Sections

1.0
pērōzgarīh ī dādārohrmazd xwarrah ī wispdānāgīh axwīg pad dēn mazdēsn ,
2.0
panǰom abar gōwišn hufraward ādurfarnbay ī farroxzādān ,
3.0
hudēnān pēšōbāy būd pad =iz nibēg ī simrā xwānīhēd ,
4.0
hangirdīg passox ī ādurfarnbay ī farroxzādān hudēnān , pēšōbāy abar nišānagīg pursišn ēčand ī yākūb ī xālidān ī čiyōnīh guft ōstīg nāf hammist ramān ī =šān simrā =z xwānēnd kē =šān ham pursag frāz awi =š rasišnīg
4.5
5.0
abar sālār ēn ērtōhmag kē šud ānišān niyāgān pad spāhsālārīh ham dōstīgspāhīgīh ī ān ram andar spāhbedīh ī bōxtnarseh ī abar agārēnīdan ī abārōndādīh wadkunišnīh ī banīsrāyēl ud garān dēwēzagīh ud zyān ī az =išān pad frēstīd ī dahībed kay luhrāsp az ērānšahr abāg bōxtnarseh ō hrōm makdis ud ān kustag mānišn
6.0
ud hudēnwurrawišn pad društag mādayān dēnīg ristag pad ramīgān hamuskāragīh dēnāgāhīh društag =ēw ,
7.0
did rāyēnišnīhā nihang zamānīg xwāstār pas az was ān ī pahikārišnīg uskārišnīg čim wizōyišnīg pursišn ud passox warm hāwišt wisānīg xwāyišnīhā passazag ,
8.0
abar čiyōn padīrēnd paygāmbarān ī pēš az zarduxšt ēn dēn ud čiyōn āmad ī abēzag hufraward zarduxšt ī spitāmān , ,
9.0
ud kē āyēnd pas pas āwurdārān ī ham abēzag wehdēn kū az paygāmbarān frēstagān dēnpadīriftārān būd kē hangirdīg bowandag padīrift čiyōn gayōmard būd kē društag az =iš None čiyōn mašī ud siyāmak hōšang ud tahmōrub ǰam ud frēdōn ud mānuščihr ud sāmag kayān any =iz was pēšōbāyīh ī andar zamānag
10.0
u =šān padīrišn passazagīhā andar āwām āwām ō kardag kird
11.0
pad =iš dāmān petyārag spōxtan sūd frāxīh xwāst gēhān rāyēnīd ud dādār ud wehdahišnān šnāyēnīd
12.0
zarduxšt andar ān ī abēzag rōšnīh hāwend amahrspandān az bundahišn ōrōn ham hangirdīg ham ōšmurdīg bowandag afragūdazišīhā padīruftārīh ud rawāgēnīdārīh dēn andar gēhān rāy mēnōyīg tāšīd ud payrāst ēstād
13.0
ka ō gilpaymōgīh ud stī gētīyīgpaydāgīh frēstīhist wuzurg xwarrah ud rōšnīh ōwōn abardīdārīg būd ī ham čiyōn andar ǰam tōhmag az pōrušāsp pid ō dugdōw ī =š mādar mad tā =z zād ǰān dranā az xwēš mān gyāg kū franaft burzīhā ud stabrīhā brāh ātaxš homānāg ō dūr zamīg rōšnīh ud bām ud payrōg dād
14.0
ǰādūgān parīgān sāstārān kayagān ud karabān abārīg wattarān kē andar =iš zāyišn ud aburnāyīh ē pad murnǰēnišnkāmīh awi =š škarwist hēnd
15.0
kē margīh None kē agārīh None ud tā =z kē andardastōš ud abārīg armēštīh wēnābdāg hanǰaman paydāgīhā abar mad ud tā =z gurgān abārīg dadān kē =šān az ān ī pōrušāsp xwēšāwandān ī ǰādūg dēwēzag čārīhxwāhīh bē pad =iz uzmāyišn frāz awi =šān abgand
16.0
hamgōnag paydāg wahman pad =iš mehmānīh rāy pad zāyišn bē xandīd
17.0
mad ō pad hampursagīh ohrmazd padīrift dēn ahriman was dēwān druzān pad bīmnimāyišnīh X ud pahikārišnxwāyišn ud hāzišn awi =š frēstād hēnd
18.0
ud hamāg apadīrišnīhā ud zadagīhā stōwīhā az =iš wašt hēnd pad ān ī ōy ī abēzag frāzgōwišnīh ī abestāgēwāzīg ohrmazd kām pahlomīh wirāstzēnīh ud paydāgmizdīh ud nērōgxwadāyīh ud ēbgat zyān rāhnimāyīh ud frazām ī yazadān pērōzīh ud čē =š hamrāyēnišn
19.0
ud dēwān čiyōn pēš az ān andar gēhān āškārag dwārist nirfsīd hēnd
20.0
kālbod škast ō nihānīg zruftagīh ōwōn wašt hēnd wiyābānān paristagān ud frēftārīh škeftpahikārān pad =iš xwastūgīh būd
21.0
ka pad bowandag ud padīrift dēn az ohrmazd ō rāmšā kay wištāsp gēhānīgān hāxtan mad
22.0
wasēwēnag xwarrahkārīh ud dēw ud druz wānišnīh nimūdan menišn ī wištāsp šāh ud wasān was ān ī nihuftag xīr āškārag guft
23.0
ud ǰānōmand tan pad =iz bahr az =iš abē tan ham bahr ud tan ǰānōmand ud abāz kird ud padīrag was ǰādūgān dēwēzagān dēwhampursagān ud dēwdūdagān frēftārān škeftpahikārān ,
24.0
ud dō ān dwāzdah stargōwišn kē =šān nām az dwāzdah axtar hammist frazānagān ī bābēlāyīgān ēd kē az xwaniras sarxwadāyān frašn pursišn frēstīd hēnd pad pahikār bōxt
25.0
ud abāg ān ēwēnag mēnōyīg ud gētīyīg widimāsīg warzkārīh ī frāz az ǰamšēd anangōšīdagīhā paydāgīhist gugāy abāgīh ī =š wahman ašawahišt ātaxš abārīg čand wehmēnōy dīdārīg
26.0
pas =iz hamāg gōwišn ī ohrmazd dēn handāz ud tarāzēnišn frāz ō wištāsp ud gēhānān čiyōn škeft hamālēnīdārīhātar dāštan None frāztar =iz az ham pahikārān padīrag xwēš saxwan čiyōn hamēmālīhātar abāg ham pahikārān ēstād
27.0
ud ka =z pad xwarrahkārīh bōxt pahikārīh ud harw ēwēnag ī paygāmbarān waxšwarān daxšag ud paydāgīh ud ān ōwōn abāg ēwarīg X gugāy wābarīgānīhist
28.0
pas =iz rāmšā kay wištāsp bīm ī dēn petyārag ud any =iz būd
29.0
wihān az X dēn rawāgēnīdārīh ēg padīrift ka =š dīd wuzurg xwarrah rāz
30.0
hammist zarēr spandyād frašōštar ud ǰāmāsp čand kišwarīg meh paydāg hukunišn yazadān wāspuhragān mardōm ān ī ohrmazd ud amahrspandān kām ud abāyišnīgīh dāmān =ēw wizīrišnīg rawāgdēnīh wēnābdāg be dīd
31.0
abdom dēwān hāzišn dagrēnišn be dīd pād az ōšmār X hambadīg kōšišnīhā padīrag ēstād hēnd
32.0
ud was ardīg ud ōzanišn būd ī abēzagīhā
33.0
būd kū gumēzagīh dēn andar gēhān bē raft
34.0
u =š hēnd hamdēn abēzag nōg āwurdārān spurr rāyēnīdārān ušēdar ušēdarmāh sōšyans
35.0
pad bowandag rawāgīh ēn ohrmazd dēn bawēd harwisp ī weh dām apetyāragīh ud hamāg xwārīh ,
36.0
abar ān ī az abzōnīgīh pēšxradīh purrwēnagīh ī zarduxšt paydāgīhistan paydāg paydāgīhist kū az =iš gōwizār čiyōn pērōzīh ī kay wištāsp ērān abar arǰāsp ud xyōnān abārīg anērān anōšmār ēwēnag
37.0
ēk tis andar ān dar None abārīg wizīdārīh wištāsp kišwarānān andar ān ē abāyēd
38.0
ud ōzad ī tūr brādrōrēš ō xwad zarduxšt wirāstan ī srid tā X rah
39.0
ud čē andar ān dar nāmčištīg tisān ī andar zamānagīhā paspasmadan X rasēd ī az =iš wizendkarān čiyōn aleksandar ī ud aγrērad zadār malkūs ud dahāg ud abārīg wizendkarān wurrawišnwārān =iz mašīh ud mānī ud abārīg
40.0
ud āwāmīhā čiyōn polābdēn ud āhenabargumēxt ud abārīg ud dēn ārāstārān winnārdārān āwurdārān čiyōn arduxšahr ādurbād husraw ud pēšyōtan ušēdarān ušēdarmāh sōšyans abārīgān , ,
41.0
ud rastag kunišn nišānīhā andar āwām āwām ō paydāgīhmadan rasēd
42.0
ēd čē ǰāmāsp az ān ī zarduxšt hammōg bē guft ud ast ī nibišt ǰōmā abestāg ud zand ī pad gāwpōst§ ud zarr nibišt ēstād pad ganǰ ī xwadāyān dāšt
43.0
