MPCD - Middle Persian Corpus and Dictionary

1.0

šnōhr dādār ohrmazd niyāyišn dēn mazdēsn

2.0

nohom dar abar hād ud pargard ī nasknask ān ī hēnd bahrān brīnag pad čandīh ī ān andar ēkēk az naskān ud ayābišnsāmān wizārišn ī abāyišnīg wizīdag ī az =iš čiyōn ast nihang ī ēw ī az was ōšmurišn ī andar

3.0

stāyišn dēn mazdēsn ī ǰuddēw ī ohrmazddādestān

4.0

sūdgar ast wīstdō pargard fradom pargard yatāahūwayryō čiyōn yatāahūwayryō pad bunīh ī dēn u =š brēhēnīdagīh ī naskān az =iš x ka abar šaš dānišn ī fradom ud abardom ī abārīg dānišnīhā ēdōn =iš pad gyāg ī xwēš nimūd

5.0

ud ēdar gōwēd abar amāwandīh ud pērōzgarīh ī az guftan ī yaϑāahūvairiiō abar kārān bun

6.0

ēk ka =š tis kāmēd guftan ēk ka =š tis kāmēd xwāstan ēk ka ō kār šawēd

7.0

dō ka =š āfrīn kāmēd kirdan

8.0

čahār ka ō radfranāmišnīh yazišn ī gāhānbār

9.0

panǰ ka ō druz bēbarišnīh

10.0

šaš ka ō amāwandīh šaš ka ō pērōzgarīh ī kārezār

11.0

haft ka ō ān ī amahraspandān yazišn ud ka yazišn ī amahraspandān kāmēd kirdan

12.0

hašt ka ō ān ī ahlawān frawahr yazišn

13.0

nō ka =š tōm ō zamīg kāmēd abgand

14.0

dah ka =š gušn kāmēd hištan

15.0

yāzdah ka ō zan xwāstan šawēd

16.0

dwāzdah ka =š pad kōf =ēw ul āxēzēd šud

17.0

sēzdah ka =š ō rōstāg =ēw kāmēd šud

18.0

dwāzdah ka abērāh bē šawēd ēk ka =š pad ān ī ābān widarg bē kāmēd šud ud abar kū pad zanišn ī dēwān fradom yaϑāahūvairiiō guft

19.0

ud abar dahišnān ī weh abāyišnīg ōšmurišn saxwan ahunawar hangirdīgīh hamāg ō zarduxšt guft

20.0

ud abar pad frāzsrāyišnīh ī frārōnmenišnīhā ahunawar harw mārīg =ēw dēw =ēw āgārīhēd ud pāsbānīh ī tan ud xwāstag az petyārag

21.0

abar bazišn ī naskān wīstudēk az =iz fradom ud didīgar ud sidīgar gāh ī ahunawar

22.0

ud abar abzōn ī dāmān az menišn ud gōwišn ud kunišn ī rād ī ahlaw hērbed wēš būd ud tarsagāhīh ān ī ōy wēš kirdan ud hamēšagmenīdārīh ī ahlāyīh ud astīh ī =š pāddāšn

23.0

ahlāyīh ābādīh pahlom ast

24.0

didīgar pargard ašemwohū abar stāyišn ī ahlāyīh ī dēn mizd ud astāyišnīh puhl az ahlāyīh padēxwīh

25.0

ahlāyīh pahlom ābādīh ast

26.0

sidīgar pargard yeŋ́hēhātąm abar kirdan ī mardōm pad dagrzīyišnīh ud ka haftād sāl bē zīyēnd xāk dagr būd ud ān =iz ī rāmišnzīyišntar az mardōmān pad brīn ī =š zīndagīh ōš madan ud nēkīh ī gētī bē ān ī ahlāyīh dōšāram rāy ō arzānīgān dahīhēd abārīg sazīhēd

27.0

ud ēn =iz kū =š ān ī dēwān dād rawāg ō dēwān zūr kird bawēd tuwānīg kas kē ō arzānīg xwāstār tis nē dahēd

28.0

ahlāyīh ast pahlom ābādīh

29.0

čahārom pargard yānīmmanō abar kū dagrzīyišnīh ān ī pad tan ī pasēn pahlom ud didīgar ān ī nūn ka =š xrad ud frahixtuzwānīh ud tūxšāgīh ud pattūgkārīh ī hēnd zīndagīh kārīgēnīdārān abāg u =š ēn panǰ agārēnīdār abāg nēst āzwārīh ud xuftagīh ud aǰgahānīh ud nēstīh ud abārōnmarzīdārīh

30.0

ēn =iz kū dahāg ēn panǰ āhōg būd az ān ī bē frēdōn abrōzīhist u =š pad ān ī ǰam kēn wānīd

31.0

ud abar garāīh ī ēn čahār āhōg ud garānzīyišnīh ī az =iš ī ast mastōgīh ud dūnhamhagīh ud ahlomōγīh ud xwaddōšagīh

32.0

ud ēn =iz kū ǰam ēn čahār āhōg az gēhān bē ōgārd ud pas amargīh šāyīd winnārdan

33.0

ud abar pahrēz ī az ōy kē pad gōwišn ī āzād ud pad ox duzz ud abāgīh ī staftgōwišn ī huox ī hamhāg

34.0

ud ēn =iz kū ō drōzan nēwdilīh dahēd kē ān ī wattar framān andar gēhān rawāgēnēd

35.0

ud abar driyōš ī mustōmand pahlom darmān garzišn ud mustgar az garzišn ī mustōmand abāz pafšīrišnīh ud nēpadīrišnīh ud awābarīgānīh ud adahišnīh būdan

36.0

ud abar paywastagīh ī ō rāst ud čimīg garzišn mustwizārišnīh ud rāst garzīdārān čimīg garzišnīh az ān ī frōdtar dādwar pāyagīhā tā ō ān ī abardom wizīrgar būd ī ast ohrmazd

37.0

ābādīh ahlāyīh pahlom ast

38.0

panǰom pargard xšmāyabī abar framuštan ī pid ō pus ud pus ō pid ud brād ō brād ud dōst ō dōst ud mānbed ō nārīg ud nārīg ō mānbed andar zamān handāzišn pad sagrīh ud hang ud nē framuštan ī mēnōy ī gāhān ō hāwanīg ōšmurdār ud srūdār ī gāhān

39.0

abar garzišn ī mēnōy ī gāhān ka gāhān ka hērbed ud dastwar pad uzdehīgīh bē widerēd ud kirb ī ān mard abāz ō xwēš būm nē rasēd ān rāy čē az ān bē andar ān būm ī zīyišn ī stahmagīh ī ahlomōγān bawēd

40.0

ud abar abardarzōrīh ī mēnōy ī gāhān ud ān =iz ī rādīh pad bōxtan ī ruwān az dušox

41.0

ābādīh pahlom ahlāyīh ast

42.0

šašom pargard attāwaxšī abar pahlomīh ī panǰ ābādīh fradom pad ahlāyīh ud didīgar pad frazend ī nēk ud sidīgar pad zamīg ī rōyišnōmand ud čahārom pad ramag ī mēšān ud panǰom pad frayādīh None pad xwēškārīh

43.0

abar baxšišn ī x tuxšāgān xwarrah ud ō aǰgahānān škōhīh

44.0

abar windišn ī xwarrah ī ēkānag nišīnān ud dōgānag rawān =iz ud segānag tazān ud čahārgānag dawān =iz ud panǰgānag barān =iz pad asp ud šašgānag wāzān =iz pad rahī ud haftgānag pad dādestānšnāxtārīh ud wizārdarīh haštgānag pad hupānagīh ī xwāstagān =iz ud nohomgānag pad šnāsagīhā tuxšāgīh ī abar warzīdārīh ī zamīg ud dahgānag pad hammōzgārīh ī mānsrspand

45.0

abar garān pašēmānīh ī zarmān mard az aǰgahānīh ī pad ǰuwānīh

46.0

abar čahār tis ī mard ka =š pad ǰuwānīh handōxt ēstēd pad zarmānīh pad =iš rāmišnīgtar bawēd fradom frahang ī frārōn didīgar xwāstag ī barōmand sidīgar zan ī nēk čahārom mānd ī ābādān

47.0

abar panǰ handōzišn ī ābādīh pahlom xwēškārīh ud tuxšāgīh ud hunsandīh ud wigrādōšīh ud čārakkarīh

48.0

abar pahrēz ī az nišast ī abāg mastōgān

49.0

ud ēn =iz kū nē pad došišn ī ǰehānmāyēnišn ud xwārīdan kē pad māyišnān ud xwārišn ud abārōn menišn x zadār ud bēšīdār ī kasān ud sazēnīdār ī kārān bawēd

50.0

ud ēn =iz kū ān ī tān xwarišn xwarē kū arzānīgīhā

51.0

ud kū =t xward sabuk bawād ma sangīg ay kū ka =t xward kirbag kunēnd ud az wināh pahrēz

52.0

ud kū =t ān ī xwarē anōšag dahād ay kū driyōšān bahr gīrēnd u =t driyōš āfrīnēnēnd ud driyōš ī ahlaw dādestānīhā =š pahlom ast āfrīn

53.0

ābādīh ast pahlom ahlāyīh

54.0

haftom pargard tāwrad abar nimāyišn ī ō zardušt ēwēnag ī čahār āwām ī andar zarduštān hazangrōzim

55.0

fradom zarrēn ān kē pad =iš ohrmazd ō zardušt dēn nimūd

56.0

didīgar sēmēn ān kē pad =iš wištāsp az zardušt dēn padīrift

57.0

sidīgar pōlābdēn ān āwām kē ahlāyīh ārāstār ādurbād ī māraspandān andar zād

58.0

čahārom āhanabargumēxt āwām ēn kē andar frāyzīyišnīh pādixšāyīh ī ahlomōγ ud abārīg wattarān ud abar wišōbišn ī dēn ud xwadāyīh ud nizārīh ī harw gōnag wehīh ud nēkīh ud frōd waštan ī xēm ud xrad az ērān dehān

59.0

andar ham āwām x ōšmurišn ī was škeftīh ud zāmīhistan ī āwām ō ān garāīh ī wehān zīndagīh ī andar anabāyišnīg bawēd

60.0

pahlom ahlāyīh ābādīh ast

61.0

haštom pargard xwaytumayt abar pahrēz ī az ēzišn ī gannāgmēnōy rāy anāstawān ī dēn ud ān ī az ēzišn ī andar ud sāwul rāy nē anaybyāstdād ud ān ī az ēzišn ī tāwrīč ud zārīč rāy ēwmōgdwārišn ud ān az ēzišn ī akatāš rāy dušnakkīrāykar ud ān ī az ēzišn ī hamāg dēwān rāy amārgendād mardōm šnāyēnīdan mādagwar

62.0

ud abar gišnagmenišnīh ī ōy kē drāyān xwarēd ud xwārēd ud šādīh ī dēwān az ān mar ud andarz ī abar nē guftan ī andar xwarišn ud xwārišn saxwan

63.0

ud pad spās ud šnāyišn ī yazadān pēš az xwarišn ud xwārišn ud pad =iz pardāxtan ud pākīh ī dahān u =š ahlāyīhstāyišnīh

64.0

ud abar ōy kē dastwar nē dāštan pad dād rāy nē xwēšīh ī ēč kirbag ī kunēd nē dāštan ud nē rasēd ī ō ān ī pahlom axwān

65.0

ud abar gāh ī yazišn ī srōšahlī abērtar pad sazišn ī fradom nēmag ī šab ud ōy ī yaštār ō pāsbānīh ī =š az ān mēnōy ī druǰ ud niwēyēnīdagīh

66.0

ud abar gāh ī yazišn ī rašn ud aštād abērtār az ān pas pad ušahin radīh ud ōy ī yaštār ān ī ǰōrdāyān ābādīh niwēyēnīdagīh

67.0

ud abar gāh ī yazišn ī mihr ī frāygāwyōd ud rāmišn xwārom mēnōy ī abērtār pad hāwan radīh ud ōy ī yaštār ān ī gōspandān ramag niwēyēnīdagīh

68.0

ud abar gāh ī yazišn ī ašawahišt ud ātaxš =iz ī ohrmazd abērtār pad rapihwin ī radīh ud ōy ī yaštār ān ī ahlāyīh ramag niwēyēnīdagīh

69.0

ud abar gāh ī yazišn ī burzand xwadāy ud mādagān ī ābānnāf ud āb =iz ī ohrmazddād abērtār pad uzayrin radīh ud ōy ī yaštār ān ī wīrān ramag niwēyēnīdagīh

70.0

ud abar gāh ī yazišn ī ahlawān frawahr ud mādagān ī wīrramagān ud sālān =iz humānišnīh ud amāwandīh =iz ī hutāšīd ī hurust ī pērōzgar =iz ī ohrmazddād wānīdārīh =iz ī abarrawišnīh abērtār pad aybisrūsrim radīh ud ōy ī yaštār harwist ābādīh bun ud harwist ahlāyīh paydāgīh bar niwēyēnīdagīh

71.0

ābādīh ahlāyīh pahlom ast

72.0

nohom pargard yatāyš abar dēwīh ud zadxwarrahīh ud purrrēmanīh ud garāngandīh ud garānwināhīh ud āzār ī ō hamāg ī mēnōyīg ud gētīyīg ī nēkīh ī kūnmarz

73.0

ud garān wināhwizārdagīh ud wuzurg kirbagxwēšēnīdārīh ī ōy ī uzīdār x škeftwināhīh ī ōy ī šnāyēnīdār ī ān ī wināhgār

74.0

az haft ī pad wad ī abar wattarīh hāwand ī gannāgmēnōy ōšmurēd čiyōn až ī dahāg pad ǰādugīh ud až ī srūwar pad stahmagīh ud wadag pad wadhunušagīh tūr ī brādarōxš pad ahlawγenīh ud ahreman pad garānwināhīh ēk pad garān wināh gōwēd

