Select Section Type

1.0
pad nām ī dādār ohrmazd ī rāyōmand ī xwarrahōmand
2.0
pad kār_nāmag ī ardaxšīr ī pābagān ēdōn nibišt ēstēd kū pas az marg ī alaksandar ī hrōmāyīg ērānšahr dewīst_ud_čehel kadag_xwadāy būd
3.0
spahān ud pārs ud kustagīhā ī awiš nazdīktar pad dast ī ardawān sālār būd
4.0
pābag marzbān šahryār ī pārs būd ud az gumārdag ī ardawān būd
5.0
ardawān pad staxr nišast
6.0
ud pābag rāy ēč frazend ī nām_burdār nē būd
7.0
ud sāsān šabān ī pābag būd ud hamwār abāg gōspandān būd
8.0
ud az tōhmag ī dārāy ī dārāyān būd
9.0
ud andar dušxwadāyīh ī alaksandar ō wirēg ud nihān_rawišnīh ēstād ud abāg kurdīgān šabānān raft
pābag nē dānist kū sāsān az tōhmag ī dārāy ī dārāyān zād ēstēd
pābag šab =ēw pad xwamn dīd čiyōn ka xwaršēd az sar ī sāsān bē tāft ud hamāg gēhān rōšnīh kird
anī šab ēdōn dīd čiyōn ka sāsān pad pīl =ēw ī ārāstag ī spēd nišast ēstād ud harw kē andar kišwar pērāmōn ī sāsān ēstēnd ud namāz awiš barēnd ud stāyišn ud āfrīn hamē kunēnd
anī sidīgar šab hamgōnag ēdōn dīd čiyōn ka ādur farnbāy gušnasp ud burzēn_mihr pad xānag ī sāsān hamē waxšēnd ud rōšnīh ī hamāg gēhān hamē dahēnd
pābag ka =š pad ān ēwēnag dīd abd sahist u =š dānāgān ud xwamn_wizārān ō pēš xwāst ud ān harw se šab xwamn čiyōn dīd ēstād pēš ī awēšān guft
xwamn_wizārān guft kū
ān kē ēn xwamn padiš dīd ōy ayāb az frazendān ī ān mard kas =ēw ō pādixšāyīh ī gēhān rasēd
čē xwaršēd ud pīl ī spēd ī ārāstag čērīh ud tuwānīgīh pērōzīh ud ādur farnbāy dēn_dānāgīh meh mardān ud mowmardān ud ādur gušnasp artēštār ud spāhbedān ud ādur burzēn_mihr wāstaryōšān ud warzkerdārān ī gēhān ud hāmōyēn ēn pādixšāyīh ō ān mard ayāb frazendān ī ān mard rasēd
pābag ka =š ān saxwan āšnūd kas frestād sāsān ō pēš xwāst ud pursīd kū tō az kadām tōhmag ud dūdag hē az pidarān ud niyāgān ī tō kas būd kē pādixšāyīh ud sālārīh kird
sāsān az pābag pušt ud zēnhār xwāst kū =m wizend ud zyān ma kun
pābag padīrift ud sāsān rāz ī xwēš čiyōn būd pēš ī pābag guft
pābag šād būd ud framūd kū tan pad abzōn kun
ud pābag framūd kū tā dast ī ǰāmag paymōzan ī xwadāywār awiš āwurd hēnd ud ō sāsān dād hēnd kū paymōz
sāsān hamgōnag kird
ud pābag sāsān rāy framūd kū tā čand rōz pad xwarišn ud dārišn nēk sazāgwār parwa sāsān pad pīl =ēw ī ārāstag ī spēd nišast ēstād nibirdan
u =š pas duxt ī xwēš pad zanīh dād ud ǰahišn ī abāyēd būdan rāy andar zamān ān kanīzag ābustan būd ud ardaxšīr aziš zād
pābag ka =š tan_bahr ud čābukīh ī ardaxšīr bē dīd dānist kū ān xwamn ī =m dīd rāst būd
u =š ardaxšīr pad frazendīh padīrift ud grāmīg dāšt ud parward
ud ka ō dād ī hangām ī frahang rasīd pad dibīrīh ud aswārīh ud abārīg frahang ēdōn frahixt kū andar pārs nāmīg būd
ka ardaxšīr ō dād ī pānzdah_sālag rasīd āgāhīh ō ardawān mad kū pābag rāy pus =ēw ast ī pad frahang ud aswārīh frahixtag ud abāyišnīg
u =š nāmag ō pābag kird kū amāh ēdōn āšnūd kū ašmāh rāy pus =ēw ast ī abāyišnīg pad frahang ud aswārīh abēr frahixtag u =mān kāmag kū ōy ō dar ī amāh frēstē ud nazdīkīh ī amāh āyēd tā abāg frazendān ud wāspuhragān bawēd u =š pad frahang ī =š ast ī bar pāddāšn framāyēm
pābag az ān čiyōn ardawān meh kāmgārtar būd ǰud kirdan ud ān framān bē spōxtan nē šāyīd
u =š andar zamān ardaxšīr ārāstag abāg dah bandag ud was tis abd ud sahist ud sazāgwār ō pēš ī ardawān frēstīd
ardawān ka =š ardaxšīr dīd šād būd ud grāmīg kird framūd kū harw rōz abāg frazendān ud wāspuhragān ī xwēš ō naxčīr ud čōbīgān šawēd
ardaxšīr hamgōnag kird
pad yazadān ayārīh pad čōbīgān ud aswārīh čatrang ud nēwardaxšīr ud abārīh frahang az awēšān hāmōyēn čēr ud nibardag būd
rōz =ēw ardawān abāg aswārān ud ardaxšīr ō naxčīr šud ēstād
gōr =ēw andar dašt bē widard ud ardaxšīr ud pus ī meh ī ardawān az pas ī ān gōr tāxt
ud ardaxšīr andar rasīd tigr =ēw ēdōn ō gōw zad kū tigr tā parr pad aškamb andar šud ud didīgar sōg bē widārd ud gōr abar gyāg murd
ardawān aswār frāz rasīd hēnd ud ka =šān zanišn pad ān ēwēnag dīd abd sahist ud pursīd kū ēn zanišn kē kird
ardaxšīr guft kū man kird ham
pus ī ardawān guft kū nē čē man kird hēm
ardaxšīr hešm grift u =š ō pus ī ardawān guft kū
hunar ud mardānagīh ō xwēš kirdan nē tuwān
ēn dašt nēk ud gōr ēdar was
man ud tō ēdar didīgar āzmāyišn kunēm ud nēkīh ud dilīh ud čābukīh pad dīd āwarēm
