pad nām ud ayārīh ī dādār ohrmazd ud wispān yazdān hamāg yazadān ī mēnōyān ī yazadān ī gētīyān

paččēn nāmag ī hērbed manuščihr ī ǰuwānǰamān kē =š ō wehān ī sīrgān kird pad andar wizīrkird hērbed zādspram ī ǰuwānǰamān kird

nām X yazadān kē =tān dagrzīwišnīhā druyistrawišnmehmānīhā ahlāyīh ud waxšišn ud xradpānagīhā ruwānfrēstagān xunak(?)kārīhā brāzišnīg abrang andar farroxīh parwast abzōnīg ābādīh ud pad wisp dōaxwānīg abardar nēkīh spurr bahr meh burzišn dārānd

dānāgīhā ud druwistīhā dēnīgwizārīhā nāmag ī =tān pad payg frēstīd framūd mad

u =m abāg =iz zarīgēnāg āgāhīh ī pad any dar andar parwast ēstād pas =iz wuzurg mādagīh ud meh arzīh ī az ān ī ašmāh drōdīgīhā winnārdagīhā ud čihrīg nāzišn ī =m ōh dānist ī dardīg āgāhīh rāy az āgāhīh ī abar =tān awiš drōdōmandīh ī ud xūb winnārdagīh nāmčištīg rāmišn , padīrift

u =m pad =š ō yazadān spās hangārd

ud abar razmīg ī ēn gumēzišnīg axwān tis =iz xīrān ī gētī pad xrad ayārīh čand šāyēd frārōn rāmišn dādīh sūd asazišnīg kirbag xwāst ud padīrift ud abzāyēnīd ōwōn sazēd čiyōn ān =iz ī abar čihr ī dānāgān guft ēstēd kū az =iz rāyēnišn ī gumēzag ud xīrān ī āhōgēnīdag pad nērōg ī xrad sūd kirbag ōwōn čīnēnd arziz harrōbēnēnd ud handōzēnd čiyōn sag xīr az āb wispgen zarr az xāk

u =m rāmišn čand az ham drōd āgāhīh rāy abzūd

ud nōg meh ārzōg ī abar paywastīhā madan ī az =iz nūn frāz āgāhīh ī abar druyistwinnirdagīh drōdagxīrīh ud kirbag frayistīhā abzōnīgīhā ruwānkāmagīh [ī] ašmāh kē wuzurg dēnmenīdārīh hangārd ud kirbagīh payrāst

huwīrīh yazdān wāspuhragānīh ī =tān ast rāy az abzōn ī =tān wispfarroxī ud tabīgīhā urwāzīhā kāmagtom

ud hamēyīgīhā ka =tān wēnišn ud ǰārīhā ka handāzīhēd xwēš dēn sūd ruwān urwāhm ud drōdōmandīh ud xūbestišnīh čē =m andar ašmāh kām ud kunišn ud man āgāhēnīd framāyēd pad yazadān kām

enyā nibišt ī =tān mayān nāmag framūd frēstīd ēg =iš nigerīd

u =m dušoxtār zarīg wēnišn dušoxkār pad sam škeftīhā ō dil menišn abganihēd

u =m garānīhā aboxšīhīd abar xwēš hammis ī pad rašnōmand tarāzūg adrōzišn passāxt andar zūrspāhīh ī xwad ēč rāst ud nērōgīh ī hambadīg dād ēstēd ō xwāstēn kōxšāgīh ī padīrag wasōz druz kē ōwōn wiyābāngar ud dušdānāg ǰādūgwarz purrfrēb kū =š ān =iz kē xwihlīg ahlāyīhdōšīdārtom ud ōstīgān rāstīhkāmagtom dēnīg frārōnristagtom ud uskārišnāgāhtom ud ruwān škeftpahrēzišntom pad astxrad gōšōsrūdxrad ī wizīdagtom pad hamāgīhā rāstīhāhangīgtom ōwōn frēftan gumānēnīdan ast pad nēst nēst pad ast homānāg awi =š nimūdan tuwān

čiyōn ān =iz hangōšīdag andar dēn gōwēd kū ahlāyīh menēd pad ēd dārēd kū =m kirbag ēw kird ud drōzišn windēd kū =š wināh ō būn bawēd kē ō nasāōmand āb bēzōhr frāz barēd ayāb kē abar pad nihuftag ud tārīk bēzōhr frāz barēd andar šab

ud man pad ēn nē gumān kū mow kām abāg ahlāyīh nē hamwimand

čē frārāst šnāxt ud dānist ēstēd kū xwēš rāy ō tan druwistrawišnīh ud ō ǰān dagrzīwišnīh nē pahrēzag kū =š payrāstagīh ud paywastagīh ī =š hammis tan abzārān ud ǰān abzārān ō ān ī padiš šnāyišn ī yazadān warzišn ī dēn ī rawāgīh ud wābarīgānīh ī čāštag ī rāst dastwarān abzāyišn bawēd

ud az =iz hamēšagkārīh ud nibēgārāyišnīh ī ud hanǰamanīggōwišnīh ī =š abar abrang ī dēn ērang ī ǰudpahikārišn paydāg

čiyōn =iš abar andarag ī awēšān kē ān ī ō ān mānāg guft ān =š nūn xwad nibišt was bōzišn ārāst ēstēd

ēn =iz āgāh ham kū bē ānōh kū pad ēč ēwēnag ī yōǰdāsrgarīh nē hāzīhēd ēg =iš wuzurg kār čiyōn yōǰdāsrgarīh ī ast šustārīh ī dēnīgnērangīhā ō āsrōnīh pēšag § abzār kē dastwarān hilēnd

šustārīh ī nē dēnīgnērangīhā ; andar pāyramān pad kardag nihād abārōn garān ī bazagīhā čē mādagwar abzār ī ruwānbōzišnīh pāšom nēkīh , mardōmān yōǰdāsrgarān mardōmān guft ī

yōǰdāsrīh ī mardōmān pākīhā ēdōn pad ruwān kū pas az zāyišnīh ī pāšom ēw

ka be zād hēnd ā =šān tis ēw yōǰdāsrīh ī pad ruwān weh

ud any gyāg nimūd ēstēd kū yōǰdāsrīh ī =iz pad ruwān pad yōǰdahrīh [ī] tan šāyēd xwēšēnīd

čiyōn abar ān ī guft ēstēd kū =š yōǰdāsrgarīh ē xwāstan aziš ,

u =š guft abāyēd kū ēdōn pad ōy rist tan be ēstād ham

ud axwāstār ham pad menišn axwāstār ham pad gōwišn axwāstār ham pad kunišn čārag dahēd kū rēmanīh rāy pad menišn gōwišn kunišn kirbag xwāstan nē tuwān

[xwāhēd] ō man yōǰdāsrīh ī kū =m be šōyēd

čiyōn =iš aziš paydāgīhēd kū ka ān kē =š tan nē yōǰdāsr tā ka =š be šōyēnd pad menišn ī gōwišn kunišn kirbag xwāst nē tuwān u =š ruwān yōǰdāsrēnīdan nē tuwān ēg pad =iz ī yōǰdāsrīh ī ruwān awizīrišnīg ast az ān [ī] [tan] [yōǰdāsrīh] [kē] [-š] [yōǰdāsrēnīdārīh] [ī] [dēn] [ān] hēnd ī āšnāg ī pad dēnīg nērang ī

ud ka ēn ēdōn hammis dēnburdārān dēndastwarān mādayān ōy kē pad dēn mazdēsnān āgāhtar kirdārtar ud andar harwist mān wis ud zand deh wēš abērtar mard ī ahlaw gōwāguzwān rāstguftār ī srūdgāhān ī āgāh ud dēnnērang ī frahaxtkār ī husrawxēm ruwāndōst pad yōǰdāsrīh winnārdan menīdan abzāyīd abēr čimīg

