Sections

1.0
wištāspyašt bun
2.0
ēn čand wāzīhā ka pad gāhīhā abāyēd guftan
3.0
abāg mānsrag ud zandpursišn ī abartar gāhīhākunišnīh mānsrag abzōnīg ī ahlaw ahlāyīh rad
4.0
pad yazišn ud niyāyišn ī šnāyēnīdārīh frāzwābarīgānīh
5.0
abāg mānsrag ud zandpursišnīh abartargāhkunišnīh mānsrag abzōnīg ahlaw ahlāyīh rad
6.0
abāg mānsrag ud zandpursišn ud abartargāhīhākunišnīh ud mānsrspand ahlaw ahlāyīh rad
7.0
abāg mānsrag ud zandpursišn abartomgāhkunišnīh ud mānsrspand abarradīh ud rad ī harwisp gāh ī abarradīh
8.0
dahmān ham kū mard ī weh mard ham āfrīngōwišn ham kū āfrīn gōwam bē rasād
9.0
abar guft zarduxšt pus ī kay wištāsp
10.0
xwarrahōmand tō sahist u =š ēdōn guft zarduxšt ō kay wištāsp kū xwarrah ī dēn ī weh ī mazdēsnān sahist abar tō ud man kē zarduxšt ham
11.0
ābādzīyišn xūbzīyišn ud dagrzīyišn kū dagr zīyišn ī druyist zīyēd pad padēxīg zīyēd
12.0
zīyēd ašmāh abāg narān zīyēd ašmāh abāg nārīgān zīyēd ašmāh abāg pus ud duxt ud abārīg frazendān ašmāh druyist ud aranǰ bawēd kū dagr zīyēd pad druyistīg kū pad padēzīh ud abēbīmīh zīyēd
13.0
xwēš tō ahlaw bawād čiyōn zarduxšt
14.0
purrgāw bawēd čiyōn ātwīyān bawēd
15.0
hād purrgāwīg ēdōn kū az harw mōy =ēw hazār būd
16.0
purrasp bawēd čiyōn pōrušāsp būd
17.0
hād purraspīg ēd kū az harw mōy hazār būd
18.0
ahlawēnē handāzag amargīg čiyōn kay husraw būd
19.0
arang rōd dūr rāh widār bawād čiyōn arang rōd
20.0
amāwand bawēd čiyōn wēnīdār pus ī arnawāz
21.0
ay arnawāzīh ēw kū arnawāz šārnawāz dō xwah ī ǰamšēd būd ud pus ī ōy ī was amāwandīh dāšt
22.0
bē zāyād az tan kālbod ī ašmāh dah pus kū šambardār frazend ašmāh bawād
23.0
se bawād čiyōn āsrōn hērbed čiyōn mowbedān mowbed ādurbād mānsrspandān
24.0
se bawād čiyōn artēštārān čiyōn spandyād guštāspān
25.0
se bawēnd wāstrīfšūnēnīdār čiyōn zaw tahmāsp andar yazadān weh
26.0
ēk pus bawād čiyōn ǰāmāsp ī frašōštar
27.0
āfrīn pad =iš kunād čiyōn ǰāmāsp kird abar dehbed guštāsp
28.0
ayask amarg bawēd čiyōn pešōtan guštāspān
29.0
tēz tuwānīg bawād abar ōy mihrōdruǰān čiyōn mihr yazad kū kē mihr druzēnēd awēšān rāy mihrōdruǰ xwānēnd
30.0
sōgōmand bawēd čiyōn māh baxtār kū māh dār ud draxtān tābad u =š zarmāyīh dārēnd ud hamčiyōnān ašmāh =iz harwispīn sōgōmand ud tābagtar dār
31.0
rōšn sōzāg bawēd čiyōn ādur yazad kū čiyōn ātaxš ī rōšn
32.0
dōst bawād čiyōn zarr ō mardōmān grāmīg ēd ašmāh čašm pad yazadān mardōmān grāmīgtar bawād
33.0
pas az bowandag bawēd čiyōn kē sāl
34.0
pahlom axwān ahlawān rōšn harwispxwārīh pasēn āfrīn bē rasād ō ašmāh wehān ān ī pahlom axwān ahlawān rōšn hamāgxwārīh
35.0
u =t dahēd amāwandīh ud pērōzgarīh u =tān dahēd gōšt ī yyy sūrīh kū =tān nān baxt u =tān az tis ī xwēš baxt
36.0
u =š ēdōn guft zarduxšt ō pus ī kay wištāsp
37.0
u =tān dahēd ān ī mardān purrrawišnīh ī frazend ī wasstāyīdār kū =š kasān nēw dānēd stāyīdan ud hanǰamanīg nēk dānēd kirdan
38.0
wānīdār ī kasān awānīdār ī kas ōy ī kū āgenēn wānīdār dušmānān bawēd ud dušmānān ōy rāy ma wānād
39.0
ka rasēd ō ayārīh ī kasān ā =š paydāgēnēd rāmišn kū =š pad gyāg rāmišn az ān ī tis bē nigēzād
40.0
yazad purrxwarrah ud yazad purrbešazēnīdārīh ud mehīhpaydāgīh ašmāh bawēd kū ašmāh =iz paydāgtar bawēd ka ēn tis ēdōn kunēnd
41.0
ēdōn guft zarduxšt ō pus ī kay wištāsp
42.0
kē mehīhsūdīh ašmāh bawād pad paydāgīh pad xwānišn kū tarsagāhīh ī yazadān ašmāh rāy sūd ī wuzurg paydāg bawād čē ašmāh xwarrah baxšēnd yazadān āb dahēd
43.0
amāh tō rāy ēn ǰān zayēm ahlišwang weh tarsagāh rādīh =iz kē kāmagdōysar hučašm ī hēnd ān ašmāh rāy abāg kāmagīh rādīh ī yašt kunēnd
44.0
frāz tō rāy az aršišwang pārand rawāg
45.0
paydāg bawād ān kē tō pus ī kay wištāsp bawād
46.0
andar ēn buland mān ī tō pad hamēšag nēkxwarišnīh bawād kē saxwanrāmišnīh nēk rasēd ud kasān =iz tō xwarišn ī nēk rasānīdag bawād
47.0
ud hagriz ma xwāhē abarō āsrōnān tarxwarišn ī dād ā =t kas tarxwarišn ī abar āsrōnān bawēd
48.0
ān kē pad xwēš rāyōmandān frazend dādan wināhgār bawēd hamčiyōnān āstārag garān bawēd čē āsrōnān rāy xwarišn ī nēk abāyēd dādan
49.0
abāz guft zarduxšt ōy ī pus ī kay wištāsp
50.0
