Sections

1.0
pursišnīhā čand dar ī mihrxwaršēd ādurmahān az anōšagruwān manuščihr ǰuwānǰamān kird abārīg hudēnān az =iš passox gōwizārēnīd ,
2.0
pad nām ī nērōg ayārīh ī dādār ohrmazd wispān yazadān hamāg yazadān mēnōyān ud yazadān gētīyān hamāg dām ī dahišn ohrmazd ō dahišn xwēš wāspuhragānīg wuspurrwindēnīd
3.0
hudēnān ī ēd pursīdārān az stāyišnīg nērōg ī čihr ud zōr ī ǰawāhir ud X daxšag ī xrad ud nišān ī hunar kē =z xradxwāyišnīh kirbaguskārišnīh ud dēnīgwizōyišnīhā pursišn paydāg az mānuščihr ī ǰuwānǰamān āfrīn
4.0
passox ēd kū čē =tān purrdōšāramīhā ud wuzurgabardomīhā andar ēd pursišnīg nāmag ōh āfrīnēnīd čand =itān X āfrīnēnīd čiyōn =itān āfrīnēnīd purrpaymānīhā bowandagabzōnpadēxīhā ō =z ašmāh hamist abar hampaywandān ǰud ǰud pad xwēš niyābag spurr rasēd
5.0
dagrhixt ō nēkfranāmīh paywandād ān ī =tān framūd nibištan abar ayāsišn ī ō hamwēnišnīh ud hampursagīh man ud mihrbānagīh ud dēndōstīh xwad
6.0
X amāh hamist kē yazadān bandag pad kōxšišn druz hamspāh pad āstawānīh ī abar wehdēn mazdēsnān hamēstišn pad ēk ān ahlāyīh rāh ī hamtuxšišn ō gāh ī andar ān ī pāšom axwān hamārzōg pad hāzišn ī ō ān ī pāšom axwān frašegird hamēmēd ham ān =imān kām ī hamwēnišnīh hampursagīh čimīg
7.0
az =iš šud ān =iz ī dēn nigēzēd kū kē abāg ōy ī dānāg ud ahlaw pad hamēnišnīh X nazdīk ud ēg =iš kirbag ī ahy waxšišnīgtar
8.0
ud stāyišn ī =tān man rāy wēš az sāmān meh pāyag framūd nibišt ud čim mādayān purrdōstīh nigerišn ī pad hučašmīh u =m pad =iš rāh ī ō ān ī asarīh X X X X X X X X X X X spāsdārīh
9.0
ān ī =tān pad dānistan šnāxtan rāh bē ō enyā ō any kas nē būdan framūd nibištan ī az ašmāh dōšāram ō pēš hučašmīh ī bē X mādagwarīh ud rāstīh rāy čimīg
10.0
nigerišn dādīhātar =uz ō abārīg mardān pad hunar ī =šān bowandagmenīdārīhātar sazēd nibištan
11.0
čē abāg =iz škeft kōšīdārīh ī druz garān wišōbišn ud zūrīh ī ō dēnīgān ; mad ēstēd pas =iz pad yazadān xwābarīh nūn =iz rad any mowbedān dastwarān dādwarān ud abārīg =iz dēnīg , hudēnīgan dēnīgbedān ī kustag ī any =iz hērbedānīg mēnōyānmardān ōšmurdmānsr ī dranǰēnīdzand uskārddādestānīh dēnīg nimūdārčim ī wizīdārkirbag pad čand gyāg hēnd
12.0
pad =iz ōwōn dādestān šnāxtan dānistan rāh awiš X wišādag
13.0
ān ī =tān kāmag abāyistan xwašmenišnīh az ān ī tō ud abar būd az yazadān ham paymān dōstīh hučašmīh xwēš bawēd
14.0
ān ī =tān andar wēš dōstīh stāyīdārīh frāybūdīhā man rāy pad kišwar dastwarīh ud ēkīh ī bē dudīgarīh ud tāgīh X čē ham sāmān framūd nibišt agar ōh =iz ašmāh dōstīh rāy nibišt pas=iz man dušxwār sahist az ēd ōwōn stāyišn
15.0
agar ud andar ēn zamānag šahr X šnāxtag ud wahāg abar kas ud agar pad ōy ī dagr wurrōyišnīh dēnpēšōbāy pāzag man xwēš rāy nē ābrōyīg dārom ka ān ī stāyišn ī sālār =imān ēwāzīg niyābag abar man srawāgīhēd ud nē =z rāmišnīg , bawam ka =m meh ī az xwēš sālār nāmēnand
16.0
čē stāyišn ān ī kāmag ī pad xwēš pāyag ud tāyag wimand
17.0
u =m ābrōyīg sahēm ērīh ī andar xwēš abarīg hāwandmehīh abar kehān
18.0
ān ī =tān wistāxīhā wistāxgarīhā abar drāz šāyēd nibištan ī , pursišn ēn =iz nimūd kū pāsox pad hangām nibēsam ī =m andar pardazišn bawam
19.0
ān ī ašmāh pad hučihrpursišnīh wistāxīh čimīgtar abar gugānīgpassoxīh spōzazgāhīh kām taftīg čē spōz ayāb abowandagīhāpāyišnīh handāzīhēd
20.0
az ān ī škeft kōxšišnīh ī druz rāy awištāb wizōyišnīgmenišnīh az ān ī awizīrišnīg frēzwānīg kār kam pardazišnīh ast
21.0
abar pāyišn ī hangām ī pardazišn ī =mān zamān dād ēstān andar hamāg paydāgēnīd ǰud =iz az hučašmīh ī dōstīhā ud nišān ī āgāhīhā ī =tān az ān ī man kampardazišnīh az =iš paydāg
22.0
u =m ēn =iz wistāxīh ast kū =tān pursišn dēnīgwurrawišnīhā dēnīgwizīrabāyišnīgīhā nibišt
23.0
andar pāyišn čimpaydāgīh az dēn was ō nimāyišn ī pad dānāgīh aniyāz ī nimūdār ēwēnag abarxwāyišnīh abēbīm , ,
24.0
ud ham nāmag andar māh tīr pad gōr ōwōn mad ka xwāstārīh ī az šāhīgān pad sesālag bahr ī sālag ī hudēnān mustfrāxāyišnīh ī pad =iš awizīrišnīh ud wizāraggarīh ī =m čand ādūgīh abar ān must ud spōzišnīh ī frēzwānīgtar
25.0
ud čār abar bōxtārīh ud frayādišn ī hāwištān čand wihān ī handāxt ēstād rāy man ō xūbīhā nigerīd ī ham pursišn nē ayāft tā māh šahrewar ka ō šīrāz āmad ham u =m hangām hangām andak ī pardazišn būd u =m ham pursišn nigerīd
26.0
ka =m hamǰādagīhā nibēsišnīh dīd ud ēg =im pursišn dar ud dar ǰud ud daxšagīhātar kirdan čimīgtar sahist
27.0
u X ō dibīr =ēw dād pursišn pad ham paččēn ī =tān framūd nibištan dar dar harw pursišn =ēw pad dar =ēw nibišt ud hangirdēnīd
28.0
čand u =m az dēnāgāhīh u =m pad ōš ayādīh ī ud az pēšēnīgān dastwarīh pad xrad sahišn ast pāsox azēr ī pursišn nibišt kāmam
29.0
ka čiyōn pursēd tis andar nēst ān rāy ǰuttar ōwōn saham čiyōn nibēsam az ān ī čiyōn ān ī amāh āgāhīh az ān ī pēšēnīgān dastwarān weh
30.0
dānāgtar ud axw ud rad ud dastwar ī amāh būd hēnd
31.0
āgenēn ǰuddādestānīh būd ān man ka =z wizīr ī abar ham dar ēdōn čiyōn =imān dastwarān zamānag ud dūdag pad mādagwar dāšt nibišt ,
32.0
pas =iz abar gōwišn ān ī dastwar kē any ēwēnag ēč ǰuddādestānīh ī nēst ud agar ī =m sahišn ō šnāyišn ī druyist rāy ayāft az dēnmard ī dēnāgāh kē šnāsēd kē dēnāgāhīhā wirāst pad spās dār
33.0
mādayān ud rāstīh pēšēnīgān dastwarān gōwišn ān =iz čē pad čim andarpāyišn ī ēd čē pad rōšngarīh ī wizīr nibišt
34.0
agar ēdōn čim rāy bowandag ud ayāb wizīr rāy rōšn nē wēnīhēd nē pargast az abowandagīh ī dēn wizīr pad rōšnīhānimūdārīh druyistčimīh bē az abowandag ud az madārīh ī amāh ō šnāyišn ī ān dēn nigēz pargūd az ōšīh ī ān =iz ī =mān xwāst āgāhīhā padisā awištāftag menišnīh ī az āwām sezdēnīh
35.0
ōh =iz nūn ǰud az ī čihrag yazišn baxšišnīh ī weh ud menišn mānsr wizārišnīg ud nigēzišn ī dēn rōšntar nimāyišn ī abar dēnīg warzišn az dō bun abērtar az =iš paydāgīhēd
36.0
ēk az mādayān ī nimūdārīh ī āsnxrad dēnpēšōbāy
37.0
ud ēk mādayāntar nihādan tag ī hufraward pēšēnīg pēšēnīgān ī pēšōbāyān meh pōryōtkēšān
38.0
az ān ī awēšān nibēgān ī abar čimnimāyišnīh zofrīh bārīksaxwanīh rāy ō =z bārīkwēnišnān ud dārmagdānišnān nē hušōn pad andak frāz =iz padēxīh ī saxwan škeft gumān kamāgāhdahišn šāyēd būd
39.0
ōwōn abar čim ī ham pursišnīhā agar ast ī =tān rōšntar paydāg ud čimīgtar abāyēd
40.0
nazdīktar rāh ō rāst yazišn rōšn nē ǰud ō wizīr ī frazānag pēšōbāy ī dēn
41.0
man čand =um dānišn ī ādūgīh hamē ka pursēd u =m tuwān pāyēnēnam
42.0
ka wehān ǰawāhirān ēwēnag nigerīd wizīrēnīdār wuzurg sūd xwēš xwēšagān druyistīh ud drōdīh ud ahlāyīh paymōyīh ud druz wišōyīdārīh
43.0
čē =m ašmāh kām kunišn man āgāhēnīd framāyēd u =tān nōg nōg =iz āfrīn ān ī =tān xwad andar hamāg pad bun ud sar =iz nibišt ǰud ǰud pad xwēš ud niyābag ud spurrīg šāyēd ud šād burzišnīg
44.0
frazāmīhād abāg X paywastagīhā ī az bun ō frazām ud hāmhāgān =iz ,
45.0
burzišnīg paččēn ī pursišn čiyōn pāsox ēd kū ka =š tis andar nēst ān ī rāy ǰuttar ōwōn saham čiyōn =im nibēsīhēd
46.0
fradom ān ī pursēd kū mard ahlaw az star māh ud xwaršēd ātaxš ī ohrmazd čē rāy weh dād ēstēd andar dēn meh ud weh guft istēd az dahišn mēnōyī az =iz ān gētīyīg ,
47.0
pāsox ēd kū frāzīh pad xrad ud rāst wizēngarīh čē dāmān mehīh ud wehīh az hunar bawēd
48.0
abar dāmān hunar =ē rāstīh wehīh kē abzārīh xrad meh spās =ēw yazad kāmištgarīh mādagwartom
49.0
čē harw se āgenēn hamband čē ,
50.0
čē rāstīh paydāgīh pad xrad u =š sūd kāmišngarīh ī dādār xrad kāmišngarīh ī ō abāyišn ī dādār
51.0
u =š dēn rāstīh ud kām ī dādār rawāgīh pad xrad abāg rāstīh
52.0
harw andar dām meh
53.0
u =š mehmānīh pad pahlomīgān
54.0
ud mardān ahlawān mēnōyīg pad ān ī abēzag ud frawahr mēnōywaxšīhā ō druz kōxšāg ud spōzāg , ānābāg ān ī yazadān spāh zōrēnāg mēnōy xwadāyīh ī , ohrmazd ud gētīyīhā pad gētīyī paymōgīh ud hambandīh ud tan gyān
55.0
u =šān abzārōmandīh mādayān xrad gētīyīgkār pad ān ī xradīg ud abargīrišnīh ī humat hūxt huwaršt bēhilišnīh arawāgīh ī dušmat dušhūxt dušhuwaršt
56.0
u =šān handāxtār gētīyīg ī xwadāy ī ohrmazd winnārāg ud ān ī abēzag stāyīdār ud druzōšīhestišnīh framūdār ī pad rawāgdahišnīh ī , ān ī wehdēn mānsr rasišn ī ān weh ristāxēzēnišnīh ud frašegirdkirdārīh hamayārīh ud xwēšīg spās ud abar hamist gētī dām sālār ud nigāhdāštār X ud rāyēnīdārīh ud meh ud abartar hēnd
57.0
ōh =iz ān mehīh nē harw mardōm bē pad pāšomān mardān ī ašōwān rāy guft -istēd kē =š andar nazdist ān =iz pāšom se ī hēnd bun ī mayān frazām dahišn
58.0
ēk abēzag mard gayōmard kē =š fradom menišnīg stāyēnīdār būd
59.0
ān ī yazadān wispān dahišn az bunāfurišnīh tā abdom frazāmišn ī gētīyīg dām az wehīh ud warzišn ī ān ī ōy ud zahag ud āwādag abar andar dārišn ī čiyōn hōšang tahmureϑ ud ǰam frēdōn čiyōn frēstagān ī dēn čiyōn zardušt ud ušēdar ud ušēdarmāh ud frašegirdkirdārān ī čiyōn sōšāns ud rōšnčašm ud X ud hamkārān rawāgdahišnīhā ,
60.0
padīriftār ud yazadān pad ān ī mēnōy nērōg stāyišnīhā wirāst dāštār ud X X X X X druz az ān ī gētī kirbīhā gētīyīgkārīh agārēnīdār dēn ī abēzag kē =š spurrwehīh ī spennāgmēnōy ud awehīh ī gannāgmēnōy u =š paydāgīh ānābišn ī druz ud pērōzīhfrazāmīh ī dādār ud akanāragrawišnīh dāmānīhā bawēd mahist burdār
61.0
ud pad =iz X ān ī gayōmard wehīh ān zardušt X zāyišn āfurīhist
62.0
pad =iz ān ī sōšyans wehīh kē =š zardušt zahag ast pad =iz harwist humat hūxt huwaršt rawāgīhist az dām ī pad dēn ēmēd dād ham spās ,
63.0
ēk kirdār frašegar sōšāns kē ān ī druzīhā dēwān stāyišnīh yazadān kōxšišnīh andar ahlomōγīh ud X agdēnīh ī sardag sardag waxt purrānābišnīhā az gēhān ānāftār pad bowandagrawāgīh ī yazadānstāyišnīh ud spurrrawāgīh ī abēzag dēn frašegirdfrazāmēnīdār