ōh =iz ka āwām ōwōn asāzīg druz ōwōn was kōxšišn ud staft zōhrārāstār ōwōn gōwišnīh ēw ī ka =iz hambāst menišn wehān pad winnārdan pattāyēnīdan ī hamfrārōn pēšag tuxšēm

ēg =iz nōg nōg az frahist šahrān ōwōn pad hanǰābišn ēstēd ī =mān ī padiš čimīgīhā garān bēš bīm

ud yazadān ō amāh frayādišnīgīhā rasānd ud rasēnānd ārāstār ī ēd abārīg =iz dēnīg ristag pad yazadān nām ud xwābarīh ud purrxwārīh aboxšišnīgīh meh tuwāngarīh ud tuwānīgīh ,

ēn =iz az ašmāh xwāyišnīg ham kū rāstkāmīhā ud an kē īhā ī =tān ast pāzag abar nibišt nibēsam ōwōn hučašmīhā ud payrāstārīhā nigerīd framāyēd čiyōn gōhrān ēwēnag čē abāg man ham sahišn hēd ham passazagtom abāz āgāhēnīdan framāyēd kū =š padiš ōstīgānmenišnīgtar bawam ud agar ast ī =tān anīy ēwēnag sahēd abāg čimbōzišn ī =tān sahēd ōwōn abāz nimūdan framāyēd čiyōn hamhāg ī āhōg abazguftār ud abāz nimūdār rāy guft ēstēd čē was ast čim kē rāy =itān niyābag hučašmīhā nigerišnīh ī abar nibēsišn

fradom ēd kū man abārīg =iz mowān dibīrīh nē pēšag ōy kē =š frahang ēw nē wāspuhragānkārīhā bē pardaxt ī az ān ī frēzwānīgtar xwēš kārīh ēg =iš awestādīh paristagīh ī padiš nē framāyišn ān =iz rāy dānāgān rāstxwāyišnān abar nibēsišn mowān mādayān tan ī dādestān barēnd ud čābukīh ī ēwāz passāzišn ī dibīrīh aziš kam framāyēnd

didīgar ēn kū andar ēn sezdēn āwām wišēg ān kē =š dardagīh ud was abāmīh az =iz pidarān awiš mānd az hamahlān šahr uzwāyīg ud was ziyān mad estēd ī pad a radīg darmānbarīh dādīg čāraggarīh purrranǰ bē pad =iz dēnburdār kē gētīyīgrāyēnišnīgtar āmār az hamēstārān garān bīm purrranǰīh ō passāzišn ī abē bahr a niyābag

sidīgar ēn kū dānāg ī mēnōynigerišn ī dēn dastwar ī āgāhdādestān ka =iz xwad andar gētīy xūbxīr abē bīm ud wābarīgān ēg =iz az =iš aboxšayišn andīhā dilzinǰagīh pad āzārišn bēšišn ī ō wehdahišnān paywast ēstēd ud was ēwēnag pēš wēnīhā āgāhīh ī abar gētīyīg mēnōyīg anāgīh rāy hamēšag and andar sōhišn andar menišn čand =iš dil bē ō čābukwāzagīh ud saxwanpassāzišnīh nē pardazēd ud čiyōn andar dēn pad pursišn gōwēd kū kē andar ox ī astōmand tēztar waxrīhēd pāsoxīhēd kū gušn ī wēnāgxīr zarduxšt kē abar harw dō ān ī mad ēstēd ān =iz rasēd ān =iz ī wattar wōyγ wēnēd čiyōn ān =iz ī andar anīz frāzwābarīgānīh čiyōn ēn dānēd kū az ēn nēkīh čē nēkīh ud anāgīh =iz dānēd hufraward hudēnan pēšōbāy farroxzādān nibišt hād az xwēš kardag gyān weh šnāsēd u =š meh handēmān ō čēhwidarg payrāstag ud ārzōg ī gētīy kamniwāzišn bawēd

čahārom ēn kū man wāspuhragānīhātar abar xīr ī pēšag a wizīrišnīg was kārīh ōwōn ī ān =iz ī hufraward ud mehfrazānag hudenān pēšōbāy ǰuwānǰam šābuhrān abāg čand pus ham dūdag nāfag mowīmard hamēw rāyēnīd ān =im ēwtāgīhā ud kamayārīhā pad rayēnīdārīh andar bunkamīh ī artēštārān wasīh ī hamēstārān zūd zūdrasišnīh ī petyārag čārag xwastārīh ī pad abāz dāštan wizend ud aweštāb ud a dādīhādārišnīh ī ātaxšān mazdēsnān rāy =im hamēšagranǰagīh ōwōn ī =m az ham dar frayist hangām guft tōš =iz ud čēhmenišnīh wasīhā hilēd ō ōwōn čēhagōmand nibēsišn kē nigerišn ī wigrādōšīhā ud āsānmenišnīhā padiš andar abāyēd bē =m ō xwārēntar nibēsišn pardazišn andak wisānīg u =m nāmčišt andar ēn widarg ka nāmag ī ašmāh mad ud hangām ī rōzīgdahišnīh ī ō paristišngarān ī hamēw pērōzgar ātaxš ud man šud abāyist ī ō sīrāb ud čand čāraggarīh ī frēzwānīg rāy kār wēš pardazišn kam būd

panǰom ēn kū agar =iz az =im hamāg kārān winnārdan rastag ud harw rāyēnišn xwēš kām ud sam pardaxtag menišn āsādag ud dil āsādag menišn urwāhmen būd hē ēg =iz =im az xwānd ī and nibišt and nōg bēš ud čēhag bē ō dil ud menišn paywast hē ī =m ōš xrad az wimandīg passāzišnīh saxwanān wizūdag māndag būd hē

šašom ēn kū ān =iz ī wigrādōštar mard ka az nibēsišn ī kišwar frazānag ēw ī rāstkām ōwōn škeft ud pas wēnēd ī =š az ham škeftīh pafšīrišn abzūdan ud wattarīh rasīdan gumān rāy andar saxwanān zōrīh kamfrayādīh būd nē gumān

haftom ēn kū agar ān šaš ī =m nibišt ēč nē hē ēg =iz ašmāh wizīdag wehgōhrīh ud stūdag huxradīh ud passandīdag bowandagmenišnīh burzīdag wehān frāy ud ōstīgān was dōšāramīh ōwōn ī pad čē rāstīhā rāstsahišnīhā nibēsam hučašmīhā rāstwizīngarīhā nigērīdan dōstwārīhā payrāst kirdan ud wirāstārīh tuxšīd frārāst saham

u =m wistāxwīh ī abar nibēsišnīh ī andar ōwōn a pardazišnīh mādayān az ham čim ud ašmāh kē =tān yazdān pāsbānēnānd šōyišn ī pad baršnūm az kardag bē nē hilēd čiyōn pēšēnīgān guft ēstēd kū ka az kār hilīhēd harw āb ātaxš urwar ud mard ī ašō gōspand ud harwisp dām ī ohrmazd bēšīd ud kāst ud nišēbēnīd bawēd

čiyōn gōwīhēd pad dēn kū ōy tan ī rist kē =š nasuš abar dwārīd ēstēd čē a hunsandīhā spitāmān zarduxšt ān kē abar rist ā =š ān xwaršēd abar bē tābēd ōwōn a hunsandīhā ān māh ēdōn a hunsandīhā awēsān stārag