kē dēn ī mazdēsnān burdār kū āstawānīg ī dēn ī weh mazdēsnīg brād ayāb dōst
51.0
ān kadāriz =ēw kē arzānīg ī dēn ī amāh bawēd kū kē brād ayāb dōst ī dēn ī weh harw kē dēndāštār ud dēnxwānīdār awēšān rāy nigāh kun az pāk xwarišn ī dādan bē parwarēnd
52.0
kē ahlaw zarduxšt guft ō wištāsp
53.0
pad tarsagāhīh ī frašōštar ud ǰāmāsp ahlaw pus ī frašōštar awēšān rāy wāstarēnēnd kū bē parwarēnd
54.0
u =š ēdōn guft ohrmazd ōy ī ahlaw zarduxšt
55.0
ōy =iz ēdōn guft zarduxšt abar pus ī kay wištāsp
56.0
ma xwad dušzōtīh ma adōstzōtīh bawād kū kē yazišnīgar mard dušmenīdār ud duškirdār ma bawād ud abāg zōtīg ud ātarwaxšīg dušmenīdār ēk abāg zōt ma bawād
57.0
čē yazadān yazišn ī ōy nē padīrēd čē kē az ān dušzōtīg adōstzōtīg mardān purrzyān rasēd az ān =iz rāy ohrmazd az dušmenišnān adōstān zōtīg mardān yōǰdāsrīh abāz guft ēstēd
58.0
kē az =iš yazišn ī yazadān ud amahraspandān nē yazīdag bawēd
59.0
čiyōn kē tō pad niyāyišn ī yazišn xwāhēd hamčiyōnān ān dušzōtīg nē kunēd ud amahraspandān nē padīrēnd
60.0
ēdōn guft ohrmazd ōy zarduxšt ud zarduxšt ōy =iz abar guštāsp guft ēstēd
61.0
ahlāyīh ābādīh ī pahlom ast
62.0
sidīgar pargard bun
63.0
ēg kē bē xwānēd ēn dēn tā hamčiyōn tō pus ī tō =iz bē xwānēd ay wištāsp kū čiyōn tō bē xwānēd tā ān paywandān ī tō =iz bē xwānēd
64.0
tō abartar ēst ēn dēn bē āšnaw ud kasān =iz rāy bē āmōzišn
65.0
tō abāg frazendān bawād abāg pēm bawād kū kārkirdār bawād pēmōmand kū dēnīgān rāy az šīr parwarēnād šīrēnōmand kū hamāg šīrēnīh ī dēnīg az tō ast
66.0
ēdōn tō kē frāz gōw kū bē xwān
67.0
ohrmazd ud srōš =iz ahlaw ud dēn =iz ī mazdēsnān az harwistīn harwispgāhhusrāyišnīh ud harwistīn harwispwarzišnīh ud harwistīn harwisphangirdīh kū harwisp kardagīhā ud hādān warzišn ī srāyišnīg kū az hamāg hādān ī yazišn ud hangirdīg srāyišnīg srāyēnd
68.0
az awēšān srūd āšnawišn frāyīdār ī gēhān ast kū abzōnīg ī gēhān ast
69.0
ud mardān ī ahlawān rāmišnīg pad kāmag rasēd
70.0
u =š mardān ī ahlawān rāy pānagīh
71.0
u =š mardān ī ahlawān rāy nigāhbānīg ud sālārīh kunēd dādār ohrmazd az ēn nēkīh ī abestāg ud zand
72.0
kē az awēšān tarsagāhīh kū abestāg ud zand tazišn ī ahlāyīh āgāhēnēnd kū āgāhīh ī kār ud kirbag bawēd
73.0
u =š ahlāyīhfrāydahišnīh gēhān ast
74.0
nē =iz mard ī ahlaw āgāhīh ī ahlāyīh sūdōmand hilēd dānēnd tuwān kū any az ēn gāhān xwānišn ī rāh ī kār ud kirbag nē tuwān dānēnd
75.0
tō abartar wardišn ī bē xwān
76.0
harwisp gyāg ī hāwanān ud harwisp ādarwaxšān pad wardišn ī bē gōw
77.0
ud harwisp gyāg ī frabardārān harwisp āburdārān ud harwisp āsnīdārān ud harwisp rehwiškar ud harwisp srōšāwarz pad wardišnīh bē gōw kū ēn haft gyāg ī pad urwēsgāh haft amahraspandān rāy kird ī ēstēd
78.0
ān harw haft amahraspandān rāy nām tō bē gōw kū bē xwān
79.0
abar xwān tō harwisp āsrōnān ud wāstaryōš
80.0
abar bē xwān harwisp mān mānbed ud harwisp wis wisbed ud harwisp zand zandbed ud harwisp deh dehbed
81.0
harwisp ǰuwān ī humenišnān ud hugōwišnān ud hukunišnān ud hudēn kū andar dēn kār ud kirbag pad nēkīh kunēd harwisp ǰuwān ī saxwanān gōwišnān kū andar dēn rāstguftārtom bawēd ud harwisp xwēdōdah kū kār ī xwēdōdah andar dēn mazdēsn kirbag guft ēstēd kū az =iš ahreman dēwān dēw anummēdag hēnd kū xwēdōdah yyy margarzān bawēd
82.0
harwisp dehwardišn yazam kū pāsbānīg gēhān kardag pāduxšāy bawēd awēšān =iz pad wasīh bē xwān ud yaz harwisp huframānīh ī dēn abar bērasīdār rāy kū andar dēn rāst framān dārēd nēk dādestānīg ud āstawānīg ī dēn mazdēsnīg ud harwisp mān mānbedīh kū zan =ēw kē andar mān rāh ī rāst dārēd
83.0
harwisp ān tō kē ōy tuxšāgīh ast ahlāyīh kār kirdār ān radān kē hēnd az ahlāyīh rad kū ahlaw ahlāyīh rad kē yazišn ī kirdārān rāy tō bē yaz
84.0
ud sīhudsē nazdist pērāmōn ī hāwan kē hēnd pad ahlāyīh rad ōy =iz rāy bē xwān srāyišntom
85.0
86.0
tō pus ī kay wištāsp kū ēn =iz abar tō guft hamāg awēšān rāy sālārtom bawād
87.0
kē az =iš bē wānīd pad āgenēn hamēmālān ud adōstān ī bēšīdārān bēš rāy kū wānīdār harwispīn dušmenān pad sad ud sadagāntom ud az sad ud dah hazāragāntom ud az hazār ud bēwar ud bēwaragāntom ud az bēwar amar ud amaragāntom amar bawēd
88.0
