Select Section Type

1.0
xšnāyišn dādār ohrmazd rāyōmand xwarrahōmand harwisp_āgāh ī dānā ī tuwānā ī mahist humat hūxt huwaršt pad menišn gōwišn kunišn hamāg yazadān mēnōyān yazadān gētīyān
2.0
pad nēk ǰahišn xūb murwāg xwāham nibišt pad did axtar nēk pad dastwarīh yazadān_dōst hamāg_xrad ahlāyīh_warzīdār kirbag_dōst ī yazadān_šnās ī mēnōy_wēn ī wehān_passend dastwar ī dēn ī weh ī mazdēsnān anōšag_ruwān spandyād māh_windād rōstom šahryār nibēsā bun_dahišnīh
3.0
az madan ī tāzīgān X ō_ī ērān_šahr rawāgēnīd ān -išān dušdēnīh dušxwāhīh ī az kayān hudēnīh ud az dēn_burdārān āzarmīgišn ānāft
4.0
rāzān būd bawēd az yazadān wehīhā ī zofr abdwān čamakīh tisān menišnīh ī kunišn rāst čam saxwan kē ayādagīh ud dānišn ī pāyram uzīd
5.0
wad_zamānīh X rāy ōy -iz az dūdag ī abarmānīg kayān ud kayān dēn_burdārān ō rām ud ristag ī awēšān dušdēnān gumēxt
6.0
pad abarag hudēnān saxwan brahm ud paristišn ud kirdag pad āhōg ērang dāšt hēnd
7.0
ōy -iz kē -š pad ēn frahang ud rāz hammōxtan kāmag būd az gyāg gyāg pad harg ud rōzēnšab ī halagīh ō xwēš kirdan šāyēd nē tuwān būd
8.0
ān zand_āgāhīh nazdist abar buništīh ohrmazd ud petyāragīh ī ganāg_mēnōy pas abar čiyōnīh ī gēhān_dām az bundahišnīh tā frazām čiyōn az dēn ī mazdēsnān paydāg
9.0
pas abar xīr az sān X dārēd pad wizārišnīh čēīh ud čiyōnīh
pad weh_dēn ōwōn paydāg ohrmazd bālistīg pad harwisp_āgāhīh ud wehīh zamān akanārag andar rōšnīh hamē būd
ān rōšnīh gāh_ud_gyāg ohrmazd ast kē asar rōšnīh gōwēd
ān harwisp_āgāhīh ud wehīh zamān ī akanārag čiyōn ohrmazd
ud gāh dēn zamān ī ohrmazd būd hēnd
ahriman andar tārīgīh pad pas_dānišnīh ud zadār_kāmīh zofr_pāyag būd
u -š zadār_kāmagīh xām ud ān tārīgīh gyāg ast kē asar tārīgīh gōwēd
u -šān mayān tuhīgīh bawēd ast kē way kē -š gumēzišn padiš
harw dō hēnd kanāragōmandīh ud akanāragōmandīh
čē bālistīh X X X , , , , , , , , X X X ān ī asar rōšnīh gōwēd kū nē sarōmand
ud zofr_pāyag ān ī asar tārīgīh
ud ān ast agāragīh
pad wimand harw dō kanāragōmand kū -šān mayān tuhīgīh ud ēk ō did nē paywast hēnd
did harw X dōān mēnōy pad xwēš_tan kanāragōmand
ud did harwisp_āgāhīh ī ohrmazd rāy harw čē -š andar dānišn ī ohrmazd ,
kanāragōmand čē ān ī harw dō awimand paymān ānīd
did bowandag_pādixšāyīh ī dām ohrmazd pad tan ī pasēn tā hamē_hamē_rawišnīh
ud ān ast akanāragīh
ud dām ī ahriman pad ān zamān be abesīhēnand ī ka tan ī pasēn bawēd
ān -iz ast kanāragōmandīh
ud ohrmazd pad harwisp_āgāhīh dānist kū ganāg_mēnōy ast abar handāzēd ud kunēd pad arešk_kāmagīh čiyōn gumēzēd abar fragān abar frazām pad abar čand abzārān
u -š mēnōyīhā ān dām ī pad ān abzār andar abāyēd frāz brēhēnīd
sē_hazār sāl dām pad mēnōyīg estād kū būd hēnd amēnīdār ud arawāg ud agriftār
X ganāg_mēnōy pas_dānišnīh rāy az hastīh ī ohrmazd anāgāh būd
pas az ān zofāyag āxēzist
ō wimand ī dīdār ī rōšnān mad
ka -š dīd ohrmazd ān rōšnīh ud agriftār padrōb zadār_kāmagīh ud arešk_gōhrīh rāy pad murnǰēnīdan tag abar kird
u -š pas yalīh ud abarwēzīh ī farrox az ān ī xwēš
abāz ō tom dwārist kirrēnīd was dēw ān ī dām ī murnǰēnīdār niyāz ud ardīggarīh ,
ohrmazd dām ī ganāg_mēnōy astwand nē sahist
dām ī hēn ī pūdag wadag_dōšīh nē burzīd hēnd
ud pas ganāg_mēnōy dām ī ohrmazd dīd sahist was dām ī zofr ī wan hamāg_pursišnīh
u -š burzīd ān ī ohrmazd dām_dahišnīh
ēg ohrmazd abāg -iz čē ēwēnag dānistan dām ī frazām ī kār ō padīrag ī ganāg_mēnōy āštīh abar dāšt guft kū ganāg_mēnōy abar ō dām ī man ayārīh bar , ud stāyišn dah tā pad ān X pāddāšn amarg ud azarmān asōhišn bawē
u -š čim ēn kū agar ardīg nē sārēnē xwad nē agār -ā ud ō -mān harw_dōān sūd abgārīhā
u -š drāyīd ganāg_mēnōy kū nē baram ō dām ī tō ayārīh nē daham stāyišn
bē tō ud dām -iz ī tō murnǰēnam tā hamē_hamē_rawišnīh
bē hāzām harwisp dām ī tō ō adōstīh tō ud dōstīh ī man
u -š wizārišn ēn kū -š pad ēd dāšt kū ohrmazd andar ōy ačārag ud ēd rāy āštīh pēš dārēd
nē padīrift padist -iz abar burd
u -š guft ohrmazd kū nē harwisp_kirdār hā ganāg_mēnōy kū -t man nē tuwān murnǰēnīdan u -š dām ī -z man ēdōn nē tuwān kirdan kū abāz ō xwēšīh man nē rasēnd
pas ohrmazd pad harwisp_āgāh dānist kū agar zamān ī kārēzār -iz ī ī -š nē gīram ēg tuwān kirdan pad dām ī man čiyōn padist abar burd ud kōxšišn ud gumēzišn ī hamēyīhā
u -š andar gumēzišn dām nišastan ō xwēš kirdan tuwān čiyōn nūn -iz mardōm andar gumēzišn was kē ačāragīh wēš warzīd kū frārōnīh kū kāmag ī ganāg_mēnōy wēš hamē warzēnd
u -š guft ohrmazd ō ganāg_mēnōy kū zamān_grift ī kārēzār pad ēn pašn nō_hazār sāl frāz abganam
čē -š dānist kū pad ēn zamān_gīr X agārēnēd ganāg_mēnōy
ēg ganāg_mēnōy awēnāg_frazāmīh rāy pad ān paymānag ham_dādestān būd
ēdōn čiyōn dō mard hamkōxšišn zamān frāz gīrēnd kū -mān wāhmān rōz tā šab kārēzār kunam
ohrmazd ēn -iz pad harwisp_āgāhīh dānist kū andar ēn nō_hazār sē_hazār sāl hamāg kāmag ī ohrmazd rawēd sē_hazār sāl andar gumēzišn kāmag ī ohrmazd ahriman harw dō rawēd ud pad ān ī abdom ardīg , ganāg_mēnōy agār šāyēd kirdan ud az dām petyāragīh abāz X dārēd
pas ohrmazd ahunawar frāz srūd kū -š yatā_ahū_wayryō ēk wīst_ēk mārīg bē guft
u -š frazām_pērōzīh ī xwēš agārīh ī ganāg_mēnōy ud abesīhišn ī dēwān ud ristāxēz tan ī pasēn ud apetyāragīh ī dām ud hamē_ud_hamē_rawišnīh bē ō ganāg_mēnōy nimūd
ganāg_mēnōy ka -š ud agāragīh ī xwēš abesīhišn ī dēwān hammist dīd sturd ud abōy bawēd abāz ō tam ōbast
ōwōn čiyōn pad dēn gōwēd kū -š ka -š ēk -ēw guft būd ganāg_mēnōy az bīm tan andar hanǰīd ka -š dō bahr guft būd ganāg_mēnōy pad šnūg andar ōbast ka -š bowandag guft būd agār būd ganāg_mēnōy az agāragīh pad dāmān ī ohrmazd kirdan
sē_hazār sāl pad sturdīh nibast
dām_dahišnīh ī mēnōyīhā gōwam ud pas gētīyīhā
ohrmazd pēš az dām_dahišnīh nē būd xwadā ud pas az dām_dahišnīh xwadā ud sūd_xwāstār X frazānag ǰud_bēš ud āškārag hamē_rāyēnīdār ud abzōnīg ud harwisp_nigerīdār būd
u -š nazdist dahišn xwadā dād nēk_rawišnīh ān ī mēnōy ī -š tan ī xwēš padiš weh bē kirdan
ka -š dahišnīh menīd čē -š az dām_dahišnīh xwadāyīh būd u -š dīd pad rōšn_wēnāgīh ohrmazd kū ganāg_mēnōy hagriz az petyāragīh nē wardēd ān ī petyāragīh ǰud pad dām_dahišnīh nē agārīhēd dām ǰud pad zamān rawāgīh nē bawēd ka zamān brēhēnēd dām -iz ī , ahriman , rawāg be bawēd
u -š ačāragīhā petyārag agār kirdan rāy zamān frāz brēhēnīd
u -š čim ēn kū ganāg_mēnōy ǰud pad kārēzār nē agārīhēd
kārēzār wizārišn ēn kū kār -ēw pad čār ud čāragōmandīhā kirdan , abāyēd
pas az zamān ī agāragīhā zamān ī dērand_xwadāy frāz dād ast kē zamān ī X kanāragōmand gōwēd
az zamān ī dērand_xwadāy asazišnīh frāz dād kū tis ohrmazd nē sazēd
az asazišnīh axwārīh_rawišnīh paydāg būd kū dēwān xwārag nē rasēd
az axwārīhgarīh_rawišnīh mēnōy abē_wardišnīh paydāg būd ān mēnōy kū tis ī ohrmazd az ān ī pad bundahišn dād nē wardēd
az mēnōy abē_wardišnīh bowandag_kāmag ī dām_gēhān paydāg bawēd frārōn dām_dahišnīh ud hamdādestānōmandīh
ahriman pad abārōn dām_dahišnīh ud adānīh adādestānīh
u -š čim_wizārišn ēn kū ahriman abāg ohrmazd kōxšīhēd
xwadā ud farroxagīh ud hamagīh ud pahlomīh ud asazišnīh ī ohrmazd ud agārīh xwad_dōšagīh ud apahlomīh , pas_dānišnīh ī ganāg_mēnō tā ō paydāgīh X mad ka -š dām dād
čē zamān -iz ī dērand_xwadāy nazdist dām ī -š frāz brēhēnīd čē agārag būd X pēš az gumēzīh
hamēyīh ī ohrmazd kāragōmand brēhēnīd az ān akanārīh kū az bundahišn ka dām dād tā ō frazām kū ganāg_mēnōy agār bawēd , paymānag -ēw dwāzdah-hazār sāl kū kanāragōmand
ud pas ō , akanāragōmandīh gumēzēd ud wardēd kū dām -iz ī ohrmazd abēzagīhā abāg ohrmazd hamēyīg bawēnd
čiyōn gōwēd pad dēn kū zamān ōzōmandtar az harw dōān dāmān dām ī ohrmazd ud ān -iz ī ganāg_mēnōy
zamān ayābag ō kār dādestān zamān az ayābagān ayābagtar zamān az pursišnīgān pursišnīgtar kū wizār pad zamān šāyēd kirdan
zamān ī mān abganīhēd ī brīn pad zamān pēsīdag frāz , škihēd
ud kas az ōy nē bōxtēd az ōšōmandān mardōmān nē ka ō ul wāzēd nē ka ō nigūnīh čāh -ēw kanēd andar nišīnēd nē ka azēr xān ī X ābān ī sard frōd wardēd ,
ohrmazd az ān ī xwēš xwadīh az stī_rōšnīh kirb ī dāmān ī X xwēš frāz brēhēnīd pad ātaxš_kirb ī rōšn ī spēd ud gird frāz_paydāg
az stī ī ān mēnōy kē petyārag ī andar harw dō dām ā -š bē burdan tuwān ast zamān
ā -š kirb ī way weh frāz brēhēnīd čiyōn way abāyēd ast kē way ī dērand_xwadā gōwēd
u -š dām pad ayārīh way ī dērand_xwadā frāz brēhēnīd čē ka -š dām -iz dād way -iz abzār -ēw ī -š pad kār andar abāyēd
ganāg_mēnōy az stī tārīkīh ān xwēš_tan dām frāz kirrēnīd pad ān kirb ī syāh ī ādurestarōn ī tam_arzānīg druwand čiyōn bazag_axwtar , xrafstar
u -š az stī xwaddōšagīh waran ī X frāz kirrēnīd čiyōn waran abāyēd
u -š nazdist dēwān xwadīh dād dušrawišnīh ān mēnōy ī -š ganāgīh ī dāmān ī ohrmazd abēr būd
čē -š az stī tārīkīh ān ī asar tārīkīh dād
az asar tārīkīh drō_gōwišnīh frāz būd
az anāgīh ī ōy ganāg_mēnōy paydāg būd
čē -š ān dām dād ī -š xwēš_tan pad -iš wattar be kird kū , agār be bawēd
čē az asar ī tārīkīh ān kirb , frāz brēhēnīd u -š xwēš dām andar ān kirb bē dād az ān ī xwēš dām_dahišnīh agār būd ,
ohrmazd az stī rōšnīh rāst_gōwišnīh az rāst_gōwišnīh abzōnīgīh dādār paydāg būd dām_dahišnīh ,
čē -š asar kirb az asar rōšnīh frāz , brēhēnīd dām -iz hamāg andar X āsrō_kirbag bē dād āsrō_kirbag zamān sazišn ǰudāg būd
ud az āsrō_kirbag ahunawar frāz būd
mēnōy ī yatā_ahū_wayryō kē -š bē_dahišnīh ud frazām ī dām aziš paydāg ast dēn čiyōn dēn abāg dām_dahišnīh dahīhist
az ahunawar mēnōy sāl frāz būd kē andar gumēzišn nūn nēm_rōšn nēm_tārīk se_sad_šast_panǰ rōz_šabān kē brīn ī zamān ī dērand_xwadā
u -š harw dō dām pad kōxšišn padiš X rawāg būd
čiyōn guft dām ī ohrmazd pad xwadāyīh ud dastwarīh dādestānōmandīh bālistīh pad xwāhrīgīh estād
dām ī ganāg_mēnōy pad čērīh stahmīh wināhgārīh zofāyagīh pad dušwārīh estād ,
ohrmazd pad amahrspandān brīnōmand mad ka -š dād būd hēnd
se rad čē -š abāz ō gētī abāyēd dād
u -š nōgtar pad tan ī pasēn anāgīh az -iš bē apaydā burdan
u -š dām ī mēnōy mēnōyīhā dārēd
u -š dām ī gētī mēnōyīhā dād
u -š did bē ō gētī dād
u -š , nazdist amahrspand dād haft bun pas , abārīg
ān ī haftom xwad ohrmazd
az dām ī gētī pad mēnōy dād nazdist šaš
ān ī haftom xwad būd čē ohrmazd harw dō ast mēnōy nazdist gētī az amahrspandān
pas way ī dērand_xwadā nazdist wahman frāz brēhēnīd kē -š rawāgīh ī dām ī ohrmazd aziš būd ,
ganāg_mēnōy nazdist mihōxtīhā akōman az dām ī gētī nazdist asmān
u -š wahman az nēk_rawišnīh gētī ī rōšnīh nazdist frāz brēhēnīd kē -š dēn weh ī māzdēsnān abāg būd
ēn kū ān ī ō dām rasēd tā frašegird ā -š dānist ,
pas ardwahišt ud pas šahrewar pas spandarmad ud pas hordad amurdad brēhēnīd
haftom xwad ohrmazd haštom rāst_gōwišnīh nohom srōš_ahlaw ud dahom mānsr_spand yāzdahom nēryōsang dwāzdahom rad ī buland rahwōbirzid sēzdahom rašn ī rāst čahārdahom mihr ī frāgōyōt pānzdahom ālišwang ī weh šānzdahom pārand haftdahom xwēy haštdahom wād nōzdahom dādestānōmandīh wīstom pahikār pēšēmāl_pasēmālīh āštīh_abzōnīg ,
az dām gētī nazdist āsemān dudīgar āb ud sidīgar zamīg ī ud čārom urwar ud panǰom gōspand šašom mardōm ud haftom xwad ohrmazd ,
u -š dām ī pad ayārīh way ī dērand_xwadāy frāz brēhēnīd
čē ka -š way ī dērand_xwadāy , frāz brēhēnīd ōy -iz abzār -ēw būd ī -š pad dām_dahišnīh andar abāyēd ,
ganāg_mēnōy pad ān ī petyāragōmandīh az kamālāgān dēwān nazdist akōman frāz kirrēnīd pas indar pas sāwul ud pas nāhwayh ud pas tarōmad ud pas tariz ud zēriz ud pas abārīgān dēwān
haftom xwad ganāg_mēnōy ,
ganāg_mēnōy hagriz tis ī frārōn nē menēd ud nē gōwēd ud nē kunēd
u -š nēkīh ī dām ohrmazd nē abāyēd dām ī ohrmazd nēkīh ī dām ī , ahriman , nē abāyēd ,
ohrmazd ān ī čiš nē menēd X ī -š kirdan nē tuwān ,
ud ganāg_mēnōy ān ī -š nē tuwān kirdan menēd pad stēz -iz abar barēm
dām ī ohrmazd pad mēnōyīh ēdōn parward kū tarrīhā ēstēd amēnīdār ud agriftār ud arawāg čiyōn šusr homānāg
pas az tarrīgīh gumēzagīh šusr xōn homānāg
ud pas gumēzagīh xwurdagīh būd gaštag -ēw homānāg
pas az xwurdagīh wiškīdagīh ǰān dast ud pāy
pas az wiškīdagīh gabrīh būd čašm ud gōš ud dahān
pas az gabrīh čandišn būd ka bē ō rōšn ēstād
nūn -iz pad gētī pad ān hangōšīdag andar aškomb ī mādar hambōšēnd ud zāyēnd ud parwarēnd
ohrmazd pad dām_dahišnīh mādarīh ud pidarīh ī dahišn ast
čē ka -š dām pad mēnōy , parward ān būd mādarīh ka -š bē ō gētī dād ān būd pidarīh
abar dām_dahišnīh ī gētīyīhā
ka ganāg_mēnōy stardīhā agār būd čiyōn -im abar nibišt sē_hazār sāl pad stardīh sayist andar ān agārīh ōy ganāg_mēnōy ,
ohrmazd dām ō gētī brēhēnīd
čē -š asar rōšnīh ātaxš ud az ātaxš wād az wād āb az āb zamīg , harwisp astōmandīh gētī frāz brēhēnīd
čiyōn gōwēd pad dēn kū fradom dām hamāg āb -ēw srešk -ēw būd kū hamāg az āb būd ǰud tōhm ī mardōmān gōspandān čē ān tōhm ātaxš_tōhm ī
u -š nazdist āsemān dād pad abāz_ ast kē fradom gōwēd
dudīgar āb dād pad zadan ī tišn druz
sidīgar zamīg dād harwisp astōmandīh
čahārom urwar dād ō ayārīh mard ahlaw ī
šašom mard ī ahlaw dād zadārīh ud agārīh ganāg_mēnōy hamist dēwān ,
u -š pas ātaxš dād xwarg u -š brāh az asar rōšnīh awi -š paywast ēdōn kirb ī weh čiyōn ātaxš kāmag
u -š pas wād brēhēnīd pad mard_kirb ī ǰuwān ī pānzdah_sālag kē ēn X X āb ud urwar ud gōspand ud mard ī ahlaw harw tis -ēw burd dārēd
u -šān čiyōnīh gōwēd ,
nazdist asemān dād rōšn paydāg ī abēr dūr ud xāyagīhā xwēnāhen ī ast gōhr almāst ī nar
u -š sar bē ō asar rōšn paywast
u -š dām hamāg andarōn ī asemān bē dād āwahan homānāg drubušt kē -š harw abzār ī pad kōšišn andar abāyist andarōn nihād estēd ayāb mān homānāg kē harw tis andar mānēd
fragān_bun ī asemān čand -iš pahnāy ī -š drahnāy čand -iš drahnāy ī -š bālā ī -š zahyā hamōg_handāz
ubsār warzwar homānāg menišnōmand gōwišnōmand kunišnōmand ud āgāh abzōnīg wizīdār mēnōy asemān
u -š padīrift drang puštīh az ganāg_mēnōy kū abāz dwārist ud darrīd
čiyōn gurd ī artēxštār kē zrē paymōxt estēd kū abēbīmīhā az kārēzār bōxtēd mēnōy ī asemān asemān ēdōn dārēd ,
u -š dād ō ayārīh ī asemān urwāhmenīh
čē -š urwāhmenīh pad -iš frāz brēhēnīd kē nūn čiyōn gumēzagīh dām pad urwāhmenīh andar mānēd ,
dudīgar az gōhr ī asemān , āb brēhēnīd čand ka mard -ēw dō dast ō zamīg hilēd pad dast ud pāy rawēd ā -š tā aškomb āb be ēstēd pad ān bālā āb be tazēd
u -š dād ō ayārīh wād wārān kē muznāh ud snōyān ud snēzag ,
sidīgar az āb zamīg dād gird dūr_widarag ud anišēb anafrāz
hamōg drahnāy abāg pahnā ud pahnā abāg zohyā rāst mayān ī ēn asemān bē winnārd
čiyōn gōwēd kū -š nazdist se_ēk ēn zamīg frāz brēhēnīd saxt čiyōn sangdār dudīgar se_ēk ēn zamīg frāz brēhēnīd ud arzan_āgand sidīgar se_ēk ēn zamīg frāz brēhēnīd wēm_tangīrag
u -š gōhr andar zamīg bē dād kōfīhā kē pas az ān waxšīd rust hēnd az zamīg
u -š dād ō ayārīh zamīg āhan rōy bōrakiz harwist -iz ān ī saxt zamīg_tōhmag ǰud az astdār čē ǰud_tōhmag hēnd
ōwōn saxt brēhēnīd zamīg pad homānāg mard ka -š ǰāmag ǰāmag kust pad tan saxt andar grift ēstād
azēr ēn zamīg hamāg gyāg āb bē ēstēd ,
čahārom , urwar dād
nazdist ō mayān ēn zamīg abar rust čand pay -ēw bālā abē azg abē pōst abē xār ud tarr ud šīrēn
u -š wisp sardag zōr ī urwarān andar čihr X dāšt
u -š dād ō ayārīh urwar āb ud ātaxš čē harw X ēwan -ēw urwarān āb -ēw srešk pad , sar ātaxš čahār angust pēš pad ān zōr hamē rust ,
panǰom gāw ī ēk_dād brēhēnīd andar ērānwēz pad mayānag gēhān pad bārīh rōd ī wehdāyt kū mayānag ī gēhān spēd rōšn būd čiyōn māh kē -š bālā se nāy paymānīg
u -š dād ō ayārīh āb urwar čē -š andar gumēzišn zōr waxšišn az ēn būd ,
šašom gayōmard brēhēnīd rōšn čiyōn xwaršēd
u -š čahār nāy paymānīg bālā būd pahnā čiyōn bālā rāst
pad bālā rōd ī dāytī kū mayānag gēhān ēstēd gayōmard pad hōy ālag gāw pad dašn ālag
u -šān dūrīh ēk az did dūrīh -iz ī az āb dāytī čand bālā xwēš būd
čašmōmand gōšōmand , zuwānānōmand daxšagōmand būd
X gayōmard X daxšagōmand ēd kū mardōm az ōy tōhmag pad ān , hangōšīdag zād hēnd
u -š dād ō ayārīh xwēy āsānīh dādār
čē ohrmazd ān xwēy frāz brēhēnīd X pad mard_kirb ī buland ī pānzdah_sālag ī rōšn ,
u -š gayōmard abāg gāw az zamīg brēhēnīd
u -š az rōšnīh ud zargōnīh asemān šusr ī mardōmān ud gāwān frāz brēhēnīd čiyōn ēn X dō šusr ātaxš tōhmag
pad tan ī gāw , ud gayōmard bē dād tā -š purr_rawišnīh mardōmān X gōspandān aziš būd ,
u -š ēn šaš dahišn pad šaš gāh gāhānbār be dād pad sāl -ēw hangārd sē_sad_šast_panǰ rōz X dwāzdah māhīgān harw māh -ēw sī rōz māh -ēw sī_panǰ rōz harw rōz -ēw nām -ēw amahrspand -ēw pad -iš nihād
u -š čiyōnīh gōwam
nazdist asemān brēhēnīd pad čehel rōz čiyōn az rōz ī ohrmazd māh X frawardīn tā rōz ī ābān māh ardwahišt
panǰ rōz abar pād ī rōz day ī pad mihr ī
ān panǰ rōz gāhānbār
u -š nām mēdyōzarm
u -š wizārišn ēn kū mān , yašt ī mard āb ud zargōnīh ō paydāgī mad ,
dudīgar āb dād pad panǰāhpanǰ rōz čiyōn az rōz mihr ī māh ordohišt tā rōz ī ābān ī māh tīr
panǰ rōz abar pād ī rōz ī day pad mihr
ān ī panǰ rōz gāhānbār
u -š nām mēdyōšam kē -š wizārišn ēn kū -š āb rōšn be kird čē nazdist tērag būd ,
sidīgar zamīg dād pad haftād rōz čiyōn az rōz mihr ī māh tīr tā rōz ard ī māh šahrewar
ān ī panǰ rōz abar pād tā rōz anagrān
ān panǰ rōz X gāhānbār
u -š nām patišah
u -š wizārišn ēn kū pay ud rawišn ī dāmān pad zamīg paydāg bē kird ,
čahārom urwar dād pad wīst_panǰ rōz
[panǰ] [rōz] abar pād tā rōz anagrān
ān panǰ rōz gāhānbār
u -š nām ayāsrim kē -š wizārišn ēn kū -š walg ud bōy ud gōnag zargōnīh paydāg būd
panǰom gōspand dād pad haftād_ud_panǰ rōz čiyōn az rōz ī ohrmazd māh ābān tā rōz ī day pad mihr māh day
panǰ rōz abar pād
ān panǰ rōz gāhānbār
u -š nām mēdyāyrim kē -š wizārišn ēn kū hambār ī zamestān ī dāmān ī xwēš rāy paydāg bē kird
šašom mardōm dād kū gayōmard haftād rōz čiyōn az rōz rām ī māh day tā rōz anagrān māh spandarmad
panǰ rōz abar pād
ān panǰ rōz gāhānbār
ast kē ān panǰ truftag ast kē duzīdag gōwēd
u -š nām hamaspasmān kē -š wizārišn ēn kū hām_spāh_rawišnīh pad gētī paydāg būd čē frawahr ī mardōmān pad hāmspāhīh raft hēnd
nām ī ān panǰ rōz ī truftag ast kē panǰ gāh ī gāhānīg ast kē panǰag ī weh gōwēd
pad dēnīg ēn ast ahunawayt_gāh uštawayt_gāh spantmat_gāh wohušahr_gāh wahištōyšt_gāh ,
ān sī rōz pad māhān -ēw nihād estēd
u -š nām rōz ohrmazd wahman ordohišt šahrewar spandarmad hordād amurdad day ādur ābān xwar māh tīr gōš day mihr srōš rašn frawardīn wahrām rām wād day dēn ard ud aštād asamān zāmyād mahrspand anagrān
ān ī , dwāzdah māhīgān nām ham amahrspandān māh frawardīn māh ordohišt māh hordad māh tīr māh amurdad māh šahrewar māh mihr ī māh ābān māh ādur māh day māh wahman māh spandarmad
u -šān čiyōnīh ēk frāztar gōwēd ,
abar frāz_brēhēnišnīh rōšnīh ,
ohrmazd andarag asemān ud zamīg rōšnān frāz brēhēnīd estēnīd hēnd stārān ī axtarīgān -iz nē_axtarīg pas māh ud pas xwaršēd , čiyōn -iš nazdist spihr brēhēnīd
u -š starān axtarīg pad -iš gumārd hēnd mādagwar ēn dwāzdah kē -šān nām warrag ud gāw ud dō_pahikar ud karzang ud šagr ud hōšag ud tarāzūg ud gazdom ud nēm_asp wahīg dōl māhīg kē -šān hambišnīh pad wīst_hašt xwurdag ī āmārišn kē -šān nām ēn ast padēwar , pēš_parwēz parwēz , pahā , abesar bašn raxwat , tarāha , azara , naxw mayān abdom , māšāha spur husraw , srū nūr grafša wanand gāw , ǰuγ muru bundi , kaht_sar kaht_mayān , kaht
u -š harwisp bundahišnān ī ud gētī māndān ō hambišn kird hēnd kū ka ēbgat rasēd padīrag hamēmāl ī xwēš kōxšānd ud dāmān az awēšān paydāg bōzēnd handāzag ī , spāh ud gund kē ō kārēzār baxt ēstēd
harw axtar -ēw az awēšān šaš_hazār_bār_hazār_ud_sē_sad_šast_hazār xwurdag_stār pad ayārīh frāz brēhēnīd hēnd ān ī nūn axtarāmārān , āmārēnd ǰud az ān anāmārānīg čiyōn pad ham_ayārīh awēšān ēstēd ,
pad awēšān axtarān čahār spāhbed pad čahār kustag gumārd
spāhbed -ēw abar awēšān spāhbedān gumārd ,
was amar stārag ī nāmčištīg pad kust kust gyāg gyāg gumārd pad hamzōrīh nērōg dādār awēšān axtarān
ud čiyōn gōwēd kū tištar xwarāsān spāhbed , sadwēs nēmrōz spāhbed , wanand xwarnifrān spāhbed , haftōring , abāxtar spāhbed , mēx gāh kē mēx mayān asemān , gōwēd spāhbedān spāhbed
pārand ud mazdād abārīg ēn mar kustībān sālār
ud axtarāmārān ēn stāragān nūn stārag awiyābānīg xwānēnd
meh ud keh ud miyānag rāy gōwēnd kū wuzurgīh ī nazdistēn wuzurgīh , sidīgar
ēn spihr pad homānāgīh sāl -ēw nihād dwāzdah axtar čiyōn dwāzdah māhīgān harw axtar -ēw sī sus čiyōn harw māh -ēw sī rōz_šabān ,
u -š haftōring pad kust ī abāxtarān ānōh kū ka ēbgat andar dwārist dušox būd gumārd
az haft kišwar az harw kišwar -ēw band -ēw ōy -iš paywast ēstēd winnārdārīh kišwarān andar gumēzišn rāy
pad ān čim haftōring xwānīhēd
u -š sipihr ī awēšān axtarān čaxrag_ēwēnag , nihād kū andar gumēzišn ō rawišn ēstēd
ēg azabar awēšān starān ī agumēzišnī winnārd kū ka ēbgat , rasēd pad kōšišn spōzēnd ō abardar gumēxtan nē hilēnd
u -š xwarrah pad weh_dēn ī māzdēsnān pad awēšān , spāhbed ī gumārd
ud ānōh xwānīhēd mādayān ī razm paydāgīh abēzagīh andar gumēzagīh
ēd rāy star ī agumēzagīh ī xwānīhēd čē ka petyārag abar awēšān nē gumēxt hēnd
axtarāmārān xwānēnd spihr ī azabar spihr ī u -š hangārīh ud wihēz padiš nēst čē -šān nē tuwān āmārdan gumēzišnīg az -iš tis ī abēzagān
azabar az ān brēhēnīd māh gōspand_tōhmag
azabar ī ān brēhēnīd xwaršēd ī arwand_asp
u -š māh ud xwaršēd pad sālārīh ī awēšān axtarān ī gumēzišnīg gumārd kū -šān hamāg band ō xwaršēd māh
azabar xwaršēd brēhēnīd gāh ī amahrspandān kē ō asar rōšnīh gāh ī ohrmazd paywast ēstēd ,
ēn -iz ast šaš pay ī ud šaš dahišn ud čiyōn šaš dahišn gētī
ud mayān dam ī spihr gumārd ast abr ud ātaxš ī wāzišt kū ka ēbgat rasēd pad ān meh mēnōy ān tuxšīdar āb stanēnd wārān wārēnd
u -š band -iz ī awēšān ham ō xwaršēd ud māh ud stāragān kird u -š did tištar ī xwarāsān spāhbed hamkār ud ham_ayār ātaxš ī wāzišt ud wād ud abr ,
az awēšān stārān ān ī meh čand sang -ēw ī kadag_masā ī ān ī mayānag čand čaxrag ōbadišn ān ī keh čand sar ī gāw kadagīg
ud māh čand asprēs -ēw dō hāsr čiyōn harw hāsr -ēw ī pad_zamīg frasang -ēw paymānīg homānāg
xwaršēd and_čand ērānwēz
tā madan ēbgat māh ud xwaršēd ud awēšān stārān estād ud nē raft hēnd
ud abēzagīhā X zamān hamē widārd
ud hamwār nēmrōz būd
pas az madan ēbgat ō rawišn estād hēnd ud tā frazām az ān rawišn nē X estēnd
rawišn ī xwaršēd čiyōn mehtar tīr ī X sē_parrag ka ān ī mehtar mard az ān ī mehtar kamān wihēd
māh_rawišn ōwōn čiyōn sē_parrag tīr ī mayānag ka ān ī mayānag mard az ān ī mayānag kamān wihēd
starān_rawišn čiyōn sē_parrag tīr keh ka ān ī keh mard az ān ī keh kamān wihēd
az awēšān axtarān tēz_rawišntar hēnd tištar ud bašn trišag ud abarag padisar pēš_parwēz
xwaršēd az ān ī ka axtar -ēw bē hilēd tā ān ī did be ayābēd mayān_drang mard -ēw sag abar stanēd bē wihēd ,
abar čim ī dahišnīh dām ō ardīggarīh ,
ohrmazd nām ī sī amahrspand pad ān ī sī rōz ēdōn nihād kū nazdist ohrmazd pas šaš amahrspand bawēd haft haštom day ast dādār ud pas šaš amahrspand bawēd haft haštom day ast dādār ud pas haft amahrspand bawēd haštom
čiyōn -iš nām ī xwēš pad čahār gyāg andar māhīgān -ēw passāxt ohrmazd ud ān sē day čiyōn ēk nām ī ēk gāh ud ēk dēn ēk zamān kē hamē būd hēnd
ka ganāg_mēnōy ō petyārag mad ohrmazd zamān ī dērand_xwadāy frāz brēhēnīd pad mard kirb ī pānzdah_sālag rōšn ī spēd_dōysr , ī buland amāwand kē -š amāwandīh az hunarāwandīh ī nē az duzīh ud stahmagīh
u -š xwad paymōzan ī spēd paymōxt ud brāh ī , āsrōnīh dāšt čē hamē dānāgīh abāg āsrōnān kē ō kasān nimūdār harw kas az -iš hammōxtār hēnd
ohrmazd -iz xwēškārīh dām_dahišnīh būd
dām pad dānāgīh šāyēd dād
ēd rāy brahmag ī dānāgān paymōxt ast āsrōnīh
way ī weh ǰāmag zarrēn sēmēn gōhr_pēsīd ud hargōnagān was_rang paymōxt brahmag ī , artēštārīh čē abar_raftār az pas dušmenān pad petyārag zadan ud dām pānagīh kirdan
čiyōn gōwēd kū way ān ī andar harw dō dām petyārag bē barēd xwēškārīh čē -š dād spenāg_mēnōy kē -z ganāg_mēnōy pad ēn kū ardīg sar be kunēd dām ī ohrmazd hamē abzāyad ān ī ganāg_mēnōy abesīhēnēd ,
az dāmān brēhēnīd , spihr ī X X ud zurwāg būd nēkbaxtīh
u -š paymōzan ī xašēn paymōxt brahmag ī wāstaryōšīh dāšt čē -š nēkbaxtārīh gēhān xwēškārīh ōwōn čiyōn wāstaryōšān gēhān warzīdan passazagīhā bē dād
čiyōn ohrmazd mayān harw šaš amahrspand dām ī xwēš passāxt
dahišn ī -iz mēnōy ud gētī pad X ham_ēwēnag dād
čiyōn mēnōy ohrmazd ān ī šaš amahrspand wahman ordohišt šahrewar spandarmad hordad amurdad ēdōn asemān šaš pay ī nazdist abr_pāyag dudīgar spihr ī axtarān sidīgar star ī agumēzišnīh čahārom wahišt māh pad ān ī pāyag estēd panǰom garōdmān kē anagr ī rōšn xwānīhēd xwaršēd pad ān ī pāyag estēd šašom gāh amahrspandān haftom asar rōšnīh ud gāh ohrmazd
