Select Section Type

1.0
wištāsp yašt bun
2.0
ēn čand wāzīhā ka pad gāhīhā abāyēd guftan
3.0
abāg mānsrag ud zand pursišn ī abartar gāhīhā_kunišnīh mānsrag abzōnīg ī ahlaw ahlāyīh rad
4.0
pad yazišn ud niyāyišn ī šnāyēnīdārīh frāz wābarīgānīh
5.0
abāg mānsrag ud zand pursišnīh abartar_gāh_kunišnīh mānsrag abzōnīg ahlaw ahlāyīh rad
6.0
abāg mānsrag ud zand pursišn ud abartar_gāhīhā_kunišnīh ud mānsr_spand ahlaw ahlāyīh rad
7.0
abāg mānsrag ud zand pursišn abartom_gāh_kunišnīh ud mānsr_spand abar_radīh ud rad ī harwisp gāh ī abar_radīh
8.0
dahmān ham kū mard ī weh mard ham āfrīn gōwišn ī ham kū āfrīn gōwam bē rasād
9.0
abar guft zarduxšt pus ī kay wištāsp
xwarrahōmand tō sahist u =š ēdōn guft zarduxšt ō kay wištāsp kū xwarrah ī dēn ī weh ī mazdēsnān sahist abar tō ud man kē zarduxšt ham
ābād_zīyišn xūb_zīyišn ud dagr_zīyišn kū dagr zīyišn ī druyist zīyēd pad padēxīg zīyēd
zīyēd ašmāh abāg narān zīyēd ašmāh abāg nārikān zīyēd ašmāh abāg pus ud duxt ud abārīg frazendān ašmāh druyist ud aranǰ bawēd kū dagr zīyēd pad druyistīg kū pad padēzīh ud abēbīmīh zīyēd
xwēš tō ahlaw bawād čiyōn zarduxšt
purr_gāw bawēd čiyōn ādbiyān bawēd hād purr_gāwīg ēdōn kū az harw mōy =ēw hazār būd
purr_asp bawēd čiyōn pōrušasp būd hād purr_aspīg ēw kū az harw mōy hazār būd
ahlawēnē handāzag amargīg čiyōn kay husraw būd
arang rōd dūr rāh widār bawād čiyōn arang rōd
amāwand bawēd čiyōn wēnīdār pus ī arnawāz ay arnawāzīh ēw kū arnawāz šārnawāz dō xwah ī ǰ̌amšēd būd ud pus ī ōy ī was amāwandīh dāšt
bē zāyād az tan kālbod ī ašmāh dah pus kū šambardār frazend ašmāh bawād
se bawād čiyōn āsrōn ēhrbed čiyōn mowbedān mowbed ādurbād mānsrspandān
se bawād čiyōn artēštārān čiyōn spandiyād guštāspān
se bawēnd wāstrī_fšuwēnīdār čiyōn zaw tahmāsp andar yazadān weh
ēk pus bawād čiyōn ǰ̌āmāsp ī frašōstar
āfrīn pad =iš kunād čiyōn ǰ̌āmāsp kird abar dahībed guštāsp
ayask amarg bawēd čiyōn pešōtan guštāspān
tēz tuwānīg bawād abar ōy mihrōdruzān čiyōn mihr yazad kū kē mihr druzēnēd awēšān rāy mihrōdruz xwānēnd
sōgōmand bawēd čiyōn māh baxtār kū māh dār ud draxtān tābad u =š zarmāyīh dārēnd ud ham_čiyōnān ašmāh =iz harwispīn sōgōmand ud tābagtar dār
rōšn sōzāg bawēd čiyōn ādur yazad kū čiyōn ātaxš ī rōšn
dōst bawād čiyōn zarr ō mardōmān grāmīg ēd ašmāh čašm pad yazadān mardōmān grāmīgtar bawād
pas az bowandag bawēd čiyōn kē sāl
pahlom axwān ahlawān rōšn harwisp xwārīh pasēn āfrīn bē rasād ō ašmāh wehān ān ī pahlom axwān ahlawān rōšn hamāg xwārīh
u =t dahēd amāwandīh ud pērōzgarīh u =tān dahēd gōšt ī yyy sūrīh kū =tān nān baxt u =tān az tis ī xwēš baxt
u =š ēdōn guft zarduxšt ō pus ī kay wištāsp
u =tān dahēd ān ī mardān purr_rawišnīh ī frazend ī was_stāyīdār kū =š kasān nēw dānēd stāyīdan ud hanǰamanīg nēk dānēd kirdan
wānīdār ī kasān awānīdār ī kas ōy ī kū āgenēn wānīdār dušmānān bawēd ud dušmānān ōy rāy ma wānād
ka rasēd ō ayārīh ī kasān ā =š paydāgēnēd rāmišn kū =š pad gyāg rāmišn az ān ī tis bē nigēzād
yazad purr_xwarrah
ud yazad purr_bešazēnīdārīh
ud mehīh_paydāgīh ašmāh bawēd kū ašmāh =iz paydāgtar bawēd ka ēn tis ēdōn kunēnd
ēdōn guft zarduxšt ō pus ī kay wištāsp
kē mehīh_sūdīh ašmāh bawād
pad paydāgīh pad xwānišn kū tarasagāhīh ī yazadān ašmāh rāy sūd ī wuzurg paydāg bawād
čē ašmāh xwarrah baxšēnd yazadān āb dahēd
amāh tō rāy ēn ǰān zayēm arišwang weh tarsagāh rādīh =iz kē kāmag_dōysar hučašm ī hēnd ān ašmāh rāy abāg kāmagīh rādīh ī yašt kunēnd
frāz tō rāy az aršišwang pārand rawāg
paydāg bawād ān kē tō pus ī kay wištāsp bawād
andar ēn buland mān ī tō pad hamēšag nēk xwarišnī bawād kē saxwan_rāmišnīh nēk rasēd ud kasān =iz tō xwarišn ī nēk rasānīdag bawād
ud haguriz ma xwāhē abar_ō āsrōnān tar_xwarišn ī dād ā =t kas tar_xwarišn ī abar āsrōnān bawēd
ān kē pad xwēš rāyōmandān frazend dādan wināhgār bawēd hamčiyōnān āstārag garān bawēd čē āsrōnān rāy xwarišn ī nēk abāyēd dādan
abāz guft zarduxšt ōy ī pus ī kay_wištāsp