ardawān az ān dušxwār sahist ud pas az ān ardaxšīr nē hišt ō asp nišastan
u =š ardaxšīr rāy ō āxwar ī stōrān frēstīd ud framūd kū niger kū rōz ud šab az nazdīk ī stōrān ō naxšīr čōbīgān ud frahangestān nē šawē
ardaxšīr dānist kū ardawān duščašmīh rud wad_kāmagīh rāy gōwēd u =š andar zamān dādestān čiyōn būd nāmag ō pābag nibišt
pābag ka =š nāmag dīd andōhgen būd
u =š pad passox ī ō ardaxšīr kird nibišt kū tō nē dānāgīhā kird ka =t pad tis =ēw kē zyān nē aziš šāyist būdan abāg wuzurgān stēzag burd saxwan društ_ēwāzīhā awiš guft
nūn =iz bōzišn gōw pad patītīg māndag hangār čē dānāgān guft ēstēd kū dušmen pad dušmen ān nē tuwān kirdan ī az adān mard az kunišn ī xwēš awiš rasēd
ēn =iz guft ēstēd kū az ān kas must abarmānd ma bāš kē ǰud az ōy nē wizarēd
ud tō xwad dānē kū ardawān abar man ud tō ud wasān mardōm ī andar gēhān pad tan ud gyān ud xīr ud xwāstag kām_kirdār pādixšāy ast
ud nūn =iz handarz ī man ō tō ēn saxttar kū ēgānagīh ud framān_burdārīh kun xwēš tan warz ō wanī_būdīh ma abespār
ardawān rāy kanīzag =ēw abāyišnīg būd kē az abārīg kanīzagān āzarmīgtar ud grāmīgtar dāšt ud pad harw_ēwēnag paristišn ī ardawān būd ān kanīzag kird ēstād
rōz =ēw ka ardxšīr pad stōr_gāh nišast ud tanbūr zad ud srūd wāzīg ud huramīh kird ō ardaxšīr dīd ud padiš nyāzān būd ud pas az ān abāz araxšīr mihr ud dōstīh ud dōšāram kird
paywastag hamē pad šab ka ardawān bē_šudag_baxt bē xuft ān kanīzag pad nihān ō nazdīkīh ī ardaxšīr raft ud tā nazd bām abāg ardaxšīr būd ud pas abāz ō pēš ī ardawān šud
rōz =ēw ardawān dānāgān ud axtarmārān ī pad dar būd ō pēš xwāst ud pursīd kū čē wēnēd pad tis ī haftān ud dwāzdahān ud rawišn ī stāragān ud tis ī āwām_xwadāyān ī šahr šahr čiyōn mardōmān ī gēhān ud tis ī man frazendān ud mardōmān ī amāh
axtarmārān sālār pad passox guft kū dwāzdahān ōbast ud stārag ohrmazd abāz bālist āmad u =š az wahrām ud anāhīd pad kust haftōiring ud šēr axtar marzīhēnd ud ō ohrmazd ayārīh dahēnd ud ham čim rāy ēdōn nimāyēd kū xwadāy =ēw ud pādixšāy =ēw ī nōg ō paydāgīh āyēd ud was sar_xwadāy ōzanēd ud gēhān abāz ō ēw_xwadāyīh āwarēd
did =iz murw_nīšān sālār ō pēš mad u =š guft kū ēdōn paydāg kū harw kē bandag mard kē az im rōz tā se rōz az xwadāy ī xwēš wirēzēd ō wuzurgīh ud pādixšāyīh rasēd abar ān ī xwēš xwadāy kāmag_anǰām ud pērōzgar bawēd
kanīzag ān saxwan čiyōn =iš ō ardawān guft andar šab ka ō nazdīk ī ardaxšīr āmad pēš ī ardaxšīr abāz guft
ardaxšīr ka ān saxwan āšnūd menišn ō wirēxtan az ānōh nihād
u =š ō kanīzag guft kū agar =it menišn abāg man rāst ud ēwgānag ast anīz andar ēn se rōz ī wizīdag ī dānāgān ud axtarmārān guft ēstēd kū harw kē az xwadāy ī xwēš bē wirēxt ō wuzurgīh ud pādixšāyīh rasēd az ēdar tā gēhān gīrēm bē šawēm
agar yazadān xwarrah ī ērān šahr ō ayārīh ī amāh rasēd bē bōxtēm ō nēkīh ud xōbīh rasēm ēdōn kunēm kū az tō farroxtar andar gēhān kas nē bawēd
kanīzag hamdādestān būd ud guft kū pad ābādīh dāram ud harw čē tō framāyē kunam
kanīzag čiyōn nazd ō bām būd abāz ō gāh ī xwēš nazdīk ī ardawān šud
šab ka ardawān xuft ēstād az ganǰ ī ardawān šamšēr =ēw ī hindūg ud zēn ī zarrēn ud kamar ī mēš_sār abesar ī zarrēn ud ǰām ī zarrēn ī pad_gōhr ud drahm ud dēnār was ud zrēy ud zēn abzār ī payrāstag ī wasyār ud abārīg was tis stad ō ēš ī ardaxšīr āwurd
ardaxšīr asp dō az bāragān ī ardawān kē pad rōz =ēw haftād frasang bē āyēnd hē zēn kird
ēk xwad ud ēk kanīzag abar nišast ud rāh ō pārs grift ud pad awištāb hamē raft
ēdōn gōwēnd kū andar šab frāz ō deh =ēw mad ardaxšīr tarsīd kū ma agar mardōm ī deh wēnēnd šnāsēnd ud griftār kunēnd andar deh nē bē pad kustag =ēw ī deh widard
u =š āmad dō zan nišast dīd ud ān zan wāng kird kū ma tars ardaxšīr ī kay ī pābagān ī az tōhmag ī sāsān nāf ī dārāy šāh abar rust hē čē harw wad kas tō nē tuwān griftan u =t xwadāyīh ī ērān šahr was sāl abāyēd kirdan
awištāb tā ō drayāb ud ka =iz drayāb pad čašm wēnēd ma pāyēd čē ka =t čašm ō zrēy ōftēd az dušmenān abēbīm bawē
ardaxšīr huram bē būd ud az ānōh pad awištāb bē raft
ka rōz būd ardawān kanīzag xwāst ud kanīzag pad gyāg nē būd
stōrbān mad ō ardawān guft kū ardaxšīr abāg dō bārag ī ašmāh nē pad gyāg ast
ardawān dānist kū kanīzag ī man abāg ardaxšīr wirēxt šud
ud ka =š āgāhīh az ganǰ āšnūd dil handrūdag kird
