Sections

1.0
pursišnīhā čand az paččēn ī hušk ī pursišn
2.0
ka yazišn =ēw kunēnd andar mayān ī ātaxš ud barsom ud zōt rāspīgān āmad ud šud kunēnd ud srawāg ud saxwan gōwēnd šāyēd ayāb nē
3.0
nē šāyēd
4.0
āmad ud šud nē šāyistagīh ī frārāst andar āyišn ud šawišn abestāggōwišn ī rāspīgān ēč nē šāyēd
5.0
ka abestāg guftan ī rāspīgān nē xūbīh zōt ōh gōwišn rāspīgān xāmōš nišīnišn
6.0
āgenēn gōš ō abestāg dārišn
7.0
az abestāg paydāg
8.0
mardōm kē tā tan ī pasēn pad dušox u =š kār ud kirbag kird ēstēd pad ān kār ud kirbag ī =š kird ēstēd ēg =iš mizd ud pāddāšn dahēnd ayāb nē
9.0
nē
10.0
az abestāg
11.0
kē ō ōy nē bē dahānd tā ō ān ī abdom axwān wardišn tā tan ī pasēn tā =š pādifrāh kunēnd ā =š mizd nē dahēnd
12.0
anāgīh ī az gannāgmēnōy ī druwand dādār ī ohrmazd pēš az tan ī pasēn abāz dāštan tuwān ayāb nē
13.0
ka xwadāy ud dastwar ēdōn čiyōn abāyēd dāštan dārēnd anāgīh ī az gannāgmēnōy abāz dāštan tuwān
14.0
ēn ī ka abāz nē šāyēd dāštan az ēd ka xwadāy ud dastwar čiyōn abāyēd nē dārēnd
15.0
az abestāg paydāg
16.0
nē ēdōn axwīgīh windišn kū ān ī ka =š pad gyāg čārag nē šāyēd xwāst ēd rāy ka xwadāy pad xwadāy nē dārēnd
17.0
ud nē dahišn ī radīh az ahlāyīh čēgāmiz kū dastwar ēdōn čiyōn abāyēd dāštan nē dārēnd
18.0
az čē ka mardōm pad xrad dānišn nēk ān ī wad pad menišn menēnd ud gōwēnd ud kunēnd
19.0
az ham pursagīh ī dēwān ka =šān xešm abar dwārīd ēstēd az abestāg paydāg
20.0
ō pursišn abar mad hēnd kū =šān abāg dēwān ōh ham pursīd bawēd
21.0
kē =šān dōšīd ān ī wattar ī pad menišn ēdōn abāg xešm ō ham dwārīd hēnd u =šān wēmārēnīd axwān ī mardōmān kū abāg xešm mardōmān āhōgēnēnd
22.0
ohrmazd pādixšāyīh pad tan ī mardōmān ast kū =šān wināh nē hilēd kirdan
23.0
ohrmazd pādixšāyīh pad tan mardōmān ud andčand =iš wahman pad tan mehmān
24.0
az abestāg paydāg
25.0
mazdā̊ auuat̰ tā ō vaxšat̰ manaŋhā̊
26.0
ohrmazd and xwadāyīh čand andar ōy waxšēd wahman kū pādixšāyīh pad tan ī mard andčand =iš wahman pad tan mehmān
27.0
kē pad dēn ī ohrmazd ud zarduxšt ēstēd ēč dušoxīg bawēnd ayāb nē
28.0
nē čē harw kē pad dēn ī ohrmazd ēstēnd ud zarduxšt yašt hēnd
29.0
harw kē zarduxšt yašt hēnd hamāg garōdmānīg hēnd
30.0
az abestāg paydāg
31.0
frōtāiš vīspāiš cinuuatō frafrā pərətūm
32.0
frāz awēšān harwist pad čīnwidarg franāmēnd kū ān ī zarduxšt yašt hēnd hamāg garōdmānīg hēnd
33.0
mānsr abestāg zand ud wizīr ud dādwarīh ō wināhgārān ud abārōnān ud ahlomōγān čāšīdan šāyēd ayāb nē
34.0
nē čē =š gurg uzwān dād bawēd
35.0
az abestāg paydāg
36.0
vəhrkāi hizuuąm daδāiti yō azrazdāi mąϑrəm cište
37.0
gurg ahlomōγ uzwān dahēd ān rāy andar gēhān stahmagtar bawēd kē ō ōy ahlomōγ mānsr čāšēd
38.0
az ahlomōγān ud abārōnān mānsr ud abestāg zand ud wizīr ud dādwarīh hamōxt ud frašnūd šāyēd ayāb nē
39.0
nē čē dušrawišnīh ud margīh andar šahr ud deh stahmagtar bawēd
40.0
az abestāg paydāg
41.0
māciš at̰ və̄ drəguuatō mąϑrąscā gūštā sāsnā̊sca
42.0
ma kas ēdōn az ašmāh az ōy druwand mānsr niyōšēd hamōzišn kū az ahlomōγān abestāg ud zand ma niyōxšēd
43.0
āzī dəmānəm vīsəm vā šōiϑrəm vā dax́iiūm vā ādāt̰
44.0
čē andar ān daman kadag ud wis ud šōysr šahr deh rōdestāg dahēd
45.0
dušitācā marəkaēcā aϑā īš rōdestāg sāzdūm snaiϑišā dušrawišnīh ud margīh ān ī ahlomōγ ēdōn awēšān ahlomōγān rāy sāzād sneh awēšān ahlomōγān rāy
46.0
kē mard =ēw dušnām dahēd ayāb anāstag ud drō pad =iš gōwēd ēg tōzišn čē
47.0
pad fradom ǰār ka gōwēd se bār gōmēz abar ē āšambēd
48.0
ud pad didīgar ǰār šaš ud pad sidīgar nō
49.0
ud čahārom zanišn u =š srōšōčarnām ud asp aštar abar āhanǰišn
50.0
az abestāg paydāg
51.0
paōiriiehe miϑōxtahe ϑrī maēsmą šamąn ašamāt̰
52.0
pad fradom mihgōwišnīh se abismag pad abarāšambišnīh abar ē āšambēnēd
53.0
bitiiehe xšuuaš ϑritiiehe nauua tūiriiehe ϑrī vā azaiti sraōšō.caranaiia aštraiia
54.0
pad didīgar šaš ud pad sidīgar nō ud pad tasom se zanišn srōšōčarnām aštar
55.0
gōmēz ǰud az ān gāw ēč didīgar šāyēd
56.0
ēn and pad abestāg gōwēd nē šāyēd abārīg hamāg šāyēd
57.0
nōit̰ mairiiehe nōit̰ jahikaiiā̊ nōit̰ sūnō nōit̰ hū.xšaϑriiā̊ nōit̰ daēuuaiiasnō nōit̰ tanu.pərəϑahe
58.0
nē mar ud nē ǰeh ud nē sag ud nē xūg nē dēwēsn ud nē tanāpuhragān
59.0
niyāyišn xwaršēd pad pušt ī stōr šāyēd kirdan ayāb nē
60.0
ka =š widang ayāb ēdōn tuwān
61.0
ka =iz ēstēd ayāb nišīnēd ayāb xuft ēstēd ayāb =iš pad zēn gāwšang hamē barēnd ayāb pad pušt ī stōr ud stōr hamē rawēd šabīg kustīg dārēd
62.0
az abestāg paydāg
63.0
hištəmnō vā ā̊ŋhānō vā daϑānō vā barəmnō vā vazəmnō vā aiβiiāstō aϑa ratufriš
64.0
ka ēstān xēzān ayāb nišīnān ayāb nibayān ayāb barān ayāb wāzān ka aybyāst kū šabīg kustīg dārēd ēdōn radīhā
65.0
ka šabīg ud kustīg nē tuwān dāštan brahnag wišādag ān weh ka niyāyišn bē kunēnd ayāb nē
66.0
niyāyišn bē =š kunišn abēr ud xūb
67.0