75.0

pahlom ast ahlāyīh ābādīh

76.0

dahom pargard yāšyawayt abar garzišn ī ātaxš mēnōy ō ohrmazd az mardōmān haft dar

77.0

fradom az kadagīgān pad xwār ud abandīh dāštan ud apaymān rōzēnīdan ud ašustdast kār pad =iš kirdan ud kanīg kē ātaxš andar azēr pāy xwār kird ud xwarg škastan ud sneh andar brāh bē āwurd

78.0

didīgar garzišn az burdārān ī ātaxš az ān mān kū =šān pahrēz ī ātaxš kirdan pad dād ō ān mān kū =šān pahrēz ī ātaxš kirdan pad dād nēst

79.0

ud ānōh az ān dēwān rasišn ud paššinǰišn ǰuwān ī ylōmand ud tābišnōmand ud afsārēstišnōmand mānāg stard nibast ud bēšāzišnīh ī =š az ān xīndagīh pad frāzburdārīh ī aw =iš ān ī pāk rāšk ayāb vohugōn ayāb vohukird ayāb hayanbāg ayāb kadāriz =ēw ān ī hubōytom az urwarān būd

80.0

sidīgar garzišn ī az ǰeh kē =š pad daštān abar rasēd gand ud rēm ī az daštān aw =iš rasēnīdan ud xīndagīh ud stardīh ī az =iš čiyōn azabar nibišt

81.0

čahārom garzišn az ǰeh kē šnūg pad ādišt andar hilēd ud gēs wizārēd ud nam ud xwēdagīh az sar abāg rēm ud mōy =iz az =iš ō ātaxš ōbastan ud ahunsandīhā dūd ud xīndagīh ud stardīh az =iš

82.0

panǰom garzišn az pid ud sālār ī aburnāyag pad abāz nē dāštan ī aburnāyag az ātaxš ud hixr ud abārīg adādīh ī =š az aburnāyagān abar rasēd

83.0

šašom garzišn az petyār kē =š ān ī ayōǰdāsr āhen abar barēd u =š wād ī dahān abar damēd ud pad kār framūd yyy bawēd

84.0

haftom garzišn ī škefttar ud garāntar gōwēd az awēšān kē =š pad drō war abar warzēnd ud ka =š pad bōxt ud ēraxt paydāg kird bawēd ud pad =iš ǰuddādestān bawēnd

85.0

ud andargarzišnīhā ān ī rēm ud ǰomā ān ī pāk frāz grift ud az =iš waxšīdan ud pad dādīg ud adād kār ēkānag sōxtan ud waxšīdan ēdōn čiyōn ka =š harw dō pad abāyist hē ud akām ud awištābīg sōxtan ud waxšīdan ān ī rēm pad sōzišn anxwarīhā ǰūdan ud andar ān ī adād kār pad waxšišn bēšistan

86.0

ud ēn =iz gōwēd kū nē ēdar bawam ud az ēdar ul uzam az zamīg abar ō asmān tō man =iz pus hēm framāy ō man čiyōn ān =iz ī any dām

87.0

u =š guft ohrmazd kū ēdōn tō ātaxš abar ēstīhē pad xwēškārīh tō ān wazr barē pad mēnōy hād abzār =it =ēw ī čiyōn ān dahēm kē pad ān harwist ox ī astōmand bē wardē ō ān ī asarrōšnīh any ud ō ān ī asartārīgīh anī

88.0

ud ēn =iz kū kē ātaxš pahrēz kunēd ā =š ān ī mahist tarsagāhīh andar ohrmazd kird bawēd

89.0

ahlawān x šnāyēnīdārīh pahlom ān ī ōy bēšišn wattom ān ka hušnūd frāyēnēnd dād ud gēhān kū bē abzāyēnd ka bišt ud rēšēnēnd dēw kū bē kāhēnēnd

90.0

ast ahlāyīh ābādīh pahlom

91.0

yāzdahom pargard yasn abar hanǰaman ī mēnōyān yazadān garzišn ī ātaxš rāy ud hanǰamanīg garzišn ī ātaxš abāg guftan ī ēn =iz kū nē ēdar bawam ud az ēdar ul uzam az zamīg abar ō asmān ānōh ān rōšnēnēm abar ō haftkišwar zamīg čiyōn māh ud xwaršēd ud star =iz ī baγdād ka pad bām ī xwēš rōšnēnēnd

92.0

ud gōwišn ī ohrmazd abar rāstgarzišnīh ī ātaxš andar gumēzagīh ī dām ud ātaxš apetyārag dāštan nē šāyistan ud dahišn ī dām ō gētī abāg petyāragōmandīh ātaxš =iz az dāštan nē šāyīdan ī adahišnīh ī abāg apetyāragīh ī ātaxš =iz weh būdan rāy ātaxš hunsandēnīdan ud pahrēz paydāgēnīdan

93.0

ud guftan ī ātaxš kū agar nē ān ēwēnag =ēw az ān kū ēdōn čiyōn =am xwāhišn kird kū ēdōn ān rōšnēnēm ohrmazd āgāh hē andar dāmān kū ēdōn nē šāyēm dād ēg man ohrmazd stan ēg man ānōh bē dah pad mayān ērānwēz

94.0

stanēnd =iš ātaxš ī abzōnīg kē dādār ohrmazd u =š ān bēsūdag andar mān dād pad hambarišnīh ayārīh

95.0

u =š ēdōn pad gōwišn guft kū ēdōn tō kē man ātaxš hē rōyišnēnēš pad harwist mān kū rasē ud harwist wis harwist zand ud harwist deh ud ēdōn tō burzānd āb ud urwar ud kē =iz ahlawān frawahr ka tō pad bēabespārišnīh zōhr frāz barēnd mardōm ka ō tō esm frāz barēnd ī hušk ī pad rōšnīh nigerīd u =š ēdōn guft kū ēn ādur gušnasp

96.0

abar ox ī mizdīh ī drūdār ud frēšīdār ud rōšnēnīdār ī esm ka harw se dōšāram rāy kunēnd ahū ī ahlāyīh hēnd

97.0

ud abar čihrīh mizdīh ī āsnūdār ud pāk ud pādyāb kirdār ī ān ī ātaxš sraxt ud esm abarburdār ud frāzāsnadār ud frāzkirdār ī ātaxš ud bēburdār ī esm ī garān framūd dādīgkār dēg yyy az =iš wināh ī ōy ǰumbēnīdār

98.0

ud abar zadār ī ān ī ātaxš sraxt ud abar burdār ī =š ān ī tarr esm

99.0

abar āfrīn ī ātaxš ō mardōmān kē az =iš hušnūd

100.0

ud abar andarz ī abar nē burd ī ō ātaxš ān ī az duzz ud appar zōhr ud garān dēwān ōwōn būd puhl ī ōy ī barēm ālūdan ī ud rēškenīh ī ātaxš az ān ī ka ōy =iz ī =š hubarišn yazēd az ēk gōwišn ī dēwān ōwōn būd

101.0

ud ēn =iz kū az ān ī ātaxš apahrēzišnīh ka zan az pusartanīh abāgēnīd nē pad harwist daštānmāh dahēnd ān ī zahag pus

102.0

ud abar tōzišn ī rawišn ud abārīg adādīh ī pad ātaxš bawēd mardōm kē ātaxš ō sālārīh mad ēstēd ud nē dādīhā sālārēnēd

103.0

ud abar andarz ī ō zarduxšt pad čēgāmizēw ī xwarēd yazadān yaštan ud ān ī yašt nē xwardan

104.0

ud abar kāmag ī gannāgmēnōy kū ma kas kunād yazišn ud niyāyišn ī yazadān ud ma xwadāy ud dastwar dārēnd kū =šān ma kāmag bawād ī ō ēč frārōnīh

105.0

ud abar andarz ī pad abāyistōmandīhā yaštan ī yazadān pad ān ī pahlom yazišn ud ān ī āsrō ī awināh ud mayānag ān ī āsrō kē =š wināh nē frāy az ēk arduš ō bun ud ān ī nidom ān ī āsrō kē =š nē frāy az xwar =ēw pad bun

106.0

ud kē andar wis ī mazdēsnān pas az pānzdah sāl asrūdgāhān pad wināhgārīh čiyōn sag ōy pih abgand ud wināh ī drāyānǰōyišnīh ō bun būd ud apadīrišnīgīh ī =š ruwān az mānsrspand

107.0

ud abar madan ī pad harw zamān astwihād ō ōšōmandān kē ōš mad estēd ud kē =iz nē

108.0

ud abar menišn ī druwandān kū nē ast ān ī pahlom axwān nē rasēd frašegirdkirdārīh ud nē rist pad ān ul ēstēnēnd ud nē ān wardišn rasēd

109.0

ud ēn =iz kū drō ō ham nigerēnd druwand čē ast ān ī pahlom axwān rasēd frašegirdkirdārīh ī weh ud ul rist pad ān ēstēnēnd ud ēdōn ān wardišn rasēd

110.0

ud abar andarz ī pad šēwan ud mōy abar widardagān nē kirdan ud pas az bēwiderišnīh hamāg snōhišn ō menišn nē abzāyēnīdan ud bēšišn ī mēnōy =iz ī xānag az kirdan šēwan ud mōy abar widardagān

111.0

ud ēn =iz kū ahlawān frawahr az pas ī xwēš yazišn x āfrīn ī mardān ī ahlawān xwāhēnd nē šēwan ud mōy

112.0

ud ēn =iz kū nē harw kas tan abāg ruwān hamkāmag bawēd xwarišn ān tan kāmag ud xwāstag =iz hambār ahlāyēnīdārīh ruwān kāmag ud dāsr =iz ī bē dahēnd

113.0

abar pursišn ī ahlaw zarduxšt kū kē ast kē harwist wehīh ud pahlomīh az xwēš appārēnīd ēstēd nē appārēnīdan menēd ud nē ān zyān garzēd

114.0

ud passox ī ohrmazd kū ōy ast ī az ān ī xwēš uzwān zēnēnīd ēstēd pad saxwan frāzgōwišnīh kū pad drō guftan margarzān būd ēstēd

115.0

ud ēn =iz kū zay ast gannāgmēnōy sneh ud ēdōn bowandagmenišnīh spandarmad ud xwadāyīh ud ēdōn druz wēš dēnōzīh ka mard garānmenišnīh rāy nē passox kū garānmenišnīh rāy drō nē gōwēd

116.0

ud ēn =iz kū ān pad ān ī ēkhazār tā zōhr dēwān yazēd kē pēš az ān ī dānāg zōt ōy ī adahm pad zōtīh ēstēnēd

117.0

ud ēn =iz kū ōy ī dahm pad zōtīh ī ēstēnēš ma ōy ī adahm čē ēdōn tō frāzrasišnīh ī ō garōdmān

118.0

ud ēn =iz kū dušzōt wattar az zōtīh

119.0

ud ēn =iz kū ōy ī wināhāyōxtār pēš hād mēnōyān menišn ī ānābīhēd pas abaxšāyišn ud pas šarm ud pas niyōšīdārīh ud pas pad ān x wināhgārīh mihrōdruǰ bawēd

120.0

ud ēn =iz kū harwist mard ī rēšīdār pēš ān ī hambarišnīh barēnd ud āsrō =iz ī srāyišnāyōxtār ud āsrō =iz ī ādehīg ud āsrō =iz ī uzdehīg ud āsrō =iz ī xwēš xwēšāwand

121.0

ēdōn ō tō gōwēm spitāmān kū ma mihr abar druzēš ma ka abāg druwandān hampursē kū pašt kunēnd u =š mehdādestānīh andar nē hād ma ka abāg xwēšdēnān ī ahlawān pad tis =iz mehdādestānīh čē harw dōān mihr ast druwandān =iz ud ahlawān =iz

122.0

ast ābādīh ahlāyīh pahlom

123.0

dwāzdahom pargard uštawayt abar burzišnīgīh ī zarduxšt pad hušnūdīh ī āb ud ēmēd ī aw =iš harwist dām

124.0

ud abar nē abēzag ōšmurdan ī mānsr kē mānsr nē pad dastwar gōwēd

125.0

ud ēn =iz kū mānsr ī mard ī āhōgēnīdag ā =š ō ān ī anāhōgēnīdag gyāg barēd

126.0

ud ēn =iz paydāg kū mard ī āzwar ī aškam bowandag az handāzišn ēwāz ō tan rāmēnīdārīh harw wināh sar aw =iš ēdōn dārēd čiyōn dār =ēw kē šēb ī harw rēmanīh awiš

127.0

ud ēn =iz kū wāy awēšān =iz warzēd kū =šān bē ōzanēd kē pad mēhan ī stabr būd ēstēnd kē āz ī dēwāndād

128.0

ud ēn =iz kū azbāyišn ī yazadān menīdan abāg guftan ud guftan abāg kirdan ud kirdan abēdād frēftārīh kārīg

129.0

ud abar abēzag wehīh ī amahraspandān ud hamīh ī =šān menišn gōwišn kunišn āgenēn ud dādārīh ud parwardārīh ud pānagīh ī =šān ābādīh ī gēhān

130.0

abar dādan ī ohrmazd zarduxšt pad wehīh čiyōn xwēš

131.0

ēn =iz kū kē ō hāwištān ī zarduxšt tis dahēd ā =š mizd ud pāddāšn ēdōn čiyōn ka =š ō zarduxšt tis dād hē

132.0

ast pahlom ābādīh ahlāyīh

133.0

sēzdahom pargard tattwāpers abar ōz ud tagīgīh ī mēnōy ī drōn

134.0

ēn =iz kū harw šab dēwān az dušox pad wināhīdan ud margēnīdan ī dāmān andar ō gēhān dwārēnd ud ka drōn yazēnd ān mēnōy pad zadan ud abāz dāštan ī dēwān ud āyōzīdan andar harw šab nawad ud nō bār pad kōšišn ī abāg dēwān frōd wardēd u =šān zanēd ud stōwēnēd ud az murnǰēnīdārīh ī gēhān abāz dārēd

