Select Section Type

1.0
dahm ō dahm gōwēd ham_rad_passāg ō ōy ī ham_rad_passāg
2.0
kū frāz =it man mard_guhrāyišnīh ka rad amard_franāmišnīh rasād kū ka gāhān_bār abāyēd yaštan az būšāsp be kirdan
3.0
ka padīrift az ōy frāz_guhrāyēnišnīh nē ōy frāz guhrāyēnēd
4.0
sōšyans ōy radīhā kē sayēd kū =š gāhān_bār yašt bawēd awōyrišt ō bun nēst
5.0
u =š aradīhā x čār az =iš awōyrišt ōy rāy ō bun u =š gāhān_bār nē yašt bawēd
6.0
kayādurbōzēd guft hād ōy radīhā kē sayēd kū =š awōyrišt ō bun nēst tā =š gāhān_bār nē yašt bawēd
7.0
u =š aradīhā čār kū =š awōyrišt ēd rāy ō bun tā =š gāhān_bār yašt bawēd
8.0
pad harw dō čāštag ā =š atuwānīgīh ēn tis andar nē abāyēd
9.0
anī bawēd ka gāhān_bār be mānēd tā ka yazišn be mānēd ā =š xwar ō bun
čandēn mardān pad āfrāh ō zōt radīhā kū pad yašt =ēw rāspīg čand dastwarīhā
ahunawar frāz_niyōxšišnīh čand aϑā_ratuš abar āšnawēnd
harwisp awēšān ī abestāg pad tan =ēw kē ōy ī mērag pad ān ī mayānag gōwišn pad wāng ī mayānag frāz_srāyišnīh rāspīg gōwišn abar āšnawēnd ud yasn =iz pad yazišn wāz āšnawēnd
ēn az abestāg paydāg
gāhān_bār ud abārīg yazišn ǰuttar nēst
tā_ō ēn paymānag az abestāg paydāg
ka mard marag weh kū yazišn frā_mā_nərə marag ī pad sidōš ud frawardīgān čē
ān ī yazišn marag weh kū mard marag
pad šaš mard yašt =ēw weh kū ēk ud pad mard ēk weh kū se
nē ēd kū pad panǰ mard ēw yazēd čē pad ēk mard ēw nē yazēd
ān anī kunišn ō puhl šawēd
ast kē ēdōn gōwēd hād ān wāzag ay gāhān_bār
tā abārīg hamāg yazišn yazišn marag weh kū mard marag az čāštag ī wehān pōryōtkēšān dānist ud paydāg bawēd
pad drōn hamdādestān būd hēnd kū drōn marag weh kū mard marag
hauruuō_pasuščit̰ ǰuttar nēst
rōšn guft hād hōrw_pās ka ēw_kardagīh be šāyēd yaštan
ān xūbtar ka rāspīg nōg ō yazišn rasēd zōt āgāh kunišn kū rāspīg pad nōg ō yazišn mad u =š rasēd
tan =ēw šnāyišn ī nām andar nē abāyēd tā zōt pad wāz_gīrišnīh ī pad frastuyē be šawēd
ā =š hamāg frastuiiē bun abāz kunišn u =š frāz_gōwišnīh
ka zōt pad wāz_gīrišnīh ī pad frastuiiē be šawēd aṣ̌əm_vohū se frauuarānē_mazdaiiasnō čē gāh dārēd ud šnūman abāz ōšmurēnd u =š wāz frāz_gīrišn x az bunīh
ka rāspīg wāz gīrēd be ka harw se wēnēd tā nē šāyēd zōt ātaxš ud barsom
pas ka ēk wēnēd ā šāyēd
ast kē ēdōn gōwēd hād u =š az bunīh ēk wēnēd šāyēd
pas ka wāng āšnawēd šāyēd
ka wāz gīrēd ā =š wāng ēdōn kunišn kū ka =z pad tan =ēw kird āšnawēš ud ka pad ēw_kardagīh frāz āšnawēnd ā =z šāyēd
farrox guft rāspīg ka wāz gīrēd ān xūbtar ka abestāg andar āhang gōwēd
zōt dast pad barsom dārišn ātaxš ōh sōzēnišn
u =š ēd ēdōn guft kū pad drōn wāz ī az pas nē šāyēd ī pad yašt
ā =m nē rōšnag
pad yašt wāz az harw gyāg pādixšāy dādan be pad bišāmrūd ud srišāmrūd ud čahrušāmrūd ud šnūman_wizārišnīh ud vīspāi
ast kē kadāriz =ēw abestāg pad tan =ēw gōwēd
hād ān gyāg kū ēk bār pādixšāy dādan was bār be pādixšāy dādan be pad aṣ̌aiia_nō_paiti ǰamiiāt̰_…_aməṣ̌a_spəṇta ō pēš čē az ān gyāg was bār be pādixšāy dādan
ka zōt pēš az abestāg ī pad ātaxš sar wāz be gōwēd ā =š nē wizārd bawēd
ast kē ēdōn gōwēd hād wizārišnīh bawēd
ka zōt pad yašt ī pad ātaxš sar xwarišn xwarēd ā =š gumānīg ud nē wizārd bawēd
ast kē ēdōn gōwēd ay wizārd =iš bawēd
ka =š wād =ēw be āyēd u =š wāz be gōwišn u =š wāz abāz gīrišn u =š ēdōn bawēd čiyōn az bunīh
ast kē ēdōn gōwēd hād xwarišn =ēw ō pēš nēst kas ōh rāyēnišn u =š gumānīg wizārd bawēd
ka zōt pad yašt ī pad ātaxš sar gumānīg be bawēd ud pad kardag mad ēstēd u =š yašt =ēw abāz kirdan abāyēd ud ābān zōhrag pas ōh yaštan
ka zōt pad yašt ī pad ātaxš sar wāz be gōwēd rāspīg kird =iz ān zamān ud ān gyāg
pas =iz ān gyāg ēdōn bawēd čiyōn zōt aṣ̌əm_vohū se aiβi gərəδmahi_apąm_vaŋᵛhinąm
ān zamān nē ān gyāg bawēd ayāb pas rasēd ā =š be škennišn ud zōt zūd abāz bawēd
zōt zūd abāz bawēd aṣ̌əm_vohū se frauuarānē_mazdaiiasnō_zaraϑuštriš čē gāh dārēd ud šnūman abāz_ōšmurišnīh u =š wāz abāz_gīrišnīh
dād ī farrox pus guft hād az pōryōtkēšān ēn nērang x mānēd kū zōt pad yašt ī pad ātaxš sar wāz be gōwēd ud šnūman abāz nē ōšmārēnd
niyōxšēd zōt abar srūdārān kū zōt gōš dārēd kū_tā rāspīg andar dōspurrnām ī man bawānd
nē abar_srūdārān ōy ī zōt kū rāspīg gōš nē dārēnd
zōt radīhā u =š az rāspīg abar ōh āyēd
ān_and =šān abar_srūdārān čand frāz ōšmurēnd kird ī xwēš
niyōxšēnd abar_srūdārān abar ō ōy ī zōt
kū rāspīg gōš dārēd kū_tā andar dōspurrnām andar ōy ī zōt bawēm
nē zōt abar_srūdārān kū zōt gōš nē dārēd
abar_srūdārān radīhā kū =šān az zōt abar ōh āyēd
ān_and =iš čand zōt frāz ōšmārēd kird ī xwēš
āzād_mard guft hād ēd ka dōspurrnām ēd ka nē andar dōspurrnām ā =šān hamē ēk az did pad ān zamān abar šawēd ka ēk =ēw az ōy ī did gōš dārēd
māhgušnasp guft hād ēn nē andar dōspurrnām tā hamē andar dōspurrnām gōš dāštan kār nēst
ka hamē pad panǰ mard yašt =ēw andar dōspurrnām zōt ul grift ā =šān harw ēk =ēw panǰ kird bawēd pad zōt
ǰud_dādestān būd hēnd
ast kē pānzdah gōwēd ast kē wīst ēk =ēw gōwēd ud ast kē wīst_panǰ gōwēd
abarg guft hād mard =ēw abēgumān ka drōn =ēw pādyāb pad nērang xūb frāz sāzēd ud ruwān dōšāram rāy be yazēd ā =š tanāpuhr =ēw kirbag
harw kē ān gyāg bawēd ud drōn wāz gīrēd ud xwarišn xwarēd ā =š tanāpuhr =ēw kirbag
drōn ōh bawēd ka aṣ̌aiia_daδąmi andar dōspurrnām ī ōy ī zōt be gōwēd ā =š kirbag ī aṣ̌aiia_daδąmi dōgānag ōh bawēd kū ēn ī abārīg drōn
dōgānag ōh bawēd ayāb ʾpp nē ā =m nē rōšnag
rōšn guft hād mard =ēw gumānīg ka mazdēsn waččag adwadād rāy ōh yazēd ā =š tanāpuhr =ēw kirbag
mard ī rāspīg gāhān srāyišn radīhā
pad_ēstišnīh ī ēsn ka gōš dārēd ēdōn fšūš_mānsr tat̰_sōiδis ka gōš dārēd
čē mard awēšān sraw abestāg pad tan =ēw afrāz_ōšmurišnīh āstārēd ka manō marətanąmča nē kunēd čiyōn gāhān =iz ka vačō marətanąmča nē gōwēd
hād harw ān abestāg ī zōtān pad tan =ēw gōwišn rāspīg gōš dārēd ud ān ī rāspīg pad tan =ēw gōwišn zōtān gōš dārišn
ka nē dārēnd ā =šān nask_hilišnīh kird
rāspīgān ēk andar did =ēw radag kird ēstēd
ka zōt srōš srūd srōšāwarz ul ō pāy ēstēd
ka ātaxš ī warahrān ān gyāg pad gyāg pas abāz nē hilišn
pad ēn tis zōt srōšāwarz
gāhān srāyēd ēsn pad yazišn abar niyōxšēd
harwisp =iš gāhān radīhā
ēsn yazišn yazēd gāhān pad srāyišn abar niyōxšēd
ēsn =iš ēw_tāg radīhā u =š aradīhā gāhān
hād pad hamāg čāštag ān zamān bawēd ka wāz_gīrišnīh ay pad hōm kōftan sar nē hišt ēstēd ēdōn čiyōn āzād_mard hamdādestān bawēd kū rāspīg ka =z abestāg čand čahrušwadag ī gāhān be hišt ā =š ān yazišn nē pēš ud nē pas nē bawēd x
ka abestāg ī =z rāspīgīh andar nē kird ēstēd ayāb pad yā_š́iiaōϑənā_yā_vačaŋhā sar wāz be gōwēd wāz abāz gīrēd
ēsn ka be niyōxšēd ēd paydāg bawēd kū pad humatanąm ēd paydāg bawēd kū ka bišāmrūd be hišt―*ēd ka =š bišāmrūd pad =iš andar āyēd ud ēd ka srišāmrūd pad =iš andar āyēd ud ēd ka čahrušāmrūd pad =iš andar āyēd ud ēd ka =š wāz_gīrišnīh pad =iš andar āyēd―ā =š hamāg yazišn ōh bawēd
ka =š wāz_gīrišnīh be hišt x ka wāz_gīrišnīh pad =iš andar āyēd tā =š yazišn nē bawēd
gōgušnasp guft hād rāspīg and čand gōwēnd ā =šān kirbag ī yazišn ōh bawēd
u =š az ēn gyāg paydāgēnīd
ka dō mard =ēw gāhān gāh_srāyišn srāyēnīd zōt =ēw ud rāspīg =ēw harw dō radīhā
ka pad wezest srāyēnīd ān and =šān kadāriz =ēw radīhā čand frāz ōšmurēnd kird ī xwad
hād pad hamāg abestāg ī dōspurrnām kār be āwarēd ǰud_wezest
abārīg abestāg pad ǰud_kardag ud pad ǰud_pargard
ka ēk bun ī wezest dārēd ud ēk sar ī wezest andar dōspurrnām
māhgušnasp guft hād andar ham_gāϑr =iz dōspurrnām nēst
dōspurrnām paymānag ahiiā_yāsā_nəmaŋhā_ustāna zastō ka ēk ahiiā_yāsā ud ēk nəmaŋhā dārēd
ān xūbtar ka pad hakat̰ gōwēnd
ka dō ēk =ēw pēš ān xūbtar ka zōt pēš
ka rāspīg pēš ēd =iz šāyēd
ka dō zōt ēsn yazēnd pad gāϑr ud wezest barw dō_ēn radīhā
ka pad hamniyōxšišnīh_gōwišnīh yazēnd kū ēk ō did gōš dārēnd harw dō_ēn aradīhā
kadār ham ʾmt_niyōxšišnīh_gōwišnīh
ka pad ham gōwēnd gāh gāϑr ud wezest
abar ōh anī āšnawēnēd nē anī
ōy radīhā kē nē abar āšnawēnēd
ēn az abestāg paydāg
anī bawēd ka dō zōt ēsn pad nigerišn pad hakat̰ be kird u =š pad ēw sar be kird
ud hamāg wāzag ēw gōwēnd ēd =iz ǰuttar nēst u =š yazišn sar be kunišn
rāspīg nē bawēd ud abārīg abestāg nē ōh bawēd
ast kē ēdōn gōwēd hād pad rāspīgān ōh bawēd ud pad abārīg abestāg ōh bawēd dēw_ēzagīh ī tanāpuhragān
ēn kū yazišn be kunišn ayāb nē ā =m nē rōšnag
kē gāhān pad abar_menišn abar menēd kū ōh sahēd ōh menēd
ayāb ō anī ōy pad srāyišn abar niyōxšēd kū kas =ēw gōwēd ud ōy gōš dārēd
ayāb ō ōy anī dahm ī =š gāhān srūd dahēd radīhā hād kū =m yašt kird u =m ō tō dād
ī =š asrūd dahēd radīhā hād fradāg tō rāy yašt =ēw kunēm
mard ka abēr tuwānīg yazišn pad mizd pādixšāy kirdan harw dō_ēn kirbag ōh bawēd
pad drahm =ēw be dahēd harw dō_ēn radīhā
kehīhā kirbag ōh bawēd
ast kē ēdōn gōwēd hād ōy kē ōh kird ā =š pad anī zamān bawēd ka =š ǰud az mizd tuwān hēh kirdan ā =z kunēh
mard ka abēr tuwānīg xrafstar ī grift pad wahāg frōxtan pādixšāy harw dōīn dō kirbag ōh bawēd ōh griftan rāy ud ōh ōzadan rāy
ōzadan kirbag kird ēstēd griftan nē kird ēstēd ān =iz xwārtar nē bawēd
ka drahm =ēw pēš be dahēd ō harw dō_ēn ōh bawēd
xrafstar pad meh_dādestān pādixšāy dāštan xwarišn be pad margīh ud rixtagīh tā nē pādixšāy dādan
ēn ka dahēd ēn čiyōn xāk =ēw ud gil =ēw ka =š kas be stānēd apparag nē bawēd be zyān wizārišn
kē gāhān srāyēd abar az ān ī ābān wāng kū wāng az āb āyēd
ayāb tan_rōdagān kū andar rōd_kadag ōftēd ud wāng az rōd_kadag āyēd ayāb kilisyāgīhā kū wāng az kilisyāgīhā ud gadagistān kū wāng az dušox āyēd
ayāb gēhān abar_pad āyišnīh āyēd kū uštar abar āyēd
agar pad ān ī xwēš ōš abar āšnawēd radīhā
agar ān nē pad ān ī xwēš ōš abar āšnawēd ayāb be ayābēd kū be ē barēd
agar bē_ayāftār kū =š be tuwān burdan
agar nē bē_ayāftār
ēdōn pad ān ī mayān gōwišn frāz ēw ōšmārēd radīhā
ēn az abestāg paydāg
anī bawēd ka yazišn andar kirdan wāng pas rasēd ka =š be tuwān burdan be barišn
ka nē aētaδa_maδəmiia_vača ka az bunīh ī wāng ān gyāg yazišn ō puhl nē šawēd ud nē kunišn ud anī ō puhl šawēd
ā =m nē rōšnag
abarg guft hād x be nē hilēnd
ēn kū čiyōn bawēd kū bē_ayāftār ud čiyōn bawēd kū abēayāftār
ka ātaxš ud ātaxš_gāh ud barsom ud barsom_dān be tuwān burdan bē_ayāftār ka nē nē bē_ayāftār
mard čand nidom pad gōwišn gāhān pad srāyišn radīhā
čand ān ī nazdišt dahm abar āšnūd kū ēk ka nazdišttar bawēd āšnawišn ayāb čand ān ī nēm ān ī xwēš ōš
griftan ī drōn
hād ēn az ān ī pas paydāg kū ēn drōn čē ān ī yat̰_hē_hauuaēbiia_ušibiia pad mādagwār šāyēd čē ān ī pad ēč =ēw šāyēd
drōn ēn se tis kirdan ud sāxtan ud yaštan
harw čē ǰōrdā sardag šāyēd gandumagēn weh ast az ān gyāg paydāg gaṇtumō_yauuanąm_ratufriš ay čē gandum ǰōrdāyān rad
ārd ī drōn rāy pad pādyābtar dārišn
ka =z az wāzār be xrīnēd ā šāyēd
abarg guft x kū hōšag pad pādyāb be čīnišn ud pad pādyāb be ārišn
andar harw čē srēšēd ka nē hixrōmand ā šāyēd
ka ōh srēšēd ā =š pādyābīh
ā ul stānišn ud nō burag andak =ēw andar kunišn
ast kē ēdōn gōwēd hād buragīh nē čē gil
drōn ānd_and kunišn čand andar rōz kār andar =iš šāyēd kirdan
frasast tā_ō se ēk ī drōn kirbag ōh abzāyēd ud az ān frāz nē abzāyēd
sudāb ō harw dō gyāg ōh nihišn ud gōšudāg ud tarragīhā
ast kē ēdōn gōwēd hād sudāb ǰuttar nēst kū abārīg tarrag =ēw
padišxwar pēš ī drōn frāz nihišn
may šāyēd ud hur =iz šāyēd
sadagīg =iz ka trufšag ā šāyēd
ka āb abar ā šāyēd
kayādurbōzēd guft and āb andak =ēw abar kunišn hād čē =š ān sāzišn =ēw
sik nē šāyēd pad =iš
pad hamčašmīh ān xūbtar ka purr
ka wēšistagīh ān xwēš
ābgīr azēr may be nihišn sprahm azabar may be nihišn abar_sar az kust ī dašn
ast kē az harw kust gōwēd
tarrag ud mēwag andarg ī may may ud frasast be nihišn u =š sar ō barsom rōn kunišn
u =š esm bōy se tāg az dašn be nihišn ud abārīg harw =iz ōh kāmēd yaštan az kust ī dašn
ka šāyēd ān xūbtar ka grih ī barsom abāg gōšudāg rāst
ka nē ā =š ēdōn kunišn kū pad bun ī barsom ud hōy abāz x tis be nē ēstēd
čē ka bun ī barsom ud hōy abāz ēstēd ā =š nē yašt bawēd
abarg guft hād harw čē pad may ud frasast be ēstēd ā =š nē yašt bawēd
ka ōh yazēd pad kūn frāz nišīnišn u =š xwāstag be nigerišn u =š pad menišn pas abzūdan ud kāstan nē pādixšāy
ast kē ēdōn gōwēd hād abzūdan pādixšāy ud kāstan nē pādixšāy
māhgušnasp guft hād ēdōn čiyōn ōh yazēd ā =z ōh nigerēd ā šāyēd
barsom stānišn ud ō hōy nihišn
ēk čāštag ēk kardag abrāstag nē dārišn ud nibāstag nē dārišn ēdōn frāz_čašmagīh ī mard rāy čē nērang ī drōn rāy
drōn sāzag ud padišxwar ēdōn pad pādyāb be kunišn kū ka =š barsom abar rasēd ā šāyēd
be x hōšēnišn
hōšēnīdan nē šāyēd ā nē šōyišn čē hušk ī apādyāb weh kū xwēd ī pad pādyāb
drōn sāzag ān xūbtar ka az bunīg ǰud_kardag
ka tarragīhā ul āyēd ā šāyēd
ka mēzag =ēw frōd wistarēd u =š abar be sāzēd ā šāyēd
giyā ka be kanēd u =š abar be sāzēd ā šāyēd
ka nē kanēd ā nē šāyēd
tarrag ud mēwag ēdōn pad pādyāb be čīnišn kū ka barsom abar rasēd ā šāyēd
ud az drōn ōh pahrēzišn
ka ō drōn rasēd ānd_and pādyābīh čand drōn ast ā ān nēst
drōn ul ō mayānag ī drōn sāzag nihišn
ēdōn kunišn kū az drōn sāzag be nē ēstēd čē drōn ka az drōn sāzag be ēstēd ā nē xūb
barsom ka pad wistarišn be ēstēd ā nē šāyēd
gōšudāg ka pad pādyāb abāg drōn ul ō mayānag ī drōn nihišn
ka wēš ayāb kem ka ul ō tis =ēw nihēd ud ul ō mayān ī drōn nihēnd ā šāyēd
ka pēš drōn frāz nihēnd ā =z šāyēd
gōšudāg ka =z abēr was pas =iz drōn hamāg be nē nihumbišn
frasast az kust ī dašn be nihišn
ka pēš frāz nihēd ā =z šāyēd
pad kamistagīh hambun =iz wēšistagīh =iz and čand drōn pahnā
harw čē ō drōn nihišn ā =š frasast =iz ōh nihišn
ast kē ēdōn gōwēd hād ēk sīr nihišn u =š anī =z ān sudāb nihišn
drōn kanārag ul kunišn ud frasast nē kunišn ud harw dō be abzāyišn x
drōn ud frasast ēdōn bē abzāyišn kū =š sūrāg be kust ī did nē bawēd
čē kē =š bōdyōzed =ēw gōwēd ā =š ēk =ēw gōwēd
abar harw čē brēzēd ka nē hixrōmand ā šāyēd
ka brišt pad dast ul griftan nē stānišn ud abāz ō im gyāg nē nihišn čē nūn pad pādyābtar dārišn
ka apādyāb be bawēd ēdōn abāz šāyēd tāftan kū =š hamāg gyāg tābišn abar rasēd ā pad pādyāb dārišn
ast kē ēdōn gōwēd hād ka apādyāb be bawēd ā pad pādyāb nē šāyēd dāštan
pas =iz pad drōn be paydāgēnišn čē drōn =ēw afsard ī apādyāb weh kū nān =ēw garmōg ī pādyāb
hamāg nān ēk nān ā =š anī frasast rāy az =iš be nē škennišn čē kē =š bōdyōzedīh gōwēd ā =š ēk =ēw gōwēd
ka be tābīhēd ayāb be sōzēd ayāb be hōšēd pādyābīh wehīh pas dīdan ud pas xwārom
ast kē ēdōn gōwēd hād xwāromīh weh kū dīdan
ādurbād ī dādfarroxān guft hād kū garmōgīh weh
hāwištān ī baxt_āfrīd guft hād ēw_kardagīh weh
gōgušnasp guft ay ka wēš_ārdīh ān gyāg ēč tis āmār nēst čē pad dō kirbagīh uskārd ēstēd ēk yazišn ud ēk myazd
ka ōh sāzēd gyāg ka =z abēr pāk pas =iz andak =ēw be rōbišn ud be paššinǰišn
ud bāliš =ēw dō_nāy x ān gyāg be nihišn
nē =z kāmag ī mard rāy be nērang ī drōn rāy āyēd ā šāyēd
abarg nōg gyāg harw se guft wehšābuhr kardag =ēw
ēdōn čiyōn wehšābuhr dādestān būd pad drōn ī nōg gyāg pas kār pad yaštan ī ān ī pēš
ka =š yašt u =š gāh ī pēš pad =iš andar āyēd ēn kū čand be pādixšāy pādan ay aṣ̌aiia_daδąmi_xᵛarəϑəm_miiazdəm_hauruuata_amərətā
ast kē se drōn drahnā gōwēd
māhgušnasp guft hād ka ēdōn x ōh rasēnd kū wāz gīrēnd ǰuttar nē
pad ān ī dō yatāhūwayryō frasast ud abzār ī frasast be nigerišn
ast kē ēdōn gōwēd hād tā_ō ān gyāg ka bun nē bawēd ā =z šāyēd
pad frasasti_ahurahe_mazdā̊ frasast abar gōšudāg abāz widārišn
ka drōn purr gōšudāg be ēstēd frasast ul ō mayān ī drōn nihišn
pad aṣ̌aiia_nō_paiti ǰamiiāt̰ rāspīg abāz ō pāy ēstēd u =š xᵛarata_narō be gōwišn harw yazišn_e
ast kē harw myazd =ēw gōwēd
ka ō aṣ̌aiia_nō_paiti ǰamiiāt̰ čē barsom nē pad nigerišn apādyāb be bawēd ast rāspīg ī čāšnīg kird ast ī nē kird ēstēd barsom be šōyēd ud be rāyēnišn
zōt ān ī čāšnīg kird ā pad xūb ud ān kē nē kird ā nē kunišn
barsom ī drōn hamāg be šōyišn ud ān ī yašt ānd_and gyāg kū hixrōmandīh be rasīd
ān kē čāšnīg kird ā =š be … ud ān kē nē kird ā =š nē kunišnīh
ka ō aētąm_ā_yātumanahe mad u =š xwaršēd nē yašt ēstēd u =š ul ō pāy ēstišn u =š nəmō_ahurāi be gōwišn u =š x frōd nišēnišn u =š aṣ̌əm_vohū se be gōwišn
pad harw dō ō mar āyēd pad ōy kas bawēd kē =š bārestān ēn frōdmānd ī kamist ēstēd ayāb pad ačāragīhā bawēd
ka =š drōn sar be kird barsom nē pad nigerišn apādyāb be bawēd ā šāyēd
ka hixrōmandīh be rasēd ka =z nē pad nigerišn ā nē šāyēd
gōgušnasp guft hād ka =š drōn sar be kird barsom nē āmār
ast kē ēdōn gōwēd hād čāšnīg kirdan kār ī pad barsom pas guft bawēd kū nē šāyēd
ka =š sar kird ud barsom gyāg =ēw be kāmēd burdan ā =š harw tis =ēw abāg be … ast kē ēdōn gōwēd ay ka apādyāb =ēw čāšnīg burd ā šāyēd
ka =š drōn sar kird ud tis az ān rasēd ī =š čāšnīg kirdan nē šāyēd drōn pad drōnīh nē šāyēd ud barsom ud drōn pad =iš nē hangārišn
kirbag ī drōn ōh bawēd ka =š drōn sar kird
ēn kū =š čand be pādixšāy pādan tā čāšnīg kunēd
ay āwarišn ud barišn
ast kē se bār gōwēd ast kē ēdōn gōwēd hād wehšābuhr pad myazd be mad u =š pas čāšnīg …
ka dārūg =ēw ōh kāmēd xwardan ud ka dārūg az ān kē pad xwardan mehmān ā =š pēš drōn frāz nihišn ud fradom čāšnīg az dārūg kunišn
abarg guft hād ānd_and čāšnīg čand az drōn kird
