāyēd
drōn ī zan ī dusraw nē yazišn bē uzēnag kunišn
ka pad nigerišn tis =ēw pēš ī ātaxš nihēd ud tan_brāh nē wēnēd tauua āϑrō nē gōwišn
pad šab kē bē xufsēd dast bē šōyišn
ēd ī az zan ī daštān ō kas ayāb ō tis rasēd hamāg pad gōmēz ud āb bē šōyišn
andar ruz ādar māh mehr_e pērōzgar sāl haft_sad pārsi man dēn_bande hērbed_zād mehrābān kayhusraw mehrābān marzbān
ēk ēn kū ādurbād māraspand guft ka harw kas =ēw bē widerēd
padām ud wastarg =iz az dāsrān xūb kunišn ka =š ruwān āsāntar bawēd
frazaft pad drōd ud šādīh
pāyag ī wināh ēn and
framān =ēw ud srōšōčarnām ud āgrift awōyrišt ud arduš ud xwar ud bāzā ud yād tanāpuhr
u =š ēk_ēk gōkān gōwam
framān =ēw se drahm sang ud dāng čahār
ud srōšōčarnām drahm =ēw dāng se
se srōšōčarnām čahār drahm sang ud dāng se
āgrift =ēw sīh_se stēr
awōyrišt =ēw sīh_se drahm sang
arduš =ēw sīh_se stēr
xwar =ēw šašt stēr
bāzā =ēw nawad stēr
yād =ēw 180 stēr
ud tanāpuhr =ēw se_sad stēr
harw kas pad ēn abēgumān ud hamdādestān abāyēd būdan kū tis =ēw ahlāyīh ud gyāg =ēw garōdmān weh ud tis =ēw hunsandīh āsānīhātar
gōspand ka kušt ud pārag ǰudāg kird ā =š gaōšdāg ēdōn baxšišn
uzwān ērwārag ud čašm ī hōy hōm yazad xwēš
gardan ašawahišt xwēš
sar wāy yazad xwēš
arm ī dašn ardīwsūr
ān ī hōy druwāsp
haxt ī dašn frawaš ī wištāsp
ud ān ī hōy frawaš ī ǰāmāsp
pušt rahwōbirzad
pahlūg mēnōyān xwēš
aškomb spandarmad
yyy wanand star
gurdag haftōring
yyy frawaš ī āsrōnān
suš frawaš ī artēštārān
ǰagar āmurzišn ud srāyišn ī driyōšān
spurz mānsr_spand
bāzā ābān
dil ātaxšān
čarb rōdīg ardā_fraward
dumbīzag frawaš ī zarduxšt ī spitāmān
dumbag wād ī ardā
čašm ī dašn abar_bahr ī māh
harw čē az awēšān bē pardaxtē abārīg amahraspandān
būd hēnd kē pad panāhīh ud būd kē pad gaōšdāg guft
kē pad panāhīh guft ēdōn čiyōn guft xūb
ud kē pad gaōšdāg guft
harw čē nāmčištīg nē guft ēstēd
ka ēk did rāy ul yazēd ā šāyēd
bē uzwān ud ērwārag ud čašm ī hōy čē ān hōm yazad xwēš az ān gyāg paydāg
hizuuąm_frə̄rənaōt̰
ēk ēn kū ka =š yašt kird ēstēd u =š wirāstan nē tuwān pōryōtkēšān kardag
ka pad barsom ī haft tāg ī aybyāhan ī yaštag drōn =ēw se_gānag yašt
ān =iš yašt pad drōn pāyag =ēw weh kird bawēd
ud kirbag ī drōn ī segānag
pad huspārom frāyist dastwarān čāšt kū and_čand yašt =ēw ī keh
ēk ēn kū ān kē xwad az dēn āgāhtar
kē ōy ān ī az xwad dēn_āgāhtar pad dastwar dārēd
kū nē wišōbēd abar puhl ī ruwān
čiyōn gōwēd pad sagādom kū nē kas az ān ī asrōšdār mard kē dastwar nē dārēd
rasēd ō ān ī pahlom axwān
ud nē ka ōy ān_and abar_ōšmurišnīh hē kū =š kār kirbag ān_and kird ēstēd
čand spīg ī urwarān ka pad wahār frāz waxšēd
kē =š dād was ohrmazd ān spīg
ēk ēn kū ātaxš andar xānag xūb dārēd
čē az ātaxš xūb nē dāštan zanān kem ābustanīh ud mardān zyān ī tan ud xwāstag bawēd
bē barišn az ātaxš angišt ī afsard ud abārīg ī bē az bar
ud pad spand paydāg kū ātaxš ka =š afsard angišt az =iš pāk bē kunēd
ōwōn āsānīh čiyōn mard =ēw kē =š paymōzan pāk kunēd
ēk ēn kū ka kas widerēd ǰāmag and_čand kamist šāyēd agārēnīdan
čē gōwēd pad wendīdād kū agar =iz awēšān mazdēsn abar ān ī rist abar_pad ān paymānag pad hilišn hilēd
čand ān kē čarātīg abar_pad ān paymānag pad hilišn hilēd
yyy ēd wizīr =ēw kū tanāpuhr pad bun ān ī dušox ī
pad wendīdād gōwēd kū dahišn hēnd ruwān wastarg ud wastarg =iz ī bē dahēnd az dāsrān
ēk ēn kū ka kas widerēd pas az sidōš rōzagīhā dāštan yyy ī ō ātaxš zōhr dādan kunišn
ān zōhr nazdist ō ātaxš dahišn
čē pad dāmdād paydāg kū bōy ī mardōmān ka škast bē_ō nazdist ātaxš
pas bē_ō star pas bē māh ud pas bē xwaršēd šawēd
ud niyābag kū ān ī nazdist ātaxš ī =š bē ōy aw =iš mad zōrōmandtar bawēd
ēk ēn kū nāxun anafsūdag nē hilišn
čē agar nē afsāyēnd ō zēn_abzār ī māzanān dēwān rasēd
ud andar wendīdād gōwizār nimūd ēstēd
ēk ēn kū pus_zāyišnīh warzišnīh ī andar šab
bē pad abar_rōšnīh ī ātaxš ayāb star ud māh tā nē kunišn
čē wuzurg petyārag aw =iš paywast ēstēd
ud pad wīstom ī huspārom ān ī andar tārīgīh warzīd frāy pādixšā ī gannāg_mēnōy abar =iš ruwān nimūd ēstēd
ēk ēn kū padīrēd awēšān yazad/dād/ǰād ud āyaft/ayāft māh ī xwadāy
ud abārīg yazadān rāy xāyag ud abārīg xwarišn
agar =išān ēdōn padīrišn kū and xwarišn wāhmān yazad rāy bē yazam nē kū drōn =ēw pad and xwarišn
u =š čim ēn kū kē padīrēd kū drōn =ēw az and xwarišn ud kē az =iš tis =ēw kem
ud ka =iz pad was bār bē yazēd ēg =iz nē tōxt
ud kē padīrēd kū and xwarišn wāhmān yazad rāy bē yazam
ka pad was drōn bē yazēd šāyēd
ud pad wīst_dō ī sagādom abar awēšān kē andar yazadān ustōfrīd nē kunēnd
garān tis bē ēstēd
ēk ēn kū ka zan ābustan bawēd tā šāyēd ātaxš ohrmazd xūb pahrēzēd andar xānag bē dārišn
čē pad panǰāh ī spand paydāg kū dugdōw ī zarduxšt mād ka pad zarduxšt ābestan būd
pad se šab ud harw šab dēw =ēw abāg 150 dēw ō wināstan ī zarduxšt āmad hēnd
