ēn , mādayān ī , yōšt ī , friyān farrox bawād pad yazadān īn mātīgąn , gōst ī , ayār ,

ēdōn gōwēnd kū andar ān ē ka axt ǰādūg abāg haftbēwar spāh ō šahr ī frašnwizārān , šud , u =š , drāyīd , kū , šahr ī , frašnwizārān , pīlxwast be kunam

ud ka ō ānōh mad u =š mardōm xwāst kū =šān dād freh az pānzdahsālag nē bawēd

u =š frašn az =iš pursīd

harw kē nē tuwān būd wizārdan ī u =š frāz grift ud be ōzad

ud pas andar šahr ī frašnwizārān mard ē būd mahrspand nām

u =š ō axt ī ǰādūg guft kū šahr ī frašnwizārān pīlxwast ma kun ud ēn mardōm abēwināh ma ōzan

kē andar ēn šahr ī frašnwizārān mard ē ast yōšt ī friyān nām kē dād freh az pānzdah sāl nēst

ud harw ān frašn ī tō pursē u =t be wizārēd

ud pas axt ǰādūg ō yōšt ī friyān paygām frēstīd kū frāz ō dar man āy tā sīhse frašn az tō pursēm

ud agar passox nē dahē ayāb gōwēd kū nē dānam ā =t pad ham zamān be ōzanam

ud yōšt ī friyān ō dar axt ǰādūg āmad

ud az ān čiyōn axt ī ǰādūg nasāy mardōmān azēr ī wistarg dāšt andar nē šud

u =š ō axt ī ǰādug paygām frēstīd kū ašmā nasāy ī mardōmān azēr ī wistarg dārēd

ud ka man andar āyam amahrspandān pēš man hēnd andar ān gyāg kū nasāy ī mardōmān bawēd man andar āyam ēg =im amahrspandān az panāhīh ī man abāz estēnd

ud pas ān frašn ī tō az man pursēh man wizārdan nē tuwān

ud pas axt ǰādug framūd ān wistarg ud ǰāmag abar dāštan ud wistarg ī nōg āwurdan ud abgandan

ud u =š yōšt ī friyān rāy andar xwāst guft kū be āy abar ēn ǰāmag bālišn be nišīn ud frašn ī =t pursam rāst be wizār

, yōšt ī friyān guft kū mar druwand sāstār abar ēn bālišn nē nišīnam čē andar ēn bālišn nasāy mardōmān ast

ud abāg yazadān amahrspandān hēnd pānāgīh ī man hēnd

ud man abar ēn bālišn be nišīnam ēg =im mēnōyān az pānāgīh ī man abāz estēnd

pas frašnīhā tō az man pursē man wizārdan nē tuwān bawēd

pas axt ī ǰādūg framūd kū ān bālišn abar dāštan nōg āwurdan

yōšt ī friyān abar ān bālišn ī nōg nišast ,

naxust frašn axt ī ǰādūg az yōšt ī friyān ēn pursīd kū wahišt pad gētīg weh ayāb ān ī pad mēnōy ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē , wahišt pad gētīg weh kū ān ī pad mēnōy

u =š nišān ēn kū harw kē pad gētīg kār kerbag nē kunēd u =š ānōh frayād nē rasēd

u =š nišān didīgar ēn kū bē agar =it pad gētīg tis ī nē nēk kird X ēnyā ō wahišt weh nē rasē

ud axt ī ǰādug čiyōn ka =š ān saxwan ašnūd stard be būd čand ka mard ē yašt ē be gīrēd stard būd estēd u =š ēdōn guft kū anāgīh man axt ī ǰādūg tō yōšt ī friyān kū abar man čēr hē

čand nēw mard ē abar nēwtom mard nēw asp abar nēwtom asp ud nēw gāw abar gāw nēwtom gāw čiyōn āsmān abar zamīg pādaxšā hē

