Select Section Type

1.0
ēn wāzag ēw_čand anōšag_ruwān ādurbād ī māraspandān andar bē_widerišnīh ī ō gētīyān guft ud čāšt kū
2.0
ayād pad daxšag dārēd ud kār az =iš gīrēd
3.0
ud hambār ma kunēd kū =tān niyāz abar nē rasād
4.0
čē hambār ī kird nē bē ō niyāz kam nē rasēd
5.0
hambār ēwāz ahlāyīh wēš tuxšēd kār ud kirbag
6.0
čē tis ī pad hambār šāyēd dāštan ēwāz ahlāyīh weh
7.0
kēn pad menišn ma dārēd kū =tān dušmenān abar nē āxēzānd
8.0
ud bē nigerēd kū az dušmen pad kēn zadan čē rēš ud zyān ud wanī_būdagīh abar šāyēd madan
9.0
ud gugārēd kēn andar wārom ī xwēš
ma zanēd dušmen pad kēn
čē paydāg kū kē ān ī kamist kēn framōšēd ā =š az ān ī mahist bīm bōzēnd pad čēh_widarg
andar pēšēmālīh ud pasēmālīh saxwan rāstīhā gōwēd kū pad dādestān bōxtagtar bawēd
čē paydāg kū mard pad gugāhīh ī rāst dādan ahlaw bawēd
druwand =iz bawēd ōy kē dārēd nē dahēd
paymān_xwarišn bawēd kū dagr_pattāy bawēd
čē paymān_xwarišnīh pad tan weh ud paymān_gōwišnīh pad ruwān
ud ōy =iz ī andak_xwāstagtom mard ka paymān xēm tuwāngar handāzag ō ruwān wēš kunēd kū ō aškamb
čē aškomb_hambār mard frāyist mēnōy_wišōb bawēd
zan az paywand ī xwēš gīrēd kū =tān paywand dūrtar rawād
čē frāyist wišuftan ud kēn ud zyān ī ō dāmān ī ohrmazd mad az ān wēš būd ī ka =šān duxt ī xwēš bē dād u =šān pus ī xwēš rāy kasān pad zanīh xwāst ta dūdag bē wināhēd
az pid ī gāwān ud gōspandān xwardan pahrēz saxt kunēd čē =tān ēdar ud ānōh āmār ī saxt abar bawēd
čē mard kē gōšt ī gāw ud gōspand xward ēstēd dast andar wināh dārēd wināh čē menēd ud gōwēd ud kunēd
ud ka =š mtwkčk =ēw xward ēstēd ud dast andar wināh dārēd ka pad anī gyāg uštar =ēw mard =ēw bē ōzanēd ōy ēdōn bawēd čiyōn ka =š pad dast ī xwēš ōzad hē
kārwānīgān_padīr bawēd kū =tān ēdar ud ānōh abērtar padīrānd
čē kē dahēd stanēd u =š waxš =iz abar pad xwaran ānōh nišānēd kū =tān ōh nišānānd ēg =iš gāh ī meh ān gyāg ī mard ī weh nišīnēd
gāh rāy ma kōxšēd čē gāh ī twšk_mard frāyist mēnōy_wišōb bawēd
pad kirbag hamdādistān ud pad wināh ǰud_dādestān
ud pad nēkīh spāsdār ud pad petyārag hunsand ud az dušmen dūr
ud pad kirbag nē wizend_kār ud pad wad ayār ma bawēd
ka škofttom tis rasēd pad yazadān ud dēn gumān ma bawēd
ma abēr šād bawēd ka =tān nēkīh awiš rasēd
ma abēr bēšīd bawēd ka =tān anāgīh awiš abar rasēd
pad petyārag hunsand ud pad astānag bārestān
pad zīndagīh wistāx ma bawēd bē pad kunišn ī frārōn wistāx bawēd
čē hukunišnān ān ī xwēš kunišn ǰādag_gōw ud duškunišnān ī ān ī xwēš hamēmāl
čē menišnān ud gōwišnān ud kunišnān kunišn ī pahlomtar
