Select Section Type

1.0
wištāsp yašt bun
2.0
ēn čand wāzīhā ka pad gāhīhā abāyēd guftan
3.0
abāg mānsrag ud zand pursišn ī abartar gāhīhā_kunišnīh mānsrag abzōnīg ī ahlaw ahlāyīh rad
4.0
pad yazišn ud niyāyišn ī šnāyēnīdārīh frāz wābarīgānīh
5.0
abāg mānsrag ud zand pursišnīh abartar_gāh_kunišnīh mānsrag abzōnīg ahlaw ahlāyīh rad
6.0
abāg mānsrag ud zand pursišn ud abartar_gāhīhā_kunišnīh ud mānsr_spand ahlaw ahlāyīh rad
7.0
abāg mānsrag ud zand pursišn abartom_gāh_kunišnīh ud mānsr_spand abar_radīh ud rad ī harwisp gāh ī abar_radīh
8.0
dahmān ham mard ī weh mard ham āfrīn gōwišn ī ham āfrīn gōwam rasād
9.0
abar guft zarduxšt pus ī kay wištāsp
xwarrahōmand sahist u ēdōn guft zarduxšt ō kay wištāsp xwarrah ī dēn ī weh ī mazdēsnān sahist abar ud man zarduxšt ham
ābād_zīyišn xūb_zīyišn ud dagr_zīyišn dagr zīyišn ī druyist zīyēd pad padēxīg zīyēd
zīyēd ašmāh abāg narān zīyēd ašmāh abāg nārikān zīyēd ašmāh abāg pus ud duxt ud abārīg frazendān ašmāh druyist ud aranǰ bawēd dagr zīyēd pad druyistīg pad padēzīh ud abēbīmīh zīyēd
xwēš ahlaw bawād čiyōn zarduxšt
purr_gāw bawēd čiyōn ādbiyān bawēd hād purr_gāwīg ēdōn az harw mōy =ēw hazār būd
purr_asp bawēd čiyōn pōrušasp būd hād purr_aspīg ēw az harw mōy hazār būd
ahlawēnē handāzag amargīg čiyōn kay husraw būd
arang rōd dūr rāh widār bawād čiyōn arang rōd
amāwand bawēd čiyōn wēnīdār pus ī arnawāz ay arnawāzīh ēw arnawāz šārnawāz xwah ī ǰ̌amšēd būd ud pus ī ōy ī was amāwandīh dāšt
zāyād az tan kālbod ī ašmāh dah pus šambardār frazend ašmāh bawād
se bawād čiyōn āsrōn ēhrbed čiyōn mowbedān mowbed ādurbād mānsrspandān
se bawād čiyōn artēštārān čiyōn spandiyād guštāspān
se bawēnd wāstrī_fšuwēnīdār čiyōn zaw tahmāsp andar yazadān weh
ēk pus bawād čiyōn ǰ̌āmāsp ī frašōstar
āfrīn pad =iš kunād čiyōn ǰ̌āmāsp kird abar dahībed guštāsp
ayask amarg bawēd čiyōn pešōtan guštāspān
tēz tuwānīg bawād abar ōy mihrōdruzān čiyōn mihr yazad mihr druzēnēd awēšān rāy mihrōdruz xwānēnd
sōgōmand bawēd čiyōn māh baxtār māh dār ud draxtān tābad u zarmāyīh dārēnd ud ham_čiyōnān ašmāh =iz harwispīn sōgōmand ud tābagtar dār
rōšn sōzāg bawēd čiyōn ādur yazad čiyōn ātaxš ī rōšn
dōst bawād čiyōn zarr ō mardōmān grāmīg ēd ašmāh čašm pad yazadān mardōmān grāmīgtar bawād
pas az bowandag bawēd čiyōn sāl
pahlom axwān ahlawān rōšn harwisp xwārīh pasēn āfrīn rasād ō ašmāh wehān ān ī pahlom axwān ahlawān rōšn hamāg xwārīh
u =t dahēd amāwandīh ud pērōzgarīh u =tān dahēd gōšt ī yyy sūrīh =tān nān baxt u =tān az tis ī xwēš baxt
u ēdōn guft zarduxšt ō pus ī kay wištāsp