ud ātaxš =iz andar mān būd rāy čārag nē dānist hēnd
ēk ēn kū ka aburnāyīg zāyēd se rōz pānag ī az dēwān ud ǰādūgān ud parīgān rāy
pad šab tā rōz ātaxš kunišn
ud pad rōz ānōh dārišn u =š bōy ī pāk abar kunišn čiyōn pad sīhom ī sagādom paydāg
ēk ēn kū dandān_friš tuf xūb az =iš bē tāšišn
čē pōryōtkēšān ast kē guft kū kē =š tuf abar_ō dandān kunēd ud bē abganēnd
zan ī ābustan kē =š pāy abar nihēd pad nisēy būdan gumān
ēk ēn kū awēšān kē =šān čagar pad zanīh ud frazend az =iš zāyēd
ān ī nar ham pad pusīh bē padīrēd xūb ud ān ī kē mādag sūd =ēw nēst čē stūr abāyišnīg
ud pad čahārdahom ī huspārom dastwarān čāšt kū man pus tō =iz pus šāyēd
ud man duxt tō =iz duxt nē šāyēd
ud was hēnd kē pad ēn menišn stūr nē gumārēnd
kū =mān frazend ī čagar pad pusīh padīrift ast
ēk ēn kū abēr tuxšīdan pad frazend zāyišnīh
čē ēwāz frāy_kirbag_handōzišnīh rāy
čē pad spand ud nigādom dastwarān čāšt kū kār ud kirbag ī pus kunēd pid ēdōn bawēd čiyōn ka =š pad dast ī xwēš kird hē
ud pad dāmdād paydāg kū mād =iz kirbag ham ēwēnag ī pid ō xwēšīh rasēd
ēk ēn kū ān ī bē_ō arzānīgān dahēnd čand šāyēd bē_ō xwarišn handāzišn
čē pad nigādom dastwarān čāšt kū mard =ēw ka ō mard =ēw nān dahēd
ka =iz ōy mard nān abēr was
harw ān kirbag ī ōy pad ān sagrīh bē kunēd
ōy ēdōn bawēd čiyōn ka =š pad dast ī xwēš kird hē
ēk ēn kū pad šab āb az čāh nē āhenǰišn
čiyōn pad bāγ_yasn abar ayōǰdāsrīh ī čāhīg āb pad šab nišān dād ēstēd
ēk ēn kū
pad šab xwarišnīg tis ō abāxtar nē rēzišn
čē druz ābus bawēd ka rēzīhēd
yatā_ahū_wayryō =ēw bē gōwišn
ud pōryōtkēšān kē huristagīhātar kird
ka =šān pad šab xwarišn xward
abāz_dārišnīh ī az wināh az wēzišn ud paššinǰišn ī ō zamīg madan rāy
ō mard =ēw framūd kū az bun ī myazd ud sar ahunawar srūdan
abērtar pad myazd ī gāhānbār
čiyōn gōwēd pad hadōxt kū ahunawar az gōwišnān ī frāz_guftān pērōzgartom
ēk ēn kū zūzag ka wēnēd abāz ō dašt kunēd
gyāg ī xwēš abēbīm pahrēzišn
čē pad wendīdād dastwarān čāšt kū zūzag harw rōz ka andar mōrastag mēzēd hazār mōr bē mīrēd
ēk ēn kū
ast az weh_dēnān kū ka rōy hamē šōyēd ašem_wohū =ēw hamē gōwišn
ān ašem_wohū pēš az ān gōwišn
čē ka andar rōy šustan gōwēd pad āb ō dahan madan warōmand
ēk ēn kū az yōǰdāsrān wizīnand ka =šān tis ēdōn wuzurg čiyōn pākīh ud rēmanīh
kē =š band ī pādyābīh ud apādyābīh aw =iš paywast ēstēd wizīnand
mādagwar abar huxēmīh ud rāst_gōwišnīh ī mard
ud kunišn ī mādayānag ud pad_a_wināhīh rāy pad ahlawtar dārišn
čiyōn andar wendīdād dō bahr ahlawīh abar gōwēd
čiyōn gōwād ay mard ī ahlaw spitāmān zarduxšt yōǰdāsrgar ī ast ī guftār kū rāst gōwēd
mānsr_pursīdār kū =š yašt kird ēstēd
ud ahlaw kē frārāst andar dānēd az dēn ī mazdēsnān yōǰdāsrgar kū =š nērang dānēd
ka ēdōn kū =šān band ī pādyābīh aw =iš paywast ēstēd
kū ān tāštīg pad ōy dārēnd ud az =iš hamē pardazand
ka yazadān šnāyēnēnd ud pad pāk dārēnd
ud ān kē āb ud gōmēz yazēnd ud band ī yōǰdāsrgarīh rāy aw =iš wizīnand
pad yaštārān nigerišnīgtar kunišn
ō gyāg ī pad_paymānag ud xūbtar handāzišn
ud yōǰdāsrgar ōwōn xūbtar ka abāz šust
ud ka az kas kē =š zamānīg pahrēzišn rāy ēdōn kird/grift ēstēd
čē andar drang ī zamānīg was ēwēnag wihān ī rēmanīh dād
yaštārān ī widēdād ān weh kē yašt ī nōšapar abāz kunēd
čē ān ham nāzukīh rāy ī =m azabar_nibišt
was =iz wihān ī =š abar yašt abēr bawēd rāy
az kirdan zyān =ēw nēst
ud az awēšān kē āb ud gōmēz padīrēnd pad pixag šustan čimīgtar
čē agar =išān rēmanīh ast ud dast ō ǰāmag ud āb ud gōmēz nihēd apādyāb
ud ka ēdōn kū ast kas ka ēdōn ī wehtarīh ī az pākīh hamē šōyēnd
awēšān az pākān šustan xūb
ēk ēn kū ma anēmēd dārē kas =iz az wahišt
ud ma ēw nihēnd ōstīgānīhā menišn abar dušox
padisāy was_wināhīh ī =š pad kām agāmāy
čē nēst ī =m dēn wināh ī =š tōzišn nēst
čiyōn gōwēd pad gāhān kū kē awēšān tō ohrmazd ōy =iz ī ristag āgāh hē kū ōy =iz ī wināhgārtar pādifrāh dānēnd
ud ōy =iz ī wināhgārtar kas pad kirbag ī =š warzīd
ēg =iš abērtar āyēd ruwān yyy ud urwāhm
čiyōn andar spand abar mard =ēw ō zarduxšt nimūd kū hamāg hannām andar anāgīh būd pāy =ēw bērōn būd
zarduxšt abar ān dar az ohrmazd pursīd
ohrmazd guft kū ān mard =ēw dawāns nām būd abar sīh_se deh pādixšā būd
u =š hagriz ēč kār ud kirbag nē warzīd
bē hangām =ēw ī ka =š pad ān pāy =ēw wāstar frāz gōspand burd
ēk ēn kū mard =ēw ka =š yašt kird ēstēd u =š zan nē kird ēstēd
abēr frēzwānīg zyānag yašt kirdan
ayāb gētōxrīd framūdan kū čiyōn pad gētī ēdōn čiyōn pad mēnōy nazdīk_menišntar bawēnd
ud pad hadōxt gōwēd kū nāyrīg ī tarsagāy hāwand ān ī zahag pus dārišn
ēk ēn kū ēn panǰ yazišn ī ka kunēd kirbag ka nē kunēd u =š hangām paydāg
ud ka az ān hangām ī xwēš kirdan bē spōzēd wināh ō puhl šawēd
yazišn ī ō puhl šawēd ēn ud pad huspārom gōwēd kū gāhānbār ud rapihwin ud sidōš ud frawardīgān ud xwaršēd ud māh nē yaštan