kē dēn ī mazdēsnān burdār kū āstawānīg ī dēn ī weh mazdēsnīg brād ayāb dōst
ān kadār =iz =ēw kē arzānīg ī dēn ī amāh bawēd kū kē brād ayāb dōst ī dēn ī weh harw kē dēn dāštār ū dēn xwānīdār awēšān rāy nigāh kun az pāk xwarišn ī dādan bē parwarēnd
kē ahlaw zarduxšt guft ō wištāsp
pad tarsagāhīh ī frašōštar ud ǰāmāsp ahlaw pus ī frašōštar awēšān rāy wāstarēnēnd kū bē parwarēnd
u =š ēdōn guft ohrmazd ōy ī ahlaw zarduxšt
ōy =iz ēdōn guft zarduxšt abar pus ī kay_wištāsp
ma xwad dušzōtīh ma adōst_zōtīh bawād kū kē yazišnīgar mard dušmenīdār ud duškirdār ma bawād ud abāg zōtīg ud adarwaxšīg dušmenīdār ēk abāg zōt ma bawād
čē yazadān yazišn ī ōy nē padīrēd
čē kē az ān dušzōtīg adōst_zōtīg mardān purr_zyān rasēd az ān =iz rāy ohrmazd az dušmenišnān adōstān zōtīg mardān yōǰdāhrīh abāz guft ēstēd
kē az =iš yazišn ī yazadān ud amahraspandān nē yazīdag bawēd
čiyōn kē tō pad niyāyišn ī yazišn xwāhēd hamčiyōnān ān dušzōtīg nē kunēd ud amahraspandān nē padīrēnd
ēdōn guft ohrmazd ōy zarduxšt
ud zarduxšt ōy =iz abar guštāsp guft ēstēd
ahlāyīh ābādīh ī pahlom ast
sidīgar pargard bun
ēg kē bē xwānēd ēn dēn tā hamčiyōn tō pus ī tō =iz bē xwānēd ay wištāsp kū čiyōn tō bē xwānēd tā ān paywandān ī tō =iz bē xwānēd
tō abartar ēst ēn dēn bē āšnaw ud kasān =iz rāy bē āmōzišn
tō abāg frazendān bawād abāg pēm bawād kū kār kirdār bawād
pēmōmand kū dēnīgān rāy az šīr parwarēnād šīrēnōmand kū hamāg šīrēnīh ī dēnīg az tō ast
ēdōn tō kē frāz gōw kū bē xwān
ohrmazd ud srōš =iz ahlaw ud dēn =iz ī mazdēsnān
az harwistīn harwisp gāh_husrāyišnīh
ud harwistīn harwisp warzišnīh
ud harwistīn harwisp hangirdīh
kū harwisp kardagīhā ud hādān warzišn ī srāyišnīg kū az hamāg hādān ī yazišn ud hangirdīg srāyišnīg srāyēnd
az awēšān srūd āšnawišn frāyīdār ī gēhān ast kū abzōnīg ī gēhān ast
ud mardān ī ahlawān rāmišnīg pad kāmag rasēd
u =š mardān ī ahlawān rāy pānagīh ud
u =š mardān ī ahlawān rāy nigāh_bānīg ud sālārīh kunēd dādār ohrmazd az ēn nēkīh ī abestāg ud zand
kē az awēšān tarsagāhīh kū abestāg ud zand tazišn ī ahlāyīh āgāhēnēnd kū āgāhīh ī kār ud kirbag bawēd
u =š ahlāyīh_frāy_dahišnīh gēhān ast
nē =iz mard ī ahlaw āgāhīh ī ahlāyīh sūdōmand hilēd dānēnd tuwān
kū anī az ēn gāhān xwānišn ī rāh ī kār ud kirbag nē tuwān dānēnd
tō abartar wardišn ī bē xwān
harwisp gyāg ī hāwanān ud harwisp ādarwaxšān pad wardišn ī bē gōw
ud harwisp gyāg ī frabirdārān harwisp ābirdārān
ud harwisp āsnīdārān ud harwisp rahwiškarag
ud harwisp srōšāwarz pad wardišnīh bē gōw
kū ēn haft gyāg ī pad urwisgāh haft amahraspandān rāy kird ī ēstēd
ān harw haft amahraspandān rāy nām tō bē gōw kū bē xwān
abar xwān tō
harwisp āsrōnān ud wāstaryōš
abar bē xwān
harwisp mān mānbed ud harwisp wis wisbed
ud harwisp zand zandbed ud harwisp deh dahībed
harwisp ǰuwān ī humenišnān ud hugōwišnān ud hukunišnān ud hudēn
kū andar dēn kār ud kirbag pad nēkīh kunēd
harwisp ǰuwān ī saxwanān gōwišnān kū andar dēn rāst_guftārtom bawēd
ud harwisp xwēdōdah kū kār ī xwēdōdah andar dēn mazdēsn kirbag guft ēstēd
kū az =iš ahriman dēwān dēw anummēdag hēnd
kū xwēdōdah wpšwpyt margarzān bawēd
harwis deh_wardišn yazam kū pāsbānīg gēhān kardag pāduxšāy bawēd awēšān =iz pad wasīh bē xwān ud yaz
harwisp huframānīh ī dēn abar bē rasīdār rāy kū andar dēn rāst framān dārēd nēk dādestānīg ud āstawānīg ī dēn māzdēsnīg
ud harwisp mān mānbedīh kū zan =ēw kē andar mān rāh ī rāst dārēd
harwisp ān tō kē ōy tuxšāgīh ast ahlāyīh kār kirdār
ān radān kē hēnd az ahlāyīh rad kū ahlaw ahlāyīh rad kē yazišn ī kirdārān rāy tō bē yaz
ud sīh ud se nazdist pērāmōh ī hāwan kē hēnd pad ahlāyīh rad ōy =iz rāy bē xwān
srāyišntom tō pus ī kay_wištāsp kū ēn =iz abar tō guft hamāg awēšān rāy sālārtom bawād
kē az =iš bē wānīd pad āgenēn hamēmālān ud adostān ī bēšīdārān bēš rāy kū wānīdār harwispīn dušmenān
pad sad ud sadagāntom
ud az sad ud x hazāragāntom
ud az hazār ud bēwar ud bēwaragāntom