64.0
pad ān ī pāšom kunišn ī anāhōgēnīdan ī brādarōd abar xwaršēd ī arwandasp hamist rōšnān hamāg wehān ī dāmān xwēšīg spās
65.0
čē ān =iz ī ka xwaršēd rōšn az spizišn ī tār spōzišn ud frāšm ī rōšnēnišn ī gēhān tazišn ī rōzān šabān wēnīhēd ham frazāmišn ī frašegird rāy andar dēn mazdēsnān guft ēstēd kū ēn meh rōšnīh ham mardān ī ašōwān paymōgīhēd ,
66.0
dudīgar ān ī pursīd kū mard ī ašō ō gētī pad čē kār rāy dād ēstēd
67.0
u =š andar gētī pad čē ēwēnag abāyēd būd ,
68.0
pāsox ēn kū dādār dām dād ō kāmrawāggarīh
69.0
ān kām u =mān abāyēd rawāgēnīd ān ī čē =š kām kū tā windam ān čē =mān kām čand ōstīgāntar ud ēstēd ōwōn čiyōn =iš kām arzānīg ī =m pad windišn ī ān čē =mān dāmag ēn dām abd ahāmtāg āfurrīd ēstēd wēnābdāg
70.0
az =iz ham abdāfurrišnīh paydāg kū āfurrāg spurr dānāg kū =š āfurrišn pad čim u =š kām wehīh
71.0
ka čimīgāfurrišnīh ī =š dām X wehīh =iz ī =š kām ud ēwar ud az =iz spurrtuwānīgīh ī dādār rāy kām āfurrīd paydāg pas wizīrīhist az xrad kū =š āfurrīd dām ō bowandagrawāgīh ī =š kām pad spurrēnīd tā wattarīh bawēd
72.0
čē ka wattarīh ēdōn ī wehīh ānābišn ī wattarīh bawēd čē ka wattarīh nē spurrīg pas čimīg gōwīhēd kū =š dām dād ō xwēš kāmagrawāgīh ī az wattarīh ānāftagīhā wehīh spurrēnīd rāy hamgugāhīhist abāg ān ī pēšēnagān guft kū āfurrīhist dām ō kāmišngarīh ī dādār
73.0
ud ān ī dādār , kāmišngarīh ī bāyīhist ō dō ī ast paristišnkunišn kōxšišn
74.0
čiyōn paristišn ān ī dādār ī xwābar kē dōst ō xwēš dām kōxšišn ān ī abāg druz ī kōxšīdār kē dušmen ī ō dahišn ī dādār
75.0
ān wuzurg paristišn kōxšišn čand abartom paymān ī xwēštan nazistom
76.0
paymān ī ō āzādīh az dōstīh āfurrāg az must ī az xwēš kōxšīdār kadārizē margōmandān abarǰastišnayāftārān meh tuxšišn
77.0
čē ka xwābarān spurrtom purrabdīhā passāxt ī dahišn ī X X xwadāy u =š aǰumbišn stī pad abarrasānīh ī X gannāmēnōy ǰumbišn awēnišnīg mēnōy waxšag ruwān andar gētī rawišnīg tan nēk ī xwadāy kird
78.0
u =š gyān zīyēnāg ud frawahr ī dārāg ud wīr ī ayābāg ud ōš ī pāyāg ud xrad ī wizīnāg ud čihr ī xwadbizešk zōr ī rāyēnāg ud čašm az dīd gōš az āšnūdan wēnīg az hambōyīd ud dahān az mizag dānistan ud kirb az pahrmāyišn ōšmārdan dil az menīdan uzwān az guft ud dast az warzīdan X pāy az raftan ēd kē gyān frāxēnīdan ud wāyišn xōn pōyādan ēd kē tan paywast ud ēd kē frayādāg dārišn rawāg rāyēnīd
79.0
ud xwēškārīh hamist ō tanabzārān ǰānkārīgīhā wirāyīhēd
80.0
pad frārōndādīh humat ud hūxt huwaršt ī pāddāšn ān rōšngar ud hamēyīg ud nēkrawišnīh niwēyēnīd ud payrāst
81.0
ān frēzwānīg abar windādār mardōmān rāst bowandagīh ī xwēš ud druyist wimand dāštan abartom xwadāyīh dādār ī dādār nē framušt ud pad rawāggarīh ī =š kām ō ōy wispweh dōst abēzag stāyīdār ud abēzag ud spāsdār būd
82.0
ānčiyōn dōstīh ī abēzag az ēwarmenišnīgīh pad harw nēkīh ī az =iš būd ud ēč anāgīh az =iš nē būd stāyīdārīh abēzag az stāyišn ī pad harw wehīh az =iš būd ud ēč wattarīh az =iš nē būd spāsdārīh ī abēzag az hamāg āzādīh az =iš bawēd ēč must az =iš nē būd wābarīgān wizīr ud ham abēzag dōstīh ī rāstīh stāyīdārīh ud čimīg spāsdārīh ōstīgānīhēd aǰudīhēd pad =iz ān ī ka wahman pad menišn srōš pad gōwišn ard pad kunišn mehmān dārīhēd
83.0
ōh =iz mehmānīh ī wahman pad menišn az dil wehīhā ō rāst šnāyišnīh nixwārišnīgh az waranīgīhā xwaddōšagīh dūr dāštan srōš mehmānīh ī pad gōwišn az ān ī āgāh ī rāst guftār ān ī anāgāh az rāst dastwarān niyōšīdār būdan ard mehmānīh ī pad kunišn ān ī wehīh dānīhēd rāyēnāg ān ī nē dānēd pahrēzāg būdan paydāgīhēd
84.0
ud se ēd se wehīh ī ōšmurd parwastag andar dō rāh ī pēšēnīgān guft
85.0
ast dānišnīg hištan ī =š abzārīh xrad ud frārōn tuxšāgīh
86.0
u =š dastwar ān ī rāyēnīdārīh ān abāg dēn dēn ī yazadān rāstīhā dāštan
87.0
u =š bun abēzagmenišnīh ī rāstīhā pad wahmanīgīhā wehīh
88.0
čiyōn pēšēnīgān dēnīgīhā guft kū kē ān ī wahmanīg wehīh pad menišn mehmān dārēd ēg =iš ān ī weh mēnōy rāh ī rāst nimāyēd
89.0
pad rāh ī rāst kāmag ī dādār , šnāsēd
90.0
ud pad kāmišngarīh ī dādār waxšēd ī windēd kē nēkīh ī frašgirdīg ud ayābēd
91.0
hangirdīgtar pāsox ēd kū mard ī ahlaw dām ast kē =š grift ān xwēškārīh ī aw =iš āfurrīhist
92.0
u =š andar gētī pad nēfrēbīhistan ī hāzāngar druz purrpās
93.0
pad wizīdārīh az xrad ān dādār kām kē xwad šnāyēnīdār X X X X kām šnāxtār ān ī wehīh šnāxtag rawāgēnīdārīh az čē awiš aziš pahrēzīhīdār
94.0
u =š ēdōn abāyēd būdan čiyōn ān ī mehīh ud wehīh pad =iz mēnōy , ōstīgāntar būd ,
95.0
sidīgar pursišn ān ī pursīd kū mard ī ašō ēn mehīh čē čim rāy ast ,
96.0
pāsox ēd kū mazdēsn kāmišngarīh ī dādār rāy
97.0
čē tāšīd agumān kū rāh ī ō kāmišngarīh ī dādār šnāyišn ī =š kām
98.0
ud ān kāmšnāyišnīh pad xrad ī druyist druyist bawēd
99.0
ān ī xrad kē =š kām mēnōyān yazadān abar šnāsēd nē waxt bē dēn ī rāst ī abēzag ī ast mēnōyān dānišn ī frahangān frahang ud awestādīhān awestādīh tōhmagīh ī wispdānišnān
100.0
ān =iz ī abēzag X dēn ī mazdēsnān rawāgīh pad mard ī ašō ī čiyōn =iš nimūd pad dēn kū man dād spitāmān zardušt mard ašō ī , kadxrad
101.0
u =š bē pāyam menišn az , dušmat uzwān az dušhūxt u =š bē pāyam dast az dušhuwaršt
102.0
u =š hāzēnam tā ō ān ī pas ašō ī dānāg ud kirdxrad
103.0
u =š hamōšmur dēn kē =š dād ud xwēšēnišn dahibed windišn ī ast dēnburdār ī dānāg ī az zamānag ō X zamānag tā =z ō ān abdom axwān wardēnišn kē hutāšīd frašegird
104.0
čiyōn pad xrad dād ān ī ahlāyīh gēhān pad xrad ānābīhēd harw wattarīh ud pad xrad spūrrīgīhēd harw wehīh pahlom xrad ī dēn ī abēzag kē =š rawāgīh pad dēnburdārān ān abrāst mehīh pahlomān mardān ī ašōwān kē andar waxt ān ī čiyōn nimūd abar gayōmard ud zardušt sōšāns
105.0
ud čahārom pursišn ān ī pursīd kū ēn zaxm ud tars ī =mān az āwāmpādixšāyān abārīg anāgīh ud āhōg ī wehdēn kārān hamē rasēd u =š dādestān čē ēwēnag bawēd
106.0
u =mān pad mēnōyān weh dādestān ast ayāb nē , ,
107.0
pāsox ēd kū andar dēn ī mazdēsnān guft ēstēd kū rāhbandīh kē =š pad ahlāyīh bēščiyōnīh ēn wizārišn ast kū ān saxtīh ud andōh ī dušxwārag ī pad kirbag rawāgēnīd rāy rasēd nē pad saxtīh ud ranǰ ud dušxwārag ī was abāyēd hangārd ī ka nē pad andōh ī saxtīh abāyēd hangārd ī ēg =iš aziš paydāgēnīd kū pad ān pāddāšn ān and āsānīh ud rāmišn bē ō ruwān rasēd čiyōn nē kas az ān saxtīh dušxwārīh ī =š pad hāwand ān kirbag abar mad az ān čiyōn dēn ī weh ōstīgān dāšt menēd stāyēd u =š padiš ēstēd
108.0
109.0
ud ēwar kū kirbag andar kirbagān mādayān
110.0
ān harw tars ud sēǰ dušxwārīh ī =mān ham wehdēn dāštan rāy az hamēstārān ī dēn abar rasēd mihr dēn rāy be gugārēm
111.0
ud az dēn wardišnīg andar gēhān aburdšnōhr nē bawēd
112.0
ēg =imān hāwandīhā spās passazagīhā rasēd az yazadān ō ruwān šnāyišn ī urwāhm ašōyīh ud xwārīh ,
113.0
panǰom ān ī pursīd kū čē rāy wehān anāgīh wēš hamē rasēd kū ō X wattarān ,
114.0
pāsox ēd kū nē harw hangām ud harw gāh nē harw wehān anāgīh wēš rasēd
115.0
čē mēnōyīg wēš nēkīh ī wehān ēwar bē gētīyīg abērtar andar wadzamānīh amaragānīhā anāgīh ud bēš abar wehān wēš paydāgtar
116.0
u =š čim was
117.0
ēk ī hangirdīg ēn =iz kū dar , hāwand rasēd wēš
118.0
čē rasišn ī anāgīh az dō dar abērtar az dēwān anāgīhbaxtārān ēk az wattarān anāgīhkirdārān ēk
119.0
ud agar ōh =iz ǰahišnīg wattarīh wattarān bēšīhēnd pas =iz amaragānīhā anāgīh ī ō wattarān az dēwān ud ān ī ō wehān az wehān az dēwān az wattarān =iz rasēd
120.0
u =š pad ham rāh ī rasišn ēwēnag bē gāh dō
121.0
ēn =iz abērtar ēdōn čiyōn pēšēnīgān guft kū weh ud kār ranǰ abērtar pad gētī u =šān mizd pāddāšn ī ēwarīgtar pad mēnōy
122.0
ud wattarān āsānīh ud rāmišn pad gētī wēš u =šān dard pādifrāh ī pad mēnōy garāntar ,
123.0
ēn =iz ast kū wehān tars ī az dard ud pādifrāh ī az dušox rāy āsānīh ī xwārīh ī pad gētī hilēnd tis =iz abārōnīh nē menēd gōwēd ud kunēd ēmēd ī ō ān ī āsānīh rāmišn pad wahišt rāy was ranǰ tars ī pad frārōnwarzīdārīh ī pad menišn gōwišn kunišn kāmagīhā ō grīw padīrēnd
124.0
ud wattarān ruzdīh ī pad rāmišn ī zamānīg rāy ān =iz rāmišn ī abārōnīhā ī =š padisārīg dušox ast ēg =iš xwēštan zamānīgīhā padiš rāmēnēnd
125.0
ud waranīgīh xwaddōšagīh rāy ān =iz kār kē =š rāh ī ō wahišt padiš šāyēd būd xwēštan pad =iš nē ranǰēnd
126.0
ud pad ēd rāy rāh andar gētī wattarān āsānīh rāmišn frāy ud wehān andōh ud bēš ud zarīg ud anāgīh X wēš bawēd dīdārag ud paydāg čim ,
127.0
šašom pursišn ān pursēd kū amāh mardōm bē ō gētī čē rāy dād ēstēd
128.0
u =mān andar čē abāyēd kird ,
129.0
pāsox ēd kū pad =iz pāyān ī ham pursišn nibišt kū andar dām āfurrīhist be rāstīh kāmišngarīh ī dādār ud purrwehīhā winnārdan ī ān ī akanārag nēkrawišnīh ī dāmān kē =š bīm bēš čiyōn ast frašegird ī did abrādarōd
130.0
ān ī winnārišn bawēd az spurrpādixšāyīhā dādār apādixšāyīh druz
131.0
čiyōn =iš guft pad dēn kū andar ān ī zamān spurrpādixšāy ; bawam man kē ohrmazd ham nē pad tis =iz pādixšāy bawēd gannāmēnōy
132.0
ud abar =iz nēkrawišnīh dāmdahišnīh ī ōšmurd kū nēk man ka =m ēdōn dām dād čiyōn man kadārizē kāmag
133.0
ud ō man xwadāyīh ī dahēnd xwadāyīh čāšēnd ka ō kāmišngarīh ī pad =iz mehānišn ī =š xwadāyīh dād ēstam
134.0
u =mān andar gētī ēdōn abāyēd būd čiyōn =mān rāst bowandagīh xwēš abartom xwadāyīh dādār drustwimandtar dāšt bawēd
135.0
rāh ī ō rāst bowandagīh pad xrad dānīhēd pad rāstīh wābarīhēd pad wehīh sūdīhēd
136.0
u =š widarg ī awi =š abērtar weh ud mēnōy rāstīhā pad mēnōyān menišn gāh kirdan dānišnīgīhā grift ud dānišnīhā hišt
137.0
čiyōn pad dēn gōwīhēd kū ohrmazd bē ō zardušt guft , kū wahman pad axw ī tō abēzag abāgenā kū =š mehmān be kunē
138.0
