Select Section Type

1.0
pad nām ī yazadān
2.0
ēdōn gōwēnd kū ēw_bār ahlaw zarduxšt dēn ī padīrift andar gēhān rawāg bē kird
3.0
tā bowandagīh se_sad sāl dēn andar abēzagīh ud mardōm andar abēgumānīh būd hēnd
4.0
ud pas gizistag ganāg mēnōy ī druwand gumān kirdan ī mardōmān pad ēn dēn rāy ān gizistag aliksandar ī hrōmāyīg ī muzrāyīg_mānišn wiyābānēnīd ī pad garān syazd ud nibard ud yask ō ērān_šahr āmad
5.0
u =š ōy ērān dahībed ōzad ud dar ud xwadāyīh wišuft ud awērān kird
6.0
ud ēn dēn čiyōn hamāg abestāg ud zand abar gāw pōstīhā ī wirāstag ud pad āb ī zarr nibištag andar staxr pad klyta nibišt nihād ēstād
7.0
ud ōy petyārag ī wad_baxt ī ahlomōγ ī druwand ī anāg_kirdār aliksandar ī hrōmāyīg ī muzrāyīg_mānišn abar āwurd ud bē sōxt
8.0
ud čand dastwarān ud dādwarān ud hērbedān ud mowbedān ud dēn_burdārān ud abzārōmandān ud dānāgān ī ērān_šahr rāy bē kušt ud mehān ud kadag_xwadāyān ī ērān_šahr ēk abāg did kēn ud anāštīh ō mayān abgand ud xwad škast ō dušox dwārist
9.0
ud pas az ān mardōmān ī ērān_šahr ēk abāg did āšōb ud pahikār būd ud čiyōn =išān xwadāy ud dahībed ud sālār ud dastwar ī dēn āgāh nē būd
ud pad tis ī yazadān gumān būd hēnd ud was ēwēnag kēš ud wurrawišn ǰud_ristagīh ud gumānīh ud ǰud_dādestānīh andar gēhān bē ō paydāgīh āmad
tā ān ka zād hufraward anōšag_ruwān ādurbād ī māraspandān kē padiš passāxt ī pad dēn kird rōy widāxtag abar war rēxt
ud čand dādestān ud dādwarīh abāg ǰud_kēšān ud ǰud_wurrawišnān bē kird ud ēn dēn andar šēbišn ud mardōmān andar gumān būd hēnd
ud pas mowmardān ud dastwarān ī dēn anī būd hēnd
az ān mar andōhōmand ud purr pēm būd hēnd
u =šān pad dar ī pērōzgar ādur ī farrbay hanǰaman xwāst
ud was ēwēnag saxwan ud uskār abar ēn būd kū =mān čārag xwāstan abāyēd tā =mān kas =ēw šawēd ud az mēnōyān āgāhīh āwarēd kū mardōmān ī andar ēn āwām hēnd bē dānēnd kū ēn yazišn ud drōn ud āfrīnagān ud nērang ud pādyābīh ud yōǰdahrīh ī amāh pad kardag āwarēm ō yazadān rasēd ayāb ō dēwān ud ō frayād ī ruwān ī amāh rasēd ayāb nē
u =šān pas pad hamdādestānīh ī az dēn dastwarān hamāg mardōm ō dar ī ādur farrbay xwānd hēnd
u =šān az hāmōyēn ǰudāg kird haft mard kē pad yazadān ud dēn abēgumāntar būd hēnd
u =šān xwēš menišn ud gōwišn ud kunišn wirāstagtar ud frārōntar ud guft kū ašmāh xwēšīhā bē nišīnēd ud az ašmāh ēk =ēw kē pad ēn kār weh ud awināhtar ud husrawtar bē wizīnēd
ud pas awēšān haft mard bē nišast hēnd ud az haft se ud az se ēk =ēw wirāz nām bē wizīd ud ast kē weh_šābuhr nām gōwēnd
ud pas ōy wirāz čiyōn =iš ān saxwan āšnūd abar ō pāy ēstād ud dast pad kaš kird ud guft kū agar =itān sahēd ēg =im akāmagōmand mang ma dahēd tā ašmāh mazdēsnān war nēzag abganēd ud agar nēzag ō man rasēd kāmagōmandīhā šawēm ō ān gyāg ī ahlawān ud druwandān ud ēn paygām drustīhā barēm ud rāstīhā āwarēm
ud pas awēšān māzdēsnān war nēzag āwurd
fradom bār pad humat ud didīgar bār pad hūxt ud sidīgar bār pad huwaršt harw se nēzag ō wirāz āmad
ud ōy wirāz rāy haft xwah būd ud awēšān harw haft xwahān wirāz čiyōn zan būd hēnd
u =šān dēn warm ud yašt kird ēstād ud ka =šān āšnūd ēg =išān ōwōn grāntom mad hēnd ud drāyīd hēnd ud wāng kird hēnd ud andar hanǰaman ī māzdēsnān pēš šud hēnd bē ēstād hēnd ud namāz burd hēnd ud gōwēnd kū ma kunēd ašmāh māzdēsnān ēn tis
čē amāh haft xwah hēm ud ōy ēk brād ud harw haft xwah ōy brād zanīh hēm
čiyōn aškōb =ēw kē haft frasp ud stūn =ēw azēr andar nihād ēstād kē ān stūn bē stanēnd awēšān fraspān bē ōftēnd ōwōn amāh haft xwah rāy brād ēn ēk ast kē =mān zīyišn ud dārišn
frāz az yazadān harw nēkīh az ōy ast
ašmā pēš az zamān az ēn šahr ī zīndagān bē ō ān ī murdagān frestēd abar amāh stahm =ēw abēčim kird bawēd
ud pas awēšān māzdēsnān čiyōn =išān ān saxwan āšnūd awēšān haft xwaharān rāy hunsandīh dād ud guft kū amāh wirāz tā haft rōz tan_drust bē ašmāh abespārēm ud ēn nām farrōxīh abar ēn mard bē mānēd
ud pas awēšān hamdādestān būd hēnd
ud pas ōy wirāz pēš ī māzdēsnān dast pad kaš kird ud ō awēšān guft kū dastwarīh ast tā ruwānīgān yazēm ud xwarišn xwarēm ud handarz kunēm pas may ud mang bē dahēd
dastwarān framūd kū hamgōnag kun
pas awēšān dēn dastwarān andar mān ī mēnōy gyāg =ēw ī sī gām pad ān ī xūb wizīd
ud ōy wirāz sar ud tan bē šust ud paymōzan ī nōg paymōxt pad bōy xwaš bē bōyēnīd
pad taxt_gāh ī passazag wistarg nōg pāk wistard
ō gāh wistar ī pāk bē nišast ud drōn yašt ud ruwānīgān ayādēnīd ud xwarišn xward
ud pas awēšān dēn dastwarān may ud mang ī wištāspān se ǰām ī zarrēn purr kird u =šān ēk ǰām pad humat ud didīgar ǰām pad hūxt ud sidīgar ǰām pad huwaršt frāz ō wirāz dād
u =š ān may ud mang bē xward ud ōšyārīhā wāz bē guft ud pad wistarg xuft
awēšān dēn dastwarān ud haft xwahān haft rōz šabān pad ātaxš hamēšag_sōz ud bōy_wizārag nērang ī dēnīg abestāg ud zand bē guft ud nask yašt ud gāhān srūd ud pad tārīg pās dāšt hēnd
ud awēšān haft xwahān pad pērāmōn ī wistarg ī ōy wirāz nišast hēnd ud haft rōz šabān abestāg yašt
awēšān haft xwahān abāg hamāg māzdēsnān dēn dastwarān ud hērbedān ud mowbedān pad ēč ēwēnag pānagīh bē nē hišt
ud ruwān ī ōy wirāz az tan ō čagād ī dāitī činwad puhl šud
ud haftom rōz_šabān abāz āmad ud andar tan šud
wirāz abar āxist čiyōn ka az ān xwamn ī xwaš āxēzēd ud xwamn_menišn ud huram
ud awēšān xwahān abāg dēn dastwarān ud māzdēsnān čiyōn =išān wirāz dīd šād ud huram būd hēnd
u =šān guft kū drust āmad hē tō wirāz ī amāh māzdēsnān paygāmbar az šahr ī murdagān ō ēn šahr ī zīndagān āmad hē
awēšān hērbedān ud dēn dastwarān pēš ī wirāz namāz burd ud pas ōy wirāz čiyōn =iš dīd padīrag āmad ud namāz burd guft kū ašmāh rāy drōd az ohrmazd xwadāy ud amahrspandān ud drōd az ahlaw zarduxšt ī spitāmān ud drōd az srōš ahlaw ud ādur yazad ud xwarrah ī dēn ī māzdēsnān ud drōd az abārīg ahlawān ud drōd az nēkīh ud āsānīh abārīg mēnōyān ī wahišt
ud pas dēn dastwarān guft kū drust awar tō wirāz ī amāh māzdēsnān paygāmbar u =t drōd bawād tō =iz harw čē =t dīd rāstīhā ō amāh gōw
pas ōy wirāz guft kū fradom gōwišn ēn kū gursagān ud tišnagān naxust xwarišn dādan ud pas pursišn aziš kirdan kār framūdan
pas dēn dastwarān framūd kū anōš xwar
ud xwarišn ī hupoxt ud hubōy ud xwardīg ud sard āb ud may āwurd
u =šān drōn yašt ud wirāz wāz grift ud xwarišn xward ud myazd rāyēnīd wāz bē guft ud stāyišn ī ohrmazd ud amahrspandān ud spās ī hordad ud amurdad amahrspandān hangārd ud āfrīnagān guft
u =š framūd kū awarēd dibīr ī dānāg ī frazānag
u =šān āwurd dibīr ī frahiztag ī frazānag ud pēš nišast
ud harw čē wirāz guft drust rōšn ud gōwizār nibišt