ōh drōn nē yazīhēd
barsom az dašn stānišn ud pad hōy nihišn
ēk čāštag ēk kardag abrāstag nē dārišn ud nigūn nē dārišn
ēdōn frāz dārišn u =š bačag abar andar nihišn
ēn kū čand pad dast abāz ēstēd ā šāyēd
ast kē gōwēd ā šāyēd x
u =š xšnaōϑra be gōwišn
ka =š nē ranǰagīhā ā =š abestāg hamāg az pāy gōwišn be xšnaōϑra ud aməṣ̌a_spəṇta
ka =z =iš ranǰagīhā ēn and az pāy gōwišn bišāmrūd ud srišāmrūd ud šnūman_wizārišnīh ud wāz_gīrišnīh ud iϑā_āat̰_yazamaide kardag =ēw
ka =š ranǰagīhātar ka hamāg nišīnān gōwēd ā =š nē tar_menišnīhā
u =š pad xᵛarəϑəm_miiazdəm fradom harw tis =ēw be nigerišn
pad hauruuata_amərətāta drōn ud frasast pad gāuš_hudā̊ gōšudāg pad āpe may pad uruuara ān ham ī hauruuata_amərətāta ast kē tarrag ud mēwag gōwēd pad aēsma_baōiδi esm ud bōy u =š pad xᵛarəϑəm_miiazdəm kē šnūman_wizārišnīh ō pēš ēstēd ǰud az frasast ud abzār ī frasast harw tis nigerišn pad ima_humatāča_hūxtāča pad āsāyišn harw tis =ēw be nigerišn
pad iϑā harw tis =ēw pad xwarišn mehmān be nigerišn pas ka nihuft ēstēd ā =š weh
ast kē ēdōn gōwēd ay hād āsāyišn ast be nigerišn ayāb pad wāzag gumānīg bawēd ayāb tis =ēw ō drōn rasīd ī =š ōh kāmēd yaštan
ka az wezest drahnā be šawēd ā =š drōn bun abāz kunišn
ka wezest drahnā šawēd u =š abāz gōwēd wezest drahnā
yatāhūwayryō pad gōwišn tā šnūman harw ul pāy ēstēd
u =š ēn kū =š čāšnīg az čē pēš kunišn ā =m nē rōšn
pēš az drōn ud gōšudāg pas az frasast ud gōšudāg ud pas az may
ast kē ēdōn gōwēd hād čē az harw čē kunēd ā šāyēd
ast kē ēdōn gōwēd ay ka harw se pad ēk bār kunēd ā šāyēd
ka zōt az anī =z tis čāšnīg pēš kunēd kū az drōn ayāb anī =z kas az drōn čāšnīg pēš kunēd kū zōt ayāb nōit̰_hiš_barōit̰_upa_karšəm kird ayāb =iš pāy az_abar abāz nihēd x x andar sūrāg =ēw abāz nihišn ayāb =iš sar ō abāxtar rōn kird ēn hamāg nē xūbīh
gōgušnasp guft ēn se nē šāyēd ka zōt az anī =z tis čāšnīg pēš kunēd kū az drōn ayāb anī =z kas az drōn čāšnīg pēš kunēd kū zōt ayāb =iš nōit̰_hiš_barōit̰_upa_karšəm kird
ēn se ud čahār aṣ̌əm_vohū anēraxt čāšt ēstēd
zōt ka iϑā aṣ̌əm_vohū gōwēd ā nē šāyēd
ka aṣ̌əm iϑā gōwēd ā nē šāyēd
rāspīgān pēš ud pas
ān ī čahār aṣ̌əm_vohū čahār ud nēm gōwēd ā nē šāyēd
ast kē pēš ud pas gōwēd
vasasča ud aməṣ̌a ka nē pad nigerišn ud ka dō bār abāz gōwēd ā nē šāyēd
abārīg abestāg wezest drahnā ā nē šāyēd
ast kē ēdōn gōwēd hād ka gāh =ēw rōz māhīgān ud ardā_fraward gōwēd ān ī abārīg ka ēk nē pad nigerišn be gōwēd ā šāyēd
sōšyans guft hād ka =z ahurahe_mazdā̊ gōwēd šāyēd
awēšān kē az may_xwarišnīh be gāhān nē srāyēnd
may xwarēnd mast be bawēnd ud gāhān_bār nē yazēnd
pad fradom warzišn awēšān kunišn atōzišn kū margarzān
ā be kunēnd abāz u =šān ō bun nēst
ān =iz xwarišn ast kū ōh agar ēdōn xwardan
ka dahm hur xwarēd may ī han =iz asp pēm
dādīhā sūr xwarēd pad paymān dādīhā sūr xwarēd xwēškārīhā az =iš mayēnēd
nē gāhān pad asrāyišnīh āstārēd kū ka gāhān_bār nē yazēd wināhgār nē bawēd
frahist sūr xwarēd apaymān frahist frahist sūr xwarēd axwēškārīhā az =iš mayēnēd
ān ī gāhān pad asrāyišnīh āstārēd kū ka gāhān_bār yazēm wināhgār ōh bawēd
sōšyans guft hād se abismag ī xwarišnīh xwarēd ud se abismag ī abzāyišnīg andak =ēw abāz kāhišn
kayādurbōzēd guft ay hād dō abismag xwarēd ud andak =ēw ōh ō abzāyišn andak =ēw andak =ēw abāz kāhišn
gōgušnasp guft hād purr xwarišn purr abzāyišn
awēšān kē gāhān ī pad hanǰaman srāyēnd pad dō gundīh ast kē ēdōn gōwēd ay hād az kust =ēw ka dō wēš radīhā
pad se gund srāyēnd ast kē ēdōn gōwēd ay hād kust =ēw ka se wēš aradīhā
čiyōn nidom hanǰaman ast pad rad_franāmišnīh pad gāh ī baxt
se mard
ēn az abestāg paydāg
gāh =ēw pad wisperad ī dwāzdah_hōmāst ud rahwōbirzad ud ardā_fraward bawēd
ast kē ēdōn gōwēd ay ēwāz =ēw pad wisperad ī ardā_fraward bawēd
pad xānag yazdānīgān pad ēk_hōmāst ō sar baxšēnd
ka ayār šaš mard ā nē baxšišn
ka ayār šaš mard ast zōt hāwanān ud frabardār az kust =ēw ātarwaxš ābard ud srōšāwarz az kustag =ēw
ka dō wēš ā šāyēd
ka se wēš ā nē šāyēd
ka az kustag ēk =ēw wēš ān xūbtar ka az kustag ī zōtān
ka ayār bowandag mad ēstēd ud az bunīh ān čahār yatāhūwayryō nē srāyēnēd ā =š pas nē srāyišn
ka pas āyēd harw gyāg kū āyēd wāz frāz gīrēd be srāyēd be šawēd ā šāyēd
ka čahār yatāhūwayryō srāyēnēd ud gāh ī andar grift ēstēd srāyēd pēš pēš =iz šāyēd pas =iz šāyēd
andarg hištan nē šāyēd
andarg hištan ān bawēd ka ahunawayt_gāh uštawayt_gāh nē srāyēd pas spandmayt_gāh srāyēd
andar grift be ka be srāyēd tā nē šāyēd be ahunawayt_gāh čē ān ka se hād srāyēd ā šāyēd
ka gāhān hamāg be srāyēd harw čē gāhānīg bawēd ā =š be x srāyišn ēn čiyōn isat̰_vāstrahe_zaraϑuštrōiš_nəmō
ka gāhān hamāg be srāyēd ā =š pad wisperad hōm pad vīspā̊_gaēϑā̊ hunišn ayāb pad gāhān ī ušt pad dwāzdah_hōmāst pad šaš pargard ǰud az kird bun
pad ēk_hōmāst pad kardag ī mad ēstēd tā_ō tā_və̄_uruuātā hād
ud agar ān be hilēnd ast kē tā ān gāhān ēstišn kirbag nē kird ēstēd x gōwēd ay ānd_and gōwēnd
ān ī dah rōz ī frawardīnagān ān panǰ rōz ī fradom šnūman ahurahe_mazdā̊_raēuuatō_xᵛarənaŋhatō_…_aṣ̌āunąm
sōšyans guft hād rōz šab abāg be kunišn
ān panǰ rōz ī andar gāh šnūman ahurahe_mazdā̊_…_gāϑābiiō_…_aṣ̌āunąm
ān panǰ rōz ī andar gāh ā hamē pādixšāy kirdan
ast kē ēdōn gōwēd ay hād gāϑābiiō be ān panǰ rōz tā nē pādixšāy kirdan
ān panǰ rōz be yašt ī padīriftag ī gāhān_bār ud sidōš ud gētīxrīd ud hōm_drōn tā pādixšāy
ān panǰ rōz ardā_fraward pad yašt abāg gāϑābiiō abāg nēst ēn ēsn ustōfrīd bāzā
drōn ka ardā_fraward nē pad yašt pad xwar
ān dah rōz ī frawardīgān panǰ rōz ī fradom šnūman ahurahe_mazdā̊_…_aṣ̌āunąm_…_yā̊_vīsāδa_āuuaiiaṇti hād pad harw 2 šnūman abāz ōšmārēnd ēk ān ī bun andar frawardīgān ud ēk ān ī sar ī frawardīgān
ēk abarg guft hād ōh gōwišn ud ēk wehšābuhr ēk guft ōh gōwišn
āmār kū ay harw dō ōh gōwišn
ān dah rōz ī frawardīgān ka zōt pad yašt ī pad ātaxš sar ī wāz be gōwēd ā =š ašem_wohū se be gōwišn u =š esm_bōy tāg frāz ō ātaxš barišn
šab ud rōz ǰuttar nēst
ast kē ēdōn gōwēd ay hād ēwāz =ēw pad šab pad yazišn ī ardā_fraward bawēd
ān dah rōz ī pad frawardīgān ān panǰ rōz ī fradom nōg_nāwar šnūman ahurahe_mazdā̊_…_miϑrahe_…_vīspaēšąm_aṣ̌aōnąm
ān panǰ rōz ī andar gāh ēd ahurahe_mazdā̊_…_miϑrahe_…_vīspaēšąm_gāϑābiiō_…_aṣ
ādurbād ī dādfarrox guft hād nōg_nāwar ī frawardīgān ēd =iz ǰuttar nēst kū pad rōz
awēšān kē gāhān abar_pad abāg wāz pas srāyēnd
abar_pad pattān ay yazišn ēdōn sāxt
ast kē ēdōn gōwēd ham_tāg šawēnd
agar tanbān be gōwišn be gōwēnd
ud gōwišn ō gōwišn be ayābēnēš kū =šān nē ranǰagīhā aradīhā
pas ka pēš ud pas gōwēd kū fradom xšmaibiiā gōwēd ud ahiiā_yāsā be nē gōwēd aradīhā
hād harw ān abestāg ī andar wēn wēn dārišn ud barišn ud āwarišnīhā ayāb xuftagān gōwēd ā =š abāz gōwišn
ka nē gōwēd ay nē xūb ān rōz rāy
ka nē dānēd ā nē šāyēd
az kū zōt gāhān frāz srāyēd
nēmag ī wezest az bun ī wezest pad ān ī mayānag gōwišn pad gōwišnīh ī mayānag pad ān ī zardušt sāmān pad gāh ud wezest
ā agar awēšān gōwišn abar rawēd kū be hišt kū kē hēnd pad gāhān bišāmrūd =iz srišāmrūd =iz čahrušāmrūd =iz
ay kē =z dēwān kirrēnišn ast
ān ī bišāmrūd
ast kē ēdōn gōwēd hād kē =z gāhān kirrēnišn būd hēh ka =š guft hēh ān ī bišāmrūd
awēšān =iš gōwišn aradīhā
pad hamāg abāz
kadār hēnd gōwišn ī bišāmrūd
kadār ast srišāmrūd
kadār awēšān gōwišn kē hēnd pad gāhān čahrušāmrūd
ēn abestāg ī pēš
anī bawēd ka bišāmrūd srišāmrūd ud čahrušāmrūd pad gāhān hamē be hišt
ā =š yazišn nē pēš nē pas nē bawēd
ka bišāmrūd hamē x ayāb srišāmrūd hamē ayāb x čahrušāmrūd x ayāb šnūman_wizārišnīh ayāb wāz_gīrišn ayāb srōš_barišnīh ayāb srōš_drōn ayāb hōm_yašt ayāb hōm kōftan ayāb yasn ayāb tat̰_sōidiš ayāb čahrušwadag ī gāhān ayāb gāh =ēw ī pad bun be hišt ā =š yazišn nē pēš nē pas nē bawēd
ēn hamē pad sūdagīh
tā hamē pad nigerišn wāzag =ēw be hišt ā =š az ān frāz nē bawēd
ka pad tar_menišnīh wāzag =ēw be hišt yazišn nē pēš nē pas nē bawēd
ka bišāmrūd be hišt ēd ka bišāmrūd pad =iš andar āyēd tā =š wāz_gīrišnīh be andar āyēd ā =š hamāg yazišn ōh bawēd
ka wāz_gīrišnīh be hišt ka =š wāz_gīrišnīh pad =iš andar āyēd tā =š yazišn nē bawēd
ka zōt wāz_gīrišnīh =ēw be hišt ā =š wāz abāz gīrišn u =š az ān frāz hamāg abāz gōwišn
ka zōt frāz ō wāz_gīrišnīh mad ā =š be pāyišn tā hamāg frāz rasēnd
ka nē pāyēd ud be rāyēnēd wāzag ī tom guft guft ēstēd
abarg guft hād wāzag =ēw =š be gōwišn u =š wāz gīrišn u =š ō abestāg ī zōt ēstišn
ast kē ēdōn gōwēd ay pad =iš tis ī xwēš ōh rāyēnišn harw ān gyāg kū frāz rasēd ā =š wāz_gīrišnīh
ast kē ēdōn gōwēd ay harw gyāg kū mad ēstēd ā =š wāz_gīrišnīh u =š be ō abestāg ī zōt ēstēd
ka zōt wāz =ēw be hišt ka dānēd ā =š wāz abāz gōwišn u =š abāz ō abestāg ēstišn
ka nē dānēd ā =š bun_abāz kunišn ēd ham_pargard ēd ǰud_pargard ā =z ǰuttar nēst
… guft andar ham_pargard
ka dānēd ā =š abāz gōwišn u =š az ān frāz abestāg hamāg abāz gōwišn
ka nē dānēd ā =š pargard bun_abāz kunišn pad ǰud_pargard
ān =iz hamdādestān būd
mard kadār gāhān pad srāyišn aradīhā
ka mēzān ayāb riyān srāyēd
ka mēzēd ud riyēd pas srāyēd
awēšān gōwišn aradīhā pas
be ā =z ēdōn čiyōn ōh kadāriz =ēw dahm ī rāspīg stōd_yasn hamēīgīh dahēd
kū abar dastwar būd ud bawēd
ast kē dahm zōt gōwēd
pēš_nēmag yašt ī pad ātaxš ayāb pas yašt ī pad āb
ka rawān ayāb tazān ayāb ēstān ayāb nišīnān ayāb sayān ayāb barān ayāb wazān barō aspō_vazō raϑō ka =š abar warm ēdōn radīhā
kayādurbōzēd guft hād ēn az abestāg paydāg
anī bawēd ka zōt barsom nē pad sālār be hišt
yazišn ī anī sar kird aradīhā tā ka zōt barsom pad sālār be hišt ā =š hamāg ō sar be kunišn
sōšyans guft hād be harwīn kār wizārīd ēstēd tā =š ō sar nē kunišn
wehšābuhr guft hād ka harw dō_ēn kār wizārd u =š ō sar kunišn =iz nē_awestwārīh paydāgēnīd
pad harw se čāštag bawēd ka =š ō sar be kunišn nōg_nāwar_ǰadag rāy ayāb awēšān ān sraw nē warm ayāb ān ī abēgumān awēšān gumānīg hēnd
ēn kū čiyōn bawēd kū zōt barsom pad sālār be hišt bawēd ka rāspīg =ēw abēgumān wāz gīrēd ud ātaxš_gāh pad pādyāb be kunēd ud dast be šōyēd ul ō barsom nihišn
ast kē ēdōn gōwēd ay hād ka dast be šōyēd ul ō barsom nihišn ā šāyēd
ast kē ēdōn gōwēd ay hād ka gōwēd ay ōš dār" ā šāyēd u =š wāz pad war ī barsom be gōwišn
sōšyans guft hād ka awištāb rāy pad rāh =ēw be gōwēd ā šāyēd u =š nask ī pad čamišn ōh gōwišn
ka =š xwaršēd nē yašt u =š ōh yazišn ka yazišn ō sar be kird ā =š sraw kem gōwišn
ka abāz ō yazišn āyēd ašem_wohū se frauuarāne čē gāh dārēd āϑrō_ahurahe_mazdā̊_puϑra_tauua_ātarš_puϑra_ahurah tā sar u =š wāz_gīrišn u =š aṣ̌əm_vohū se be gōwišn u =š ātaxš_gāh pad pādyāb be kunišn u =š abāz ō gāh ī zōtān šawišn u =š dast ul barsom nihišn u =š aṣ̌əm_vohū se frauuarāne az =iš šnūman abāz ōšmārišn u =š wāz_gīrišnīh ī pad yašt ī keh
abarg guft hād yaϑā_ahū_vairiiō_yō_zaōtā pad ān ī meh
wehšābuhr guft hād yaϑā_ahū_vairiiō_yō_ātarəuuaxšō_…_aϑā_ratuš ēn kū ōy pad ān čiyōn―ā =m nē rōšnag
ast kē ēdōn gōwēd yaϑā_ahū_vairiiō_yō_ātarəuuaxšō_…_yō_zaōtā_…_aϑā_r
ka rāspīg sar be kunēd ka wehīh hamē ōy weh
ka nē ātarwaxš yō_bitiiō_zaōtā
ka wēš_abestāgīh ān gyāg tis =iz āmār nēst
u =š aṣ̌əm_vohū se be gōwišn u =š ātaxš_gāh pad pādyāb be kunišn u =š ō gāh ī zōtān šawišn u =š dast be šōyišn u =š ul ō barsom nihišn u =š ō abestāg ī zōt ēstišn
ast kē ēdōn gōwēd ay ān =iz =iš aṣ̌əm_vohū … yaϑā_ahū_vairiiō dō andar rāh ōh gōwišn
ast kē ēdōn gōwēd ay hād frauuarāne dōīhā ōh gōwēd čē =š pad zōtīh nē guft ēstēd
hād pad hamāg čāštag pad ān zamān bawēd ka zōt pad frastuiiē ī bun be šawēd tā ka zōt pad wāz_gīrišnīh pad frastuiiē ī bun be šud zōt ay ka be namēd ay ka be drāyēd ay ka kār =ēw wizārdan šawēd hamāg yazišn sar
māhgušnasp guft hād ka =š abestāg ī pad rāspīgīh andar kird ā =š yazišn sar be kunišn
sōšyans guft hād zōt harw gyāg =ēw kū be drāyēd az harw kas =ēw yazišn sar
ēdōn hamdādestāntar būd hēnd kū az zōt sar tā rāspīg ōh sar be kunišn
ka gōspand pad yašt zōt ay ka be namēd ay ka be drāyēd ay ka ō kār wizārdan šawēd gōspand ka nē kušt ā nē kušišn
ka kušt ā zōhr nē dahišn
mard ka be namēd ayāb ō wizārdan šawēd zōhr ōh dahišn
ka be drāyēd ā nē dahišn
mard ka abestāg ī yašt ī drōn =ēw be hišt zōhr dahišn
yašt drahnā spandarmad pad šōn az =iš hamuruhbarīh ōh kunišn
ka yašt pad zōhr =ēw zōt ay ka be namēd ay ka be drāyēd ay ka ō kār wizārdan šawēd zōhr ka nē dād nē dahišn
ka yašt ay ka be namēd ay ka be ō kār wizārdan šawēd ā az =iš bāzā ud drōn ōh yazišn
ka be drāyēd ā nē yazišn
hād wehšābuhr ay pāyag ī xwārtar guft
pas guft bawēd kū bāzā drōn pad ǰud az yazišn hamē ōh yazišn
anī tōm ka ōh gumānīg awēšān abēgumān hēnd ka bāzā
drōn sar andar šab barēd ā šāyēd
abarg āča_niča ōh kird
ka dahm zōt u =š tanāpuhr abar_srūdār
kū margarzān hēnd
agar ān az awēšān tanāpuhragīh āgāh
ān_and =iš radīhā čand =iš frāz ōšmārēd kird ī xwēš
agar ān nē az awēšān tanāpuhragīh āgāh
harwisp gāhān radīhā
tanāpuhr zōt u =š dahm abar_srūdār kū zōt margarzān
agar =iš awēšān az āy tanāpuhragānīh āgāh hēnd
ān_and =šān radīhā čand frāz ōšmārēnd kird ī xwēš
agar awēšān nē az ān ī ōy tanāpuhragānīh āgāh hēnd
harwisp gāhān radīhā
hād nē xūb kē pad xūb gōwēd margarzān
ud az ān patit u =š dast pad pādyāb ōh bawēd u =š kār ud kirbag ōh bawēd ud yazišn az ān ō puhl šawēd
ast kē ēdōn gōwēd ay hād margarzān ud az ān ōh pad bīm ud zōr
zurwāndād pas guft bawēd kū yaštag ka atuwānīgīh rāy nē rawēd ēd =iz pad raft dārišn margarzān
ka pad patitīg būd ēstēd nē šāyēd
ā =š dast pad pādyāb ōh bawēd u =š az ān yazišn ī kasān ōh pahrēzišn
ast kē ēdōn gōwēd ay hād yazišn =iš bun nē bawēd
ast kē ēdōn gōwēd ay tis =iz =iš kār ud kirbag nē bawēd
dahm zōt u =š dahm abar_srūdār hād harwisp radīhā
tanāpuhr zōt u =š tanāpuhr abar_srūdār harwisp aradīhā
mard kadāriz =ēw az dahm pad zōtīh radīhā
nārīg =iz pad ān ī xwēš aburnāyag =iz pad ān ī kasān
agar ēdōn āgāh ī hādān brīn sar ud frāz_gīrišnīh bun
andarg ī hādān andarg dānēd ud yasn =iz frāz_yazišnīh
dānēd kū_gyāg abāyēd guftan
ā =z aburnāyag ka zīrak u =š yašt warm ud abēgumān pad kār ī yazišn ā pad harw kār =ēw šāyēd
zan tā daštān bawēd
ā =š yazišn ī pad zōhr ōh kunišn daštān bawēd andar gumbad nē hilišn az kadag pad pānzdah gāmīh dārišn
ast kē ēdōn pad sīh gām gōwēd
ay nōit̰_tā_nāirika_kasu xraϑβa
ān ī zōhr ī ābān gōwēd ī yazišn hamē hēnd ā nē šāyēd
kē ān ī ātaxšān gōwēd ka nē pad zōhr ā šāyēd
ādurfarnbāgnarsē guft hād zan ī be pad ān kār abestāg guft kū šāyēd tā nē šāyēd
wehdād ādurohrmazdān guft be gōwēd kū nē šāyēd tā šāyēd
gōgušnasp guft hād kū ān abestāg gōwēd kū nē šāyēd ān =iz drāyišn
ay ēd ēdōn gōwēd hād xwaršēd šnāyišn nē kunišn u =šān māh niyāyišn nē kunišn u =šān saxwan ī xūb_dār nē gōwišnīh u =šān xwadāy ī rōzēn nēst u =šān pēš_gāhīh nēst
ahlāyīh ābādīh ī pahlom ast ēn kū hambār =ēw ī kirbag weh
nēk ast ahlāyīh ī ōy =iz ī nēk hamē rawišnīg
kē ahlāyīh ahlāyēnīdār anī ayāb amāh pahlom ahlāyīh kū ōh kunēnd
fradom pargard sar
dudīgar bun
pad nām ud ōz ī xwābar ī dādār ī kirbag_kar
nērangestān dudīgar pargard pad čāštag ī sōšyans
farrox bawād
kē gāhān nē yazēd anastīh rāy ka gōwēd ay dēn nēst ayāb tarmenišnīh rāy ka gōwēd ast u =š nē āzādīh dādār be tanāpuhr bawēd
kadār anastīh kadār tarmenišnīh
ka dēn ī mazdēsnān abāz stāyēd
ēd gōwišn tan ī xwēš wizīr hād abestāg ān gōwēd
bawēd ka pad se gōwišn ud menišn gōwēd hād dēn nēst pad gyāg tanāpuhr
sāl_drahnā margarzān
tanāpuhr az ēn gyāg paydāg se gōwišn sāl_drahnā ōh margarzān az anī gyāg paydāg yō_hača_daēnaiiāt̰_māzdaiiasnōit̰_apastuuōit̰_ϑriš vīpaitičit̰
ka nē menišnīg gōwēd margarzān nēst
nē bawēd ka pad menišn abēr was menēd pad guftan nē gōwēd margarzān nē bawēd
rōšn guft hād ēn griftārīh āmār tā se bār pad menišn menēd margarzān ōh bawēd x ud ka se gōwišn ayāb pad gōwišn gōwēd margarzān
pad anī zamān bawēd ka =š kird ud ēd abāg be kunēd
kird abāg kunišn drāyān_ǰōyišnīh pad bun
ka sāl pad patitīgīh bawēd x u =š yašt ī nōg_nāwar abāg kunišn u =š tanāpuhrīh ī ruwānīg be wizārišn u =š kār ud kirbag ī pēš az ān kird abāg rasēd ān ī andar ān xwēš nē bawēd
ka pad patitīgīh nē bawēd rad =iz pādixšāy škastan kū pad patit bawēd rad
ka škast_rad rāy be mīrēd margarzān
ka zardušt rāy gōwēd u =š dēn rāy guft bawēd
ka ohrmazd rāy gōwēd xwārtar nē bawēd ma agar garān bawēd
abārīg dād rāy gōwēd ā =z pad ēd šōn
dād ī wattar pad ēč meh_dādestānīh nē pādixšāy stāyīdan
ka xwadāy_gāh ud xwāstag rāy stāyēd margarzān
ka bīm ī tan rāy stāyēd ā =m nē rōšnag
hād čē dād ī weh kē =š ōh stāyēd x u =š menišnīg stāyēd
kē az dād ī weh ō wattar šawēd margarzān
ān ī wattar ō ān ī wattar margarzān nē bawēd
wehšābuhr guft hād pad ān zamān nē bawēd ka anī gyāg ōh šawēd ud ēk wattar kū anī nēst
az ǰud_ristagān wāz nē gīrišn u =š ōh nē dahišn ka ān gyāg ōh šawēd
ka šāhānšāh gōwēd kū drōn ma yaz ay nē yazišn ka gōwēd ay nē abāyēd yaštan ā =š pad gōš dārišn
ka gāhān nē srāyēd gāhān_bār nē yazēd sāl_drahnā ōy be tanāpuhr bawēd
agar ān ēk paymān gōwišn frāz ōšmurēd
sōšyans guft hād wāz frāz_gīrišnīh ud wāzag =ēw be gōwišnīh
kayādurbōzēd guft hād wāz frāz gīrišn
abāz az ān ī ōy tanāpuhragānīh ēstēd