ud az bēwar amar ud amaragāntom amar bawēd
ēn saxwan_gōwišnīh frāz gōwē čiyōn kē tō rāy frāz gōwēm man dād ī weh ohrmazd ast kū az harwistīn dādestānīhā kē weh ud meh dādestān ēn hēnd tō bē gōw
an tō andar yazišn ī yazē
an tō andar yazišn ī frāz yazē
ēn dām kē ohrmazd ast kū andar dēn ī ohrmaz frāz yazam
passoxīh ān abar pursīd kē pus ī kay_wištāsp ōy zarduxšt
az kē tō an yazam
az kē yazišn ī frāz yazam an
andar ēn dām ī ohrmazd kū az čē nērang kunišn yazišn ī yazam
u =š guft zarduxšt
abar tō kadār =iz =ēw paydāgēnam
tō kē ast pus ī kay_wištāsp kū az ān nērangīhā yazišn ī yazam an abar tō āškārag gōwēm
kē pēš ī urwar ī ārōyišn hēnd bē ras ay guštāsp
kū urwar az nēkīh rust ī hēnd ānōh rasīdag amāwand
ēn saxwan gōwišn ī tō frāz bē gōw kū ēn gōw
kē namāz ōy ī tō urwar ī weh ohrmazd_dād ahlaw
pas aṣ̌əm_vōhu se bē gōwišn ī se bār ān urwar ī tāg rāy yōǰdahrēnīd
pas ān barsom rāy ul barišn
fradom bār ayāb didīgar bār ayāb sidīgar bār
kū barsom pad kār ī yazišn kirdan az kārd ī barsom_čīn bē_čīnišn yazam
urwar bē čīnišn ī ān urwar ī kē yaz guft ēstēd pad yazišn yazam bē_āwarišn yazam
pad abartom aiβiiaghan barsom pad ahlāyīh frāz wisturd
pad ahlāyīh aybyāstišn yazam kū pad ahlāyīh nigerišn yazam
barsom bandišn kū zōhr ud barsom pad dahmān nigerīdag ud dahmān framūdag yazišn yazam pad abar_dādīhā
nidom hōm pad kāmag bē kōb kū tāg ī hōm pad hāwan bē kōbišn yazam kū hōm pālā bē kun pad_dādīhā
nidom hōm pad kāmag hunīšn kū hōm bē xwarišn andar yazišn mard az huframānīh xwarēd kū az ān xwardan pādaxšāyīh ayābēd kū pad pahlom axwān rasēd
ahlāyīh ābādīh ī pahlom ast
čahārom pargard bun
u =š ēdōn guft ōy zarduxšt abar ōy pus kay_wištāsp kū
tō bē xwānē wištāsp ohrmazd xwadā rāy
kē purr_xwarrahōmand ahlaw ohrmazd
tō xwānē spās ī xwadād ēd xwadādīh ay kū az xwēš estīdag ast asmān
tō xwānē zamān ī akanārag ud wāy abarkār kū mēnōy rām_yazad
bē xwānē tō wād ī tagīg ī ohrmazd_dād
kē az =iš baγ_baxt ayābēd
ēn abar guft awēšān amahraspandān rāy bē xwānē
čiyōn kē =t kāmag ayābišn ī dahēd kū harw =iz ī kē kāmēd bē ayābēd
ān druzān rāy wānišn yazam barēd wād ī taxm ud škeft spēnnāg_mēnōy dād
kū wād ī tagīg ī ohrmazd_dād pad harwisp amahraspandān tagīgtom ast abar hamāg dēwān druzān kū az tuwānagīh ī xwēš bē škennēd
purr_pāsbān az bēšīdārān bē_zadārtom dušmenān
pad āgenēn_wānīdārtom hamēmālān ud adōstān ī bēšīdārān
ēdōn ēn saxwan gōwišn frāz gōw kū ēn pargard
pad kāmag pad pēš_rawišnīh kū pad pēšōbāyīh bē gōw
abar tan ī xwēš ul warzēn ēn gōwišn kū abestāg_gōwišnīh frāz warzēn
pus kay_wištāsp ud tō bē yaz ēn ātaxš ī ohrmazd pus kē tagīg hēnd ud artēštār kū tan ī ātaxš armēšt ud mēnōy artēštār hēnd
kē =š dēw ī kund mast ǰud_mast rāy bē wānēd ān ātaxš
druǰaskān hampadēnd druwand dēwēsnān zīyišnīg ī zanēd mardōmān
kund dēw ān bawēd kū andar tan ī mardōmān kundīh nihēd
druǰask ān bawēd kū andar tan ī mardōmān yaš ud zyān nihēd
druwand dēwēsnān ān bawēd kū az kunišn ī xwēš_zīyišnīh ī mardōmān bē kāhēd
rāh ī zurwān_dād abar rasēd bē tarsēd kē =iz druwand kē =iz ahlaw ruwān bawēd
kū harw kē widerēd rāh ī zurwān_dād rasēd ud bē tarsēd kē =iz druwand kē =iz ahlawān ruwān bawēd
ēg kē ahlaw bē widerēd pas az widerišnīg ī ōy dēwān druzān
az bōy ēdōn frāz tarsēd čiyōn mēš gurgān xwistag kē az bōy ī gurg frāz tarsēnd
awēšān =iz kē dēwān druzān hamčiyōnān az bōy ruwān anōšag ī bē tarsēnd
ān ahlawān ruwān pad nīrmad ī kōfag ī xwēš andar garōdmān ī abzōnīg pad mān ī ohrmazd kē nēk kardag bē mānēd
harwisp rāh ī garōdmān ān ul barēd
kū wahištīg ōy bawēd kē ham_dahišnīh ī stōdān_yasnān saxwan gōwēd kū ēn yazišn ī bē yazēd
čē kē az =iš garōdmānīg bawēd ān
nē ān kas mard zarduxštīg rāh dārēd kū kē mard =iz ayāb kanīg pad hą bōy bē tabāhēnēd kū kāhēd
kū gyān bē zanēd andar aškomb kū mard abāg zan ī kasān gād kunēd u =š ōy zan ābistan bawēd pas ān kanīg ud mard harw dō az šarm ī kasān dārūg ud darmān appurēd ud ān dārūg kanīg xwarēd u =š ābistan ōbadēd awēšān mardōmān pad rāh ī zarduxštīg nē bawēd