u =š ēdōn framūd nibištan kū pad ān ī fradom šab man ō padīrag bē mad srōš ahlaw ud ādur yazad u =š ō man namāz burd hēnd ud guft kū drust āmad hē tō ardā wirāz ka =t ahanūz āmad zamān nē būd
man guft paygāmbar hēm
ud pas pērōzgar srōš ahlaw ud ādur yazad ān ī man dast frāz grift
fradom gām pad humat ud didīgar gām pad hūxt ud sidīgar gām pad huwaršt frāz ō činwad puhl mad hēm ī was pahnāg ī amāwand ohrmazd_dād
ka ō ānōh frāz mad hēm u =m dīd ān widardagān ruwān ka =šān andar ān se šab ī naxust ruwān pad bālēn ī tan nišast ud ān ī gāhānīg gōwišn guft uštā ahmāi yahmāi ušta kahmāiči† kū nēk ōy kē az ān ī ōy nēkīh kadār =iz =ēw nēkīh
u =š andar ān se šab ān and nēkīh ud āsānīh awiš mad ēstēd čand hamāg nēkīh ī =š pad gētī dīd čiyōn mard =ēw kē tā pad gētī būd aziš āsāndar ud xwaštar ud huramtar nē būd
pad ōšībām ī sidīgar ōy ruwān ī ahlawān andar urwar bōy ī xwaš bē wašt
u =š xwaštar sahist ān bōy čiyōn harwisp bōy xwaš ī =š pad zīndagān pad wēnīg abar šud ud ān bōy wād az rabihwintar rōn az nēmag ī yazadān bē āyēd
u =š ān ī xwēš dēn ud ān ī xwēš kunišn kanīg kerb ī nēk pad dīdan ī hurust kū pad frārōnīh rust ēstād frāz pestān kū =š pestān abāz nišast ī dil ud gyān dōst kē =š kerb ēdōn rōšn čiyōn dīd hudōšagtar nigerišn abāyišnīgtar
ud pursīd ān ī ahlawān ruwān az ān kanīg kū tō kē hē ud kē xwēš hē kē =m hagriz pad zīndagān gētī ēč kanīg nēkōgtar ud hučihrtar kerb az ān ī tō nē dīd
u =š passox dād ān ī xwēš dēn ud ān ī xwēš kunišn kū man kunišn ī tō hēm ǰuwān ī xūb menišn ī xūb gōwišn ī xūb kunišn ī xūb dēn
kāmag ud kunišn ī tō rāy ka man ēdōn meh ud weh ud hubōy ud pērōzgar ud abēbēš hēm čiyōn tō sahēd
čē tō pad gētī gāhān srūd u =t āb ī weh yašt u =t ātaxš pahrēxt u =t mard ī ahlaw šnāyēnīd kē az dūr frāz mad kē az nazdīk
ka man frabih būd hēm ā =t frabihtar kird hēm ud ka man nēk būd hēm ā =t nēktar kird hēm ud ka arzānīg būd hēm ā =t arzānīgtar būd hēm ud ka pad gāh ī čašmgāhān nišast hēm ā =t čašmgāhtar nišāst hēm ud ka burzišnīg būd hēm ā =t burzišnīgtar kird hēm pad ēn humat ud hūxt ud huwaršt ī tō warzīd tō mard ī ahlaw pas az tō yazēnd pad ān ī ohrmazd dagr yazišnīh ud hampursagīh ka dagr zamān ohrmazd rāy yazišn ud hampursagīh ī frārōn kunēnd āsānīh aziš
pas ān činwad puhl nō nēzag pahnāy abāz būd
man pad abāgīh ī srōš ahlaw ud ādur yazad pad činwad puhl xwārīhā ud frāxīhā ud nēw_dilērīhā ud pērōzgarīhā bē widard hēm
was pānāgīh ī mihr yazad ud rašn ī ristag ud wāy ī weh ud wahrām amāwand ud aštād yazad freh_dādār ī gēhān ud xwarrah ī dēn ī weh ī māzdēsnān ud frawahr ī ahlawān ud abārīg mēnōyān ō man ardā wirāz naxust namāz burd hēnd u =m dīd man ardā wirāz rašn ī rāst kē tarāzūg ī zard ī zarrēn pad dast dāšt ud ahlawān ud druwandān handāzīd
ud pas srōš ahlaw ud ādur yasd dast ī man frāz grift ud guft kū bē āy tā ō tō nimāyēm wahišt ud dušox ud rōšnīh ud xwārīh ud āsānīh ud frāxīh ud xwašīh ud huramīh ud rāmišn ud šādīh ud hubōyīh ī wahišt pāddāšn ī ahlawān
u =t nimāyēm tārīgīh ud tangīh ud dušxwārīh ud wadīh ud bēš ud anāgīh ud gandagīh pad dušox pādifrāh ī gōnag gōnag kē dēwān ud ǰādūgān ō bazakkarān kunēnd
u =t nimāyēm gāh ī rāstān ud ān ī drōzanān
u =t nimāyēm pāddāšn ī xūb_wurrawišnān pad ohrmazd ud amahrspandān ud nēkīh ī pad wahišt ud anāgīh ī pad dušox ud astīh ī yazadān ud amahrspandān ud nēstīh ī ahriman ud dēwān ud būdan ī ristāxēz ud tan ī pasēn
u =t nimāyēm pāddāšn ī ahlawān az ohrmazd ud amahrspandān pad andar wahišt
u =t nimāyēm zaxm ud pādifrāh ī gōnag gōnag ī ō druwandān pad andar dušox az ahriman ud dēwān petyāragān
gyāg =ēw frāz mad hēm u =m dīd ruwān ī mardōm ēw_čand kē pad ham ēstād hēnd
u =m pursīd az pērōzgar srōš ahlaw ud ādur yazad kū awēšān kē hēnd ud čē rāy ēdar ēstēnd
gōwēd srōš ahlaw ud ādur yazad kū ēn gyāg hamēstagān xwānēnd ud ēn ruwānān tā tan ī pasēn ēn gyāg ēstēnd ud ruwān ī awēšān mardōmān kē =šān kirbag ud wināh rāst būd
ud ō gētīyān bē gōw kū ān ī xwārtar kirbag az āz ud bēš ma dārēd
čē harw kē =š se srōšōčarnām kirbag wēš kū wināh ō wahišt kē =š wināh wēš ō dušox kē harw dō rāst tā tan ī pasēn pad ēn hamēstagān ēstēnd
u =šān pādifrāh az wardišn ī andarwāy sardīh ayāb garmīh u =šān abārīg petyārag nēst
ud pas naxust gām frāz niham ō star pāyag pad humat ān gyāg kū humat pad mehmānīh ud wēnam ān ahlawān ruwān kē =šān čiyōn star rōzāg rōšnīh aziš hamē waxšīd
u =šān gāh ud nišast abēr rōšn ud burz ud purr xwarrah būd
u =m pursīd az srōš ahlaw ud ādur yazad kū ēn gyāg kadām ud ēn mardōm kadām hēnd
u =šān guft srōš ahlaw ud ādur yazad kū ēn gyāg star_pāyag ud awēšān ruwānān hēnd kē =šān pad gētī yašt nē kird ud gāhān nē srūd ud xwēdōdah nē kird u =šān xwadāyīh ud dahībedīh ud sālārīh nē kird ēstēd
pad abārīg kirbag ahlaw būd ēstēnd
ka didīgar gām frāz niham ō māh pāyag pad hūxt ān gyāg kū hūxt pad mehmānīh ud wēnam ān ī wuzurg hanǰaman ī ahlawān
u =m pursīd az srōš ahlaw ud ādur yazad kū ēn gyāg kadām ud awēšān ruwānān kē hēnd
gōwēd srōš ahlaw ud ādur yazad kū ēn gyāg māh_pāyag ud ēn awēšān ruwānān hēnd kē =šān pad gētī yašt nē kird ud gahān nē srūd ud xwēdōdah nē kird
ud pad abārīg kirbag ō ēdar mad ēstēnd
u =šān rōšnīh ō rōšnīh ī māh homānāg
ka sidīgar gām frāz niham pad huwaršt ānōh kū huwaršt pad mehmānīh ō ānōh rasēm
rōšnīh ī bālistān bālist xwānēnd ud wēnam ān ī ahlawān pad gāh ud wistarg ī zarrēn_kird ud mardōm būd hēnd kē =šān rōšnīh ō rōšnīh ī xwaršēd homānāg būd
u =m pursīd az srōš ahlaw ud ādur yazad kū ēn gyāg kadām ud awēšān ruwānān kē hēnd
gōwēd srōš ahlaw ud ādur yazad kū ēn gyāg xwaršēd_pāyag ud awēšān ruwānān hēnd kē =šān pad gētī hupādixšāyīh ud dahībedīh ud sālārīh kird
čahārom gām frāz niham ō ān ī rōšn ī garōdmān hamāg_xwārīh
u =mān ō padīrag āmad awēšān widardagān ruwān ud
drōd pursēnd ud āfrīn kunēnd ud ēn gōwēnd kū čiyōn tō ahlaw bē mad hē az ān ī seǰōmand ud was_anāgīh axwān abar ō ēn ī asēǰ axwān ī apetyārag āmad hē ud anōš xwar čē dagr zamānīhā ēdar rāmišn wēnē
ud pas az ān padīrag āmad ātaxš ī ohrmazd ādur yazad ō man namāz =ēw burd
u =š guft drust awar tō ardā wirāz ī xwēd_esm ī māzdēsnān paygāmbar
ud pas man namāz burd hēm ud guft hēm kū awar tō ādur yazad kē pad gētī hamāg esm ud bōy ī haft sālag abar ō tō nihād u =m xwēd esm xwānēnd
ud pas gōwēd ātaxš ī ohrmazd ādur yazad kū bē āy tā ō tō frāz nimāyēm ān war ī āb ī esm ī xwēd kē abar ō man nihād
ud gyāg =ēw frāz burd ud nimūd war ī wuzurg āb ī kabōd ud guft ēn ān āb ast kē az ān esm bē tazīd ī tō abar ō man nihād
ud pas ul ēstād wahman amahrspand az gāh ī zarrēn kird
