Sections

1.0
fradom pargard bun
2.0
guft =iš ohrmazd ō spitāmān zardušt man dād spitāmān zardušt gyāg rāmišndahišn nē kū dād ēstēd āsānīh
3.0
ēn kū mardōm ān gyāg kū ōh zāyēd ī =š ōh parwarēnd ā =š weh sahēd kū nēktar ud āsāntar
4.0
ā man dād
5.0
čē agar man nē dād hē spitāmān zarduxšt gyāg rāmišndahišn nē kū dād ēstēd āsānīh harwisp ox ī astōmand ō ērānwēz frāzšawišnīh būd hē
6.0
andar ēd kār ēstād hē tā =šān šudan nē tuwān būd hē čē az kišwar ō kišwar bē pad parwān ī yazadān šudan nē tuwān
7.0
ast kē ēdōn gōwēd
8.0
ay pad =iz ān ī dēwān šāyēd šudan
9.0
asō rāmō.dāitīm nōit̰ aōjō.rāmištąm
10.0
har dō ēk
11.0
har dō rāmišn az gyāg
12.0
ast kē anī =z rāmišn az xwēškārīh gōwēd
13.0
paōirīm bitīm
14.0
ēd āmār kū fradom kār ud dādestān ō ān gyāg brēhēnīd ud didīgar ō ān gyāg tā mēnōy ī zamīg hamāg pad ēwkardagīh bē dād petyārag
15.0
har ān gyāg kū dō bē gōwēd ēk ān pad bun dahišn ēk ān pad pas
16.0
āat̰ ahē paitiiārəm hamāg ān ī pas
17.0
gyāg ud rōdestāg har dō hamgōnīh
18.0
ast kē ēdōn gōwēd ay gyāg ān gyāg kū mardōm abar nē mānēnd ud rōdestāg ān gyāg kū mardōm abar mānēnd maš mā rauua šaϑąm haitīm
19.0
ēn pad ēn pargard paydāg
20.0
hamāg gyāg gōwēd
21.0
ast kē hēdōmand rōd gōwēd
22.0
fradom az gyāgān ud rōdestāgān ā =m pahlom frāz brēhēnīd man kē ohrmazd ham ērānwēz kū wehdāytī
23.0
u =š wehdāytī ēd kū rōd ī dāytī ān gyāg bē āyēd kār pad auuaēpaēm kunēnd
24.0
ast kē ēdōn gōwēd kū pad auuaēpaēm bē āyēd kār ān gyāg kunēnd
25.0
u =š pad ān ī ōy petyāragīh frāz kirrēnīd gannāgmēnōy ī purrmarg az =iz rōdīg was bawēd zamestān =iz ī dēwāndād stahmagtar bawēd
26.0
dah māh ānōh zamestān dō māh hāmīnīh pas =iz hapta həṇti hąminō mā̊ŋhō paṇca zaiiana āškār
27.0
awēšān =iz hēnd sard āb sard zamīg sard urwar ān dah māh
28.0
ast kē ān dō māh gōwēd aδa zəmahe maiδīm aδa zəmahe zarəδaēm
29.0
ō nūn māh wahman ud māh šahrewar ast kē zamestān dil kū stahmagtar kū abāg =iz ēw kū hamāg stahmag pas =iz andar ēn zamān stahmagtar bawēd
30.0
ēg ka zamestān bē padēd kū šawēd ēg frahist wōyγne kū =š petyārag zamestān hamāg abāg bē šawēd
31.0
ast kē ēdōn gōwēd kū nēstčišīh pad =iš andar āyēd
32.0
didīgar az gyāgān ud rōdestāgān ā =m pahlom frāz brēhēnīd man kē ohrmazd ham gauuāi ī sūlīgmānišn kū dašt ī sūlīgmānišnīh daxšag
33.0
u =š nē petyārag
34.0
u =š pad ān ī ōy petyāragīh frāz kirrēnīd gannāgmēnōy purrmarg kullag mayg ī gōspandān daytīk purrmarg kū mayg bē āyēd bē ǰōrdā
35.0
bē wāstar bē āyēd
36.0
ud gāw bastan nē šāyēd
37.0
gōspandān margīh bawēd
38.0
sidīgar az gyāgān ud rōdestāgān ā =m pahlom frāz brēhēnīd man ohrmazd ham marw ī abzār hambūd pad kār ud dādestān kirdār kū =š was andar kunēnd
39.0
u =š pad ān ī ōy petyāragīh frāz kirrēnīd gannāgmēnōy purrmarg hamāl ud dōšag
40.0
hamāl kū hamāl ī ayārān ān gyāg kunēnd
41.0
u =š dōšag kū dōšag marz ān gyāg
42.0
tasom az gyāgān ud rōdestāgān ā =m pahlom frāz brēhēnīd man ohrmazd ham baxl ī nēk pad dīdan abrāstdrafš kū drafš andar abrāst dārēnd
43.0
ast kē ēdōn gōwēd ay wasīh andar abrāzēnd kū dušmen abar ōh kušēnd
44.0
u =š pad ān ī ōy petyāragīh frāz kirrēnīd gannāgmēnōy purrmarg gōr =iz kāt
45.0
was bawēd
46.0
ast kē ēdōn gōwēd ay gyāg sūrag dārēd bē nihumbēd gōr =iz kāt bē bawēd
47.0
panǰom az gyāgān ud rōdestāgān ā =m pahlom frāz brēhēnīd man kē ohrmazd ham nisā ī andarg marw ud baxl
48.0
ay ān gōwam tā ān anī =z ast
49.0
u =š pad ān ī ōy petyāragīh frāz kirrēnīd gannāgmēnōy purrmarg gumānīgīh
50.0
pad čiš ī yazadān gumān hēnd kū ma agar hād
51.0
ast kē ēdōn gōwēd kū pad =iz ān ī dēwān hēnd kū ma agar hād
52.0
šašom az gyāgān ud rōdestāgān ā =m pahlom frāz brēhēnīd man kē ohrmazd ham harē ī wishil
53.0
u =š wishilīh ēd kū ān amāh nōšabag ud māhdrahnā pad pahrēz dārēm awēšān xānag pad tag bē hilēnd ud šawēnd
54.0
u =š pad ān ī ōy petyāragīh frāz kirrēnīd gannāgmēnōy purrmarg srask =iz dribagīh
55.0
wāzag ēd hād gišnag hēm
56.0
ast kē ēdōn gōwēd ay pad tamburag kunēnd
57.0
haftom az gyāgān ud rōdestāgān ā =m pahlom frāz brēhēnīd man kē ohrmazd ham kābūl ī dušsāyag
58.0
u =š dušsāyagīh ēd kū sāyag ī draxtān pad tan wad
59.0
ast kē ān ī kōfān gōwēd
60.0
u =š pad ān ī ōy petyāragīh frāz kirrēnīd gannāgmēnōy purrmarg ān ī parīg kāmagīh ān ī uzdēs paristagīh kē =š abar abāgēnīd kirsāsp kū =š ōh kird
61.0
awēšān =iz ōh kunēnd nē pad dād
62.0
haštom az gyāgān ud rōdestāgān ā =m pahlom frāz brēhēnīd man kē ohrmazd ham uruue purrwāstar mēšan
63.0
u =š purrwāstarīh ēd kū =š ǰōrdā ud wāstar was andar bawēd
64.0
u =š pad ān ī ōy petyāragīh frāz kirrēnīd gannāgmēnōy purrmarg ān ī wattar abarmānišnīh kū =š mēšan ēw abar mānēnd
65.0
nohom az gyāgān ud rōdestāgān ā =m pahlom frāz brēhēnīd man kē ohrmazd ham xnąn ī gurgān mānišn kū xnąnrōd gurgānmānišnīh daxšag u =š nē petyārag
66.0
u =š pad ān ī ōy petyāragīh frāz kirrēnīd gannāgmēnōy purrmarg ān ī wattar anāpuhragān wināh kē mard waypī kū kūnmarz
67.0
ay nē =šān pad dād bē kunēnd
68.0
dahom az gyāgān ud rōdestāgān ā =m pahlom frāz brēhēnīd man ohrmazd ham harahmand ī nēk pad dīdan
69.0
u =š pad ān ī ōy petyāragīh frāz kirrēnīd gannāgmēnōy purrmarg ān ī wattar anāpuhragān wināh kē nasānigānīh
70.0
ay agdēn hēnd u =šān pad dād
71.0
yāzdahom az gyāgān ud rōdestāgān ā =m pahlom frāz brēhēnīd man ohrmazd ham hēdumand rāyōmand ud xwarrahōmand
72.0
xwēškār ud tuxšāg mēnōy ī sīstān
73.0
ast kē ān weh rōd gōwēd
74.0
u =š pad ān ī ōy petyāragīh frāz kirrēnīd gannāgmēnōy purrmarg ān ī wattar ǰādūgīh
75.0
ay ǰādūgīh hamē wad
76.0
ast kē ān ī frāsyābān gōwēd
77.0
ān awēšān kirdan tuwān u =š wizārdan nē tuwān
78.0
ast kē ēdōn gōwēd kū ǰādūgīh ēd ast ka nē sparānēnd ā =z ōy ōh bawēd
79.0
pas guft bawēd kū pad rāh nē pādixšā
80.0
ēd ān ī ōy paydāgīh daxšag ast ēd čiš ō pēš gōwam
81.0
u =š ēd =iz paydāgīh pad abarnigerišnīh ka nigerēnd paydāg bawēd čiyōn kanām =iz =ēw gyāg kū rasēnd dast ī ǰādūgīh āškārīhā
82.0
ēdōn =iz hēnd ǰādūgtomist ēdōn =iz awēšān ul rasēnēnd snēxr ud tagarg kū awēšān =iz ōh kunēnd
83.0
ast kē ēdōn gōwēd ay ēdōn az awēšān bē ul rasēd snēxr ud tagarg kū wināhgārīh ī awēšān rāy wēš bawēd
84.0
čēgāmizēw mayg ud čēgāmizēw abāz atūn
85.0
dwāzdahom az gyāgān ud rōdestāgān ā =m pahlom frāz brēhēnīd man kē ohrmazd ham raγ ī setōhmag ādurbādagān
86.0
ast kē ray gōwēd
87.0
u =š setōhmagīh ēd kū āsrōn ud artēštār ud wāstaryōš nēk az =iš bawēnd
88.0
ast kē ēdōn gōwēd ay zardušt az ān gyāg būd u =š ēn har se pad =iš būd kē ray gōwēd
89.0
u =š setōhmagīh ēd kū =š ēn se paywand az ān gyāg būd bē raft
90.0
vaēδaŋhō nōit̰ uzōiš
91.0
u =š pad ān ī ōy petyāragīh frāz kirrēnīd gannāgmēnōy purrmarg ān ī wattar abar gumānīgīh kū xwad gumān hēnd ud kasān =iz gumān bē kunēnd
92.0
sēzdahom az gyāgān ud rōdestāgān ā =m pahlom frāz brēhēnīd man kē ohrmazd ham čaxr ī abzār ud kirdār mazan yyy
93.0
u =š pad ān ī ōy petyāragīh frāz kirrēnīd gannāgmēnōy purrmarg ān ī anāpuhragān wināh kē nasā poxt
94.0
ay nē =šān pad dād bē was pazēnd ēn čiyōn rōbāh ud rasūg
95.0
čahārdahom az gyāgān ud rōdestāgān ā =m pahlom frāz brēhēnīd man ohrmazd ham warn ī čahārgōš padišwārgar gēl
96.0
ast kē kirmān gōwēd
97.0
u =š čahārgōšīh ēd kū rāh čahār andar bē ēstēd
98.0
ast kē ēdōn gōwēd kū šahrestānīh dar čahār ast
99.0
kē ō ān zād frēdōn pad zanišn ī az ī dahāg
100.0
u =š pad ān ī ōy petyāragīh frāz kirrēnīd gannāgmēnōy purrmarg ān =iz abārōn daštān stahmagtar bawēd anēr =iz dehān abarmānišnīh
101.0
kē pad padišxwārgar gōwēd sarm kē kirmān gōwēd bārīč
102.0
pānzdahom az gyāgān ud rōdestāgān ā =m pahlom frāz brēhēnīd man kē ohrmazd ham kē hafthindūgān
103.0
u =š hafthindūgānīh ēd kū sar xwadāy haft ast
104.0
ēd =iz rāy gōwam kū haft nēst čē az abestāg
105.0
haca ušastara həṇduua auui daōšatarəm həṇdum
106.0
ast kē ēdōn gōwēd kū har kišwar =ēw ēk ast
107.0
u =š pad ān ī ōy petyāragīh frāz kirrēnīd gannāgmēnōy purrmarg ān =iz abārōn daštān stahmagtar bawēd ān ī abārōn garmīh freh az paymān bawēd
108.0
šāzdahom az gyāgān ud rōdestāgān ā =m pahlom frāz brēhēnīd man ohrmazd ham abarpad oδā ī arangistān ī hrōm kē asālār abar mānišn hēnd kū zūd abāz ēstēnd
109.0
ast kē ēdōn gōwēd ay xwadāy pad xwadāy nē dārēnd
110.0
u =š pad ān ī ōy petyāragīh frāz kirrēnīd gannāgmēnōy purrmarg zamestān ī dēwāndād stahmagtar bawēd
111.0
hēnd anī =z gyāg ud rōdestāg ī nāmčištīg nē guft ēstēd nēk pad dīdan zofr pad kār dādestān ud ārzōg kū abāyišnīg pursišn kū pursišn was kunēnd bāmīg kū xwarrahōmand
112.0
ast kē nisāyag gōwēd čiyōn pārs ī abēzag bāmīg
113.0
didīgar pargard bun
114.0
pursīd zardušt az ohrmazd kū ohrmazd mēnōy abzōnīg dādār ī gēhān ī astōmandān ahlaw
115.0
ay ohrmazd dādār ahlaw pad xwānišn abārīg pad stāyišn
116.0
ō kē fradom mardōmān hampursīd hē tō kē ohrmazd hē kū =t hampursagīh pad dēn fradom abāg kē kird any az man kē zardušt ham ā =t ō kē frāz nimūd ēn dēn ī ohrmazd ud zardušt
117.0
u =š guft ohrmazd kū ō ǰam ī nēk huramag ahlaw zardušt ay huramagīh ēd būd kū =š ramag ī mardōmān ud ramag ī gōspandān drust dāšt ō ōy fradom az mardōmān hampursīd ham man kē ohrmazd ham kū hampursagīh ī pad dēn fradom abāg ōy kird any az tō kē zardušt hē ā =m ō ōy frāz nimūd ēn dēn ī ohrmazd ud zardušt
118.0
ēg =am ō ōy guft zardušt man kē ohrmazd ham kū padīr az man ǰam ī nēk wīwanghānān ōšmurišn ud barišn ō dēn kū hērbedīh ud hāwištīh kun
119.0
ēg =iš ō man passox guft ǰam ī nēk zardušt kū nē dād ham čāšīdār ōšmurišn ud barišn ō dēn kū =m hērbedīh ud hāwištīh nē tuwān kirdan
120.0
ēg =am ō ōy guft zardušt man kē ohrmazd ham kū agar az man ǰam nē padīrē ōšmurišn ud barišn ō dēn kū hērbedīh ud hāwištīh nē kunē ēg ān ī man gēhān frāxwēn kū wēš bē kun ēg ān ī man gēhān wālēn kū frabīhtar bē kun ēg ān ī man padīr gēhān rāy srāyišn parwarišn sālārīh framān dādan pad nigāhdārišnīh pānagīh kirdan
121.0
ēg =iš ō man passox guft ǰam ī nēk zardušt kū an ān ī tō gēhān frāxwēnam kū wēš bē kunam ān ī tō gēhān wālēnam kū frabīhtar bē kunam ān az tō padīram gēhān rāy srāyišn parwarišn ud sālārīh framān dādan pad nigāhdārišnīh pānagīh kirdan kū ēd kunam ēd =iz kunam kū nē pad ān ī man xwadāyīh bawēd ān sard wād nē ān garm wād ud nē xīndagīh waštagīh ud nē margīh hambun =iz