ōwōn -iz dām ī gētī haft brēhēnīd nazdist asemān dudīgar āb sidīgar zamīg čahārom urwar panǰom gōspand šašom mardōm haftom ātaxš kē brāh az asar rōšn gāh ī ohrmazd
u -š ātaxš harwisp dahišn ēdōn bē pargand frāz brēhēnīd čiyōn kadag_xwadāy -ēw ka andar xānag šawēd ǰāmag ī andar xānag xūb abāz nihād
u -š framūd ō ātaxš andar ēbgatīh paristag ī mardōm kirdan xwarišn sāxtan ud dard zadan ud ka az tis bē wazēnd bērōn āyēd ka ēzm abar nihād frāz gīrēd u -š harwisp amahrspandān pad hamkārīh ardīggārīh ud dām ēdōn gumārd ud estēnīd kū ka ēbgat mad harw kas ān ī xwēš hamēmāl pad kōxšišn frāz gīrēd kū nōg framān andar nē abāyēd
u -š čiyōnīh frāztar gōwam ,
fradom az mēnōyān ohrmazd az gētīyān band mardōm ō xwēš kird
u -š hamkār ān sē day ēk gāh ī ēk dēn ēk zamān wisp_day_nām kē ast mēnōy harwisp_dahišn
u -š mardōm pad panǰ bōzišn frāz dād tan ǰān ud ruwān ud ēwēnag ud frawahr
čiyōn tan ān ī gētī
ud ǰān ān ī abāg bōy andar tan āšnawēd gōwēd dānēd
ēwēnag ān ī pad xwaršēd_pāyag estēd
frawahr ān ī pēš ī , ohrmazd xwadāy
pad X ān ī čim ēdōn brēhēnīd kū andar ēbgatīh mardōm mīrēnd tan ō ǰān ō (uncertain) ēwēnag ō xwaršēd , ruwān ō frawahr paywast kū -šān ruwān murnǰēnīd nē tuwān bawēd ,
ud dudīgar az mēnōyān wahman
u -š az gētīyān dahišn , gōspand sardagān ō xwēš padīrift
u -š dād ō ayārīh ud hamkārīh māh ud gōš ud rām ud spihr ī xwadāy ud zurwan ī akanārag zurwan ī dērand_xwadāy
u -š gōspand pad panǰ bōzišn frāz brēhēnīd tan ī ud ǰān ruwān ēwēnag mēnōy kū tā andar ēbgatīh gōšurwan tōhmag ī gōspandān az māh_pāyag padīrēd pad X ayārīh rām ī weh andar gēhān rawāgēnēd
ka mīrēnd tan ō gōšurwan ruwān ō rām ī ēwēnag ō māh mēnōy ō wahman paywast kū -šān be murnǰēnīdan nē tuwān būd
sidīgar az mēnōyān ordohišt
u -š az dahišn ī gētī ātaxš ō xwēš padīrēd
u -š dād ō ayārīh ud hamkārīh ādur srōš wahrām ud nēryōsang az -iš pad ān čim kū andar ēbgatīh wahrām ātaxš andar mān nišastan winnārd drubuštīh ud dād srōš ud pānag ī gīrēd
ka be uzrōbēd az wahrām ō srōš az srōš ō ādur az ādur abāz ō ordohišt paywast kū dēwān bē murnǰēnīd nē tuwān bawād ,
čahārom az mēnōyān šahrewar
u -š az dahišn gētī ayōxšust ō xwēš grift
u -š dād pad ayārīh hamkārīh xwar mihr ī ud asemān ud anagrān sōg ī weh , ardwīsūr ī hōm_yazad burz_yazad ud dahmān āfrīn
čē ayōxšust , awestwārīh az asmān asmān bowand_gōhr ī ayōxšustēn
u -š winnārišn az anagrān
anagrān andarag rōšn mān ī zarrēn gōhr_pēsīd ul ō gāh ī amahrspandān paywast estēd kū pad ēn hamkārīh dēwān andar ēbgatīh ayōxšust wany kirdan nē tuwān bawād ,
panǰom az mēnōyān spandarmad
u -š az dahišn ī gētī zamīg ō xwēš , padīrift
u -š dād ō ayārīh hamkārīh ābān dēn ard mahrspand ud aršišwang ud ardwīsūr ī ud anāhīd čiyōn ašōnī mēnōy yōǰdahrgar ī zamīg ābān tōhmag
u -š pēš mahrspand
mahrspand gōwišn ī ohrmazd
ud ard dēn andar xwarrah ī mān ast kē aršišwang gōwēd xwarrah ī wahištīg ardāyīh
ud ardwīsūr ud anāhīd pid ud mād ī ābān pad ēn hamkārīh andar ēbgatīh winnārd estēnd ud ēn mēnōyān hamkār xwarrah nigāh dārēnd ,
šašom az mēnōyān hordad
u -š dahišn ī gētīyān āb ō xwēš padīrift
dād ō ayārīh hamkārīh tīr ud wād frawardīn čiyōn tīr tištar kū andar ēbgatīh ān ī āb pad ayārīh frawardīn ast ī frawahr ī ahlawān stanēd mēnōyīhā ō wād abespārēd ud wād ān āb tagīhā ō kišwarīhā rāyēnēd ud widārēd pad abr abzār abāg hamkārān , wārēnd ,
haftom az mēnōyān amurdad
u -š az dahišn ī gētī urwar ō xwēš X padīrift
u -š dād ō ayārīh hamkārīh rašn ud aštād ud zamyād se xwarrah ī ānōh pad čīnwār_pul kē ēbgatīh ruwān mardōmān pad nēk ud wad kird āmārēnd
any mēnōy ī dām pad awēšān hamkārīh winnārd estēnd čiyōn ān ī andar spihr ī axtarān rāy nibišt
u -š rōz -iz andar mayānagān harw ēk pad panǰ hangām baxt
harw hangām -ēw mēnōy -ēw pad -iš gumārd čiyōn bāmdād gāh ī hāwan mēnōy nēmrōz gāh ī rapihwin mēnōy ī ēbārag gāh ī uzērin mēnōy āpādyābān ēbsrūsrim mēnōy ušahin ī gāh ušahin ī mēnōy xwēšīh dārēnd
u -š awēšān -iz pad hamkārīh baxt hēnd
čē -š hāwan ō mihr rapihwin ō ordohišt uzērin ō burz_yazad ēbsrūsrim ō ahlawān ud wahrām , ušahin ō srōš ud rašn pad hamkārag winnārd
čē -š dānist kū ka ēbgat rasēd ēn pad ēn panǰ hangām baxšīhēd tā pēš ka ēbgat mad hamēšag nēmrōz būd ast rapihwin
ohrmazd abāg amahrspandān pad rapihwin mēnōy ī yazišn frāz sāxt andar yazišn kunišn dām hamāg bē dād
abāg bōy frawahr ī mardōmān uskārd ud xrad ī harwisp_āgāhīh pad mardōmān frāz srūd guft kū kadār -tān sūdōmandtar sahēd ka -tān bē ō gētī brēhēnom ud tanīgirdīhā abāg druz be kōxšēd ud druz be abesīhēnēd u -tān pad frazām drust drust anōšag abāz wirāyēm u -tān abāz ō gētī daham hamēyīg_gāh ī amarg abē , hamēmāl bawēd ayāb -itān hamēyīg_pānagīh ēbgat abāyēd kirdan
ud u -šān dīd frawahr ī mardōmān pad ān ī xrad ī , harwisp_āgāhīh anāgīh az druz ud ahriman andar gētī pad -iš rasēd abdom abē_hamēmālīh ī az petyārag drust anōšag abāz bawišnīh ī pad tan ī pasēn ī hamē_rawišnīh rāy pad šudan ī hēnd ,
dwārist ī ēbgat ō dām ,
gōwēd pad dēn kū ganāg_mēnōy ka -š agārīh xwēš ud hamist dēwān az mard ī ahlaw ī dīd stard būd
sē_hazār sāl pad stardīh nibast
andar ān stardīh kamālīgān_dēwān ǰud ǰud dawīd hēnd kū abar āxēz pid ī amāh čē ān kārēzār kunam ān ī -š ohrmazd ud amahrspandān tangīhā anāgīh aziš
u -šān ǰud ǰud kunišnīh ī xwēš gugānīg ōšmārd
az -iš nē rāmīhist ōy ī druwand nē āxist az ān stardīh bīm ī mard ī ahlaw rāy tā ka ǰeh ī druwand mad pad bowandagīh sē_hazār sāl dawīd kū āxēz pid ī amāh čē man andar ān kārēzār and_čand bēš abar mard ī ahlaw gāw warzāg hilam kū kunišn ī man rāy zīwandīh nē abāyēd u -šān xwarrah bē apparam bēšēm āb bēšēm zamīg bēšēm ātaxš bēšēm urwar bēšēm harwisp dahišn ī ohrmazd_dād
u -š ān duškunišnīh ōwōn pad gugān ōšmurd kū ganāg_mēnōy be rāmīhist az ān stardīh frāz ǰast sar ǰeh abar bōst ēn rēmanīh daštān xwānēnd pad ǰeh paydāg būd ,
dawīd ganāg_mēnōy ō ǰeh kū -t čē kāmag hād xwāh tā daham
ēg , ohrmazd pad xrad harwisp_āgāhīh dānist kū pad zamān čē ǰeh xwāhēd ganāg_mēnōy ādūg dād
u -š pad ān ī meh sūdīh ān ganāg_mēnōy kirb ī dīd_ud_dēs wazag az -iš mard ǰuwān ī pānzdah_sālag homānāg ō ǰeh nimūd ān ī ǰeh menišn awi -š bast
u -š dawīd gālīh andar mān be nišīnam
u -š dawīd ganāg_mēnōy kū čē tis xwāstan ō tō nē gōwēm čē abē_sūd ud wad dānē xwāstan
be sazist ān zamān čē ka -š xwāst hād nē ādūg būd hē dah
pas āxēzist ganāg_mēnōy abāg hamist dēwān abzārān ō , pedīragīh rōšnān
u -š ān asmān dīd ī -šān mēnōyīhā nimūd ka nē astōmand dād estēd
arešk_kāmagīhā tag abar kird
asemān pad star_pāyag estād
frōd ō tuhīg āhixt ī -m ī pad bun nibišt kū andarag buništ rōšnān X ud tamīgān būd ōwōn kū azabar ī star_pāyag andarōn ī , asmān tā ēk_se be estād
u -š mār homānāg asemān , azēr ī zamīg bē ǰast frāz xwāst be škast
māh frawardīn rōz ohrmazd andar dwārist nēmrōz
u -š asmān ēdōn aziš be tarsīd čiyōn gōspand az gurg
pas ō āb X ī -m guft kū azēr ī ēn zamīg winnārd estēd u -š pas , mayānag ī zamīg suft āmad
pas ō urwar mad pas ō gāw ud gayōmard
pas ō ātaxš abar mad ī
magas homānāg pad harwisp dahišn be dwārist
u -š gēhān pad nēmrōz ōwōn , ōst_tom be kird čiyōn šab ī tērag homānāg asmān ēr ud azabar zamīg tam grift
u -š guft mēnōy asmān ō ganāg_mēnōy kū bēdom zamān ā -m pānagīh abāyēd kirdan kū -t bērōn be nē hilam
u -š āb ǰud_mizagīh abar burd
u -š guft mēnōy āb kū dahišn wahman ordohišt šahrewar kū ēdōn ō man rasēnīd kū nūn ka petyārag mad ān mizd kū_gyāg estēd
u -š zamīg xrafstarān abar hišt
ōwōn astōmand aziš be hambūsīd hēnd xrafstar ī gazāg ī wišōmand čiyōn az ud mār ud gazdum karbāš ud kašawag ud wazag kū sōzan_tēx az xrafstarān zamīg nē xwast
u -š guft zamīg kū awēšān kēnīgān pad ēn dahišn ī -šān dād kēn rasād
u -š urwar zahr ōwōn abar burd ham_zamān bē hōšīd
u -š guft mēnōy urwar kū pad ān ī ōy tarsāgāhīh ohrmazd urwar waxšēnēd
u -š āz ud niyāz sēǰ dard ud yask waran ud būšāsp pad tan ī X gayōmard , frāz , hišt
pēš az madan ī ō gāw ohrmazd mang ī bēšāz kē ast ī banǰ xwānēd ō gāw pad xwardan dād pēš čašm bē mālīd kū tā -š az zanišn bazak wizend duš_rāmīh kam bawēd pad ham zamān nizār wēmār būd ud pēm bē šud frāz widard
u -š guft gāw kū ān ī gōspandān dahišn awēšān kunišn kār pahlom framāyišn
pēš az madan ī ō gayōmard ohrmazd xwēy abar gayōmard frāz burd and_čand dranā ī wezest -ēw bē gōwēd
čē -š brēhēnīd ohrmazd ān xwēy pad mard_kirb ī pānzdah sāl ī rōšn ī buland
ud ka gayōmard az xwēy frāz būd dīd gēhān tārīk čiyōn šab zamīg čiyōn sōzan_tēx az dwārišn xrafstarān nē pargūd estād spihr ī ō gardišn xwaršēd māh ō rawišn estēd pattānōmand gēhān az γarrānišn ī māzagān dēwān kōxšišn ī abāg axtarān
u -š menīd ganāg_mēnōy kū -m dāmān ī ohrmazd hamāg agārēnīd hēnd ǰud az gayōmard
u -š astīwihād abāg ēw_hazār dēw margīh_kirdārān pad gayōmard frāz hišt u -šān zamān ī brīn rāy ōzadan čār nē ayāft
čiyōn gōwēd kū pad bun_dahišn , ka ganāg_mēnōy ō petyāragīh mad zamān ān ī gayōmard zīwand ī xwadāyīh ō sī sāl brēhēnīd guft čiyōn pas az madan ī petyārag sī sāl zīwist
u -š guft gayōmard kū nūn ka ēbgat mad mardōm az tōhmag ī man bawēnd tis -ēw ēn weh ka kār ud kirbag kunēd
pas ō ātaxš mad u -š dūd ud tēragīh andar gumēxt
haftān abāxtarān abāg was dēwān hamkārān ō spihr kōxšišn ī axtarān X gumēxt hēnd
u -š harwisp dahišn ōwōn āhōgēnīd čiyōn ka az ātaxš hamāg dūd abar āxēzēd ō -z abargarān gāh pad gumēxtan kōxšīd hēnd
nawad rōz_šabān mēnōyān yazadān abāg ganāg_mēnōy hammis dēwān andar gētī ham_kōxšīd būd hēnd tā -šān stōwēnīd ō dušox abgand
drubuštīh asmān kirdan kū petyārag awi -š gumēxtan nē tuwān
dōšox andar mayānag zamīg ānōh kū ganāg_mēnōy zamīg suft padiš andar dwārist
čiyōn hamāg xīr gētī pad dōīh_wardišnīh hamēmāl_kōxšišn ud ul ud frōd gumēzišnīh paydāg būd ,
ēn -iz gōwēd kū ka gāw ēk_dād frāz widard pad dašn dast ōbast gayōmard pas az ān ka be widard pad hōy dast
gōšurwan čiyōn ruwān ī gāw ēk_dād az tan gāw bērōn āmad pēš ī gāw be estād
čand ēk_hazār mard ka pad ēk bār wāng dārēnd ō ohrmazd garzīd kū -t sālārīh dām pad kē bē hišt ka zamīg wizandag andar sayēd urwar hušk āb bēšīd kū hēd ān mard kē -t guft kū daham tā pahrēz bē gōwēd
u -š guft ohrmazd kū wēmār hē gōšurwan az ān ganāg_mēnōy wēmārīh ud X ī dēwān abar burd hē
agar ān ī mard andar ēn zamān frāz šāyēd dād ganāg_mēnōy ēn stahmagīh nē būd hād
frāz raft gōšurwan tā star_pāyag garzīd ham_ēwēnag
frāz tā māh_pāyag ud garzīd ham_ēwēnag
ud frāz tā xwaršēd_pāyag ham_ēwēnag garzīd
u -šān pas frawahr ī zardušt be nimūd kū bē daham ō gētī kē pahrēz bē gōwēd
hunsand būd gōšurwan ud padīrift kū dām be parwāram kū pad gōspand abāz ō gētī dahišnīh ham_dādestān būd ,
abar hamēstārīh dōān mēnōyān kū čē ēwēnag mad hēnd mēnōyīhā pad hamēstārīh kamālagān dēwān ō mēnōyān yazadān , čiyōn ahriman ō ohrmazd akōman wahman indar ō ordohišt sāwul ō šahrewar , nāhāh X kē tarōmad -iz xwānēnd ō spandarmad tawriǰ ō hordad ud zayriǰ ō amurdad xēšm ō srōš ud drō ud mihōxt ō rāstīh sraw ī ǰādugīh ō mānsr ī abēzag frāybūd ud abēbūd ō paymān ī ast dēn weh , dušhumat dušhūxt ud dušxwaršt ō humat hūxt ud huwaršt astīwihād kē wāy wattar xwānīhēd ō rām ī ast wāy weh waran ī arāh ō āsn_xrad aš_kunīh ī ast nigerīdārīh ō mēnōy nigerīdārīh aǰgahānīh ō tuxšāyīh būšāsp ō xwēy kēn ō āštīh bēš ō rāmišn gand ō hubōyīh tārīkī ō rōšnīh zahr ō anōšag taxlagīh ō šīrēnīh penīh ō rādīh wanīgarīh ō wizīdār_dāšnīh zamestān ō hāmīn sard ō garm huškīh ō xwēdīh dušoxīgīh ō wahištīh X druwandīh ō ardāyīh ahlomōγīh ō ahlawīh zarmānīh ō ǰuwānīh šab ō rōz anāmurzīdārīh ō aboxšišnīh ganāgīh ast zadārīh ō abzōnīgīh rēmanīh ō pākīh nasruštīh ō yōǰdahrgarīh ahunsandīh ō hunsandīh abārīg dēwīg waxš čiyōn , dēwān ud druzān ud māzenīgān ō yazadān bayān amahrspandān andar gētī tam ō asmān tišn ō āb hixr X ud xrafstar wazag ō zamīg sōg ō urwar sūy tišn ō gōspandān ud marg ud sēǰ ō wišēz dard ēwēnag ēwēnag ō mardōmān afsārišn wazišn ō ātaxšān ān ī ka mardōm ud gōspand sōzēnēd pad huškīh astōmandīhā šēr ud gurg sardagān ud yōzān ō sagān gōspandān wazag ō māhīgān būg abāg abārīg xrafstar ī parrwar ō murwān ahlomōγān ī druwandān ahlawān ī mardān ǰeh ō zanān abārōn zīwōmandīh ō frārōn zīwōmandīh abaxšišnīh druz ō , paywand_rawišnīg axw abārīg gētīyīg druz ō gētīyān yazadān mad hēnd
andar -iz spihr mihr ī tamīg ō xwaršēd māh ī tamīg ō māh gōspand_tōhmag mad hēnd
u -šān ō rah xwēš , bast hēnd pad ham_paymānagīh abārīg ǰādūgān parīg abāg ragēn murnǰēnīdārān abāxtarān axtarān ud haft ud abāxtarān spāhbedān axtarān čiyōn tīr ō tištar , ohrmazd ī abāxtarīg ō haftōring wahrām ī abāxtarīg ō wanand anāhīd abāxtarīg ō sadwēs kēwān kē abāxtarān spāhbedān spāhbed ō mēx mayān asmān ud gōzihr -iz ud mūš_parīg ī dumbōmand ō xwaršēd ud māh -o stārīgān mad hēnd
xwaršēd mūš_parīg ō rah xwēš bast pad ham_paymānagīh kū tā wināh kirdan kam tuwānist ka harzag bawēd tā abāz_griftan was anāgīh baxšēd
andar -iz abr_pāyag spinǰarūš ō ātaxš ī wāzišt apāwš dēw ō tištar hamkārān ō tā tištar mad
any amar_čašmagān dēwān ō wād wārān kirdārān yazadān mad hēnd ,
u -šān gugān dagrang u -šān rawišn kōxšišn ō wihēz ud drang pad axtarmārīh -iz paydāg
abar zayǰ ī gēhān kū čiyōn ǰast
pad dēn gōwēd kū māh ī frawardīn rōz ī ohrmazd nēmrōz ka rōz ud šab rāst būd petyārag andar dwārist ,
ǰānān būd karzang dah_nō gyāg xwurdag azarag (uncertain) past ,
andar tištar stārag az abāxtarān ohrmazd andar būd
kisagān šēr , , X X X ud hōšag pedištān tarāzūg kēwān andar ǰast
frazandān gazdum waštagān nēm_asp dōgihrēn andar ǰast
wayōdagān wahīg wahrām andar ǰast
margān dōl kārdāgān māhīg anāhīd tīr andar ǰast
mayān_asmān warrag mihr andar pad xwurdag farroxān gāw ud māh andar dušfarragān dō_pahikar gōzihr sar andar ǰast būd
awēšān abāxtarān čiyōn pad ēn ēwēnag andar spihr dwārist hēnd abāg axtarān ō kōxšišn estād hēnd mihr māh ud tamīg ō xwaršēd ud māh rōšnān šahryār ohrmazd ō haftōring abāxtarān spāhbed anāhīd ō sadwēs ī nēmrōz X spāhbed wahrām ō waran ī xwarwarān spāhbed tīr ō tištar ī xwarāsān spāhbed kēwān ō mēx mayān asmān spāhbedān spāhbed
pad asmān ham hangōšīdag az abāxtarān tīr xwarāsān spāhbed mihr māh tamīg , šahryār ī tamīgān ǰast hēnd
gōzihr mayān ī asmān be ēstēd mār homānāg sar pad dō_pahikar ud dumb pad nēmasp čiyōn mayān sar ud dumb harw gāh šaš ī axtar bawēd
u -š dwārišn ō pas harw dah sāl ānōh kū sar dumb ānōh kū dumb sar abāz bawēd
mūš_parīg ī dumbōmand parrwar ǰast xwaršēd ō rah ī xwēš bast kū tā -š wināh kirdan nē tuwān bawēd
ka harzag bawēd tā abāz ō hamčašmānīh xwaršēd mihr bast was anāgīh pad gēhān , kunēd
ud dumb awēšān abāxtarān mihr ī X tamīg ud mūš_parīg pad ham_paymānagīh azēr ī xwaršēd andar gumēzišn ō rah ī xwaršēd ud māh tamīg ō rah māh bast estēd
abārīg dudīgar ō ham rah ī xwaršēd pad dagrangīh ud kastagīh bast estēd
u -šān az ān paymānag wēš dādan nē tuwān čē kēwān ohrmazd wahrām harw ēk pad ēw_sad_haštād sus ī mihr ī ud tīr pad hazār_hašt_sad_ud_panǰāh lipī anāhīd pad dō_hazār_ud_hašt_sad_sī_ēk dah lipī az mihr bast ēstēnd
axtarān andar spihr pad dwāzdah kadag ī axtarān ī harw kadag petyārag bālist ud nišēb ud marz sē sūd ud dahīg ud šādīh bēš ud abārīg was ēwēnag gyāg_gāh xwēš paydāgēnīd estēd
hamāg rāyēnišn ī āwām čiyōn was ō axtarān čiyōn čašm_dīd paydāg wišōband ul_frōdēnd kast abzōn kunēnd
u -šān rawišn -iz nē čiyōn axtarān abar ast ka tēz ast ī dērand ast ka abāz_rawišn ast ka ēstādag hēnd
u -šān abāxtarān_nāmīh ēd kū nē axtar hēnd
u -šān ēn rōšnīh aziš paydāg ham rōšnīh ī ohrmazdag handāzag wattarān kē paymōzan ī spāh paymōzēnd čiyōn rōšnīh andar čašm ī xrafstarān
u -š sūdōmandīh az -iš ēk ēn kū paymōxtan ī ān rōšnīh rāy wināh kirdan kam tuwān ud ēk ēn kū mardōm wēnēnd az -iš nē tarsēnd
handāzag ēn axtarān homānāg ī tērag čē awēšān dēw hēnd zarmānīh ud anāgīh kirdār
ka andar spihr tazēnd ān rōšnīh spihr ǰumbīhēd paydāg bawēd
pad dēn gōwēd kū ka kas ān druzīh be wēnēnd hād wēnišn ī čašm bē šud
kōf ī harborz pērāmōn ī gēhān kōf ī tērag mayān ī gētī
ud xwaršēd gardišn čiyōn abesar pērāmōn ī gēhān andar abēzagīh azabar ī kōf ī harborz pērāmōn ī tērag abāz wardēd
čiyōn gōwēd kū tērag ī harborz kē ān man xwaršēd ud māh stārag az pas abāz wardēd
čē ēw_sad_haštād rōzan ast pad xwarāsān ēw_sad_haštād pad xwarwarān pad harborz
xwaršēd harw rōz pad rōzan -ēw andar rawēd pad rōzan ī ē bē šawēd
māh ud axtarān -iz axtarān hamāg band ud rawišn ō ōy
harw rōz se kišwar nēm , hamē tābēd
čiyōn čašm_dīd paydāg kū harw sāl dō garān rōz ud šab rāst
čē pad bun_ardīg ka az nazdist xwurdag ī warrag frāz rawēd rōz ud šab rāst būd hangām ī wahār ,
ka ō nazdist xwurdag ī karzang rasēd rōzān mahist bun hāmīn
ka ō xwurdag ī tarāzūg rasēd rōz ud šab rāst , bun pādēz
ka ō xwurdag ī wahīg rasēd šabān mahistēd bun ī zamestān
nōgtar ka ō warrag rasēd šab rōz rāst abāz bawēd čiyōn ka az warrag frāz wardēd tā abāz ō warrag rasēd pad sē_sad_šast rōz ud ān panǰ rōz ī gāhānīg pad ham rōzan be rasēd bē šawēd
rōz -ēw nē guft estēd čē agar bē guft hād dēwān rāz bē nē dānist hād wizend handāxt hād
az ānōh kū xwaršēd pad rōz ī mahist abar āmad tā pad rōz ī keh abar āyēd xwarāsān kišwar arzah ,
az ānōh kū pad rōz ī keh abar āyēd tā pad rōz ī keh bē šawēd kust nēmrōz kišwar ī fradadafš ud wīdadafš ,
az kū pad rōz ī keh andar šawēd tā pad rōz ī meh andar šawēd xwarwarān kišwar ī sawah ,
az ānōh kū pad rōz ī mahist abar āyēd tā pad rōz ī mahist andar šawēd kust ī abāxtar ud kišwar ī āwarišn wōrūǰaršt
ka xwaršēd abar āyēd kišwar ī arzah fradadafš ud wīdadafš nēm -ēw az xwaniras tābēd
ka pad kust ī tērag andar šawēd kišwar ī sawah ī , ud āwarišn , wōrūǰaršt nēm -ēw az xwaniras tābēd
ka ēdar rōz ānōh šab čē kōf ī tērag rāy šab paydāgīhēd
pad bun ka ēbgat andar dwārist ōwōn ǰast kū mihr māh ī tamīg ham_paymānagīh abāg rah xwaršēd māh rāy wināhgārīh kirdan nē tuwānist
ud haftōring ud sadwēs az ohrmazd ud anāhīd frāy_nērōgtar ǰast hēnd u -šān ohrmazd ud anāhīd az wināh kirdan pādīrānīd
ham čim rāy axtarāmārān awēšān rāy pad kirbaggar xwānēnd
wahrām az wanand kēwān az mēx ī gāh frāy_nērōgtar ǰast hēnd u -šān wināhgārīh paydāg
ēd rāy axtarāmārān awēšān pad bazaggar ōšmārēnd
ud tīr ī , ast apāwš dēw ō tištar mad
harw dō hāwand_zōr ud hāwand_nērōg ǰast hēnd
ēd rāy axtarāmārān gōwēnd kū tīr abāg kirbaggarān kirbaggar abāg bazaggarān bazaggar
ast kē ēdōn gōwēnd kū apāwš nē tīr
ham čim rāy gōwēnd kū ohrmazd stārag ī zīwandagīh ud kēwān stārag ī margīh
čē ohrmazd apādyāwandīh andar hamēstārīh rāy ān baxšēd ī hamēstār kāmag zīwandagīh ud rawāyīh ud xwāstag dād
kēwān čērīh ī az hamēstār rāy ān kunēd ō ēn petyār margīh wadagīh ud driyōšīhpazām petyārag
gōwēd kū anāhīd āb_čihrag čē -š hamēstār sadwēs āb_čihrag
ud tīr wādīg gōwēd čē -š hamēstār tištar ud wād wārān_kirdārān
did ēn kū tā X madan ī petyārag ēd hazār sāl zamān widard estād sē_hazār sāl andar mēnōyīh ud sē_hazār sāl gētīyīh andar abēzagīh
ud ān šaš_hazār sāl az warrag tā hōšag harw axtar -ēw ēw_hazār sāl xwadāyīh kird
čiyōn hazārag xwadāyīh ō tarāzūg mad ast šēbān šēb ī mihr petyārag az azēr andar dwārist
kēwān pad tarāzūg ǰast
pad bālist ī xwēš būd tā pad tarāzūg rāy kēwān hazārag xwadāyīh padīrift
čiyōn tarāzūg ul warrag kēwān xwadāy ī tārīkīh mihr xwadāy ī rōšnīh ō tārīkīh petyārag ōwōn -iz tarāzūg bālist kēwān nišēb ī mihr ud warrag bālist ī mihr ud nišēb ī kēwān ǰast
drāzīh ǰuγ ī kēwān ān -iz ī tarāzūg rāy andar ān hazārag X mardōm bulandtar , mahisttar būd hēnd
xwaršēd -iz xwadāy ī rōšnīh ud azabar ī hamāg axtarān kēwān xwadāy ī tārīkīh azabar ī hamāg abāxtarān ēstēd
pas az ānōh kū xwaršēd frāz raft tā abāz ō ān gyāg mad pad sāl -ēw hangārēd sē_sad_šast_panǰ rōz šaš zamān ī xwurdag kē harw rōz -ēw wīst_ud_panǰ zamān nēm -ēw tārīk ud nēm -ēw rōšn ast šab ud rōz
ud panǰ hangām ī šabān_rōz paydāgīhist
čiyōn , kōxšišn ī harw dahišn abāg xwēš hamēmāl ōwōn -iz rōz abāg šab čē šaš māh kē šab abzāyēd ō rōz paydāg X šaš māh rōz abzāyēd az rōz ud šab ,
ud abārīg axtar_āmārān paydāg bē huwizārīhātar ān ī az weh_dēn mazdēsnān paydāg
ēn nišānag pad asmān kē rāh ī kayusān xwānēnd ud rāh ī gōzihr mār čiyōn andar spihr
ud azabar gugān kird ,
, abar ardīg_kunišnīh dahišnān gētī padīrag ī ganāg_mēnōy ,
, gōwēd pad dēn kū ganāg_mēnōy čiyōn andar X X mēnōy ī dwārist ud čimīg_dahišnīh dām abarwēzīh yazadān ud nizōrīh ī xwēš dīd abāz dwārist kāmist
mēnōy ī asmān čiyōn arwand artēštār kē zrēh ī ayōxšustēn dārēd xwad ast asmān padīrag ī ganāg_mēnōy bē winnārd padist barēd tā ka ohrmazd drubuštīh saxttar az asmān pērāmōn ī asemān be kird
u -š frawahr ī artēštārān ī ahlawān gurd , asēǰ_nēzag_dast pērāmōn ī ān drubuštīh ōwōn be gumārd čiyōn homānāgīh mōy abar sar
hangōšīdag ī awēšān ahlawān pad -iš estēnd ahlawān āgāhīh xwānēnd
u -š nē ayāft ganāg_mēnōy widarg abāz_dwārišnīh
u -š abesinnēnišnīh ī dēwān agārīh xwēš ōwōn rōšn be dīd čiyōn ohrmazd frazām pērōzīh xwēš ud frašegird_kirdārīh dām tā hamē_hamē_rawišnīh
ēn nazdist ardīg mēnōy asmān abāg ganāg_mēnōy kird ,
dudīgar ardīg āb kird
az ān čiyōn tištar stārag pad karzang ī ābīg pad xwurdag ī azarag xwānēnd ǰānān būd andar ham rōz ēbgat andar dwārist abāz ō ēbārag pad kust ī xwarofrān abr ō paydāgīh āmad
ānōh harw māhīgān -ēw xwēšīh axtar -ēw
māh tīr čahārom māhīgān ī az sāl
karzang čahārom axtar ī az warrag
čiyōn xwēšīh karzang kē -š tištar andar ǰast daxšag ī wārān_kirdārīh mad
u -š āb ul ō abr rawānīd pad nērōg ī wād
hamkārān abāg tištar ēstād hēnd wahman hōm_yazad ud pad parwānagīh burz_yazad ud pad hamkārīh ardā fraward pad paymān_winārišnīh
ud tištar pad se tan ī bē_wašt mard_kirb asp_kirb ī ud gāw_kirb ī sī rōz_šabān andar rōšnīh čiyōn pad harw kirb -ēw dah šab rōz wārān kird
čiyōn axtarāmārān -iz gōwēnd kū harw axtar -ēw se kirb dārēd
ān wārān harw srešk -ēw čand tašt ēw ī wuzurg ī ābānagān āb abar wašt hamāg zamīg mard bālāy āb be estād
ān xrafstarān zamīg hamāg pad ān wārān be ōzad
bērōn huzārag ī parrwar kē pad sūrāxīh ī zamīg andar šud hēnd
pas mēnōy ī wād čiyōn ast -iz nē gumēxt estād čiyōn gyān andar tan ī ǰumbēd wād andarwāyīg frāz ǰumbīhist
u -š ān āb hamāg bē mušt bē ō kanārag ī zamīg āwarēd ud zrē ī , frāx_kard az -iš būd
ān xrafstar ī murdag pad zamīg andar mānd
u -š wiš ud gandagīh pad zamīg abar gumēxt
ud ān wiš az zamīg bē burdan rāy tištar pad asp_kirb ī X ī drāz_dumb andar zrēy frōd šud
u -š apāwš dēw pad homānāgīh asp ī syā ī kūg_dumb padīrag bē tazēd
u -š ē frasang tištar pad stōwīh rāyēnīd
tištar hanǰaman ī ohrmazd xwāst ohrmazd ōzōmandīh abar burd
čiyōn gōwēd kū tištar pad ham zamīg dah asp ī ǰuwān ud dah X uštar ī ǰuwān dah gāw ī ǰuwān dah kōf dah rōd X ōz abar mad
u -š ēw frasang apāwš dēw pad stōwīh bē tazēnīd
ē rāy pad ān čim tīr abāg tištar hāwend_nērōg gōwēnd
pas pad abr_nihumb paymānīg abzār -ēw ī ān kār ēdōn gōwēnd āb abar stanēd
ud čand škefttar wārēnēd pad srešk gāw sar ud māh sar saxt zahā ud must zahā meh -iz ud keh -iz
andar ān wārān_kirdārīh aspanǰarūš ud apāwš kōxšīd hēnd
ud ātaxš ī wāzišt gad abar zanišnīh γarrēnīd wāng kird čiyōn nūn -iz ham ān ardīg pad wārān_kirdārīh drahnāy ud rōzāg paydāg
u -š dah šab rōz pad ān ēwēnag wārān kird
ān wiš xrafstarān ī andar zamīg būd hamāg andar ān āb bē gumēxt ud ān mahīdar be kird
čē andar , zamīg be mānd az ān tōhmag xrafstar hamē hambūsēnēnd
pas wād ān āb pad hamēwēnag tā bandagīh se rōz pad kust kust zamīg abāz nišāst
se zrē ī meh ud sī zrē keh az -iš būd
dō čašmag ī zrē az -iš ō paydāgīh mad ēk čēčest ēk sūwar kē -šān bun ī xān , ō čašmag ī zrē paywast estēd , ,
u -š az kust ī abāxtar dō rōd bē tazēnīd
ēk ō xwarāsān ēk ō xwarōrān šud hēnd ī ast ī arwand rōd X ud weh rōd
čiyōn gōwēd kū pad ān ī X angust zahā ī ohrmazd dō āb_tazan_bun frāz kārēd
ud ān harw_dō rōd pad harw_dō sar ī zamīg be gardēnd pad zrē Frāxkard abāz ō ham gumēzēnd
ud ka ān dō rōd bē tazīd būd az ham bun_xān ī awēšān haštdah rōd ēw_tāg bē tazīd
pas abārīg ābīhā az ān ēw_tāgān frāz tazīd hēnd
awēšān -iz hamāg abāz ō arwand ud weh rēzand kē -šān X ī gēhān ud frāy_zīwišnīh ī dāmān aziš būd
ēn fradom ardīg āb abāg ganāg_mēnōy kird ,
sidīgar ardīg zamīg kird
čiyōn ganāg_mēnōy andar dwārist zamīg be zandīd ān gōhr ī kōf ī andar zamīg dād estād pad X ham zamān kōf ō rawišn estād nazdist harborz baγ_baxt pas abārīg kōfān mayān ī zamīg abar
čiyōn harborz frāz waxšīd harwisp kōf ō rawišn estād hēnd čē hamāg az rēšag ī harborz ī frāz waxšīd hēnd
pad ān zamān az zamīg abar raft hēnd draxtān homānāg kē tāg pad ān ō rēšag ēk andar did ōwōn be widārd pad hambandišnīh be winnārd hēnd
ud pas az ān zamīg pad škoftīh čandēnīdan nē šāyēd
čiyōn gōwēd kū kōf meh band ī zamīgān