čē man ādurbād ī māraspandān rāy anāgīh nē bawēd ī =m frāz awiš mad kē =š 68711 ēwēnag rāmišn aziš nē padīrift
fradom ēn kū ābādīhā ka =m anāgīh ēn čē az ēn wattar šāyēd būdan
didīgar ēn kū ka =m anāgīh nē ō ruwān bē ō tan mad čē pad tan weh šāyēd widārdan kū pad ruwān
sidīgar ēn kū =m az anāgīh ī man rāy ǰahist ēstēd ēk widārd
čahārom ēn kū =m ābādīhā mad ēstēd ka man mard =ēw ōwōn nēk ham ī gizistag ahriman ī druwand ud dēwān ēn anāgīh wehīh ī man rāy pad tan ī man kird
panǰom ēn kū harw kē wad ud anāgīh kunēd ō xwad ayāb ō frazendān rasēd ud ān ī ō man mad ō frazendān ī man nē rasīd
šašom ēn kū ahriman ī druwand dēwān harw anāgīh ī dād pad dāmān ī ohrmazd rāy dāšt ēstēd ān ī ō man mad ganǰ ī ahriman kāhist u =š pad anīz weh =ēw did kirdan nē tuwān
ud az duščašmīh ud xwad_dōšagīh ud wehān dušmenīh ud hešmenīh ud āzwarīh ud spazgīh ud drōzanīh saxt aziš pahrēzēd kū =tān tan dusraw ud ruwān druwand nē bawād
ma handāzēd wad ō wattarān čē wattar ōy xwad rasēd ō ān ī xwēš kunišn
sazistan ī wattaran rāy az amāwandīh wehīh ayād ud pad daxšag dārēd
kē būd kē ō wattarān paywast kē frazām nē pašēmānīh būd
wehīh kunēd čē wehīh weh
nēk ast wehīh ka wattarān =iz wehīh stāyēnd
ud harw čē dānēd kū xūb kunēd
harw čē dānēd kū nē xūb ma kunēd
harw čē =tān pad xwēš tan nē nēk sahēd abāg anī kas ma kunēd
māndag ō radān garzīdan ud aštar ī srōšīg burdan ud hamīh vičidāiti kirdan pad xwār ma dārēd
ēw_kāmag hēd mardōm hēd
ma nigerēd ō harw dō kāmag
čē nē bawēnd tan ud ruwān harw dō hamkāmag
čē tan pad tan_kāmagīh šāyēd dāštan ud ruwān pad ruwān_kāmagīh
pad harw gāh kēn rāy wināh nē bē pad kār ud kirbag kirdan tuxšāgtar bawēd
waran rāy dād ī frārōn bē ma hilēd
hešm az kas rāy abēwināhān az staftīh ma zanēd
kēn rāy mihrōdruz ma gīrēd kū pad kunišn ī xwēš griftār nē bawēd
pad zanān wistāx ma bawēd kū ō šarm ud pašēmānīh nē rasēd
rāz ō zanān ma barēd kū =tān ranǰ abēbar nē bawād
dušxradān framān ma padīrēd kū ō wanī_būdagīh nē rasēd
čē čahār tis ywšyt’’n rāy ēn wēš pad kār andar abāyēd xrad ud hunar ud dīdan ud dānišn dānistan tuwāngarīh ud rādīh ud xūb gōwišnīh ud xūb kunišnīh
čē hunar kē =š xrad nē abāg ōš ast ī pad tan ī mard
dīdan ka =š dānišn abāg nēst tan pahikar =ēw ast ī nigārdag
tuwāngarīh ka =š rādīh abāg nēst ganǰwar ast ī ahriman
xūb_gōwišnīh ka =š hukunišnīh abāg nēst ahlomōγīh ast ī āškārag
ahlomōγān daxšag šaš
huxēm_barāy dušxēm_srōg
abēdahišn_srōg ī anāg_kirdār
pad kasān frāx_dranǰišn ud pad xwad tang_dast
rād hōmānāg ud wad_dahišn
ud bārestān dušnām
ud ǰud_menišn ud ǰud_gōwišn ud ǰud_kunišn