az abestāg paydāg
68.0
vaŋharəštascit̰ maγnəṇtascit̰ srāuuaiiōiš
69.0
wišādag =iz brahnag =iz ē srāyēd
70.0
ka =š ēdōn tuwān hād
71.0
yezi ište yezi nōit̰ išti nōit̰ ašauuanəm ainištiš āstāraiieiti
72.0
tuwānīg ēdōn čiyōn xūbtar bē kunišn ka nē tuwānīg nē ān ī ahlaw pad atuwānīgīh āstārēd
73.0
andar wehdēn kirbag kadām weh ud pahlomtar
74.0
dastwarīh ī nēk dāštan
75.0
ahumat̰ ratumat̰ vahištəm vaōcatā spitama zaraϑuštra
76.0
ahūōmandīh ud radōmandīh pahlom gōw spitāmān zardušt
77.0
kəmcit̰ aŋhuš astuuatō aōi
78.0
kadāriz =ēw ox ī astōmand abar ō ahlāyīh
79.0
ahlāyīh rāy ā =šān tis =ēw ēn pahlom gōw rad dastwar
80.0
marəṇtəm vərəziṇtəm sixšəṇtəm sācaiiaṇtəm paitišəṇtəm gaēϑābiiō astuuaitibiiō aṣ̌ahe
81.0
ī ōšmārdār ī warzīdār ī hamōxt ī hamōxtārīh pad nōgxwāyišnīh ī andar gēhān ī astōmand ī ahlāyīh
82.0
ān ī wattartom pad wehdēn wināh =ēw kadām wattar
83.0
dastwar nē dāštan ka dārēd ān ī wad dārēd wattar
84.0
anaŋhauuō aratauuō acištəm
85.0
anahūīh ud aradīh wattartom gōw kē dastwar nē dārēd
86.0
dužaŋhauuō kē ān ī wad ahū dārēd čē kē hambun nē dārēd weh kū ka ān ī wad dārēd
87.0
ēč kār ud kirbag ast ī ka nē pad dastwar kunēnd mardōm
88.0
kē wināh bē āwarēd u =š kirbag ō ruwān rasēd
89.0
nē
90.0
nōit̰ zī tis asraōšanąm tanunąm aṣ̌ahe uruua ciϑiiāi vīδāiti
91.0
čē nē kas ī asrōštan kē kār ud kirbag nē pad dastwar kunēd ā =š ahlāyīh ō ruwān tōžišn wʾwwyt kū =š kirbag wināh bē nē kanēd
92.0
nōit̰ kaiiaδəm haṇdaraite
93.0
u =š nē kastārīh ō ham dārēd kū =š az garmōgwarīh bē nē āwarēd ka ǰuddastwar kunēd
94.0
kadār kirbag =ēw meh ud weh kirbag hamāg meh ud weh ud ka was mad ēstēd ayāb nē
95.0
paydāg kū kadār mehsūdtar ēg =iš yazišn ī yazadān kunišn
96.0
zad daēnaiiā̊ māzdaiiasnōiš srauuō kē pad dēn ī mazdēsnān sraw
97.0
pad abestāg zand bē niger ān ī mehdādestānīhātar pad ruwān ān kun
98.0
srāuuaiiōiš staōta yesniia ay kē pad dēn ī mazdēsnān huahlaw bē niger ud ēk ī mehdādestāntar ān kun ud andar warōmandīh =ēw yazišn kun
99.0
kē mard ī ahlaw ātaxš ī ohrmazd pus nē pad dōst u =š kār ud kirbag ud didīgar dōst ud yazišn =ēw yazadān kunēd ēg =iš ruwān tuwān bōxtan ud pad ruwān tis =iz sūd dārēd ō ān ī pahlom axwān rasēd ayāb nē
100.0
nē čē kē mard ī ahlaw ud ātaxš ī warahrām nē dōst ohrmazd nē dōst
101.0
kē ohrmazd nē dōst ēg =iš kār ud kirbag nē bawēd
102.0
mā zī ahmi nmāne mā aŋ́he vīsi mā ahmi zaṇtuuō mā aŋ́he daŋ́huuō frīm vaōcata mąm yim ahurəm mazdąm
103.0
ma man andar ān mān ma andar ān wis ud ma andar ān zand ud ma andar ān deh dōst gōwē ō man kē ohrmazd ham
104.0
yaϑa mē nōit̰ ātarš ahurahe mazdā̊ friiō aŋhat̰ nāca ašauua frāiiō.humatō frāiiō.hūxtō frāiiō.huuarəštō
105.0
kū andar ān nē ān ī amāh ātaxš ī ohrmazd dōst hēnd mard ī ahlaw ī frāyhumat ī frāyhūxt ī frāyhuwaršt
106.0
kē wināh kird ēstēd pad ānand čand =iš wināh kird ēstēd kirbag abāz kunēd ēg =iš ān wināh az bun bē šawēd ayāb nē
107.0
bē šawēd
108.0
az abestāg paydāg
109.0
tanu.mazō aṣ̌aiiāiti yō tanu.mazō draōxšat̰
110.0
tanmasā ē ahlāyēnēd kū kirbag =ēw tanāpuhr ē kunēd ka =š tanmasā pad drōzišn druxt hād kū =š wināh =ēw tanāpuhr kird hād
111.0
tanu.mazō zī aētąmcit̰ aṣ̌aiiąm pafre
112.0
ka az tanmasā ōy ahlāyīh hambārēd kū =š kirbag =ēw tanāpuhr kird
113.0
yō nōit̰ yauua miϑō mamne nōit̰ miϑō vauuaca nōit̰ miϑō vāuuarəza
114.0
ka =š nē hagriz mih menīd u =š nē hagriz mih guft u =š nē hagriz mih kird
115.0
mard =ēw ī hāwišt =ēw ast ān hāwišt kirbag ī pad dād ud rāh ī =š az wehdēnān abar šawēd ān =iz ī hāwištān ōy hāwišt kunēd ān hērbed ī naxwistīn ān kirbagīhā abar šawēd ayāb nē
116.0
ān kirbag ī pad dād rāh ī ō hāwištān rasēd ō hērbed nē rasēd
117.0
ān ī pad hamōzišn hāwišt ō any hāwišt hamōxtan hērbed =iz ō bawēd
118.0
aēibiiō yōi īt̰ aϑa vərəziiąn yaϑā īt̰ astī
119.0
awēšān ī ān ī hērbed ēdōn ast čiyōn ān ast ān ī warzēnd kū ān ī hāwišt kunēd
120.0
ā =š abar ōh šawēd ān ī hāwišt az kasān abar šawēd ā =š abar nē šawēd
121.0
ahurahiiā zī at̰ və̄ mazdā̊ yasnəmca vahməmca vahištəm
122.0
ān ī ohrmazd yazišn niyāyišn az ān ī ašmāh pahlom
123.0
ēn sraw ēd kē pēš abēr pad hamāg yazišn naxwist xšnaōϑra gōwēnd ud pas ašem wohū
124.0
ud ān sraw ī pēš az ašem wohū abēr gōwēnd kū xšnaōϑra pad čē bōzišn ī az wehdēn bē gōwēnd
125.0
ōy kē pēš abēr xšnaōϑra gōwēnd az ēn abestāg bē gōwēnd
126.0
imā āt̰ uxδā vacā̊ ahura mazdā aṣ̌əm maniiā vahehiiā frāuuaōcāmā
127.0
ēn ēdōn saxwangōwišnīh ī ohrmazd dēn ī ohrmazd pad ahlāyīhmenīdārīh ī weh frāz gōwam pad frārōnmenišnīh
128.0
ϑβąm at̰ aēšąm paitiiāstārəmcā fradaxštārəmcā dadəmaide
129.0
tō ēg ī az awēšān padīrānwazišnīh frāzdahišnīh daham kū az amahraspandān tis ī tō wēš padīrēnd ud pad dahišn wēš bē kunēnd
130.0
ka ēdōn pas az ohrmazd wahman rāy naxwist pas az xšnaōϑra ud ahlāyīh ast ašawahišt stāyēd nē wahman ī fradom ī ō ohrmazd nazdīktom ēd rāy čē ēn =iz gōwēd ham ēn gyāg