135.0

ud ēn =iz kū awēšān mardān kadāriz =ēw kē ēn gōwišn frāz ēzēd ān bawēd ahlaw bē az awēšān mardān kē hunsandīhā pad kāmag ān ī dušhuwaršt framān abar barēnd ud wiftēnd ayāb wiftēnēnd az gōwišnān ī frāz grift ō awēšān ēdōn kē dušmat frāy kū humat u =š dušhūxt frāy kū hūxt u =š dušhuwaršt frāy kū huwaršt

136.0

ud abar bē burdan ī āstawānīhdahišnīg kū margarzān frāz muštan ī abārīg wināh wād ī škeft ud tag mānāg ka tēz dašt frāz mālēd

137.0

ahlāyīh ābādīh ast pahlom

138.0

čahārdahom pargard atfrawaxšī abar nimūdan ī ohrmazd ō zarduxšt ruwān ī kirsāsp sahmgenīhā ud tars ī zarduxšt az ān sahmgenīh ud pašēmānīh guftan ī kirsāsp az āmārīhā zadan ī =š mardōm burzīdan ī =š pahrēxtagān ī az wināh ud čašmāgāhīh ī =š az dādār ohrmazd pad zadan ī =š ātaxš

139.0

ud abar xwāst ī kirsāsp az ohrmazd ān ī pahlom axwān pad ān kirdārīh ka =š kušt gaz srūwar ud stahmagīh ī ān petyārag ud ka =š wānīd gandarw ī zayrīpāšnān ud škeftīh ī ān druz ud ka =š zad hunušag ī niwīgān ud dāštānīgān ud garān anāgīh ud wizend ī az =išān ud ka =š rāmēnīd tagīg wād ud az gēhān zyānīh abāz dāšt ud ō dāmān sūdīh āwurd pad ān ī ka dahāg az band harzag bawēd ud pad murnǰēnīdan ī gēhān abar dwārēd ud dāmabesīhēnīdārīh drāyēd ōy hangēzīhēd ud pad wānīdan ī ōy ān ī wasōz druz ī ō gēhān dām frahaxtēd

140.0

ud hamēmālīh ī ātaxš ō kirsāsp pad must ī pad =iš kird ud abāz dāštan ī =š az wahišt ud ayārīh ī gōšurun aw =iš pad ābādīh ī pad =iš kird ud pādan ī =š az dušox

141.0

ud xwāyišn ī zarduxšt ō ātaxš abar āmurzīdan ī =š az wināh ud hanǰāftan ī ātaxš ān ī xwāyišn ud franaftan ī kirsāsp ruwān ō hammistīgaxwān

142.0

ahlāyīh pahlom ast ābādīh

143.0

pānzdahom pargard kamnamayz abar rasišn ī astwihād pad gyāg ud kas ud abōzišn ī az =iš kas =iz az ōšōmandān abar xwāst nē sazistan ī ōšōmand tan ud frasāwand xīr ī mardōm

144.0

ud ēn =iz kū ōšōmandān hamāg astwihād pad ān ī škeft ud frāz paydāg abd barēd ud nē bōxtēnd az =iš kas =iz bē kē ruwān bōzēd

145.0

ud ēn =iz kū ruwān ēwtāg wēnēd mēnōy mizd ud puhl ud tanōmand nē ēdōn wēnēd agar =iš tanōmand čiyōn ān dīd hē ēg =iš pad =iz tis =iz ī āsānīh ud xwārīh ī gētī wināh hambun =iz nē kirdan az kirbag fradom nē mōšīd hē

146.0

ud abar zištīh ud sahmgenīh ī mardōmān tan pas az marg ud ān =iz ī pad harw abāyišnīg tisīh tis ī grāmīgdar dāšt ēstād afrasāg andar

147.0

xākabgandagīh ud zīndagān =iz ān ī =š nabānazdišttar anabēdānīgīh az =iš dūrīh

148.0

ud ka ēg =iz bōy pad nazdīkīh ī tan ud sag ud way pad wišōbišn ī tan frāz šawēnd bōy az =išān čiyōn mēš az gurg tarsēnīdan ud ō sag ud way abar nē wišuftan ī tan pahikārdan ud awēšān ān gōwišn mēnōyīhā mārdan ud fradom abāz passardan ud ān tan zīndag menīdan

149.0

ud pas ka =šān ān tanwišōb bōy rasēd ēdōn čiyōn mēš ī dēnūdag ka ō waččagān bē tazēd ō nazdīkīh ī ān wišuftag tan tazīdan pad garān ašādīh ō tan nigerīdan kū ān tan andar čē nēkīh būd nūn ō čē anāgīh mad ēstēd ōšmurdan

150.0

ud ka ān tan pad zīndagīh wināhgār būd abar nē padīrift ī =š andar ān zīndagīh ān ī bōy ī abar pahrēz ī az wināh ud warzīdan ī kirbag ō ān tan āfrāhēnīdan abāz ōgrāyēd

151.0

ēn =iz kū =t zamānag ī nēkīh gišnag būd ud ān ī anāgīh drāz ast

152.0

ud ēn =iz kū andar gētī mardōm kē sad sāl bē zīyēd kem kū ān kē sad sāl nē zīyēd ud zīndagīh andak andak sazīhistan ud hanǰaftan ī zīndagīh zan ud xwāstag ud abārīg gētīyīg ādān hamāg pad ēwbār hištan ud ō any kas madan

153.0

ud ēn =iz kū ka mardōm nihang =iz ēwarz ī pad ān ī dōstōmand ud pattānōmand rāh rāy abar wizīrišnīg tōšag wizīhēnd ud frāyīhā abar dārēnd ī =šān abērtar sazēd abārīg ān ī ǰāwēdān abāyišnīg u =š awizīrišnīg tōšag wizīhīdan ud sāxtan abāg xwēš abar dāštan

154.0

ud abar haft ahōš xwadāy ī andar kišwar ī xwaniras dād ēstēd u =šān abar xwarrah ud wuzurgōzīh ud nēkīh =iz ī ayārān ud zīndag pādixšā ī andar harw dō axwān

155.0

wan ī ǰudbēš abar ērānwēz ud pad ān ī yyy gāh

156.0

ud gōbed andar anērān dehān

157.0

ud pišyōsn ī wištāspān pad kangdiz ī stēndagdrafš kē andar ān bēwar ān ī yyy kē syā samōr dārēnd ī dēn dōšīdār ī ahlaw az pasīh ī pišyōsn ī wištāspān

158.0

ud fradāxšt ī xumbīgān ī hōšang pus kē pādixšā pad āb ī nāydāg

159.0

ud ašwazd ī pōrūdaxšt pus kē pādixšā abar pad bālist ī paydāgdom dašt ī pēšinās

160.0

ud barazd ī kōšišnkirdār

161.0

ud haštom kay ī nāmīg wištāsp ast kē kay husrōy gōwēd kē ān ī tō dēn ī mazdēsnān rawāgīh =iz dahēd ud andar =iz dānēd kē ān ī man warzišn ī weh dahēd frāz wābarīgānīh kū kird ī man pad wābarīgān sahīg dārēd

162.0

ahlāyīh ābādīh pahlom ast

163.0

šāzdahom pargard spandmayt abar wināhgarān puhl čiyōn az dēn paydāg kirdan

164.0

ud abar yašt kirdan ō mard ud zan ud zan pēš az mard framūd ēstēd ud garōdmānīgīh pad yašt xwad ī srāyišnīg ayāb gētōxrīd būd

165.0

ud abar āzādīh ī ruwān az dušox pad ahlāyīh ud dōšāramīhā dādan ī asp ī raγ ud zamīg ī kišwzār ud zan ī nēk ō mard ī ahlaw ud zan =iz kē tan pad zanīh ō mard ī ahlaw dahēd ud zamānān x zamānān x ud rōz rōz ān rād kirbag waxšīdan

166.0

ud abar puhl ī ōy ī niwēyīdār ud yyy pad sidōš čiyōn kē zīndag āhan ī widāxt pad galōg abāz rēzēnēnd

167.0

ud abar pādufrāh ī zan kē tan pad zanīh ō mard ī ahlaw dahēd az =iš abāz āyēd čiyōn ka =š zūzag bāstān pad haxt andar šawē ud bē āyē ud brīdrāhīh ī =š az ān ī pahlom axwān

168.0

ud abar abōxtišnīh ī druwandān ruwān az dušox tā tan ī pasēn

169.0

ud abar pādufrāh ī druwandān ēn =iz čiyōn gōspand =ēw kē zīndag pad pāy ud sar nigōn āgust ēstē u =š angustzahyā =ēw māyišn pad wēnīg tazē

170.0

ud abar gāhān pad mēnōy war ī pad hamāg gōnag abēpāstag mānāg ō ōy ī gāhān srūdār ahlaw nihumbīhistan

171.0

ābādīh ahlāyīh ast pahlom

172.0

haftdahom pargard yezid abar kū kē ēn panǰ wināh kunēd az dēn wašt u =š xwēš zīndagīh ud xwarrah kāhīd bawēd ud mardōm ka dēw ud āstawān dēn ka anāstawān dēn ud čāšīdār ka ačāšīdār adān ud āgāh gāhān ka anāgāh gāhān anašnās ud wizīdārdahišn ka awizīdārdahišn axrad ud hunsandīhā pad ahūīh ud radīh ēzēd

173.0

ēn =iz kū awēšān =iz kē pah ud stōr adādīhā kušēnd ān =išān zīndagīh ud xwarrah kāhēd

174.0

ud ēdōn =iz awēšān =iz kē ohrmazd tarmenēnd abēzag ahlaw spitāmān ud xwēš dēn ān =iz ī ahlawān hāwištān ī tō

175.0

ābādīh pahlom ast ahlāyīh

176.0

haštom pargard atmāyaw abar ābusīh ī dēw az ōy kē xward hordād ud amurdad pad wināhgārīh drāyēd ud kē ēstān mēzēd ud kē šusr āwēnēnēd

177.0

ud ǰeh kē pas az hūfrāšmōdād čēgāmag ǰōyēd ud kē šab pad asrāyišnīh ī ahunawar šūr xwārišn ō abāxtar rēzēd

178.0

ud ēn =iz kū ruwān ēwtāg bāstān ō tan xwāhišnīg pad =iz ēn ēwāz kū ay tan ī sazōmand ahlāyīh stāyē pad ulpēmišnīh ka bē xufsē ahlāyīh pad frāzbawišnīh ka wigrād bawē ud ahlāyīh pad ulēstišnīh čiyōn tō pad harwist āyišn ud bēšawišnīh pad wēn āwarišn ud barišn humizdīh ud wasmizdīh ud ahlāyīhmizdīh bawād

179.0

ud ka tan hamgōnag kunēd ruwān šādīhēd ud ō tan āfrīn kunēd kū nēk tō bawād ēd tan ī sazōmand kē =t man buland kird ham kē =t man nazdīk rasēnīd ham ō ān ī pahlom axwān

180.0

ud ka tan ān ī ruwān āfrāh nē padīrēd ud anāgrawišnīh gōwēd pad ulpēmišnīh ud anāgrawišnīh pad frāzbawišnīh ud anāgrawišnīh pad ulēstišnīh ruwān ī dēn ast ān ī garzišnīg gōwišn barēd kū anāg tō tan ī seǰōmand kē =t man gišnag kird ham kē =t man nazdīk rasēnīd ham ō ān ī wattom axwān

181.0

ud abar kū yyy ud yyy nišān ī gišnagzīyišnīh u =š bēšāzišnīh ahunawar ud ahlāyīh guftan

182.0

ud ēn =iz kū ka ō gōmēz nišīnē ahunawar fradom frāz srāyē ud ahlāyīh pas ka ul ēstē kū kamist tō wisinnād dēw ud druz

183.0

ud ka ō nārīg abar srawē ahunawar fradom srāyē ud ahlāyīh pas ka andarg haxt kunē čē ēdōn tō ān =iz ast pad ahlāyīh ahlawtar ud pērōzgartar kē tō pus kunē

184.0

ud ēn =iz kū ka andar ō xānag šawē mēnōy ī xānag ud harwist ān ī ahlawān stī ī andar ān mān kē hēnd ud būd ud bawēnd namāz barē ud ahunawar gōw

185.0

ud abar =iz tuštan ī druwandān ān =iz sūr ī =šān pad xwadāyīh nē rāst baxt

186.0

ābādīh pahlom ahlāyīh ast

187.0

nōzdahom pargard katmōyruwag abar kū ruwān ka ō ham rasēnd ān ī ōy ī nēk dastwar ī ruwāndōst ruwān burzēnd pad ān kū =š nē rēšēnēd ud az dušox pād

188.0

abar tārīgīh ud burzōmandīh ud dūr abunīh ī wisiškīh ud awehīh ī dušox ud wazagǰōyišnīh ud wazagnihumbišnīh ud pēšōgbāryōš ud snēxr abarrasišnīh ud dardōmandīh ud bēšōmandīh ud škeftbīmīh ī dušoxīgān

189.0

ēn =iz kū =š azabar abāz abgand ēstēd az čagād ī dāytī ī abar ērānwēz ō harborz ī ast čandōgpuhl u =š azēr ī mayān dušox dar ī widār ast ī hamāg ahlaw ud druwand warzēn pad ahlawān widār nō nēzag pahnā ēkēk dagrandīh se nāy frāxwīhēd ud pad druwandān widār čiyōn awestarag tēx bawēd