čē man abar ēn X frašn 900 mowmard kē =šān and yazišn ī yazadān kird estād ka =šān and xwardan ī parāhōm rāy hamāg tan zard būd estād u =m nō duxt ī spitāmān ōzad ka =šān dēnstāyēnīdan , rāy abesar ī pad zarr ud murwārīd az dahībedān windād

ka =m az awēšān pursīd u =šān guft kū wahišt pad mēnōy weh man guft , kū ašmā ēdōn weh sahēd hamēdōn weh kū ō wahišt weh šawēd

u =m frāz grift be ōzad ,

dōwom frašn ī ēn pursīd kū ān tis az dām ī ohrmazd kē pad kōn nišīnēd bulandtar kū pad pāy estēd ,

yōšt ī friyān ī guft kū zīwandagān pad škōh bāš mar ī druwand ī sāstār ud murdagān ō dōšox ōft kū ān sag ast ,

seyom frašn ēn pursīd kū čē ān az dām ī ohrmazd kē rawēd ud gām nē nihēd ,

yōšt ī friyān guft kū zīwandagān pad škōh bāš mar ī druwand sāstār ud murdagān ō dōšox ōft ,

čē ān winǰišk ast kē rawēd ud gām nē nihēd ,

, čahārom frašn ī ēn pursīd kū čē ān tis az dām ī ohrmazd kē dandān sruwēn ud srū gōštēn , ,

yōšt ī friyān guft kū zīwandagān pad škōh bāš mar ī druwand ī sāstār ud murdagān , ō dōšox ōft

, čē ān xrōs xwānēnd murwag ī srōšahlaw

ud ka wāng kunēd ā =š petyārag az dām ī ohrmazd abāz dārēd ,

panǰom frašn ēn pursīd kū kōdag kārd weh ayāb andak xwarišn ,

yōšt ī friyān guft kū zīwandagān pad škōh bāš mar ī druwand sāstār ud murdagān ō dōšox ōft ,

čē kōdag kārd weh kū andak xwarišn

čē pad kōdak kārd barsom šāyēd brīdan ud čīdan

ud andak xwarišn ō aškomb nē rasēd ud agar rasēd wād hangēzēd ,

šašom ēn pursīd kū čē purr ud čē ān nēmpurr ud čē ān ī hagriz purr nē bawēd ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē ān ī purr hangad ī tuwānīg rad čē ud ka be widerēd ān ī ahlaw

ud nēmpurr škōh ī driyōš ī wadzīwišn ka be mīrēd ruwān ī ahlaw

ud ān tuhīg kē hagriz purr nē bawēd ān škōh ī wadzīwišn ka be mīrēd ruwān ī druwand ,

haftom frašn ēn pursīd kū čē ān tis ī mardōmān pad nihān kāmēnd kirdan u =šān nihān kirdan nē šāyēnd ,

yōšt ī friyān ī guft kū zīwandagān pad škōh bāš mar ī druwand sāstār murdagān ō dōšox ōft

čē X ān X zarwān ast kē kas nihān kardan nē tuwān

čē zarwān xwad paydāg ,

haštom frašn ēn pursīd kū kadām ān zīwindag mardōm kē astiwihād wēnēd mīrēd u =š ēdōn kāmag kū abāz ō zīwindag šawēd

ud did =iz astiwihād , wēnēd be mīrēd u =š xwār sahēd ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft

čē mardōm ast kē yašt nē kird estēd ud parāhōm nē xward estēd

ud didīgar ān mardōm ō gāh zanān mad estēd u =š zan nē kird estēd

ud sidīgar ān mardōm kē zīwandagānruwān nē yašt estēd ud ahlawdād nē dād estēd ud yazišn ī yazadān nē kird , estēd

u =š ahlawdād ō wehān mardōmān u =š guft kū daham ud nē dād estēd

u =š frēstīd kāmag ōwōn kū abāz zīwandag šawam

ud did =iz mīrēd ud astiwihād wēnēd u =š xwār sahēd

nohom frašn ēn pursīd kū pīl ud asp ud uštar ud xar ud gāw ud gōspand ud zan ud sag ud xūk ud gurba pad čand māh zāyēnd ,

yōšt ī friyān ī guft kū zīwandagān pad škōh bāš mar ī , druwand sāstār murdagān ō dōšox ōft ,