122.0
ǰam ān ī =š nē būd hērbedīh ud hāwištīh tā wehdēn būd ud ahlaw būd u =š daxšag mardōmān andar tan kird ēstād
123.0
ēn kū wehdēn būd az ān gyāg paydāg
124.0
mrūiδi tat̰ mąϑβəm yat̰ aēmcit̰ yō daēuua
125.0
ēn kū ahlaw būd az ān gyāg paydāg
126.0
yimahe vīuuaŋhanahe aṣ̌aōnō frauuaṣ̌īm yaz
127.0
ǰam ī wīwanghānān ahlaw frawahr yazēm
128.0
ēn kū =š daxšag mardōmān andar tan kird ēstād az ān gyāg paydāg
129.0
abarəṣ̌nauua pascaēta asāra maṣ̌iiākaēibiiō
130.0
ǰam ud kay us har dō ahōš dād ēstād hēnd wināhgārīh ī xwēš rāy ōšōmand būd hēnd
131.0
ǰam rāy az ān gyāg paydāg
132.0
mūṣ̌u tat̰ paiti akərənaōt̰ aōṣ̌aŋhat̰ huua hizuua
133.0
kay us rāy az ān gyāg paydāg
134.0
am̨i dim paiti fraŋhərəzat̰ am̨i hō bauuat̰ aōṣ̌aŋhā̊
135.0
ēg ō ōy zay frāz baram man kē ohrmazd ham sūrāgōmand ī zarrēn ud aštar =iz zarrēnpēsīd muhrāg ī dastag kē ǰam būd barišn ī xwadāyīh kū =š ān xwadāyīh ēdōn nēk pad ān abzār tuwān būd kirdan
136.0
ēg ka pad ān ī ǰam xwadāyīh ān sidīgar sadōzim ōham mad kū =š sar bē bawēd ēg ēn zamīg būd purr az pahān stōrān mardōmān sagān wayān ātaxš =iz ī suxr ī sōzāg
137.0
awēšān nē abar hīm abarpad ēn zamīg gāh windīd pah ud stōr ud mardōm
138.0
ēg =išān ō ǰam ī nēk abar paywēhīd kū awēšān kē xwēškārīh būd bē āpursīd kū ǰam ī nēk wīwanghānān purr ēn zamīg ōham mad az pahān ud stōrān ud mardōmān ud sagān ud wayān ātaxš =iz suxr ī sōzāg
139.0
nē abar ēn hīm abarpad ēn zamīg gāh windīd pah ud stōr ud mardōm
140.0
ēg ǰam frāz raft pad rōšnīh ān ī pad rōšnīh ī xwēš abar ō rapihwintar rōn abarpad ān ī xwaršēd rāh kū paydāgēnīd kū kē xwēškārīhā pad kār =ēw bē kāmēd šudan ā =š se gām ō rapihwintar rōn šawišn u =š yatāahūwayryō =ēw bē gōwišn u =š ǰahišn xūbtar bawēd
141.0
az gāw paydāg
142.0
usəhištat̰ gāuš barat̰ daŋ́huš
143.0
ān kū =š abestāg gōwišn az pasušhorw paydāg
144.0
srīra uxδa vacā̊ sąsaŋhąm
145.0
ēn kū ān ī abestāg ī yatāahūwayryō =ēw az ahunō vairiiō paydāg
146.0
ān ō ēn zamīg abar swad pad sūrāgōmand ī zarrēn u =š bē ān suft pad aštar kū =š abar frōd darrēd
147.0
u =š ēdōn guft kū dōšāramīhā kunē spandarmad kū dōšāramīhā dāmān rāy kun ēn čiš frāz raw kū wēš dārē bē hunąm kū yašt bē bawē barišn ī pahān stōrān ud mardōmān rāy kunē ēn čiš
148.0
ēg ǰam ēn zamīg bē rawēnīd ēk srišwadag az ān meh čiyōn pēš az ān būd
149.0
abar ān ānōh frāz raft hēnd pah ud stōr ud mardōm pad ān ō xwēš dōšišn čiyōn kadārizēw ān ī ōy xwēš kāmag ud dōšišn har kas =ēw
150.0
ast kē ān ī ǰam gōwēd az ān ī petyārag ō dām madan nē tuwān
151.0
ēg ka ān ī ǰam xwadāyīh ān šašom sadōzim ōham mad kū =š sar būd ēg ēn zamīg būd purr az pahān ud stōrān mardōmān sagān ud wayān ātaxš =iz suxr sōzāg
152.0
u =šān nē abar ēn hīm abarpad ēn zamīg gāh windīd pah ud stōr ud mardōm
153.0
ēg =išān ō ǰam ī nēk abar paywēhīd kū awēšān kē xwēškārīh būd bē āpursīd kū ǰam ī nēk wīwanghānān purr ēn zamīg ōham mad az pahān ud stōrān ud mardōmān ud sagān ud wāyān ātaxš =iz suxr ī sōzāg
154.0
nē abar ēn hīm abarpad ēn zamīg gāh windīd pah ud stōr ud mardōm
155.0
ēg ǰam frāz raft pad rōšnīh ān ī pad rōšnīh ī xwēš abar ō rapihwintar rōn abarpad ān ī xwaršēd rāh kū paydāg kird kū kē xwēškārīhā pad kār =ēw bē kāmēd šudan ā =š se gām ō rapihwintar rōn šawišn u =š yatāahūwayryō =ēw bē gōwišn u =š ǰahišn xūbtar bawēd
156.0
az gāw paydāg
157.0
usəhištat̰ gāuš barat̰ daŋ́huš
158.0
ān kū =š abestāg gōwišn az pasušhorw paydāg
159.0
srīra uxδa vacā̊ sąsaŋhąm
160.0
ēn kū ān ī abestāg ī yatāahūwayryō =ēw az ahunō vairiiō paydāg
161.0
ān ō ēn zamīg abar swad pad sūrāgōmand ī zarrēn u =š bē ān suft pad aštar kū =š abar frōd darrēd
162.0
u =š ēdōn guft kū dōšāramīhā kunē spandarmad kū dōšāramīhā dāmān rāy kun ēn čiš frāz raw kū wēš dārē bē hunąm kū yašt bē bawē barišn ī pahān stōrān ud mardōmān rāy kunē ēn čiš
163.0
ēg ǰam ēn zamīg bē rawēnīd dō srišwadag az ān meh čiyōn pēš az ān būd
164.0
abar ō ānōh frāz raft hēnd pah ud stōr ud mardōm pad ān ō xwēš kāmag ud dōšišn čiyōn kadārizēw ān ōy dōšišn har kas =ēw
165.0
ēg ka pad ān ī ǰam xwadāyīh ān nohom sadōzim ōham mad kū =š sar bē būd ēg ēn purr az pahān ud stōrān mardōmān sagān ud wayān ātaxš =iz suxr sōzāg
166.0
u =šān nē abar ēn hīm pad ēn zamīg gāh windīd pah ud stōr ud mardōm
167.0
ēg =išān ō ǰam ī nēk abar paywēhīd kū awēšān kē xwēškārīh būd bē āpursīd kū ǰam ī nēk wīwanghān purr ēn zamīg ōham mad az pahān ud stōrān ud mardōmān ud sagān ud wayān ātaxš =iz suxr ī sōzāg
168.0
nē abar ēn hīm abarpad ēn zamīg gāh windīd pah ud stōr ud mardōm
169.0
ēg ǰam frāz raft pad rōšnīh ān ī pad rōšnīh ī xwēš abar ō rapihwintar rōn abarpad ān ī xwaršēd rāh kū paydāgēnīd kū kē xwēškārīhā pad kār =ēw bē kāmēd šudan ā =š se gām ō rapihwintar rōn šawišn u =š yatāahūwayryō =ēw bē gōwišn u =š ǰahišn xūbtar bawēd
170.0
az gāw paydāg usəhištat̰
171.0
gāuš barat̰ daŋ́huš
172.0
ān kū =š abestāg gōwišn az pasušhorw paydāg
173.0
srīra uxδa vacā̊ sąsaŋhąm
174.0
ēn kū ān ī abestāg ī yatāahūwayryō =ēw az ahunō vairiiō paydāg
175.0
ān ō ēn zamīg abar swad pad sūrāgōmand ī zarrēn u =š bē ān suft pad aštar kū =š abar frōd darrīd
176.0
u =š ēdōn guft kū dōšāramīhā kunē spandarmad kū dōšāramīhā dāmān rāy kun ēn čiš frāz raw kū wēš dārē bē hunąm kū yašt bē bawē barišn ī pahān stōrān ud mardōmān rāy kunē ēn čiš
177.0
ēg ǰam ēn zamīg bē rawēnīd se srišwadag az ān meh čiyōn pēš az ān būd
178.0
abar ō ānōh frāz raft hēnd pah ud stōr ud mardōm pad ān ō xwēš dōšišn čiyōn kadārizēw ān ī ōy xwēš kāmag ud dōšišn har kas =ēw
179.0
ast kē ān ī ǰam gōwēd ān petyārag ō dām madan nē tuwān
180.0
frāz sadōzim sidīgar andar xwadāyīh ī ǰam sar bawēd
181.0
ǰam šašsad sāl wēš ēn dām amarg ud azarmān dāšt
182.0
ēn čand wēš dāšt ā =m nē rōšnag
183.0
u =šān hazārag sar bē kirrēnēd
184.0
az ān gyāg paydāg
185.0
paōiriieheca pascaēta hazaŋhrō.zəmahe ϑβarsō ās yimō kərənaōt̰
186.0
u =š ēn gēhān pad se bār ānand ǰam bē kird
187.0
auuaiti bązō
188.0
ōh =iz ēdōn ast
189.0
kū =š čiyōn kird ā =m nē rōšnag
190.0
ast kē ēdōn gōwēd ay čagād =š ō gabrān hambārēd
191.0
ast kē ēdōn gōwēd ay fragānīh abāz sparānīd
192.0
ast kē ēdōn gōwēd ay gōspand ī nizār kē =š wāstar dād bē abzāyēd
193.0
ohrmazd ēn dām sehazār sāl mēnōy ēstišn dāšt sehazār sāl gētī ēstišn apetyārag ud sehazār sāl az petyārag ī dām madan tā dēn madan sehazār az dēn ī madan tā tan ī pasēn
194.0
az ān gyāg paydāg
195.0
cuuaṇtəm zruuānəm mainiiauua stīš aṣ̌aōne dāta as
196.0
hanǰaman =iš frāz burd kē dādār ohrmazd kū zamān bē kird abāg mēnōyān yazadān abar ō ān ī nāmīg ērānwēz kū wehdāytī
197.0
hanǰaman =iš frāz burd kē ǰam ī šēd ī huramag kū =š zamān bē kird abāg pahlomān mardōmān abar ō ān ī nāmīg ērānwēz kū wehdāytī
198.0
ō ān hanǰaman bē mad kē dādār ohrmazd kū pad zamān ī kird bē mad abāg mēnōyān yazadān abar ō ān ī nāmīg ērānwēz kū wehdāytī
199.0
ō ān hanǰaman bē mad kē ǰam šēd ī huramag kū pad zamān ī kird bē mad abāg pahlomān mardōmān abar ō ān ī nāmīg ērānwēz kū wehdāytī
200.0
ay ohrmazd ēn hanǰaman war rāy kird u =š drahnā ī zamestān rāy kird
201.0
az pēš paydāg
202.0
ǰam āgāhīh az ohrmazd būd
203.0
mardōmān āgāhīh az ǰam būd
204.0
ǰam ī ohrmazd guft āšnūd
205.0
ka =š abāyēd dīdan ā =š dīd
206.0
mardōmān =iz ān ī ǰam guft āšnūd ēn kū =šān ān ī ohrmazd guft āšnūd
207.0
ay ka =šān ēd kār rāy būd ā ō gyāg =iz ī ǰam šud hēnd
208.0
u =š guft ohrmazd ō ǰam kū ǰam ī nēk ī wīwanghānān abar ō ox ī astōmand ān wattar zamestān rasēd kē az ān stahmagīh ī =š sturg kū har gyāg =ēw andar šawēd mūdag zamestān kū čiš tabāh bē kunēd
209.0
abar ō ox ī astōmand ān ī wattar zamestān rasēd malkūsān gōwēd kē az ān bē was snōyān wafr snēšišn pad bālist abar garān pad bāš čand ird
210.0
ān gyāg kū kem nišānēd ēd widest dō angust nišānēd
211.0
az se gyāgān ēdar ǰam gōspand bē rasēnd ēd =iz kē ast pad bīmagēntar az gyāgān čiyōn spāhān ēd =iz kē ast pad bālēn abar garān čiyōn abarsēn ēd =iz kē ān zofr rōdestāg čiyōn ērāstān abar ō ān kird mān
212.0
kū pēš az zamestān awēšān deh būd hēnd burd wāstar kū =šān pēšōbāy ī nēk būd u =šān hambār abāz kird
213.0
pēš az āb bēwazišnīh pas az bētāzišnīh ī wafr pēš ud pas abd =iz ēdar ǰam andar ox ī astōmand sahēd ka ēdar pah anumē pay wēnīhēd
214.0
ay az ān =iz pay abar dīdan tā pahast was bē mānēd
215.0
ēg ān war kunē aspresdrahnā pad kadārizēw ī čahrušwadag dō hāsr az kust =ēw
216.0
ast kē har čahār kust gōwēd
217.0
u =š pad āgenēn tōhmag abar bar az pahān stōrān mardōmān sagān wayān ātaxš =iz suxr ī sōzāg
218.0
ēg ān war kunē aspresdrahnā pad kadārizēw ī čahrušwadag mardān abarmānišnīh rāy aspresdrahnā pad kadārizēw ī čahrušwadag gāwān gōstān rāy
219.0
u =š pad āgenēn āb frāz tazēn hāsrmasā rāh
220.0
u =š pad āgenēn marw bē ēstēn pērāmōn ī āb
221.0
abar hamēšag zarrēngōn kū tarr abar hamēšag xwarišnanafsinnišnīh kū ka xward mad
222.0
u =š pad āgenēn mān bē ēstēn pērāmōn ī marw =iz kadag dēwār frāzāškōb kū bē āškōb frawār ud pērāmōn ī parwār
223.0
bawēd ka ēdōn kird
224.0
u =š pad āgenēn az harwispīn narān ud nārīgān tōhm abar bar kē hēnd pad ēn zamīg mahist pad tan pahlom pad arz nēktom pad dīdan
225.0
u =š pad āgenēn az harwispīn gōspand sardagān tōhm abar bar kē hēnd pad ēn zamīg mahist pad tan pahlom pad arz nēktom pad dīdan
226.0
u =š pad āgenēn az harwispīn urwarān tōhm abar bar kē hēnd pad ēn zamīg bālist čiyōn sarw ud činār hubōytom čiyōn gul ī yāsaman
227.0
u =š pad āgenēn az harwispīn xwarišnān tōhm abar bar kē pad ēn zamīg xwarzist čiyōn xormā ud hubōytom čiyōn bēh ud wādrang
228.0
awēšān war mānišnān rāy kunē dōgānag anafsinnišn miϑβaire ast kē gumēzag gōwēd ast kē hamēšag gōwēd hamē az ān ka awēšān mardān warmānišnān hēnd
229.0
ay paydāg bawēd kū nē war mānišnān hēnd
230.0
ma ō ānōh ān ī frāzkōfag ō pēš ma ān ī abāz kōfag ō pas ā =š ō ān gyāg ma nayēd ma ān ī yyy kē =š stūnag andar war frōd škast ēstēd ma ān xalag kū dastwar nē dārēd ma dribag kē murdag āwarēd ma ān ī frēftār ma ān ī yyy ma ān ī yyy rēšag =iz ast kē xōnazg gōwēd ma ān ī bē winast dandān kē afsōs kunēd ast kē ēdōn gōwēd dandān =iš pūdag ēstēd ma pēs kē ǰud kird ēstēd tan wāzag ay dēnīg kār ast kē ēdōn gōwēd ay ma pēs ī kōft ēd =iz kē ǰud kird ēstēd tan ma kas az ān xxx daxšag kē hēnd kē gannāgmēnōy daxšag pad mardōmān bē dād ēstēd