190.0

ēdōn ān tō gōwēm spitāmān kū rāstīh mard franāmēd tarist čēhwidarg ī dūrnāmīg čandōg puhl čē bē mard ī rāstīhōmand aštād ī weh ī frayīdārgēhān ud mihr =iz ī frāygāwyōd ā =š az ān tangīh bōzēnd čiyōn ān ī hazārgānag spāh

191.0

ēdōn ō tō gōwēm spitāmān kū mihr ma abardruxtār bawē ma ka abāg druwandān hampursē ma ka abāg xwēšdēnān ī ahlawān čē harw dōān mihr ast druwandān =iz ahlawān =iz mihr ast gurg =iz zarduxšt abāg waččagān ān ī ǰehīg mihr škefttar ast spitāmān

192.0

ēdōn ō tō gōwēm spitāmān kū ma ǰeh hāzē ō kunišn kū =š zan ma kun ud abāgnibēmišnīh ma kun kū =š abāg ma xuft

193.0

ud agar ǰeh hāzē ō kunišn ud abāgnibēmišnīh ōy ma pas frāz hilē ma pad tangīh ud ma pad frāxwīh ud ma tan ud ma gyān dōšāram rāy čē kē ǰeh hāzēd ō kunišn abāgnibēmišnīh ud ōy frāz hilīhēd tan ayāb gyān dōšāram rāy ud ān ōy ziyānēnīd mān ud wis ud zand ud deh mihrāndruz ī az ān bawēd ān ōy ruwān ziyānēnīd

194.0

ēdōn frazendān kū =šān mihrōdruǰ abar rasēd pad dušhammōzišnīh ī ōy ī druwand andar bun ī dušox ud pad afrazendīh bē nibāyēd

195.0

hād druwandān tis =iz nēkīh nēst kē =š dād was ohrmazd ān nēkīh

196.0

pahlom ahlāyīh ast ābādīh

197.0

wīstom pargard wohuxšahr abar stahmbagīhā kird ī dahāg xwadāyīh abar būm ī haft ud pēšrawāgīh ī =š framān az dastān wardišn

198.0

ud abar hanǰamanīg pursišn ī dahāg abar čim ī wēšōmandīh ī hambāstag mardōm pas az kirrēnīdan ī ǰam ud xwadāyīh ī dahāg ud mardōm ō dahāg passox guftan kū ǰam abāz dāšt ēstād az gēhān niyāz ud škōhīh ud suy ud tišn ud zarmān ud margīh šēwan ud mōy ud sarmāg ud garmāg ī apaymān ud āmēzišn ī dēw abāg mardōm

199.0

ēn =iz kū āsānīh dādār būd ǰam kū =š tis ān kird ī mardōmān āsānīh az =iš būd kāmag dādār kū =š nēkīh pad dādšnāyēnīdārīh kū =š mardōm pad frārōnīh ōh šnāyēnīdan

200.0

abar ōdag kē ǰam ī šēd ī huramag x tan pad zūrzanišnīh bē zad adādestānīhā ud rag abar gēhān harzag kird niyāz ud škōhīh ud tangīh ud āz ud suy ud tišn ud xešm ī xurdruš niyāz ī awāstar ud sahm ud seǰ ī nihānrawišn ud zarmān ī dušpid ī apid dēwēzišnōmand dād

201.0

ud ēn =iz kū ān ī pad kēr ud gund ā =t bē az ābusīh kird dušxwarrah hād šabestān =it kird ī abēkird seǰ kū =š čārag xwāst nē šāyēd kē nē wālēd az tan kū paywand az =iš nē rawēd

202.0

ud tō gōspand ī frāxraftār az mardōmān siždēnīd ud tō az amāh bē appurd ān ī bāmīg rōšn ī ǰam ī šēd ī huramag kē pad harwist xā abarrasišnīh pad hamāg zamestān ī =š pad hutābišnīh tāft kū =š gyāg pad nēkīh kirdan bē mad

203.0

ōšōmand hē bēwarāsp tō =iz bē ških čiyōn ēn dādestān ēdōn kū xwadāy ī wad tis =ēw ī ēdōn wad ā =m ō ōy ī weh xwadāy kāmag bahr abarbarišnīh kū tis ō ōy dahēm kē xwadāyīh ī weh abāyēd ka kunēd

204.0

ud abar wānīdan ī frēdōn dahāg ud margēnīdan rāy wazr abar frēg dil mastarg =iz zadan ud nē murd ī dahāg az ān zanišn

205.0

ud pas pad šafšēr zadan ud pad fradom didīgar ud sidīgar zanišn az tan ī dahāg was ēwēnag xrafstar waštan

206.0

guftan ī dādār ohrmazd ō frēdōn kū =š ma kirrēnē kē dahāg čē agar =iš kirrēnē dahāg purr ēn zamīg kunē az yaz ud ōgrāg ud gazdum ud karbūg ud sōg ud wazag abāg ēwēnag bastan ī pad škeft band andar garāntom pādufrāh ī awisān

207.0

ud ēn =iz ka až ī dahāg bast būd ēdōn ān =iz sraw bē mad pad harwist kišwar kē haft kū bē zad až ī dahāg ud bē ān zad frēdōn ī āspīyān ī buland ī zōrīg

208.0

ud ān ī dahom zamestān ān mādayān wurrawist u =šān ēdōn guft kū menēm nūn kū =šān zad ī až ī dahāg čē nē nūn wazēd abar ō harwist kišwar kē haft ud ān ī weh gōwišn ud ān ī wattar ā =iz nē gōwēd ud nē pad xwāhišn xwāhēd ān ī čarātīg ud ān =iz ī ārzōg xwāstag

209.0

ud ēn =iz kū ka =š zan ud xwāstag ī =š abāyišnīg sahist dāštan āgāhīh mad ēg =iš pad sūragōmand ī zarrēn andar hāxt ud ān bowandag ud arišt pad mēnōygyāgīh ō gilistag bē mad ī až ī dahāg

210.0

ud ēn =iz kū kē =š ān ī ōy bē zad brād ayāb nāf ayāb naftī ayāb kadāriz =ēw nabānazdištān ā =šān nē pad ān ī garān sahist u =šān nē pad menišn menīd kū =šān ayād =iz abāz nē kird u =šān ēdōn guft kū mānbed ān bē zad kē harwisp ātaxšān az dānān abāyēd ān mānbed ud dehbed ān bē zad kē harwistīn awēšān xwadāy

211.0

ud ēn =iz kū harw gyāg kū ōy bē mad āyēb ī az saf andar ōbast u =šān ān ī stabr ātaxš āyiftan pahrēz rāy

212.0

ud ēn =iz kū =š pad gumēzag warzīd huwaršt ud ān =iz ī dušhuwaršt až ī dahāg

213.0

ud abar hampursīd ī māzandarān dehān pas az wānīdan ī dahāg pad dāštan ī ō xwanirah spōxtan ī frēdōn az =iš pad menišn frāz grift ī im gyāg ud pad was marag padīdan u =šān bulandīh rāy zrēy ī frāxkird ast kūtā mayān rān ast kūtā nāfag ud ān ī zofrtar gyāg tā ō dahan mad

214.0

ud ka ō ēn kišwar mad hēnd garān zyān ud zanišn kirdan mardōmān pad garzišn ō frēdōn madan ud guftan kū čim =it bē zad až ī dahāg kē huxwadāy būd pad pāduxšāyīh kū =š bīm abāz dāšt ud wizōstār u =š ēn kišwar bē pād az māzandarān dehān

215.0

u =šān abar wattarīh ī māzandarān yyy ī mardōm ī ēn kišwar andar awēšān ēn =iz guft kū ēg gōwēnd kū čē ēdōn awēšān dādestān čē gōšōmand kū =šān kark ast sūragōmand kū =šān sūrag ast xwānišnōmand kū ēk ōy ī didān xwānēnd wīr amāh awēšān =iz menēm pad ēd dārēm kū mardōm hēnd

216.0

ud abar hamrasišnīh ī frēdōn abāg māzandarān dehān pad dašt ī pēšānīgah ud pahikārdan ī ō awēšān kū māzandar deh ast ān bē zad až ī dahāg kē stūdom kē harw garān pāduxšā būd dēwān ud mardōmān an =iš pad ān ōy zanišn frāz dād ham ohrmazd tarwēnīdārtar az dōān dāmān pad hamēmāl ī xwēš stumbkird ud ēg ēn ān ī man deh bē zanēd ašmāh kē mazandār deh hēd

217.0

ud māzandarān frēdōn sabuk menīd ud pad afsōs ēwāz guftan kū ēdōn ā bawēd kū tō bē zad až ī dahāg kē stī arwandtom kē harw dōān pāduxšā būd dēwān ud mardōmān u =š tō pad ān ī ōy zanišn frāz dād hē ohrmazd tarwēnīdārtar az dōān dāmān ēg =iz amāh andar ēn nišīnēm ud andar ēn mānēm ud nē tō ī buland ī wasārōyišn ī stabr pah ī wīr gōwišn andar abārīg kas ā =t ēdar bē nē hilēm

218.0

ēn =iz kū bē pas tazīd ud pērōzgar frēdōn ō bālist ī pēš tazīd u =š wēnīg ān frōgīd kū =š bē daft ud az dašn wēnīg ī ōy snēxr padīd hēnd ī hamāg sard ī zamestān handaxšwand burrāg ud tēz ud az hōy wēnīg ī ōy sag padīd hēnd ī ka yyy ī kadag ī meh ā ī ātaxš handaxšwand ī burrāg ī tēz xāk =iš barēnd bē bast pērōzgar ī tagīg ī frēdōn az pāy ī gāw ī gušn ī barmāyūn

219.0

u =š ān pad ulīh ul dawēnīd u =š awēšān kird sagkirb u =š awēšān bē zad hēnd kē māzandarān deh pad panǰāhγenišnīh sadγenišnīh hazārγenišnīh amarγenišnīh

220.0

u =š ēdōn bē zad hēnd pērōzgar ī tagīg frēdōn dō srišwadag ān ī māzandar deh ēk srišwadag bē mad ud zad ud wēmārag ud nē =iz pas spitāmān zarduxšt kē māzandar deh abar ēn kišwar ī xwanirah raft hēnd u =šān nē pad abarmenišnīh =iz menīd kū šawēm bē az dō kē ēdōn nām būd spityōš ī spānsnāyōš ud arzrāspī ī spānsnāyōš kē tazīd hēnd pad xradxwāhišnīh ud raft hēnd abar frašōštar ī hwōbān

221.0

pahlom ābādīh ast ahlāyīh

222.0

wīstudēkom pargard wahištōyšt abar kū xwāhišnān pahlom dēn ī weh ud abar mihr ī hamāggēhān xešm harw šab ēk būšāsp dō ǰār pad wināhēnīdan ud kāhīdan srōšahlī se ud dahmān āfrīn čahār pad frāydahišnīh ud wālišndahišnīh ud bōxtārtom az yazadān dahmān āfrīn būd

223.0

ud ēn =iz kū kirbhuapaytom az nārīgān hōmāy ī āzādtōhmag ī wištāspān ud az aspān asp ī šēd ī wištāspān ud az gāwān gāw ī gušn ī barmāyūn ud az mēšān mēš ī frašōštar ī spar ī spēdērwārag ī starpassāxt ud abarnēmag pad yyy ud zarrēnpēsīd azabarnēmag zard ud ēk =iz kē awēšān ō hazār ēk =iz =ēw xwarrah hāwandīh ī dahm mard ī ahlaw kē dahmān ī wehān āfrīn pad =iš nē ayābēd

224.0

ud ēn =iz andčand pad mard ud zan wehīh pad mar ud ǰeh wattarīh

225.0

ud abar kird ī kay us xwadāyīh pad čērīh abar būm ī haft pad dēwān ud mardōmān rawāgīh ī =š framān tēztar az dast yyy ud kirdan ī ān =iš haft mān pad mayānag ī harborz ēk zarrēn ud dō sēmēn ud dō pōlābdēn ud dō ābgēnagēn ud was dēw ud māzanīg az wināhīdan ī gēhān abāz dāštan ud andar ō kār ī xwēš bastan mardōm kē zōr az zarmān tarwēnīdag ud ǰān nazd ō pazdagīh ī az tan būd ō ān ī ōy mān ayāft tēz pērāmōn ān mān ud **wāzēnīdan ud zarmān az =iš ōsānīhistan u =š zōr ud ǰuwānīh abāz madan hād framān =iš dād ēstād kū mardōm pad dar abāz ma dārēd pānzdah sālag handēmān kunēd

226.0

pas dēwān abar ōš ī kay us hampursīdan ud xešm ān ī ōy ōš padīrēd ud ō kay us madan ī ud ānōwōn wuzurg xwadāyīh ī =š abar haft būm dāšt pad =iš menišn yyy kird u =š ō xwadāyīh ī asmān gāh ī amahraspandān ārzōgēnīdan

227.0

ud kay us az wiyābāngarīh ī xešm ud abārīg dēw ī =š hamkār ō ān agārēnīdan ēstād pad =iz pahikārišn ud yyy ī yazadān

228.0

u =š nē wašt ud tar harburz abāg was dēw ud druwand ud mardōm tā yyy ī tom ul dwāristan pad ān kanārag ī kayān xwarrah gar kirb būd

229.0

ud kay us az spāh hamist abar rēzīhistan ud pad =iz nōg abarīg pahikārišn ī yazadān abardom az ān dušāgāhīh nē waštan

230.0

ud pas dādār kayān xwarrah abāz ō xwēš xwānd ud spāh ī kay us az ān burz ō zamīg ōbastan ud kay us ō zrēh ī frāxkird wāzīdan

231.0

ud ēn =iz gōwēd kū bē ōy az pasī wāzīd nēryōsang frāydādār ī gēhān ud pad wardišn ī ān ī ōy kas