čē garāntar wināh kū margarzān bawēd kū rāh ī ānōh tabāhīhēd
u =š ēdōn abar guft zarduxšt ō kay_wištāsp
bē yaz tō dēn spitāmān zarduxšt rāy
pas az abar_stāyišnīg kū yazišn yaz ud pas stāyišn abar gow
kē ēdōn ast ham_dahišnīh ī mānsr_spand
u =š ēdōn yazišn bē yazam
ud abāz wardēn tō az dād ī ǰud kū az rāh ī kasān abāz ēstēn
čiyōn abar asp ī aγrī aswār bawēd ud rāh ī ǰud_ristag rawēd pas paydāg bawēd kē abar arāhīh ī āmad ham
pas az ān gyāg asp rāy abāz wardišn wardēd ud abāz ōy ī rāh ī rast āwarēd
hamčiyōnān tō =iz asp rāy abāz nay pad rāh ī rāst kū abar dēn ī māzdēsnīg asp rāy bē āwar kū dēn bē padīr
kū az =iš was druzān rāy wānišn ast kū pad yazišn ī ēn dēn hamāg dēwān druzān nēstēnēd
čē az ulīh ul bē rawišn kē ān weh dēn ī māzdēsnīg pad xwānišn bē xwān kū abar ēn dēn ī mazdēsn bē ras ay guštāsp_šāh
ēdōn ēn nigāh dār andar axwān ān kē mardān ud nayrīgān ī dēn padīriftārān kū awēšān pānagīh bē kun
bē =iz az ōy yyy mizd frāz rādīh griftan kē mizd ī mēnōy abāyēd griftan ka =š andar garōdmān bahr ayābēd
kē andar axwān awēšān amāh dēn bē dāštār hēnd pad awēšān rādīh bē kun mizd_stanišnīh kē az astān ān weh ast kē dēnīgān rāy bē parwarēnd
nē =iz ān weh ka =š abar gyan tan ī xwēš weh_xwāstār bawēd kū xwēš xagr bawēd ud kasān rāy asagr dārēd nēkīh xwad xwāhēd
kū tō =iz ēn dēn ī mazdēsn padīrēd rawāgīh dahēd tā ka =š ōy sūdōmand pērōzgar sōšyans rawāgīh dahēd kū tā zamān ī sōšyans dēn rawāg dārēd
ēdōn =iz awēšān kasān rāy ān dahišn ī bawād ka =š ǰud_dōstān bawēd kū dušmenān ī ēn dēn bawēd abar dēn nē garōyēd awēšān =iz rāy abar dēn āstawān bē kunēd
ēg kē tō ud pus ī tō ud duxt ī tō kū dēn_burdārān harw kē bawēd dast ī šabēn rāy pāk kunēd tā fradom az saxwan nē šōyēd fradom az gōmēz ī gāw dast šōyēd ud pas az āb šustan
kē =š ast abar pad gannāg_mēnōy snehag ī menišnīh kū pad menišn ī abar gannāg_mēnōy snehag dārēd az nērōg ī dēnīg
kē nē ēdōn nērōg dārēd ān sneh nē menēd kē =š abar gannāg_mēnōy sneh_gōwišn ast kū az gōwišnīh snehag abar gannāg_mēnōy dārēd
ka =š ast abar gannāg_mēnōy dām sneh pad kunišnīh kū =š az būšāsp abar handazēd fradom dast az gōmēz ī gāw šōyēd pas kə̄manā mazdā bē gōwēd
pas az āb dast šōyēd tā šāyēd hamēdōn nērōg gīrēd čiyōn kē pad abar nibišt ōy mard ēdōn bawēd kū pad menišnīh ud gōwišnīh ud kunišnīg sneh abar gannāg_mēnōy ahriman ī stwnīdag bawēd kū snehīhā ā =š az =iš bawēd
kū āšnaw az man kē ān man gōwēm kē =š āmurzīdār ast
tō rāy ohrmazd kū wināh bē āmurzēd ud kanīg az tō padīrēd
kē ān man zarduxšt rāy dēn nimūd ēstēd ohrmazd ān dēn tō =iz padīr kē abāg mayānǰīh ī amahraspandān pad guwāgīh ī man āyīdag ast ōy pēš tō andar ēn gēhān
kū amahraspandān pad guwāgīh ī man āyīdag ast andar ēn gēhān pad padīrēnīdan ī dēn pēš tō ān dēn tō bē padīr kē ānōh mizd mēnōy bē ayābēd
kū tā dagr_husrawīh bē mānēd andar ēn axwān tā dagr_huaxwēnīh ruwān rāy pad mēnōy ast pahlom axwān
kū tā dagr_huaxwīh winnīrīh pad čīn_widarg bawēd ud pas az widirdan pahlom axwān rasēd
bē nēk_rawišnīh pad pahlom axwān bē pad nēkīh mānišn andar garōdmān ī mēhan ī ohrmazd kē nēk kardag ēstēd pad harwisp pēsīdag
ēg kē az ēn gēhān ā =š ǰudāg bawēd kū bē āyēd baxt pas ruwān rāy kē man ohrmazd ham xwad pad nēkīh saxwan pursēm pad pahlom axwān_nigēzišnīh hamčiyōn ohrmazd amahraspandān =iz man paydāgēnīd
ān =iz pad was nēkīh hampursīd ruwān rāy pad āsānīgīh čē kē az sahmgen bīmgen rāh rawīdag bē āyēd
ahlāyīh ābādīh ī pahlom ast
pargard panǰom bun
kē purr_rayōmand ud xwarrahōmand dēn baxt ēstēd ohrmazd pad tō rāy pad franāft ī amahraspandān kū rōšn dēn ohrmazd baxšīdag ēstēd ay †guštāsp
pad tēz kū ul asp bē daw abar pad ēn dēn ī ohrmazd ud zarduxšt
ud ārzōgēn kū tēztar ēn dēn ī weh tō bē padīr kē =š az ān pusarān ī tō =iz āstawānīg dahēd kū awēšān ēn dēn ī weh padīrēd