šnāyēnēd spitāmān zarduxšt ān mard ī yōǰdahr ka ān abar rist ā =š frāz aziš nasuš kird kē rēman būd ēstēd šnāyēnēd ātaxš šnāyēnēd āb šnāyēnēd zamīg šnāyēnēd gōspand šnāyēnēd urwar ud šnāyēnēd nar ī ahlaw šnāyēnēd nāyrīg ī ašō harw dō čiyōn =iš abestāg

ka yōǰdahrgar nē bawēd hamāg yazdān az gētīyīg bēšīd a hušnūd bawēnd ud yōǰdahrgarān ī dēnīg ī dānāg kār ī yōǰdahrgarīh čiyōn =išān az pōryōtkēšān pad kardag awiš mad nūn =iz abāz nē dāštan u =š nē wizūdan frārōn dād kerbag nē wardēnīdan waštag ī nē drīst nē frārōn dād kerbag nē padīrift kār az =iš nē kardan abēr dānāgīhā ud drīstxradīhā handēšīdan u =tān padiš abartarīhā stāyišn burzišn ud spās ud āfrīn xwēšīg čē guft ēstēd kū pad hamāg kār ī dādestān kardan ud dāštan ī pōryōtkēšān az harw tis ēw mehmādagwartar ud harw ān raft ud kardag kē az awēšān andar mad estēnd pad rāst dastwarīh pōryōtkēšān āšnāg būd hēnd bē anīyēwēnagīh ī tāštīg dānišnīhā ud rōšn bōzišnīhā pad paydāgīh az dēn ud čāštag ī dastwarān bē āwarīhēd ēg =iš wardēnīdan nē dastwarīhā ud ōy mowīmard kē =š wizīr ī pānzdah pad nām nibēsīhēd čiyōn agīh ud a passaxtagīh ī ham nibēsišn nē ham gōnagīh ī abāg dēn čē =š pēš xōg nē būd rāy pad ōy wizīrīh ī nē abē gumān ham

u =š andar =iz nibišt paydāgēnīd ud wizīrēnīd kū ǰār ēw tā yōǰdahrgar rasēd ī āgāhnērang kē ōwōn šōyēd čiyōn pad dēn paydāg guft ēstēd ōwōn šust tis ōwōn saham kē rāy az ān čiyōn yōǰdahrgar ī xūb šustār nūn =iz ast ān ī =š azēr nibišt rōšn frārāst kū nē =iz wizīrēnīd hē pad ān kambōzišnīh ī andar ān nibištag paydāg ud nē wābar gōwišn hē

čē agar ōh =iz ōy pad abartarīhā ud āgāhdēnīh frazānagdānišnīh frazānagdānišnīh rāstdastwarīh mehpōryōtkēšīh stūdag paydāg az hammis nūnēnīgān dastwarān frāzīg tāyag hē būd hē ēg =iz abāg mowīmardān āwāmfrazānagān ohrmazd mowbedān ī pēš būd hēnd nē hāwand hē ud ka =iz hamāg abestāg zand warm wābartom āgāhmānsr zarduxštrōtom mow ēw pad ohrmazd ud ohrmazdmowbedīh aγrīy saxwanwirāy hudēn kay ēw pad mādayān dahībedīh mad estād hē ēg =išān pad dād kardag wardēnīdan ayāb ǰud az uskār ud ham dranǰišnīh ud ham dādestānīh ī mowān ī dēnsarān ud sālārān ham dādestānīh ī čašmag wehān xwad sahišnīhā nē padīrišnīg nē uspurrīg hē

bē wābar gōwišn ān ī ast būd bawēd ī =šān pad anōšagsaxwanīh rāstpahikārišnīh bowandagzōrīg uskārišnīh abāg mehān menišn uskārd estēd az =iz čāštag ī rāst dastwarān pad wēš gugāhīh bōzišn ī ēwarīg ō hanǰamanīgān ī dād šahr nimūd frayist mowīmardān dādestānšnāsān ī kustag kustag padiš xwastūgēnīdan āwištag ī ham šahr andar harw čahār pāygōs abar kird hē az =iš hangōšīdag paydāg az =iz ān ī anōšagruwān wehšābuhr ī mowbedān mowbed ud anīz ohrmazd mowbedān guft čāštag ī u =šān pas =iz kardag padiš nē wardēnīdan gōwišn ī anīy dastwar padiš nē āgārēnīdan bē ān ī =šān pad ēwarīh padīrift az gōwišn ī abārīg dastwarān pad wābartar dāštan ud kardag ī anīy ēwēnaggōwišnān nē wardēnīdan dādīg sahist ōwōn būd

čiyōn ān ī wehšābuhr pad hanǰaman ī anōšagruwān husrōy ī šahān šah ī kawādān 21 ān bazišnīhā ōwōn nimūd ī mowān padiš ēstād hēnd u =šān nibišt āwišt kū ōwōn mowān padiš ham dādestān būd čiyōn wizīrēnīd u =šān pas ān and wizīr ī ōy ōwōn nimūd mowān padiš ham dādestān būd hēnd pad mādagwarīh ēwarpāyagīh ud andar kardag ī ōstīgān dāštan abārīg ī =š guft ōwōn dārēd čiyōn abārīg gōwišn ī ēk ēk az awēšān dastwarān

uskārišnīg čāštan ān nibištag ī =tān mayān nibištag ī nāmag āyēd drustbōzišnīh ēw andar nēst ī padiš ān ī frārōndārišnīhā kardag wardēnīdan sazēd čē agar ōh =iz ān ī =š az gōwišn ī mēdyōmāh ud abarg ud sōšāns nibišt estēd ǰud ǰud gōwišn čāštag ī ham dastwarān ast ēg =iz passāzišnpaydāgīh ī aziš nē ōwōn čiyōn ān ī =š pad frāzsāzišnīh parwastag u =š paydāg sahist pargast kū ōy mow gām az rāstīh čaft ayāb =iš menišn ō kāmagwizīrīh rawēd ayāb =iš āgāhīhā ān ēwēnag ī nibišt ī čiyōn =iš pad ox wurrawist kū nigēz ī dēn čāštag ī dastwarān ast bē tā rasišn ī a brādarōd sōšāns kas pad bowandag dānišn a waxr andar axwān nē ud agar nāmčišt druz pad menišn ī dēndastwarān uzmānīgtar kōxšēd tā wizīr ī dēn ud pattāyīh =iz brādarōdōmandīh ī xīrān ān ast ka abēzagmenišnān saxtag nigerīd purrguftārān tēzwīrīh ud dēnīgčihrān hučašmīh abar bōzišn abar nigerišnīg ham mow afrēftārīh ī xwad ud saxtagnigerišnīh kām ī =š abar purrwistarišnīh ī dēnīg hamag rāy tēzwīrīh ud āhang ī =š ō bōzišnīh dēnīg hammōg rāy tēzwīrīh ud āhang ī =š ō bōzišn ī dēn ērang ī ǰudpahikārān winnārdan rāy hučašmīh abar xwēš bōzišn ī kē =š xōg ast

ān =iz ī =š az ān bōzišnīhā parwastag passāxtag paydāgēnīdag menīd az ēn se čim abērtar abar saham ān ī =š saxtagnigerišnīh saxtagnigerišnīh ī mēdyōmāh pad čāštag mēdyōmāhīg ud ān ī abarg ud sōšāns harw ēk pad čāštag ēw ōšmurd u =š tēzbrīnīhā harw čē ēk az awēšān guft pad paydāgīh ī az čāštag ēw wizīr abar kird u =š hučašmīhā pad bōzišn ī xwēš uspurrīg menīd u =š nē mad estēd ī passazag ham uskār ud abāz nimūdār rāy an ēdōnīh awiš nē āhumbīhist ud ka pāsox ī rāst abāz nimūdārān ašnawēd pad bowandagmenišnīh uzwārēd xwad xwastūgīhēd kū čāštag mēdyōmāh nē hamāg gōwišn ī mēdyōmāh čē was dādestān ast mēdyōmāh ēwēnag ēw guft pad mādagwar čāštag ī mēdyōmāhīg anīyēwēnag wizirēnīd estēd nē harw čē mēdyōmāh guft nē xūb pad čāštag ī mēdyōmāhīg ēwar kū nē šāyēd čē was ī pad šāyistagīh guft estēd

