Select Section Type

pad nām ī yazadān
ēdōn gōwēnd ēw_bār ahlaw zarduxšt dēn ī padīrift andar gēhān rawāg kird
bowandagīh se_sad sāl dēn andar abēzagīh ud mardōm andar abēgumānīh būd hēnd
ud pas gizistag ganāg mēnōy ī druwand gumān kirdan ī mardōmān pad ēn dēn rāy ān gizistag aliksandar ī hrōmāyīg ī muzrāyīg_mānišn wiyābānēnīd ī pad garān syazd ud nibard ud yask ō ērān_šahr āmad
u ōy ērān dahībed ōzad ud dar ud xwadāyīh wišuft ud awērān kird
ud ēn dēn čiyōn hamāg abestāg ud zand abar gāw pōstīhā ī wirāstag ud pad āb ī zarr nibištag andar staxr pad klyta nibišt nihād ēstād
ud ōy petyārag ī wad_baxt ī ahlomōγ ī druwand ī anāg_kirdār aliksandar ī hrōmāyīg ī muzrāyīg_mānišn abar āwurd ud sōxt
ud čand dastwarān ud dādwarān ud hērbedān ud mowbedān ud dēn_burdārān ud abzārōmandān ud dānāgān ī ērān_šahr rāy kušt ud mehān ud kadag_xwadāyān ī ērān_šahr ēk abāg did kēn ud anāštīh ō mayān abgand ud xwad škast ō dušox dwārist
ud pas az ān mardōmān ī ērān_šahr ēk abāg did āšōb ud pahikār būd ud čiyōn =išān xwadāy ud dahībed ud sālār ud dastwar ī dēn āgāh būd
ud pad tis ī yazadān gumān būd hēnd ud was ēwēnag kēš ud wurrawišn ǰud_ristagīh ud gumānīh ud ǰud_dādestānīh andar gēhān ō paydāgīh āmad
ān ka zād hufraward anōšag_ruwān ādurbād ī māraspandān padiš passāxt ī pad dēn kird rōy widāxtag abar war rēxt
ud čand dādestān ud dādwarīh abāg ǰud_kēšān ud ǰud_wurrawišnān kird ud ēn dēn andar šēbišn ud mardōmān andar gumān būd hēnd
ud pas mowmardān ud dastwarān ī dēn anī būd hēnd
az ān mar andōhōmand ud purr pēm būd hēnd
u =šān pad dar ī pērōzgar ādur ī farrbay hanǰaman xwāst
ud was ēwēnag saxwan ud uskār abar ēn būd =mān čārag xwāstan abāyēd =mān kas =ēw šawēd ud az mēnōyān āgāhīh āwarēd mardōmān ī andar ēn āwām hēnd dānēnd ēn yazišn ud drōn ud āfrīnagān ud nērang ud pādyābīh ud yōǰdahrīh ī amāh pad kardag āwarēm ō yazadān rasēd ayāb ō dēwān ud ō frayād ī ruwān ī amāh rasēd ayāb
u =šān pas pad hamdādestānīh ī az dēn dastwarān hamāg mardōm ō dar ī ādur farrbay xwānd hēnd
u =šān az hāmōyēn ǰudāg kird haft mard pad yazadān ud dēn abēgumāntar būd hēnd
u =šān xwēš menišn ud gōwišn ud kunišn wirāstagtar ud frārōntar ud guft ašmāh xwēšīhā nišīnēd ud az ašmāh ēk =ēw pad ēn kār weh ud awināhtar ud husrawtar wizīnēd
ud pas awēšān haft mard nišast hēnd ud az haft se ud az se ēk =ēw wirāz nām wizīd ud ast weh_šābuhr nām gōwēnd
ud pas ōy wirāz čiyōn =iš ān saxwan āšnūd abar ō pāy ēstād ud dast pad kaš kird ud guft agar =itān sahēd ēg =im akāmagōmand mang ma dahēd ašmāh mazdēsnān war nēzag abganēd ud agar nēzag ō man rasēd kāmagōmandīhā šawēm ō ān gyāg ī ahlawān ud druwandān ud ēn paygām drustīhā barēm ud rāstīhā āwarēm