dahībedān dastwarān aziš būd ī wēš pačēn kird
44.0
ud pas =iz ō =z āgāhān ud wināhīdārān =iz aziš ast ī mad būd ī ǰuddādestānīh ǰudwēnišnīh abar barēnd ,
45.0
abar wizīdagīh ud pahlomīh ī tōhmag ī ērān kū čiyōn ō dahišn ēbgad ud āhōggumēzišnīh mad fradom andar baxšišn ī tōhmag az frazendān ī siyāmak abērtar huxradīh ud huxēmīh ud humihrīh huspāsīh hušarmīh ud ēmēdwarzišnīh ud rādīh rāstīh āzādagīh wehdōstīh ō abārīg hunarāwendīh ud xwarrahxwēškārīh ō frawāg andarg§ ud abāz waštag ō kustānīyān
46.0
ān ōwōn wehīh ud xwarrah , did pad čīdagīh az bun gumēzišnīg tā čē abarmadan ī nōg nōg āhōgōmandīh ī az dēwān andar frazendān ī frawāg ō hōšyang ud wāygard čiyōn hōšyang pad abardar xwarrahīh gēhān xwadāy ud wāygard pad dahigānīh gēhān warzīdār ud parwardār būd
47.0
u =šān paywandān āwādagān waxšēnīd ān dahibedān tōhmag andar ān ī dahigān huzahag ,
48.0
pad hamšōn ān ōwōn xwarrah wehīh andar āwām āwām wizīdagīhā pad mādayān ham paywand raft ud xadur kustagān spōzīhēd
49.0
ud andar =iz mādayān mādayān būd pad paywand čiyōn tahmōrub ud ǰam ud āspīyān frēdōn ēriǰ ī ērān niyāg ud mānuš mānušxwārwar ud mānuščihr tā =z ō im bay abardar xwarrah dahībed
50.0
abārīg dahibedān čiyōn andar =iz ham tōhmag wizīdag X kayān hamē mādayān ōy ī dahibed druyist dāštan ī ham nāf ud paywand ud xwarrah pad =iš mehmānīh
51.0
dādār ohrmazd nēryōsang ī xwēš aštag paydāgēnīd ēstēd ham handāzag zarduxštrōtomīh ud dēn ud xwarrah ud az ham ud abārīg =iz was čim ī ōšmurišnīg andar abestāg paydāg ud gēhān āšnāg bē hutōhmagtom ērmardōm
52.0
ud ēn =iz guft ēstēd kū ēd ēwēnag wuzurg xwarrah ud wehīh ī az ham tōhmag awisēnišnīg nōg =iz wēnābdāg paydāg
53.0
abar čē ud čiyōn kird abāyistan ī awēšān ram =išān simrā =z xwānēnd az amāh dēn āgāhīh kū =š ōšmurišn was bē ǰār =ēw čand andar ēn zamānag šāyēd
54.0
u =šān tuwān pahrēzišn andar kunišnān pahrēzišnān nāmčištīgtar dād ēwēn handāxtan čē az amāh waštag ud rāst abāz kirdan
55.0
pad hammōxtišn čand ud tan ī wīrōmand ud abzārōmandīh ud ruwāndōst āmadan
56.0
bowandag awi =š pardazišnīhā hammōxtan ō ham ōy ud kē abāyēd hammōxtan
57.0
ka =šān šāyēd zamānīg =iz rad =ēw ī čiyōn mad ēstēd ō ham ram nayēnd , ,
58.0
abar handarz ī ahlaw zarduxšt kū hamāg kām ud framān ī dādār ohrmazd
59.0
az =iš nāmčišt zanišn ī dēwān ānāftan ī ēbgad ālūdagīh āhōg ī az =iš ud mehēnišn ī wisp sūd nēkīh hammist wehdahišnān az =iš niyōšīdārīh ud parwardārīh bar mādagwarīhā ō mardōmān se frāyēnīdārīh gētī pad harw ēwēnag ēwēn , bōxtišn ī ruwān az harw ēwēnag anāgīh ud rasišn , pad =iz tan ī pasēn ,
60.0
ud bowandag mizd az =iš dādestān hangirdīg wāzag ī ēk ī ast pad fradom baxšišn ī ō dō bahr pahrēz kunišn pad dudīgar baxšišn ō se kunišn ud se hilišn dušhumat ud dušhūxt dušxwaršt , kunišn humat ud hūxt ud huwaršt , pad sidīgar baxšišn ō pēšagān , pad ud čahārom ō padān
61.0
pad ham padisār baxšīd tā spurrīg parwandišnīh ī čēgāmiz xīr
62.0
u =š gugān nimūdār abestāg ud zand , , ,
63.0
abar hušnūdīh dādār kū =š az kām ud framān rāyēnīdārān ahušnūdīh kū =š az kām ud framān spōzān
64.0
ēn =iz guft kū =š anambasān framān ō kām X ,
65.0
abar pād ī pās
66.0
passox bē kū šnāxtan frēftārīh ud wiyābāngarīh ī ahriman ud dēwān čiyōn gumēxtagīh ī =šān bārīgīhā andar wehdahišnān wānīd nihuftārīh ī =šān rāh ī rastag ud rāst ud zūrnimūdārīh ī =šān ast pad nēst rāhdārīh ī =šān andar axw menišn gōwišn kunišn ī astōmandān asūdagīh ī =šān pad wināhišnkārīh
67.0
niyāzōmandīh ī =mān ō waxšwarān rāstāwurdārīh mēnōyīg rāz gētīyīg paydāgēnīdārīh šnāxtan grift ī ān widarg ud āsūdagīhā pād ī ān pās
68.0
bē sūd ī dēwān az tan nē kirdan ud ān =išān andar ō tanbahr None
69.0
ud andar =iz hāmwār kōšišnīh padīrag druzān nāmčištīgīhātar nikōhīdag ud zadag dāštan ī dēwān dēw ganāgmēnōy u =š mazan abzārān ī čiyōn akōman ud yindar ud sawul nanhēs ud tariz zēriz akātaxš āz xešm ud abārīg ī māzan ī dēw
70.0
ud čand az hamāg awēšān dēwān pās pāyīhēd frāy =iz az āfrāh waran pās pādan
71.0
xrad mādayān padīrag waran mādayān hamēšag pāsīhā winnirdan winnārdan ,
72.0
ud ēdōn =iz wahman padīrag akōman None abārīg weh mēnōyān padīrag ān xwēš hamēstār druz estēnīdan rāy andar tan mehmānēnīdan ud ōstwārīhā ǰāndranā pās pād , ,
73.0
abar wahišt dušox ristāxēz kū wahišt dušox nūn =iz ast
74.0
wahišt starpāyag az ān abar ,
75.0
ud dušox azēr rōy ī zamīg
76.0
wahišt rōšn hubōy ud frāx hamāg xwārīh ud hamāg nēkīh ,
77.0
dušox tārīg tang ud gandag ud axwārīh ud hamāg anāgīh
78.0
ǰud ǰud gugān ī nēkīh ān ī anāgīh ōšmurišn was
79.0
ud andarg dō mayān zamīg ud starpāyag hamēstagān u =š gumēzagīhā bahragdārīh ī az harwdō
80.0
widardān ud murdān kē kirbag wēš rāh ō wahišt kē wināh wēš rāh ō dušox kē kirbag wināh hāwend gāh pad hamēstagān
81.0
andar harw se gyāg pāyagīhā
82.0
ud čiyōn gyāg ēdōn =iz xwārīh ud nēkīh ud axwārīh ud anāgīh abēzagīhā ud gumēzagīhā čiyōn wād
83.0
ristāxēz pad abdomīg bēabesīhēnišnīh ī petyārag bawēd
84.0
xwābar dādār ud hamāg hušnūd zīndag abāz kunēd
85.0
ud druwandān pad yōǰdāsrēnīdārīh az wināh āhōg ǰud ǰud wināh ī kird ud gumēzišn ī awiš passazag ačārīg pādifrāh ī az yōǰdahrgarān abar rasēd
86.0
ahlawān pad kirdārīh pādāšn ǰāwēdān pattāyišnīg None ud padīrag hamāg kunišn pahrēzišn tōzišn ud mizd rasēd
87.0
ēč dām andar petyāragōmandīh be nē mānēd
88.0
ahriman abārīg =iz dēwān druzān wānīdan zadan ān ōzad bawēnd
89.0
ud hamāg petyārag āhōg az wehdahišnān bē barīhēd
90.0
ud hammist dām čiyōn mān bungōhr rōšnīh pad abēzagīh ud pākīh ud anāhōgīh ud abēniyāzīh ud hanǰāftkāmīh ud apetyāragīh hamāgšādīh winnārīhēd , ,
91.0
abar husrawīh ēdar bōzišn ī ānōh pādāšn ī andar harw dō abēčārīh az =iz škeft passāxt ī pad tan ī pasēn grift ī ān ī abardom mizd kū rāh ī awiš abēāhangīh ī az wināh frāzāhangīh ō kirbag
92.0