131.0
aṣ̌ā aṣ̌āat̰cā hacā vaŋhūšcā manaŋhō vaŋhūšcā xšaϑrāt̰
132.0
az ahlāyīhabāgīh az ašawahišt hamist ān =iz ī weh menišn ī wahman ān =iz ī weh xwadāyīh šahrewar
133.0
ud pad stōdēsnān pahlom yazišn ī ohrmazd
134.0
ud didīgar kirdag pahrēzišn ud āsnīdārīh ī ātaxš
135.0
ud sidīgar kirdag ēdōn yazišn ī ohrmazd kē =š gōspand ahlāyīh =iz dād
136.0
pad abdom kirdag stāyišn srāyišn ud niyāyišn ō ohrmazd
137.0
ud pas ašawahišt gōwēd
138.0
dēg ī xwardīg ka =š āb ī purr ī ǰāmag abar ō ātaxš nihēnd kū bē tābēnd ud bē ayārdēd
139.0
ō ātaxš rasēd wināh čiyōn ka bīm bawēd kū āb bē ayārdēnīd ō ātaxš rasēd wināh čiyōn
140.0
ka =š bīm bawēd kū =š āb ayārdēnīdag abar rasēd ēg ātaxš bīm ōwōn dārēd čiyōn mardōm kē =š padīrag sneh ud tigr ayāb aštar ayāb karsang sāxt ēstēd u =š harw zamān bīm kū =š bē aw =iš zanēnd
141.0
ud ka =š āb abar rasīd ēdōn mānāg čiyōn ka =š ān sneh abar ī rasīd hē
142.0
biβiieiti zī spitama zaraϑuštra ātarš ahurahe mazdā̊ haca yaēšəṇtibiiō aiβiiō
143.0
čē =š bīm spitāmān zardušt ātaxš ī ohrmazd az ān ī ayārdēnīdag āb
144.0
mąnaiiən ahe yaϑa nā snaiϑiš asne niγmatəm paiti.vaēnōit̰
145.0
mānāg ī ōy čiyōn ka mard sneh az nazdīk pad bēzanišnīh abar zanē
146.0
išūm vā arštīm vā fradaxšanąm vā auuat̰ paiti pāpaiiamnō
147.0
tigr ayāb aštar ayāb karsang kōbēn ōwōn bē āhanǰē kū abar bē dēw =ēw madan
148.0
viδuuā̊ auuat̰ hauua xraϑβa yezi mā hāu nā auua snaiϑiša aōi auua.ašnauuāt̰ vī mąm uruuaēsaiiāt̰ astaca uštānaca
149.0
ud āgāh ēdōn pad ān xwēš xrad wahman ēd kū dānē kū man ān mard ān sneh abar bē rasēnēd bē man wardēd az tan ud gyān
150.0
kē zōhr ud esm duzzīdag appurdag ud ān ī ī =š pad frēbbarīh windād bē ō ātaxš dahēd ēg =iš tis =iz kirbag bawēd ayāb nē
151.0
nē
152.0
bē =š wināh =iz bawēd dazēd ātaxš ī ohrmazd ōwōn čiyōn ka =š tab dārēd
153.0
yasca mē tāiiā̊sca hazahīšca viuuāpā̊sca vīuuarā̊sca draōjinō.bərətā̊sca zaōϑrā̊ frabarāt̰
154.0
kē =iz ō ōy ī man ātaxš ān ī az duzz ud appar ud wiyābānīh ud frēbišn ud wīrzīnēnišnīh pad mardōm pad wahāg zīnēnēnd ud drōzanbarišnīh zōhr frāz barēd
155.0
dažat̰ zī mąm auuauuata daxša yaϑa ana maṣ̌iiāka aŋrahe mainiiəuš āhitišca
156.0
dazēd ōy ī man ātaxš ān mard pad and dazišn čiyōn ān mardōm kē gannāgmēnōy āhōgēnīd kū =š tab dārēd
157.0
ātaxš ka =š dast ī rēman ān =iz ī pad šab ka az būšāsp abar āxēzēnd frāz aw =iš ud frāz aw =iš gīrēd ēg =iš wināh čiyōn
158.0
ēdōn čiyōn mard ī zarmān kē abar nasā abganēnd ī gand ud pūdag u =š azēr nasā nigān bē kunēnd ud ān mard zarmānīh rāy azēr ī nasā bē āmad nē tuwān
159.0
stərənaōiti ana auuauuata starəmana yaϑa narəm aṣ̌auuanəm dušcā.zarətəm uparāt̰ naēmāt̰ nasuš aōi auua.ϑrauuit̰
160.0
āstārēnēd ōy ātaxš ī ohrmazd čiyōn mard ī dušzarmān kē =š zarmānīh ō gyān rasīd ēstēd u =š az abardar nēmag nasā abar bē pargēnē kū =š abar frōd āyē
161.0
naēδaca pascaēta hō nā ahmat̰ haca gātaōt̰ isaēta fraš́ūtōit̰ nōit apa.š́ūtōit̰ ϑraiiąm.cina gāmanąm
162.0
ud nē =iz pas ān mard az ān gāh xwāstār hē kū frāz šud nē tuwān hē ud pad frāzšawišnīh ud nē pas pad abāzšawišnīh se =iz gām
163.0
kē wināh kird ēstēd nē dānēd kū =š andar čand yazadān ī mēnōyān ud gētīyān kird ēstēd ēg kadām kirbag =ēw kunēd kē pad ēwarīh dānēd kū =š ān wināh az bun bē šawēd
164.0
ān ī =š nē andar mardōm ǰast pad esm ī frāz ō ātaxš barēd ud yazišn ī yazadān bē šawēd
165.0
aēuuaiiacit̰ aēsmō.bərəiti aēuuaiiacit̰ barəsmō.stərəiti
166.0
pad =iz ēk esmbarišnīh ēw tāg pad ēk barsomwistarišnīh ēwbār
167.0
barəziiā̊ aṣ̌auua zarahehīm drujəm
168.0
pad bulandīh ō ōy ahlaw ahlāyīh dad kū =š buland kird bawēd bē abzāyēnēd kāhišnīh ī druz kū =š bē kāhēnēd
169.0
frāδāiti aṣ̌əm
170.0
frāxēnēd gōspand ud frāxēnēd ātaxš
171.0
vīspəm aṣ̌auuanəm vahištəm ā ahūm ā baraiti
172.0
ud ān harwist ahlawān ō ān ī pahlom axwān barēd
173.0
š́ātəm daϑāiti uruuānəm aṣ̌aōnō irīriϑānahe
174.0
āsānīh ō ruwān ō ān ī ahlaw ī bē widurd
175.0
ēč mard ī ahlaw ast kē pad kirbag =ēw ahlaw būd ēstēd kē ēdōn tagīg ud arwand ō ān pahlom axwān rasēd čiyōn pad rādīh
176.0
ast ān ī kē pad dēnhāzišnīh bē rasēd andar dehān
177.0
hāuca iϑra spitama zaraϑuštra taxmanąm taṇcištō paiti.jasāt̰ yō aēta hišiiānanąm hišiiānōtəməm paiti.jasāt̰
178.0
ān =iz ānōh spitamān zardušt az tagīgīh tagīgtom bē rasēd kē ēdar az hāxtārān hāxtārtom bē rasēd kē =š mardōm ō kār ud kirbag kirdan wēš hāxt ēstēnd
179.0
arəm.maiti humata mamne arəm.ūxti hūxta arəm.varšti huuaršta
180.0
pad bowandagmenišnīh bē rasēd bowandag humat pad menišn menēd pad bowandaggōwišnān bē rasēd bowandag hūxt pad gōwišn gōwēd pad bowandagkunišnān bowandag huwaršt pad warzišn warzēd
181.0
pad mēnōyān ēč kas ast kē pad gōwišn ēdōn ahlaw būd ēstēd čiyōn ōy ī hāxtār u =š pad mēnōyān gōwišn wābarīgāntar