ēk ēn kū pad ēn se tis [punct] rāy gišnag_zīyišnīh āyēd
ast šnōšag ud wāsak ud yyy
harw ēk =ēw yatā_ahū_wayryō =ēw ud ašem_wohū =ēw bē guftan
ud ka =iz šnōšag ī kas āšnawēd hamgōnag guftan
wehān pad kardag ōwōn dāšt
pad sūdgar gōwēd kū čē šnōšag yyy kū pad čē kār āyēd
u =š guft ohrmazd kū gišnag_zīyišnīh zarduxšt
čē ōy ast bēšāzišnīh ahunawar zarduxšt ahlāyīh
čim ī gāhān
ēn se ašem_wohū kē frawarānē pēš nērang
ud wardišn ī ēn se hād frawarānē ud frōstawan ud āstuyē
frawarānē frәrān bun tā frasastaiiaēča
frastuiiē frastuiiē bun tā āstuiiē
āstuiiē āstaōϑβәn bun tā āstaōϑβanәmčā
daēnaiiā̊_māzdaiiasnōiš vīsāi_və̄_amәṣ̌ā_spәntā stōdān_yasn bun
baγąm ēn se hād
pad čāšīdag ud pad dēn_gugāhīh dānāgān ī pōryōtkēšān ēdōn guft kū mard ī pānzdah_sālag mazdēsnān pus brād
ka māndag ō radān garzēd u =š aštar ī srōšōčarnām barēd
u =š ēn panǰ gāh srūd ud ābīn ī weh yašt
u =š hamā_yyy_zādīh kird ēstēd
rēdag ī purnāy ud nē aburnāy
u =š az yašt ī nāwar ud ātaxšān bahr bē dahišn
ud ka =š ēn and nē kird ēstēd bahr nē dahišn
ēn se gāh az tan ī mard ī ahlaw bē kird bawēd
ayās ud xšmāyabī ud attāwaxšī ǰud_ǰud yāzdah wezest
čē yāzdah tis andar tan ī mardōmān mēnōyīhā rawēnd
čiyōn ox ud bōy ud dēn ud ruwān ud frawahr
ud menišn ud gōwišn ud kunišn
ud wēnišn ud ham_bōyišn ud āšnawišn
ud tan ī mardōmān abārīg =iz dahišnān dahīhist az āb ud ādur wād
aṣ̌әm_ahurәm_mazdąm se bār pēš madan ī xwaršēdar ud xwaršēdarmāh ud sōšyans
ud ka =iz hād xūb pad gāh ud wezest ōšmurēnd awēšān pēš rasēnd
ud šahr ābādtar ud gēhān dāštārtar bawēd
tāwrad wīst_dō wezest wīst_dō dādestān ī pad hadōxt gōwēd kū anaōmō _manaŋ́he_kiia_vīsāi_kauua_kuua_parō
pad dādwar mehmān kū_tā wīst_dō dādestān rāsttar kū ka tāwrad_hād xūb yazēnd ud pad gāh ud wezest ōšmurēnd
dādwarān ān wīst_dō dādestān rāsttar dārēnd ud dādestānōmandīh mehmāntar
xwaytumayn šāzdah wezest
ud pad artēštārān mehmān kū_tā =šān dušmen az ān šāzdah šahr
ī pad fradom pargard ī ǰud_dēw_dād gōwēd
pānagīh weh tuwān bawād kirdan
yaϑāiš čahārdah wezest
pad ēn čim čē haft amahraspand mēnōy ud haft amahraspand gētī rāy
pad xwēškārīh tuxšāgtar bawēnd tā rasēnd ō garōdmān
mēhan ī ohrmazd mēhan ī amahraspandān mēhan ī awēšān ahlawān
auui garō nmānәm_maēϑanәm_ahurahe_mazdā̊_maēϑanəm_aməṣ̌anąm_
yə̄_sәuuištō se ǰār zōhr abar_dārišnīh ēn čahār pēšag rāy
ud ēd rāy pad ahurāi_mazdāi
āsārīh ī datuš zōhr ham dil ī ōy zōt rāst dārišn
ud āsrōšān ham bāzā ī ōy ī zōt rāst dārišn
kū_tā artēštārān andar kōxšišn ī abāg anērān nēw_diltar
ud wāstaryōšan pad warz ud ābādānīh ī gēhān bāzā_ōztar bawānd
yāš́iiaōϑanā pānzdah wezest
ud pad ēn čim čē zanišn ī ān pānzdah druz pad bēšāz ī hadōxtīg paydāg rāy dād ēstēd
mazdā_at̰_mōi čahār bār
bahr ī ēn panǰ radīh rāst bē madan rāy
mānbed ud wisbed ud zandbed ud dehbed ud zarduxštrōdom
ahiiā_yāsā dō ǰār pad ēn čim kū dehbed nē ēwāz tan bē ruwān =iz gīrād
ān čahār yatā_ahū_wayryō ī fradom pad ēn čim kū_tā kehān andar mehān framān_burdārtar
ud humat ud hūxt ud huwaršt andar gēhān mehmāntar
ud druz apādixšāytar bawānd
ēmar
ayās pad ohrmazd ud mard ī ahlaw
xšmāyabī pad wahman ud gōspand
attāwaxšī pad ardwahišt ud ātaxš
tāwrad pad šahrewar ud ayōšust
xwaytumayn pad spandarmad ud zamīg gāh
yatāyš pad hordād ud āb
ud yāšyawayt pad amurdad ud urwar
frāg dahm ī pad ahunawayt_gāh frāz barēd
mānbedān ān ī pad uštawayt_gāh frāz barēd
wisbedān ān ī pad spandmayt_gāh frāz barēd
zandbedān ān ī pad wohuxšahr_gāh frāz barēd
dehbedān ān ī pad wahištōyšt_gāh frāz barēd
zarduxštrōdom ān ī pad yasn wisperad ud ahlaw ī gyāg frāz barēd
ēn čahār pēšag xwēš
yasn bun kardag nō wezest u =š bun humatanām u =š sar humatanām
ahiiā_ϑβā_āϑrō šaš wezest
ud az ān šaš war ī garm ī pad huspārom pad čaϑraiiāim_āϑraiiąm kird ēstēd
iϑā_āt̰_yazamaide panǰ wezest stāyišn ud spās az ohrmazd pad dād ī weh_dahišnān
imąm_āat̰_ząm panǰ wezest
ud az ān panǰ āsānīh ud panǰ anāsānīh ī zamīg
ī pad wendīdād pad sidīgar pargard paydāg bē kird ēstēd kū zamīg fradom āsānīh az ān ka =š mard ī ahlaw abar frāz rawēd
ud didīgar ka =š mān ī wehān ud ātaxšān abar kunēd
sidīgar ka =š ǰōrdā abar kārēnd ud nasā_pahrēz kunēd
tasom ka =š harw stōr abar zāyēnd
panǰom ka =š harw stōr abar mēzēnd
u =š fradom anāsānīh az ān ī arzūr grīwag dar ī dušox
didīgar ka =š rist abar kirrēnēnd
sidīgar ka =š hazzān abar kunēd
tasom az ān ka =š sūrāg ī xrafstarān
panǰom ka =š mard pad wardagīh abar bē barēd ī ahlaw
iϑā panǰ wezest čiyōn ān =iz ī pēš
āhū_at̰_paitī čahār wezest abar arzōmandīh ī āb ud zamīg ud urwar ud gōspand rāy
stūtō_garō šaš wezest humatanąm dō ǰār
huxšatrōtəmāy se ǰār būd ī pusarān ī zardušt rāy
aṣ̌ahiiā_āat̰_sairī dō ǰār stāyišn ī ahlāyīh ud zanišn ī druz rāy