ud widarg ī ābān andar kōf rēšag kōfān ud azēr azabar bē hišt kū -š padiš andar tazēnd ōwōn čiyōn rēšag ī draxtān andar zamīg , widerēd hangōšīdag xōn ī andar rāγān kē zōr ō hamāg tan dād
pad āmār ǰud az harborz pad haštdah sāl hamāg kōf az zamīg abar āmad hēnd kē frayādišn ud sūd ī mardōmān az -iš
čiyōn gōwēd kū frāz dād estēnd pad sūr ō āsrōnān ud artēštārān ud wāstaryōšān
ēn fradom ardīg zamīg abāg ganāg_mēnōy kird , , , ,
čahārom ardīg urwar kird
ān ka hušk be būd amurdad amahrspand čiyōn -iš urwar xwēš ān urwar xwurd kōst abāg āb ī tištar stad be gumēxt
ud tištar ān āb pad hamāg zamīg bē wārēnīd
pad hamāg urwar ēdōn bē rust čiyōn mōy pad sar mardōmān
u -š bēwar aziš ēk sardag mādagwar frāz rust hēnd pad abāz_dārišnīh bēwar wēmārīh ī ganāg_mēnōy ō dāmān kirrēnīd
az ān bēwar ē_sad_ud_sīh sardag andar sardag urwar frāz waxšīd hēnd
az ān hamāg tōhmag ī urwarān wan ī was_tōhmag frāz dād
andar zrē ī frāxkard abar rust kē hamāg sardag ī urwar tōhmag pad ān wan az -iš hamē waxšēnd
nazdīk ō ān wan gōkirn draxt bē dād pad abāz_dārišnīh ī zarmān ī dušpad
u -š purr_frahixtišn ī gēhān aziš būd ,
ēn fradom ardīg urwar abāg ganāg_mēnōy kird , ,
panǰom ardīg gāw ēk_dād kird
čiyōn frāz widard urwar_čihrīh rāy az hannāmān ī gāw panǰāh_panǰ sardag ǰōrdāg ud dwāzdah sardag urwar bēšaz az zamīg waxšīd hēnd
u -šān rōšnīh wēmār ī andar tohm ī gāw būd ō māh abespārd
ān tōhm pad rōšnīh ī māh be pālūd pad hamāg gōnagīhīhā be wirāst ud ǰān andar kird
az ānōh ǰuxt ēw gāw ēk nar ud ēk mādag ud pas az harw sardag ēw dō čiyōn dō_sad_ud_haštād_dō pad zamīg dō frasang homānāg kē pad dēn haštdah hāsr gōwēd frāz paydāg būd hēnd ,
gōspandān māništ pad zamīg murwān ō andarwāy ud māhīg ō āb šnāzēn hēnd kē pad frāy_parwālišnīh ī andar aziš būd
ēn fradom ardīg ī gāw abāg ganāg_mēnōy kird , , ,
šašom ardīg gayōmard kird az ān čiyōn pad spihr ī gayōmard paydāg būd kū andar ēbgatīh pad , kōxšišn ī axtarān sī sāl zīwist
čiyōn guft zamān pēš az ēbgat kū gayōmard ī tagīg ō zamestān zīwandagīh ud xwadāyīh brēhēnīd
pad madan ī ēbgat ohrmazd stārag pad karzang ī ābīg pad bālist ī xwēš pādyāwandīh ī -š andar hamēmāl rāy ō gayōmard zīndagīh ī ǰān brēhēnīd
ud kēwān X stārag pad tarāzūg pad gyāg ī -z pas az kū meh ī azēr zamīg pad bālist ī xwēš hast abarwēzīh ī ī -š abar hamēstār rāy margīh brēhēnīd
būd ī ohrmazd pad bālist ī xwēš pad meh ī ǰānān ud abarwēzīh abar kēwān rāy ān margīh az gayōmard bē spōxt tā sī sāl
ka did kēwān abāz ō tarāzūg mad kū -š bālist ī xwēš pad ān hangām pad gāh -ēw ǰast kū -š nišēb ī xwēš ud abarwēzīh kēwān abar ohrmazd rāy gayōmard margīh abar mad pad hōy dast ōbist
andar bē_widerišnīh -ēw tōhm andar ō zamīg , šawēd čiyōn nūn -iz andar widerišnīh -ēw hamāg mardōm tōhm bē rēzand
az ān čiyōn tan ī gayōmard az ayōxšust kird estād az tan ī gayōmard šaš ēwēnag ayōxšust ō paydāgīh mad
ān tōhm ī andar ō zamīg šud pad čehel sāl meš ud māšanī abar rust hēnd kē -šān purr_rawišnīh ī gēhān ud abesīhēnišn dēwān ud agārīh ī ganāg_mēnōy aziš būd
ēn fradom ardīg gayōmard abāg ganāg_mēnōy kird ,
haftom ardīg ātaxš kird
ān padīrag ī aspanǰarūš bē estād ātaxš wāzišt -iz pad wārān_kirdārīh ud ud ādur ī farnbay ud gušnasp ud burzēnmihr pad gēhān_pānagīh ī dām_pādārīh ud ātaxš čiyōn andar urwar ud mardōmān ud gōspandān pad ǰān_dāštārīh , ud waxšēnīdārīh
u -š winnārdārīh ī gēhān dām aziš būd
ēn -iz fradom ardīg ātaxš abāg ganāg_mēnōy kird ,
haštom ardīg axtarān kird padīrag druzān , abāxtarān
harw kas abāg xwēš hamēmāl pad kōxšišn estād ud padīrag hambadīg winnārd hēnd tā frašegird čiyōn -im zayǰag ī gēhān nibišt
ēn fradom ardīg mēnōy yazadān abāg ganāg_mēnōy kird ,
nohom ardīg mēnōyān yazadān abāg ganāg_mēnōy kird ka -šān zad stōwēnīd ō dōšox abgand
čiyōn gōwēd nawad rōz šab axwēb ud apōyišn būd hēnd mēnōyān yazadān pad ān ardīg_kirdārīh ,
dahom starān ī agumēzišn kird , ka -šān tārīkīh ud bazzagīh ō abargar gumēxt nē hišt
čiyōn gōwēd kū xwarrah ī weh_dēn ī māzdēsnān pad ēbyāhān homānāg ī ast kustīg homānāg star_pēsīd ī mēnōyān tāšīd se tāg pad čahār grih pērāmōn asmān pad [ān] [pāyag] be dāšt
awēšān starān abāg pad kōxšišn estād hēnd tā frazām čiyōn nibišt
ānōh mayān axw razm barēnd
abēzagīh andar gumēzagīh xwānīhēd , , ,
abar ēwēnag awēšān dahišnān , ,
gōwēd pad dēn kū ka ganāg_mēnōy andar dwārist nē pad sāl ud māh ud rōz čē tēz pad zamān be mad nazdist ō se_ēk ī ēn zamīg dudīgar ō panǰ_ēk ī zamīg sidīgar ō ēn zamīg hamāg bē pas ,
ast ohrmazd ān ī awēšān kirb abar grift abar awēšān stārag_pāyag burd frāz ō stāragān kē nūn abāz ō gētī tābēnd
čiyōn gōwēd kū axtarān ī āb_čihrag zamīg_čihrag urwar_čihrag hēnd ,
awēšān āb_čihragān , tištar ud trišag ud abarag padispar ud pēš_parwēz panǰ stārag kē parwēz xwānēnd awēšān āb_stāragān
ān zamīg_čihr haftōring ud mayān asmān awēšān zamīg_sardagān
ud ān ī urwar_čihrag abārīg ǰud az awēšān
pas ganāg_mēnōy ō gāw mad
gāw ō nēmrōz ālag pad dašn dast ōbast
nazdist ān ī dašn pāy ō ham burd
ohrmazd ān ī gāw kirb ēwēnag ī gāw abar grift ō māh abespārd čiyōn ast ēn rōšngar ī māh abāz ō gēhān tābēd
čiyōn gōwēd kū māh ī gōspand_tōhmag kū ēwēnag gāwān gōspandān pad māh_pāyag estēd
pas ka ō , gayōmard mad gayōmard ō nēmrōz rōn hōy ālag ōbast ,
nazdist -iz ān ī hōy pāy ō ham burd
ohrmazd ān ī ōy kirb abar grift ō xwaršēd abespārd čiyōn ast ēn rōšnīh ī xwaršēd kē ō gēhān padiš tābēd abar
gāw ōwōn būd čiyōn māh ud gayōmard ōwōn būd , čiyōn xwaršēd ,
ohrmazd pad gētī frāz brēhēnīd
ka ēbgat mad ul ō azabar burd kū tā abāz ō xwēš buništ tābēnd dēwān -iz ān ī xwarrah ō xwēšīh nē rasēd kū padiš pādixšā bawēnd
agar nē ēdōn kird hād ān rōšnīh ō gētī nē tēzist hād handāzag_ī ātaxš ka brā az asar rōšnīh awi -š paywast estēd ka abrōzēnd rōšnīh ō azabar dād ō xwēš buništ ī ī -š aziš āmad
ēn -iz gōwēd kū ka ō gayōmard margīh abar mad nazdist pad ān ī dašn pāy pad ān ī keh angust ganāg_mēnōy frāz dwārist pas ō dil gursagīh padiš frāz hišt
ohrmazd ud ganāg_mēnōy ānōh bē X ēstēd tā -š gōšt ud rōγn ō gayōmard xwārēnīd kū tā -š dēwān pad axwarišnīh nē kirrēnēnd pad ān čim ǰān andar tan ī gayōmard pad war saxttar be būd
pas abar suft mad
pas abar ō bālist sar dwārist
az tan ī gayōmard rōšnīh ōwōn bē šawēd čiyōn āhen ī garm ī , , suxr ka -š putak abar zanēnd ud syā be bawēd
nūn -iz mardōm andar gētī pad ēn hangōšīd mīrēnd kē nazdist pāy ud pas abārīg handām ud war tā ō kas hōšēd ud pas ǰān andar war saxttar be bawēd ud xwarišn xwarēd was ka mardōm padiš niyāzān bawēnd kū ān tan weh bawēd
ud pas zūd mīrēd ud ka murd gōn be wardēd ,
abar čiyōnīh zamīgān , ,
gōwēd pad dēn kū ast zamīg sī_se sardag
čiyōn ān ī -m pēš pad dar ī zamīg nibišt ka tištar ān wārān kird kē -š zrēhā aziš būd hēnd zamīg hamāg gyāg nam be grift
pad haft pārag bē wisist azēr_dārišn ud azabar_dārišn be būd
X nišast pārag -ē čand nēm -ēw mayān ud šaš pārag pērāmōn ,
ud ān šaš pārag čand xwaniras
u -š kišwar nām nihād kū kiš be būd
čiyōn pārag -ē pad kust ī xwarāsān arzah kišwar pārag -ē pad kust ī xwarōrān sawah kišwar ud dō pārag pad kust ī nēmrōz fradadafš ud wīdadafš kišwar ud dō pārag ī pad kust ī abāxtar wōrūbarišn wōrūǰarišn , kišwar xwānēnd ud ān ī mayān ī awēšān and_čand kū awēšān xwaniras
az kišwar ō kišwar ǰud pad parwānagīh yazadān warzānagīh tā šud nē šāyēd
čiyōn gōwēd kū mayān ī arzah ud sawah ud xwaniras zrē dārēd čē bahr -ēw az zrē ī frāxkard pērāmōn be dāšt
az mayān ī fradadafš wēšag dārēd
mayān ī wōrūbarišn , wōrūǰarišn kōf ī buland bē rust kū tā az kišwar ō kišwar paywand bē bawād kū tā ēk ō did šudan nē šāyēd
az ēn šaš kišwar hamāg nēkīh andar xwaniras wēš dād
ganāg_mēnōy ō -z xwaniras wēš kōxšīd anāgīh ō xwaniras wēš kirrēnīd
zadārīh rāy ī -š aziš wēnēd čē kayān ud wīrān andar xwaniras dahīhēd
dēn -iz weh ī māzdēsnān pad xwaniras dahīhēd
pas ō abārīg kišwar barēnd
sōšāns -iz andar xwaniras zāyēnd kē ganāg_mēnōy abesihānand ud X ristāxēz tan ī pasēn kunēnd
čiyōn gōwēd kū frahist mardōm andar xwaniras ud xwaniras ōzōmandtar
andar kišwar ī xwaniras ēn druz wattom
ēn awēšān -iz kišwar ī abdom druz bē burd ,
, , abar čiyōnīh kōfān , ,
gōwēd pad dēn kū nazdist kōf frāz rust harborz ī baγbaxt az ān pas hamāg kōf frāz rust hēnd pad haštdah sāl
harborz tā bowandagīh haft_sad sāl hamē rust dwēsad sāl ō star_pāyag ud dwēsad tā ō māh_pāyag ud dwēsad tā ō xwaršēd_pāyag ud dwēsad tā ō bālist asmān
čiyōn abārīg kōfīhā az harborz frāz rust estēnd pad marag dō_hazār_ud_dwēsad_ud_čehel_ud_se kōf ī ast hugar ī , buland tērag ī harborz čagād ī dāytī ud arzāzar garīwag usindām kōf kōf abursēn kē ast abursān gōwēd , kōf ī zərəδaz kē ast kōf mānuš kōf ēriǰ kōf ī kaf kē ast ī kōf ī X X X X X X ušdāštār kōf ī arwadarbūm kōf rōyišnōmand kōf ī padišxwār kōf kē mast xwarrah ud xwārīh kōf -iz xwānēnd kōf ī rēwand kōf ī dārspǝṇt baγgar kōf ī was_škuft kōf ī gyāhōmand kōf ī wafrōmand kōf ī spandyād kawīrasp kōf ī asewand kōf kaykarās kōf sēzdah kōf ī andar kang_diz kē gōwēd āsānīhōmand awēšān ud weh_xwarrah xwurdag kōf
u -šān gugān gōwam
harborz pērāmōn ī ēn zamīg ō asmān paywast estēd
tērag ī harborz ān kē -š star māh ud xwaršēd padiš andar wardēnd padiš abāz āyēnd
hugar buland ān kē -š āb ardwīsūr aziš frōdīhēd ēw_hazār mard bālā ,
usindām kōf ān az āhan muhrēn gōhr ī asmān ud mayān ī zrē ī frāxkard kē -š āb az hugar ī pad -iš frōd rēzēd
čagād ī dāitī ān ī gēhān ēw_sad mard bālā kē -š činwad puhl padiš estēd
ruwān pad ān gyāg āmār
ham_dwārišnīh ī dēwān pad -iš kū hamāg dranǰišn ānōh kunēnd
čiyōn gōwēd kū zamīg kadār gyāg mustōmandtar guft hād arzūr grīwag pad dar ī dōšox kē -š ham_dwārišnīh ī dēwān padiš bawēd
ēn -iz gōwēd kū ǰud az harborz abursēn kōf meh ast kū abursēn gōwēd kōf ī hamāg pārs u -š bun
u -š bun pad sagestān u -š sar pad hūzestān pad -iz xwarāsān tēx ast
dudīgar kōf ī mānuš meh ān kōf kē -š mānuščihr padiš zāyēnd
abārīg kōfān pārs az awēšān frāz rust hēnd
čiyōn gōwēd kū frōd_ābīg ud absārīg deh pērāmōn awēšān se kōf wēš ǰast estēd
kōf ī ēriǰ pad māy ud hamadān ī xwārizm az kōf ī abursēn rust estēd
kōf ī mānuš pad xwarāsān pad wimand turkestān ō -iz abursēn paywast estēd
kōf ī kaf az ham kōf ī abursēn rust estēd
kōf ī ušdāštār pad sagestān
arzūr kōf ān ī pad kust ī hrōm
padišxwargar kōf ān ī pad tabarestān ud gēlān
ud ān kustag rēwand kōf pad xwarāsān
ādur ī burzēnmihr pad -iš nišīnēd u -š X rēwandīh ay kū rāyōmand
wādgāh kōf ān ī pad wādišān wimandān ud ān kustag purr_dār ud purr_draxt
baγgar kōf ān ī frāsyāb ī tūr pad drubuštīh dāšt
u -š ān mān andarōn kird ,
u -š im_rōz šahr rāmpērōz bēwar šahrestān abar abgand estēd
kōf ī was_škuft ān ī pārs az ham kōf ī , abursēn
kōf ī gyāhōmand kōf ī wafrōmand ān ī -šān kāwul ud ān kustagīhā aziš rust estēd ō kust ī čīn
spandyād kōf pad war ī rēwand kōf
kawīrusp kōf pad tūs šahr kē -š war ī sūwar pad sar
kōf rās pad ērānwēz
usewand kōf pad ādurpādagān
rōyišnōmand kōf ān kē -š urwar padiš rust
būm kōf ān ī hamāg gyāg pad būm būm ud šahr šahr u -š warz ābādānīh padiš kunēnd
was nām was marag az ham ēn kōfīhā ī ōšmurd rust estēd čiyōn ān ī -š nām pad ayādgārīhā ud šahrīhā paydāg
kōf ī wanāft kōf aspranǰ kōf ī pahrgar kōf ī dambāwand kōf ī rāzag kōf ī zarrēn kōf ī gēsbaxt kōf ī dahnād kōf ī mēzan nūn marag kē hamāg az abursān mānuš ud abārīg kōf ī gāh ōsmurd rust estēd
čē dahnād kōf ō X hūzestān paywast estēd ham az abursēn kōf
dambāwand kōf ān ī -š bēwarasp padiš bast estēd az ham padišxwar
az ham padišxwar kōf -iz ī kōmīš ud gurgān paywast estēd čiyōn kōf ī kōmīš , kōf ī madōfrayād xwānēnd ān kē wištāsp arzāsp pad -iš stōwēnīd
kōf ī -ēw mayān ī dašt az ān kōf ānōh wisist estēd
ud gōwēd pad kārēzār ī dēn ka stōwīh pad ērānagān būd az ān kōfīhā ī bē_wisist mayān ī dašt frōd ōbast ud ērānagān , padiš bōxt hēnd
u -šān madōfrayād xwand
wanād kōf pad hampušt wištāspān ud ānōh ō rēwand kū mān ī ādur ī burzēnmihr nō frasang ō xwarōrān rōn
rāzag bašn pad zarābād
ēn gyāg ast kē zarābād ud ast kē rāzag bašn ast kē karā xwānēd
az dō kust kōf ī ud rāh mayān diz ī frōd
ēd rāy diz kū ānōh kird estēd ast karā diz xwand
ēn gyāg andar sirāb būm
kōf ī aspranǰ azabar ī čīnestān
gēsbaxt pad pārs
pahrgar pad xwarāsān
kōf ī marag pad lārān
kōf ī zarrēn pad turkestān
kōf ī behistūn pad spāhān garmēnišān
abārīg az ēn mar kē pad rawišn hēnd kōf būm hangārēd
andar dēn ī māzdēsnān kōf ān ī pārag pad gyāg gyāg rust estēd
, abar čiyōnīh zrēyān ,
gōwēd pad dēn kū zrē ī frāxkard pad kust nēmrōz kanārag ī harborz se_ēk -ēw ay ēn zamīg dārēd
ud ēdōn frāx_kird kū -š ēw_hazār war andar dāšt estēd
ast kē čašmagān ī ardwīsūr ud ast kē xānīgān ī war gōwēd
harw war -ēw rāy āb_xān dō ast kē āb pad -iš abar āyēd andar ō war rēzēd
harw war -ēw rāy harw āb_xān dō and_čand pahnāy ud drahnāy ast ī ka huasp mard tāzēnēd pad čehel rōz ud šab pērāmōn be gardēd ī būd ēw_hazār_hašt_sad frasang meh
az ān čiyōn ān āb pad garmīh ud xwēdīh yōǰdahrīh frāy az abārīg ābān , harw rōz az čašmagān ī ardwīsūr hamēw tazēnd ō nēmrōz ,
ud kōf ī harborz ānōh ēw_sad ēw_hazār nāyīzag ī zarrēn kird estēd
ān āb ī pad garmīh ud čihrag pad ān nāyīzag abar hugar ī buland šawēd pad bālist ān war -ēw ast andar ān war rēzēd yōǰdahr be būd pad ǰud nāyīzag ī zarrēn abāz āyēd
pad hazār mard bālā az ān nāyīzag ī tāg -ēw wišādag ī zarrēn frāz ō kōf ī usindām ǰahēd
mayān zrē ī frāxkard az ānōh bahr -ēw yōǰdahrīh zrē rāy frāz ō zrē rēzēd ud bahr -ēw pad hamāg ēn zamīg pad nam ud paššinǰag be rasēd
ud hamāg dahišnān xwēdīh bēšāzēnišnīh az -iš ayābēnd ud huškīh ī andarwāy bē zanēd
čiyōn gōwēd kū hugar ī buland kē hamāg sūrag zarrēn kē padiš frāz ǰahēd ardwīsūr ī awinast ēw_hazār wīr bālā
zrēyīhā ī sōr se ast
mādagwar ast ēk gēhān bun
az harw se pūytīk āb kē purr ud ōgār pad -iš ud ham_kust ī zrē frāxkard ō frāxkard paywast estēd
mayān zrēy ī frāxkard ud ān ī pūtīk pahlūg ī zrēy dārēd kē war ī sadwēs xwānēnd
harw stabrīh ud sūrīh ud nē_pākīh az zrēy ī pūytīk ō zrēy ī frāxkard wurrōyēd šawēd
pad wād ī wuzurg ī buland az ān war ī sadwēs abāz zanēd
harw čē pāk ud rōšn andar ō frāxkard čašmagān ardwīsūr šawēd ān ī dudīgar abāz ō pūytīk rēzēd
band ī ēn zrē ō māh ud wād paywast estēd pad abzāyišn ud kāhišn
ud ul āyēd ud frōd šud čē -š gardišn ō nēmrōz
band -iz ī sadwēs ō sadwēs_stārag bast estēd kē -š zrēyīhā ud kust nēmrōz andar pānagīh ōwōn čiyōn haftōring ud kust ī abāxtar andar pānagīh
purr ōgār rāy gōwēd kū az pēš ī māh harw_gāh dō wād hamēw wazēd kē -šān māništ andar war ī sadwēs
ēk frōd_āhang ud ēk ul_āhang xwānēnd
ud ka ān ī ul_āhang wazēd purr ud ka ān ī frōd_āhang X wazēd ōgār bawēd
pad abārīg , zrēyīhā az ān ī čiyōnīh gardišn ī māh pad -iš nēst purr ōgār nē bawēd
zrē kamrōdīg ān ī abāxtar pad X widerēd
ān gēhān_bun pad hrōm
zrēyān ī keh ān ī warm zrē ī kayānsē čiyōn pad sagestān
fradom xrafstar ud mār ud wazaγ andar nē būd āb gilēn
abārīgān zrē ī keh ast āb šīrēn
ēn -iz zrēyīhā sōr pad nazdīk gandagīh rāy tā hāsr ō X nazd nē šāyist šudan
and and pad zanišn ī X ōy ān ī gandīh ud sōrīh ānābēd
ka frašegird būd šīrēn abāz bawēd ,
abar čiyōnīh ī rōdīhā
gōwēd pad dēn kū ēn dō rōd az abāxtar nēmag az harborz ohrmazd frāz tāzēnīd
ēk ō xwarōrān kū arand ud ēk ō xwarāsān šud kē weh xwānēnd
az pas ī awēšān haštdah rōd az ham bunxān frāz tazīd hēnd
pad ham harborz andar zamīg frōd šud hēnd
pad xwaniras ō paydāg hēnd čiyōn abārīg āb az awēšān pad was marag ī frāz tazīd estēnd
čiyōn gōwēd kū ēdōn zūd ēk az pas ōy did bē tazīd hēnd čiyōn mard -ēw kē ašemwohū -ēw padisār bē gōwēd
awēšān āb hamāg abāz ō ēn dō rōd gumēzēnd ī ast arand rōd ud weh_rōd
awēšān harw dō pad kanārag ī zamīg gardēnd ud pad zrēyīhā widerēnd
ud hamāg kišwar xwārēnd az ān zahābīh
ud pas harw dō pad zrē ī frāxkard ō ham rasēnd ud abāz ō bunxān rasēnd az -iš bē tazīd hēnd
čiyōn gōwēd kū ōwōn čiyōn rōšnīh pad harborz andar āyēd pad harborz bē šawēd
ēn -iz gōwēd kū mēnōy arand az ohrmazd xwāst kū fradom harwispīn , šnāyēnīdārīh kē weh_rōd nēkīh az -iš be dah ud pas pad man amargīh be dah
mēnōy -iz weh_rōd az ohrmazd arand rōd rāy ēdōn xwāst
dōšāram ayārīh ēk andar ō did rāy pad ham zōrīh frāz tazēnīd hēnd čiyōn pēš az madan ī ēbgat atazišn būd hēnd
ud ka druz bē zanēnd atazišn abāz bawēnd
ān haštdah rōd ī mādagwar ǰud az ārang ud weh ud abārīg rōdīhā ī az awēšān bē tazīd ān ī nāmčištīgtar gōwēd arand rōd dargam rōd zand rōd harēw rōd marw rōd hēdōmand rōd axwšīr rōd wataēnī rōd zišmund rōd xwaǰand rōd baxl rōd mihrān rōd kē hindūgān rōd -iz xwānēnd spēd rōd turd rōd kē kūr -iz xwānēnd ūlē rōd kē , misragān -iz xwānēnd araz rōd turmid rōd wandīš rōd dārāǰa rōd kāsag rōd dāyt rōd paydāg_mēhan rōd čihrōmēhan āb makurestān rōd
u -šān gugān gōwam , , ,
arand rōd ān ī guft kū az harborz bē āyēd pad sūrag būm kē šam -iz xwānēnd ud pad yegiptos būm kē misr -iz xwānēnd bē widerēd
u -š ānōh rōd ī tag spitōis , xwānēnd
weh_rōd pad xwarāsān bē widerēd pad sind būm šawēd pad hindūgān ō zrē rēzēd
u -š ānōh mihrān rōd xwānēnd ud hindūgān rōd -iz xwānēnd
frād rōd bunxān az wimand ī hrōm pad asūrestān widerēd ō dīlit rēzēd
u -š frādīh ēd kū abar zamīg xwārišn kunad
paydāg kū ān bun_xān X manuščihr kand ud āb hamāg abāz ō ēk abgand
čiyōn gōwēd kū yazam frād ī purr_māhīg kē xwēš ruwān rāy manuščihr kand āb stad ud xwārēnīd
diglit rōd az daylmān bē āyēd pad xūzestān ō zrē rēzēd
dāytī rōd az ērānwēz bē āyēd pad dūdestān bē šawēd
az hamāg rōd xrafstar andar ān wēš
čiyōn gōwēd kū dāytī rōd purr_xrafstar
dargām rōd pad sugud
zand rōd pad kōf ī panǰestān widerēd abāz ō harēw rōd rēzēd
harēw rōd az abursēngar bē tazēd
hēdōmand rōd pad sagestān u -š bun ī xān az abursēngar
ēn ǰud az ān ī frasyāb spurd
rōd ī axwšīr pad kōmīš
zišmund rōd pad kust ī sūt abāz ō xwaǰand rōd rēzēd
xwaǰand rōd pad sumarkand fragān bē šawēd
u -š rōd -iz X xwānēnd
marw rōd xwarrahōmand pad xwarāsān az abursēngar bē tazēd
baxl rōd az abursēn kōf ī bāmīgān andar āyēd bē ō weh rōd rēzēd
spēd rōd pad ādurbādagān
gōwēnd kū dahāg āyaft az , ahriman ud dēwān az ānōh xwāst
turd rōd kē kūr -iz xwānēnd az zrēyīh sīrāb bē āyēd ud ō zrēyīh gurgān rēzēd
zahābag ī ān rōd az ādurbādagān bē āyēd pad pārs ō zrē rēzēd
ūlē rōd bē xān az spāhān pad xūzestān bē widerēd ud frāz ō diglit rōd rēzēd
u -š pad spāhān misragān rōd xwānēnd
araz rōd pad tabarestān
u -š bun_xān X az kōf X dambāwand
turmid -iz rōd abāz weh rōd rēzēd
wandasiš rōd ān pārs kē sagān -iz xwānēnd
kāsag rōd pad -iz X šahr bē āyēd
u -š ānōh kasīb rōd xwānēnd
ēn ham rōd weh
ud ānōh kāsag xwānēnd pad -iz sind kāsag xwānēnd
ud wataēnī rōd pad sagestān bun_xān bun_xān az kayānsē būd
paydāg_mēhan rōd čihrōmēhan āb ī pad kang_diz
dārāǰa rōd pad ērānwēz kē -š mān pōrušasp ī pidar ī zarduxšt pad bār būd
abārīg amar āb rōd ī xānīg ud kahasīhā ast ī kē ī awēšān zahābag frāz xwārīd estēnd
ēn rōdīhā bun ēk pad šahr šahr gyāg gyāg pad nām nām xwānēnd
frāsyāb rāy gōwēnd kū -š andar zrē ī kayānsē ēw_hazār xān ābān bē wispurd ī asp zahā ud uštar zahā gāw zahā xar zahā meh -iz keh -iz
u -š wispurd andar ham zrēh -ēw xān ī zarrēnōmand kē hēdōmand rōd taft
u -š xān wataēnī rōd ud šaš āb ī nēwdāg andar ham zrēh -ē wispurd ud mardōm nišāstag be kird
pad dēn šāzdah , sardag āb gōwēd čiyōn ēk nam ī abar urwarān nišīnēd dudīgar ān ī garān tazišn ī ast rōdīhā sidīgar ān ī wārānīg āb čahārom ān ī čāhīg ud ān ī armēšt ud abārīg ī anāmčištīg , panǰom šusr gōspandān mardōmān šašom gōmēz ī gōspandān ud mardōmān haftom xayūg ī gōspandān mardōmān haštom āb ī andar pōst ī gōspandān mardōmān , nohom ars ī gōspandān ud mardōmān , dahom xōn ī gōspandān mardōmān yāzdahom rōγn ān ī andar pad harw se axwān kām dwāzdahom āb ī andar hambowišnīh gōspandān ud mardōmān sēzdahom xwē ī gōspandān ud mardōmān X čahārdahom ān ī andar pusyān gōspandān ud mardōmān kē pus pad -iš parwarēnd pānzdahom ān ī azēr ēwan ī urwarān čiyōn guft kū harw ēwan -ēw āb -ēw srešk pad tah ātaxš čahār angust pēš šāzdahom ān ī andar urwarān gumēxt estēd kē āb ī tan ī tōhmag gōwēd haftdahom šīr ī gōspandān mardōmān
ēn harwisp pad waxšīg ayāb tanīgardīg abāz ō ēn rōdīhā gumēzand čē āb tanīgardīg waxšīg harw dō ast
ēn -iz gōwēd kū ēn se rōd marw rōd hēdōmand rōd ahunsand būd hēnd mēnōy awēšān kū andar gēhān nē tazēnd az anāgīh āhōgēnišn , armēštīh ī -šān dīd kū -šān andar ēbgatīh hōm ud zōhr awiš rēzēd ud drust abāz kunēd ud pahrēz bē gōwēd X X , ,
ēn -iz gōwēd kū āb kē hixr kam ud zōhr wēš awi -š mad estēd pad se sāl abāz ō bun_xānīg šawēd kē hixr zōhr harw dō rāst abar mad estēd pad šaš sāl abāz rasēd kē hixr wēš ud zōhr kam pad nō sāl abāz rasēd
ōwōn -iz urwarān rōyišn pad ēn paymānag nērōg ō bun dahēnd
ēdōn -iz āfrīn ī ahlawān kunēnd pad ēn paymānag abāz ō xwad rasēd
rōd ī kataēnī rāy gōwēd kū frāsyāb bē ō wazr abgand
ka X rasēd asp_zahā abāz tazēd ēdōn -iz čašmagīhā ī zrē ī kayānsē , ,
, abar čiyōnīh warīhā , ,
gōwēd pad dēn kū ēn and čašmag ī ābān ō paydāgīh kē war xwānīhēd handāzag ī čašm ī mardōm awēšān čašmag ī ābān hēnd čiyōn war ī čēčast war sūyar war ī xwārizm war ī frazdān war zarrōmand war ī aswast war ī husraw war ī sadwēs war ī urwiš
u -šān gugān gōwam
war ī čēčist pad ādurpādagān garm_āb ud ǰud_dad kū -š tis čiyōn hēnd andar nē bawēd
u -š bun zrē ī frāxkard paywast estēd
war ī sūyar pad abar_šahr būm pad sar kōf ī tūs čiyōn gōwēd kū sūd_bahr ud hučašmīh ud wehīh ud abzāyišnīgīh ud rādīh az -iš bē dād estēd
war ī xwārizm rāy gōwēd kū az -iš bē dād estēd ahlišang xwāstag ud tuwāngarīh ud hubahrīh ud abāyišnīgīh ud huramīh
war ī frāzdān pad sagestān
gōwēd kū az -iš mard -ēw ī ahlaw kē tis-ēw andar awi -š abganēd padīrēd
ka nē ahlaw abāz ō bērōn abganēd
ān bun_čašmag ō frāxkard paywast estēd
war ī zarrōmand pad hamadān
war ī aswāst rāy paydāg kū āb ī awinast ast andar zrēyīhā hemwār hamēw tazēd ōwōn rōšn xwarrahōmand čiyōn gōwēd kū xwaršēd payrōg mad ayāb -im aswāst war ī dīd
ān āb pad frašegird wirāstan rāy andar abāyēd
war ī husraw pad čahār frasang ī war čēčist
war ī sadwēs ān ī nibišt pad mayān ī zrē ī frāxkard ān pūtīk
gōwēnd pad damišn zofrāy ast kē hamwār dūd az -iš āyēd
harw tis -š awiš abganēnd ǰud az ǰānwar nē padīrēd
ka -š ǰānwar awiš andar abgand frōd barēd
mardōmān gōwēnd kū -š čašmag -ēw dušox andar ast
war ī urwiš pad hugar ī buland ,
abar čiyōnīh gōspandān panǰ_ēwēnag ,
, gōwēd pad dēn kū ka gāw ī ēk_dād bē widard ānōh kū -š mazg bē fraǰast ǰōrdāg abāz rust panǰāh_panǰ sardag dwāzdah sardag urwar ī bēšaz
čiyōn gōwēd kū az mazg kunǰid girgir
az X mazg_čihrīh rāy xwad -iz mazg -ēw
az srū miškag
az wēnīg gananag
az xōn kudrag ud raz kē may az -iš kunēnd
ēd rāy may pad xōn abzūdan zōrīgtar
az suš spandān
az mayān sar X ābīšān abāz_dārišnīh gand ī akōman ud padīrag_rasišnīh ī bēš ud abārīg ēk
čiyōn pad abestāg gōwēd , gōwēd kū ǰōrdāg -ēw sardag pad bundahišn dād andar asp_kirbān dād
ē kardag ānōh bawēd
pas bē ō arand rōd āwurd
ast kē brinǰ ud ast kē gandum ābxwār guft
šusr ī gāw abar ō māh_pāyag burd ānōh bē pālūd hēnd
ud gōspand purr_sardag frāz brēhēnīd nazdist dō gāw ēk nar ēk mādag
ud pas az harw sardag ǰuxt -ēw andar zamīg hašt hāsr kē se frasang homānāg pad ērānwēz paydāg X bawēd
čiyōn gōwēd kū -m arzōmandīh gāw rāy dō bār dād hambār pad gāw ud ēw bār abāg gōspand purr_sardag
sī rōz ud šab awēšān axwardār būd hēnd
u -šān nazdist āb pas urwar xward
u -š pad kardag gōspand frāz brēhēnīd
čiyōn gōwēd kū nazdist buz ud mēš ud pas uštar hūg pas asp ud xar
čē -š fradom dād čarag_arzānīg
dād ān ī girišāg ī ast frāx_raftār ud wāyendag awēšān nē dast_āmōg
ud sidīgar dād ābīg ūnīg
čiyōn ast andar awēšān se kardag šaš ēwēnag
fradom ēwēnag ān ī dōkāftpāyīh ī čarag_arzānīg kē az awēšān uštar meh azisčān keh ud nōg_zādag
dudīgar ēwēnag xar_pay ī kē az awēšān asp ī zabāl meh ud X xar nidom
sidīgar ēwēnag ī ān ī panǰ_X panǰ kē az awēšān sag meh ud mušk hufarrox nidom
čahārom ēwēnag wāyendag kē az awēšān sēn ī se_X meh ud X nidom
panǰom ēwēnag ān ī ābīg kē az awēšān kar_māhag meh ud X nidom
ud X ēn panǰ ēwēnag pad dwēsad , ud nawad_dō sardag be baxt ,
fradom buz panǰ sardag harborz ud X ud pāzan warrag buz
dudīgar mēš panǰ sardag ān ī pad dumb ān ī adumb ud sag_mēš ud mēš takel ud kōrišag_mēš kē srū wuzurg asp homānāg se kōf dārēd u -š ō bārag gīrēnd
čiyōn gōwēd kū , manuščihr ī amā niyāg kōrišag ēw pad bārag dāšt ,
sidīgar uštar dō sardag kōfīg ud čarag_arzānīg
čē ēk pad kōf šāyēd dāštan ēk pad , dašt ī ast ēk_kōf ud dō_kōf
čahārom gāw pānzdah sardag spēd xašēn suxr zard ud syā ud pēsag gawazn gāw_mēš ud uštar_gāw_palang ud gāw_māhīg ud hūg ud šān_gāw X ud X ud abārīg gāw sardag