u =š ān ī man dast frāz grift pad humat ud hūxt ud huwaršt ō mēhan burd ī ohrmazd ud amahrspandān ud abārīg ahlawān ud frawahr ī zarduxšt ī spitāmān ud kay wištāsp ud ǰāmāsp ud isadwāstar ī zarduxštān ud abārīg dēn_burdārān ud dēn_pēšōbāyān kē =m hagriz az ān rōšndar ud nēktar nē dīd hēm
ud wahman bē guft kū ān ast ohrmazd
u =m kāmist pad pēš =iš namāz burdan
u =š ō man guft kū namāz ō tō ardā wirāz drust āmad hē az ān seǰōmand gētī ō ēn abēzag gyāg ī rōšn āmad hē
u =š framūd ō srōš ahlaw ud ādur yazad kū =š barēd ardā wirāz bē nimāyēd gāh ud pāddāšn ī ahlawān ān =iz ī pādifrāh ī druwandān
ud pas srōš ahlaw ud ādur yazad ān ī man dast frāz grift
u =šān gyāg gyāg frāz burd hēm
u =m dīd hēm amahrspandān u =m dīd abārīg yazadān u =m dīd frawahr ī gayōmard ud zarduxšt ud kay wištāsp ud frašostar ud ǰāmāsp ud abārīg kirdārān ud dēn_pēšōbāyān
ud gyāg =ēw frāz mad hēm u =m dīd ān ī rādān ruwān kē brāzišnīg raft ud azabar ī abārīg ruwānān pad hamāg rōšnīh
ud ohrmazd hamē burzīd ān ī rādān ruwān ī rōšn ud buland ud amāwand
u =m guft kū nēk tō kē rādān ruwān hē ēdōn azabar ī abārīg ruwānān
u =m burzišnīg sahist
u =m dīd ān ī awēšān ruwān kē =šān pad gētī gāhān srūd ud yašt kird ud āstawān būd pad weh dēn ī māzdēsnān kē ohrmazd ō zarduxšt čāšt
ka =m frāz mad hēnd pad ān paymōzan ī zarrēn_pēsīd ī asēmēn_pēsīd ī brāzišnīgtom az harwisp paymōzanān
u =m burzišnīgtar sahist
u =m dīd ān ī xwēdōdahān ruwān andar ān ī abzār brēhēnīd rōšnīh ka =š gar_bālāy rōšnīh aziš hamē waxšīd
u =m burzišnīg sahist
u =m dīd ān ī xūb xwadāyān ud pādixšāyān ruwān kē =šān mehīh ud wehīh ud amāwandīh ud pērōzgarīh aziš hamē waxšīd ka =šān rawēnd andar rōšnīh pad ān ī zarrēn rahī ud wardyūn
u =m burzišnīg sahist
u =m dīd ān ī wuzurgān ruwān ud rāst_gōwišnān kē =šān rawišn andar ān ī buland rōšnīh pad ān ī meh xwarrah
u =m burzišnīg sahist
u =m dīd ruwān ī awēšān nārīgān ī frāy_humat ī frāy_hūxt ī frāy_huwaršt ī rad_xwadāy kē =šān šōy pad sālār dārēnd pad paymōzan ī zarrēn_pēsīd ī asēmēn_pēsīd ud gōhr_pēsīd
u =m pursīd kū awēšān kadām ruwān hēnd
u =šān guft srōš ahlaw ud ādur yazad kū ēn ruwān ī awēšān nārīgān kē =šān pad gētī āb šnāyēnīd ud ātaxš šnāyēnīd ud zamīg ud urwar ud gāw ud gōspand ud abārīg hamāg weh dahišnān ī ohrmazd šnāyēnīd hēnd
u =šān yazišn ud drōn ud šnāyēnīšn ud paristišn ī yazadān kird ud usōfrīd ud šnāyēnišn ī yazadān ī mēnōyān ud yazadān ī gētīyān kird ud hušnūdīh ud ēgānagīh ud tarsagāhīh ud framān_burdārīh ī xwēš šōy ud sālār warzīd ud pad dēn ī māzdēsnān abēgumān būd hēnd
pad kirbag kirdan tuxšāg būd ud az wināh pahrēxtār būd hēnd
u =m burzišnīg sahist
u =m dīd ān ī yazišngarān ud mānsrbarān ruwān andar ān ī buland rōšnīh ud pad ān ī meh burzišnīh u =m burzišnīg sahist
u =m dīd ruwān ī awēšān kē =šān hamāg dēn yašt ud yazišn ī yazadān kird ud framūd
ka =šān nišast abar abārīg ruwānān u =šān kirbag asmān_bālāy ēstād u =m abēr burzišnīg sahist
u =m dīd ān ī artēštārān ruwān kē =šān rawišn pad ān ī azabardom rāmišn ud urwāhm_menišnīh ud pad ān ī dahībedān brahmag ud ān ī gurdān zēn_abzār ī xūb kird ī zarrēn_kird ī gōhr abzūd ī huabrōg ī harwisp_pēsīd andar ān ī škuft rahī ud wardyūn pad was škōh ud amāwandīh ud pērōzgarīh
u =m burzišnīg sahist
u =m dīd ān ī awēšān ruwān kē =šān pad gētī xrafstar ī was ōzad ud xwarrah ī ābān ud ādurān ud ātaxšān ud urwarān ud anīz ī zamīg xwarrah aziš hamē waxšīd ud andar bulandīh ud brāzišnīgīh
u =m abēr burzišnīg sahist
u =m dīd ān ī wāstaryōšān ruwān pad ān ī bāmīg gāh ud xwarrahōmand ud star_waxšāg paymōzan
ka =šān mēnōy ī āb ud zamīg ud urwar ud gōspand pēš ēstād ud āfrīn kird ud stāyišn ud spās ud ābādīh gōwēnd u =šān gāh meh ud gyāg weh kunēnd u =m burzišnīg sahist
u =m dīd ān ī hutuxšān ruwān kē =šān pad gētī xwadāyān ud sālārān paristīd ka =šān nišast hēnd pad ān ī xūb wistard gāh ud wuzurg ud bāmīg ud brāzišnīg
u =m abēr burzišnīg sahist
u =m dīd ān ī šubānān ruwān kē =šān pad gētī čahārpāy ud gōspand warzīd ud parward ud nigāh dāšt az gurg ud duzd ud stambag ī mardōm ud pad hangām ī mad āb ud giyā ud xwarišn dād ud az sarmāg ud garmāg ī saxt pahrēxt ud gušn pad gāh ī xwēš abar hišt ud dādīhā pahrēxt
u =š was meh sūdīh ud bar ud nēkīh ud xwarišn ud ǰāmag ī mardōmān ī āwām dād
kē =šān rawēnd andar ān ī rōšnīh ud pad ān ī brāzišnīg bar ud wuzurg rāmišn ud šādīh u =m abēr burzišnīg sahist
u =m dīd ān ī was zarrēn gāh wistarg ī xūb ud bāliš abāg bōb passazag
kē =šān padiš nišast hēnd kadag_xwadāyān ud dahīgān ruwān ī deh dūdag mān ud mēhan ud dastgerd ud gyāg ī awērān ābādān kird
u =šān was kahas ud rōd ud xānīg ō warz ud ābādānīh bar ud sūd ī dāmān āwurd
ka =šān pēš ēstēnd kē āb ud urwar ud kē =iz ahlawān frawahr pad ān ī meh amāwandīh ud ān ī meh pērōzgarīh u =š āfrīn ud stāyišn kunēnd ud spās hangārēnd u =m abēr burzišnīg sahist
u =m dīd ān ī awestwārān ud čāšīdārān ud wizōstārān ruwān andar ān ī bāmīg gāh wuzurgtom šādīh u =m burzišnīg sahist
u =m dīd ān ī ǰādag_gōwān ud āštīh_xwāhān weh dōst ruwān kē =šān rōšnīh ī star ud māh ud xwaršēd homānāg aziš hamē waxšīd ud rāmišnōmandīhā hamē raft hēnd andar andarwāy rōšnīh
u =m dīd ān ī pahlom axwān ī ahlawān ī rōšn ī hamāg xwārīh ī frāxīh ud was sprahm ī hubōy harwisp_pēsīd ī harwisp_škuftag ud bāmīg ud purr_xwarrah ud wisp_šādīh ud wisp_rāmišn kē kas aziš sagrīh nē dānēd
pas srōš ahlaw ud ādur yazad ān ī man dast frāz grift ud az ānōh frāztar raft hēm
gyāg =ēw frāz mad hēm u =m dīd rōd =ēw ī wuzurg ī seǰdēn dušox tār kē was ruwān ud frawahrān andar ān rōd būd hēnd ud ast ī =šān widardan nē tuwān ud ast ī pad garān ranǰ hamē widard ud ast ī xwārīhā widard hēnd
u =m pursīd kū ēn kadām rōd ud ēn mardōm kē hēnd kē ēdōn ranǰag ēstēnd
gōwēd srōš ahlaw ud ādur yazad kū ēn rōd ān was ars ast ī mardōmān az pas ī widardagān az čašm bē hilēnd ud šēwan mōyag ud grīyistan kunēnd
ān ars adādīhā bē rēzēnd ud ō ēn rōd abzāyēd
awēšān kē =šān bē widardan nē tuwān awēšān hēnd kē =šān az pas widardag šēwan ud mōyag ud grīyistan was kird ud ān xwārdar ān kē =šān kam kird
ud ō gētīyān bē gōw kū ašmāh ka pad gētī šēwan mōyag ud grīyistan adādīhā ma kunēd čē ēn and anāgīh ud saxtīh ō ruwān ī widardagān ī ašmāh rasēd
u =m did =iz abāz ō činwad puhl āmad hēm
u =m dīd ān ī druwandān ruwān ka =šān andar ān se šab ī naxust and anāgīh ud wattarīh ō ruwān nimūd kē =šān hagriz pad gētī čand ān saxtīh nē dīd estānd
u =m pursīd az srōš ahlaw ud ādur yazad kū ēn ruwān ī druwandān ānōh dwārist kū ān ī ōy druwand frōd murd bālēn ān gyāg kū gyān bē šud
u =š pad sar ēstād ud ān gāhānīg gōwišn gōwēd kū dādār ohrmazd ō kadām zamīg šawēm ud kē pad panāh gīrēm