232.0

ud ān ī azād husrōy ā =š ēdōn hunām ārāst wāng čiyōn ān ī hazārgānag spāh kū ma ē zanē nēryōsang ī frāydādār ī gēhān čē agar ēd mard zanē nēryōsang ī frāydādār ī gēhān nē pas pad windišn windīhēd bē wizēnīdār ī dastwar ī tūrān čē az ēd mard zāyēd ī siyāwaxš ast nām az siyāwaxš ān zāyēm kē husrōy ham kē ān ī hamwīrdom az tūrān kē gund ud spāh tabāh wēš ā =š ō yyy bē rasēnam kū =š gund ud spāh tabāh bē kunam kē ān ī tūrān pāduxšā dūrtazišn kunam

233.0

u =š pad ān gōwišn rāmēnīd frawahr ī husrōy nēryōsang ī frāydādār ī gēhān u =š ān pad ān gōwišn frāz hišt ud ān pad ān ōšōmand būd kay us

234.0

pahlom ābādīh ahlāyīh ast

235.0

wīstuddōwom pargard ayryaman , abar hamrasīd ī kay husrōy ud wāy ī dagrandxwadāy nazd ō frašegird pursīd ī kay husrōy ō wāy ī dagrandxwadāy abar zadan ī =š čand az pēšēnīgān kē pad warz ud xwarrah abardom būd hēnd az mardōmān ,

236.0

ud passox ī wāy ī dagrandxwadāy abar zadan ī =š awēšān ud pad ān passox grift ī kay husrōy wāy ī dagrandxwadāy ud frāz wardēnīdan ī ō ān ī uštarkirb ud abar nišast ud šud ī abāg ērān hanǰamanīgān ō ānōh kū nibāyēd pad xwēy , haōišt ī gəuruuąn ī amarg ud hangēzēnīdan ī =š ōy ud hammis ōy =iz šud ī ō ānōh kū nibāyēd pad xwēy tūs ī ardīgrānēnīdār ud hangēzēnīdan ī =š ōy =iz ud hammis ōy =iz šud ī =š ō ānōh kū nibāyēd kay abīweh ud hangēzēnīdan ī =š ōy =iz

237.0

ud raft ī =š hammis awēšān ud andarg rāh ō ham rasīd ī ōy ī sūdōmand ī pērōzgar sōšyans ud pursīd ī az ōy sūdīmand ī pērōzgar kū kē mard hē kē nišīnē pad wāy abar ī dagrandxwadāy kū wāzēnē wāy ī dagrandxwadāy frāz wašt ō ān ī uštarkirb

238.0

ud guftan ī kay husrōy pad passox ō sōšyans kū ān ham kay husrōy

239.0

ud burzīdan ī sōšyans ō kay husrōy abar kand ī =š ān uzdēsčār ī abar bār ī war ī čēčast ud zadan ī =š ǰādūg frāsāsp

240.0

ud stāyīdan ī kay husrōy dēnmazdēsn ud madan ī asttuwānīg kirsāsp gaddast ō awēšān padīrag abar ī ōy gay ǰādūg mān bē ēstād ī ardīgrānēnīdār tūs ud xwānd ī =š kirsāsp ō āstawānīh ī abar gāhānīgīh ud hamīh ī abāg awēšān ud stāyīdan ī kirsāsp ahlāyīh ud abgand ī =š ān ī armzadār

241.0

pad ēn =iz gōwēd kū ēdōn awēšān mard ō ham rasēnd ī frašegirdkirdār ī pad ēn pargard ud ān =iz ī abārīg gyāg guft ēstēd harwist arwand hēnd abarkār ud harwist tagīg hēnd nēw ud awēšān kunēnd frašegird pad kāmag andar axwān azarmān ud amarg ud asuyišn ud apuyišn tā hamēudhamērawišnīh

242.0

ast pahlom ābādīh ahlāyīh

243.0

warštmānsr ast wīstse pargard fradom āsrōpaytiš pad pursišn ī mēdōmāh ō zardušt abar čiyōnīh ī zāyišn ī zardušt ud madan ī =š ō dēn

244.0

ud passox ī zardušt abar kōxšišnīg abarrasišnīh ī zīyēnīdār ud margēnīdār mēnōy pad ān ī ōy zāyišn

245.0

ud ēn =iz kū ka =š ān ī burdār mād yyy ud kān suft ardwīsūr war ud pušt ahlišwang sēnūg ud uruhbar mēnōy ī rādīh dāšt , ud dēn pahlūg ud kayān xwarrah sēnūg mušt

246.0

ud guftan ī zardušt mēnōyīhā pad waγdan yyy zāyišn kū čiyōn ahū kāmag kē zōt hē frāz ō man gōw ud passox ī az ohrmazd kū ēdōn radīhā az ahlāyīh čēgāmizēw frāz ahlawāgāhīh gōwam tō hē frāy =iz arztar ud tō ahlawtar ud tō āgāhtom ud tō gōwē dēn ī mazdēsnān ō harwistīn dāmān

247.0

pad ān gōwišn ō dēwān mēnōyīhā tigr ēdōn rasīd čiyōn az tagīg aγrī ī artēštār ī kay wištāsp mānāg ī ōy ī pad garānmānīh wist tigr ō padīrag yyy pahikafišn ,

248.0

ud dawīd gannāgmēnōy ō dēwān kū anāg ašmāh būd šāyēd bē wany bawēd

249.0

ēdōn =iz zardušt ā =š az dēwān sālārīh bē guft ka =š ēn =iz guft kū čiyōn ahū kāmag padīdan ī dēwān pad zanišn ō zardušt ēstād ī padīrag ī awēšān mēnōy yazad ud abāz dāštan ī =šān andar ān sneh az zardušt ,

250.0

ud did guftan kū dēn ī sūdōmandān ānōh rawēd kē andar ān pad hukirdārīh ā =š az ahlāyīhurwāhmenīh ud pad ān gōwišn ō dēwān dah and ān ī fradom guft mēnōyīhā tigr rasīd ud dēw pad zanišn ī zarduxšt abar padīdan ud padīrag ōy yazadān mēnōyīhāēstād ān sneh az zarduxšt abāz dāšt

251.0

sidīgar guftan ī zardušt pad bāzā zāyišn kū ān pad nigerišn ēdōn warzišn kē dād axwān ī fradom pad ōy ī rad kunišn rāzagēnišn ud pad ān gōwišn ō dēwān sad and ān ī fradom guft mēnōyīhā tigr rasīd , ud dēw pad ōš ī zardušt abarpadīd ud mēnōy yazad dēw az zardušt abāz dāštan

252.0

ud ka zardušt hamāg tan bē zād āyēb andar dēwān ōbast ud dēw pad awištāb abāz ō dušox dwāristan ud rōšnīh andar dām abzūdan ud harwist ān ī spennāg yazad dām rāmīhistan ud nēkrawišnīh guftan ,

253.0

ud ohrmazd ō zardušt pad urwāhmenīh bē kird pahrēz kirdan ud ardwīsūr ud ahlišwang ud hamist kayān xwarrah zardušt tan muštan ohrmazd ō zardušt guft kū ōy ī dānāg menēš

254.0

ud zardušt pad ān passox mēnōyīhā guftan kū mazdēsn ham ud mazdēsnīh ī zardušt franāmam , ay kū ohrmazd frēstag ham ud ohrmazdfrēst =am

255.0

ud ohrmazd ō zardušt guft kū yazadān stāy u =šān hamīh xwāh ud dēwān nikōh u =šān ǰudāgīh dōš ud humat ud hūxt huwaršt kun , ud az dušmat ud dušhūxt dušhuwaršt pahrēz

256.0

ud abar =iz yazadān wēnāgīhā yaštan ud mizd pad =iš ud wattar nē nērōgēnīdan ud weh nē nizōrēnīdan ud dēn pidarīhā nigēxtan ud ō dēn padīruftārān rādīh kirdan ud tan ud gyān dōšāramrāy az dēn nē waštan

257.0

ud padīriftan zardušt mēnōyīhā ham andarz ud stāyīdan ī =š ohrmazd pad dādārīh ud xwadāyīh ud hamāg wehīh ud amahraspand hamist abārīg dahišn ī weh ǰudǰud pad xwēš mādī ud xwarrah ,

258.0

ud pas gannāgmēnōy pad ān bēš kēnīgīhā dawīdan kū dād =im ō ōy ī tō dēnburdār rēšīdārīh 99999 ǰādūg , 99999 gurgīzag , ud 99999 ahlomōγ ,

259.0

guftan ī ohrmazd ō zarduxšt kū ēn dēn ōstīgān dār čē pad ēn dēnabāgīh ā =t man abāg bawam kē ohrmazd ham u =t bawēd xrad ī harwispāgāh u =t ō hāwištīh rasēd mēdōmāh ud paršadgāw ud sēn ud kay wištāsp ud frašōštar ud ǰāmāsp ī āskāragwarz ud kāmag čāšīdār ō ahlawān ud was ān ī xwēškār ud ān =iz ī axwēškār mardōm u =t xwēšīhēd ān ī awēšān kirbag ud spās

260.0

ud abar gētīyīg nimūdārīh ī ohrmazd dēn ō zardušt ud padīriftan ī zardušt dēn pad ōšmurdan ud āstawānīh ud yaštan ī zardušt ahunawar

261.0

ud abar =iz dād ī ohrmazd dām pad mēnōy frāz brēhēnīdan ī =š ō gētī abardarīh ī mard ī ahlaw az abārīg dām ud andar mardōmān ōy kē pad dādwinnārdārīh ud awardišnīgīh ī az wehīh ōstuwārīh yazadān hammōxtār ud hammōzgār ī wehdēn abardom astīh ,

262.0

ud hangird ī āwarišnīh ī ān ātaxš kē ātaxš ī pad xānag hanǰāmišn ō ān ud yaštan ī ān āb ī nazdtar ō mānišn ud ān ī xwēš menē ud kē āyišt ud ān ātaxš ud āb ud mēnōy ud hamkāmagīh rāy abārīg ātaxš ud āb ud mēnōy yazēd ēwčand ī kē awēšān ān ēzišn nē padīrēnd ud padīrišn abārīgān ān ī mard yazišn ēdōn būd ka =š ān se yašt ēstēd ,

263.0

ahlāyīh ābādīh pahlom ast ,

264.0

didīgar pargard yatāahūwayryō ,

265.0

abar arzānīgīh pad gētīyīg ud mēnōyīg nēkīh pad xwadāy ud dastwardārīh dād ud pad dēndārīh ud dastwarīh awišāyist kē abāg astīh ī =š abārīg hunar kē xwadāyīh dastwarīh pad =iš xwēšīhēd xwad =iz xwadāy ud dastwar dārēd ,

266.0

dōš man zardušt tō pad ahūīh ud radīh čiyōn hē zardušt ahūōmand radōmand kū tō =iz pad dastwar dārēnd čiyōn tō ēg frāzrasišnīh hād kū be bōxtē ka =t abāg dēwānāmēxtišnīh kū =t abāg ahlomōγān pahikār hād

267.0

xwadāy ud dastwar nē dārīh xēm ud dād ī dēwān būd ud dāštan ī amahraspandān ud ohrmazd pad xwadāy ud dastwar ud ohrmazd xwadāyīh abāg dādārīh hambūd

268.0

ud ēn =iz kū pad ahlāyīh rad pad kāmag xwadāy ud dānāg ud dādār ud parwardār ud āsnīdār ī driyōšān , ud garōdmānīgīh ī hamāg awēšān kē dēn x az zardušt padīrēnd ,

269.0

ahlāyīh ābādīh ī ast pahlom ,

270.0

sidīgar pargard ašemwohū , abar andarz ī pad ahlāyīhstāyīdārīh ī xwad ast rāsttarsagāhīhkirdārīh ī ohrmazd ud astān pahlomīh ud xwāyišnān wehdarīh ud mazdēsnramagīh ī ahlāyīh ud huzahagīh ud hunaftīyīh ud mēnōy hutarsīh wēšurwāhmenīh ud ruwānāsānīh

271.0

ud rōšnīhpaymōgīh ī ōy ī pad dastwar warzīdār ahlāyīh ud yazišnōmandīh niyāyišnōmandīh ī ahlāyīh mēnōy ,

272.0

ahlāyīh pahlom ābādīh ast ,

273.0

čahārom pargard , yeŋ́hēhātąm

274.0

guft =iš ohrmazd ō spitāmān zarduxšt kū gōw gōwišn ī amāh yazišn niyāyišn kē amahraspand hēm čiyōn tō hād zardušt yašt āb ud yašt urwar ud yašt ahlawān frawahr ud yašt ān ī mēnōy ī yazad kē =iz ō gētī frāz brēhēnīd

275.0

u =š guft zardušt kū gōwam gōwišn ī ohrmazd ī ǰudbēš ud ohrmazddādestān ān ī ašmāh yazišn niyāyišn ī kē amahraspand hēd ,

276.0

ahlāyīh pahlom ast ābādīh ,

277.0

panǰom pargard yānīmmanō ,

278.0

abar nēkīharzānīgīh ī zardušt pad frārōnīh ī =š menišn gōwišn kunišn ud fradomīh ī ohrmazd ud fradomxwēšīh ī =š niyāyišn menišnīgkunišnīh ī niyāyišn ī yazadān ud hamāgkirbag niyāyišn ī yazadān pahlomīh ī mard ī ahlaw ud padīrišn ud ātaxšhambarišnīh ud wehdēn dāštārīh ud hāmxradīh ī dādār ud handāzišn ī harw kār ō =š kām ud dahišn ud frāzdaxšagīh pad abzōn wizīdan ud kird ī ān ī abzōnīgān hammōg būd ud xwad hāxtagīh ī zardušt ō dēn ud az fradom tā abdom pad bowandaggarmōgīh ī pad ān ī yazadān niyāyišn ēkānag būd ,