ud pas awēšān māzdēsnān war nēzag āwurd
fradom bār pad humat ud didīgar bār pad hūxt ud sidīgar bār pad huwaršt harw se nēzag ō wirāz āmad
ud ōy wirāz rāy haft xwah būd ud awēšān harw haft xwahān wirāz čiyōn zan būd hēnd
u =šān dēn warm ud yašt kird ēstād ud ka =šān āšnūd ēg =išān ōwōn grāntom mad hēnd ud drāyīd hēnd ud wāng kird hēnd ud andar hanǰaman ī māzdēsnān pēš šud hēnd ēstād hēnd ud namāz burd hēnd ud gōwēnd ma kunēd ašmāh māzdēsnān ēn tis
čē amāh haft xwah hēm ud ōy ēk brād ud harw haft xwah ōy brād zanīh hēm
čiyōn aškōb =ēw haft frasp ud stūn =ēw azēr andar nihād ēstād ān stūn stanēnd awēšān fraspān ōftēnd ōwōn amāh haft xwah rāy brād ēn ēk ast =mān zīyišn ud dārišn
frāz az yazadān harw nēkīh az ōy ast
ašmā pēš az zamān az ēn šahr ī zīndagān ō ān ī murdagān frestēd abar amāh stahm =ēw abēčim kird bawēd
ud pas awēšān māzdēsnān čiyōn =išān ān saxwan āšnūd awēšān haft xwaharān rāy hunsandīh dād ud guft amāh wirāz haft rōz tan_drust ašmāh abespārēm ud ēn nām farrōxīh abar ēn mard mānēd
ud pas awēšān hamdādestān būd hēnd
ud pas ōy wirāz pēš ī māzdēsnān dast pad kaš kird ud ō awēšān guft dastwarīh ast ruwānīgān yazēm ud xwarišn xwarēm ud handarz kunēm pas may ud mang dahēd
dastwarān framūd hamgōnag kun
pas awēšān dēn dastwarān andar mān ī mēnōy gyāg =ēw ī gām pad ān ī xūb wizīd
ud ōy wirāz sar ud tan šust ud paymōzan ī nōg paymōxt pad bōy xwaš bōyēnīd
pad taxt_gāh ī passazag wistarg nōg pāk wistard
ō gāh wistar ī pāk nišast ud drōn yašt ud ruwānīgān ayādēnīd ud xwarišn xward
ud pas awēšān dēn dastwarān may ud mang ī wištāspān se ǰām ī zarrēn purr kird u =šān ēk ǰām pad humat ud didīgar ǰām pad hūxt ud sidīgar ǰām pad huwaršt frāz ō wirāz dād
u ān may ud mang xward ud ōšyārīhā wāz guft ud pad wistarg xuft
awēšān dēn dastwarān ud haft xwahān haft rōz šabān pad ātaxš hamēšag_sōz ud bōy_wizārag nērang ī dēnīg abestāg ud zand guft ud nask yašt ud gāhān srūd ud pad tārīg pās dāšt hēnd
ud awēšān haft xwahān pad pērāmōn ī wistarg ī ōy wirāz nišast hēnd ud haft rōz šabān abestāg yašt
awēšān haft xwahān abāg hamāg māzdēsnān dēn dastwarān ud hērbedān ud mowbedān pad ēč ēwēnag pānagīh hišt
ud ruwān ī ōy wirāz az tan ō čagād ī dāitī činwad puhl šud
ud haftom rōz_šabān abāz āmad ud andar tan šud
wirāz abar āxist čiyōn ka az ān xwamn ī xwaš āxēzēd ud xwamn_menišn ud huram
ud awēšān xwahān abāg dēn dastwarān ud māzdēsnān čiyōn =išān wirāz dīd šād ud huram būd hēnd
u =šān guft drust āmad wirāz ī amāh māzdēsnān paygāmbar az šahr ī murdagān ō ēn šahr ī zīndagān āmad