u =š axtarmārān sālār xwāst ud guft kū zūd bāš ud bē niger tā ān wināhgār abāg ān ǰeh ī rōspīg kadām gyāg šud kay šāyēm griftan
axtarmārān sālār zamān handāxt ud pad passox ō ardawān guft kū māh az kēwān ud wahrām rēzēd ō ohrmazd ud tīr paywast xwadāy ī mayān ī asmān azēr brāh ī mihr ēstēd ud ēdōn paydāg kū ardaxšīr wirēxt šud ’ṗlwd ō kustag ī pārs ast ud agar tā se rōz grift nē šāyēd pas az ān griftan nē tuwān
ardawān andar zamān spāh se hazār ārāst rāh ō pārs pay ī ardxšīr grift
ud ka nēmrōz būd ō gyāg rasīd kū rāh ī pārs ānōh widard
u =š pursīd kū ān dō aswār ī ō ēn kustag rōn āmad čē zamān bē widard
mardōmān guft kū bāmdād ka xwaršēd tēx abar āwurd ēdōn čiyōn wād ī ardāg homānāg bē widašt u =šān rag =ēw ī abēr stabr az pas hamē dawīd ī az ān nēkōgtar būdan nē šāyist dānēm kū tā nūn was frasang zamīg šud u =tān griftan nē tuwān
ardawān hambun =iz nē pād ud awištāft
ka ō anī gyāg =ēw mad az mardōmān pursīd kū ān dō aswār čē gāh bē widard hēnd
awēšān guft kū nēmrōz ēdōn čiyōn wād ī ardāg hamē šud hēnd u =šān rag =ēw hamwar hamē raft
ardawān škoft sahist ud guft kū hangār kū aswār ī dōgānag dānēm bē ān ī rag čē sazēd būdan
u =š az dastwar pursīd dastwar guft kū ān xwarrah ī xwadāyīh ahanūz aw =iš nē rasīd bē abāyēd kū bē nixwārēm šāyēd kū pēš kū ān xwarrah awiš rasēd šāyēm griftan
ardawān abāg aswārān saxt awištāft rōz ī did haftād frasang raft hēnd
u =š kārwān =ēw grōh =ēw ō padīrag āmad ardawān az awēšān pursīd kū ān dō aswār kadām gyāg padīrag būd
awēšān guft kū mayān ī ašmāh ud awēšān zamīg ī wīst_ēk frasang u =mān ēdōn sahist kū ēk az awēšān aswārān rag =ēw was wuzurg ud čābuk abāg =iš pad asp nišast ēstād
ardawān az dastwar pursīd kū ān rag ī =š abāg pad asp čē nimāyēd
dastwar guft kū anōšag bēd ardaxšīr xwarrah ī kayān awiš rasīd pad ēč čārag griftan nē tuwān pas xwēš tan ud aswārān ranǰag ma dārēd ud aspān ma ranǰēnēd ud tabāh ma kunēd čārag ī ardaxšīr az ān dar xwāhēd
ardawān ka =š pad ān ēwēnag āšnūd abāz wašt ō gyāg ī nišast ī xwēš āmad
pas az ān spāh ud gund ārāstag abāg pus ī xwēš ō pārs griftan ī ardaxšīr frestād
ardaxšīr rāh ō bār drayāb grift ud ēdōn čiyōn hamē šud
čand mard az mardōmān ī pārs kē az ardawān mustgar būd hēnd u =šān xīr ud xwāstag ud tan ī xwēš pēš ī ardaxšīr dāšt ud ēgānagīh ud framān_burdārīh paydāgēnīd
ud ka ō gyāg ī rāmišn ī ardaxšīr xwānēnd rasīd mard ī wuzurg_menišn ī banāg nām būd ud az spahān kē az dast ī ardawān wirēxt ēstād ānōh bunag dāšt xwad abāg šaš pus ud was spāh ud gund ō nazdīk ī ardaxšīr mad
ardaxšīr az banāg hamē tarsīd kū ma agar =im grift ud ō ardawān abespārēd
pas banāg ō pēš ī ardaxšīr mad ud sōgand xward ud abēgumānīh dād kū tā zīndag bawēm xwad abāg frazendān framān_burdār ī tō bawēm
ardaxšīr huram būd ud ānōh rōstāg =ēw ī rāmišn ī ardaxšīr xwānēnd framūd kirdan
banāg abāg aswārān ānōh hišt ud xwad ō bār ī drayāb šud
ka =š drayāb pad čašm bē dīd andar yazadān spāsdārīh hangārd ud ānōh rōstāg =ēw ī bōxt_ardaxšīr nām nihād ud 10 ātaxš ī wahrām abar drayāb framūd nišāstan
az ānōh abāz ō nazdīk ī banāg ud aswārān āmad ud spāh ārāst
ō dar ī ādur_farnbay ī kerbakkar šud ud āyaft aziš xwāst
ō kārēzār abāg ardawān mad ud ān spāh ī ardawān hāmōyēn ōzad ud xīr ud xwāstag ud stōr ud bunag aziš bē stad ud xwad pad staxr nišast
kirmān ud makarestān ud pārs kustag kustag spāh pad was_marag gird kird ud ō kārēzār ī ardawān āmad
čahār māhīgān harw rōz kārēzār ud ōzanišn ī was būd
ardawān az kustag kustag čiyōn az ray dambāwend dēlmān ud padišxwārgar spāh ud āxwar xwāst
az ān čiyōn xwarrah ī kayān abāg ardaxšīr būd ardaxšīr pērōzīh windād
u =š ardawān ōzad ud hāmōyēn xīr ud xwāstag ō dast ī ardaxšīr mad ud duxt ī ardawān pad zanīh kird ud abāz ō pārs mad
šahrestān =ēw ī ardaxšīr_xwarrah xwānēnd kird ud ān ī wuzurg war kand ud āb čahār ǰōy aziš āwurd ud ātaxš ō nišāst
kōf =ēw ī stabr kand ud rōd rāzag rāyēnīd
was deh dastkerd ābādānīh kird was ātaxš ī wahrām ānōh framūd nišāstan
pas az ān was spāh gund zāwal ō ham kird ud ō kārēzār kurdān šāh māyīg franaft
was kārēzār xōn_rēzišnīh būd ud spāh ardaxšīr stōwīh padīrift
ardaxšīr az spāh ī xwēš wiyābān bē būd
andar šab ō wiyābān =ēw mad kē =š ēč āb ud xwarišn nē būd ud xwad az aswārān ud stōrān hammis ō gursagīh ud tišnagīh mad