čē ka wahman pad axw ī tō abēzag abāgēnē kū =š mehmān be kunē dō rāh be dānā kē hurawišn kē =iz , dušrawišn , ,
139.0
haftom pursišn ān ī pursīd kū ka mard =ēw widerān bawēd pas az widerānbūdan ī ōy kirbag ī kas ōy rāy kunēd kē az gētī bē šud ēstēd pad šab ī sidīgar andar bām =ē bē ō tarāzūg šawēd ēg =iš čiyōn awiš šawēd
140.0
frayādēd ēdōn čiyōn mehīh pad dast ī xwēš kird ēstēd ayāb anī ēwēnag ,
141.0
pāsox ēd kū ka kas ōy ī bēwidardag rāy pas az bēwiderišnīh kirbag kunēnd agar bēwidardag andar zīndagīh =ēw ān kirbag nē framān framūd u =š nē handarzēnīd ud nē bun kird u =š nē =z pad dād bawēd ēg =iš bē ō tarāzūg nē šawēd ud nē rasēd
142.0
pad =iz hangām rawāgīhīd rāy ka ān kirbag kē =š nē frayādēd pad nē xwēšīhist čē ān ī pad dād ī az kas xwēšīhēd pad padīrišnīh az kas xwēšīhēd ka =š nē pad dād ēg =iš nē padīrift bawēd
143.0
agar ān kirbag ōy widardag nē framūd u =š nē =z handarzēnīd bē pad dād hamdādestān būd ān andar zīndagīh kunīhād ēg =iš pad sidōš bē ō abzōn ī gāh rasēd
144.0
ān ī pas az widardagīh kunīhēd nē pad āmār ī sidōš ud tarāzūg bē pad hangām ī kirbag rawāgīhēd bē ō rāmišn ī ruwān rasēd
145.0
agar ān ī kirbag ō widardag andar zīndagīh ī xwēš framūd ayāb =iš handarzēnīd ayāb bunkirdār ud wihān ī ruwānwarzīdārīh būd ka pas az bēwiderišnīh X rawāgīhēd ēg =iš bē ō rāmēnīdārīh ī =š ruwān rasēd
146.0
čē bun ī spās framūdār ud xwēšīgkirbagīh ēwar
147.0
čēgāmizē kirbag ī rawāgīhēd andar ān ī āmārgarān rōšnīhā abāg ōy ī kē kirdār X X X X X hamkirbag
148.0
u =š pad āmār ī ruwān kirbag abāg ō kē kird hāwand
149.0
bē ān ī kē =š kirbag pad dast ī xwēš kird az ān ī kē =š framūd ruwān hučihrtar ud amāwandtar
150.0
u =š hangōšīdag ōwōn čiyōn ka mard =ēw , wastarg =ēw dast ī hučihr abāyišnīg xwēš pad tan dārēd any mard =ēw wastarg =ēw dast ī pad hamēwēnag , xwēš pad ganǰ dārēd hučihrtar bāmīg abāyišnīgtar bawēd ,
151.0
haštom pursišn ān ī pursīd kū ān ī =š az xwāstag ī xwad bē ō kas framūd kū =š pad ruwān uzēnag ī kunēnd tā ān kas ō rāy kunēnd az ān xwāstag ranǰkirdan ī xwēš ēk az did ǰuttar ast ayāb nē
152.0
ud pāsox ēd kū ēk az did ǰuttar
153.0
čē ān ī az xwāstag ī xwēš framāyēd mādagwartar kū ān kas bē az framāyišn ī ōy rāy kunēnd
154.0
andar ēwēnag ī kirbag ān mādagwartar ī xwad pad xwēš ranǰ warzēd ud pas az ān ī az xwēš =iz pad xwēš framāyišn ī rawāgēnēd ī pas ān ī xwad pas az xwēš rāy handarzīd , framāyēd bē ō rawāgīh rasēd ud pastar ān ī kas ōy rāy kunēnd
155.0
čiyōn =iš ēdōn xwēš ān ī =š pad dād
156.0
ka kas ōy rāy andar =uš zīndagīh rāyēnēd ēg =iš gāh abzāyēd ruwān bōzīhēd
157.0
ka pas az ōy rāy rāyēnēd ēg =iš rāmišn bē ō ruwān rasēd
158.0
ka pad ān ī kirbag nē hamdādestān u =š nē dād , ka =z kas ōy rāy kunēnd ēg =iš bē ō xwēšīh nē rasēd ,
159.0
nohom pursišn ān ī pursīd kū wēš kirbag ī az ān ī ka kirbag kird ēstēd tā ān ī ka zīndag čand abzāyēd ,
160.0
pāsox ē kū az ān ī ka kirbag bē ō rawāgīh rasēd waxš andar ō abzāyišn ēstēd
161.0
tā ka zīndag bē ka =š ān ī kirbag aziš apparīhēd tā waxš ī waxš abāz nē ēstēd ēdōn waxšēd čiyōn frazend andar aškamb ī mādarān abzāyīd bawēd ,
162.0
dahom pursišn ān ī X pursīd kū waxš ī abzāyēd pad šab ī tasom ēdōn frayādišnīg bawēd čiyōn bun ī kirbag pad xwadīh ayāb ǰuttar bawēd ,
163.0
pāsox ēd kū ǰuttar
164.0
čē bun None kirbag padīrag wināh bē ēstēd
165.0
wināh ud kirbag padīrag ud waxš wināh bē ēstēd ,
166.0
yāzdahom pursišn ān ī pursīd kū waxš ī kirbag wināh ēdōn kanēd čiyōn ān ī kirbag bun ī ayāb nē ,
167.0
pāsox ēd kū bē ōh kanēd hā čiyōn ān ī kirbag rasēd tā wināhwizārišnīh rāy pad tōzišn ī wināh rāy kunīhēd ān wināh kanēd ī andar dēn nāmčištīg guft ēstēd
168.0
ēg =iš abārīg kirbag gāh ruwān paydāg būdan rāy abāg wināh ī pad bun ēstēd ō āmār gīrīhēd
169.0
pad kirbag waxš ī kirbag ruwān pāddāšn ī tā ān ī kirbag X wināhwizārišnīh kunēd wināh kand ī nē guft ēstēd
170.0
bun kirbag tā bun ī wināhīh ī wināh ī kirbag waxš wināh ud kanēd ,
171.0
dwāzdahom pursišn ān ī pursīd kū pad šab ī tasom wināh ī pad kirbag bē hangārēnd az bun šawēd ayāb =iš wināh ī =š ǰast pādifrāh kunēnd kirbag ī =š kird mizd ī pāddāšn dahēnd ,
172.0
pāsox ēd kū šab ī sidīgar andar bāmag āmārkird guft ēstēd abar wināh ī =š wizārd ud kirbag ī ī =š appār ō āmār nē niyāz
173.0
čē āmār abar kirbag bawēd ī =š xwēš
174.0
ēd čē =š xwēšīhēd abar wināh ī =š pad bun ēstēd
175.0
ēd čē =š bun ǰud ēstēd u =š pad =iš āstird ēstēd pad =iš tarāzēnd
176.0
ud wēšīh kamīh ī kirbag wināh čiyōn bawēd sanǰēnd ǰānōmandān pad rāst tarāzūg ī ačafsišn
177.0
ōy ī frārōndād wēš kirbag ka =š ǰast wināh zamānīg pādifrāh widārēd pad kirbag ǰāwēdān šnāyišnōmand bawēd
178.0
ōy ī abārōndād ī wēš wināh ī =š kird kirbag pad ān ī zamānīg rāmišn rasēd pad wināh ī =š ast tā be ristāxēz pādifrāhōmand bawēd ,
179.0
sēzdahom pursišn ān ī pursīd āmār ī abar kunēnd ka =šān pādifrāh kird ēg =išān gyāg kū bawēd ,
180.0
pāsox ēd kū āmār ī abar kunišngarān pad kirbag wināh tā kunišngar zīndag bawēd harw rōz se bār wahman amahrspand kunēd čiyōn =iš menišn gōwišn kunišn ī harwist ox ī astōmand āmārēnīdag andar xwēškārīh ast
181.0
abar wināh ī hamēmālān ī ō mihrōdruǰān gīrīhēd gētīyīh =iz abar tan ud nāf ud āwādag ī mihrōdruǰān madan guft ēstēd
182.0
pad čandīh pad =iz wēš kūgyāgīh kayzamānīh hamēmālgar mihr
183.0
pad sidōš abar paymān ī kirbag wināh sāmān ī ahlawīh druwandīh srōšahlī rašn rāst
184.0
pad tan ī pasēn pad spurrīgīh ī harw āmār āmārēnēd xwad dādār ohrmazd kē =š az ān =iz ī sidōš hammis āmār hamāg menišn gōwišn kunišn ī dāmān āškārag andar ān ī harwist āgāh ī xrad ī
185.0
pādifrāh pad ruwān ī wināhgārān az ān ī mēnōy [wināh] ī =š kird hambandīhist rasēd az ān bozagkunišn ī warzīd parward
186.0
ān pādifrāh fradom pad zamīg pas pad dušox abdom pad passāxt ī tan ī pasēn abar ruwān wināhōmandān ud druwandān rasēd
187.0
ka pādifrāh pad sidōš widārd bawēd ān ī ahlawān ruwān ō wahišt pāšom axwān , ān druwandān ruwān ō dušox ud wattom axwān , rasēd
188.0
ka =šān pādifrāh ī frašegird widārd bawēnd pad passāxt yōǰdāsr az harw wināh rasānd bē ō hamēyīgīhārawišnīhā ud nēkrawišnīh pāšomrawišnīh ī ān ī pāšom axwān apetyārag
189.0
čahārdahom pursišn ān ī pursīd kū kandan ī gyān ud gyān driyōšān ī sag ud way pad nasāy ī bawēd az wināh ōgārēnd wināh az bun bē šawēd ayāb nē ,
190.0
pāsox ē kū wināhkāhišnīh kirbag abzāyišn ī az humat hūxt huwaršt az =iz ān , passāxtīh ud dušxwārīh ī bawēd ī dēn ruwān warzīd rāy abar rasēd
191.0
pad stūrīh andar passāxtīh ud āstawānīh dēn pānag ī ruwān , ōstīgān dārēnd
192.0
ān ī anāgīh ī ka kirbakkar ī ēd ka bozakkar ud ka tuxšēd ēd ī tuxšēd ēd ī ka nē tuxšēd ēd ka hunsend ud ēd ka nē hunsend pas akām
193.0
u =š ēč wihān ī kirbagīh abāg nēst čiyōn akām rasēd
194.0
spās ud mizd rāy X ēwar kandan ī gyān abar ahlawān ud druwandān ēwtom bawēd
195.0
harw kas mizd stad ēstēd ān mizd zīndagīh ī tā widard hangām
196.0
bē darrēnišn ī sag ud way nē abar harw kas ud harw tan bawēd ǰuttar kirdan šāyēd
197.0
kē šnāxtan ī kirbag az xūb pahrēxtan ī nasāy zūd wardīhistan ī ān rēmanīh kāmag ī abar wināhwizārišnīh rāy widord kirdan bē ō kōf X gyāg ī ēwēnagīhā barēnd handarzēnāg hamdādestān kū =š az dādīhā gyāgīh sag murw darrēnēnd
198.0
az ān čiyōn ān tars dēnframānīh ud rawāgkāmagīh rāy tuxšāgīhā ō grīw ī xwēš padīrift ēstēd pad =iš xwēšag pāddāšn
199.0
u =š pad ān rāh rasēd ō wināhnirfsišn ō ruwānšnāyišn ,
200.0
pānzdahom pursišn ān ī pursīd kū ka =š sag ud way darrēnd ruwān dānēd u =š dušxwārīh bawēd ayāb čiyōn bawēd ,
201.0
pāsox ē kū tan ī mardōmān az X brīnišn darrēnišn ī dard ōwōn mārēd kū ka ruwān hamkadag ī tan ī
202.0
u =š ruwān kē xwaš ud axwaš dānēd abāg gyān zīyēnēd bē bōy ī sōhēnāg abārīgān gyānabzārān az tan šawēd
203.0
tan akār ud aǰumbāg , ud amārišn ēč dard ud frazāmiz nē mārēd ud nē sōyīhēd
204.0
ruwān abāg gyān az tan bērōn u =š darrēnišn awiš nē abyōxtag bē pad ān mēnōyīg sōhišn wēnēd , dānēd ,
205.0
ān ī druwand ka =šān dawīd kū abdpassāxt tan ī =š paymōg būd wišōbīhēd ud ān and ī =š dagr abāg būd ēd =iz rāy kū čē =m andar tanōmandīh ud gētīrawišnīh wināh nē wizārd ahlāyīh nē hambārd ud pad =iz handēšišn ī abar ē kū =m pad wēš būdan ī =m abāg ēn tan wināh wizārdan ruwān bōxtan šāyist hā ud nūn az harw kas rāmišn ī gētī ī meh ēmēd ī mēnōy ǰudāg hom ō škeft āmār ud garāntar bīm windist ēstam ēg =iš abāz ō tanōmandīh ārzōgīhēd
206.0
u =š darrēnišn ōwōn garān bawēd ān tan rāy čiyōn abzārxānag ī bēdom ud nišān wastarg ī andartom abāg zay zēnabzār husāmānīhā agārīhēd wišōbīhēd
207.0
ōy =iz ī ahlaw abāg wuzurg urwāhman ī az ēwarz ī ō pāšom axwān pas =iz xōg ī =š abāg tan bawēd wuzurg wuzurg frayādišnīg ahlāyīh ī =š hamē abāg tan hambārišn rāy abar hutāšīd tan ī abdpassāxt sahmgenīhā wišōbīhēd
208.0
ud čimīgīhā ka =š abāyišn ī padiš bawēd
209.0
bōy ī mardōmān čiyōn se šab bērōn ī tan pad nazdīkīh ī tan nišīnēd ān ī rāstīhā bīm ud āhr bē ō dēwān mizdag ud drōd ud niwē bē ō wehān mēnōyān ayādēnīdan ēmēd ānīdanīg abāyišn ī X az tan rāy mēnōyīgīhā ēwāz gōwēd kū čim darrēnēnd sag ud way ēn tan ī passāxt ka abdomiz abāg hamīhēd tan gyān
210.0
pad āxēzēnišn ī ristāxēz ī rēzišn mēnōy ī tan ī abārīg weh ud mēnōyān urwāhmīh wēhmīh ud dēwān druzān bīm bēš rasēd ,
211.0
šāzdahom pursišn ī ān ī pursīd kū nasāy ō X murwān dād wihān čē ast ,
212.0
pāsox ī ēd kū passāzišn ī widardagān tan ōwōn škeft kū ō ham mad ēstēd ud dō hambedīgīh ēk dagr pattāyēnīd ud ēk tēz wardēnīdan
213.0
u =š ēwēnag ēn ō yazadān pād ud dēwān wardēnišn
214.0
