u =š nē šāyist nibištan

pursišn

ēn kū wihēzag ī ašmāh xwarrah_abzūdān andar farrox būm ī abaršahr frāz padīrift ham

ud yazišn pad ān nērang framūdan be kird ham

ēk hāwišt dahmān gōwēd kū tā man rāy drust šawēd kū ēn wihēzag xwad čiyōn kird hēnd ēg =iš man padiš nē ēstēd čē man mowbed farrah_srōš rāy dīd ud ōy =iz radag =ēw bē nibišt hēd wasān uskārišn kird hēd

man nē dānam kū ēn čiyōn kird ast

pas nāmag =ēw az xwarrah_abzūdān awestād abū miswar yazadān_+pād ī marzbān frāz rasīd az būm ī bagdād kū amāh pad nāmag ī dēn dīd ud hudēnān pēšōbāy wihēzag frāz padīrift

ud ēn kas ān nāmag dīd ud abar xwānd

ōy gōwēd kū awestād abū miswar mard =ēw ī sultānīg ast andar dēn nē dānēd abar asrōšīh pad xānag ī xwēš nēst kas ī xwēš yazišn ī yazdān kunēd

ud abar padisār ī pēš

ud ēn kū ān yazišn kunēd čē bawēd

ēn kas andar mayān ī wehān čiyōn abāyēd dāštan

wizīrēnīdan framāyēd pad yazadān kām

passox

pad =iš nigerīdan man nūn =iz pad andak framāyišn ī abar xwār pāk ī was wasān uskārišn pad =iš kirdan

u =š xwēš tan xōgēnīd ēstēd ud xrad ud hamāfrāhīh ī aburnāy ud nōg mad ud pēr ud awezmūd ēr ud wsdym’n nēw kasān ī andar weh_dēn bwl’y ī ys’k ud nēwīh ud frahangīh dārēnd ōh =im uskārišnīh kird pad mādagwar dāšt ēstēd ēn dēn framān dastwarān handāzag pidarān =imān griftag

ud ōy kē nigerišnīg tis ī xūb ud passandānīg ud dēn ud dastwar ’č swd ud pad xānag abar nigerēd duščašmīhā andar wehān pad nē xūbīh uzwāyēnīdan ud kas padiš wiyābānīhēd ud mardōm az rāh ī rāst passandišnīg abāz dārēd harw wināh ī aziš uzīhēd padiš griftār ud āstārōmand

ud wināh =iz guftan nē šāyēd čē nē dānist ham kū čē az =iš uzīhēd

ud awestād abū mansūr yazadān_pādār ī marzbān paristišn ī arwand_zōrīh rāy āfrīnagān gōwišn u =š nē ačār

kē pad nē xūbīh ī ēn weh_dēn drōzišn gōwēd kē_s čimīgīh az dēn nigēz ud gōwizār paydāg ī =š hannām =ēw nasāy ī wehān dūrīh ī az pōryōtkēšān rāy druwand wināhgār u =š zytltkyh andar ruwān ī tā yazišn framūdārān šāh_yazagīh ud asrōš_dārīh wizīr ān ī dēn gōwēd

aētǝm zī mraot̰ ahurō mazdā̊ spitama zaraϑuštra ǰūm astaitǝm aiiaŋhaēnāiš karǝtāiš azdǝbīš paiti auua ǰarǝsūm

čē =š ōy rāy guft ohrmazd ō spitāmān zarduxšt kū zīndag tanōmand ud gyānōmand gyān pad ān ēwēnag kār tan abar frōd kirrēnišn

pursišn

ēn kū ka hudēnān pēšōbāy ēd mowmard ēw rāy mowbedīh ī šahr ēw dahēd pad passan ud hamdādestānīh ī weh_dēnān

pas az ān pad ēw_čand radīh ī kustag ēw dahēd ud gumārd ī sazāg pad ēwēn nibēsēd

ud wehān ī ān kustag frāz padīrēnd ud abar bē ēstēnd u =š pad rad ud mowbed dārēnd ud andar awiš framān_burdār bawēnd

ud ān rad pad harw šahr abestān gumārd

pas ān hudēnān pēšōbāy widerān bawēd u =š ruwān ō pahlom axwān rasēd u =š ēd gōwēd kū hudēnān pēšōbāy widurd ēn rad ō_nūn rad mowbed nēst harw kē ōy rāy mowbed xwānēd tā nōg gumārd ēd az nōg hudēnān pēšōbāy ēw nē bawēd u =š wināh ī garān bawēd

sāl_drahnāy abar ān gōwišn bē ēstēd

ēn kū ān gōwišn ayāb drāyišn aziš wināh ud puhl pādifrāh čē ud weh abāg =iš hamīh čiyōn abāyēd kirdan

passox

kār =iš adādīhā sālār bē nē hilišn

harw ǰuttarīh ud zyān ud wizend ī andar =iš rawēd ēg =iš wināh ō bun

ud az ān drāyišn ī kunēd wehān az rāh ī rāst abāz dārēd garān_wināhīhā ud padiš tōzišnōmand

ud kē abāg =iš hamgōwišn ud hamayār bawēd abāg =iš hamwināh ud hamdād

ka nigerišnīg gōwēd garān_wināhtar

pursišn

ēn kū mard kē abar stūrīh zād ēstēd pad stūrīh anī kas šāyēd ayāb nē

ud ham mard kē xwēš tan pad stūrīh bē ō anī kas dahēd čiyōn bawēd

ud ōy kē padīrēd aziš gētīyīhā ud mēnōyīhā pus ī padīriftag xūb bawēd ayāb nē

passox

agar tis andar nēst ī ān rāy ǰuttar abar stūrīh zād pad stūrīh šāyēd pus was duxt pad ēk šāyēd

pursišn

ēn kū ka ēk duxt ast ayōgēn ī pid xwēš ud šōy hamē xwāhēd kirdan

šōy ī sazāg ēdōn hamē windēd ī ka xwēš tan pad pādixšāy zanīh bē dahēd

ka az xīr ī xwēš ud pad guharīg tan ī xwēš nāyrīg ēd ī ruwān dōst ī husraw ī ēdōn kē =š stūrīh ud ayōgēnīh ī kas awiš nē mad ēstēd pad mayān kunēd/gīrēd ēdōn čiyōn xwah ī meh kē ō xwah ī keh abespārēd ud ayōgēn ī pid ī xwēš awiš abespārēd xwad pad pādixšāy zanīh šōy kunēd šāyēd ayāb nē

passox

nē kunišn ēd rāy čē =š kerdag ī pēšēnagān pōryōtkēšān abāg nēst

ēn ēdōn ēn ānd frī_srōš ī wahrāmān wizīrēnīd pad sāl ī se_sad ud haftād_haft ī pārsīg ud pas az sal wīst ōy ī yazadgerd ī šāhān šāh nāf ī ōy bay husrōy ī šāhān šāh ī ohrmazdān

čahār ēn azabar_nibišt hērbed spandyād ī farrox_burzēn az mowbedān mowbed pursīd andar ham sāl abāg az paččēn ēd anōšāg