yeŋ́hē_hātąm dō ǰār stāyišn ī ohrmazd ud amahraspandān
ud zanišn ī gannāg_mēnōy ud wišūdagān rāy
ϑβōi_staōtarasčā stāyišn ī yazišn ud miyazd rāy
ātrәmča dō bār stāyišn ī ādur ī farnbay ud ātaxš ī wāzišt rāy
uštawayt šāzdah wezest hamčiyōn xwaytumayn rāy guft ēstēd
tattwāpers wīst wezest ān ī wīst dādestān mayān spennāg_mēnōy ud gannāg_mēnōy
ud ēd rāy harw ǰār =ēw tattwāpers abāz kunēd čē dādestān bun abāz kunēd
bār ī wīstom gannāg_mēnōy stō bawēd
at̰_frauuaxšiiā yāzdah wezest az šaš radīh ud panǰ frahang az dēn bē kird ēstēd
ēk kū harw ān ī pad xwad nē nēk pad kasān nē kirdan
didīgar xūb kird ud nē xūb kird bē dānistan
sidīgar az wattarān waštan u =šān andarg guftan
čahārom māndag ō radān garzīdan ud aštar burd
panǰom gāhānbār ud abārīg =iz ǰašn ī ō puhl šawēd andar hāsr bē nē hištan
ud kē ēn panǰ frahang nēst ān šaš radīh xwēš nē bawēd ud pad =iz čāšišnīh nē šāyēd
kamnamayz nōzdah wezest
pad ēn čim kū harw kas pad xwēšagānīh ōwōn tuxšēd
kū_tā =mān ān nōzdah ustōfrīd ī pad sagādom gōwēd ā =m xwēš bawād
ud yazadān ōz ud nērōg abērtar ud ēbgad abesīhēnīdārtar bawānd
uštawayt_gāh čahār hād ēw gāh ud panǰ gāh =ēw wezest bē haečat̰ aspā_vaxšiiā
uštā_ahmāi dō ǰār
ud ēk dārišn radīh ī ohrmazd ud ēk zadārīh ī druzān
ušta_ahurәm_mazdąm hamgōnag
spandmayt šaš wezest
ud yezid dwāzdah wezest
atmāyaw dwāzdah wezest
katmōyruwag yāzdah wezest
spandmayt_gāh čahār hād =ēw gāh ud čahār gāh ud ēk wezest
az panǰ radīh ud čahār pēšag bē kird ēstēd
spәṇtā mainiiū dō bār
ēk stāyišn ī spandarmad ud ēk ān ī zamīg rāy
spәṇtəm_ahurәm_mazdąm dō ǰār
ēk stāyišn ī spennāg_mēnōy dām ud ēk zadārīh ī gannāg_mēnōy dām
ud wohuxšahr_gāh wīst_dō wezest
ān wīst_dō dādestān ī abar_pad dādwarān mehmān čiyōn azabar nibišt
vohu xšaϑrәm dō ǰār
ēk stāyišn ī zīndagīh ud ēk ī zarduštrōdom
vohuxšaϑrәm yazamaide dō wezest
ēk stāyišn ī šahrewar ud ēk pad ayōšust rāy
auui_apąm dō ǰār
ēk stāyišn ī ābān ud ēk urwarān rāy
ud wahištōyšt nō wezest ān nō tis rāy ī abar zarduštōdomān mehmān zarduštōdomīh ud xānīgān čašmag ud ābān puhl ud rōd =iz ī nāydāg ud nar ī ahlaw ud nāyrīg ī ahlawēnī
ud ēk hād ēw gāh =ēw čahār gāh ēw wezest bē iϑā ī haiϑiiā_narō čē xwadāy ud dehbed hamē andar gēhān ēk
ud ān čahār gāh ēd rāy čē paydāg čaϑruš_hamaiiā̊_xšapō_dahmaiiāt̰_parō_āfritōit̰ harw šab čahār bār dahmān_āfrīn ud se srōš ud dō būšāsp ud ēk xešm ō ox ī astōmand bē rasēnd
ud ān ēk ēd rāy panǰ čē ōy zarduštōdom ayār panǰ mānbed ud wisbed ud zandbed ud dehbed ud ān =iz ī xwēš nārīg
vahištā_īštiš dō ǰār ēk stāyišn ī dehbedān ud ēk stāyišn ī paymān rāy
vahištәm_ahurәm_mazdąm dō ǰār ēk stāyišn ī ohrmazd ud amahraspandān ud ēk zadārīh ī druzān rāy
ayryaman čahār ǰār ērmānīh ī andar mān ud wis ud zand ud deh wēš būdan rāy
auuat̰_mīždәm čahār ǰār bēšāzīh ī awēšān andar mān ud wis ud zand ud deh mānēnd rāy
kardag bun tatsōydiš bowandagīh gāhān rāy gāhānīg čāšt
gāhān bun ahiiā_yāsā u =š sar drigaōiiē_vahiiō
ud ast 278 wezest ud 1016 gāh ud 5567 wāzag 9999 mārīg ud 16554 xwardag
čē =mān handāxt gāh ud wezest ī gāhān
ud būd ahunawayt_gāh sad wezest ud harw wezest =ēw se gāh
ud yasn čēhel wezest ī harw wezest =ēw se gāh
uštawayt_gāh šast_šaš wezest ī harw wezest =ēw gāh bē haečat̰ aspā čē ān ēk čahār gāh
spandmayt_gāh čēhel_ēk wezest ī harw wezest =ēw čahār gāh
wohuxšahr wīst_dō wezest ī harw wezest =ēw se gāh bē iϑā ī čē ān ēk panǰ gāh
wahištōyšt nō wezest ī harw wezest =ēw čahār gāh
hammis yyy yyy dō_sad_haftād_hašt wezest
pad nām ī yazadān ud ǰahišn ī nēk bawād
ka drōn yazēnd ka dēw_ēzagīh bawēd kadām ud čand nē šāyēd
wizīr ēn
kē dānišnīgīhā pad barsom ī apādyāb ayāb pad barsom kē tāg marag wēš ayāb kem
ud abārīg urwar ī pad barsom nē šāyēd drōn yazēd
ayāb barsom sar ō abāxtar dārēd nigerišnīg ud abestāg gōwēd
ayāb kē pad sūdagīh ud anāgāhīhā yazēd
ā =š nē pad guft dārišn
kē pad nigerišn ayāb nē pad nigerišn
čāšnīg nē az drōn gaōšdāg az frasast gīrēd
ayāb kē wāz az ān drōn gīrēd pēš az zōt az ham drōn čāšnīg kunēd
ayāb wezest_drahnā abzūdan bē gōwēd ud drōn bun abāz nē kunēd
ayāb šnūman pēš ud pas kunēd
ayāb ka ātaxš wēnēd abestāg nē pad ātaxš gōwēd
ēd kū čiyōn bawēd ka gāh grift ud čiyōn bawēd ī ka hišt
ay ka star ī ohrmazd_dād ēk =iz ī paydāgīhēd grift ud ka nē hišt
hād wanandohrmazd guft kū ka ǰud az tištar ud wanand ud sadwēs ēk ī axtarīg paydāgīhēd grift ud ka nē hišt
hād būd kē guft kū ka ǰud az ān se ī se axtarīg paydāgīhēd šāyēd ud ka nē hišt
pad nām ī dādār ohrmazd
pad nām ī dādār ohrmazd
az abestāg gyāg =ēw paydāg kū zarduxšt pēš ohrmazd nišast u =š wāz hamē xwast
u =š ō ohrmazd guft
kū =m sar ud dast ud pāy ud wars ud rōy ud uzwān ī tō ēdōn pad čašm
čiyōn ān =iz ī xwēš
ud wastarg ān dārē mardōmān dārēnd