ēn saxwangōwišnīh frāz gōwē čiyōn kē tō rāy frāz gōwēm man dād ī weh ohrmazd ast kū az harwistīn dādestānīhā kē weh ud meh dādestān ēn hēnd tō bē gōw an tō andar yazišn ī yazē an tō andar yazišn ī frāz yazē ēn dām kē ohrmazd ast kū andar dēn ī ohrmazd frāz yazam
89.0
passoxīh ān abar pursīd kē pus ī kay wištāsp ōy zarduxšt
90.0
az kē tō an yazam az kē yazišn ī frāz yazam an andar ēn dām ī ohrmazd kū az čē nērang kunišn yazišn ī yazam
91.0
u =š guft zarduxšt abar tō kadāriz =ēw paydāgēnam
92.0
tō kē ast pus ī kay wištāsp kū az ān nērangīhā yazišn ī yazam an abar tō āškārag gōwēm
93.0
kē pēš ī urwar ī ārōyišn hēnd bē ras ay guštāsp
94.0
kū urwar az nēkīh rust ī hēnd ānōh rasīdag amāwand
95.0
ēn saxwan gōwišn ī tō frāz bē gōw kū ēn gōw
96.0
kē namāz ōy ī tō urwar ī weh ohrmazddād ahlaw
97.0
pas aṣ̌əmvōhu se bē gōwišn ī se bār ān urwar ī tāg rāy yōǰdāsrēnīd
98.0
pas ān barsom rāy ul barišn fradom bār ayāb didīgar bār ayāb sidīgar bār kū barsom pad kār ī yazišn kirdan az kārd ī barsomčīn bē čīnišn yazam
99.0
urwar bē čīnišn ī ān urwar ī kē yaz guft ēstēd pad yazišn yazam bēāwarišn yazam pad abartom aiβiiaghan barsom pad ahlāyīh frāzwistard pad ahlāyīh aybyāstišn yazam kū pad ahlāyīh nigerišn yazam
100.0
barsom bandišn kū zōhr ud barsom pad dahmān nigerīdag ud dahmān framūdag yazišn yazam pad abardādīhā
101.0
nidom hōm pad kāmag bē kōb kū tāg ī hōm pad hāwan bē kōbišn yazam kū hōmpālā bē kun pad dādīhā
102.0
nidom hōm pad kāmag hunišn kū hōm bē xwarišn andar yazišn mard az huframānīh xwarēd kū az ān xwardan pādixšāyīh ayābēd kū pad pahlom axwān rasēd
103.0
ahlāyīh ābādīh ī pahlom ast
104.0
čahārom pargard bun
105.0
u =š ēdōn guft ōy zarduxšt abar ōy pus kay wištāsp kū tō bē xwānē wištāsp ohrmazd xwadā rāy
106.0
kē purrxwarrahōmand ahlaw ohrmazd tō xwānē spās ī xwadād ēd xwadādīh ay kū az xwēš ēstīdag ast asmān
107.0
tō xwānē zamān ī akanārag ud wāy abarkār kū mēnōy rām yazad
108.0
bē xwānē tō wād ī tagīg ī ohrmazddād
109.0
kē az =iš baγbaxt ayābēd
110.0
ēn abar guft awēšān amahraspandān rāy bē xwānē čiyōn kē =t kāmag ayābišn ī dahēd kū harw =iz ī kē kāmēd bē ayābēd
111.0
ān druzān rāy wānišn yazam barēd wād ī taxm ud škeft spēnnāgmēnōydād kū wād ī tagīg ī ohrmazddād pad harwisp amahraspandān tagīgtom ast abar hamāg dēwān druzān kū az tuwānagīh ī xwēš bē škennēd purrpāsbān az bēšīdārān bēzadārtom dušmenān pad āgenēnwānīdārtom hamēmālān ud adōstān ī bēšīdārān
112.0
ēdōn ēn saxwan gōwišn frāz gōw kū ēn pargard pad kāmag pad pēšrawišnīh kū pad pēšōbāyīh bē gōw
113.0
abar tan ī xwēš ul warzēn ēn gōwišn kū abestāggōwišnīh frāz warzēn
114.0
pus kay wištāsp ud tō bē yaz ēn ātaxš ī ohrmazd pus kē tagīg hēnd ud artēštār kū tan ī ātaxš armēšt ud mēnōy artēštār hēnd
115.0
kē =š dēw ī kund mast ǰudmast rāy bē wānēd ān ātaxš
116.0
druǰaskān hampadēnd druwand dēwēsnān zīyišnīg ī zanēd mardōmān
117.0
kund dēw ān bawēd kū andar tan ī mardōmān kundīh nihēd
118.0
druǰask ān bawēd kū andar tan ī mardōmān yaš ud zyān nihēd
119.0
druwand dēwēsnān ān bawēd kū az kunišn ī xwēšzīyišnīh ī mardōmān bē kāhēd
120.0
rāh ī zurwāndād abar rasēd bē tarsēd kē =iz druwand kē =iz ahlaw ruwān bawēd kū harw kē widerēd rāh ī zurwāndād rasēd ud bē tarsēd kē =iz druwand kē =iz ahlawān ruwān bawēd
121.0
ēg kē ahlaw bē widerēd pas az widerišnīg ī ōy dēwān druzān
122.0
az bōy ēdōn frāz tarsēd čiyōn mēš gurgān xwistag kē az bōy ī gurg frāz tarsēnd
123.0
awēšān =iz kē dēwān druzān hamčiyōnān az bōy ruwān anōšag ī bē tarsēnd
124.0
ān ahlawān ruwān pad nīrmad ī kōfag ī xwēš andar garōdmān ī abzōnīg pad mān ī ohrmazd kē nēk kardag bē mānēd
125.0
harwisp rāh ī garōdmān ān ul barēd
126.0
kū wahištīg ōy bawēd kē hamdahišnīh ī stōdānyasnān saxwan gōwēd kū ēn yazišn ī bē yazēd čē kē az =iš garōdmānīg bawēd ān
127.0
nē ān kas mard zarduxštīg rāh dārēd kū kē mard =iz ayāb kanīg pad hą bōy bē tabāhēnēd kū kāhēd
128.0
kū gyān bē zanēd andar aškomb kū mard abāg zan ī kasān gād kunēd u =š ōy zan ābistan bawēd pas ān kanīg ud mard harw dō az šarm ī kasān dārūg ud darmān appurēd ud ān dārūg kanīg xwarēd u =š ābistan ōbadēd awēšān mardōmān pad rāh ī zarduxštīg nē bawēd čē garāntar wināh kū margarzān bawēd kū rāh ī ānōh tabāhīhēd