u =š az dūr ātaxš ī šabānān dīd ud ardaxšīr ō ānōh šud mard =ēw pīr ānōh dīd kē abāg gōspandān pad dašt kōf būd hēnd
ardaxšīr ān šab ānōh šud ud rōz didīgar az awēšān rāh xwāst
awēšān guft kū az ēdar se frasang rōstāg =ēw ast ī abēr ābādān ud was mardōm padēxwīh ī wasyār ast
ardaxšīr ō ān deh šud mard frestād ud aswārān ī xwēš hāmōyēn ō dar xwāst
spāh ī māyīgān pad ēd dāšt kū nūn az ardaxšīr abēbīm bē būd ham čē pad stōwīh abāz ō pārs šud
ardaxšīr 4000 mard ārāst abar awēšān taxtag šabīxōn kird
ud az kurdān mard hazār ōzad abārīg xastag dast_gīr kird ud az kurdān šāh abāg pusarān brādarān frazendān was xīr ud xwāstag ō pārs wisēy kird
andar rāh haftānbōxt ī kirm xwadāy padiš pahikōftag ān hāmōyēn xīr ud xwāstag bunag az ān aswārān ī ardaxšīr bē stadag ō gōzārān dastkerd =ēw ī gulār ānōh kū kirm bunag dāšt āwurd
ardaxšīr pad ān menišn būd kū ō armin ud ādurbādagān šawēm čē yazadānkerd syārzūrīg abāg was spāh ud gund az ān kustag syārzūrīg mihrān kardag pad kirmān burdār awiš mad ēstād
bē az ān čiyōn stambagīh wināhgārīh ī haftānbōxt pusarān pad spāh ardaxšīr būd handēšīd nazdist kār ī pārs abāyēd wirāstan az dušmenān abēbīm būdan pas šahr ī did pardāxtan
nūn pad ān uzdehīh pad gōzārān ēdōn čēr ud stambag kū =š spāh =ēw 5000 čē pad hēnīh pad kustag kustag ī būm ī sind ud az karān ī drayāb āmad ēstād
ardaxšīr spāh ud gund az kustagīhā abāz ō ardaxšīr āmad
haftānbōxt spāh ī xwēš hāmōyēn abāz ō dar xwāst
ardaxšīr spāh wasyār abāg spāhbedān ō kārēzār kirm wisēy kird
gālān kirm hāmōyēn xīr xwāstag ud bunag ō drubuštīh ud diz gōzārān nihād xwad kōfīhā gyāgīhā šastag nihān būd hēnd
ud aswārān ī ardaxšīr āgāhīh nē būd ō bun ī diz ī gulār mad hēnd ud diz bē parwast
ka šab būd spāh ī kirm abar awēšān zad šabīxōnīh kird az aswārān ardaxšīr was ōzad ud asp zēn zēnabzār xwāstag ud bunag aziš stad
aswārān pad afsōs ud riyahrīh ēwēnag wad_wāzag ud brahnag abāz ō pēš ardaxšīr āmad
ardaxšīr ka =š pad ān ēwēnag dīd abēr pad bēš būd ud az šahr šahr gyāg gyāg spāh ō dar xwāst xwad abāg spāh ī was ō kārēzār kirm franaft
ka ō diz gōzārān mad spāh kirm hāmōyēn ō diz nišast ēstād ud ardaxšīr pērāmōn diz nišast
kirm xwadāy haftānbōxt haft pus dāšt ud harw bus =ēw abāg hazār pad šahr šahr gumārd ēstād
andar ān gāh pus =ēw pad arwāstān būd abāg was spāh az tāzīgān mēzanīgān pad drayāb widārag mad ud abāg ardaxšīr ō kōxšišn ēstād
spāh kirm kē pad diz būd hāmōyēn ō bērōn mad abāg aswārān ī ardaxšīr kōxšišn ud kārēzār gyān_abespārīhā saxt kird ud az harw dō kustag was ōzad
spāh kirm bērōn mad u =š rāh ud widarg ēdōn bē grift kū ēč kas az spāh ardaxšīr bērōn šudan ud xwardan ī xwēš padēxwīh ī stōrān āwurdan nē šāyīd ud az sagr hāmōyēn mardōmān ud stōrān ō niyāz ud ačāragīh mad hēnd
mihrōg ī anōšagpādān zōhm pārs ka āšnūd kū ardaxšīr pad dar ī kirm apardazišn u =š abar spāh kirm nē windād spāh ud gund ārāst ō gyāg ardaxšīr šud u =š hāmōyēn xīr ud xwāstag ī ganǰ ardaxšīr burd
ka =š mihrāndruzīh ī mihrōg ud abārīg mardōmān pārs pad ān ēwēnag āšnūd ǰār =ēw ēn handēšīd kū az kōxšišn kirm bē abāyēd drang dādan pas ō kōxšišn kārēzār mihrōg šudan
u =š spāh hāmōyēn abāz ō dar xwāst abāg spāhbedān uskārd ud čārag ī pad bē bōxtan ī xwēš ud spāh nigerīd ud pas az ān pad čāšt xwardan nišast
andar zamān tigr čōbak az diz payrōd tā parr pad warrag abar xwān būd bē nišast
ud pad tigr ēdōn nibišt ēstād kū ēn tigr aswārān ī warzāwand kirm xwadāy wist u =mān nē abāyēd kū wuzurg mard čiyōn ašmāh bē ōzad hē čiyōn =mān ō ēn warrag zad
ardaxšīr ka =š pad ān ēwēnag dīd spāh az ānōh kand bē gašt
spāh ī kirm az pas ī ardaxšīr awištāft gyāg ī did abar awēšān ēdōn bē kerd/grift kū spāh ī ardaxšīr bē widardan nē šāyist
ud ardaxšīr xwad tanīhā ō bār drayāb ōbast
ēdōn gōwēnd kū xwarrah ī kayān pad dūr bē būd nūn andar pēš ī ardaxšīr ēstād ud andak andak hamē raft tā ardaxšīr az ān gyāg ī dušwidarg az dast ī dušmenān abēwizendīhā bērōn āmad frāz ō deh ī mānd xwānēnd rasīd
andar šab ō xānag ī brādar dō ēk burzag ud ēk burzādur nām būd mad ō awēšān guft kū man az aswārān ī ardaxšīr hēm kē az kārēzār kirm pad stōwīh āmad ēstēm ud im rōz aspinǰ framāyēd dādān tā āgāhīh spāh ī ardaxšīr bē āyēd kū ō kadām zamīg ōbast hēnd