panǰom asp sardag X tāzīg ud pārsīg ud astar ud xar ud gōr asp ī ābīg abārīg asp sardag
šašom sag dah sardag pasušhorw , X ī ast šubān ud wīšhorw ī ast ī mānbān ud wohunazg ī ast ramīg ud torrōg babrag ī ābīg kē sag ī ābīg xwānēnd ud rōbāh ud raspūg kē rasūg , xwānēnd ud X ud udrag ud muškān X kē az awēšān dō sardag sūrag_hammōxtišn čiyōn rōbāh ud raspūg ud wēšag_hammōxtišn čiyōn udrag kē xār pad pušt dārēd ud zandag ,
haftom sahōy ī ast xar_gōš , panǰ sardag dō dawišnī ēw sardag ēk ūnīg_māništ ud ēk wēšag_mānist ,
haštom X hašt sardag samōr ud syā_samōr ud sanǰāb ud , X ud xaz ud kākom spēd abārīg X sardag ,
nohom mušk hašt sardag ēk ān ī pad muškīh āšnāg ud ēk mušk ī nāfag ān -iz ī pad X ud bīš_mušk kē bīš xwarēd mīšk ī syā čiyōn hamēstār ī garzag pad drayā kustag wēš bawēd , abārīg mušk sardag ,
dahom murwān ēw_sad_dah sardag az -iš sēzdah , sardag čiyōn sēn_murw karšift āluh ud kargās kē dālman X xwānēnd , warāγ ud X xrōs kē parōdarš xwānēd ud , ud kuleng
ud yāzdahom šawāg az awēšān dō hēnd šīr dārēnd pad pestān ud waččag parwārēnd sēn_murw šawāg
čiyōn gōwēd kū šawāg pad se sardag dād estēd sag ud murw ud mušk ēwēnag
čē wazēd čiyōn murw u -š harw dō dandān čiyōn sag ud sūrāg_māništ čiyōn mušk
u -š ēn ēw_sad ud dah sardag murwān pad hašt gōnag be dād
u -š ēdōn bē pargand čiyōn mard -ēw ka tōhm parganēd
ān tōhm andar angust ō zamīg hilēd meh mayānag ud keh
dwāzdahom māhīg dād dah sardag nazdist , māhīg ī arz ud ārǝkā ud abārīg nām ī abestāg
ud pas andar harw sardag sardag andar sardag wiškīd hēnd tā bowandagīh dwēsad ud šast ud dō sardag
sag rāy gōwēd kū az star_pāyag kū az ān kustag ī star ī haftōring ā -š az mardōmān pad yuǰyast frāz dād pānagīh gōspandān rāy čiyōn , gumēzag az gōspandān ud mardōmān
ēd rāy sag xwānīhēd čē -š se_ēk -ēw az mardōmān
u -š dād arwand xwēš_mōg xwēš_wastarg ud axwāb ud tuxšāg ud wigrād čahārdah_dandān tēz_dandān ud ramag_sālār
čē ramag ī , gōspandān ān dudīgar pattāyēd kē sag abāg bawēd pad ān ī meh bīm ka šēr ud pad ān ī keh ka tōrag rasēd ud panāgīh kunēd ,
guft -iš ohrmazd ka -š murw ī warīšag dād ast murw ī X škarag kū -m dād hē tō murw warīšag kū -m az tō bēšišn wēš bawēd kū šnāyēnišn čē kām ī ganāg_mēnōy wēš kunē kū ān ī man
čiyōn mardōm ī druwand kē az xwāstag sēr nē bawēd tō -z az murw ōzadan sēr nē bawē
bē agar -im nē dād hē murw warīšag ā -š dād hē ganāg_mēnōy gurg ī parrwar ī pad ē tō kirb u -š dām zīwistan nē hišt hē
u -š gōspand pad ēd hamāg sardag ēd rāy dād kū ka ganāg_mēnōy ēk be abesīhēnēd ēk be mānēd abesīhēnīd nē šāyistan rāy kōxšišn ī pad abesīhēnīd , kem kunēd
ēn -iz gōwēd kū -š gōspand nazist pad ān ī hamīn māh ast māh frawardīn rōz ī ohrmazd bun ī hamīn frāz brēhēnīd
ud sāl ī dudīgar frawardīn māh ābus būd hēnd
az awēšān ān ī ī -š nazdist būm_xwāhišnīh menīd uštar asp kē abdom menīd xūg būd
pad nō sāl awēšān gōspand mad hēnd pad haft kišwar zamīg pad se sāl pad šaš X kišwar pad šaš sāl pad xwaniras
čiyōn gōwēd kū nazist kar_māhīg ī arz pad āb ī arwand frōd ō sawah šud
ud gōspandān bē raft hēnd ō wōrūbaršn wōrūǰaršn sēn_murw ō zrēh ī asp ī nērōgōmand ō , fradadafš ud widadafš
u -š aziš šaš māh awēšān ānōh šud hēnd pēš az wāyendagān
pad sāl drahnāy ān ī girišāg be mad ǰud sēn_murw
pad dō sāl ān ī ābīg ud ūgīg be mad ǰud az X asp
būd andar gāwān ān ī čiyōn gāw X sargen kē hāδaiią , xwānēnd ud andar xarān xar ī sē_pāy andar murwān čumurwōš ud māhīgān wās panǰāsadwarān
u -šān kirdārīh pad dar ī xwēš gōwēd , ,
, , abar čiyōnīh mardōmān , ,
pad dēn gōwēd kū -m mardōmān frāz brēhēnīd dah sardag
nazdist ān ī rōšn ī spēd_dōysar ī ast gayōmard tā dah sardag
čiyōn ēk gayōmard nohom az gayōmard abāz bawēd dahom kabīg mardōmān nidom gōwēd
ka gayōmard wēmārīh abar mad pad hōy dast ōbast
az sar srub ud az xōn arzīz az mazg sēm az pāy āhen ud az astag rōy az pīh ābgēnag az bāzā pōlāwad ud az gyān_bē_šawišnīh zarr ō paydāgīh āmad kē nūn arzānmandīh rāy mardōmān abāg gyān bē dahēnd
az ān hōyag margīh pad tan ī gayōmard andar šud
harwisp dāmān tā frašegird , margīh abar mad
ka gayōmard andar widerišnīh tōhm bē dād ān tōhm pad rōšnīh xwaršēd be pālūd hēnd
u -š X bahr -ēw nēryōsang nigāh dāšt bahr -ēw spandarmad padīrift čehel sāl andar zamīg dād
pad bowandagīh ī čehel sāl rēbāh_kirb ī ēk tan ī pānzdah warg , mahlā mahlānē zamīg rust hēnd ōwōn homānāg kū -šān andar dast pad dōš abāz estād
ēk ō did paywastag hambašn ud hamdēsag , būd hēnd
u -šān harw dō xwarrah abar āmad
ōwōn hambašn būd hēnd kū nē paydāg būd kū kadām nar ud kadām mādag kadām ān ī xwarrah ī ohrmazd_dād ī abāg awēšān ī ast ī xwarrah ī mardōm awi -š dād
čiyōn gōwēd kū kadār pēš dād xwarrah ayāb tan
u -š guft ohrmazd kū xwarrah pēš dād tan pas ō ān dād estēd
andar tan dād kū xwēškārīh be brēhēnīd tan bē ō xwēškārīh dād
u -š wizārišn ēn kū ruwān pēš dād tan pas ruwān andar tan xwēškārīh rāyēnēd
pas harw dō az urwar_kirbīh bē ō mardōm_kirbīh wašt hēnd
ud ān xwarrah mēnōyīhā andar awēšān , šud ī ast ruwān
nūn -iz pad ān hangōšīdag draxt ul rust estēd kē -š bar dah ēwēnag mardōm
guft -iš ohrmazd ō mašī mašānī kū mardōm hēd
pidar ī gēhān hēd
u -m bowandag_menišnīh pahlom dād hēd
kār ī dādestān bowandag_menišnīh kunēd
humat menēd hūxt gōwēd ud huwaršt warzēd
dēwān ma yazēd
awēšān harw dō nazdist ēn menīd ka -šān ēk_ō_did rāy menīd kū mardōm ast
u -šān nazist kunišn ēn kird ka bē raft hēnd u -šān be menīd
u -šān nazdist gōwišn ēn guft kū ohrmazd_dād āb zamīg urwar ud gōspand ud star ud māh ud xwaršēd ud harwisp ābādīh kē az ahlāyīh paydāgīh
gōwēd bun bar
u -šān pas petyārag pad menišn abar dwārēd u -š menišn be āhōgēnīd hēnd
u -šān drāyīd kū ganāg_mēnōy dād āb ud zamīg ud urwar ud abārīg tis
čiyōn guft ān nazdist drō_gōwišnīh ī -šān X niyāzīhēd pad abāyist ī dēwān guft
ganāg_mēnōy nazdist urwāhmenīh az awēšān ēn xwēšēnīd
pad ān drō_gōwišnīh harw dō druwand būd hēnd u -šān ruwān tā tan ī pasēn pad dušox
u -šān sī rōz xwarišn wisānišn būd
wastarg giyā nihuft
pas az sī rōz pad škar frāz ō buz -ēw ī sipēd_mōy mad hēnd
u -šān pad dahān pēm_pestān mēzīd
ka -šān pēm xward būd , māhyānī guft kū āštīh man az ān ka man nē xward ān ī šusr pēm u -m āštīh_dādtar az ān ī ast nūn ka xward ā -m pad tan wad
ān ī -iz dudīgar drō_gōwišnīh dēwān ōz abar mad
u -šān mizag ī xwarišn bē appurd ōwōn kū az ēw_sad bahr ēd bahr mānd
pas pad sī rōz_šabān ī dudīgar ō gōspand -ēw mad hēnd ī spar ī spēd_ērwārag u -šān be kušt
u -šān az dār ī kunār ud šimšār pad nimūdārīh mēnōyān ātaxš abgand čē awēšān harw dō dār ātaxš_dādārtar bawēnd
u -šān pad -iz dahān ātaxš abrōxt
u -šān nazdist ēzm X dār ī kundur pēš muγ sōzēnīd
u -šān ān gōspand wardānāg kird
u -šān se must_masā gōšt andar ātaxš bē hišt , guft kū bahr ī ātaxš
ud az ān pārag -ēw ō asmān wist guft kū ēn bahr yazadān
murw kargās abar raft az awēšān bē burd čiyōn nazist gōšt sagān xward
u -šān nazdist wastarg pōstēn nihuft
pas pad škar ā -šān bē tad
ān ī tadag ǰāmag kird nihuft hēnd
u -šān pad zamīg sag bē kost
u -šān āhen bē widāxt
u -šān pad sang āhen zad
u -šān tēx -ēw az -š kird dār pad -š brīd ān ī dārēn padišwar , ārāst
az ān X huspāsīh ī ān -šān kird dēwān pad -š stahmbag būd hēnd
u -šān xwad pad xwad ān ī abārōn arešk abar burd
ēk pad did frāz raft hēnd zad ud darrīd ud wars rūd ,
pas -šān az tom wāng kird kū mardōm hēd dēw yazēd tā -tān arešk bē nišīnēd
mašyānī frāz ǰast šīr ī gāw dōxt ō abāxtar rōn abar
pad ān dēwēzagīh dēwān , ōzōmand būd hēnd
u -šān awēšān harw dō ēdōn hušk_kūn be kird kū -šān panǰāh sāl kāmag ī pad hamgumēzišnīh nē būd
ka -z -išān hamgumēzišnīh hād ēg -išān frazand nē būd , hād
pad bowandagīh ī panǰāh sāl ā -šān pus_xwāhišnīh frāz menīd nazist mašī ud pas mašānī
čē -š guft mašī ō mašyānī kū ka X ē ī tō X wēnam ēg ān ī man meh ul āxēzēd
pas mašānī guft kū brād mašī ka ān ī X tō meh wēnam ān man X drafšēd
pas awēšān kāmag ō ham burd
andar kāmag_wizārišnīh ī -šān kird ēdōn abar menīd kū -mān -iz ī panǰāh sāl kār ēn abāyēd būd
az awēšān zād pad nō māh ǰuxt ēw zan ud mard
az šīrēnīh ī frazend ēk mādar ǰūd ēk pidar
pas ohrmazd šīrēnīh ī az menišn āwurdārān bē kird and_čand parwarišn ī frazendān rāy pad -iš bē hišt hēnd
u -šān šaš ǰuxtag aziš būd hēnd nar mādag
hamē brād xwah zan kird
hamāg abāg mašī mašānī , fradom šaš ǰuxt būd hēnd
u -šān harw ēk pad panǰāh sālag frazend aziš be būd
xwad pad ēw_sad sāl be murd hēnd
az ān šaš ǰuxtag ēk siyāmak nām mard zan
u -šān ǰuxt -ēw azišān zād kē mard frawāg zan frawagīn nām būd
az ōy pānzdah ǰuxtag aziš zād kē harw ǰuxt -ēw sardag sardag -ēw būd
u -šān purr_rawišnīh ī gēhān aziš būd
az ān pānzdah sardag ī -šān nō sardag pušt ī gāw ī srisōg pad ān ī frāxkard zrēy ō ān šaš kišwar ī dudīgar widārd ud ānōh nišāstag kird
ud šaš sardag pad xwaniras mānd hēnd
az ān šaš sardag ǰuxt -ēw mard tāz ud zan gawāzag nām būd hēnd
u -šān pad dašt ī tāzīgān būd
ud dašt ī tāzīgān nām ī ōy rāy ēdōn xwānēnd
ǰuxt -ēw mard hōšang ud zan gūzag nām u -š ērānagān aziš būd hēnd
ǰuxt -ēw māzandarān aziš būd hēnd
pad āmār ān ī pad ērān dehān ud ān pad anērān deh ān ī pad tūr deh ān ī pad salm deh ast hrōm ān ī pad sēn deh ast čīnestān ān ī dāh deh ān ī pad sind deh ān -iz ī pad ān ī šaš X kišwar dudīgar hamāg az paywand frawāg ī , siyāmak ī mašī hēnd
čiyōn dah sardag mardōm ī az bun guft pānzdah sardag az frawāg būd wīst ud panǰ sardag hamāg az tōm ī gayōmard būd hēnd čiyōn zamēnīg ud ābīg ud war_gōš ud war_čašm ēk_pāy ān -iz kē parr dārēd čiyōn šawāg ud wēšagīg dumbōmand kē mōy pad tan dārēd čiyōn gōspandān kē xirs gōwēd , ud kabīg mēxuzwāngar kē bālā šaš and ī mayānag_bašnān ud widestīg kē bālā šaš_ēk ī mayānag_bašnān ud X hrōmāyīgān , X turkān sēnīgān ud dāhagān ud tāzīgān ud sindīgān ud hindūgān ud ērānīgān awēšān -iz ī gōwēd kū pad ān šaš kišwar -and
ud az ēn harw sardag ēw nōgtar was sardag būd hēnd
did pad wihān ī petyār gumēzišnīh būd čiyōn zangīg az ābīg ud zamīg būd X kē āb ud zamīg harw dō zīwēd ud abārīg ī az ēn ēwēnag , , ,
guft -iš ohrmazd ka -š zan brēhēnīd kū dād -iz -im hē tō kē -t ǰehān sardag petyār
u -m nazdīk kūn dahān -ē dād hē kē -t māyišn ēdōn sahēd čiyōn pad dahān mizag ī xwarišnān ī šīrēntom
u -m tō ayārīh čē -t mard aziš zāyēd
man -iz āzārē kē ohrmazd ham
bē agar -im windād hād ǰāmag kē mard az -iš kunam ā -m nē dād hād hagriz kē -t ān ī ǰeh sardag petyārag
bē -m xwāst andar āb ud zamīg ud urwar ud gōspand bālist garān ān -iz ī zofr rōdestāg nē windād ǰāmag kē mard ī ahlaw az -iš būd ǰud zan kē ǰeh petyār
ēn -iz gōwēd kū ǰam ka -iš xwarrah aziš bē šud bīm ī az dēwān rāy dēw -ēw pad zanīh grift ud ǰamag ī xwah pad zanīh ō dēw -ēw dād
u -šān kōfīg ud xirs ud wēšagīg dumbōmand abārīg wināhišnīg sardag aziš bawēd
u -š paywand nē raft
zangīg rāy gōwēd kū az ī dahāg andar xwadāyīh ǰuwān_zan dēw abar hišt ud ǰuwān_mard abar parīg hišt
u -šān pad ǰuwān_dīdārīh ī ōy marzišn kird
az ān nōg ēk X kunišn zangīg būd
ka frēdōn mad awēšān az ērān_šahr dwārist hēnd pad kanārag ī zrē nišānīdīg kird
nūn pad dwāristan ī tāzīgān abāz ō ērān_šahr gumēxt hēnd , , ,
abar čiyōnīh ī zāyišnān ī az harw sardag ,
gōwēnd pad dēn kū zan ka az daštān bē šōyēd tā ō dah šab ka -š ō nazdīkīh šawēnd pēš_ābustan būd
ēdōn -iz asp xar ud gōr pad haft šab ud sag ud xūg pad panǰ šab ud mēš ud buz pad ēk šab ud ēdōn -iz X ēdōn -iz awēšān ūnīg ud ābīg pad ēk šab
zan daštān gōspandān wardagīh čē gōspandān ka wardag bawēnd xōn mēzēnd
zan hamēw tā daštān abāz bawēd ābustan ōh bawēd bē andar ān X dah šab pēš bawēd ka -š az daštān šust estēd
ka ābustanīh_zamān mad estēd hamē ka -š tōhm ī mard nērōgōmandtar pus ka ān ī zan nērōgōmandtar duxt hambust ī ka harw dō tōhm rāst dōgān sēgān az -š bawēd
tōhm ī narān X pēš āyēd pīh bawēd mādag abzāyēd az -š frabīh būd
agar tohm ī mādag pēš bē āyēd xōn bawēd mādag az -iš nizārīhēd
tōhm ī mādagān , sard ud xwēd ud tazišn az pahlūg gōnag suxr ud zard
ud tōhm ī narān garm hušk ud tazišn az mazg ī sar ud gōnag spēd ud xašēn
hamēw tōhm ī mādagān pēš bē āyēd ud andar kadag_gāh frāz gardēd
ud tōhm ī narān azabar be estēd ud ān kadag_gāh purr be kunēd
harw čē az -iš X parrēzēd abāz ō xōn bawēd ud pad ragān ī mādagān andar šawēd
pad hangām ī zāyišn šīr abāz pestān X āyēd kē zāyišn ī pad -š frazend parwārēd čiyōn hamāg šīr az tōhm ī narān bawēd
pas ān tōhm ī narān xōn mādagān šīr frušag homānāg pēlag bandēd ān kadag_gāh dahān āmēzēd
ān xarān čehel rōz ān ī mardōmān ud asp_sardagān ud gāwān abārīg az ēn ēwēnag sī rōz ud ān ī gōspandān pānzdah rōz ud ān ī sagān dah rōz ud ān ī rōbāh haft rōz ān ī raspūg panǰ rōz ān ī mūšagān šaš rōz pad šusrīh estēd ,
pas se rōz pad gumēzagīh estēd šusr xōn
pas bawēd čiyōn gašt -ēw andar waxšēd ud čašm gōš ud dahān az -iš rōyēd dast ud pāy abārīg ham
ud hamē ast ud mōy az pidarān xōn gōšt az mādarān
pas ān ī uštarān pad šaš māh ān ī mardōmān asp_sardagān gāwān pad panǰ māh ān ī raspūg pad ēk māh ān ī mūšagān pad pānzdah rōz ō mādar paydāg bawēnd
ud harw xwarišn mādarān xwarēd awēšān -iz abzāyišn az -iš bawēd
X pas pad dwāzdah māh uštar pad dah māh mardōm ud asp_sardagān gāwān pad panǰ māh gōspandān pad panǰ māh sagān pad se māh rōbāh ud xūg pad dō māh raspūg pad ēk māh mūšagān zāyēnd ,
murwān rāy gōwam čiyōn āluh ud dālman ud sēn_murw abārīg meh az wāyān kū čehel rōz pad šusr ud sī rōz pad gumēzagīh pānzdah rōz pad xāyag ud dah rōz tā parrag_bē_rōyišnīh
abārīgān haft šab andar šusr ud haft pad gumēzagīh ud haft andar xāyag tā bē_wiškōbišnīh ud haft tā parrag_bē_rōyišnīh
ud ēn -iz hangōšīdag šīr homānāg ud waččag az zardag hambūsēd
u -š spēdag čiyōn gōspandān čē xāyag zardag gōšt spēdag parwārišn
tā andar spēdag ast pad -iš hamē zīwēd hangōsīd aburnāyag ka zāyēnd pad šīr zīwand
ka -š ān ī spēdag xward čiyōn ka šīr ud waččag bawēd pas ō bērōn , āyēd
ud ast ī xwad_čīnag_čīd čiyōn xrōs
ud ast ī nēst_parragīh rāy mādar čīnag bawēd
xrōs kē murw ī parōdarš ud pēš_dahāg -iz gōwēd pad ēk ēk rōz xāyag kunēd
ud ast ī ka nihānāg ud ast ī ka āškārag mayān ī mardōmān rōyēd
andar murwān ēwāz pad ēn ēwēnag xrōs ast
sār gar kē hǝraidrī. kūčak -iz xwānēnd andar hāmīn pad garmsēr andar ud zamestān pad sardsēr rawēd
andar sāl -ēw se bār waččag kunēd
ē ǰār ī fradom ā -š zamestān bē zīwēd ē ǰār andar sard_garm bē zīwēd ud ē ǰār andar hāmīn
u -š waččag kirm be xwarēd ,
ēn -iz čahār tis narān ud čahār mādag gōwēd
asmān ud ayōxšust ud wād ud ātaxš nar ud hagriz ǰuttar nē bawēd
āb zamīg ud urwar ud māhīg mādag hagriz X ǰuttar nē bawēd
abārīg dahišn nar ud mādag ōh bawēd
čiyōn māhīg rāy gōwēd kū pad hangām ī pus_ō_xwāhišnīh pad ān ī tazāg āb frōd šawēnd ud ē hāsr dranāy ast čahār_ēk ī frasang -ēw dō dō pad āb frōd šawēnd ud ē hāsr ham_ēwēnag padīrag ī āb abāz āyēnd
andar ān ī mad_šawišn āgenēn kirb frāz sāyēnd u -šān xwēy ēwēnag bē ōftēd tā harw dō ābus bawēnd ,
pad zrēy ī frāxkard zrēy ī kamrōdīg abārīg āb ī zrēy ī ka -š purr ud ōgār ud rawišn ī āb padiš nēst ka ast andar ōftēd āb bē rāyēnēd
pad ān rawišn ī āb ham_ēwēnag kunēnd u -šān ēdōn sahēd čiyōn ān ī tazāg āb
awēšān māhīgān pad tanuk āb pus_xwāhišnīh kunēnd pad zofr āb zāyēnd
wās ī punǰāsadwarm rāy gōwēd kū panǰ_sad waččag rasēd karmāhīg ī dwēsad_ēw_hazār
ēn ān ī be parwārēnd
X nō_hazār X hašt_hazār X haft_hazār X šaš_hazār X X panǰ_hazār X ēk ēk čahār_hazār ud X panǰ_hazār andar sāl waččag rasēd
ēn nām ī māhīgān pad abestāgān
čiyōn māhīgān -iz xāyag dārēnd harw ēk ǰuxt -ē grāb andar ān xāyag ī ǰuxt -ē xāyagīhā be pazmāyēd čiyōn gōspandān pad gardīh harw ēk pad paymānag ī xwēš ka ēdōn be parwārēd
pad ān sūrāg ī pad aškom kē dar ī xāyag awi -š paywost estēd ān xāyagīhā bē rīd ān xāyag andar āb parwārēd ud škōfēd māhīg ī xwurd az -š āyēd
and and wuzurg ōh bawēd pad tis xwēš paymānag
māhīg ka andar ān ī zofr āb gardēd xāyag rīd ān xāyag ōh xwarēd
ān ī nē ayābēd u -š bē parganēd ān parwārēd
ēdōn -iz āb zamīg ud urwar az ham xwadīh bar ī pazzāmēnd kū -šān gušn -ēw nēst
pad māh šahrewar ī ast māh tīr ī wihēzagīg kū mēdyōšim māhīgān ābus bawēnd
pad māh ī frawardīn ast māh spandarmad ī wihēzagīg ast kū hamaspahmēdim be zāyēnd
az murwān nar ān ī xāyag kunēd abganēd ēwāz xrōs čē ast -iz ka pad wēnišn ī mardōmān bē abganēd , ,
, abar čiyōnīh urwarān , , ,
gōwēd pad dēn kū pēš az madan ī ēbgat urwar xār ud pōst padiš nē būd
pas andar ēbgatīh pōstōmand ud xārōmand būd čē petyārag ō harw tis gumēxt bē ō urwar wiš gumēxt
az ān čim urwar čand ast ī wišgumēxttar čiyōn X biš balādur kū zahrōmand ud mardōm ud gōspand kē az -iš xwārēd mīrēd
abāg panǰāh ud panǰ sardag ǰōrdāg ud dwāzdah sardag urwar ī bēšāz ī az gāw ī ēk_dād būd estēd ud dah_ēw_hazār urwar aziš urwar ī mādagwar ud ēw_sad ud sī hazār sardag ī andar sardag urwar andar zamīg X estēd
az ēn hamāg tōhm wanand was_tōhmag pad -iš rust
az ān ī az gāw ēk_dād būd estēd harw sāl sēn_murw ān wanand ōšēnēd ān tōhmīhā andar āb gumēzēd
tištar abāg āb ī wārānīg , stanēd ō kišwarīhā wārēd
ud nazdīk ō ān wanand hōm ī spēd ī bēšaz ī awinast rust estēd andar čašmag ī ardwīsūr
harw kē xwarēd ahōš bawēd
u -š gōkirn draxt xwānēnd
čiyōn gōwēd kū hōm ī dūr_ōš u -š pad frašegird anōšagīh aziš wirāyēnd
urwarān rad ast
urwar ēn and ēwēnag ōh bawēd dār draxt mēwag ǰōrdā gul ud sprahm tīrag abzār giyāhag ud nihāl dārūg zadūg ēzm bōy rōγn ud rang ud ǰāmag
u -š gugān gōwam
harw čē -š bar pad xwārbārīh mardōmān nē mehmān ud sālwār ast čiyōn sarw ud činār spēd_dār ud šimšār ud ǰaγ ud gaz abārīg az ēn ēwēnag dār X xwānēnd
harw čē -š bar pad xwār_bār mardōmān mehmān sālwār ēdōn čiyōn , xormā ud kunār angūr bēh sēb wādrang ud anār ud šift_ālūg ud urmōd anǰīr ud gōz mardōmān šāyēd
ud ān ī nē šāyēd sālwār ast draxt xwānēnd
harw čē pad pih ī rōzwārag šāyēd ka bar stānēd bun be hōšēd abārīg az ēn šōn ǰōrdāg xwānēnd
harw čē škuftag hubōy ud andar warz mardōmān hangām bawēd ayāb bun ud warg ī ud yāseman ud nastaran ud alālag ud kustus X ud X xērīg kurkum zardag wanafšag X abārīg az ēn šōn gul xwānēnd
harw čē -š bar hubōy ayāb škōfag hubōy rāy dast_warz ī stōrān ud gōspandān mehmān giyāhag xwānēnd
harw čē pēš_pāragīhā andar šawēd abzārīhā xwānēnd
harw čē pad nān ud xwardīg_xwardan mehmān čiyōn sudāb karafs ud kišnīz ud kahkīzag tarrag xwānēnd
harw čē -š mazg čarbišnōmand čiyōn kunǰid X ud šādānag ud zayt , abārīg az ēn šōn rōγn xwānēnd
harw čē ǰāmag padiš šāyēd raštan čiyōn kurkum ud dār_parnīgān zard_čōbag ud wahag ud rōyan ud nīl rang xwānēnd
harw čē rēšag ayāb tūt ayāb dār bōyāg čiyōn kundurg ud X kawast ōlūg ud čandal palang_mušk kākūlag kāfūr ud ādur_bōy abārīg az ēn šōn bōy_dār xwānēnd
harw čē -š az dōsēn ī az urwar bē āyēd zadag xwānēnd
ud ēn hamāg urwarīhā ēk_tag dārag xwānēnd
urwar hamāg dō_ēwēnagān dō_bazagān ē_bazagān gōwēnd
mēwag mādagwar sī ēwēnag
u -š dah ēwēnag andarōn bērōn šāyēd xwardan čiyōn anǰīr ud sēb bēh wādrang angūr ud tūt_bun urmōd ud X ,
dah bērōn šāyēd xwardan ud andarōn nē šāyēd čiyōn xormā ud šift_ālūg ud zard_ālūg X sēwak ud kunār ud harad ud X ,
dah ān ī andarōn šāyēd xwardan bērōn nē šāyēd čiyōn gōz ud wādām ud anārgēl ud pondik šāh_balūt ud wan ī gurgānīg kē pustag -iz xwānēnd
ud kē -z wēš az ēn ast bē mādagwar ēn and ast
ān ī az dō škanǰag ud dō dār nišānand čiyōn X ud X ud abārīg az ēn šōn paywastag xwānēnd
ēn -iz gōwēd kū harw gul -ēw amahrspand -ēw xwēš
u -š ast gōwam mōrd yāseman ohrmazd xwēš X ī spēd wahman murzangōš ardwahišt šah_sprahm šahrewar palang_mušk spandarmad sōsan hordad X amurdad wādrang day_pad_ādur gōnag ādur nīlōpal ābān murw ī spēd xwar nargis māh wanafšag tīr mēzwars gōš X dēn , hamāg_wiškōfagīhā mihr xērīg ī suxr srōš ud nastaran rašn bōyestān_abrōz frawardīn simbul wahrām wahārīg ī zard rām wādrang_hubōy wād šambalīdag day gul ī ēw_sad_warg day wahār ard X X X , hōm ī spēd asmān ud bānūg_sprahm zāmyād kurkum mahrspand murw ī ardaxšīrān hōm_yazad
hōm az se ēwēnag xwēš
ēwan ī urwarān rāy gōwēd kū harw ēwan -ē āb -ēw srešk pad tahag ātaxš čahār angust
az hamāg X kunār wēš_ēwantar ud gulāwandtar gōwēd ,
, , abar radīh mardōmān gōspandān harw tis -ēw , ,
, pad dēn gōwēd kū -m fradom mard gayōmard , brēhēnīd rōšn spēd_dōysar
ōy meh bē nē ōy rad
čē zarduxšt rad
hamāg -iz radīh az zarduxšt būd
X spēd az zarduxšt sar frōd dārēd
buzān rad fradom ōy az awēšān sard frāz dād
mēš ī spar ī spēd_ērwārag mēšān rad ,
fradom az awēšān sard ōy X dād
uštar spēd_mōy ī hušnūg ī dō_kōyān az uštarān rad
fradom gāw ī syā_mōy zard_hušnūg dād
ān ast gāwān rad
fradom asp ī arus ī zard_gōš ī šēd_wars ī spēd_čašm frāz brēhēnīd
ān ast rad
xar ī spēd ī gurbag_pāy xarān rad
fradom az sagān X sag arus ī zard_mōy brēhēnīd
ōy ast sagān rad
fradom xar_gōš ī bōr frāz brēhēnīd
ōy ast frāx_war rad ,
fradom az murwān sēn ī se_X būd
nē ān rad čē , karišift rad ān murw ī -š ō war ī ǰam_kird burd
fradom az rasūgān kākom ī spēd brēhēnīd kē ōy ast rasūgān rad
čiyōn gōwēd kū kākom ī spēd kē ō hanǰaman ī amahrspandān be mad
kar_māhīg araz dāmān ī ābīgān rad
dāytī rōd tazāgān ābān rad ,
dārāǰa rōd bārān rad čē -š -mān ī pidar ī X zarduxšt pad bār zardušt ānōh zād
arus razūr razūrān rad
hugar ī buland kē āb ī ardwīsūr pad -iš ǰahēd , bālistān rad ,
ānōh kē star ī sadwēs gardišn azabar , gawrān rad
hōm ī hūd biǰagān urwarān rad
dramnag ī daštīg abiǰagān urwarān rad
gandum stabr_dānag ǰōrdāyān rad
alum ī hāmīnīg kē gahl -uz xwānēnd kōdak_dānagān ǰōrdāyān rad
kustīg wastargān rad
bāzābānag zrēyān rad
dō mard ka pad āgenēn frāz rawēnd ān ī dānāgtar rāst_gōwišntar rad
ēn -iz gōwēd pad dēn kū -m nē harwisp axw ī astōmānd hamāl dād kū hamāg ēk hēnd čē rāy xwarrah xwēškārīh pad kasān wasyār
harw_kē ān ī weh warzēd ud kunēd ā -š arz wēš
čē āb nē hamāl dād
čē ardwīsūr āb ī awinast harwisp āb ī andar asamān zamīg , arzēd ǰud az arand rōd ī ohrmazd_dād
az urwarān xormā_muγ ī az urwar ī abar_kirrēnīdag gōwēd harwisp urwar ī andarag asamān ī zamīg ī arzēd ǰud az X gōkirn draxt ī -š rist padiš āxēzēnd
az kōfān kōf ī abārsēn bun pad sagestān sar pad hūzestān ast kōfān hamāg pārs gōwēd harwisp kōfān arzēd andarag ī asamān zamīg arzēd
X X X X X X X az murw čamrōš murw harwisp murwān andarag zamīg asamān arzēd ǰud az sēn ī se_X
hangirdīg ēn kū harw ī meh kunēd asnīd ēg -iš arzišn meh ,
, , abar čiyōnīh ī ātaxš , ,
gōwēd pad dēn kū pad panǰ ēwēnag ātaxš brēhēnīd estēd čiyōn ātaxš bǝrǝzisauuaṇg , ātaxš ī hufriyān ātaxš urwāzišt ātaxš ī wāzišt ātaxš ī spēništ ,
ātaxš ī wohufriyān ī wizārēd weh_franāftār ān ī andar tan ī mardōmān gōspandān ,
ātaxš ī urwāzišt ān ī andar urwarān ,
ātaxš ī wāzišt ān ī andar abr padīrag spinǰarūš pad kōxšišn estēd
ud ātaxš sipēništ X wizārēd abzōnīg ān ī andar gēhān pad kār dāšt estēd ud ātaxš -iz ī warahrān
az awēšān panǰ ātaxš ēk āb ud xwarišn harw dō xwarēd čiyōn ān ī andar gāw mardōmān tā pad kumīg dād ēstēd
u -š xwarišn āb gugārdan xwēškārīh
ēk āb xwarēd ēk xwarišn nē xwarēd čiyōn ān ī andar urwarān ī kē -š pad āb zīwēd waxšēd
ēk xwarišn xwarēd āb nē xwarēd čiyōn ān ī andar gētī pad kār dārēnd X , ud ātaxš -iz ī wāzišt ud ān ī birzisawang ud ān ī andar zamīg ud kōf ud abārīg tis
ēn se ātaxš ast ādur farnbay ud gušnasp ud burzēnmihr az bun_dahišn ohrmazd čiyōn se dāmān awēšān pad pāsoxīh ī gēhān frāz brēhēnīd
pad ān kirb xwarrahōmandīhā andar gēhān hamē hēnd
andar xwadāyīh tahmōrub ka mardōm pad pušt ī gāw srisōg az xwaniras ō abārīg kišwar hamē widārd šab -ēw mayān ī zrē pad wād ī staft ud āhr ī zrē ādur_gāh kē -š ātaxš andar būd čiyōn pad pušt ī gāw pad gyāg kird estēd abāg ātaxš bē ō drayā ōbast
awēšān harw se ātaxš čiyōn se xwarrah pad gyāg_gāh ī ādur_gāh pad pušt ī gāw , waxšīd hēnd
ud ǰam andar xwadāyīh hamāg kār pad ayārīh awēšān ī harw se ātaxš abērtar hamē kird
u -š ādur farnbay ō dād_gāh pad xwarrahōmand kōf pad xwārizm nišāst
ka -šān ǰam bē kirrēnīd xwarrah ī ǰam az dast dahāg ādur farnbay bōzēnīd
andar xwadāy ī wištāsp šāh pad paydāgīh az dēn az xwārizm ō rōšn kōf ī pad kanārangān deh nišast nišāst hēnd čiyōn nūn -iz ānōh mānēd
ādur gušnasp tā xwadāyīh kay_husrōy pad ān ī ēwēnag pānag ī gēhān hamēw ī kird
ka kay_husrōy uzdēszār hamēw kand abar ō buš asp ī nišast ud tār ud tom bē zad
rōšn ī bē kird tā uzdēszār kand
pad ham ānōh pad asewand frāz ātaxš_gāhīhā nišāst
pad ān ī čim gušnasp xwānēd čē abar buš ī asp nišāst
ādur burzēnmihr tā xwadāyīh wištāsp šāh ham_ēwēnag andar gēhān hamē wazīd , pānagīh hamē kird
ka anōšag_ruwān zarduxšt dēn āwurd pad rawāgēnīdan dēn abēgumān ī kirdan tā wištāsp ud frazendān pad dēn yazadān ēstēnd was tis wēnābdagīhā nimūd kird