pas az X ōsānd gyān tā ka kirb wehīh pad gyāg dēwān xradstardān az tan tarsand čiyōn wēš gurgān xwist ka az gurg frāz tarsand
215.0
mēnōy ī tan ī xōg ī dagr rāy andar tan būd rāy mardōmān ōwōn kāmag ī pad =iš mānist ka =z =iš hilēnd az māništ
216.0
pad ham rah ān ī widardān tan čand awināhīhātar šāyēd druyisthā pād dašn
217.0
ham passazag andar čiyōn stāyīd ēstēd awēšān frawahrān kē abar nigāh dārēnd ān kirb ī sāmān kirsāsp any =iz spāhān
218.0
az būdan bē ān čim rāy ka hamīhēd , ēbgadīg wināyišn ōy widardān tan paywēšagōmand nasuš dwārēd pad =iš
219.0
ud az ān stahmagīh ka čēr bawēd abar gyān ī ān ī ahlaw mardōm u =š stōwēnēd az ān ī hukirdīhā gāh ī tan xwad andar tan gāh gīrēd
220.0
ēg ān tan gāh kunēd
221.0
ēg ān tan pad ān čim kirīhēd nasāy
222.0
ēd hambedīgīh ī tēz wardēnīd ēwēnag ud grāyīh ī ham nasuš rāy ka =z pad wišōbišn ī ān tan šāyēd pas =iz ānāft ud wardēnīd bēšazdārīhā
223.0
az ān čiyōn ī mardōmān tan passāxtag ī az ast ī saxt pid ī sust ān ēstīhēd rāyēnišn ī ast az ān ī pid
224.0
čē ast pad =iš saxtīh ka =š pid ī tarr nē abāg u =š nē bawēd ud tarrdāštār xwadčihrīgīhā huškīhēd ud ačarbišn ud dagrpattāyišn ī bawēd
225.0
pad huškīh az nasāyīh bē ō hixrīh wihurīhēd
226.0
pid ī pērāmōn ast kē pad wāsēnīdārīh ī zīyēnāg gyān tarr waxšišnīg būd ud pas az gyānšawišnīh ī tars ī adōstīh rāy ō pūdagīh ud gandagīh rasēd u =š xrafstarān andar hambēšēnd
227.0
saxt =iz ast pūdag wišuftag ud agār kird ud payrāst ēstēd
228.0
abar abāzēstīd ī ān ī wināhgārān nazdīkrāhtar čār ān bē az mardōmān āstār pid az ast ǰud ud stēndag ud gugārd bawēd čiyōn pad ǰudīh pid ō ud gugārišn az nasāyīh bē hixrīh ud ast bē ō X , kālbod ō tāyišn abērtar rasēd
229.0
čiyōn ān ī pid mardōmān xward rāh nēst čē =šān garāntom rēmanīh ud pihag awiš abyōxtīhēd āstārd garān purrīhā az =iš āstārēnd brēhēnīd dād ud ēstēd dād nē sazāg čē =š ālūdagīh ī ān yōǰdahrān gōspandān ud pihagīg abāzpaywandišnīh ī ō mardōmān rāy garā ud anēwēn
230.0
ān ī purr pākīh ātaxš az =iš bawēd
231.0
čiyōn xwad bē ō sōxt madan nē šāyēd ud ēg ān ī sōxtār pad garāntom āstār az =iš X
232.0
ud bē ō ǰōyišn ī xrafstarān hangāštan nē sazāg čē mēnōy ī tan ka X mēnōyīh ī andar tan ī wināstišn ī xrafstarān abar weh kirbān nigerēd wišōbēd agārēnēd ud ēg škeftīh X bēšīhēd
233.0
ud pas ōwōn čārīgtar rāh bawēd ka čiyōn framūd ēstēd ān ī nasušōmand tan pad rōšn kōfwaxš būm nihīhēd
234.0
nēburdan ī ō āb ud urwar mardōmān māništ rā ēwēnīhā bandīhēd tā kirbxwārān sagān ud kirbxwārān wayān kē nē dasthammōg ī mardōmān hēnd nē pad xwarišn mehmān hēnd u =šān nē =z mardōmān bē ō nasāyxwarišnīh barēnd čē xwad tazān wāzān šawēnd ān ī pid xwarēnd
235.0
pad gyānīg ātaxš andar zīstan ī ohrmazd dāmān gugārīhēd
236.0
az pidkirbīh nasāyīh bē ō gilkirbīh ud hixrīh wihirīhēd ō =z xākīh gumēzīhēd payrāstag bawēd
237.0
ōh =iz ān sagān ud wayān murwān hučihrag yazadān kirbxwār dād ēstēd
238.0
ud stardxradīh rāy pad =iz ān wināh anāstarīd hēnd
239.0
az pid ī ō tan zīndag ud ohrmazd dāmān gumēzīhēd ēg ān =iz dēwān snah ī čiyōn nimūd andar ān dar ī abar čim ī sag ī ō murdag nimūdan kū widardagān tan ka bēāstārīhā ō ohrmazd dām zīndag gyān tan gumēzīhēd bahrīg ristāxēzišnīh ud X daxšag nimāyēd
240.0
u =š pad =iš dēwān andar dārēnd dardīhēnd pad yazadān kām ,
241.0
haftdahom pursišn ān ī pursīd kū ān ī weh ī ka ō murwān dahēnd ayāb čē ēwēnag weh ,
242.0
pāsox ēd kū pas az sag nimūdan čiyōn =iš čim pad dar ī xwēš paydāg ān ī nasāy ī ō kōfwaxš būm ēwēn barēnd ān =iz rāy kū tā sagān murwān nasāy bē ō ābōmand warzōmand māništōmand gyāg nē āwarēnd
243.0
any ēwēn bastan ka murwān ī kirbxwārān ān ī pid ī ka nē xwarīhēd pūdag wināstag ud xrafstarōmand bawēd
244.0
ān ī pid ī xward bawēd ēg ān ī ast dādīhā bē ō astōdān kē X az būm ēdōn abar dāštan az abar ēdōn aškōb ēstēd tā pad ēč ēwēnag wārān ō nasāy nē wārēd u =š āb ul awiš nē ēstēd u =š nam ul awiš nē dahēd u =š sag ud rōbāh awiš šawēd nē X šāyēnd u =š rōšnīh ō mad rāy sūrag pad =iš kird ēstēd barēnd abēr dastwarīhā guft ēstēd
245.0
ān astōdān ast kirdag az ēk sēg
246.0
u =š nihumbag az ēk ī X ī sūragōmand tāšīdan passāxtan
247.0
u =š pērāmōn pad sang ud gač hambarēnīdan ,
248.0
haštdahom pursišn ān ī pursīd kū ruwān ī ahlawān ī ruwān ī druwandān ka mard ō mēnōyān šawēnd ēg =išān , ohrmazd ahriman be abāyēd dīd , wēnēnd ayāb nē ,
249.0
pāsox ēd kū ahriman rāy guft ēstēd kū =š spāh nēst
250.0
ohrmazd čiyōn mēnōyān mēnōy pad ān ī gētīyīg ud ān =iz ī mēnōyīg šnāyišn ī kirb wēnišnīg
251.0
spurr nē bē pad xrad ud zōr hangōšīdag wēnīhēd ī čiyōn guft bē ō spitāmān zarduxšt ka =š dastdahišnīh zāyist
252.0
u =š guft kū dast ī ān mard ī ašō gīr ,
253.0
čē =m pad tō xwēš dēn hučašmkunišnīh ī and kū gīrēš wēnēš ān kē az ān ī man xrad xwarrah mehmānīh wēš
254.0
abar ruwān ī ahlawān ud druwandān pad ān ī mēnōyīg sōhišn ān gāh wēnēnd kē ohrmazd dīd sahēnd
255.0
ēdōn =iz ān ī ahriman X pad ān ī xrad ī =š dādār abar burd bārīkīhā be šnāsēnd tā ohrmazd ud ahriman
256.0
ud ān ī ahlawān pad bōxt az ahriman madan ī ō ohrmazdīg axwān šād bawēd
257.0
ō ān ī ohrmazd ud xwarrah namāz barēd
258.0
ud ān ī druwand pad frēbīhistan az ahriman āyēnd az ohrmazdīg nēm bišttarw ud pašēmāntar bawēd
259.0
zayišn āmurzišn , handēšīhēd ud pattāyīh dastgrawīh ī =š pad xwēš dastdahišnīh andar druz
260.0
az mēnōy ān paywāzišn ī az xwābarān xwābartom rasēd , pad rist pad ristāxēz zamānag ,
261.0
nōzdahom pursišn ī kū ahlawān ud druwandān ī ō kūgyāg šawēnd ,
262.0
pāsox ēd kū ēdōn guft ēstēd kū widordān murdagān ruwān se šab pad zamīg hēnd
263.0
u =šān fradom X šab az humat šnāyišn az dušmat bēš dudīgar šab X az hūxt rāmišn az dušhūxt dušxwārīh pādifrāh ud sidīgar šab az huwaršt frayādišn az dušhuwaršt pādifrāh rasēd
264.0
ud ān sidīgar šab andar bāmī ō harburz gyāg ī āmār šawēnd
265.0
kird āmār ō pul andar rawēnd
266.0
ud ān ī ahlawag pad puhl widerēd pad ulīh
267.0
agar hamēstagānīg tā ō ānōh kū =š gāh ud agar abāg wēškirbagīh frārōn tā =z ō wahišt agar abāg wēškirbagīh frārōndādīh srūdgāhān tā =iz ō garōdmān šawēd
268.0
ān ī druwandān az tēx ī puhl ayāb az mayān ī puhl ōbadēd
269.0
pad nigūnīh ō dušox ōbadēd tā ān ī pāyag ī =š druwandīh nigūnīhēd ,
270.0
wīstom pursišn ī ān ī pursīd kū činwad puhl ud čagād ī dāytī X ī X rāh ī ahlawān ud druwandān čiyōn
271.0
ka ahlaw čiyōn ka druwandān čiyōn bawēd ,
272.0
pāsox ēd kū dastwarān ēdōn guft kū čagād ī dāytī andar ērānwēz pad mayān ī gēhān
273.0
tā nazdīkīh ī ān čagād ī ayāft ān dārgirb mēnōy činwad puhl ī az war ī harburz abāz ō čagād ī dāytī abgand ēstēd
274.0
čiyōn ān ī puhldār homānāg ī was pahlūg kē =š pušt ast ī frāx ud ast ī bārīk ī tēz u =š frāxsōgīhā ast ēdōn wuzurg ī =š wīstšaš nāy pahnāy u =š tēzsōgīhā ēdōn pad bārīkīh ēdōn čiyōn awestarag tēx ka ahlawān ud druwandān ruwān rasēnd ō sōg ī =šān niyābagīhā ast gardēd pad wuzurg xwarrah ī dādār ud framān ī ōy rāstāmār ud puhlbān ahlawān frāxpuhlīh bawēd and čand nō nēzag bālāy ud drahnāy kē =š ǰud ǰud dagrandīh se nāy druwandān tundpuhlīh bawēd tā =z hangōšīdag ī ān ī awestarag ī tēx
275.0
ud ān ī ahlawān pad puhl widerēd u =š rāh xwašīh ī pad ān ī hangōšīdag ī gētīyīg ka andar wahār ī zargōn tan ī anǰīr ī wiškuft ī hubōy pad ān ī X mēnōy pōst xwašarz wehīhārzōgīhā wāzārīhā rawāh
276.0
ān ī druwandān čiyōn gām ō puhl nihēd ud spurīh ud tēzīh rāy az mayān ī puhl ōbadēd ud nigūn gardēd
277.0
u =š ō dušox rāh axwašīh pad ān hangōšīdag čiyōn gētīyīg andar mayān X X ī ān ī gandag ī murdag astān ānōh kū ān ī tēz mōgdōz , nigūn bē ul tēx abzīd ēstēd
278.0
ud nākāmtazišnīhā rawēnd abāz ēstād drang kirdan nē hilēnd
279.0
and meh ān xwašīh abar ruwānān , hangōšīdag ī gētīyīg čand meh ēdōn mēnōy sazišnīg az gētīyīg ī sazišnīg ,
280.0
wīstdōwom pursišn ī ān ī pursīd kū ka ān ahlaw bē widerēd kē =š was yazišn ī yazadān was kār kirbag kird ēstēd mēnōy dāšn mēnōy yazišn dēn mazdēsnān āb ud zamīg urwar ud gōspand bē ō ohrmazd garzišn kunēnd az bēwiderišnīh ān ī ahlaw
281.0
u =šān dušxwār bawēd ka az gētī bē šawēd ayāb čiyōn bawēd ,
282.0
pāsox ēd kū ān ī ahlawān ī pad andar bēwiderišnīh gētīyīg dardwidār pas =iz az bēwiderišnīh tā bēwidošt ī =š pad ān škeft āmār čēhdār
283.0
ud pas az āmār pad ān ī xwēš ī gāh urwāhmen
284.0
pad ān ī ka =š hamnāfān ī andar gētī X X X X kē =šān ān ī X mēnōyān nē =z anayāft ud ān ī ōy gāh ašnāxt gētīčihrīhā andar dranāyīg andōhōmand abar yazadān abaxšāyišn ganāg menišn
285.0
mēnōy dāšn dēn mazdēsnān mēnōy ī weh ī andar gētīyīg kē =šān ōy =iz ahlaw andar gētī stāyīdār ud warzīdār rāyēnīdār ud pānag pahrēzēnāg ud ayār bawēd abar ān ahlaw ī az gētīyīg ī pānagīh ōpahrēz ayārdahišnīh apparīhēd appurdār garzišn abar pāddāšn paywandišn abar =iš nōg pānag ārāstār xwāyišn ō dādār kunēnd
286.0
dādār wisptuwān , paywāzēd ud ō druz wānišn ō X ahlawān šnāyišn ō ān ī weh dāmān pānag ud frayādāg baxšēd
287.0
čiyōn guft ēstēd kū ān andar harw zamānagīhā dēndastwar ud rāyēnāg ī dām paydāgēnēd kē andar ān ī pānagīh ud yazadān kāmagīh abar rawāgīhēd ,
288.0
wīstseyom pursišn ān ī pursīd kū gyān ka az tan ī mardōmān frāz stānēnd čiyōn bē šawēd ,
289.0
pāsox ēd kū pad ān homānāg guft čiyōn ka az ātaxš suxrīh ul uzīhēd čē ātaxš ka sōzišnīg sōxtanī mānd ka nōg sōzišnīg nē ayābed ud ayāb wizāyišnīg abar rasēd ēg =iš suxrīh garmīh aziš bē šawēd
290.0
gyān čiyōn pad atōšagīh andar tan nē ēstēd homānāg bē šawēd
291.0
hampassazag dēndastwarān ēn =iz guft kū margōmand mardōmān pad dānišn hangām wēnēnd ka mēnōyīhā band =ēw ō grīw kird
292.0