u =m dast dah tā dast ī tō bē gīram
ohrmazd guft kū man mēnōy ī agriftār ham dast ī man grift nē tuwān
zarduxšt guft kū tō agriftār
ud wahman ud ardwahišt ud šahrewar ud spandarmad ud hordād ud amurdad agriftār
ud man ka az pēš ī tō bē šawam ud tō ud awēšān =iz nē wēnam
čē ān kas ka =š wēnam u =š yazom az =iš tis
ā =m tō ud ān haft amahraspand yašt bawēd ayāb nē
ohrmazd guft kū bawēnd ō tō gōwam spitāmān zardušt kū amāh harw tan =ēw dāyag =ēw ī xwēš ō gētī dād ēstēd
kē rāy ān xwēškārīh ī pad mēnōy kunēd pad gētī andar tan ī ōy rawāg kunēd
gētī ān ī man kē ohrmazd ham mard ī ahlaw
ud wahman gōspand ud ardwahišt ātaxš ud šahrewar ayōšust
spandarmad zamīg ud nāyrīg ī nēk ud hordād āb amurdad urwar
kē pahrēz ī ēn harw haft hammōxtēd xūb kunēd ud šnāyēnēd
ā =š hagriz ruwān ō xwēšīh ī ahriman ud dēwān nē rasēd
ka =š pahrēz awēšān kird ā =š pahrēz ī ēn haft amahraspandān kird bawēd
pad gētī hamāg mardōm hammōxtan abāyēd
kē andar gēhān ohrmazd kāmēd šnāyēnīdan tis ī ohrmazd kāmēd abzūdan
kē ān abāyēd kē =š ohrmazd hamē pad harw gāh abāg bawēd mard ī ahlaw
pad harw čē =š mad ēstēd ud harw čē ast ēw šnāyēnēd u =š pad rāmišn ēw kunēd u =š az wattarān pānagīh ēw kunē
čē mard ī ahlaw hangōšīdag ī ohrmazd xwadāy
ka mard ī ahlaw kunēd ā =š ān ī ohrmazd kird bawēd
kē mard ī ahlaw šnāyēnēd ā =š andar gēhān dērang_zamān husrawīh ud nēkīh bawēd
u =š wahišt rōšnīh ī ohrmazd ud šādīh ud rāmišn xwēš bawēd
kē andar gēhān wahman kāmēd šnāyēnīdan ud pad rāmišn kāmēd yyy kirdan
kē tis ī wahman kāmēd abzūdan u =š ān abāyēd ka =š hamē wahman abāg bawēd
pad hamāg gāh zamān gōspand ī hudahāg pad čē mad ēstēd čē ast ēw šnāyēnēd
ud pad rāmišn ēw kunēd
u =š andar ān ī sahmgen rōz ud ān ī awištāb gāh =iš az stahmagān ud axwēškārān
pānagīh ēw kunēd
pad pārag ō mard ī druwand sāstār ma ēw dahēd
pad ān ī xwaš ud garmōg gyāg ud gāh ēw dārēd
u =š pad hāmīn kāh ud ǰōrdā ambār ēw kunēd
kū pad zamestān pad čarag nē abāyēd dāštan
u =š pad ēd kār ma ēw pardazēd kū wāš bē_ō wattarān daham
čē ō wehān abāyēd dādan
u =š ǰud az waččag ma ēw rāyēnēd u =š waččag az šīr ǰudāg ma ēw kunēd
čē =š ān ast andar gēhān hangōšīdag xwēš gōspand ī hudahāg
kē awēšān šnāyēnēd kē gōspand ī hudahāg
ōy andar gēhān husrawīh bawēd u =š ān ī pahlom axwān rōšnīh ī ohrmazd xwēš bawēd
kē andar gēhān ardwahišt kāmēd šnāyēnīdan kē tis ī ōy kāmēd abzūdan
u =š ān abāyēd ka ardwahišt pad hamāg gāh ud zamān abāg bawēd
ātaxš ī ohrmazd pad čē mad ēstēd ud čē ast ēw šnāyēnēd ud pad rāmišn ēw kunēd
ud esm ud bōy ud zōhr ī duzzīdag ud appurdag abar ma ēw nihēd
ud bahr ī =š pad stahm az mardōmān appurd ēstēd ā =š ma ēw pazēd
čē =š ān ast andar gēhān hangōšīdag ī xwēš ātaxš ī ohrmazd
ud kē awēšān šnāyēnēd kē ātaxš ohrmazdān
ōy andar gēhān husrawīh bawēd u =š wahišt rōšnīh ī ohrmazd xwēš bawēd
kē andar gēhān šahrewar kāmēd šnāyēnīdan ud pad rāmišn kāmēd kirdan
kē tis ī šahrewar kāmēd abzūdan
kē ān abāyēd ka =š šahrewar pad harw gāh ud zamān abāg bawēd
pad hamāg gāh ud zamān āhen ī widāxtag ēw šnāyēnēd
ud šnāyēnīd ī āhen ī widāxtag ēn kū ox ud dil ēdōn abēzag ud pāk bē kunēd
ī ka āhen ī widāxtag abar bē hilēnd nē sōzēd
ud ādurbād =iz ī māraspandān pad ēn dastwarīh kird kū āhen ī widāxtag
ka abar ox ud dil ī abēzag hilēnd
ā =š ēdōn xwaš bawēd čiyōn kē šīr pad =iš dōšēnd
ka abar ox ud dil ī druwandān ud wināhgārān hilēnd dazēd ud mīrēd
ud pad ayōxšust wināh ma ēw kunēd u =š dazišn pad =iš
ud zarr ud asēm ō wattarān ma ēw dahēd
čē =š ān ast andar gēhān šahrewar hangōšīdag ī xwēš
kē awēšān šnāyēnēd kē āhen ī widāxtag
ōy andar gēhān husrawīh bawēd u =š wahišt rōšnīh ī ohrmazd xwēš bawēd
kē andar gēhān spandarmad kāmēd šnāyēnīdan
ud tis ī spandarmad kāmēd abzūdan
kē ān abāyēd ka =š spandarmad abāg bawēd
pad hamāg gāh ud zamān zamīg ud nāyrīg ī nēk pad čē mad ēstēd ud pad čē ast ēw šnāyēnēd
ud pad_rāmišn ēw kunēd
čē ka ēn zamīg bē nē wisāyēd ud ēk az did abāz nē ēstēd
u =š tan harw gāh ud zamān yyy abar nē hamē bawēd
mehmānīh ī spandarmad pad zamīg rāy
ka duzz ud stahmag ud margarzān
ud zan kē andar šōy atarsagāh andar gēhān pad wināhgārīh abar rawēnd
u =šān šōy xwēškār nēk yyy wēš bawēd
ēn =iz paydāg kū ēn yyy hamē ka bawēd pad ān zamān wēš bawēd ka margarzān ud wināhgār wēš hēnd
čē paydāg ka margarzān ud wināhgār abar rawēnd dard ud dušxwārīh ēdōn bawēd
čiyōn mād ān ī murdag pus pad war ā =š dušxwār
spandarmad ān gyāg kū margarzān wināhgār pad =iš rawēnd mehmānīh ī pad zamīg kem bawēd
u =š rāmišn az ān gyāg bēd ka =š kār ud warz pad =iš kunēnd
u =š pus ī nēk abar zāyēd u =š gōspand abar parwarēnd
u =š ān ast yyy ōy andar gēhān husrawīh bawēd u =š wahišt rōšnīh ī ohrmazd xwēš bawēd
kē andar gēhān hordād ud amurdad kāmēd šnāyēnīdan ka ān abāyēd kē tis ī awēšān abzāyēd