wištāsp pad kōf ī rēwand kū pušt ī wištāspān gōwēd ō dād_gāh nišāst
awēšān harw se ādurān ātaxš ī wahrām hamāg tan ī ham ātaxš ī gētīyīg
u -šān ān xwarrah padiš mehmān hangōšīdag tan ī mardōmān ka andar aškomb ī mādar frāz būd ruwān -ēw az mēnōy abar nišīnēd kē ān tan tā zīndag ōh rāyēnēd
ka ān tan frōd mīrēd tan ō zamīg gumēxt ruwān X abāz ō mēnōy šawēd
ast -iz ka hazār ātaxš ī gētī ō ān ēk kunēnd pad ān nērang ī paydāg zōhr dahēnd ō dād_gāh nišānēnd ēg -iš mēnōy -ēw az xwarrah ī ātaxšān abar nišīnēd čiyōn awēšān -iz ka pad ātaxš ī gētīyīg mehmān būd hēnd abārīg -iz ātaxš wahrām
u -šān tan ātaxš ī gētīyīg ruwān ān xwarrah ī az abargarān , āyēd pad -iš nišāstan
nūn -iz ham_ēwēnag druz_zadārīh ud pānagīh ī mardōmān hamēw kunēnd
ka bē afsārēnd ān xwarrah abāz ō mēnōyān rasēd
ātaxš ī pad gētī drubuštīh az warahrān , pānagīh az srōš
u -šān āgenēn hamkārīh
pad ān hamkārīh abāg warahrān ud ādur ī gušnasp artēštār ādur ī burzēnmihr wāstaryōš gōwēd
tā frašegird pānagīh-kirdār ī gēhān hēnd čiyōn wēnābdāg wēnīhēd ka wāzēnd ud dēw ud druz zanēnd ka mardōmān gōwēnd kū ātaxš -ēw be widard
ātaxš ī wahrām was ast
harw ēk dahībed -ēw nišāst estēd
gugān was čiyōn ādur -iz wardāstar ī pad buxārān andar pašag deh frēdōn nišāst estēd
ādur ī kawādagān kē uzaw ī tōhmāspān andar deh nišāst pad ān ī pādāšn ī ka -š kawād windād
ādur ī karkōy čiyōn se ātaxš pad sagestān frāsyāb nišāst ka -š pādixšāyīh ērān_šahr kird
abārīg ān ī az wištāsp xwadāyīh ka dēn mad tā sāsānīyān sar hēnd was nām ud was marag ud was šnūman
hamāg ātaxš ī warahrān ōšmārēd
was andar xwadāyīh ī tāzīgān afsārd
was nūn -iz ast
ēk ēk pad nišāstan ī dahibed paydāg
ātaxš ī framgar rā paydāg kū axwarišn hamē waxšēd
pad rōz dūd pad šab ātaxš paydāg
ka tis -ēw X pāk awi -š abganēnd padīrēd ka ān ī rēman abāz wihēd
az garmāh ī ō nazdīk šudan nē šāyēd
ud ēč ǰādūg wināhgār awi -š šudan nē ayārēnd
gōwēnd kū pad kust ī mān ī wēwagān
gōwēd kū ātaxš -ēw ī ham_ēwēnag pad kōmīš ast
ātaxš ī axwarīg xwānēnd
pad ādurestar nihuftan nē šāyēd
ka -š ēzm abar nihēnd sōzēnēd ka nē nihēnd ham_ēwēnag waxšēd
ast kē gōwēnd kū ātaxš ī framgar ān ast , ,
abar čiyōnīh ī xwāb ,
pad dēn gōwēd kū fradom xwāb pad bundahišn dād pad mard tan ī pānzdah_sālag ī spēd_dōysr
ud ōy -iz dēwān , āhōgēnīd čiyōn āb ī urwar ud gōspand ud razūr ud kōf ud sag ud ēdar sang -iz ast ī hamē āhōgēnīd ēstēd kē -z -iš gōhr andar gumēxt ēstēd
ān ī xwāb pad X asp_kirb ī gušn ī čahār ayāb panǰ_sālag az pas mādagān šawēd ōy -iz az pas pad mardōmān rasēd az bālist ī sar tā ušnūg and_čand dranāy pattāyēd kū se ayāb čahār yatāhūwaryō az padisār bē gōwēnd nē abāg tan dād čē pad ǰudāgīh ī az pas būd
ka mardōm wēš xufsēnd kū čahār wezest dranāy adādīhā
xwāb pad hamāg mardōm be rasēd
ka ēk xufsēd pad ān ī dudīgar estēd
ka hamāg mardōmān nē xuft -ēnd pad tuxšāgār kunēnd X ud ān estēd abar harw kas pad xwēš stī čiyōn xwāb ast
ēn -iz gōwēd kū zamīg āb urwar ud nē tuxšāgīh rāy ka bar dahēnd ud nē xuftagīh ud X rāy ka bar nē dahēnd čē tuxšāgīh xuftagīh ud X pad mardōm gōspand_sardagān bawēd
ēn -iz gōwēd kū čašārag_wāng ān bawēd ka garzišnīg ahlaw rāy kār framāyēnd
ēd rāy garzišnīg estēd čē mard ī ahlaw ka anāgīh ī az ganāg_mēnōy abar mad estēd rāy garzišn abāyēd kirdan kū -m wāhmān tis abāyēd ayāb -im wāhmān anāgīh ast ān anāgīh bē nišāstan rāy harw tis ī andar gētī kār abāyēd framūdan
win_wāng ān ast kē ahlawān srāyēnd abestāg abar gōwēnd
barbūd tambūr ud čang harw rōdīhā ī srāyēnd win xwānēnd
sang_wāng ān ī ast kē ahlawān ǰōrdāg pad -iš ārēnd čiyōn āsyāg
ēd rāy ahlawān gōwēd čē hamāg nēkīh ahlawān rāy dād estēd ud druwandān az -iš ham_ēwēnag bahragwarīh
pas harw tis ahlawān rāy kār , framāyēnd ud ranǰ dārēnd ud pattān az -iš āyēd frārōnīhā wāng xwānīhēd
ka druwandān rāy adādīhā nē pad wāng dārišn
āb_wāng ān bawēd ka pad tazišn frāz tazēd ayāb az abr frōdīhēd ayāb pad padīrag abar ǰahēd ayāb -iš mardōm ud gōspand padiš widārēnd
urwar_wāng ān ī ast ī ka -š tis -ēw abar frōd pahikōbēd ayāb -iš xānag -iz padiš bē hambāyēnd ayāb sang az kōf bē ud kanēnd
ēn -iz gōwēd kū urwar ka be zanēnd urwar bē urwar ī pad nazdīk ī ān urwar būd gumēzēd
pušt ud rōy ī zamīg rāy gōwēd kū -š ēn rōy kē -š urwar , padiš waxšēd u -š ān ast pušt kū -š ō pas -iš kū azēr tis -iz nē waxšēd , ,
, , abar čiyōnīh ī wād ud abr ud wārān , ,
gōwēd pad dēn kū ān ī frārōn wād az ēn zamīg frāz brēhēnīd pad mard ī kirb ī pānzdah_sālag ī rōšn ī spēd_dōysar kē -š ǰāmag xūb wastarg ud mōzag dārēd
pad sāxtīh bowandag garmōg ōwōn kū mardōmān ka -šān abar mad ēg -išān ēdōn xwaš sahist hād čiyōn tan ī abāg gyān
ud az zamīg abar āyēd čiyōn X
ka abr wāyēd pad dašn ālag ī xwaršēd abāz māh tā ī wašt pad bunxān ī arand rōd ī widarg pad ulīh paydāg būd
u -š bīm ī az dēwān rāy harw tis ǰud ǰud X , be nigerīd pādyāwandīhā pad nērōgōmandīh frāz wazīd
u -š ān ī wiš az ham darrīdan ganāg_mēnōy andar zamīg urwar gumēxt čiyōn -iš pad nērōg ī āb mušt zrēyīhā az -iš kird
pas dēwān az pas ī wād pad kōxšišn abar be raft hēnd u -šān wād -iz āhōgēnīd stard be kird
pas pad xwēš dīd ī pad ān tagīgīh pad hamāg kišwar nē āyēd kardag be būd
čiyōn gōwēd kū drāyist ganāg_mēnōy ō dēwān kū āy wād murnǰēnēd ī čēr ī tagīg ī ohrmazd_dād
čē ka -tān wād murnǰēnīd ā -tān harwisp dām murnǰēnīd bawēd
pad ān ī kōxšišn bē wāy ī dagrand_xwadāy rāy kū -š pad gāh ō ayārīh nē mad wād stard būd
nūn az wēn_āwarišn , ud barišn āmadan šudan ī mardōmān gōspandān X wāyēd
wād nazdist az ēn kišwar ī X xwaniras pad tagīgīh wardēd ō arzah ud sawah
X az ānōh pad tagīgīh wardēd ō fradadafš ud wīdadafš
ud az ānōh pad tagīgīh wardēd ō kišwar ī xwaniras
čiyōn pad harw ēwēnag wazēd sard ud garm ud xwēd , ud hušk hamāg ēk ast
čē pad gond widerēd gondīh ka pad bōh widerēd hubōyīh ka pad sard sardīh ka pad garmō garmōyīh pad harw tis , widerēd ān gōhr āwarēd
wād dārēd ēn zamīg ēr_dārišn ud abar_dārišn mardōmān ud gabr_dārišn zrē_dārišn ǰān_dārišn mardōmān ud gōspandān
harw tis ī āwām_winnārišn ; az wād
X stardīh rāy pad freh_būdīh ud abēbūdīh wazēd
čiyōn X freh_būdīh wazēd wād ǰānēnag xwānēnd
kardagkardagīh rāy ud az kust tazēd pad nām nām xwānēnd
ka sūdōmandīhā ud čiyōn wazēd ān ī frārōn wād gōwēd ka , zyānōmandīhā wazēd wād ī ǰānānag , čē āhōgēnīd wistard kird estēd
abr rāy gōwēd kū abzār -ēw ī mēnōyīg kē pad čašm ī gētīyīg dīdan ud griftan nē šāyēd
ka tištar pad nērōg ī wād āb ō andarwāy ārāst ān abr mēnōyīgīhā harw gyāg -ē bē rasēd ud ān āb srešk srešk pad ān ī abzār wārēd
ka nē ēdōn hād ān āb pad andarwāy ēstād ud kust kustag rāyēnīd nē tuwān hād
nē srešk srešk bē ēk pārag wašt hād
ēn ī pad andarwāy paydāg kē mardōmān abr gōwēnd kōf ī āb ast
handāzag ī kaf ī abar sar dēg ō gird āyēd
ka was ō ham mad pad srešk frōd rēzēd
ka -z abr gōwēnd šāyēd čē harw āb ī pad andarwāy šawēd ān abr mēnōyīhā abāg estēd ud padīrēd
čiyōn gōwēd kū abr ān ī mēnōyīg kē barēnd ān ī gētī āb
ast kē abr gōwēd ast kē ābrēz
pad bundahišn az kust ī xwarōfrān paydāg būd čē wād āb ō ānōh tāxt
ānōh bun_kadag ī abr gōwēd
nūn -iz ham_ēwēnag wād ān āb ō xwarōfrān hamē spōzēd az xwarōfrān abr ārāst kust kust āwarēd wārēd ān ī frārōn
čē rāy gōwēd kū -m az āb frāz brēhēnīd bowandag garmōg kū mardōmān ka -šān abar wašt hād ēdōn xwaš sahist hād čiyōn tan gyān
ud pad bundahišn az dašn ārag ī xwaršēd ul āyēd čiyōn āyišmag homānāg
ka abar mad sī šabān_rōz ān , wārān kird kē wiš ī xrafstarān agārēnīd ud zrēy ī frāxkard X az -iš būd
pas az ān wārān_bē_nišānišnīh az kōxšišn ī dēwān ān -iz ī wārān āhōgēnīd kū pad kardag kardag be būd
čiyōn ān ī xwēš kū apāwš dēw abāg tištar ud aspinǰarūš abāg ātaxš wāzišt pad wārān_kirdārīh kōxšīd γarrānāg ud rōzāg paydāgīhist ud ān wārān kird kē zrēyīhā ud sōr az -iš būd
nūn -iz harw sāl se ǰār kē tištar āb stanēd wārēd ān kārēzār bawēd dēwān ud ǰādūgān ānōh pad kōxšišn rasēnd ud ān se wārān handāzēnd
ēk ān ī ī -š padiš kārēnd ēk ān ī -š padiš šing pazzāmēd
bē ast ka az āhōgēnišn ī dēwān frāy_būdīhā ud abēbūdīhā wizend ud ziyān āhōgēnišn kardag wārān wārēd
tištar āb az hamāg zrēy stanēd bē az zrēy ī frāxkard wēš stanēd
čiyōn gōwēd kū xar ī sē_pāy andar zrēy ī frāxkard frāz ǰumbēd hamāg āb ī zrēy X pad šēbišn šēbēd ud āb bē ō kustān ī zrēy abganēd
tištar pad ayārīh ī frawahr ī ahlawān ud any -iz mēnōyān yazadān frōd āyēd meh ǰāmag ī wārān ī pad dast dārēd kē abrnihumb ī pad paymān xwānēnd nazdist abar āb nihēd ud dudīgar wardēnēd sidīgar purr kunēd bē ǰumbēnēd ud abar gīrēd ul ō andarwāy šawēd
pas ān ī āb ēw_tāg pad wād frāz rawēd ōwōn čiyōn wād_girdag ka xāk gird ō andarwāy abrāzēd
ud wād -iz pad ān ēwēnag pad hamkārīh ī abāg tištar āb ō andarwāy āhanǰēd ud estēnēd ud kišwar ī kišwar rāyēnēd
mēnōyīg abr padīrag estēd wārēd čiyōn čašm_dīd paydāg kū wād_girdag andar zrēy āb ō andarwāy barēd
mardōmān gōwēnd kū tištar stanēd abar wād pad ān abzār
ka āb stanēd andar ast ī tištar ka az zrēy ī sōr stanēd ān sōrīh ud gandagīh zrē hilēd ud ān ī xwaš abar barēd
ud hamē miznē_ēwēnag andarwāy barēd estēnēd bowandag stabr pad andarwāy gīrēd srešk srešk wārēd
ka dēwān ō padīragīh rasēnd sardīh pad -iš hilēnd ān ī āb afsārēnd ud hušk kunēnd kū tā nē wārēd
ast -iz ka srešk afsārēnd ud tagarg wārēd
ast ka wārān az gyāg kū ast waštan spōzēnd pad gyāg ī abēsūd wārēd
čiyōn wēnīhēd kū ast ka ō sōrag zamīg ud ast ka ō ham zrēy ast ī ka ō warzbūm pad frehbūd wārēd ō gyāg kū abāyēd waštan nē wārēd
ka pad ān ēwēnag būd ātaxš wāzišt čiyōn andar abr be dād estēd ud hamēstārīh ī spinǰarūš dēw ān āb widāzēnēd ud gad ō sar ī spinǰarūš dēw pahikōbēd
ān gad_dazišn ātaxš_widāzišn tāzišn ī āb rāy rōšnīh andar abr bawēd kē rōzāg , xwānēnd
aspinǰarūš ka ān gad abar pahikōbēd wāng ī sahmgen kunēd kē γarrānāg xwānēnd
ātaxš wāzišt tan ham ātaxš ī gētī kē abāg āb andar abr u -š frawahr ān xwarrah ī az asar rōšnīh awi -š mad estēd
tištar -iz abārīg mēnōyān yazadān kē -š hamkār hēnd abāg apāwš dēw ud hamkārān ham_ēwēnag kōxšēnd
ka dēwān abrōzēnd ān wārēd kardag kardag pad ziyānōmandīhā dāmān , wārēnd ayāb az sūd ī dāmān spōzēnd
yazadān abrōzēnd sūdōmandīhā ud pad paymān wārēnd
čiyōn gōwēd kū pad abāyist ī yazadān wārēd ē rōz nēm wārēd ē rōz nēm wārēd
ǰādūgān -iz kayagān -iz ud dēwān az ān čiyōn ān ī abzārān ī wārān_kirdārīh ud wād xwad -iz wārān_kirdārān yazadān andar gumēzagīh hēnd pad hamān abzār ī pad nērōg ī wād āb ō abr hāmārēnd wārēnd
čiyōn gōwēd kū ān ī ǰādūgān hišt kayagān hilēnd pad bēš ī mardōmān hilēnd
ud ham awēšān andar āb ul barēnd ud ham andar zamīg , frōd barēnd kū nēm_rōz ārāyēd nēm_rōz wārēd
ān -iz āb abāz ō ham bun_xān ābān šawēd ī -šān aziš ul stanēnd
andar dwārist pad ham rōz wārān ō harwisp zamīg āyēd ō harwisp zamīg wāyīd ud xwaršēd ō harwisp zamīg tābīd
ēn -iz gōwēd kū ka tištar pad nērōg ī wād āb ō andarwāy barēd čiyōn harw čē andar āb dardag abāg āb šawēd ō andarwāy čiyōn sang ud māhīg ud wazaγ ud abārīg az ēn šōn aziš paydāgīh aqz ān ka ān ham tix abāg wārān abāz wārēd čiyōn čašm dīd paydāg kū ast ka māhī ayāb wazaγ ayāb sang wārēd kē mardōmān abr xwānēnd
ān sang hēnd kē pad tābišn ī ātaš ī andarwāy pad ān ēwēnag garm būd estēd abāg āb abāz wārēd
ēn ātaš ī ōftēd kē ham mardōmān wazr xwānēnd ham -iz ī čāh hēnd ham zrēy ī abāg āb ul ō andarwāy šawēd
ka pad dast ī dēwān hamēstārān ī tištar ōftēd pad ǰādūgīh gīrēnd ud tābēnd ud wināhēnd pad frāy_būd garmīh ud xwēdīh ayāb sardīh ud xuškīh āhōgēnēnd ud pad ziyān ī mardōmān abāz ō gēhān āwarēnd
ēn stunag ī pad āzmān paydāg bawēd kē mardōmān sanwar xwānēnd harw čē spar zard ud sabz ud suxr ud xšēn ud harūgān waxš hēnd ud dēw kē pad hamēstārīh ī sabz -iz ī tištar zard ud suxr wārēd nē sanwar būdan rāy ō abr kōxšēnd ud ast kē -šān dēwān -iz ī sahmagān xwānēnd ud harw čē spēd waxš ud ast ī yazadān kē ayārīh ī tištar rāy abāg ān dēwān kōxšēnd
ēdōn -iz wād_gerdag ham dēwān -iz ī sahmagān hēnd
čiyōn tištar ka pad nērōg ī wād āb ō andarwāy hangēzēd awēšān xāk ud gard hangēzēnd ud ō petyāragīh ī abr barēd ud pad ān ēwēnag abāg abr kōxšēnd
wizandag rāy paydāg kū ham dēwān -iz ī sahmagān ān wād ī gyānīg ī dāštār čiyōn rawišn ī pad sūrāgīhā ī kōfān pad ǰādūgīh widarg bē gīrēnd kū -š rawišn padiš nē bawēd ān and zamīg kē dārišn az ān wād ō čandišn estēd ud škābēd wād widarg ī xwēš bun bawēd ud ast ka kōf hambaxšēd ud pad zamīg ud zrēyīhā gardēd ud xān ud -mān ēr ud abar kunēd
ud gyāg kū kōf nēst wizandag ō paydāgīh nē rasēd ud nē āyēd čē ān widarg bawēd andar zamīg ī griftan nē šāyēd ka gīrēd zūd škābēd ud agar widarg bawēd ō paydāgīh nē rasēd
čē wād ī bazag andar gēhān ēg čiyōn andar tan ī mardōmān ka -šān wād ī bazag winastagīh ud kaštīh rāy pad ragān bē estēd ud agar gyāg ī madan ud šudan nē tuwān ān tan dard ōšmārēd ud gyān wizār xwāhēd
ka stahmag bawēd wād ī gyānīg aspinǰēd ud tan mīrēd
ud čand wād āmēzišnīh wēš wād ī bazag stahmagtar ēg -iz paydāg kū mardōm wināhgārtar hēnd
ān wād ī bazag andar zamīg kē -iz sahmagān xwānēnd stahmagtar ud wizend wēš kunēd u -šān band -iz ō im abāxtarān ud nērōg az awēšān wēš
abar čiyōnīh ī xrafstarān
gōwēd pad dēn kū ganāg mēnōy ka andar dwārist wiš ī xrafstarān waxš ī bazag čiyōn mār ud kazdumb ud karbūg ud mōr ud magas ud malax ud abārīg az ēn šōn was marag abāg āb ud zamīg ud urwar andar gumēxt
pad ān gyāg ī -šān waxš būd az ēn čahār zahāgān bē hambōsīd hēnd ud ušnūg_bālā gēhān xrafstar bē estād
ud pas pad ān wārān ī wazurg ī čiyōn guft bē abesīhīd hēnd ān āb ī waxšōmand ī andar zrēy ud ān ī andar gēhān bē mānd būm abāz uzīd nōg nōg pad ān gāh ud kirb az ēn čahār zahāgān ī ast āb ud zamīg ud wād ud ātaš hamāg hambōsīd hēnd ud pad zāyišn -iz ēk az ōy ī did hamgōnag hamāg hambōsīd
ay u -šān stīy ud rōšnīh ī čašm ud wād ī gyānīg ohrmazdīg az ān čiyōn andar gēhān u -š waxš ī bazagīh ud wad_kāmagīh ān ī ahrimenīg ēn -iz meh_sūdīh kū tā ka -šān wēnēnd ōzanēnd ayāb aziš pahrēzēnd
az -iz ēn paydāg kū nē dahišn ī ohrmazd hēnd čē -šān hangrāmīg kirb ud gōnag ō gōspandān ud dadān nē homānāg
u -šān dwārišn paydāgīh ud wizend_kunišnīh pad šab hamgōhrīh abāg tārīkīh rāy ud pad uzmāyišn ī bīm ud wizend ud zanišn az wizendgārīh ī dāmān nē estēnd
u -šān tan pad dārūg_āmēzišnīh darmānīhā andar šawēd ud sūd ī dāmān aziš čē -š bawišn az ān čahār gōhr ud zahāgān ī ohrmazd
hamāg xrafstarān se ēwēnag hēnd ābīg ud zamīgīg ud parragīg
ān ī ābīg xrafstar ud zamīgīg xrafstar ud parragīg xrafstar gōwēnd
az ābīgān wazaγ ud az zamīgīgān až ī was kamāl ud az parragīgān mār ī pad parrag wattar
mār ud až ud aždahāg ī 2_kamāl ud 7_kamāl ud čahār kaf ī az pāy āwarēd ud čiyōn karbūg ī dumbag_syā nōgag karčang ud šabāg wēšagīg ud zamīgīg ud mār_hangōš ud ān -iz ī mārānīhā gōwēnd čiyōn abar sar ī mār ī meh nišīnēd bārīk ud spēd angust_drahnā ud abārīg was ēwēnag hamāg mār_sardag
ud kazdumb ud paykūk ud kašawag ud taštāgwar wādag ud kadag ud abārīg az ēn šōn hamāg kazdumb_sardag
karbūg ud warag_mār ud mārān -iz ī widarg ud daštīg ud abārīg ī az ēn šōn hamāg karbūg_sardag
pazūg -iz gardag ān ī nahālīg ud tagīg ud ān ī pād_zahr ud dānag_widār ud rēg_mēz xwarag ud hamāg az ēn šōn pazūg_sardag
kerm ī abrēšom ān -iz ī andar ātaš čiyōn pad kust ī xwarāsān bawēd kē rang ī suxr aziš rēzēnd ud ān -iz ī andar wafr bawēd kē harw ēk čand dast ēw ast ud abārīg kē andar tis tis hambōsēd hamāg ēk sardag hēnd
mōr ī dānag_keš ud ān -iz ī gazāg ud ān -iz ī šabīg ud gul_ayār xwānēnd ud gilag ud abārīg az ēn šōn hamāg mōr_sardag hēnd
magas ī kāskēnēn ud siyā ud magas ī angabēn az se ēwēnag ud wabz az čand ēwēnag ān -iz ī xānag āšyān kunēd ī gilān hamāg ī az ēn šōn magas_sardag
ān malax_sardagīhā ān ī mardōm ōzanēd ud pašag_sardagīhā ud kāgīz_sardagīhā ud parragīg_sardagīhā ud wazaγ_sardagīhā kē gugān dērang
ēn xrafstarīhā čiyōn zamīgīg ast ud ābānīg -iz ast gōwēd kū xrafstar hamāg ǰādūg ud mār ǰādūgtar bē agar -iš ōzanēnd tā nē mīrēd
ud mār ān -iz ast kē zahr pad čašm dārēd ud pad nigerišn mardōm bē ōzanēd čiyōn ka gazīd estēd ān -iz ast kē az dūr gyāg gāw ud gōspand ud asp ud mard abāz ō xwēš āhenǰēd ud ōbarēd
ud aždahāg ān -iz bawēd ī -š and čand dušdānāgīh padiš kē hangōšīdag ī wināhgārān anāgīh kunēd
kehtar xrafstar gilag ǰādūgēnīh rāy xwarišnīg tis ī pad dūr az ōy nihēnd bē šawēd ēwar kū nē pad bōy ud wēnišn bē pad ǰādūgīh awiš ayābēd
mōr_sardagān -iz dānag ī xwārbār stanēd ud pad ǰādūgīh tāzēnēd ud hamgōhr ī xwēš ayāb kazdumb aziš gīrēnd
wabz_ēwēnag lē āšyān ī gilān kanēd ud kerm andar ān āšyān nihēd ud gil kanēd pad hangām ī gil kanēd ast ī ō magas ī kāskēn ud ast ī ō hamān wabz būd estēd
magas ī kāskēn rāy gōwēd kū ka ō gōšt rīyēd kerm ud ka ō zamīg kāk ud ka ō andarwāy pašag ud ka ō nišēm ī kabōd rīyēd pilag ī mār ī kōk aziš hambōsēd ud ka ō āb zarūg
mōr rāy paydāg kū ka -š 300 sāl āšyān nē wišōbēnd abāz ō mār ī pad parrag bawēd
ēn wāzag az dstwarān āšnuftag
mār ī pad parrag ka āsyā ēw abar kas ēw afkanēd ōzanēd
dādār bāz ī spēd pad bē zadan ī ān mār dād estēd kū čiyōn ān mār parrōmand bawēd ō azēr ī tabišn ī xwaršēd šawēd tā āsyā abar mardōm gyānōmand ōftēd tā mīrēnd bāz ī spēd ō kārēzār ī ān mār šawēd u -š ōzanēd
bawēd ī ka pērōzīh ī bāz bawēd ud mār ōzanēd ud bawēd ī ka mār čērīhēd ud bāz ōzanēd
ka harw dō ēk zōr bawēnd harw dō ēk abāg did pēčīhēnd ud murdag ō zamīg ōftēnd ī was kas dīd
ēn xrafstarān ohrmazd pad harwisp_āgāhīh was abāz ō sūd ī dāmān wardēnēd čiyōn magas kē angabēn kunēd ud kerm kē abrēšom ud kač aziš ud wādag kē kazdumb ud warag_mār kē mār ōzanēd ud abārīg az ēn ēwēnag ī hangōšīdag ī tīr ī dušmenān bē āyēd ud a kār nē bawēd ud abāz ō ham dušmenān handāzēnd ān -iz ī ohrmazd pad ham ēwēnag ǰast čiyōn māhīg kē māhīg ud murw kē murw ud dad kē dad ōzanēd ud xwarēd ud ēn -iz ast daxšag ī ardīg ud gumēzišn kē ēč abēzagīh andar nē rawēd
abar čiyōnīh ī gurg_sardagān
gōwēd pad dēn kū ganāg mēnōy ān ī duzz gurg dād kōk ud tom_arzānīgtom ud ziyāg ud tom _tōhmagtom ud kirb syā ud gazišn_kerdār ud nēst_mōy ud hušk_kūn ud pad ān kirb ī wišuftag pad ēn kū ka gōspand darrēd fradom mōy aziš bē rōbēd
u -š pad pānzdah sardag frāz kirrēnīd nazdist gurg ī syā ī kōk ī sturg ī dilērtar kū pad harw tis andar ayārēd andar dwārēd
ud pas abārīg gurg_sardagān čiyōn babr -iz ud šēr ud palang kē kabōd -iz xwānēnd ud yōz ud xaftār ud turag kē uskāl -iz xwānēnd ud gārkan ud karčag ud gurbag ud ān ī parrwar čiyōn bōf ud ān ī ābīg čiyōn ābxwar ud xumīg -iz xrafstar kē gurg ī ābīg xwānēnd ud kōkīg ud abārīg ābīg_sardagān sardag ī andar āb sardag čiyōn abārīg dad tā dahišn gurg čahār_pāy kē ka -š kōdag pad ram rawēd
u -š drāyīd ganāg mēnōy ka -š karčag dād kū dād om hē tō kē karčag hē sēzdah om ī gurgān kū -m az tō ēn -iz nēkīh ast kū dandān andar zanē bē sumbē ud rēman bē kunē ud harw kē ān bē xwarēd ēwar -iz ān dard aziš nē kāhēd ka mardōm bē gazēd karčag andar tan bē hambōsīhēd
az awēšān gurg_sardagān karčag wattar
čiyōn gōwēd kū kē čahār gurg ī šēr bē ōzanēd kirbag and bawēd čand ēk karčag ī kōk_dumb bē ōzanēd
dastwarān az dēn ēn -iz gōwēnd kū ganāg mēnōy ēn gurg_sardagān nihānīg kirrēnīdan kāmist andāzag ī tab ud dard ud abārīg druzīh tā ka ō mardōm rasēnd nē wēnēnd
ud ohrmazd meh_sūdīh rāy kālbod ī awēšān wirāst ud pad ān gāh ō ganāg mēnōy nimūd
u -š drāyīd ganāg mēnōy pas_dānišnīh rāy kū ān ī man wirust kirdan ohrmazd xwad kird
u -š ān druzīh ō ān kālbod bast astōmand kird ud dāmān aziš abērtar šāyēd pahrēxtan
az -iz ēn paydāg kū -šān wirāyišn ī kālbod ō grāmīg sag ud dadān homānāg nē xrafstar_ēwēnag
ast -iz ī az bīm pahrēzēd ud ast ī pad xwāhišn rāmīhēnd čiyōn pīl ud šēr u -šān astōmandīh ī az čahār zahāgān āb ud zamīg ud wād ud ātaš
abar tis tis kū pad čē šōn dād estēd u -šān hamēstārīh čē mad
gōwēd pad dēn kū hōm ī spēd kē gōkaran draxt xwānēnd ī andar zrēy ī frāxkard pad ān ī zufr war rust estēd pad fraškerd_kerdārīh andar abāyēd čē -š anōšagīh aziš wirāyēnd
ud ganāg mēnōy pad ān ī ōy hamēstārīh andar ān zufr āb wazaγ ēw kirrēnīd estēd kū ān hōm bē wināhēd
ud abāz dārišn ī ān wazaγ rāy ohrmazd dō māhī kar ānōh dād estēd kē pērāmōn ī hōm hamwār hamēw gardēnd tā hamēw ēk ēw az ān māhīgān sar ō ān wazaγ ud ham awēšān māhīgān mēnōy xwarišn hēnd kū -šān xwarišn nē abāyēd tā frašegird pad kōxšišn estēnd ud ast gyāg ēw ī ān mānīg araz ī ābīg nibišt estēd
čiyōn gōwēd kū mahist ān ī az ohrmazd dāmān ān māhīg ud mahist ān ī az ganāg mēnōy dāmān ān wazaγ pad tan ud zōr kē mayān ī awēšān and az harw dōwīn dāmān pad dō bē wisinnēnd ǰud az ān ēk māhīg kē ast wāsī panǰāsad_warām
ēn -iz gōwēd kū ān māhīg ōwōn mārāg kū andar ān ī zufr āb sūzan tēx mālišn āb padiš bē abzāyēd ayāb bē kāhēd dānēd
wāsī panǰāsad_warām rāy paydāg kū andar zrēy ī frāxkard rawēd was drānā and čand as kū tā ka pad tag ī tēz bē tazēd bāmdād bē rawēd tā ka rōz frōd šawēd and čand kū -š drānā xwēš nē raft estēd az ān meh kirb ī hurust
ēn -iz gōwēd kū az ān sālārīh dāmān ī ābīgān frāyist -iz zīyēnd
wan ī was tōxmag ī mayān ī zrēy ī frāxkard rust estēd was tōxm ī harwispīn urwar padiš ast kē frārōn bizišk ud ast kē tuxšāg bizišk ud ast kē hamag bizišk gōwēd
andar hāwan ī ōy nō gar brēhēnīd estēd ān gar ī sūrāgōmand nō hazār ud nō sad ud nawad ud nō bēwar ǰōy andar ān gar nēm ī āwān dād estēd kū āb az ānōh pad ān ǰōy widarg frāz rawēd ō haft kišwar zamīg čiyōn hamag āb ī zrēy ī haft kišwar zamīg čašmag az ānōh
xar ī 3_pāy rāy gōwēd kū mayān ī zrēy ī frašegird estēd u -š pāy se ud čašm šaš ud gund nō ud gōš dō ud sruw ēk ud sar xšēn ud tan spēd ud mēnōy_xwarišn ud ahlaw
u -š ān šaš čašm dō pad čašmgāh ud dō pad bālist ī sar ud dō pad kōfgāh ud pad ān šaš čašm sēǰ ud sēǰišnōmandīh ī wattar tarwēnēd ud zanēd.23
ud ān nō gund se pad sar ud se pad kōf ud se andarrōn_nēmag ī pahlūg ud harw gund ēw čand kadag_masā u -š and čand kōf ī xwanwand
ud ān se pāy harw ēk ka nihād estēd and zamīg dārēd čand hazār mēš ka pad ham nišīnišnīh gerd frōd nišīnēd xwurdag ī pāy and čand hazār mard abāg asp ud hazār wardyūn padiš andar widerēd
ud ān dō gōš māzandarān dehān bē wardēnēd
ud ān ēk srū zarrēn homānāg sūrāgōmand u -š ēw hazār srū abārīg aziš rust estēd ī ast ī uštar zahyā ī ast ī asp zahyā ī ast ī gāw zahyā ī ast ī xar zahyā ud meh -iz ud keh -iz pad ān srū harwisp ān ī kōxšišnōmand xrafstarān wattar sēǰ bē zanēd ud bē škennēd
ka ān xar andar zrēy gerd bē dārēd ud gōš bē xamēd hamāg āb ī zrēy ī frāxkard pad ǰundišn ǰundēd ud bē šēbēd kust ī wanāwag
ka wāng kunēd hamāg dām ī ābīg ī mādag ī ohrmazd ābus bē bawēnd ud hamāg xrafstar ī ābīg ī ābus ka ān wāng āšnawēnd rēdag bē abganēnd
ud ka andar zrēy mēzēd hamāg āb ī zrēy yōǰdahr bē bawēd kē pad haft kišwar zamīg
ud pad -iz ān čim hamāg xar ka āb wēnēnd andar mēzēnd
čiyōn gōwēd kū agar xar ī sē_pāy yōǰdahrīh bē ō āb nē dād hē harwisp ābān ī pad zrēy bē abesīhīd hē az āhōgēnišnīh ī ganāg mēnōy abar ō āb burd estēd pad margīh ī dām ī ohrmazd
ud tištar āb az zrēy ī frāxkard pad ayārīh ī xar ī sē_pāy rāy abērtar stanēd
ud ambar -iz paydāg kū sargēn ī xar ī sē_pāy ast čē agar was -iz mēnōy xwarišn ast pas -iz ān nam ud parwār ī āb ī pad sūrāgīhā ō tan šawēd pad gōmēz ud sargīn abāz abganēd
gāw ha∂ayãs kē srisōg -iz xwānēnd rāy gōwēd kū pad bundahišn mardōm az kišwar ō kišwar widārd ud pad frašegird anōšagīh aziš wirāyēnd
ud gōwēd pad dēn kū zīndag pad xwarrah ī ān mard ī pad srišwadag ī ēn zamīg u -š drubuštīh pērāmōn kird estēd tā frašegird ka andar abāyēd
čamrōš murw rāy gōwēd kū pad sar ī kōf ī harborz harw se sāl was az anērān dehān ō gerd āyēnd pad šudan ī ō ērān dehān ziyān āwarišn ud wināhišn ī gēhān kirdan
ēg burz_yazd az ān ī zofr war ī arang abar āyēd ān čamrōš murw ul awestēnēd pad bālist ī hamāg ān ī buland kōf ī čīnēd ān hamāg anērān dehān ēdōn čiyōn murw dānag
ud way ī karšift rāy gōwēd kū saxwan dānist guftan ud dēn pad war ī ǰam kird ōy burd ud rawāgēnīd ud ānōh abestāg pad uzwān ī murwān gōwēnd
ud gāw ī ābīg rāy gōwēd kū andar hamāg zrēy bawēd ud ka wāng kunēd hamāg māhīgān ābus bawēnd ud hamāg xrafstarān ī ābīg rēdag bē kanēd
sēn_murw ud šawāg pad darrag ēw gugān kird bawēd
ud murw ī ašōzušt kē murw ī zōr_barag wahman murw ī ašō -iz xwānēnd rāy gōwēd kū az abestāg ēw pad uzwān dād estēd
ka gōwēd dēwān aziš wirēzēnd ud ānōh bunag nē dārēnd ēd rāy bunag pad wiyābān kunēd ud andar anērānestān bawēd tā dēwān ānōh bunag nē gīrēnd
ud nāxun kē nē afsūd estēd dēwān ud ǰādūgān stanēnd ud tigr homānāg ō ān murw andāzēnd ud ōzanēnd
ēd rāy ān murw nāxun ka nē afsūd estēd stanēd ud xwarēd kū tā dēwān ud ǰādūgān kār nē framāyēnd