ka =š zamānag frāz mad ēg =iš pad ham bar rāyēnīd u =š ō ōbadišn gyāg ī marg az =iš būšāsp abespārd X
293.0
u =š tēz , āšōbēnēd ud ōš az =š zarmān stānēd nērōg
294.0
pad ān abespārēd anōšrawišn tazišn ī abzārān kē =šān darrēnāg hēnd abāz ēstēd
295.0
wizīr kē xwadīg ud andarōnīg buzešk ast widarg ī rōšn nē ayābed
296.0
u =šān āšuftōšīh rāy ō čārīg kār rāh bast bawēd
297.0
pad agārīh ī abzārān rawēd ruwān ī amarg tan kadagxwadāy abāg gyān zīyēnāg az tan agār ō ruwān ī amarg čiyōn kadagxwadāy ī dānāg az kadag ī awērān ō mān ī hupēsīd
298.0
ōh =iz guft pēšēnīg frazānagān kū gyān ast mēnōy zīyēnāg ī andarg ruwān ī tan tā ruwān hamkadag ī tan zīndagīh dārēd tan
299.0
widord tan zīndagīh ī ruwān ast ,
300.0
, wīstčahārom pursišn ān ī pursīd kū ka ān ī , ahlaw bē widerēd ruwān šab fradom ud didīgar ud sidīgar kūgyāg nišīnēd čē kunēd ,
301.0
pāsox ēd kū ēdōn guft ēstēd kū ruwān ī mardōmān xwad mēnōy ī tan pas az bēwiderišnīh se šab pad zamīg bawēd
302.0
X gumān ī abar xwēš gāh andar bīm ī az āmār ud tars X ud bīm pašag ī az puhl ī činwad rāy sōhist ud čēhān nišīnēd abar xwēš kirbag wināh nigerēd
303.0
ruwān ī andar rāh =ēw ō ham mēnōy ī tan kē =š hamsōhišn hammārišn ast abar ī =š wināh kird kirbag ī =š kam kird čašmagāh bawēd
304.0
u =š fradom šab az xwēš humat dudīgar šab az hūxt sidīgar šab az huwaršt rāmišn ō ruwān hāzēd
305.0
agar abāg =iz ahlawīh wināh ast ī =š pad bun ēstēd fradom pad tōzišn dušhuwaršt pādifrāh ham sidīgar šab rasēd
306.0
ham sidīgar šab andar bāmag nigāhbed ud ganǰwar ud kirbag čiyōn hučihr kanīg =ēw ō padīrag āyēd
307.0
abāg hambār ī xwēšīg kirbag ud frēg čand atōxt wināh ud bazag bē ō āmār rasēd rāstīhā āmārīhēd
308.0
pad mānd wināh puhl , pādifrāh widārēd
309.0
ud tōxt dušmat dušhūxt dušhuwaršt abāg frayādāg ud rāmēnāg mēnōy ī xwēš ud humat hūxt huwaršt bē ō garōdmān ayāb ō wahišt ayāb ō hamēstagān ī ahlawān ānōh kū =š andar ahlawīh gāh ast awiš franāmēd ,
310.0
wīstpanǰom pursišn ān ī pursēd kū ān ī druwandān ka be mīrēd ruwān šab ud dudīgar kūgyāg nišīnēd
311.0
čē gōwēd kunēd ,
312.0
pāsox ēd kū ān ī šab se ruwān pad zamīg bawēd
313.0
abar menišn gōwišn kunišn ī ān ī xwēš tan nigerēd
314.0
ud gumān ī abar xwēš gāh ud garān bīm ī az āmār meh tars ī az puhl škeft ud bīm ī dušox rāy sōhist ī menišn garān čiyōn bīm ī nimūdār
315.0
ud ruwān andar rāh =ē mēnōy ī tan abar kirbag ī =š nē kirbag kird ud wināh ī =š hangrāyīdār ud čašmagāhdādār
316.0
fradom šab az xwēš ud dušmenišnīh ī dudīgar šab az dušgōwišnīh ud sidīgar šab az xwēš duškunišnīh ī awištābmand
317.0
bē az kirbag ī =š andar gētī kird ēstēd fradom šab mēnōy ī humenišnīh ud dudīgar šab mēnōy ī hugōwišnīh sidīgar mēnōy ī hukunišnīh bē ō ruwān , rasēd u =š rāmišnīg ud frayādāg bawēnd
318.0
ud sidīgar šab andar ī bāmag nigāhbed ī =š wināh pad čarātī ud kerb ī samgen rēman ī āzārdār abāg hambār ī =š wināh ō padīrag āyēd
319.0
ud gandag wād ī abāxtarīgīhā bē ō padīrag āyēd
320.0
ud astwisistīhā pad X ud agāmtazišnīhā bē ō āmār rasēd
321.0
frēftagīh frēftārīh ud abārōndēnīh ud ašōgenīg zūrgō hamē wehdēnwār ōbadēd ō dušox kunīhēd ī ,
322.0
wīstšašom pursišn ān ī pursīd kū čiyōnīh ī wahišt ud āsānīh xwašīh andar wahišt čiyōn ast ,
323.0
pāsox ēd kū ulīhīg ud abrāzīg bālistīg rōšntom hubōytom ud pāktom ud hučihrīhātom abāyišnīgtom wehtom ud gyāg māništ ī yazadān
324.0
u =š andar ast hamāg āsānīh ud rāmišn , urwāhm ud wišīdāyīh ud nēkīh wēš ud weh az =iz ān ī mahist ud abartom nēkīh rāmišn ī pad gētī
325.0
u =š nēst ēč niyāz ud dard bēš ud dušxwārīh
326.0
u =š xwašīh Y nēkīh yazadān az ān ī hamēšagsūd gāh ganǰ ī purr ī akāhišn anabesīhān akanārag
327.0
ud wahištīgān andar wahišt abēbīmīh ī az anāgīh čiyōn ō apetyāragīh rasišn ī nēk yazadān čiyōn ō xwēš kirbag passazag
328.0
ēd ī , frāyist nēkīh mēnōy ī az ān ī gētī ān akanārag ud hamēyīg az ān ī kanāragōmand ud gēhānīg ,
329.0
wīsthaftom pursišn ān ī pursīd kū čiyōnīh dušox dard dušxwārīh pādifrāh ud gand ī dušox čiyōn ast ,
330.0
pāsox ēd kū frōdīg zofāyīg ud nigūnīg ud tārīktom ,
331.0
gandagtom ud samgentom anabēdāntom ud wattom gyāg ud gilistag ī dēwān druzān
332.0
u =š nēst andar ēč āsānīh ud urwāhmenīh
333.0
u =š andar ast hamāg gandagīh ud rēmanīh dard ud pādifrāh ī bēš ī ud zarīg anāgīh dušxwārīh aziš
334.0
u =š nē hangōšīdag ēč gandagīh rēmanīh dard anāgīh ī gētīyīg
335.0
čē nē hangōšīdag ēn =iz anāgīh ī gētīyīg ō ān ī =š aǰomā nēkīh u =š damišn az bunkadag ī anāgīh
336.0
ud and garāntar ān anāgīh andar dušox az =iz garāntom tars ī pādifrāh ī abar ruwān az ān ī pad tan wattarīh ī dēwān
337.0
tār mānāgīh ī ān anāgīh ō dušox ī ī =šān kamālag ī ahriman purrmarg
338.0
ud čimīg guftan ī dastwarān saxwan ēd kū abārīg harw tis bīm wēš kū xwad tis
339.0
ud dušox xwad tisē wattar kū bīm ,
340.0
wīsthaštom pursišn , ān ī pursīd kū sidōš čim čē ast ka andar se rōz yazišn drōn ē srōš framāyēnēnd kird ,
341.0
pāsox ēd kū gyān ruwān ka az mēnōy ud waxš bē ō gētīpaymōgīh rasēd u =š dard ud wizāyišn abar widard ēstēd nāzuktar
342.0
u =š parwarišn zāyišn paristišn ud pānagīh pāsbānīh abāyišnīgtar ud awizīrišnīgtar ,
343.0
pēmxwarišnīh ud ātaxš X hamēšag pākīhā andar abāyēd
344.0
ēdōn =iz ka az tanōmandīh bērōnīhēd u =š dard ud gyānkanišnīh abar mad ēstēd hamgōnag nāzuktar
345.0
u =š pānagīh pāsbānīh frayādišn ī az mēnōyān gētīyān abāyišnīgtar
346.0
u =š mēnōyčihrīh rāy dāšn ī yazadān ī frayādišn ī mēnōy nērangīg frayādišnīgtar
347.0
ātaxš =iz X ān ī andar yazišn ēwēntar
348.0
pad ham čim se rōz ka ruwān paywastagīhā yazišn ātaxšsōzišnīh ud pāk§ abārīg ud dēnīg nērangīg pāsbānīh pēmxwarišnīh framūd ēstēd
349.0
az ān čiyōn pāsbānīh pānagīh gētīyān az dādār framān srōšahlī ān ruwān se rōz ud šab mēnōywaxšīhgāh andar gētī ud pānag dārēd ud pad ān ī srōš pādifrāhīh ī ud āmārīhēd pad =iz ān ī srōš āmārīh
350.0
ud pad ān čim se rōz ud šab yazišn srōš kirdan paydāg čim
351.0
rōz ī tasom yazišn ardāyfraward framūdan kirdan ham ruwān abārīgān ardā frawardān ī astān būdān az gayōmard ī abzōnīg ō sōšāns ī pērōzgar ,
352.0
wīstnohom pursišn , ān ī pursīd kū yazišn ī srōš any šnūman ī did abāg kirdan nē pādixšāy
353.0
čē čim rāy ka =š ǰudāgīhā yazēnd ,
354.0
pāsox ēd wispān xwadāy dādār kē xwābar abar xwēš dām ud grāmīgdār xwēš rāstbandagīh ī =š dād ō srōšahlī ī ǰudāgīhā yaštan
355.0
ka nē ān ī ōy nām wasīhā gōwīhēd nē =z ān ī amahrspandān nām abāg ōy yaštan pad ēn čim ,
356.0
wīstnohom pursišn , ān ī pursīd kū šab ī sidīgar pad ōšbām ān drōn , se pad šnūman ǰudāgīhā yaštan čim čē ast ,
357.0
pāsox ēd kū drōn ē kē =š šnūman rašn aštād šnāyišn ī ōšbām ud gāh ušahin rāy čē gar ī ušdāštār andar šnūman aštād X yazad gōwīhēd abāg aštād ī gāh ī ušahin šnūman
358.0
xwarrah xwadāy ī ān hangām āmār šawēnd ā =šān widār pad ōš ī bāmīg ,
359.0
drōn ē kē pad šnūman wāy ī weh
360.0
X X X X X X X X ēd =iz rāy ka čiyōn ī wāy ī wattar appurdār ī ud zadār ī ēdōn =iz ī wāy ī weh kōšīdār ud ham padīrag ī wāy ī wattar u =š wizūdār az gyānapparišnīh
361.0
padīriftār ud pānag ī gyān drōn rāy ī ,
362.0
sīhom pursišn , ān ī pursīd kū ruwān ī ahlawān ka bē ō wahišt šawēd pad čē ēwēnag šawēd
363.0
u =š kē padīrēd kē nayēd
364.0
u =š handēmān ī ohrmazd kē kunēd
365.0
u =š az ahlawān ī pad wahišt kas bē ō padīrag rasēd
366.0
u =š kas pursišn aziš kunēd ayāb čiyōn
367.0
u =š āmār ī pad wināh ud kirbag abar kunēnd
368.0
u =š andar wahišt āsānīh xwašīh čiyōn nimāyēd
369.0
u =š xwarišn čē
370.0
u =šān ayārišn ī bē ō gētī bawēd ayāb nē
371.0
ud sāmān ī wahišt paydāg ast ayāb čē ēwēnag ,
372.0
pāsox ē kū ruwān ī ahlawān bē ō wahišt pad zōr ī ān mēnōy ī kirbag abāg wehīh mēnōy ī ruwān parwānag pad paymān pāyag ud tāyag ī =š xwēš kirbag abāg kirbag mēnōyīg bē ō gētī raγ wardyūn ud wāš ud čahārag ud ǰāmag payrāyag abzārān ī abāyišnīg mēnōyafšānīhā bē ō wahišt ayāb ō garōdmān ānōh kū =š gāh ast franāmēd
373.0
u =š wahman amahrspand ō ohrmazd ī dādār handēmānēd
374.0
az ohrmazd framān gāh ud mizd paydāgēnēd
375.0
ud ān ohrmazd X handēmānīhā pad ān ī wēnēd dānēd ud ayābed šād bawēd ī
376.0
ohrmazd ī wehdahāg hudādār andar =iz mēnōyān paydāg
377.0
X X X X X X X X X X X X X bē ān ī ka pad wuzurg xwēš dādār mēnōyān gētīyīg wēnišn paymōzēnd ox =iz ō gētīyān mēnōysōhišnīg wēnišn abyōzēnd ēnyā ox pad gētī sōhišn mēnōyān dīd pad ān ī hangōšīdag tuwān čiyōn ka tanīhā wēnēnd ī kē =š ruwān andar ayāb ka ātaxš wēnēnd kē =š warahrān andar ayāb āb wēnēnd kē =š xwēš mēnōy andar ast
378.0
bē pad ān handēmānīh ohrmazd ān ruwān wēnēd ēwar
379.0
čē ohrmazd wispān wēnēnd
380.0
ān =iz druz ruwān čandīh az ān ī ohrmazd andar mēnōyīg sōhišn abyōzīhēd pad nimūdan ī az ān ī ohrmazd urwāhmānīhēd
381.0
u =š ahlawān ī andar wahišt kē =š gētī paywand ī dōst ud hamdēn ud hamgāh būd hēnd dōšāramnimāyišnīh ud drōdpursišnīh mānāg burzišnīgīh ī az madan ī ō wahišt ī u =š hamēyīg nēk būd ī andar wahišt gōwēnd
382.0
ud āmār ī pad wināh ud kirbag abar wahištīgān nē bawēd ī xwad andar ēn mādayān škeftpursišnīh
383.0
čē ruwān ī widardagān bē ō wahišt kirdāmārīh ud tōxtwināhīhā ēdōn rasīd ī ka =š tā frašegird ānōh gāh
384.0
ō nōg āmār aniyāz
385.0
ud ān ī āmār bawēd pad hangām ī āmār
386.0
bawēd āmārgar ohrmazd wahman mihr ī srōš rašn
387.0
harw ud ēk pad xwēš hangām hamāg pad rāstīh āmār kunēd čiyōn pad dar ī xwēš pāsox nibišt
388.0
ān ī xwarišn rāy pursēd gētī xwarišnān pad dō rāh bawēd ēk ačaxšišn ī az X aweštāb ī az āz ud ēk pad urwāzišn ī ō frazāmišn
389.0
ī andar wahišt aweštāb ī az āz nēst pad wēšrāmišnīh urwāz