231.0
ā =š ō ān gyāg ma nayēd
232.0
pad ān frāztom deh ī meh nō widarg kun nō kōyag pad ān mayānag šaš pad ān nidom se
233.0
pad ān ī frāztom widarg deh ī meh ā =š hazār az narān ud nārīgān tōhm abar bar pad ān mayānag šašsad pad ān ī nidom sesad
234.0
ay ka deh marag paydāg hē mardōm marag =iz paydāg bawē
235.0
abar =iz awēšān warmānišnān rāy kunē pad sūrāgōmand ī zarrēn
236.0
abar =iz pad ān war dah dēwār kū =š xunak bē wēz rōzan kū =š dargāh bē hil xwadrōšn az andarōn nēmag
237.0
bawēd ka ēdōn kird būd
238.0
ēg =iš menīd ǰam kū čiyōn awēšān an war kunam kē =š ō man guft ohrmazd
239.0
u =š guft ohrmazd ō ǰam ī nēk wīwanghānān
240.0
ēn zamīg pad pāšnag bē ōspar ud pad dast bē xafxay homānāg ī ōy kird čiyōn nūn mardōm ka ān šuhr zamīg bē rawēnēnd
241.0
ēg ǰam ēdōn kird čiyōn pad ōy xwāst ohrmazd
242.0
ēn zamīg pad pāšnag bē ōspurd ud pad dast afxast homānāg ō kird čiyōn nūn mardōm ka ān šuhr zamīg bē rawēnēnd
243.0
ēg ǰam ān ī war kird aspresdrahnā pad kadārizēw ī čahrušwadag dō hāsr az kust =ēw
244.0
ast kē har čahār kust gōwēd
245.0
u =š pad āgenēn tōhmag abar burd az pahān stōrān mardōmān sagān wayān ātaxš =iz suxr ī sōzāg
246.0
ēg ān ī war kird aspresdrahnā pad kadārizēw ī čahrušwadag mardān abarmānišnīh rāy aspresdrahnā pad kadārizēw ī čahrušwadag gāwān gōstān rāy
247.0
u =š pad āgenēn āb frāz tazēnīd hāsrmasā rāh
248.0
u =š pad āgenēn marw bē ēstēnīd pērāmōn ī āb
249.0
abar hamēšag zarrēngōn kū tarr abar hamēšag xwarišnanafsinnišnīh kū ka xward mad
250.0
u =š pad āgenēn mān bē ēstēnīd pērāmōn ī marw =iz kadag dēwār frāzaškōb kū =š bē aškōb frawār ud pērāmōn ī parwār
251.0
būd ka ēdōn kird
252.0
u =š pad āgenēn az harwispīn narān ud nārīgān tōhm abar burd kē hēnd pad ēn zamīg mahist pad tan pahlom pad arz nēktom pad dīdan
253.0
u =š pad āgenēn az harwispīn gōspand sardagān tōhm abar burd kē hēnd pad ēn zamīg mahist pad tan pahlom pad arz nēktom pad dīdan
254.0
u =š pad āgenēn az harwispīn urwarān tōhm abar burd kē hēnd pad ēn zamīg bālist čiyōn sarw ud činār hubōytom čiyōn gul ī yāsaman
255.0
u =š pad āgenēn az harwispīn xwarišnān tōhm abar burd kē pad ēn zamīg xwarzist čiyōn xormā ud hubōytom čiyōn bēh ud wādrang
256.0
u =š pad awēšān war mānišnān rāy kird ān ī dōgānag anafsinnišn miϑβaire ast kē gumēzag gōwēd ast kē hamēšag
257.0
hamē az ka awēšān mardān warmānišnān hēnd
258.0
ay paydāg bawēd kū nē war mānišnān hēnd
259.0
nē ō ānōh ān ī frāzkōfag ō pēš nē ān ī abāz kōfag ō pas ā =š ō ān gyāg nē nayēd nē ān ī zpyl kē =š stūnag andar war frōd škast ēstēd nē ān xalag kū dastwar nē dārēd nē dribag kē murdag āwarēd nē ān ī frēftār nē ān ī yyy nē ān ī yyy rēšag =iz ast kē xōnazg gōwēd nē ān ī bē winast dandān kē afsōs kunēd ast kē ēdōn gōwēd ay dandān =iš pūdag ēstēd nē pēs kē ǰud kird ēstēd tan wāzag ay dēnīg kār ast kē ēdōn gōwēd ay nē pēs ī kōft ēd =iz kē ǰud kird ēstēd tan nē kas az ān daxšag kē hēnd kū gannāgmēnōy daxšag pad mardōmān bē dād ēstēd
260.0
ā =š ō ān gyāg nē nayēd
261.0
u =š pad ān frāztom deh ī meh nō widarg kird nō kōyag pad ān mayānag šaš pad ān nidom se
262.0
pad ān ī frāztom widarg deh ī meh ā =š az narān ud nārīgān tōhm abar burd pad ān mayānag šašsad pad ān ī nidom sesad
263.0
ay ka deh marag paydāg hē mardōm marag =iz paydāg bawē
264.0
u =š abar =iz awēšān warmānišnān rāy kird pad sūrāgōmand ī zarrēn
265.0
u =š abar =iz pad ān war dād dēwār kū =š xunak bē wēxt rōzan kū =š dargāh bē hišt xwadrōšn az andarōn nēmag
266.0
būd ka =š ēdōn kird
267.0
ay ōh paydāgēnēnd kū petyārag andar xwadāyīh ī ǰam ēč čārag xwāstan nē tuwān būd
268.0
kāyōš tuwān būd
269.0
ast kē ēdōn gōwēd ōh =iz tuwān būd bē =š pad ēd dāšt kū ka abāz rasēd stahmagtar būd
270.0
dādār ī gēhān ī astōmandān ahlaw az čē ēdōn awēšān rōzan hēnd ahlaw ohrmazd kē ēdōn ān gyāg rōšnēnēnd andar awēšān warmānišnān ī ǰam kird
271.0
u =š guft ohrmazd kū xwadād rōšnīh ān =iz stiδāt
272.0
vīspa anaŋra raōcā̊ usca usraōcaiieiti vīspa stiδāta raōcā̊ aōra āraōcaiieiti aṇtarāt̰
273.0
ēk ēwēnag awēšān riftagīh sahēd anāgīh ī =šān az amāh ēn ēk ast kē ēdōn gōwēd ay xwad =šān ēn ēk wēnišn star ud māh ud xwaršēd ka =šān nēst
274.0
awēšān =iz rōz menēnd sāl =iz
275.0
pas hapta həṇti hąmina mā̊ŋhō paṇca zaiiana ānōh =iz kār
276.0
pad čēhel sālān zamestān az dō mardān dō mard ul zāyēnd pad gumēzag ī mādag ud nar
277.0
ēdōn =iz az awēšān gōspand sardagān ēd =iz kē ast zayēnd
278.0
awēšān mard nēktar pad gyān zīwēnd kū sadudpanǰāh sāl ōh zīwēnd ast kē ēdōn gōwēd kū nēktar pad gyān zīwēnd kū hagriz nē mīrēnd andar awēšān warmānišnān ī ǰam kird
279.0
dādār ī gēhān ī astōmandān ahlaw kē ō ānōh dēn ī mazdēsnān bē burd ō awēšān warmānišnān ī ǰam kird
280.0
u =š guft ohrmazd way karšift spitāmān zardušt čāxrawāk ī pad ox ī menišn abāz šawēd
281.0
dādār ī gēhān ī astōmandān ahlaw kē awēšān ast None ud rad
282.0
kē =šān dēn ān gyāg burd ā =šān dastwar kē
283.0
u =š guft ohrmazd kū urwatadnar zardušt pus ī tō tō =z kē zardušt hē
284.0
ay ōh paydāgēnēnd kū dastwar ka ān murd kunēd šāyēd ka ān kunēd ī nē mad ēstēd ā =z šāyēd
285.0
sidīgar pargard bun
286.0
dādār ī gēhān astōmandān ī ahlaw kū fradom ēn zamīg āsāntom kū mēnōy ī zamīg āsānīh az čē wēš
287.0
u =š guft ohrmazd kū pad ān abar mard ahlaw franāmēd spitāmān zardušt esmdast ud barsomdast ud ǰīwdast ast kē ēdōn gōwēd ay paywāsag hāwandast kē āštīh ī abāg wehān dēn pad gōwišn frāz gōwēd kū ōh yazēd mihr ī frāxgāwyōd zayēd kū gīrēd wāz =iš rāmišn xwārom
288.0
u =š bawēd ka ēdōn kunēd
289.0
ast kē gōwēd kū rāmišn =iz xwārom =iz kunēd
290.0
dādār ī gēhān ī astōmandān ī ahlaw kū didīgar ēn zamīg āsāntom kū mēnōy ī ēn zamīg āsānīh az čē wēš
291.0
u =š guft ohrmazd pad ān abar mard ahlaw mān ul dād kū xānag kird āsrōnōmand gōspandōmand nārīgōmand pusōmand ud huramagōmand
292.0
ēg pas andar ān mān frāzpadēx gōšt frāzpadēx ahlāyīh frāzpadēx wastarg frāzpadēx sag frāzpadēx nārīg frāzpadēx aburnāyag frāzpadēx ātaxš frāzpadēx harwisp huzīwišnīh bun ud bar bē bawēd
293.0
ast kē ēdōn gōwēd ay huzīwišnīh bun ud bar
294.0
ast kē ēdōn gōwēd bē gīrēd
295.0
dādār ī gēhān ī astōmandān ī ahlaw kū sidīgar ēn zamīg āsāntom kū mēnōy ī ēn zamīg āsānīh az čē wēš
296.0
u =š guft ohrmazd kū pad ān abar frahist kārēnd spitāmān zardušt ǰōrdā wāstar urwar =iz xwarišnbar ēd =iz kē ān anāb ān ābōmand kunēnd kū wēš freh =iz bē kunēnd ān ābōmand ō anāb kunēnd kū ābōmand ābādān kunēnd
297.0
dādār ī gēhān ī astōmandān ī ahlaw kū tasom ēn zamīg āsāntom kū mēnōy ēn zamīg āsānīh az čē wēš
298.0
u =š guft ohrmazd kū pad ān abar frahist ul zāyēnd pah ud stōr
299.0
dādār ī gēhān ī astōmandān ī ahlaw kū panǰom ēn zamīg āsāntom kū mēnōy ēn zamīg āsānīh az čē wēš
300.0
u =š guft ohrmazd kū pad ān abar frahist mēzēnd pah ud stōr ān gyāg kū pad =iš parwarēnd
301.0
dādār ī gēhān ī astōmandān ī ahlaw kū fradom ēn zamīg anāsāntom kū mēnōy ēn zamīg dušxwārīh az čē wēš
302.0
u =š guft ohrmazd kū pad arzūr grīwag spitāmān zardušt pad dar ī dušox kū andar ān gyāg dēw ōham dwārēnd ka abāz dwārēnd ān gyāg abāz dwārēnd druz az gilistag
303.0
ka abāz dwārēnd ānōh abāz dwārēnd
304.0
ast kē ēdōn gōwēd ay ka bē dwārēnd kūnmarz kunēnd
305.0
dušox ī azēr ī zamīg az azabar abar asmān
306.0
u =š dar ul ō zamīg
307.0
ēn kū abar bērōn asmān ast ayāb nē ā =m nē rōšnag
308.0
ān gyāg abāz dwārēnd druz az gilistag ka abāz dwārēnd
309.0
dēwīh druzīh har dō hamgōnīh
310.0
ast kē nar mādag gōwēd
311.0
ast kē wināhgārīh gōwēd
312.0
kē nar mādagīh gōwēd ay dēw nar ud parīg mādag
313.0
dādār ī gēhān ī astōmandān ī ahlaw kū didīgar ēn zamīg anāsāntom kū mēnōy ēn zamīg dušxwārīh az čē wēš
314.0
u =š guft ohrmazd kū pad ān abar frahist nibayēd nigān sag ī rist ayāb mard =ēw ī rist azēr ī zamīg nē xwaršēd nigerišn tā zamīg mēnōy hamāg ēwkardag bē bawēd ēdōn čiyōn mard =ēw kē az bīm dušxwārtar
315.0
dādār ī gēhān ī astōmandān ahlaw kū sidīgar ēn zamīg anāsāntom kū mēnōy ēn zamīg dušxwārīh az čē wēš
316.0
u =š guft ohrmazd kū pad ān abar frahist hazzān uldēsīd kū daxmag kird ēstēd ud andar ān mard ī rist bē dād ēstēd azēr ī zamīg nē xwaršēd nigerišn
317.0
ēn ēd rāy wattar gōwēd čē ēn pad xwaršēd nigerišn ummēdwārtar
318.0
dādār ī gēhān ī astōmandān ahlaw kū tasom ēn zamīg anāsāntom kū mēnōy ēn zamīg dušxwārīh az čē wēš
319.0
u =š guft ohrmazd kū pad ān abar frahist bawēnd ān ī gannāgmēnōy gilistag
320.0
sūrāg ī xrafstarān kū =š xrafstarān pad =iš andar bawēnd
321.0
dādār ī gēhān ī astōmandān ahlaw kū panǰom ēn zamīg anāsāntom kū mēnōy ēn zamīg dušxwārīh az čē wēš
322.0
u =š guft ohrmazd kū pad ān abar mard ahlaw spitāmān zardušt nārīg =iz ud aburnāyag pad wardagīh pad rāh rawēnēnd
323.0
ay ēn garān bē pad rāh ī abāz madan anummēdwārtar
324.0
pad xākīh ud huškīh garzān burd gōwišn
325.0
ay ka =šān hamāg pad parwandišn rawēnd u =šān xākīh ud huškīh hē
326.0
ast kē ēdōn gōwēd ay xākdahānīh ud huškdahānīh az =iš bawēd
327.0
dādār ī gēhān ī astōmandān ahlaw kē fradom ēn zamīg pad ān mahist šnāyēnišn šnāyēnēd kū kē pad rāmišntar kird bawēd
328.0
u =š guft ohrmazd kū pad ān abar frahist ul kand kū andar ān nibayēd nigān sag ī rist ayāb mard ī rist azēr ī zamīg nē xwaršēd nigerišn
329.0
ay dušox rāy nē gōwēd čē dušox ō nūn kandan nē šāyēd
330.0
dādār ī gēhān ī astōmandān ahlaw kē didīgar ēn zamīg pad ān mahist šnāyēnišn šnāyēnēd kū kē pad rāmišntar kird bawēd
331.0
u =š guft ohrmazd kū pad ān abar frahist hazzān ī uldēsīd bē kand kū andar ān mard ī rist bē dād ēstēd azēr ī zamīg nē xwaršēd nigerišn
332.0
ma kas mardōm barād ēwtāg pad tan =ēw ka rist kū murd ēd pad saxwan gōwam kū dānēd kū murd
333.0
čē agar kas mardōm barēd ēwtāg pad tan =ēw kē rist abar ōy nasuš gumēxtēd az nāk bē az čašm bē az uzwān bē az padišxwar bē az kēr bē az kūn ī ōy murd
334.0
awēšān srū ī wināhgārān abarpad awēšān wināhgārān ā =šān ān druz ī nasuš abar dwārēd
335.0
ast kē srū ī murdagān gōwēd