129.0
u =š ēdōn abar guft zarduxšt ō kay wištāsp
130.0
bē yaz tō dēn spitāmān zarduxšt rāy pas az abarstāyišnīg kū yazišn yaz ud pas stāyišn abar gōw
131.0
kē ēdōn ast hamdahišnīh ī mānsrspand u =š ēdōn yazišn bē yazam
132.0
ud abāz wardēn tō az dād ī ǰud kū az rāh ī kasān abāz ēstēn čiyōn abar asp ī aγrī aswār bawēd ud rāh ī ǰudristag rawēd pas paydāg bawēd kē abar arāhīh ī āmad ham
133.0
pas az ān gyāg asp rāy abāz wardišn wardēd ud abāz ōy ī rāh ī rast āwarēd
134.0
hamčiyōnān tō =iz asp rāy abāz nay pad rāh ī rāst kū abar dēn ī mazdēsnīg asp rāy bē āwar kū dēn bē padīr kū az =iš was druzān rāy wānišn ast kū pad yazišn ī ēn dēn hamāg dēwān druzān nēstēnēd
135.0
čē az ulīh ul bē rawišn kē ān weh dēn ī mazdēsnīg pad xwānišn bē xwān kū abar ēn dēn ī mazdēsn bē ras ay guštāspšāh
136.0
ēdōn ēn nigāh dār andar axwān ān kē mardān ud nāyrīgān ī dēn padīriftārān kū awēšān pānagīh bē kun
137.0
bē =iz az ōy yyy mizd frāz rādīh griftan kē mizd ī mēnōy abāyēd griftan ka =š andar garōdmān bahr ayābēd
138.0
kē andar axwān awēšān amāh dēn bē dāštār hēnd pad awēšān rādīh bē kun mizdstānišnīh kē az astān ān weh ast kē dēnīgān rāy bē parwarēnd
139.0
nē =iz ān weh ka =š abar gyān tan ī xwēš wehxwāstār bawēd kū xwēš xagr bawēd ud kasān rāy asagr dārēd nēkīh xwad xwāhēd
140.0
kū tō =iz ēn dēn ī mazdēsn padīrēd rawāgīh dahēd tā ka =š ōy sūdōmand pērōzgar sōšyans rawāgīh dahēd kū tā zamān ī sōšyans dēn rawāg dārēd
141.0
ēdōn =iz awēšān kasān rāy ān dahišn ī bawād ka =š ǰuddōstān bawēd kū dušmenān ī ēn dēn bawēd abar dēn nē garōyēd awēšān =iz rāy abar dēn āstawān bē kunēd
142.0
ēg kē tō ud pus ī tō ud duxt ī tō kū dēnburdārān harw kē bawēd dast ī šabēn rāy pāk kunēd tā fradom az saxwan nē šōyēd fradom az gōmēz ī gāw dast šōyēd ud pas az āb šustan
143.0
kē =š ast abarpad gannāgmēnōy snehagmenišnīh kū pad menišn ī abar gannāgmēnōy snehag dārēd az nērōg ī dēnīg
144.0
kē nē ēdōn nērōg dārēd ān sneh nē menēd kē =š abar gannāgmēnōy snehgōwišn ast kū az gōwišnīh snehag abar gannāgmēnōy dārēd
145.0
ka =š ast abar gannāgmēnōy dām sneh pad kunišnīh kū =š az būšāsp abar handazēd fradom dast az gōmēz ī gāw šōyēd pas kə̄mnā mazdā bē gōwēd
146.0
pas az āb dast šōyēd tā šāyēd hamēdōn nērōg gīrēd čiyōn kē pad abar nibišt ōy mard ēdōn bawēd kū pad menišnīh ud gōwišnīh ud kunišnīh sneh abar gannāgmēnōy ahreman ī stwnīdag bawēd kū snehīhā ā =š az =iš bawēd kū āšnaw az man kē ān man gōwēm kē =š āmurzīdār ast
147.0
tō rāy ohrmazd kū wināh bē āmurzēd ud kanīg az tō padīrēd
148.0
kē ān man zarduxšt rāy dēn nimūd ēstēd ohrmazd ān dēn tō =iz padīr kē abāg mayānǰīh ī amahraspandān pad gōwāgīh ī man āyīdag ast ōy pēš tō andar ēn gēhān kū amahraspandān pad gōwāgīh ī man āyīdag ast andar ēn gēhān pad padīrēnīdan ī dēn pēš tō ān dēn tō bē padīr kē ānōh mizd mēnōy bē ayābēd kūtā dagrhusrawīh bē mānēd andar ēn axwān tā dagrhuaxwēnīh ruwān rāy pad mēnōy ast pahlom axwān kūtā dagrhuaxwīh winnīrīh pad čīnwidarg bawēd ud pas az widardan pahlom axwān rasēd
149.0
bē nēkrawišnīh pad pahlom axwān bē pad nēkīh mānišn andar garōdmān ī mēhan ī ohrmazd kē nēk kardag ēstēd pad harwisp pēsīdag
150.0
ēg kē az ēn gēhān ā =š ǰudāg bawēd kū bē āyēd baxt pas ruwān rāy kē man ohrmazd ham xwad pad nēkīh saxwan pursēm pad pahlom axwānnigēzišnīh hamčiyōn ohrmazd amahraspandān =iz man paydāgēnīd
151.0
ān =iz pad was nēkīh hampursīd ruwān rāy pad āsānīgīh čē kē az sahmgen bīmgen rāh rawīdag bē āyēd
152.0
ahlāyīh ābādīh ī pahlom ast
153.0
pargard panǰom bun
154.0
kē purrrayōmand ud xwarrahōmand dēn baxt ēstēd ohrmazd pad tō rāy pad franāft ī amahraspandān kū rōšn dēn ohrmazd baxšīdag ēstēd ay guštāsp
155.0
pad tēz kū ul asp bē daw abarpad ēn dēn ī ohrmazd ud zarduxšt ud ārzōgēn kū tēztar ēn dēn ī weh tō bē padīr kē =š az ān pusarān ī tō =iz āstawānīg dahēd kū awēšān ēn dēn ī weh padīrēd
156.0
ul sah ud bē ras tō ay pus ī kay wištāsp abarpad ēn dēn ī ohrmazd ud zarduxšt
157.0