ul sah ud bē ras tō ay pus ī kay_wišāstp abar pad ēn dēn ī ohrmazd ud zarduxšt
abāz abar guft zarduxšt kū dēn ī māzdēsnīg kē man čiyōn frāz gōwam hamēdōn tō padīrīd bawād
kū kē ǰud_dōst bawēd kū abar pad ēn dēn āstawānīg nē dārēd kū ǰud_dēnān bawēd ōy rāy pas guft bawēd
ōy yyy rāy frāz guft ēstēd kū bārestān pad tarist ī āhen widaxt ān x xwarišnān barēd kū ān nēk bē barānd ān wad bē ō tō āwarēnd
agar awēšān xwarišn az awēšān ān frāy ābādīh az pardaxt hē ay kē =š ēdōn grāy bawēd nē ān tō ham padēxwīh bawēd pad hamrasišnīh ī kū ānōh kē ruwān ahlawān māzdēsnān hampaywand kū nē ruwān ā =šān pad āgenēn xwēš
ānōh kū druz padēnd āgenēn ā =šān abāg padēx yyy bawād
kū andar druz_tom mān padēnd kū andar dušox ī tārīk
kū ēw_pāduxšān pāduxšāyīh wištāsp ānōh mānišn yyy bawād
kū andar garōdmān mēhan ī ohrmazd ud mēhan ī amahraspandān
ānōh kū tō dēn rawīdār ast kū dēn rawāgīh az tō ast
mā tō rāy dēn ī mazdēsnīh pad tangīh abganišn kū andar tangtar gyāg ī dušox mā abganēd
kū az tangīh ī dušox dūr dārēd andar rōšn garōdmān baxšād
čē rāy kē tō az harwistīn astōmandān axwān ham āhānd ān hamxwāyišnīh ī dēn ī mazdēsnān hēnd kū dēn ī weh pad xwāyišn ī xwēš rawāg dārēd
bāstān ēdar ēstēnd pad dar ī tō yyy kū yyy ī dēn ī tō yyy hēnd pad dar ī tō ēstād kū =m tis bē dah
bārestān ēdar ēstē pad ōy anī dar ī kasān xwarišn ī pursišn ud xwāyišnīh rāy kū tā =m dahād kū pad xwārīh pad dar ī kasān bē wardēnād pad wēnisn
bārestān ī tō tarist āhąn yyy ān ī stad xwarišn pad sōzišn kū xwarišn ī dāγ pad sar ī tō bawād
kū bē āy bē ārāyē pad rād dahišn ēn dēn ī weh ahlaw ohrmazd_dād
kē az =iš ān hamnāf ī tō rāyōmand dēn ī weh rāy bē ārāyēnd nāf kū frazendān rāyōmand ī tō
abāz =iš guft zarduxšt ōy pus ī kay_wištāsp kū dēn ī mazdēsnīg pusān nāfīg zāyīdag
kū frazendān ī tō rāy u =š pērōzgarīh dahēnd abar ōy bēšīdārān druwandān dēwēsnān
kū pērōzgarīh dahēnd mazdēsnīh dēn az padīrišnīh ī dēn
kū mā ašmāh az menišn ī ān gannāg_mēnōy ahriman āstārēd kū harw kē pad menišn gannāg rāy menēd xwēš frēb ayābēd az ān wināhgār bawēd
čiyōn kē dēwān pad frēbišnīh waran_kāmagīh bē waxšēd hamāg pad afsōs_kirdārīh wahišt_kāmagīh rāy bē škennēd tō =iz hamāg yyy bē škenn kē az =iš dēwān ud druzān nēstēnēd kū az druz ī waran afsōsgar dēw ud dēwēzagīh dūr parhēz
kū mardān ī ahlawān rāy az urwarān dar ī wišād dār kū mardān ahlawān rāy pad rād_dahišnīh ī ǰōrdāyān dar rāy bē wišad kū az frēbišn ī ahriman ī dēwān druzān az ahlawān rādīh mā band ī čē guft ēstēd pad dēn kū pad ruwān rādīh ud hamē gēhān rāstīh weh
vyt
ō ōy ātaxš āfrīnēnēd kē =š abar ātaxš bōy bē rasēd hušnūd abišt ud sagr
kū abar_ō tō haxtād ān gōspandān ramag kū =t bawād abar ān ī tō wīrān ī purr_rawišnīh kū frazend ī was
barād ayābagīh abāg baxt baγ_baxt =iz kū kāmag tō bē ayābād pad nēkīh ud frazendān baxtdār bawād
tō ān_ēdōn abar bē xwānišn ī pad hamāg_stāyišnīh andar ēn axwān ī astōmandān was xwarrahōmand ātaxš ī ohrmazd rāy
ān xwarrah ī ohrmazd xwad dōstōmand abar ōy ātaxš xwarišn rawišn yyy kū esm ud bōy abar ātaxš rasān
ān ohrmazd abartom xwad dād ēstēd bē pad stāyišn
awēšān gōwišnān gōwišn ī kē amāwandān ud pērōzgarīh ud drustīh ud bēšazišnīh ud frāy_dahišnīh ud wālišn_dahišnīh ud waxšēnišnīh ǰōrdāyān ay gōwišn bē gōw
pad ham_barišnīh ud pad āgenēn harw kē ēn gāhān saxwan bē gōwēd kū ēn pargard bē xwānēd ān fradom brēhēnīdag garōdmān ī ohrmazd rasēd az ān čē tō =iz abar bē xwānē kū garōdmānīg bawēd
ahlāyīh ābādīh pahlom
pargard šašom bun
amahraspandān rāy bē gōwēd kū amahraspandān rāy bē xwānēnd ay wištāsp
abar ēdōn guft ōy zarduxšt kū pus kay_wištāsp
srōš ahlaw yazam nēryōsang =iz hurustag
ātaxšān =iz ohrmazd
ārzōgīh =iz buland kayān xwarrah
pad kāmag pēš_rawišnīh pad nigah_dārišnīh ī tan xwēš bē xwānišn kū pad tan ī ahlāyīh az astān pēšōbāyīh ēn hamāg awēšān rāy tō bē xwānēd
ēdōn tō pad tarist ī šab xrad_pursišnīh ī ahlawān kū pad ušahin gāh xrad ī ahlawān pursēnišn bē xwān