kē ān abāyēd ka_š pad harw gāh ud zamān abāg bawēd
hordād ud amurdad pad čē mad ēstēd ud pad čē ast āb ud urwar ēw šnāyēnēd
pad awēšān wāz ēw gīrēd ka āb ud urwar xwarēnd
duzd ud stahmag ma ēw kunēd gēhān pad wināhgārīh ma ēw rawēd
ud hixr ud nasā ud abārīg =iz rēmanīh ō āb ma ēw barēd
urwar adādīhā ma ēw škennēd ud mēwag ō axwēškār ud wattarān ma ēw dahēd
čē ka wināh andar āb ud urwar kunēd ka =iz =iš andar tāg čak =ēw kird ēstēd u =š nē wizard ēstēd
kē az gētī bē šawēd mēnōy ī hamāg urwar ī pad gētī ō pēš ī ōy mard_bālā bē ēstēnd
u =š ō wahišt nē hilēnd
ud ka wināh andar āb kird ēstēd ka =iz =iš andar srešk =ēw kird ēstēd ud nē wizārd ēstēd
ān =iz and bālā čand urwar ēstād bē ēstēd u =š ō wahišt nē hilēd
čē awēšān ast hordād ud amurdad hangōšīdag ī xwēš āb ud urwar
kē awēšān šnāyēnēd kē āb ud urwar
ōy andar gēhān husrawīh bawēd u =š wahišt rōšnīh ī ohrmazd bahr bawēd
ohrmazd ēn =iz guft ō zarduxšt kū =m kāmag ud abāyist
pahrēz ud šnāyēnišn ī ēn haft amahraspand ō tō guft
ud tō =iz ō mardōmān gōw kū_tā wināh nē kunēnd ud druwand nē bawēnd
u =šān wahišt rōšnīh ī ohrmazd xwēš bawād
frazaft pad drōd šādīh rāmišn
pad nām ī yazadān
dar ēd kū wināh ī pad xwardag ēk_ēk nibēsēm
wināh ī kamist framān ēw
framān =ēw se drahm dāng se ud panǰ dānag
ast kē se drahm dāng se gōwēd
āgrift =ēw harw čē andar gēhān mardōm pad =iš zanēnd sneh
u =š hamē ka sneh pad dast grift
u =š čahār angust az zamīg abar grift
ā =š āgrift =ēw ō bun
āgrift =ēw tōzišn ud pādifrāh panǰāh_se ud drahm dō
ka ān sneh frōd wardēd ā =š awōyrišt =ēw ō bun
u =š dādestān wardišn
u =š tōzišn ud pādifrāh haftād_se drahm se
bawēd ī ka tis =ēw ī ǰuttar bawēd
ka =š ān sneh abar bē dahēd arduš =ēw ō bun
u =š tōzišn pādifrāh sīh stēr
agar =iš rēš panǰ_ēk =ēw ī dišt pad =iš kird ā =š arduš =ēw ō bun
u =š tōzišn pādifrāh ham sīh stēr
pāyagīhā ī wināh nibēsēm
srōšōčarnām =ēw se drahm dāng =ēw nēm
framān =ēw srōšōčarnām
āgrift =ēw šāzdah stēr awōyrišt =ēw wīst_panǰ stēr
arduš =ēw _xwar =ēw šašt
bāzā =ēw nawad yād =ēw 180
tanāpuhr =ēw sīh
kirbag ī abar yazišn ī yazadān
drōn =ēw tanāpuhr =ēw kirbag
yašt =ēw sad tanāpuhr
wisp_rad =ēw hazār tanāpuhr
ēw_hōmāst =ēw bēwar
dwāzdah_hōmāst =ēw 100000
kē pad zōhr harw ēk kirbag ēk =ēw sad guft ēstēd
hadōxt =ēw 2000 tanāpuhr pad zōhr ēk sad bawēd
ēn =iz pursīd zarduxšt az ohrmazd kū hangām kadār ī ka gōšt nē abāyēd xwardan
ohrmazd passox dād kū andar xānag =ēw ka tan =ēw bē mīrēd tā se šab bowandag bawēd
pad ān nāmagānīh tis =iz gōšt ō drōn nē nihišn
bē ēn ī čiyōn šīr ud panīr ud mēwag ud xāyag ud rīčār ōh nihišn
paywandān ī ōy tis =iz gōšt nē xwarišn
andar se rōz hamāg yazišn ī srōš abāyēd kirdan
ēd rāy čē ruwān ī ōy az dast ī dēwān se rōz srōš bē tuwān bōxtan
ud andar se rōz ka harw gāh yazišn =ēw hamē kunēd weh
čiyōn ka pad ēw bār hamāg_dēn bē yazēnd
ud pas šab ī sidīgar ōšbām se drōn yaštan
ēk rašn aštād ud didīgar wāy ī weh sidīgar ardā_fraward
ud ǰāmag abar drōn ī ardā_fraward nihišn
rōz ī čahārom rāy gōspand pādixšāy kuštan
rōz čahārom yazišn ī ardā_fraward kunišn
ud pas dah rōzag ud māhīgān ud pas sālīgān
ud māhīgān ī fradom pad sīh rōz ī rāst
ud sālīgān pad rōzgār ī xwēš
ka gyāg =ēw dūr bē mīrēd kū āgāhīh rasēd
ka ān gyāg kū bē murd sidōš yašt xūb
ka nē ā =š ēn gyāg bē yazišn
az ān ī ka āgāhīh rasīd tā se šab bowandag bawēd yazišn ī srōš abāyēd kirdan
pas az se rōz ud šab yazišn ī ardā_fraward abāyēd kirdan
gyāg =ēw paydāg kū ōy kē =š gušnīh az dēwān ōy kē kūn_marz kunēd ud ōy kē dēn ī ahlomōγīh kunēd
ēč =ēw rist nē wirāyēnd
ēd rāy čē ōy kē gušnīh az dēwān xwad dēw
ud ōy kē kūn_marz kunēd ā =š ruwān dēw bē bawēd
ud ōy kē dēn ī ahlomōγīh kunēd ā =š ruwān mār =ēw šēbāg bē bawēd
ēn =iz az abestāg paydāg kū ohrmazd guft kū hamāg mardōm tan pad paristišn ud framān_burdārīh
bē ō ān mard dahēd kē hamāg abestāg ud zand warm
tā =tān az kār kirbag āgāh kunēd
čē mardōm ēd rāy ō dušox šawēnd ka tan ō hērbedestān nē abespārēnd
ud az kār kirbag āgāh nē bawēnd
pursišn
ān kār ī pad tan abestāg pad nē xūb kirdan wizīr margarzān abar kird ēstēd
ān kār nē kirdan pad_bōzišntar ayāb andar warōmandīh
ay mihr ī dēn rāy bē kirdan ud rāyēnīdan
passox ēd kū pad_bōzišntar ka xūb kunēnd
bīm nē xūb kirdan rāy bē nē hištan
ōh =iz ka nē xūb =iš hišt kār =iš wattar čē =š tar_menišnīh pad =iš andar rasēd
ēn =iz paydāg kū zarduxšt az ohrmazd pursīd kū ēn mardōm az kū gyāg abāz āxēzēnd
az ān gyāg kū naxwist andar_ō mādarān šawēnd
ayāb az ān gyāg kū az mādarān zād hēnd
ayāb az ān gyāg kū tan bē ōftēd
ohrmazd passox dād kū nē az ān gyāg kū andar_ō mādarān šud hēnd
ud nē az ān gyāg kū az mādarān zād hēnd
ud nē az ān gyāg kū tan ud gōšt ōftēd
čē az ān gyāg āxēzēnd kū =šān az tan gyān bē šud