ka afsūd estēd nē xwarēd ud dēwān wināh padiš kirdan nē tuwān
abārīg -iz dadān ud murwān hamāg pad hamēstārīh ī dēwān ud xrafstarān dād estēd
čiyōn gōwēd kē murwān ud dadān hamāg pad hamēstārīh ī xrafstarān ud ǰādūgān
ēn -iz gōwēd kū murw hamāg zīrag ud warāγ zīragtar bawēd
bāz ī spēd rāy gōwēd kū mār ī pad parr ōzanēd
kāskēn murw malax ō ōzanēd pad ān hamēstārīh dād estēd
kargās ī zarmān_menišn ī ast dālman nasā_xwarišnīh rāy dād
ud ēdōn -iz warāγ ud sār ī gar ud gāw ī kōfīg ud pāčen ud āhūg ud gōr ud abārīg dadān hamāg murdār xwarēnd ud ēdōn -iz abārīg xrafstar
sagān pad hamēstārīh ī gurg_sardagān ud pānagīh ī gōspandān kirdan rāy dād estēd
rōbāh pad hamēstārīh ī xšabag dēw dād estēd
ud rasūg pad hamēstārīh ī karčang ud abārīg xrafstarān ī sūrāgīg dād estēd
ud ēdōn -iz mūšag ī wazurg pad hamēstārīh ī karčang dād estēd
zūzag pad hamēstārīh ī mōr ī dānagkeš dād estēd
čiyōn gōwēd kū zuzag harw ǰār ka andar mōr āšyānag mēzēd hazār mōr bē ōzanēd
zamīg ka -š dānagkeš abar rawēd abar sūrāg aziš bē kanēd
ka -š zūzag abar rawēd abar abāz sūrāg aziš bē šawēd ud rāst abāz bawēd
babrag ī ābīg pad hamēstārīh ī dēw ī andar āb bawēd dād estēd
ānōh kū wāng ī kabk bē šawēd ud xāyag ī kabk bē rawēd āb bē kunēd
hangerdīg ēn kū hamāg dadān ud murwān ud māhīgān harw ēk pad hamēstārīh ī xrafstar ēw dīd estēd
dālman rāy gōwēd kū az ān ī burztar -iz parwāz ka mušt_masā gōšt pad zamīg ast wēnēd u -š bōy ī mušk azēr ī parr dād estēd kū agar pad nasā xwardan gand ī nasā ōšmārēd sar azēr ī parr abāz barēd ud abāz āsāyēd
asp ī tāzīg rāy gōwēd kū agar pad šab ī tārīk mūy ēw tāg pad zamīg sayēd wēnēd
xrōs pad hamēstārīh ī dēwān ud ǰādūgān dād estēd abāg sag hamkār
čiyōn gōwēd pad dēn kū az gētī dāmān ān ī pad druz zadārīh abāg srōš hamkār hēnd xrōs ud sag
ēn -iz gōwēd kū nē winnārd hād -mān ka -m nē dād hē sag ī šubān ī pasuš_horw ud sag ī mānbān ān ī wiš_horw
čē gōwēd pad dēn kū sag pad pāyagān ī gētī mardōm ōwōn druz ud dard zadār čiyōn xūk pad pāyagān ī gētī stōrān
čē gōwēd kū pad čašm hamāg nisrušt bē zanēd xūk
ka wāng kunēd dard bē zanēd u -š gōšt ud pih pad sēǰ ud dard -iz az mardōmān bē zadan bēšaz
pas ohrmazd tis -iz abēsūd nē āfrīd čē harw tis ēw pad sūd ēw dād estēd
ka -š čim nē dānēd az dastwarān abāyēd pursīdan čē -š panǰ ī xūk pad -iz ēn ēwēnag āfrīd estēd kū druz hamēw zanēd
abar sāl ī dēnīg
gōwēd pad dēn kū -m dām ī gētī pad 365 rōz hangārd dād ast ī šaš gāh ī gāhānbār ī pad sāl ēw hangārd estēd
hamāg nazdist rōz abāyēd āmārēnīdan pas šab čē nazdist rōz bē šawēd ud pas šab āyēd
ud az mēdyōšim gāh ī ast māh ī tīr ī wihēzagīg ud rōz ī xwar tā mēdyārim gāh ī ast māh ī day wihēzagīg ud rōz ī warahrān rōz kāhēd ud šab abzāyēd
ud az mēdyārim gāh tā mēdyōšim gāh šab kāhēd ud rōz abzāyēd
rōz ī hāmīnīg mahist čand dō ī zamestānīg kahist
šab ī zamestānīg čand dō ī hāmīnīg kahist
ud rōz ī hāmīnīg dwāzdah hāsr šab ēw šaš hāsr
ud šab ī zamestānīg dwāzdah hāsr ud rōz šaš
hāsr ēw ī zamānīg pad zamīg ham ēwēnag
pad hamespadmaedēm gāh ī ast panǰag ī pad māh ī spandarmad sar rōz ud šab rāst abāz bawēd
čiyōn az māh ī frawardīn ud rōz ī ohrmazd ī wihēzagīg tā māh ī mihr ud rōz ī anagrān wihēzagīg bawēd haft māh hāmīn
ud az māh ī ābān ud rōz ohrmazd ī wihēzagīg tā māh ī spandarmad ī wihēzagīg ud panǰag bē ō sar bawēd panǰ māhīgān zamestān
ēhrbed wizīr ī nasā ud abārīg tis pad hāmīn ud zamestān az ēn ošmārag kunēnd
pad ān haft māh ī hāmīn gāh ī rōzān ud šabān panǰ čē rabihwin ōh yazēnd čīyōn bāmdād gāh ī hāwan ud nēmrōz gāh ī rabihwin ud ēbārag gāh ī uzērin
ud ka stārag ō asman ō paydāgīh mad tā nēm_šab gāh ī ēbsrūsrim ud az nēm_šab tā stārag abaydāg bawēd gāh ī ušahin
pad zamestān čahār gāh čē bāmdād tā uzērin hamāg hāwan ud abārīg čiyōn im guft
u -š čim ēn kū zamestān āšārišn pad kust ī abāxtar kū kišwar ī wōrubaršt ud wōruǰaršt ud hāmīn -iz bun_kadag pad nēmrōz kū kišwar ī fradadafš ud widadafš
pad māh ī ābān ī wihēzagīg ud rōz ī ohrmazd zamestān zōr gīrēd ud pad gēhān andar āyēd
mēnōy ī rabihwin az azabar ī zamīg ō azēr ī zamīg šawēd kū xānīg ī ābān garmīh ud xwēdīh pad āb andar āyēd tā rēšag ī draxtān pad sardīh ud huškīh nē hōšēd
ud māh ī day ī wihēzagīg ud rōz ī ādur ān zamestān pad wēš sardīh ō ērānwēz rasēd
ud pad māh ī spandarmad ī wihēzagīg ō sar pad hamāg gēhān bē rasēd
ēd rāy māh ī day ud rōz ī ādur hamāg gyāg ātaxš abrōzēnd ud nišān kunēnd kū zamestān mad
pad ān panǰ māh āb ī xānīg hamāg garm čē rabihwin ānōh garmīh ud xwēdīh dārēd ud gāh ī rabihwin nē yazēnd
čiyōn māh ī frawardīn ud rōz ī ohrmazd bawēd zamestān nērōg ud pādixšāyīh kāhēd ud hāmīn az xwēš bun_kadag andar āyēd ud nērōg ud pādixšāyīh padīrēd ud rabihwin az azēr ī zamīg azabar āyēd ud bar ī draxtān pazzāmēd
ēd rāy pad hāmīn āb ī xānīg sard čē rapihwin ānōh nēst
ud ān haft māh rabihwin ōh yazēnd ud hāmīn pad hamāg zamīg bē rasēd
ud pad -iz kust ī hindūgān ānōh bun_kadag ī hāmīn nazdīktar ud hamwār nē sard nē garm
čē pad ān hangām kū pādixšāyīh ī hāmīn hamwār wārān garmīh ī wēš bē zanēd ud paydāg nē bawēd
pad zamestān wārān nē wārēd sardīh ī wēš paydāg nē bawēd
pad kust ī abāxtar kū āšārišn ī zamestān hamwār sard čē pad hāmīn wēš stahmbagīh ī zamestān ānōh rāy sardīh ēdōn nē tuwān zadan kū garm bē kunēd
ud pad mayānag gyāg sarmāg ī zamestān garmāg ī hāmīn zōrōmandīhā bē rasēd
did sāl ēw pad wardišn ī māh abāg sāl ī ōšmurdīg nē rāst
ēd rāy čē māh ǰār ēw pad 29 abāz bawēd ud ǰār ēw pad sī u -š ān ēk čahār zamān was
čiyōn gōwēd kū harwisp drōzēnd kū pad māh gōwēnd bē ka gōwēnd kū pad šašt rōz dō bār
kē sāl az wardišn ī māh hangārēd hāmīn pad zamestān ud zamestān pad hāmīn āmēzēd
ēn kū māh ī frawardīn ī wihēzagīg ud māh ī ardwahišt ud māh ī hordad wahār
māh ī tīr ud māh ī amurdād ud māh ī šahrewar hāmīn
ud māh ī mihr ud māh ī ābān ud māh ī ādur pādēz
ud māh ī day ud māh ī wahman ud māh ī spandarmad zamestān
ud xwaršēd az ān xwurdag ī warrag ī pad bunīh bē raft pad 350 rōz ud šaš zamān ud xwurdag ī ast sāl ēw abāz ō ān gyāg rasēd
čiyōn harw se māh pad se axtar wēš ud kam bē rasēd
ud māh pad 180 rōz abāz ō ān gyāg āyēd ī az bunīh bē raft
hāsr ēw pad zamīg frasang ēw ī hazār gām ī dō pāy
frasang ēw ī paymānīg and čand kū mard ēw ī dūr_wēnišn frāz nigerēd stōr ēw bē wēnēd ud syāyīh andar spēdīh šnāsēd
māh ēw paymānīg šaš widest ī zamānag
abar wazurg kerdārīh ī mēnōyān yazadān
ohrmazd dām ī xwēš pānagīh kunēd pad āmurzīdārīh ud rāyōmandīh ud xwarrahōmandīh
u -š āmurzīdārīh parwarišn ī dāmān rāyōmandīh rādīh ī abar dāmān xwarrahōmandīh ēd kū xwarrah ī ohrmazd_dād
čiyōn gōwēd kū xwarrah ī sūd ī ohrmazd_dād ud kayān xwarrah ī ohrmazd_dād ud ērān xwarrah ī ohrmazd_dād ud ān -iz ī agrift xwarrah ī ohrmazd_dād
kayān xwarrah ān ī abāg hōšang ud ǰam ud kay_us ud abārīg xwadāyān dād estēd ud paywand -iz ī kayān aziš rawēd
ērān xwarrah ān ī ērānīgān
agrift xwarrah ān ī āsrōnān čē hamwār dānāgīh abāg awēšān
ohrmazd xwad āsrōn ud ēd rāy agrift xwarrah xwānēd čē ohrmazd andar mēnōyān mēnōy tuwān būdan kē agrift xwarrah ēd rāy ēdōn tuwān būdan kū -š mēnōyān nē wēnēnd
u -š ān šaš gāh ī gāhānbār kē -š dām ī gētī padiš dād raθβō burzait nām nihād kē -š wizārišn ēn kū ohrmazd ī xwadāy hangōšīdag ān se day andar māhīgān pad nām ī xwēš nihād xwad nišīnēd pad ān ī asar rōšnīh ud āyēd mēnōy ud gētī dāmān ō -iz gētī nazdīk čiyōn pad mēnōy u -š wahman ud ardwahišt ud šahrewar az dašn ud spandarmad ud hordad ud amurdad az hōy ud srōš pēš estēnd
ud pad ān ī ohrmazd āmurzīdārīh dāmān zīyēnd ud pad ān ī ohrmazd rādīh ō ān ī pahlom axwān rasēnd ud pad ān ī ohrmazd xwarrahōmandīh ud harwispāgāhīh az ēbgat bōxtēnd ud ō xwēšīh ī ohrmazd rasēnd
u -š gētī daxš mard ī ašō
kē mard ī ašō rāmēnēd ayāb bēšēd ēg -iš ohrmazd rāmēnīd ayāb bēšīd bawēd
wahman xwēškārīh handēmāngarīh
čiyōn gōwēd kū wahman weh ī amāwand ī āštīh_dādād
u -š wehīh handēmāngarīh kū ašōān ō ān ī pahlom axwān wahman barēd ud handēmānīh ī ohrmazd wahman kunēd
u -š amāwandīh ēd kū gund ī yazadān ud ān -iz ī ērān ka āštīh kunēnd bē abzāyēnd pad rāh ī wahman ka -šān andar mayān šawēd ud gund ī dēwān ud ān -iz ī anērān ka -šān anāštīh bē abaxšēnd wahman rāy ka -šān ō mayān nē šawēd
u -š āštīh ēd kū ō hāmōyēn dām ī ohrmazd āštīh dahēd kū pad ān āštīh ī ōy ahriman abāg dēwān abesīhēnīdan ud ristāxēz ud tan ī pasēn kirdan ud amargīh winnārdan abērtar šāyēd kirdan
āsn_xrad ud gōšōsrūd_xrad nazdist abar wahman paydāg bawēd kē -š īn harw dō ast ō ān ī pahlom axwān rasēd kē -š īn harw dō nēst ō ān ī wattar axwān rasēd kē āsn_xrad nēst gōšōsrūd nē āmōxtēd kē -š āsn_xrad ast ud gōšōsrūd xrad nēst āsn_xrad ō kār nē dānēd burdan
az hamag yazadān wahman ō dādār nazdtar
u -š gētī gōspand ud wastarg ī spēd xwēš kē awēšān rāmēnēd ayāb bēšēd ēg -iš wahman rāmēnīd ayāb bēšīd bawēd
u -š hamkār māh ud gōšurūn ud rām
māh xwarrah_baxtārīh ī gēhān pānzdah abzāyēd pānzdah nirfsēd u -š pad abzār ī gušnān homānāg ī ka abar sazēd tōhm ō mādagān dahēd ōwōn māh -iz pad ān hangōšīdag pānzdah abzāyēd ud nēkīh ō gētīyān baxšēd pānzdah nirfsēd kū kār ud kirbag az gētīyān padīrēd ud pad ganǰ ī yazadān abespārēd
čiyōn gōwēd kū andarmāh ud purrmāh ud wišaptah čē az ēk tā pānzdah abzāyēd andarmāh xwānēnd az dah tā pānzdah abzāyēd purrmāh xwānīhēd az wīst tā wīst ud panǰ kāhēd wišaptah xwānīhēd pad ān se panǰag xwarrah baxšēd ud pad ān se panǰag kirbag padīrēd
az ān čiyōn paywandīdan ī āb ō māh pad ān se panǰag hamag āb ul abzāyēnd čiyōn čašm dīd paydāg
draxtān -iz pad ān hangām weh abar waxšēnd ud bar wēš pazzāmēnd
čiyōn gōwēd kū māh_yazd ī xwarrah_baxtār ī abrōmand kū abr pad rāh ī ōy wēš āyēd tābišnōmand kū andar gēhān pad rāh ī ōy draxtān garmtar waxštōmand kū ramag ī gōspandān bē abzāyēd sūdōmand kū tis tarr dārēd weh ī ābādīhōmand kū hamag ābādīh weh ōh dahēd dād āyaft kū āyaft ī dādīhā xwāhēnd pad zamān bē dahēd
gōš ī gōšurūn mēnōy ī ruwān ī gāw ēk dād kē -š gōspandān ī panǰ_ēwēnag aziš būd
ēdōn -iz gāw ī hadayānš ī haδaiiąs kē pad frašegird anōš aziš wīrāyēnd u -š parwardārīh ī dāmān kirdan xwēškārīh
rām ī wāy ī weh ī dērang_xwadāy gōwēd xwad ast wāy ī dērang_xwadāy kē andar mēnōyān artēštārān sālārīh xwēškārīh
ud ruwān ī ašōān ka pad čēh_widarg widerēd wāy ī weh dast abar gīrēd ud ō ān ī xwēš gāh barēd ēd rāy rām gōwēd čē rāmišn_dādār ō hamag dahišn
ka -iz wāy ī wattar gyān az tan bē zanēd ōy wāy ī weh bē padīrēd ud hunsandīh bē dahēd
az ān zamān ī brīn spahr ud zurwān
čiyōn gōwēd kū spahr ī xwadāy ud zurwān ī akanārag ud zurwān ī dērang_xwadāy
spahr ān kē nēkīh baxšēd u -š xwadāyīh pādixšāyīh čiyōn wāstaryōšān gēhān warzēnd ōy -iz baxtārīh kunēd
mēnōy ēw ī abāg mihr hamkār sōg xwānēnd
hamag nēkīh ka az abargarān ō gētī brēhēnīd nazdist ō sōg āyēd sōg ō māh abespārēd māh ō ardwīsūr abespārēd ud ardwīsūr ō spahr abespārēd ud spahr pad gēhān baxšēd kē wēš dahēd nēkīh spahr ud kē kem dahē wad spahr xwānēnd ud ān -iz baxšišn pad zamān rasēd kē wāy ī dērang_xwadāy ī ast zurwān ī zēn ast ī ohrmazd ēd kū zōr padiš wānēd ān -iz ast baxšišn ī zamān kē būd akanārag tā ō dām dahišnīh ud kanāragōmandīh brēhēnīd tā ō frazām kū agārīh ī ganāg mēnōy ud pas gumēzēd ō im akanāragīh tā ō hamēw ud hamēw rawišnīh
ardwahišt xwēškārīh ēd kū ruwān ī druwandān andar dōzox dēwān wēš az wināh ī -šān ast pādifrāh nē hilēd kirdan u -šān was abāz dārēd
čiyōn gōwēd kū ašwahišt ašāyīh ī pahlom ī amarg ī abzōnīg
čē harw kas ašāyīh warzišnīh rāy ō garōdmān šawēnd ud pad nēkīh arzānīg bawēnd
ud pad -iz bundahišn ka ohrmazd im šaš amahrspand frāz brēhēnīd xwad -iz abāg awēšān ān ī pahlom haftom būd ēg pursīd az awēšān kū amā kē brēhēnīd hēm u -šān ēk -iz passox nē kird
ǰār ī dudīgar ud sidīgar hamēwēnag pursīd
pas ardwahišt guft kū amā tō brēhēnīd hēm awēšān -iz pad hampassoxīh hamēwēnag guft ud ardwahišt -iz abāg awēšān abāz guft
nazdist xwadāyīh ō ohrmazd ardwahišt dād
pas ohrmazd ašemwohū ēw bē guft
u -š ardwahišt tah harw kē mēnōyān frāz kird
čiyōn ka wahman meh ardwahišt tah čē hamēw yazišn bē sar ašemwohū kē ast ašāyīh ī pahlom ī frāy az hamag tis
ud ohrmazd pad ān čim ēdōn pursīd čē ka -šān xwadāyīh ō ohrmazd dād dēwān aziš zanišn ud bēšišn bawēd
ardwahišt pad gētī ātaš xwēš
kē ātaš rāmēnēd ayāb bēšēd ēg -iš ardwahišt rāmēnīd ayāb bēšīd bawēd
u -š hamkārīh ī ādar ud srōš ud wahrām
ādar andar gētī mādagwar ēn se mēnōy farnbay ud gušnasp ud burzēnmihr ud pas abārīg ātaxšān ī pad dādgāh nišīnēnd kē pad zadan ud abesīhēnīdan ī druz ud pānagīh ī dāmān dād estēd
ādar farnbay rāy gōwēd kū pad čīnwar puhl ka ruwān ī ahlawān widerēd ānōh bē rasēd ud tom bē zanēd ud rōšn bē kunēd
srōš gētī pad pānagīh_kerdārīh az ohrmazd dārēd
ēdōn čiyōn ohrmazd pad mēnōy ud gētī sālār srōš pad gētī sālār
čiyōn gōwēd kū ohrmazd mēnōy ruwān pānag ud srōš pad gētī tan pānag
az ān čiyōn kū -šān dām dād pānagīh ī dāmān kirdan rāy xwaš nē xuft estēd harw šab ō harw mardōm se ǰār pad hām šab ayābēd abāg māzenīgān dēwān kū az bīm ī dēwān stōw nē bawēd ud az ōy hamag dēw akāmagīhā pad stōw ō tom dwārānd
ruwān ī widerdagān pad pānagīh ī srōš ō čēhwidarg rasēnd pad ān haft kišwar haft sāl ēg -išān yazišn ud drōn ud āfrīnagān hamag ān ī srōš kirdan ān ašīy ānōh wēnābdāgīhā pad sālārīh nišīnēd
čiyōn gōwēd kū srōš ahlīy ī tagīg ī tan pad framān ī škuft_zēn ī xwadāy šnāyēnēm
u -š tagīgīh ēd kū gad ī pad xwarāsān bē zanēd nē nišīnēd tā ka -š pad xwarwarān abāz zad
u -š tan_framānīh ēd kū tan pad framān ī yazadān dārēd
u -š škeft_zēnīh ēd kū dēwān az zanišn ī ōy nē bōxtēnd
u -š xwadāyīh ēd kū pad arzah ud sawah framādār
warahrām yazad drafš_dār ī mēnōyān yazadān
kas az ōy pērōzgartar nēst kē hamwār drafš pad pērōzīh ī yazadān dārēd
šahrewar xwēškārīh pēš ī ohrmazd dād_gōwīh ī driyōšān kirdan
hamag sālārīh bun az šahrewar ask kē xšatrwar gōwēd kē wizārd šahryārīh ī pad kāmag ēd rāy čē -š gētī as ayōxšust xwēš hamag kāmag_xwadāyīh ud ōzōmandīh ud kāmagrrawāgīh ud passox_guftārīh pad zēn abzār šāyēd kirdan
zēn_abzārīh ī hamag ayōxšustān mēnōyān zēn ī dēwān padiš wānēnd ī hamag ayōxšust
čiyōn gōwēd kū yazam wazr ī huwēhm ī abar pad kamāl ī dēwān
mihr ī frāx_gōyōd ud xwaršēd -iz pad zadan ī ān druz pad rōzanīhā zēn_abzār ayōxšustēn dārēnd
kē ayōxšust rāmēnēd ayāb bēšēd ēg -iš šahrewar rāmēnīd ayāb bēšīd bawēd
u -š hamkārīh ī xwar ud mihr ud asmān ud anagrān
xwar xwaršēd ī amarg ī rāyōmand ī arwand_asp
u -š amargīh ēn kū tan ī pasēn pad madan ud šudan ī xwaršēd bawēd
u -š arwand_aspīh ēn kū -š asp ī nēk abar druwaspān xwarrah dārēd
u -š rāyōmandīh ēd kū -š abzār was
ud ēn -iz gōwēd kū harw šab buš ī asp homānāg nasrušt pad zamīg ud āb ud zamīg -iz ī ahlawān bē dwārēd ud ka xwaršēd ul āyēd hamag zamīg dēwān bē zanēd ud yōǰdahr bē kunēd
ēn -iz gōwēd kū ka xwaršēd ēk zamān pas abar āyēd dēwān hamag dām bē murnǰēnēnd
bē zanēd xwaršēd tom ud tārīkīh ud tom_tōhmagān dēwān ud sēǰ ī nihān_rawišn ud duzzān ud kaygān ud stahmagān
mihr xwēškārīh wizīr ī gēhān pad rāstīh kirdan
čiyōn gōwēd kū mihr ī frāx_gōyōd ī ēw hazār_gōš ī bēwar_čašm
u -š frāx_gōyōdīh ēd kū ka pa dašt abēbīmīhā bē šāyēd madan ud šudan pad rāh ī mihr
u -š hazār_gōšīh ēd kū -š panǰ sad mēnōy kār ī gōšīh hamēw kunēd u -š bēwar_čašmīh ēn kū -š panǰ hazār mēnōy kār ī čašmīh kunēnd kū mihr ēn -iz niyōš ud ān -iz niyōš ēn -iz wēn ud ān -iz wēn
harw rōz tā nēmrōz abāg xwaršēd pad ēn kār ēd rāy dādwar pad gētī tā nēmrōz wizīr kunēd
mihr rāy ēn -iz gōwēd kū pad hamag dehān dahībed kū pad harw kas ud harw tis bē rasēd dādestān bē bawēd kē frāz dād ohrmazd xwarrahōmandtom az mēnōyān yazadān
ud mēnōy ēw ast ī abāg mihr yazad hamkār ī mihr gōwēd u -š gāh andarg ī māh ud xwaršēd
asmān mēnōy asmān kē gurdīh homānāg ī pad tan dārēn ēn asmān dārēd kū ganāg mēnōy abāz dwāristan nē hišt u -š xwaēnā ayanghā ahlawān āgāhīh pad ham ayārīh abāg winnārd estēd
anagrān mēnōy anagr ī rōšn ī -mān ī gōhr_pēsīd suft_mākand ī mēnōyān_tāšīd
spandarmad xwēškārīh parwardārīh ī dāmān ud harw xīr ī pad dāmān bowandag bē kirdan
u -š gētī zamīg xwēš
čiyōn gōwēd kū spandarmad ī weh ī rād ī bowandag_menišn ī kāmag_dōisr ī ohrmazd _dād ī ahlaw
u -š wehīh ēn kū wīdwar ud galag_ōbār ēn kū anāgīh ī ō spandarmad zamīg rasēd hamag bē guwārēd
u -š bowandag_menišnīh ēn kū hamag anāgīh ī -š padiš kunēnd hunsandīhā padīrēd
u -š rādīh ēd kū hamag dāmān az ōy zīyēnd
ahlawān mēnōy pākīh ī zamīg rāy dād estēd kū ka -š dēwān pad šab nasrušt abar barēnd ōy yōǰdahr bē kunēd
u -š ēn -iz xwēškārīh kū harw aspārag ēw az harw dahišn ēw xwarrah ēw abāz ō pēš ī ohrmazd šawēd pad ušahin gāh ān xwarrah ō star_pāyag āyēd ud ōš_bām bē padīrēd ud pad bāmdād gāh bē ō war ī urwās āyēd ud ahlaw mēnōy padīrēd ud pad rahī wardyūn āyēd ud harw dānar ēw xwarrah ēw ī xwēš awiš abespārēd
kē -š zamīg rāmēnēd ayāb bēšēd ēg -iš spandarmad rāmēnīd ayāb bēšīd bawēd
u -š hamkārīh ī ābān ud dēn ud ard ud mahrspand
ōšbām ān ī tay ī xwaršēd abar āyēd ka xwaršēd rōšnīh paydāg u -š tan nē paydāg tā ka xwaršēd paydāg bawēd ka bām ī ōš
u -š xwēškārīh ōš_dāštārīh ī mardōmān az -iz ēd paydāg kū -šān pad ān hangām ōš ayābagtar25 ud tis weh rasēd ud weh āmōxtēd ud padiš ayābagtar bawēd ud ān -iz kē az ōš bē šawēd ka -š nē ahrišwang marg pad ān hangām abāz ō ōš āyēd aziš
mēnōy ī hamag ābīhā ardwīsūr ay anāhīd mād ī ābān ud tōhm ī narān ka az xōn pālūd estēd ud mādagān -iz ka zāyēnd ud dudīgar ābus bawēnd xwēškārīh ī ardwīsūr
ud burz yazad mehmānīh ānōh kū ardwīsūr ud āb ī awinast u -š xwēškārīh ēd wēš kū āb ī pad zrēy ō hamag kišwar baxšēd u -šān ēn -iz ān kū dāmān pad widārdan ī andar zrēyīh az ī buland bōzēnd ud hamag xwarrah nigāh dārēnd
čiyōn gōwēd kū burz ī xwadāy ī mādagān ī ābān nāf ī arwand_asp
hōm yazad andar gōkarn hōm ī awinast ī bēšaz kē -š fraškerd_kerdārīh padiš bawēd
dahmān āfrīn ān mēnōy ka mardōmān āfrīn kunēnd ān xwarrah bē rasēd čē čiyōn āb pad ān paymānag ī -m guft kū abāz ō xān rasēd āfrīn -iz ī dahmān kunēnd pad ān paymānag abāz ō mard rasēd xwāstag ī pad tuxšāgīh kunēnd pānag dahmān āfrīn harw rōz ud šab čahār hangām ō tan ī hamag uštānōmandān ud rēšag ī hamag urwarān ud bālist ī kōfān bē rasēd ka nēkīh kunēd zamīg pahnā ud rōd drahnā ud xwaršēd bālā ān nēkīh rasēd
dēn dānišn ī ohrmazd ud panāh ī spandarmad kē -š harwisp astān ud būdān ud bēdān aziš paydāg ud nazdist abar wahman paydāg būd kū dēn ī weh ī māzdēsnān ī ǰud_dēw ī ohrmazd_dādestān ī abgand_āyōzišn ī bē nihād_sneh ī -š wizārišn ēn kū -š dēwīh az yazdīh ǰudāg paydāgēnīd estēd kē ēč hešmenīh nasuš ud anāgīh andar nēst čē pad dēn padīrišnīh dēwān kālbod bē škast ud pad dēn_ēzišnīh gannāg mēnōy abāg hamist dēwān abesīhēd pad dēn_ēzišnīh ōz ī hamist mēnōyān yazadān abzāyēd ud hamkārīh ī tištar ud āwāmīh ī sālān ud dādestān_wistarišnīh ī xwadāyān ud abārīg harwisp nēkīh bawēd pad -iz dēn_ēzišnīh ristāxēz ud tan ī pasēn kunēnd ud dāmān amargīh ud xwārīh rasēd
ard mēnōy ardāyīh wahištīgīh ast kē ahlišwang ī weh ast kē ašišwang gōwēd xwarrah_abzāyišnīh ī -mān čē harw čē bē ō arzānīgān dahēnd ōy pad abzōn abāz ō ān -mān rasēd pānagīh ī ganǰ ī wehān kunēd čē wahišt -iz -mān ēwēnag ī gōhr_pēsīd čiyōn gōwēd mēhan ī mānišn ī weh čiyōn harwisp axw ī astōmand nē pad ēn dēn ī ohrmazd hēnd
airyaman amahrspand ān mēnōy kē bēšazišnīh az hamag dard ī ō dāmān dād
čiyōn gōwēd kū harw dārūg ī dard bē zadan rāy dāmān xwarēnd ka man ohrmazd airyaman pad bēšazišnīh nē dād hē ān dard weh nē hē
ēdōn -iz nīrang ud afsōn ī gātā gāhān ī ahlawān mēnōy yazišn ud xwarrah nigāh dārēnd
mahrspand gōwišn ī ohrmazd ī ast abestāg kē -š wizārišn abēzag stāyišn ī yazadān
nēryōsang pty’k ī yazadān kū pad hamag paygām ōy frestēd abāg awēšān kayān ud yalān pad ayārīh dādārīh ī andar gētī winnārd estēd ud tōhmag ī kayān rāy gōwēd kū ōy bē abzāyēnēd
čiyōn gōwēd kū ōy tōhmag ī kayān az paywand bayān xwānēd nēryōsang frāyīdārīh ī gēhān kū pad ayārīh ī ōy ān kayān ud yalān frāyīdārīh ud rāyēnīdārīh ī gēhān kirdan
hordad rad ī sālān ud māhān ud rōzān az ēn kū harwīn rad u -š gētī āb xwēš čiyōn bawišn ud zāyišn ud parwarišn ī hamag astōmandān gēhān az āb ud zamīg -iz ābādānīh az ōy ka andar sāl weh šāyēd zīstan pad rāh ī hordad
čiyōn gōwēd kū hamag nēkīh ka az abargarān ō gētī āyēd hordad rōz ī nōrōz āyēd
ast ī gōwēd kū hamag rōz āyēd bē ān rōz wēš āyēd
paydāg kū ka ān rōz tan ī ǰāmag ī nēk dārēnd ud bōy ī xwaš bōyēnd ud murwāg ī nēk gīrēnd ud pa nišēm ī az gyāg ī rēman ud az mardōm ī wattar dūr bawēnd ud ābān bahr kunēnd ud yazišn ī gāh ud rōz ayaranām -iz ud asniyanām kunēnd ān sāl nēkīh awiš wēš rasēd ud anāgīh wēš aziš barēd
kē -š āb rāmēnēd ayāb bēšēd ēg -iš hordad rāmēnīd ayāb bēšīd bawēd
u -š hamārīh ī tīr ud wād ud frawardīn
tīr tištar kē wārān kerdārīh ud dām parwardārīh kunēd
wād mēnōy wād kē ēn zamīg azēr ud azabar dārēd ud āb ī tištar stanēd ōh abespārēd
frawardīn frawahr ī ardā_frawahr ān ī pēš ī ohrmazd ī xwadāy ī zādān ud azādān kē pad tanīkerdīg waxšāyīh abāg druz hamēw kōxšēnd
čiyōn gōwēd kū ganāg mēnōy hamāg xāmōš būd tā ka -š mard ī ašō dīd čē ān ganā mēnōy abāg dēwān hammis wišūdagān a kār kunēd ēwāz mard ī ašō ī frāy_humad ī frāy_hūxt ī frāy_huwaršt
ud tištar -iz āb pad ayārīh ī awēšān abērtar stanēd ud ristāxēz ud tan ī pasēn mard ī ašō kunēd ī ast sōšāns ī pērōzgar
rašn mēnōy ī rāstīh kē īn ān -iz ī axwaftagīh winnārd estēd
čē mēnōy ī rāstīh rāy ka dēwān wināhgārān gētī dām nē marnǰēnēnd ruwān -iz ī mardōmān pad wināh ud kirbag rašn āmārēnēd
čiyōn gōwēd kū dādwar ī wizīr ī drōw kunēd rašn ānōh gāh nē wēnēd ud srōš ašīy garzīd kū ā -m gētī padiš tang kē rāstīh ānōh nē mehmān
ud aštād -iz ī rāh_nimūdār ī mēnōyān ud gētīyān
zamyād mēnōy ī zamīg
čiyōn gōwēd kū ān se xwarrah pad čīnwar puhl ul estēd kū rašn ruwān āmārēd ud aštād ud zamyād ruwān ō tarāzūg widārēnd
purr_xwarrah pārand ī panǰāh_stārag kē abāg ahlišwang amahrspand sūd dād
čiyōn gōwēd kū pārand ī rawāg_rahī
hamag mēnōyān šnāyišn ud hamag dēwān bēšišn az awēšān mēnōy gāhān yazišn čiyōn az dēn paydāg
ud ēn mēnōyān was nāmčištīg kār awiš paymār čiyōn pad dēn gōwēd kē dōgān kirdan dērang ud hangerdīg ēn and ī nibišt
ohrmazd ud ān šaš amahrspand ī bun hamag amahrspand gōwēd kū amarg ud abzōnīg hēnd ān ī nē menēnd ud nē gōwēnd ud nē kunēnd ēk ōy ī did gōwēnd kū nē abāyēd menīdan ayāb nē abāyēd guftan ayāb nē abāyēd kirdan
ohrmazd dādīh ī dēn ēr_menišnīh ud zēn rāstīh ud kunišn āškāragīh ud kāmag ēn kū ā -m pursēd ud wizōyēd ud āmōxtēd ud šnāsēd čē ka ēdōn kunēd az pas ī man wēš āyēd
gōhr ī ohrmazd garm ud xwēd ud rōšn ud hubōy ī sabuk andar frāz paydāg
abar duškunišn ī ahriman ud dēwān
pad dēn gōwēd kū anāgīh ī ganāg mēnōy ō dahišn ī ohrmazd kirrēnīd estēd pad ēd zamestān bē šāyēd guftan
u -š ān ī kirb wazag_dēs ī nēkīh ī dām ī ohrmazd nē menēd ud nē gōwēd ud nē kunēd u -š kār anāmurzīdārīh ud zadārīh ēn kū dām ī ohrmazd bē abzāyēd ōy bē zanēd ud čašm mizagān az wizend ī dāmān kirdan nē estēd
čiyōn gōwēd kū az ān ka -mān dām dād nē man āsānīhā nišast hēm kē ohrmazd hēm pānagīh ī dāmān ī xwēš kirdan rāy ud nē -iz ōy ī ganāg mēnōy anāgīh ō dām kirrēnīdan rāy
ud pad ǰādūgēnīh mardōm ō dōstīh ī xwēš ud āštīh ī ohrmazd āxēzēd kū dēn ī ohrmazd hilēnd ud ān ī ahriman warzēnd ēn ō menišn ī mardōmān abganēd kū ēn dēn ī ohrmazd nēst ud padiš āstawān nē abāyēd būdan
kē ān mardōm kē -š ēn gōwišn pad dād nihād estēd tis dahēd ēg -iš ganāg mēnawišnāyēnēd kū -š pad rāmišn kird bawēd
akōman kār ēn kū wattar_menišnīh ud anāštīh ō dāmān dādan
indar dēw kār ēn kū menišn ī dāmān az frārōnīh kardan ōwōn afsārēd čiyōn snexr ī xūb afsārd ēn ō menišn ī mardōmān abganēd kē šabīg ud kustīg nē abāyēd dāštan
sāwul dēw kū sālār ī dēwān kār ēn kū dušpādixšāyīh ud stahm ud adādestānīh ud mustkārīh
nānghaiθ dēw kār ēn kū ahunsandīh ō dāmān dahēd
čiyōn gōwēd kū kē tis ō ān mardōmān dahēd kē dād ēn kū šabīg ud kustīg nē abāyēd dāštan ēg -iš indar ud sāwul ud nānghaiθ šnāyēnīd bawēd
tōriǰ dēw ān kē zahr ō urwarān dāmān gumēzēd
čiyōn gōwēd kū tōriǰ ī tarwēnīdār ud zēriǰ ī zahr kerdār
awēšān harw šaš kamālagān dēwān gōwēd abārīgān hamkār ud hamayār ī awēšān hēnd
ēn -iz gōwēd kū kē tis ō mard dahēd kē gōwēd kū ēw mōg_rawišnīh pad gēhān abāyēd dāštan ēg -iš druz šnāyēnīd bawēd
tarōmad dēw tar_menišnīh dahēd
mihōxt dēw druz ī gumānīgīh
arešk dēw druz ī kēnwarīh ud duš_čašmīh
awēšān ham abzār ī hešm dēw hēnd
čiyōn gōwēd kū haft zōr hešm dād kū dāmān padiš bē abesīhēnēd
ud kayān ud wīrān andar zamānag ī xwēš az ān haft zōr šaš bē zanēd ud ēk bē mānēd