390.0
pad ān homānāg ī ō gētīyān nām mēdyōzarm rōγn
391.0
u =š čim ī ān nām ēn kū gētī gētīyīg xwarišn ān ī az gōspandān bar pāšom guft ēstēd
392.0
andar ān ī gōspandān bar pad xwarišnīh šīr rōγn
393.0
, andar rōγn ān pad wehīh stāyīd ēstēd ī dudīgar māh ī az sāl ka mihr pad gāw axtar bawēd ud kunēnd čiyōn ān ī māh dēnīg zarmiyā xwānīhēd
394.0
nām ī āmārišn nimāyišn ēn kū =š handāzag ī gētīyīg ān ī pāšom xwarišn ī andar gētī
395.0
ud ān ī ahlawān ruwān az wahišt ī garōdmān bēayārīhišnīh nē bawēd čē ān ī purr urwāhm oxān
396.0
ēg =iš nē aziš ayāsišnīh bē =š harw kas awiš purr , ayāsišn ast
397.0
bē ham ruwān gētī , gētīyīgān xwēšīgān hamnāfān X ayādīhēd ān ī huayād ud abrādarōd apetyārag ud hamāgrāmišn stī ī čiyōn pad frašegird bawēd X ,
398.0
urwāzēd pad xwēš hangām ud madan awi =š ayāstan
399.0
ham ruwān āsānīh ud rāmišn ud urwāhmen ī andar wahišt ud garōdmān pad paymān ristag ud ēwēn ī xwēš kirbag
400.0
hamāgēwēnīg āsānīh rāmišn ī čiyōn gētīyīgīhā az mard ī dōst ī dānāg ān paristag ī tarsagāh abārīg mardān ī frayādišnīgān ēd kē nāyrīg ī hugirb ī hušarm šōykāmag ān ī xīrpānag ī ārāstār abārīgān ērān ī sūdabgārān ēd =iz az stōrān pahān dadān murwān māhīgān abārīg gōspandān sardagān ēd čē az rōšnān ātaxšān , hutazišnān wādān brāzyāgīh ayōšustān huniyāgān X ēd =iz ī az fragān būm xānag hammis zamīgān ī hudahāgān ēd =iz ī az rōdān ud xānīgān čāhān hammis ābsardagān ēd =iz ī az dārān ud draxtān ; mēwagān ī ōy ǰōrdāyān ud wāstarān ud tarragān ud spramagān abārīg urwarān ī ēd =iz ī zamīgpassāzišnīh ī imišān ī dām hammis dahišnān ēd čē az ēwēnagān ud mizagān ī bōyān wēnišn ī xwaš ī hamāg čihrān zōrān kārān axwān abzārān bē ō margōmandān madan šāyēd
401.0
az ān mēnōy kirbagīg pad hangōšīdag homānāgīh ī dīdārag narān ud nāyrīgān ud gōspandān ātaxšān ī ādurān ud hāmōyēn ayōšustān sagān zamīgān ud ābān urwarān passazagīhā kirbag mēnōyīg ō ruwān , abyōxt
402.0
pad pāyag paymān ī =šān zōr ī az kirbagrāyēnīdārīh ī ān ahlaw ō ān ī ahlaw pad rāmēnīdārīh sazāg hangāmīhā ud abāyišnīgīhā sāzišnīh ud hamēšag rāmišn paywastagīhā ud aǰomābēšīhā ayābēd was =iz urwāhmenīhēd ;
403.0
ē ī =š andar gētī az bun handāzag nē waxt bē ō ān ī wahištīgān garōdmānīgān ēdōn rasēd ī =š ān =iz ī abartom nēkīh rāmišn ī gētīyīg nē hangōšīdag
404.0
bē pad , āgāhdārīh ō gētīyān nimūnag guftan nimūdan ī az gētī ēnyā ud kanāragōmand abāg akanārag ud asazišnīg abāg sazišnīgīh kāhišnīg abāg akāhišnīg hamhangōšīdag nē bawēd
405.0
ud gētī ast kanāragōmand ud sazišnīg ī kāhišnīg
406.0
ī ān ī asar rōšnīh ast asazišnīg akāhišnīg
407.0
ud ān ī hamāgsūd ganǰ hamēyīgsūd anabesīhišnīg
408.0
ud ān ī rōšn garōdmān gāh ān ī mizd fradom hāzēd
409.0
u =š tā ristāxēz ka gētī =z abēzag apetyārag bawēd xwad az =iš awardišnīg
410.0
pad ristāxēz ān meh weh pāšom hāzēd ud ǰāwēdān xwārīhēd ,
411.0
sīhēkom pursišn , ān ī pursīd kū ān ī druwand ka ō dušox šawēd čiyōn šawēd čē ēwēnag šawēd
412.0
u =š kē ō padīrag āyēd
413.0
u =š kē ī nayēd ō dušox
414.0
u =š az dušoxīgān kas ō padīrag āyēd ayāb čiyōn bawēd
415.0
u =š pādifrāh ī wināh ī =š kird pad ēwbār abar kunēnd ayāb =iš tā tan ī pasēn ān ham pādifrāh ast
416.0
u =šān andar dušox xwarišn čē bawēd
417.0
u =šān dard ud dušxwārīh pad čē ēwēnag
418.0
dušox sāmān paydāg ast X ayāb čiyōn ast ,
419.0
pāsox ēd kū druwandān ruwān pas az widerišnīh šab ī tasom ī kird āmār az puhl ī činwad nigūn gardēd ud kafēnēd
420.0
u =š wizarš dēwān sagēnīhā bastag ast u =š nayēd bē ō dušox
421.0
u =š abāg bawēnd mēnōy dēw ī hambūsīd az ān ī ōy wināh pad was čihrag gāh mānāg ī wimuštārān =iz rēštārān ud ōzanišngarān murnǰēnīdārān marān dušgirbān bazagēwēnagān ud anabāyistān anačarātīgān rēmanān gazān darrāgān xrafstarān gandagān wādān tārīkān sōzāgān tišnīgān gušnēnāgān X anāpuhrān ud abārīg frahist wināhēnāgān dardēnāgān kē =š pad hangōšīdag ī gētī bēškirdārān mēnōyīg abāg bawēnd
422.0
u =š ham handāzag zōr nērōg ī =š az ān ī ōy wināh wēxt ān ī tā bē ō frašegird zamān xwāyišnīhā dardēnēnd bēšišnēnēnd
423.0
pad ān ī wizarš nīdārīh akāmagīhā āyēd bē ō dušox handēmānīhēd ō druz ud gannā pašēmānīhēd az frēbišn ī wirēgīhā kāmagīh
424.0
az dušox abāzayāstār ō gētī škeft ārzōg ō kirbag
425.0
u =š xwarišn pad handāzag ān ī andar gandagtom pūdagtom rēmantom ud axwašīhtom
426.0
u =š xward nē urwāzišn ud frazāmišn ī bē pad niyāz ī =š az āz awištābīhēd ud gursag ud tišnag dārēd ǰuxt az ān bazagēwēnagīh
427.0
u =š nē bawēd sagrīh bē =š abzāyēd awištāb
428.0
gyāgīh andar dušox nē sāmānīhēd
429.0
pēš az ristāxēz ī az =iš ān dard pādifrāh aweštāb gīrišn ,
430.0
frašegird zamānag andar dušox
431.0
u =š wināh frāzag ān pādifrāh paywastag
432.0
u =š ān ī pādifrāh az druz mēnōy ī xwēš wināh ī pad ān ī ēwēnag ud handāzag abar rasēd ī =š āzārīd ud bēšīd ud ān ī wattar yašt ud stōd paristīd
433.0
pad frašegird zamānag ka X ān druz ān ruwānān ī druwandān se rōz andar āhun ī widāxtag widārēnd hamāg druzān dušmenišnīh ī =šān az wināh ud pad burišn ud škennišn ī ān āmēxtagīh ī ān ī druwandān ruwān ī wināh passazagīhā dard dārēnd ud awištāb dārēnd
434.0
pad ān ī abartom šōyišnīh pad ān ī widāxtag āhun bē yōǰdahrīhēnd az gast ud rēbag
435.0
pad ān ī xwābarīh abošīdārīh ī xwābar abartom āmurzēnd
436.0
az didom abēzagān bawēnd čiyōn pad hangōšīdag guft ēstēd kū abēzagān bawēnd dō ēwēnag ēk ī anālūd ēk ī āsnūd
437.0
ud pas az ān ī yōǰdahrīh nē bawēnd dēwān nē pādifrāh nē dušox ī abar druwandān
438.0
awēšān =iz wirāstag bawēd rāst bawēnd ahlaw adard amarg ī abīm ud abēanāgīh ,
439.0
u =šān abāg rasēd mēnōy ī ān kirbag ī ī =šān kird rāyēnīd ēstēd andar gētī
440.0
az =iš hurāmišn urwāhmen ayābēd ud pad pāyag paymānag ī ān ī kirbag
441.0
bē ruwān ī ahlawān pādāšn wehdādīh wēškirbagīh gāh weh ud pēšīg meh rāmišn šādīh wēš bawēd ,
442.0
sīhdōwom , pursišn , ān ī pursīd kū dušox pad kadām kustag ud kadām zamīg čiyōn ast ,
443.0
pāsox ēd kū gyāg ī druwandān ruwān pas az frōdmīrišnīh ī tan ī pad se wimand
444.0
u =š ēk hamēstagān ī druwandān xwānīhēd
445.0
gumēzag ast bē anāgīh wasīhā frāxīhā wēš az nēkīh
446.0
ud gyāg samgen tārīk ud gandag ud garān ī anāgīh
447.0
ud ēk ān ī wattom axwān xwānīhēd
448.0
ast fradom nixrōyišn
449.0
ud dēw māništ ānōh dārēnd
450.0
anāgīh pādifrāh purr ud āsānīh rāmišn ēč nēst ,
451.0
ēk druzestānag xwānīhēd ,
452.0
ast pad bun ī ox ī tom kū dēwān kamālāg dwārēd
453.0
ānōh hamāg tār hamāg anāgīh ud ābād mān
454.0
ēd se gyāg pad hangirdīg dušox xwānīhēd
455.0
ast abāxtarīg ud nigūnīg azērīg ī ēn zamīg tā =z abardom ud nigūnīh ī asamān
456.0
u =š dar pad zamīg X X az abāxtar X
457.0
gyāg =ē ast arzūr grīwag xwānīhēd
458.0
kōf =ē ī pad ham kōfag ī aruzūr nām az andar kōfīg kōfān pad dēwān meh nām andar dēn guft ēstēd
459.0
dēwān andar gētī hamdwārišnīh hanǰaman pad sar ān ī kōf čiyōn ān ī arzūr kamāl xwānīhēd ,
460.0
sīhseyom pursišn , ān ī pursīd kū az čagād ī dāytī rāh =ēw ī ašō’ān ō wahišt ēk ī druwandān ō dušox
461.0
u =š čiyōn pad ēwēnag ast ,
462.0
pāsox ēd kū ēk ō ulīh ēk ō nigūnīh harw dō az ēk
463.0
ud mayān ēn was ō šnāsišn bēčīšišn rāy nibēsam kū ān ī ahlawān ruwān pad ī činwad puhl widerēnd pad mēnōywāzišnīh
464.0
ud ān ī kirbag zōr ul ō star ayāb ō māh ayāb ō xwaršēd pāyag ud ayāb ān ī asar rōšnīh franāmēnd ,
465.0
ān ī druwandān ruwān az puhl ōbadišnīh u =š druxtār dēw ud rēman az ān ī ōy wināh hambāst u =š andar zamīg ō nigūnīh nayēd čiyōn harw dō rāh az ān ī puhl ī abar dāitī čagād ,
466.0
sīhčahārom pursišn , ān ī pursīd kū ēn gētī abē mardōm be bawēd
467.0
ēdōn ēč astōmand andar nē bawēd pas ristāxēz kunēnd ayāb čiyōn bawēd ,
468.0
pāsox ēd kū ēn gētī hamēšag az āfurrišn tā =z ō abēzag frašegirdārīh hagurz abē mardōm nē būd nē =z bawēd
469.0
ud gannāmēnōy aweh ēn rawāgkāmagīh nē hāzēd
470.0
ud nazd ō zamānag ī frašegird astōmandān az xwardārīh bē ēstēnd pad axwarišnīh zīyēnd
471.0
frašegird ud frazend az awēšān zāyēnd ān ī anōšag
472.0
ēd čē dagrpattāy ud huwirāy kirb dārēnd
473.0
ēdōn az astōmandān ast ī pad gētī hēnd
474.0
ka widardān mardōmān ast abāz hāzēnd abāz ud zīyēnd ,
475.0
sīhpanǰom pursišn , ān ī pursīd kū awēšān kē andar frašegirdārīh andar abāyēnd kē hēnd
476.0
kē bawēnd
477.0
čiyōn hēnd ,
478.0
pāsox X ēd kū abāyišnīgān ī pad ān ī pāšom kār gugān ī ōšmurd drāz
479.0
čē gayōmart =iz ǰamšēd ud zardušt spitāmān ašō’ān rad wasān wuzurgspāsān abzār ī frašegird frazāmēnīd rāy brēhēnīd
480.0
u =šān wuzurg awizīrišnī rāyēnīdārīh abar raft ō kirdan frašegird gīrēd
481.0
pad =iz ān ī frašegird nazdīkīh sāmān ī kirsāsp kē dahāg wānēd ud kayhusrōy kē az wāy ī dagrandxwadāy widārēnīd tūs wēw X abārīg čand wuzurgkunišnān ayārōmand X frašegirdkirdārīh
482.0
bē ān ī wāspuhragānīgtar frašegirdkirdār , X haft guft ēstēd ī =šān nām rōšnčašm xwarčašm frādadxwarrah wīdadxwarrah ud kāmagniyāyišn kāmagsūd sōšāns
483.0
čiyōn guft ēstēd kū andar panǰāhhaft sāl ī ristāxēzišnīh zamānag rōšnčašm pad arzah ud xwarčašm pad sawah ud frādadxwarrah pad fradadafš ud wīdadxwarrah pad wīdadafš kāmagniyāyišn sōšāns pad xwaniras ī bāmīg ud abēzag
484.0
paywastaxwīh bowandag ud hamwēnišnīh ud spurrīgīhādānišnīh purrxwarrahīh ī ān haftān frašegirdkirdārān ēdōn abd kū az kišwar bē ō kišwar harw ēk ō šaš āgenēn ēdōn hampursēnd čiyōn nūn mardōm ō hamgōwišn hamwēnišn hamkunišnīh pad uzwān ēk ō did saxwan X gōwēnd hampursagīh kunēnd
485.0
ham pāšomkunišnān pad šaš sāl andar šaš X kišwar pad panǰāh sāl andar xwaniras bāmīg amargīh winnārēnd
486.0