182.0
ānē ān kē =š ǰādaggōwīh wizīr wēš kird ēstēd abāz aw =iš dād ǰādaggōwīh wizīr wēš kird ēstēd abāz aw =iš dād ǰādaggōwīh wizīr wēš kird ēstēd
183.0
hāuca iϑra spitama zaraϑuštra uxδō.vacaŋhąm uxδō.vacastəmō paiti.jasāt̰ yō aēta etc driγūmca drīuuīmca araϑβiiō.bərəte barəmne paiti.jasāt̰
184.0
ān =iz ī ānōh spitamān zardušt pad saxwangōwōmandīh saxwangōwtom bē rasēd kē ēdar abarguftārtom bē rasēd ī driyōšān mardān zanān kū ǰādaggōwīh ī driyōšān mardān zanān wēš kird ēstēd kē =šān pad abārōn abārōnbarišnīh burd ēstēd xwāstag
185.0
huuąm.cit̰ ahmi huuąm.cit̰ xšaϑre auuat̰ cōišta
186.0
xwad =iz pad ān ī ēd kū ōh kunēd pad =iz ān ī xwēš xwadāyīh ēdōn čāšt ō kasān kū ōh kunēd
187.0
ud ān ī hufraward ādurbād māraspandān pad frahang ō hāwišt =ēw guft kū niyāyišnōmand ud āštīhōmand bowandagmenišn rād akēn bāš
188.0
ēn hunarān čiyōn ō xwēš šāyēd kirdan
189.0
čiyōn dēn gōwēd
190.0
yeŋ́he vacaŋhō nəmaŋha žnāϑrəm
191.0
kē =iz ān ī ōy gōwišn pad niyāyišn šnāsēnēd kū šnāsagīh ī pad dēn ān zamān bawēd ka =š tan abar bē rādēnēd
192.0
āxšti saxəδrəm
193.0
u =š pad āštīh hamōxtišn ī ud pad dēn kū āštīh abāg hērbedān pad ān zamān bawēd kē abāg hērbedān āšt bawēd
194.0
ārmaiti darəϑrəm
195.0
u =š pad bowandagmenišnīh dārišn kū =š bowandag bowandagmenišnīh ī pad dēn ān ī zamān bawēd ka bowandagmenišn bawēnd hērbedestān bowandagmenišnīhā bē kunēd
196.0
frārāiti vaēidīm
197.0
u =š pad frāzrādīh āgāhīhākirdārīh kū =š kirdārīh ī pad dēn pad ān zamān bawēd ī ka tan bē ō hērbedān rādēnēd
198.0
ainiti aēšō vāxš
199.0
akēn gōwišn ī ōy mard kū =š gōwišn pas awināhīhā ka ēn hamāg tis ēdōn kunēd čiyōn guft
200.0
mard ī agdēn kē gōwēd hād pad wehdēnīh āstawān ham ōy =iz wehdēn az čē bē šāyēd dānistan kū dēn pad tan mehmān
201.0
az ēn ī dēn gōwēd
202.0
kat̰ tē asti ahunahe vairiiehe haiϑim
203.0
kadār tō ast ān ī ahunawar āškārīh kū čiyōn bawēd ka rōšn bawēd kū =š dēn pad tan mehmān
204.0
paiti šē aōxta ahurō mazdā̊ manō bā vohu zaraϑuštra aδaōiiamnəm aδaōiiamnāt̰ xrataōt̰
205.0
passox =iš ō ōy guft ohrmazd kū menišnīg ud weh zarduxšt kē =š ān ī ēwagīhā xrad abāg ōh =iš az guftan kirdan paydāg
206.0
zazuš vīspaēšu vaŋhušu zazuš vīspaēšu aṣ̌ō.ciϑraēšu
207.0
ī griftār harwist ābādīh ud griftār harwist ahlāyīhpaydāgīh ī bun ud bar
208.0
bowandagtar dānist xwāham kū bē dānam kū menišn ox ud xrad bē wirāst ēstēd
209.0
az ēn manaŋhasca humaiti hizuuasca hūxti zastaiiā̊sca huuaršti raϑβiiō.varšti az menišn humat uzwān hūxt dast ī huwaršt ān ī frārōn kunišn warzēd
210.0
ohrmazd nazdīh ī ō tan ī mardōm tā čand drahnā menišn gōwišn ud kunišn ī mardōm and čand bē āyābēd
211.0
pad dēn az wēnīg tā gōš ayāb az gōš tā tlg gōwēd az man bē nazdtar =iz
212.0
nazdiiā̊ ahmi zaraϑuštra azəm yō ahurō mazdā̊ vīspahe aŋhūš astuuatō manā̊sca vacā̊sca š́iiaōϑnaca
213.0
nazdīk ham zarduxšt ud an kē ohrmazd ham harwist ox ī astōmand menišn gōwišn ud kunišn
214.0
yaϑa nā̊ŋha haca gaōšaēibiia yaϑa vā gaōša haca ϑraŋhibiia
215.0
čand az wēnīg tā ō gōš ayāb čand az gōš ō ϑarγ
216.0
ka parāhōm xwarēnd naxust didīgar wēš ud sidīgar wēštar xwarēnd šāyēd ayāb nē
217.0
nē xūb nē kunišn
218.0
xwarōiš haōməm zaraϑuštra bisarəmca ϑrisarəmca yaϑa ϑrisarəm nitəməm
219.0
xwarē hōm zarduxšt pad dōkunišnīh sekunišnīh ēdōn pad sekunišnīh nidom bār ī sidīgar kem xwar ud dastwarān pad harw bahr =ēw az panǰ bahr =ēw se bahr xward guft hēnd
220.0
ān aṣ̌əm šaš ka ʾwwtʾl nē gōwēnd u =š saxwan andar gōwēd šāyēd ayāb nē
221.0
nē vīspaēca aṇtarə aṣ̌əm upa.stuiiā̊
222.0
harwist andarg ī ahlāyīh xūb čē ē stāyēnd rāspīg
223.0
fraōrət̰ fraxšni aōi manō zarazdātōit̰ aŋhuiiat̰ haca
224.0
pad franāmišn ī was kū was bār ō ēn kār franaftīhā abar pad menišn kū menišnīg franaftīhā pad rawāgdahišn ī az ahū =ēw pad dastwar
225.0
ka harw šaš pad ēwbār bē gōwēd šāyēd ayāb nē
226.0
nē šāyēd
227.0
ma agar dēw ēzagīh =iz bawēd u =š harw dō aṣ̌əm bē gōwišn
228.0
u =š bē pāyišn tā abāg xwarēd u =š pas aṣ̌əm gōwišn
229.0
vīspā̊ aṇtarə viiānīš
230.0
u =š pad harwisp andarg bē pʾlyhʾ kū =š bē pāyē
231.0
mardōm kē yašt yazišn ī was bē framāyēd kirdan ud ān ī yašt stāyišn yazišn ud azbāyišn ī yazadān hamāg ēkgōnag abestāggōwišnīh
232.0
ān ham ka =š ēkǰār ān abestāg bē ōšmurdan ēzišn =ēw ī xūb bē kird andar ham rōz ud ham zamān
233.0
ān ham yazišn bun abāg kunēd ud didīgar kirdan
234.0
mizd ud wābarīgānīh az wasōšmurišnīh pad čē čim
235.0
ud yazadān pad ān apardazišn ud az āšnawišn ud āfrīnpassoxīh ranǰag ud garān =mān nē bawēnd u =šān dušwār nē sahēd
236.0
nē čē =šān ēdōn xwaš ud hubōy ud abd sahēd čiyōn andar ox ī astōmand mard ī xwāstagkāmag pad tuwānīgīh ī =š az xwāstag rāy harw abāyišn ī pad =iš ā =š pad tuwānīgīh abzōn u =š ēdōn xwaš sahēd
237.0