u =tān dahēd ān ī mardān purr_rawišnīh ī frazend ī was_stāyīdār kasān nēw dānēd stāyīdan ud hanǰamanīg nēk dānēd kirdan
wānīdār ī kasān awānīdār ī kas ōy ī āgenēn wānīdār dušmānān bawēd ud dušmānān ōy rāy ma wānād
ka rasēd ō ayārīh ī kasān ā paydāgēnēd rāmišn pad gyāg rāmišn az ān ī tis nigēzād
yazad purr_xwarrah
ud yazad purr_bešazēnīdārīh
ud mehīh_paydāgīh ašmāh bawēd ašmāh =iz paydāgtar bawēd ka ēn tis ēdōn kunēnd
ēdōn guft zarduxšt ō pus ī kay wištāsp
mehīh_sūdīh ašmāh bawād
pad paydāgīh pad xwānišn tarasagāhīh ī yazadān ašmāh rāy sūd ī wuzurg paydāg bawād
čē ašmāh xwarrah baxšēnd yazadān āb dahēd
amāh rāy ēn ǰān zayēm arišwang weh tarsagāh rādīh =iz kāmag_dōysar hučašm ī hēnd ān ašmāh rāy abāg kāmagīh rādīh ī yašt kunēnd
frāz rāy az aršišwang pārand rawāg
paydāg bawād ān pus ī kay wištāsp bawād
andar ēn buland mān ī pad hamēšag nēk xwarišnī bawād saxwan_rāmišnīh nēk rasēd ud kasān =iz xwarišn ī nēk rasānīdag bawād
ud haguriz ma xwāhē abar_ō āsrōnān tar_xwarišn ī dād ā =t kas tar_xwarišn ī abar āsrōnān bawēd
ān pad xwēš rāyōmandān frazend dādan wināhgār bawēd hamčiyōnān āstārag garān bawēd čē āsrōnān rāy xwarišn ī nēk abāyēd dādan
abāz guft zarduxšt ōy ī pus ī kay_wištāsp
dēn ī mazdēsnān burdār āstawānīg ī dēn ī weh mazdēsnīg brād ayāb dōst
ān kadār =iz =ēw arzānīg ī dēn ī amāh bawēd brād ayāb dōst ī dēn ī weh harw dēn dāštār ū dēn xwānīdār awēšān rāy nigāh kun az pāk xwarišn ī dādan parwarēnd
ahlaw zarduxšt guft ō wištāsp
pad tarsagāhīh ī frašōštar ud ǰāmāsp ahlaw pus ī frašōštar awēšān rāy wāstarēnēnd parwarēnd
u ēdōn guft ohrmazd ōy ī ahlaw zarduxšt
ōy =iz ēdōn guft zarduxšt abar pus ī kay_wištāsp
ma xwad dušzōtīh ma adōst_zōtīh bawād yazišnīgar mard dušmenīdār ud duškirdār ma bawād ud abāg zōtīg ud adarwaxšīg dušmenīdār ēk abāg zōt ma bawād
čē yazadān yazišn ī ōy padīrēd
čē az ān dušzōtīg adōst_zōtīg mardān purr_zyān rasēd az ān =iz rāy ohrmazd az dušmenišnān adōstān zōtīg mardān yōǰdāhrīh abāz guft ēstēd
az =iš yazišn ī yazadān ud amahraspandān yazīdag bawēd
čiyōn pad niyāyišn ī yazišn xwāhēd hamčiyōnān ān dušzōtīg kunēd ud amahraspandān padīrēnd
ēdōn guft ohrmazd ōy zarduxšt
ud zarduxšt ōy =iz abar guštāsp guft ēstēd
ahlāyīh ābādīh ī pahlom ast
sidīgar pargard bun
ēg xwānēd ēn dēn hamčiyōn pus ī =iz xwānēd ay wištāsp čiyōn xwānēd ān paywandān ī =iz xwānēd
abartar ēst ēn dēn āšnaw ud kasān =iz rāy āmōzišn
abāg frazendān bawād abāg pēm bawād kār kirdār bawād
pēmōmand dēnīgān rāy az šīr parwarēnād šīrēnōmand hamāg šīrēnīh ī dēnīg az ast
ēdōn frāz gōw xwān
ohrmazd ud srōš =iz ahlaw ud dēn =iz ī mazdēsnān