279.0

ud ēn =iz kū mad hē ō garōdmān ay ahlaw zardušt āgāh hē kunišn zardušt kē =šān warzīd astōmand axwān ud kē =iz warzēnd ud yazadān abar mardōm kirbag tuwānayābag nihād ,

280.0

ud abar abdīh ī garōdmān , ud ēn =iz kū kē andar ān mān nē kas pas az zāyišn bē widerēd pad frašegird zamān garōdmān frōd ō starpāyag ud zamīg ul ō ānōh wihēzēnīdan pad hamāg kār wahman ō hampursīh xwāst ud ka =š xwānēnd pad gyāg madan ud dagrgyānīh az ahlāyīh būd ud pad ān ī rāst saxwan amahraspand ō ayārīh madan ud pad amahraspandān ud srōšahlī abāgīh ī ī bēšīdārān bēš tarwēnīdan ud ayārēnīdan ī amahraspandān ō zardušt ka pad abārōn dād ī ērān agārēnīdan frāz raft

281.0

zardušt rāy pad gōwišn ī ohrmazd ēn =iz kū xwēš tō amāh hē zardušt ud amāh ēd ī tō rādīh tis ō tō dahēd ā =š amāh dād bawēd ud niwē ī ō zardušt rasēnīdan ī wištāsp ō =š ayārīh ud ān ī ōy xwadāyīh ō =š hamnērōgīh ,

282.0

ud frašōštar ō =iz hāwištīh ud tarsagāyīh , ud stāyišn ī frašōštar pad rawāg kirdan ī dēn ud rāstwidāragīh ī pad ān ī ohrmazd saxwan ud awēšān ī frašōštar ō dēn hāxt hamāg ahlawīh ,

283.0

abar stāyišn ī zardušt ēn =iz kū nē amāh āzārē nē pad gyān nē pad frašn ud nē frāzniwēyēnišnīh ka dēn ō kasān nimāyē ud nē pad kadāriz =ēw spitāmān amāh kē amahraspand hēm ud sūddahišnīh ī ō xwāstārān xwarišn ud wastarg ō amāh kē pad yazišn yazadān asūdag bawēd ,

284.0

ud abar dōst pād ud adōst wirāstan ud pānagīh ud rāstīh ud frārōnīh rāy mardōm pānagīh kirdan ud anarzānīgbahrīh ī ōy mard kē ān ī meh kār ud kirbag niyābag kirdan ān ī keh kunēd ,

285.0

ud ēn =iz kū āgāh =iz hē ān ud andar =iz dānē ahlaw zardušt pad ān ī man xrad frazānagīh kē andar axwān fradom būd ud kē =iz ēdōn tā ō ān ī abdom axwān ,

286.0

ahlāyīh ast ābādīh pahlom ,

287.0

šašom pargard xšmāyabī ,

288.0

abar garzišn ī gōšurun ka ō dād niwist andar amahraspandān hanǰaman ō ohrmazd az was xīndagīh ud anāgīh ī =š mēnōyīhā dīd kū =š pad tanōmandīh abar rasīd az zadan ud ōzadan rēšēnīdan ud duzzīdan ud appurdan ud dādan ī ān ī abārōn kunišn kāmag wattar pad pārag ō ōy ī dušpādixšā mar ud pad =iš kirdārīh wadxwāhīh ud dušnakkīrāyīh ud zūrgōwāgīh ud wardag kirdan ī ān ī xešm ī stahmag pad āz ud arešk ud az ān ī garmōg gōstān ān ī tuwān tuxšāg pasušhorw sālārīh ō ān ī sard ī abar awištābgar gāh ud ōy xwar xwāhēnd anaboxšīdār dast pad gurgīhā ǰudāgkirdārīh ī az waččag

289.0

ud nizārēnīdan ud kāstan ud was ēwēnag anāgīh pad =iš kirdan kē =šān nē bēš =ēw ka =m ān ī sard wād ud ān =iz ī garm abar rasīd u =šān nē bēš =ēw ud ka =m bē abgand aškambag kušēnd u =šān nē bēš =ēw ka =m yaz ud udrāy ud ān =iz ī pūdagtom xrafstar ī ǰōyēd ,

290.0

ud xwāyišn ī gōšurun kū =m gētī ud ān škeft ud xīndagīh ma brēhēn , ud agar =im ō gētī brēhēnē ān =im uzuštānīhā bē dah kū a-mārdār bawam ud ān dušwidār dard ayāb =im ō tagīgān dah kē =šān pad ayārīh ud pānagīh ī man kirdan pattūgīh ast ka =iz kay ud karab hēnd

291.0

ud abāg rāstgarzišnīh ī gōšurun aboxšāyišn ī amahraspandān pad ān garzišn ud pas =iz dahišn ī dām kē =š andar meh ud pahlom mardōm ō kōšišn ānābišn ī ēbgad =iz ōh hambāstag pad rēš ud bēš garzišn čiyōn gōšurun az adahišnīh abāg =iz apetyāragīh ī hammis gōšurun mehdādestānīhātar būd ud mardōm pad gōspand ayārīh zīstan ud winnirdan šāyistan rāy gōšurun ō gētī tanōmandīh ud ayārīh ī mardōm dād ,

292.0

ud kem mārdan ī =š gētīyīg anāgīh rāy gōspand māyēnīdan ud xwāštīh paymōxtan ud gōšurun pad dahišn zardušt ō gōspandān ayārīh rawāgēnīdan ī zardušt dēn mazdēsn andar gēhān ud bōzāgīh ī gōspand ud abārīg dahišn ī weh pad bowandagrawāgīh dēn hunsandēnīdan ,

293.0

ud ēn =iz ō gōšurun guftan kū gōwam ō tō wišōbišn wizārišn kū anāgīh ī az gannāgmēnōy čārag ast kē =m nē dām frāz brēhēnīd hē man kē ohrmazd ham ka =m anāgīh ī az ōy čārag nē dānist =ēw

294.0

ēn =iz kū =š ēdōn kāmag būd gannāgmēnōy kū ma hagriz dām frāz brēhēnīd hē ohrmazd ud ma ēdar ahūīh hē ud ma radīh ud ma kāmag ī ō ahlāyīh pahlom abāyist ī ō kār ud kirbag ,

295.0

ud pursišn ī gōšurun kū ō kē an brēhēnīd ud tāšīd ham ud passox ī aw =iš kū ō ōy ī tuxšāgīh paymānīg

296.0

ud xwāst ī gōšurun gōspandān rāy ayār ud srāyišn dād ī ohrmazd ō ayārīh ī gōspand mard ī ahlaw ud srāyišn ī gōspandān rāy šīrēnīh andar āb ud urwar kū xwardan dāštan ī gōspand ōy pāduxšāyīh kē =š ast dahēd wāstar ud ān =iz ī gōspandān dahišn tuxšāg kū =š wāstar dahēd u =š pasušhorw =ēw az ān paydāgēnīd kē gōspand bē abzāyēnēd ud ōy =iz kē ān ī druwand xešmen anēr wānišn dahēd kū stō kunēd

297.0

ud abzāyēnīdan ī ohrmazd gōspand andarz ī ō mardōmān pad paymānxwarišnīh ud garān puhl ī ōy ī adādīhā gōspand bēš dād ī gōšurun pad mēnōy hamkirb ī amahraspandān ud hamkirb ī ān ī xwaršēd rōšnīh ud kāmagdōysr hučašm ud kū astān ōzōmandtar ōy kē ō yazadān paywāzēd u =š yazadān paywāzēnd ,

298.0

ud abar gōwišn ī ohrmazd ēn =iz kū an ān saxwan āmārēnīdār ham kē saxwan ast ī gētīyān ān ī harw dō axwān rāy gōwēnd , ud āgāh ham kunišn kē =šān warzīd andar astōmand axwān dēw ud mardōm ud kē =iz warzēnd an ham bē wizīdār xwadāy ud ēdōn ud ast čiyōn man kāmag pad =iz ān ī abdom axwān wardišn ud harwist ān abar wēnam pad ān ī man xrad ud frazānagīh kē būd kē ast kē =iz hagriz bawēd

299.0

ud tāšīdan ī ohrmazd mizd ō gētīyān pad mānsrspand kē būd ēstēd pēšraftārīh sūdōmandān kū =šān dastwar kē abzōnīgīh ud āgāhīh ī harwist sūdīmand ast ān ī mānsr

300.0

ud abar ēkīh ud dōhamtāgīh ī zardušt ud andar mardōmān pad kāmag ī ō ahlāyīh ud čāragšnāsīh ī abar wānīdan ī ēbgad ud hammōxtārīh ī dāmān ,

301.0

ahlāyīh ast pahlom ābādīh ,

302.0

haftom pargard attāwaxšī ,

303.0

az ēzišnōmandīh ud niyāyišnōmandīh ī dēn , ud mānsr mēnōy ud ēn =iz kū mēnōy ī ēzišn ī ōy ī humenīdārīh āgāh ī dānāg mard tēz abar gumēxtēd ō ān ī xwaršēd rōšnīh ud ō kāmaghanǰāmīh ud urwāhm ī amahraspandān paywandēd ,

304.0

ud abar wizēn ī mardōmān kāmrāh ī ō mizd pad wizēngarīh būd ,

305.0

abar andarz ī ō mardōmān pad xwāstan ī ān gāh kē dagr pad kāmag abar mānistan šāyēd ud ōšmurdan ud hammōxtan ī dēn ī yazadān ,

306.0

ud az gōwišn ī zardušt abar drāyīdan ī arš dēw ō mardōmān ohrmazd ud ahreman brād ī pad ēk aškom būd hēnd ud az awēšān amahraspand ān ī wattar dōšīd pad ān ī ka =š yyy yyy dēwānēzišnīh guft ud ēn kū pasīh gōspand dahēd ō abāxtarīgān dēwān ,

307.0

ud abar drōzanīh ī arš dēw ud ǰudbunīh ī rōšn ud tom ud wehīh ī ān ī rōšnist ī pad wizēn ud waršt , ud wadīh ī ān ī tom

308.0

ud dawīdan ī gannāgmēnōy kū ān ī wattar menišn man ast spanāg mēnōy ud ān ī wattar gōwišn ān ī wattar kunišn ud ān ī tamīg man ast wastarg ī was ī stabr ī dušērtar kū and čand wēš šawēnd tārīgtar ud dušmat ud dušhūxt ud dušhuwaršt man ast xwarišn ud ān awēšān dōšam kē andar ān ast pad dušmat ud dušhūxt ud dušhuwaršt

309.0

ud guftan ī ohrmazd kū ān ī wehmenišn man ast gannāgmēnōy ud ān ī wehgōwišn ud ān ī wehkunišn asmān man ast wastarg kē fradom frāz brēhēnīd az ān ī gētīyān stī kē pad ān sag abar ārust sag bē dād ēstēd kū =š hamāggōhr andar pēsīd ēstēd humat ud hūxt ud huwaršt man ast xwarišn ud ān awēšān dōšam kē andar ān ast pad humat hūxt huwaršt ,

310.0

ēn =iz kū nē =šān rāst bē wizīd dušdānāg dēw ud nē hagriz rāst bē wizīnēnd kē kāmag ān ī akōman

311.0

ud abar wēmārēnīdan ī dēwān ān ī mardōmān axwān pad frēftan =iz ī mardōm ō mardōm az dēwān frēbišn ud madan ī mardōm pad ān wihān ō āhōgīh ud dušruwānīh ud rasēnīdan ī ohrmazd ō dāmān bōzāgīh xwadāyīh ud dēn ud dānāgīh ud abāz paymīhistan ī pad =iš rēš ud bēš ō dēwān ud xwadāyīh abāz ō ohrmazd ud mizd ī wahman ud abāyist ī yazadān dārēnd ud pāduxšāyīh pad frazām mardōm abar dēw ud weh abar wattar ud ahlaw abar druwand ud abar čiyōnīh ī awēšān ī frašegirdkirdār ,

312.0

ud ēn =iz kū paydāgīh awēšān hēnd spitāmān zardušt kē frašegird kunēnd andar axwān wigrād awēšān hēnd ud zēnāwand pad xwāyišn ī ahlāyīh ud sabukxwēy awēšān hēnd ud abar pad menišn ahlāyēnēnd tis ī frārōn kē ō awēšān

313.0

abar ān ī stūd gōwišn srūd ēstēd kū pad gāh guft ēstēd kū ēdōn abāg kē ī tō ham kū tō xwēš hēm ā =mān ēn frašegird kunišn andar axwān ,

314.0

ud abar hamēšaghanǰamanīh ī amahraspand abar kirdan ī tan ī pasēn ,

315.0

ud ēn =iz kū bē waxšēnīdār ī rōzān ān ī druz škennēnd spāh ud paymōzēnd ān ī šēd rōšnīh ud ān =iz ī nēk tanwarzišnīh ud ān =iz ī nēk tanwarzišn awēšān hēnd āsrōn artēštār ud wāstaryōš ud mard ī xwadāy kē =šān abāg ast ahlišwang ud mēnōy ī rādīh ud awēšān pad humenišnīh ud rāmišn menēnd ud pad rāmišn ō xwēš dahēnd gēhān pad ān ī ohrmazd sālārīh ud ašawahišt =iz ka ohrmazd ud dēn pad xwadāy dārēnd ,

316.0

ēn =iz kū kē menišn pad dastwar ī ahū dārēd hamēšag ān ī frārōn menēd ā =š frazānagīh abzāyēd ,

317.0

ud abar andarz ī ō mardōmān pad se tis kē pad =iš bawēd frašegird ud dāmān nēkrawišnīh dēn rāst xwāst az wināhišn ī dāmān pahrēxtan ud pad nēkīh ī mardōmān tuxšēd ,