ān mard pad harw ēzišn =ēw ī bē kunēd ayāb bē framāyēd kirdan ēg =iš tuwānīgīh ēdōn abzāyēd čiyōn andar gētī mōy ī pad tāg
238.0
ud ka was ō ham kunē ēg ruwān =iz ī ōy mard abzāyišn ī az kirbag nērōg pad ān hangōšīdag
239.0
u =š gētīyīhā āfrīn ī dahmān pad harw ēzišn =ēw kē sar bē kunēd ēg =iš nērōg ī ān āfrīn abar rawēd čiyōn uštar ī aγrī ī mast
240.0
yeiti catica spitama zaraϑuštra dahmō aṣ̌auua hauruuū ratūš daϑat̰
241.0
kē ān =iz ī spitāmān zarduxšt ud dahm mard ī ahlaw hamē radīh dahēd harw ēzišn =ēw ī sar bē kunē
242.0
at̰cit̰ dim aiβiiāiti yā dahma vaŋᵛhi āfritiš uštrahe kəhrpa aγriiehe aγriiō.maδu.mastəmahe
243.0
ēg =iz ān ō ōy abar rawēd kē dahmān wehān āfrīn pad uštar tan ī aγrī kē =š ān ī mast ud aγrīmastīh
244.0
dēwān ud mardōmān ī wad ud ǰādūgān parīgān sāstārān āfrīn ī dahmān nēk wānīdan abesīhēnīdan nizār kirdan tuwān ayāb nē
245.0
nē
246.0
nōit̰ tē ahmāt̰ drājiiō.yeitīm framraōmi spitama zaraϑuštra yąm dahmąm vaŋᵛhīm āfritīm
247.0
az nē tō az ān drōzēnīdagtar frāz gōwam spitāmān zarduxšt kū pad tan ī ān mard wēš nizār kirdan nē šāyēd kē dahmān wehān āfrīn
248.0
yūnat̰ haca humanaŋhat̰ huuacaŋhat̰ huš́iiaōϑnāt̰ hudaēnāt̰
249.0
az ǰuwān ī humenišn hugōwišn hukunišn hudēn kird ēstēd
250.0
yaϑa pāuruuō aēuuō.gauuō aēuuō.armō raŋhąm auua.naiieiṇtīm sauuauuā̊ dət̰ cišāite
251.0
čiyōn paurune ēksōg ēkarm ka az arang āb pad bēbarišnīh pad sōg mar abesīhēnīdan kāmist u =š abesīhēnīdan nē tuwān ēdōn =iz ān āfrīn pad tan ī ān mard nizārtar bē nē bawēd
252.0
mard kē widerān bawēd ēg =iš kadām mizd weh kē =š wirāyišn ī ruwān pad =iš
253.0
u =š kadām yazad abar pādixšātar kē =š ō xwēš kunišn ud kū =š ruwān pad =iš warzēd
254.0
u =š kāmag ī ruwān pad kadām kirbag wēš xwāyišn
255.0
wirāyišn ud pašēmānīh az wināh pad ān ī ohrmazd radīh mizd
256.0
u =š srōšyazad abar pādixšātar
257.0
u =š kāmag ān kū abāg bōy ruwān ī gōspandān ka ātaxš zōhr dahēnd pad sraxtag ī ātaxš abar nišīnēd
258.0
kat̰ tē rāzarə̄ tat̰ zī mazda
259.0
kadār ēd ī tō wirāyišn ēdōn pad ān ī ohrmazd abar
260.0
at̰ mōi at̰ rātąm uxδax́iiācā sraōšəm xšaϑrəmcā
261.0
pad ān ī man radīh saxwan ud pad ān ī srōš xwadāyīh
262.0
para tē gaōspəṇta gaōhudā̊ baōδasca uruuānəmca fraēšiiāmahi nazdišta upa ϑβarəšta raōcā̊ narš cašmanā̊ sūkəm
263.0
bē tō gāw ī abzōnīg hudahāg bōy ruwān framāyēm kū ān gyāg šawēd ō ān ī nazdist abar brēhēnīd rōšnīh ī mard čašmwēnišnīh sraxtag ī ātaxš
264.0
widarg ī ō ān ī pahlom axwān kē xwār bē kunēd
265.0
ruwān ī widardān ā =šān kadām yazadān āsānīhdādārtar
266.0
ašawahišt pad ayārīh ī dastwarān
267.0
u =šān az bulandwarzišnīh humenišnīh gyāg ī nēk ōy ī ahlaw bē widard ēg =iš ham ašawahišt āsānīh dahēd
268.0
aṣ̌āi vahištāi yat̰ hupərəϑβəm dāštō.ratu
269.0
ašawahišt kē =iz widarg ō ōy ī murd kē ēdar dastwar dārēd ā =š rāh ānōh xwār bē kunēd
270.0
bərəzat̰ varəzi.haōmanaŋhəm
271.0
u =š bulandwarzišnīh humenišnīh
272.0
yat̰ irīriϑānahe aṣ̌aōnō š́ātəm daϑāiti uruuānəm
273.0
kē ōy bē widurd ahlaw ā =š āsānīh dahēd ō ruwān
274.0
rādīh ī niyāyišnōmand kadām
275.0
paydāgīh ī rādīh az čē
276.0
rādīh ō kē bawēd
277.0
az čē bē šāyēd dānistan kū =š rādīh kird bawēd
278.0
rādīh ī niyāyišnōmand ān ī kē =š tis ī abāg bē dahēd
279.0
paydāgīh ī rādīh az ēd ka nē pāddāšn rāy ud az ān ham paydāgīh bē dahēd
280.0
ud ō xwēšdēnān ahlaw dahēd
281.0
ud az ēn bē šāyēd dānist ka ān ī bē dahēd frāz paydāg ka ēdōn kunēd ēg =iš ān rādīh andarg ī mardōmān yazadān āškārag kird bawēd
282.0
āuuišca nā̊ aŋtarə hə̄ṇtū nəmaxᵛaitīš ciϑrā̊ rātaiiō
283.0
āškārag ō amāh andarg hē rādīh niyāyišnōmand kū =š tis abāg bē dahēd paydāg rād kū paydāg bawēd kū rādīhā kird bawēd
284.0
tā̊ āuuiš yā̊ rātaiiō aṇtarə aməṣ̌ə̄sca spəṇtə̄ saōšiiaṇtasca
285.0
awēšān āškāragīh gōwam kē rādīh andarg amahraspandān sūdōmandān
286.0
frārāitīšca vīdīšā̊sca aṇtarə xwādaēnāiš aṣ̌aōnīš
287.0
frāzrādīh ud bēdahišnīh gōwam andarg ī xwēšdēnān ahlawān
288.0
kē xwēštan wēš menēd kū ān ī =š xrad hunar ēg =iš wināh bawēd ayāb nē
289.0
u =š wināh tā čē pāyag
290.0
u =š dādestān čiyōn
291.0
wināh bawēd u =š wināh ī garān
292.0
u =š pāyag tanāpuhr ud rāh ō dušox
293.0
āat̰ yō aētahmi aŋhuuō yat̰ astuuaiṇti spitama zaraϑuštra upairi hunarəm manō barāt̰
294.0
kē abar andar ox ī astōmand spitāmān zarduxšt abar az hunar menišn barēd kū xwēštan pad ān hunar menēd ī =š nēst
295.0
vīspəm aētəm paiti zruuānəm astarəma uruua kāšaiiāt̰
296.0
harwisp ōy abar pad ān zamān ā =š āstard ō ruwān kunēd kū wināh andar bē dārēd
297.0
ka pad patit bēd bē wirāyēd ud abāz ō sar ī wināh nē šawēd ēg =iš tōzišn čē
298.0
tōžišnīh ham ān patit
299.0
vīspəm ā ahmāt̰ yat̰ hē manahi paiti auua.barāt̰
300.0
ān tā ō ān ka ōy az ān menišn frōd barēd kū menišn abāz ō paymānag āwarēd pad patit bēd
301.0