az harwistīn harwisp gāh_husrāyišnīh
ud harwistīn harwisp warzišnīh
ud harwistīn harwisp hangirdīh
harwisp kardagīhā ud hādān warzišn ī srāyišnīg az hamāg hādān ī yazišn ud hangirdīg srāyišnīg srāyēnd
az awēšān srūd āšnawišn frāyīdār ī gēhān ast abzōnīg ī gēhān ast
ud mardān ī ahlawān rāmišnīg pad kāmag rasēd
u mardān ī ahlawān rāy pānagīh ud
u mardān ī ahlawān rāy nigāh_bānīg ud sālārīh kunēd dādār ohrmazd az ēn nēkīh ī abestāg ud zand
az awēšān tarsagāhīh abestāg ud zand tazišn ī ahlāyīh āgāhēnēnd āgāhīh ī kār ud kirbag bawēd
u ahlāyīh_frāy_dahišnīh gēhān ast
=iz mard ī ahlaw āgāhīh ī ahlāyīh sūdōmand hilēd dānēnd tuwān
anī az ēn gāhān xwānišn ī rāh ī kār ud kirbag tuwān dānēnd
abartar wardišn ī xwān
harwisp gyāg ī hāwanān ud harwisp ādarwaxšān pad wardišn ī gōw
ud harwisp gyāg ī frabirdārān harwisp ābirdārān
ud harwisp āsnīdārān ud harwisp rahwiškarag
ud harwisp srōšāwarz pad wardišnīh gōw
ēn haft gyāg ī pad urwisgāh haft amahraspandān rāy kird ī ēstēd
ān harw haft amahraspandān rāy nām gōw xwān
abar xwān
harwisp āsrōnān ud wāstaryōš
abar xwān
harwisp mān mānbed ud harwisp wis wisbed
ud harwisp zand zandbed ud harwisp deh dahībed
harwisp ǰuwān ī humenišnān ud hugōwišnān ud hukunišnān ud hudēn
andar dēn kār ud kirbag pad nēkīh kunēd
harwisp ǰuwān ī saxwanān gōwišnān andar dēn rāst_guftārtom bawēd
ud harwisp xwēdōdah kār ī xwēdōdah andar dēn mazdēsn kirbag guft ēstēd
az =iš ahriman dēwān dēw anummēdag hēnd
xwēdōdah wpšwpyt margarzān bawēd
harwis deh_wardišn yazam pāsbānīg gēhān kardag pāduxšāy bawēd awēšān =iz pad wasīh xwān ud yaz
harwisp huframānīh ī dēn abar rasīdār rāy andar dēn rāst framān dārēd nēk dādestānīg ud āstawānīg ī dēn māzdēsnīg
ud harwisp mān mānbedīh zan =ēw andar mān rāh ī rāst dārēd
harwisp ān ōy tuxšāgīh ast ahlāyīh kār kirdār
ān radān hēnd az ahlāyīh rad ahlaw ahlāyīh rad yazišn ī kirdārān rāy yaz
ud sīh ud se nazdist pērāmōh ī hāwan hēnd pad ahlāyīh rad ōy =iz rāy xwān
srāyišntom pus ī kay_wištāsp ēn =iz abar guft hamāg awēšān rāy sālārtom bawād
az =iš wānīd pad āgenēn hamēmālān ud adostān ī bēšīdārān bēš rāy wānīdār harwispīn dušmenān
pad sad ud sadagāntom
ud az sad ud x hazāragāntom
ud az hazār ud bēwar ud bēwaragāntom
ud az bēwar amar ud amaragāntom amar bawēd
ēn saxwan_gōwišnīh frāz gōwē čiyōn rāy frāz gōwēm man dād ī weh ohrmazd ast az harwistīn dādestānīhā weh ud meh dādestān ēn hēnd gōw
an andar yazišn ī yazē
an andar yazišn ī frāz yazē
ēn dām ohrmazd ast andar dēn ī ohrmaz frāz yazam
passoxīh ān abar pursīd pus ī kay_wištāsp ōy zarduxšt
az an yazam