ud ō ōy ān šab and anāgīh ud saxtīh rasēd čand andar gētī mard =ēw kē andar gētī andar saxtīh ud anāgīh zīyist
pas wād =ēw ī sard ī gandag ō padīrag āyēd
ōy ruwān ōwōn sahist čiyōn ka az abāxtar nēmag az nēmag ī dēwān bē āmad ī gandagtom wād az ān ī =š pad gētī nē dīd
u_d andar ān ī wād dīd ān ī xwēš dēn ud kunišn zan ī ǰeh rūdag ī pūdag ī paššixtag ī frāz_šnūg ī abāz_kūn ī akanārag_drēm kē drēm ō drēm paywast ēstād čiyōn ān ī bazag_ēwēntom xrafstar ī rēmantom ī gandagtom
ud pas ōy ruwān ī druwand gōwēd kū tō kē hē kē =m hagriz az dām ī ohrmazd ud ahriman az tō zišttar ud rēmantar ud gandagtar nē dīd
ō ōy gōwēd kū man hēm ān ī tō kunišn ī wad ī tō ǰuwān ī dušmenišn ī dušgōwišn ī duškunišn ī dušdēn
kāmag ud kunišn ī tō rāy ka man ēdōn zišt ud wadag ud bazag_ēwēn ud rūdag ud pūdag ud dušgand ud abērōzgār ud abāg_bēš hēm čiyōn tō sahēd
ka tō kas dīd kē yazišn ud drōn ud stāyišn ud namāz ud paristišn ī yazadān kird ud āb ud ātaxš ud gōspand ud urwar ud abārīg weh dahišnān pahrēxt ud pānagīh kird tō kāmag ī ahriman ud dēwān ud kunišn ī abārōn warzīd
ud ka tō dīd kē kē dāšn ud ahlawdād ī sazāgīhā ō wehān ud arzānīgān sūd kē az dūr ud kē az nazdīk frāz mad pad aspinǰ padīriftārīh kird ud tis dād tō penīh kird u =t dar bē bast
ud ka man afranāft būd hēm kē wad dāšt ēstād hēm ā =t afranāfttar kird hēm
ud ka sahmgen būd hēm ā =t sahmgentar kird hēm
ka garzišnīg būd hēm ā =t garzišnīgtar kird hēm
ka pad ān ī abāxtar gyāg nišast hēm ā =t abāxtartar nišast hēm pad ēd dušhumad ud pad ēd dušhūxt ud pad ēd dušxwaršt ī tō warzīd
dagr zamān man yazēnd pad ān ī ganāg mēnōy dagr yazišnīh ud dušhampursagīh
ud pas fradom gām frāz burd ān ī druwandān ruwān pad dušhumad ud ud didīgar gām pad dušhūxt ud ud sidīgar gām pad dušxwaršt ud čahārom gām ō dušox dwārist
ud pas srōš ahlaw ud ādur yazad ān ī man dast frāz grift ka ēw_čand šud hēm
pad ān ēwēnag sarmāg ud zaxmag ud ud huškīh ud gandagīh dīd kē =m hagriz andar gētī pad ān ēwēnag nē dīd ud nē āšnūd
ud ka frāztar šud hēm u =m dīd argand dušox zofr čiyōn ān ī sahmgentom čāh pad tangtar bēmgentar gyāg frōd burd ēstād
pad tārīgīh ēdōn tārīg ī kē pad dast frāz šāyēd griftan ud pad gandagīh ēdōn ī harw kē =š ān wād pad wēnīg abar šawēd bē tāšēd ud bē larzēd ud bē ōftēd
ud ēdōn tang ī tangīh rāy harw kas estišn būdan nē šāyēd
ud harw kas ēdōn menēd kū tanīhā hēm
ud ka se rōz ud šabān būd gōwēd kū nō hazār sāl bowandag būd u =m bē nē hilēnd
harw gyāg kē kemtar xrafstar kōf_bālāy bē ēstēd ud ō ruwān ī druwandān ēdōn darrēnd ud ǰōyēnd ud wišōbēnd čiyōn sag astag
u =m xwārīhā ānōh andar widārd ud srōš ahlaw hurust ī pērōzgar ud ādur yazad
gyāg =ēw frāz mad ham u =m dīd ruwān ī mard =ēw kē ruwān čiyōn mār =ēw ī frasp homānāg pad nišēm andar šud ud pad dahān bērōn bē āmad ud mārān ī was hamāg handām hamē ǰōyēnd
u =m pursīd az srōš_ahlaw ud ādur_yazad kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī kūn_marz kird
u =š mard abar xwēš tan hišt
nūn ruwān ēdōn garān pādifrāh barēd
gyāg =ēw frāz mad ham u =m dīd ruwān ī zan =ēw kē =š rēm ud palīdīh ī nardōmān tašt tašt ō xwardan hamē dād hēnd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē =š pad daštān nē pahrēxt ud dādīhā nē dāšt ud ō āb ud ātaxš šud
u =m dīd ruwān ī mard =ēw kē =š kamāl pōst_pahnāy hamē gīrēnd pad garān margīh hamē ōzanēnd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī mard =ēw ahlaw ōzad
u =m dīd ruwān ī mard =ēw kē =š rēm ud daštān ī zanān pad zafar hamē rēzēnd ud frazend =ēw abāyišnīg ī xwēš hamē puxt ud hamē xward
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī daštān_marz kird
ud ast ī harw ēw_bār wināh pānzdah ud nēm tanāpuhr
u =m dīd ruwān ī mard =ēw kē az gursagīh ud tišnagīh wāng hamē kird kū bē mīram
u =š ān ī xwēš mōy ud rēš hamē kand ud xōn hamē xward ud kaf pad dahān hamē abgand
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī hordād ud amurdad āb ud urwar drāyān ǰūd ud adādīhā xward ud wāz nē dāšt ud pad wināhgārīh yašt nē kird
az =iš hordād āb ud amurdad urwar ēdōn tarīh būd
nūn ēn ruwān ēdōn garān pādifrāh abāyēd burd
u =m dīd ruwān ī zan =ēw kē pad pestān ō dušox āguxt ēstād u =š xrafstarān hamāg tan ī ōy ǰōyēnd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud adur_yazad kū ēn ruwān ī ōy druwand zan kē =š pad gētī šōy ī xwēš hišt ud tan ō mard ī kasān dād u =š rōspīgīh kird
u =m dīd ruwān ī mard =ēw čand ud zan =ēw čand kē =šān xrafstar pāy ud gardan ud mayān hamē ǰūd ud ēk az did hamē wizārd
u =m pursīd kū ēn tanān čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī ēw_mōg_dwārišnīh kird ud wišād_dwārišnīh ud az pāy mēzišnīh ud abārīg dēw_ēzagīh kird
u =m dīd ruwān ī zan =ēw kē =š uzwān pad gardan hamē kešīd ud az andarwāy āwēxt ēstād
u =m pursīd kū ēn ruwān ān ī kē
gōwēd srōš_ahlaw ud adur_yazad kū ēn ruwān ī ōy druwand zan kē pad gētī šōy ud sālār ī xwēš tar menīd ud nifrīn kird ud dušnām dād ud dād_passoxīh kird
u =m dīd ruwān ī mard =ēw kē pad kabīz ud dōlag xāk ud xākestar hamē paymāyēnd ō xwardan hamē dahēnd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī kabīz ud dōlag ud sang ud handāzag nē rāst dāšt āb ō may gumēxt ud xāk ō ǰōrdā kird ud pad wahāg ī garān ō mardōmān frōxt ud az wehān tis duzdīd ud appurd
u =m dīd ruwān ī mard =ēw kē =š andarwāy dāšt
u =š panǰāh dēw pad mār ī šēbāg pēš ud pas hamē zanēnd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī dušpādixšāyīh kird ud pad mardōmān anāmurz ud zadār būd ud zaxm ud pādifrāh ān_ēwēnīhā kird
u =m dīd ruwān ī mard =ēw kē uzwān pad zafar bērōn āhixt ud xrafstarān hamē ǰūd
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud adur_yazad kū ēn ruwān ī ōy druwand mard kē =š pad gētī spazgīh kird ud mardōmān ēk abāg did pahikāft
u =š ruwān pad pas ō dušox hamē dwārist
u =m dīd ruwān ī mard =ēw kē handām ēk az did hamē škennēnd ud wizārēnd
u =m pursīd kū ēn tan čē wināh kird kē ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī kušišn ī gāwān ud gōspandān ud abārīg čahār_pāyān adādīhā was kird
u =m dīd ruwān ī mard =ēw kē sar tā pāy škēnǰag abar nihād ēstād ud hazār dēw azabar frāz kōft ud pad garān anāgīh ud saxtīh hamē zad
u =m pursīd kū ēn tan čē wināh kird
gōwēd srōš_ahlaw ud adur_yazad kū ēn ruwān ī ōy druwand mard kē =š pad gētī xwāstag ī was gerd kird ud xwad nē xward ud ō wehān nē dād ud bahr nē kird ud pad hambār dāšt
u =m dīd ruwān ī ašgahān mard =ēw ī dawānus xwānd hēnd kē hamāg tan xrafstar hamē ǰūd ud pāy =ēw ī dašn ī ōy nē hamē ǰūd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī dawānus ī ašgahān kē tā pad gētī būd