336.0
ayōǰdāsr pas bawēd tā ō hamēudhamērawišnīh
337.0
ēn az abestāg paydāg
338.0
ān bawēd ka dānēd kū murd bawēd ud dānēd kū sag nē dīd ǰumbānēd kū wināh margarzān
339.0
u =š ēd andar nē abāyēd kū sag nē dīd
340.0
pad tan =ēw stad bē barēd ud pad ēwkardagīh bē čandēnēd ā =z ǰuttar nēst
341.0
rēman ud margarzān
342.0
u =š šōy nēst pad ēn nērang
343.0
az pēš paydāg bē ōzanišn
344.0
abarg čār ud tuwān āmār nē kird
345.0
ud gōgušnasp guft hād pad čār ud tuwān bawād
346.0
u =š andar nē abāyēd kū dānēnd kū wināh margarzān čē ka dānēnd kū hambun =iz wināh =ēw ud pas kunēnd ā =z margarzān ōh bawēd
347.0
rōšn guft ay handāzīh abāyēd kū dānēnd kū sag nē dīd ud nasā paymānag hambun =iz nōit̰maxši.bərətō
348.0
ka čand bār stad nihād har bār =ēw margarzān ōh bawēd
349.0
ka ēk pad ēn dast stānēd ēk pad ēn dast nihēd margarzān dō
350.0
ka dīd pad ēwkardagīh frōd bast ēstēd pad ēw bār abāz stanēd wēš nēst kū margarzān =ēw
351.0
har =iz abāg mard ēwkardag ka =š pad =iš bē čandēnēd u =š tan rēman ud margarzān ōh bawēd
352.0
ka pad pāy =ēw mard bē čandēnēd u =š tan rēman kird =iz ī ōy rāy tanāpuhr ō bun
353.0
ka =š nasā andar sālārīh bawēd ka ō ōy kas framāyēd kē frahang andar nēst ā =z margarzān ōh bawēd
354.0
ka =š andar kanār bē mīrēd pad gyāg abganēd rēman nē bawēd
355.0
ay ma agar pad čāštag ī mardbūd
356.0
agar ka =š murw =ēw ēwkardag abar bē abganēd bē pad rāh hamkirbag tā rēman nē bawēd
357.0
ay murw =iz ān āmār kē =š nasuš rāy zanēd
358.0
ka ān sārīgar ast pad nigerišn pad nasā bē rāyēnēd rēman nē bawēd
359.0
ka pad stōr frōd bast ēstēd frāz āhanǰēd ā =m nē rōšnag kū ēdōn bawēd čiyōn pad zōr ī mard =ēw ayāb ēdōn bawēd čiyōn pad zōr ī dō mard
360.0
rōšn guft ay ēdōn bawēd čiyōn pad zōr ī dō mard
361.0
pad āb ud pad gōmēz nē pad gil ud āb nē rōšnag
362.0
rōšn guft ay pad āb ōh bawēd ud pad gōmēz nē bawēd pad gil ōh bawēd pad āb nē bawēd
363.0
āb ān bawēd ka =š dast andar frōd kunēnd tā ārešn andar frōd kunēnd
364.0
pad ēw paywand nē bawēd
365.0
ud gōmēz ān ka az gōmēzdān abar frōd kunēnd tā ka =š andar mēzēd
366.0
pad paywand ōh bawēd
367.0
gil ān bawēd ka =š pad =iš bē rawēnd
368.0
āb ān bawēd pad zamīg frōd kōst
369.0
nasā ī sag nē dīd ka pad dō bē čandēnēnd har dō tan pad baršnūm wastarg pad xšwašmānghō pad =iz hamkirbagīh ǰuttar nēst
370.0
ān ī sag dīd ka pad tan =ēw bē čandēnēd tan pad baršnūm wastarg pad xšwašmānghō pad hamkirbagīh pad āb ud gōmēz
371.0
ka tan ēdōn rēman kunēnd ī =š pad baršnūm abāyēd šustan ā =š tanāpuhr ō bun
372.0
yō vīsat̰ aētaiiąm zaōϑrąm ātrəm ā frabarōit̰
373.0
ānōh paydāg kū kē dast šabīg ō āb barēd ēdōn bawēd čiyōn kē hixr ō ātaxš burd hē
374.0
yaϑa narəm dušcā zarətəm
375.0
ānōh paydāg kū kē hixr ō āb ud ātaxš ēdōn bawēd čiyōn ka =š nasā ō mard ī ahlaw burd hē
376.0
ka rēman ēdōn kunēd ī =š pad gōmēz abāyēd šustan ā =š xwar ō bun
377.0
ka =š tanāpuhr ō bun bawēd ā =š xwar ō bun nē bawēd
378.0
ka xwar ō bun bawēd ā =š tanāpuhr ō bun nē bawēd
379.0
paōriiāi upaēta paōriiāi nišasta
380.0
ān bawēd ka har bār =ēw bē šōyēd ud bē wizārēd
381.0
ka pad nasāyīh ēwar ka pahikōftan warōmand ā =š ōh ōy šōyišn
382.0
ka pad nasāyīh warōmand ka pad pahikōftan ēwar ā =š nē šōyišn
383.0
ka ānōh bawēd nē ānōh bawēd warōmand ēdōn bawēd čiyōn ka pad nasāyīh warōmand hē
384.0
abarg hazzān paymānag āmār nē kird
385.0
ud gōgušnasp adān adīd guft
386.0
dādār ī gēhān ī astōmand ahlaw kū ōy mard gāh kū ast ī =š rist kēš ī ēkbar
387.0
u =š guft ohrmazd kū kē hēnd pad ēn zamīg ǰudābtom ǰudurwartom yōǰdāsrzamīgtom az hixr huškzamīgtom kū nam pad ān paymānag nēst yārə narš xᵛā aōϑrəmahe iiato kamist =iz pad awēšān rāh franāmēnd pah ud stōr ātaxš =iz ī ohrmazd ud barsom =iz pad ahlāyīh frāz wistard mard =iz ī ahlaw
388.0
dādār ī gēhān astōmandān ahlaw čand drahnā az ātaxš čand drahnā az āb čand drahnā az barsom pad ahlāyīh frāz wistard čand drahnā az mard ī ahlaw
389.0
u =š guft ohrmazd kū sīh gām az ātaxš ud sīh gām az āb ud sīh gām az barsom pad ahlāyīh frāz wistard ud se gām az mardān ahlawān
390.0
ēdōn ōy wināh rāy kūtā nē bawād awēšān mazdēsn ēn zamīg pad pērāmōndēsišn pērāmōn ēw dēsēnēnd kū parzīn kardag =ēw bē ēw kunēnd
391.0
u =š pad xwarišn pas ēw ēstēnēnd awēšān kē mazdēsn hēnd u =š pad wastarg pas ēw ēstēnēnd awēšān kē mazdēsn hēnd
392.0
drōzēnīdagištom wattom nyuruzdištom kamist awēšān xwarišn ēw xwarēd awēšān wastarg ēw nihumbēnd hamē az ān tā ka han ī panǰāhsālag ud zarmān šastsālag pēš pas ud pādīrānšuhr bawād
393.0
šastsālag ay kār ī =m
394.0
ka han zarmān pādīrānšuhr būd hād sōšyans guft hē ay nērōg nē dārišn ud kayādurbōzēd guft ay zāyišn nē dārišn ud ēdōn čiyōn kayādurbōzēd guft ān bawēd ka zan =iz čiyōn ān mard ēstēd ān ī ōzōmandtom ōy pas mazdēsnān ī tagīgtom kū nēwtom ī bē pāktom frahixttom pad ān kārīh abar ēw mānēnēd pad bālist pad sar ī kōf
395.0
pōstpahnā ī ōy kamāl ēw kušēnd kū =š sar bē ēw brīnēnd
396.0
ō wasxwardārān ī spennāgmēnōy dāmān ī kirbxwārān kirb bē ēw abespārēnd ō way ī kargās
397.0
ēdōn ēw gōwēd kū abar ēn zamīg bē mehēnam kū pad patit bawam az harwisp dušmat ud dušhūxt ud dušxwaršt ī =m ēkbarīh ō bun būd ēstād
398.0
agar =iz any ān ī wattar kunišn frāz warzīd kū =š anī =z wināh kird patitīhāīh ī ōy tōzišn bawēd
399.0
tōxt bawēd
400.0
sōšyans guft ay ān bawēd ka =š ān ī did nē margarzān
401.0
kayādurbōzēd guft ay patitīhāīh ī ōy tōzišn u =š az abārīg wināh ǰudǰud patit bawišn
402.0
agar =iz ōy any ān ī wattar kunišn nē frāz warzīd patitīhāīh ī ōy mard tā ō hamēudhamērawišnīh
403.0
dādār ī gēhān ī astōmandān ī ahlaw kē sidīgar ēn zamīg pad ān mahist šnāyišn šnāyēnēd kū kē rāmišntar kird bawēd
404.0
u =š guft ohrmazd kū pad ān abar frahist bē kanēd ān ī gannāgmēnōy gilistag sūrāg ī xrafstarān kū xrafstar bē ōzanēd
405.0
dādār ī gēhān astōmandān ahlaw kē tasom ēn zamīg pad šnāyišn šnāyēnēd kū kē pad rāmišntar kird bawēd
406.0
u =š guft ohrmazd kū pad ān abar frahist kārēnd spitāmān zardušt ǰōrdā ud wāstar urwar =iz xwarišnbar ay ōh paydāgēnēnd kū =šān kē =šān nēkīh pad =iš kunēnd ēd =iz kē ān anāb ān ābōmand kunēnd kū wēš freh =iz bē kunēnd ēd =iz kē ān ābōmand ān ī anāb kunēnd kū =šān ābādān zamīg kird
407.0
čē nē zamīg az ān ī āsānīh ka dagr akišt nibayēd ka pad kešišn kešišnōmand kū anāb ēdōn kārēnd awēšān ān weh ī abarmānišnīh ōy abāyēd tōhm ēdōn čarātīg hurust ka dagr abus rawēd awēšān ān weh gušn ōh abāyēd
408.0
kē ēn zamīg abar warzēd spitāmān zardušt pad ān ī hōy bāzā pad ān ī dašn bāzā pad ān ī dašn ud pad ān ī hōy pad ayārōmandīh ī ēk abāg did abar sagrīh barēd homānāg ī ōy čiyōn mard kē dōst ī zyānag
409.0
ōy kē dōst ī zyānag mērag pad ān wistarg gāh nibayān pus āgenēn abar barēd ābustan bawēd ayāb pad gōn weh bē bawēd zamīg =iz pad bun weh bē bawēd ayāb pad bar
410.0
kē ēn zamīg abar warzēd spitāmān zardušt pad ān ī hōy bāzā pad ān ī dašn bāzā pad ān ī dašn bāzā ud pad ān ī hōy pad ayārōmandīh ī ēk abāg did gōwēd ēn zamīg kū mard kē man abar warzē pad ān ī hōy bāzā pad ān ī dašn bāzā pad ān ī dašn bāzā pad ān ī hōy pad ayārōmandīh ī ēk abāg did
411.0
bāstān ēdar ēwēn bē barān kū =t ēwēn ī nēk az =iš kunān
412.0
u =t harwisp az xwarišnān barānd az hambarišnīh bē ǰōrdāyān ka bē bawād kū har čiš =ēw ī nēk ōh bawād fradom bē tō āwarād
413.0
ast kē az dah šāzdah gōwēd
414.0
kē ēn zamīg nē abar warzēd spitāmān zardušt pad ān ī hōy bāzā pad ān ī dašn bāzā pad ān ī dašn bāzā ud pad ān ī hōy pad ayārōmandīh ī ēk abāg did gōwēd ēn zamīg kū mard kē man nē abar warzē pad ān ī hōy bāzā pad ān ī dašn bāzā pad ān ī dašn bāzā pad ān ī hōy pad ayārōmandīh ī ēk abāg did bāstān ēdar abar ēstē pad ō any dar ī kasān xwarišn pursišn rāy kūtā =m dahād
415.0
bāstān tō tarist āhąna =t ān ī stadag xwarišn barānd kū ān ī nēk barānd ud ān ī wad bē ō tō āwarēnd
416.0
ā =t awēšān xwarišn az awēšān mardōmān barēnd az awēšān ān ī frāyābādīh
417.0
kē =šān parrēxt hād ay čiš ēdōn garā
418.0
dādār gēhān astōmandān ī ahlaw pad =iš kē ast dēn ī mazdēsnān uruhbar kū mehmānīh pad kē u =š rawāgīh az kē weh
419.0
u =š guft ohrmazd kū pad ōy čēr abar ǰōrdā kištan spitāmān zardušt bāzyār ī tuxšāg
420.0
kē ǰōrdā kārēd ān ahlāyīh kārēd kū =š kišt bawēd ān dēn ī mazdēsnān frāz pad wāzišn wazēnēd kū =š rawāg kird bawēd
421.0
ān dēn ī mazdēsnān pēmēnēd kū parward bawēd pad sadpadištānīh čiyōn pad panǰāh mard dastyārīh aburnāyag kunēnd u =šān xūb kird bawēd ōy =z kird bawēd pad hazārpestānīh čiyōn ka pad panǰsad zan dāyagānīh ī aburnāyag =ēw kunēnd ā =šān xūb kird bawēd ōy =z kird bawēd pad bēwar yazišnkirdārīh čiyōn pad pānagīh ī aburnāyag rāy ānand yazišn bē kunēd čand =iš yeŋ́hēhātąm bēwar ā =šān xūb kird bawēd ōy =z xūb kird bawēd
422.0
ka ǰōrdā dād ēg dēw xwist hēnd kū ō pāy būd hēnd ay ēn hamāg ān ī pad bundahišn
423.0
ka suftag dād ēg dēw tuhīg būd hēnd anummēd
424.0
ast kē ēdōn gōwēd ay ēd gyān andar aškamb bē nē mānd
425.0
ka pēšag dād grih ēg dēw griyist hēnd kū =šān šēwan ud mōyag kird
426.0
ka gund dād kulāčag ēg dēw pulīd hēnd kū =šān tarakag andar ōbast
427.0
ēdar mānēnd dēw pad mehmānīh bē zanēd andar ō mān ī gundag kū =šān ǰōrdā pad wināhkārīh nē dād
428.0
u =š zafarmasā āhan ī tāftag ōham wašt sahēd ka ǰōrdā was bawēd
429.0
ēg mānsr ēdōn ōšmurēnd kū hērbedestān ī weh kunē
430.0
čē nē kas az axwardārīh tuwānīg kē nē xwarēd ā =š nē tuwān kē nē čēr pad kār ī ahlāyīh ka dwāzdahhōmāst =ēw abēr nēw ka nē xwarēd ā =š nē tuwān
431.0
nē kē čēr pad kār ī warzišnīg ud pusxwāhišnīg kē daštānmāh abēr tuwān wizārdan ka nē xwarēd ā =š nē tuwān
432.0
čē az xwardārīh harwisp ox ī astōmandān zīwēnd tā sar ī brīn zamān az axwardārīh frāz mīrēnd
433.0
abarg guft hād ka murd axwardār
434.0
dādār ī gēhān ī astōmandān ahlaw kē panǰom ēn zamīg pad ān mahist šnāyišn šnāyēnēd kū kē rāmišntar kird bawēd
435.0
u =š guft ohrmazd kū kē ēn zamīg abar warzēd spitāmān zardušt ō mard ī ahlaw pad ahlāyīh ī weh dahēd kē ēn zamīg abar warzēd spitāmān zardušt ō mard ī ahlaw pad ahlāyīh ī weh nē dahēd abar ōy abganēd spandarmad ō tom ōh paydāgēnēnd kū kē andar šēdā frōdmand ǰast ēstēd ka druwand ā =š hamēmālīh kirdan =iz ī ōy rāy pēš dušox abganēnd ī bēšōmand ox ī dardōmand ī wattom axwān ān harwisp abar ō tēx abganēd