awēšān hērbedān ud dēn dastwarān pēš ī wirāz namāz burd ud pas ōy wirāz čiyōn =iš dīd padīrag āmad ud namāz burd guft ašmāh rāy drōd az ohrmazd xwadāy ud amahrspandān ud drōd az ahlaw zarduxšt ī spitāmān ud drōd az srōš ahlaw ud ādur yazad ud xwarrah ī dēn ī māzdēsnān ud drōd az abārīg ahlawān ud drōd az nēkīh ud āsānīh abārīg mēnōyān ī wahišt
ud pas dēn dastwarān guft drust awar wirāz ī amāh māzdēsnān paygāmbar u =t drōd bawād =iz harw čē =t dīd rāstīhā ō amāh gōw
pas ōy wirāz guft fradom gōwišn ēn gursagān ud tišnagān naxust xwarišn dādan ud pas pursišn aziš kirdan kār framūdan
pas dēn dastwarān framūd anōš xwar
ud xwarišn ī hupoxt ud hubōy ud xwardīg ud sard āb ud may āwurd
u =šān drōn yašt ud wirāz wāz grift ud xwarišn xward ud myazd rāyēnīd wāz guft ud stāyišn ī ohrmazd ud amahrspandān ud spās ī hordad ud amurdad amahrspandān hangārd ud āfrīnagān guft
u framūd awarēd dibīr ī dānāg ī frazānag
u =šān āwurd dibīr ī frahiztag ī frazānag ud pēš nišast
ud harw čē wirāz guft drust rōšn ud gōwizār nibišt
u ēdōn framūd nibištan pad ān ī fradom šab man ō padīrag mad srōš ahlaw ud ādur yazad u ō man namāz burd hēnd ud guft drust āmad ardā wirāz ka =t ahanūz āmad zamān būd
man guft paygāmbar hēm
ud pas pērōzgar srōš ahlaw ud ādur yazad ān ī man dast frāz grift
fradom gām pad humat ud didīgar gām pad hūxt ud sidīgar gām pad huwaršt frāz ō činwad puhl mad hēm ī was pahnāg ī amāwand ohrmazd_dād
ka ō ānōh frāz mad hēm u =m dīd ān widardagān ruwān ka =šān andar ān se šab ī naxust ruwān pad bālēn ī tan nišast ud ān ī gāhānīg gōwišn guft uštā ahmāi yahmāi ušta kahmāiči† nēk ōy az ān ī ōy nēkīh kadār =iz =ēw nēkīh
u andar ān se šab ān and nēkīh ud āsānīh awiš mad ēstēd čand hamāg nēkīh ī pad gētī dīd čiyōn mard =ēw pad gētī būd aziš āsāndar ud xwaštar ud huramtar būd
pad ōšībām ī sidīgar ōy ruwān ī ahlawān andar urwar bōy ī xwaš wašt
u xwaštar sahist ān bōy čiyōn harwisp bōy xwaš ī pad zīndagān pad wēnīg abar šud ud ān bōy wād az rabihwintar rōn az nēmag ī yazadān āyēd
u ān ī xwēš dēn ud ān ī xwēš kunišn kanīg kerb ī nēk pad dīdan ī hurust pad frārōnīh rust ēstād frāz pestān pestān abāz nišast ī dil ud gyān dōst kerb ēdōn rōšn čiyōn dīd hudōšagtar nigerišn abāyišnīgtar
ud pursīd ān ī ahlawān ruwān az ān kanīg ud xwēš =m hagriz pad zīndagān gētī ēč kanīg nēkōgtar ud hučihrtar kerb az ān ī dīd
u passox dād ān ī xwēš dēn ud ān ī xwēš kunišn man kunišn ī hēm ǰuwān ī xūb menišn ī xūb gōwišn ī xūb kunišn ī xūb dēn
kāmag ud kunišn ī rāy ka man ēdōn meh ud weh ud hubōy ud pērōzgar ud abēbēš hēm čiyōn sahēd
čē pad gētī gāhān srūd u =t āb ī weh yašt u =t ātaxš pahrēxt u =t mard ī ahlaw šnāyēnīd az dūr frāz mad az nazdīk