pad nēryōsang hammōxtišn ēn pargardīhā bē gōw
ēg tō kē pad tarist ī šab ān xrad ī ahlawān pad ušahin bē kunēd pad ǰaγar bāzāīh bē xwānēd
pad ān tarist šab ud rōz pad amāwandīh ul abespār
pad wāstarišnīh gōspand ī hudahāg kū gōspand ī hudahāg rāy pad parwarišnīh bē abespār
awēšān atuwān gōspandān rāy tō xwēš tuwānāīh dah pad xwarišn ī parwarišn ī bē kun kē =š ast awēšān zarduxšt rāy dād ēstēd pad radīh čiyōn kē zarduxšt awēšān =iz rad_tom ast
u =š tō ahlāyīh rāh nigēzēd pad āgenēn ānōh rāh nigēzēd kū wahištīg bawēd pad garōdmān ī ohrmazd
kū wahman amahraspand andar garōdmān gāh ī zarrēn abāg wistarg xōbīhā dahēnd
kū ast pērōzgar andar dēn ī mazdēsnān
kū ēdōn ān mard pad xwēš ruwān ān pahlom ahlāyīh pad hunsandīhā frāztar franāmēd kū ān pērōzgartar bawēd
ān nāmīg mard az dūr kē puhl ī čēh_widarg wēnīdag amāwandīh bawēd
kū az kār ud kirbag ahlawān ruwān amāwandtar bawēd
kē ahlāyīh ān pad hupānagīh pānagtar bawēd andar ān rāh čēh_widarg
ēg kē tō andar dāmān dādag bawēd ohrmazd pad hamēdōn frāztomtar bē guft ast ohrmazd tō rāy
zarduxšt abāz ōy guft ōy pus kay_wištāsp kū tō ān abar bē xwān kē =š ast pāsbān nigāhbān māh ud xwar =iz rāy kū harw kē ǰud_dōstīh bawēd
kū pad dēn ī weh āstawān nē bawēd ān druwandān ruwān rāy ānōh pad āškārag zanišn ī bē dahēd kū tōzišn ānōh dahēnd
ēdōn guft dušxwarišn gannāg_mēnōy purr_marg pad anāštīh kū pad anāštīh ī dēn rāy ēdōn gōwēd dēwān ud druzān rāy
kū xwarisn ī wattar ān ruwān ī druwandān abganēd kū bē dahēd kū nasā =iz bē dahēd
ān frēband ruwān rāy dēwān andar dušox xwarišn ī wad dahēd ud abāz xwēšīh ī xwēš dārēd
ān ruwān az wad xwarišn xwarišn ī adādīhā_xradīh bawēd čiyōn kē sag pad adādīhā_xradīh pah ud mard rāy bē rēšēnd
bē ān ōy rēš čē rēš tōzēd ān sag rēš tōzēd pad bōdōwaršt tōzišn čiyōn ān ōy =iz rāy tōzišn kunišn
fradom pad rēšišn dahm bē widerēd ud fradom ān dahm rēšēnīdār sag rāy bē rēšēnēd pad bōdōwaršt tōzišn
kū čiyōn kē sag rāy tōzišn ī dahēnd kū fradom bār mard ayāb pah bē rēšēnd ud fradom bār hamēdōn tōzišn dahēnd hamčiyōn dahmān
kē az dēn ī ohrmazd pad frēbišn ī dēwān abāz ēstēd awēšān =iz rāy pad fradomīh tōzišn dahišn ī abāz pad dēn ī āstawān dārišn ī saxwan ānōh pad tōzišn ī nē rasēd kū andar dušox dēwān nē nayēd
ahāyīh ābādīh pahlom ast
pargard haftom bun
abar_ō tō haxtād ahlaw pus kay_wištāsp kū bē rawād sad_ēβārīh kunīdag gurdīh ī bowandag ān bowandag meh ud bowandag keh
tā drahnāy ī sālān ī tō ay ahlaw wištāsp kū tā zīndagīh ī tō hamāg gurdīh ī tō društ_ēβārīh kunendag bawād
kū pērōzgarīh abar dušmenān hamwār ī bawād
ud azarmān amarg ud awinastag ud apūdag kū tā hamwār amarg ud azarmān kū tuwānāg ud zīndag bawād ud awinastag ud apūdag kū hamwār pad hamāg nēkīh ud drustīh zīyēnād čiyōn andar pahlom axwān ī ahlawān ī rōšn ī hamāg_xwārīh
bē bar pad gōš āšnūdan kū gōš dār
kū man gōwēm tō bē āšnūdan bē frayād ī kasān =iz āšnaw kū dādestān kasān nēk kun
bē bar xwarišn bē bar wastarg anī mazdēsnān kū hamāg mazdēsnān rāy parwarišn bē kun pad xwarišn ī wastarg
az =iš bawād tō rāy ān_and čand ayābišnīh kū az =iš ayāft_kāmag bawād
čiyōn kē =t ān an frāz guft
amahraspandān xwarrah abar tō baxšēnd ud ān rāyōmand xwarrahōmand abzāyēnd bawād kū =šān xwarrah abar tō abzāyēnd
pad tēz asp rāy bē ǰahān kū abar ēn dēn bē āy kū =š az =iš tēz pusān ī tō =iz ham āstawānīh dahēd
kē dēn nēk az harwistīn mahist ud buland ēdōn srāyīd ēstēd ān ēn dēn rāy tō ēdar srāyišn bē kun
srāyišn ēdar xwāhēh ay pāduxšā kē =š andar mēnōy dādār ohrmazd abzōnīgōmand ud gannāg_mēnōy ahriman rāy kāhišnīhōmand az srāyišnīh ī abestāg zand
ān kadār =iz =ēw kē pad tēztar yazišn yazišn kunēd pad ahlāyīh abāgīh ān abzāyišnīh ī ohrmazd xwāhēd ud ān ō gannāg_mēnōy škennišn xwāhēnd
kē hamāgān yazišn ud niyāyišn pad abārōnīh šāyēd ōy rāy abārōn pādaxšāyīh bawēd nē ōy rāy pāduxšāyīh kū pahlom axwān nē ōy rāy