awēšān was hudardagīhā ō ardaxšīr guft kū gizistag bawād ganāg mēnōy druwand kē ēn uzdēs ēdōn čēr ud pādyāwand kird ēstēd kū hāmōyēn mardōm kustagīhā az dēn ī ohrmazd ud amahrspandān wiyābān kird ēstēd ud wuzurg xwadāy =iz mard čiyōn ardaxšīr ud spāh ī =š abāg hāmōyēn az dast ī awēšān dušmenān ī druwandān uzdēs_paristagān sar ō stōwīh wardēnīd
u =šān asp ardaxšīr grift andar sarā burd pad āxwar bast pad ǰaw ud kāh ud aspast nēk dāšt ud ardaxšīr ō nišast_gāh ud gyāg pad ēwēn nīd ud bē nišāst
ud ardaxšīr was andōhgen būd ud hamē handēšīd
ud awēšān drōn yašt ō ardaxšīr xwāhišn kird kē wāǰ framāy grift ud xwarišn xwar ud andōh tīmār ma dār čē ohrmazd ud amahrspandān čārag ēn tis xwāhēnd ud ēn petyārag ēdōn bē nē hilēnd čē abāg stambagīh dahāg ud frāsyāg ī tūr ud aliksandar hrōmāyīg pas =iz yazadān padiš hunsand nē būd u =šān pad warz ud xwarrah ī xwēš ēdōn wanī abaydāg kird čiyōn ān ī gēhān āšnāg
ardaxšīr pad ān saxwan menišn xwaš bē būd wāǰ grift ud xwarišn xward
u =šān may nē būd bē wašag ō pēš āwurd ud mēzd rāyēnīd āfrīnagān kird
ardaxšīr pad wehīh ud dēn_dōstīh ēgānagīh ud framān_burdārīh ī awēšān abēgumān būd u =š rāz ī xwēš ō burzag ud burzādur dād ud guft kū man xwēš ardaxšīr hēm nūn ēn nigerēd kū čārag ī ēn pad bē abesīhēnistan ī ēn kirm ud aswārān ī ōy čiyōn šāyēd xwāstan
awēšān pad passox guft kū amāh pad tan ud gyān ud xīr ud xwāstag ud zan ud frazend ǰādag ašmāh xwāhišn ērānšahr bē abāyēd abespārdan bē abespārēm
bē amāh ēdōn dānēm kū čārag ī ēn druz ēdōn šāyēd xwāstan ka tō xwēš_tan pad ēwēnag mard =ēw ī dūr_šahrīg ārāstag kunē ō widār ī dizag ud tan ī xwēš pad bandagīh ud paristišnīh ī ōy bē abespārē ud mard dō ī hāwišt ud dēn_āgāh ō ānōh nayē ud pad =išān yazišn ud azbāyišn yazadān ud amahrspandān frāz kunē ud ka hangām ī xwarišn xwardan ī ān kirm bawēd ēdōn kunē kū rōy ī widāxtag dārē pad zafar ān druz rēzišn tā mīrēd ud ān druz ī mēnōy pad yazišn ud azbāyišn yazadān bē šāyēd zadan
ardaxšīr ān saxwan passandīd ud pad xūb dāšt ud ō burzag ud burzādur guft kū man ēn kār pad ayārīh ašmāh tuwān kirdan
awēšān guft kū harw kār ī ašmāh framāyēd tan gyān bē abespārēm
ardaxšīr az ānōh abāz ō ardaxšīr_xwarrah mad ud kār abāg mihrōg anōšagpādān kird ud mihrōg zad šahr ud gyāg ud xīr ud xwāstag hāmōyēn ō xwēš kird
kārēzār abāg kirm kirdan rāy kas frēstīd burzag ud burzādur ō pēš xwāst abāg uskārd ud was drahm ud dēnār ud paymōzan stad ud xwēš_tan pad brahmag xwarāsānīg ārāstag dāšt ud abāg burzag ud burzādur ō bun diz ī gulār mad ud guft kū man mard =ēw ī xwarāsānīg hēm az ēn warzāwand xwadāy āyaft =ēw xwāhēm kū ōy dar paristišn āyēm
awēšān uzdēs_paristagān ardaxšīr abāg ān dō mard mardōmān bē padīrift pad mān kirm gyāg kird
ardaxšīr se rōz pad ān ēwēnag paristišn ud ēgānagīh kirm kird paydāgēnīd ud ān drahm ud dēnār ud ǰāmag ō paristagān dād ud ēdōn kird kū harw kē andar ān diz būd abd sahist ud āfrīn_kirdār būd hēnd
pas ardaxšīr guft kū ēdōn weh sahēd ka kirm se rōz xwarišn pad dast ī xwad dahēm
paristagān ī kār_framānān hamdādestān būd hēnd
ardaxšīr kas frestād ud spāh čahār_sad mard ī hunarōmand ud gyān_abespār ud pad parr_gōhr ī ān gyāg pad kōf gyāg ī škastag nihān framūd kirdan framūd kū asmān rōz ka az diz ī kirm dūd wēnēd mardānagīh ud hunarōmandīh kunēd ud ō bun diz āyēd
xwad ān rōz rōy ī widāxtag dāšt ud burzag ud burzādur yazišn ud azbāyišn ī yazadān frāz grift
ka hangām ī xwarišn būd kirm pad ēwēnag ī harw rōz wāng kird
ardaxšīr pēš az ān uzdēs_paristagān kār_framānān pad čāšt mast ud abēbōy kird ēstād ud xwad abāg rahīgān ī xwēš ō pēš kirm šud ud ān xōn ī gāwān ud gōspandān čiyōn harw rōz dād ō pēš ī kirm burd ud hamčiyōn kirm zafar abāz y’ṗt kū xōn xward ardaxšīr rōy widāxtag pad zafar ī kirm andar rēxt
ud kirm čiyōn rōy ō tan mad pad dō škāft ud wāng ēdōn aziš bē mad kū mardōmān andar diz hamāg ānōh mad hēnd ud āšōb andar diz ōbast
ardaxšīr dast ō spar ud šamšēr zad ud garān zanišn ud ōzanišn pad ān diz kird ud framūd kū ātaxš kunēd tā dūd pad awēšān aswārān dīdār bawēd
rahīgān hamgōnag kird
aswārān ī pad kōf būd hēnd čiyōn ēn az diz dīd pad taxtan ō bun ī diz ayārīh ardaxšīr mad hēnd ō widār ī diz ōbast ud wāng kird kū pērōz pērōz bawād ardaxšīr šāhān šāh ī pābagān
ud šamšēr ō kār grift ēstād ud ōwōn xwadāy ī diz ud harw čē ōzad ēnyā pad awištābišn ud kušišn ī kārēzār az diz ōbast hēnd ud ān abārīg zēnhār xwāst ud ō bandagīh ud framān_burdārīh mad hēnd