ka az ān be abārōnēnišn
ay az ān be tanāpuhr bawēd gāhān_bār ēn gyāg az abestāg
anī bawēd ka =š gāhān_bār panǰ abēr nē yašt ēstēd ān ī šašom
sōšyans guft hād wāz frāz gīrēd wāzag =ēw be gōwēd ay be drāyēd
kayādurbōzēd guft hād wāz be nē gīrēd
u =š gāhān_bār nē yaštan rāy tanāpuhr ō bun
anī bawēd ka =š xwarišn abēr nē xwarīd ēstēd tā ka =š xwarišn abēr xwarīd ēstēd
ā =š drāyān_ǰōyišnīh ō bun
ka drāyīd ēstēd ā =š yašt =ēw tuwān kirdan
nē kunēd wināh ī garān garzišnīg wināh nē kird ēstēd
rōšn guft hād ēn anī bawēd ka =š pad wināhgarīh drāyīd ēstēd ud drāyēd anī wattom ka nē yazēd xwarēd ud apādyāb drōn yazēd ud abārīg hamē andar ēn
ka =š drāyīd ēstēd ā =š gāhān_bār nē bawēd u =š rapihwin nē bawēd u =š ustōfrīd nē yazišn
u =š xwarišn ka gumānīg ā =š gāhān_bār yašt u =š rapihwin nē yašt bawēd u =š ustōfrīd nē yazišn u =š ōh xwarišn
wehšābuhr ōh ēd pāyag_xwārtar guft ka yašt nē kird ēstēd
u =š wāz nē dahišn
ka =š kird u =š nē warm ā =š wāz =iš nē gīrišn u =š ōy ī pad kirbag ōh dādan
ēw_čand gyāg =ēw mad ēstēd hamāg abēgumān hēnd ayāb hamāg gumānīg hēnd
ka wehīh paydāg hamē ōy ī weh drōn yazišn ud abārīg wāz gīrišn
ka wehīh =ēw nē paydāg ka nē paydāg kē drōn yazēd ud abārīg wāz gīrēnd ā šāyēd ka hamāg drōn yazēnd
weh =iz ka harw dō drāyīd ēstēd harw dō drōn yazēnd weh čē ēk =iz ī pad zōtīh ō did nē šāyēd
wehšābuhr guft hād šāyēd
ka yašt_warm ud abēgumān pad yašt ī keh pad harw kār =ēw šāyēd ud pad zōtīh ī harw kas =ēw šāyēd
ka hadōxt_warm u =š wisperad =ēw ayāb sraw =ēw yašt ēstēd pad =iz ān ī meh pad hamāg kār šāyēd
wehšābuhr guft hād hadōxt_warmīhā andar abāyēd
kār ī pēš az yaštan ī pad abestāg abāyēd kirdan hamē abēgumān kunišn
ān ī andar yazišn =ēw az =iš bunīh ka ayār ī bowandag mad ēstēd ēn and abēgumānīh_kunišnīh ud zōtīh_wēnišnīh barsom bastan ud parāhōm griftan ud hōm hunīdan ud zōhr andar dāštan ud abestāg ī pad tan =ēw
ka az ān kem mad ēstēnd hōm hunīdan ud zōhr andar dāštan ka =z ān ī gumānīg kunēnd ā šāyēd
ēw_kird ka garmądāri frāz burd ay ast kē ǰīw =iz gōwēd ka abēgumān ēk frāz sāzēd ud xwēš ul kunēd ā šāyēd
ka frāz sāzēd ud be šawēd ud ēk ī did ul kunēd ā šāyēd
hād dādīh pad dōšišnīh andar nē ēstēd
āzād_mard guft pad harw yazišn =ēw ǰud az ōy ī zōt mard =ēw abēgumān ōh abāyēd
ka hamāg gumānīg yazišn ō puhl šawēd ud nē kunišn
anī ō puhl šawēd ayāb nē ā =m nē rōšnag
abarg guft hād hōm be nē hilēnd
yašt ī fradom šnūman ī nōg_nāwar kunišn
pas ka gumānīg be bawēd nōg_nāwar šāyēd sī_rōzag šāyēd
sī_rōzag wēš_abestāgīh weh =iz ast
ast kē ēdōn gōwēd ay az bunīh sī_rōzag kunišn ā šāyēd
pas ka ardā_fraward kunēnd ā šāyēd
sōšyans guft hād ka ahurahe_mazdā̊_raēuuatō_xᵛarənaŋᵛhatō gōwēd ā šāyēd
hadōxt ī fradom šnūman ī rahwōbirzad kunišn
sraw pad hamāg šnūman pādixšāy be pad rahwōbirzad
ast kē ēdōn gōwēd ay hād harw =iz fradom yazēd ā =š šnūman ī nōg_nāwar kunišn
āzād_mard guft hād mard kē dēn ōh yazēd yašt ī dwāzdah_hōmāst =ēw rahwōbirzad abēr be yazišn u =š dahišn xūbtar bawēd
gōspand pad hamāg yazišn pādixšāy kuštan
nōg_nāwar gumānīg ud yašt pad war ast kē hadōxt =iz ī fradom gōwēd ud ast kē rapihwin =iz ī fradom gōwēd … srōš_drōn pad hamāg yazišn pādixšāy xwardan be pad nōg_nāwar ī gumānīg ud zōtīh ī zanān ud bāzā drōn
anī pādixšāy
gāhān_bār ud panǰag ī fradom weh yazišn
pad panǰag ī abdom weh xwardan
panǰ ud panǰ ast kē čahār ud čahār gōwēd
sārahe ǰuttar nēst
ast kē sārahe ǰuttar gōwēd
mard kē xwēškārīhā pad kār =ēw kāmēd šudan pad ēd dārēd kū =m andar gāh abāz madan nē tuwān u =š paṇča_tišrō_dasa ud raϑβąm abāz_hilišnīh u =š gāhān_bār bē_yazišnīh u =š hazaŋrəm_maēšanąm kirbag ōh bawēd
ka andar gyāg abāz āyēd ud be yazēd ā =š hazaŋrəm_gauuanąm kirbag ōh bawēd
ka tuwān yaštan ud nē yazēd ēn kū =š awōyrišt ō bun bawēd ayāb nē ā =m nē rōšnag
rōšn guft hād kū andar ān paymān ōh yazēd ā =š raϑβąm abāz_hilišnīh
ka nē ā =š raϑβąm =ēw =z abāz nē hilišn yazišn ō puhl šawēd
ēn yašt ī padīriftag gāhān_bār ud rapihwin ī fradom ī pad sidōš ud yašt =ēw pad frawardīgān ud yašt =ēw nōg māh harw māh se bār xwaršēd harw rōz se bār
yašt ī padīriftag az abestāg kū ēn az abestāg paydāg kū pad awōyrišt ēstēd ud bārīg nē rōšnag
ast kē ēdōn gōwēd ay hād ēdōn bawēd čiyōn gāhān_bār
xwaršēd harw se bār awōyrišt ēstēd ast kē harw bār =ēw gōwēd
ast kē ēdōn gōwēd ay hād barsom awestwārān stānišn ud ō awestwārān dahišn
ka be dād ā dastwar abāz stānišn
dād_weh guft hād man pad barsom be pad stōš nē kird ēstēd
ast kē bayaspānīh gōwēd
kē gāhān ī ēk gōwišn abar raft kū be hišt ayāb ēk wezest
se zanišn ayāb rōz_drahnā wāstarēnišn ud yazišn xūb
ēdōn dudīgar ud ēdōn sidīgar sōšyans guft
kayādurbōzēd hād ast ka dō ast ka se
ast kē ēdōn gōwēd hamāg az ān ka pad ōy abar ōy ō_ham rasēd
and_čand čahrušwadag ī gāhān andar sāl =ēw asrūdār ast arduš ōy wināh
srišwadag tarist xwar nēmag tarist bāzā_zanišnīh
ka hamāg tarist sāl_drahnā pad yāt āstārēd
ka =z pas ēk ratufrīd be abārōnēnēd kū be hilēd be tanāpuhr bawēd
kē gāhān ēk ratufrīd be abārōnēnēd 3 zanišn ayāb rōz_drahnā wāstaryōš
ud yazišn xūb
hād ēd =iš rāy abāz āwarēd kū_tā dānād kū ratufrīd ud wezest harw dō ēk
čiyōn x guft ēstēd ēn az abestāg paydāg
anī bawēd nask_hilišnīh pad yazišn ī padīrift bawēd
zōt hamāg yazišn ī padīriftag ud rāspīg ī drust ēn ka gōwēd ay ēn yazišn =ēw tō rāy kunēm tā_ō čahrušwadag ī gāhān harw wāzag =ēw pad pēšīh ud pasīh be hilēd
sōšyans guft hād harw ēk =ēw se srōšōčarnām
x kayādurbōzēd guft hād āgenēn wēš nēst kū se srōšōčarnām
ay ō čahrušwadag mad arduš pāyag kunēd pad srōšōčarnām ham_dādestān būd hēnd kū nēst
srišwadag xwar nēmag bāzā hamāg yāt
ka andar sāl abēr was hišt wēš nēst kū yāt =ēw
sāl ī dudīgar gāhān wezest_drahnā ayāb abārīg abestāg ī hōmāst gāh_drahnā be hišt tanāpuhr =ēw
ka andar ān sāl abēr was be hišt wēš nēst kū tanāpuhr
u =š arduš ud xwar ud bāzā ud yāt ud tanāpuhr andar hamēmālān be wizārišn ud yazišn gōhrīg abāz kunišn harw dō kirbag ōy bawēd
ast kē ēdōn gōwēd ay hād ān nē
kē ōh kunēd u =š ānd_and bawēd čand az yazišn ōh be hišt ēstēd
ast kē ēdōn gōwēd ay hād ka az yazišn ī kasān wāz frāz gīrēd ān ī and ul gōwēd ā šāyēd
ka dwāzdah_hōmāst =ēw be padīrēd ud be nē yazēd wēš nēst kū xwar =ēw
ka hōmāst =ēw be padīrēd ud ka guft ēstēd kū pad čand barsom be yazēm harw barsom =ēw rāy xwar =ēw
ka and čand pad barsom =ēw be šāyēd yaštan wēš nēst kū xwar =ēw
ka yašt =ēw padīrēd ay kū =š pad čand mard čand padīrift bawēd ā =m nē rōšnag
abarg guft hād pad =iš panǰ mard ī abēgumān andar dōspurrnām padīrift bawēd
gōgušnasp guft hād pad =iš dō mard ī abēgumānīg nē andar dōspurrnām padīrift bawēd
kē gāhān nē yazēd gāhān_bār nē yazēd nēm sāl_drahnā
az ān be ō anī dahm gāhān srāyišn pādīrānēnēd kū anī kasān nē hilēd yaštan
čand ka pad nēm sāl gāhān asrūdār būd hē ēdōn āstārēd
ka pēš nēmag ī sāl xwad nē yazēd pas kasān nē hilēd yaštan ayāb pas xwad nē yazēd pēš kasān nē hilēd yaštan pādīrānēnēd tanāpuhr bawēd
ēn az abestāg paydāg
anī bawēd ka gāhān =ēw fradom xwad nē yazēd ud ān hamāg kasān nē hilēd yaštan u =š xwar ī awōyrišt andar_ō bun bawēd
ēd ka fradom x xwad nē yazēd ud dudīgar kasān nē hilēd yaštan ayāb ēd ka dudīgar xwad nē yazēd ud ān ī fradom kasān nē hilēd yaštan tanāpuhr =ēw bawēd
ēw_kardag gāhān_bār nē yazēd pad ǰud
gāhān_bār ī ēw_kardag pad hamayā nēm tanāpuhr pāyag
pairi_auuat̰_varštə̄e_xə̄t̰ ast kē ēdōn gōwēd hād pad =iz yāt pāyag ast
kē gāhān nē yazēd gāhān_bār nēm sāl
kē az ān be ōy ī anī dahm zanēd
arduš ayāb aγrī stōr ayāb dō stōr ayāb yāt ud meh xwar
xwar nē ast tōzišn pad abar_barišnīh kū wināh ī pas az ān kunēnd abāg zaxm afrawaršt nē bawēd
gāhān_bār nē yaštan pad tis =iz ī tiz ast afrawaršt nē bawēd
pad tis ī xwēš ōh bawēd
abāg zaxm az abestāg paydāg kū nē bawēd
abāg nask_hilišnīh ā =m nē rōšnag
az kū be ušahin gāh rad_franāmišnīh frāz rasēd kū yazišn ī ušahin pad čē hangām kunišn
az mayān ī šab x huwaxšišn be sazēd
ēdōn pad zamestān
pad hāmīn ēdōn agar pēš ī huwaxš ahunawayt_gāh srāyēd
yasn =iz ī haft_hād ud uštawayt =iz hād ī az =iš kār nēst
anāstārīd pas kū awināh kē awēšān anī srāyēd x x tā ō mayānag ī frayar
tā =z ō šab ǰuttar nēst
hād yazišn hamē ān xūbtar kē x x x andar gāh sar be šāyēd kirdan az bunīh ka frāz ēstēd
ka dānēd kū =m yasn andar gāh ul tuwān guftan frāz pādixšāy ēstēd ka ul pādixšāy
ast kē yašt nēmag gōwēd
ay ast kē hōmāst gōwēd
ān kē hangām nē paydāg hamē ka frāz ēstēd ā šāyēd
ast kē ēdōn gōwēd ā šāyēd hād ān =iz ān ī xūbtar kē ēdōn frāz ēstēd
ast kē ēdōn gōwēd parāhōm pad gāh tuwān xwardan ka =š andar grift
tis az ān rasēd rāyēnīdan nē šāyēd
u =š gāh ī pēš pad =iš andar āyēd ka =š parāhōm xward ā =š ōh rāyēnišn u =š gumānīg wizārd bawēd
ka gōspand pad yašt u =š gāh ī pēš pad =iš andar āyēd gōspand ka nē kušt ā nē kušišn
ka kušt zōhr ōh dahišn ka yašt pad zōhr u =š gāh ī pēš pad =iš andar āyišn
āzād_mard guft hād ka hōm harw čahār bār hunēd ā =š zōhr ōh dahišn
ka ēk bār ayāb dō bār hunēd ā =z pad ēw šōn
ka ēč bār nē hunēd zōhr nē dahišn
ka srōš drōn xwarēd u =š gāh ī pēš pad =iš andar āyēd u =š dast az barsom ul dārišn u =š wāz be gōwišn
u =š sāzišn ēk =iz pad kār nē āyēd be parāhōm pad ǰud_yazišn kē =šān andar kār kird andar kār kirdan drust hēnd
ka =š srōš drōn xward ka ēk bār ayāb dō bār xwarēd ā =z pad ēw_bun x x x u =š gāh ī pēš pad =iš andar āyēd dast az barsom ul dārišn u =š wāz be gōwišn
ud sāzišn hamē pad kār šāyēd be parāhōm pad ǰud_yazišn kē =šān andar ō kār kird nē kirdan barsom did bandišn ud parāhōm did gīrišn
abar barsom ī pad ǰud_gāh bast ēstēd ud parāhōm ī pad ǰud_gāh kird ēstēd ān ī ēk šāyēd pad rapihwin ī fradom
ast kē ēdōn gōwēd ay ān =iz nē šāyēd
kē meh sāxt ēstēd u =š keh kāmēd kirdan u =š abāz āhanǰišn u =š grih saxt be kunišn
ka keh sāxt ēstēd u =š meh kāmēd kirdan u =š abāz wišāyišn u =š did bandēd
ast kē ēdōn gōwēd ay hād ān =iz ka be bandēd u =š nē andar ul bandēd ā šāyēd
barsom ǰud_šōy nē šāyēd ǰud_šōy ǰud_ātaxš
ast kē ǰud_wistarišn gōwēd
bulandohrmazd guft kū ǰud_dādestān abar ēd kū barsom ān gyāg kū ōh bandēd abāz x abāyēd wišādan
tā abar ēd ǰud_dādestānīh nēst barsom šāyēd
barsom bastan gāh =ēw nē paydāg
pad kardag pad x x bandišn u =š sar ō ātaxš rōn kunišn
aṣ̌əm_vohū se frauuarānē_mazdaiiasnō gāh ān ī bawēd ahurahe_mazdā̊_raēuuatō_xᵛarənaŋhatō_xšnaōϑra tā frasastaiiaēča wāz frāz_gīrišnīh
aṣ̌əm_vohū čahār be gōwišn u =š harw se bār az bun ō sar šōyišn u =š ēk =ēw did be gōwišn u =š ēk bār az sar ō bun šōyišn u =š ēdōn kunišn kū harw gyāg harw tāg pas ud pēš pādyāb abar be rasēd
ast kē ēdōn gōwēd ay ka harw čahār bār rasēd ā šāyēd
ast kē ēdōn gōwēd ay hād andar x se bār šōyēd ā šāyēd
frāgām aybyāhan ud zōhrag kē abāg barsom kū mad ēstēd šōy ān ī barsom
ka pas rasēd frāgām šōy ud ān ī barsom aybyāhan ud zōhrag pādyāb andak =ēw abar frōd hilišn
ka be šust u =š abāz nē abrāzišn abāz ō gāh ī zōtān šawišn
ka =š az barsom_dān ul stad ā =š pādyāb andak =ēw abar frōd hilišn u =š frōd ō barsom_dān nihišn
xšnaōϑra_ahurahe_mazdā̊ u =š kār nēst hād pad kōrān ōh gōwēnd u =š be ēd gāh ī frabardārān šawišn
ud aybyāhan abar wistardan nē nērang
u =š ēk_bār humatanąm_hūxtanąm_huuarštanąm abar ēw gōwēd u =š zōhr az kust ī dašn hamē abāg kunišn
nā_yašta kār nēst
ast kē ēdōn gōwēd ay hād kār =ēw ka ēk bār pad abestāg abar abāg kird hamē ka be ōftēd u =š nē pad abestāg abar abāg kunišn
ka x abāg nē šāyēd kirdan ā =š abāz šōyišn ud āb ī šōy az =iš be nē āhōgēnišn
ka pas rasēd harw gyāg kū rasēd rāspīg ī abēgumān wāz frāz gīrēd u =š pad abestāg abāg kunišn
ka harw dō pad ēk bār rasēnd meh pēš keh pas xwēš zōhrag abar dāštan
angust u =š čahār angust gāh ī xwēš ǰīw abar čahār angust u =š angust gāh ī xwēš
pēmīh hamē pad zōhrag dō angust u =š dō angust abar čahār u =š abar šaš u =š abar hašt
u =š dō abar dah
u =š dō abar dwāzdah
dō abar yašt ī keh
čahār u =š dō abar wisperad =iz ud ōh ēk_hōmāst ud hadōxt ī ēk_hōmāst
šaš u =š dō abar dō_hōmāst
8 u =š dō abar dah_hōmāst ud dwāzdah_hōmāst
dah u =š dō abar wisperad ī artōkarten
dādweh guft hād x x wisperad ī aratō kərəϑən nē pad čāštag u =š haft abar wisperad ī dwāzdah_hōmāst
barsom ī pad ačār tuwān ka se tāg ī abārīg kē be az frāgām rasēd ā šāyēd
u =š frāgām azabar frōd nihišn
dādweh guft hād barsom ī pad ačār tuwān hamāg rāst abāyēd
pad ačār ka se tāg rāst ud abārīg pad grih be rasēd šāyēd
u =š frāgām pad sar abāz nihišn u =š aṣ̌əm_vohū ēk =ēw be gōwišn u =š aybyānghan =ēw pērāmōn āwarišn u =š yaϑā_ahū_vairiiō dō be gōwišn u =š pad š́iiaōϑananąm grih ī gaštag be kunišn
barsom pad panǰ se azēr ud dō azabar grih pardazišn ō bahr ī azēr
ast kē ēdōn gōwēd ay hād andar srišwadag ī mayānag harw gyāg =ēw kū bast ēstēd ā šāyēd
ast kē ēdōn gōwēd ay hād az ān dō bahr ī azabar ka ašem =ēw wohū =z kem ā nē šāyēd
wišād ō dašn ud bālēn ō hōy
ka nē owōn ā nē xūb
ka dō grih ā nē šāyēd
hōm pad abestāg čīdan nē nērang
ast kē gōwēd pad abestāg abāyēd čīdan
u =š čīnišn ān ī barsom
ka az wāzār be xrīd ā šāyēd
u =š ka abēr pad pādyāb čīd ēstēd pas grih_grih kunišn u =š pad abestāg be šōyišn
ka ēw pēšag ayāb dō pēšag ast nē pad grih
škast ēstēd ā šāyēd
dādweh guft hād u =š bunīh ka pad hōšag be šust ā šāyēd
pas grih_grih be kunišn u =š pad abestāg be šōyišn
ka ēw pēšag ayāb dō pēšag ast nē pad nērang
škast ā šāyēd
ēd ka ōh šōyēd aṣ̌əm_vohū se frauuarānē_mazdaiiasnō čē gāh dārēd haōmahe_aṣ̌auuazaŋhō_xšnaōϑra tā frasastaiiaēča u =š wāz frāz gīrišn
u =š aṣ̌əm_vohū čahār bār gōwišn u =š harw bār =ēw dast ī ǰāmag pad pādyāb be šōyišn tā andar_ō kār kird
ka hamāg apādyāb be bawēd ā =š pad abestāg abāz šōyišn
ka =š andar_ō kār kunēd abāg šustan kār nēst
ka parāhōm xwarēd ā =š esm_bōy ēw tāg az kust ī dašn be nihišn u =š hōm ud urwarām pad čandīh be paydāgēnišn
hōm pad kamistīh se grih pad wēšistīh sīh grih
urwarām andar ān ī pad nēmag
u =š hamē xwarišn
tā abāz ō bahrag ī hōm āyēd pādyāb
ka az ān zōhr abāg šōyēd ā šāyēd
ka ēk =ēw did ul stānēd ā šāyēd
aṣ̌əm_vohū se frauuarānē čē gāh dārēd
zaraϑuštrahe_spitāmahe_aṣ̌aōnō_frauuaṣ̌ə̄e_xšnaōϑr tā frasastaiiaēča u =š wāz frāz gīrišn
u =š ahurāi_mazdāi bun kunišn u =š sar be kunišn u =š pad harw tis ēw xūb be nigerišn u =š pad iməm_haōməm hōm ud urwarām andar abganišn pad yā̊ŋhąmčā ān esm_bōy ēw tāg frāz ō ātaxš barišn
wāz griftan kār nēst ay pad kōrān ōh gīrēnd
pad ān čahār yaϑā_ahū_vairiiō se ud šaš ud nō škāftan dādan nērang
dādweh guft hād škāftan nē nērang
pad ān se aṣ̌əm_vohū harw ēk pādyāb andak =ēw andar kunišn
pad haōma_pairi_harəšiiaṇte abar hōm abāg gardēnišn
pad ān ī čahār yatāhūwayryō pad š́iiaōϑananąm fradom be wardēnišn ud pad xšaϑrəmčā be afšārēnišn
pad ān ī dō mayān ēw gāh ōh hunišn ud ēw gāh pādyāb andar kunišn be wardēnišn ud ēw_gāh be afšārēnišn
pad ān ēk ī abdom pad xšaϑrəmčā be wardēnišn ud pad ādāi_kahiiāčit̰_paitī be afšārēnišn
ka parāhōm kird barsom ēw tāg kem ayāb pādyāb srešk andar ōftēd ā šāyēd
ka apādyāb be bawēd pad barsom =ēw was bār abāg pādixšāy kirdan
keh ō meh ēk meh ō keh kē mān ī wehān ō mān ī ātaxšān ayāb mān ī ātaxšān ō mān ī wehān hamē šāyēd
ast kē ēdōn gōwēd ay hād mān ī wehān ō mān ī ātaxšān nē šāyēd
az bunīh ēn and tis ōh abāyēd barsom_dān wistarišn
anī kār nē dānēm
abārīg pad gāh ī xwēš rasēd ā šāyēd
dādweh guft hād ka parāhōm kird andar ān pad ān čahār yaϑā_ahū_vairiiō pādyāb ān gyāg abāyēd
dādweh guft ay be nigerišn
pad ān se aṣ̌əm_vohū gōspand ān gyāg abāyēd ka andar nayēd ā be nē nayišn
zōt ka andar ō yazišn āyēd az kust ī dašn pad gāh ī ātarwaxšān be ēstišn u =š war ō ātaxš ud barsom rōn kunišn aṣ̌əm_vohū se frauuarānē čē gāh dārēd pad mān ī wehān tauua_ātarš_puϑra_ahurahe_mazdā̊_xšnaōϑra
ast kē ēdōn gōwēd ay hamē āϑrō_ahurahe_mazdā̊_puϑra_tauua_ātarš_puϑra_ahurah
ka az ān kē barsom bandēd parāhōm kird wāz dārēd wāz az ōy gīrišn ka nē ēn wāzag =ēw ka az xwēš gīrēd weh =iz ast
āzād_mard guft hād harw yazišn =ēw ān xūbtar ka az rāspīg ī abēgumān wāz frāz gīrēd ud ātaxš_gāh pad pādyāb be kunēd
harw kē andar ān yazišn kār =ēw kāmēd kirdan wāz az ōy gīrēd
u =š wāz frāz gīrēd u =š az kust ī frabardārān šawišn u =š ātaxš sar ī barsom andar kunišn u =š pad se aṣ̌əm_vohū ātaxš_gāh pad pādyāb be kunišn
andar bōxtan nē nērang
ast kē pad čahār gōwēd
ātaxš_gāh az gilēn šāyēd ud gačēn šāyēd ān pad pādyāb bawēd
ast kē ēdōn gōwēd ay hād nērang =ēw pas guft bawēd kū =z dārēn šāyēd
ka sarāsar darrīd ēstēd ā nē šāyēd
ka =š kāh =ēw andar sarāsar andar be ēstēd ēdōn bawēd čiyōn sarāsar darrīd ēstēd
ast kē ēdōn gōwēd ay hād ka be škihēd yazišn sar
ast kē ēdōn gōwēd ay hād pad ēk frāz_gīrišnīh yazišn sar be kunišn
tā srōš_drōn xwarēd ka apādyāb be bawēd u =š yašt bun abāz kunišn
ka srōš_drōn xwarēd ā =š pādyāb andak =ēw abar frōd hilišn
u =š ān dō yatāhūwayryō ā andar rāh be gōwišn u =š abāz ō gāh ī zōtān šawišn
u =š =ēw gām az barsom abāz ēstišn u =š andar_ō kār kunišn
u =š frastuiiē bun be kunišn tā staōmi_aṣ̌əm frāz gōwišn
u =š pad staōmi pāy ī dašn andar gāh ī zōtān nihišn u =š aṣ̌əm_vohū ī dudīgar ī barsom gōwišn