hamēzīndagīh hamsūdagīh rawāgēnēnd pad ayārīh zōr xwarrah ī wispāgāh spennāgmēnōy dādār ohrmazd ,
487.0
sīhšašom pursišn , ān ī pursīd kū ristāxēz čiyōn kunēnd ud rist čiyōn wirāyēnd
488.0
ka =šān rist wirāst bawēd čiyōn bawēnd
489.0
ka =šān kird bawēd ā =šān rōšnīh star ud māh ud xwaršēd andar abāyēd bawēd ayāb nē
490.0
ud draxt rōd kōf andar bawēd ayāb nē
491.0
ud gēhān hamčand ēn bawēd ayāb wēštar ud frāxtar bawēd ,
492.0
pāsox ēd kū wirāst ī kirdan ī ristāxēz abāg abd passāxtīh ud wuzurgīh
493.0
pas škeftsahišnīh abar dāmān kē anāgāh hēnd ān ī xwābar dādār rāzān ud tisān čiyōn harw nihuft ud rāz bē xwad ōy harwdānišn ī purrāgāh wispān ēnyā ēč az gētīyān ud mēnōyān ī anuspurr nē dānist
494.0
rāst gōwišn andar šnāsišn ī gētīyān ī āškārag kū čiyōn gōwēd framuštag ī frahang abāzāmōxtan az ān ī anāmōxt X āsāntar pad āmōxtan ud dēsīdag hambastag xānag abāzwirāstan az ān adēsīd dēsīd ud āsāntar ēdōn =iz ān brēhēnīd brēhēnišnīh hugartar ud škeftīh kam az dāmdahišnīh
495.0
pad xrad xwarrah wispāgāh wisptuwān dādār kē =š X dām dād ān ī škast nōg abāzdād nē škeft bē andak huzārag
496.0
ōh =iz dādār ī gāhān dād ān ī mēnōy dām abēzag anāhōgēnīd ān =iz ī gētīyīg dām amarg ud azarmān asōyišn ud apōyišn abēš ud adard tā ka čandīd andar tam dušīh druz kē xrad rāst wizīngar nē ud gāh ī spenāgīg bē astškennāg margēnāg ud dušāgāh ud frēbāg ud purrkēn ud wiyābānēnāg ud wišōbāg ud nanggar wanygar purrarešk
497.0
u =š ēdōn purr ast kēn frēb ud wiyābāngarīh wanyīdārīh ud wišōbišngarīh ud zadārīh kū nē ēwāz bē ō hambadīgān padīragīgān bē ō =z xwēšagān hamgundān hamsarān anāgkām ud wiyābānēnāg ud wišōbāg ud wanyēnāg ud kēnēnāg areškburdār
498.0
u =š az xwēš bun zofāy ī purrtār nihād ō tār sāmān ud rōšnān wimand
499.0
u =š pad samgenīh ud uskār ī dēwīg nigerīd ō rōšn ud anāhōg dām ī ohrmazd spennāg
500.0
u =š pad arešk ī purrkēnwarīh ī spurrdruxtārīh nixwārīd ō griftan wišuftan ud wanyīyēnīdan abesīhēnīdan ī ham hukird dām ī yazadān
501.0
u =š az zūrag nigerišn pad waran zūrmihōxtīhā framūd ī =š pad wanykirdan ī xwēš pērōzīh windīd šāyist
502.0
andar drang ī =z , nō hazangrōzim ān ī pad =iš wanyīhēd xwad druz
503.0
ud ōy ī abartom rōšnān xwadāyān xwadāytom mēnōyān mēnōytom wispagān ohrmazd ī dādār kē =š ō harw čār tuwān ayāftag xwad tuwān bawēd pad andarnēhištan ī ōy X druz ō parwastag rōšnān
504.0
u =š pad xwēš ud harwistdānāgīh šnāxtan ān ī druz wattarīh menišn ud zūrmihōxtīhā handēšišn āgāh būd
505.0
pad xwēš āgāhīhā ōy druz ōšīh nē padīrēd ān ī spenāgīg framāyišn ān rāstīhā bawišn
506.0
čē =š nēst ān ī wehīg gōhr ān ī abzōnīg xrad
507.0
nē wardēd az rōšnān wimand ud wehīgān kōxšišn tā rasēd ō dām ī kōxšēd pad uzmān ī parwandīhēd andar asemān ud drōšīhēd andar razmān dardīhēd purrpaymān ,
508.0
uzmāyišn spurrsāmān ī az =iš wišōbīhēd abzārān ānābīhēd zōr ī angramenīh
509.0
ud wanyīhēd zēn ī druxtārīh ud abesīhēd čār ī frēbāgīh
510.0
ud pad bowandagīh uzmūdagīh ud spurrdardīh ud škastspāhīh wisistrazmīh ud abesīhīdčārīh ulwāzīd ō bērōn parwast ī rōšnān pad anayāsišn anayāragīh ī did abāz awiš ,
511.0
ham wispwēn dādār ī ka =š andar nē hišt ahriman rōšnān ranǰ akanāragzamānīhā ēstādan ī druz pad handēmānīh ō wimandīgān pad andarnēhilišnīh X ǰāwēdānranǰīhā ō dām hamēyīg druz =iz handēmānīh hamēšagpīmīhā hā sahist
514.0
u =š pēškōšišn =iz druz ka =š any ō rōšnān nē kōšīd ud zadan ī ka rōšnān nē zad tōzēnīdan ī pēš az wināh ud kēnēnīdan ī pēš ō rāstīh ud dādestānīgīh kē =š awardišnīg nām xwābarīh ud akēnīh kē =š ōstīgān čihr ēdōn nē hamāg hangārd
520.0
ō ān ī pēšag dādār druz pas az drōzišn ud kōšišn zanišn ī rōšnīgān dādīg abāzdārišnīh az rōšnān zadār X rāy abarwēzīh ī xwēš spāh kōxšišn ān zanišnarzānīg zadār abāzzanišnīh ud ān ī kēnēnīdār kēnīg abāzkēnišnīh ān ī xwēš ī gāh ēbgad abāz ān ī anērmanīg wattarīh ud akārēnišnīh framūd
527.0
ud spenāgkārīhā wēnēd ī =š pad ān ohrmazdīg xrad ān ī mēnōyīg xrad andar ān ī brīnōmand zamānag ud ān ī kanāragōmand gāh ud ān ī sāmānmand razm ud ān ī paymānī ranǰ ān ī frazāmōmand kār padīrag druz adādagdāštār dādag kōšīd
531.0
andar saxt asemān zēndānīg parwastan tā spurrdardīhā ud spurruzmūdīhā bērōn abāz nē hilēnd
533.0
pad ān ī brīn zamān ī ān ī druz tarmihōxtīhā pērōzīh framūd ham druz hamist dēwān ālūdagīhā ud ānāstīhā ud pašēmānīhā apērōzīhā purrmaddardīhā bowandagīhā uzmūdīhā ud ēd čē zūrīhā ud hanǰāftabzārīhā ānāftnērōgīhā abesistfrēbīhā wišuftčārīhā ud stardīhā akārīhā bērōn abgand
538.0
andar wišuftahrimanīh wanydruz ud abesīhīddēwīh ud nēstpetyāragīh ān ī weh dām nōg ud abēzag abāz tuxšīd
539.0
ud ǰāwēdānīg frāz dāštan andar abēzag ud nēkrawišnīh anōšag winnārdan andarnēhilišnīh ī hambadīg nōg nōg padistīh ī =š pad drōzišn hamēšag handēmānīh ī =š ō dām ī yazadān ǰāwēdān tarsānīh ī rōšnīgīh aziš būd hē mehsūdtar dāšt
543.0
u =š abzār nē ān ī andarnēhilišnīh ī bē =š ān ī frazāmpērōzīh ārāst
544.0
u =š ān ī asarrōšnīh ī akanārag frāz brēhēnīd
545.0
ud ān ī hamēšagsūd ganǰ ī xwadād kē wisp gōhrān tōmagān čihrān ud zōrān kārān abzārān
546.0
ī az bunāfurrišn ī wehān dāmān andar dwārišnīh ī druxtār ēbgad
547.0
tā abdom dādīg/yazdīg pērōzīh ī huframān dādār
548.0
ud frazāmišn ī wispān kōxšišnān pad pānagīh
549.0
ud pāddāšn ī kirdspāsān šnāyišn ī ahlawān bēšazišnīh ī druwandān
550.0
ud winnārišnīh ī fraškerd abāyišnīg
551.0
ēd čē abzāyišnīhā
552.0
ud ēd čē pusyānīhā ud ēd čē zahagnērōgīhā
553.0
ud ēd čē zāyišnīhā ud ēd čē tōhmagīhā
554.0
ud ēd čē dāyagīhā ud ēd čē čihrīgīhā
555.0
ud ēd čē dānišnīhā
556.0
ud ēd čē rāyēnišnīgīhā ud rāyēnāgīhā
557.0
ud ēd čē ǰudgarīhā ēd čē ǰudōšmārīhā
558.0
ud ēd čē abārīg wasān frahīdagān ēwēnagān ud ristagān ī andar āwām āwām [T6035v čont ] zamānag zamānag
559.0
pad kayīh kū’īh čandīh ud čiyōnīh ī abāyišn bowandag az =iš rasānīh spurr u =m andar wht
560.0
u =š baxt nēkkird asmān pad se srišwadag
561.0
ī ēk pad ulīh paywast ō ān ī asarrōšnīh kē ān ī hamēšagsūd ganǰ andar
562.0
ud ēk pad frōdīh ayāft ō ān ī zofāy tom kē ōy purrwattarīh druz andar
563.0
ud ēk mayān ī ān dō srišwadag ēr ud abar az =iš
564.0
ān abartom srišwadag xwānīhēd garōdmān
565.0
darbušt kird pad abēzagīh ud hamāgrōšnīh ud wisprāmišn ud druzawišnēayābišnīh
566.0
u =š payrāst ān ī srišwadag ī ō apetyāragīhā xwānišn ī abēzagān amahrspandān kirdspāsān ahlawān
567.0
kē čiyōn āznāwar gurdag ī hambadīg ī awirāst bowandagīhā kōxšēnd andar ardīg
568.0
ud wānēnd hambadīg
569.0
ud wizārd xwēš guharīg ēwarzēnd ō haspīn
570.0
pad ān ī amahrspandān abāgīh ud ān ī dādār xwarrah
571.0
ud did =iz andar ō abēbīmīh ō dēwān zanišn ud ō wehān dāmān frayādišn xwāhēnd
572.0
čiyōn kē az darbušt čand abīm kē tigr ud sneh anayābag ud ō ērpānag tigr wihēd ud ō dōstān ayārēd
573.0
u =š ō ān ī ērtom srišwadag ī asmān pad ān yazadīg warz xwarrah wizārēnīd ǰuttarīh ud pad radīh
574.0
kū tā druz ī awehīh rasēd ud ān srišwadag purrtār ud purrdēw kunēd
575.0
ud škeft andar ān saxtīh ka [T6036r bačk to sīhēk 1] hazangrōzim bawēd
576.0
zēndān ī pōzēnag ristag ī dēwān ān =iz ī druwandān
577.0
kē dēw frēft ud az razm wirēxt pad wināh āsterīd bawēnd ud pattūgīhād andar
578.0
bē nē hilišn druz az parwastār ī rōšnān tā zamān ī brīn
579.0
ka spurrīhēd ān ī dēwān pādifrāh ud ān ī druwandān pašēmānīh
580.0
u =š ō ān ī mayānag srišwadag brēhēnīd ān ī gētī dām pēšradag ī az gētī ud mēnōy
581.0
u =šān andar awēšān dāmān dād ān ī rāyēnāg mardōm sālār ī dāmān ud ān ī wizīngar xrad abzār ī mardōmān ud ān ī rāst dēn ī pāšomdānišnān
582.0
u =š sāxt ān srišwadag ō razmgāh ī kōxšišn ī dōān ǰudgōhrān
583.0
u =š pad abartomīh ī ham srišwadag ēstēnīd rōšn xwar ud bāmīg māh ud xwarrahōmandān starān
584.0
u =š payrāst kū mad petyārag wāzēnd ud gardēnd pērāmōn ī dām
585.0
ud spīzišn ī dūr būm ud rōšnīh ud wārān wasān nēk yazadān zanēnd
586.0
ud wānēnd ǰādūgān parīgān kē azēr ī awēšān dwārēnd pad wināhišn ō dāmān
587.0
ud škeft kōxšānd ud abāzēstēnīdār bawānd ān gast ud seǰ
588.0
u =šān pad gardišn abrāz nišēb ud waxšišn ud nirfsišn ī dāmān bawād
589.0
ud purr ud ōgār ī zrēyān ud waxšišn ī rōymānān ud wālišn ī dāmān
590.0
u =šān aziš ud padiš wizīhād brīn ī rōzān ud šabān māhān sālān
591.0
āwāmān sadōzimān hazangrōzimān
592.0
u =š brēhēnīd bē ō pidānpaymōzīh ī xwad ast stīpaymōgīh čēr ī tagīg ahlawān frawahrān
593.0
u =š payrāst kū zamānag zamānag pad xwēš gōhrag ēstēnd
594.0
ud rasēnd bē ō gētīpaymōgīh
595.0
ud ān ī yalān ramag čand bowandag ō ān ī zamānag kār zāyēnd andar tōmag
596.0
ān ī purrfrazend čiyōn frawāg
597.0
ān ī pēšdād čiyōn hōšang
598.0
ud ān ī dēwzadār čiyōn tahmureh
599.0
ān ī purrxwarrah čiyōn ǰam
600.0
ud ān ī purrbēšaz čiyōn frēdōn
601.0
ud ān ī harwdōxrad čiyōn ahlaw manuščihr
602.0
ud ān ī purrōz čiyōn garišasp
603.0
ud ān ī xwarrahtōmag čiyōn kaykawād
604.0
ud ān ī purrxrad čiyōn ōšnar
605.0
ud ān ī āzādag čiyōn siyāwaš
606.0
ud ān ī abarkār čiyōn kay husrōy
607.0
ud ān ī burzāwand čiyōn kay wištasp
608.0
ud ān ī purrweh čiyōn ašō zarduxšt
609.0
ud ān ī gēhānwirāy čiyōn pišyōtan
610.0
ud un ān ī dēnabarg čiyōn ādurbād
611.0
ud ān ī mānsrīg čiyōn ōšīdar
612.0
ud ān ī dādīg čiyōn ōšīdarmāh
613.0
ud ān ī gāhānīg frazāmīg čiyōn sōšyans
614.0
andarg awēšān wasān warzāwandān xwarrahkārān dēnburdārān wehrāyēnīdārān
615.0
kē āzwar ō wānišn ī druz/drōzan ud kāmišn ī dādār
616.0
u =š ō kōxšišnīgān dāmān dād ud wīdwarīh baxt ī andar kōxšīšn pad wuzurg rāz ō ān ī pāšom nēkīh ī az wahišt pad fraškerd
617.0
u =š wāspuhragānīhā hunsand kird menišn ī āhōgēnīd zīndagān pad guharīg wihēz ī az anāgīh