wināh az ān ī garāntar ast ī nāmčišt ēn yazadān dušmenīh ud yazadān amenīh ud abārīg ī andar ham dar čiyōn pad hangirdīg dēwčihragīh nām , ud xwadāydušmenīh ud xwadāynēdārīh ud framānspōzīh ī dahibedān nē menīdan ī sālārīh ud sālārān nē padīruftan ī abar pad xwēš nē kirdan ud abārīg dādestānōmandīh čiyōn pad hangirdīg ud bahr =iz anērīh nām , ud tarmenišnīh ī dēn abāzstāyišnīh az =iš nē dāštan ī dastwar xwaddōšagīhā raft abārīg andar ham dar čiyōn pad hangirdīg čē agdēnīh tā čē adēnīh nām nē padīruftan ud nē kirdan kōšišn ī abāg dēwān wattarān ud rāyēnīdan ī paywand warzīdan ī gēhān tuxšišnīh pad abārīg frārōnīh čiyōn hangirdīg anayārīh nām
93.0
andar bahrān anespāsīh ud penīh drōzanīh ud andar ōšmurišnān ō wehdušmenīh wattarān šnāyēnīdārīh ud abārīg dēwēzagīh ud ahlawganīh ahlomōγīh ud kūnmarz ǰādūgīh rāhdārīh ud zanrizā ud dūdagapparīh abārīg sālārīhappurdārīh drōdādwarīh ud drōčāšīh ud stūrškanīh ud dūdagasālārēnīdārīh wadxwāhīh ud zūrgugāyīh ud zūrpanāhīh pad margarzān
94.0
ātaxš ī warahrān ōzad nasāǰōyīh nasā ō ātaxš ud āb burdan adādīhā pahrēxtan ī tanīhā andar zamīg nigān kirdan , ud apatitīg margpuhlīh abārīg margarzānīhā
95.0
ud babrag hammist ud sagsrādag ōzad ud ǰehīh ud daštānmarzīh ud abārīg abārōnmarzīh
96.0
ud mastīh ud duzanstahm ud wanīgarīh ud spazgīh ud frēftārīh ud hixrX ud drāyānǰōyīh wišāddwārišnīh ud azpāymēzīh ud adādīhā srūd hammist adādīhā kārīh ud abārīg ī pad ham šōn
97.0
kirbag čiyōn mehdādestānīh paydāg hamē ān ī mehdādestānīhātar ān ī meh ast ī nāmčišt ēn yazadāndōstīh ud xwadāydōstīh xwadāydārīh xwadāyparistīh ud hammist ērīh ud hudēnīh ud wehdōstīh dāmdōstīh ud abārīg ī padīrag ān ī abar wināh guft paydāg
98.0
andar hudēnīh āstawānīh pad =iz yaštkirdan
99.0
andarōn ēd se āstawānīh ī ast ērīh hudēnīh ud yaštkirdan xwēdōdah ud abestāgyaštan ud gāhānbār ud abārīg X ī yazadān wehān ud mādagwarīhā ahlawān šnāyēnīdārīh ud dēwān xrafstarān abārīg wattarān zadārīh ud hamēstārīh ud pahrēz patitīg ī az wināh čiyōn nāmčištīgtom abzār ī bōxtišn ī rādīh ud rāstīh ud spāsdārīh =iz pad xwad bunōmand ī ahlāyīh , ,
100.0
abar tōzišnīh wināh ud šōyišn yōǰdāsrīh ī az =iš
101.0
fradom abaxšīh xwastūgīh ud patitīg
102.0
ud čiyōn wināh marag was ēdōn =iz wizārišnīhā
103.0
bē ast ī nāmčišt ēn framānspōzīh dahībedān abārīg anērīh ud abāzstāyīdan ī az wehdēn stāyīdan ī nōg agdēnīh ud adādīhā ōzad ī mardōm ud kūnmarz ǰādūgīh rāhdārīh ud nasāypazīh ud abārīg margarzān puhl marg ud appārīh hamāg xwāstag ud zaxm ud apparudgād truft
104.0
ud apetyāragīh apaydāgkārīh abāg xwāstag tōzišnīh ēwēnag ēwēnag andar pāyag ud kārwarzišnīh =iz pādufrāh
105.0
ud ast ī band =iz ud drōš ,
106.0
abar abēčim zanišnīh ud drōšišnīh ī mardōm abāzzaxm =iz
107.0
appar az mādīh hammis bāy ud apatitīgwināhīh =iz hamgōnag duzmard
108.0
nakkīrāwināhīh =iz hamgōnag apaydāgkirdan gōhrīg ud adādīhā kird appārmādīyīh nasušgīrišnīh ud wardišnīh ud samnimāyišnīh drōgōwišnīh ud dušnāmxwānišnīh ud tā =z ō kē X =ēw tāg abēčim ō X ēw zanēd ayāb harg X =iz mih gōwēd
109.0
tōzišn čandīh gōwizār paydāg hamāg tōzišn pad wizīr ud framān ī radān dādwarān
110.0
ōzad ī mardōm bē ān ī andar kōšišn ēd kē rēš nē kunišn tā pad framān ī xwadāyān guft ēstēd
111.0
pad xwad dast tōzišn kird apparagīh ud abārīg =iz wināhgārīh čand ēwēnag andar kē ēdar nē wizārēd pad stōš ud dušox tan ī pasēn kē gyān hammis abēr škeft tōzēd ,
112.0
abar šōyišn ī tan yōǰdāsrēnīdan ī az nasuš dāštan andar pākīh kū az awiš gumēxtagīh ālūdagīh
113.0
ud abar pahikaftagīh harwdō ēwēnag murdag ēk nasāy ēk abārīg hixr čiyōn daštān šusr ud xōn ud mēšag xayūg abārīg ī az mardōm ud sag abārīg ǰānwar ī rēman pid andar zīndagīh bahrīhā mīrēd pad pākgarīh pākīh ud āb ud kamālāyišnīh ud kamāzārīh ī pahrēz ī āb tan čiyōn tanōmandān ān gumēzag kamōšmārāg ālūdagīh ī =š hambadīg ān ī kamālūdag āb čiyōn gōmēz ayāb urwartōhmag
114.0
šustan az ēwēnagān ī šōyišn ast ī nāmčišt ēn daštān pas az sešabag apaydāgīh ān ālūdagīh pād ī tuhīg ī rōzānšabān abestāg nērangīg X
115.0
nasāy gumēzišn abārīg kē pad nasāy rēman pas az gugārišn ī andarōnīg ud apaydāgīh bērōnīg čēgāmiz ālūdagīh
116.0
ud dast ud šabēn ēn andar bām =ēw ud pad =iz pihgāh ud ka ō niyāyišn šawīhēd ōh =iz ān ī kē pad barsom None hamāg tan wastarg az ālāyēnēnag hixr ud rōzgārīg =iz tan wastarg ud gyāg ud harw tis pāk dāštan ud az ālūdagīh pahrēxtan , ,
117.0
abar radīhā kū harw frārōnīh az =š nāmčišt ēn dēn paygāmbarān be šnāxtan wināh nē kirbag čand šāyēd pad dastwar kirdan ud xwēškārīh nigāh dāštan ud az xwēškārīh zīwistan ud ābtazišnīh ud urwarwaxšišnīh ud abārīg ābādānīh ī gēhān padiš tuxšīdan ud pēšag grift ud zadpēšagīhā ud aǰgahānīhā nē raftan zan dāštan frazend dranǰēnīdan ud paywand rāyēnīdan mardōm ud gōspand ud abārīg dahišn ī weh čand frārōnīhā šāyēd abzāyēnīdan abesēnīdan ud xwāstag az frārōnīh kird niyāz ī driyōšān bahr ī arzānīgān dād
118.0
ud kē weh tuwān pad xwurdag harwkas pad društag az kirbag wināh
119.0
ud astīh ī dādār ud abdīh ī =š dahišn ud sahīgīh ud wuzurgīh ī mēnōyān yazadān pahrēz ī gētī dahišn nēkīh ohrmazd ud anāgīh az ahriman yaštārīh ud stāyīdārīh ī yazadān handāzišn , ,
120.0
ud nikōhišnīgīh ī dēwān aparistišnīh ī uzdēsīh ud payrāstagīh ī kirbag mizd wināh puhl ud wahišt dušox ristāxēz āgāh būd ,
121.0
, , ud kē =z pad yaštkird atuwānīg ēg =iz iϑā aṣ̌ǝmvohū , yaϑāahūvairiiō warm kird
122.0
abārīg ōšmurišn abestāg paydāg ,
123.0
abar xwarišn kū ān ī xwēš ud arzānīgīhā niyābagbahrīhā ud pāk pad paymānag kār ī X ī gēhān az =š tankāmīh ast ī āb ud urwar ud bar ī xwarišnīg ī pad mehdādestānīh ī az gōšt ī panǰ ēwēnag gōspand srādag ǰud az ān se murw ī ast ī sār ī gar ud warāγ ī syā ud dālman ka X X dādīhā ud pēm ī awēšān gōspandān māyēnišnān ī pāk amastīhā ud abārīg ī pad xwarišn mehmān
124.0
anaxwarišn kū harw čē ō xwarišn abāzwaštag čiyōn paywand mardōm sag ud rōbāh abārīg nasāy ud xrafstarān ud hammis hixrīhā ud zahrīhā ud hangirdīg harw čē rēman ayāb zyāngār ,
125.0
abar brahmag kū wastarg ān ī awizīrišnīg čiyōn ēbyāstišnīh ast ī šabīg tōf =ēw pad kirbag
126.0
kustīg azabar ham šabīg bastan
127.0
pad čār brahnag nē būd
128.0
wišādag nē raftan
129.0
ud šarm nihuftan
130.0
sarmāg ud garmāg abāz dāštan abārīg
131.0
payrāyišn čiyōn ēwēn ō kār ud pēšag ud X kirdan dāšt passazag ud tan passazag