āat̰ yat̰ hē manahi paiti auua.baraiti
302.0
ka ōy az ān menišn frōd barēd kū =š menišn abāz ō paymānag āwurd pad patit bawēd
303.0
pascaēta azəm yō ahurō mazdā̊ hauuāi urune uruuāsma daēsaiieni
304.0
pas an kē ohrmazd ham ā =š ō ān ī xwēš ruwān urwāhmenīh nigēzam mizd
305.0
vahištəmca ahūm anaγraca raōcā̊ afrasanhąnca xᵛāϑra
306.0
ō ān ī pahlom axwān ō ān ī asar rōšnīh ud ān ī asazišn xwārīh
307.0
vīspāiiūmca uštatās yā narš sādra drəguuatō
308.0
hamēzīndag ud hamē nēkrawišnīh ka mard widang ī druwand ān mizd ud pāddāšn ī andar zamān bē dahēnd ka druwandān pādifrāh kunēnd
309.0
ka mardōm hamāg dām ohrmazd hēnd ud ohrmazd xwābar ēn agdēnān ud anērān kē pad dōstīh ī ohrmazd agdēnīh ud anērīh kunēnd ēg =išān pad mēnōyān kār čiyōn bawēd
310.0
agdēn ud anēr az ān čiyōn pad frāybūd ud ēbbūd was kirbag pad wināh ud was wināh pad kirbag pad kird dārēnd u =šān dušhamōxtīh ī ō mard ī ahlaw ud ātaxš ī warahrān čihrīg nē pad dōstīh ohrmazd dārišn
311.0
ān kē nē pad dōstīh ohrmazd dārišn ahlaw būdan nē tuwān
312.0
mā zī mā ahmi nmāne mā aŋ́he vīsi mā ahmi zaṇtuuō mā aŋ́he daŋ́huuō frīm vaōcata mąm yim ahurəm mazdąm
313.0
ma andar ān mān ma andar ān wis ud ma andar ān zand ud ma andar ān deh dōst gōwā ō man kē ohrmazd ham ma gōw kū =m dōst hēnd
314.0
yaϑa mē nōit̰ ātarš ahurahe mazdā̊ friiō aŋhat̰ nāca aṣ̌auua frāiiō.humatō fraiiō.hūxtō frāiiō.huuarəštō
315.0
kū andar ān nē ān ī man kē ātaxš ī ohrmazd dōst hēnd ud mard =iz ī ahlaw ī frāyhumat ī frāyhūxt ī frāyhuwaršt nē dōst hēnd
316.0
ohrmazd xwadāy ō zarduxšt ī spitāmān kadām kirbag ī ēzišn pahlomtar guft kū ō mardōmān gōw
317.0
ān ohrmazd ud ātaxš ud mard ī ahlaw ēzišn ud niyāyišn ud hubarišnīh ud nēkbarišnīh ud ayārbarišnīh
318.0
para mē aētahmi aŋhuuō yat̰ astuuaiṇti spitama zaraϑuštra ϑrišcit̰ vahišta aŋᵛhe astuuaite vīsata
319.0
bē =iz man rāy andar ox ī astōmand spitāmān zarduxšt se pahlomīh andar ox ī astōmand padīr kū gōwam ud gōw
320.0
manaca yasnəm yat̰ ahurahe mazdā̊ āϑrasca ahurahe mazdā̊ yasnəmca vahməmca hubərəitīmca ušta.bərəitīmca vaṇta.bərəitīmca
321.0
ān ī man ēzišn kē ohrmazd ud ātaxš ī ohrmazd yazišn ud niyāyišn ud šnāyēnīdārīh ud frāzwābarīgānīh
322.0
naršca ašaōnō xšnūitīmca ārəitīmca viiādā̊sca paiti paiti.zaṇtaiiasca frāiiō.humatahe frāiiō.hūxtahe frāiiō.huuarəštahe
323.0
mard =iz ī ahlaw šnāyēnīdārīh ud tarsagāhīh ud bēdahišnīh ud padīrišnīh frāyhumat frāyhūxt frāyhuwaršt
324.0
kē xwāstagkāmagīh rāy kū xwāstag az dast ī wattarān bē gīrēd kū pad kār kirbag ī wehān ud frārōnān uzēnag kunēd ud pad kāmag ī wattarān drang ī gētīzīyišnīh rāy drō gōwēd čiyōn bawēd
325.0
mēnōyān ox az =iš appār bawēd
326.0
māca tē iϑra spitama zaraϑuštra astuuatahe aŋhūš didrəzuuō pīsa manahīm ahūm paiti.raēxšīša
327.0
ma =iz tō ēdar spitāmān zarduxšt ī astōmand axwān druzuzwān pēsišn rāy pēsišn ī xīr ī gētī rāy kūtā az zarr ud asēm xwāstag bawād mēnōyān axwān bē rānēnē kū appār kunēnd
328.0
kē kunēnd ēg =iš wināh čē
329.0
pad gētīyīhā nē xwāstag ud nē ahlāyīh ud pad mēnōyān ēg =iš nē ān ī pahlom axwān bē dušoxīg
330.0
yō zī spitama zaraϑuštra astuuatahe aŋhūš didrəzuuō pīsa manahīm ahūm paiti.irinaxti
331.0
kē tō ēdar spitāmān zarduxšt ox ī astōmand druzuzwān pēsišn rāy pēsišn ī xīr ī gētī rāy kūtā az zarr ud asēm ud xwāstag bawād mēnōyān axwān bē appārēnēd kū appār kunēd
332.0
nōit̰ hē gāuš buuat̰ nōit̰ aṣ̌əm nōit̰ raōcā̊ nōit̰ vahištō aŋhuš yō mana yat̰ ahurahe mazdā̊
333.0
nē ōy gōspand bawēd nē ahlāyīh ud rōšnīh ud nē ān ī pahlom axwān ī man kē ohrmazd ham ā =m xwēš
334.0
buuat̰ vīspanąm acištəm paōšištəmca yat̰ ərəγat̰ daōžaŋhum
335.0
čē =š bēd ān ī harwist ud wattartom ud pūdagtom kē druwand dušox
336.0
arz ī wehdēn ī mazdēsnān ast ud agar =iš arz ast ēg =iš arz čand
337.0
dēn arz ānand čand harwist ahlāyīh ud tēr ud šuhr ī meh ud weh ud nēktar
338.0
ud ān =iz pad windišn ī dēn šāyēd guftan pad ǰōrdā
339.0
ud čand dēn arz guftan nē andar dānišn ī amāh
340.0
yauuat̰ nū aṣ̌a vanaiti spitama zaraϑuštra vīspa taršuca xšudraca vanaiti ana masanaca vaŋhanaca sraiianaca
341.0
ānand nūn ahlāyīh windēd spitāmān zarduxšt kū dēn arz ānand windišn čand harwisp ān ī tēr ud ān =iz ī šuhr windēd ān =iz ī meh ī ud weh ud nēktar
342.0
mard kē =š pādixšāyīh nēst u =š brādarān xwēšān nē ayār bē hamēmāl =iz bawēnd u =š pad =iz tan nērōg ud tuwānīgīh ud pādyāwandīh nēst kū dēn ō xwēš kunēd ud ahlāyīh warzīdār bawēd ka dēn nē dārēd ēg =iš pad mēnōyān griftārīh bawēd ayāb nē
343.0
bawēd čē dēn pad dōstīh ud dōšāram abāyēd dāštan nē pādixšāyīh ud pādyāwandīh ud tuwānīgīh
344.0
nōit̰ nmānō.baxtəm nōit̰ vīsə.baxtəm nōit̰ zaṇtu.baxtəm nōit̰ daŋ́hu.baxtəm
345.0
nē kē pad mānbazišnīh nē kē pad wisbazišnīh ud nē kē pad zandbazišnīh ud nē kē pad dehbazišnīh
346.0