pad ēn ōy rāy pad abārōn axwān dahēd pādafrāh agar kē =š ō deh dehbed bawēd ān ī ō asp huburdār ud ān ī ō pad rah huwazēnīdār bawēd ō u =š wahišt ī hubōy nē bawēd
kū kē yazišn ud niyāyišn pad abārōnīh_menišn xwāhēd agar =iz ōy ī šāhān šāh bawēd wahištīg nē bawēd
kū ay pādaxšāyīh bē dahē abar dēn ī zarduxštīh pad frāyistīh kū wasīh yyy dahišn bē kun kē =š tō =iz rāy pādaxšāyīh pad kāmag dahēd
u =š pas ēstēd duškār_kirdār u =š abāz dārēd mānsr_spand harwisp dušīh kū harwisp wattarīh abāz dārēd
az ēn mānsrag gōwišn frāz tō zāyišn ī waxšišn =iz yōǰdahrag ī kirdagōmand kū pāk bē kunēm kū parwarišnīh dādag ast
ašmāh abāg pusīhā abāg pēmīh kū =t xwad pusān ud duxtān u =t pēm bawēd kārōmand kū =t kār bēd ud pēmōmand kū =t pēm bawēd šīrēnōmand kū =t šīrēnīh bawēd ēk ān ī mardōmān ud ēk ān ī gōspandān pēmōmand ud frazendōmand
an ēdar frāz šnāyīd_ēm kū parward_ēm ān az harwistīn mānsrag mazdēsnīh
u =tān yyy ō hamtazīn yyy kē ast pus_srāyišnīh
hamēdōn ohrmazd ōy zarduxšt guft
mā kas dēn ī man abar druwandīh dahād kū abar pad dast ī druwandān wināhgārān dēn arawāgīh dahēnd
agar dēn ī ā =mān abāg druwandīh rawāgēnēd pad =iš abar pad ēn spandarmad weh bowandag_menišnīh dard ī tabišn bē rasēd
kū andar ēn gēhān harw kadār =iz =ēw ranǰ ud bēš ā =š bē rasēd az kunišn ī druwand ahlomōγ
ud urwāhmenīh ī mardōmān az gēhān bē barēd
ud humātrām dahēnd kū šīr az mādagān bē_barišntar dahēnd
kū az šīr ī mādagān hamāg gēhān bē parwarēnd ān hamē bē kāhēd čē kē druwand ahlomōgān dēn pad ahlomōγīh rawāgēnēd
ul kū tēz az ēn waran_kunišn_kirdārīh mādagān pēm bē barēnd ud ān harwistīn apēmīdag bawēd
ud harwistīn gušnān rāy pad tangīh handāzēd ud druwandān rāy frāz tuwān dahēnd
pad purr kū wasīh abar ātaxš bōy bē nihē kē =š pad dūr nēmag kē dōst ī ātaxš ī dādār ohrmazd hēnd kū abar ātaxš ī ohrmazd bē bōy nihēnd kē az =iš pad harw kadār =iz =ēw nēmag pad dūr gyāg dēwān ud druzān ud ǰādūgān nēstēnēd kū bōy az wād harw gyāg =ēw kē barēnd kē awēšān nēstēnēd
nē az =išān abar ašmāh wahman mard zyān niyāzānīh rasēd kū =tān nēkīh abar rasēd pad hunsandīh ī ātaxš
ān kē harwistīn spēnnāg_mēnōy dāmān kē hend u =šān bēšīdārān bē nayēnd kū harwispīn bēšīdārān az spēnnāg_mēnōy dāmān nēst apaydāg ud wanī bawēd
vyt
kē tā dērang zamān ummēdēnēd az mihr ud rašn =iz razistag kē =iz dēn ī mazdēsnān ān mard kē ummēnīd hēnd az mihr yazad ud rašn ī rāst yazad kū harw kē abar ēn dēn ī mazdēsnān āstawānīh nē dārēd ud kunišn =iz pad framān dēn ī weh nē kunēd ān mard az mihr yazad ud rašn ī yazad dūr bawēd
bē warzēnd pad hammōxtišnīh čiyōn kē hammōxtišn pursišn hēnd kū nērangīhā ī dēnīg az hērbedān hammōxtišn warzēnišn čiyōn kē =t ān frāz guft =am kē =š az =iš ān pusarān ī tō =iz ud brādarān ī tō =iz sālārēnēd ēn dēn ī weh pad dōstīh ud ērmenišnīh
ahlāyīh ābādīh pahlom ast
pargard haštom bun
ān ī pahlom gāhān_srāyišnīh saxwan bē gōw pad gyān
pad nēkīh bāstān bāš ay ahlaw pus kay_wištāsp
čiyōn ōy kē ān ī ōy ī nēkīh kadār =iz =ēw kū kadār =iz =ēw mardōm az nēkīh ī ōy nēkīh ast
kē ēdōn gōwēd ay nēkīh az ēn dēn harw kas =ēw nēkīh
u =š pad kāmag pādaxšāyīh dahēd ohrmazd pad abāyist ōh abar
pad ān ōy šab ān xwēš ruwān bē wizārēd kū ahlaw ruwān bē widerēd
ān ōy xwēš ruwān pad garōdmān ohrmazd bē wizārēd pad nēkīh ī xwēš kū =š kār ud kirbag kird ēstēd ān ruwān ahlaw bawēd
ēg gōwēd ohrmazd pad ōy ī ahlawān ruwān kū ēdōn kū nē pad ān pursēd kū tō rāy pus frašostar ast ān ruwān kē bē widerēd abar pad ān se šab pad nazdīk ī waγdān nišīnēd dahēd ānōh kū ka =š gyān bē šawēd ā =š sar ēstēd uštwad gāh srāyēd kū zand gōwēd nēk rawišn ī bē gōwēd ay nēktom bawād
kū nēk ōy kē az ān ī nēkīh kadār =iz =ēw nēkīh
pad fradom šab ān ī xwēš ruwān wizārēd pad ēn gāhān saxwan gōwišn pad humat kū humat menīd ēstēd
pad didīgar šab ān xwēš ruwān bē wizārēd pad hūxt kū hūxt guft ēstēd
ān pad sidīgar šab ān xwēš ruwān bē wizārēd pad huwaršt kū huwaršt warzīdag ēstēd
pad sidīgar šab ān xwēš rāh abartar bē wizārēd kū rāh =ēw pahlom ox wizārdan kāmēd