u =š ēn =iz pursīd kū kē andarwāy az tis =ēw āguxt ēstēd bē mīrēd az kū abāz āxēzēnd
passox
az ān gyāg kū =š naxwist ast ud gōšt ō zamīg ōftēd
az ēn bē ka abar gāh =ēw ayāb wistarg =ēw bē mīrēd
pēš kū =š bē barēnd kadām =ēw pārag stānišn u =š tar handām dahišn
čē ka nē ēdōn kunišn ā =š az ān gyāg abāz āxēzēnd kū =š tan ō zamīg rasīd
frazaft pad drōd šādīh rāmišn
andar dēn guft ēstēd kū xešm dwārist ō ahriman pēš u =š drāyīd kū man andar gētī nē šawēm
čē ohrmazd ī xwadāy andar gētī se tis dād ēstēd kē man tis =iz kirdan nē tuwān
ahriman drāyīd kū gōw kū ān se tis čē
xešm drāyīd kū gāhānbār ud miyazd ud xwēdōdah
ahriman drāyīd kū andar gāhānbār bē ras
agar az awēšān ēk tis =ēw bē duzzīd gāhānbār bē škast ud kār bē kām tō
pad mēzd bē ras
agar az awēšān ēk =ēw bē drāyīd mēzd bē škast ud kār pad kām ī tō
xwēdōdah bē hil čē =š man čārag nē dānam
čē kē zan čahār bār ō nazdīk šud az xwēšīh ī ohrmazd ud amahraspandān ǰudāg nē bawēd
yatā_ahū_wayryō kū pad harw gyāg =ēw abāyēd tis =ēw pad kār čiyōn gōwišn
ēk ēn kē ō hanǰaman ayāb pēš ī mehān sālārān ayāb pad kār =ēw frāz šawēd
ayāb ka ō xwāyišn xwāstan šawēd
ka =iz kār =ēw wizārēd pad ēn harw gyāg =ēw ēk =ēw guftan tā =š kār rawāgtar šawēd
āfrīn huāfrīntar bawād ēd rāy dō gōwēd čē āfrīn dō ēwēnag
ēk ān ī pad menišn ud ēk ān ī pad gōwišn
čahār ka ō rad_franāmišnīh aŋ́hā̊_xšapō kadāriz =ēw pad kadāriz =ēw abar šawēd rādīh ī gāhānbār āfrīntar bē madan rāy
panǰ kē ō wināh wizārdan šawēd druz bē_barišnīh rāy
čē pādifrāh pad dastwarīh ī ēn panǰ kas šāyēd wizārdan
mānbed wisbed zandbed ud dehbed ud zarduštrōdom
u =š ašem_wohū panǰ pad sar bē gōwišn
šaš kē ō amāwandīh xwāstan šawēd ō kārēzār tā pērōzgartar bawād
haft kē ō yazišn yazadān kirdan šawēd amahraspandān ō yazišn pēštar rasēnd
hašt kē ō yazišn ī ardā_fraward kirdan šawēd
nō kē ō ǰōrdāg kištan šawēd
ay ēd rāy gōwēd čē ǰōrdāg pad nō māh bē rasēd
tā ǰōrdāg pēš rasēd xrafstarān zyān kem kunēd
dah kē ō zan xwāstan šawēd tā dahišn pad kār weh bawēd
dah kē ō stōr ud gōspand gušn kāmēd hišt tā huzahagtar bawēd
yāzdah kē ō ān ī buland gar šawēd tā =š xwarrah ī gar ud kōf āfrīn kunēnd ayār bawēnd
dwāzdah kē ō ān ī zofr rōstāg šawēd tā =š xwarrah ī ān šahr ud rōstāg āfrīn kunēnd ayār bawēnd
sezdah kē ō abērāhīh bē šawēnd ān ham gyāg bē gōwēd
ayāb kē pad puhl =ēw rōd =ēw bē widerēd tā =š mēnōy ī ān āb āfrīn kunēd čē andar hamāg abestāg yatāahūwayryō meh ud pērōzgartar
pad harwisp rōd ud harwisp bēšāzišnīh ud harwisp pānagīh
dēn abāg yatā_ahū_wayryō ēdōn ēw_kardag čiyōn dēm abāg rōy xwarrah ēw_kardagtar
ēd =iz čē mōy rōy dēm ǰudāg kirdan yyy
gyāg =ēw paydāg kū az dēn guft ēstēd kū mard čand wēšist ō mān ī ātaxšān šawišn ud ātaxš niyāyišn tarsagāhīhā kunišn
čē harw rōz amahraspandān se bār andar mān ī ātaxšān hanǰaman kunēnd
ud kirbag ud ahlāyīh ānōh bē hilēnd
ud kē wēš ō ānōh šawēd ud ātaxš_niyāyišn tarsagāhīhā wēš kunēd
ēg ān kirbag ud ahlāyīh ī ānōh bē hišt pad tan mehmāntar bawēd
ēn =iz kū xrad gōhr ēdōn čiyōn ātaxš
čē andar ēn gēhān tis nēst ī ēdōn bē bawē čiyōn ān tis ī pad xrad kunīhēd
ud ātaxš =iz harw kū abrōzēnd az dūr wēnēd bōxt ud ēraxt paydāg kunēd
ud kē pad ātaxš bōxt ǰāwēdān bōxt ud kē pad ātaxš ēraxt ǰāwēdān ēraxt
ēn =iz kū xēm kē xrad andar nēst ēdōn homānāg čiyōn xānīg =ēw ī rōšn ud anāhōg
kē bast ēstēd ud ō kār nē hamē šawēd
ud ān xēm kē xrad abāg ōwōn homānāg čiyōn xānīg =ēw ī rōšn ud anāhōg
kē tuxšāg mard abar ēstēd ud andar_ō kār kunēd bē warz bandēd ud bar ō gēhān dahēd
ēn =iz kū mardōmān ēn se tis kunišn
nasuš az tan dūr bē kirdan pad dēn āstawān būdan ud kirbag kirdan
nasuš az tan dūr bē kirdan ēd kū pēš az xwaršēd ul mad
dast ud rōy pad gōmēz ud āb šustan
pad dēn āstawān būdan ēd kū xwaršēd yaštan
ud kirbag kirdan ēd kū xrafstar ēw_čand bē ōzadan
ēn =iz kū mardōmān ēn se xwēškārīh ī mahist
ān ī dušmen dōst kirdan ān ī druwand ahlaw kirdan ud ān ī dušāgāh dānāg kirdan
dušmen dōst kirdan ēd kū =š xīr ī gētī pēš dārēd u =š pad menišn dōst dārēd
druwand ahlaw kirdan ēd kū =š wināh kē pad =iš druwand bawēd az =iš bē wardēnēd
ud dušāgāh dānāg kirdan ēd kū xwēš_tan ōwōn bē wirāstan kū =š ān ī dušāgāh abar hammōzēd
ēn =iz kū mardōmān rawišn ō ēn se gyāg abērtar kunišn
ō dar ī hudānāgān ō dar ī wehān ud ō dar ī ātaxšān
ō dar ī hudānāgān kū_tā dānāgtar ud dēn pad tan mehmāntar bawēd
ō dar ī wehān pad ēn kū_tā pad wehīh ud wattarīh āgāh bawēd ud wattarīh az =iš bē barēd
ud ō dar ī ātaxšān pad ēn kū_tā druz ī mēnōy az =iš bē wardēd
ēn =iz kū kē kunišn ō ruwān ēg =iš gētī xwēš ud mēnōy xwēštar
ud kē kunišn ō tan mēnōy pad kāmag dārēd ud gētī akāmagīhā az =iš stānēnd
ēn =iz kū baxt_āfrīd guft kū harw dahišn =ēw ohrmazd ō hamēstārīh ī ēk petyārag
