Select Section Type

1.0
frazāft pad wuzurg urwahm ud purr_drōdīh im ohrmazd_dōšīdag ud anarz ahamtāg dēnkard nibēg nēmag ī abdom tā gyāg kū =mān ayāft ’wšknd pad asūrestān andar farrox_ābād
2.0
ud hubōy ud huniyāg ud hupadēx xwarrahōmand ahlišwang bagdād az pačēn =ēw kē andar dīwān andar ast
3.0
čiyōn hufrawahrān hudēnān pēšōbāyān ī az dudag ī hufraward ādurbād ī māraspandān ī az panǰ ud šaš āwādag abāz az abēzag dēn ast frahangān frahang ī harwisp_pēsīd dānāgīh wizārd hudēnān pēšōbāyān ī pas pas abāz hāmwār andar xwānišn nigerišn dāšt ud wirāyišn gyāg gyāg pad dast_nibēg =išān padiš kird ud nibišt ēstād
4.0
man māhwindād ī narmāhān ī wahrām mihr_abān rōz dēn ī māh tīr pērōzgar ī sāl 369 ī pas az sāl wīst ī ōy bay yazadgerd šāhān šāh ī šahryārān
5.0
stūr_mānāg xwēšīh xwēš rāy kē nibišt frāz hišt andar āstawānīh pad abēzag weh_dēn mazdēstān abar aštagīh ī ahlaw_ frawahr zardušt ī spitaman rāst passāzišnīh ī ādurbād ī māraspandān ud abar aštagīh ahlaw āfrīn_guftārīh ī ō harwist ox ī astōmand ahlāyīh kāmagān ī humat_menīdārān hūxt_guftārān ud huwaršt_warzīdārān gētīyīhā pad spurr_kāmag hučašnīh ī ahlāyīh warz–hā ō fraškerd paywastārīh paywandēnānd
6.0
ud menōyīhā abēzag ruwān frawahr ō abartom meh_gāhīh ud burzāwandīh ud bowandag pāddāšn_windišnīh ī andar ān ī asar_rōšnīh ī hamēšag_sūd ī purr_xwārīh ī windēnānd
7.0
nāmčištīgīhā ō awēšān hufrawardān agrī frazānagān ādurfarnbay farroxzādān ādurbād ī ēmēdān kē =šān ēn arz dēnkard nibēg ēdōn frazānagīhā ud abēzag ox_wēnišnīhā andar pl’wzw’’_drayāb ī weh_dēn ōwōn humihr ud weh_nām ud andar purr_dōšāramīhā ud meh_sūdīhā wizārdan amāh pasēnīgān rāy
8.0
ud yazadān an kē ahlāyīh ārzōgīhā stūr mānāg ēn nibēg ’wšknd ud ān =iz ī kē xwānād kār aziš kunēd padiš āstawān abēguman ud ān kē aziš pačēn stanēd andar pad frārōnīh dārēd paywandānd passazagīhā awiš
9.0
ō harwisp kār paymānīgīh ō paymānīgīh rāyēnīdārīh
ō paymān rāyēnīdārīh xūb_frazāmīh
ō xūb_frazāmīh drōdīgīh
ud ō drōdīgīh rāmišnīgīh
ud ō rāmišnīgīh šādmānīh
ud ō šādmānīh urwāhmenīh
ud ō urwāhmenīh wahuman_menišnīh
ud ō wahuman_menišnīh arwand dil
ud ō arwand dil atarsīh
ud ō atarsīh payrāstagišnīh
ud ō payrāstagišnīh druyist_rawišnīh_tanīh
ud ō druyist_rawišn_tanīh kārīg_abzārīh
ud ō kārīg_abzārīh tuxšāgīh
ud ō tuxšāgīh hudāšnīh
ud ō hudāšnīh wywbly’yh
ud ō wywbly’yh hangad_xīrīh
ud ō hangad_xīrīh spurr_bahrīh
ud ō spurr_bahrīh abēniyāzīh
ud ō abēniyāzīh abēšīh
ud ō abēšīh spāsdārīh
ud ō spāsdārīh abzōnīgīh
ud ō abzōnīgīh farrox_winnārišnīh
ud ō farrox_winnārišnīh rawāg_paywandīh
ud ō rawāg_paywandīh ǰāwēdīgīh
ud ō ǰāwēdīgīh paywandīh kāmag hučašmīh
ud ō kāmag hučašmīh xwābarīh
ud ō xwābarīh burzišnīgīh
ud ō burzišnīgīh āzād_čihrīh
ud ō āzād_čihrīh sūdōmand_kunišnīh
ud ō sūdōmand_kunišnīh rawāg_framānīh
ud ō rawāg_framānīh tuwānīgīh
ud ō tuwanīgīh ābādīh
ud ō ābādīh rādīh
ud ö rādīh wizīdār_dahišnīh
ud ō wizīdār_dahišnīh wehān_dōstīh
ud ō wehān_dōstīh ahlāyīh_pandīh
ud ō ahlāyīh_pandīh humenišnīh
ud ō humenišnīh rāst_gōwišnīh
ud ō rāst_gōwišnīh wābarīgānīh
ud ō wābarīganīh kirbag_warzīdārīh