ān ī andar ān nāmag nibišt kū pad čāštag ī sōšāns ōwōn gōwēd kū yōǰdahrgar dō ōh abāyēd harw ān šāyēd kē =š yašt kird estēd ēdōnīhā ham dādestāntar būd hēnd kū ka ēk ā =iz ast ī šāyēd abārīg ī =š pad hamband nibišt ān bē čiyōn =iš gōwišn ī abarg pad čāštag ēw ī az =iš ān rāy ān ī paydāgīh az =iš sahist ī čiyōn =iš wizīrēnīd

ēg =iš ka =š āfrāhēnāg pāsox ī abāz nimūdār rasēd rāstkāmagīh rāy xwad xwastūgīhēd kū abarg pad ēk ī az dastwarān ō mar āyēd ud ān ī mādagwar čāštag sōšāns guft kū ham dādestāntar būd hēnd kū ka ēk ast ā šāyēd

ān gugāhīh =iz ī čand dastwar ud mādagwar ī čāštag ēw ham pāzag pad =iz čāštag mēdyōmāhīg guft estēd kū ka ōy kē hamēw šōyēd pišag šnāsēd ēg =iš yōǰdahrgar ēk was

ka pad mādagwar ī dō čāštag ka ēk ast šāyistagīh paydāg ēw tāg gōwišn ī abarg rāy bē nē a kārēnišn čē abarg bē čiyōn =iš xwad ōwōn sahist guft yōǰdahrgar dō ōh abāyēd

ēnyā anīy dastwar abāg ham gugāy būdan nē paydāg u =š xwad =iz ēn nē spēzīd kū anīy ēwēnag būdan nē šāyēd čē =š wēnišn ī xwēš čiyōn =iš sahist guft

ēk ōy abārīg wizīd pōryōtkēšān pad ēn ham dādestān bē būd hēnd kū vīkaiieha kār čiyōn =iš wizārišn ēn kū dādestān ī =š mowān abar ǰudpahikār hēnd ān ī mow ēw ēw ēwēnag gōwēd dō mow ī =š hāwand anīyēwēnag gōwēd kār az ān dō gugāh kunišn

čiyōn az ham nimāyišn ēn =iz paydāgīhēd kū pad =iz xwastūgīh ī abarg ka yōǰdahrgar ēk ast pad šāyistan dārišn pattāyēš tā =š gugāhīh ān ī =t nibišt kū mēdyōmāh guft kū harw pēšag se bār šōyišn ud nūn yōǰdahrgarān ēk bār

ān hamgōnag čāšt estēd čiyōn =iš nibišt bē mēdyōmāh se bāršōyišnīh nē tāšišnīg šōyišnīh bē uskārišnīg guft u =š ēn =iz nē guft kū ka se bār nē šōyēd ā nē šāyēd

abarg guft kū ka ēk bār šōyēd ā šāyēd ud abar ēn ēw bār mēdyōmāh dādestān pasēmālīhā ud abarg dādestān pēšēmālīh čē mardōm andar zīndagīh fradom dārišn abar pākīh nē frēzwānīgīh ī šōyišn ud pas rēmanīhīhēd ī =š andar dēn šōyišnōmandīh abar gōwēd tā čand bāršōyišnīh paydāgīhēd ēg =iš dārišn abar ēk bār ī ast fradom mar

ōy kē wēš az ēk bāršōyišnīh gōwēd pēšēmālpahikārišnīh nē paydāgīh ōy kunišn tā ka paydāgēnīd dārišn abar gōwišn ī ōy kē pasēmāldādestānīhā ēk bāršōyišnīh guft

az ham bē agar =iz ōh =iz wēššōyišnīh ast ī xūbīh ī kār pas gōwišn ī abarg abar ēn ēk bār bōzišnīgtar paydāg ān ī mēdyōmāh ō paydāgīh niyāz

ud ān ī nibišt kū pad čāštag ī abarg ōwōn paydāg kū pv.9.32 harw tan ēw pad kemistīh āb ēw dōlag gōmēz ēw dōlag ī wehmār ōh abāyēd ān hamgōnag pad čāštag ī mēdyōmāh guft estēd kū āb ud gōmēz ka šāyēd hamāg bē yazišn ka nē pad nidomīh ī harw tan ēw ray āb ēw dōlag ud gōmēz ēw dōlag ī wehmār ān gyāg bē nihišn ud pas ōh gumēzišn

ud az ān čiyōn dō čāštag ōwōn guft ēštēd kār az ēn kardan bōzišnīgtar ud drīstdādestānīhātar

u =mān bōzišn ēw ī drīst nē šnāxt ud paydāgčimīhā bē ō dānišn nē mad kū kem az ēn paymān šāyēd

bē ēn nē tāštīgdānišn ham kū kem az ēn nē šāyēd čē āgāhīh ī abāg az ān ī awēšān āgāhīh kē pēš dastwar uskārdār ō ōy paywastār būd hēnd ān ī =m āšnūd kū ast kē paymānag ī āb ud gōmēz kāstan rāy bōzišn ēn gōwēd kū pad harw tis ēw kār ī ēn wizārēd kū ka and čand =iš az =iš tan paydāg šāyēd

u =m wāzag drīstbōzišnīgīh ēw nē dīd čē meh frazānag hudēnān pēšōbāy hufraward ǰuwānǰam ud anīz uskārdārān dādestānhumenišnān sahišn ōwōn būd kū ān wāzag abar ān guft estēd ī =š az dēn čāštag ī dastwarān paymānag ī pad kemistīh nē paydāg

ud pas ka hambun =iz ast šāyēd ēg =iš ān ī =š paymānag ī pad kemistīh paydāg kem az kemistīh nē xūb agar pad čāštag pad šāyist guft ēstēd wēšgugāhīh rāy wābarīgāntar ud kār aziš kardan dādīgtar čē ān čāštag ōh xwastūg kū gōwišn ī dastwarān wēšgugāhīh kār

ēn ān ast ham bāstag yōǰdahrgarān gyānsahmān andar kār dāšt ud wehān menišnīgīhā pad =išān ayār ud nērōgdādār būd abēr čimīg ud nūn =iz yōǰdahr se xwēš wāspuhragāntar ham paymānag andar kār dašt framūd estēd

ān ī =m dīd u =m ō dānišn madag abērtar ka =m xwad šust ham paymānag andar kār dāšt estēd

ud agar =iz ast yōǰdahrgar kē āb ud gōmēz ī yaštag bowandag pad kār nē rāyēnēd ēg =iz nē wattar kū ka hambun =iz nē bawēd u =š nērang =iz ī dēnīg nē bawēd

u =š windēdād yazišnīh =iz abestāg gōwišnīh =iz wāzgīrišn =iz čiyōn =iš pursīd zarduxšt az ohrmazd kū pv.9.33 čiyōn yōǰdahrom kū tā airiieme nē bawēd ast kē hamāg gōwēd

čiyōn pad ātaxš ud čiyōn pad āb ud čiyōn pad zamīg čiyōn pad gōspand ud čiyōn pad urwar ud čiyōn pad mard ī ašō ud čiyōn pad nārīg ī ašōnīy čiyōn pad star ud čiyōn pad māh ud čiyōn pad xwaršēd čiyōn pad ān ī asar rōšnīh ud čiyōn pad anagr rōšnīh čiyōn pad harwisp ī ābādīh ohrmazddād kē az ahlāyīh paydāgīh

u =š guft ohrmazd kū yōǰdahrīh srāyēš zarduxšt kū windēdād ēw bē yaz yōǰdahr pas bawēd

čiyōn =im guft kū windēdād ēw nē yazēnd kū ān ī =š nibišt nērang pad kār dārēnd ēn ēč nē zanēd u =š ēg =iz wizīr framān ī sālārān ī dēn nē abar bē hišt

baršnūm bē abar ēn niyābag bawēd kū āb ud gōmēz ī yaštag pad paymānag dastwarān čāšt ēstēd andar kār dār