čē pīl pad se sāl zāyēd ud asp ud uštur ud xar pad dwāzdah māh zāyēd ud gāw ud zan pad noh māh zāyēd , gōspand pad panǰ māh zāyēnd ud gurba pad čihl rōz zāyēnd sag ud hūk pad se māh zāyēd

dahom frašn frašn ēn pursīd kū mardōm kadām padrāmišntar ud āsāntar zīwēd ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē mardōm ān padrāmišntar āsāntar zīwēd ī abēbīmtar ud hunsand ud xīrtar ,

yāzdahom frašn ēn pursīd kū čē tis ī pad gētīg ō ohrmazd amahrspandān homānāg ast ,

yōšt ī friyān guft kū zīwandagān pad škōh bāš mar ī druwand sāstār murdagān ō ōft ,

čē ān gētīg dahībed ō ohrmazd ud amahrspandān homānāg ast

ī dahībedān homānāg ī rōšn garōdmān ,

ud pāsānīgān ī dahībedān homānāg ast ō amahrspandān

ud darbānān andar dar homānāg ast ō ān stārag parwēz xwānēnd

abārīg mardōm ka xwēškār ud awestwār ast homānāg hēnd ō abārīg stārag ī xwurdag pad āsmān hēnd ,

dwāzdahom frašn ēn pursīd kū xwarišn kadām xwaštar ud padmizag ,

yōšt ī friyān guft kū zīndagān pad škōh bāš mar ī druwand sāstār ud murdagān ō dōšox ōft

čē ān xwarišn xwaštar ud padmizagtar ; kē az dar frārōnīh tuxšāgīh handōxt estēd ud u =š abāz kār ud kirbag xwarēd dārēd , yōšt ī ,

sēzdahom frašn ēn pursīd kū ēk čē dō čē se čē čahār čē panǰ čē šaš čē haft čē hašt čē nō čē dah čē ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft

čē ēk xwaršēd weh kē , hamāg gēhān rōšn dārēd ,

dō āwurišn ud barišn ī wēn ,

ud se humad ud hūxt ud huwaršt ,

ud čahār āb ud zamīg ud urwar ud stōr

ud panǰ panǰag weh

ud šaš šaš šaš gāhānbār

ud haft haft amahrspandān

ud hašt haštīh nāmīh weh ,

nō nō sūlāg ī pad tan mardōm

ud ud dah dah angust ī pad dast ī mardōm ,

wīstseyom frašn ēn pursīd kū čē sardtar ,

yōšt ī friyān guft kū zīwandagān pad škōh bāš mar ī druwand sāstār ud murdagān ō dōšox ōft

čē nē ēdōn čiyōn tō handēšē bē ēdōn čiyōn man dānam

ud tō ēdōn handēšē kū wafr sardtar ī X abar kōf nišīnēd ud hagriz xwaršēd awiš nē tābēd

bē nē ēdōn čiyōn tō handēšē čē druwand mard menišn sardtar

u =š nišān ēn kē tō axt ī ǰādūg rāy brād ē ast druwand

u =š zahr pad dil čand mušt ēw andar estēd tō nē pad xwaršēd , ud nē pad ātaxš widāxtan nē tuwān

ud man ka pad mušt gīram be widāzēd

ud pas axt ī ǰādug framūd brād ī xwēš rāy āwurdan ōzadan ud zahr az dil bē stadan

nē pad xwaršēd nē pad ātaxš widāxtan nē tuwān būd

yōšt ī friyān andar mušt frāz grift u =š be widāxt ,

wīstčahārom frašn ēn pursīd kū čē garmtar ,

yōšt ī friyān guft kū zīwandagān pad škōh , bāš mar ī druwand sāstār murdagān ō dōšox ōft ,