abāz abar guft zarduxšt kū dēn ī mazdēsnīg kē man čiyōn frāz gōwam hamēdōn tō padīrīd bawād kū kē ǰuddōst bawēd kū abarpad ēn dēn āstawānīg nē dārēd kū ǰuddēnān bawēd ōy rāy pas guft bawēd
158.0
ōy yyy rāy frāz guft ēstēd kū bārestān pad tarist ī āhen widaxt ān yyy xwarišnān barēd kū ān nēk bē barānd ān wad bē ō tō āwarēnd
159.0
agar awēšān xwarišn az awēšān ān frāyābādīh az pardaxt hē ay kē =š ēdōn garā bawēd nē ān tō hampadēxwīh bawēd pad hamrasišnīh ī kū ānōh kē ruwān ahlawān mazdēsnān hampaywand kū nē ruwān ā =šān pad āgenēn xwēš
160.0
ānōh kū druz padēnd āgenēn ā =šān abāg padēx yyy bawād
161.0
kū andar druztom mān padēnd kū andar dušox ī tārīg
162.0
kū ēwpāduxšān pāduxšāyīh wištāsp ānōh mānišn yyy bawād
163.0
kū andar garōdmān mēhan ī ohrmazd ud mēhan ī amahraspandān
164.0
ānōh kū tō dēn rawīdār ast kū dēn rawāgīh az tō ast
165.0
mā tō rāy dēn ī mazdēsnīh pad tangīh abganišn kū andar tangtar gyāg ī dušox ma abganēd
166.0
kū az tangīh ī dušox dūr dārēd andar rōšn garōdmān baxšād
167.0
čē rāy kē tō az harwistīn astōmandān axwān ham āhānd ān hamxwāyišnīh ī dēn ī mazdēsnān hēnd kū dēn ī weh pad xwāyišn ī xwēš rawāg dārēd
168.0
bāstān ēdar ēstēnd pad dar ī tō yyy kū yyy ī dēn ī tō yyy hēnd pad dar ī tō ēstād kū =m tis bē dah
169.0
bārestān ēdar ēstē pad ōy any dar ī kasān xwarišn ī pursišn ud xwāyišnīh rāy kūtā =m dahād kū pad xwārīh pad dar ī kasān bē wardēnād pad wēnišn
170.0
bārestān ī tō tarist āhąn yyy ān ī stad xwarišn pad sōzišn kū xwarišn ī dāγ pad sar ī tō bawād
171.0
kū bē āy bē ārāyē pad rād dahišn ēn dēn ī weh ahlaw ohrmazddād
172.0
kē az =iš ān hamnāf ī tō rāyōmand dēn ī weh rāy bē ārāyēnd nāf kū frazendān rāyōmand ī tō
173.0
abāz =iš guft zarduxšt ōy pus ī kay wištāsp kū dēn ī mazdēsnīg pusān nāfīg zāyīdag
174.0
kū frazendān ī tō rāy u =š pērōzgarīh dahēnd abar ōy bēšīdārān druwandān dēwēsnān kū pērōzgarīh dahēnd mazdēsnīh dēn az padīrišnīh ī dēn
175.0
kū ma ašmāh az menišn ī ān gannāgmēnōy ahreman āstārēd kū harw kē pad menišn gannāg rāy menēd xwēš frēb ayābēd az ān wināhgār bawēd
176.0
čiyōn kē dēwān pad frēbišnīh warankāmagīh bē waxšēd hamāg pad afsōskirdārīh wahištkāmagīh rāy bē škennēd tō =iz hamāg yyy bē škenn kē az =iš dēwān ud druzān nēstēnēd kū az druz ī waran afsōsgar dēw ud dēwēzagīh dūr pahrēz
177.0
kū mardān ī ahlawān rāy az urwarān dar ī wišād dār kū mardān ahlawān rāy pad rāddahišnīh ī ǰōrdāyān dar rāy bē wišad kū az frēbišn ī ahreman ī dēwān druzān az ahlawān rādīh ma band ī čē guft ēstēd pad dēn kū pad ruwān rādīh ud hamē gēhān rāstīh weh
178.0
ō ōy ātaxš āfrīnēnēd kē =š abar ātaxš bōy bē rasēd hušnūd abišt ud sagr
179.0
kū abarō tō haxtād ān gōspandān ramag kū =t bawād abar ān ī tō wīrān ī purrrawišnīh kū frazend ī was
180.0
barād ayābagīh abāg baxt baγbaxt =iz kū kāmag tō bē ayābād pad nēkīh ud frazendān baxtdār bawād
181.0
tō ān ēdōn abar bē xwānišn ī pad hamāgstāyišnīh andar ēn axwān ī astōmandān was xwarrahōmand ātaxš ī ohrmazd rāy
182.0
ān xwarrah ī ohrmazd xwad dōstōmand abar ōy ātaxš xwarišn rawišn yyy kū esm ud bōy abar ātaxš rasān
183.0
ān ohrmazd abartom xwad dād ēstēd bē pad stāyišn
184.0
awēšān gōwišnān gōwišn ī kē amāwandān ud pērōzgarīh ud drustīh ud bēšāzišnīh ud frāydahišnīh ud wālišndahišnīh ud waxšēnišnīh ǰōrdāyān ay gōwišn bē gōw
185.0
pad hambarišnīh ud pad āgenēn harw kē ēn gāhān saxwan bē gōwēd kū ēn pargard bē xwānēd ān fradom brēhēnīdag garōdmān ī ohrmazd rasēd az ān čē tō =iz abar bē xwānē kū garōdmānīg bawēd
186.0
ahlāyīh ābādīh pahlom
187.0
pargard šašom bun
188.0
amahraspandān rāy bē gōwēd kū amahraspandān rāy bē xwānēnd ay wištāsp
189.0
abar ēdōn guft ōy zarduxšt kū pus kay wištāsp
190.0
srōš ahlaw yazam nēryōsang =iz hurustag ātaxšān =iz ohrmazd ārzōgīh =iz buland kayān xwarrah pad kāmag pēšrawišnīh pad nigahdārišnīh ī tan xwēš bē xwānišn kū pad tan ī ahlāyīh az astān pēšōbāyīh ēn hamāg awēšān rāy tō bē xwānēd
191.0
ēdōn tō pad tarist ī šab xradpursišnīh ī ahlawān kū pad ušahingāh xrad ī ahlawān pursēnišn bē xwān
192.0
pad nēryōsang hamōxtišn ēn pargardīhā bē gōw
193.0