ēnyā abāg =iz ēd kū ān ī pad dō čāštag guft ēstēd ēwar drīsttar pas =iz ast kū =šān tuwān awiš nē ayābīhēd pad čāštag ēw pad šāyist guft ēstēd ud man nē šayistagīh nē wizīrēnam

ud ān =iz 300 sang ī pad pādyāb ī āwāsēnīdag ō gōmēz ud āb abgand rāy nibišt ān ham gōnāg =iz čāšt ēstēd ud ā =iz ōh =iz ka nē abganēd pad ast čāštag ī šāyēd

ēg =iz arzānīh ud āwāsīh ī sang rāy yōǰdahrgarān padiš kambōzišnīgtar ud ān tis ōwōn xwār pad kardan ōwōn hučār

pad ast čāštag ī nē xūb yōǰdahrgarān pad xwār dāštan abēr sūdagīhā bē =š nē šāyist nē guft estēd pad čāštag ī abarg guft estēd kū šāyēd

ud ān ī nibišt kū pad sagādom paydāg kū gōmēz ī yaštag ka gandag bawēd bē ayārdēnišn ōwōn ī frāz ō ātaxš nē barēnd kū gand bē ō ātaxš rasēd čē agar ān gand bē ō ātaxš rasēd xwēdīh rāy pad hixr abar frāzbarišnīh ō ātaxs ān āsterēd ān ham gōnag čāšt ēstēd ma agar az ān ī guft ēg =iš sahist kū hixrīh ī rēmanīh ī gōmēz gandag nē

bē =š bowandagmenišnīhātar ud uspurrīgīhāuzwārīhātar sazēd nigerīdan čē ān ī =š guft kū pad hixr frāz barišnīh ī ō ataxš āsterēd nē rēmānīh ī gōmēz bē paymānag ī wināh rāy pad ēn kū =š and wināh ō būn bawēd čand ōy rēmānīh ī gōmēz bē gand ud xwēdīh rāy čiyōn kē =iz āb ī pāk yōǰdahr bē ō ātaxs barēnd padiš wināhōmand bawēd

ēn =iz wāz ēw kū paymānag ī wināh nē remānīh ī gōmēz rāy guft ēstēd hangōšīdag az =iz ān paydāg ī zōhr ī xar ud xūg rāy guft ēstēd kū ka wēš az paymānag ī framūdag bē ō ātaxš barēnd pad hixr frāzbarišnīh ī ō ātaxš āsterēd ud ēg =iz ān gōšt pad pākīh wizīrēnīd pad bē dādan ī ō gāhānbār guft ēstēd

xwad =iz gōmēz gandag frārāst kū ēd rāy framūd estēd kū bē ayārdēnišn kū tā ka bē ayārdēnīd ēg =iš kār framāyēnd ēnyā agar bē agārēnišn pas ō ayārdēnišn nē niyāz ayārdēnišn rēmanān abar yōǰdahrēnišn paydāg kū hixr bē ōwōn kū nē hixr ud ōwōn pāk kū ān =iz ī anīy yōǰdahrēnēd

ka =š xwad nibišt kū pad sagādom ōwōn paydāg kū gōmēz ī yaštag ī gandag pad ātaxš bē ayārdēnišn pas paydāg kū gōmēz ī nē ēwāz ān se rōz grift ēstēd bē ān =iz ī kahwan ī yaštag ī gandag būdag ī abāz ayārdēnīdag ka pad kār dārēnd xūb

ud ān ī sagādom paydāg mādagwar kū ēk az dastwarān ēwtāgīhā guft ān gandagīh ān rāy guft estēd tā ka =š gandagīh ēw rasēd ī ǰudēwēnag az ān ī =š čihrīgīhā padiš ast

ud ān ī nibišt kū mēdyōmāh ud abarg sōšāns harw se mad estād hēnd ud ān rāy kē ēdōn šust čiyōn nūn hamēw šōyēnd ēwar kū šāyēd u =šān pad šāyist hē mēdyōmāh guft hē kū nē čē yōǰdahrgar ēk bawēd abārīg ī čiyōn andar ān dar nibišt ī =š tēznigerišnīh rāy az gōwišn ī awēšān ōwōn sahist u =š awēšān =iz az čāštag ī pad nām ī awēšān ōwōn nē wizīd čiyōn =im pēš nišānēnīd bē nē ōwōn šnāsēm kū agar awēšān harw se mādagwarān ī harw se čāštag mādagwarīh būd hē ud kas rāy kē ēdōn šust hē kū yōǰdahrgar ēk būd mēdyōmāhīg ud sōšānsīg guft hē kū šāyēd čē dastwarān ēdōn ham dādestāntar būd hēnd kū ka ēk yōǰdahrgar ast ā šāyēd ud ka =šān pad šāyēd hē kū =šān ǰud az dast abārīg pēšag ēw bār šust ud abarg guft hē šāyēd čē =š se bāršōyišnīh pad abestāg nē guft ud ka pad šāyēd hē kū 300 sang pad āb ud gōmēz nē abganēd abargīg guft kū šāyēd čē sagīzag kārew nēst ud ka pad šāyēd hē kū pad ān maγ šōyīhist kē kas padiš šust ud sāldrahnāy padiš nē uzīd estēd bē =šān stad abaz nihād mēdyōmahīg guft hē kū šāyēd čē ka =š sag abāz nihād ā =š wistarišn kird ud ka =š wārān ēw ēdōn padiš bē bawēd ī andarrōn bērōn hamāg gyāg bē xwist ā šāyēd ud agar kas ēw gōwēd kū ēn ān ast ī nērang ēw pad dastwarīh ī čāštag ēw ud ēk pad dastwarīh ī anīy čāštag pad ēč čāštag harw nērang ī andar ēd šōyišn ī čiyōn pad kardag dārēnd bē bōxtan nē šāyēd

ān pāsox ēn =iz kū harw nērang ōwōn kunišn čiyōn kē guft bōzišnīgtar u =š paydāgīh ī dēn gugāhīh ī dastwarān abāg hambandtar ud nē pad ān čim kū mēdyōmāhīg pad nērang ēw bōzišn ōmandtar pas ān tis ī abarg bōzišnōmandtar ud kār az gōwišn ī mēdyōmahīg kunišn bē harw ān čē mēdyōmāh bōzišnōmandtar az mēdyōmāh ud harw ān ī abarg bōzišnōmandtar az abarg ud ān ī anīy dastwar bōzišnōmandtar az ān dastwar padīrišn ī wēšbōzišntar ud hangerd harw ān ī awēšān dastwarān guft kē pad rāst dastwarīh wizīn ī kišwar frazānagān framān ī dādīgīhā šahryārān abar būd ēstēd bē ān čē =š padīraggōwišnīh wēšgugāhtar ud paydāgbōzišntar ayāb az nigēz ī dēn ud čāštag ī dēndastwarān pad an ēdōnīh paydagīhēd ēg =iš hamāgīhā padīrēnd ud kār aziš kardan dastwarīhā ud bōzišnōmandīhā

ud ēn =iz ōwōn saham ud agar =iz ǰud ǰud čāštag pad šāyēd hē ēg =išān pad nē šāyistīh tāštīg nē wizīrēnīd hē čē mēdyōmāh bē čiyōn =iš sahišnīg guft kū harw pēšag ēw se bār ōh šōyišn ēnyā =š nē wizīrēnīd kū ka hamāg ēk bār šōyēd ā nē šāyēd pad mādagwar čāštag ī mēdyōmāhīg ud šōyišn ī pad dād ī wizāragdēnān rāy gōwēd kū kē rēman bē bawēd pad ān dād bē šōyēd ēd kū =š šust pad šust dārišn ham nē kird ēstēd ud agar ōh =iz anīy dastwar guft kū harw kē rēman bē bawēd ud nē pad dād pōryōtkēšīh šōyēd nē pad šust dārišn ēg =iz pad mādagwar čāštag ī mēdyōmāhīg ān šōyišn ī pad dād ī pāragdēnān šōyīhēd nē guft kū nē šāyēd ud ān ī pad dād i pōryōtkēšān šōyīhēd kē was dastwar pad xūb dārēnd čiyōn sazēd handēšīd kū se bāršōyišnīh rāy guft hē kū nē šāyēd ōh =iz ka ōy =iz pad ēn ham dādestān būd kū gōwišn ī dastwarān pad hāwandīh ud wēšgugāyīh ī dastwarān rāh ō xwastūgīh būd hē ī abar ān ud kū andar warōmandīh ēw dastwarīhā ud ān =iz ī abarg ud šōšans hangōšīdag tis ham dānist šāyēd