ardaxšīr ān diz kand ud awērān kirdan framūd ud ānōh rōstāg ī gōzārān xwānēnd kird
u =š ātaxš ī wahrām pad ān gyāg nišāst
ud xīr ud xwāstag ud zarr ud asēm az ān diz pad hazār uštur bār kird ud ō gwb’l wisēy kird
burzag ud burzādur bahr dō pāddāšn ī wuzurg kird gyān_abespārišn_kirdārān dād ud ān gyāg rōstāg =ēw pad sālārīh ud kadag_xwadāyīh awiš dād
pas az ān ī ardaxšīr ān kirm ōzad būd abāz ō gwb’l āmad
u =š spāh ud gund ō kustag ī kirmān ud kārēzār ī bārzān mad
pus ī ardawān dō abāg xwēš_tan dāšt ud dō pad wirēg ō kābul šāh šud ēstād u =šān ō xwāhar ī xwēš čiyōn zan ī ardaxšīr būd nāmag nibišt paygām frestād kū
rāst ast ān ī ašmāh zanān rāy gōwēnd kū ka tō marg ī xwēšān ī ka xwēš tōhmagān ēn wināhgār ī yazadān dušmen asazāgīhā pad marg ōzad framōš kird u =t mihr ud dōšāram ī abāg awēšān mustōmandān brādarān ī kē pad ačār ud saxtīh bīm ud sahm ud anāzarmīh pad uzdehīgīh šahr ī kārān griftār ud ān ī dō wadbaxt brādarān ī tō kē ēn mihrdrōz pad band ī zēndān pādifrāh āwarēd kē marg pad āyift hamē xwāhēnd u =t hāmōyēn az daxšag bē hišt u =t menišn abāg ōy mihrdrōz rāst bē kird u =t ēč tēmār ud handēšišn ī amāh nēst zad šud ān kas kē pas az im rōz pad ēč zan pad gēhān wistāx abēgumān bawēd
nūn ēn kū agar =it hambun =iz mihr ī amāh ast čārag ī amāh xwāh ud kēn ī pidar ud ān xwēšāwendān ud hamtōhmagān framōš ma kun ud ēn zahr gīr ī =mān abāg mard abēgumān ī xwēš ō nazdīk ī ašmāh frēstīd az ēn mard stan ud ka =tān tuwān pēš az xwarišn ō ān wināhgār ud mihrdrōz dahēd tā andar zamān mīrēd ud tō ān ī harw dō brādar ī bastag wišāyē amāh =iz abāz ō šahr ud būm ud gyāg ī xwēš āyēm ud tō ruwān wahištīg nām ī ǰāwēdag ō xwēš kird bēd ud abārīg zanān andar gēhān kunišn xūb ī tō rāy nāmīgtar grāmīgtar bawēnd
duxt ī ardawān ka =š ān nāmag pad ān ēwēnag dīd abāg zahr ī =š awiš frēstīd handēšīd kū hamgōnag abāyēd kirdan ud ān čahār brādar ī wadbaxt az band rastag kirdan
rōz =ēw ardaxšīr az naxčīr gurišnag ud tišnag andar xānag mad u =š wāǰ grift ēstād ud kanīzag ān zahr abāg pist ud šakar gumēxt ud ō dast ī ardaxšīr dād pad ēn kū ahī az abārīg xwarišn framāyē xwardan čē pad garmīh ud ranǰagīh nēk
ardaxšīr stad xwardan kāmist
ēdōn gōwēnd kū warzāwend ādur farnbāy ī pērōzgar ēdōn čiyōn āluh =ēw ī suxr andar parrīd ud parr ō pist zad ud ān ǰām az pist hammis az dast ī ardaxšīr ō zamīg ōbast
ardaxšīr ud zyānag harw dō ka pad ān ēwēnag dīd stard bē būd hēnd
gurbag ud sag ī andar xānag būd hēnd xwarišn bē xward ud abar gyāg murd hēnd
ardaxšīr dānist kū ān zahr būd pad zadan ī man ārāst ēstād
andar zamān mowbedān mowbed ō pēš xwāst pursīd kū hērbed kū pad gyān ī xwadāyān kōxšīhēd pad čē dārē u =š čē kunišn
mowbed guft kū anōšag bawēd ō kāmag rasēd ōy kē pad gyān ī xwadāyān kōxšēd margarzān bē ōzanišn
ardaxšīr framūd kū ēn ǰeh ǰādūg druwand zadag_zādag ō aspānwar barēd ud framāy ōzadan
mowbedān mowbed dast ī zyānag grift ō bērōn āwurd
zyānag guft kū im rōz haft māhīgān ast tā ābustan hēm ardaxšīr āgāh kunēd čē agar man margarzān hēm ēn frazend ī andar aškamb dārēm pad margarzān abāyēd dāštan
mowbedān mowbed ka =š ān saxwan āšnūd wašt abāz ō pēš ī ardaxšīr šud ud guft kū anōšag bawēd ēn zan ābustan ast ǰār =ēw tā ān ī ka bē zāyēd ōzadan nē abāyēd čē agar ōy margarzān ān frazend ī az tōhmag ī ašmāh bayān andar aškamb pad margarzān dāštan ud ōzadan nē abāyēd
ardaxšīr hešm rāy dāšt guft kū ēč zamān ma pāy u =š ōzan
mowbedān mowbed dānist kū ardaxšīr hešm was ud az ān ō pašēmānīh rasēd u =š ān zan rāy nē ōzad u =š pad xānag ī xwēš burd u =š nihān kird u =š ō zan ī xwēš guft kū ēn zan grāmīgīhā dār ō kas tis =iz ma gōw
ka zamān ī zādan frāz mad aziš pus abēr abāyišnīg zād u =š šābuhr nām nihād u =š hamē parward tā ō dād ī haft_sālag mad
ardaxšīr rōz =ēw ō naxčīr šud u =š asp ō gōr mādag hišt
ān gōr nar ō tēx ī ardaxšīr mad u =š gōr rastār kird ud xwēš tan ō marg abespārd
ardaxšīr ān gōr hišt ud asp ō waččag abgand
gōr mādag ka =š dīd kū aswār asp ō waččag abganēnd mad u =š waččag rastār kird ud xwēš tan ō marg abespārd