618.0
ud ēn ōh =iz hunsand pad marg kū =šān sāmān dānēnd brīnōmand
619.0
ud frazāmōmand bawād anāgīh ī gētī pad zīndagīh brīnōmand
620.0
ud ma asāmān abrīn bawānd andar anāgīh ī gētī pad hamēyīg zīndagīh ī abāg dard
621.0
u =š pad wuzurg rāz ī purrabdīh guharīg amargīh ō zīndagān dād škeft
622.0
tā =š ān ī weh ud abartom ast amargīh ī petyāragōmandīh
623.0
čē hamēzīndag ī petyāragōmand ǰāwēdāndard
624.0
ud ōy škeft zōr ī ayāft paywand hamēǰuwān pad paywand ud nāf āwādagān ī weh andar petyāragōmandīh
625.0
ud hamēyīgīh ī zīndagīh kū =šān pad xwēš frazend āwādag ud zīndagīh paywandīhēd ī ǰāwēdān
626.0
ōwōn kū harw windēnd kahwanīh ī az wēmārīh zarmānīh
627.0
abāz nōgīhēd ǰuwānīhā pad xwēš frazend ud gōhrag hamē ka purr bawēd
628.0
ēk =iz az razmīg ī =šān kōxšišn pad wānišn ī =š hamnibard windēd
629.0
pad tarāzūg ālag ī āsān
630.0
ēn ōh =iz franāmišn ī ō wahišt
631.0
čiyōn ōy =iz abartom ī ašō’ān mahist ī paygāmbarān ud farroxtom ī zāyišnān gētīyān rad ahlaw zarduxšt spitāmān
632.0
ka =š az ohrmazd sp abar mad xrad ī harwispāgāh
633.0
u =š dīd ōy ī ahōš afrazend ud ōy =iz ōšōmand ud frazendōmand
634.0
ēg =iš ān ī hamēzīndagīh ī afrazendīhā samgen ud ān ī rawāgpaywandīhā ī ōšōmandīhā burzišnīg sahist
635.0
kū ān ī āsnūdag frazend rasišn ī ōšīdar ud ōšīdarmāh ud sōšyans ārzōgtar ud kāmagtar bawēd ud margīh az hamēzīndagīh ī ān ī xwēštan
636.0
ud ka ōy ī wispwehīh wispāgāh ārāst būd abzārān ī padīrag druz
637.0
čiyōn spar ō =šān mad [K35139v end] ān druz ī frēbāg gōhrag ud ganāg ud dwārāg ud anāgkām ud pēškōxšīdār
638.0
abāg akōman ud xešm ud zarmān būšāsp ud niyāzēnāg tangīh ud but baxt wāy ud waran ud astwihād ud wizariš dēw ud hamist māzandarān amar dēwān ud druzān
639.0
u =š tār tom ud waγ gazdum wyyp̄l spiš ud wiš ud zahr ud hammistīhā wināhišn andar ān ī ēr srišwadag
640.0
ul padīd dušdānāg ō ān mayānag srišwadag kē =š andar =uš dām ī ōhrmazd dād
641.0
u =š zad gāw u =š margōmand kird gayōmard u =š čandēnīd zamīg ud škast būm
642.0
ud tārīk būd dahišn
643.0
dwārist hēnd dēw ēr abar ud kustag
644.0
u =šān nixwārīd ō =iz ān ī abartom srišwadag kū garōdmān ī abēzag
645.0
ud mad hēnd ō abarīg asmān ī mayān srišwadag
646.0
ud ānōh haspīhist ēstēd mēnōywaxšīg ān ī banddrubuštīh
647.0
kē =š harwist bandān nigāh awiš
648.0
ī xwad ast wuzurg xwarrah ī kē =š harwist bandān nigāh
649.0
dēn abēzag gumānwizār
650.0
brāzīhist bāmīg ud dūrpayrōg čiyōn aibyānghan ī starpēsīd ī mēnōyāntāšīd wehdēn ī mazdēsnān
651.0
ēdōn =iz brāzīd rōšnān ī purrxwarrahān
652.0
u =š nē būd ādūgīh ēč dēw ud druz nē =iz ōy =iz dēwān dēw mazantom
653.0
pad ēč gurdīh tar ān wimand ul dwāristan
654.0
abāz kaft hēnd
655.0
nūn ka nē ayāft az tamīggōhr druz ud tār tohmagān dēwān abēzag mēnōyān yazadān rōšn garōdmān gāh
656.0
ī =š framūd pad zūrag mihōxt pērōzīh ī xwarrah gētī dām pad dō zay
657.0
ēk abesīhēnīd ī zīndagān pad margīh zōr
658.0
ud ēk dastgraw kirdan ī ruwānān pad druwandīh rāh
659.0
u =š gardīd ō margēnīdārīh
660.0
u =š pad =iš sālār kird ān ī dušdānāg ī xwānīhēd astwihād ud wizārīhēd astōmandān wišōbēš
661.0
u =š būšāsp dēw pad nizārēnīdan ī wēn abespārd
662.0
ud tab dēw pad stardēnīdan ud ōš āšōbēnīdan
663.0
ud āz dēw pad zōr ōgārdan ud pēš tanišn darrišnēnīdan
664.0
u =š zarmān dēw pad kerb wināhīdan ud tōš appurdan
665.0
wattar wāy wisānišn gyān az tan stōwēnīdan
666.0
xešm dēw pad kōxšišn sārēnīdan ōzanišn abzāyēnīdan
667.0
tamīgān xrafstarān pad gazišn kirdan ud wināhēnīdan
668.0
zāyriǰ dēw pad xwarišnān zahrēnīdan ud margīh wihānēnīdan
669.0
abāg niyāz ī nihānrawišn ud sam ī bīmkun ud xīndagīh tabišnafsār
670.0
was wināhišnīg zōrān wināstārān dēwān hamayār kird ō astwihād pad margēnīdārīh
671.0
u =š ō druwandēnīd dušoxīg kirdan ī =šān ruwān pad sālārīh ud drō
672.0
kē pad ēwāz ī dēnīg xwānīhēd mihōxt
673.0
čiyōn guft pad dēn kū ast ānand wattarīh čand harwisp dēw abāg dēwān dēw akōman kē abāg gannāymēnōy az ān mihōxtgōwišn
674.0
u =š pad ān ī drōdēnīh ud dām ayāftēnīd spazg frēftār ud waran xwaddōšag ud kēn ud arešk ān =iz ī čēr nangrawišnīh ud ān ī abārōn dāmārzōgīh ud aǰgahānīh ī pad xradxwāyišnīh ud purd ī pad ān ī nēstfrahang nimāyišnīh ud spōz ī pad ahlawčayēnīh
675.0
ud abārīg was wiyābānīg zōr wiyābānēnāg dēw hamayārīh kird ō ān ī drō dēn pad dāmān frēft
676.0
u =š kirrēnīd ō abārīgān =iz ēwēnag ēwēnag dāmān petyāragīh frahīdān dēwān druzān
677.0
u =š ō ayārīh ī ān razmīgān ēstēnīd
678.0
ud gugān =iz wasān parīgān ī tamīgān gōhrān kē =šān paymōxt rāh ī rōšnīgān
679.0
kū padēnd dwārēnd ud gardēnd azēr rōšnān ī wāzišnīgān
680.0
pad rāhdārīh ī andak mēnōyān ud gētīyān nihumbišn
681.0
ud ān ī awēšān rōšnīh ud xwarrah apparānēnd
682.0
ān ī az awēšān xwarrah baxšišnīh ud damišnīh az xwēš ud ō dāmān ud xīndag =iz ast dard marg ud hamist anāgīh ī mān ō =šān dēw
683.0
ud awēšān dēwān kamālīg ud māzanīgān dēwān hamist druzān
684.0
adādestānīhā ud pēšrawišnīhā ud pēšǰōyīhā
685.0
ud nē pad sūd frayād ī xwēš bē pad asazāg kēn ud anēwēn arešk wizārdan
686.0
wizāy ud anabāyišnīg kām ī abar rōšnān abesīhēnišn škeft yyzšn kōxšišn kōxšēnd ō wehān dāmān ī yazadān
687.0
ud ān ī yazadān spāh dādestānōmandīhā ud paskōxšišnīhā
688.0
ud nē pad pēškēnīh ud pēšwizāyīh bē pad xwēš zyān abāzdārišnīh
689.0
ud gundagān az kēnwizūdārīh gurdīhā ud amāwandīhā
690.0
frārōnīhā ud spurrabarwēzīhā pērōzīhabarwēzīhā kōxšēd
691.0
ud kōxšēnd ō ahriman ud dēwān tā frazāmkōxšišnān pērōzīh ī wehīgān
692.0
ka wanīyīhēd druz ud abēzagīhēd dām
693.0
ud čiyōn gētīyan andar gētī ān ī mēnōyān kār ud ristag šnāxtan az rāst nigerišn ī pad xrad ān ī zyk šāyēd
694.0
ī ka pad hangōšīdag ī rāst zōr ī xrad ān ī wēnābdāg ud zyk awēnābdāg
695.0
az ān ī mad ud ān ī pahrist nigerēnd šnāsēnd paydāgēnēnd
696.0
ōwōn frazām =iz ī hamkōxšišn dānišngugāhīhā ēwarpaydāgīhā dīdārīg daxšag wēnābdāg ud nišān ī āškārag
697.0
kē ō xrad ī pēšēnīgān
698.0
agar ōh =iz dānišn ī abar ēd abartom dar frahīd nihuft
699.0
druzān ī nihuftār az ayābišn ī gētīyan
700.0
az =iz ī mad ō gētīyan ayābišn
701.0
ud dānistan frazānag dastwarān ī pēšēnīgān u =šān abespārdan ō pasēnīgān ān bahrīhā ī paywast ō im zamānag padisāy appurdārān anāst abespārdārān frēftārān ī būd hēnd zamānag zamānag
702.0
andar =iz ān ī abyōxt ō =m dānišn ud mehīhā mānd pad =im ayādīh pad framāndahišn ox ī gētīyīg wizīrīg az =iz dēn ī =m ayādīh ast ī nē frazām ō nibēsišn parwāy frārōnkār ī awizīrišnīg
703.0
pas rōšn paydāg zōrīh ī ān druz andar amāh ēr
704.0
ud ān ī dādār payrāstrāhīh ī =š ō wanībūdagīh ud akārīh
705.0
ud ēdōn =iz purrnērōgīh ī spāh ī yazadān
706.0
ēwarīgīhā frazām pērōzīh ī wehīgān dādār
707.0
ud wisptuwānīhā spurrēnīdan ī =š bar ī xwēš wisp
708.0
ud dahišn pad hamēyīg bowandag nēkrawišnīh ī =š āfrīdagān pad =iš dīdārīg ud paydāg
709.0
was daxšag ud nišān az =iš paydāgīhā rōšn
710.0
ēk ēn kū dādār xwēš māništīg bagdādag ud druz abarrasišnīg andardwārīdag
711.0
u =š abarrasišnīh ō ānābišnīh daxšag
712.0
ēk ēn kū dām ī ohrmazd mēnōy ud gētī =iz
713.0
ōy druz nēst gētī bē wadmēnōyīh abyōzēd ō gētī
714.0
čiyōn andar hāwand =iš čēr ā =iz andar ēk ōwōn abarwēzīh paydāg ī mēnōyān gētīyān ī weh abar mēnōyān ī wad
715.0
ēk ēn kū =š az kōxšīdārīh pēšzadārīh paydāgzadīh ī pad frazām
716.0
čē druz adādkōxšišnīh pēšzadār
717.0
ud ān ī ohrmazd spāh pasīhā dādīg/yazdīg abāz zadārškenn
718.0
ān ī ka zūr druz andar dast ī dādār
719.0
bē agar =iz hāwandspāh ud hāwandnērōg hē
720.0
agar =iz harw ǰār ī dāmān zanēd ēk ǰār hāwandīhā dādīg/yazdīg abāz zanīhist
721.0
ēwarīgīhā az =iš paydāgīhēd kū ka =šān zadārīh zadagīh ud āgenēn hāwandīh
722.0
fradom ōy ī pēšdastzadārīh ud paskōxš zadag būd
723.0
abdom ōy ī paskōxš zadār ud ān ī pēškōxš zadag bawēd
724.0
čē ka pēšpahikār zanēd zanīhēd paspahikār abāz u =š dušmen zadag bawēd
725.0
ēk ēn kū ka kōxšīdārān zēnabzār ud kōxšišntuwānīgīh hāwand
726.0
hamē ōy ī pēšzadār pēš wanīyīhēd zadabzār
727.0
ud abdom ōy ī azēn u =š hamēmāl zēnōmand mānēd
728.0
ud pērōz wšwyyt zēnōmand abar ō azēn
729.0
čiyōn abarwēzkōxšāg abar akōxšāg
730.0
u =š hangōšīdag ī az gētī ōwōn čiyōn ka dō ’lt ī hamzōr pad hamkōxšišnīh
731.0
harw ēk tigr dārēnd ud harw ēk az tigrōmandīh ī ōy ī did tarsēnd
732.0
ud az awēšān ēk tanīhā tigr wihēd hamēmāl rasēnēd
733.0
ud pas ōy ī atigr aziš/u =š hamēmāl bowandagmenišn ud tigrōmand ud atars bawēd
734.0
andar tigrōmandīh ud atarsīhā ī xwēš atigrīh purrtarsīhā ōy ī pēšwistār ud abar tagīg kār pērōzīhēd
735.0
ka hāwandnērōgān pēškōxšīdār pērōzfrazāmīh apaydāg
736.0
ud ōy ī paswišuftpad xwadīh ī andar ōy ī wisptuwān ēraxtfrazāmīh ud wanībūdagīh agumān rōšn paydāg
737.0
ēk ēn kū pēš wanīyīh ī druz rāy wēmārīh ud margīh bē ō dām ī yazadān pēš mad
738.0
ud ka druz dwārist u =š wēmārēnīd axwān ī mardōmān
739.0
u =š marnǰēnīd ud margēnīd zahag ī gōspandan
740.0
pas pad dādīg/yazdīg abāzzanišnīh rāy bārīkīhā
741.0
bē ō dēwān wēmārīh ud margīh
742.0
bē ō dām ī yazadān ašō’ān bēšazišnīh zīndagīh ī bowandag
743.0
čiyōn =iš hangōšīdag ast wuzurg bēšazišnīh bē ō dām ī yazadān paywandēd
744.0
pad hamwinnārag rāsttarāzūgīhā rasēd
745.0
pad frazām
746.0
bē ō druzān wēmārīh ī garān margīh ī spurr
747.0
ud ō dām ī yazadān bēšazišnīh ud zīndagīh ī xwad
748.0
čiyōn =iš gētīyīgān hangōšīdag ān ī ka dō hampahikār
749.0
ēk pēškēnīhā ō hampahikār zahr ī ōzenāg dahēd ud xwad rūrag ī bēšaz xwarēd
750.0
ud paspahikār pasčāragīhā ō pēš pahikār zahr dahēd
751.0
xwad rūrag ī zahrānāb xwarēd
752.0
pas az zahr bēšazīhēd u =š dušmen pad