ud ānōh kū mihōxt rasēd arešk mehmān bawēd
hešm bun frōd gīrēd
ud ānōh kū hešm bunag dārēd was dām abesīhēnēd ud was awērānīh kunēd
ud hamāg anāgīh ō dāmān ī ohrmazd hešm wēš kirrēnīd
awēšān kayān wīrān duš_kunišnīh ī hešm rāy abērtar wanī būd hēnd
čiyōn gōwēd kū hešm ī xurdruš čē hamāg druš ōy kunēd
wizarš dēw ān kē ruwān ī mardōmān ī widerdagān ān se šab ka pad gētī abāg kōxšēd ud tars ud zanišn abar barēd ud pad dar ī dōšox nišīnēd
ud ōdag dēw ān kē ka mardōm pad xwēš gāhīh nišīnēnd ayāb ka xwarišn xwarēnd mēnōyīhā pad zanēd kū bē drāy ud bē niger kū drāyān xwarēd ud drāyān rīyēd ud drāyān mēzēd mēzēd kū tā ō ān ī pāhlom axwān nē rasēd
akataš dēw druz ī nigerāyīh kē dāmān az tis ī frārōn nigerāy kunēd
čiyōn gōwēd kū kē tis ō ān tan dahēd kē mardōm az tis ī frārōn nigerāy dārēd ēg -iš akataš dēw šnāyēnīd bawēd
kē tis ō ān tan dahēd kē dād ēn kū dastwar nē abāyēd dāštan ēg -iš hešm dēw šnāyēnīd bawēd
kē tis ō ān tan dahēd kē dād ēn kē gōwēd kū mārgen nē abāyēd dāštan ēg -iš ahriman abāg hamist dēwān šnāyēnīd bawēd
ēn ōy rāy gōwēd kū ka xrafstar wēnēd nē ōzanēd
mārgen dār ēw ud čarm ēw pad sar wirāst estēd paydāg kū harw wehdēn ēw ēk ēw ō abāyēd dāštan kū xrafstarān ud wināhgārān padiš zanēnd ud ōzanēnd kirbagōmandtar
zarmān dēw ān kē dušpid kunēd kē pērīh xwānēnd
čišmag ān kē wizendag kunēd ud wād_gerdag -iz kunēd ud ō petyāragīh ī abr šawēd
waran dēw ān kē abārōn_marzišnīh kunēd
čiyōn gōwēd kū waran ī arāh
būšāsp dēw ān kē aǰgahānīh kunēd ud sēǰ ān druz kē abesīhēnišn kunēd ud niyāz dēw ān kē tangīh
āz dēw ān kē tis ōbarēd ka niyāzīh rāy its nē mad estēd az tan xwarēd ān druzīh ast ī ka -š hamāg xwāstag ī gētī bē dād nē anbarēd ud sagr nē bawēd
čiyōn gōwēd kū čašm ī āzwarān ēk ast ī was sāmān nēst
penīh ān dēw kē anbār kunēd ud nē xwarēd ud ō kas nē dahēd
ēn -iz gōwēd kū āz dēw zōr az tan kē pad zan ī xwēš nē hunsand ud ān -iz ī kasān bē appurēd
nas dēw ān kē rēmanīh ud nisruštīh kunēd kē nasā xwānēnd
frēftār dēw ān kē mardōm wiyābānēnēd
spazg dēw ān kē saxwan āwarēd ud barēd tis ēw ī nēst pad homānāgīh
ōwōn gōwēd ud nimāyēd kū mardōm xwad pad xwad zanēd ud abesīhēnēd
anast dēw ān kē zūr gōwēd
aγaš dēw ān druz ī sūr_čašmag kē mardōm pad čašm zanēd
but dēw ān kē -š pad hindūgān paristēnd u -š wāxš pad ān butīhā mehmān čiyōn būdāsf paristīd
astōwihād way ī wattar kē gyān stanēd
čiyōn gōwēd kū ka dast abar mardōm mālēd būšāsp ka -š sāyag abar abganēd tab ka -š pad čašm wēnēd aγaš bē zanēd u -š marg xwānēnd
sūr dēw ān kē mardōm tis ī wēnēnd ud pad nām ī yazadān nē gōwēnd bē wināhēd
awēšān harw ēk was dēw ud druz abāg hamkār hēnd kē paydāgēnīdan gugān dērang
dēwān -iz ī anāmagān pad was maragīh gōwēd awēšān dēwān ī seǰ ud dard_zōrān bēš ud zarīg_dādārān ud xwēš zīwēnīdārān ud tom_tōhmagān ud gandagīh ud pūdagīh ud wattagīh_āwurdārān kē was ud was marag ud was nāmčišt u -šān hamāg andar tan ī mardōmān bahr gumēxt estēd ud pad mardōmān daxšag rōšn
apaoš dēw ud aspenǰarūš dēw ān kē abāg wāān_kerdārān pad kōxšišn estēnd
ganāg mēnōy dād wattarīh ud dēn ǰādūgīh ud zēn druzīh ud kunišn ī nihān_xēmīh u -š kāmag ēn kū ā -m ma pursēd u -m ma šnāsēd čē agar im pursēd ud šnāsēd az pas ī man nē āyēd
ēn -iz gōwēd kū ganāg mēnōy wāng ō γarrānag ud ō -iz kuling ī 6_sālag ud ō -iz wāng ī xar ud ō -iz wāng ī mard ī ahlaw ī ka akāmagōmandīhā zanēd ud wāng kunēd mānēd
kundag dēw ān ī bārag ī ǰādūgān
nōg nōg dēw ān ī nōg nōg az wināh ī dāmān kunēnd awiš ǰahēnd
awēšān -iz abāxtarān ī andar spahr dwārēnd was marag pad kōxšišn estēnd u -šān kamālagān awēšān haftān ud gōčihr sar ud dumb ud mūšparīg ī dumbōmand bawēd dah u -šān ēn dah dahišn ī gētīyīhā ī ast asmān ud āb ud zamīg ud urwar ud gōspand ud ayōxšust ud wād ud rōšnīh ud ātaš ud mardōm pad ēn hamāg wattarīh āhōgēnīd estēnd ud az awēšān ō āb ud urwar ud abārīg dahišn ud az āb ud urwarān rōšnīh ō gyānwarān rasēd čiyōn ēn dah dahišn kē ast gētīyīhā az ān dah druzīh wizend ud bēš ud yask ud marg ud abārīg anāgīh ud āhōgēnišn hamēw rasēd awišān ī -m ōšmurd abāg ayārīh ī abzārōmand gōhr ī ahrimenīg ī sard ud hušk ud sūdīg ud tārī ud gandag andar abrāz paydāg
dōzox rāy gōwēd kū tār ī pad dast šāyēd griftan ud gandagīh ī pad kārd šāyēd brīdan ud agar hazār mard andar widest ēw pādifrāh kunēnd pad ēd dārēnd kū ēk tāg hēnd u -š pādifrāh ēw ēk tāgīh wattar
u -š band ō haftān abāxtarān ī ast ī pad wēš sardīh čiyōn kēwān ud ast ī pad wēš garmīh čiyōn wahrām
u -šān xwarišn gandag ud mūhrišn ī wazaγ ud abārīg anāgīh padēx
abar tan ī mardōm andāzag ī gētī
pad dēn gōwēd kū tan ī mardōmān andāzag ī gētī
čē gētī az āb ēw srešk kird estēd čiyōn gōwēd kū ēn dām fradom hamāg āb ēw srešk būd mardōmān -iz az āb ēw srešk hamēw bawēnd
ōwōn čiyōn gētī pahnā abāg drahnā rāst mardōm -iz hamgōnag
ud harw kas drahnā ud pahnā ēk ī xwēš ast ī pōst čiyōn asmān ud gōšt čiyōn zamīg ud astag čiyōn kōf ud ragān čiyōn rōdīhā ud xōn ī andar tan čiyōn āb ī andar zrēy ud aškom čiyōn drayā ud mōy čiyōn urwar ud ānōh kū mōy wēš rust estēd čiyōn wēšag ud gōhr ī tan čiyōn ayōxšust ud āsn_xrad čiyōn mardōm ud gōšōsrūd xrad čiyōn gōspand ud garmīh čiyōn ātaš ud dast ud pāy abzār čiyōn haftān ud dwāzdahān ud kumīg ī xwardīg_guwār čiyōn abr ud ātaš ī wāzišt ud gyān āwarišn ud barišn čiyōn wād ud ǰigar čiyōn zrēy ī frāxkard ī bun_kadag ī hāmīn ud spihl čiyōn kust ī abāxtar kū āšarišn ī zamestān ud dil ī gerd āb ī ardwīsūr ī awinast čē dil -iz wēmārīh awiš nē rasēd bē agar ka -š marg ud bālist ī sar ud mazg čiyōn asar rōšnīh ud sar čiyōn garōdmān ud dō čašm čiyōn māh ud xwaršēd ud dandān čiyōn stārag ud dō gōš čiyōn rōzan ī garōdmān rāy paydāg kū -š padiš kē hamwār ēwāz ī pad nawāg ī xwaš padiš hamēw āyēd kē ruwān xunyāgīh ud rāmišn aziš ud dō wēnīg ī čiyōn dō damag ī garōdmān rāy gōwēd kū -š padiš hamwār bōy ī xwaš ī gōnag gōnag padiš andar damēd kē ruwān hubōyīh ud urwāhmenīh aziš ud dahān ān darag ī pad garōdmān kē hamwār mizag ī gōnag gōnag padiš andar āyēd kē ruwān čarbīh ud padēxīh aziš ud kūn čiyōn dōzox andar zamīg kūn azērtar nišēm ī tan ud ruwān čiyōn ohrmazd ud ōš ud wīr ud mālišn ud handēšišn ud dānišn ud uzwārišn čiyōn ān šaš amahrspand ī pēš ī ohrmazd estēnd ud abārīg wāxš ī andar tan čiyōn abārīg mēnōyān yazadān
ōwōn čiyōn ohrmazd gāh pad asar rōšnīh ud madārīh ō garōdmān u -š nērōg hamāg gyāg rasīd estēd ruwān -iz gāh pad mazg ī sar ud kadag pad dil ud nērōg pad hamāg tan rasīd estēd
ōwōn čiyōn wād az kustag kustag āyēd mardōm -iz az nēmrōz tā nēmšab wād ud gyān pad wēnīg ēw tāg āyēd ud az nēmšab tā nēmrōz pad kust ī dudīgar āyēd
ōwōn čiyōn xwaršēd az māh rōšntar mardōm -iz pad čašm ēw rāy weh wēnēnd
ōwōn čiyōn āb pad zrēy ī frāxkard ka abar ō hukar ī buland šawēd ud yōǰdahr bawēd bahr -iz abāz ō zrēy rēzēd ud bahr -iz ēw pad paššinǰag pad hamāg gēhān bē rasēd mardōm -iz xōn ī andar tan ī čiyōn kadag pad ǰigar ud harw bāmdād az ǰigar abar ō mazg ī sar āyēd ud andar mazg abāz wardēd bahr ēw abāz ō ǰigar razēd bahr ēw pad ragān bē hilēd kē hamāg tan nērōg aziš bawēd ud ān kaf ī pad sar xwēdīh ī čašm ud gōš ud wēnīg ud dahan aziš bawēd
ōwōn čiyōn gētī war ō nēmrōz u -š xwarwarān dast ī dašn hamāg rōšnān az xwarāsān āyēnd u -š purr_abr az xwarwarān āyēd ī bun_kadag ī abr ast mardōm -iz ǰigar čiyōn bun_kadag ī xōn pad dast ī dašn
ōwōn čiyōn andar gētī mardōm wināh ud kirbag kunēd ud ka mīrēd wināh ud kirbag āmārēnd harw čē abēzag ō garōdmān šawēd ud harw čē druwand ō dōzox abganēnd hamgōnag mardōm -iz xwarišn ī xwarēnd harw čē abēzag ō mazg ī sar šawēd ud xōn pāk bawēd ud ō ǰigar rasēd ud hamāg tan nērōg aziš bawēd harw čē wēš gumēxtag az kumīg ō rūdīg šawēd ī pad niyām bērōn abganēnd ī andāzag ī dōzox
ōwōn čiyōn wārān_kerdārīh ka druz stahmbag bawēd sardīh ī wēš pad āb andar hilēd ud bē afsārēd ud nē wārēd ayāb srešk afsardag tagarg ud ziyān ud wizend pad dāmān bawēd mardōm -iz ka xwarišn wēš xwarēd kū ān ī guwārēd aguwārīd būdan rāy srešk awēzišnīg kunēd ud aguwārdagīh bērōn āyēd ud ziyān ud wizend ī tan aziš bawēd
ōwōn čiyōn ohrmazd bālistīg ud ahriman zōfāyīg u -š agenēn nērōg andar gētī ēk ō did kōxšišnīg mardōm -iz dō wād andar tan ēk wād ī gyānīg ī ast ī ruwān kē -š gāh pad mazg ī sar ud gōhr garm ud xwēd ud rawišn ō nāfag ēk wād ī bazag kē gōhr sard ud hušk ud gāh pad kūn ud rawišn ī ō zard
ōwōn čiyōn dēwān andar gētī ka widargīhā ī wād gīrēnd wizend bawēd mardōm ka ān wād ī bazag andar ragān bē estēd stahmag bē bawēd ud widarg ī wād ī gyānīg nē dahēd ān gyāg dard -iz gīrēd ud tan larzēnēd ud wizandēd
abārīg wāxš ī bazag ī andar tan -iz čiyōn abārīg dēwīg wāxš ī andar gētī
ōwōn čiyōn andar gētī xwarrah ī dēn ī māzdēsnān kustīg homānāg ī star_pēsīd ī mēnōyān_tāšīd andar spahr ǰašt estēd se tāg andar čahār grih ēw kū tārīkīh ud rēmanīh ud abārīg gumēzagīh ō abargar nē gumēzēd mardōm -iz pad hangōšīdag kustīg pad mayān dārēnd se tāg andar čahār grih čiyōn humad ud hūxt ud huwaršt andar čahār čihr ī mardōmīh paydāg ī ast abēzagīh andar gumēzagīh
ōwōn čiyōn andar gētī mardōm wināh ud kirbag kunēnd ud ka murd ruwān āmārēnd wahištīg ō wahišt ud dōzaxwīg ō dōzox dahēnd mardōm -iz andar gētī xwarišn ī xwarēnd harw čē kem_gumēzišnīgtar ō xōn ī pāk bawēd ud pad ragān ī tan šawēd ud harw čē wēš_gumēzišnīgtar pad rūdag spōzēd ud pad niyām bērōn abganēd
hamgōnag tis ī gētī ud mēnōy pad čahār bahr ī haft nihād estēd
čiyōn gōwēd kū haft ī awināh ud agriftār ī ast ohrmazd ud ān ī šaš amahrspand bun ud haft ī wināh ud agriftār ī ast čiyōn xwaršēd ud māh ud stāragān ud abr ud wād ud ātaš ī wāzišt ud ādurān kē widarg widerēnd ud druz zanēnd ud haft ī awināh ud griftār ī ast čiyōn asar rōšnīh ud gāh ī amahrspandān ud garōdmān ud asmān ud haft ī wināh ud griftār ī ast čiyōn zamīg ud āb ud urwar ud gōspand ud ayōxšust ud handēšišn ud uzwārišn mardōm iz... haft ī awināh ud agriftār ī ast dō gōš ud dō čašm ud dō wēnīg ud dahan ud haft ī wināh ud agriftār ī ast ǰigar ud sušag ud zahrag ud dil ī gerdag ud rūdīg ud spihl ud gurdag ud haft ī awināh ud griftār ī ast ī gētī
ān rāy wiyābān wēš kū ābādān kū tā tārīkīh ud sarmāg ud abārīg dēwīg abzārān ka -šān az mēnōyān yazadān zanišn rasēd pad stōwīh ud wiyābānīhā dwārēnd ud az dāmān wizend wardēnd
čē ka hamāg gēhān ābādānīh būd hē agar -išān was -iz zad ud stō kird hēnd hē az dāmān wizendīh bērōn nē šud hēnd hē čē -šān nē tuwānist hē šudan
andāzag ī hāmīn ud zamestān ud tārīkīh ud rōšnīh čē az ānōh kū rōšnīh tārīkīh wirēzēd ō gyāg_gāh ī rōšnīh ānōh nēst
ud ka az nēmrōz_rōn hāmīn andar āyēd damestān abāz ō abāxtar_rōn dwārēd
ud ka zamestān andar āyēd hāmīn abāz ō nēmrōz šawēd ī bun_kadag ī xwēš
ud ka hāmīn pad zōrtar zamestān nizōrtar ud ka zamestān pad zōrtar hāmīn nizōrtar
mardōm -iz hamgōnag ka ǰigar pad zōrtar sperz nizōrtar ud ka sperz pad zōrtar ǰigar nizōrtar
dēwān xwāhišn ud ōnāmišn ānōh kū wourubaršn ud vouruǰaršn kišwar ud az ānōh andar āyēd ud bē dwārēd
ēn -iz paydāg kū harw pēšag ēw ī mardōmān mēnōy ēw xwēš
gyān harw rōšnīh abāg gyān ōš ud bōy ud abārīg ī az ēn mar ohrmazd xwēš gōšt wahman rag ud pay ardwahišt astag šahrewar mazg spandarmad xōn hordad mōy amurdad xwēš
abar radīh ī kišwarān
gōwēd pad dēn kū ān šaš radīh kišwarān harw ēk ēw rad ēw ast
čiyōn arzah rad ašāšagahtē nēvandān ud sawah rad hōazarodāxhr xwaparēštaro fradadafš widadafš rad spitoid uspōsēnān aērēčrasp usposēnā wōrūbaršt rad hwāsp wōrūǰaršt rad čaxrāvāi
zarduxšt kišwar xwaniras ud harwisp -iz ahlawān stīy rad kū -šān hamāg dēn az zarduxšt padīrift
ud andar kišwar ī xwaniras was gyāg ast kē -š andar ēn wad_zamānagīh ud stahmag_kōxšišn ī petyārag pad mēnōyīg nērōg widarg aziš bast estēd āwahan ī xwaniras xwānīhēd
hangōšīdag ān kišwarīhā ī dudīgar čiyōn kang_diz ud zamīg sōkawestān ud dašt ī tāzīgān ud dast ī pēšyānsīy rōd ī nāydāg ud ērānwēz ud war ī ǰam_kerd ud kašmir ī andarrōn ī u -š rad ēw ahōš andar pādixšāyīh kunēd
čiyōn gōwēd kū pišōtan ī wištāspān kē čihrōmān -iz xwānēnd pad kang_diz ī bāmīg
aγrērad ī pašangān pad zamīg ī sōkawestān u -š gōbedšāh xwānēnd
fradaxšt ī xumbīgān pad dašt ī pēšyānsīy
ēd rāy xumbīgān kē -šān bīm ī hešm rāy andar xumb ēw parward ašǝm yahmāi ušta pad gyāg ēw kē rōd ī nāydāg xwānēnd
wan ī ǰud_bēš pad ērānwēz
urwatandar ī zarduxštān pad ǰam_kerd war
awēšān -iz rāy gōwēd kē ahōš hēnd čiyōn narsē ī wiwanghānān ud tūs ī nōdarān
ud gīw ī gōdarzān
bairazd ī kōxšišn_kerdār
ud ašawazd ī pus ī pourudāxštān
awēšān hamāg pad frašīgerd_kerdārīh bē ō ayārīh ī sōšyans bē rasēnd
sām rāy gōwēnd kū ahōš būd pad ān ka -š tar_mēnīd dēn ī māzdēsnān turk ēw kē nōhīn xwānd ka xuft estād pad tigr bē winast
ud ānōh pad dašt ī pēšyānsīy u -š ān ī abārōn būšāsp abar burd estād
ud mayān ī darmag nibast u -š wafr azabar nišast estēd pad ān kār kū ka azdahāg harzag bawēd ōy āxēzēd u -š bē zanēd
u -š bēwar frawahr ī ahlawān pad pānagīh hēnd
dahāg rāy kē bēwarasp -iz xwānēnd gōwēd kū frēdōn ka -š ōy bē grift pad kuštan nē šāyist u -š pas pad kōf ī damāwand bē bast
ka harzag bawēd sām āxēzēd u -š zanēd ud ōzanēd
kang_diz pad kust ī xwarāsān azabar ī zrēy ī frāxkard ō ān kustag pad was frasang
dašt ī pēšyānsīy pad kāwarestān
čiyōn gōwēd kū bālist ī paydāgtom pad kāwarestān kū pēšyānsīy ud ānōh darmag pad bālāy bulandtar nēst
ērānwēz pad kustag ī ādurbādagān
zamīg ī sōkawestān pad rāh ī turkestān ō čīnestān pad kust ī abāxtar
war ī ǰam_kerd mayān ī pārs pad sarwāg
ēdōn gōwēnd kū war ī ǰam_kerd azēr ī kōf ī damagān
kašmīr andar hindūstān
abar čīnwār puhl ud ruwān ī widerdagān
gōwēd pad dēn kū čagād ēw ī sad mard bālā mayān ī gēhān kē čagād ī dāytīy xwānēnd ǰuγ ī tarāzūg ī rašn_dād tēx ēw pad bun ī kōf ī harborz pad kust ī abāxtar ud tēx ēw pad sar ī kōf ī harborz pad kust ī nēmrōz mayān abar ān čagād ī dāytīy estēd
pad ān mayān gyāg ēw ī tēz ī šafšēr homānāg estēd kē -š nō nēzag drahnā ud pahnā
ud ānōh estēd mēnōyān yazadān kē mēnōyīgīhā ruwān ī ahlawān yōǰdahrēnēnd ud sag ēw mēnōyīg pad sar ī ān puhl ud dōšox azēr ān puhl
ka mardōm bē widerēnd se šab ruwān pad nazdīk ī tan ānōh kū -š sar būd nišīnēd
ān šab az wizariš dēw ud hamkārān was awištābišn wēnēd hamēw pušt abāz ō ātaxš kunēd ī ānōh abrōxt estēd
ēd rāy ān se šab tā rōz ānōh kū -š sar bawēd ātaxš pad abrōzišn dārēnd
ud ka ān ātaxš nēst pušt abāz ō ātaxš ī warahrām ayāb ātaxšān hamabrōgōmand kunēd
andar ān se šab ka kirrēnišn ud wišōbišn ō tan rasēd ēg -iš ēdōn dušxwār sahēd čiyōn mard ēw ka -š -mān kanēnd
ān se rōz ruwān pad bālēn ī tan pad ān ēmēd nišīnēd kū bawēd ka xōn tazēd ud wād ō tan šawēd ō abāz šudan tuwān bawād
ud pas šab ī sēyom andar bāmīy agar ān ruwān ahlawān ēn gōwēd kū nēk ōy kē az ān ī ōy nēkīh kadār -iz ēw kū man nēk az nēkīh ī man harw kas nēk
u -m ohrmazd pad kāmag_xwadāyīh dād
ud agar ān ruwān druwand gōwēd ēn ān tan gyān kirb kē -š abāg pad dwārišn dwārīd hēm pas az ēdar ō kū dwārēm
ud agar ahlaw tēz pad ān gōwišn wād ēw padīrag āyēd ī weh ud nēktar ud hubōytar pērōzgartar az hamāg wādān ī pad gētī kē ruwān bē urwāhmenēd
ud agar druwand wād ēw padīrag āyēd gandagtar ud pūdagtar apērōzgartar az hamāg wādān pad gētī kē ruwān dušrāmīh pēm rasēd
pas barēnd agar ān ruwān ō hamāg kē ahlaw kē -iz druwand
agar ān ruwān ī ahlaw andar rāh ēg -iš gāw_kirb ō padīrag rasēd ī frabih purr_pēm kē ruwān aziš padēxīh ud čarbīh rasēd
did kanīg_kirb padīrag rasēd hukirb ī spēd_wastarg ī pānzdah sālag ud kē az hamāg kustag nēkōg kē ruwān padiš šādīhēd
did bōstān_kirb rasēd purr_bar purr_āb purr_mēwag purr_padēx kē ruwān urwāhmenīh ud padēx_menišnīh rasēd
ast būm ī wahištīg
ēn pēš az āmār daxšag pad gēhān wēnēd
ast kē ān ruwān ēk ēk pursēd ka -š padīrag bawēd pursēd kū tō kē hē kē man ēdōn sahēd kū -t harwisp xwārīh ud āsānīh padiš
ēdōn awēšān ēk ēk passox gōwēnd man ham ahlaw dēn ī tō ān kunišn ī -t warzīd ka tō ān nēkīh kird
man tō rāy ēdar būd ham
agar ān ruwān ī druwand ēg -iš gāw_kirb ō padīrag rasēd hušk ī nizār ī sahmgen kē ruwān huškīh ud ačarbīh rasēd
did kanīg_kirb padīrag rasēd sahmgen ī duškirb kē -š tar_menišnīh nihuft estēd az hamāg kustag sahmgen kē ruwān aziš bīm ud tarsišn rasēd
did bōstān_kirb rasēd abē āb ī abē draxt ī abē xwārīh kē ruwān dušmenišnīh rasēd
ast ī būm ī dōšoxtīg
ēn pēš az āmār daxšag wēnēd
ast kē awēšān ēk ēk pursēd kū tō kē hē kē man az tō anāgtar pad gēhān nē dīd
passox ō ōy gōwēd kū ay druwand man dēn ī tō kē -t xwēš kunišn ham ka tō ān ī wattar warzīd
ēdar tō rāy būd ham
ay paydāg kū harw kas kunišn ī xwēš padīrag bawēd
pas ān ruwān rāyēnēnd tā bun ī kōf ī harborz kū tēx -iz ī ǰuγ abar ān rawēd tā bālist ī čagād ī kū ān tēx ī tēz estēd
pas agar ahlaw ān tēx ī tēz pad pahnā bē estēd
ādur ī farnbay ī pērōzgar tārīkīh bē zanēd pad ātaxš_kirb ān ruwān pad ān tēx widārēd u -š ān mēnōyān yazadān yōǰdahrēnēnd mēnōyīhā pad ǰuγ ī dudīgar widārēd tā ō bālist ī harborz u -š way ī weh dast abar gīrēd ō gyāg ī xwēš barēd čiyōn ān ka ruwān padīrēd ānōh abespārēd
tan -iz ka pad gētī yōǰdahrēnēnd pad ān hangōšīdag ī mēnōyīg
agar ān ruwān druwand ka pad ǰuγ abar ō čagād āyēd ān tēx ī tēz pad ham tēx bē estēd ud widarg nē dahēd
u -š akāmagīhā abar ham tēx raftan abāyēd
pad se gām ī frāz nihēd ī ast ī dušmad dušhūxt ud dušxwaršt ī -š warzīd estēd frōd brīnēd az sar ī puhl sar_nigōn ō dōšox ōbadēd ud wēnēd harw anāgīh
ēn -iz gōwēd kū kē pad rādīh ahlaw būd estēd ka -š ān wād ō padīrag rasēd andar ān wād kanīg_kirb wēnēd
ān pursišn kunēd ud ān kanīg pad rāh_nimāyīh ō sard ēw barēd kē -š se pāyag padiš ud pad ān sard ō garōdmān šawēd pad se gām ī ast ī humad hūxt huwaršt
nazdist gām tā ō star_pāyag dudīgar tā ō māh_pāyag ud sidīgar tā ō xwaršēd_pāyag kū garōdmān rōšn
agar pad pēnīh druwand būd estēd ka -š wād padīrag bawēd andar ān kanīg_kirb rasēd ud ān pursišn kunēd ast ān ī kunišn tēx ī tēz homānāg wardēd kē hamāg tēx ī tēz ō ān ruwān gōwēd kū druwand ka -t kāmag ka -t nē kāmag abar ēn pad gām raftan abāyēd
ēg ruwān gōwēd kū agar im pad kārd ī was tēx brīnē weh sahēd kū pad gām abar ēn rawom
dudīgar bār hamēwēnag gōwēd
ruwān passox gōwēd kū agar im pad tigr bē zanē weh sahē kū abar ēn pad gām rawom
sidīgar bār hamēwēnag gōwēd
ōy passox gōwēd kū agar im gyān az tan bē zanē weh sahē kū abar ēn pad gām rawom
’yww’t ān kunišn dad ēw sahmgen ī nē dast_āmōg homānāg bawēd pēš ī ruwān bē estēd
ān ruwān ōwōn tarsēd kū abar ān pad gām rawēd ud pad se gām frōd brīnēd ō dōšox ōbadēd
kē -š wināh ud kirbag harw dō rāst ēg -iš ō hamēstagān dahēnd
hamēstagān rāy gōwēd kū gyāg ēw čiyōn gētī homānāg
harw kas pad ān pāyag ī -šān kirbag gyāg dahēnd
abar šahrīhā ī nāmčištīg az ērānšahr ud -mān ī kayān
pad dēn gōwēd kū agar man nē dād hē mēnōy ī būm ud deh harwisp mardōm bē ō ērānwēz šud hēnd hē xwašīh ī ānōh rāy
čē fradom az gyāgān ud rōdestāgān pahlom ērānwēz brēhēnīd
was petyārag ī az ganāg mēnōy īn wēš abar mad damestān ī dēwān_dād ud mār ī pad parrag ud ān -iz ī nē pad parrag
dah māh ānōh damestān ud dō māh hāmīn
čiyōn gōwēd kū hāmīn ud damestān hamag gyāg ēwtom bē ānōh grāntar bawēd andar mayānag ī day māh ī wihēzagīg
dudīgar pahlom dād dašt ī sūrīg mānišn kū -š sūrīg padiš mānēnd ī ast bagdād ī bayāndād
u -š petyārag malax wattar ǰast hamwār malax gīyā bē xwarēd ud gōspandān ud gāwān margīh rasēd
sidīgar pahlom dād marw ī kerdār kū -š kār ud dādestān was nām kunēd
u -š petyārag spāh_rawišn wēš mad čē hamwār axwārān ānōh wēš kunēnd dūšag marz duzzān ud stahmagān ud ašomoγān ud anāst_gōwišnān ud ašō_bēšān
čahārom balx pahlom dād nēk pad dīdan mardōm ī ānōh drafš pad tuxšāyīh dārēnd
u -š petyārag sūrag wēš mad xānag sūrag ul kanēd ud bē ham bāyēd
panǰom nisā ī andarg marw ud baxl dād
u -š petyārag īn wēš mad gumānīgīh pad tis ī yazadān
šašom harēy pahlom dād
u -š petyārag īn wēš mad šēwan ud mōyag_kunišnīh ēk gōwēd ud abārīg stanēnd pad čand ud čēgāmag
čiyōn gōwēd kū harēy ī wiš_hil čē xānag ka -š tanēw andar bē widerēd bē hilēnd ud bē šawēnd ēdōn čiyōn amāh nō šab ud māh dranā pad pahrēz dārēm awēšān xānag bē hilēnd ud bē šawēnd tā nō šab ud māh dranā
haftom kāwar ī duš_sāyag pahlom dād ī ast kāwarestān ay sāyag ī draxtān ānōh pad tan wad
u -š petyārag parīg_kāmagīh wēš mad ān dēwēzagīh ī sām hamēw kird awēšān -iz hamēw kunēnd ast kē wišād_dwārišnīh gōwēd
aštom masān pahlom dād purr_wāstar kū -š ǰōrdāg was bawēd
u -š petyārag wattar wēš mad čē masānīgān abar mānēnd ud mardōm pad ēwkardagīh az awēšān wattar nēst
nohom xǝnǝn pahlom dād gurgānīg_mānišn kū -š awēšān padiš mānēnd xānīg rōd āmār ud abārīg dašt āmār
u -š petyārag wattar kunišn ī anbuhlagān mad kū mardōm wīftagīh ī ān gyāg wēš kunēnd ast ī kūnmarz gōwēnd
dahom armin pahlom dād
u -š petyārag nasā_nigānīh wēš mad kū ānōh wēš kunēnd
yāzdahom hēdōmand ī rāyōmand ī xwarrahōmand sagestān pahlom dād
u -š petyārag ǰādūgīh ēd ī wēš mad
u -š daxšag az ēd paydāg kū harw mardōm ī az ān gyāg bē āyēnd kū hrw kas ēw daxšag ēw ōh kunēnd
az awēšān ǰādūgān saxwan sangzār ud tagarg ud tanand ud malax ōftēd
dwāzdahom rag ī 3_tōhmag pahlom dād ī ast ādurbādagān ēd rāy 3_tōhmag gōwēd čē āsrōn artēštār ud wāstaryōš ān gyāg weh bawēd
u -š petyārag ān ī wattar gumānīgīh ī pad tis ī yazadān xwad gumānīg hēnd ud kasān -iz gumānīg kunēnd
sēzdahom wahār ī sūd_xwāstār pahlom dād kē ast ī mēzan
u -š petyārag nasā_pazišnīh ud nasā_ǰōyišnīh wēš mad
hamwār rōbāh ud rasūg pazēnd ud ǰōyēnd
čahārdahom war ī čahārgōš pahlom dād ast ī dunbāwend
u -š čahārgōšīh ēd kū čahār sōy ast ī gōwēd kū az čahār sar ī deh āb andar ō šahr āyēd
u -š petyārag ān ī abārōn daštān wēš bawēd kū ānō grātar ud wattar bawēd
u -š anērān dehān padiš mānēnd
pānzdahom haft hindūgān pahlom dād
hindūgān ēw bē -š sar_xwadāy haft andar hēnd
u -š petyārag abārōn garmīh ud gerā daštān wēš mad
šānzdahom ōdā ārang pahlom dād hunušk ī tāzīgān odā
u -š petyārag ēn wēš mad kū -š sālār pad sālār nē dārēnd ud ud zamestān -iz ānōh gilā bawēd
u -š tāzīg abar mānēnd
ān ī nēk pad dīdan ud zofr pad kār ud dādestān ud abāyišnīg u -š kār ud dādestān was andar pursēnd ī andar hēnd kē pārs gōwēd
ēn šahrīhā ī andar ērānšahr nāmčištīgtar hēnd
abar mānīhā ī kayān kird pad xwarrah kē abdīhā ud škeftīhā gōwēnd
ēk ān ī ǰam kird pad hariborz
ēk ān ī frēdōn kird pad padišxwārgar pad war ī čahārgōš ī dunbāwend
ēk ān ī kay us kird pad hariborz
ēk ān ī dahāg kird pad bābēl kē kuling dušit xwānēnd
ēk ān ī siyāwaš ī kay usān kird kē kang_diz xwānēnd
ēk frāsyāb ī tūr ī ǰādūg kird azēr ī zamīg pad ǰādūgīh
ēk ān ī ǰam kird pad pārs kē ǰamkerd gōwēnd
ēk ān ī dahāg kird pad šambarān ud ēk pad hindūgān
ēn ān ī pad abd_kerdīh kird estād tā abārīg was šahr ud šahrestānīhā ud mānīhā kird hēnd kē gugān dērang
ǰamkerd rāy gōwēnd kū azēr ī zamīg pad nihuftagīh -mān sāxt ast ī abd ī rōšn kē hāmīn ud zamestān nē tarwēnēd u -š az harwisp xīrān ī pad gētī andar
-mān ī kay us rāy gōwēd kū ēk zarrēn būd ī -š abar nišast dō ābgēnagēn būd ī -š aspestān ud dō pōlābdēn būd ī -š ramag u -š harw mizag ud xānīg ud anōšag āb aziš tazīd kē zarmān tarwēnēd kū ka zarmān mard pad ēn darag andar šawēd aburnāg ī pānzdah_sālag pad ān darag bērōn āyēd ud marg -iz bē zanēd
kang_diz rāy gōwēd kū dastōmand ī pāyōmand ud stī_rawāg ī hamēšag_wahār pad kamāl ī dēwān būd
kay husrōy bē ō zamīg nišāst u -š haft frasp ī ast zarrēn ud āsēmēn ud pōlābdēn ud brinǰēn ud āhenēn ud ābgēnēn ud kāsagēn u -š 700 frasang ristagān mayān u -š pānzdah darag padiš kē az darag ō darag pad asp ēw ī rahī ud rōz ī wahārīg pad pānzdah rōz šāyēd šudan
-mān ī frāsyāb rāy gōwēd kū azēr ī zamīg pad ǰādūgīh kird estēd pad rōšnīh ī -mān šab čiyōn rōz rōšn būd u -š čahār rōd andar tazīd ēk āb ud ēk may ud ēk šīr ud ēk māst ī zadag xwaršēd gāh ud māh gāh pad rawišn andar ārāst estēd hazār mard ī mayānag_ bālāy ī -mān būd
-mān ī ǰam pad hariborz gōhrān būd
-mān ī dahāg pad bābēl kuling homānāg būd
abar wizend ī hazārag hazārag ō ērān_šahr mad
ka ganāg mēnōy andar dwārist pad bun nazdist hazārag ī andar gumēzišnīh gāw ud gayōmard būd hēnd
ka mašī ud mašyānī ān huspāsīh kird panǰāh sāl ēg -išān zāyišn aziš nē būd
andar ham hazārag pad haftād sāl hōšang ud tahmūraf harw dō dēwān bē ōzad
andar hazārag sar dēwān ǰam kirrēnīd
dudīgar hazārag bun būd ažidahāg dušxwadāyīh abar kerd.26 sad sāl bē kird
čiyōn hazārag sar būd frēdōn grift bast
sidīgar hazārag bun būd ka frēdōn kišwar baxt salm ud tūz ēg -išān ēriǰ ōzad frazendān ud āwādagān abesīhēnīd
andar ham hazārag mānuščihr zād ud kēn ī ēriǰ xwāst
pas afrāsyāb āmad