čē ahlaw mard mušt garmtar

ud u =t nišān ēn kū ān tō axt ī ǰādūg brād zahr nē pad ātaxš ud nē pad X xwaršēd nē tuwān būd widāxtan

ud man pad mušt frāz grift be widāxt ,

25 frašn ēn pursīd kū frōd šawēd čē weh ud be afsard estēd čē , ud weh kē be mīrēd čē weh ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē frōd šawēd āb ud čē afsard estēd ātaxš weh ud kē be mīrēd mar ī druwand sāstār čiyōn tō weh ,

čē agar āb frōd nē šawēd ud ātaxš nē afsarēd ud mar ī druwand ī sāstār čiyōn nē mīrēd ēg =iš hamāg gēhān purr az āb ud ātaxš ud purr mar ī druwand sāstār čiyōn tō hē ud gēhān ud dāštan nē tuwān ,

wīstšašom frašn ēn pursīd kū az kōf čē garāntar

ud az , kārd pōlābdēn čē tēztar

ud az angubēn čē šīrēntar

ud az dumbag mēš čē čarbtar

ud az rādān kē rādtar

ud az rāstān kē rāsttar ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē az kōf zūr ānāstag garāntar

ud az kārd pōlābdēn uzwān ī mardōmān tēztar

ud az angabēn pidar ud mādar rāy frazend ī rōzweh šīrēntar

ud az dumbag ī mēš spandarmad zamīg wārān , čarbtar

ud az rādān tištar yazad rādtar

ud az rāstān wāy ī weh rāstar kē ēč kas āzarm nē ud pārag nē stanēd xwadāy bandag rāy abāg didīgar rāst dārēd ,

wīsthaftom frašn ēn pursīd kū pāy kadām nēktar ud nēkōgtar

ud az was pāy ī man dīd ēg =iš pāy ān ud nēkōgtar ud nēktar , ī man , dīd hufrīh ī tō xwah ī man zan ,

yōšt ī friyān guft kū zīndagān pad škōh bāš mar ī druwand sāstār murdagān ō dōšox ōft ,

čē pay ī āb nēkōgtar

u =t nišān ēn kū ānōh kū āb pāy nihēd xwēd be rust

ud ānōh hufrīh pāy nihēd hušk be bawēd ,

wīsthaštom frašn ēn pursīd kū zanān wuzurgīh rāmišn az čē ,

yōšt ī friyān kū zīndagān pad škōh bāš mar ī druwand sāstār murdagān ō dōšox ōft

čē nē ēdōn čiyōn tō handēšē bē ēdōn čiyōn man dānam

kū tō ēdōn handēšē kū zanān wuzurgīh rāmišn az paymōzan gōnag gōnag ud kadbānūgīh ī sazāgwār ka =šān dārēnd ,

čē nē ēdōn zanān wuzurgīh rāmišn az būdan abāg šōy ī xwēš

axt ǰādug guft kū drō gōwēd u =t pad ēn frašn be ōzanam

nūn be āy tā bē nazdīk ī hufrīy šawam

u =š tō xwah man zan ud u =š hagriz drō nē guft nē gōwēd ud pad gōwišn ī ōy be estam

yōšt ī friyan hamdādestān būd ud axt ī ǰādūg abāg , yōšt ī friyān pad nazdīk ī hufrīy šud hēnd

ud u =šān pursīd kū be nišīn ēn frašn ī rāstīhā be wizār ,

yōšt ī friyān guft kū zanān wuzurg rāmišn az paymōzan ī gōnag gōnag ud kadagbānūgīh ī sazāgwār ka =šān dārēnd ayāb wuzurg rāmišn az būdan ī abāg šōy ī xwēš

ud pas hufrīy handēšīd kū škoft =iz ud ō man mad kē tis =iz mar ī druwand ī sāstār ī ǰādūg ka =m be nē hilēd tā be ōzanēd