132.0
X abēčim nē drōšīdan
133.0
ud pad =iz brahmag ī anēwēn anašnāsag nē kirdan
134.0
ud čand ō kār abārīg tis nē wizāyēd pāk ud čābuk ud andar frārōnrāyēnišnīh nēk dāštan , ,
135.0
abar čandīh ī xwāstag zandāštan kū xwāstag az frārōnīh ud aǰomā penīh None bun pad warz ābādān dāštan
136.0
bar pad kirbag uzēnag kirdan
137.0
ud zan ān xwēš pāduxšāyīhā ud čagar ud X pad paristār bē ān ī nēpāduxšāyīhā nē dād
138.0
tā dāštan paymānag čand šāyēd tuwān daštānmāh kunišn
139.0
ān ī pad rāh ī nēpāduxšāyīh ī harw māh ē bār
140.0
ud pad čār zan šōy nē kirdan None ud mard zan nē kirdan nē pāduxšāy ,
141.0
abar dāšn kū =š ēwēnag was
142.0
ud ast ī nāmčišt ēn ō frāxīh arzānīgān wuzurgīhišnīhā ud ruwān rāy ō dēnīgān wēš ō kadāmagān =iz hudēn
143.0
ān ī pad rāh ī nēpāduxšāyīh ud suy ud tišn ud sarmāg ud garmāg az =š abāz dāštan
144.0
ud az bar ō bar ud rasišn ō rasišn ī sālīg parrēxt ī az awēšān ī ōy rād frēzwānīg andar parwarišnīgīh ī xwēš ud frāy =iz az andar sāl dō pih bārestānīh driyōšān rāy
145.0
ō agdēnān ka =šān az rēštagīh madan bīm gursagīh ud tišnīh ud sarmāg ud garmāg abāz dāštan
146.0
ud ō =z margarzān pad mehdādestān ayāb bīm ayāb ačār ud pāduxšāy
147.0
xwarišn ō arzānīgān dād rāy xwad nē xward ud bē gyāndārišnīh parwarišnīgān ī =š dēnīg andar sālārīh bē dād nē pāduxšāy
148.0
ud any abārīg xwurdag abestāg gōwēd hangird pad nērād būd , ,
149.0
abar xwēdōdah kū kē akunišnīh pahikārēd pēšēmālīh ēwarīg paydāgēnīdan
150.0
čim čimīg ud padiš griftār
151.0
ān ēč ēwēnag nē X tā pad kunišnīh čim
152.0
mardōm warzišnīh =iz ī az bun pad ham ēwēnag az dādār ēdōn dahišnīhā ōstīgān paydāgīhā
153.0
pēšēmālīg dārišn ī pad =iš bowandag
154.0
ud pas X dagruzmōgīh ī pad =iz hudahišnīh abzāyišn ī pad ān ōwōn bunwarzišnīh az ēk ō wasmaragīh mad
155.0
ud mehxwarrahīh ud mehxwēškārīh ud any abārīg wehīh ud pahlomīh mardōmān tā =šān amaragānīhā ham warzišn druyist dāštan hukārīh ī paywand xūbpaywastārīh ud kamwizendīhā ud xūbdarišnīh mihr ud wehparwarišnīh ī frazendān wehpānagīh ī zādagān pad dōbandīg xwēšāwandīh ud hunsandīh ī =šān ēk abar did ud husāzagīh ī =šān āgenēn ud akārdāgīh ud hukadagīgīh ī =šān xwēš zādagān ham pad tan būm ud ham pad zamīg būm ud ham nēk xōg ud dōšāramīh ī ō ham
156.0
hampādan ī ka =z ēk ud anigerīd , ēk pad dēn menišnīg menišnīh ī =šān ēkdid
157.0
ud kē nang nigerēd abēnangīh =iz ī az ān frāzšawišnīh ī bēgānag kas awi =š
158.0
ud garān tarsišn ud zanišn ī mardōm dušmen ud dēwān az dīd ī ēd ōwōn nēkīh
159.0
ud wasummēdīh abārīg xūbīh ud paydāg sūdīh ī andar ham dar pad mardōmān druyist pāyišnīgīh =iz ī hunar
160.0
ud šāyendagīh wāspuhragānīhā andar tōhmag tōhmag
161.0
X rāy pad wizīdagīh ud paydāg
162.0
ud abārīg was āhōg hupaydāg bōzišn
163.0
ud mādagwarīhā abaristišnīh ī bun dēn , padīruftār kē ēč hupaydāg sālār az =iš nē ǰuddādestān čand , paygāmbarān ud waxšwarān mādagwarīhātar handarz ī abēzag ahlaw zarduxšt az dādār ohrmazd xwad pad hamrasišnīh ud rasišnīg framān ,
164.0
abar paristišn kū bowandag menīdārīhā ud guftārīhā warzīdārīhā tuwānsāmān ān ī xwābar spennāgmēnōy pad dahišn āfrīdārīh ud abārīg ān stāyišn hammis paristišn ī dahišnān nē xwēš
165.0
hamāg pad =iš bowandagspāsīhā pad ham stāyišnīgīh ham paristišnīh
166.0
ud fradom šnūmanīh ī andar ēzišnīhā namāz ān ī padīrag xwarxšēd fradom ō dādār ohrmazd ud pas dahišnānīh se bār andar rōz pad huwaxš ud nēmrōz ud hūfrāšmōdād
167.0
čiyōn menišnīhātar huparistagīhātar ēzišn pad šnūman ī rahwōbirzad abārīg warzišn ī gāhānbār niyābag
168.0
padandar sāl pad šaš hangām ī gāhānbār harw ǰār =ēw panǰ rōz ud frawardīgān dah rōz
169.0
paristišnīh andar frawardīgān niyābag ,
170.0
ud rōzgārīg ān ī pad nāmčišttar
171.0
andar sāl dwāzdah māh ud harw māh sīh rōz rōz
172.0
ud andar rōz panǰ gāh
173.0
ud hamē pēš ud pas az xwarišn paristišn
174.0
ud abārīg paristišnīhā čiyōnīh gugān az abestāg paydāg
175.0
ud ān ī dahišnān bowandagmenišnīhā ud rāstīhā ǰud ǰud pad xwēš čiyōnīh abdīhā ud wuzurgīhā stāyīdan ud azbāyīdan
176.0
ud wuzurgdahišnīh ud abddahišnīh ī dādār pad =iš guftan
177.0
hamdahišnīh ī =šān amāh dōšāramīhā paydāgēnīdan awi =šān padīrag niyāyišn ,
178.0
ud čand šāyēd pēš niyāyišn būd ,
179.0
ōh =iz ī abēzag rōšnān ī wēnišnīg hamrasišn
180.0
čiyōn mardōm ud gōspand ud ātaxš ud ayōšust zamīg ud āb urwar abāg stāyišn ud paristišn
181.0
čiyōn guft pahrēz =iz parwarišn ī dādīhā ud ēwēnīhā čiyōn abar mardōm anāgīh nē ud nēkīh čand šāyēd kirdan
182.0
ud mihr dōšāram ī hamdahišnīh ud hamčihragīh ud hamdēsīh ud abārīg hampaywandīh ōstīgān dāštan
183.0
abērtar ān čahār hampaywandīh pad xwēšīh ud ērmānīh ud wālanīh ud dēn guft
184.0
guft ēstēd az ōy ī abardom dahībed ud tā =z ān ī abāzīgtom mardōm ud ēč ī wehdahišn tar nē harw kas ud harw tis bowandag menīdan
185.0
ān ōwōn menīdārīh ō menīdārīh ī xwābar dādār pad ān ī ōwōn abddahišnīh abzūdan
186.0
u =šān pad kirdārīh spās dāštan pad stāyišn ud niyāyišn ud āfrīn waxšēnīdan
187.0
ud hangirdīg ān ī pad xwēš nē nēk pad anyēčān nē kirdan
188.0
ud abārīg ī čiyōn andar frārōndādīh paydāg nāmčišt xwārīh ēč ēwēnag nē =z menīdan ,
189.0
ud pad zanišn ud apparišn ud wiyābānēnīdārīh ō dādestānōmandān nē šud mihr nē druxtan ud spās X nē framōšīdan
190.0
ud penīh abārīg dēwāndādīh abar nē burdan
191.0
ud akēnīh ud xwābarīh ī abar harw wehdahišnān abērtar mardōmān xwēš hāwand nigerišnīhā dāštan
192.0
ud gōspand andar abēbīmīh ud pānagīh pad āb ud wāstar ud abārīg paristišn ēwēnīhā dāštan
193.0
ud čiyōn kuštan pad mehdādestānīh ī mehdānān čiyōn mardōm ud mehzanišnīh dēwān čiyōn ātaxš ī warahrān awizīrišnīgīhā nihād ēstēd , apaymān adādīhā nē kuštan az anarzānīgān ,
194.0
ud apaymān ǰōyišnīh ud wanīgarīh ud duzān gurgān suy tišn sarmāg garmāg abārīg petyārag zanišn ud pahrēxtan
195.0
ud kār ud ranǰ bār ī garān adādīhā abarnišast ī wattarān nē framūdan
196.0
ud adādīhā sālār nē hištan
197.0
ud aboxšūdārīhā ud ēwēnīhā dāštan ,
198.0
ud ātaxš ǰud =iz az ān ī čiyōn abārīg rōšnān padisāy =iz bahrīh ī =š gētīyān stī az āb ud wād hammis mādayān bunmādī abāyēd ī =š ēdarīg gyāndārīh ud parwarišn abāg pahrēz ī az zad ōzad ,