ēg tō kē pad tarist ī šab ān xrad ī ahlawān pad ušahin bē kunēd pad ǰaγar bāzāīh bē xwānēd
194.0
pad ān tarist šab ud rōz pad amāwandīh ul abespār
195.0
pad wāstarišnīh gōspand ī hudahāg kū gōspand ī hudahāg rāy pad parwarišnīh bē abespār
196.0
awēšān atuwān gōspandān rāy tō xwēš tuwānāīh dah pad xwarišn ī parwarišn ī bē kun kē =š ast awēšān zarduxšt rāy dād ēstēd pad radīh čiyōn kē zarduxšt awēšān =iz radtom ast
197.0
u =š tō ahlāyīh rāh nigēzēd pad āgenēn ānōh rāh nigēzēd kū wahištīg bawēd pad garōdmān ī ohrmazd
198.0
kū wahman amahraspand andar garōdmān gāh ī zarrēn abāg wistarg xūbīhā dahēnd
199.0
kū ast pērōzgar andar dēn ī mazdēsnān
200.0
kū ēdōn ān mard pad xwēš ruwān ān pahlom ahlāyīh pad hunsandīhā frāztar franāmēd kū ān pērōzgartar bawēd
201.0
ān nāmīg mard az dūr kē puhl ī čēhwidarg wēnīdag amāwandīh bawēd
202.0
kū az kār ud kirbag ahlawān ruwān amāwandtar bawēd
203.0
kē ahlāyīh ān pad hupānagīh pānagtar bawēd andar ān rāh čēhwidarg
204.0
ēg kē tō andar dāmān dādag bawēd ohrmazd pad hamēdōn frāztomtar bē guft ast ohrmazd tō rāy
205.0
zarduxšt abāz ōy guft ōy pus kay wištāsp kū tō ān abar bē xwān kē =š ast pāsbān nigāhbān māh ud xwar =iz rāy kū harw kē ǰuddōstīh bawēd
206.0
kū pad dēn ī weh āstawān nē bawēd ān druwandān ruwān rāy ānōh pad āškārag zanišn ī bē dahēd kū tōzišn ānōh dahēnd
207.0
ēdōn guft dušxwarišn gannāgmēnōy purrmarg pad anāštīh kū pad anāštīh ī dēn rāy ēdōn gōwēd dēwān ud druzān rāy
208.0
kū xwarišn ī wattar ān ruwān ī druwandān abganēd kū bē dahēd kū nasā =iz bē dahēd
209.0
ān frēband ruwān rāy dēwān andar dušox xwarišn ī wad dahēd ud abāz xwēšīh ī xwēš dārēd
210.0
ān ruwān az wad xwarišn xwarišn ī adādīhāxradīh bawēd čiyōn kē sag pad adādīhāxradīh pah ud mard rāy bē rēšēnd
211.0
bē ān ōy rēš čē rēš tōzēd ān sag rēš tōzēd pad bōdōwaršt tōzišn čiyōn ān ōy =iz rāy tōzišn kunišn
212.0
fradom pad rēšišn dahm bē widerēd ud fradom ān dahm rēšēnīdār sag rāy bē rēšēnēd pad bōdōwaršt tōzišn
213.0
kū čiyōn kē sag rāy tōzišn ī dahēnd kū fradom bār mard ayāb pah bē rēšēnd ud fradom bār hamēdōn tōzišn dahēnd hamčiyōn dahmān
214.0
kē az dēn ī ohrmazd pad frēbišn ī dēwān abāz ēstēd awēšān =iz rāy pad fradomīh tōzišn dahišn ī abāz pad dēn ī āstawān dārišn ī saxwan ānōh pad tōzišn ī nē rasēd kū andar dušox dēwān nē nayēd
215.0
ahlāyīh ābādīh pahlom ast
216.0
pargard haftom bun
217.0
abarō tō haxtād ahlaw pus kay wištāsp kū bē rawād sadēwārīh kunīdag gurdīh ī bowandag ān bowandag meh ud bowandag keh
218.0
tā drahnā ī sālān ī tō ay ahlaw wištāsp kūtā zīndagīh ī tō hamāg gurdīh ī tō društēwārīh kunandag bawād
219.0
kū pērōzgarīh abar dušmenān hamwār ī bawād
220.0
ud azarmān amarg ud awinastag ud apūdag kūtā hamwār amarg ud azarmān kū tuwānāg ud zīndag bawād ud awinastag ud apūdag kū hamwār pad hamāg nēkīh ud drustīh zīyēnād čiyōn andar pahlom axwān ī ahlawān ī rōšn ī hamāgxwārīh
221.0
bē bar pad gōš āšnūdan kū gōš dār
222.0
kū man gōwēm tō bē āšnūdan bē frayād ī kasān =iz āšnaw kū dādestān kasān nēk kun
223.0
bē bar xwarišn bē bar wastarg any mazdēsnān kū hamāg mazdēsnān rāy parwarišn bē kun pad xwarišn ī wastarg
224.0
az =iš bawād tō rāy ānand čand ayābišnīh kū az =iš ayāftkāmag bawād
225.0
čiyōn kē =t ān an frāz guft
226.0
amahraspandān xwarrah abar tō baxšēnd ud ān rāyōmand xwarrahōmand abzāyēnd bawād kū =šān xwarrah abar tō abzāyēnd
227.0
pad tēz asp rāy bē ǰahān kū abar ēn dēn bē āy kū =š az =iš tēz pusān ī tō =iz ham āstawānīh dahēd
228.0
kē dēn nēk az harwistīn mahist ud buland ēdōn srāyīd ēstēd ān ēn dēn rāy tō ēdar srāyišn bē kun
229.0
srāyišn ēdar xwāhēh ay pāduxšā kē =š andar mēnōy dādār ohrmazd abzōnīgōmand ud gannāgmēnōy ahreman rāy kāhišnīhōmand az srāyišnīh ī abestāg zand
230.0
ān kadāriz =ēw kē pad tēztar yazišn yazišn kunēd pad ahlāyīh abāgīh ān abzāyišnīh ī ohrmazd xwāhēd ud ān ō gannāgmēnōy škennišn xwāhēnd
231.0
kē amāgān yazišn ud niyāyišn pad abārōnīh šāyēd ōy rāy abārōn pādixšāyīh bawēd nē ōy rāy pāduxšāyīh kū pahlom axwān nē ōy rāy
232.0
pad ēn ōy rāy pad abārōn axwān dahēd pādifrāh agar kē =š ō deh dehbed bawēd ān ī ōy asp huburdār ud ān ī ōy pad rah huwazēnīdār bawēd ōy u =š wahišt ī hubōy nē bawēd
