Dk3-B-01_sentence_371

andar zamīg wād winnārišn ī zamīg rāy bāstān pad rawišn ēdōn čiyōn andar =iz mardōm tan ud čiyōn x x x x x x andar mardōm tan rāh ud widār wād pad =iš rawēd paydāg ēdōn =iz andar zamīg čiyōn ast ī ka wād andar tan az rāh ud rawišn ī xwēš ō hannām ud gyāg ī awidarg ōbast bawēd pad bast_widargīh ēdōn =iz andar zamīg ud pad ān ēwēnag ī čiyōn andar tan kē pargūd abārōn druwandīh =iz ī ǰādūgān wināhišn kunēd ēdōn =iz andar zamīg ast ī ka az ǰādūgān abārōn nērangīh wād widarg bandīhēd ān kust ī pad =iš bast bawēd pad widarg xwāstārīh ī wād wizandīhēd čiyōn ān ǰādūg frāsiyāb ī tūr ī pad ǰādūgīh kird ud gyāgīhā pad wizandag ī zamīg anāb ud zad_mardōm ud awērān kird ud pad =iz āgāh ī weh_dēn paywastag ast ī ka wād andar zamīg az ātaxš tabīhēd wizandīhēd az x frōd nixwārīhēd ō abar ud padisāy awidargīh wināsēd ud wizandēnēd ō zamīg ud āyēb ī wād az ātaxš andar =iz mardōm tan paydāg ōh =iz harw kadār tōhmag ī =š paymān ī xwad bawēd ārāyišn az paymānīgīh ham tōhmag wišōbišn bawēd ud az dēn paydāg paymān dāštan tōhmagān pad weh mēnōy nērōg rasišn ī ō abzōn apaymānīgīh az wattar mēnōy zōr ud wād gyān ī ātaxš ud ātaxš rawāgēnīdār ī wād ud ka paymān ī pad xwēš sāmān ēstēnd ātaxš az wād zīndagīh ud waxšišn ud wād az ātaxš zōr rawāgīh ud winnirdagān ī az =iš x druyistīh ud xwārīh ud ka apaymānīhēnd az xwēš sāmān bē ēstēnd ātaxš az wād čērīh azruft ud wād az ātaxš ud āyēb āšuft ud winnirdagān ī az =iš agar zamīg wād āb ud agar urwar ud gōspand ud mardōm wizandīhēnd