436.0
har čiyōn ōbadēd tēx ōbadēd
437.0
dādār ī gēhān ī astōmandān ahlaw kē andar ēn zamīg nigānēnēd sag ī rist ayāb mard ī rist nēm sāldrahnā anulkand kadār ōy ast tōzišn
438.0
u =š guft ohrmazd panǰsad pad abarzanišnīh abar zanišn aspaštar panǰsad srōšōčarnām ay tanāpuhr ud nēm wināh
439.0
dādār ī gēhān ī astōmandān ī ahlaw kē andar ēn zamīg nigānēnēd sag ī rist ayāb mard ī rist sāldrahnā anulkand kadār ōy ast tōzišn
440.0
u =š guft ohrmazd hazār abarzanišnīh abar zanišn aspaštar hazār srōšōčarnām panǰ tanāpuhr wināh
441.0
az ēn tā dēwēzagīh wēš nēst kū tanāpuhr
442.0
pad abārīg dād and čand dō tanāpuhr
443.0
ham se tanāpuhr pad abārīg dād ī čand and gōwēd ast
444.0
dādār ī gēhān ī astōmandān ī ahlaw kē andar ēn zamīg nigānēnēd sag ī rist ayāb mard ī rist dōsāldrahnā anulkand kadār ōy ast tōzišn
445.0
kadār ōy ast puhl pad aštar ud srōšōčarnām
446.0
čiyōn ast ōy yōǰdāsrīh pad ruwān
447.0
u =š guft ohrmazd kū nē ōy ast tōzišn pad xwāstag ud nē ōy ast puhl pad aštar ud srōšōčarnām ud nē ōy ast yōǰdāsrīh pad ruwān čē anāpuhragān wināh tā ō hamēudhamērawišnīh
448.0
ast kē any puhl gōwēd
449.0
bē kay ēdōn
450.0
agar ast āstawān kū weh dēn dānēd kū wināh ayāb =iš abarāšnūd dēn ī mazdēsnān kū agdēn u =š pad wināh uskārd ēstēd
451.0
ēn az abestāg paydāg nihuftan āmār
452.0
yōi aiŋ́hā̊ zəmō nikaṇte
453.0
ān kandan āmār
454.0
ka se frēg bē kanēd ud rōbēd tanāpuhr =ēw
455.0
ka panǰ frēg bē kanēd bē rōbēd dō tanāpuhr
456.0
ka ēk ōh kanēd ēk ōh rōbēd tanāpuhr =ēw
457.0
ōy ēk kand ēstēd bē rōbēd kandan rāy wēš nē bawēd
458.0
har =iz abāg zamīg ēwkardag ka bē kanēd kandan rāy ōh bawēd
459.0
ka kem az ēn paymānag kanēd kandan rāy pad ān zamān bawēd ka andar nihēd ud bē nihumbēd
460.0
ka ēčand gyāg pad ēn paymānag pad ēd menišn bē kanēd kū har gyāg kū =m abāyēd niham kandan rāy wēš nēst kū ēk
461.0
farrīg guft ay har gyāg ōh bawēd čē mēnōy ī zamīg bīm dārēd
462.0
ka ēčand gyāg kem az ēn paymānag bē kanēd ēdōn bē nihumbēd ka gyāg =ēw xwaršēd nigerišn kird ā =š hamāg gyāg kird ud kand
463.0
ka gyāg =ēw ēk nihuftan rāy ud ēk kandan rāy nē abzāyēd
464.0
nihuftan rāy tā ō ēn paymānag az abestāg paydāg abzāyēd
465.0
nasānigānīh pad har čiš =ēw ōh bawēd
466.0
bē pad nasā ayāb ka andar must abāz gīrēd ēdōn bawēd čiyōn wattar dādestāntar čē sag ka nasā andar ābgēnag wēnēd nasuš nē zanēd
467.0
māhgušnasp guft hambun pad =iz wastarg ī tadag nē bawēd
468.0
ka zan ī daštān barsom andar ābgēnag wēnēd rēman ōh kunēd kū =š nasā andar nihēd bē nihumbēd ā =š nasānigānīh ōh kunišn
469.0
ka ǰud az wars ud nāxun nigān kunēd ā =š nigānīh ōh kunišn
470.0
ka sag wars ud nāxun wēnēd nasuš nē zanēd
471.0
ka hamkirbagīh mard rēman ōh kunišn
472.0
ka pēš az dō sāl pōsēd ayāb kirm bē xwarēd ayāb xwaršēd nigerišn bē bawēd ka pas nigān abāz bawēd ā =z ō nasānigānīh abāz ēstēd
473.0
windādgušnasp guft ay ka kirm bē xwarēd ā =š har kirm =ēw rāy tanāpuhr =ēw ō bun
474.0
u =š az ān gyāg paydagēnēd
475.0
yō narš aṣ̌aōnō iririϑušō zəmē kəhrpa nikaiṇti
476.0
agar ast anāstawān kū agdēn u =š pad kirbag uskārd ēstēd ayāb =iš anabarāšnūd dēn ī mazdēsnān kū weh dēn pad xwāhišn ud pursišn wināhgār pad abēgumānīh ud kirbagmenišnīh kunēnd awēšān =z wināh az awēšān mardōmān abganēd āstawānīh patitīgīh pad dēn ī mazdēsnān paydāg ka awarzīdār pas ān ī abārōn kunišn kū pad ēd menišn pad patit bawēd kū az nūn ōh frāz wināh nē kunam
477.0
čē abganēd spitāmān zardušt dēn ī mazdēsnān az mard ī āstawānīh band band ī dahišnīg
478.0
abganēd drōš
479.0
ay ēd dānēnd kū duzzīh nē abāyēd kirdan bē pad ēd dārēd kū ka az tuwānīgān duzam ō driyōšān dahom ā =m kirbag
480.0
abganēd ahlawganīh ay dānēnd kū =š apahikārradīh abāz abāyēd dāštan bē ēd nē dānēd kū pahikārradīh xūb abāg kē bē abāyēd kirdan
481.0
ast kē ēdōn gōwēd ay margarzān ōh abāyēd ōzadan bē ēd nē dānēd kū ǰud az framān ī dastwarān nē abāyēd ōzadan
482.0
abganēd nasānigānīh
483.0
ay ēd dānēnd kū nasānigānīh nē abāyēd kirdan bē pad ēd dārēd kū ka sag ud rōbāh ō āb ud ātaxš nē burd ā =m kirbag
484.0
abganēd ān ī anāpuhragān wināh ī margarzān
485.0
ay nāmčištīg nē guft ēstēd
486.0
abganēd ān ī škoftpurdagīg abām waxš ī garān
487.0
ēd dānēnd kū =š ōh abāyēd stadan
488.0
bē ēd nē dānēnd kū abar az dēnīg nē abāyēd stadan
489.0
abganēd harwisp awēšān wināh čēgāmizēw abar warzēnd
490.0
homānāg ī ōy spitāmān zardušt dēn ī mazdēsnān az mard ahlaw frāz mālēd harwisp dušmat ud dušhūxt ud dušhuwaršt čiyōn wād ī škoft ī tag ka tēz āyēd ud dašt frāz mālēd
491.0
giyāhīzagīh ud čiš =ēw bē bard
492.0
weh ēdar zardušt ān ī huwaršt kunišn warzišn kū spaiieiti čiš =ēw ī nēk ay ēdar =iz pas ēd kū spaiieiti čiš =ēw ī nēk pas =iz awināhīh weh
493.0
weh dēn ī mazdēsnān wābarīgān tōzišn brēhēnēd
494.0
ka dēn gōwēd ay arduš ay pādifrāh ēd pad awestwār dārišn
495.0
ēn az abestāg paydāg spaiieiti pad har kas =ēw ō abāyēd pad har wināh ōh bawēd
496.0
sōšyans guft pad zaxm nē bawēd
497.0
parā kauuahmāt̰ nərət̰
498.0
u =š sōšyans bē ō dādestān ēdōn bawēd kū zaxm hamāg kēn nām
499.0
wehšābuhr guft ay wināh ī hamēmālān pad ēk =iz nē bawēd
500.0
nōit̰ marąm pairištəm
501.0
pad har dō čāšt hamdādestān būd hēnd kū abāmīhā bē bawēd mard druwand nē kunēd
502.0
weh dēn ān pad ōy kas bawēd kē pad xwāhišn pursišn
503.0
wināhgār ān pad abēgumānīh kirbag menišn kunēd ka wināh ō bun u =š pad spaiieiti wizārišn
504.0
ka kirbag ā =m nē rōšnag
505.0
ay ma agar čiš =ēw az hād spōxtan nē šāyēd ōh bawēd
506.0
ēn čiyōn anēr kē ō ērīh āyēd ud agdēn ka bē ō weh dēnīh āyēd ud ǰudristagān ka bē ō pōryōtkēšīh āyēd
507.0
har ī =š pad dād ī xwēš pad kirbag uskārd ēstēd ā =š az bun bē šawēd
508.0
ān ī =š pad wināh uskārd ēstēd ā =š ōh tōzišn
509.0
u =š tōzišn ēdōn bawēd čiyōn amāh
510.0
u =š pādifrāh barēd nē pad burd dārišn
511.0
u =š šōy nē pad šōy dārišn
512.0
māhgušnasp guft ay har ān ī kas kē pad dād ī xwēš šōy ka šust ā =š pad šust dārišn
513.0
sōšyans ay bē ka andar ērīh ud pōryōtkēšīh bē mīrēd tā ka mīrēd ay margarzān
514.0
u =š ēd =iz ēdōn guft ay kē xwāhēd pursēd ā =š tuwān ka ō dād ī wattar nē rasēd
515.0
vaŋhauue manaŋhe
516.0
ud gōgušnasp guft ay andar har dād =ēw mardōm ahlaw ōh bawēd čē az tūiriianąm dax́iiunąm paydāg
517.0
čahārom pargard bun
518.0
kē ō mard ī nihišnōmand čiš abāyēd dādan ā =š nē nihišn abāz bard kū =š nē dahēd duzz ī nihišn bawēd ān ī =š pad ēd menišn stānēd kū abāz nē dahom apparag ī nihišn az barišn
519.0
ka xwāhēd gōwēd ay ast =am u =t nē dahom
520.0
ēn az abestāg paydāg
521.0
ān bawēd ka gōwēd ay čiš =iz dah ud tō =z ka abāyēd ā =t dahom ud pad ēw menišn bē stānēd kū abāz nē dahom
522.0
ka kas nē dānēd pad hāsr duzz ud ka kas dānēd pad hāsr apparag
523.0
ka xwāhēd gōwēd ay nēst =im pad gyāg duzz
524.0
ka gōwād ay ast =im u =t nē dahom pad gyāg duzz ī duzzēn ud apparag ī apparagēn frēzwānīg
525.0
u =š band ud drōš
526.0
andar ān =iz druz ābus ōh kunēnd
527.0
yat̰ nā kasuuikąmcina
528.0
nē abām čē abām pad ān duzz bawēd ī =š abāz abāyēd dādan
529.0
ud nē gōharīd čē gōharīd pad ān duzz bawēd ī =š bē stad
530.0
ēn pad har dō duzz bawēd pad ēd šōn kū =š nē dahēd
531.0
awēšān čiyōn andar rōz ayāb ānōh andar šab mēhan pad xwēšīh abar gīrēd kū pad drubuštīh gāh ēd bē gīrēd
532.0
ay bawēd ka pad gyāg gīrēd
533.0
az ān gyāg paydāg
534.0
yauuat̰ vā aēte vaca framruuānā maēϑəmnahe vāi pairi gə̄uruuaiieiti
535.0
dādār ī gēhān astōmandān ahlaw čand awēšān mihr ī tō kē ohrmazd hē
536.0
čandtom ka bē drōzēnd wināhgār ōh bawēnd
537.0
u =š guft ohrmazd kū šaš ahlaw zardušt ay ǰār šaš gōwēd
538.0
fradom ān pad gōwišn
539.0
sōšyans ēr abāg ēr guft
540.0
u =š xwadāy rōzīg guft
541.0
kayādurbōzēd ēr abāg anēr
542.0
u =š ǰāmag ay anuspurrīg az kust ēw guft
543.0
didīgar ān ī dastmušt
544.0
kē ān ī xwadāy rōzīg guft ā =š uspurrīg az kust ēw guft
545.0
kē ān ī anuspurrīg az kust ēw guft ā =š ēn uspurrīg har dō kird guft
546.0
sidīgar pahmasā se stēr
547.0
tasom stōrmasā dwāzdah stēr
548.0
panǰom wīrmasā panǰsad drahm
549.0
šašom dehmasā wēš az panǰsad drahm hambun =iz
550.0
ast kē gōwēd ay čand wīr az stōr wēš deh az wīr wēš
551.0
daxšagmihr gōwēd yō daŋhauue hu vaxšāi fraδəmnahe varəδəmnahe xraϑβəmnahe suiiamnahe
552.0
kē pad huwaxš frāxwēnēd kū wēš bē kunēd sūdēnēd kū =š sūd pad =iš kunēd
553.0
pad gōwišn fradom mihr kunēd kū kunēd ēd pad saxwan gōwam kū drōzēd
554.0
dastmasā pas
555.0
ēd kū abāz nihēd ka frāz mālēd ān ī pad gōwišn
556.0
dastmasā pas andar grawgān frāz ēw dahēd kū abāz ēw nihēd
557.0
pahmasā pas
558.0
ēd kū abāz ēw nihēd ka frāz mālēd ān ī dast mušt
559.0
pahmasā pas andar grawgān frāz ēw dahēd kū abāz ēw nihēd
560.0
stōrmasā pas
561.0
ēd kū abāz ēw nihēd ka frāz mālēd ān ī pahmasā
562.0
stōrmasā pas andar grawgān frāz ēw dahēd kū abāz ēw nihēd
563.0
wīrmasā pas
564.0
ēd kū abāz ēw nihēd ka frāz mālēd ān ī stōrmasā
565.0
wīrmasā pas andar grawgān frāz ēw dahēd kū abāz ēw nihēd
566.0
dehmasā pas
567.0
ēd kū abāz ēw nihēd ka frāz mālēd ān ī wīrmasā
568.0
dehmasā pas andar grawgān frāz ēw dahēd kū abāz ēw nihēd
569.0
ēn az abestāg paydāg
570.0
mihr ī griftag az bunīh nē frēzwānīg
571.0
ka =š andar grift frēzwānīg
572.0
ēd xwēš ēd pidarān ā =z ǰuttar nēst
573.0
ka ān pad gōwišn bē drōzēd ā =š az ān ī dast mušt abāz nihēd u =š ēn pādifrāh az pēš paydāg andar hamēmālān bē wizārēd
574.0
ast kē andar mihr gōwēd ka abāz nē nihēd pad ān ī gōwišn wināhgār bawēd
575.0
ka ēn abāz nihēd abāz nē kunēd ā m nē rōšnag
576.0
dādār ī gēhān ī astōmandān ahlaw čand awēšān mihr pad abardrōzišnīh āstārēnēd pad gōwišn kū čand sāl bīm dārišn
577.0
u =š guft ohrmazd kū sesad pad hadtōzišnīh ō mardān nabānazdištān abar barēd kū sesad sāl bīm dārišn
578.0
dādār ī gēhān ī astōmandān ahlaw čand awēšān mihr pad abardrōzišnīh āstārēnēd dastmušt
579.0
u =š guft ohrmazd kū šašsad pad hadtōzišnīh ō mardān nabānazdištān abar barēd kū šašsad sāl bīm dārišn
580.0
dādār ī gēhān astōmandān ahlaw čand awēšān mihr pad abardrōzišnīh āstārēnēd pahmasā
581.0