ast kē ēdōn gōwēd ay hād staōmi_aṣ̌əm ka nē pad barsom gōwēd ā nē šāyēd
barsom ōšmurdan nē nērang
ka =š nē ranǰagīhā ā =š abestāg hamāg az pāy gōwišn x x be vasasča_tū_ahura_mazda ud aməṣ̌a_spəṇta
ka =š ranǰagīhā ēn_and az pāy gōwišn bišāmrūd ud srišāmrūd ud čahrušāmrūd ud šnūman_wizārišnīh ud wāz_gīrišnīh ud srōš_barišnīh az yašt bun tā imat̰_barəsma_haδa_zaōϑrəm az ahurāi_mazdāi tā daϑušō ud az aētat̰_dim tā ān yašt sar hādān sar hamāg tā vaŋhučā_vaŋhā̊sčā abestāg
pad ranǰagīhātar ka nišīnān gōwēd nē tarmenišnīhā
pad haiϑiiā varštąm barsom frōd ō barsom_dān nihišn ka nē nihēd ā nē šāyēd
tā ka pad imat̰_barəsma be šawēd hamē ka barsom ēw tāg kem andar barišn ud ka wēš ā abāz āhanǰišn
ka pad imat̰_barəsma be šawēd ka kem andar barišn ka wēš ā be hilišn
ka ǰuxt dō tāg be gīrišn ka pad nihān
ast kē ēdōn gōwēd ay hād ēdōn bawēd čiyōn pad srōš_drōn
pad abāz guftan ēdōn čiyōn pad abārīg abestāg
pad srōš_drōn drōn ud gōšudāg ān gyāg be nihišn
frasast kār nēst u =š esm bōy se tāg az kust ī dašn be nihišn
u =š pad āsāyišn =ēw harw tis =ēw be nigerišn ka āsāyišn =ēw ast be x nigerēd
agar pad wāzag =ēw gumānīg bawēd ka az wezest_drahnā be nē šawēd ā =š az =iš abāz gōwišn
ka az wezest_drahnā be šud ā =š x x yašt bun abāz kunišn
yašt bun abāz kirdan ud ātaxš_gāh šustan
ast kē ēdōn gōwēd az frastuiiē x
ast kē ēdōn gōwēd ay hād srōš_drōn bun abāz kunišn ā šāyēd
tā srōš_drōn xwardan wars ud hōmīzag az barsom ōh pahrēzišn
ka abar rasēd ā šāyēd
pad ān dō yaϑā_ahū_vairiiō ka pēš frāz barēd ā šāyēd ud ka pas frāz barēd ā šāyēd
pad aṣ̌aiia nō_paiti ǰamiiāt̰ hāwanān ul ō pāy ēstišn u =š xᵛarata_narō be gōwišn
ka nē gōwēd ēn kū šāyēd ayāb nē šāyēd ā =m nē rōšnag
ka srōš_drōn xward ud barsom nē pad nigerišn apādyāb be bawēd ā =š be šōyišn u =š be rāyēnišn u =š gumānīg pardāxt bawēd
ka gōspand pad yašt ā =š ōh kušišn
ka yašt pad zōhr ā =š zōhr ōh dahišn
abarg guft hād pad barsom ī apādyāb gōspand nē kušišn ud az =iš zōhr ōh nē bawēd
ka pad kardag mad ēstēd u =šān pad nērang garān dāšt
ka srōš_drōn xward ud parāhōm nē pad nigerišn apādyāb be bawēd u =š ōh rāyēnišn u =š apādyābān abāz xwarišn
ka hixrōmand be bawēd ayāb be rēšīhēd nadatum guft ēstēd
ast kē ēdōn gōwēd ay ka wars be šōyēd ud abāg xwarēd ā šāyēd
ast kē ēdōn gōwēd ay hād ka ǰąm frāz afšārēd ud abāg xwarēd ā šāyēd
dādweh guft hād nar ka wars pad parāhōm kird ēstēd ēwtom ān ī xūbtar az rāspīg ī abēgumān wāz frāz gīrēd
ēk pad abestāg frōd kunēnd ud zōt hōm_stōd bun abāz kunēd pad hōm_stōd bun be nigerišn
pad nəmō_haōmāi_mazdaδātāi_vaŋhuš_haōmā_huδātō be nigerišn
pas ka nihuft ēstēd weh =iz ast
x ka hāuanānəm_āstāiia nē gōwēd ka nē pad kardag mad ēstēd u =šān pad yašt ī keh be rāyēnīd
pad wisperad ud bayān_yasn šāyēd būdan
rāspīg ka azəm_vīsāi nē gōwēd ī pad kār andar yazišn pad tis =iz kār nē šāyēd
ka ēk pad gāh =ēw hamē be gōwēd pad hamāg kār šāyēd
pad yō_nō_aēuuō_at̰_te_parāhōm pad war ī zōhrag barišn u =š yō_nō_aēuuō pad war ī zōhrag gōwišn
ast kē ēdōn gōwēd ay ka andar rāh =ēw be gōwēd ā šāyēd
zōt ka =š taškanāgīhā xūb bast ēstēd pas dagr ǰār xūb pad im šōn u =š dast pad bun ī barsom frāz dārišn
frabardār parāhōm ul ō dast nihišn ud pairi_tē_haōma aṣ̌əm_vohū se be gōwišn
nēmag =ēw abāg xwarišn ud bār ī did az ān ī abāg nēm =ēw abāg xwarišn ud bār ī sidīgar hamē abāg xwarišn
ka čahār bār xwarēd ā =š drāyīd bawēd
ka ēk bār ayāb dō bār xwarēd ayāb rāspīg abestāg nē gōwēd ayāb =iš ātaxš =ēw abd ī ōh nišīnīhād wāzag =ēw be gōwēd ayāb zōt dast nē pad barsom dārēd aṣ̌əm_vohū be ēk … nē rōšnag
ēdōn uskārd kū hamāg šāyēd be ān ī ēwtom kū zōt dast nē pad barsom dārišn
aṣ̌əm_vohū be gōwēd čē ān kē abāg gōwēd u =š gumānīg
ast kē ēdōn gōwēd ay hād vaŋhuča vaŋhā̊sča ōh rāyēnišn u =š gumānīg wizārd bawēd
kayādurbōzēd guft hād pōryōtkēšān abestāg anēraxt nē čāšt ēstēd pad ēn wāzag ā hamdādestān bawēd
ast kē ēdōn gōwēd pad =iz abārīg nē bawēd
ast kē ōwōn ēdōn gōwēd ay pad =iz ēn nē bawēd
pad yeŋ́hē_mē_aṣ̌āt̰_hačā ǰīw be baxšišn pad se bahr
dō bahr ān ī zōhrag ud ēk ān ī barsom ay tāg ī bastag kē az kust ī dašn =iš zōhrag pad =iš
pad ān čahār yatāhūwayryō pad š́iiaōϑananąm ī fradom andak =ēw grih be sōhišn u =š pas tā_ō sastiča be hilišn
ast kē ēdōn gōwēd ay xwad =iš tā_ō sastiča be hilišn
u =š pad sastiča barsom and dašn paydāg bē_gīrišnīh az =iš ēw tāg ī stabrtar ud rāsttar pad datuš be abrāzišn
ka az dō ēk =ēw ān ī stabrtar
ast kē ān ī rāsttar gōwēd
ka datuš be škīhēd ka barsom_drahnā be mānēd u =š anī pad āsāyišn ēw tāg az kušt ī dašn abāz abrāzišn
ast kē ān ī hōy gōwēd
ka barsom_drahnā be mānēd u =š ān be nihišn u =š ēk =ēw did be bandišn ud andar barišn u =š ēw tāg az kust ī dašn abāz abrāzišn
ast kē az ān ī hōy gōwēd
ka datuš ul āyēd ayāb aybyāhan be wisinnēd ayāb grih abāg rahēd ayāb pad barsom abāz āyēd ā ēk =iz nē rōšnag
ēdōn uskārd kū kār ī xūb be kunēd be nē rāyēnēd ā šāyēd
pad hōmāst bun esm ud bōy ēw tāg az dašn be nihišn u =š hōm ud urwarām pad čandīh be paydāgēnišn hōm pad kamistīh se grih ud pad wēšištīg 5 ṣ̌ōpaϑ pad dwāzdah_hōmāst =ēw tašt =ēw
enyā urwarām ī andar ān pad nēmag
u =š hamē xwarišn
abāz tā_ō bahrag ī hōm āyēd u =š pad āsāyišn harw tis =ēw xūb be nigerišn
u =š pad ahurāi_mazdāi hōm_urwarām be war ī ǰīuu ul dārišn
ēn kū čiyōn ud čand dārišn ā =m nē rōšnag
dādweh guft hād gōš bālā dārišn frāz ō pēš dārišn u =š x be nigerišn
ka =š ahurāi_mazdāi be guft hāwan be šōyišn pad aməṣ̌ā_spəṇtā hāwan abāg wardēnišn u =š pad iməm_haōməm hōm ud urwarām andar hāwan abganēd
pad yā̊ŋhąmčā ān esm_bōy ēw tāg frāz ō ātaxš barišn u =š wāz gīrišn
u =š pad ān čahār yatāhūwayryō se ud šaš ud nō pad xšaϑrəmčā ī sidīgar gōš bālā ul dārišn az ān gyāg paydāg āϑritīm_xšaϑrō kərətahe_gaōšō bərəzō_us šāuuaiiōit̰
ka ōh škafēd ān ī xwēš barsom zōt ātaxš škāfišn ā =š ēdōn kunišn kū abar harw se ōh rasēd ō hōm ud urwarām āhōg
u =š pad ān se aṣ̌əm_vohū pādyāb andak =ēw andar kunišn pad yeŋ́hē_mē_aṣ̌āt̰_hačā keh abāz ō meh wardēnišn
pad haōmanąmča_harəšiiamnanąm abar hāwan abāz gardēnišn
pad aršuxδanąmčā_vačaŋhąm ēw srešk andar_ō ǰīuu abganišn
pad aϑā_zī_nə̄_humaiiōtara_aŋhən be war ī zōhrag barišn ud pad barsom dārišn
pad ān čahār yatāhūwayryō pad š́iiaϑiananąm ī fradom be wardēnišn
pad ādāi_kahiiāčīt̰_paitī be pālāyišn
pad us_mōi_uzārəšuuā_ahurā_ārmaitī_təuuīšīm_dasuuā ul se wezest az dašn ēk hōy ēk pad war ī zōhrag dārēd
ka ǰīw ī bahr ī barsom apādyāb be bawēd ka az ān ī zōhrag abāz šāyēd dāštan abāz dārišn
ka nē ā =š ōh rāyēnišn ud az =iš apādyābān abar barišn
ka bahr ī zōhrag apādyāb be bawēd ka az ān ī barsom abāz šāyēd baxtan abāz baxšišn
ka nē ay ka ǰīuu apādyāb be bawēd ayāb ka pādyāb apādyāb be bawēd ēd hōm ud urwarām apādyāb be bawēd
hamē ka āsāyišn ēk =iz abāz ast ka šāyēd abāz āwurdan abāz āwarišn
ka nē sōšyans guft hād yazišn sar
kayādurbōzēd guft hād ay tā se hād sar
hamē ka abāz šāyēd āwurdan abāz āwarišn ud zōt hōmāst bun abāz kunišn
pad ān ī se hād ī sar ān =iz ham_dādestān būd hād ka =š ēw bār xwarēd ud apādyāb be bawēd ā =š ōh xwarēd u =š ǰudāg dārišn
ka ǰīuuām apādyāb be bawēd ā =š xwarišn u =š pad wars nē pālāyišn
ka =š harw čahār bār xward ud apādyāb be bawēd ā =š ōh rāyēnišn u =š apādyābān ō āb barišn
ka hixrōmand be bawēd ayāb be rēšīhēd ā =š ōh rāyēnišn u =š pad pargard bahr ī ābān abāz hilišn
bahr ī ābān nē rōšnag
ast kē gōwēd ay az aṣ̌aiia_daδąmi_imąm_zaōϑrąm_haōmauuaitīm_gaōmauuai tā tauua_ahurāne_ahurahe_…_vahištābiiāō_zaōϑrābiiō
ast kē tauua_ahurāne ēd =iz gōwēd
ka =š yašt sar kird barsom ēw tāg kem ayāb wāzag =ēw hišt ēstēd ā =š gumānīg wizārd bawēd
abarg guft hād pad yašt ī gumānīg_wizārd
ka =š hambun =iz x ǰuttarīh andar nēst ā =š gumānīg nē bawēd
az kū be hāwan gāh rad_franāmišnīh frāz rasēd kū yazišn ī hāwan pad čē āwām kunišn
az huwaxš tā mayānag ī frayar ān =iz ī sazēd
pad hāmīn ēdōn
pad zamestān tā_ō mayānag ī uzayar
rōz nēm frayar ud nēm uzayar yat̰_vā_yaϑa_uzaiiarəm_yat̰_yaϑa_xšaparəm
uzayrin pad nēm rapihwin ud nēm ō uzayrin
pad zamestān bahr ī rapihwin abāz ō hāwan gumēzēd
ēn_and yazišn andar gāh ī hāwan kunišn nōg_nāwar ī gumānīg wisperad ud bayān_yasn
nōg_nāwar yašt =ēw bowandagtar be kunišn u =š bowandagīh vohū_uxšiiā_manaŋhā_imā̊_raōčā̊_barəzištəm_barəzim ud yahmī_spəṇtā_ϑβā_mainiiū_uruuaēsē_ǰasō harw ēk se bār be gōwišn
u =š drōn pad sar be yazišn barsom ī haft_tāg ud aybyāhan ī gaštag
drōn ēk =ēw ēwāz pad bowandag
ud šnūman ān ī im yašt abāg yaštan nē nērang
zōt ān yazišn
ka andar ān rōz nē šāyēd yaštan pas andāzēnd
pēš šāyēd be yazēd
čē tā ān nē yazēd pad zōtīh ī kasān nē šāyēd ay ēwāz ēd kū ka ān drōn nē yazēd pad zōtīh ī kasān nē šāyēd
pas =iz ka abēgumān az ān drōn wāz gīrēd ud xwarišn xwarēd ōh šāyēd
nōg_nāwar ka parāhōm xwarēd ud tis az ān rasēd yazišn sar kirdan nē šāyēd
ā =š wāz ōh gīrišn čē pad dēn āstawān būd bawēd
ka bayān_yasn yazēd tā srōš_yasn nērang hamāg ēdōn bawēd čiyōn pad wisperad
pad srōš_yasn =ēw pēš =iz ud ān ī pas u =š harw yasn =ēw pad bun wāz frāz gīrēd ud pad sar be gōwišn
be ān ka =š az yasn guft ā =š az yašt guft bawēd čē =š ān nē gōwišn
ast kē ēdōn gōwēd ay ān =iz ōh gōwišn čē =š az yasn guft bawēd
ka nē bayān_yasn yazēd az ān kē šnūman az ān gyāg ǰud az srōš_yasn
u =šān harw yazišn =ēw yasn pādixšāy guftan ka rōz ān gyāg rōz
ka nē ān ī meh
pad mehīh ǰud_dādestān būd hēnd
ast kē ān ī wēš_abestāgtar gōwēd
x ast kē gōwēd ay pad _rōzag ī pēš
sraw pad tan =ēw nē pādixšāy yaštan
yasn pādixšāy ka yasn yazēd barsom ī haft_tāg aybyāhan ī gaštag ud drōn ēk ud yasn =iz ī gāh ī dārēd pad ēd yasn ul guft ēstēd
ka čāšnīg kunēd ā =š barsom pad war be nihišn
u =š wāz pad barsom be gōwišn ka wāz be gōwēd ay rauuasča_xᵛāϑrəmča_āfrīnāmi_vīspaiiā̊_aṣ̌aōnō_stōi ązasča_dužāϑrəmča_āfrīnāmī_vīspaiiā̊_druuatō_stōiš aṣ̌əm_vohū se
vaiiaōš_uparō kairiiehe_taraδātō_aniiāiš_dāmąn_aētat̰_tē_vaiiō_y u =š wāz frāz gīrišn u =š yazāi_apəmča_baγəmča bun kunišn ud sar be kunišn
u =š wāz ēdōn be gōwišn čiyōn pad drōn x bawēd
harw kē az ān drōn wāz frāz gīrēd xwarišn xwarēd ud yasn ul gōwēd ā šāyēd
ka yasn ul nē gōwēd ay ēn kū šāyēd ayāb nē ā =m nē rōšnag
šnūman ka haft amahraspand ān gyāg ān ī haft amahraspand pas gāh pas rōz pas māhīgān pas ān ī pad _rōzag pēš
ka haft amahraspand nē ān gyāg gāh ud rōz māhīgān pas ān ī pad _rōzag pēš
ast kē ēdōn gōwēd ay hād ka az haft amahraspand ēk ān gyāg hamāg ān ī pēš šnūman
x pēš ud pas nē sāyēd
ast kē ēdōn gōwēd ay hād ka gāh rōz ud māhīgān ardā_fraward nē pēš nē pas kunēd
abārīg ka ēk nē pad nigerišn pēš pas kunēd ā šāyēd
hordād rōz šnūman ī rōz ī sāl ēn hauruuatātō_raϑβō_yāiriiaiiā̊_hušitōiš_sarəδaiiaēb aiiaranąmča_māhiianąmča_yāiriianąmča_sarəδanąmča_v
pad yazamaide_aiiara_aṣ̌ahe_raϑβō_ratufriš_yaz māhiia_aṣ̌ahe_raϑβō_ratufritīš_yaz yāiriia_aṣ̌ahe_raϑβō_ratufritīš_yaz sarəδa_aṣ̌auuana_raϑβō_ratufritīš_yaz āzād_mard guft hād aiiara_aṣ̌auuana_aṣ̌ahe_raϑβō_ratufritīš_yazamaide pad harw hordād rōz =ēw pādixšāy kirdan
ast kē ēdōn ān ī ēk gōwēd pad nōg_rōz
gāh pad čāštag hamē ast
pad kardag ān ī ušahin nē kunēd
gāh ī nē_pad_gāh_mēnišnīh hamē pādixšāy kirdan
ka šnūman =ēw abāg frāz kunēd ēn kadār pēš ā =m nē rōšnag
ādur rōz šnūman rōz ēn āϑrō_ahurahe_mazdā̊_puϑra
ān ī māhīgān ēn kū hamē bun kunēd ēw_kardag ī ādur rōz
ka māhīgān kunēd xšaϑrō_nafəδrō_nairiiō saŋhahe nē pādixšāy kirdan
ka xšaϑrō māhīgān ā =m nē rōšnag
āzād_mard guft ādur rōz ka māhīgān kunēd xšaϑrō pādixšāy kird čē xšaϑrō abāg ātaxšān ēdōn ēw_kardag čiyōn ātaxš ēk abāg did
ast kē ēdōn gōwēd ay ādur rōz ka māhīgān kunēd ā =š mat̰_vīspaēibiiō_ātərəbiiō be kunišn
ka ādur farnbay ī ašō ā =š ēn harw se kird bawēd ēn se ātaxš
harw gyāg pādixšāy kirdan
sōšyans ān ī plčkl ōh kird
wehšābuhr ān ī gar =ēw ōh kird kū pad kardag mad ēstēd
ā =šān ān ī plčkl pēš kird
abārīg harw ātaxš ay wehān ud pōryōtkēšān šnūman wizīd ēstēd ka pad mān ī xwēš ka pad ēk āϑrō_ahurahe_mazdā̊_puϑra ka dō āϑrō_ahurahe_mazdā̊_mat̰_vīspaēibiiō_ātərəbiiō
sōšyans guft hād ka dah ā =iz harw ēk =ēw āϑrō_ahurahe_mazdā̊_puϑra
u =š ēd ēdōn guft ay xšnūmaine ī mā̊ŋhahe_gaō čiϑrahe ud xšnūmaine ī daϑušō ka kār =ēw nōg kunēd
šnūman ī apąm kunišn ka ǰōrdā kārēd ayāb ǰōrdā stānēd ā =š šnūman ī apąm kunišn ǰōrdā kārēd aspō kəhrpąm pad menišn dārēd
tīr rōz xšnūmaine ēn tištriiehe_stārō_raēuuatō_xᵛarənaŋhatō_satauuaēsah
ān =iz ī māhīgān ēn kū hamē be kunēd tištriiehe kē vanaṇtō abāg nēst
ēn yasn ustōfrīd tištriiehe
ud tištrīgān šnūman ēn tištriiehe_vātahe_aṣ̌āunąm
wād rōz ǰuttar nēst
ast kē wād rōz ǰuttar gōwēd
gōspand pad hamāg šnūman ud yazišn pādixšāy kuštan
ān ī nāmčištīgtar ēn gāh rōz māhīgān ud āϑrō_ahurahe_mazdā̊_puϑra_mat̰_vīspaēibiiō_ātərəbi … ardā_fraward
ka sar šust ā =š xšnūmaine amahe kunēd u =š paϑaiiā̊ abāg be kunišn paϑaiiā̊_xᵛā stātaiiā̊_yazamaide_zarənumaṇtəm_sūrəm_yazamaide_s
harw anī pādixšāy kirdan
ast kē ēdōn gōwēd fradom rāmanō_xᵛāstrahe abāg ϑβāšahe ēdōn ēw_kardag čiyōn tištriiehe abāg vanaṇtō
ka mehmān ō xānag rasēd ā =š xšnūmaine_aṣ̌ōiš_vaŋhuiiā̊_čistōiš_vaŋhuiiā̊_ərəϑē ardā_fraward kunišn
drōn ka gāh paydāg weh yazišn
ka nē ā =m nē mehmān
ān drōn ō x ān gyāg barēd be ō mān ī ātaxšān
tā nē pādixšāy burdan pākīh ud āsānīh rāy ō harw gyāg pādixšāy burdan
pad ān zamān pādixšāy ka =š anī =z kas abar nē hāzēd drōn az xānag ō ēn_and gyāg barēd
pad frawardīgān pad bun ī xānag kahas =ēw nōg kunēd ud ēg =iš yazēd
ka zan =ēw gōwēd ay drōn =im yaz ka wehīh āšnāg ēdōn bawēd čiyōn mard
ka nē x šāyēd ā nē yazišn
ka nē ōh yazišn šnūmanē abāg frāz yazišn
ka nē ōh yazišn šnūman =ēw abāg frāz kunišn
šnūman harw =iz ī _rōzag pādixšāy kirdan abāg rōz pādixšāy kirdan ǰud =iz ī tis pādixšāy kirdan be vīspaēšąmča čē ān ī be _rōzag tā nē šāyēd
dō bərəzatō dō daϑušō x pad _rōzag tā nē pādixšāy kirdan
az kū be yazišn ī ābān wehān rad_franāmišnīh frāz rasēd kū yazišn ī ābān pad čē hangām
az hū_waxš tā hūfrāšmōdād be sazēd
ēdōn pad hāmīn ēdōn pad zamestān
kē āb_zōhr frāz barēd
pas az hūfrāšmōdād x x pēš ī hūwaxš
nē weh az ān kunišn warzēd
čiyōn ka =š az wiš be āyāft pad gaštar abar abāg kišt hē
čiyōn ka =š abāz ō zafar ī mārān rēxt hē
ēn_and kār andar rōz kunišn zōhr stadan zōhr dādan ud šnūman ī apąm_…_vīspaēšąm čiyōn dādestān būd
abarg guft hād vīspaēšąm yazad =ēw pad šab nē pādixšāy kirdan
ast kē ēdōn gōwēd ay hamāg yazad pad šab nē pādixšāy kirdan
zōhr ēn_and tis rāy nē stānišn haōmiiąn ud wars ud tašt ī aburnāyagān ud parāhōm ī aburnāyagān
čē az anī yazišn =ēw and ǰuttar bawēd kū zōhr pad šab stadan ā šāyēd
ast kē ēdōn gōwēd ay hād ka tašt ud wars nē bawēd ōh šāyēd
ast kē ēdōn gōwēd ay hād pad sang =ēw frōd kōbēd ōh šāyēd u =š wiščihrīhātar andar kunišn u =š kār bawēd kū pad xēm weh bawēd
ast kē ēdōn gōwēd ay hād ǰādūgīh =ēw ast
ka nē xwāhēnd ā =z warm ōh bawēd ud pas guft bawēd x nē pādixšāy
ka zōhr stānēd ā =š pad war ī āb šawišn u =š abestāg pad war ī āb gōwišn aṣ̌əm_vohū se frawarānē čē gāh dārēd aiβiō_vaŋhubiiō_vīspanąmča_apąm_mazdaδātanąm bərəzatō_ahurahe_nafəδrō_apąm_apasča_mazdaδātaiiā̊ tauua_ahurāne_ahurahe_xšnaōϑra tā frasastaiiaēča
u =š wāz frāz_gīrišn
frā te_staōmaide_ahurāne_ahurahe_vaŋhə̄uš_yasnąsča_vah bərətīšča_vaṇta bərətīšča_yazatanąm abar āb
ϑβā andar wardēnišn aṣ̌aōnąm pādyāb andak =ēw andar kunišn kuxšnīša purr be kunišn
us_bī barāmi az āb ul dārišn raϑβasča_bərəzātō andar rāh =ēw gāϑā̊šča_srāuuaiiōit̰ ān gyāg kē be nihēd
ka dō mard =iš kār framāyēnd ā =šān ēk az did wāz gīrišn raϑβasča_bərəzatō ōh gōwišn kē be barēd tā az se gām ī āb be šawēd hamē ka apādyāb be bawēd u =š frā_tē_staōmaide abāg gōwišn
ka az se gām ī āb be šawēd ā =š wāz abāz gīrišn
dādweh daxšmēst guft
ka tis =ēw pad zōhr āb andar šawēd ā šāyēd
ka =š stad ēstēd u =š andar ā nē šāyēd
ast kē ēdōn gōwēd ay be ka =š pas andar ōftēd tā hamē šāyēd
āb radag šāyēd xrafstar tis =iz nē šāyēd
ēk pad ēw_čand x x ul stānēd ōh šāyēd ay ēk ul stānēd pad ēw_čand abāg baxšēd ōh šāyēd
ka stānēd x ud šab pad =iš andar āyēd ā nē šāyēd
ast kē ēdōn gōwēd ay hād tā gandag be bawēd x x hamē šāyēd
pad šab ka stad ēstēd be rēzēd
ka =š andar_ō kār kunēd abāz stānišn
ka nē ā nē stānišn
yazišn ān ī ō puhl šawēd ēd =iz ǰuttar nēst
dādweh guft hād ka yazišn ān ī ō puhl šawēd ka nē stad ēstēd ēd =iz ōh stānišn
kē stad ud be rēxt hē ā hamē abāz stānišn
pad šab ka barsom ēw tāg ayāb dō tāg andar abāyēd adastwarīhā čīdan
ka pādyāb az čāh stānēd tā āb andar hēzag ōh stad ēstēd hanǰēd u =š abestāg nē gōwišn
pas pad kuxšnīša purr be kunišn
hēzag ēdōn bawēd čiyōn war
war ka purr az kāh be ēstēd ā šāyēd
ka apādyābīh andar paymānag ka apādyābīh be šawēd ā šāyēd ka hēzag be barēd ā šāyēd
āb ī nāydāg šāyēd ān kē bun ī xān gandag
abarg guft ay nē šāyēd
weh_šābuhr guft ay šāyēd
ān kē wēš taxl sōr be pad pih poxtan ud parāhōm kirdan tā pad hamāg kār šāyēd ka =š wars andar hilēd
ka =š guft ēstēd mizag nē wašt ēstēd ā šāyēd
ka mizag wašt ēstēd ēd nē šāyēd
weh_šābuhr guft ay ān šāyēd
az pādyābagīh āmad ēstēd ān šāyēd