az yazišn ī frāz yazam an
andar ēn dām ī ohrmazd az čē nērang kunišn yazišn ī yazam
u guft zarduxšt
abar kadār =iz =ēw paydāgēnam
ast pus ī kay_wištāsp az ān nērangīhā yazišn ī yazam an abar āškārag gōwēm
pēš ī urwar ī ārōyišn hēnd ras ay guštāsp
urwar az nēkīh rust ī hēnd ānōh rasīdag amāwand
ēn saxwan gōwišn ī frāz gōw ēn gōw
namāz ōy ī urwar ī weh ohrmazd_dād ahlaw
pas aṣ̌əm_vōhu se gōwišn ī se bār ān urwar ī tāg rāy yōǰdahrēnīd
pas ān barsom rāy ul barišn
fradom bār ayāb didīgar bār ayāb sidīgar bār
barsom pad kār ī yazišn kirdan az kārd ī barsom_čīn bē_čīnišn yazam
urwar čīnišn ī ān urwar ī yaz guft ēstēd pad yazišn yazam bē_āwarišn yazam
pad abartom aiβiiaghan barsom pad ahlāyīh frāz wisturd
pad ahlāyīh aybyāstišn yazam pad ahlāyīh nigerišn yazam
barsom bandišn zōhr ud barsom pad dahmān nigerīdag ud dahmān framūdag yazišn yazam pad abar_dādīhā
nidom hōm pad kāmag kōb tāg ī hōm pad hāwan kōbišn yazam hōm pālā kun pad_dādīhā
nidom hōm pad kāmag hunīšn hōm xwarišn andar yazišn mard az huframānīh xwarēd az ān xwardan pādaxšāyīh ayābēd pad pahlom axwān rasēd
ahlāyīh ābādīh ī pahlom ast
čahārom pargard bun
u ēdōn guft ōy zarduxšt abar ōy pus kay_wištāsp
xwānē wištāsp ohrmazd xwadā rāy
purr_xwarrahōmand ahlaw ohrmazd
xwānē spās ī xwadād ēd xwadādīh ay az xwēš estīdag ast asmān
xwānē zamān ī akanārag ud wāy abarkār mēnōy rām_yazad
xwānē wād ī tagīg ī ohrmazd_dād
az =iš baγ_baxt ayābēd
ēn abar guft awēšān amahraspandān rāy xwānē
čiyōn =t kāmag ayābišn ī dahēd harw =iz ī kāmēd ayābēd
ān druzān rāy wānišn yazam barēd wād ī taxm ud škeft spēnnāg_mēnōy dād
wād ī tagīg ī ohrmazd_dād pad harwisp amahraspandān tagīgtom ast abar hamāg dēwān druzān az tuwānagīh ī xwēš škennēd
purr_pāsbān az bēšīdārān bē_zadārtom dušmenān
pad āgenēn_wānīdārtom hamēmālān ud adōstān ī bēšīdārān
ēdōn ēn saxwan gōwišn frāz gōw ēn pargard
pad kāmag pad pēš_rawišnīh pad pēšōbāyīh gōw
abar tan ī xwēš ul warzēn ēn gōwišn abestāg_gōwišnīh frāz warzēn
pus kay_wištāsp ud yaz ēn ātaxš ī ohrmazd pus tagīg hēnd ud artēštār tan ī ātaxš armēšt ud mēnōy artēštār hēnd
dēw ī kund mast ǰud_mast rāy wānēd ān ātaxš
druǰaskān hampadēnd druwand dēwēsnān zīyišnīg ī zanēd mardōmān
kund dēw ān bawēd andar tan ī mardōmān kundīh nihēd
druǰask ān bawēd andar tan ī mardōmān yaš ud zyān nihēd
druwand dēwēsnān ān bawēd az kunišn ī xwēš_zīyišnīh ī mardōmān kāhēd
rāh ī zurwān_dād abar rasēd tarsēd =iz druwand =iz ahlaw ruwān bawēd
harw widerēd rāh ī zurwān_dād rasēd ud tarsēd =iz druwand =iz ahlawān ruwān bawēd
ēg ahlaw widerēd pas az widerišnīg ī ōy dēwān druzān