199.0
ud nasāy az sīh gām ī se pay None daštān az pānzdah gām None niwinnišn , ud gand az se gām None ud abārīg hixr az tan ud az =iz ādurestar ud sraxt ud tābišn nazdīkīh ud harw rēmanīh ud adādīh az =iš abāz dāštan ī brāh ī xwaršēd
200.0
ud suy nizārīh ud sarmāg ud garmāg ī ud apaymān ranǰ ud kār anēwēn paristišnīh anarzānīgān
201.0
hubarišnīh ud ayārbarišnīh ud nēkbarišnīh abarbarišnīh ān ī hušk ud pāk ud passazag ud esm ud bōy ud hupānagīh ud dādīhā sālārīh ud ka nērangīg šāyēd zōhr abārīg ī čiyōn pōryōtkēšān kardag
202.0
ayōšust pāk pahrēxtag pad kār ud payrāyag xūb dāštan
203.0
ud X pad nāmčišt ud abārīg =iz ayōšust az dād ī ō anērān adādestānkunišnān None pad dāštan ī andar nigānagīh ud agārīh wizendabrāzyāgīh ud anarzānīgān pad =iš brāzēnīdārīh ud kār wattarān pahrēxtan , ud ēwēnīhā dāštan
204.0
zamīg az nasānigānīh ud dēwān xrafstarān abārīg wattarān mānišnīh ud dārišnīh ud bar az =iš ǰōyišnīh abar dwārišnīh čand šāyēd abar nigerišnīh ud X ud abār ud amānišn hilišnīh ud abārīg adādīh ud pahrēxtan
205.0
ud mardōmōmand ud gōspandōmand None ud āb ud urwar waxšišnīh ud wehdahišnān pad =iš winnārišnīh ud huzīyišnīh ud frārōnīh rāyēnīdārīh dāštan ,
206.0
ud āb ǰud =iz az ān ī čiyōn abārīg rōšnān pad ān ī abāg ātaxš ham čim pahrēz paristišn čiyōn ātaxš
207.0
ud pad hangirdīg az harw rēmanīh ud gandišn šōyišn ud abārīg ayārīh ud paristišn ī anarzānīgān pahrēxtan ud pāk ud dādīhā ud hušnūd dāštan ,
208.0
ud urwar pad ān ī abāg zamīg ham čim ǰomā ud pad ān ī abāg āb ham čim ǰomā ud pad ān ī abāg ātaxš ham čim ǰomā ātaxš ud pad ān ī mayānag mayānagīhā pahrēz ud dārišn
209.0
ud dārišn parwarišn ud stāyišn abārīg šnāyišn čiyōnīh niyābag
210.0
ǰud ǰud čiyōn =išān ōšmurišn dēn gōwēd ēdōn =iz ēk awēnišnīg mēnōyān yazadān az xwārdārišnīh ud nikōhīdārīh ud abārīg tarmenišnīh pahrēxtan
211.0
ud pad sahīgīh , ud abdīh ud kirdārīh ud spās ī =šān ast bowandag stāyīdan
212.0
ud wēnišnīg rōšnān az =iz abar nigerišnīh ī daštān wattarān , pahrēxtan
213.0
ud huniyāyišnīhā wehān frāz awi =šān dīd ,
214.0
, abar pahrēxtan ī sag ud mardōm ī bē widard kū sag nimāyišn pad dō mard ayāb wēš pahrēzišn , ud tanīhā ud adādīhā nē
215.0
u =š gugān was rāh ō ǰuddēwāgāhīh ,
216.0
abar namāz ō mardōmān burdan kū frōdāwarišnīh ī sar niyāyišnīg pad ērmenišnīh ō hamdahišnān
217.0
nē ān paristišn ast ī dādār
218.0
pad =iš anīrmad =ēw sazēd būd
219.0
andar ēd rāyēnišn sarnimāyišnīh az dastnimāyišnīgīh ud uzwān nē ǰuttar
220.0
ud kamist abar ham dar āhōg guftan awēšān niyābag kē =šān saxwan ēn kū ēn hamāg āšuft ud anāgīh ī andar dahišnān nē burdan namāz ō mardōmān bē āmad
221.0
kē rāy az =iš paydāg ān paydāg ī abar framān ī nōg paydāgīh abāyēd , ,
222.0
abar rāstīh ī =mān ērangīh ī hambadīggōwišnān kū ka =z ān ī az warzkirdīh , , ud xwarrahkārīh ud amahrspandān gugāyabāgīh ud abārīg ān ēwēnag abd bē az hangōšīdag paydāgrāyēnišnīh pad ahlaw zarduxšt ud mēnōywēnišnīh None ud āškāragpaydāgīhā tis andar āwām āwām pad dēndastwarān ī az ān frāz wēnīhist ud pad widāxtag rōy passāxtan ī hufraward ādurbād ī mahrspandān bōxtan ī =š pad pahikārhandāzišn ī hāmxwanīras pahikārdārān andar xwadāyīh ī ōy bay šābuhr šāhān šāh ohrmazdān abdīhā paydāgīh az any čand ēwēnag nērang ī war ī tā frāz az frazām xwadāyīh ōy yazadgerd šāhān šāh ī šahryārān andar kardag dāšt ēstād ud abārīg imīn paydāgīh uzīd ī ǰomā uzīd az ham čim dast abar nihād az tan rāy ō harw kas šāyistan
223.0
andak kirrō mānd ēstēd ī nūn ān ēwēnag nigēzišn rāy pahikārdārān gumānīgīh ī pad =iš guftan rāh
224.0
ēg =iz abestāg frahist anhambadīg awi =š gōwišn
225.0
nibēgān padgyāg wizīrgarīh xrad ī =š padiš ǰuddādestān nē bawišn
226.0
abāg =iz X ān zruftagīhā nizārēnīd ēstēd abestāg ǰādaggōwān ud wālīdagīh ī =š pahikārān
227.0
pas =iz ka im xwābar bay anōšaggyāntar šāh ī šāhān framān dahēd padīrag murnǰēnīdārān ud zandīgān ǰud deylāmānān abārīg harw kē handāzišn kāmag ārāst ēstēd rāstīh nērōg ī hudāg dēn mazdēsn
228.0
paymāngōwišn mānsrspand was xwarrah ud spurrān abestāg nēkīh zandwizīdār āgāh ud abzōnīg bawē ,
229.0
yākōb nūn dōstagčašm u =š dēnāgāhīh X ārzōgtar
230.0
ud abar ān ī =š nōg pad hampursagīh ī tarsāg mard =ēw bōxtmārē xwānēnd pursīd , kū čē paydāg astīh yazad , wāy ān ī hambadīg ,
231.0
ud az kū āmad ān hambadīg ,
232.0
ud pad čē čim āmad ,
233.0
ud pad čē wihān ō gumēzišnīg kōšīd ,
234.0
ud čē rāy pēš nē āmad ,
235.0
ud X yazad ōy hambadīg abāz dāštan šāyist ,
236.0
ud čē rāy ēg abāz nē dāšt ,
237.0
ud čim andar hišt ,
238.0
ud wizend ō dāmān čim padīrift ,
239.0
agar abāz dāštan nē šāyist pas abdom abāz dāštan čiyōn šāyēd ,
240.0
u =š pad nērōg abāz abganēd ,
241.0
u =š abāz āmad tuwān ayāb nē None ,
242.0
ud agar =iš nē tuwān čim nē tuwān ,
243.0
ud agar =iš tuwān čim nē āyēd ,
244.0
yazad ēn dēn čē rāy pad ēwāz =ēw ī anāšnāg ī nihuftag ī abestāg nām guft ,
245.0
ud čē rāy pad nibištag nē bowandag hangārd bē pad gōwišn warm kirdan X framūd ,
246.0
ud čim yazad dēn ēwāz ō ērān frēstīd , u =š abārīg pad hammōg ī dēwān bē hišt
247.0
abārīgān yazad pad arzānīgān nē dārēd ayāb =iš nimūdan nē tuwān ,
248.0
ud čim namāz nē ēwāz ō yazad bē ō =iz xwaršēd abārīg =iz was rōšnān barišn ,
249.0
ud X X X X X anaibyāstkustīg rawēd pad wināh dārīhēd ,
250.0
barsom ud drōn abārīg ēzišn čē rāy ,
251.0
ud yazad az yazišn paristišn čē sūd ,
252.0
ud tan ka murd čē rāy rēmantar kū ka zīwandag
253.0
ud X daštān rēmanīh čē ,
254.0
ud čē rāy ka az sūrāg =ēw bē āyēd hamāg tan rēman ud dūr az =iš pahrēzišn ,
255.0
ud az drāyānxwarišnīh ud ēwmōgdwārišnīh estānmēzišnīh abārīg ī az ēn šōn dēw čiyōn X zāyēnd ,
256.0
ud agar dēw zāyēnd hamāg čim nē ōbārēnd ,
257.0
zan ī wisistag šustan čim ,
258.0
agar šustan abāyēd čim nē any zan bē mard šōyēd ,
259.0
ud gōspand pad kuštan ud pēš az kārd čōb zad čim ,
260.0
barsom az nasāy ud daštān dūr dāštan čim ,
261.0
ud ka drōn yaštan stāyišn ī yazad pēš az X xward abar xwarišn guft bawēd az ān pas tā did stāyišn gōwīhēd māwā dāštan čim ,