az apādyābagīh ānī =z ī anī xwad šāyēd tā apādyāb be bawēd ēn čiyōn zamān =ēw tis =ēw pad hixr abar mad warōmand
ēn kū =š āb andar be pādyāb bawēd ayāb nē ā =m nē rōšnag be pad čāštag ī mardbūd ī dādǰuwān čē mardbūd ī dādǰuwān guft āb be ka hixrōmand ayāb gandag tā ka be raft ā pāk
dast ka abēr pāk ēd =iz andar ā ǰōy nē šōyišn
az kū be rapihwin =iz gāh rad_franāmišnīh frāz rasēd kū yazišn ī rapihwin pad čē hangām kunišn
az rapihwin pad mayān ī uzayar be sazēd
rapihwin andar sāl =ēw dō bār ōh yazišn ēk ān kē andar āyēd ud ēk ān kē be šawēd
ān ī ō puhl šawēd ka andar āyēd tā ka be šawēd
hamē ka yazēd ā šāyēd
ohrmazd rōz yazišn
ka ohrmazd rōz nē šāyēd yaštan wahman rōz weh nēst kū ardwahišt rōz
ast kē ēdōn gōwēd ay kū šahrewar rōz weh
barsom pad hāwan bandišn u =š parāhōm pad hāwan kunišn ka pad rapihwin kunēd ā šāyēd
ast kē ēdōn gōwēd ay hād xwad pad rapihwin kunišn
šnūman aṣ̌ahe vahištahe āϑrasča ahurahe_mazdā̊ ardā_fraward
ast kē ēdōn gōwēd aṣ̌ahe_vahištahe_āϑrasča_ahurahe_mazdā̊_puϑra
gōwēd rapihwin yašt =ēw gōwizār be kunišn
ēn kū tis čand hilēd ā šāyēd
x wehšābuhr guft ay hād čašm_frāz šawēd u =š yašt bun abāz kirdan
u =š drōn =ēw pad sar pad barsom ī haft_tāg šāyēd haft_tāg ud aybyāhan ī gaštag ud drōn ēk
panǰ_tāg ud aybyāhan ī nē_gaštag ā šāyēd
drōn ī dah zōtān yazišn
andar ān gāh yazišn
ka ān gāh yaštan nē šāyēd yaštan ā =š pas nē yazišn
harw kē x ān gāh ī rapihwin pad zōtīh yašt ēstēd ayāb abāg ōy x yašt ēstēd az ān drōn wāz gīrēd ud xwarišn xwarēd ā šāyēd
ān kē nē yašt ēstēd ā nē šāyēd
ast kē ēdōn gōwēd hād barsom =iz andar ān gāh čīnēd ud bandēd pad abārīg gāh x x ka yašt ēstēd ā nē šāyēd
wehšābuhr guft pad xānag ī amāh zanān =iz ka rapihwin nē yašt ēstēd andar ān hangām xwarišn kem xwarišn
az kū be uzaiieirin_gāh rad_franāmišnīh frāz rasēd kū yazišn ī uzaiieirin pad čē hangām kunišn
az mayān ī uzayrin pad hūfrāšmōdād be sazēd
pad hamīn ēdōn
pad zamestān agar pēš az hūfrāšmōdād ahunawar frāz srāyēd
sōšyans ān ī pad š́iiaōϑananąm sar guft ay ān ī pad hōmāst kū zōhr be barēd
spandmayt =iz šaš wezest srāyēd
pad frayar kū frayar sar be kunišn
anāstarīd pas kū awināh kē awēšān anī ēw srāyēd x ō mayānag ī šab tā =z rōz ǰuttar nēst
hād pad wāzag =ēw zand ǰud_dādestān būd hēnd hād tā pad dādestān hamdādestān būd kū zōhr bē pad gāh ī xwēš xwardan nē šāyēd
pad ān čahār yaϑā_ahū_vairiiō čiyōn ka parāhōm xwarēnd ā =š be xwarišn
u =š pas čand weh šāyēd ōh rāyēnišn u =š ān se hād pad ēwar andar kirdan andar kunišn
ast kē harw yašt =ēw gōwēd
ka =š andar kunēd tis =ēw az ān rasēd rāyēnīdan nē šāyēd
ay ā =š šab =ēw pad =iš andar āyēd harw gyāg =ēw kū mad ēstēd ā =š barsom hōy dašn be paydāgēnišn u =š datuš be pēmēnišn
u =š be ē frayar ēstēd
ka pad wāzag =ēw šāyēd guftan ā =š zōhr hamē andar_ō āb rēzišn u =š frayar sar be kunišn
abāz āyišn u =š ātaxš be abrōzišn u =š be ō gāh ī zōtān ōh šawišn u =š datuš abāz be abrāzišn abāz ō abestāg ēstišn u =š yašt ī pad ātaxš sar be kunišn
u =š ǰīw bahr ī barsom abāg hilišn u =š rōz ī did nē pad zōhr_menišnīh be im āb dahišn
pad dah_hōmāst ud dwāzdah_hōmāst ēdōn frāz ēstišn kū =š zōhr hamāg andar šab šawēd
ka ēk_ēk dušāgāhtar mad ēstēd u =š ēk_ēk andar rōz frōd kirdan
ka pad kardag mad ēstēd u_šan ān be dādan u =šān pas ān ī abārīg ōh yaštan
zōhr ka be gumēzēd be gumēzišn ud be baxšišn
barsom ka zōhr be gumēzēd ā =m nē rōšnag
ast kē ēdōn gōwēd ay hād harw dō_ēn tā =š pad harw dō sar be kunišn
ka zōhr swsynyt pad at̰_tā_vaxšiiā be rēzēd
agar =iš ān tā waxšyā nē pad abestāg be rēzēd
u =š abārīg ōh rāyēnišn u =š bahr ī ābān abāz hilišn
zōhr ka az dō ēk =ēw šāyēd dādan ān ī ō āb dahišn
yazišn ka az dō ēk =ēw sar šāyēd kirdan ān ō ātaxš kunišn
ast ēn kū pad ēk_hōmāst tā pad dō_hōmāst ud dwāzdah_hōmāst harw dō šāyēd kirdan
pad dah_hōmāst ud dwāzdah_hōmāst ka ēk frayar šāyēd guftan pad ān frayar zōhr hamāg andar āb rēzišn ud abārīg ōh rāyēnišn
bahr ī abārīg hilišn
pad dah_hōmāst ud dwāzdah_hōmāst harw frayar =ēw āb_yasn se bār pādixšāy guftan
ast kē harw nask =ēw gōwēd
az kū be ēbrūsrim_gāh rad_franāmišnīh frāz rasēd kū yazišn ī aybisrūsrim pad čē hangām kunišn
az hūfrāšmōdād pad mayānag ī šab be sazēd
ēdōn pad hāmīn ēdōn pad zamestān
hād ay ka star =ēw paydāg gāh griftan ka ēk =iz nē paydāg ān ī pēš griftan
ast kē pad griftan ī ēw gōwēd ay pad šab ka yazišn ēw_tāg kird u =š rōz pad =iš abāz bawēd
pad čāštag ātaxš_gāh harw dō x ōh šōyēnd
pad kardag ān ī wahrān ōh šōyēnd ān ī kadagīg nē šōyēnd
ka yazišn ēw_tāg kunēd pēš_rōz ud šab bawēd ātaxš pad nigerišn sar frāz kunēd dēw_ēzagīh ī tanāpuhragān
ēn kū yazišn sar be kunišn ayāb nē ā =m nē rōšnag
hād agar dēw ān anāgīh pad ātaxš kunēd pad =iz barsom ōh kunēd ā =š nē kunišn nē =š ōh kunišn
ast kē ēdōn gōwēd ay ōh kunēd u =š pas =iz sar be kunišn aēδa_aiβiiāstačit̰_paiti_apa ϑrəstəməmčit̰_ptārənta
ka ān frāz kunēd ēk ī did ul abrōzēd ā šāyēd
ka be ō ēk kunēd ud ēk ī did barēd ā šāyēd
sōšyans guft hād ka be ō stōr =ēw mēš barēd ā šāyēd
awēšān kē pad dādīhā āyōzišnīh be rawēnd kū pad xwēškārīh be šawēnd
kār_warzišn warzēnd kār ī abārīg xrad ī ahlawān abar ēw ōšmārēnd kū hērbedestān ī pad dād ud zand ēw kunēnd
adādīhā sūrōmand kū =šān nān ast u =šān gōšt nēst
ān ī dādīhā sūr xwāhišn rāy ēdōn bē xuftēnd kū_tā =mān bawēd
frāz ōšmurd xuft awēšān kū =šān gāhān_bār yašt bawēd awōyrišt ō bun nēst
nē awēšān rad_franāmišnīh rāy gāhān_bār nē yaštan ā =š ān rad_franāmišnīh rāy gāhān_bār nē yaštan ā =šān rad_franāmišnīh brēhēnišn kū =šān pādifrāh nē garzišn
ka ēdōn frāz ōšmārēnd kū be yazēnd ēdōn =šān radīhā
u =šān hazaŋrəm_maēšinąm_daēnunąm_paiti puϑranąm_narąm_aṣ̌aōnąm_aṣ̌aiia_vaŋhuiia_urune_čiϑ u =š kirbag ōh bawēd
awēšān kē be rawēnd ō kilisyāgīh ud gēgistānīh ān =iz ī frēftārān hamdwārišnīh ud kambūrag ī rōspīgān gōwēnd pad hamāg šab čēgām =iz =ēw
dādīhā sūrōmand kū =šān nān ast u =šān gōšt ast
ān ī freh gōšt sūr abar_xwāhišnīh rāy ēdōn bē xuftēnd kū_tā =mān wēš bawād
frāz anōšmurd awēšān kū =šān gāhān_bār nē yašt bawēd u =šān awōyrišt ō bun
awēšān pad rad_franāmišnīh rāy gāhān_bār nē yaštan rāy u =šān rad_franāmišnīh brēhēnīd kū =šān pādifrāh ōh garzišn
mard kadār gōšt radīhā be ō gāhān_bār dahēd
awēšān xwēš tan mēnōy awēšān nārīgān ud pēšīgān awēšān pus ī aburnāyag windišn
ēd kē az ōy ī pad tanāpuhragānīh pad rānagīh grift margarzān
ōh ēwar dādwarān wizīr kird frēzbān dādan sar be brīnēd ud xwāstag be ō gāhān_bār dahēd ān =iš radīhā
ēd kē az awēšān dēw_ēsn abar_pad dōšāramīh nayēd dēw_ēsn =ēw kē dōšāramīh abāg nē dārēd sar be brīnēd xwāstag be ō gāhān_bār dahēd ān =iš radīhā
ēdōn kē abar arduš ī apatitīg grift
hād arduš =ēw ō bun būd ēstēd kū dādwar wizīr kird frēzbān dādan patitīgīh abāg
u =š yāt =ēw andar_ō bun būd ud yāt dādwar wizīr kird frēzbān dādan
u =š kār ēw bawēd kū pad patit bawēd
pādixšāy ka =š abāg nē dahēd
ēd kē andar ān ī pad war be …
ēd =iz kē =š pad adahišnīh ī frāz_dādestān frāz appārēnīd
pad ēd azišmānd
ēd kē nē paydāg kū druwandān ayāb ahlawān apēdag afrāz_srāyišn kē =š daxšag ī anērān pad =iš ān =iš radīhā
ēdōn kū abar barēd kū =š hamēmālīh be kunēd aradīhā pad hamē abāz
gōgušnasp guft ǰud az ān ī pad war nihuft hē
nē apēdag kē =š bahr andar nē būd ēstēd nē pāymāragān ka =š bahr andar nē bawēd radīhā
radīhā apēdag kē xwēš ka =š bahr andar būd ēstēd
radīhā ān ī xwēš mān payrēz kadāriz =ēw pad srēnag_masā ud bāzā_masāy
agar =iš awēšān ān ī xwēš dād ēstēd radīhā
… radīhā ēk
agar =iš ān ī ō xwarišn zast ēstēd radīhā
agar =iš nē ō xwarišn zast ēstēd aradīhā
ēn az abestāg paydāg
ka gōwēd ay stōr =ēw ī =m ēk bār pad zīndag dahēnd be xwarēnd zīndag kār nēst
ka gōwēd ay ēk bār stor =ēw pad hamōg ī ahlaw_dād dahēnd tā be xwarēm xwardan kār nēst
ka gōwēd ay stōr ī =m ēk rōz dahēnd be xwarēnd ayāb be dahēnd kū andar anī rōz be xwarēd ayāb be dahēd wēš hamē abāz rasēd
ast kē ēdōn gōwēd ay ka dahēd tā hamē abāz rasēd
nē pah wēmār kē pad waštag nē ān ī rēšīd kē rēš hambun =iz nē ān ī nizār kē pih ud vazdang nēst radīhā
awēmār ud arēšīd ud anizār abar_hurust_hannām kū =š barišn hamāg hurust ēstēd radīhā
hād ka =š rēš =ēw apaymān ī pahlūg nēst frabīh be zōhr ī ātaxšān tā pad hamāg kār šāyēd
ka rēš =ēw ō pahlūg ēdōn nizār ud be adwadād rāy nē pādixšāy kuštan
nizārīh paymān =ēw ka nē kuštan grāyīdan u =š pih ī rōdīgān brīdan
be pad margīh ud rixtagīh tā =š nē pādixšāy kušt
pad yazadān kušišn ā =šān ēk zōt gumānīg nēst pad zōhr ī ātaxšān nē šāyēd
ka ēk pad dō ayāb dō pad ēk nar pad mādag ayāb mādag pad nar …
ast kē … astuxān =ēw frārāst … kū pad zōhr ī ātaxšān nē šāyēd
ēn kū zōt gumānīg kunēnd ayāb nē ā =m nē rōšnag
ka ast ēstēd tis az ān rasēd kuštan nē šāyēd ud az ān frāz abestāg abāz hilišn
zōt gumānīg nēst
ka =š rēš hambun =iz ā nē šāyēd
ka =š barsom nē hurust ēstēd ā nē šāyēd
suy ud tišn ā nē šāyēd
aranǰagīhā šāyēd
ka karr ā nē šāyēd
ka kōr ā nē šāyēd
ka gung ā nē šāyēd
rōšn guft ay ka čašm ō hōy kōr ā nē šāyēd
griftan ī gōšudāg bun
radīhā pēm ān =iz ī pīxt ān ī apoxt ān az ān ī frabīh gōspand ud ān az ān ī nizār
radīhā pid ān ī pōxt nē ān ī apoxt ān ī az ān ī frabīh gōspand nē az ān ī nizār
ēd kū nē kušišn tā ka kušt ān =iz šāyēd
radīhā gyānwar ān ī poxt pah nē ān ī apoxt ān kē az ān ī frabīh gōspand nē az ān ī nizār
hād ēn pēm pad gōšudāg šāyēd
u =š ēd andar nē abāyēd kū gāw ī paydāg čē gōn_wašt ēstēd ā šāyēd
barsom ud gōšt ī poxt šāyēd
ka =š hambun =iz poxtagīh ayāb brištagīh pad =iš paydāg šāyēd
namak_sūd šāyēd xām nē šāyēd
ast kē ēdōn gōwēd ay xāmizag šāyēd
sōšyans guft hād xāmizag nē šāyēd
nē xwarišn čē mardōm xāmtar bawēnd
gōgušnasp guft ay ōh xwarišn čē mard mardāzogtar bawēd
xāyag harw dō ast pēmīh ud gōštīh az ān gyāg paydāg paēnaēniiāčit̰_zaōϑraiia
abarg guft ay pad gāhān_bār gōšudāg ī gāw weh
ān ī wēš_gōštīh ud kem_gyānīh rāy
abārīg harw =iz sardag meh ān ī weh
ast kē ēdōn gōwēd ay hād pad =iz ī gāhān_bār ān weh kē sardag meh
mēdyōmāh guft meh kū xar ud xūg ud mādag ī kadagīg_nē hōrw_pās rāy
čē sardag rāy ma_agar wattar_nē šāyēd
hād kū anumē =ēw xar ud xūg ud mādag ī kadagīg meh kū gāw ī kōfīg
anī bawēd ka harw dō_ēn sardag rāst tā ka ōy sardag ī meh ān ī weh
gōšudāg pad hamčašmīh ī ān ī weh xūbtar ka =š ātaxš ī az =iš zōhr xward ēstēd pad nišastīh ī ān ī xwēš
ka gōšudāg yazēd ǰud az gōšudāg harw tišt =ēw pādixšāy xwarēd
abārīg harw =iz ī yazēd ān āb hād ǰud_may ǰud_dādestān būd hēnd
stōr be pad yašt tā pādixšāy kuštan
anumē =ēw ka yašt sāxt ēstēd pad drōn nē pādixšāy kuštan
ast kē ēdōn gōwēd ay ka =z yašt nē sāxt ēstēd pad drōn nē pādixšāy
amāh ēn kū pādixšāy kuštan az ēn gyāg paydāgēnēm yo_pasūm_auua_vīnaōiti_pasča_hū_frāšmō dāitīm_asaōčaṇtat̰_paiti_āϑrāt̰
xar ud xūg ud mādag ī kadagīg ka =z yašt sāxt ēstēd pad drōn pādixšāy
kōfīg tā dast_hammōz bawēd pad tigr ud kamān
ka dast_hammōz bawēd ēdōn bawēd čiyōn kadagīg
xrōs be asāxtārīh ayāb darmān burdan rāy tā nē pādixšāy kuštan
ka dastwarīhā kušt u =š pad yašt kušišn
u =š bōdyōzedīh bawēd čiyōn anumē
ast kē ēdōn gōwēd ay hād murw ī meh pas guft bawēd kū ēdōn bawēd čiyōn stōr abārīg harw čē tan ō paymānag rasē yaϑa_vā_azō_sčaēniš_yaϑa_huš_parəsō pad yazišn ī yazadān kunišn
u =š hōm drōn ōh yazišn be māhīg čē māhīg pad yazišn kušišn u =š hōm drōn nē yazišn
murw ud wahīg pad ēw_kardagīh ul yazēd u =š šnūman ī hōm be gīrišn
ka ustōfrīd =ēw hōm yazad be padīrēd drōn dō padīrift bawēd hād ēd rāy čē gōspand pad ēw_kardagīh ul yazēd u =š hōm drōn nē yašt bawēd
hōm drōn ēk pad dō ud dō pad ēk nē šāyēd
gōwēd ay ka hōm drōn ēk yazēd u =š šnūman =ēw abāg frāz gīrēd ud čāšnīg az hōm drōn kunēd ā šāyēd
grāyēd ka =š tis =ēw abāg frāz nihēd šnūman =ēw abāg frāz gīrēd ud čāšnīg az hōm drōn kunēd ēdōn bawēd čiyōn ka =š tis =ēw nē yašt būd ēstēd u =š čāšnīg az ān ī pēš kird hē
griftan sar
radīhā čarmēn pad urwēs_gāh pah wistarag pad paywāsag
ka abar frōd az frōdtar nēm
ēd pad mēš gōwēm kū =š sar ud pāy abāg nēst
ēd kū dušwārtar wirāstan ēd ān šāyēd
ān ī narmēn nē ān ī anarmēn az ān ī frabīh gōspand x nē az ān ī nizār
aštar ud srōšōčarnām az ān šāyēd kē ātaxš az =iš zōhr xward ēstēd
wars az ān šāyēd ī pad zōhr ī ātaxšān kušt ēstēd
paywāsag az ān šāyēd ī pad yazišn ī yazadān kušt ēstēd
wehšābuhr ay pāyag xwārtar guft
pas guft bawēd kū paywāsag ka =z rēš pad kār šud ēstēd ā šāyēd
wars az gāw šāyēd az asp šāyēd
az ān gyāg paydāg gə̄uš_vā_aspahe_vā_varəsahe ay šāyēd
pad bēš nē nērang ka kušt šōyišn u =š be nigerišn ka =š tis =ēw abar_aš u =š be kunišn ka be kušt ā be brīnišn ud be šōyišn
wars bastag šāyēd abrāstag šāyēd
ka fradom ōh bandēd pas šōyēd šāyēd ā šāyēd ka pazēd
ā =š pādyāb =ēw ul stānišn u =š war ī ātaxš ī wahrān andar kunišn ud be ayārdēnišn
tērag rōšn ǰudāg be kunišn u =š tā se aṣ̌əm_vohū harw bār =ēw pad tērag be hambāhēnēd u =š pad rōšn be šōyišn
pad kardag pad pādyāb ōh šōyišn u =š bār ī čahārom pad tērag frāz pahikōbišn
gyāg be nihišn be hilišn ud xwēd be hambāhišn
uš pas be šōyišn u =š andar ō kār kunišn ka ōh šust aṣ̌əm_vohū se frauuarānē_mazdaiiasnō_zaraϑuštriš_vīdaēuuō_ahura t̰kaēšō čē gāh dārēd ahurahe_mazdā̊_raēuuatō_xᵛarənaŋhatō_xšnaōϑra_yasn u =š wāz frāz gīrišn
u =š aṣ̌əm_vohū se be gōwišn u =š pad harw aṣ̌əm_vohū ēk_bār be šōyišn u =š harw bār =ēw pad dast ī ǰāmag ud pādyāb be šōyišn
pas šōyišn u =š andar_ō kār kunišn
tā ka andar_ō kār kunēd hamē ka apādyāb be bawēd ka abāz pazēd šāyēd
ka hazār bār be šust ā šāyēd
ast kē ēdōn gōwēd ay hād wars pazišn ēk bār ka apādyāb be bawēd
ka abāz āyād abāz šōyišn
ka =š be bēšīd abāz pazišn
ka be wizīhēd akār
ka ēw_tāg sōg abar rasēd ka be bēšīd be parāhōm griftan tā pad hamāg kār šāyēd
paywāsag pad harw čē wīrāst harwīn pad =iš šāyēd
ka pas abar rasēd ka pad šustan be šawēd ā šāyēd
ka nē brīnišn u =š abrēšmag =ēw abar be abganišn
abarg guft ay ka nē brīnišn ā šāyēd
ēd =iz ēdōn bawēd čiyōn dastag kafšgarīg ka =š hixr abar rasēd ka =z be pad šustan be šawēd ēd =iz ī be brīnišn u =š abrēšmag =ēw abar abganišn
gōgušnasp guft ay ka nē brīnēd ā šāyēd čē ēdōn bawēd čiyōn pad ayōxšust
ka =š mōy tāg abar ā nē šāyēd ka sōg šawēd ēstēd ā nē šāyēd
ka nam =ēw az bērōn andar āyēd apādyāb
ast kē ēdōn gōwēd ay ka mōy tāg ayāb dō tāg abar ā šāyēd
ka =š dānag ī pōst zahā wēš nē šawēd ēstēd ā šāyēd
ka nam =ēw az bērōn andar ō andar āyēd pad čāštag ī mardbūd ī dādǰuwān šāyed
radīhā nārīg kirb pad tarsāgāhīh nē pēm
hād =iz pēm =iz bawēd tā ka radīhā
sag nē kirb nē pēm
radīhā
abarg guft hād bun andar nē hilišn
radīhā gurg kirb ud pēm pad tarsāgāhīh abāg harwispīn dēw_ēsnān ud tanāpuhragān ka =šān ān ī abāg bun frōd wašt ēstēd kū =š sar ī dumb brīd ēstēd
pad kardag ān gyāg gyāg dārēnd
ka ēk az ham_gēhānīgān ham_rad_passāgān barsom frāz wistard u =š gōšt =iz abar barēd ǰīw
pas ka awēšān ī anī az andarg nēmag ī hāsr gōwišn =iz frāz gōwēd abestāg pad rāspīgīh ud kār_warzišn kār warzēnd kār ī abārīg
harwisp =iz abar ōšmārēnd aϑā_ratuš_aṣ̌āt̰čit̰_hačā_frā_aṣ̌auua_vīδuuā̊_mraō harwisp =išān radīhā
agar nē abar āšnawēnd ōy ī radīhā hēh kē barsom frāz wistarēd u =š gōšt =iz abar barēd ǰīw
ham_rad_passāg ka ēk yazišn kunēd ēk myazd ud ēk abārīg kār ī gāhān_bār kunēd ka =š yašt pad awināhīh nē kird ēstēd ā =š kirbag ī yazišn ōh bawēd
kirbag ī az ēn gāhān_bār tā anī gāhān_bār kunēd ēw_kardag be bawēd
harw ēk_ēk ōh bawēd
ast kē ēdōn gōwēd ay ka =z ēk xwēdōdah =ēw be kunēd ā =z harkēn ōh bawēd
gāhān_bār yaštan kirbag nē yaštan wināh
sāxtan kirbag nē sāxtan wināh
xwardan kirbag nē xwardan wināh
yaštan hazaŋrəm_maēšanąm kirbag nē yaštan awōyrišt =ēw
sāxtan hazaŋrəm_maēšanąm kirbag nē šāxtan awōyrišt
xwardan kirbag nē xwardan wināh
kirbag nē kird ēstēd anī =iz xwārtar nē bawēd
rad_passāg pyšk_sālārag wināh ud kirbag frēzbānīg pādixšāy kirdan
ān =iz ī frēzbānīg ud gerā xwārtar kirdan pādixšāy
pad hamdādestānīh kirdan pādixšāy
ast kē ēdōn gōwēd ay hād girāy xwārtar nē pādixšāy xwārtar girāy pad hamdādestānīh pādixšāy
andar deh ka čahār mard ī meh ī weh pašt =ēw nē pad wināh be kunēd harw kē andar ān deh nē pādixšāy be ka abar rasēnd yaēšąm_aŋhən_čaϑβārō_mazišta
harw kē az ān pašt zyān ā =š zyān wizārišn
az kū be myazdōmandān myazd gumēzēd kū čiyōn bawēd gōšt pādixšāy xwardan
ān ī šusr may ka be yazēd ka pad nērang ī srōš frāz nihēnd ayāb ō_ham gumēzēnd kū andar_ō ǰām kunēd
ayāb frāz hambarišn_rawišnīh ham_pursēnd
ay rasēnd kū ēk abāg did ōh yazēm
ayāb awēšān anī ōy ī anī dahišn pad gāhān_bār dahēnd
ēn az abestāg paydāg drōn ī srōš ka dwāzdah_hōmāst ī rahwōbirzad u =š drōn ī srōš abēr be yazišn zōtān be yazišn ka =z rāspīg yazēnd ā =z šāyēd
zōt may ānd_and xwarišn čiyōn ka ō parāhōm rasēd ā =šān gugārd
rāspīgān ān_and xwarišn kū =šān kār andar yazišn be pāyēd u =šān pad sar be gōwišn
āfrīn ēn_and tis rāy gōwišn drōn ī srōš nōg_nāwar rahwōbirzad mān ī wehān ud mān ī ātaxšān frawardīgān ud stōš
drōn ī srōš aṣ̌əm_vohū se frauuarānē čē gāh dārēd šnūman sraōšahe_aṣ̌iiehe_taxmahe_tanu mąϑrahe_darši draōš_āhūiriiehe_xšnaōϑra_yasnāiča tā frasastaiiaēča ā dōgānag kardag yō_paōiriiō_mazdā̊_dāmąn u =š āfrīnagān pad sar