az bōy ēdōn frāz tarsēd čiyōn mēš gurgān xwistag az bōy ī gurg frāz tarsēnd
awēšān =iz dēwān druzān hamčiyōnān az bōy ruwān anōšag ī tarsēnd
ān ahlawān ruwān pad nīrmad ī kōfag ī xwēš andar garōdmān ī abzōnīg pad mān ī ohrmazd nēk kardag mānēd
harwisp rāh ī garōdmān ān ul barēd
wahištīg ōy bawēd ham_dahišnīh ī stōdān_yasnān saxwan gōwēd ēn yazišn ī yazēd
čē az =iš garōdmānīg bawēd ān
ān kas mard zarduxštīg rāh dārēd mard =iz ayāb kanīg pad bōy tabāhēnēd kāhēd
gyān zanēd andar aškomb mard abāg zan ī kasān gād kunēd u ōy zan ābistan bawēd pas ān kanīg ud mard harw az šarm ī kasān dārūg ud darmān appurēd ud ān dārūg kanīg xwarēd u ābistan ōbadēd awēšān mardōmān pad rāh ī zarduxštīg bawēd
čē garāntar wināh margarzān bawēd rāh ī ānōh tabāhīhēd
u ēdōn abar guft zarduxšt ō kay_wištāsp
yaz dēn spitāmān zarduxšt rāy
pas az abar_stāyišnīg yazišn yaz ud pas stāyišn abar gow
ēdōn ast ham_dahišnīh ī mānsr_spand
u ēdōn yazišn yazam
ud abāz wardēn az dād ī ǰud az rāh ī kasān abāz ēstēn
čiyōn abar asp ī aγrī aswār bawēd ud rāh ī ǰud_ristag rawēd pas paydāg bawēd abar arāhīh ī āmad ham
pas az ān gyāg asp rāy abāz wardišn wardēd ud abāz ōy ī rāh ī rast āwarēd
hamčiyōnān =iz asp rāy abāz nay pad rāh ī rāst abar dēn ī māzdēsnīg asp rāy āwar dēn padīr
az =iš was druzān rāy wānišn ast pad yazišn ī ēn dēn hamāg dēwān druzān nēstēnēd
čē az ulīh ul rawišn ān weh dēn ī māzdēsnīg pad xwānišn xwān abar ēn dēn ī mazdēsn ras ay guštāsp_šāh
ēdōn ēn nigāh dār andar axwān ān mardān ud nayrīgān ī dēn padīriftārān awēšān pānagīh kun
=iz az ōy yyy mizd frāz rādīh griftan mizd ī mēnōy abāyēd griftan ka andar garōdmān bahr ayābēd
andar axwān awēšān amāh dēn dāštār hēnd pad awēšān rādīh kun mizd_stanišnīh az astān ān weh ast dēnīgān rāy parwarēnd
=iz ān weh ka abar gyan tan ī xwēš weh_xwāstār bawēd xwēš xagr bawēd ud kasān rāy asagr dārēd nēkīh xwad xwāhēd
=iz ēn dēn ī mazdēsn padīrēd rawāgīh dahēd ka ōy sūdōmand pērōzgar sōšyans rawāgīh dahēd zamān ī sōšyans dēn rawāg dārēd
ēdōn =iz awēšān kasān rāy ān dahišn ī bawād ka ǰud_dōstān bawēd dušmenān ī ēn dēn bawēd abar dēn garōyēd awēšān =iz rāy abar dēn āstawān kunēd
ēg ud pus ī ud duxt ī dēn_burdārān harw bawēd dast ī šabēn rāy pāk kunēd fradom az saxwan šōyēd fradom az gōmēz ī gāw dast šōyēd ud pas az āb šustan
ast abar pad gannāg_mēnōy snehag ī menišnīh pad menišn ī abar gannāg_mēnōy snehag dārēd az nērōg ī dēnīg
ēdōn nērōg dārēd ān sneh menēd abar gannāg_mēnōy sneh_gōwišn ast az gōwišnīh snehag abar gannāg_mēnōy dārēd