ān sidīgar šab sar ā =š pus ī frašōštar bē kāmagīha pad yyy sahēd pad ušbām
ān kē mard ahlaw ruwān kū andar urwar abar bōy dāšt sahēd tan ī xwēš kū az urwarān pānagīh sahēd kē =m pad bāγ ī wahišt rasēm
pas ān az rabihwintar rōn wād ī hubōy hubōytom az anī wādān ī =š pad gētī āyēd
ōy wād ā =š pad wēnīg ul grift sahēd kū az wād ī hubōy wēnīg tābagtar bawēd
ēg ān ruwān gōwēd pad pursišn kū az kū dahišn ēn wād ast kē =m haguriz =iz pad wēnīg wād ī hubōytom nē rasīd pad gētī
ēg ān ruwān rāy pad mēnōyīh saxwan ēdōn āyēd kē sahēd ān xwēš dēn kū ēg ān az mēnōyīh saxwan āyēd kē ēn wād az dēn ī tō kē andar gēhān dēn ud kunišn ī tō kē sahīd ēstēd
ān ruwān rāy padīrag āyēd kanīg ī kirbag nēk ī rōšn abārīg tan ārus_bāzā ī amāwand ī hurustag ul_ēstādag kū ǰuwān buland yyy pestān nēk tan āzād kū rāst rāyōmand tōhmag kū =š tōhm az yazadān _sālag ārōyišn u =š kirb ēdōn nēk čiyōn dāmān nēktar
ēg ōy gōwēd u =š pursēd kē mard ahlaw ruwān kū
ān kē tō čarāytīg xūb kirb nēktom wēnēd
ēg ōy passox gōwēd kū =š xwēš dēn kū
an =am ǰuwān ī humenišn ī hugōwišn ī hukunišn ī hudēn kē =t xwēš dēn az ān ī xwēš tan ēdōn nēk bōy ēstēd
ēd kē kāmag kird ī kē rāy tō ēdōn meh ud weh nēk hubōy ud pērōzgar ud abēbēš čiyōn man sahīdtom abar
kū tō ān ēd dīd hēnd kē kasān afsōs kird bowandag kū =šān yyy kird u =šān pad kāmag ī xwēš kāmag hāmhāgān zanēd
kū kē tis xwāšt kasān nē dād u =šān urwar yyy =iz kird kū =šān dar bē bast
kū kasān afsōs nē kird yyy =iz nē kird
ud kāmag ī hāmhāgān nē zanēd kū kē tis xwāst ā =šān dāšn =iz dād
u =šān urwar yyy =iz nē bast kū =šān ǰōrdāyān bē dād
ēdōn tō nišīnīd hē kē afsōs ud yyy nē kird
u =t gāhān srūd u =t āb =iz weh yazīd
ātaxš =iz ohrmazd u =t pahrēz kird
ud mard =iz ī ahlaw šnāyēnīd kē az nasdīk mad ud kē =iz az dūr
ēg man kē franāft ham kē xūb dāšt ham u =t franāfttar kird ham kū =t xōbtar dāšt ham
u =m nēk būd ham u =t nēktar dāšt u =t arzānīg dāšt ham abāyišnīgtar
pad ān frāztom gāh nišast ham ā =iz ǰāmag u =t pad ān ī frāztomtar gāh nišāst ham kū gāh ī meh kird ham
pad ēd humat pad ēd hūxt pad ēd huwaršt ī tō warzīd
ēg mard pas yazēnd ān ī ohrmazd dagr_yazišnīh ud hampursēd frārōn kird
šast_ēk fradom gām frāz bard kē mard ī ahlaw ruwān pad humat bē dād ān gyāg kū humat mehmānīh
didīgar gām frāz barēd kē mard ī ahlaw ruwān pad hūxt bē dād
sidigar gām frāz barēd kē mard ī ahlaw ruwān pad huwaršt bē dād
tasom gām frāz burd kē mard ī ahlaw ruwān pad ān ī asar rōšnīh bē dād
ōy gōwēd u =š pursēnd ān ī pēš bē widard ahlaw
bē mad hē ō ēn gyāg az ān mānišnōmand gōspandōmand xwāyišnōmand kū =šān ōh xwēšēnd yyy kū =š daštān māh andar wizārēnd daxšag ī gēhān gōwēd
az ān astōmand axwān ī abar ōy ēn mēnōyān ox az ān seǰōmand axwān ī petyaragōmand abar ōy astōmand apetyārag
ēdōn tō dagr nēk bawād az ān ī čiyōn bē ēdar āmad hēnd ā =t dagr zamān nēk bawād kē mēnōyān axwān ohrmazd tā dagr zamān tō ayāftēd
u =š gōwēd ohrmazd ōy amahraspandān kū mā az im pursēd kē =š pursēd kū =š az =iš mā pursēd
čē pad ān bīmgen tārīk sahmgen ud rēšken rāh abar rawēd
kē =š az tan bōy wardišn kū kē az tan bē āmad ā =š dušxwār bawād
xwarišn ō barēnd ān zarmaēn ī rōγn
čē =š ān ī ast ǰuwān ī humenišn hugōwišn hukunišn ī huden xwarišn ī pas az bē_widerišnīh
ēdōn nāyrīg ī frāy_humat ī frāy_hūxt ī frāy_huwaršt xūb hammōxt ī rad ī xwadāy kū šōy pad sālār dārēd ī ahlaw xwarišn pas az bē_widerišnīh
ēdōn nāyrīg ī frāy_humat ī frāyhūxt ī frāy_huwaršt xūb hammōxt az hērbedān huxēm hammōxt ī huwaršt_warzīdār ī ahlaw framān_burdār ī šōy ud sālār huwarštīh pas az bē_widerišnīh pad garōdmān
frāz guft zarduxšt spitāmān ōy pus kay_wištāsp
agar =iz ān ruwān ī dušoxīh bawēd pad se šab nazdīk ī kamāl ī ōy ī xwēš nišīnēd ud ēn saxwan gōwēd kū zamīg yyy barēm ohrmazd
pad kū nēmag šawēm ud nēkīh ī man az kū saham
ēdōn pad anummēd saxwan gōwēd pad kamāl ī xwēš
ahlāyīh ābādīh ī pahlom ast