nōg_nāwar aṣ̌əm_vohū se frauuarānē čē gāh hāuuanə̄e ud sāuuaŋhə̄e_raϑβąm šnūman ahurahe_mazdā̊_raēuuatō kardag ahurəm_mazdąm_aṣ̌auuanəm_aṣ̌ahe_ratūm_yazamaide_hu gaēϑəm tā at̰_zaiiene u =š āfrīnagān pad sar
raϑβō_bərəzatō aṣ̌əm_vohū se frauuarānē pad hadōxt haδaōxδāi pad wisperad hāuuanə̄e šnūman raϑβō_bərəzat̰ kardag dātāča_aēte_mazdaiiasna u =š āfrīnagān pad sar
pad mān ī wehān ud mān ī ātaxšān aṣ̌əm_vohū se frauuarānē čē gāh dārēd šnūman dahmaiiā̊_vaŋhuiiā̊_āfritōiš_uγrāi_dāmōiš_upamanāi yasnāiča_vahmāiča_xšnaōϑrāiča_frasastaiiaēča dōgānag kirdan az =iš tā̊_ahmi_nmāne u =š āfrīnagān pad sar
ān ī dah rōz pad frawardīgān ān ī panǰ rōz ī fradom aṣ̌əm_vohū se frauuarānē čē gāh dārēd šnūman ahurahe_mazdā̊ ud aṣ̌āunąm kardag yā̊_vīsāδa_āuuaiieiṇti u =š āfrīnāmi pad sar
ān ī panǰ rōz ī andar gāh ay aṣ̌əm_vohū se frauuarānē čē gāh dārēd xšnūmaine_ahurahe_mazdā̊_gāϑābiiō ud aṣ̌āunąm u =š kardag yā̊_vīsāδa u =š āfrīnagān pad sar
pad stōš aṣ̌əm_vohū se frauuarānē čē gāh dārēd u =š šnūman sraōšahe aṣ̌iiehe kardag yō_vananō u =š āfrīnagān pad sar nēst
hād ēd rāy čē xwadāy ud dehbed ān gyāg nē niwist ēstēnd
az kū be myazdōmandān myazd ēw gumēzēd kū čiyōn bawēd ka pad sagrīh pādixšāy hēnd xwardan
pid ī poxt pad kāmag_xwarišnīh pad sagrīh
ka abar_pad barsom ō_ham rasēnd kū pad drōn ī rahwōbirzad frāz nihēnd ēdōn pad rad_franāmišnīh pad gāhān_bār
ast kē ēdōn gōwēd ay hād ka x x abar barsom ō_ham rasēnd kū pad drōn ī srōš frāz nihēnd ēdōn pad rad_franāmišn pad bāzā ī drōn
ka yazēnd ayāb ō ham gumēzēnd
ayāb frāz hambarišn_rawišnīh ham ka pursēnd ay gōwēnd ay ēk pad did ōh yazēnd
ayāb aiβi ϑβarəs nē be nihēd ka mruiiāt̰ča yaštag kardag ayāb nē_šnāsag =ēw
ayāb awēšān anī ō ān pad dahišn dahēnd kū az ēn gund be ō ān gund dahēnd
ka dwāzdah_hōmāst ī rahwōbirzad yazēnd drōn =ēw pad sar be yazišn barsom ī haft tāg aybyānghan ī gaštag ud drōn yasn =ēw pad uzayrin šnūman ī rahwōbirzad u =š abar ul nihišn zōtān yazišn andar ān gāh yazišn tā ān gāh be šawēd ka yazēd ā šāyēd
harw kē =z dwāzdah_hōmāst ī rahwōbirzad pad zōtīh yašt ēstēd ayāb abāg ōy kū yašt ēstēd ka ān wāz gīrēd ud xwarišn xwarēd ā šāyēd
ka ustōfrīd =ēw rahwōbirzad =ēw be padīrēd ā =š dwāzdah_hōmāst =ēw ud drōn =ēw padīrift bawēd ēd rāy čē ēk_hōmāst nē pad čāštag =ēw
wisperad drōn pad sar nēst
ast kē ēdōn gōwēd ay hād ēk pad čāštag =ēw wisperad drōn pad sar
māhgušnasp guft hād wisperad ī ēk ud drōn =ēw padīrift bawēd
hād ēd čē wisperad im yazišn drōn ōh yazišn
ka =š andar ān gāh dwāzdah_hōmāst ī rahwōbirzad pad zōtīh yašt ēstēd ayāb abāg ōy ī yašt ēstēd ān drōn nē yašt ēstēd
pad harw se čāštag hamdādestān būd hēnd kū gōspand pad ēw_kardagīh pad bāzā ī drōn frāz nihēd ān drōn ka nē yazēd ā šāyēd
kē az awēšān myazdōmandān ham_rad_passāgān az awēšān myazd anāfrāh abēdastwarīh tis =ēw az gāhān_bār be barēd
nē duzz nē appar bawēd
pad =iz abar čāšnīg az =iš xwāhēnd ān tōzišn ēstēnēd sarag dah
anī kadāriz =ēw ox ī astōmand be barēd mard ī šahr ka āškārag apparag ka nihān duz
ham_rad_passāg ka =š tis ī gāhān_bār andar dārišn ǰud az dastwarīh ī rad_passāg_sālār pad abām pādixšāy stadan
ka =š stānīd bawēd ka duzz az =iš xwāhēd sarag bawēd ka apparag
ka dō mard ham_xwarišn hēnd ham_takōk ham =iz gōšt_dān ud ham čāštag_dān ham ān ī awēšān šusr zōhr ēw barēd ham pid ī poxt
hamxwarišn ǰud_takōk
ǰud awēšān ān ī šusr zōhr ēw barēd may ham pid ī poxt
ǰud_xwarišn hēnd ham_takōk
ham awēšān ān ī šusr zōhr ēw barēd may ǰud_pid ī poxt
ǰud_xwarišn hēnd ǰud_takōk ǰud_gōšt_dān ud čāštag_dān
ǰud awēšān ān ī šusr zōhr barēd may ǰud_pid ī poxt
abarg guft hād tuwāngar =ēw =z dahišn ud rāst xwarišn hauruuō_pasō_frašaōštrō_naēmō_pāpiϑβa_zaraϑuštrō
gōgušnasp guft hād rāst dahišn ud rāst xwarišn
mard čand az ēk pah zōhr be barād
čahār
gōnwad pāzbid astbid
ēdōn ka dō ēdōn ka se
az čahār gōspand ēk =ēw gōspand ēdōn ka frāy ēw passox gōwēnd kū az ēk čahār be barēd
čiyōn gōnwad be barād pad wēšistagīh
čand pad dō angušt ō_ham gīrād barəzištəm_barəzimanąm
pad bālist abar buland pad sar ī kōf
az dašn gōnwad abar gaštag az pēšag ī sidīgar
az bālist abar waγdan andarg mōy ī pēšag ī sar
ka =z was ūϑ
ka ēdōn ō_ham rasēd was gōnwad ud ūϑ
harwisp ō ātaxš abar ēw barēd gōnwad pad ān paymānag =ēw ī =m guft ud pih
tar ēsn ī haft_hād yazišn nē ān ī ātaxš frōd kunišn tōzāg kū be nē ōzanēd nē gōšt pad wināhišnīh kū =š bōdyōzedīh ī gōšt ō bun drūnēd
hād gušnān pad bun ī yašt gōspand be paydāgēnišn
abarg guft ay hād pad gāhān yat̰_franata ō bun
mēdyōmāh guft ay hād pad nigerišn
pad čāštag gušnān ālagān ī ātaxš ōh šōyišn
pad kardag ān ēk šāyēd
kē gōnwad frāz burd pad ān se yaϑā_ahū_vairiiō gōnwad ēdōn čiyōn abestāg gōwēd u =š be brīnišn pad š́iiaōϑananąm
pad fradom ān ī fradom pad dudīgar ān ī dudīgar ud pad sidīgar ān ī sidīgar
ka pad ān ī fradom nē brīnēd u =š pad ān ī dudīgar harw dō ōh brīnišn
ka pad ān ī dudīgar nē brīnēd u =š pad ān ī sidīgar harw se be brīnišn
ka pad ān ī sidīgar nē brīnēd u =š pad ān ī čahārom nē abestāg
ast kē ēdōn gōwēd ay abestāgīh ka =š pēš pas wēš nēst kū ān ī pad pargard ī haštom paydāg ā šāyēd
gōnwad az war be brīnišn pad barsom abāg ōh x brīnišn
ka be brīnišn ā =š bun be brīnišn u =š pādyāb andak =ēw abar frōd hilišn u =š be xūb hōšēnišn
pad esm se tāg pādyāb kunišn az kust ī dašn be nihišn ast kē ān ī hōy ēdōn gōwēd
be hilišn ud xūb be hōšēnišn
pad yā̊ŋhąmčā_kē_aētā̊sə_tē ātarə_zaōϑrā̊
ōy ī pēš ēstēd ān gōwišn kē ātaxš_gāh šōyēd frāz ō ātaxš barēd ka apādyāb be bawēd frāz barišn
ātaxš ī warahrām ǰuttar nēst
ka gōnwad barēd gōspand kuštan
ka gōnwad nē dād ud zōhr ōh dahēd ka nē brīnišn x nē kuštan ā nē kušišn
ka kušt ēn kū zōhr dahišn ayāb nē ā =m nē rōšnag
rōšn guft hād hamē ka nē brīnēd x nē kuštan
ka kušt zōhr ōh dahišn
ka gōnwad ast ast ka nēst ān ī pēš ka pad kār šud ēstēd ā šāyēd
ka ēk ast kē nē pad kār šud ēstēd ā nē šāyēd
ka ēk_ēk =iz nēst ka hamāg pad kār šud ēstēd ā nē šāyēd
pad pasuuāzaŋhəm_āstāiia gušn gōspand be abganišn
az kušt ī dašn gōspand abganišn az ān gyāg paydāg dašina_paiti_arəδaŋha
az kušt ī dašn ī zōt abganišn
kū abāz kunišn sar kūn ō zōt ud war ō ātaxš maγ kandan ud bālišn nihādan nē nērang be ka maγ nē kand bālišn rēš bawēd u =š ō bun
u =š pāy ī pēš harw dō pad war abāz nihišn x u =š ān ī pas abar dārēnišn
u =š aybyānghan =ēw gōnag pērāmōn andar dārišn u =š grih dō abar abganišn
ka =š dāštārīh =ēw tis =ēw andar abāyēd u =š nibardīg gyāg_gōnāg gyāg gōnāg pērāmōn andar dārēnišn u =š kūdēn pad čahār angust warzišn az ān gyāg paydāg čaϑβarəsatəm_gaōšəm_frāiiazamaide
pad ān se yaϑā_ahū_vairiiō se ud šaš ud nō pēš ud pas wēš ud kem ayāb … abarg guft se šāyēd ēk wehšābuhr guft hād šāyēd pēš ud pas wēš ud kem ā nē šāyēd
rōšn ēdōn uskārd kū pēš ud pas anī bawēd ka ān gyāg =ēw abāyēd xwandan ay xwānēd wēš ud kem šāzdah ayāb pad haštdah …
u =š xšaϑrəmčā ī sidīgar kārd andar dahišn kūdēn az dašn ud kārd az hōy
ka pad kūdēn nē pad kūdēn gāh rēš bawēd nē šāyēd mehgār bawēd ā šāyēd
ka bē xuftan rāy rēš bawēd ayāb mehgārīg bawēd ā nē šāyēd
ka pad kūdēn be mīrēd ā nē šāyēd
ka pad kūdēn stard be nē bawēd ā nē šāyēd
xwey kunēd ā nē šāyēd
ka wēn āwarišn barēd ā nē šāyēd
ka čašm stānēd ud nihēd ā nē šāyēd
ka tan pad ēw_kardagīh az gyāg be rawēd ā nē šāyēd nē šāyēd
ay andar kārd kūdēn =ēw ud pas az kārd kūdēn ǰuttar nēst
ast kē ēdōn gōwēd ay hād ka pas az kārd kūdēn ka hāwan kunēd
ast kē ēdōn gōwēd ay hād ka pas az kārd kūdēn ka ox gīrēd ā šāyēd
rēš ī sar x x ā =š ēdōn pādyāb be kunišn
ka barsom abar rasēd ā šāyēd
zōhr harw =iz pēš stad ēstēd ud āyēd pēš stānišn bāzā
ka az kust ī dašn apādyāb be bawēd az ān ī hōy weh nēst kū abārīg
ast kē ēdōn gōwēd harw =iz ī mazg ā šāyēd be sar pāy andarōn
pih ka az kust =ēw apādyāb be bawēd tanuk =ēw be tāšišn
bōr ka az kust =ēw apādyāb be bawēd hamāg apādyāb
ka gōšt apādyāb be astag pad pādyāb
ka astag apādyāb be bawēd mazg pad pādyāb
ǰagar pad ēw_kardagīh be nigerišn
ka =š kafčag abar ā šāyēd
ast kē ēdōn gōwēd ay hād ka rēm nē kird ēstēd ā šāyēd
suš pārag pārag be brīnišn ud be nigerišn
ka gōn wašt ēstēd ka =š az giyā wašt ēstēd ā šāyēd ka =š az wēmārīh wašt ēstēd ā nē šāyēd
andar warōmandīh andar_ō sag dahišn
u =š warr ī ātaxš ī warahrān andar kunišn u =š be anēraxt ayārdēnišn
ka gōn abāz āwarišn pad ēd dārišn kū =m az giyā ud āb rōšn
be ka ō pih ayābišn paywand ō pih tā nē šāyēd
tērag =iz nē šāyēd
hušk harw gyāg =ēw šāyēd
huškīh paymānag ēd ka be sāyēnd
ast kē ēdōn gōwēd ay ka miϑra_… be šāyēd griftan
garmōg =iz nē šāyēd be andar hamkārān ī wuzurg sōk
dandān nē wizāyišn
ka paydāg bawēd x andar nē šāyēd
pust ka =š surāg dēnār pahnā ast ā nē šāyēd u =š uruhbar ōh gīrišn
ka ōh pazēd pāk pazišn ay ēk pih ī pāzbid ud ēk bōr ī zōhrag u =š pas ēk abāz ō did gīrišn u =š bahr ī āsrōān andar kunišn u =š be pazišn
pih poxtan paymānag ēd ka ul grift ud frōd basūd
bōr poxtan paymānag ēd ka ast ī abāg ō sazišnīh wardēd
zōhrag poxtan paymānag ēd ka =š saxtīh passandišnīh
ēn kū zōhrag būdan čand ka nē poxt ēstēd ayāb wēš poxt ēstēd ayāb padišxwar namb ayāb āpādyābīh aw =iš rasēd
ka =š mōy =ēw ēw tāg az im gōspand andar ōftēd ā šāyēd
ka =š kāh =ēw ēw tāg andar ōftēd ā nē šāyēd
ka =š maxš =ēw andar ōftēd ka =š tis abāg frōd nē hilēd ā šāyēd
hād ka gōwēd ay tat̰_čiϑrəmča pad dāmān ī ahriman ōh bawēd
nazd ī ān nar nē šāyēd
dēg ī nazd ī pāk ka =š sazēd spyt pāk andar kunišn ā be ēstēnišn
ka dēg pāk kird be rawišn
ka dēg ul nēst be škennišn
wehšābuhr guft ay pāyag xwārtar hād ka =š nasā abar rasēd pad ān kār akār
zōhrag ī wizīdag šāyēd
tašt ī wizīdag šāyēd ay pad ādur farnbay wizīdag pad ādur gušnasp widāxtag
zōhr ka abēr was padišxwar pad panǰ wēš nē kunišn ϑrišūm_ā̊ŋhāt̰_uϑəm_sadaiiāt̰
pas ēdōn čiyōn āb ātaxš abar barišn
pad čāštag pāzbid hamāg be ham yazišn pad kardag ī sar mayān
pad čāštag astbid az kust =ēw hamē be handāzišn pad kardag sar pad mayān
pad čāštag yazišn bērōn kunēnd u =š abestāg ī pad ān ī meh gōwišn u =š ān ī keh pēš šnāyišn
pad kardag pad ān ī meh gōwēnd ud ān ī meh pēš šnāyēnd
ka ān ī meh nē šnāyēd ā =š zōhr nē dahišn
ka ān ī keh nē šnāyēd u =š yazišn xwad nēst
pad ādur farnbay ka yazišn bērōn kunēnd āϑrō_ahurahe_mazdā̊_puϑra_mat̰_vīspaēibiiō_ātərəbi darənahe_mazdaδātahe_aṣ̌a_xᵛāϑrahe
ka andar šawēd ā =š harw tis abāg andar barišn
pad kardag zōhr ī āb u =š ādur ēsn pad ān ī meh gōwišn
ka yazišn pad ān sar be kunēd u =š anī =z ma sōzišn
ast kē ēdōn gōwēd ay hād ēw_kardag =iz abar barišn
zōhrag ka ōh wehīh paydāg ō weh andar barišn
ka nē frabardār ka ēk pad ēd kār wāz frāz gīrēd ud be dahēd ud be šawēd ā šāyēd
pad yā̊ŋhąmča zōt se bār angust andar burzist abāz dārēnišn pad yazamaide padišxwār abar x burzist nihišn pad ahurəm_mazdąm abāg wardēnišn pad aməṣ̌ā_spəṇtā be āwarišn pad humatanąm andar āwarišn
pad ān zamān ka nēktom srīrəm_arəduməm ā pad xwardan ā pad tāftan ā pad dāštan hamāg čahār angust andar dārišn u =š ōh gardēnišn
tā ātaxš zōhr xwarēd zōhr ā sar astbid ā sar ēsn ēk kardag ī mayān ka be ātaxš zōhr xwarēd astbid ā sar ēsn kardag ī mayān ka astbid xward ēsn kardag ā sar
ka pēš az yeŋ́hē_hātąm frōd hišt astbid frabardār frāz barišn
ka nē hāwanān kē ka =š andar kird u =š be stānišn
ka pad yeŋ́hē_hātąm frōd hilēd ā =š pad humatanąm be dārišn
ka pad humatanąm be hilēd tā ān čahār yaϑā_ahū_vairiiō ud se aṣ̌əm_vohū ōh dārišn
wehšābuhr guft hād pad kardag ka =š frōd hilēd tā =š be xward ā =š az =iš be nē dāštan
ka frōd nē hišt ayāb be sōzēd ayāb be pazēd u =š pad gyāg be rēzišn u =š abestāg abar be gōwišn
ast kē ēdōn gōwēd ay ka pad dēg =iz ōy uzēnag kunēd ā šāyēd
rōšn guft ay ka abēdēg šāyēd
ka be rēxtēd pad ǰud_ātaxš barēd drust ēn čiyōn farnbay farnbay ī ohrmazd
ka be šawēd ā =š harw tis =ēw abāg be barišn be hōm drōn čē hōm drōn anī yazišn kē =š gōspand kušt
az bunīh ka frāz ēstēd ka az ēn čahār ēk =ēw ast … nēst frāz nē pādixšāy ēstādan
pad im gōspand ī kušt zōhr dādan dastwarīh
tā ātaxš zōhr xward zōhr az ān gōspand pad kār nē kunišn
ka kunēd nē xūb
ka šāyēd čāšnīg ī harw dō pad ēk bār kunišn az hōm_drōn pēš šāyēd
az bunīh ka frāz ēstēd ka az ēn čahār ēk =ēw ast ī nēst frāz nē pādixšāy ēstādan
pas ka ēk =ēw apādyāb be bawēd ā =š ōh rāyēnišn u =š abestāg abāg hilišn
ka az ēn se ēk kirdan ud xwardan bāzā ī drōn ud ōh yazišn
wehšābuhr guft hād pad kardag ka pih nē būd ā =šān bāzā ī drōn nē yaštan
griftan sar
mard čand ō āb ī frāz_tazāg ān ī šusr pēm abar barād
čand tašt ī zōhr_barān
ān ī tēr panīr
čand se abismag ī gumēzag_baxš
ān ī pid bōr
čiyōn čahār x aštīg_masā ud anī_zahā
mard čand āb ī armēšt šusr pēm abar barād
čand se abismag gumēzag_baxš
pad ul_gīrišnīh čand ān pid ul gīrēd bōr
pad frāz_dārišnīh ān ī tēr frāz ēw dārēd panīr
ka nāydāg āb ēdōn
nāydāg āb
awināh ān kē frabardār az nēmag_masā frāz barēd
ay sanǰag ī frāz_baxtag ī pōst griftan
ēn az abestāg paydāg
čāštag ī sidīgar dādestān ī tašt ī zōhr_barān az ēn gyāg paydāg
pādyāb ā tašt ī zōhr_barān az pargard ī wīstom paydāg
apādyāb ā tašt ēg =iš bawēd be bōr čē bōr pad nidomīh uspurrīg se ud pad wēšistīh se fraēšta_bązā
armēšt stadār ī tis ī andar tazāg stadār ī pad nēmag be bōr čē bōr pad nidomīh uspurrīg se ud pad wēšistīh šaš
ka nāydāg āb dādestān sanǰag ī frāz_baxtag ī pōst az ēn gyāg paydāg
pādyāb ā sanǰag frāz nihādan
pōst az pargard ī wīstom paydāg pad āgenēn se dōlag ī pōst bawēd
bōr se pad nidomīh uspurrīg ud se pad wēšistīh auuaēzō_pasūm_hąm puxδəm
ast kē ēdōn gōwēd ay hād ēn mādagwar ustōfrīd ī māhīgān
ka māhīgān hēnd āb pad nāydāgīh nē āmār
ǰīw pad pādyāb nē hambārīh pādyāb pad ǰīw nē hambārīh
ast kē ēdōn gōwēd ay kū ǰīw pad pādyāb ōh hambārišn
panīr baxšēn se abismag
abarg guft ay hād kū frušag pad pādyāb ul stānēd ā šāyēd
ka pad šīrag ī anǰīr frāz gīrēd ā šāyēd
az ēn hamāg pad xūb kird vīčiϑrəmčit̰ pad harw tis =ēw kār
tazāg stadār ī ān bawēd ī ka ōh āyēd dah ānd_and ast čand ān ī az zōhr_barān be rasēd
armēšt stadār ī ān bawēd ī ka ōh ēstēd dah ānd_and ast čand ān ī andar barān rawēd
ast kē ēdōn gōwēd ay tazāg stadār ān bawēd kē andar se gām be gugārēd armēšt stadār ān bawēd ka ōbast ō bun nē hilēd
āšixt asp pēm ud gāw ud mēš ud buz ǰīuu
az ēn_and šāyēd az abestāg paydāg
sōšyans guft ay hād ān =iz ī uštar šāyēd
abarg guft hād andar ēn ačār ān ī sōšyans nē šāyēd čē bast ēstēd
u =š az ēn gyāg paydāgēnēd tūiriia_paiiā̊_bauuāt̰_aspaiiaāt̰ča_xaraiiaāt̰ča
dādweh guft ay kōfīg ka ēmēd ēdōn čiyōn tag dawēd frāz šāyēd griftan ā šāyēd
ka ǰīw gīrēd ā =š be war ī gōspand šawišn u =š abestāg pad war ī gōspand gōwišn aṣ̌əm_vohū se frauuarānē čē gāh dārēd gə̄uš_tašne_gə̄uš_urune ka ēk tauua_gə̄uš_hudā̊ŋhō_urune ka dō yauuākəm_gə̄uš ka =š abēr ǰuttar nēst xšnaōϑra u =š wāz frāz gīrišn
u =š aṣ̌a sara_manaŋha be gōwišn u =š hamē gōspand be āyēd aṣ̌a sara_vačaŋha_aṣ̌a sara_š́iiaōϑana
ka abestāg wēš gōwēd ǰīw kem gīrēd ā nē šāyēd
ka kem gōwēd ud wēš gīrēd ā nē šāyēd
ka =š tanuk_ā_tanuk pad dōšišn andar ōftēd ā šāyēd
ka mōy tāg pad kanišn andar ōftēd ā šāyēd
ka =š rēš =ēw pad ōy pestān ka abāg dast be āyēd ā šāyēd
waštagīh ud padwēšag tis =iz nē šāyēd
ka gōn wašt ēstēd ka =š az giyā wašt ēstēd ud ka az ābustanīh wašt ēstēd ā nē šāyēd
ka pēš az yazišn frāz bawēd ā nē šāyēd
ka andar yazišn frāz bawēd ā šāyēd
awināh ān kē harw panǰ ō_ham pazēd ān ī myazd nē ān ī pih
pad ulīh ī āb padīrag ī āb pad rawišn gām
andarg šaš saxwan frāz barēd
kem az šaš saxwan
čiyōn ka nē awēšān nihānīh rēšēnd kū pad māhīgān rēš nē bawēd
čē anī pad ān ī awēšān bōdyōzedīh āstārēd
hād paydāg bawēd kū anaz wināh =ēw ast
bōr kōstan gāh =ēw nē paydāg pad kardag pad srōš_yasn kōbēnd
ēw_čand xwārtar šāyēd be kōbišn kū pad kār abāyēd
kōst ēstēd ka pad ān paymānag ī az abestāg ēstēd ā šāyēd
u =š pad yeŋ́hē_mē_aṣ̌āt̰_hačā_vahištəm harw dō bār zōhr barišn pad yesnē zōhrag andak =ēw andar hāwan kunišn ud paitī bōr
x hamāg abāz ō zōhrag kunišn be ān ī ēwtom kē āb abāxtar rōn āyēd tā hamē abāz rēzišn
ast kē ēdōn gōwēd ay padīragīh ī ōy dawišn
tā xwaršēd andak =ēw ul āyēd barsom ō xwaršēd rōn kunišn
ēdōn kē frabardār zōhr frāz ēw barēd
ēdōn hāwanān hōm ēw hunēd
ka ēdōn āgāh hād kū ēdar ān ī man zōhr rawēnd andar rōšnīh nē andar tārīgīh
ka ēdōn āgāh hēnd sūdōmand ī mardōm
ast kē sūdōmand ī dād gōwēd čiyōn ān ī ō āb tarsāgāhīh ast
čē harwispīn bē_rēxtagān be pēš ǰādūgān ud dēw_paristān lēsēnd abar_pad nihuftag ud tārīg pad asrāyišnīh abar ahunawar ka yaϑā_ahū_vairiiō x nē gōwēd
ēn az abestāg paydāg andar yazišn ā anī bawēd ka ātaxš ōh tom pas guft bawēd kū zōt abestāg nē … tā rāyēnīd ud harw čē rawēd ud harw gyāg kū rēzēd dēw_ēzagīh se srōšōčarnām pad abestāg wizārd kē abestāg … tā nē rāyēnīd u =š pad ān ham wizārēd
ān ī parāhōm zōhrag =iz ǰuttar nēst
anī bawēd ka pad nigerišn andarōn ī ātaxš ud barsom be ō zamīg rēzēd
dēw_ēzagīh ī tanāpuhragān u =š wināh bawēd
be xandišn harw čiyōn rēzēd ud harw gyāg kū rēzēd dēw_ēzagīh se srōšōčarnām