ud abārīg was ī =m gōwizār pāsox nē nibišt ud ast ī wizīrišnīgīh ī aziš ast ī nāpardazišnīh ud ast ī a frēzwānīh ud abārīg =iz ī =m nibišt mādayān ka uškārišn ud handāzišn ī abar ōwōn rāyēnišn nē andar amaragān bē mowān āgenēn niyābag bawēd

ud ēn =iz and ī =m nibišt ēd rāy ka =tān nibišt ēw awiš mad ēstēd ī =m abāz nimāyišn passazag sahist kū pas saxtagnigerišnīhā nibēsīhēd ōwōn =iz dānēnd az wehkāmagān ī menišnīg ruwāndōstān ī saxtagnigerišnān kē =šān az ān nibēsišn ast ī gumānīgīh andar dil ud menišn bē mānād u =m az ān bē ēn and abāz nimūdan xūb sahist ud ēg =iš =im andar was ēwēnag zarīgwidārišnīg čēhišnīh ī abar ham dar ēn andar handēšišn ast kū pas ma agar ham mowīmard kē =š ān nibišt frēstīd kē =š yazdān āsnūdagxradīh ōstīgān awezmāyišnīg zāmēnīdan ī yōǰdahrgar ī kustagīhā rāy ān nibišt kird kū tā =š aziš škōyīhēnd ud spurrīg paymānīgīh ī āb gōmēz bowandaggōwišnīh ī abestāg abārīg xūbnērangīh spurrīgtar ō kār kunānd ud passandišnīgtar rawānd ud agar =iz az =iš ham wihān rāy nibišt nē bōzišnīg bē =š waxrhandēšišnīhā čē ān ēwēnag nibištag ēč čim nē kunišn

bē agar =iš pad ān čim nibišt pad ast ī kamgrāytar paydāg ud man nūn škeftsahišnīh pad ān abērtar ka =m mehfrazānagīh az =iš dīd ēstādan rāy ēn gumān nē būd kū saxwan mehdādestān ī ast dād ī āsrōnīh pēšag kardag ī hamāg kišwar hudēnān bē az uskār ī man ud abarīg mowān dēnīgnigerān wizīr ēw kunēnd ēnyā sahišn ī =š andar wizīr nē ōwōn škeft dāram čē agar nūn =iz pad saxtagnigerišnīh frāz čaft ēstēd ēg =iz bun zāyišn az ǰudčāštagīh ī awēšān pōryōtkēšān meh dastwarān meh pēš būd hēnd awēšān būd zofrīh ud was brahmīh ī dēn rāy was sahišn uskār wizīr kardag =iz az āgenēn ǰudwimand ēwāz ǰuddādestānīh ī hērbedān abāg naskōšmārdārān bē mayān =iz xwad abartom rāst dastwarān bē andar āštīh ud ham ayārīh ud dōšāram ī =šān āgenēn was ǰudsahišnīh ud ǰuddādestānīh ud ǰudčāštagīh ud ǰudgriftagīh ud ǰudkardagīh būd čiyōn ān =iz ī abar se mowbedān mowbed ī frāztar ī =šān nām ādur ī farnbay ud windād ud ādurbōzēd kē ǰud ǰud wirāstdēn kišwardastwar ud āwāmfrazānag būd hēnd

ōh =iz ī ka sahišn pas ō mow dastwar ōwōn ayābīhist čiyōn abar spitāmān zardušt guft ēstēd kū fradōm ǰār ka =š amahrspand dīd hēnd ēg =iš menīd kū hēnd endar ud sāwal ud nānghāyh ud tāwriǰ ud zāirīǰ kē hēnd mazantom az dēwān abāg waxrīh ud zēfānīh ī ān ōwōn nibištag garānīh ud ziyānīh ī ān ōwōn wizīr bundāštīgīh ud kambōzišnīh ī ōy ōwōn nibištag passāxt ud pas =iz ašmā pad dād wehmenišnīh sahišn ōwōn waxrīhist ī =š az pōryōtkēšān dastwarān ōwōn paydāgīhēd čiyōn =iš gōwišn =iz ī awēšān abāg nibištag ham dēn bowandagīhā waštag menišn az ān ī dastwarān čāštag čaft

bē čiyōn ham wizīr ud ān ī ham mānāg ī ham wizīr ud agar frayist wizirēnīd az =iš nē padīrišn ud kār az =iš nē kunišn ēnyā gāh abartom dēnwarzīdārīh ōstīgān dārišn pad frāztom āgāhīh ud wēnāgīh ī =š andar dēn ī mazdēsnān rāstpāyagīhā menišn ud abārīg dēnīg āgāhīhā ud ruwānbōzišnīg wizīr ī az dēn ī mazdēsnān čāštag ī rāst dastwarān āškāragēnīd paydāgēnīd sazāgīhā padīrišn wābarēnišn ud čiyōn =im hangōšīdag az =iz abarg nibišt ud abar =iz bōzišn ī ǰudgriftagīh ud ǰudčāštagīh nē frayist az hambasāngōwišnīh ī an ērang dēn ī mazdēsnān nē =iz az stēzag pahikār ī āgenēn bē az sahišn ī rāstkāmīhā būd bōzišn wasīhā ast bē zamānīg az nibēsišn ī padīrag waxrīg ziyānīg nibištag ī ān mowīmard ō pardazišn kam

u =m nigerīd estēd nihangīhā mard ēw ī xwēš abāg nāmag ī gōkānīg padīragpahikārišnīg ziyānnimāyišnīg bōzišnāgāhēnišnīg ud ō wirāyišn niyāzišnīg ud ō ān mowīmard frēstīd az =im mard ī pad ham kār frēstīd paydāgīhist drang ī padiš tā frāz pardaxt ī =m ō gōkānīgtar nāmag čē ān ī az dūr wirāst abāyēd gōkān rōšngarīh padiš a wizīrišnīgtar ēnyā agar ham mow andar nazdīkīh būd hē ēg =im ham wēnišnīhā pad andak saxwan az ān waxr wardēnīd ud pad ān ī pišag pad =iz nibēsišn ī gōkānīgtar ud āgahēnišn ī was bōzišntar

u =m nūn =iz nigerišn uskār ud čāragxwāhīh ast kū agar kārān ī a wizīrišnīg padiš čēhišnīg ōwōn winnārdan šāyēd ī =m māhīgān se pardāxtan tuwān xwad ud frēzwānkārīhā pad wirāstārīh bē ō pēš ī ham mow šawam ud ēn wirāyišn xūbīhā handāzam ud yazdān āhīd was čim ast kē rāy wihēz ī az gyāg duščārag u =m ǰār ēw zamānīg nāmag ēw awiš nibišt ud abāg ēn nāmag frēstīd

yazdānpānagmardak ī guharīg awiš ēw frēstīd ēnyā =š ham pay abāg mard ī xwēš awestwār gōkānīgtar pahikārišnīgtar awiš nibēsam āgāhīhā =iz ī =š padiš kū =š gōwizārtar āgāhēnēm āgāhīhēm bē agar pad ēn ī =m nibišt ayāb xwad nihangīhā bē ō pārs āyēd ēnyā pad =iz wirēxtan ī xwad čāragxwāh bawam abar nē mōšom ka yazdān abāyēd ud yazdān čiyōn nēktar pad ēn abārīg rāyēnišn handāzānd ōy mow abartar īhā abzār ud dēnāgāhīh ī =š xwāst az sūd ī dēn pēš ma appārīhēd