318.0

ābādīh ahlāyīh pahlom ast ,

319.0

haštom pargard tāwrad abar andarz ī pad ōšmurdan ī dēn ud āgāhīh ī az =iš ō āstawānān ī pad =iš āgāhēnīdan ud ō anāstawānān pad handāzag ī paydāgīg dānišn ī nimūdārīg guftan ud kadāriz =ēw kē padīruftan ud kē =iz nē padīruftan menēd ō dēn xwānd sūd ī az hāxtan ī mardōm ō dēn wēš hāwištīh =iz az wēšhāwištīh gētīyīgīhā abzōnīg mehīh ud mēnōyīhā frāymizdīh ud rawāgīh ī dēn ī ohrmazd pad =iz agdēnān ud ahlomōγān =iz

320.0

ud ēn =iz kū dāmān ī ohrmazd zīndagīh ud abārīg =iz hamāg nēkīh az ohrmazd ud ān ī ohrmazd kāmwarzag pad =iš az ohrmazd mizd =iz ī ud pāddāšn rasēd

321.0

ud dām ī ahreman az ahreman sazēd ud anāgīh hamāg az ahreman ahreman ka =š yazēnd wattar ud stahmagtar ud anāgīhkirdārtar bawēd ,

322.0

ud abar ēstišnwinnārišn ī harw dō mēnōy pad xwēš stī ud xwadkirdārīh ī =šān xwēš abzārān harw ēk pad xwēš abzār guharīg pad ān ī did yadišnīg kār rāyēnīdan

323.0

ud ohrmazd ahūīh ud radīh ud rāst xwastūgīh wehdēn rawāgīh ahreman pad hamēmālīh ī dāmān ī ohrmazd hambadīg ēn kē ohrmazd pad ān hambedīgspōzīh ān ī rāst āgāhīh dādār uzwān ud nērang =iz ī war dād ud xwānišn ī yazadān ō ayārīh ud rasišn ī yazad ō xwandārān ayārīh ud tarwēnīdan ī =šān bēš ud dād ī =šān ābādīh ud ahlāyīh =iz ud ān =iz weh xwadāy ī ohrmazd aštag ud abāzārāstārīh tan ō ēmēd ī hamāg wehdahišnān pad xwand ī yazadān ō ayārīh rasīdan kū ayābišn ān ī frārōn dānišn pad wahman ī dēn ī weh kē ast čēgāmiz hudānāgīh wisp astān būdān bawēdān

324.0

ud abar drāyišn ī ariš dēw ō zardušt ud passox ī zardušt pad ān ī ohrmazd andarz ud čē andar ān dar čiyōn =iš dēn gōwēd kū =š ō ōy guft ariš dēw kū adēn franāmam zardušt ō ān ī dēwān ōz kē kē tō rāy nišīnēnd pad ham gāh se šab ud čahār rōz , pad sidōš

325.0

az ōy zardušt kū ariš =am drōzantom čē man pad ān pāddāšn ast agar ašmāh pad gōwišn yazam ,

326.0

u =š ō ōy guft ariš ī dēwān drōzantom kū tō pāduxšā bawē andar mardōmān pad kāmagdahišnīh andar axwān čiyōn =it xwad abāyēd ud ahōš bawē spitāmān

327.0

u =š az ōy pursīd zardušt kū ariš ī dēwān drōzantom mardōm kē =š ašmāh yašt ud humēnīd pad =iz ān ī zahāg pus ud pad =iz ān ī pad hunsandīh xwāst ǰeh kū =š pad xwēšīh ī ašmāh dāšt čiyōn kas ud az awēšān ahōš

328.0

u =š ān ī ōy nē guft wasāgāhīh ariš ī dēwān drōzantom ,

329.0

guft =iš zardušt kū ōy ham ud ōy dōšam kū ōy xwēš ham ud tis ī ōy kunam ud ān dād ud ān wābarīgānīh ōšmuram ī ohrmazd ī hudānāg ī kāmagrāmēnīdār ,

330.0

ud abar bōzāgīh ī hamāg dām pad mānsr , ud andčand az =iš rawāgīhēd ō zōr kē pad frašegird amargīh ī hāmdahišn pad =iš winnārīhēd ud abzūdan ud pad bowandagrawāgīh mānsr dām ī weh abēzagīhistan ud waxšēnīdan ī ī andar gēhān wehīh ka ōy ī weh xwadāyīh rasēd

331.0

ud mēnōyīg dahišn fradom menišn ī ohrmazd būdan ohrmazd dām fradom mēnōyīg āfurrīdan ud pas gētī kirdan ud mēnōy ō gētī gumēxtan ud pad =iš dām rawāgēnīdan ud pad ān ī ōy xrad wahman ahlāyīh andar dām mehmānīhistan pad =iš harwist dām ī weh ō abēzagīh ud urwāhmenīh zāmīhistan ,

332.0

ēn =iz kū bowandagšnāsīh ī tisān pad wahman andar wārom ud mēhan kardagīh bawēd

333.0

ud abar wuzurgmizdīh ī ōy kē pad gōspandān nēkīh kunēd ud frēftārīhā ud wiyābāngarīhā paymōgdēnīh ud dūnmenišnīh ud ahlāyīhmōšīh ud dušwarštkārīh ud pad ān ahlāyīh ōšmurdārīh yyy aniyābagmizdīh ī awarzīdār ahlomōγ

334.0

ud abar kār ī dādār pad frazāmēnīdan pad =iš abardom šnāsīhēd ka =š gēhān dēn tāšīd ud ka =š ō tanōmandān gyān dād ka =š hammōg ud kunišn āfurrīd ud ka =š ō kāmagōmandān kāmag dād kū bahr ī gētī ud mēnōy ōy wēš xwēšēnēd kē bowandagmenišnīh pad tan mehmānēnēd ud bowandagmenišnīh hampursēd

335.0

ud andar hāxtārīh ī harw dō mēnōy kē weh ud kē =iz wattar ǰudǰud ō xwēš abzār kār ī dēn ī ohrmazd pad ox ud menišn wēšnigerišnīh ud agārīh ī ud čārag ī mardōm abar wišuftan ī =šān wināh čē ohrmazd hamāg āgāh ān ī āškārag ud ān =iz ī nihānīg warzēnd

336.0

ud wuzurgmizdīh ī ōy kē ō mard ī ahlaw kē xwēš xīr dāsr rādēnēd , ud ēn =iz kū kē ō ōy ī druwand ān ī abārōn ummēd rāy dāsr dahēd tam ayārēnēd nē rōšnīh

337.0

ud ēn =iz kū wattom xwadāy ān ī dušdēn duškunišn kē pad =iz pārag nēkīh nē kunēd ud ān ī awināh zadār ud garānpādufrāhīh ī ān kas pad dušox ud kē ōy druwand xwadāy kunēd

338.0

ud andarz ī ō mardōmān pad kirdan ī abar harw mān dādwar ud sālār uzmūdan ī mard pad ān ī meh kār gumārdan ud abzōn ō gēhān hamāg dahišn ka =š xwadāy hudānāg ,

339.0

ud škarwīdan ī gannāgmēnōy ō mard ī rāstmenišn ī rāstgōwišn ī rāstkunišn ī wizurd ī ahlaw petyārag =iš druwand ī dušnakkīrā ī abārōnpahikār ahlomōγ ud wurrawēnīdan ī ahlomōγ mardōm ō abērāhīh frāy az ān ī hāzēnēd ōy ī ahlaw ō ān ī rāst rāh ud adēn =iz pad frazām škastan kē sūdīmand mardōm ān ī druz spāh

340.0

ud andarz ī ō mardōmān abar pahrēz ī az pasī ī ōy ahlomōγ ud nē niyōšīdan ud nē xwastan ī az =iš =išān abestāg ud zand ud dušrawišnīh ud spazgīh ud anāštīh ud margīh ud bīm az ahlomōγān andar gēhān

341.0

ud andarz ī ō dēnburdārān abar čārag ī ahlomōγān bē šnāxtan u =šān dēnīh sāxtan dāštan kū ān ī pāduxšā ī abēbīm rāstgōwišnīh niyābagtar ud ka =š dēn ī ohrmazd dōšīd ēg =iš rāstgōwišnīh ud abārīg ahlāyīh kāmagēnīd bawēd ,

342.0

ud rasīdan ī pad sidōš pad passāxt ud ātaxš ī abzōnīg ō ayārīh ud bōzāgīh ī ahlawān ud šēwanrawišnīh ōy kē mard ī ahlaw frēbēd ud bēšēd ud nīdan ī druwandān xwēš abāyēd kird ō dušox ,

343.0

ud ēn =iz kū bowandagarzānīgīh ī pad hordād ud amurdad ōy bawēd kē pāduxšāyīh ī =š ast pad frārōnīh dārēd kē kadāriz =ēw ān ī xwēš mēnōy pad kunišn ēdōn dōst abāyēd būdan čiyōn dādār ān ī xwēš dām ,

344.0

ēn =iz kū abar gēhān kadāriz =ēw ēdōn pahlom ka harw kas ēdōn menēd gōwēd ud kunēd čiyōn =iš ahū dastwar ud kū weh xwadāy ud ōy kē abāg nēkēnīdārīh frārōnkunišn =iz bawēd

345.0

ēn =iz kū ohrmazd andar gētī mehmānīh pad tan ī ōy ī xwadāy wēš ud ān mehmānīh pad =iš paydāgīg

346.0

ābādīh ahlāyīh ast pahlom ,

347.0

nohom pargard xwaytumayt

348.0

abar madan ī se dēw ō frēbīg lābakkarīh ī ohrmazd kū pad ān lābag ō awēšān menād mizdēnād ud ō zōr ī =šān pad murnǰēnīdan ī dāmān rasād

349.0

ud awēšān dēwān az zofr =ēw ō burz lābagēwāzīhā yyy ud ēk kū xwēšīh ī adrōzišn ud ēk =iz kū wālanīh ī adrōzišn ēk kū ērmānīh ī adrōzišn ham guftan pad ēn kū ān mēnōy hēm ka xwēš ud ērmān ud wālan ēk abāg did mihr nē drōzēnd amāh rāy ud ēn =iz kū amāh abzār ī tō hēm u =mān dēn ud dād ān ī tō kāmag ī tō kunēm ud kē tō dōst ayār ud kē dušmen wizūdār bawēm ud az tō xwāhēm gāh ī andar ān ī pahlom axwān ud mizd ī mizdarzānīgān

350.0

passox ī ohrmazd ō awēšān kū bē dušdānāg dwārēd ō bun ī ān ī ērand tam ēdōn ašmāh harwist kē dēw hēd ā =tān az akōman =iz ast tōhmag az ānōh kū akōman ud waran =iz ī abesīhēnīdār ud āz =iz ī yyy ud indar =iz ī kōšīdār dēn mēnōy ī ahlomōγīh ud frāz frēbēd mardōm ī gētī pad huzīyišnīh ud amargrawišnīh ud menišn awēšān fradom bē bandēd

351.0

fradom ēd kunēd kū mardōmān menišn az tis ī frārōn bē bandēd u =šān frāz gōwišn wardēnēd frāz kunišn az ān ī amāh ēzišn ud kē amahraspand hēm ud frāz xrad bē wisinnēnd ud frāz ahlāyīh =iz ī pahlom ud ān ī dēwān dōšīd menēnd ud ān drō gōwišn gōwēnd ud pad ān ī wattar kunišn mardōm ašmāh yazēnd pad zōhr ud kē ašmāh was yazēd drōzantar abarmenišntar bawēd ud az ān drōzanīh ud abarmenišnīh mahist yazišn abzāyēnd kū wēš wēš ōh kunēnd

352.0

ud awēšān az anāštīh pad zanišn zanēnd pad ān =iz ī ašmāh duššnūman dēw hēd kē =tān nē pad pēšīh hunsandīh ka =tān pēšōbāy dargandzadār bawēd ēdōn pad pasīh =iz ast kū zanēd ka =iz =itān pad pasōbāy dagrandzanišn kunēd

353.0

wattar dēw =ēd pad hambarišnīh ka =tān pahrēz gōwēnd ud wattar pad yazišn niyāyišn ka rasēd ān ī ahlāyīh guftār hamāg rōšnīh bawēd andar axwān ašmāh bē abesīhēd ud andarz ī ō mardōmān abar pahrēz ī az dēw rāy bowandagmenišnīh pad tan mehmānīd ,

354.0

ud ēn =iz kū wattar ašmāh druwand =ēd kē pad ān ī weh zōhr pad gōwišn dēwān yazēd pad awēšān zōhr ān ī wattar windēd pāddāšn ud ān =iz ī ērand dušox ,

355.0

ud ēn =iz kū awēšān kēnīg dēwān rāy ō tō āgāhīhā fradom gōwam ka mad hēnd ō gēhān kū fradom ka andar dwārist hēnd ā =šān dādestān čiyōn būd

356.0

sīh sadōzim ān ī man gēhān būd hēnd amarg ud azarmān zardušt ka ān ī om sadōzim bē saxt būd spitāmān ēg ō ān ī man gayōmard ān ī dēwāndād xwēy frāz mad pad bēš ānand zamān čand mard ēn gōwišn frāz gōwēd ī ahūōmand ud radōmand yatāahūwayryō

357.0

ud ka az ān xwēy frāz būd asāyag būd kū tārīgīh andar āmad būd u =m ēg ēn gōwišn frāz guft ī ahūōmand ud radōmand ud ka =m wāstar =im guft būd ēg dēw ō tam zkplwnyt hēnd

358.0

ud abar wizend ī az dēwān ēn =iz kū murnǰēnīd =iš gannāgmēnōy ān ī man dām dušhammōzišnīh ī sraw u =š ān ī man īšt appurd paymān ī kirdan ud dāštan ī xwāstag ī ārzōg ast pad wahman kū ka pad frārōnīh dārēnd abāyišnīg