ān kas kē =š dādwarīh ud mowbedīh ud radīh mēnōyān hugriftīh bē tuwān dād ā =š dēn ō xwēš kirdan nē tuwān
347.0
nōit̰ framānīm brāϑranąm āzūzušte
348.0
ud nē kē pad framān pad =iš brādarān pad dōšišn ul dōšīd ēstēd kū andar xānag pad pēšōbāyīh dāšt ēstēd
349.0
nōit̰ astō hutaštīm nōit̰ tanuuō hurustīm
350.0
x x x kē tan ī hurust kū nēk rust ēstēd ā =š dēn ō xwēš kirdan nē tuwān
351.0
tat̰ zī aṣ̌auuat̰ zaraϑuštra cinma kahiiācit̰ anhūš astuuatō yō aṣ̌ahe cinmauuastəmō aŋhat̰
352.0
čē ān ahlāyīh zardušt dēn pad dōšāram ī kadāriz =ēw ox ī astōmand kē dēn ō xwēš kunēd ā =š pad dōšāram ō xwēš kirdan kē ahlāyīh dōstmenišnīgtom ast kū dēn dōsttar ast
353.0
kē kār ud kirbag wasyār kunēd ud tis ō driyōšān nē dahēd ēg =iš ruwān tuwān bōxtan
354.0
x čē =š pad sar ī puhl naxwist ēn pursēnd ī driyōšān ayārīh
355.0
ka =š driyōšān ayārīh nē kird ēstēd ēg =iš ēč tis ī didīgar nē pursēnd
356.0
nōit̰ nū aētahmi aŋhuuō yat̰ astuuaiṇti spitama zaraϑuštra aēuuō nōit̰ duua nōit̰ ϑrāiiō nōit̰ frāiiaŋhō aṣ̌ahe
357.0
nē nūn andar ox ī astōmand spitāmān zarduxšt ēk nē ud dō nē ud se nē frāy pad ahlāyīh
358.0
nōit̰ aṣ̌aiia frāšəṇti yōi nōit̰ driγaōš aṣ̌ō.t̰kaēšahe auuaŋhasca ϑrāϑraheca pərəsā̊ṇte
359.0
ud nē pad ahlāyīhēnīdārīh ō ham pursēnd tis ī frārōn kē kirdan dānistag frārōn az ān tis kē kirdan ud dānistan ī kār ud kirbag u =š nē ham pursīd bawēnd kē nē driyōš ī ahlawdādestān rāy ayār ud srāyišn ō ham pursēnd
360.0
kē dānāg pad kār ud kirbag kirdan tuxšāg ud abestāg ud zand pad kār nē dārēd ō ān ī pahlom axwān rasēd
361.0
nē čē hudānāg būdan ud kār ud kirbag čāštan nē dānēd hudānāg būdan nē šāyēd
362.0
pouru š́iiaōϑna huδānuš afracītis hauuāi urune afrauuaōcō hauua hizuua
363.0
pad was kār hudānāg pad was kār ud kirbag =ēw ī frārōn ud afrāzčāšīdār ō ān ī xwēš ruwān nēkīh ud afrāzguftār pad zand pad xwēš uzwān ō kasān tis ī frārōn
364.0
yō nōit̰ mąϑrāt̰ spəṇtāt̰ ā awindišnōmand kē mard ī druwand ruwān kū tis =iz ud nēkīh nē windēnd
365.0
mard =ēw ī agdēn ayāb anēr kē pad nēkīh ud ǰuttarīh abāg wehdēnān hamband ud nēkīh ud ǰuttarīh ī wehdēnān pad xwēš dārēd wehdēnān rāy ayārīh kunēd pad abzār wehdēn ud hambandīh ī kār ud kirbag ahlāyīh pad xwēš šāyēd dāštan ayāb nē
366.0
nē
367.0
nōit̰ hāu sūrō zaraϑuštra yō nōit̰ aṣ̌a sūrō
368.0
nē ān abzār zarduxšt kē nē pad ahlāyīh abzār
369.0
kē nē pad kār ud kirbag hamband nē pad hamband dārišn
370.0
ēn artēštārān ī anērān kē abāg turkān ud amāh anērān ǰudsardag hamē kōšēnd ud awēšān az wināhišn ī amāh abāz hamē dārēnd ēg =išān pad ān tagīgīh ud amāwandīh kirbag ō ruwān rasēd ayāb nē
371.0
nē čē nē pad tagīg dārišn hēnd
372.0
nōit̰ hāu taxmō yō nōit̰ aṣ̌a taxmō
373.0
nē ān tagīg kē nē pad ahlāyīh tagīg kē nē pad kār ud kirbag kirdan tagīg nē pad tagīg dārišn
374.0
kē pad kār ud kirbag was tuxšāg tis ī frārōn az ān ī abārōn bē wizīnēd ān ī frārōn pad dām ī ohrmazd sūdōmand ī abzāyēnīdār dēn rawāg nē kunēd ēg =iš ān ī kirbag bawēd ayāb nē
375.0
ān nē pad kār ud kirbag tuxšāg ud ān nē wizīnīdār ud ān nē sūdōmand ud ān nē abzāyēnīdār ud ān nē wehīh ud ān nē kār ud kirbag kē wehdēn rawāg nē kunēd
376.0
nōit̰ hāu ās vaōze zaraϑuštra nōit̰ ahmāt̰ vašata
377.0
nē ān wāzēnīdār zarduxšt kū =š tis =ēw ī frārōn rawāg nē kird bawēd nē =iz az ān wāzēnēd az nūn frāz ud nē az ān ast kū wāzēnišn u =š nē kunēnd kird bawēd
378.0
yō nōit̰ ašahe vahištahe bərəja framərətahe maiiā̊ vaōze
379.0
kē nē ahlāyīh pahlom pad ārzōgōšmurišnīh pad paymān wāzēnīd kū dēn ud kār ud kirbag ēdōn čiyōn
380.0
abāyēd rawāg kirdan rawāg nē kunēd
381.0
az čē bē šāyēd dānistan mard ī paydāg mizd kū =š pad mēnōyān ān ī meh mizd ī =š kird ēstēd rāy ahlaw būd ēstēd
382.0
az ēd bē šāyēd dānist kū =š ahlaw mardān zanān ēg =iš srāyišn dādārīh kird ēstēd
383.0
u =š abāg ahlawān kem harw dāšn kird ēstēd
384.0
yō nōit̰ narəm aṣ̌auuanəm xᵛāhuua aϑāhuua jasəṇtəm xšnaōšta vā xšnāuuaiieite vā
385.0
kē nē mard ī ahlaw andar ān ī xwēš ābādīh xwāstag ī xwēš ā =š ka rasīd ā =š šnāyēnēd ī nūn u =š šnāyēnēd az nūn frāz
386.0
taēca spitama zaraϑuštra aŋhūš vahištahe ciϑre paitiiā̊ṇti
387.0
awēšān spitāmān zarduxšt andar ān ī pahlom axwān pad ān ī pahlom paydāg bawēnd pad mizd
388.0
yōi aŋhən nərəbiiō aṣ̌auuabiiō aiiaptō.dātəmasca aspərəzō.təmasca
389.0
kē hēnd mardān ahlawān āzādīhdādārtom ud spurrīgīhdādārtom ān hamakōxšišnīh dādārtom
390.0
druwandān dēn dušmenān ayārīh kirdan tis dādan šāyēd ayāb nē
391.0
nē čē ahlāyīh bē kāhēd
392.0
hō daδō aṣ̌əm upa.raōδaiieiti yō druuaite daδāiti
393.0
ō ān dēn ahlāyīh bē kāhēd kū ahlāyīh az =iš appār bawēd kē ō druwandān tis dahēd
394.0
gāϑβōištacit̰ vaca
395.0
pad gāhānxwāhišnīh =iz guft ēdōn čiyōn rad čē gōwam ham pad =iz gāhān guft
396.0
huuō zī druuā̊ yə̄ druuaite vahištō
397.0