ud patitīg ō hamēstārīh ī harw druz būd ēstēd
ēn =iz kū gētī rāy wāhag nē barišn ud pad tis =iz nē dārišn ud az dast nē hilišn
wāhag ēd rāy nē barišn čē ān ī brēhēnīd ēstēd bē rasēd
ud pad tis =iz ēd rāy nē dārišn čē sazišnīg ast ud bē hištan abāyēd
ud az dast ēd rāy nē hilišn čē mēnōy pad gētī ō xwēš šāyēd kirdan
ēn =iz kū pahlom tis rāstīh ud wattom tis drōzanīh
ud ast kē rāst gōwēd pad =iš druwand bawēd ud ast kē drōzan gōwēd pad =iš ahlaw bawēd
ēn =iz kū ātaxš nē ōzanišn čē wināh
ud ast kē ōzanēd weh
ēn =iz paydāg kū tis ō wattarān nē dahišn
ud ast kē pahlom xwaštar xwardīg ō wattarān dahišn
abar =iz ēn nigerišn mardōmān
čē harw tis čārag ast bē margīh
harw tis ummēd bē druwandīh
harw tis bē sazēd bē ahlāyīh
harw tis wīrāstan šāyēd bē gōhr
ud harw tis wardīdan tuwān ud nē baγōbaxt
ēn =iz paydāg kū frēdōn az_ī_dahāg ōzadan kāmist
ohrmazd guft kū =š nūn ma ōzan čē zamīg purr xrafstar bē bawēd
nišān sāyag ī nēm_rōz nibēsam farrox bawād
xwaršēd pad karzang panǰ ēk pāy ī mard _om karzang ēk pāy
xwaršēd pad šagr ēk pāy ud nēm _om ī šagr dō pāy
xwaršēd pad hōšag dō pāy ud nēm _om ī hōšag se pāy ud nēm
tarāzūg čahār pāy ud nēm _om ī tarāzūg panǰ pāy ud nēm
gazdum šaš pāy ud nēm _om ī gazdum haft pāy ud nēm
nēmasp hašt pāy ud nēm _om ī nēmasp nō pāy ud nēm
wahīg dah pāy _om ī wahīg nō pāy ud nēm
dōl hašt pāy ud nēm _om ī dōl haft pay ud nēm
māhīg šaš pāy ud nēm _om ī māhīg panǰ pāy ud nēm
warrag čahār pāy ud nēm _om ī warrag se pāy ud nēm
gāw dō pāy ud nēm _om ī gāw dō pāy
dōpaykar ēk pāy ud nēm _om ī dōpaykar ēk pāy
sāyag ī nēm_rōz xūb frazām bawād
nišān ī uzayrin nibēsam
xūb farrox bawād pad yazadān ayārīh
ka rōz pad abzōn bawēd xwaršēd pad sar karzang āyēd
sāyag šaš pāy ud dō bahr bawēd uzayrin_gāh gīrēd
harw sīh rōz =ēw pāy =ēw ud se ēk =ēw hamē abzāyēd
nūn čiyōn harw dah rōz nēm pāy ōšmār hamē bawēd xwaršēd pad sar ī šagr
sāyag haft pāy nēm
pad ēn padisār harw axtar =ēw hamgōnag
ud māhīgān hamgōnag tā xwaršēd bē sar ī wahīg āyēd
sāyag čahārdah pāy ud dō bahr bawēd
andar wahīg se ēk =ēw pāy abāz kāhēd az ānōh abāz wardēd
čiyōn kāhišn ī šab ud abzāyišn ī rōz harw māhīgān =ēw pāy =ēw se ēk =ēw hamē kāhēd
čiyōn harw dah rōz nēm pāy ōšmār hamē bawēd tā abāz ō šaš pāy ud dō bahr āyēd
harw axtar =ēw hamgōnag ud māhīgān hamgōnag
nibišt ud frazāmēnīd ham man dēn_bandag mihrābān kayhusraw hērbed_zād
nibišt xwēš man awestād pišyōtan ī rām hērbed
ohrmazd dahād pādrōz mehtar pāyag ud gāh
wahman =it xrad dahād
wehīg wahman yān ud humenišn bawād hukunišn kū ruwān bōzāy
ardwahišt ī hučihr dahād =it ōš ud wīr
šahrewar =it bē dahād az harw ābādag ī xīr
spandarmad =it bē dahād spās
pad tan_tōhm nāyrīg =it zan dahād az tōhmag wuzurgān
hordād =it bē dahād purrīh ud padēxwīh
amurdad =it bē dahād ramag čahār_pāyān
day dādār ohrmazd hamēšag pušt pāyād
rōšn burz ādur pad wahišt =it gīrād gāh
ābān =it bē dahād az harw ābādag ī xīr
xwar =it gīrād bē yyy pad mayān hambadīgān
māh =it yyy dahād kē pādrōz xwāzāy
tištar =it raftār gīrād pad haft_kišwar būm
gōšurun amahraspand pānag čahār_pāyān
day dādār ohrmazd hamēšag pušt pāyād
mihr =it dādwar bawād kē =t yyy kāmād yyy
srōš ī ahlaw wānīdār dēwān āz ud xešm ud niyāz az tō dūr dārād ud kōšād tā_ō tō ma gīrād abēdād
rašn =it parwānag bawād ō wahišt ī bāmīg
frawardīn =it frazend dahād kē tōhmag barēd nām
wahrām ī pērōzgar frayādār razm bawād
rām xwābar xwadāy stāyīdār yānān āfrīn =it yyy girād
kū tīr ēst sāl zīwā amarg ud azarmān pad frazāmišn ī rōz
wād =it drōd āwarād az wahišt ī bāmīg
day dādār ohrmazd hamēšag pušt pāyād
dēn =it mehmān bawād pad tō mēhan ud mān
aršišwang ī hučihr kayān xwarrah bām
aštād =it ayār bawād kē pādrōz xwāzāy
asmān =it bē stāyād pad harw hunar ud xīr
zamyād =it bē zanād dēw ud druz az tō mān
māraspand =it gāh gīrād pad wahišt ī bāmīg
anagrān_it anōšag pad harw xīr windād_kāmag bawād wispān yazadān kē āyād kū šawād tō pērōz windā
baxt =it ayār bawād spihr pāsbān ō ēn =im harw amahraspand kē man nām burd hēd
harwīn =it ayār bawād pad harw kirbag ud kār
āfrīn ō srid awestād dagr zīwād šahr ābādag bawād hamāg_šādīh ud rām
harw kač xwār bawād pad kāmag xwābar ohrmazd
ohrmazd dādārtar wahman čābuktar ardwahišt wizīdārtar šahrewar kirdārtar spandarmad bowandagtar hordād čarbtar ud amurdad barōmandtar
day ārzōgōmandtar ādur tābišnīgtar ābān bāmīgtar xwar brāzišntar māh yyy tīr rādtar gōš niyōšīdārtar
day pad mihr čiyōn ohrmazd mihr dādwartar srōš tagīgtar rašn rāsttar frawardīn tuwāngartar wahrām pērōzgartar rām rāmišnīgtar ud wād hubōytar
day ēdōn čiyōn ohrmazd dēn arzōmandtar ard hučihrtar aštād pāktar asmān bulandtar zamyād frazāmīgtar māraspand dēn_burdārtar ud anagrān abzōnīgīhā ud nēkīhā
frazaft pad drōd šādīh bawād