ardaxšīr ka =š pad ān ēwēnag dīd bē mānd u =š dil sōzag būd ud asp abāz wašt ud handēšišn kū wāy ō mardōm bawād kē =iz abāg adānīh ud agōwāgīh ī ēn čahārbāy ī gung pas madan ī ēk ō did ēdōn uspurrīg kū gyān xwēš zan ud frazend rāy bē abespārd hāmōyēn u =š ān frazend ī =š andar aškamb dāšt ayād būd ud pad pušt ī asp ēdōn čiyōn ēstād pad buland wāng bē grīyist
spāhbedān ud wuzurgān ud āzādagān ud wāspuhragān ka =šān pad ān ēwēnag dīd škoft bē mānd hēnd ud hamāg ō pēš ī mowbedān mowbed šud hēnd
ēn čē sazēd būdan ka ardaxšīr pad did ēdōn zarīg ud bēš ud andōh awiš rasīd pad ān ēwēnag ka grīyēd
mowbedān mowbed ērān spāhbed pušt_aspān sālār ud dibīrān mahist dar_handarzbed wāspuhragān ō pēš ī ardaxšīr šud hēnd ud pad rōy ōbast ud namāz burd ud guft kū anōšag bawēd pad ēn ēwēnag xwēš_tan andōhgen kirdan bēš ud zarīg ō dil kirdan ma framāyēd
agar kār =ēw ān mad ēstēd ī pad mardōm kārīh čārag kirdan šāyēd amāh =iz āgāh framāy kirdan tā tan ud gyān ud xīr ud xwāstag ud zan ud frazend ī xwēš pēš dārēm
ud agar wizend ān ast ka čārag kirdan nē šāyēd xwēš_tan ud amāh mardōmān ī kišwar zarīgōmand ud bēšōmand ma framāyēd kirdan
ardaxšīr pad passox guft kū =m nūn ǰuttarīh nē mad ēstēd bē =m im rōz andar dašt az =iz čahārbāy ī gung ī agōwāg ud adān ī =m xwad pad ēn ēwēnag bē dīd u =m ān zan ud ān frazend ī =š andar aškamb ī mādar abēwināh abāz ayād būd ud pad ōzadan ī awēšān handēšīdār ud čīdār hēm kū pad =iz ruwān wināh garān šāyēd būdan
mowbedān mowbed ka =š dīd kū ardaxšīr az ān kār ō pašēmānīh mad pad rōy ōbast u =š guft kū anōšag bawēd framāyēd tā pādifrāh ī wināhgārān ud margarzānān ud framān ī xwadāy spōzgārān pad man kunēnd
ardaxšīr guft kū čim ēdōn gōwē
tō čē wināh ǰast ēstēd
mowbedān mowbed guft kū ān zan ud ān frazend ī =š ašmāh framūd kū bē ōzan u =mān nē ōzad ud pus =ēw zād ī az harw nōg_zādān ud frazendān ī xwadāyān nēkōgtar ud abāyišnīgtar ast
ardaxšīr guft kū čē hamē gōwē
mowbedān mowbed guft kū anōšag bawēd hamgōnag ast čiyōn =im guft
ardaxšīr framūd kū dahan ī mowbedān mowbed purr az yākand suxr ud murwārīd ī šahwār ud gōhr kird
pad ham zamān kas mad kē šābuhr ō ānōh nīd
ardaxšīr ka =š šābuhr frazend ī xwēš dīd pad rōy ōbast ud andar ohrmazd xwadāy ud amahrspandān xwarrah ī kayān ud ādurān šāh ī pērōzgar was spās hangārd guft kū ān ō man mad ō ēč xwadāy ud dahībed nē mad kē pēš az hazārag ī sōšyans ristāxēz ud tan ī pasēn būd kē =m frazend ēdōn nēkōg az murdagān abāz mad
u =š ham gyāg šahrestān =ēw ī walāš_šābuhr xwānd framūd kirdan ud dah ātaxš warahrān ānōh nišāst ud was xīr ud xwāstag ō dar ī ādurān šāh frestād ud was kār ud kirbag framūd rāyēnīdan
pas az ān ardaxšīr ō kustag kustag šud ud was kārēzār ud ōzanišn abāg sar_xwadāyān ī ērān šahr kird
ud hamwār ka =š kustag =ēw xūb kird did =iz kustag ō abāz_sārīh ud aburd_framānīh ēstād
abar ān xīr abēr =iz ǰahišnīh handēšīdār būd kū ma agar =im az abargar nē brēhēnīd ēstēd kū ērān šahr pad ēw_xwadāyīh bē šāyēd winnāristan
u =š handēšīd kū az dānāgān ud frazānagān kēdān kēdān kandāgān bē abāyēd pursīdan
agar ēdōn kū az xwarrah amāh nē brēhēnīd ēstēd xwadāyīh ērān šahr rāyēnīd kirdan hunsand ud bāristan abāyēd būdan ēn kārēzār xōnrēzišnīh bē abāyēd hištan ud xwēš az ēn ranǰ ud āwām āsān kirdan
u =š mard =ēw az awestwārān ī xwēš ō pēš ī kēd ī hindūgān frēstīd pad pursišn kirdan ī ārāstan ī ērān šahr pad ēw_xwadāyīh
mard ī ardaxšīr ka ō pēš ī kēd ī hindūgān rasīd kēd hamčiyōn mērag dīd pēš kū mērag saxwan guft u =š ō mērag guft kū =t xwadāy ī pārsīgān pad ēn kār frēstīd kū xwadāyīh ī ērān šahr pad ēw_xwadāyīh ō man rasēd nūn abāz ward šaw ud ēn passox saxwan ī mand awiš gōw kū ēn xwadāyīh ō dō tōhmag ēk az tō ud ēk az dūdag ī mihrōg ī anōšīzādān ēnyā winnārdan nē šāyēd
mērag abāz ō pēš ī ardaxšīr mad ud az rāyēnišn ī kēd ī hindūgān guft ardaxšīr āgāhēnīd
ardaxšīr ka =š ān saxwan āšnūd guft kū ān rōz ma bawē kū az tōhmag ī mihrōg ī ward_ruwān kas pas ērān šahr kāmgār bawēd
čē mihrōg ī garān_tōhmag ī anāg_tōhmag dušmen ī man būd ud frazendān ī =š ast hamāg dušmen ī frazendān ī man hēnd
agar ō nērōgōmandīh rasēnd ud kēn ī pidar xwāhēnd pad frazendān ī man wizendgār bawēnd
ardaxšīr hešm ud kēn rāy pad gyāg ō mihrōg šud ud hāmōyēn frazendān ī mihrōg framūd zad ud ōzad
duxt =ēw ī mihrōg se_sālag būd
dehgānān pad nihān ō bērōn āwurd u =šān ō warzīgar mard =ēw abespārd kū parward ud ywš aziš dāšt