ka man frabih būd hēm ā =t frabihtar kird hēm ud ka man nēk būd hēm ā =t nēktar kird hēm ud ka arzānīg būd hēm ā =t arzānīgtar būd hēm ud ka pad gāh ī čašmgāhān nišast hēm ā =t čašmgāhtar nišāst hēm ud ka burzišnīg būd hēm ā =t burzišnīgtar kird hēm pad ēn humat ud hūxt ud huwaršt ī warzīd mard ī ahlaw pas az yazēnd pad ān ī ohrmazd dagr yazišnīh ud hampursagīh ka dagr zamān ohrmazd rāy yazišn ud hampursagīh ī frārōn kunēnd āsānīh aziš
pas ān činwad puhl nēzag pahnāy abāz būd
man pad abāgīh ī srōš ahlaw ud ādur yazad pad činwad puhl xwārīhā ud frāxīhā ud nēw_dilērīhā ud pērōzgarīhā widard hēm
was pānāgīh ī mihr yazad ud rašn ī ristag ud wāy ī weh ud wahrām amāwand ud aštād yazad freh_dādār ī gēhān ud xwarrah ī dēn ī weh ī māzdēsnān ud frawahr ī ahlawān ud abārīg mēnōyān ō man ardā wirāz naxust namāz burd hēnd u =m dīd man ardā wirāz rašn ī rāst tarāzūg ī zard ī zarrēn pad dast dāšt ud ahlawān ud druwandān handāzīd
ud pas srōš ahlaw ud ādur yasd dast ī man frāz grift ud guft āy ō nimāyēm wahišt ud dušox ud rōšnīh ud xwārīh ud āsānīh ud frāxīh ud xwašīh ud huramīh ud rāmišn ud šādīh ud hubōyīh ī wahišt pāddāšn ī ahlawān
u =t nimāyēm tārīgīh ud tangīh ud dušxwārīh ud wadīh ud bēš ud anāgīh ud gandagīh pad dušox pādifrāh ī gōnag gōnag dēwān ud ǰādūgān ō bazakkarān kunēnd
u =t nimāyēm gāh ī rāstān ud ān ī drōzanān
u =t nimāyēm pāddāšn ī xūb_wurrawišnān pad ohrmazd ud amahrspandān ud nēkīh ī pad wahišt ud anāgīh ī pad dušox ud astīh ī yazadān ud amahrspandān ud nēstīh ī ahriman ud dēwān ud būdan ī ristāxēz ud tan ī pasēn
u =t nimāyēm pāddāšn ī ahlawān az ohrmazd ud amahrspandān pad andar wahišt
u =t nimāyēm zaxm ud pādifrāh ī gōnag gōnag ī ō druwandān pad andar dušox az ahriman ud dēwān petyāragān
gyāg =ēw frāz mad hēm u =m dīd ruwān ī mardōm ēw_čand pad ham ēstād hēnd
u =m pursīd az pērōzgar srōš ahlaw ud ādur yazad awēšān hēnd ud čē rāy ēdar ēstēnd
gōwēd srōš ahlaw ud ādur yazad ēn gyāg hamēstagān xwānēnd ud ēn ruwānān tan ī pasēn ēn gyāg ēstēnd ud ruwān ī awēšān mardōmān =šān kirbag ud wināh rāst būd
ud ō gētīyān gōw ān ī xwārtar kirbag az āz ud bēš ma dārēd
čē harw se srōšōčarnām kirbag wēš wināh ō wahišt wināh wēš ō dušox harw rāst tan ī pasēn pad ēn hamēstagān ēstēnd
u =šān pādifrāh az wardišn ī andarwāy sardīh ayāb garmīh u =šān abārīg petyārag nēst
ud pas naxust gām frāz niham ō star pāyag pad humat ān gyāg humat pad mehmānīh ud wēnam ān ahlawān ruwān =šān čiyōn star rōzāg rōšnīh aziš hamē waxšīd
u =šān gāh ud nišast abēr rōšn ud burz ud purr xwarrah būd
u =m pursīd az srōš ahlaw ud ādur yazad ēn gyāg kadām ud ēn mardōm kadām hēnd
u =šān guft srōš ahlaw ud ādur yazad ēn gyāg star_pāyag ud awēšān ruwānān hēnd =šān pad gētī yašt kird ud gāhān srūd ud