hagriz ēč kār ī nēk kird bē pad ēn pāy =ēw ī dašn dastag =ēw giyāh ō pēš ī gāw ī warzāg abgand ēstād
u =m dīd ruwān ī mard =ēw kē uzwān kirm hamē ǰūd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī zūr ud drō was guft ud zyān ud wizend pad dāmān az =iš būd
u =m dīd ruwān ī zan =ēw kē xrafstarān hamāg tan hamē ǰūd
u =m pursīd kū ēn tan čē wināh kird
gōwēnd srōš_ahlaw ud ādur_yazad kū ēn ruwān ī ōy druwand zan kē =š pad gētī az gēš ud mōy abar ātaxš wizārd ud mōy ud spiš ud rišk abar ātaxš abgand ud ātaxš azēr ī andar nihād ud tan ī xwēš pad ātaxš dāšt
u =m dīd ruwān ī zan =ēw kē =š nasā ī xwēš pad dandān hamērišt ud hamē xward
u =m pursīd kū ēn ruwānī kē
gōwēnd srōš_ahlaw ud ādur_yazad kū ēn ruwān ī ōy druwand zan kē =š pad gētī ǰādūgīh kird
u =m dīd ruwān ī mard =ēw kē andar dušox pad ēwēnag ī mār =ēw ī čand stūne_e bē ēstād
u =š sar ō sar ī mardōmān ud abārīg tan ō mār homānāg būd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī ahlomōγīh kird u =š andar dušox pad mār_kerbīh dwārist
u =m dīd ruwān ī mardōm =ēw čand ud zan =ēw čand kē =šān nigūnsār andar dušox āguxt ēstād
u =šān hamāg tan mār ud gazdum ud abārīg xrafstarān hamē ǰūd
u =m pursīd kū ēn ruwān ī kadām mardōmān hēnd
gōwēd srōš_ahlaw ud ādur_yazad kū ēn ruwān ī awēšān mardōmān hēnd kē =šān pad gētī āb ud ātaxš nē pahrēxt ud rēmanīh ō āb ud ātaxš burd ud pad nigerišn ātaxš ōzad
u =m dīd ruwān ī mard =ēw kē gōšt ud nasāy ī mardōmān abāg xōn ud rēm ud abārīg rēmanīh ud gandagīh ō xwardan hamē dahēnd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī hixr ud nasāy ō āb ud ātaxš ud tan ī xwēš ud ān =iz ī mardōmān burd ud hamwār ēk_bar ud rēman būd u =š pad pixag nē šust
u =m dīd ruwān ī mard =ēw kē pōst ud gōšt ī mardōmān hamē xward
u =m pursīd kū ēn ān ī kē ruwān
gōwēnd srōš_ahlaw ādur_yazad kū ēn ruwān ī ōy druwand mard kē =š pad gētī mizd ī mizdwarān ud bahr ī bahrwarān abāz grift
ud nūn ruwāngarān pādifrāh abāyēd burdan
u =m dīd ruwān ī mard =ēw kē =š kōf =ēw pad pušt hamē kešīd
u =š andar wafr ud sarmāg ān kōf abar pušt dāst
u =m pursīd kū ēn tan čē wināh kird
gōwēnd srōš_ahlaw ud ādur_yazad kū ēn ruwān ī ōy druwand mard kē =š pad gētī zūr ud anast saxwan ī abēsūd abar mardōmān was guft
u =š nūn ruwān ōwōn garān pazd ud pādifrāh hamē barēd
u =m dīd ruwān ī mard =ēw kē gūh ud nasāy rēmanīh xwardan dahēnd ud dēwān pad samg ud kudāmag hamē kōbēnd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mardōm kē ō garmābag ī was šund hēnd
u =šān hixr ud nasā ō āb ud ātaxš ud zamīg burd ahlaw andar šud ud druwand bērōn āmand hēnd
u =m dīd ruwān ī mardōm ēw_čand kē griyēnd ud brāmēnd ud wāng hamē kunēnd
u =m pursīd kū ēn kadām mardōm hēnd
gōwēd srōš_ahlaw ud adur_yazad kū ēn ruwān ī awēšān hēnd kē =šān pidar andar mādar kird ud ka bē zād hēnd pidar abar nē padīrift ud nūn garzišn az pidar hamē kunēnd
u =m dīd ruwān ī mard =ēw kē aburnāyag ēw_čand andar pāy ōbast ud hamē wāng kird ud dēwān čiyōn sag homānāg andar hamē ōftēnd ud hamē tan darrēnd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī aburnāyag ī xwēš nē padīrift
u =m dīd ruwān ī zan =ēw kē pad pestān ī xwēš kōf =ēw hamē kand u =š abar sar sang =ēw ī āsyāb rist homānāg hamē dāšt
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē =š pad gētī kōdak ī xwēš nasāy ud tabāh kird ud bē abgand
u =m dīd ruwān ī mard =ēw kē =š kirm hamāg handām hamē ǰūd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī zūr_gugāyīh kird ud xwāstag az wehān appurd ud ō wattarān dād
u =m dīd ruwān ī mard =ēw kē mastarg ī mardōmān pad dast dārēd ud mazg hamē xwarēd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī xwāstag nē az frārōnīh bē az tis ī kasān duzdīd
u =š xwad pad dušmenān hišt ud xwad ēw_tāg pad dušox abāyēd būd
u =m dīd was mardōm kē =šān sar ud rēš awestardag ud gōnag zard ud hamāg tan pūdag ud xrafstar hamē tan raft
u =m pursīd kū ēn kē ud kadām hēnd
gōwēd srōš_ahlaw ud ādur_yazad kū ēn ruwān ī awēšān mardōmān kē =šān pad gētī ahlomōγ ī frēftār būd hēnd ud mardōmān hamē murnǰēnīd ud az dād ī wehīh bē ō dād ī wattarīh āwurd ud was kēš ud wurrawišn ī abārōn andar gēhān rawāg kird
u =m dīd ruwān ī mard =ēw kē =š dēwān čiyōn sag homānāg hamē darrēnd
ōy mard nān ō sagān dahēd ud nē xwarēnd ud war pāy aškomb ud rān ī ān mard hamē xwarēnd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mardōm kē =š pad gētī sag ī šubānān ud mānbānān xwarišn abāz dāšt ayāb zad ud ōzad
u =m dīd ruwān ī mard =ēw čand kē =šān gūh ud hixr ud nasāy ud rēmanīh ī mardōmān hamē ǰūd ud dēwān sang kand ud az pas hamē handāxtand
u =šān kōf =ēw pad pušt hamē kešīd ud kešīdan nē tuwānist
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlawud ādur_yazad kū ēn ruwān ī awēšān druwandān kē =šān pad gētī zamīg tarāzēnīd ud drō tarāzēnīd ud was mardōm abēbun ud abēbar kird ud ō niyāz ud driyōšīh mad hēnd ud xarā ī ī garān hamē abāyēd dādan
u =m dīd ruwān ī mard =ēw kē kōf =ēw pad angust ud nāxun hamē kand ud dēwān az pas pad mār ī šēbāg hamē zad ud nihēb hamē kird
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī sāmān ud wimand ī kasān spōxt ud pad ān ī xwēš kird
u =m dīd ruwān ī mard =ēw kē pad šānag ī āhanēn gōšt az tan hamē kešīd ō xwardan hamē dād
u =m pursīd kū ēn tan čē wināh kird kē ruwān ōwōn pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī zēnhār ī drō abāg mardōmān kird
u =m dīd ruwān ī mard =ēw kē pad =iz šēbāg tigr ud sang ud kudāmag hamē spurdēnd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē pad gētī mihr_druz ī was kird ud mihr druxt abāg ahlawān ud abāg druwandān čē harw dō mihr ast ham abar ahlawān ud ham abar druwandān
ud pas srōš_ahlaw ud ādur_yazad dast ī man frāz grift ud man pad čagād ī dāidīg azēr ī činwad_puhl andar wiyābān =ēw burd ud mayān ī ān wiyābān azēr ī činwad_puhl andar zamīg dušox nimūd
ahriman ud dēwān ud druzān ud abārīg was ruwān ī druwandān az ān gyāg garzišn ud wāng ī ān āmad ī =m pad ēd dāšt kū haft kišwar zamīg čandēnd
ka =m ān wāng ud garzišn āšnūd tarsīd ham u =m ō srōš_ahlaw ud ādur_yazad xwāyišn kird kū =m ēdar ma barēd ud abāz wardēd
ud pas srōš_ahlaw ud ādur_yazad ō man guft kū ma tars čē tō rāy hagriz az ēdar bīm nē bawēd ud az pēš šud srōš_ahlaw ud ādur_yazad ud az pas abēbīmīhā man ardāy wirāz frāz ō ān ī tomīg dušox andarōntar šud ham
u =m dīd ān ī seǰōmand ī bīmgen ī sahmgen ī was dard ī purr_anāgīh ī gandag ī tār tom dušox
ud pas handēšīd hamēdōn sahist čiyōn čāh =ēw kē hazār wāz ō bun nē rasēd