233.0
kū kē yazišn ud niyāyišn pad abārōnīhmenišn xwāhēd agar =iz ōy ī šāhān šāh bawēd wahištīg nē bawēd
234.0
kū ay pādixšāyīh bē dahē abar dēn ī zarduxštīh pad frāyistīh kū wasīh yyy dahišn bē kun kē =š tō =iz rāy pādixšāyīh pad kāmag dahēd
235.0
u =š pas ēstēd duškārkirdār u =š abāz dārēd mānsrspand harwisp dušīh kū harwisp wattarīh abāz dārēd
236.0
az ēn mānsrag gōwišn frāz tō zāyišn ī waxšišn =iz yōǰdāsrag ī kirdagōmand kū pāk bē kunēm kū parwarišnīh dādag ast
237.0
ašmāh abāg pusīhā abāg pēmīh kū =t xwad pusān ud duxtān u =t pēm bawēd kārōmand kū =t kār bēd ud pēmōmand kū =t pēm bawēd šīrēnōmand kū =t šīrēnīh bawēd ēk ān ī mardōmān ud ēk ān ī gōspandān pēmōmand ud frazendōmand
238.0
an ēdar frāz šnāyīd =ēm kū parward =ēm ān az harwistīn mānsrag mazdēsnīh
239.0
u =tān yyy ō hamtazīn yyy kē ast pussrāyišnīh
240.0
hamēdōn ohrmazd ōy zarduxšt guft
241.0
mā kas dēn ī man abar druwandīh dahād kū abarpad dast ī druwandān wināhgārān dēn arawāgīh dahēnd
242.0
agar dēn ī ā =mān abāg druwandīh rawāgēnēd pad =iš abarpad ēn spandarmad weh bowandagmenišnīh dard ī tābišn bē rasēd
243.0
kū andar ēn gēhān harw kadāriz =ēw ranǰ ud bēš ā =š bē rasēd az kunišn ī druwand ahlomōγ
244.0
ud urwāhmenīh ī mardōmān az gēhān bē barēd
245.0
ud humātrām dahēnd kū šīr az mādagān bēbarišntar dahēnd
246.0
kū az šīr ī mādagān hamāg gēhān bē parwarēnd ān hamē bē kāhēd čē kē druwand ahlomōγān dēn pad ahlomōγīh rawāgēnēd
247.0
ul kū tēz az ēn warankunišnkirdārīh mādagān pēm bē barēnd ud ān harwistīn apēmīdag bawēd
248.0
ud harwistīn gušnān rāy pad tangīh handāzēd ud druwandān rāy frāz tuwān dahēnd
249.0
pad purr kū wasīh abar ātaxš bōy bē nihē kē =š pad dūr nēmag kē dōst ī ātaxš ī dādār ohrmazd hēnd kū abar ātaxš ī ohrmazd bē bōy nihēnd kē az =iš pad harw kadāriz =ēw nēmag pad dūr gyāg dēwān ud druzān ud ǰādūgān nēstēnēd kū bōy az wād harw gyāg =ēw kē barēnd kē awēšān nēstēnēd
250.0
nē az =išān abar ašmāh wahman mard zyān niyāzānīh rasēd kū =tān nēkīh abar rasēd pad hunsandīh ī ātaxš
251.0
ān kē harwistīn spennāgmēnōy dāmān kē hēnd u =šān bēšīdārān bē nayēnd kū harwispīn bēšīdārān az spēnnāgmēnōy dāmān nēst apaydāg ud wany bawēd
252.0
kē tā dērangzamān ummēdēnēd az mihr ud rašn =iz razistag kē =iz dēn ī mazdēsnān ān mard kē ummēnīd hēnd az mihr yazad ud rašn ī rāst yazad kū harw kē abar ēn dēn ī mazdēsnān āstawānīh nē dārēd ud kunišn =iz pad framān dēn ī weh nē kunēd ān mard az mihr yazad ud rašn ī yazad dūr bawēd
253.0
bē warzēnd pad hamōxtišnīh čiyōn kē hamōxtišn pursišn hēnd kū nērangīhā ī dēnīg az hērbedān hamōxtišn warzēnišn čiyōn kē =t ān frāz guft =am kē =š az =iš ān pusarān ī tō =iz ud brādarān ī tō =iz sālārēnēd ēn dēn ī weh pad dōstīh ud ērmenišnīh
254.0
ahlāyīh ābādīh pahlom ast
255.0
pargard haštom bun
256.0
ān ī pahlom gāhānsrāyišnīh saxwan bē gōw pad gyān
257.0
pad nēkīh bāstān bāš ay ahlaw pus kay wištāsp čiyōn ōy kē ān ī ōy ī nēkīh kadāriz =ēw kū kadāriz =ēw mardōm az nēkīh ī ōy nēkīh ast
258.0
kē ēdōn gōwēd ay nēkīh az ēn dēn harw kas =ēw nēkīh
259.0
u =š pad kāmag pādixšāyīh dahēd ohrmazd pad abāyist ōh abar
260.0
pad ān ōy šab ān xwēš ruwān bē wizārēd kū ahlaw ruwān bē widerēd
261.0
ān ōy xwēš ruwān pad garōdmān ohrmazd bē wizārēd pad nēkīh ī xwēš kū =š kār ud kirbag kird ēstēd ān ruwān ahlaw bawēd
262.0
ēg gōwēd ohrmazd pad ōy ī ahlawān ruwān kū ēdōn kū nē pad ān pursēd kū tō rāy pus frašostar ast ān ruwān kē bē widerēd abarpad ān se šab pad nazdīk ī waγdan nišīnēd dahēd ānōh kū ka =š gyān bē šawēd ā =š sar ēstēd uštawaytgāh srāyēd kū zand gōwēd nēkrawišn ī bē gōwēd ay nēktom bawād kū nēk ōy kē az ān ī nēkīh kadāriz =ēw nēkīh
263.0
pad fradom šab ān ī xwēš ruwān wizārēd pad ēn gāhān saxwan gōwišn pad humat kū humat menīd ēstēd
264.0
pad didīgar šab ān xwēš ruwān bē wizārēd pad hūxt kū hūxt guft ēstēd
265.0
ān pad sidīgar šab ān xwēš ruwān bē wizārēd pad huwaršt kū huwaršt warzīdag ēstēd
266.0
pad sidīgar šab ān xwēš rāh abartar bē wizārēd kū rāh =ēw pahlom ox wizārdan kāmēd
267.0