u =š abestāg aṣ̌əmča_pasča_hū_frāšmō dāitīm čē az abestāg yaϑā_ahū_vairiiō
ān gyāg kū aṣ̌əmča abāyēd guftan yaϑā_ahū_vairiiō
gōwēd ā šāyēd
sōšyans guft ay be az yazišn ī pad āb nē bawēd
farrox guft ay wanand namāz ān gyāg hamē ka gōwēd x ā šāyēd
ka abar ō āb barēd nē ō barsom
pēmišn pad āb be kunēd ān ī pad barsom nē kunēd
agar barsom az andarōn nēmag ēš_drahnā ǰaw_pahnā
ul ō barsom =iz ēw barēd kū pēmišnīh ī pad barsom =iz ēw kunēd
agar nē abar barēd se zanišn ayāb rōz_drahnā wāstaryōš ud yazišn xūb
ka abar ō barsom barēd nē abar āb
pēmišn ī pad barsom kunēd ān ī pad āb nē kunēd
agar āb az andar_nēmag ī barsom pad se gām ī barsom
abar =iz āb be barēd
pēmišn ī pad āb ēw kunēd
agar nē abar barēd se zanišn ayāb rōz_drahnā wāstaryōšīh ud yazišn xūb
hād ēn gyāg az ān barsom andar se gām ī āb šāyēd burdan u =š be ō aγrītarīh ī āb nē šāyēd burdan
u =š abestāg pad barsom be gōwišn u =š be šawišn u =š pēmišn pad āb be kunišn u =š abāz āyišn u =š ān ī pad barsom be kunišn
abar āb ud abārīg abar barsom
pad rātōiš zōhrag andak =ēw andar_ō āb rēzišn zōhrag čahār angust az āb ul dārišn barsom čahār angušt az zōhr ul dārišn az ān gyāg paydāg auuauuat̰_taδa_yaϑa_čaϑβarō_ərəzuuō pad hamāg abestāg
pad srunuiiā̊ andar rēzišn be pad dah_hōmāst abar ān ī pad vīspaiia_…_āfrīnāmi andar rēzišn zōhrag čahār angust az āb ul dārišn čiyōn guft
ka barsom ēš_drahnā ǰaw_pahnā kadāmiz =ēw pad ān abar_barišnīh radīhā
ka barsom meh az ān barsom
čiyōn ōy pad frāz_wistarišnīh frāz ēw wistarēd ēdōn ōh abar ē barēd
pad zamestān ka āb be ō barsom barēd ayāb pad hāmīn ka barsom be ō āb barēd
ka zōt ohrmazd yazēd kū ēn abestāg gōwēd ay kū ahurəm_mazdąm pad mayānag ī barsom abar ēw barēd
ka amahraspandān yazēd pad ān ī meh ud weh nām frāztom pad barsom abar ēw barēd pad sar ī barsom
ka āb ēdōn yazēd ō hōytom ī barsom abar ēw barēd pad war ī zōhrag
ka ahlawān ruwān frawahr yazād ō dašntom pad barsom abar ēw barēd pad war ī zōhrag
ud pad harwispīn yazišn_kirdārīh pad yeŋ́hē_hātąm pad mayānag ī barsom abar ēw barēd pad war ī zōhrag
kār =ēw nē dānēm narąmča abar hāwan nairīnąmča ay abar_hāwan yaēšąm_vahehiš andar rāh daēnā̊ abar zamīg vanaiṇti_vā abar ϑraxti abar ātaxš_vaŋhən abar tašt ī waras vaōnarə abar dast ī zōt u =š pas ō war ī zōhrag barišn u =š tā_ō xšaϑrəmčā ī sidīgar pad war ī zōhrag dārišn u =š tā_ō xšaϑrəmčā ī sidīgar x abāz ō barsom āwarišn u =š pas ō dast ī zōt dahišn tā_ō yāiš_azāϑā_mahmāi_x́iiātā_auuaŋᵛhē_mat̰_vā̊_padāiš ǰasāi šaš gōwišn u =š gām az kust ī hōy pad sar ī barsom be āyišn
daxšmēst ān barsom ka pad ān ī āb frāz šawēš
hamē ka andar daxšmēst harw ēn dō yazāi_āpəm ōh gōwēd ay daxšmēst harw ēn dō yazāi_āpəm andar daxšmēst guftan
pad wiškar pad ǰud_kadag tauua_āϑrō
ast kē ēdōn gōwēd ay hād pad ǰud_kardag tauua_āϑrō_ahurahe nē gōwišn
dādweh guft ay hād ēn =iz =iš ay kār
ka =š zōhrag stānēd abestāg andar daxšmēst gōwēd ay ā šāyēd
u =š yasnəmča_vahməmča x xwad andar daxšmēst gōwēd ay mādagwar ēn ay ka gumbad =ēw wēnēd u =š nəmasə tē_ātarš_mazdā̊_ahurahe_huδā̊_mazišta_yazata ōh gōwišn andar im xānag
daxšmēst kār nēst abar ka abēr was
hamē tauua_āϑrō_ahurahe_mazdā̊ ka andar ōh āyēnd ud ōh šawēnd
hād abarg pušt ō ātaxš nē kirdan u =š tauua_āϑrō_ahurahe_mazdā̊ ōh kirdan
pad xānag ī šāhīgān ōh āyēnd ud ōh šawēnd tauua_āϑrō_ahurahe ōh kunēnd pad ādur_burzēn_mihr
andar xānag =ēw drōn =ēw yazēd ātaxš ān gyāg be az ēn se ēk kunēd nē šāyēd ayāb frāz kunēd ayāb ul abrōzēd ayāb be barēd
ast kē ēdōn gōwēd ay hād ka be barēd ayāb ul abrōzēd tā nē šāyēd
ka andar xānag =ēw drōn =ēw yazēd u =š dar ēk dar ī ēwtom ka =š ō abāxtar rōn tā =š barsom sar ō dar rōn kunišn
ka =š ātaxš ān gyāg barsom nē āmār čē =š ō ātaxš rōn kunišn
sōšyans guft hād ō abāxtar rōn nē kunišn
ka =š dar čahār ast kē ēdōn gōwēd ay hād čiyōn wiškar čē pad wiškar az frayar tā_ō ēbarag ō rapihwintar az ēbārag tā_ō nēmag šab ō dōšastar az nēmag šab tā_ō frayar ōšastar nēmag
čirāγ harw tis =ēw ēdōn bawēd čiyōn ātaxš be tauua_āϑrō
ast kē ēdōn gōwēd ay hād ka rōšnīh wēš nēst kū ān ī čirāγ drōn nē yazišn
rāspīgān abestāg ēdōn gōwišn čiyōn zōt pad aṣ̌aiia_daδąmi guft ēstēd
ast kē ēdōn gōwēd ay xwad pad ātaxš ēstēd ā =šān tauua_āϑrō ōh gōwišn
barsom az ātaxš ō ātaxš ud az ātaxš ō bērōn ud az bērōn ō ātaxš hamāg šāyēd be az ātaxš ō bērōn čē ān nē šāyēd
pad ātaxš =ēw yašt =ēw ud drōn =ēw pādixšāy
ka yašt nē kunēd drōn ēw_čand pādixšāy
ast kē ēdōn gōwēd ay yašt =ēw drōn =ēw čand pādixšāy
ka yašt dō kunēd dēwzagīh =ēw
ka be ka awēšān pas az ān frabardār awēšān zōhrag ēw stanēd pārag
awēšān kē ōy nē kē ō āb ī weh frāz barišn hēnd nē čāh
frāz ō awēšān zōhr ēw barēd pārag
zōt gōšt padīrag ī āb ī yašt ēstēd fradom ēw xwarēd
ka =š guft hād zōt pas ēn gōwišn
amahraspandān hēd dēn ī mazdēsnān pad gōwišn ud xwānišn
weh nar ud weh mādag ud zōhr kū nar ašmāh weh hēd ud mādag ašmāh weh hēd ud mayēn zōhr ān ī ašmāh weh
ka andar awēšān mazdēsnān mazdēsnīh gōwēd
ay gōwēd kū mard =ēw weh mard hēm
pad ahlāyīh bahr zīwād
kū bahr ud dāsar ī wehān xwarēd
kē pad ǰādūgīh gēhān ī ahlāyīh murnǰēnēd kū ǰādūg hād
abar ašmāh ōy nigēzēd kū =š paydāgēnēd kē abar āb kē abar urwar kē abar zōhr hād
kē abar az awēšān mazdēsnān bumāyān ī abar_guftārān ēn gōwišn nē padīrēd pad frāz_gōwišnīh kū aməṣ̌a_spəṇta nē gōwēd x
pad ǰādūg_hambūsišnīh rasād kū =š daxšag ī tāštīg pad =iš kunēd
ast kē ēdōn gōwēd ay rasād pad nifrīn kirdan
ēn az abestāg paydāg bāzā ī drōn
aϑa_ǰamiiāt̰_yaϑa_āfrīnāmi
rasād ud bawād ēn āfrīn
ēn az abestāg paydāg pādyābīh ul stānišn ud az kust ī hōy be nihišn
ka ardā_fraward pad yašt drōn =ēw sāzišnīh ay ka ardā_fraward pad rāyēnišn drōn se sāzišn se frasast ēk may se ābgīr se esm_bōy se tāg az kust ī dašn be nihišn
pad drōn ī ābān ān gōšudāg ān šaš pārag ān ī ardā_fraward čarb ī rōdīg ān ī rahwōbirzad sar
pad ān ī ātaxšān dil weh nēst kū abārīg
ast kē ēdōn gōwēd ay hād wehān nihumbīd pādyāb abar_ō frasast nihišn
pad frasasti_ahurahe_mazdā̊_ahunahe_vairiiehe_aršuxδah frasast be drōn ī ohrmazd barišn drōn harw čē šnūman az pēš ud nazd tā_ō barsom xᵛarəϑəm_miiazdəm_hauruuata_amərətāta_gāuš_hudā̊_ā xšnūmaine_aiβiiō_vaŋhūbiiō_vīspanąmča_apąm_mazdaδā bərəzatō_ahurahe_nafəδrō_apąm_apasča_mazdaδātaiiā̊ tā aōxtō dō bār
xšnūmaine_raϑβō bərəzatō tā aōxtō dō bār xšnūmaine_ahurahe_mazdā̊_raēuuatō_xᵛarənaŋhatō_amə tā aōxtō nāmanō_yazatahe dō bār
u =š ohrmazd šnūman yašt kunišn be ka =š šnūman ī srōš ayāb rahwōbirzad ā =š abāg aṣ̌āunąm kunišn ka šnūman ī ohrmazd amahraspand abāg kunišn u =š kardag harw dō ōh gōwišn iϑa ud imąm_āat̰_ząm
pad aṣ̌aiia nō_paiti ǰamiiāt̰_yehiiā_sauuā_išā̊ṇti_rādaŋhō hāwanān ul ō pāy ēstišn u =š xᵛarata_narō be gōwišn
pad yašt ī keh zōt aməṣ̌a_spəṇta be rāyēnišn u =š pārag xwarišn
pad ān ī meh srōšāwarz ul ō pāy ēstišn u =š xᵛarata_narō be gōwišn u =š abāz ō gāh ī frabardārān šawišn aṣ̌əm_vohū se ahurahe_mazdā̊_raēuuatō_…_xšaōϑra u =š wāz frāz gīrišn
zōt aməṣ̌a_spəṇta be rāyēnišn u =š pārag xwarišn
ka zōt pārag xward srōšāwarz dast ul ō barsom nihišn u =š aϑa_zī_mraōt̰ be gōwišn tā frauuaōčat̰_ahurō_mazdā̊_spitamāi_zaraϑuštrāi aṣ̌əm_vohū ēk =ēw guftan u =š dast az barsom ul dārišn
ka =š abāg zōt abestāg rāst rāyēnīd ēstēd ā =š aməṣ̌a_spəṇta be rāyēnišn u =š aṣ̌əm_vohū se be gōwišn u =š pārag xwarišn
ast kē gāhān hamē gōwēd
ast kē gāh gōwēd
ay anī bawēd ka =š az bāzā ī drōn ēč wāzag nē hišt ēstēd tā ka pad bāzā ī drōn bun frāz gīrēd ud xwarišn xwarēd ā šāyēd
ka pārag zōt xward ī hāwanān dād hāwanān xward ī zōt dād zōt xward ī frabardār dād frabardār xward zōt dād …
ka wāz be gōwēd pad bāzā ī drōn wāz frāz gīrēd ud xwardan xwarēd ka yazišn sar be kunēd ā šāyēd
sar be nē kunēd ēn kū šāyēd ayāb nē ā =m nē rōšnag
pad čāštag ān ī pad panǰ pārag pādixšāy xwardan
ēn az abestāg paydāg pas az ān ka az bāzā ī drōn wāz be hišt bawēd čiyōn ka =š az srōš_drōn be hišt hē u =š bāzā ī drōn bun abāz kunišn u =š pad yā_āhūiriš_zaraϑuštriš abāz ēstišn u =šān ān wāzag =ēw be gōwišn u =š ōh rāyēnišn
pad yašt ī keh ka wāz be gōwēd āfrīnāmi_vīspaiiā̊_druuatō_stōiš aṣ̌əm_vohū se … aiβiiō_vaŋᵛhībiiō … ahurahe_mazdā̊_raēuuatō_xᵛarənaŋhatō_xšnaōϑra_yasn tā frasastaiiaēča u =š wāz frāz gīrišn yaϑā_ahū_vairiiō_zaōtā_frā mē_mrūtē_aϑā_ratuš_aṣ̌ātčit̰_hača_frā_aṣ̌auua_vīδu
pad ān ī meh ązasča_dužāϑrəmča_āfrīnāmi aṣ̌əm_vohū yaϑā_ahū_vairiiō yō_frabərətō_frā mē_mrūte zōt aṣ̌əm_vohū ēk =ēw rāspīg wāz gīrišn ahurəm_mazdąm tā āča_manō_mata_āča_yazamaide tā varəš́iiamnača yeŋ́hē_hātąm tā tā̊sčā_yazamaide
vaŋᵛhīm_iδāt̰_āδąm_vaŋᵛhīm_aṣ̌īm_āča abar āb niča andar wardēnišn mrūmaide purr be kunišn īžā̊ abāz gardēnišn yāōštaiiō čahār angušt az āb ul dārišn āpō abar āb at̰ andar rāh =ēw yazamaide pad war ī zōhrag abāz ōh rēzišn uiti_yā və̄_vaŋhə̄uš pad bun ī barsom apasča pad war ī zōhrag vā̊ āb abāz ō āb kunišn
harw kē abāg zōt kū pārag xward ēstēd pērāmōn ī barsom ōh gardēnišn harw pad kust ī dašn esm_bōy ī se_tāg frāz nihādag ō ātaxš ī sōzag barišn u =š ϑβąm_ātarəm ān gyāg be gōwišn
abarg be hammist šudan u =šān be nē hištan
ka ān čahār pārag apādyāb be bawēd ā =š pādyābān be yazišn
ka hixrōmand be bawēd ud gōšt az ān ham gōspand abāz šāyēd āwurdan abāz āwarišn
ka nē paydāg be yazišn nē pad panīr
ēd =iz yazišn be bawēd ān pārag rōz ī did pad drōn ī ābān be yazišn
se_gānag drōn se_gānag ka gōwēd ay ēdar drōn se sāzišn se may se ābgīr se frasast ud ēk esm_bōy se tāg az kust ī dašn be nihišn xᵛarəϑəm_miiazdəm_āiiese_yešti_hauruuata_amərətāta xšnūmaine_ahurahe_mazdā̊_raēuuatō_xᵛarənaŋhatō_amə tā gaēϑanąm_aōxtō nāmanō_yazatahe dō bār
ka yašt kirbag nē kird ēstēd ast kē gōwēd ay yašt ī keh x
ast kē se drōn gōwēd
frāz pas yašt ī pad ātaxš sar kird hād andar_nēmag ī yuǰyast abar rasēnd esm ud barsom
yazišn ī pēš rāy
hād ēn yuǰyast ēdar gōwēd
ǰādag rāy kē awēšān az frāz ī asrūdār ast kū abestāg pad rāspīgīh kem guft ēstēd ēdōn abar ēw gīrēnd pad frēzbān abar
ka xwēškārīhā be šawēd ka =z abēr was be šawēd u =š kār appār nē bawēd
axwēškārīhā be šawēd ka hambun =iz be šawēd u =š kār appār
ka andar yazišnīg =ēw barsom čīnēd ā =š be ō war ēw wēšag šawišn u =š abestāg pad āsrōīh gōwišn aṣ̌əm_vohū se frauuarānē čē gāh dārēd uruuaraiiā̊_vaŋhuiiā̊_mazdaδātaiiā̊_aṣ̌aōniiā̊ wēšag pad ēw_kardagīh hamē be nigerišn u =š abāz āyišn u =š az zōt wāz gīrišn u =š nəmō_uruuaire ān gyāg gōwišn kū barsom čīnēd
ka andar yazišn =ēw barsom čīnēd ud bandēd aṣ̌əm_vohū se frauuarānē čē gāh dārēd ahurahe_mazdā̊_raēuuatō_xᵛarənaŋhatō_xšnaōϑra tā frasastaiiaēča u =š wāz az zōt frāz gīrišn ud abāz ō abestāg pad rāspīgīh ēstišn
ā =š harw barsom =ēw rāy ā =š aṣ̌əm_vohū yaϑā_ahū_vairiiō =ēw be gōwišn ka abāz ō abestāg ī rāspīgīh ēstēd ā =š nōg wāz frāz gīrišn
pas ka zōt be drāyēd ā nē šāyēd ka rāspīg be drāyēd ā šāyēd
ast kē pēš pas gōwēd
ast kē ēdōn gōwēd ay harw kē be drāyēd ā nē šāyēd
čē x zōt kār ast andar ān ī myazd rōz ī gāhān_bār pad zōtān_gāh
gāhān =iz frāz ēw srāyēd gōwišn =iz ī ox ī astōmand passox ēw gōwēd aϑā_ratuš
ōy hāwanān hōm ēw hunēd ud hunišn =iz narmēnēd kū pāk be ēw kunēd
ān ātarwaxš ātaxš =iz abar ēw waxšēnēd ud ātaxš se sraxt yōǰdāsrēnēd kū pāk dārēd
zōt passox ēw gōwēd aϑa_ratuš
ān ī frabardār ātaxš ēk sraxt yōǰdāsrēnēd kū pāk dārēd
barsom =iz frāgām ud ātaxš =iz pad frāz yazišn_kirdārīh abar ēw barēd hadanapad
ān ī āsnadār hōm =iz ēw šōyēd ud hōm =iz ēw pālāyēd
vīspā̊sča_āϑrō pad hāwanān
ān ī rehwiškar hōm =ēw ud ǰum gōšt ēw gumēzēd ud bōr ud zōhr ēw baxšēd pārag
ast kē ēdōn gōwēd ay gumēzag bōr ud zōhr ēw baxšēd
anī ham ast kē ēdōn gōwēd ay gumēzēd nān ud spēdbāg baxšēd pārag
āb ān ī ābard ēw barēd srōšīh ān ī srōšāwarz abar nigāh ēw dārēd
kū harw kē andar yazišn frōdmāndag ēw kunēd ā =š pādifrāh garzēd
zōt dādīhā gāh
pad mayānag ī mān pad mayānag tā pad mayānag ī āb pad mayānag ī zōt_dān be abāǰuxt
hāwanān dādīhā gāh
čē az dašn abar sraxt frāztar az barsom abāztar az ātaxš
az hōy nēmag ī ōy āsnadār bawēd
ātarwaxš dādīhā gāh
az dašn nēmag ī sraxt frāztom az ātaxš
frabardār dādīhā gāh
az hōy abar sraxt frāztom az barsom abāztom az ātaxš
az dašn nēmag ī ōy rehwiškar bawēd
anabardranggāh awēšān ābard ud srōšāwarz be rawēnd kū =šān pad rāspīg yašt guftan gāh nē paydāg
ka =z awēšān radān anāfrāh be rawēnd abēdastwarīh
zōt harwisp radīhā gumēzēd hamē kār pālāyišn
be az ēk āsnadār hāwanānīh ō ān gumēzēd ān bawēd ka ān gyāg
zōt anāfrāh be rawēd abēdastwarīhā ōh āy ī dānāgtar rāst_gōwišntar az awēšān axwān zōhr pad zōtīh gumēzēd
ka ēw_tāg zōt frāz xwānēd andar ān ī myazd rōz gāhānbār pad zōtān gāh
ēdōn awēšān myazd mēnōy gāhānbār niwēyēnd rad =iz ī myazd mēnōy ī mānsr rad =iz ī rad_franāmišnīh mēnōy ī gāhān_bār
harwisp =iz mar čēgām =iz =ēw ān ī ahlawān stī ō yazišn ud niyāyišn ud šnāyēnīdārīh ud frāz_wābarīgānīh
ēw niwēyēnēd
hād ka =š ahurāi_mazdāi guft ā =š hamē niwist hēnd
pad ān ī zōtān gāh ahunawar frāz_srāyēd
pad š́iiaōϑananąm_rawišnīh tā hāwan abar ēw rasēd kū kardag =ēw ēw yazēd
pad ān ī hāwanān gāh x
pad ān ī ātarwaxšān_gāh ātaxš abar ēw waxšēnēnd
pad ān ī frabardār gāh yasn ī haft_hād frāz yazēd
hād abestāgīh hamē ōh gōwišn be ān šaš aṣ̌əm_vohū u =š hamāg pad gāh ī zōtān gōwišn be yasn ī haft_hād čē ān ka pad gāh ī frabardārān gōwēd ā šāyēd
u =š abestāg pad barsom bē gōwišn u =š be šawišn u =š kār xūb be kunišn u =š abāz āyišn u =š dast abar barsom nihišn u =š ōh rāyēnišn
hād ōh paydāgēnēnd kū ka dast pēš ī grih ī barsom frāz dārēd ā šāyēd
kē =z az awēšān anī radīgān fradom abāz rasād pad hāwanānīh ān ē ēstēnd
hād ōh paydāgēnēnd kū be ka ēk pad gāh =ēw hamē be yazēnd gōwēd pad hamāg kār šāyēd
dudīgar pad ādarwaxš ud sidīgar pad frabardār tasom pad rōd_wizīnīdārīh pad āburdīh
panǰom pad āsnadārīh šašom pad rehwiškarīh haftom pad srōšāwarzīh
pas awēšān anīgān radīgān passox ēw gōwēd aϑā_ratuš
awēšān =iz kē radīh ēw rawēnd ō kār
se gām andarg_rawišnīh andar andarg pad anandargrawišnīh ēdōn anandargpaššinǰišnīh
kū andar ma raw ud andar ma paššinǰ
ka andar rawēd ayāb andar paššinǰēd se zanišn ayāb rōz_drahnā wāstarēnišn
ud yazišn xūb
hād ēn abestāg pad rāspīgīh guftan yaδōit̰_gaēm ān abestāg pad tan =ēw yauuat̰_ərəduua
ān kār andar yazišn zōt az bun ī yazišn tā sar ī yazišn se gām wēš nē pādixšāy šudan ϑri_gāmim_aiβiiāstāt̰_hača_barəsma_parāiti anī yašt ī pad vaŋharštasčit̰ ast kē tā_ō datuš abrāstan se gām ast kē ān ī frāz ay daxšmēst gōwēd
ast kē vaŋharštasčit̰ ǰuttar nēst ast kē vaŋharštasčit̰ ǰuttar gōwēd
zōt zōhrān pādixšāy ast x andar myazd rōz
gāhān_bār zōtān pad garmōwarag baxtan
rad rādīh čē niyāz ma barēd dāsarān srūwān pah wastarān
rad_passāg_sālārīh be pādixšāy dādan
anāg ān ī pad wānišn spitamān zardušt kē pad ān ī ōy frāz_rānagīh ā =š ān ī xwēš ruwān wānīd ēstēd kū =š pad anāg ayārīh wināhgār būd ēstēd
harw kas
ast kē artēštār gōwēd ay pad rāh ī anāg_ayārīh ud anabāzdārišnīh
anāg ān drōzišn spitamān zardušt kē pad ān ī ōy frāz_rānagīh ā =š ān ī xwēš ruwān drōzēnīd ēstēd kū pad guftan wināhgār būd ēstēd
harw kas =ēw
ast kē āsrō gōwēd ay pad rāh ī drō_čāšišnīh
anāg pad ān ī dāsar bē_dahišnīh spitamān zardušt kē pad ān dāsar bē_dahišnīh ā =š nē ān ī xwēš ruwān urwāhmenīd ēstēd
harw kas
ast kē wāstaryōšān gōwēd ay pad rāh ī awizīdār_dahišnīh
čē pad dāsar be_wizārišnīh ī harwisp axwān ī astōmand ruwān az dušox pad =iz ēd wizārišnīh weh be šāyēd bōxtan pad humat =iz ud hūxt =iz huwaršt =iz
ast kē ēdōn gōwēd ay pad =iz abārīg kirbag ī did šāyēd bōxtan
čē x ān az zōhrān mahist pad tan pašom pad ārzog ud nēktom pad dīdan
kē ō mard ī ahlaw ēw dahēd ī ōšmurdār ast ud čāšīdār
ast kē gōwēd ay kē warm be kunēd ud abāz čāšēd
abāz_pursīdār ī xrad ī ahlawān kū nērang dānēd
ahlāyīh ābādīh ī pahlom ast ēn kū hambār ī kirbag weh
pad etč
sar ī dudīgar pargard xwābar bōxtār ud kirbagkar
aybyāst mazdēsn gāhān ēw srāyēnd kū šabīg ud kustīg ēw dārēnd ma anaybyāst
kē gāhān nē yazēd anastīh rāy ka gōwēd ay dēn nēst ayāb tarmenišnīh rāy ka gōwēd ast u =š nē āzādīh dādār be tanāpuhr bawēd
čand aybyānghan dārēnd pad pēštagīh
čiyōn ka awēšān ka ān ī stēndag kār_warzišnīh warzānd kū kār az pāy kunēnd ā =šān nē az rānag bawād azēr harw dō =iz parrag
ēn az abestāg paydāg
mard ī wēmār ud zan ī ābustan andar ēn paymānag az ēd abestāg paydāg
harw gyāg kū rasēd ā šāyēd
ā =š andar čahār angust pad pāiri_zi dārišn az kust =ēw
ka ēw_tāg frōd āyēd ā nē šāyēd ud dādīg ud hadāmānsrīg ēd ǰuttar nēst
ast kē ēdōn gōwēd ay dādīg šāyēd ud hadāmānsrīg nē šāyēd
kustīg az ēn_and tis ā šāyēd pašm ī buz pašm ī uštar pašm ud mōy
sōšyans guft ay pambagēn =iz ī šāyēd pad kač ud abrēšom ǰud_dādestān būd hēnd
dōk_rīs šāyēd
parrag weh pad kamistīh čahārag angust
abarg ēw_tāg guft
mēdyōmāh be tā ōy ϑri_vitasti_aspaiiā̊_pauruuō aziiā̊_arəǰō kirbag ōh abzāyēd az ān frāz nē abzāyēd
ka brīd ēstēd pad tis =ēw kē aybyānghanīh pad =iš bawēd frāz dōzēd ā šāyēd
ka gird ēstēd pad uruhbar čahār angust drust ast ud šāyēd
ka pambagēn ēw_tāg sarāsar andar ēstēd