ud ka hamāg ēzm ī andar gēhān ast hamāg andar gandagtom ī tomīg dušox abar ō ātaxš nihēnd hagriz bōy nē dahēd
ud did =iz az gōš tā čašm ud čand buš ī asp =ēw abar mōy dārēd ōwōn was marag ruwān ī druwandān andar ēstēnd ud ēk ō ōy did nē wēnēnd ud wāng nē āšnawēnd
harw kas pad ēd dārēd kū tanīhā ham
u =šān tomīh ud tārīgīh ud gandagīh ud bīmgenīh ud zaxm ud pādifrāh ī gōnag gōnag ī dušox kū kē ēw rōz pad dušox bawēd wāng kunēd kū ahanūz nē bowandag ān noh_hazār sāl ka =mān az ēn dušox abar nē hilēnd
ēg =im dīd ruwān ī druwandān kē =šān pādifrāh ī gōnag gōnag čiyōn wafr snēxr ud sarmāg ī saxt ud garmāg ī ātaxš ī tēz_sōzāg ud dušgandagīh ud sang ud xākestar ud tagarg ud wārān ud abārīg was anāgīh pad ān bīmgen tārīg gyāg frōd murd zaxm ud pādifrāh hamē barēnd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mardōm kē =šān pad gētī wināh ī margarzān was kird ud ātaxš ī wahrāmān afsārd ud puhl ī rōd ī nāwdāg kand ud zūr ud anast guft ud zūr_gugāyīh ī was dād
u =šān kāmag ī apādixšāīh ud āzwarīh ud penīh ud waranīh ud hešm ud areškenīh rāy abēwināh mardōm ī ahlaw ōzad ud was frēftārīhā raft hēnd nūn ruwān ōwōn garān zaxm ud pādifrāh abāyēd burdan
ēg =im dīd ruwān ī awēšān kē =šān mārān gazīd ud hamē ǰūd
u =m pursīd kū awēšān ān ī kē ruwānān
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī pad yazadān ud dēn nakkīrā būd hēnd
u =m dīd ruwān ī zanān kē =šān sar brīd ud az tan ǰudāg būd ud zuwān wāng hamē dāšt
u =m pursīd kū ēn awēšān ān ī kē ruwānān
gōwēd srōš_ahlaw ud ādur_yazad kū ēn ruwān ī awēšān zanān kē =šān pad gētī šēwan ud mōyag was kird ud abar sar ud rōy zad
ēg =im dīd ruwān ī mard =ēw kē kešān ō dušox nayēnd ud hamē zanēnd
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē pad gētī sar ud rōy ī xwēš ud dast ud šabīg ud abārīg rēmanīh ī handām ī xwēš pad āb ī ēstādag ī wuzurg ud xānīg ī rawān was šust ud hordād amahraspand āzard
u =m dīd ruwān ī zan =ēw kē hamē griyist ud pōst ud gōšt az ān ī pestān ī xwēš hamē kand ud hamē xward
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē kōdak ī xwēš niyāz ud gursagīh rāy griyān hišt
u =m dīd ruwān ī mard =ēw kē tan andar dēg =ēw rōyēn kird ēstēd u =š hamē pazēnd
pāy =ēw ī dašn ī ōy bērōn ī ān dēg ēstād
u =m pursīd kū ēn tan čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē pad zīndagān waran_kāmagīhā ud abārōnīhā bē ō zan ī šōymand was šud
u =š hamāg tan bazakkar būd ud pad ān pāy ī dašn waγ ud mōr ud mār ud gazdum ud abārīg xrafstarīhā was zad ud ōzad ud kušt
u =m dīd ruwān ī awēšān druwandān kē =šān bē ōbārd ud rīd ud did =iz ōbārd ud rīd
u =m pursīd kū ēn awēšān kē ruwānān hēnd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī pad mēnōy nē wurrawist ud dēn ī dādār ōhrmazd anespās būd hēnd nēkīh ī pad wahišt ud anāgīh ī pad dušox ud pad būdan ī rist_āxēz ud tan ī pasēn pad gumān būd hēnd
u =m dīd ruwān ī zan =ēw kē pad šānag ī āhanēn war ud pestān ī xwēš hamē darrīd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē =š pad gētī šōy ud sālār tar menīd ud wad būd ud dāšt
u =š xwēš_tan ārāst abāg mard ī kasān abārōnīh kird
u =m dīd ruwān ī zan =ēw kē pad uzwān brēzan =ēw ī garm hamē list ud dast ī xwēš azēr ī ān brēzan hamē sōxt
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē =š pad gētī andar šōy ud sālār ī xwēš dād_passoxīh kird ud sag_zuwān būd
u =š aburd_framānīh kird
u =š pad kāmag ī ōy gādan nē dād
u =š xwāstag az šōy duzdīd ud nihānīhā handōxt ī xwēš kird
u =m dīd ruwān ī zan =ēw kē griyān ud brāmān hamē āmad ud šud
u =š abar sar tagarg ud snēxr hamē āmad ud azēr ī pāy rōy ī garm ī widāxtag hamē raft ud sar ud rōy ī xwēš pad kārd hamē darrīd
u =m pursīd kū ēn tan čē wināh kird ka ruwān ōwōn garān pādifrāh hamē barēd
gōwēd srōš_ahlaw ud ādur_yazad kū ēn ruwān ī ōy druwand zan kē az mard ī kasān axwēškārīhā ābustan būd
u =š kōdak tabāh kird ud
az dard ud pādifrāh pad ēd dārēd kū wāng ī ān kōdak āšnawēd ud dawēd ud dawistan ōwōn garōmandīh sahist čiyōn kē abar rōy ī garm rawēd ud hamē wāng ī ān kōdak āšnawēd ud sar ud rōy ī xwēš pad kārd hamē darrēd ud kōdak xwāhēd u =š nē wēnēd tā fraškerd ēn pādifrāh abāyēd burdan
u =m dīd ruwān ēw_čand kē =šān war pad laǰan ud gandagīh abgand ēstād
u_šd ās ī tēz andar pāy ud abārīg handām hamē šud ud pid ud mād hamē xwānēnd
u =m pursīd kū ēn ruwānān kē u =šān čē wināh kird kē ruwānān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī pid ud mād bēšēnīd ud pad gētī az pid ud mād petītīgīh ud āmurzišn nē xwāst
u =m dīd ruwān ī mard =ēw ud zan =ēw kē zuwān nihaxt ēstād ud mārān zafar hamē ǰūd
u =m pursīd kū ēn tanān čē wināh kird ud awēšān ruwānān kē hēnd
gōwēd srōš_ahlaw ud ādur_yazad kū ēn ruwān ī awēšān kē =šān pad gētī spazgīh hamē kird ud mardōm pad āgenēn pahikāft
u =m dīd ruwān ī mard =ēw kē pad pāy =ēw pad tārīgīh ī dušox āwēxt ēstād
u =š pad dast dās =ēw ī āhanēn dāšt ud war ud kaš ī xwēš hamē brīd
u =š mēx ī āhanēn pad čašm andar zad ēstād
u =m pursīd kū ēn ruwān ān ī kē u =š čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē šahr pad mayānǰīgīh awiš dāšt ēstād ud ān ī sazēd kirdan ud framūdan nē kird ud nē framūd ud sang ud kabīz ud paymānag keh dāšt
u =š az driyōšān ud az kārwānīgān garzišn nē niyōšīd
u =m dīd ruwān ī mard =ēw ud zan =ēw kē =šān ān mard ō wahišt ud ān zan ō dušox hamē kešēnd ud zan dast andar band ud kustīg ī ān mard abgand ēstād
u =š guft kū čiyōn ka =mān pad zīndagān harw nēkīh pad āgenēn būd nūn tō ō wahišt ud man ō dušox hamē nayēnd
ud ān mard guft kū ēd rāy čē man wehān ud arzānīgān ud driyōšān padīrift u =m tis dād
u =m humat ud hūxt ud huwaršt warzīd
u =m yazadān menīd ud dēwān nikōhīd ud pad weh_dēn ī mazdēsnan āstawān būd ham
ud tō wehān ud driyōšān ud arzānīgān ud kārwānīgān tar kird
u =t yazadān nikōhīd u =t uzdēszār paristī ud dušhumat ud dušhūxt ud dušhuwaršt warzīd ud pad dēn ī ahriman ud dēwān āstawān būd hē
ud pas ān zan ō ān mard guft kū pad zīndagān hamāg tan ī tō abar man sālār ud pādixšā būd ud tan ud gyān ud ruwān ī man ān ī tō būd ud xwarišn ud dārišn ud paymōzišn ī man rāy az tō būd
ēg =it zaxm ud pādifrāh čē rāy padiš nē kird ham
u =t wehīh ud frārōnīh čim ka nē hammōxt hē kē =m pas wehīh ud frārōnīh kird hē ud tā nūn ēn zaxm ud anāgīh nē abāyēd burd
ud pas ān mard ō wahišt ud ān zan ō dušox šud ud ān zan az ān pašēmānīh andar dušox bē tārīgīh ud gandagīh anī petyārag nē būd
ud ān mard andar wahišt mayān ī ahlawān az nē wardānīdan ud nē hammōzānīdan ī ān zan kē dārišn awiš mad būd ō frārōnīh pad šarm nišast
u =m dīd ruwān ī zanān kē =šān mēx ī dārēn andar harw dō čašm zad ēstād