262.0
ud pad frawardīnīgān widardagān čiyōn abāz āyēnd ,
263.0
ud dast pad gōmēz ud tarrag šustan čim ,
264.0
sag ō nasāy čim nimāyišn ,
265.0
ud čim pad tan ud grīw brāh ud xwarrah xrad bawišn xwāstag abārīg nēkīh yazadparistagān frāyīh nē paydāgtar kū pad dēwyazagān
266.0
xwad dēn dāštan pad tis wurrawist čim abāyēd , , ,
267.0
passox ō bōxtmārē
268.0
kamāgāhīh ī =š az uskārišnīhā rāy ayādgār dagrand nimūdārīh ī was bunīhā ī saxwan ud saxwan ī pursišn ud wizārišn ī dānāgān āgāhēnīdan ayāb ān nibēg ī =mān dēnkard nām nihād čiyōn =iš ēn =iz hamāg andar ud agar gōwizār nimūd abāyēd
269.0
bē be dōstīg nišānag =ēw bowandag ī čiyōn nibištan payrāst ōh =iz ka =š nūn wizīd ēstēd kū abar ān ī ēwāz pad dānišnīg paydāgīh ačārīg čē ān ī pad āgāhīh ī tāštīg ud čē ān ī pad ēdōnīh ī ēwarīg , ud čē ān ī andar sāmān ī wirrōyišn pad =iz homānāg bahrīh frāyīhā ud awiškinnīhā padīruftan ēwēn ,
270.0
ud ān nišānag ēn ,
271.0
astīh ī yazad paydāgīh az was ēk kirdagīh gēhān ,
272.0
hambadīgīh paydāgīh ēk čim abāyišnīgīh dahišn ,
273.0
hambadīg pad wihēz ī az gyāg andar tuhīgīh āmad ,
274.0
hambadīg az bun abēčim agārīhā dwārist
275.0
pad tuwānǰumbāgīh ud nē nāmčištīg xwāyišnīhā mad ō sāmān ī ēn rōšn gōhr
276.0
ōh =iz ōy hambadīg abēčim ud halagkirdagār
277.0
ud ka anāgāhīhā pahikafišnīg mad ud az ǰudgōhrīh ōšmurīhist būd
278.0
kōšišn ī pad andargumēxtan wihān anēwēn kēnwarīh ud āzwarīh wanyīg ud waranīgīh ud areškenīh nangwarīh ud apparagxēmīh ud stēzkārīh ud abarmenišnīh ud tarmenišnīh ud afrazānagīh ī mihōxtīh ī pad abesīyēnīdan šāyistan ī buništ rōšn gōhr akāmīh adādīg čihrīgīh ud halagkōšāgīh ud hammis ī imīn ham rāyēnišn , ,
279.0
ud pēš nē madan čim nē abāyēd bē ka frāyīhā guftan kāmēd
280.0
ēn =iz bārīyīhā nē nigerēd kū tuwān abar kirdan gōwišn ud nē abar nē kirdan
281.0
u =š mānāg āhang sahēd nē kirdan abāzāhangīh ī az kirdan
282.0
ēg =iš ān =iz nēāmad ī pēš pad tuwān guftan rāh
283.0
ud pas =iz čand pursīd ān pēšīh ka abdom tar akanāragzamanīh abāz waštan nē šāyēd ,
284.0
yazad ōy hambadīg abāz dāštan az sāmān ī xwēš hammist tuwān būd hammist čand ǰār abāz dāšt did abāz ō kōšišn āmad
285.0
nūn =iz harw ka =š abāyēd bērōn kirdan hugarīhā tuwān bē ǰumbistan nē hišt ī =š dūrgumandīhā tā frāz madan ī ō āgenēn ōwōn nē andar būdšāyistan nē pad atuwān bē pad nēšāyistbūd ī andar ēč zōr hangārišn
286.0
ud čiyōn ud čēgāmiz tuwānsāmān az šāyēd būd None ud atuwāngumand az nē šāyēd būdan pardāxtan nē šāyēd ,
287.0
u =š andar hištan ī hambadīg ō gumēzišn ī wizārišnīg čim sūd ī xwēš dāmān az =iz uzmāyišnwidardan ī , , abar ōy hambadīg andar brīnōmand zamān =iz tā ōy hambadīg zūrmihōxtīhā pad =iš pērōzīh burdan sahist
288.0
paydāg frazāmīh ī ham kōšišn ud purrdardīkkarīh ī =š andar gumēzišn az amāh ud wēnābdāgīh ī hamāg ēwēnag pērōzīh ī yazadān abāz nē ayārīhistan ī =š pas ō kōšišn
289.0
abārīg ī ōšmurišn =iz andar =iz dēnnibēg paydāgēnīd ,
290.0
ud pēš az ān zamān bērōn nē kirdan čim ēk awišōbišnīh ham hufrazāmkārīh kē rāy andarhištan =iz čim ,
291.0
ud wizend madan andar gumēzišn ōwōn ačārīg čiyōn nē =iz šāyēd andar andargumēzišn ī ō nasāy rāy ōšmārdan ī gand ,
292.0
abgandanōbastan ī =š abāz ō tuhīgīh spurruzmāyišnīhā ud bowandag ud stōwīhā ud agārīha ud purrwaxrīhā ud zadabzārīhā ud waštrangīhā ud widārd ud garāntom ud awištāfttom bīm paymōgīhā ud ān drubuštīh ī pērōzīhapērōzīh xwānīhēd andargīhā ud brīdkōšišnīhā ud anēmēdīhā pad ān ham nērōg ī yazad , ,
293.0
u =š abāz ō kōšišn āmad ayārīhistan nē sazistan čim ēk ān ī pēš abāz dwārēd u =š ēč ēwēnag abāz ayārīhistan nē sazēd
294.0
ud ēč homānāg bahrīh nēst
295.0
ēč bīm ud čēhišn ud handēšišn az =iš ēdar nē mānēd
296.0
pad =iz ān pērōzīhapērōzīh drubuštīh ud waxr ud X ud X Xbandīh bowandag ud bast ēstēd
297.0
ēč ēwēnag nē ayārīhistan čimīg ,
298.0
ud tuwān nē tuwān āyēd nē āyēd čim ī ham xīr ī pursīd az ān ī azabar čiyōn čand ēwēn nibišt paydāg ,
299.0
ēn mānsr ud dēn abestāg harwistāgāhīh čiyōn wehmēnōyān ud nazdbrahmīhātar pad hamāg āwāz ī gēhānīgān ōwōn widēmāsīg ī widard az harw ayābagīh ī mardōmān
300.0
ud zand pad ēwēnag =ēw guft ēstēd pad mayān ī gēhān rawāgtar andar gēhān āšnāgtar
301.0
xwad X abestāg wuzurg daxšag ast pad āwurd ī zardušt az ohrmazd
302.0
ēč drō ud halagīh ud dēwān kāmagīh pad =iš nē hamāg rāst mehdādestānīhā ud yazadānšnāyēnīdārīh guft ēstēd
303.0
andar ēč āwāz ī druzān nē dāšt ēstēd
304.0
kas =iz nē waštan rāy dēwān ēč ēmēd awi =š nē dārēnd
305.0
ud harwčiyōn gōwīhēd druz az =iš X None ud yazadān pad =iš urwāhmenīh bawēd
306.0
ud pad =iz rāstīhā ō hamāg kustag niyābagīhā ud hāwand āyišnīh ī abestāg ud mayānag gēhān uzwānīg āšnāgīhā frēstišnīh ī =z =ē zand purrbōzišn paydāg andar kadāmagānizēw ,
307.0
ud ēn dēn mānsr ud hamāg ī uzwānīg nibištan ōwōn framūdan ō bunīh nibištag
308.0
nūn =iz frahist pad =iz nibēgīhā pād ēstēd čiyōn andar āgāhān paydāg
309.0
bē warm kirdan sūd was
310.0
u =š hūdagīh pad ēzišn stāyišn āgāhēnišn ī ō ramān ēk wēš dānist ī tisān az =iš ōh =iz ān ī ōwōn zofrīhā saxwan
311.0
ud ēwēnrāstīhā ud awaštrangīhā X abespārdan šāyistan ī dādestān ī wāzēnbungōwišnīh frāy az nibēsišnīg wasīhā
312.0
ud pad =iz abārīg was čim zīndaggōwišnīg saxwan az ān ī pad xwēš mādagwartar hangārdan čimīg ,
313.0
ud dādār ohrmazd ēn dēn nē ēwāz ī ō ērānšahr bē ō hamāg gēhān harw srādag frēstīd
314.0
ud andar hamāg abēzagīhā kū gumēzagīhā rawāg kird ēstēd mēnōyīhā pad čihrīg dānāg rāstmenišnīh rāstgōwišnīh , , gētīyīhā pad rāstkunišnīh
315.0
andar kadamīyānizēw ōwōn rawāg kū ōy =iz ī agdēntar kas ēn dēn wuzurgmādīyīhā pad =iš
316.0
bē andar ēn ēdōn gumēzagīh hamāg abēzagīhā rawāg būd nē bē kōšišnīg X šāyēd
317.0
ud hamē ēn dēn abzāyišnīg None u =š hambadīg kāhišnīg bawēd tā dēn ō bowandagrawāgīh None ud pad =iš gēhān ō abēzagīh rasēd , ,
318.0
ud yazad ēč kas pad hammōg ī dēwān nē hišt , ,
319.0
ud čim ī gēhānīgān ān kē dēn ī yazadān abēzagīhā nē padīrēnd ud rāyēnēnd ayāb hilēnd az =iš wardēnd nē ān ēk ēwēnag anarzānīgīh ayāb frahist āhōgōmandīh