sōšyans guft hād ay ka taškanag =ēw ēw_tāg pērāmōn andar dārēnēd u =š grih dō andar abganēd ā šāyēd
ēn hamē ō kas x kē =š kird ēstēd x andar yazišn
ka =š kird ēstēd nē andar yazišn ayāb =iš nē kird ēstēd ay yazišn =ēw ka nē andar yazišn hamē ka waštag =iz ā mard pērāmōn andar dārišn u =š grih dō andar abganišn ā šāyēd
ast kē gōwēd ay hād ēw_sāz tā ēw_tāg šāyēd
abarg guft ay kamar ēdōn čiyōn pad kārtar kunēd ā šāyēd
mard brahnag raftan nē wināh zan wināh
anī wināh ī wišād_dwārišnīh nēst
pad šab ka bē xufsēd ānd_and ǰuttar
ka šabīg ud kustīg pad mayān dārēd čē pad tan pāsbān pad ruwān xūbtar
mard čand nidom aybyānghan pad wastarg radīhā
čand dō pāybānag mard frāz nihumbēd tā_ō nēmag ī padištān
kōdag =iz ī āy pad aybyānghanišnīh radīhā
ka pad arz abēr ōzārak arzēd ud pad ēn paymānag ast ā šāyēd
ka meh az ān ī ēdōn wastarg arz
ān ī and ān nidom aybyānghanišnīh radīhā
ka pad arz was ud pad ēn paymānag nēst ā nē šāyēd
šabīg az harw tis ā šāyēd
dārēn az abestāg paydāg kū šāyēd
pad kūč ud abrēšom ǰud_dādestān hēnd
ka abar tan kird ēstēd ā šāyēd
ast kē ēdōn gōwēd pad paymānag x
ka az anī kird ēstēd andar čahār angust ēw_tāg šāyēd
wizūd ēstēd ā nē šāyēd
ast kē ēdōn gōwēd ay hād ēk dō_tāg nē rōšnag
se_tāg nē šāyēd ka dard ēstēd az =iš
pargast andak =ēw abar abganēd
abēr be brīnēd ā šāyēd
abarg guft ay tabangōg ēdōn čiyōn pad kardag kunēd ā šāyēd
awēšān kē aybyānghanēnēnd abar kustēnd kirrēnīdag kustīg abar frāz bandēnd pad aškamb abāz nihēnd az =iš ud kustīg abar frāz bandēnd aradīhā
pas az aybyānghanišīh nidōšēnd kū =šān abar frāz bast pas =iz frōd gīrēnd radīhā
sōšyans guft hād ay andar čahār angust nē pēš ud nē pas nē šāyēd
be az awēšān kē ras ud paswarzd pad barsom ō_ham wardēnd
4 angust pēš =iz šāyēd ud pas =iz šāyēd
kayādurbōzēd guft hād ay pēš =iz nē šāyēd
pas harw gyāg =ēw kū ast šāyēd
ast kē kayādurbōzēd be pas =iz x čahār angust gōwēd
agar se be ham āgenēn rawēnēnd kū se tāg rāst be kunēnd radīhā
agar nē 3 tāg pad āgenēn rawēnēnd aradīhā
kē abar_pad awēšān kār ud dādestān barsom frāz wistarēd čiyōn ahlaw ǰāmāsp frāz wistarēd hād kārawānīg ī ahlāy =iz būd u =š gāhān_bār be yašt radīhā
mard čand nidom barsom radīhā
se urwar
čē ēwēnag awēšān urwar hēnd
tar šnūg handāzag wars zahā
sōšyans guft ay hād az kust =ēw
kayādurbōzēd guft hād ay az harw dō kust
ān ī abardom ēš_drahnā ǰaw_pahnā
ēn az abestāg paydāg barsom ī yašt ud ān ī drōn ǰuttar nēst =iz
ēn keh tis nē šāyēd
tā ōy ēš_drahnā ǰaw_pahnā kirbag ōh abzāyēd
az ān frāz nē abzāyēd
ka abēr was mad ēstēd ān yašt ī se widest kunēd ay nē tar_menišnīh
ast kē ān dō widest ud ēn se widest gōwēd
ast kē ēdōn gōwēd barsom harw urwar ā šāyēd be az ān kē tan_drahnā sūrāg
ast kē ēdōn gōwēd ay anī =z ka tan sprahm pad naēčit̰
šāyēd
ka tan nē sprahm čē =š nē sprahm ēw_tāg šāyēd
se tāg šāyēd ud panǰ tāg šāyēd haft tāg šāyēd nō tāg šāyēd dwāzdah tāg šāyēd sezdah tāg šāyēd wīst ud ēk tāg šāyēd sīh ud se tāg šāyēd ēk tāg kem kū haftād tāg šāyēd panǰ_sad ud panǰāh ud ēk tāg šāyēd
se tāg ēsn šāyēd ka panǰ tāg nē mad ēstēd ā =š drōn ī pādyāb abar pādixšāy yaštan
ka pad se tāg nē pad nigerišn drōn yazēd ā nē šāyēd
ka panz tāg nē pad nigerišn drōn yazēd ā šāyēd
ast kē ān drāyīdan ud ēn gumānīg gōwēd
panǰ tāg drōn ī pād rēzag
haft tāg drōn ī nōg_nāwar ud rahwōbirzad ud ēsn ī rapihwin ī fradom
harw čē az ēn panǰag_tāg ī pad aybyānghanīh yaštag drōn ēk
be ān ī mowbed čē anī pādixšāy ka xānag ī xwad yazēd
nō tāg be ō hāwištān dahēd
ēd =iz ī pādixšāy ka nō tāg xwad ud ēk be ō hāwištān dahēd
nō tāg drōn ī šāhān_šāh
dwāzdah tāg drōn ī gōspand
pānzdah tāg yašt ī keh
wīst ud ēk tāg yašt ī hāwan
sīh ud se tāg wisperad ud sraw =iz ōh ēk_hōmāst ud hadōxt ī ēk_hōmāst
ēk tāg kem kū haftād tāg dwāzdah_hōmāst ud dah_hōmāst ud dō_hōmāst
550 ud ēk tāg wisperad ī artōkarten
dādweh guft hād ay wisperad ī aratō kərəϑən nē pad čāštag
awēšān kē nihumbēnd ān =iz kirrēnīdag
čiyōn tan_bastag =ēw
ham_namāzīg čiyōn kirb ī šabīg =ēw
ast kē ēdōn gōwēd ay ēd kē hamayā ōh ham_namāz ēstēd
abar awēšān =iz wzg =ēw nē rūdag ān =iz ī ōy xar ud babr =iz
xast rāy gannāg
kē =z andarg uspurrīg ān wastarg aybyānghanēnēnd radīhā
agar nē uspurrīg ān wastarg aybyānghanēnēnd aradīhā
ēn čiyōn tan_bast =ēw kirb =ēw nihān =iz ān ī wzg =ēw nē rūdag az ān =iz xar barišn
xast rāy gannāg
kē sar kird ēstēd u =š aybyānghanīh pad =iš nē bawēd u =š wišād_dwārišnīh u =š wišād_dwārišnīh kunišn
ka sar nē kird ēstēd ā =š aybyānghanīh pad =iš nē bawēd ud wišād_dwārišnīh nē bawēd u =š wišād_dwārišnīh nē kunišn
awēšān kē nihumbēnd warr ī ēw_tāg ud parzagmōg ī tābīg dārēnd
pad ōy zōtān tābēd adag =iz frāz_xastag kabāh =ēw ay ēw_tāg abar_nihān =iz ī wzg =ēw rūdag
hād ka mōy_tāg abar ān ī and gyāg ēdōn bawēd čiyōn gannāg hēh
agar ēr az =iš aybyānghanīh bawēnd radīhā
abar agar aybyānghanēnēnd aradīhā
anī =z ān ī suft pad nihān be drabēnd radīhā ka az kustag =ēw pad apēdtar ā az kust ī hōy weh
awēšān kē wastarg abar wastarg aybyānghanēnēnd kū šabīg ud kustīg dārēnd
agar az azēr nēmag ul barēnd kū pad pāy ul hanǰēnd aradīhā
hād ka xūb be kunēd ā =z nē šāyēd
az azabar nēmag abāg barēd u =š ēdōn abar aybyānghanēnēnd radīhā
awēšān kē pad gird waγdan be drabēnd
abarg taškanag =ēw mēdyōmāh rānbān =ēw
čiyōn azabar guft
ka dō pad ham aybyānghanēnēnd ud ō_ham aybyanghanēnēnd kū pad dō mard kustīg =ēw dārēnd
agar andarg bandēd kū sar =ēw anī bandēd ēk harw dō_ēn radīhā
hād paydāgēnēnd kū ka =š sar kird ēstēd ā šāyēd
ka =š sar nēst ā šāyēd
agar nē andarg bandēnd čē pad ēk abāz ēstēnd harw dō_ēn aradīhā
awēšān kē aybyānghanēnēnd abar mašk ud wiyān pardag
agar tarist aybyānghan abar warzēnd kū pad ān paymānag ast radīhā
agar pēš kū =š pēš ast u =š pas nēst ayāb pas kū =š pas ast u =š pēš nēst abar barēnd aradīhā
awēšān kē nihumbēnd nay ud sundus =iz ud x čarm =iz hušk
agar ān ī brahnag tan be aybyānghanēnēnd rēšēnd nē pad anaybyānghanīh āstārēnd
agar nē ān ī brahnag tan pad aybyānghanīh rēšēnd ān ī pad anaybyānghanīh āstārēnd
awēšān kē gāhān pad rad_franāmišnīh be franāmēnd kū gōspand ī gāhān_bār pāyēnd
agar awēšān uspurrīg_wastarg pad aybyānghanīh dārēnd ān pad anaybyānghanīh āstārēnd
agar nē awēšān uspurrīg_wastarg pad aybyānghanīh dārēnd nē pad anaybyānghanīh āstārēnd
hād ōh paydāgēnēnd kū mard brahnag raftan nē wināh
awēšān kē barsom frāz wistarēnd pad kamāndār hāwand ī tigr ēw_čand az pad sanwar andar dāšt ēstēd
kamān =ēw dārēn
agar se āgenēn ō_ham dārēnd kū se tāg ī rāst be gīrēnd radīhā
agar nē se pad āgenēn ō_ham dārēnd aradīhā
hād tā ka ō kār gīrēd ā =š tis nē āmār
u =š pas be šōyišn u =š andar_ō kār gīrišn
nērang ēdōn čiyōn barsom
ast kē ēdōn gōwēd ay pēš srišum az =iš be gīrišn
awēšān kē raz ud pahwarzd pad barsom ō_ham wardēnēnd
ēn kū az čē be grift ēstēd
se tāg az humat hūxt huwaršt panǰ tāg az ān panǰ rōz ī andar gāh ā haft tāg az haft amahraspand nō az humat hūxt huwaršt ud az ān šaš gāh ī gāhān_bār dwāzdah tāg az aṣ̌əm_vohū sezdah tāg az humatanām wīst_ud_ēk tāg az yaϑā_ahū_vairiiō sīh_se tāg az yaϑa_ahū_vairiiō ud aṣ̌əm_vohū ēw tāg kem kū haftād tāg ēn hamāg radīhā 550 ud ēk tāg 550 ud ēk pargard
u =š anī tāg_tāgīh rāy dwāzdah_hōmāst ī rahwōbirzad pad harw _ān hambārišn pad zastōfrēn tāg marag ī abārīg ka ēk hambārēd ā šāyēd anī gyāg kū mard gōwēd hamčiyōn ēn zastōfrēn ān kū ēk gōwēd zastō_ratuš_frə̄nā
ēn wimand ī pad barsom nēm hamčiyōn barsom pad dast kirdan nē nērang be wēzišn ka =š tis =ēw abar az =iš be gīrišn
ka ōh čīnēd be ō war ī wēšag šawišn u =š abestāg pad war ī wēšag gōwišn aṣ̌əm_vohū_3_frauuarāne_mazdaiiasnō čē gāh dārēd u =š pad urwar uruuaraiiā̊_vaŋhuiiā̊_mazdaδātaiiā̊_aṣ̌aōniiā̊_xšn tā sar
u =š wāz frāz gīrišn
ēn kū az wēšag tā_ō wēšag čand pādixšāy šudan ay daxšmēst gōwēd
ast kē ēdōn x x gōwēd ay be ka az harw bun =ēw tāg =ēw tā nē šāyēd
ast kē ēdōn gōwēd ay ka*wāng āšnawēd ā šāyēd
u =š pad aṣ̌əm frāz gīrišn u =š pad vohū kārd abar nihišn u =š pad vahištəm be brīnišn tā se tāg pad abestāg be čīnēd
hamē ka ēw tāg apādyāb be bawēd ā =š wāz abāz gīrišn ka =š se tāg pad abestāg čīnēd ka harw se apādyāb be bawēd ā =š wāz abāz ul gīrišn
ka sar hušk u =š be brīnišn pas ōh čīnišn
sōšyans guft hād ka nē brīnēd ā šāyēd čē hušk ī az tarr be rust ēstēd ēdōn bawēd čiyōn anī čē hušk apādyāb nē būd ēstēd ud tis apādyāb nē kunēd
andar warōmandīh ay ka =ēw ayāb wēš pad ēd dārišn kū apādyāb nē būd ēstēd ka wāz čāšēd a šāyēd
ast kē ēdōn gōwēd ay ka harw tāg aṣ̌əm_vohū =ēw gōwēd ā šāyēd
ast kē ēdōn gōwēd ay ka ōh drūnēd ā šāyēd
ka pad kārd andar škennēd ā nē šāyēd
ka pad zōr ī kārd pad wisist āyēd ā šāyēd
ka az bun be āyēd ā nē šāyēd
ka abāz škast ēstēd ka āb hāwand ast ā šāyēd
barsom brahnagīh nē šāyēd pad aybyānghan šāyēd
ka čīd ēstēd ud tis =ēw bazagwar abar nišīnēd ā nē šāyēd
ast kē ēdōn gōwēd ay ka ōh nē ōftēd ā šāyēd
ka ēw tāg apādyāb be bawēd ka ēdōn čiyōn dārēd be abganēd ā šāyēd
dast nē šōyišn
ka abāz ō dast ī did gīrēd ā =š harw dō ōh šōyišn
ka gyāg wisist andar dast abāz griftan kār nēst
aybyānghan az harw čē tarrag ā šāyēd
az ān gyāg paydāg kąmčit̰_vā_vaxšišąm
anī nē šawēd ud ēstēd tā abar zamīg āgust be bawēd
ast kē ēdōn gōwēd ay tā barsom_drahnā be rust ān ī nōg rust ēstēd tā ēdōn frāz šāyēd bastan
ān ī =š rēš pad =iš nē bawēd ā šāyēd
yaštagīh paymānag ēd ka ēw tāg frōd gīrēd abārīg frōd āyād mōy_tāg šāyēd tā =š niyāyišn pad =iš paydāg bawēd
ast kē ēdōn gōwēd ay tā =š gāh ī pēš pad =iš andar āyēd
ast kē ēdōn gōwēd ay pad harw gyāg šāyēd čē urwar hamē waxšišn
ast kē ēdōn gōwēd ay čiyōn tāg čīnēd ā =š gāh pad =iš andar āyēd ā =š wāz be gōwišn
ā =š wāz abāz_gīrišnīh
ān čiyōn pad čīd dārišn pad dast
šab wālišn be adwadād rāy tāg nē pādixšāy čīdan
ka =š čīd pad drōn ā šāyēd
pad šab ka pādixšāy čīdan ā =š ātaxš rōšnīh ōh abāyēd
ast kē ēdōn nērang rāy gōwēd ay ka =š čīd ēstēd ud abar_ō draxt nihēd u =š šab pad =iš andar āyēd ā nē šāyēd
ay pōryōtkēšān barsom abar draxtān nihād u =š sar ī šab nē bast ud čīd ēstēd u =š wārān pad =iš bawēd ān ī yašt ōh be wardēnēd ā šāyēd
ān ī drōn ka ēw tāg sarāsar be xusēd ā pad drōn ōh šāyēd
ka az bunīh abēr xūb čīd ēstēd pas =iz mard ī abēgumān aṣ̌əm_vohu se frauuarāne čē gāh dārēd ahurahe_mazdā̊ tā xᵛarənaŋhatō_xšnaōϑra tā frasastaiiaēča
u =š bun_sar xūb be rāyēnišn abēgumān ān kunišn
kūčak ka =z ān ī gumānīg kunēd ā šāyēd
māhgušnasp guft hād ka az bunīh abēr xūb čīd ēstēd ā =š pad rēšišnīh ā ān weh
u =š barsom bun zarrmandīh šāyēd
sar zarrmandīh šāyēd
gird šāyēd
ka sarāgūn ā nē šāyēd
ka =š bun abāg sar ēstēd ā nē šāyēd
ka tanuk_ā_tanuk sarāsar šud ēstēd ā nē šāyēd
ān ī stabr ka barsom zahā šud ēstēd ā nē šāyēd
ka =š bun abāg brīd ēstēd ā nē šāyēd
ka škennīhēd ud az barsom_drahnā widerēd ā šāyēd
ast kē ēdōn gōwēd ay nē šāyēd čē bōdyōzed
az_ēw*tāg ud ēw tāg šāyēd
frāgām =ēw ay ka barsom gīrēd frāgām ēw_čand šāyēd
ast kē ēdōn gōwēd ay barsom =ēw frāgām ēw_čand šāyēd
ka ēw tāg apādyāb be bawēd ān ud anī ī =š pērāmōn ka pad dastag bast ēstēd
hamē ka hixrōmand be bawēd ān ud anī ī =š pērāmōn ka pad dastag bast ēstēd
ka pad abestāg bast ēstēd hamāg
hamē ka dastag brīnēd ayāb pad kārd be škennēd ā =š pādyāb andak =ēw abar frōd hilišn
ast kē ēdōn gōwēd ay kardag ōh hilišn būdag nē hilišn
xrafstar hamāg apādyāb
ast kē sūragīg syā babrag agārīh gōwēd
humāy ud rasūg pēš =iz šāyēd pas =iz šāyēd
pad taštīg ud kārawānīg ǰud_dādestān hēnd
parrīg tis =ēw apādyāb nē
ast kē ēdōn gōwēd ay ān ī ohrmazd ōh gīrēd ān ī ahriman nē gīrēd
ast kē ēdōn gōwēd ay hād ān kē az bunīh būd nē gīrēd ān ī pas rōyēd ōh gīrēd
kalāzag abarg guft hād spēd šāyēd syā nē šāyēd
wehšābuhr guft hād ay ka syā ka pad dast be šāyēd kirdan pad dah drōn ā šāyēd
ka frāz bast nē az barsom nē aybyānghan tis =ēw x pādixšāy
ka az čīdan wāz bē nē gōwēd ā nē šāyēd
ka bast ka nē pad nigerišn wāz be nē gōwēd ud ka az drōn wāz be gōwēd ā šāyēd
ka šnūman ī srōš ēd =iz ǰuttar nēst
ka az barsom mayān be abar āxēzēd ayāb be sust bawēd ayāb be rāyēd ayāb =iš gāh ī gāhān_bār pad =iš andar āyēd ka =š yazišn pad =iš kird ēstēd ā nē šāyēd
ka =š yazišn pad =iš nē kird abāz wišāyišn u =š did bandišn
ka pad drōn ī dahm barsom abāz ō barsom dān nihēd ayāb =iš gāh =ēw pad =iš andar āyēd ā =š ēd =iz barsom nē šōyišn
ast kē ēdōn gōwēd ay ā =š ōh šōyišn
barsom hamrēh ud padrēh nē kunēd
māhgušnasp guft hād ka dō andar ēk ēstēd ēk_ēk abar gašt ēstēd ēk nō ēdōn =iz bawēd čiyōn anī
ka ēw tāg be hilēd ā =š tanāpuhr =ēw wināh
ka =ēw zastō frə̄nā ul uzēnēd ā =š tanāpuhr =ēw kirbag
kē urwar barsom frāz wistarēd hambun purr_tāg
kē =š bun ēk az =iš sar ēw_čand ast
ka be barēd tāg radīhā ka be brīnēd nē ka be nē barēd
mādagwar ēw tāg pad im yazišn ud abārīg tāg pad ǰud_yazišn
purr purr tāg frāz wistarēd
sīh tāg kū kē harw ēk =ēw sīh tāg az =iš rust ēstēd
ka be barēd ka be nē barēd radīhā
hād ōh paydāgēnēnd kūčak nē kird ēstēd ā šāyēd
ka barsom az ān ēk nēmag ō_ham abyōxt ēstēd ēdōn ayāb kē harw dō nēmag ayāb ō_ham bast ēstēd
ka be barēd radīhā
nē be ka be nē barēd
hād ōh paydāgēnēnd kū sarāgūn nē šāyēd
ka =š sar zahā wēš kū =š bun ā nē šāyēd
ēdōn bawēd ka pad ham_bawišnīh ō_ham āgišt ēstēd x ayāb harw dō nēmag ō_ham abyōxt …
hād ēdōn ōh paydāgēnēnd kū ka ōh drūnēd ā šāyēd
ka =š tanuk_ā_tanuk sarāsar šud ēstēd ā šāyēd
awēšān kē barsom abar nidōšēnēnd x pad ān ī dār sūrāg
andar ō un andar anī sūrāg ayāb andar kadāriz =ēw gabr
agar se tar šnūg pad āgenēn be ēstēnēnd aradīhā
hād ēn gyāg az ān ī zōt ātaxš ud barsom wēnēd
yazišn šnūman ud ān ī pad x bīm az ahlomōγān
kē urwar pad yazišnīh yazēd kū be wēzēd
agar se tar_šnūg pad ham be ēstēnd radīhā
agar nē se tar_snūg pad ham āgenēn ōftēnd aradīhā
hād ka wārān būd ēstēd ā šāyēd
ka =š nē āb abar rēzišn
ast kē ēdōn gōwēd ay mašk =ēw abar be wistarišn
āb ī ēstēd kū gil pad pādyāb nē mašk =ēw abar be wistarišn
u =š pad aṣ̌əm frāz gīrišn pad vahištəm be brīnišn
tāg_ā_tāg pad abestāg be ōftēd ā =š harw tāg rāy aṣ̌əm_vohū =ēw be gōwišn
pad harw aṣ̌əm_vohū ēw tāg šāyēd
ka pad zamīg se kiš x kārēd
abar_ō ānōh ēw barēd ǰōrdā pad dānag ayāb gauuina pad ǰaw =ēw
agar se tar_šnūg pad ham āgenēn ō_ham dārēd kū rāst radīhā
agar nē se tar_šnūg pad āgenēn ō_ham dārēd aradīha
hād pad kišīh se pad zamīg frōd kārēnd u =š ǰōrdā =ēw dānag ayāb gawīnag pad ǰaw =ēw ō aybyānghan gāh nihēd abārīg nē dānēm
kē pad anī ōh ēw gyāg ī kasān barsom frāz wistarēd
agar urwar drūnēd kū barsom ī nōg be kunēd radīhā
ān ī pēš abar drūnēd frāz wistarēd aradīhā
barsom čīd ēstēd ka ēk =ēw ēwar dānēd kū =m pas abar dāštan dastwar bawēd ā =z nē šāyēd
ān ī nē čīd ēstēd ka =š ēwan abar nē dāšt ēstēd ā šāyēd anī abar nē dāštan drust
ka ān dast harw dō pad pādyāb andar šāyēd burdan
ast kē ēdōn gōwēd ay sang_rēz abar pādixšāy nihādan
ēn kū pad dastwarīh kē šāyēd bāγdār ud zan ī bāγdār framān
hād mard =ēw ka mard =ēw ham_hāwand gīrēd ā =š tarrag ud sprahm pad drōn and čand andar abāyēd ā =š abar dastwar x bawēd
haft hēnd kū pad hāwan radīhā barsom_wistarišnīh kū =š pad haft gyāg abar ōh barišn
u =š kār nēst anī bawēd ka ēdōn rasēd
fradom pad yeŋhe_mē_aṣ̌āt̰_hačā pad frīd
dudīgar pad ahunawar frāz_srāyišnīh pad frīd
sidīgar pad dāidī_mōi
čahārom pad uštawayt ayāb pad spandmayt_hād pad ham_dahišnīh pad gāh ī xwēš
panǰom pad yeŋhe_mē_aṣ̌āt̰_hačā pad frīd
šašom pad dāidī_mōi pad frīd
haftom pad uštawayt ayāb pad spandmayt_hād pad ham_dahišnīh pad gāh ī xwēš
ān ī anī rad_franāmišnīh wisperad ī dwāzdah_hōmāst čahār kadāriz =ēw barsom_wistarišnīh
kū =š pad čahār gyāg abar ōh barišn
fradom pad yeŋhe_mē pad frīd
čiyōn guft pad frīd
wisperad ī dō_hōmāst čāštag ast hāwan
dō_hōmāst pad čāštag ēdōn pad =iz kardag nēst
ka wisperad ī dō_hōmāst yazēd hōmāst harw dō ān ī meh ud pargard
harw ān ī meh ud … harw dō_ēn uštawayt ud spandmayt abar gōwišn
spandmayt pēš gōwišn
hōmāst ayāb pad gāh ī xwēš ayāb yasn sar
vīspąsča_aməṣ̌ąn_spəṇtąn_yaz aṣ̌əm_vohū se yeŋhe_mē ud haōmanąm ud hōmāst rawāg tā gaōdaiieheča_narš_aṣ̌aōnō_āiiese_yešti yasnahe_haptaŋhātōiš_āiiese_yešti vīspaēibiiō_aēibiiō_ratubiiō tā yat̰_vahištāt̰_tā_huδā̊ŋhō_yazamaide ahurəm_mazdąm tā ratufritīm_yazamaide tā yasnəm_sūrəm tā aŋhuiiat̰_hača_ātrəmča_iδa_ahurahe_mazdā̊ kardag ī wisperad tā frāiiaštīmča_vača_aršuxδa tā gaēϑaiiā̊_stōiš
iməm_haōməm tā aṣ̌aiia_uzdātəm tā aētat̰_dim_vīspanąm tā sraōšəm_xšaϑrəmčā aṣ̌əm_vohū se ud frauuarāne ud hāuuanə̄e ud sāuuaŋhə̄e ud raϑβąm yaϑā_ahū_vairiiō_yō_ātarəuuaxšō ud yō_zaōtā ud aϑā_ratuš kirdan
aṣ̌əm_vohū se aiβi gərəδmahi_yasnahe_haptaŋhātōiš_humatača_hūxtača_hu gərəδmahi aṣ̌əm_vohū =ēw se bār guftan
yaϑā_ahū_vairiiō_yō_ātarauuaxšō ud yō_zaōtā
anī bawēd ka yasn kardag kem az ēn
keh az ēn šāyēd be ka nē hamāg rāspīgīh ōh kunišn
dāiiata_pairišti ān sad ālag anī =z ālag =iz pad ēw bōy x
ān ī yazišn ǰuttar nēst
frārāϑni drāǰo ān ī hayanbāg
vaŋharəštasčit̰ ān ī waxš pāšišn harw ān zāhag tis pad xwarg rāyēnēd
ast kē ēdōn gōwēd ay hād harw zāhag tis az abestāg paydāg
gōwēd ud hamē dahēd
kū ān esm abar barād
andarg ahunawar ud ayryaman