ka ast abar gannāg_mēnōy dām sneh pad kunišnīh az būšāsp abar handazēd fradom dast az gōmēz ī gāw šōyēd pas kə̄manā mazdā gōwēd
pas az āb dast šōyēd šāyēd hamēdōn nērōg gīrēd čiyōn pad abar nibišt ōy mard ēdōn bawēd pad menišnīh ud gōwišnīh ud kunišnīg sneh abar gannāg_mēnōy ahriman ī stwnīdag bawēd snehīhā ā az =iš bawēd
āšnaw az man ān man gōwēm āmurzīdār ast
rāy ohrmazd wināh āmurzēd ud kanīg az padīrēd
ān man zarduxšt rāy dēn nimūd ēstēd ohrmazd ān dēn =iz padīr abāg mayānǰīh ī amahraspandān pad guwāgīh ī man āyīdag ast ōy pēš andar ēn gēhān
amahraspandān pad guwāgīh ī man āyīdag ast andar ēn gēhān pad padīrēnīdan ī dēn pēš ān dēn padīr ānōh mizd mēnōy ayābēd
dagr_husrawīh mānēd andar ēn axwān dagr_huaxwēnīh ruwān rāy pad mēnōy ast pahlom axwān
dagr_huaxwīh winnīrīh pad čīn_widarg bawēd ud pas az widirdan pahlom axwān rasēd
nēk_rawišnīh pad pahlom axwān pad nēkīh mānišn andar garōdmān ī mēhan ī ohrmazd nēk kardag ēstēd pad harwisp pēsīdag
ēg az ēn gēhān ā ǰudāg bawēd āyēd baxt pas ruwān rāy man ohrmazd ham xwad pad nēkīh saxwan pursēm pad pahlom axwān_nigēzišnīh hamčiyōn ohrmazd amahraspandān =iz man paydāgēnīd
ān =iz pad was nēkīh hampursīd ruwān rāy pad āsānīgīh čē az sahmgen bīmgen rāh rawīdag āyēd
ahlāyīh ābādīh ī pahlom ast
pargard panǰom bun
purr_rayōmand ud xwarrahōmand dēn baxt ēstēd ohrmazd pad rāy pad franāft ī amahraspandān rōšn dēn ohrmazd baxšīdag ēstēd ay †guštāsp
pad tēz ul asp daw abar pad ēn dēn ī ohrmazd ud zarduxšt
ud ārzōgēn tēztar ēn dēn ī weh padīr az ān pusarān ī =iz āstawānīg dahēd awēšān ēn dēn ī weh padīrēd
ul sah ud ras ay pus ī kay_wišāstp abar pad ēn dēn ī ohrmazd ud zarduxšt
abāz abar guft zarduxšt dēn ī māzdēsnīg man čiyōn frāz gōwam hamēdōn padīrīd bawād
ǰud_dōst bawēd abar pad ēn dēn āstawānīg dārēd ǰud_dēnān bawēd ōy rāy pas guft bawēd
ōy yyy rāy frāz guft ēstēd bārestān pad tarist ī āhen widaxt ān x xwarišnān barēd ān nēk barānd ān wad ō āwarēnd
agar awēšān xwarišn az awēšān ān frāy ābādīh az pardaxt ay ēdōn grāy bawēd ān ham padēxwīh bawēd pad hamrasišnīh ī ānōh ruwān ahlawān māzdēsnān hampaywand ruwān ā =šān pad āgenēn xwēš
ānōh druz padēnd āgenēn ā =šān abāg padēx yyy bawād
andar druz_tom mān padēnd andar dušox ī tārīk
ēw_pāduxšān pāduxšāyīh wištāsp ānōh mānišn yyy bawād
andar garōdmān mēhan ī ohrmazd ud mēhan ī amahraspandān
ānōh dēn rawīdār ast dēn rawāgīh az ast
rāy dēn ī mazdēsnīh pad tangīh abganišn andar tangtar gyāg ī dušox abganēd
az tangīh ī dušox dūr dārēd andar rōšn garōdmān baxšād
čē rāy az harwistīn astōmandān axwān ham āhānd ān hamxwāyišnīh ī dēn ī mazdēsnān hēnd dēn ī weh pad xwāyišn ī xwēš rawāg dārēd