320.0
dēn ēč ēwēnag ērang ī pad =iš
321.0
wagar bē wiyābānīh ī az dēwān andarkirdan ī =šān druz ō tanbār nibardagīh ī wānydārīh ud nēxwāst ud nēwizōstan ī ēwēnīhā ud tandahišnīh ud sūdagīh ī wēmārīh ud sustistišnīh hištan framānīhā ud āsānīh ud dōšagīh ī aǰgehānīhā ud abārīg ī
322.0
pad namāz , ,
323.0
namāz ō xwarxšēd māh ātaxš āb rōšnīgān hammis wehdahišnān ēwēn ēwēn =ēw ī brādarīhā ud hamgōhrīhā
324.0
ud ast ī mehīhā ud ast ī abardarīhā ud ast =iz ī hamahlīhā čiyōn mardōmān =iz ēk ō did drōdpursišnīh
325.0
ud frahist ān ī az awēšān ī abardar ō amā wāzag ud frāy
326.0
ud nē paristišn =ēw ud menīdārīh =ēw ī ōy abardom yazad ēwāzīg xwēšīhā hamē kunīhēnd čiyōn awēšān agdēnān abar amā hangrāyēnd kē xwad pad bunēwēn yazadān namāz ō mardōmān burdan sazistan xwastūg hēnd , ,
327.0
ud kustīgaybyāstišnīh abārīg ī azēr ān ī pad gēhānīg nibišt passox frahist hangirdīg
328.0
pad =uz wāzag =ēw čimīg wirrōyišn ī dānāgīhā padīrift ēstēd az bun ōstīgānīh ēdōn
329.0
ahriman =iz gētī pahikārišnīg škastan nē tuwān nē =z mārīg =ēw andar abestāg ud zand pad hambasāngōwišnīh ī ēk ō did paydāg kirdan
330.0
druyistdār ī ham saxwan pad gyāg
331.0
ud čiyōn dēn andar gētīyān mādayānīhā kār dō ēk dānāgēnīdār ī harw čē gētīyīhā dānist šāyēd , ēk rāhnimūdārīh pad ān ī gētīyīhā dānist nē
332.0
az =iš paydāg ka dānist nē šāyēd pad čiyōnkunišnīh ōh ast ī wēnābdāg dānišnīg nimūdan spurrīg nē šāyēd
333.0
ēg =iz sazāgīhā rāh ō kār az =iš kirdan ōwōn wišādag čiyōn pādārīh dēnīg hannām ī wirrōyišnīg ǰomā ān ī dānišnīg
334.0
ud pas =iz abāg ān ī ka =z ōh ēd pursišnīhā passox ēč nē saxtag wirrōyišnīg bē hamāg dānišnīg nimūdārīhā gōwē ēg =iz ān ī wasān čimīg rāh ō čimīg wirrōyišn X X X X X X X X X X X X X X X ōwōn was čiyōn andar šnāsagān xwarišn
335.0
pad ān ham šōn nišānag ast ī nibēsīhēd , ,
336.0
kustīg pad =iz daxšag nimūdārīh wimand ī mayān dōān kū andar tan ī mardōm ast handāzag gēhān čē ān ī azabar nēmag wēš wād , ud čē ān ī azēr nēmag
337.0
čim ī dāštan nē keh
338.0
ud harwčē dāštan asazāgīh ud framānspōzīh ,
339.0
ud barsom drōn ud abārīg ī andar paristišn ī yazadān frāz dārīhēd nihang =ēw ī pad nāmbarišnīh hangirdīg hēnd hamāg gētīdahišnān ī pad sālārīh ō mardōmān abespārd ēstēnd ,
340.0
dēwān pad mehmānīh kird abar kōšēnd
341.0
ud mardōmān agāmāy dēwān menišnīg gōwišnīg ud kunišnīg az xwēš tan ud ǰān hammis bunmenišnīhā abardomdōšāramīhā pad xwēšīh yazadān frāz dāštan
342.0
ud yazadān pad =iš stāyīdan dēwān pad =iš nikōhīd
343.0
nāmčištīg wēšpāduxšāyīh yazadān apāduxšāyīh dēwān az =iš paydāg ,
344.0
ud sūd ī yazadān az yazišn ka =iz ēwāz kam pādixšāyīh dēwān abar xwad ōy ī yaštār hē ēg =iz az wēšpādixšāyīh abēniyāz sazē hangārd ,
345.0
ud rēmanīh hamāg dēwīh az dēwān
346.0
harwkū dēw mehmāntar rēmanīh wēš ,
347.0
ud tan ka murd abarwēzīhā madan margīhkirdār ud agārēnīdār ud astwihād stōwēnīdan ī gyān az =iš abāzkird ī =š gyāg gyāg ī zīndagīh ud pad mehmānīh andarburdan ī =š brādarān gandēnīdārān pōyēnīdārān abārīg anabēdānkirdārān dēwān ō tan ud ānāftan ī =šān ǰud , ǰud xwēš hambadīg čiyōn hubōyīh pākīh huburdīh hučihrīh ud abārīg ī abāyišnīg az tan
348.0
mehmānīhā wālīd wālīdan ī =šān andar ham tan ōwōn frāyīhā kū ō =z bē nasuš wisp wēmārīh damānd
349.0
ud ānōh kū dēwān mehmānīh pad ān ēwēnag rēmanīh guftan abēpahikār sazēd bawēd ,
350.0
az ēdar niwinnīhēd guftan abar rēmanīh ī bahrān ī andar =iz zīndagīh ī mādayān ī tan az tan ǰudāg bawēnd
351.0
nē ēwāz pid bē šusr ud xōn abārīg =iz ī hixr xwānīhēd az =iš ān ī grāytar daštān murdag bahr ī az ān ī ō frazend hambunīgīh winast kē rāy pad =iš mehmānīh windēd
352.0
abāg awēšān druzān ī azabarnibišt ōy =iz druz ī huzahagīh murnǰēnīdār ī zāyišn wizūdār pādīrāngar ī mādagān , petyāragtom X srādag
353.0
az =š frāy az =iz zan , ,
354.0
zan ī wistag pad =iz ašzanišnīh tisān čim ēk zīndagčihrīh abarwēzīh ī ōy druz ī X srādag
355.0
ud damišn ī =š andar X =ēw čiyōn gētīyīg paydāg
356.0
mānāg =iz ī ān ī wēnišnīg dīd ǰomā abārīg ī mēnōy druz mēnōywēnišnān tuwān
357.0
ēd rāy pad šnāxtan ud az =iš pahrēxtan abestān ō mēnōy xīr xīrāgāhān dēn ī pad dānāgīh wizīd ēstēd
358.0
kē nēstīh tāštīg gōwēd wizārdan , ,
359.0
ud kē wirrōyišnīg gōwēd bun wirrōyišn abāg ēn ī pad dānāgīh wizīd ud pad mēnōywēnišnīh padīrift ēstēd dēn kē astīh az =iš paydāg handāxtan abāyēd ,
360.0
ud daštān kē az ān sūrāg =ēw āmad pad wiš X ī ōy druz andar hamāg tan rēzišn ī =š xwēš gandagīh rēmanīh gētīyīg mēnōyīg ō =z bērōn bawēd
361.0
ud ān rāy čand =iš zōr ī nasušdamišnīh and az =iš dūr pahrēzišn
362.0
harw čē =š ud pākīh abēzagtar wēš nāzukīh =iz rāy az rēmanīh wēš pahrēzišn
363.0
ōh =iz ī ān ī nāmčištīg abzārīhā andar yazišn ī yazadān dāšt ēstēd ,
364.0
daštān ǰudgōnīh =iz ī az abārīg xōn grāygandīhīh X X X ud āhōgēnīdārīh xwad =iz ōy tan kē pad =iš wināhīdārīh pad nazdīkīh ō =z āb ud urwar kāhišnīh ud xwarišnīhā amizag ud bōywardišnīh
365.0
pad =iz hampursagīh ō ōš ud wīr ud xrad ī apākān was wizend ī aziš andar šnāsag xwarišn ,
366.0
kē zāyišn ī dēwān škeft sahēd fradom čiyōnīh nigerišn ī kadāmagāniz zāyišn kū mādayān abzāyišn ī az gyāg tā ēn kū dēwān harrōbišn ō ānōh wēš kū adādīhā ud anēwēnīh mehmāntar hupaydāg
367.0
ud šusr wanīgārīh anešnōhrīhā ud yazadān tarmenišnīhā ud xwāyišnīg drāyišnǰōyišnīh ud abārīg ī druz az =iš zāyišnīh ī guft ēstēd pad anēwēnīh ud adādīh dād ēwēn šnāyišn nē gumānīg ,
368.0
ud dēwān wasīhā gēhān hamē murnǰēnēnd bē pānagīh az yazadān meh kū zōr ī dēwān
369.0
u =šān abarwēzīhā ōbārdan nē hilēnd ,
370.0
az dēwān čiyōn pad ān ēwēnag adādīhā kunišnīh ī mardōmān wistāxwīhā frāztar āyēnd ēdōn =iz pad ān ī =šān az mardōmān dādīhā warzišnīh zanišn rasēd
371.0
az mardōmān seǰdīhā abāzdwārišnīg bawēnd
372.0
ud hamē andar gēhān kām ī yazadān warzīdārīh wēš kū ān ī dēwān ,
373.0
ud zan wistag mard =iz ī nasuš ǰomā šustan abāyistan
374.0
ka rēmanīh murdag ōwōn paydāg amaragān gēhān abargugāy škeftīh =ēw nēst
375.0
u =š pas abāyišnīg wirrōyišnīh ud wēšīh ud kemīh mād ī passazagīhā uskārišn
376.0