čē agar drō gōwam ēg =im brādar rāy be ōzanēd ud man druwand be bawam ud bē ēdōn weh kū rāst gōwam

ud čē agar drō gōwam xwad druwand be bawam ud dād ud dēn ud , ēwēn be wišōbēd bē X ka man pad rāstīh ōzanēd ahlawtar be bawam

u =š čādur abar sar nihuft ud be guft kū zanān wuzurg rāmišn az paymōzan gōnag gōnag ud kadagbānūgīh ī sazāgwār

bē ka =šān X gādan abāg nēst pad dard dušramīh ud tisiz rāmišn ī ān nēst bē dard ud dušxwārīh ,

ka =šān gādan abāg ast ēg =išān pad rāmišnīgtar bawēnd ,

pas axt ǰādūg ka =š ān saxwan ašnūd hešm grift ud hufrīy rāy pad ham zamān be ōzad

ruwān ī hufrīy pad ham zamān ō garōdmān šud ,

u =š wāng kird kū xunak man tā nūn ahlaw būd ham ud nūn =iz ahlawtar ham

bē anāg tō axt ī ǰādūg tā druwand būd hē ud nūn =iz druwandtar šud ,

wīstnohom frašn ēn pursīd kū čē ī pāy dah ud sar se ud čašm šaš ud gōš šaš ud dumb dō ud gund se ud dast dō ud wēnīg se ud srū ud čahār ud pušt čahār ud hamāg gēhān zīwišn ud az ōy ,

yōšt ī friyān guft kū zīwandagān pad škōh bāš mar ī druwand sāstār murdagān ō dōšox ōft ,

čē az dēn paydāg kū kē pēšyār āyēd frašn pursēnd nē ēwēn wizārdan

ud axt ī ǰādūg guft kū šaw pad nazdīk gyāg be nišīn ud pēšyār be kun ud zūd be āy ud frašn rāst wizār

bē čē agar X drō gōwēd ayāb gōwēd kū nē dānam ēg =it pad ham zamān be ōzanam ,

yōšt ī friyān be šud ud abar maγ be nišast

u =š pad menišn handēšīd kū škuft =iz ō man mad estēd kē ēn mar ī druwand ī sāstār ud kē nē hilēd tā be ōzanēd

čē agar ān ī zīwandag ud čē ān ī murdag abāz zīwandag bawēd ēn frašn wizārdan nē tuwān hād ,

pas ohrmazd xwadāy nēryōsangyazad pad paygām ō yōšt ī friyān guft kū frašn passox dah kē ēn gāw ǰuxt ast ī abāg mard kē kār warz kunēd

ud yōšt ī friyān čiyōn wāng ašnūd ud ēg =iš kas nē dīd gumān būd

u =š pad menišn handēšīd kū ma agar ahriman ud dēwān hēnd ud u =šān abāyist kāmag ēn kū man be ōzanēnd

ud agar man ēn frašn hamgōnag passox daham ēg =im ān mar ī druwand sāstār be

pas nēryōsangyazad ō nazdīk ī yōšt ī friyān āmad kū u =š guft kū ma X tars čē man hom nēryōsangyazad ō tō mad hom

u =š guft ohrmazd ud xwadāy kū ēn frašn passox dah čē frašn gāw ǰuxt ast ī abāg mard ēw kē warz kunēd

yōšt ī friyān ka ān saxwan ašnūd ēg saxt pad rāmišnīg būd

pad ham zamān ō nazdīk ī axt ī ǰādūg šud guft kū ēd mar ī druwand ī sāstār ēn frašn passox ēn ast čē ēn , gāw ēw ǰuxt ast ī abāg mard ēw kē kār ī warz , kunēd

ud axt ī ǰādūg ka =š ān passox ašnūd pad ham zamān sturd be būd estād ud se rōzšabān stard būd estād

ud pas az se rōzagudšabān abāz ō ōš āmad ō yōšt ī friyān guft kū farroxīhā tō yōšt ī friyān kē ummēd ō ohrmazd xwadāy kird kē pad ham zamān ō pušt ud ayārīh rasīd ,