saxwan ka =š sūd =ēw ī nāmčištīg aziš abāg nēst bē ān ī abar huramīh ēnyā ma gōwēd
ud ān =iz ī pad huramīh gāh ud āwām bē nigerēd
čē uzwān pānag xrad
ud tan bar frahang
ud kirbag pāddāšn wahišt
gētī bar xwardan dādan
ēd rāy čē harw hunar ō xrad ud harw xrad ō dānišn ud harw dānišn ō uzmāyišn ud harw burzišn ō husrawīh ud harw kār ō ǰahišn ud harw tuwāngarīh ō xwardan ud dādan ud harw rāmišn ō abēbīmīh niyāz
ma abēr šād bāš ī ka =tān nēkīh awiš rasād
ud ma abēr bēšīd bāš ī ka =tān anāgīh awiš rasēd
čē nēkīh ud anāgīh harw dō ō mardōmān šāyēd madan
pad nēkīh ī mad ēstēd andar yazadān spāsdārīh kunēd ud yazadān ud wehān az =iš bahr kunēd
pad yazadān bē hilēd čē pāddāšn az ān gyāg kū abāyēd madan xwad rasēd
abar zamīg warz ī nēk kunēd čē harw kas zīyišn parwarišn az warz ī spandarmad zamīg
ud āb ātaxš ud gāw ud gōspand ud sag ud sag_sardagān wināh abar ma kunēd kū =tān rāh ī wahišt ud garōdmān ō bastagīh nē rasād
pad kirbag kirdan kē az dūr kē az nazdīk frāz rasēd dar wišādag dārēd
čē ōy kē pad kirbag kirdan dar wišādag nē dārēd ēg =iš dar ī wahišt ud garōdmān aziš bē bandīhēd
pad frahang xwāstārīh tuxšāg bawēd
čē frahang andar frāxīh payrāyag ud andar škeftīh pānag ud andar astānag dast_gīr ud andar tangīh pēšag
ud ka =tān bē dānist hē kār u =š kunēd
čē wēš dānistan ud kam wurrawistan wēš_wināhtar
xrad ī was dānišn ka =š wehīh abāg nēst wīr ō ahlomōγīh ud xrad ō sāstārīh wardēd
pad kas =iz kas afsōs ma kunēd
čē afsōsgar mard afsōs_bar bawēd zad_xwarrah ud nifrīdag bawēd
u =šān frazend =iz ī šāyendag ī artēštār kam bawēd
harw rōz hampursagīh rāy frāz ō hanǰaman ī wehān šawēd
čē ōy kē hampursagīh rāy frāz ō hanǰaman ī wehān wēš šawēd ēg =iš kirbag ud ahlāyīh wēš baxšēnd
harw rōz se bār andar ō mān ī ātaxšān šawēd ātaxš niyāyišn kunēd
čē ōy kē andar mān ī ātaxšān wēš šawēd ud ātaxš niyāyišn wēš kunēd ā =šān xwāstag ud ahlāyīh wēš baxšēnd
tan az drō bazag
ud az zan ī daštān ud rōspīg pēmēnīdag dūr bawēd
saxt pahrēzēd kū =tān az rištagīh ī pad tan wad ī pad ruwān awiš nē rasād
hamēšag ēn and wināh ī ō puhl šawēd andar hāsr bē ma hilēd kū =tān abēzag weh_dēn ī mazdēsnān hamēmāl nē bawēd
tan ōšōmand
ruwān ’stwn kirbag kunēd
čē ruwān ast nē tan
mēnōy ast nē gētī
tan rāy āzarm ruwān bē ma hilēd ud ma framōšēd
pad āzarm kas frasāwandīh ī xīr ī gētī kāmag abar ān tis ma barēd kē =tān tan ō puhl ud ruwān ō pādifrāh rasēd
dōšāram kas rāy āzarm ī ruwān bē ma hilēd kū =tān akāmagīhā pādifrāh ī garān widārdan nē abāyēd
anōšag_ruwān bawād ādurbād ī māraspandān kē =š ēn handarz kird u =š ēn framān dād
frazaft pad drōd ud šādīh