warzīgar hamgōnag kird
kanīzag nēkōgīhā parward
ud ka sāl ēw_čand būd kanīzag ō dād ī zanān mad tan_brāh ud dīdan ud čābukīh ud pad =iz zōr ud nērōg ēdōn būd az hāmōyēn zanān ān weh ud frāztar būd
ǰahišn ud zamān brēhēnišn rāy rōz =ēw šābuhr ī ardaxšīrān ō ān šahr āmad ō naxčīr šud ud pas ī naxčīr xwad abāg nōh aswār ō ān deh mad kē kanīzag padiš būd
ǰahišn rāy kanīzag pad sar ī čāh būd ud āb hamē hixt ud čahārbāyān rāy āb hamē dād
warzīgar pad kār =ēw šud ēstād
kanīzag ka =š šābuhr ud aswārān dīd āxist ud namāz burd guft kū druyist ud weh ud pad drōd awarēd
bē framāyēd nišastan čē gyāg xwaš sāyag ī draxtān xunak ud hangām garm tā man āb hinǰam
xwad ud stōrān āb xwarēd
šābuhr māndagīh ud gursagīh tišnagīh rāy hešmgen būd u =š ō kanīzag guft kū bē ǰeh rēman amāh āb ī tō pad kār nē abāyēd
kanīzag pad tēmār šud ud pad kust =ēw bē nišast
šābuhr ō aswārān guft kū hēzag ō čāh abganēd ud āb āhinǰēd tā amāh wāǰ gīrēm ud stōrān āb dahēd
aswārān hamgōnag kird hēzag ō čāh abgand ud wuzurgīh ī hēzag rāy purr āb būd ul kešīdan nē šāyist
kanīzag az dūr gyāg hamē nigāh kird
šābuhr ka =š dīd kū aswārān hēzag az čāh hixtan nē šāyēd hešm grift ud ō sar ī čāh šud ud dušnām ō aswārān dād guft kū =tān šarm ud nang bawād kē az zan =ēw apādyāwendtar ud wad_hunartar hēd
u =š arwēs az dast ī aswārān stad ud zōr pad arwēs kird u =š hēzag az čāh ul hixt
pad zōr ud hunar ud nērōg ī šābuhr kanīzag abd sahist čiyōn =iš dīd kanīzag pad zōr ud hunar ud nērōg ī šahīgīgīh būd xwēš hēzag az čāh ul hixt dawān ō pēš ī šābuhr mad pad rōy ōbast āfrīn kird guft kū anōšag bawēd šābuhr ī ardašīrān mardān pahlom
šābuhr bē xandīd ō kanīzag guft kū tō čē dānē kū man šābuhr hēm
kanīzag guft kū man az was kas āšnūd kū andar ērān šahr aswār =ēw nēst kē zōr ud nērōg ud tan_brāh ud dīdan ud čābukīh ēdōn čiyōn tō šābuhr ī ardaxšīrān
šābuhr ō kanīzag guft kū rāst gōw kū tō az frazendān ī kē hē
kanīzag guft kū man duxt ī ēn warzīgar hēm ī pad ēn deh mānēd
šābuhr guft kū nē rāst gōwē čē duxtar ī warzīgarān ēn hunar nērōg ud dīdan ud nēkōgīh ī tō ast nē bawēd
nūn bē ka rāst gōwē ēnyā hamdādestān nē bawēm
kanīzag guft kū agar =im zēnhār dahēd pad tan ud gyān ī man tā rāst bē gōwēm
šābuhr guft kū zēnhār ud ma tars
kanīzag guft kū man duxt ī mihrōg ī anōšīzādān hēm ud az bīm ī ardaxšīr rāy ō ēn gyāg āwurd hēm
az haft frazend ī mihrōg bē man tā anī kas nē mānd ēstēd
šābuhr warzīgar rāy frāz xwānd ud kanīzag pad zanīh padīrift ud andar ham šab abāg būd
brēhēnišn rāy kū abāyēd būdan pad ham šab abar ohrmazd ī šābuhragān ābustan būd
šābuhr kanīzag āzarmīg ud grāmīg dāšt ud ohrmazd šābuhragān aziš zād
šābuhr ohrmazd az pidar pad nihān dāšt tā ān ka ō dād ī haft_sālag mad
rōz =ēw abāg aburnā_zādagān wāspuhragān ī ardaxšīr ohrmazd ō asprēs šud ud čōbīgān kird
ardaxšīr abāg mowbedān mowbed artēštārān sālār was āzādān ud wuzurgān ānōh nišast ō awēšān hamē nigerīd
ohrmazd az awēšān aburnāyagān pad aswārīh čēr ud nibardag būd
abāyēd būdan rāy ēk az awēšān čōbīgān ō gōy zad ud gōy ōy kanār ī ardaxšīr ōbast
ardaxšīr ēč tis =ēw nē paydāgēnīd ud aburnāyagān tušt mānd hēnd ud škōh ī ardaxšīr rāy kas nē ayārēd frāz šawēd
ohrmazd wistāxīhā šud ud gōy abar grift wistāxīhā zad wāng kird
ardaxšīr az awēšān pursīd kū ēn rēdag nē dānēm ardaxšīr kas frāz kird ud rēdag ō pēš xwāst guft kū tō pus ī kē hē
ohramzd guft kū man pus ī šābuhr hēm u =š ham zamān kas frēstīd šābuhr xwānd ud guft kū ēn pus ī kē ast
šābuhr zēnhār xwāst ardaxšīr bē xandīd u =š šābuhr zēnhār dād
šābuhr guft kū anōšag bawēd ēn pus ī man ast u =m az ēn and sāl abāz az ašmāh pad nihān dāšt
ardaxšīr guft kū ēd axwēškār čim ka =t az haft_sālag abāz frazend ī ēdōn nēkōg az man pad nihān dāšt
u =š ohrmazd grāmīgēnīd ud was dāšn ud paymōzan awiš dād ud spāsdārīh andar yazadān hangārd
u =š guft kū homānāgīh ī ēn ān ast ī kēd ī hindūg guft
ud pas az ān ka ohrmazd ō xwadāyīh rasīd hāmōyēn ērān šahr abāz ō ēw_xwadāyīh tuwānist āwurdan ud sar_xwadāyān ī kustag kustag ohrmazd ō framān_burdārīh āwurd
ud az hrōm ud hindūgān sāg ud bāz xwāst ud ērān šahr ō payrāyišnīgtar ud čābuktar ud nāmīgtar kird
kēsar ī hrōmāyān šahryār ud tāg ī kābul ī hindūgān šāh ud tūrag ī xāgān ud abārīg sar_xwadāyān ī kustag kustag pad drōd šīrēnag ō dar āmad hēnd