u =š guft ohrmazd kū haftsad pad hadtōzišnīh ō mardān nabānazdištān abar barēd kū haftsad sāl bīm dārišn
582.0
dādār ī gēhān astōmandān ahlaw čand awēšān mihr pad abardrōzišnīh āstārēnēd stōrmasā
583.0
u =š guft ohrmazd kū haštsad pad hadtōzišnīh ō mardān nabānazdištān abar barēd kū haštsad sāl bīm dārišn
584.0
dādār ī gēhān astōmandān ahlaw čand awēšān mihr pad abardrōzišnīh āstārēnēd wīrmasā
585.0
u =š guft ohrmazd kū nōsad pad hadtōzišnīh ō mardān nabānazdištān abar barēd kū nōsad sāl bīm dārišn
586.0
dādār ī gēhān ī astōmandān ahlaw čand awēšān mihr pad abardrōzišnīh āstārēnēd dehmasā
587.0
u =š guft ohrmazd kū hazār pad hadtōzišnīh ō mardān nabānazdištān abar barēd kū hazār sāl bīm dārišn
588.0
ay ēn sāl marag āmār
589.0
ān ī pad huspārom xwāstag marag āmār
590.0
ud ān ī pad nigādom mard marag āmār
591.0
sāl marag ud mard marag ud xwāstag marag paymānag āmār ud nāf marag nē āmār
592.0
tā az ēn se ēk bē šawēd ayāb kas =ēw bē wizārēd har kēn bīm dārišn
593.0
ka az ēn se ēk bē šawēd ayāb kas =ēw bē wizārēd ēk =iz bīm nē dārišn
594.0
ka ō ēk mad ōy did ēd rāy bīm kem nē dārišn
595.0
mihrōdruǰ pad zyānag bawēd
596.0
nauua drujaiti xšaϑraeibiiō
597.0
pad ō frazend bawēd pas az wināh kird zāyēd
598.0
nərəbiiō hō dądrąxti
599.0
u =š pad har kirbag kird ǰahišn wattar bawēd
600.0
pas =iz pairi aōjastarō zī ahmāt̰ kār
601.0
kayādurbōzēd ī kirmānīg guft ay wehān bīm kem dārišn
602.0
pad čāštag ī gōgušasp ka pid murd ahlaw frazendān bīm nē dārišn
603.0
dādār ī gēhān astōmandān ahlaw kē mihr abar drōzēd ī pad gōwišn kadār ōy ast tōzišn
604.0
u =š guft ohrmazd kū sesad pad abarzanišnīh abar zanēd aspaštar ud sesad srōšōčarnām ay pādifrāh rāy abāz āwarēd
605.0
dādār ī gēhān astōmandān ahlaw kē mihr abar drōzēd ī dastmušt kadār ōy ast tōzišn
606.0
u =š guft ohrmazd kū šašsad pad abarzanišnīh abar zanēd aspaštar ud šašsad srōšōčarnām
607.0
dādār ī gēhān astōmandān ahlaw kē mihr abar drōzēd ī pahmasā kadār ōy ast tōzišn
608.0
u =š guft ohrmazd kū haftsad pad abarzanišnīh abar zanēd aspaštar ud haftsad srōšōčarnām
609.0
dādār ī gēhān astōmandān ahlaw kē mihr abar drōzēd ī stōrmasā kadār ōy ast tōzišn
610.0
u =š guft ohrmazd kū haštsad pad abarzanišnīh abar zanēd aspaštar ud haštsad srōšōčarnām
611.0
dādār ī gēhān astōmandān ahlaw kē mihr abar drōzēd ī wīrmasā kadār ōy ast tōzišn
612.0
u =š guft ohrmazd kū nōsad pad abarzanišnīh abar zanēd aspaštar ud nōsad srōšōčarnām
613.0
dādār ī gēhān astōmandān ahlaw kē mihr abar drōzēd ī dehmasā kadār ōy ast tōzišn
614.0
u =š guft ohrmazd kū hazār pad abarzanišnīh abar zanēd aspaštar ud hazār srōšōčarnām
615.0
kē pad ān mard sneh ul ēstēd pad zanišn ī mard =ēw ēdōn ōy āgrift kū =š āgrift andar ō bun bawēd
616.0
ka frāz raft kū bē rawēnēd ēdōn ōy awōyrišt kū =š awōyrišt andar ō bun bawēd
617.0
u =š āgrift andar šawēd
618.0
ast kē ēdōn gōwēd ay nēst
619.0
ka andar ō ōy kēnmenišn bē rasēd kū =š dast abar nihēd ēdōn ōy arduš kū =š arduš andar ō bun bawēd
620.0
u =š awōyrišt andar šawēd
621.0
ast kē ēdōn gōwēd ay nēst
622.0
panǰom arduš mard =iz tanāpuhr bawēd
623.0
pad awōyrištīh ud pad =iz arduš ǰuttar nēst
624.0
dādār ī gēhān ī astōmandān ahlaw kē ō mard āgrift gīrēd kadār ōy ast tōzišn
625.0
u =š guft ohrmazd kū panǰ pad abarzanišnīh abar zanišn aspaštar panǰ srōšōčarnām
626.0
didīgar dah pad abarzanišnīh abar zanišn aspaštar dah srōšōčarnām
627.0
sidīgar pānzdah pad abarzanišnīh abar zanišn aspaštar pānzdah srōšōčarnām
628.0
tasom sīh pad abarzanišnīh abar zanišn aspaštar sīh srōšōčarnām
629.0
panǰom panǰāh pad abarzanišnīh abar zanišn aspaštar panǰāh srōšōčarnām
630.0
šašom haftād pad abarzanišnīh abar zanišn aspaštar haftād srōšōčarnām
631.0
haftom nawad pad abarzanišnīh abar zanišn aspaštar nawad srōšōčarnām
632.0
haštom az awēšān kunišn ka warzēd ka anulwarzīd ān ī pēš kū nē wizārd ēstēd kadār ōy tōzišn
633.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
634.0
dādār ī gēhān astōmandān ahlaw agar nē ul warzēd kū be xxx nē wizārēd kē ō mard āgrift gīrēd kadār ōy tōzišn
635.0
u =š guft ohrmazd kū pad ān ī ōy tanāpuhragānīh dewīst abarzanišnīh abar zanišn aspaštar dewīst srōšōčarnām
636.0
dādār ī gēhān astōmandān ahlaw kē mard awōyrišt warzēd kadār ōy ast tōzišn
637.0
u =š guft ohrmazd kū dah pad abarzanišnīh abar zanišn aspaštar dah srōšōčarnām
638.0
didīgar pānzdah pad abarzanišnīh abar zanišn aspaštar pānzdah srōšōčarnām
639.0
sidīgar sīh abarzanišnīh abar zanišn aspaštar sīh srōšōčarnām
640.0
tasom panǰāh pad abarzanišnīh abar zanišn aspaštar panǰāh srōšōčarnām
641.0
panǰom haftād pad abarzanišnīh abar zanišn aspaštar haftād srōšōčarnām
642.0
šašom nawad pad abarzanišnīh abar zanišn aspaštar nawad srōšōčarnām
643.0
haftom az awēšān kunišn ka warzēd ka anulwarzīd ān ī pēš kadār ōy tōzišn
644.0
u =š guft ohrmazd kū pad ān ī pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
645.0
dādār ī gēhān astōmandān ahlaw agar nē ul warzēd kū bē nē wizārēd kē mard awōyrišt warzēd kū bē nē wizārēd kadār ōy tōzišn
646.0
u =š guft ohrmazd kū pad ān ī ōy tanāpuhragīh dewīst abarzanišnīh abar zanišn aspaštar dewīst srōšōčarnām
647.0
dādār ī gēhān ī astōmandān ahlaw kē ō mard arduš sneh zanēd rēš ī panǰwadag kadār ōy ast tōzišn
648.0
u =š guft ohrmazd kū pānzdah pad abarzanišnīh abar zanišn aspaštar pānzdah srōšōčarnām
649.0
didīgar sīh pad abarzanišnīh abar zanišn aspaštar sīh srōšōčarnām
650.0
sidīgar panǰāh abarzanišnīh abar zanišn aspaštar panǰāh srōšōčarnām
651.0
tasom haftād pad abarzanišnīh abar zanišn aspaštar haftād srōšōčarnām
652.0
panǰom nawad pad abarzanišnīh abar zanišn aspaštar nawad srōšōčarnām
653.0
šašom az awēšān kunišn ka warzēd ka anulwarzīd ān ī pēš kadār ōy tōzišn
654.0
u =š guft ohrmazd kū pad ān ī pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
655.0
dādār ī gēhān ī astōmandān ahlaw nē ul warzēd kū bē nē wizārēd kē ō mard ān arduš sneh zanēd kadār ōy ast tōzišn
656.0
u =š guft ohrmazd kū pad ān ī pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
657.0
dādār ī gēhān ī astōmandān ahlaw kē ō mard guxrūnōmand xwar zanēd rēš ī čahrišwadag kadār ōy ast tōzišn
658.0
u =š guft ohrmazd kū sīh pad abarzanišnīh abar zanišn aspaštar sīh srōšōčarnām
659.0
didīgar panǰāh abarzanišnīh abar zanišn aspaštar panǰāh srōšōčarnām
660.0
sidīgar haftād pad abarzanišnīh abar zanišn aspaštar haftād srōšōčarnām
661.0
tasom nawad pad abarzanišnīh abar zanišn aspaštar nawad srōšōčarnām
662.0
panǰom az awēšān kunišn ka warzēd ka anulwarzīd ān ī pēš kadār ōy tōzišn
663.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
664.0
dādār ī gēhān ī astōmandān ahlaw nē ul warzēd kū bē nē wizārēd kē ō mard ān guxrūnōmand xwar zanēd kadār ōy ast tōzišn
665.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
666.0
dādār ī gēhān ī astōmandān ahlaw kē ō mard ān ī tazāgxōn xwar zanēd rēš ī srišwadag kadār ōy ast tōzišn
667.0
u =š guft ohrmazd kū panǰāh abarzanišnīh abar zanišn aspaštar panǰāh srōšōčarnām
668.0
didīgar haftād pad abarzanišnīh abar zanišn aspaštar haftād srōšōčarnām
669.0
sidīgar nawad pad abarzanišnīh abar zanišn aspaštar nawad srōšōčarnām
670.0
tasom az awēšān kunišn ka warzēd ka anulwarzīd ān ī pēš kadār ōy tōzišn
671.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
672.0
dādār ī gēhān ī astōmandān ahlaw nē ul warzēd kū bē nē wizārēd kē ō mard ān ī tazāgxōn xwar zanēd kadār ōy ast tōzišn
673.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
674.0
dādār ī gēhān ī astōmandān ahlaw kē ō mard ān ī astškenn xwar zanēd rēš ī nēmdašt kadār ōy ast tōzišn
675.0
u =š guft ohrmazd kū haftād pad abarzanišnīh abar zanišn aspaštar haftād srōšōčarnām
676.0
didīgar nawad pad abarzanišnīh abar zanišn aspaštar nawad srōšōčarnām
677.0
sidīgar az awēšān kunišn ka warzēd ka anulwarzīd ān ī pēš kadār ōy tōzišn
678.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
679.0
dādār ī gēhān ī astōmandān ahlaw nē ul warzēd kū bē nē wizārēd kē ō mard ān ī astškenn xwar zanēd kadār ōy ast tōzišn
680.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
681.0
dādār ī gēhān ī astōmandān ahlaw kē ō mard ān ī frāzazbōy sneh zanēd rēš ī dašt kadār ōy ast tōzišn
682.0
u =š guft ohrmazd kū nawad pad abarzanišnīh abar zanišn aspaštar nawad srōšōčarnām
683.0
didīgar az awēšān kunišn ka warzēd ka anulwarzīd ān ī pēš kadār ōy tōzišn
684.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
685.0
dādār ī gēhān ī astōmandān ahlaw nē ul warzēd kū bē nē wizārēd kē ō mard ān ī frāzazbōy sneh zanēd kadār ōy ast tōzišn
686.0
u =š guft ohrmazd kū pad ān ī ōy tanāpuhrīh dewīst abarzanišnīh abar zanišn aspaštar dewīst srōšōčarnām
687.0
ka wināh awēšān pas bawēnd ka =šān abarwārag tanāpuhr ō bun bawēd pas ēd mādagwar ēd abarwārag hamāg tanāpuhr hēnd
688.0
az abestāg paydāg
689.0
ān bawēd ka sneh ō ōy gīrēd kē mihr abāg dārēd
690.0
u =š ēd andar nē abāyēd kū pad ēd kār kunēd kūtā mihr bē drōzād
691.0
abarwārag āmār
692.0
abarwārag ī =š wēš nēst
693.0
čiš nē pādixšāy kirdan kū az abestāg paydāg
694.0
abāg =iz ān ī ast awōyrišt nē bawēd
695.0
pad čiš ī xwēš ōh bawēd pad adād ō tanāpuhr šawēd
696.0
dō ast andar ēw pāyag kū bāzā har ristag =ēw pad =iz tanāpuhr
697.0
pad ān ī ahlāyīh rāh ēd kunēd čiyōn ō pēš gōwam ast kē ēdōn gōwēd ay pad =iš ān ī ahlāyīh rāh kird bawēd ka ēdōn kunēd čiyōn ō pēš gōwam pad ān ī ahlāyīh abar mānsr ēd kū srāyēd ōšmurišn kū hērbedestān kunēd pad ān ī ahlāyīh frāzwābarīgānīh xxx pad dastwar ī dēn
698.0
ka =z ēdar mard hamdēn rasānd brād ayāb hamāx xwāstagkāmagīh rāy ayāb nārīgkāmagīh rāy xradkāmagīh rāy hērbedestān kirdan rāy
699.0
agar xwāstagkāmagīh rāy rasānd ham ō ēdar xwāstag ōham ēw barēnd kū ēw dahēnd
700.0
agar nārīgkāmagīh rāy rasānd abar ō nārīg abar ēw wāyēnēnd kū =š zan ēw dahēnd
701.0
agar xradkāmagīh rāy rasānd abar ō mānsrspand ēw ōšmurēnd kū =š wāzag ēw čāšēnd pēš =iz nēmag rōz ud pas =iz ud pēš =iz nēmag šab ud pas =iz
702.0
ka =š waxšīd hād xrad kū =š warm kird hād u =š wigrād hād az ahlāyīh kū =š ān az =iš paydāg bē dānist hād pad tarsagāhīh ī yazadān niyāyišnōmandīh tā yazadān ān waxšīd hād xrad ī =š warm kird hād pad āyōzišn ēstāyēnēd kū pad kār ud sūd ī yazadān ēw dārēd