dēn ī dēn mazdēsn ārāyišn ud wirāyišn ud wābarīgānīh abrāz rasād ašmāh hammis dēnniyōxšīdārān andar sarīg abartarfarroxīh pad hamāg nēkīh burzišnīgīh bawād ēnyā pad ōwōn menišnīg dōstīh dušwār čēhīdārīh rawāgīhā āgāhēnišn ī =tān ō man ān =im wazurgīhā spāsdārīh abzūd ud ō ašmā āfrīnēnīd agar padiš nigerēd uskārēd ān =itān čimīg sahēd ka =tān wēnišn bawēd ō rāst nibištār dibīr ēw kē mārīg bē nē wardēnēd framūd tā =m ēn nāmag ī =m ō ašmā nibišt ān ī sazēd paččēn nibēsēd ō ham yazdānpānagmardak ud abāg ān nāmag dād framāyēd tā awiš frēstēd čē ast ī ka āgāh saham kū xūbtar

u =tān yazdān nōg nōg purrpaymānīhā ud spurrabrāzīhā abzāyēnānd mehēnānd rāmišn ud drōd ahlāyīh ud ābādīh ud burzišn farroxīh paywandānd wisp ō nēkfrazāmīh

mānuščihr ǰuwānǰamān nibišt rōz māh spandarmad andar ahlāyīhurwāzišnīh ud dēnstayišnīh ud yazdānabestāmīh spāsdārīh ī andar dādār ī ohrmazd ud amahrspandān hamāg yazdān mēnōyan ud yazdān gētīyān niyāyišn ō hamag māh kē =š ham rōz pad frāznām

paččēn ī nāmag ī hērbed manuščihr ǰuwānǰamān kē =š ō hērbed brād zādspram kird ,

nām ī yazadān kē hērbed ī xwadāy abartom pērōzgarīh ī andar harw dō axwān kāmaghanǰām burzišnīh dārānd

yazadān kāmīhā az frazendān hammis druwisttan ud rawāgxwēškārīh ud ō hērbed ; ī xwadāy anōšēnwēnišn drōdāgāhīh ud purrārzōg ud pad harw dar andar yazadān spāsdār ham ,

nāmag ī =tān andar māh ābān az nēwšābuhr nibištan X framūd mad

u =m az kišwar arz ud druwistīh ; ud drōdōmandīh ī hērbed ī xwadāy andar yazadān spāsdārīh abzūdan be abāyist hē ī ka =tān āgāhīh ī xwēš X ast ī nibišt , hē čē =tān nibēsišn ī nāmag nē ōwōn čiyōn dūrān kē gōkanīg nibēsēnd bē čiyōn nazdīkān kē menēnd kū nōg nōg hamwār āgāhīh āmēzē

ud ān =iz ī =tān nibišt framūd pad nišānag ōwōn nihuftag ī =m wizīhišn awiš nē čiyōn gōkān mayān nāmag paydāg

ud az nūn frāz āgāhīh rōšntar framāyād nibišt čē =m apardazišnīgīh ; ī abar was darīhā rāy bē ō nišānšnāsīh dil nē pardaxt ,

hērbed xwadāy āgāhēnēm kū andar ēn tāhīg nibišt ēw bē ō man mad ī =tān bē ō wehān ī sīragān bēš ud zarīg ud čēhag ōwōn paymōzīhist ī =š hangōšīdag ī ka hufraward pidar =mān az astōmand axwān ēwarzīd

čē ēdōn čiyōn akārīh ī čašm hamāg zanišnīh ī tan hāwand ēdōn =iz gazišn ud āhōgēnišn ; ī ō ōš ud xrad rasēd hamāg zanišnīh ī gyān hāwand

ud abar wimand ī abēzag āstxrad ī ārāstīh bowandag ī mānsr paywehag(?) kē =š ān ī mahist āgāhīh ī dēn mazdēsnān abāgēnīd estēd

ud andak =iz pasxradīh ud waxrwēnišnīh garānawrandīhātar ud zištārangīhatar

u =m fradom =iz andōh pad ān ka =tān spurrīg ulmatīh abardom rōšnīh ī xwēš X be wināhīd u =tān didīgarīh ī man be ānāft

ud ān wizīr ī ka =iz rāst hē ēg =iz az ān čiyōn dād ēw ī kišwar ud dādestān ēw ī gēhānmasāy ast

ud ka =iz pad šādurwān ī mōyān hanǰaman ī pārs dar ud abārīg was hamrasišnīh ; uskārd ēwhazār hudēn mōy padiš hamsahišnīh āwišt estē ēg =iz ǰud az uskārišnīh ud padīraghandāzišnīh ī abāg man abārīg sarān ī mōyān ī dēn frārāst ud wizīr ; padiš brīnēnīd ud dād padiš nihād ud framān abar dād nē sazist hē

u =tān ēn =iz andar abāyist nigerist hē kū ka magīhā ī tan pad wizēn ī čahār pāšomān ī zamānag winnārīhēd ēg =iz ud ān ī dēn dastwar dādestānīh az harw dādestān ; meh ud ēwēn ud dād ī kišwar

bē pad uskār ī ham pāšomān ēnyā wizīrēnīdan nē xūb

u , =tān ān āmārēnīd abāyist hē ī guft kū ma ān warzē zarduxšt ka tō se ayāb čahār hambrādag andar wis ī stāyīdār ī hanǰamanīg ēd gōwānd ēdōn kū ēdōn ast ēd dušmenišnīh ,

ēg =tān ēn wāzag nē āmārēnīd

u =tān saxtagīhā ud tēznigerišnīhā wizīrēnīd

u =tān ō xwēš ; bōzišnīg menīd kū =m abar hanǰaman ī abar sirāz ud uskārd wināh =iz andarag nē paydāgēnīd

ēd framāyēd dānist kū agar =tān pad hanǰaman ī tuγzγuz guft ē hē andarguftār kam =iz būd hē

saham kū ašmāh abar ēn xīr andar xwēš ; ud ōwōn wēš hēd čiyōn zarduxšt ī ādurfarnbay ka =š waxšagīhā winnārd

aziš ādurfarnbay xwad ; kehīhīd

u =š bē ōh nibišt kū musalmānān ka =šān āšnūd ēg =išān nēk passandīd

ud rāzīgān pāsox nibišt kū agar =itān andar dūr =iz nihād hē ēg =išān weh =iz passandīd hē

ēn ī ašmāh az ān ī ōy kird wasyār garādar

pāsox ī az kustān anāgtar

ud dusrawīh ī andar mardōmān uzwāyišnīgdar

ud bār ī pad ruwān garān xwarānīhādar

ud darrišn pahikārišn ī az ohrmazd ud zarduxšt škeft āmārīhātar bawēd

u =m ēn =iz abēr garān ka =tān xwēš dēnāgāhīh ud ruwānbōzāgīh ōwōn zūr ud pad ān hangōšīdag ī ōy tanbuzišk kē ka =šān dandān ī dard zad rāy pursīd ēg pāsox , dahēd kū bē kan

u =šān pāsoxēnīd kū amāh buzišk ān hamē abāyēd kū dandān =iz ī wēmār ud druyist kunēd

ēg =iš dandān kanam az ān ī frāxīhādar wasyārdar

ud agar hudēnān =iz ī ērānšahr frazānagīh dēnāgāhīh ī hērbed xwadāy pad ān ī hamē abāyēd kū tā pēšag =iz ī wēmār darmān wirāyišn X handāzēd ēg =iš pad pēšag bē abgand was niyāz ēw ō xrad dānāgīh ī hērbed xwadāy nēst