kū ān druwand pad wizīr kē ō druwandān pahlomīh kē tis ō druwandān dad andar warōmandīh =ēw pad druwand dārišn
398.0
pad gētī ud mēnōy čē pahlom
399.0
ahlāyīh ī ābādīh ī pahlom
400.0
ābādīh ī gētī ud ahlāyīh ī mēnōy
401.0
ābādīh ī gētī čē kē pad ābādīh ī kunēd ēg =iš ahlāyīh ī mēnōy kird bawēd
402.0
az ahlāyīh ī mēnōy bē ka ābādīh ī gētī ast
403.0
aṣ̌əm vohū vahištəm astī
404.0
ahlāyīh ābādīh ī pahlom ast
405.0
kē ahlāyēnīdār ēg =iš pad mēnōyān mizd pāddāšn az kū dahēnd
406.0
az ān ī wahman dahišn
407.0
aṣ̌āt̰cīt̰ hacā vaŋhūš dazdā
408.0
az ahlāyīh čēgāmiz =ēw ān =iš ī wahman dahišn
409.0
dō mard ēk abāg did pahikār ud harw dō brād hēnd
410.0
ēk gōwēd kū pidar ī man wāhmān dō xwāstag ō man dād
411.0
frāz ō dādwarān šawēnd ud andarz ī pidar pad dādwarān dārēnd
412.0
ud pad andarz ōwōn gōwēd kū =m wāhmān xwāstag ō wahmān pusar dād
413.0
ud nūn =iz ān pusar ōwōn gōwēd kū
414.0
ān kē pidarān guft kū =m wāhmān xwāstag ō tō dād frāz gīr pad ān kē =š nām burd u =š dādan nē guft ēg =iš nē dād bēd u =t nē dahēm
415.0
dādwar wizīr čiyōn kunišn
416.0
dādwar harw dō xwāstag ō ōy abespārišn
417.0
čē agar ōh =iz ēg =iš pad abdom dād nē guft
418.0
ēg =iš pad mayān xwāstag ud xwāstag dād guft u =š xwēš
419.0
apascā dāt̰ uruuarā̊scā vaŋᵛhiš
420.0
u =š āb =iz dād urwar =iz ī weh
421.0
ud nē kū =š dād pad āb guft u =š urwar nē guft čē =š āb ud urwar harw dō dād
422.0
dādwar ka xwēš tis pad gugāhīh šāyēd ayāb nē
423.0
nē
424.0
yat̰cit̰ dim dauua dātōiš uzrātiš
425.0
agar =iz ān kē dādwar pad dahišn ul nigerā
426.0
nōit̰ aētahe uzarənō naēδa varō auuauuāite
427.0
nē ōy pad ān ulnigerāyīh ā =š nē bē rasēd
428.0
tan ast ēčand ō kārezār ayāb ō naxčīr šawēnd
429.0
ud az kārezār xwāstag az zamīg ud gyāg az abzār ud abārīg tis
430.0
ayāb az naxčīr gōšt ud pōst ud astag ud srū ud parr ud abārīg ī pad naxčīr mehmān bē āwarēd
431.0
ān xwāstag ēg =išān pad āgenēn xwēš ayāb ān xwēš kē ān xwāstag pad tay bē āwarēd
432.0
ka ō kārezār šawēnd bē ka pašn kunēnd kū hamwindišn hēm ēnyā ǰudwindišn hēnd
433.0
pad naxčīr bē ka pašn kunēnd kū ǰudwindišn hēm ayāb hamwindišn hēm ēnyā hamwindišn hēnd
434.0
mard =ēw kē =š tanāpuhr ō bun bē ēstēd ēg =iš ayārīh ī az wehwizīr dādwarīh ī ud ohrmazddādestānīh aw =iš kunišn ayāb nē
435.0
nē
436.0
nōit̰ hē dahmō anauuahīm cikaiiat̰
437.0
nē ōy ān ī any dahm anayārīh tōzēnēd
438.0
nōit̰ aδāiti frārāiϑiianąm uruuiδiieiti
439.0
ud nē pad adahišnīh ī frāzdādestānān ēraxtēd ka =š dādestān bun nē kunēd
440.0
tarō darəγa dāta aṣ̌aōnō zaraϑuštrahe
441.0
čiyōn tar dagrand dād ī ahlaw zarduxšt ēdōn paydāg čiyōn guft
442.0
mard =ēw kē =š kār =ēw gōwēd kū =m tuwān kirdan ud pad ān tis nē paydāg kū =š tuwān kird aw =iš framūdan dastwarīhā ayāb nē
443.0
dastwarīhā pad awestwār abāyēd dāštan
444.0
vīsaite aińiiō usiiō nōit̰ aińiiō əuuīsəmnō āstriiete
445.0
ka kē ōy ī padīrēd ōy ī any ulhilišnīh nē ān ī any apadīrišnīh āstārēd
446.0
kār =ēw kē pad mard =ēw šāyēd kirdan pad mard =ēw bandag ud ka pad dō mard kunēnd ēg =išān aǰgahānīh kunišn ayāb nē
447.0
uua vīsaēte naēδacit̰ āstriiaēte
448.0
ka harw dō padīrēnd nē tis āstārēd
449.0
mard kē andar pādixšāyīh ī anērān xwāstag =ēw windēd čiyōn kunēd
450.0
kū =š bē ō xwēšīh rasēd xwāstag ī gyānōmand ka bē nayēd ud ān ī aǰān kē ōbast ēstēd ka gōwēd kū xrīd
451.0
darəsa nā pairiiaōxtica uzuštanā̊ ādarəiiete naiiete uštanauuaitīš
452.0
pad wēnišn mard ka bē nigerēd ud abargōwišnīh =iz ka gōwēd ay griftom ā =š pad ān ī uzuštān xwāstag ud dārīg bawēd vīspā̊ frašumaitīš ud pad nayišn uštānōmand
453.0
ēn wizīrīhā ī dēn ī mazdēsnān pad yazadān kām nibištam az paččēn ī daftar yazadānpādār hunarburzišnīgtar xwarrahabzāyišnīgtar nāmhusrawtar dēnawestwārtar pidar ī man dēnbandag marzbān frēdōn ī wāhrom rōstom bundār šahmardān
454.0
ō man paččēn ī dastwar ī abēzag dēn šādruwān gōbedšā ī rōstom bundār ud ōh az paččēn ī anōšagruwān nēknām kayhusraw siyāvaxš ī šahryār ī baxtāfrīd ī šahryār kē =šān nibištag bawēd kē =šān ruwān ōh ān ī pahlom ox rōšn garōdmān hamāgxwārīh nōgnōg bē rasād
455.0
man kē ī =m nibišt frēdōn marzbān frēdōn pad gētī ham bād nēknām ud pad mēnōy ī =m bād anōšagruwānīh ud hudēnān dēnburdārān pad kirbag ī mānd hambahr ud amāh pad kirbag awēšān hambahr ud huram pad ayārīh ī ohrmazd ud amahraspandān ahlawān frawahr ud frawahr ahlawān man =iz hambahr pad kirbag mizd ud ahlāyīh ī wehān wehdēnān haft kišwar zamīg nibištam
456.0
ud frāz hišt ham andar rōz ī frawardīn māh ī ābān sālbar nō ēksad ud haftād hašt pārsīg
457.0
pas az man bē yazadegird šāhān šāh ī šāhriyārān nāfag pus ō ī husraw ī šāhān šāh ī ohrmazdān ī =m nibišt frāz hīšt az bahrīh xwēšīh hamāg pērōzgarīh rōstom ī farroxzād šahryār ī pad kē tā ēksad ud haftād sālān pad ahlāyīh kār framāyād
458.0
pad yazadān kāmag bawād