703.0
pad mayān rōzān ud šabān ēw xufsēd abarpad rōz abarpad šab hamē az ān ka awēšān sraw dranǰēnānd ī =š pēš hērbedān dranǰēnānd čiyōn ādurbād ī mānsrspandān
704.0
tā hamtābišnīh ābān kū purr bē tābād yyy kirdārīh ī mardān kū kār šāyēd kirdan zardušt ma gōšt ma wastarg ī =t hād adahišnīh gōwē
705.0
hagriz ma gōw ud pas =iz andar ān zamān kem gōw
706.0
bē ēd =iz ēdōn kū ō ōy nārīgōmand tō az ēd ō pēš gōwam pēš frāz gōwam spitāmān zardušt ō ōy pēš abāyēd dādan čiyōn kē pad maγīh frāz raft ēstēd kū zan nēst ān ī wisōmand kū xānag ast az ān čiyōn =š ast kē ōy awis kē nēst ān ī pusōmand az ān čiyōn abus ān xwāstagōmand az ān čiyōn ān axwāstag
707.0
čē ān az awēšān mardān wahman gyāg griftārtar ast kū =š pad tan mehmāntar kē pad gōšt uruhbar ōham hambārīd ēstēd ay sagr čiyōn ōy kē nē
708.0
ēdōn ōy abar margīh bawēd kū bē =z mīrēd
709.0
ōy asparonmasā ōy anumēmasā ōy stōrmasā ōy wīrmasā ōy pēš abāyēd dādan
710.0
ast kē ēdōn gōwēd ay ō ōy pēš abāyēd dādan
711.0
čē ān ī mard ō padīrag rawēd ōy kē astwihād pahikārēd kū pahikār abāg astwihād ēd =iz kē tigr huhaxt pahikārēd u =š pahikār abāg astwihād ēd =iz kē ān ō zamestān pahikārēd pad kemwastargīh ī =š nihuft čē kē zamestān pahikārēd u =š pahikār abāg astwihād ēd =iz kē ō mardōm druwand sāstār kamālzadār pahikārēd čiyōn zurwāndād u =š pahikār abāg astwihād ēd =iz kē ō ahlomōγ anahlaw axwarišn sāstār pahikārēd čiyōn mazdak ī bāmdādān kē =š xwēš sagr xward u =š kasān pad suy marg dād u =š pahikār abāg astwihād
712.0
fradom az awēšān kunišn ka warzēd ud nē didīgar kū ōh paydāgēnēnd kū =š rawāg kirdan andar nē abāyēd ka =š se srōšōčarnām kirbag pad wināh ayāb wināh pad kirbag bē nihēd u =š čāšišn ud rāyēnišn andar nē abāyēd ānōh ōy ēdōn pad kunišn čiyōn kē āgāh kū pad bōy andar ox ī astōmand ā =š pad āhanēn kārd tan frōd kirrēnēnd ōšōmand tan meh az ān
713.0
ānōh ōy ēdōn pad kunišn čiyōn kē āgāh kū pad bōy andar ox ī astōmand ā =š pad ān āhanēn fšēy tan abar frōd fšēnēnd ōy ōšōmand tan meh az ān
714.0
ānōh ōy ēdōn pad ān kunišn kē āgāh kū pad bōy andar ox ī astōmand ā =š az sadwīr wēm ahunsandīhā abganēnd ōy ōšōmand tan meh az ān
715.0
ānōh ōy ēdōn pad ān kunišn čiyōn kē āgāh kū pad bōy andar ox ī astōmand ā =š ahunsandīhā pad ān parrōntom marz bē ēstēd kū rōbāhīzag abāz nihēd
716.0
u =š nasā bē ō grīw gīrēd
717.0
ay ān pad ruwān u =š hamāg ōh kunēd
718.0
ēn pad tan u =š ēk šāyēd kirdan
719.0
ānōh ōy ēdōn pad ān kunišn čiyōn kē āgāh kū pad bōy andar ox ī astōmand āb ī gōgirdōmand zarrōmand čihragōmand pad ān ī drōgōwišn āgāhīhā dawēd
720.0
rašn =iz abar gōwēd kū rāst gōwam mihr =iz abar drōzēd kū drō gōwēd
721.0
dādār ī gēhān astōmandān ahlaw kē āb gōgirdōmand zarrōmand čihragōmand pad ān ī drōgōwišn āgāhīhā dawēd rašn =iz abar gōwēd kū rāst gōwam mihr abar drōzēd kū drō gōwēd kadār ōy ast tōzišn
722.0
u =š guft ohrmazd kū haftsad pad zanišnīh zanišn aspaštar haftsad srōšōčarnām
723.0
war kē warzīdārīh pādifrāh gōwēd ēwāz =ēw ēn
724.0
ahlāyīh ābādīh pahlom ast
725.0
panǰom pargard bun
726.0
mard ēdōn bē widerēd abar andar ān zofr rōdestāg ay zofrīh az kōf
727.0
ast kē ēdōn gōwēd ay pad kār ud dādestān gōwēd
728.0
ān murw ul wazēd az ān buland gar abar ō ān zofr rōdestāg
729.0
abar ān kirb frāz xwarēd ōy rist mardōm
730.0
ān murw ul wazēd az ān ī zofr rōdestāg abar ō ān buland gar
731.0
abar ān wan wazēd saxt čiyōn wan ī wādām narm čiyōn wēd ī naft
732.0
abar ān wāmīd
733.0
abarg hixr guft mēdōmāh nasā
734.0
abar ān rīd hixr ud abar ān paššinǰīd hixr
735.0
mard ēdōn frāz rawēd az ān zofr rōdestāg abar ān buland gar
736.0
abar ān wan rawad kū ōy murw auui dim vaṇta kirdār ātaxš rāy esm xwāhēd
737.0
abar ān zanēd pad bun abar ān brīnēd tāgtāg abar ān tāšēd dāiiaēta dāitiiō pairišta pad ān abrōzēd ātaxš ī ohrmazd pus
738.0
kadār ōy ast tōzišn
739.0
u =š guft ohrmazd kū nē ān sagburd nē ān wayburd nē ān gurgburd nē ān wādburd nē ān maxšburd nasuš mard nē āstārēnēd kū wināhgār nē kunēd tā rēman ōh kunēd
740.0
agar =iz awēšān nasā kē sagburd wayburd gurgburd wādburd maxšburd nasuš mard āstārēnīd būd hē kū wināhgār ōh būd hē pad tēzrawišnīh kū ēd zūd būd hē ān ī man harwisp ox ī astōmand zad xwāstār ī ahlāyīh kū =šān rāh ī kār ud kirbag zad ēstād hē xrōsišn dād ō ruwān kū =šān ruwān az garōdmān xrōstag ud xwistag būd hē tanāpuhragān kū margarzān bawānd pad frahistīh az wasīh ī awēšān nasā kē abar ēn zamīg widerēnd
741.0
abarg guft ay ēn pursišn pad hixr ud wizīr pad nasā bē kird čē ka =š xward way hixr
742.0
mēdōmāh guft ay ēn pursišn pad har dō ud wizīr pad nasā bē kird čē tā gugārēd way pad nasā
743.0
pad har dō čāštag hamdādestān būd hēnd kū ka =šān pad ān garā kird ā =š pad ān ī xwārtar kird bawēd
744.0
mard =ēw ka ō esm āwurdan šawēd ā =š gyāg =ēw nē āmār čē har kū ēstēd bē pādixšā brīdan
745.0
ān ī ātaxš ī wahrām ka abēr pāk andak ēw bē tāšišn
746.0
ān ī ātaxš kadagīg dāitiiō pairišta bē kunišn
747.0
dār akār ēn
748.0
ān ī kē nasā pad =iš bē burd ud ān kē pad =iš bē wišōbēnd ud ān kē pad =iš dār kird ud ān kē čarbišn andar gumēxt ēstēd ud ān kē zan ī daštān dast abar nihēd ud ān kē ō kār wēxt ēstēd u =š nasā abar rasēd
749.0
ēk =iz nē sōzišn bē pad margīh ud rištagīh
750.0
ka sōzēd ēd tanāpuhragān bē ān kē čarbišn andar gumēxt ēstēd
751.0
ān ka sōzēd margarzān
752.0
farrīg guft ay ānand gyāg bē brīnišn abārīg pad margīh ud rištagīh pādixšā sōxtan
753.0
ēk =iz nē kārišn
754.0
ka kišt rustag pad esm ud barsom šāyēd bē ān kē čarbišn andar gumēxt ēstēd
755.0
abarg guft ay ka andar warg gumēxt ēstēd hamāg akār
756.0
gōgušasp guft ay ōh gugard dārišn
757.0
tarr ka rust ēstēd u =š nasā abar rasēd ā čāniz nēst
758.0
ud ka =š hixr abar rasēd ka paydāg ā =š az =iš bē kunišn
759.0
ka nē ā čāniz nēst
760.0
ēd ka zad ēstēd u =š nasā abar rasēd hamāg vitasti.drājō frārāϑi.drājō
761.0
ka =š hixr abar rasēd ka paydāg hamāg ānand gyāg
762.0
ka nē hamāg pērāmōn tōf =ēw bē tāšišn
763.0
hušk az tarr rust ēstēd ka ō tarr rasēd hušk pāk
764.0
ka ō hušk rasēd tarr pāk
765.0
ka az bun bē abganēd hamāg vitasti.drājō frārāϑi.drājō
766.0
ān bawēd ka ō hušk rasēd
767.0
esm ēw hambārišn
768.0
ka ō tāg =ēw nasā rasēd ka paydāg ānand tāg
769.0
ka nē hamāg vitasti.drājō frārāϑi.drājō
770.0
gōgušasp guft ay ēd tāg warōmand tarr pad kust =ēw abāz nihišn abārīg pāk
771.0
u =šān =iz zamīg ud gōspand ǰuttar nēst guft
772.0
rāh ud dar ī deh ud ǰōy ī hamēšag āb ka =š nasā abar mad wehān pōryōtkēšān pad hamkār bē hilišn
773.0
az ān bē dar ī bēdom ēdōn
774.0
dar ī xwēš šah gāh pad ān daštānestān šāyēd
775.0
ān ī daštānestān pad ān hazzān šāyēd
776.0
garā pad ān xwārtar nē šāyēd
777.0
hōšag =iz ǰuttar nēst
778.0
draxt =ēw bun ka =š pazzāmišn hamāg az hixr abarg guft ay bar =iš nē xwarišn čē pad tan garā
779.0
pas guft bawēd kū pad esm ud barsom šāyēd
780.0
dādār ka mard āb abar āšinǰēd abar ō ǰōrdākirdārīh ān pad awēšān ǰōy rawēd ud ān didīgar ud ān sidīgar ast kē ēdōn gōwēd ay ēw rawēd u =š pas tasom nasā abar kešēnd sag ayāb rōbāh ayāb gurg kadār ōy ast tōzišn
781.0
u =š guft ohrmazd kū nē ān sagburd nē ān wayburd nē ān gurgburd nē wādburd nē ān maxšburd nasuš mard nē āstārēnēd kū wināhgār nē kunēd tā rēman ōh kunēd
782.0
agar =iz awēšān nasā kē sagburd wayburd gurgburd wādburd maxšburd nasuš mard āstārēnīd būd hē kū wināhgār ōh bawē pad tēzrawišnīh kū ēd zūd būd hē ān ī man harwisp ox ī astōmand zad xwāstār ī ahlāyīh kū =šān rāh ī kār ud kirbag zad ēstād hē xrōsišn dād ō ruwān kū =šān ruwān az garōdmān xrōstag ud xwistag būd hē tanāpuhragān kū margarzān bawānd pad frahistīh az wasīh ī awēšān nasā kē abar ēn zamīg widerēnd
783.0
ēn az abestāg paydāg
784.0
ǰōy ud huškwar az nasā nigerišn yezi
785.0
vasən mazdaiiasna ząm raōδaiiən
786.0
ān zamīg ud ǰāy ud kišwzār az hixr nigerišn
787.0
ud ēk andar did =ēw
788.0
mard =ēw ka ō āb dāštan šawēd ā =š tā se bār har bār =ēw pad ǰōy frōd šawēd u =š har bār =ēw ǰōy xūb bē nigerišn
789.0
u =š bār ī tasom āb andar gīrišn
790.0
pēš ī āb bē šawēd ǰōy pad sālārīh dāštan kār nēst
791.0
pad yyy pādixšā ka nē nigerēd
792.0
ka pad ǰōy nigerīdan awināh ō āb frāz rasēd ud nasā ān gyāg nibayēd ka =š bē tuwān waštan ā =š bē wardišn
793.0
ka bē nē tuwān waštan ā =š āb az bun wardišn
794.0
margīh ud rištagīh ā =š nasā bē barišn
795.0
ēdōn bawēd čiyōn ka az āb bē burd hē
796.0
u =š tanāpuhr =ēw kirbag
797.0
ka pad ǰōy nigerīdan wināhgar ō āb frāz rasēd ud nasā ān gyāg nibayēd ka =š bē tuwān waštan ā =š bē nē barišn
798.0
ka bē nē tuwān waštan ā =š nasā bē barišn
799.0
ēn kū rēman ud margarzān bawēd ayāb nē ā =m nē rōšnag
800.0
rōšn guft ay rēman ōh bawēd margarzān nē bawēd
801.0
ud nasā ō āb ud ātaxš ud āb ud ātaxš ō nasā barēd
802.0
abarg guft ay ātaxš ān āmār kunēd kū pādixšā abganēd
803.0
āb pad hixr bē nayēd abarg nē kird ēstēd
804.0
nēryōsang guft ay bōdōzedīh ī wāstar wināh pad āb nigerišn
805.0
pad hāwand wināh pādixšā
806.0
dādār āb mard zanēd
807.0
u =š guft ohrmazd kū āb mard nē zanēd
808.0
astwihād ōy bandēd wāy wattar ōy bast nayēd āb =iš ul wazēnēd kū =š ul ō sar āwarēd
809.0
u =š āb nigūn wazēnēd kū =š frōd ō bun barēd
810.0
u =š āb padīrag gumēxtēd kū pad sūrāg abāz šawēd
811.0
wāy ōy pas frāz xwarēnd
812.0
ka az ānōh pas frāz rasēd kū bē āyēd baxt ōy pas bē rasēnēd kū pad rāh ī brīn bawēd ka bē āyēd
813.0
dādār ātaxš mard zanēd
814.0
u =š guft ohrmazd kū ātaxš mard nē zanēd
815.0
astwihād ōy bandēd wāy ī wattar ōy bast nayēd ān ham ast kē ēdōn ay way ī weh hamāg bē padīrēd
816.0
ātaxš ōy ham dazēd tan ud gyān kālbod
817.0
ka az ānōh frāz rasēd kū bē āyēd baxt ōy pas bē rasēnēd kū pad rāh ī brīn bawēd ka bē āyēd
818.0
gētī pad baxt ud mēnōy pad kunišn
819.0
ast kē ēdōn gōwēd ay zan ud frazend ud xwāstag ud xwadāyīh ud zīndagīh pad baxt ud abārīg pad kunišn
820.0
mard ān nēkīh ī =š nē brēhēnīd ēstēd ā =š hagriz abar rasēd az ān gyāg paydāg
821.0
gairi masaŋhō aētahe
822.0
ān ī =š abar brēhēnīd ēstēd ā =š pad tuxšāgīh pēš bē rasēd
823.0