čē āwāmīg hēnd ī pādixšāy kē pad was gōnag huērīh nāmgānīh ud nē passand hamē kunēnd

wasīhā gōnag ī gētīyīhā xwārdar ud āsānīhādar ī pad nibišt barēnd wēš az ēn ī hērbed ī hamē , dahēnd

ud abdom kas =iz nē hamē padīrēd ǰud ān ī dušdānāg ī X druwand

u =m ān nibištag pad xwurdag nigerīd

ud abēr ī apassazag ō gōwišn ī frazānagān dēnāgāhān čē saxwan saxt bōzišn nizōr nimāyišn aparwast

ēdōn saham kū nē frēstēnišn ī abar ōwōn rāh bē samēnišn ēw ī yōǰdāsrgarān ōwōn nibišt kū tā ham sam rāy abērtar škōyīhēnd spurrīg andarkārdārišnīh ī āb ī gōmēz ud pahrēz ud rawišn kunišn nērang ī čiyōn kār passazag ō dastwarān abērtar kunānd

az =iz ān abērtar saham kū =tān hamdādestānīh ī xwēšīhišnīh ēn nimāyišn kird

ka =m andar wizīr dīd ān ōwōn ī =tān nibišt ēstād kū ǰār ēw tā yōǰdāsrgar X rasēd ī ōwōn šōyēd čiyōn pad dēn paydāg ī az bē ka yōǰdāsrgar ī dēnīg astīh az =iz nērangšnāsīh ī hērbed ī xwadāy paydāg az ham bē wizīr kār nēst

bē ēg =iz ōwōn nibēsišn kirdan abēr saxtagnigerišnīh čē az sampadīrišnīh ī yōǰdāsrgarān ān ī wirāyišn abar xwēš xēm rawišn ī paydāg kirdan was zyān adādīh ud škefthandēšišnīh ī mardōmān dusrawīh ī wizīrgar aziš zāyīhēd

ān andar wišeg ī yōǰdāsrgarān pad any rāh hangāštan čimīgtar būd hē

ud ān ī =tān ēdōn nimūd čiyōn ka stūr ēstēd pad paydāgīh hē

u =tān nibišt ēn mānāg kū ast ī az čāštag ēw ēwēnag ī nē šāyēd

čē ēdōn kunišn ī kāmist pad =iz čāštag ī ēw harw nērang ī andar kār šāyēd mānāg passāzišn ō saxwan zūrpahikārdārān mānāgdar nē druyist

čē ka mēdyōmāh xūbtar az čāštag ī abarag frārāst xūb ka harw nērang ēw ī pad čāštag ēw ī xūb

u =š nērang nē wēš paydāg kū bōzišn frārāst pad dārišn

ōh =iz ān ī ka mēdyōmāh sebāršnāyišnīg abarag ēwbāršnāyišnīg guft ī mēdyōmāh pasēmāl ud abarag pasēmāl

nē paydāgīh kunišn tā ka mēdyōmāh bōxtēd

abar ān dādestān ud gōwišn ī abarag dārišn pad bōxtagīh

ān ī abarag guft kū dō yōǰdāsrgar ōh abāyēd mēdyōmāh =iz guft kū ēk was

az ān čiyōn =iš čāštag ī sōšyans hamgugāh pad ān ī =š guft ēdōn hamdādestāntar būd hēnd kū ka ēk ast ašāyēd

čiyōn hamgugāh =iz čand dastwar paydāgēnīd bawēd xwad abarag abārīg hērbedān hamdādestān būd hēnd kū bi.vīkāiiehe , kār

ān ī mēdyōmāh bōxtag nē ēd rāy kū abarag pad ēkbāršōyišnīg bōzišnīgdar kār az čāštag ī abarag kunišn bē ēkbāršōyišnīg az abarag ī pēšēmāl ēk ī yōǰdāsrgar az mēdyōmāh ī wēš gugāh padīrišn rāyēnišn

ud starhangārān =iz ēstišn ī axtarān ǰast ka ān ī mihr māh az zīg ī šahriyārān ān ī kēwān az X zīg ī hindūg ān ī warahrān az zīg ī ptalemayōš kunēnd ēstišn abēr xūb āyēd

ud zūrpassāzišn anārangak abar āwurd guft tuwān kū ēn ēstišn pad ǰast ud zīg ī nē šāyēd

čē agar zīg ī šahriyārān druyist az ān čiyōnīh kēwān warahrān nē az zīg kirdan nē xūbtan

agar X zīg ī hindūg rāst az ān čiyōnīh mihr māh warahrān nē az ān zīg kirdan nē xūb

ud agar zīg ī ptalmayōš rāst az ān čiyōnīh mihr māh kēwān [nē] az ān zīg kirdan nē xūb kē rāy pad ēč zīg nē rāst

ēn sahwarzišn passāxtan tuwān saxtmenišn =iz gīrēnd bē rāstān dānāgān wizīn kunēnd gōwēnd kū ēn ēstišn abēr xūb

čē ān ī pad X zīg ī šahryārān rāsttar az ān ī šahryārān ān ī pad zīg ī ptalmayōs xūbtar ān ē kird ēstēd

ašmāh šnāsēd kū hamgōnag ān ī hangōšīdag ī se čāštag X ī =tān nibišt abāg ēn ī =m nišānēnīd hangōšīdag X kirdan handāxtan framāyēd tā awiš rōšntar wēnēd

az hučašmīh ī abar xwēš bōzišn tēzwīrīh ī anuskārdag abāg āhōg abāznimūdārān hambarīh pad ān ī pēšēnīgān dād ōstīg framāyēd pahrēxtan

čē kē abdīh ud abardarīh ī ān pēšēnīgān uskārdan ud winnārdan menīdan nē šnāsēd xwad dānišn andar ān ī pēšēnīgān xrad nē pad ēr ud hammōzišnīg dārēd xwēš xwēštanmenīh wēšīh =iz ī pad xwēš frahang aziš paydāg xwēš xwēštanmen dādestān čiyōn framāyēd šnāxtan

ēn =iz abar dušxwār ī =tān andar nibišt tēzkāmagīh ī ud ruzdīh ī ō nōg ī dād ud nām ī ārzōg ī paygāmbarīhā dādnihišnīh abar paydāgīhēd čiyōn ān =iz ī =tān abar gōwišn ī az se čāštag ī ud xwurdagčīnīh abar dād nōg tēzbrīnīh kird

u =tān ruzdīh ud wadag rāy , frasnātə̄e ud upasnātə̄e ud , ul hišt , pānzdah

mard ēk ī =š abāz ō pānzdah ī ēk ēw āwurd ud se bār harw bār ēw ēk , hāsr , tā =iz ka ayābēd yōǰdahrgar ud ī tazēd

čiyōn ma agar sīh frasang =iz frāy bawēd kirbag frāzkārīhā se frasang frāy nibišt

ud ān =iz ī ōwōn ī dastwarān dād ēstēd ka ō se kas ī pad ān ī ēwēnag pahikārd ayāb ōy wināh tōzišn awi =š baxšīhēd andar wizīhēned čiyōn ān ī kunišn tōzišn ī wināh nūn ma agar ō hērbed baxšīhēd

čē agar pargast ēč kas nēst kē čiyōn abāyēd yōǰdāsrgarīh xūb kunēnd ēg ašmāh yōǰdāsrgarīh kirdan frēzwānīg bawēd

čē ān ī kār ī ēdōn awizīrišnīg kū ān kē abar rist kū rēman būd ēstēd ā =š star =iz ud māh ud xwaršēd ahunsandīhā padiš tābēnd

ōwōn frayādišnīg ka meh šnāyēnīdārīh ātaxš ud āb ud zamīg ud gōspand ud nar ahlaw nārīg ī ahlaw ē padiš ast

ōwōn wuzurg arz kū kē =š yōǰdāsrīh ī tan nēst ā =š ruwan yōǰdāsrēnīd nē tuwān

ka andar kišwar ēw mard ēw ast kē =š tuwān kirdan ān mard nē pādixšāy bē ka kunēd