bāstān ēdar ēstēnd pad dar ī yyy yyy ī dēn ī yyy hēnd pad dar ī ēstād =m tis dah
bārestān ēdar ēstē pad ōy anī dar ī kasān xwarišn ī pursišn ud xwāyišnīh rāy =m dahād pad xwārīh pad dar ī kasān wardēnād pad wēnisn
bārestān ī tarist āhąn yyy ān ī stad xwarišn pad sōzišn xwarišn ī dāγ pad sar ī bawād
āy ārāyē pad rād dahišn ēn dēn ī weh ahlaw ohrmazd_dād
az =iš ān hamnāf ī rāyōmand dēn ī weh rāy ārāyēnd nāf frazendān rāyōmand ī
abāz =iš guft zarduxšt ōy pus ī kay_wištāsp dēn ī mazdēsnīg pusān nāfīg zāyīdag
frazendān ī rāy u pērōzgarīh dahēnd abar ōy bēšīdārān druwandān dēwēsnān
pērōzgarīh dahēnd mazdēsnīh dēn az padīrišnīh ī dēn
ašmāh az menišn ī ān gannāg_mēnōy ahriman āstārēd harw pad menišn gannāg rāy menēd xwēš frēb ayābēd az ān wināhgār bawēd
čiyōn dēwān pad frēbišnīh waran_kāmagīh waxšēd hamāg pad afsōs_kirdārīh wahišt_kāmagīh rāy škennēd =iz hamāg yyy škenn az =iš dēwān ud druzān nēstēnēd az druz ī waran afsōsgar dēw ud dēwēzagīh dūr parhēz
mardān ī ahlawān rāy az urwarān dar ī wišād dār mardān ahlawān rāy pad rād_dahišnīh ī ǰōrdāyān dar rāy wišad az frēbišn ī ahriman ī dēwān druzān az ahlawān rādīh band ī čē guft ēstēd pad dēn pad ruwān rādīh ud hamē gēhān rāstīh weh
vyt
ō ōy ātaxš āfrīnēnēd abar ātaxš bōy rasēd hušnūd abišt ud sagr
abar_ō haxtād ān gōspandān ramag =t bawād abar ān ī wīrān ī purr_rawišnīh frazend ī was
barād ayābagīh abāg baxt baγ_baxt =iz kāmag ayābād pad nēkīh ud frazendān baxtdār bawād
ān_ēdōn abar xwānišn ī pad hamāg_stāyišnīh andar ēn axwān ī astōmandān was xwarrahōmand ātaxš ī ohrmazd rāy
ān xwarrah ī ohrmazd xwad dōstōmand abar ōy ātaxš xwarišn rawišn yyy esm ud bōy abar ātaxš rasān
ān ohrmazd abartom xwad dād ēstēd pad stāyišn
awēšān gōwišnān gōwišn ī amāwandān ud pērōzgarīh ud drustīh ud bēšazišnīh ud frāy_dahišnīh ud wālišn_dahišnīh ud waxšēnišnīh ǰōrdāyān ay gōwišn gōw
pad ham_barišnīh ud pad āgenēn harw ēn gāhān saxwan gōwēd ēn pargard xwānēd ān fradom brēhēnīdag garōdmān ī ohrmazd rasēd az ān čē =iz abar xwānē garōdmānīg bawēd
ahlāyīh ābādīh pahlom
pargard šašom bun
amahraspandān rāy gōwēd amahraspandān rāy xwānēnd ay wištāsp
abar ēdōn guft ōy zarduxšt pus kay_wištāsp
srōš ahlaw yazam nēryōsang =iz hurustag
ātaxšān =iz ohrmazd
ārzōgīh =iz buland kayān xwarrah
pad kāmag pēš_rawišnīh pad nigah_dārišnīh ī tan xwēš xwānišn pad tan ī ahlāyīh az astān pēšōbāyīh ēn hamāg awēšān rāy xwānēd
ēdōn pad tarist ī šab xrad_pursišnīh ī ahlawān pad ušahin gāh xrad ī ahlawān pursēnišn xwān
pad nēryōsang hammōxtišn ēn pargardīhā gōw
