abar panǰ xēm ī āsrōnān ud dah handarz kē hamāg handarz ī dēn abar paywastag

ān panǰ xēm

fradom awināhīh

didīgar wizīn_kirdārīh ī menišnān ud gōwišnān ud kunišnān

sidīgar dastwar_dārīh čiyōn ān ī rad ī dānāgtar ī rāst_gōwišntar kē dēn_āgāhīhā hammōxtēd ud rāstīhā hammōzēd

čahārom yazišn ī yazadān rāst_wāzagīhā wāzagīhā warm naskīhā pad nērang yaštan

panǰom rōzān_šabān šnāyišnīhā andar xwēškārīh ēstādan abāg xwēš hamēstār kōxšišn kirdan zīndag_drahnāy az āstawānīh ī dēn bē nē waštan ud pad xwēškārīh tuxšāg būdan

ān ī dah handarz

fradom husrawīh ī xwēš sālār ud hammōzgār ud rad ud pid abāyistan rāy husrawīhā raftan

didīgar dusrawīh ī awēšān sālārān nē būdan rāy az dusrawīh škeft pahrēz būdan

sidīgar ān ī xwēš hammōzgār pad ān ī drāztar čōb nē zadan ud nē bēšīdan rāy čē nē āšnawēd az xwēš hammōzgār pad =iš nām nē srawēnīdan

čahārom nām paydāgīh az ahlawān nē appurdan rāy čē hammōxt az xwēš hammōzgar rādīhā abāz ō arzānīgān abespārēd

panǰom rawāg_dēnīh rāy kerbakkarān mizd bazakkarān tōzišn ī pad_dād nihādan

šašom ahlāyīh_daxšag andar xwēš mān mehmān kirdan rāy rāh ī wehān ō xānag wišādag dāštan

haftom druz ī andar wārom ahōšīhā nē waxšēnīdan rāy abāg wehān kēn nē dāštan ud pad apetītīgīh az wināh nē ēstādan

haštom druz az [MK 139 137 ] wārom brīdan rāy kēn az menišn ōgārdan ud az wināh tēz petītīg būdan

nohom pēš_rawišnīh ud pas_rawišnīh ī dēn šnāxtan

ud pēš_rawišnīh ī dēn frāz ō pēš dāštan ud kār ud bahr pad =iš xwāstan

ud pas_rawišnīh ka petyārag ō dēn rasēd dēn abāz ō pas ud tan pad mkwyīh ī dēn dāštan

dahom srōšyārīh rāy andar xwadāy ud rad ud dastwar ī dēnīg huniyōxš būdan

frazaft pad drōd šādīh rāmišn