ān sidīgar šab sar ā =š pus ī frašōštar bē kāmagīhā pad yyy sahēd pad ōšbām
268.0
ān kē mard ahlaw ruwān kū andar urwar abar bōy dāšt sahēd tan ī xwēš kū az urwarān pānagīh sahēd kē =m pad bāγ ī wahišt rasēm
269.0
pas ān az rapihwintar rōn wād ī hubōy hubōytom az any wādān ī =š pad gētī āyēd
270.0
ōy wād ā =š pad wēnīg ul grift sahēd kū az wād ī hubōy wēnīg tābagtar bawēd
271.0
ēg ān ruwān gōwēd pad pursišn kū az kū dahišn ēn wād ast kē =m hagriz =iz pad wēnīg wād ī hubōytom nē rasīd pad gētī
272.0
ēg ān ruwān rāy pad mēnōyīh saxwan ēdōn āyēd kē sahēd ān xwēš dēn kū ēg ān az mēnōyīh saxwan āyēd kē ēn wād az dēn ī tō kē andar gēhān dēn ud kunišn ī tō kē sahīd ēstēd
273.0
ān ruwān rāy padīrag āyēd kanīg ī kirbag nēk ī rōšn abārīg tan ārusbāzā ī amāwand ī hurustag ulēstādag kū ǰuwān buland yyy pestān nēk tan āzād kū rāst rāyōmand tōhmag kū =š tōhm az yazadān xxx sālag ārōyišn u =š kirb ēdōn nēk čiyōn dāmān nēktar
274.0
ēg ōy gōwēd u =š pursēd kē mard ahlaw ruwān kū ān kē tō čarātīg xūb kirb nēktom wēnēd
275.0
ēg ōy passox gōwēd kū =š xwēš dēn kū
276.0
an =am ǰuwān ī humenišn ī hugōwišn ī hukunišn ī hudēn kē =t xwēš dēn az ān ī xwēš tan ēdōn nēk bōy ēstēd
277.0
ēd kē kāmag kird ī kē rāy tō ēdōn meh ud weh nēk hubōy ud pērōzgar ud abēbēš čiyōn man sahīdtom abar
278.0
kū tō ān ēd dīd hēnd kē kasān afsōs kird bowandag kū =šān yyy kird u =šān pad kāmag ī xwēš kāmag hamhāgān zanēd
279.0
kū kē tis xwāšt kasān nē dād u =šān urwar yyy =iz kird kū =šān dar bē bast
280.0
kū kasān afsōs nē kird yyy =iz nē kird
281.0
ud kāmag ī hamhāgān nē zanēd kū kē tis xwāst ā =šān dāšn =iz dād
282.0
u =šān urwar yyy =iz nē bast kū =šān ǰōrdāyān bē dād
283.0
ēdōn tō nišīnīd hē kē afsōs ud yyy nē kird
284.0
u =t gāhān srūd u =t āb =iz weh yazīd
285.0
ātaxš =iz ohrmazd u =t pahrēz kird
286.0
ud mard =iz ī ahlaw šnāyēnīd kē az nazdīk mad ud kē =iz az dūr
287.0
ēg man kē franāft ham kē xūb dāšt ham u =t franāfttar kird ham kū =t xūbtar dāšt ham u =m nēk būd ham u =t nēktar dāšt u =t arzānīg dāšt ham abāyišnīgtar
288.0
pad ān frāztom gāh nišast ham ā =iz ǰāmag u =t pad ān ī frāztomtar gāh nišāst ham kū gāh ī meh kird ham
289.0
pad ēd humat pad ēd hūxt pad ēd huwaršt ī tō warzīd
290.0
ēg mard pas yazēnd ān ī ohrmazd dagryazišnīh ud hampursēd frārōn kird
291.0
fradom gām frāz bard kē mard ī ahlaw ruwān pad humat bē dād ān gyāg kū humatmehmānīh
292.0
didīgar gām frāz barēd kē mard ī ahlaw ruwān pad hūxt bē dād
293.0
sidīgar gām frāz barēd kē mard ī ahlaw ruwān pad huwaršt bē dād
294.0
tasom gām frāz burd kē mard ī ahlaw ruwān pad ān ī rōšnīh bē dād
295.0
ōy gōwēd u =š pursēnd ān ī pēš bē widard ahlaw
296.0
bē mad hē ō ēn gyāg az ān mānišnōmand gōspandōmand xwāyišnōmand kū =šān ōh xwēšēnd yyy kū =š daštān māh andar wizārēnd daxšag ī gēhān gōwēd
297.0
az ān astōmand axwān ī abar ō ēn mēnōyān ox az ān seǰōmand axwān ī petyāragōmand abar ō astōmand xxx apetyārag
298.0
ēdōn tō dagr nēk bawād az ān ī čiyōn bē ēdar āmad hēnd ā =t dagr zamān nēk bawād kē mēnōyān axwān ohrmazd tā dagr zamān tō ayāftēd
299.0
u =š gōwēd ohrmazd ōy amahraspandān kū ma az im pursēd kē =š pursēd kū =š az =iš ma pursēd
300.0
čē pad ān bīmgen tārīg sahmgen ud rēšken rāh abar rawēd kē =š az tan bōy wardišn kū kē az tan bē āmad ā =š dušxwār bawād
301.0
xwarišn ō barēnd ān zarmaēn ī rōγn
302.0
čē =š ān ī ast ǰuwān ī humenišn hugōwišn hukunišn ī hudēn xwarišn ī pas az bēwiderišnīh
303.0
ēdōn nāyrīg ī frāyhumat ī frāyhūxt ī frāyhuwaršt xūb hamōxt ī rad ī xwadāy kū šōy pad sālār dārēd ī ahlaw xwarišn pas az bēwiderišnīh
304.0
ēdōn nāyrīg ī frāyhumat ī frāyhūxt ī frāyhuwaršt xūbhamōxt az hērbedān huxēm hamōxt ī huwarštwarzīdār ī ahlaw framānburdār ī šōy ud sālār huwarštīh pas az bēwiderišnīh pad garōdmān
305.0
frāz guft zarduxšt spitāmān ōy pus kay wištāsp
306.0
agar =iz ān ruwān ī dušoxīh bawēd pad se šab nazdīk ī kamāl ī ōy ī xwēš nišīnēd ud ēn saxwan gōwēd kū zamīg yyy barēm ohrmazd
307.0
pad kū nēmag šawēm ud nēkīh ī man az kū saham
308.0
ēdōn pad anummēd saxwan gōwēd pad kamāl ī xwēš
309.0
ahlāyīh ābādīh ī pahlom ast