ud agar saxwan zišt sahist ī tisān nē xwadīhā bē pad kird bawēd ,
377.0
ud dānāgān čim ī tis ī abērtar xwadīha uskārēnd ud nē kirdīhā
378.0
ud ān abzār frazendxwāyišnīh ka =z nē nigerēnd ēg =iz =iš astīh andar ōšyārān ēdōn rōšn čiyōn ka =z hamē wēnēnd ,
379.0
ud agar ka =š wēmārīh =ēw padiš wasān bizeškān nigerīd ud dānāgān passandēnd čand abērtar pad yōǰdāsrēnīdan ī az ōwōn wizendīg X dīd nē āhōg ,
380.0
ud čim ī ān yōǰdahrgarīh rāy zan bē kirdan ēk wēš
381.0
ud amāwandīh ī nar ī ahlaw ud wēšsamīhā seǰdīh ī dēwān az =iš
382.0
ud nāirīgān ōy =iz ī petyārag ī srādag ō čihr abyōxt ēstēd
383.0
narīh =iz ī awēšān druzān rāy az mādagān kam tarsīdan
384.0
pad =iz abārīg kār ī nē ōwōn mādīg mard az zan weh šāyistan
385.0
ud ēmar ān zišt sahist ī čiyōn azabarnibišt ō ēč čim ī az =iš pahrēzišnīg kird X nē sazistan , , ,
386.0
gōspand čōb pēš az kārd frāz burdan ud hammis abārīg ī andar ān dar kunišn čim ān ǰud az nērangīg sūdārīh ī čand druz az tan pāk kirdan nāmčištīg bahr ī X ud dušmizagīh adādīhā ud halagīhā ud kam kušišnīh =iz ī gōspand ēk abaxšāyišn ī abar gōspand
387.0
pad =iz ān rāh kambīmīh ud kamdardīh ī =š az frāzbarišnīh kārd
388.0
ud nē halagīhā zūd zūd pad harw zamān ārzōgtēzīhā ōzad ī gōspand , ,
389.0
ud barsom az rēmanīh dūr dāštan ǰud =iz az ān ī azabarnibišt ēk ēn kū az haft gētī amahrspandān pad nimūnag nihang =ēw ī az hamāg gēhān ān ēwēnag azabarnibišt ēzišnīg frāz ō yazadān dārīhēd
390.0
az ān ī pāk dāštan abērtar šāyēd ēk urwar ,
391.0
ud čim ī māwāyīh ī andar =iz myazd =ēw , ēk X ēn kū čiyōn stāyišn ud paristišn ī yazadān hāwand ǰān frāy =iz dōšīdan sazēd
392.0
ud az ham čim andar yazišn ī yazadān awisānišnīhā framūd ud abāg frazāyišn tan dāštār abārīg harw rāyēnīdārīh tan hamband kird ēstēd
393.0
ān harw ēwēnag =iz dārišn ī tan andar ō pih stāyišn framānbandagīh ī yazadān ōwōn parwast ēstēd kū az ēč kust tan az =iš rāyēnišnān pardaxt ī az yazišn ud paristišn ī yazadān nē nāmčištīgīhātar
394.0
andar frazāyišn ī padīrišnīh ēbowandagmenišnīhā ud X mayān paristišn stāyišn bawēd
395.0
pad =iz wihān ī xward gōwišnīg stāyišnīg spāshangārišnīh ō bowandagmenišnīh paywast ham bowandagmenišnīh abāz ō ham ēwēnag gōwišnīg spās stāyišn āfrīn X ud abārīg frārōnwarzīdārīh abespārēd
396.0
pad =iz xwašmadag bowandagmālišnīh ī xwarišnān xwārišnān ud huparxistagīhā rāyēnīdārīh ī myazd ud hammis ēwēn ī xwaranīg andar šnāsagān abēr passandišnīg ,
397.0
ud pad frawardīgān abārīg =iz hangām ahlawān ruwān āmad šāyistan
398.0
ka =z ō ēn ī nūn nigerīhēd kū =mān abāg burdārīh tan None ud čand bahr az dēwān abāg tan gumēxt ēstēd pas =iz āmad ud šud čiyōn paydāg škeft nē sahišn
399.0
ud az tan ud gyān spurrīg ō yazadān dahēd ahlawān ruwān
400.0
abērtar =iz wēnēd kū ān ī nūn amāh
401.0
bē ō amaragān pursīdārān nišānag ī ham passox ēn abērtar kū frawardīgān hangām spurrīgīh ast ī sāl pad rōzān hambārišn pad =iz kirbag kirdagān paristišn ī yazad stāyišn ī =š weh dahišnān kē mardōm ān ī mādayān
402.0
pad ān čim andar ān gāh ahlawān ruwān ud abārīg =iz ī wehmēnōy abērtar rasēnd ō padīrišn ī ham X , ,
403.0
ud dast ī pad xōn šusr ud abārīg ī murdag ī az tan hixr ālūd ēstēd fradom nē pad āb ī nāzuktom bē pad any =ēw ī gumēzagīh rāy kam mālišn ,
404.0
ud pas =iz pad āb ī pahlom ud pākgartom šustan
405.0
čim ēk wēš pahrēzīh āb pāk dāštan ī az ān rēmanīh nasuš
406.0
ōh =iz āb az ātaxš hammis gōhr ud čand ēwēnag pid ud mād hēnd amāh
407.0
u =mān pad =iz yōǰdahrīh =iz ī druyistpāyišnīh xwēš gōhr xwēškārīh mādayān
408.0
ud nasāy sag nimūdan
409.0
nērangīg čim ēk ēn kū X awēšān druzān ī tan agārēnīdārān kē nasuš =iz xwad hēnd pad ōy tan gāh dāštan ud tā waštan ī az nasāyīh abāzmadan ī did ō kār ud sūd ī gēhān šāyēnd
410.0
ud az ān čiyōn nasāy pēšīhā abāz ō ātaxš , ud wād X ud gil ī pāk ud kārīgīh pad nōg zāhagīh zahagān ud wēš frahixtīh ud mehsūdīh ī dāmān ēwēnīhā madan pad gugārišn sōzišn ī andar tan ī sagān ud wayān abērtar šāyēd ,
411.0
ud ān =iz rāy ō pih X X pad xwēškārīh ī awēšān paydāgēnīdan pad pākkārīh ō awēšān abespārdan pad =iš kārag ud xwēšāwand kird ēstēnd ,
412.0
ēg awēšān druzān hamčiyōn sag ayāb way frāz ō nasāy nigerēnd ān gāh dāštan nē šāyēd ōšmārēnd bē ō wizandišn ud wihēzišn ēstēnd ,
413.0
ud az mehmānīh ī =šān pad =iš bahrag bē kāhēd ud ham handāzag ān nasuš nizārīhēd , ,
414.0
ud tan =iz ud grīw wirāyišn pad ān čihr ī nē rōz rōz abāg paristārīh ōwōn wardišnīg būd sazāgīhā
415.0
bē brā ī wehīh ud xwarrah xwēškārīh ud huxradīh ī sūdōmand ud dānišn ī frārōn xwāstag ī wēš frayādišnīg ud abārīg =iz nēkīh ī pahlom ōh =iz wēš mehmānīh pad yazadān paristagān , ,
416.0
ud ān ī bōxtmārī pad wēš ābādīh gētīyīhā hangārd ēstēd rāy ēn =iz gōwam kū agar abesar ud abārīg payrāyīg ī pērozīhburdārān niyābag gund ī pērōzān windād abar sar ud grīw dāštan nē kird ardīg pad abāzmadan ī ō pēš šahryārān bē andar razmgāh ud kōšišnzār ēwēn
417.0
ēg ān ēwēnag =ēw =iz nēkīh paydāgīh abērtar andar gētī nē pad mēnōy sazēd būd
418.0
ud agar ān nē ōwōn pas ǰār =ēw yazadān paristān nē ēwāz pad kam waštgōnīh az axwāyīh ud nizārīh ī az wēšranǰīh ud sam ī az wēšškōhīh ud hištpihīh pad ǰāwēdān abēniyāzīh ēmēd bē pad =iz X ud bīm ud brīn ud marg ī kārēzārīg madan šāyēd
419.0
bārestān kirdan ud zamānīg =iz ranǰag ī dēwyazagān abar hazēnd pad zahr hangārdan pad frārōn tuxšāgīh hunsand pad xwēškārīh tuxšāg būd abēr čimīg ,
420.0
abāyišnīgīh ī dēn hudānāgīh ud xūbwirrōyišnīh wizīdārdēnīh pad xrad mēnōy dastwarīh wizīdārīhā xwāyišnīh ī dānišn wirrōyišn andar dēn parwand paydāgīh andar kē nigerēd ud dānēd
421.0
az =iz frāzdīd ī ō bōxt bōxtmārē nē kamīg , ,
422.0
ōh =iz dēnāgāhīh kōrīhā ō čāh ī druwandān nē ōbadēnd
423.0
ud frārōnwirrōyišnīg kas X ī az čāh bōxtār
424.0
pad mayān az =šān hamēstār hēnd frēftārān wiyābāngarān kē guharīg dānāgīh zūrmānāg dānišnīh pad =iz wirrōyišn nām rāh homānāg abērāh pēš kamwizōstārān ī awizīdārān xīrān dārēnd
425.0
pad =iš wāyēnēnd ō ān ī ǰāwēdānīg anāgīh
426.0
ud xunak nūn ōy tan wisp hudānāg pāyist dēn mazdēsn āgāh ud rāhnimāy bawēd , , , , , , ,