ud ō kirbag_warzīdārīh ruwān_dōstīh
ud ō ruwān_dōstīh kam_wināhīh
ud ō kam_wināhīh farrox_gētīyīh
ud ō farrox_gētīyīh ahlaw_ruwānīh
ud ō ahlaw_ruwānīh garōdmānīgīh
ud ō garōdmānīgīh wuzurg_gāhīh ī ast abāyēdān pahlomtom ud ēmēdīgān mahisttom
pad yazadān nērōg ud ayārīh dādār ohrmazd handāxt bē rasād
namāz zardušt ī spitamān ī ahlaw_frawahr aštag ī ohrmazd wz
ud ān kē ēn nibēg pačēn u =š kird ayāb xwānd rāy pad bār xwāhēd az ylwbw’w =ēw ī zarr kē arz ud mādag bawēd ēnyā nē dahēd andar =išān agar kē dēn čē zamanag ī purr_mar petyārag madan zēnār andak kē abēranǰ uzēnag ud rōzgār ī purr ō dast =išān rasēd pad abāz dādan nē kāmēnd
ud ka ō dast kas ī čiyōn azabar_nibišt rasēd abāz dē dahē ayāb nām ī man kē nibištār ham u =š ’wstwlyt ayāb abganēd ēg =iš nē ahlawdād aziš pad mēnōyān pad činwad puhl ud yytw’yyt’l’n hanǰaman hamēmāl bawam
ud čand ahī xwadāy ī dēnīg bē rasād dēn_burdārān az dēn nēkīh rasād
pērōz bawād xwarrah ī abēzag weh_dēn ī mazdēstān ī gumān_wizār
frazaft pad drōd ud šādīh ud rāmišn andar rōz ī ohrmazd az māh spandarmad sāl ī hašt_sad se panǰ pas az sāl ī wīst ō bay yazadgerd šāhān šān ī šahryārān nibišt ham
man dēn_bandag šahryār yltyšyl ī ēriǰ ī rōstahm ī ēriǰ ī kawād ērān_šāh nibišt ham
frāz hišt xwēšīh xwēš rāy ud frazendān ī xwēš rāy kē tā 150 sālān pad ahlāyīh kār framāyēm
ud pas az 150 sālān ō frazendān ī frazend husraw dēn_burdār abespāram andar abētāywānīh pad abēzag weh_dēn mazdēstān
ud abar_aštagīh ī ahlaw_frawahr zardušt ī spitāmān
rāst passāzišnīh ī ādurbād ī māraspandān
wāz_guftārīh ī ō harwisp ox ī astōmand ī ahlāyīh_kāmagān humat_menīdārān ī hūxt_guftārān ī huwaršt_warzīdārān gētīyīha pad spurr_kāmag_hanǰāmīh ī ahlāyīh_warzīhā ō fraškerd paywastārīh paywandānd
ud mēnōyīhā abēzag ruwān frawahr ō abartom meh_gāhīh ud burzāwandīh ud bowandag ud bowandag_pāddāšn_windišnīh ī andar ān ī asar_rōšnīh ī hamēšag_sūd ī purr_xwārīh windēnānd
nāmčištīgīhā ō awēšan hufrawardīgān agrī frazānagān ādurfarnbay farroxzādān ādurbād ī ēmēdān kē =šān ēn anarz dēnkard nibēg ēdōn frazānagīhā ud abēzag_wēnišnīhā andar purr_huzandīh drayāb ī weh_dēn ōwōn humihrīhā weh_dām andar purr_dōšāramīhā ud meh_sūdīhā wizārd amāh pasēnīgan rāy
ud yazadān ō an ! kē ahlāyīh_ārzōgīhā stūr mānāg ēn nibēg ’wšknd ud ān =iz kē xwānd kār u =š kunēd padiš āstawān abēgumān ān kē aziš pačēn stanēd pad frārōnīh dārēd paywandānānd passazagīhā awiš ēn daftar pačēn az daftar ī marzbān ī spandyād marzbān mihrābān spandyād mihrābān ī marzbān ī dāšn_ayār rōzweh ī šāhmardān ī šādān kwš’’ kird ham
man ēn daftar az dastwar wēzan yazad_ayār wēzan kird ham ud az hampursagīh gwn spandyād ywn kird ham kē =šān paywand pad ērīh ud wehīh bē ō sōšyans pērōzgar paywandīhēd
ahlaw ud garōdmanīg bād gwn spandyād gwn māh_ayār kē =š ēn dēn_bandag šahryār ayār kird u =š abzār dād tā ēn daftar druyist kird u =m aziš paywand pad ērīh ud wehīh bē ō sōšyans pērōzgar paywandīhēd
ēdōn bawād čiyōn =imān āfrīnēnīd
pērōz bād xwarrah ī abēzag weh_dēn ī mazdēstān
hamēšag purr_pačēn purr_xwānīšn bād harw kas pad kāmag ī xwēš tuwān bawād zīstan