pad pāy =ēw nigūn āgust
u =šān was waγ ud gazdum ud mār ud mōr ud magas ud kirm ud abārīg xrafstarān pad zafar ud wēnīg ud gōš ud kūn ud gyāg ī gād andar šud ud āmad
u =m pursīd kū ēn ruwānān ān ī kē u =šān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwandān zanān kē =šān pad gētī šōy dāšt ud abāg anī mard xuft ud gād dād hēnd ud gāh ud wistarg ī šōy tabāh dāšt ud tan ī šōy āzard
u =m dīd ruwān ī zanān kē =šān nigūnsār abgand ēstānd ud zūzag homānāg ī āhanēn abāg xār az =iš rust ēstād pad tan andar burd abāz āhixt ēstād
u =š angust_zahā šusr ī dēwān ud druzān ud gandagīh ud rēmanīh pad zafar ud wēnīg andar hamē šud
u =m pursīd kū awēšān čē wināh kird kē ruwānān ōwōn garān pādifrāh barēnd
gōwēd srōš_ahlaw ud ādur_yazad kū ēn ruwān ī awēšān druwandān zanān kē =šān pad gētī mihr_druzīh andar šōy kird ud az šōy abāz ēstād ud hagriz hušnūd nē būd ud gād nē dād hēnd
u =m dīd ruwān ī mard =ēw kē mārān mēzūg gazīd ud hamē ǰūd ud pad harw dō čašm mār ud kirm hamē rīd ud mēx ī āhanēn abar zuwān rust ēstād
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š kūn_marz was kird ud abārōn waran_kāmagīh rāy zan ī kasān gād ud pad čarb_zuwānīh ī xwēš zanān ī kasān frēft ud wiyābānēnīd ud az šōy ǰudāg kird
u =m dīd ruwān ī zanān kē =šān daštān ī xwēš hamē xward
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlawud ādur_yazad kū ēn ruwān ī awēšān zanān kē =šān daštān nē pahrēxt ud āb ud ātaxš ud spandarmad zamīg ud hordād ud amurdad āzard ud abar asmān ud xwaršēd ud māh nigerīd ud stōr ud gōspand pad daštān āzard ud nar ahlaw rēman dāšt
u =m dīd ruwān ī zanān kē =šān dah angust xōn ud rēm hamē āmad ud mēzīd ud xward ud pad harw dō čašm kirm hamē āmad
u =m pursīd kū ēn ruwānān kē u =šān čē wināh kird kē ōwōn garān pādifrāh barēd
gōwēd sroš_ahlaw ud adur_yazad kū ēn ruwān ī awēšān druwandān zanān kē =šān rang nihād ud mōy ī kasān pad payrāyišn dāšt u =šān čašm ī yazadān mardōmān bast
u =m dīd ruwān ī awēšān kē =šān nigūnsār pad pāy =ēw āgust ēstād hēnd
u =šān kārd pad dil zad ēstād
u =m pursīd kū ēn ruwānān kē hēnd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī stōr gāw ud gōspand adādīhā ōzad ud kušt
u =m dīd ruwānān kē =šān azēr ī pāy ī gāwān abgand ēstād hēnd pad srū zad ud aškomb darrīd ud astuxwān bē škast ud nālān būd hēnd
u =m pursīd kū ēn mardōmān kē hēnd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī stōr ud gāw ī warzāg dahān bast
u =šān pad garmīh āb nē dād ud gursag ud tišnag pad kār dāšt
u =m dīd ruwān ī zanān kē =šān pad xwēš dast ud xwēš dandān pestān ī xwēš hamē brīd ud sagān aškomb hamē darrīd ud hamē xward ud harw dō pāy abar rōy ī garm ēstād
u =m pursīd kū ēn ān ī kē ruwānān u =šān čē wināh kird
gōwēd srōš_ahlaw ud ādur_yazad kū ēn ruwān ī awēšān druwandān zanān kē =šān pad gētī pad daštān xwarišn sāxt ud pēš ī mard ī ahlaw burd ud xwardan framūd
u =šān ǰādugīh hamē pursīd
u =šān spandarmad zamīg ud mard ī ahlaw āzard
ēg =im dīd ruwānān kē =šān pušt ud dast ud pāy rēš dāšt ud nigūn andar rōy āwēxt ēstād ud sang ī garān pad pušt hamē wārīd
u =m pursīd kū awēšān kē hēnd u =šān čē wināh kird
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī stōr būd ud kār ī saxt framūd ud bār adādīhā garān kird ud xwarišn sagrīh nē dād ud pad nizārīh burd ud ka rēš šud az kār abāz nē dāšt ud darmān nē burd
nūn ōwōn garān pādifrāh abāyēd burdan
ēg =im dīd ruwān ī zan =ēw kē pad pestān kōf ī āhanēn hamē kand ud kōdak =ēw az ān sōg ī kōf griyist ud wāng hamē āmad ud kōdak ō mād ud mādar ō kōdak nē rasēd
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē_špad gētī nē az šōy ī xwēš bē az anī kas ābustan būd
u =š guft kū ābustan nē būd ham
u =š kōdak tabāh kird
ēg =im dīd ruwān ī mard =ēw kē =š harw do čašm kand ud uzwān brīd ud pad pāy =ēw andar dušox āwēxt ēstād
u =š pad šānag ī dō srū ī rōyēn tan hamē randīd
u =š mēx ī āhanēn andar sar zad
u =m pursīd kū ēn kē mard u =š čē wināh kird
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī dādwarīh drōzanān būd u =š pārag stad ud dādestān ī drō kird
ēg =im dīd ruwān ēw_čand kē =šān nigūnsār andar dušox āwēxt ēstād
ud xōn ud rēm ud mazg ī mardōmān pad dahān andar kunēnd ud pad wēnīg āwarēnd ud hamē wāng kunēnd kū paymānag rāst dārēm
u =m pursīd kū ēn tanān kē u =šān čē wināh kird
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī sang ud kabīz ud abārīg paymānag keh ud kāstag dāšt ud ō mardōmān tis frōxt
ēg =im dīd ruwān ī zan =ēw kē uzwān brīd ud čašm kand ud mār ud gazdum ud kirm ud abārīg xrafstarān mazg ī sar hamē xward ud ǰārǰār tan ī xwēš pad dandān grift ud gōšt hamē ǰūd
u =m pursīd kū ēn tan čē wināh kird
gōwēd srōš_ahlaw ud adur_yazad kū ēn ruwān ī ōy druwand zan kē =š pad zīndagīh rōspīg būd
u =š was ǰādugīh kird ud was bazakkarīh az =iš raft
ēg =im dīd ruwān ī zan =ēw čand kē zuwān dazēnd
u =m pursīd kū ēn zan čē wināh kird
gōwēd srōš_ahlaw ud adur_yazad kū ēn ruwān ī ōy druwand zan kē =š pad gētī zuwān tēz būd
u =š šōy ud sālār ī xwēš was āzard pad zuwān
ēg =im dīd ruwān ī zan =ēw kē nasā ī xwēš hamē xward
u =m pursīd kū ēn zan čē wināh kird
gōwēd srōš_ahlaw ud ādur_yazad kū ēn ruwān ī ōy druwand zan kē =š pad gētī nihān az šōy gōšt ī was xward u =š ō anī kas dād
ēg =im dīd ruwān ī zan =ēw kē pestān dazēnd ud aškomb darrīd ēstād ud rōdīgān ō sagān dād
u =m pursīd kū ēn zan čē wināh kird
gōwēd srōš_ī ahlaw ud ādur_yazad kū ēn ruwān ī ōy druwand zan kē =š pad gētī zahr ud rōwn afsōn_kird dāšt
u =š ō xward ī mardōmān dād
ēg =im dīd ruwān ī zan =ēw kē pōst ī āhanēn pad tan ul kunēnd ud dahān abāz āwarēnd ud abāz ō tanūr ī garm nihēnd
u =m pursīd kū ēn zan čē wināh kird
gōwēd srōš_ahlaw und ādur_yazad kū ēn ruwān ī ōy druwand zan kē =š pad zīndagān ōy ī huxēm frazānag mard zan būd
u =š mihr ī šōy druxt abāg ōy ī bazakkar ud dušxēm mard xuft
ēg =im dīd ruwān ī zan =ēw kē mār =ēw sezdēn pad tan ul šud ud pad dahān bē āmad
u =m pursīd kū ēn tan čē wināh kird kū ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand zan kē xwēdōdah wināhīd
ēg =im dīd ruwān ī zan =ēw kē pad šānag ī āhanēn tan ud rōy ī xwēš hamē randīd ud pad pestān kōf ī āhanēn hamē kand
u =m pursīd kū ēn zan čē wināh kird
gōwēnd srōš_ahlaw ud ādur_yazad kū ēn ruwān ī ōy druwand zan kē =š pad gētī bazag kird ud xwāstag_kāmagīh rāy kōdak ī xwēš šīr nē dād
ud nūn hamē wāng kunēd kū ēdar tā ēn kōf kanam ud ān kōdak šīr daham nūn tā fraškerd ō ān kōdak nē rasēd
ēg =im dīd ruwān ī mard =ēw kē nigūnsār az dār =ēw āwēxt ēstād ud hamē marzīd
u =š ān šusr andar dahān ud gōš ud wēnīg hišt