ēg pad tarist ī šab ān xrad ī ahlawān pad ušahin kunēd pad ǰaγar bāzāīh xwānēd
pad ān tarist šab ud rōz pad amāwandīh ul abespār
pad wāstarišnīh gōspand ī hudahāg gōspand ī hudahāg rāy pad parwarišnīh abespār
awēšān atuwān gōspandān rāy xwēš tuwānāīh dah pad xwarišn ī parwarišn ī kun ast awēšān zarduxšt rāy dād ēstēd pad radīh čiyōn zarduxšt awēšān =iz rad_tom ast
u ahlāyīh rāh nigēzēd pad āgenēn ānōh rāh nigēzēd wahištīg bawēd pad garōdmān ī ohrmazd
wahman amahraspand andar garōdmān gāh ī zarrēn abāg wistarg xōbīhā dahēnd
ast pērōzgar andar dēn ī mazdēsnān
ēdōn ān mard pad xwēš ruwān ān pahlom ahlāyīh pad hunsandīhā frāztar franāmēd ān pērōzgartar bawēd
ān nāmīg mard az dūr puhl ī čēh_widarg wēnīdag amāwandīh bawēd
az kār ud kirbag ahlawān ruwān amāwandtar bawēd
ahlāyīh ān pad hupānagīh pānagtar bawēd andar ān rāh čēh_widarg
ēg andar dāmān dādag bawēd ohrmazd pad hamēdōn frāztomtar guft ast ohrmazd rāy
zarduxšt abāz ōy guft ōy pus kay_wištāsp ān abar xwān ast pāsbān nigāhbān māh ud xwar =iz rāy harw ǰud_dōstīh bawēd
pad dēn ī weh āstawān bawēd ān druwandān ruwān rāy ānōh pad āškārag zanišn ī dahēd tōzišn ānōh dahēnd
ēdōn guft dušxwarišn gannāg_mēnōy purr_marg pad anāštīh pad anāštīh ī dēn rāy ēdōn gōwēd dēwān ud druzān rāy
xwarisn ī wattar ān ruwān ī druwandān abganēd dahēd nasā =iz dahēd
ān frēband ruwān rāy dēwān andar dušox xwarišn ī wad dahēd ud abāz xwēšīh ī xwēš dārēd
ān ruwān az wad xwarišn xwarišn ī adādīhā_xradīh bawēd čiyōn sag pad adādīhā_xradīh pah ud mard rāy rēšēnd
ān ōy rēš čē rēš tōzēd ān sag rēš tōzēd pad bōdōwaršt tōzišn čiyōn ān ōy =iz rāy tōzišn kunišn
fradom pad rēšišn dahm widerēd ud fradom ān dahm rēšēnīdār sag rāy rēšēnēd pad bōdōwaršt tōzišn
čiyōn sag rāy tōzišn ī dahēnd fradom bār mard ayāb pah rēšēnd ud fradom bār hamēdōn tōzišn dahēnd hamčiyōn dahmān
az dēn ī ohrmazd pad frēbišn ī dēwān abāz ēstēd awēšān =iz rāy pad fradomīh tōzišn dahišn ī abāz pad dēn ī āstawān dārišn ī saxwan ānōh pad tōzišn ī rasēd andar dušox dēwān nayēd
ahāyīh ābādīh pahlom ast
pargard haftom bun
abar_ō haxtād ahlaw pus kay_wištāsp rawād sad_ēβārīh kunīdag gurdīh ī bowandag ān bowandag meh ud bowandag keh
drahnāy ī sālān ī ay ahlaw wištāsp zīndagīh ī hamāg gurdīh ī društ_ēβārīh kunendag bawād
pērōzgarīh abar dušmenān hamwār ī bawād
ud azarmān amarg ud awinastag ud apūdag hamwār amarg ud azarmān tuwānāg ud zīndag bawād ud awinastag ud apūdag hamwār pad hamāg nēkīh ud drustīh zīyēnād čiyōn andar pahlom axwān ī ahlawān ī rōšn ī hamāg_xwārīh
bar pad gōš āšnūdan gōš dār
man gōwēm āšnūdan