aniiō ərəduuō zəṇgō xᵛarənō
824.0
u =š pad wināhgārīh bawēd ka =š appār bawēd āat̰ xᵛarənō frapiriieiti
825.0
u =š anāgīh ī abar brēhēnīd ēstēd pad frārōn tuxšāgīh spōxtan tuwān pouru
826.0
xᵛarənaŋhō aṣ̌auua zaraϑuštra
827.0
u =š wināhgār nōg nōg aw =iš ōh brēhēnēd
828.0
aēšanąmca narąm
829.0
mard =ēw ka =š pad dast ī mard ēw abāyēd murdan
830.0
bē ka pad dast ī ōy mard mīrēd tā nē šāyēd bē ōy tuwān kirdan kū pad ōzadan ī ōy awināh =ēw pahikārradīh xūb abāg bē kunēd
831.0
dādār ka frāz hamīn sazēd kū bē šawēd ēdōn zamestān kū andar āyēd čiyōn ōy wināh rāy kūtā nē bawād warzānd awēšān kē mazdēsn hēnd
832.0
u =š guft ohrmazd kū mān mān wis wis xānag xānag dastgird dastgird se kadag ul ēw dahēnd ōy rist
833.0
dādār čand hēnd awēšān kadag ī ōy rist
834.0
u =š guft ohrmazd kū čand ān nē ka stēndag kū zīndag āhan waγdan abar zanēd nē ka frāz pay pay parrēxt ēstēd nē ka widārīd dast kū =š dast abāz dāšt ēstēd
835.0
awēšān =iz hēnd dādīhā kadag ī ōy rist
836.0
ēdōn ōy ul az bōy murd ā =š tan bē ēw dahēnd dōšabag ayāb sešabag ayāb māhdrahnā ayāb =iš kār nēst hamē az ān tā ka frāz way padānd kū bē āyānd ud frāz urwar waxšānd kū bē rōyānd bē tazād kū petyārag zamestān bē šawād ul wād zamīg āwāsēnād
837.0
ay kār nēst
838.0
ka frāz way padīd hād frāz urwar waxšīd hād nihānen =iz bē tazīd hād kū petyārag zamestān bē šud hād ul wād zamīg hōšēnīd hād ēdōn ōy wināh rāy kūtā nē bawād awēšān mazdēsn ān kirb xwaršēdnigerišn ēw kunēnd
839.0
agar nē awēšān mazdēsn kirb xwaršēdnigerišn kunēnd sāldrahnā ānand ašōgenīh čiyōn pad pargard sidīgar paydāg ā =š ān tōzišn ēw nigēzēnd kū =š bē ēw kunēnd
840.0
hamē az ān wināh šāyēd būdan tā ka ān nasā abarwarzišnīh kū bē barēnd ān abar hazzān warzišnīh kūtā bē kanēnd ān abar hixr abarwarzišnīh kū bē barēnd ud wayān =iz frāzxwarišnīh
841.0
kayādurbōzēd ēn hād ēn az abestāg paydāg
842.0
kadag ān pad pargard haštom paydāg
843.0
andar kadag
844.0
sōšyans guft ay ēn kadag pahrēz
845.0
ay ēn pahrēz zīndagān rāy abāyēd tā andar ēk abēr was pādixšā nihādan
846.0
tā andar kār kunēnd pad har kār =ēw šāyēd
847.0
ka =š andar kār kird andarōn ud bērōn hixr ī garā
848.0
pad āb pādixšā wirāstan
849.0
ka kand xwēd apāk
850.0
ka andar barēnd sag bē nimāyišn
851.0
pad dō mard andar barišn
852.0
ka āwarēd sag nimūdan kār nēst
853.0
ast kē ēdōn gōwēd ay pas =iz =iš ōh nimāyišn
854.0
kadag andar warōmandīh sar bē kunišn ud astōdān =iz nē kunišn
855.0
ka bē abāyēd āwurdan bē nē āwarēd ā =š pad gyāg nasānigānīh andar ēstēd
856.0
ka pid nasā nigān kird pad bē nē āwurdan pus wināhgār ōh bawēd
857.0
tanāpuhr ōh bawēd margarzān nē bawēd
858.0
ka pid nasānigānīh andar ēstēd pus ēdōn bawēd čiyōn pid
859.0
ud ān kē pas rasēd ēdōn bawēd čiyōn pid
860.0
hixr ī mānd hamāg pad āb ud ātaxš barēnd tanāpuhragān
861.0
ast kē kadag padišxwarr gōspand pad āb dādagān gōwēd
862.0
dādār āb gīrē tō kē ohrmazd hē pad wāzag abāz ēd ō man gōwē kū kirbag kunē xwad ēn čiš kunē ī ō pēš gōwam az zrēh frāxkard abāg wād ud abr pad ayārōmandīh ī awēšān
863.0
abar ō nasā wazēnē tō kē ohrmazd hē
864.0
abar ō hazzān wazēnē tō kē ohrmazd hē
865.0
abar ō hixr wazēnē tō kē ohrmazd hē
866.0
abar ō ast frāz hilē tō kē ohrmazd hē anāškārān frāz frawēnē tō kē ohrmazd hē nasā ī nigān
867.0
ast kē anarzān gōwēd
868.0
awēšān pad āgenēn frāz frawēnē abar ō zrēh pūtīk
869.0
u =š guft ohrmazd kū ēdōn =iz zardušt čiyōn tō abēzag gōwē āb gīram man kē ohrmazd ham az zrēh frāxkard abāg wād ud abr pad ayārōmandīh ī awēšān
870.0
abar ō nasā wazēnam man kē ohrmazd ham
871.0
abar ō hazzān wazēnam man kē ohrmazd ham
872.0
abar ō hixr wazēnam man kē ohrmazd ham
873.0
abar ō ast frāz hilam man kē ohrmazd ham
874.0
anāškārān frāz frawēnam man kē ohrmazd ham nasā ī nigān
875.0
ast kē anarzānīgān gōwēd
876.0
awēšān pad āgenēn frāz frawēnam abar ō zrēh pūtīk
877.0
awēšān ēstēnd andar ābxānīg ī dūr āšixt purr andarg ālag ī zrēh
878.0
pad yōǰdāsrīh tazēnd āb pad pākīh az zrēh ī pūtīk abar ō zrēh ī frāxkard
879.0
ō rapihwintar rōn ī puhl abāz ēstēd
880.0
u =š sadwēs wanand pērāmōn abāz ēstēd
881.0
pūtīk az kust ī sadwēs ēstēd
882.0
ēn kū az kadār kust ēstēd ā =m nē rōšnag
883.0
āb pad pākīh ō sadwēs rasēd
884.0
ast kē ēdōn gōwēd ay kāf ī kōf pālayēd
885.0
abar ō wan ī xwāb
886.0
abarg wan ī se bun guft mēdōmāh wēšag =ēw
887.0
ānōh ān ī man urwar rōyēnd harwisp pad marag harwispsardag sadēwēnag hazārēwēnag bēwarēwēnag sardagēwēnag ud andarsardag
888.0
caiti həṇti uruuaranąm sarəδa ān sardag mādagwar
889.0
awēšān pad āgenēn bē wārēnam man kē ohrmazd ham ay kē tištar āb stānēd ōh stānēd pad =iz xān ī ābān ōh āyēd
890.0
xwarišn =iz mard ī ahlaw rāy ud wāstar gōspand ī hudāg rāy
891.0
ǰōrdā ān ī man mardōm xwarēd ud wāstar gōspand ī hudāg
892.0
ēn weh ēn nēktar čiyōn tō abēzag gōwē
893.0
ōy pad gōwišn rāmēnīd ay kē =š rāmēnīd ohrmazd ahlaw ahlaw zardušt ay zardušt ka =š ēd bē dānist kū mard pad xwēškārīh kirdan wināhgār nē bawēd pad rāmišn būd
894.0
yōǰdāsrīh ī mardōm pākīh pad ruwān pas az zāyišn pahlom
895.0
ka bē zād hēnd ā =šān čiš ay yōǰdāsrīh pad ruwān weh
896.0
yōǰdāsrīh gōwam zardušt pad dēn ī mazdēsnān paydāg
897.0
ān ī xwēš yōǰdāsrēnēd kū az wināh pāk dārēd pad humat hūxt huwaršt ay aŋhuuąm daēnąm har dō ēk
898.0
dādār čand ast meh ud weh ud nēktom ēn dād ī ǰuddēw ī zardušt abar az ān any sraw abārīg
899.0
ān =iz meh ud weh ud nēk ēn dād ī zardušt
900.0
u =š guft ohrmazd kū homānāg ōy spitāmān zardušt ēn dād ī ǰuddēw ī zardušt abar az ān any sraw ān =iz meh ud weh ud nēk čiyōn zrēh frāxkard abar az ān any āb
901.0
homānāg ōy spitāmān zardušt ēn dād ī ǰuddēw ī zardušt abar az ān any sraw ān =iz meh ud weh ud nēk čiyōn ān meh āb ka ān ī keh āb frāz dāyēd barēd ka andar cāϑā ōbadēd
902.0
homānāg ōy spitāmān zardušt ēn dād ī ǰuddēw ī zardušt abar az ān any sraw ān =iz meh ud weh ud nēk čiyōn meh wan ka ō ān keh wan abar nihumbēd sarwān šāh giyāhīzag =ēw
903.0
homānāg ōy spitāmān zardušt ēn dād ī ǰuddēw ī zardušt abar az ān any sraw ān =iz meh ud weh ud nēk čiyōn ō ēn zamīg ān ī asmān abar =iz bē nihumbēd ay hamāg pad hamāg
904.0
ast kē ēn pad nasuš ān ī pad nigādom pad wizīr ī dādwarīh ud ān ī pad huspārom pad nērang ī yazišn gōwēd
905.0
ān guft rad kū dastwar dārēd guft srōšāwarz kū wināh garzēd az ulgīrišnīh bē sūr ān ī =š nē ul grift ān ī =š pad menišn bē nē kird ā pad menišn kird az dahišnīh bē sūr ān ī =š nē bē dād ān ī =š ō guft nē āwarēd ā bē ō guft āwurd az bēabespārišnīh bē sūr ān ī =š nē abespurd ān ī =š dārišn bē nē kird ā dārišn kund
906.0
pādixšā ōy pas ān kē rad srišwadag ī ān ōy tōzišn bē hišt
907.0
ay ka dastwar dārēd ud wināh garzēd ud kirbag nē frēzwānīg kunēd ā =š rad wināh ī ruwānīg pad se ēk bē pādixšā hišt
908.0
ay paydāg bawēd kū andar radān wizārišn nē radān xwēš
909.0
ka radān xwēš hē hamāg bē pādixšā hē hišt
910.0
agar =iz ōy any ān wattar kunišn frāz warzīd kū =š anī =z wināh ēw kird patitīhāīh ōy tōzišn
911.0
tōxt bawēd
912.0
sōšyans guft ay ān bawēd ka ān did nē margarzān
913.0
kayādurbōzēd guft ay patitīhā ōy tōzišn u =š az =iz abārīg wināh ǰudǰud pad patit bawišn
914.0
agar ōy any ān ī wattar kunišn nē frāz warzīd patitīhāīh ōy mard tā ō hamēudhamērawišnīh
915.0
dādār awēšān mard kē pad hamgāh bē pōyēnd pad ham wistarg pad ham bāliš padīrag =iz ōy any ayāb dō hēnd panǰ ayāb panǰāh ayāb sad pad hammardīh pad hamkirbagīh az awēšān mardān ēk bē widerēd čand andarg awēšān mardān ā =šān ān druz ī nasuš pad xīndagīh waštagīh paššinǰišn rēmanīh ud āhōgēnišn akārīh frāz rasēd
916.0
u =š guft ohrmazd kū agar āsrō frāz ān dwārēd spitāmān zardušt ān druz ī nasuš
917.0
agar ō yāzdahnīn frāz mad ēstēd ō dahnīn abar gumēxtēd
918.0
agar ast kū artēštār frāz ān dwārēd spitāmān zardušt ān druz ī nasuš
919.0
agar ō dahnīn frāz mad ēstēd ō nōnīn abar gumēxtēd
920.0
agar ast kū wāstaryōš frāz ān dwārēd spitāmān zardušt ān druz ī nasuš
921.0
agar ō nōnīn frāz mad ēstēd ō haštnīn abar gumēxtēd
922.0
u =š guft ohrmazd kū agar sag pasušhorw frāz ān dwārēd spitāmān zardušt ān druz ī nasuš
923.0
agar ō haštnīn frāz mad ēstēd ō haftnīn abar gumēxtēd
924.0
agar ast kū sag wišhorw frāz ān dwārēd spitāmān zardušt ān druz ī nasuš
925.0
agar ō haftnīn frāz mad ēstēd ō šašnīn abar gumēxtēd
926.0
u =š guft ohrmazd kū agar sag wohunazg frāz ān dwārēd spitāmān zardušt ān druz ī nasuš
927.0
agar ō šašnīn frāz mad ēstēd ō panǰnīn abar gumēxtēd
928.0
agar ast kū sag tarunag frāz ān dwārēd spitāmān zardušt ān druz ī nasuš
929.0
agar ō panǰnīn frāz mad ēstēd ō čahārnīn abar gumēxtēd
930.0
u =š guft ohrmazd kū agar sag ī xūkar sukurun frāz ān dwārēd spitāmān zardušt ān druz ī nasuš
931.0
agar ō čahārnīn frāz mad ēstēd ō senīn abar gumēxtēd
932.0
agar ast kū sag ī ǰažuš frāz ān dwārēd spitāmān zardušt ān druz ī nasuš
933.0
agar ō senīn frāz mad ēstēd ō dōnīn abar gumēxtēd
934.0
agar sag ī aiβizuš frāz ān dwārēd spitāmān zardušt ān druz ī nasuš
935.0
agar ō dōnīn frāz mad ēstēd ō ēk abar gumēxtēd
936.0
agar ast kū sag ī vīzuš frāz ān dwārēd spitāmān zardušt ān druz ī nasuš
937.0
ay jažuš aiβizuš vīzuš nē rōšnag
938.0
agar ō wasnīn frāz mad ēstēd ō wasrīn gumēxtēd
939.0
ast kē ēdōn gōwēd ay ēn andar agar ō ēk frāz mad ēstēd ō ēk abar gumēxtēd
940.0
ay ēn andar zamān āmār ka =š gyān bē šawēd
941.0
sōšyans guft ay tā sag dīd hamāg ēdōn tā yāzdah
942.0
ōy dahom tan pad baršnūm ud wastarg pad xšwašmānghō yāzdahom pad gōmēz ud āb ud dwāzdahom ānand gyāg ud sīzdahom pāk
943.0
ēn yāzdahom ka hamāg zan ī ābustan ayāb hamāg ēw bār hēnd ā =z ǰud nēst
944.0
ēn az kust =ēw āmār az har =ēw čahār kust ast
945.0
ka =š čiš =ēw andar mayān kē nasuš abar nē dwārēd abāz nē burd
946.0
ān pad ēwarīh tā andar warōmandīh mardōm hamāg pad āsrōn sag hamāg pad pasušhorw dārišn
947.0
kabīg har čiš =ēw ēdōn bawēd čiyōn mardōm
948.0
mēdyōmāh guft ay bōdōzedīh pad bāzā ēstēd
949.0
dādār agar ast kū sag rasūg čand ān sag ī rasūg spennāgmēnōy dāmān ōham gumēxtēd pad hamrēh čand abar gumēxtēd pad padrēh
950.0
u =š guft ohrmazd kū nē ān sag ī rasūg spennāgmēnōy dāmān ōham gumēxtēd pad hamrēh u =šān