mānuščihr abāg ērānagān ō padišxwārgar spōxt pad sēǰ niyāz ud was margīh abesīhēnīd frīy nōdar ī mānuščihr pus ōzad tā pad anī paywand ērānšahr az afrāsyāb stad
ka mānuščihr uzīd būd did afrāsyāb āmad ērānšahr was wišōbišn ud awērānīh padiš kird
wārān az ērānšahr abāz dāšt tā uzaw ī tahmāspān mad afrāsyāb spōxt ud wārān kird ī -šān nōg_wārānīh xwānd
ud pas az uzaw did afrāsyāb garān anāgīh pad ērānšahr kird tā kawād ō xwadāyīh nišast
andar xwadāyīh ī kāyus andar ham hazārag dēwān stahmag būd hēnd ud ōšnar ō ōzanišn mad ud menišn ī wiyābānēnīd tā ō kārēzār ī asmān šud sarnigōn ōbast xwarrah aziš appār būd
pas pad asp ud mard gēhān anastān kird u -šān pad būm ī šambarān pad frēb abāg paydāgān ī kišw27 bast hēnd
ēk ēw ī zēnīgāw xwānēnd kē -š zahr pad čašm dāšt az tāzīgān ō xwadāyīh ī ērānšahr āmad
harw kē -š pad duščašmīh padiš nigerīd bē ōzad
33.10 ērānagān frāsyāb pad xwāhišn xwāst ud daštan ōy zēnīgāw ōzad xwadāyīh ērānšahr kird
was mardōm az ērānšahr burd
pad turkestān nišāst ud ērānšahr awērān kird wišuft tā rōstahm az sagestān sepāh ārāst ud šambarānīhā grift
kāyus ud abārīg ērānagān az band wišād
abāg frāsyāb pad hwlyk rōdbār kē spāhān xwānēnd kārēzār kird
az ānōh stōwīh būd ud was kārēzār dudīgar abāg kird tā spōxt
ō turkestān abgand
ērānšahr az nōg ābādānēnīd
yāzdah did frāsyāb kōxšīd kay siyāwaxš ō kārēzār āmad
pad āhōg ī sūdābī ī zan ī kay kāyus siyāwaxš abāz ō ērānšahr nē šud pad ēd ī frāsyāb čiyōn -iš padiš zēnhār padīrift estād ō kay kāyus nē āmad bē xwad ō turkestān šud
duxt ēw ī frāsyāb pad zanīh grift
kay husrōy aziš zād
siyāwaxš ānōh ōzad hēnd
andar ham hazārag kay husrōy frāsyāb ōzad
xwad šawēd ō kang_diz
xwadāyīh ō luhrāsp dād
ud ka wištāsp_šāh sī sāl xwadāyīh kird būd hazārag sar būd
pas hazārag ī čahārom bun būd
andar ān hazārag zarduxšt dēn az ohrmazd padīrift āwurd wištāspšāh padīrift rawāg kird
abāg arzāsp kārēzār ī škeft kird
ērān ud anērān wasīhā absist28 hēnd
andar ham hazārag ka xwadāyīh ō wahman ī spandyādān mad wērān būd ērānagān xwad pad xwad absist hēnd
ud az tōhmag xwadāyīh kas nē mānd kē xwadāyīh kird hād
u šan humā ī wahman duxt pad xwadāyīh nišāst
pas andar xwadāyīh ī dārā ī dārāyān aliksandar kēsar az hrōm dwārist ō ērānšahr āmad
dārā ī šāh ōzad
hamāg dūdag ī xwadāyān mowmardān ud paydāgān ērānšahr abesīhēnīd
was marag ātaxš afsārd dēn ī māzdēsnān zand stad ō hrōm āmad abestāg sōxt ērānšahr pad nawad kadag_xwadāy baxt
pas andar ham hazārag ardaxšahr ī pābagān ō paydāgīh āmad
ān kōdag xwadāyān ōzad xwadāyīh winnārd dēn ī māzdēsnān rawāgēnīd ēwēn ī was wirāst
pad tōhmag ī ōy raft
andar xwadāyīh šābuhr ī ohrmazdān tāzīgān āmad hēnd u -šān hurīy rōdbār grift
was sāl pad ēwār tāzišn dāšt tā šābuhr ō xwadāyīh mad awēšān tāzīgān spōxt šahr aziš stad was šāh tāzīgān abesīhēnīd was maragīhā -šān kušt29
andar xwadāyīh pērōz ī yazdgerdān šaš sāl wārān nē būd
mardōm anāgīh ud saxtīh ī garān rasīd
did ’šnw’č ī hayftālān xwadāy āmad ud pērōz ōzad kawād ud xwah ātaxš ēw pad grawagān ō hayftālān burd
andar xwadāyīh kawād mazdak ī bāmdādān ō paydāgīh mad dād ī mazdakīh nihād
kawād frēft ud wiyābān kird
zan ud frazend ud xwāstag pad hamīh ud ham bāyīh abāyēd dāštan framūd
dēn ī māzdēsnān az kār dāšt tā anōšag_ruwān husrōy ī kawādān ō parnāyīh mad mazdak ōzad dēn ī māzdēsnān winnārd ud awēšān xyōnān kē -šān asptāg ō ērānšahr hamēw kird spōxt ud widarg bast ud ērānšahr abēbīm kird
ud ka xwadāyīh ō yazdgerd mad wīst sāl xwadāyīh kird
ēg tāzīgān pad was maragīhā ō ērānšahr dwārist hēnd
yazdgerd pad kārēzār abāg awēšān nē...30 ō xwarāsān ud turkestān šud asp ud mard ayārīh xwāst u -šān ānōh ōzad
26 pus ī yazdgerd ō hindūgān šud spāh gund āwurd pēš az āmadan ī ō xwarāsān uzīd ān spāh ud gund wišuft ud ērānšahr pad tāzīgān mānd
u -šān ān ī xwēš dād ag dēnīh rawāgēnīd ud was ēwēn ī pēšēnīgān wišuft
dēn ī māzdēsnān nizārēnīd nasā_šōyišnīh ud nasā_nigānīh ud nasā_xwarišnīh pad kardag nihād
az bun_dahišn tā im rōz anāgīh az ēn garāntar nē mad čē duškunišnīh awēšān rāy niyāz ud awērānīh ud must_kunišnīh ud wad_dādīh ud wad_dēnīh rāy sēǰ ud niyāz ud abārīg anāgīh mehmānīh kird estēd
28 pad dēn gōwēd kū duš_pādixšāyīh awēšān sar kāmēd būdan
grōh ēw āyēnd suxr_nišān suxr_drafš ud pārs ud rōstāgīhā ī ērānšahr tā bābēl gīrēnd
awēšān tāzīgān nizār kunēnd
pas ēk ēw az kust ī xwarāsān āyēd wad_mard
awēšān padišxwārgarīgān spōzēd
sāl ēw čand dušpādixšāyīh kunēnd
pad sarīh ōy ī andar pārs mardōm bē abesīhēnd
bē huzārag ī pad kāzrūn drayā bārīhā tā bē nē mānēd az ān
pas xyōn turk ī pad was marag ud was drafš andar ērānšahr dwārēnd ēn ērānšahr ābād hubōy awērān kunēnd
ud was dūdag ī āzādān wišōbēnd was anāgīh must pad mardōmān ī ērānšahr kunēnd was mānīhā kanēnd wišōbēnd gīrēnd tā yazadān abaxšišn kunēnd
ka rōmīg rasēnd ēk sāl pādixšāyīh rāyēnēnd ān hangām az kust ī kāwarestān ēk ēw āyēd kē -š xwarrah padiš az ham dūdag ī bayān kay wahrām xwānēnd
ud hamāg mardōm abāg ōy abāz bawēnd ud pad -iz hindūgān hrōm ud turkestān hamāg kustag ī pādixšāyīh kunēd
abārōn_gurawišn ī ul dārēnd dēn ī zardušt winnārd ud kas pad ēč gurawišn ō paydāgīh nē tuwān āmadan
andar ham nihang pišyōtan ī wištāspān az kang_diz āyēd abāg 150 mard ahlawān
ān uzdēsčār ī rāz_gāh ī awēšān būd bē kanēd ātaxš ī wahrān pad guharīg nišānēd dēn hamāg drust gōwēd winnārēd
pas panǰom hazārag ī ušīdarān bun bawēd
33.35 ušīdar ī zarduxštān pad dēn nimūdār ud rāst payγāmbar az ohrmazd āyēd
čiyōn zarduxšt āwurd ōy -iz dēn āwarēd
tangīh ud huškīh kāhēd rādīh ud āštīh ud akēnīh ud hamāg gēhān waxšīhēd
se sāl ō urwarān zargōnīh dahēd ud rōd ī vātaēni asp_zahā bē tazēd ud čašmagīhā ud zrēy ī kayānsēy abāz tazēd
dah rōz šab xwaršēd pad bālist ī asmān bē estēd ud gurg sardagān hamāg bē abesīhēnd
36 pas ka hazārag ī ušīdar sar bawēd malkūs sēǰ_čihr ī az tōhmag ī tūr ī brātrōrēš ī ōš ī zardušt būd ō paydāgīh rasēd pad ǰādūg_dēnīh ud parīg_kāmagīh sahmgen wārān ī malkūsān xwānēnd kunēd
se sāl pad zamestān ud ān ī sard pad hāmīn ān ī garm
abāg amar wafr ud tagarg ī dahišn abesīhēnīdār ōwōn ī hamāg mardōm bē huzārag ēnyā bē abesīhēnd
ud pas abāz ārāyišnīh ī mardōm ud gōspand az war ī ǰamkerd bawēd
ēn kār rāy pad nihuftagīh estēd
37 ēn -iz kū pad ān hangām bēšāzišnīh andar hazār sardag urwar ī pad hamēstārīh hazār sardag wēmārīh dād estēd bē ō dō sardag urwar ēk sardag zamīg rasēd ud kas pad wēmārīh nē mīrēd bē pad zarmānīh ayāb ōzanēnd
ud pas šašom hazārag ī ušīdarmāh bun bawēd
xwānīhēd hazārag ī ušīdarmāh
ud pad ān hazārag ušīdarmāh ī zardušt pad paygāmbarīh az ohrmazd āyēd čiyōn zarduxšt dēn āwarēd andar gēhān rawāgēnēd
wīst rōz šab xwaršēd pad bālist ī asmān estēd
šaš sāl ō urwarān zargōnīh dahēd
ān ī āz_tōhmag druz abesīhēd
kū mār abāg xrafstarān bē abesīhēd
pas nazd ō hazārag sar ī ušīdarmāh dahāg az band harzag bawēd bēwarāsp was dām_dahišn pad dēw_kāmagīh wināhēd
ud andar ān hangām sōšāns ī zarduxšt ō paydāgīh āyēd
sī rōz ud šab xwaršēd pad bālist ī asmān bē estēd
nazdist az gētīyīgān rist sāmān garsāsp ul hangēzēnd bēwarāsp pad gad zanēd ōzanēd az dāmān abāz dārēd
hazārag ī sōšāns bun bawēd čiyōn hazārag ī ōy tan_kerdār 55 sāl
ān se pus ī zarduxšt čiyōn ōšīdar ud ōšīdarmāh ud sōšāns rāy gōwēd kū pēš kū zarduxšt bē guft ēg -išān xwarrah ī zarduxšt andar zrēy ī kayānsēy pad nigāhdārīh ō ābān xwarrah ī ast anāhīd yazad abespārd
nūn -iz gōwēnd kū se čarāg ī andar bun ī zrēy ī waxšīd pad šab hamēw wēnēnd
ud ēk ēk ka -šān zamānag xwad rasēd ēdōn bawēd kū kanīg ēw sar šustan rāy ō ān āb ī kayānsēy šawēd uš xwarrah andar ō tan gumēzēd ābestan bawēd awēšān ēk ēk pad zamānag ī xwēš ēdōn zāyēnd
abar ristāxēz ī tan ī pasēn
gōwēd pad dēn kū az ān čiyōn mašī ud mašyānī ka az zamīg abar rust hēnd nazdist āb pas urwar ud pas šīr pas gōšt xward hēnd
mardōm -iz ka -šān murdan nazdist gōšt ud šīr ud pas az nān xwardan bē estēnd
ud ēwāz tā bē murdan āb xwarēnd
ēdōn -iz pad hazārag ī ušīdarmāh nērōg ī abāyīdan bē kāhēd kū mardōm pad ēk pih xwarišnīh se šab rōz pad sagrīh estēnd
pas az ān az gōšt xwarišnīh estēnd
urwar ud pēm gōspandān xwarēnd
ud pas az ān az pēm_xwarišnīh -iz estēnd
pas az urwar_xwarišnīh -iz estēnd ud āb_xwarišn bawēnd
pēš pad dah sāl ka sōšāns āyēd ō a xwarišnīh estēnd ud nē mīrēnd
pas sōšāns rist ul hangēzēnēd
čiyōn gōwēd kū zarduxšt az ohrmazd pursīd kū tan ī wād wānēd āb wāzēd az kū ul kunēnd ud ristāxēz čiyōn bawēd
u -š passox kird kū asmān abē stūn pad mēnōy_estišnīh dūr_kanārag rōšn ud az gōhr xwēnāhen ud ka -iz im zamīg dād kē hamāg axw ī astōmand barēd u -š abar dāštārīh ī gētī nēst
ka -m xwaršēd ud māh ud stārag andar andarwāy rōšn_kirbīh wāzīd hēnd ud ka -m ǰōrdāg dād kū andar zamīg bē fraganēnd ud abāz rōyēd pad abzōn abāz bawēd
ka -iz im urwar rang dād gōnag gōnag ud ka -iz im urwarān abārīg tis ātaxš dād pad asōzišnīh ka -iz im andar burdār mād pus dād srāyēnīd ǰud ǰud mōy ud pōst ud nāxun ud xōn ud pay ud čašm ud gōš abārīg pēšag bē dād ka -iz im ō āb pīh dād kū bē tazēd ud ka -iz im abr dād nēnōyīg kē ān ī gētī āb barēd ud ānōh kū -š kāmag wārēd ud ka -iz im wāy dād kē čašm dīd pad wād nērōg ēr ud abar čiyōn kāmag wazēd pad dast frāz nē šāyēd griftan ēk ēk az awēšān ka dād padiš duškerdtar būd kē ristāxēzišnīh čē -š andar ristāxēz ayārīh ī čiyōn awēšān ast ī ka -m awēšān kird nē būd
abar niger kū ka ān ī nē būd ēg im bē kird ān ī būd čim abāz nē šāyēd kirdan
čē pad ān hangām az mēnōy ī zamīg ast az āb xōn az urwar mōy ud az wād gyān čiyōn -išān pad bundahišn padīrift xwāham
nazdist ast ān ī gayōmard ul hangēzēd ud pas ān ī mašī ud mašyānī ud pas ān ī abārīg kasān ul hangēzēd
ud 57 sāl sōšāns rist hangēzēnēd ud harwisp mardōm hangēzēnēnd kē ahlaw kē druwand mardōm harw kas az ānōh ul hangēzēnd kū -šān gyān bē šud ayāb nazdist ō zamīg ōbast hēnd
ud pas ka -šān harwisp axw ī astōmand tan_kirb abāz wirāst ēg -išān ēwēnag bē dahēnd
ud ān rōšnīh abāg xwaršēd nēm ēw bē ō gayōmard ud nēm ēw pad abārīg mardōm bē dahēnd
pas mardōm mardōm bē šnāsēnd kū ruwān ruwān tan tan bē šnāsēd kū ēn man ast pid ēn man ast brād ud ēn man ast nāirīg ēn man ast kadār -iz ēw nazdīk_paywandtar
pas bawēd hanǰaman ī isadwāstarān kū mardōm pad ēn zamīg bē estēnd
andar ān hanǰaman harw kas nēk_kunišnīh ud wad_kunišnīh xwēš wēnēnd
ahlaw andar druwand ōwōn paydāg čiyōn gōspand spēd andar ān ī siyā bawēd
andar ān hanǰaman ahlaw kē -š pad gētī druwand dōst bawēd ān druwand garzēd az ān ahlaw kē čim andar gētī az kunišn ī nēk ī -t xwad warzīd man āgāh nē kird hēm
agar hamgōnag ān ahlaw ōy rāy āgāhēnēd ēg -iš pad ān hanǰaman šarm abāyēd widārdan
pas ahlaw az druwand ǰudāg kunēnd ud ahlaw ō garōdmān nayēnd ud druwand abāz ō dōšox abganēnd
ud se rōz šab dōšoxīg tanōmand gyānōmand andar dōšox pādifrāh widārēnd ud ahlaw andar garōdmān tanōmand ān se rōz šab urwāhmenīh wēnēd
čiyōn gōwēd kū pad ān rōz ka ahlaw az druwand ǰudāg bawēnd harw kas ars tā zang padiš frōd āyēd
ka pus az hambāz ī pid brād az ōy brād dōst az ōy dōst ǰudāg kunēnd
harw kas ān ī xwēš kunišn widārēnd
grīyēd ahlaw abar druwand
druwand grīyēd abar xwēštan
ast ka pid ahlaw pus druwand ud ast kē brād ēw ahlaw ēk druwand
awēšān kēšān..
rāy kird estēd čiyōn dahāg ud frāsyāb ud wāman ud abārīg ī az ēn ēwēnag -iz margarzānān pādifrāh 10_ēwēnag widārēnd ēč mardōm nē widārēd pādifrāh ī tišra…m xšafna…m xwānēnd
andar ān fraškerd_kerdārīh awēšān mardān ī ahlawān ī nibišt kū zīndag hēnd pānzdah mard pānzdah kanīg ō ayārīh sōšāns bē rasēnd
ud gōčihr mār čiyōn andar spihr az tēx ī māh ō zamīg ōbadēd
zamīg ōwōn homānāg dard bawēd čiyōn mēš ka -š gurg pašm rūnēd
pas ātaxš ud ērman_yazd ayōšust ī andar kōfān ud garān tāzēnēd pad zamīg rōd homānāg estēd
ud pas harwisp mardōm andar ān ayōšust ī widāxtag bē widārēnd pāk bē bawēnd
kē ahlaw ēg -iš ōwōn sahēd čiyōn ka andar šīr ī garm hamēw rawēd ud ka druwand ēg -iš hamēwēnag sahēd kū andar ayōšust widāxtag hamēw rawēd
pas pad ān ī mahist dōšāram harwisp mardōm ō ham rasēnd
pid pus brād hamāg dōst mard az mard pursēnd kū ān and sāl kū būd hē u -t pad ruwān dādestān čē būd
ahlaw būd hē ayāb druwand
nazdist ruwān tan wēnēd u -š pursēd pad ān ī guft passox mardōm āgenēn ham wāng ī dahēnd buland stāyišnīh ō ohrmazd ud amahrspandān barēnd
ohrmazd pad ān gāh hangerdēnīd_dām bawēd kū kār ēw abar nē abāyēd kirdan
andar ān ka -šān rist wirāyēd
yazišn ī pad rist_wirāyīh sōšāns abāg ayārān kunēnd
gāw ī hadayanš pad ān yazišn kušēnd az pīh ī ān gāw ud hōm ī spēd anōš wirāyēnd ō harwisp mardōm dahēnd
mardōm ahōš bawēnd ī tā hamēw ud hamēw rawišnīh
ēn -iz gōwēd kū ka mard paymān būd hēnd ēg -išān pad dād ī čihl sālag abāz wirāyēnd ud ān kē xwurdag nē rasīdag būd hēnd ēg -išān pad dād ī pānzdah sālag abāz dahēnd
harw kas zan frazend dahēnd ud abāg zan māyišn ōwōn kunēnd čiyōn nūn andar gētī bē frazend_zāyišnīh nē bawēd
pas sōšāns az dādār framān hamāg mardōm mizd ud pāddāšn dahēd kunišn_passazagīhā ān -iz ast ī ēdōn ahlaw kū gōwēd kū nay ō garōdmān ī ohrmazd ud čiyōn xwad abāyēd kirb ul stanēd tā hamēw ud hamēw rawišnīh pad ān abāgīh rawēd
ēn -iz gōwēd kū kē yašt nē kird estēd gētīxrīd nē framūd estēd ǰāmag ahlawdād ō arzānīgān nē dād estēd ānōh brahnag u -š ohrmazd yašt bē kird u -š mēnōy gāhān kār ī wastarg ōh kunēd
pas ohrmazd ganāg mēnōy wahman akōman urdwahišt endar šahrewar sāwul spandarmad tarōmad ī ast ī nāŋhaiθ hordad ud amurdad tāriǰ ud zēriǰ rāst_gōwišnīh ān ī drō_gōwišnīh srōš_ahlīy hešm ī xurdruš gīrēnd
pas dō druz frāz mānēnd ahriman ud āz
ohrmazd ō gētī šawēd xwad zōd srōš_ahlīy rāspīg ud ēbyāhan pad dast āwarēd
ganāg mēnōy ud āz pad ān ī gāhānīg nērang zad abzārīhā wasīyār tarag ān widarg asmān padiš andar dwārist abāz ō tam ud tār ...
ud gōčihr mār pad ān ayōšust ī widāxtag sōzīhēd
ayōšust andar ō dōšox tazēd ud ān gandagīh ud rēmanīh andar zamīg kū dōšox būd pad ān ayōšust sōzīhēd ud pāk bawēd
ān ganāg mēnōy padiš andar dwārist pad ān ayōšust gīrīhēd
ān zamīg dōšox abāz ō frāxīh ī gēhān āwurd bawēd
frašegird andar axwān pad kāmag gēhān amarg tā hamēw ud hamēw rawišnīh
ēn -iz gōwēd kū ēn zamīg anafsār ud anišēb ud hāmūn bē bawēd ud kōf čagād ud gawr ud ul_dārišn ud frōd_dārišn nē bawēd
abar tōhmag ud paywand ī kayān
hōšang ī frawāg ī siyāmag ī mašī ī gayōmard
tahmōraf ī wīwanghān ī iianγht̰ ī hōšang
ǰam tahmōraf spitūr ud narseh—ī rašn_čīn -iz xwānēnd—hamāg brād būd hēnd
az ǰam ud ǰamag ī -š xwah zād ǰuxtag ēw mard ud zan
ud āgenēn zan_šōy būd hēnd
mērag aspīgān ud ziyānag zrēšom nām būd hēnd
paywand bē raft
spitūr ān būd kē abāg dahāg ǰam kirrēnīd
narseh ēg -iz zīst
ud narseh ī wiyābānīg xwānēnd
gōwēd kū -š xwarrah abar dād estēd kū harw rōz andar wāzārīhā bē widerēd hamāg xwarišn yōǰdahr ud pāk bē kunēd
dahāg arwadasp ī zaēnīgāb ī..
ī tāz ī frawāg ī siyāmag ī az mādarān
dahāg ī ōdag ī baiiak ī tambaiiak ī ōβōix ī pairiurvaēsm ī gadβiθβ ī druǰaskān ī ganāg mēnōy
frēdōn ī āspīyān ī purr_gāw ī āspīyān ī sōg_gāw ī āspīyān ī bōr_gāw ī āspīyān ī siyā_gāw ī āspīyān ī spēd_gāw ī āspīyān ī dabr_gāw ī āspīyān ī ramag_gāw ī āspīyān ī wanō_plwkšn ī āspīyān ī ǰam ī wīwanghān
čiyōn awēšān ǰud az āspīyān ī purr_gāw dah paywand—harw ēk sad sāl bē zīst hēnd bawēd hazār sāl
ān hazār sāl dahāg duš_pādixšāyīh būd
az āspīyān purr_gāw frēdōn zād kē kēn ī ǰam xwāst
anīz frazend barmāyōn ud kadāyōn
frēdōn az awēšān purr_xwarrahtar būd
az frēdōn zād se pus
salm ud tūz ud ēriǰ
ud az ēriǰ dō pus ud duxt ēw zād
pus ī dōgānag wānīdār ud ’wstb nām būd hēnd
duxt gūzag nām būd
salm ud tūz -iz ēriǰ frazendān āwādagān hamāg ōzad
ān duxt frēdōn pad nihānīh dāšt az ān duxt duxt ēw zād
awēšān āgāhīh būd u -šān mādar ī ān duxt ōzad
ud hamēw frēdōn pad nihān bē kird tā dah paywand ka mānuš xwaršēd pad wēnīg az mād zād
čē čiyōn bē zād rōšnīh ī xwaršēd pad wēnīg ōbast
az mānuš ud xwāhar mānušxwarnar az mānušxwarnar ud xwāhar mānuščihr zād kē -š salm ud tūz ōzad ud kēn ī ēriǰ xwāst
az manuščihr zād frīy nōdar ud dūrāsraw
čiyōn manuščihr ī manuščihrwar manušxwarnāg kē mād gūzag ī ērag ī ÿritak ī bitak ī frazušag ī zušag ī frēn
ān gūzag ī ēriǰ ī frēdōn
frāsyāw ī pašang ī zaēšim ī tūrag ī spaēniiasp ī durwišab ī tūz ī frēdōn
čiyōn karswas -iz kē kēdān xwānēnd ud agrērad harw se brād būd hēnd
pašang ud wēsag harw dō brād būd hēnd
ud az wēsag pīrān ud humān ud y’’n abārīg brādarān zād hēnd
az frāsyāw frasp ud čōr ud y’’n ud šēdag ud abārīg frazendān zād hēnd
wispān_frī ī kay_husraw aziš zād duxt ī frāsyāw būd abāg frasp ud čōr ham mādag būd
az frasp ī čōr sūlīg ud asūrīg ud abārīg frazendān ud az awēšān anast_ēraxt ud nihān_ēraxt ud..
az aγrērad gōbedšāh zād
ud ka frāsyāw ud manuščihr abāg ērānagān andar gar ī padišxwārgar griftār kird sēǰ ud axt abar hišt aγrērad az yazadān āyift xwāst u -š ān nēkīh windād kū -š ān spāh ud gund ī ērānagān az ān saxtīh bōxt
frāsyāw pad ān āhōg aγrērad ōzad
aγrērad pad ān pāddāšn frazend čiyōn gōbedšāh zād
uzaw ī tūmāsp ud kanak ī barzišt ud araβšxwasp ud vaētang ī rāγinōi† ī agāimašuuāk ī nōdar ī manuščihr
az uzaw zād se pus duxt
kawād aburnā andar kēbūd ēw būd u -šān pad rōd bē hišt
pad kawādagān afsard
uzaw bē dīd stad bē parward
frazend wistag windīdag nām nihād
az kawād kay abīweh zād
az kay abīweh kay arš ud kay biyarš ud kay pisān ud kay kāyus zād
az kay kāyus siyāwaxš zād az siyāwaxš kay husraw zād
karsāsp ud ud urwāxš harw dō brād būd hēnd
aθrat ī sāhm ī tūrag ī spaēniiasp ī durwišab ī tōz ī frēdōn
luhrāsp ī ōz ī manuš ī kay pisīn ī kay abīweh ī kay kawād
az kay luhrāsp wištāsp ud zarēr ud abārīg brādarān zād hēnd
az wištāsp spandyād ud pēšōtan zād hēnd
ud az spandyād wahman ud ādur_tariš ud mihr_tariš ud abārīg zād hēnd
ardaxšahr ī pābagān kē -š mād duxt ī sāsān ī wehāfrīd ud zarēr ī sāsān ī ardaxšahr kē wahman spandyādān guft
mādar ī kay abīweh frānag ī vaδargā ī frštagā ī urwat̰.gā ī frašt ī rag ī durasraw ī manuščihr
ēd -iz gōwēd kū xwarrah ī frēdōn andar zrēy ī frāxkard pad nay ēw bun nišast ud wadargā pad ǰādūgīh gāw ēw ō bwzčyt' kird ō ānōh šud ēw sāl ānōh nay drūd ō gāw dād tā xwarrah bē ō gāw šud
gāw āwurd šīr dōxt ō se pus ī -š būd dād čiyōn wahman wašn čṇgraŋhā
xwarrah ō pusarān nē bē ō frānag šud
wadargā frānag ōzadan kāmist frānag pad xwarrah az tay ī pidar šud padestāg kird kū nazdist frazend ō ušbām daham
pas ušbām ōy az pidar bōxt ud nazdist frazend kay abīweh ān zād ud ō ušbām dād nōg abāg ušbām hamkār ušbām andar gumēzagīh raft
mādar ī uzaw duxt ī wāmōn ī ǰādūg hamtōhmag abāg frēgīz u -šān mād -iz
az sām zād šaš frazend pad ǰuxtag nar ud mādag ēk damūg ud ēk xwasrūg ud ēw mārindag nām būd hēnd ud mard ud zan āgenēn nām ēk būd
u -šān ēk dastān nām būd az awēšān ōy frāztar dāšt u -š sagān_šāh ud kust ī nēmrōz awiš dād u -š abaršahr kadag_xwadāyīh ō abrūg dād
abaršahr ēd gōwēd kū abrū šahr
srōš ud ardwahišt āfrīn pad paywand awēšān šāynar kird
ēd rāy aspōmandīh ud zēnōmandīh ud stabr_sanwarīh ud pākīzagīh ud paydāgī ud rāmišn ud xunyāgīh ud frāz_nāmīh pad awēšān wēš
damū asūrestān kadag_xwadāyīh awiš dād
xwadāyīh ud dād ī xwadāyīh ārāstan ud drayāb_warzīh ud harg ī saxt burdan pad awēšān būd
sparūg spahān kadag_xwadāyīh awiš dād
xwasrūg ray kadag_xwadāyīh awiš dād
mārindag padišxwārgar šāhīh ud wēšag_mālišnīh ud gar_mānišnīh awils dād payk raftan ud šabīg_xōn kirdan ud huzahišnīh ud xwār_zīyišnīh ud hamēšag_pērōzīh pad dušmenān
az dastān rōdstahm ud uzwārag zād hēnd
pōršasp pōrušasp ī pītarasp ī urwadasp ī haēčātasp ī čāšnōš ī paitarasp ī harakītārašn harāītār spitāmān ī wādašt ī ayazim ī raǰan ī durāsruw durāsraw ī manuščihr
čiyōn pītarasp dō pus būd
ēk pōrušasp ēk ārāspē ī az pōrušasp zarduxšt ō wātariga handainiš zād hēnd az ārāspē ī mēdyōmāh zād
zarduxšt ka -š dēn awurd fradom andar ērānwēz frāz yašt faršward mēdyōmāh dēn aziš ! padīrift
mowbedān ī pārs hamāg abāz ō ēn tōhmag ī manuščihr hēnd gugān gōwēm
az zarduxšt zād se pus se duxt ēk isatwāstar ēk urwatandar ēk xwaršēd_čihr čiyōn isadwāstar āsrōnān rad mowbedān mowbed būd sad sāl pas ī dēn bē widerd
urwatandar wāstaryōš rad ī war ī ǰam_kerd ī azēr zamīg xwaršēdčihr artēštar ! spāhbed pašotan pišōtan ī wištāspān pad kang_diz mānēd
ud se duxt ēk frēn ēk srīt ārīt ēk pouručist nām būd hēnd
urwatandar ud xwaršēd_čihr az zan ī čagar būd hēnd abārīg az zan ī pādixšāyīh būd hēnd
az isatwāstar zād pus ēw urwarwizag nām būd
ušān arwiǰ ī bīrādān xwānēnd
ēd rāy kē az zan ī čagar būd ēg -išān pad stūrīh isatwāstar bē gumārd
ēn -iz dānēd kū se pus ī zarduxšt čiyōn hōšīdar ōšīdar hōšīdarmāh ōšīdarmāh ud sōšyans sōšāns az hwōw būd
čiyōn gōwēd kū zarduxšt se ǰār ō nazdīk hwōw hamēw šud
harw ǰār ān tōhm ō zamīg hamēw šud
nēryōsang yazad rōšnīh zōrīh ī ān tōhm hamēw padīrift pad nigāhdārīh ō anāhīd yazad abespārd pad hangām bē ō mādar gumēzēd 99,999 frawahr ī ahlawān pad pānagīh gumārd estēnd kū dēwān nē wināhēnd
mādar ī zarduxšt duγda nām būd
pidar ī mādar ī zarduxšt frahumruwānān nām būd
dūdag ī mowbedān
bawā ī waēbōxtān ādurbandag ī māhdād ī mēdyōmāh ī frāywaxšwindād ī mēdyōmāh ī kād ī mēdyōmāh ī ārāspīy ī pērtirasp
čiyōn bawā andar šābuhr ī ohrmazdān mowbedān mowbed būd ud kād andar dārāy wazurg_framadār būd
ādurbād ī mānsrspand ī dādardā ī dādēraxt ī hudēn ī ādurdād ī manuščihr ī wohūmanuščihr ī friyān ī bayag ī bayag ī frēdōn ī frašōstar ī pōrušasp ī nēwasp ī nēwar ī waxš ī whidraw ī frašt ī gāg ī waxš ī friyān ī razān ī durasrō ī manuščihr
mihr_warāz ī narseh ī abzūdgāw ī šērgušnasp ī rarštwa ī urwadgā ī taxm ī zarēr ī durāsrō ī -mān ī dūr_nāmīg ī zāγ ī mašwāk ī nēdar ī manuščihr
mihragwīd ī mardān_weh ī āfarrnbag ī windād ī windād ī paydāg waēbōxt ī bawā ī waēbōxt
mādar kē -š man aziš zād hēm duxt ī frāymāh ī čahrubōxt ī māhiya® ī māhbandag ī māhbōxt ī usānduxt ī mardānweh ī āfarnbag ī windād ī windād ī paydāg waēbōxt ī bawā ī waēbōxt
35a7 abārīg harw mōwbedān ī -šān pad xwadāyīh_nāmag az hamdūdag gōwēd az ēn tōhmag ī manuščihr hēnd awēšān -iz mowbedān ī nūn hēnd hamāg az hamdūdag hēnd xwānēnd
ud man farnbag ī xwānēnd dādagīh ī ašwahišt ī ǰuwānǰam ī wahrāmšād ī zarduxšt
zarduxšt ī ādurbād mahraspandān zādspram ī gušǰam ādurbād hēmēdān ud ašwahišt ī frīy_srōš31 ud abārīg mowbedān az hamdūdag būd hēnd
ēn -iz gōwēd kū pad ēk zamestān panǰāh rōz dēn ī mazdēsnān pad šaš kišwar ī dudīgar bē mad
abar sāl_mar ī tāzīgān zamān dwāzdah hazār sāl
gōwēd pad dēn kū se hazār sāl mēnōy ēstišn būd kū dām amēnīdār ud arawāg ud agriftār būd
hazārag xwadāy warrag ud gāw ud dō_pahikar būd
se hazār sāl gayōmard abāg gāw pad gētīy_estišn būd hēnd čīyōn būd 6000 sāl apetyārag hazārag xwadāy karzang ud šagr ud hōšag būd hēnd čiyōn būd 6000 sāl
ka hazārag xwadāyīh ō tarāzūg mad petyārag andar dwārist ud gayōmart andar ēbgatīh sī sāl zīst
pas čihl sāl mašī mašyānīy abar rust hēnd ud panǰāh sāl ān būd ka -šān zanīh šōyīh nē būd
93 sāl ud šaš māh āgenēn zan ud šōy būd hēnd tā ān ka hōšang mad
hōšang čihl sāl ud tahmurab sī sāl ud ǰam tā xwarrah aziš bē šud 616 sāl ud šaš māh ud pas az ān sad sāl andar wirēz būd
716 sāl ud šaš māh bawēd
pas hazārag xwadāyīh ō gazdum mad ud dahāg hazār sāl xwadāyīh kird
pas hazārag xwadāyīh ō nēm_asp mad frēdōnxwadāyīh kird 500 sāl
andar im 500 sāl frēdōn ēriǰ dwāzdah sāl manuščihr sāl 120
andar im xwadāyīh ī manuščihr ka pad padišxwārgar būd frāsyāb dwāzdah sāl uzaw tōhmāspān panǰ sāl 230r kay kawād pānzdah sāl
xwadāyīh ī sām andar ān ī uzaw ud kawād ud manuščihr būd
kay kāyus tā šudan ō asmān 75 sāl pas az ān 75 sāl āgenēn 150 sāl
kay husrōy šašt sāl kay luhrāsp 120 sāl kay wištāsp tā madan ī dēn sī sāl
mar 3000 sāl
pas hazārag xwadāyīh ō wahīg mad ud zarduxšt spitāmān pad paygāmbarīh az dādār ohrmazd ō wištāsp šāh mad
wištasp šāh pas padīriftan dēn nawad sāl āgenēn 120 sāl
wahman ī spandyādān 112 sāl humāy ī wahman duxt sī sāl dārāy ī čihr_āzādān ī ast wahman dwāzdah sāl dārāy ī dārāyān čahārdah sāl alaskandar ī hrōmā čahārdah sāl aškānān ī pad ahlaw xwadāyīh nām barēnd 284 sāl
ardašīr ī pābagān sāsānān ay mar 460 sāl tā gyāg ayāft hunušk ī tāzīgān tā sāl 447 ī pārsīg
ō nūn 527 sāl ī pārsīg.pas ō tāzīgān šud
andar dēn guft estēd kū hešm dwārist ō ahriman pēš u -š drāyīd kū man andar gētī nē šawēm čē ohrmazd ī xwadāy andar gētī se tis dād estēd kē man gumēz kirdan nē tuwān
ahriman drāyīd kū gōw kū ān se tis čē
hešm drāyīd kū gāhānbār ud mēzd ud xwēdōdah
ahriman drāyīd kū andar gāhānbār bē ras agar az awēšān ēk tis ēw bē duzīd gāhānbār bē škast ud kār bē kāmag ī tō
pad mēzd bē ras agar az awēšān ēk ēw bē drāyīd mēzd bē škast ud kār pad kāmag ī tō