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī abārōn_marzišnīh kird
u =š zan ī kasān frēft ud wiyābān kird
ēg =im dīd ruwān ī awēšān kē andar dušox nizārīh rāy kust ō kust pahikōft ud tišnagīh ud gursagīh ud sarmāg ud garmāg rāy wāng hamē dāšt ud xrafstarān az pušt ī pāy ud abārīg handām hamē brīd
u =m pursīd kū ēn awēšān ruwānān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwandān kē =šān pad gētī xwarišn ud wistarg az xwēš_tan pardāxt būd
u =šān ō wehān ud arzānīgān nē dād ud tis =iz rādīh nē kird ud andar tan ī xwēš ud mardōm ī =š andar sālārīh mad ēstād būd gursag ud tišnag ud abēǰāmag dāšt
u =šān sarmāg ud garmāg ud suy ud tišn burd
nūn ōy murd ud xwāstag ō anī kas mānd
nūn ruwān ōwōn garān pādifrāh barēd az kunišn ī xwēš
ēg =im dīd ruwān ī awēšān kē =šān mārān gazīd ud uzwān hamē xward
u =m pursīd kū awēšān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān drōzanān ud anast_gōwišnān kē pad gētī zūr ud drō ud anast was guft
ēg =im dīd ruwān ī mard =ēw kē frazend ī xwēš ōzad ud mazg hamē xward
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy dādwar ī wizīrgar kē pad mayān ī wizīr_xwāstārān wizīr ī drō kird
u =š hučašmīhā ud rāstīhā abar pēšmālān ud pasēmālān nē nigerīd ud bē ō xwāstag_kāmagīh ud āzwarīh abar xwāstārān pad hešm ud sneh drāyīd
ēg =im dīd ruwān ī awēšān kē =šān mēx =ēw dārēn abar čašm zad ēstād
u =m pursīd kū ēn tan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy duščašmān kē =šān pad gētī nēkīh az mardōmān abāz dāšt
u =m dīd ruwān ī awēšān kē =šān nigūnsār andar dušox ōbast ēstād ud azēr dūd ud garmīh ud azabar wād ī sard abar abgand ēstād
u =m pursīd kū ēn tanān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān kē pad gētī gyāg ud xān ī kārwānīgān ud aspanǰ ud gyāg ī tanūr ud brēzan nē dād ud kē dād mizd az =iš stad
ēg =im dīd ruwān ī awēšān zanān kē pad dast ī xwēš pestān ī xwēš abar tābag ī garm nihād ēstād ud kust ō kust hamē gardānīd
u =m pursīd kū ēn zan čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān zanān kē kōdak ī xwēš šīr nē dād nizār ud tabāh kird ud ayāftīh ī gētī rāy šīr ō kōdak ī kasān dād
ēg =im dīd ruwān ī zan =ēw kē kōf =ēw pad pestān hamē kand ud tišnag ud gursag hamē būd
u =m pursīd kū ēn zan čē wināh kird
gōwēd srōš_ahlaw ud ādur_yazad kū ēn ruwān ī ōy druwand zan kē kōdak ī xwēš šīr nē dād ud gursag ud tišnag hišt ud xwad kāmag ī āz ud waran ī abārōn_marzišnīh rāy abāg mard ī bēgānag šud
ēg =im dīd ruwān ī mard =ēw kē uzwān brīd ēstād ud pad mōy hamē kešēnd ud nasā hamē afšānēnd ud pad kabīz paymāyēnd
u =m pursīd kū ēn mard čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī ōy druwand mard kē =š pad gētī tōxm stad u =š guft kū afšānam u =š nē afšānd u =š xward ud spandarmad zamīg drōzan kird
ēg =im dīd ruwān ī mard =ēw ud zan =ēw kē uzwān brīd ēstād
u =m pursīd kū ēn tanān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwand mard ud zan kē =šān pad zīndagān drō ud anast was guft ud ruwān ī xwēš drōzan kird
ēg =im dīd ruwān ī zan =ēw ud mard =ēw kē abar rīd ud bē xward
u =m pursīd kū ēn tanān čē wināh kird kē ruwān ōwōn garān pādifrāh barēd
gōwēd srōš_ahlaw ud ādur_yazad kū ēn ruwān ī awēšān druwand mard ud zan kē =šān pad gētī nasāy pad wināhgārīh ǰūd ud babrag ī ābīg andar āb ōzad ud abārīg dām ī ōhrmazd zad ud ōzad
ud anīz was dīd ruwān ī druwandān mardān ud zanān ud sahmgen ī bīmgen ī rēšken ī purr_anāgīh ī was dard ī tārīg ī andar dušox zaxm ud pādifrāh ī gōnag gōnag hamē barēnd
ēg =im dīd ruwānān kē =šān pad mēx ī dārēn zuwān rust ēstād ud andar dušox nigōnsār frōd hamē šud hēnd ud dēwān pad šānag ī āhenēn hamāg tan ī awēšān hamē kand
u =m pursīd kū ēn ruwānān ān ī kē hēnd u =šān čē wināh kird kē =šān ruwān ōwōn garān pādifrāh barēd
gōwēd srōš ahlaw ud ādur yazad kē ēn ruwān ī awēšān druwandān kē =šān pad gētī andar xwadāyān aburd_framān būd hēnd ud andar spāh ud gund ī xwadāyān dušmen būd hēnd
nūn ēdar ōwōn garān dard ud zaxm ud pādifrāh abāyēd burdan
ēg =im dīd ganāg mēnōy ī purr_marg ī gēhān_murnǰēnīdār ī dušdēn kē andar dušox ō druwandān afsōs ud riyahrīh hamē kird ud guft kū čē rāy nān ī ohrmazd hamē xwarēd ud kār ī man kunēd ud pad dādār ī xwēš nē menēd ud kāmag ī man warzēd ōwōn was afsōskarīhā ō druwandān hamē drāyīd
pas srōš ahlaw ud ādur yazad ān ī man dast frāz grift ud az ān gyāg ī tārīg ī sahmgen ī bīmgen bē āwurd ō ān ī asar rōšnīh ud hanǰaman ī ohrmazd ud amahrspandān burd
ka =m kāmist namāz burdan ohrmazd pēš ud āsān būd ud guft kū drust awar tō ahlaw ardā wirāz māzdēsnān paygāmbar
šaw ō axw ī astōmand
čiyōn =it dīd dānist rāstīhā ō gētīyān gōw čē man abāg hēm kē ohrmazd hēm
harw ān ī drust rāst gōwēd man šnāsēm ud dānēm bē gōw ō dānāgān
ud ka ohrmazd pad ēn ēwēnag guft man škoft bē mānd hēm čē =m rōšnīh dīd u =m tan nē dīd u =m wāng āšnūd u =m dānist kū ēn ast ohrmazd
u =š guft dādār ohrmazd az mēnōyān abzōnīgtom kū bē gōw tō ardā wirāz ō māzdēsnān ī gētī kū ēk ast rāh ī ahlāyīh rāh ī pōryōtkēšīh ud ān ī abārīg rāh hamāg nē rāh
ān ēk rāh gīrēd ī ahlāyīh ud ma pad frāxīh ud ma pad tangīh ud ma pad ēč rāh aziš wardēd
ud bē warzēd humat ud hūxt ud huwaršt ud pad ān ham dēn ēstēd ī =š az man padīrift spitāmān zarduxšt ud wištāsp andar gēhān rawāg kird
ud dārēd dād ī frārōn az abārōn pahrēzēd
ud ēn =iz abar āgāh bawēd kū xāk bawēd gāw ud xāk bawēd asp ud xāk bawēd zarr ud asēm ud xāk bawēd ān ī mardōmān tan
ān ēk ō xākīh nē gumēzēd kē andar gētī ahlāyīh stāyēd ud kār kirbag kunēd
drust tō ardā wirāz ō ān ī xwēš ābādīh šaw čē harw pākīh ud pādyābīh ī ašmāh kunēd ud dārēd ud hamāg ka dādīhā dārēd pāk yōǰdahrīh ud yazišn ka pad hamgōnag yazadān menišnīhā kunēd hamāg man dānēm
ud ka ān saxwan āšnūd zufr namāz burd ō dādār ohrmazd
ud pas srōš ahlaw pērōzgarīhā ud nēw dilērīhā widārd ō ēn gāh ī wistarg
pērōz bawād xwarrah ī weh dēn ī māzdēsnān
afsōn tab ud xōn abāz ēstādan
šnāyišn ī dādār ohrmazd ud wispān yazadān ud hamāg yazadān ī mēnōyān gētīyān
afsōn tab
surahī
virsā
anmō
karošī
vašā
ahrąs
ahrs
wlyy’m’n ī mād duxt rasīdan pad nām ī ān tan se tāg ud mād se tāg
ud agar tab ī čahārom ast ān grāy ī abar mayān abgand ud ēk az snyd ud ēk az snyd
ud agar mard pad bāzūg ud agar zan pad bāzūg bastan
afsōn ud nērang xōn abāz ēstādan rāy wāz sūd wahišt ud ēw tan roz afsōn haft bār ayāb dah ī bār ayāb wīst_ēk bār padiš abar guftan
afsōn ud ēn kō
kārō
nāga
kārō
nō
āb az xānag kē bastan bast pad framān ī nēw frēdōn az kōf andar āmad tan ēw ’sṗwlys nihuft tan ēw ’sṗwlys paymōxtan ud nō tabarzīn pad dast dārēd aniiāi