359.0

ān ī wīwanghānān ǰam ā =š šnāyēnīd mardōm u =š šnāyēnīd gōspand ī hudahāg ēdōn pad gōwišn zardušt ka =š guft ō mardōmān kū ašmāh gōspand mardōm =ēd kū ašmāh xwēš pad bazišn mardōm =ēd gōšt xwarēd u =tān pad bazišn gōšt sagr bawišn ast mardōm =ēd ma āz rāy ud ma arešk rāy ud ma bē abgandpid ī rōdīg ud ma bē abgandpid ī wpyšk rāy pad kušišn kušēd kū =tān ēdōn nēk u =tān bowandag ,

360.0

ud ēn =iz kū ōy =iz mard ō ān ī man murnǰēnišn dād ī gannāgmēnōy ī druwand xwēš ān mard wanī =iš dagrandgyān kē =š astāyišnīh ī ahlāyīh guft ud ēzišnīh ī mard ī ahlaw kē =š guft ō kū awēšān wāstar mardōm =ēd wispdādār kū bē abzāyēd wisphamburdār kū rawāg bē kunēd andar awēšān wāstar mardōm =ēd wisp mānēnd pad mehmānīh awēšān wāstar rāy mānēnd pad kušišn ud sar ō ham zanēnd awēšān wāstar mardōm =ēd wisp =ēd pad ātaxš ud wiyābānēnīd pad abārīg tis būd =iz ašmāh kū =š ān drōgōwišn ī anāst ō ham wurrawēnīd hēd kē xwēšīh ī dagranddrōd wiyābānīh bē az druz ī =tān meh mad ēstēd ,

361.0

ud abar wizend ī az dēwān ēn =iz kū =šān abar ō ēn ī man dām abarmenišnīh bē kird ud anāštīh =iz mard ī ahlaw ān =iz ī čēr nasā nigānīh ,

362.0

ud ēn =iz kū awēšān mardān zanišntar hēnd kē nasā bē kešēnd pad ān ī dēn xwāstag andar ēn gēhān pad pah ud stōr ,

363.0

ēn =iz kū ān ī sahmgen dušwārīh zīndag abāgēnēd mardōmān kē nasā ī rist pad pah ud stōr dahēnd ō wis kū barēnd ud awēšān ātaxš bēšēnd ud āb =iz ī srāwtazišn ud awēšān =iz tan ī wimēg ī dah ud awēšān yyy ī čahārag hēnd ī hazārgānag kū pad ēd bār bē āyēnd ayārdahišntar bawēnd kē nasā druwand ,

364.0

awēšān =iz rāy ō tō gōwam spitāmān zardušt kū pad ān ī nohom ud dahom sadōzim rasēnd ī ōy ī druz hunušagān hēnd yyy ī gannāgmēnōy ēk =iz kē awēšān zanišntar čiyōn dah dēwāst kē ōy abēzag kunēnd kū =š az xwāstag tuhīg bē kunēnd kē āsrō az ōšmurišn ud burzišn bē ,

365.0

ud kē ǰaw ī purrmarag wāstaryōš kē pāyēd ān ī dagrand kū az mardōmān abāz dārēd ud ōy ī awināh mardōm āstirdagīh abar barēnd ud warzēnd ān ī dušwaršt framān

366.0

ud awēšān =iz ēk ō ān ī man murnǰēnišn dahēnd ō ēn ī man dēn kē zīyišnōmandīh gōwēnd kū ka zīstan šāyist pad rāh ī amāh druwand hēnd ud pad mehīh kāhēnēnd wattarīh =iz kū pad pēšōbāyīh ud pasōbāyīh wināh kunēnd ud kē tō gannāg halag gōwēnd kē ēd ī tō dēn ī gand abēzag spitāmān gannāg

367.0

awēšān =iz gōwēnd kē ēd ī tō dēn ī mazdēsnān ōšmurēnd awēšān zardušt az ān tō ān =iz ī lyšyn windišn ēd kū apparēnd ud tar ēd ī tō yazišn menēnd ud tar niyāyišn , ud tar ān ī harw dō wābarīgānīh menēnd abestāg zand kē ō tō man frāz guft kē az mēnōyān abzōnīgtom ham

368.0

ud ān ōy ī pahlom ahlaw yazišn rēšēnd ud niyāyišn =iz kē zardušt ī spitāmān hāwišt būd ān kē bē nihād ud lyyyh ī wattar srāyēnd pahlom kunišn ō mardōmān kē az ān ī wattar kunišn urwāhmenīh gōwēnd

369.0

ud xwadāyīh pad grāmag xwāhēnd kū pāduxšāyīh pad pārag xwāhēnd u =šān ān ī wattar andargōw pad menišn kū pad ēd menišn dahēd kū sad stēr bē daham ud dewīst stēr abāz stanam ud murnǰēnēnd ān ī pahlom axwān ud murnǰēnēnd ān ī xwēš ruwān murnǰēnēnd astōmandān gēhān

370.0

ēg ān xwadāyīh bē barēnd kē pāduxšā hēnd kayag ud karab ud ān =iz ī dušxwadāytom pad deh abar ō ōy ī huxwadāytom andar mān ud wis ud zand ud deh ud ēg harw dō wāng barēnd kē ān ī huxwadāy ud ān =iz kē kē ān ī dušxwadāy ud zanīhēd ān ī dušxwadāy ud ō ōy ī huxwadāytom xwadāyīh bē abespārēd

371.0

ēg kē andar ān pad ān harw grāmag xwāhēd ī uštānōmand ud ān =iz ī uzuštān kē zanišn ud garzišnkāmag ud kē ān ī man mard ī ahlaw tarist baxšēd āsānīh ud kē awēšān pāyēd az nigēzišn ī ahlāyīh , ud kē ǰādūg ud parīg ay kū =šān pādufrāh kunēnd ,

372.0

ēn =iz kū was kēnīgān kēn xwāhīhēd ud kū wināhgārān pādufrāh kunēnd ka paymōzēnd ō tan gyān kū gyān abāz ō tan dahēnd bē ōwōn āhen abar pad zamīg purr ēstēd frāz widāxt kē nē kēnēnēd ōy ī ahlaw ud kēnēnēd ōy ī druwand ud frašegird andar axwān kunam man kē ohrmazd ham

373.0

ud ēdōn =iz hagriz fradom ān druyist bawēd gēhān druyist =ēw ī ēdōn ī az ān frāz wēmār nē bawēd kē mar bē nūn =iz amarg paydāgīh =iš ast ōh nūn , ud āgāh =iz bawēnd pad ān ī man xwadāyīh kū az man bē nūn =iz amarg gēhān ī astōmand ī ahlāyīh ,

374.0

ābādīh pahlom ahlāyīh ast ,

375.0

dahom pargard yatāyš , abar frašegird pad gōwišn ī ohrmazd ō zarduxšt kū man ān dād frašegirdkirdār ahlāyēnīdār sōšyans kē gōwēnd mardōm kū nē rasēd ud rasēd pad ān xwārīh ud hamāgrōšnīh bawēd ō ahlawān

376.0

ud abar nigerīdan ud ō paymān handāxtan pad dastwar kirdan ī harw kār ud ēn =iz kū ān azadār kām ī abar kadāriz =ēw xwēšīhā ud ērmānīhā ud wālanīhā nēkīhkirdār kāmwarz ud dōst ī ohrmazd u =š ān mēnōy pad =iš mehmān nē frēftēd ,

377.0

andarz ī abar dūrīh ī az ōy kē =š druz ī aniyōšīdārīh ud tarmenišnīh pad =iš stahmag xwēšān tarmen abāg wālanīn tēz drōzan ud ērmānān yyy dahišn ud gōspandān apahrēz mustōmandān anayār

378.0

ud abar puhl kē pad =iš rasišn ī ō ohrmazd ud ān ī pahlom axwān bawēd wēnišnīg ud awēnišnīgān =iz yazadān yaštan

379.0

ud čāštan ī ohrmazd ō zarduxšt pōryōtkēš ud ahū ud rad u zōt ī gēhān ēstād ī pad frašegird hangām zarduxšt ī az se zamānān pad zōtgāh ī hamāg gētīyān ud wahwast ī snōy az snōān dehān pad hāwanānīh , ud iswand ī warāzān ī az tūrān dehān pad ādarwaxšīh ud sēn ī hōmstawanān ī az sēnān dehān pad frabardārīh , ud wištāsp ī az nōdarān pad srōšāwarzīh ,

380.0

abar amāwandīh ud pērōzgarīh ī ān yazišn būd ī pad =iz andar ān axwān hamāgrōšnīh ī frašegird ud amargīh ī hāmdahišn ,

381.0

ud ēn =iz kū gannāgmēnōy abdom =iz ōš pad wahman bawēd , ud mehmizdīh ī ōy kē pad wizīdārdahišnīh rādīh yazadān yazēd ud dēnnigēz ī yazadān bawēd pad bowandagdōstīh ud hamkārīh ud pad āgenēn ō xwēškārīh ī āyōxtārīh amahraspandān ,

382.0

ud ēn =iz kū tō awēšān hēnd frazend kē awēšān yazad frāz gōwēnd hamdādestānīh kē hagriz abardom hamīh frāz guft kū hamdādestānīh =ēw ān stabrtar bawēd , u =š guft ohrmazd kū man ham xwadāy ī dānāg ī sūdxwāstār ī frāydādār ī gēhān u =m pad ēn gōwišn yə̄ səuuištō menišnīg pad nērang yaštār bawē , ud nēk xēm tō āmurzēm tō u =t rasēm ō ayārīh u =t dahēm kadāriz =ēw pad =iš pādixšāyīh ī ēdar ud ānōh ,

383.0

ud ēn =iz kū ka ātaxš abrōzē ēn gōwišn frāz gōw usmōi tā wezest sar , ud abar paywāxt ud yazadān se yān ī zardušt pattūgīh ī pad frārōnīh ud frāzdaxšagīh ī dēn ud rāmišn ī andar harw dō axwān ,

384.0

ud ēn =iz kū sahēd =iš gannāgmēnōy kū ahlāyīh abar ōy stahmag ud amāwand ān zamān ka ēstēd akōman az muhrag ī wahman ka pafšīrēd akōman az wahman nē wēnēd akōman kē ān ī ōy rāmēnīdārīh gōwēd ,

385.0

ud abar xwāst ī zardušt az ohrmazd nimūdan ī =š kirb ī ātaxš ul waxšīd az dō yyy ī ohrmazd , ud sahist ī zardušt ān ātaxš kū hāmgēhān ī ul ō asmān waxšē menīdan ī =š kū nēk ēdōn man ka =m ātaxš ī abzōnīg pad hamīh ul waxšē ud pad ān abāgīh frāz rawam andar astōmandān gēhān ,

386.0

ud guftan ī ohrmazd kū menīd =it ēdōn zardušt kē =t amenīd būd kū =t nē abāyist menīdan čē menē ēd zardušt ud griftār kirdan nē šāyēd kē wēnē sōzān pad ān ī čašm wēnišn , ud anāhōgēnīd zardušt ēd ātaxš ud āhōgēnīd tō hē andar gētīyān nē tō hē hamhāgīhkirdār pēš az axwān frašegirdkirdārīh ud ānōh ān ī man zahāg pus āhōgēnīd andar gētīyān stī rādēnēš ō ōy kū =š tis dah ēzēš ud rāmēnēš ōy zardušt ,

387.0

ābādīh pahlom ast ahlāyīh ,

388.0

yāzdahom pargard yāšyawayt ,

389.0

abar kirdan ī pad hamāg kār ud dādestān myazd =ēw ī nāmčištīg ka nōgnāwar ēzīhēd andar ān panǰ gāh , ud ēn =iz kū ohrmazd gēhān pad dānāgīh ud pad wehīh parward ud pad u rāstīh waxšēnīd ,

390.0

ud abar dād ī ohrmazd ātaxš ō ayārīh ī mardōm ud paydāgīh ī abar mardōmān tan ayārīh ud rāmišn ī az ātaxš ud pad =iz ruwān ayārēnīdan ī mēnōy ī ātaxš ō kē ātaxš ayārēnēd ud padīrag ruwānhamēmālīh ēstād ī kē ātaxš bēšēd ud abar dānāg guftār dād ī ohrmazd ān ātaxš menēnd ,

391.0

ud ēn =iz kū ka ātaxš abar kunēm pad ān ī xwēš wēnāgīh zardušt niyōšišn dahēš spitāmān abar pad ān ī xwēš tan tā =š wāng bē nišīnēd ud ka =š gōwišn hangirdēnīd hād zahag pus ī ohrmazd ēg ēn gōwišn frāz gōw ān ī pērōzgar zardušt , at̰ tōi ātrə̄m ahurāi gāhānīg tā wezest sar , dahēd ō tō ātaxš ābādīg kē az ōy zayē spitāmān kū gētīyīhā xwāstag ud xwadāyīh ī yazadān ān ī yazadān āhang ud nēk kunišn mardōm ud yazadān ān mard ēdōn dōst čiyōn pid ō zahag pus ,

392.0

abar nēwdilīhā stāyīdan ī ahlāyīh ud ǰudāgīh ī az dēwān abēgumānīh ī abar ēn kū dādār tuwānīgtar ud pāduxšāytar az hamāg dēw ud mardōm , ud paydāgīh ī az was gētī wēnišnīg tis abar bawēd tā tan ī pasēn kū kē xwāhēd kū =š wābarīgānīh ī andar mardōmān abērtar bawēd stāyišn yazišn ī yazadān wēš kirdan ,

393.0

ud ēn =iz kū rādīh ī ō yazadān frārōnkunišnīh bawēd ud ō frārōnkunišnīh pad frārōnmenišnīh šāyēd madan ,

394.0

ud ēn =iz kū rawēd ān ī man wahman nigerēd ox ī astōmand menišn ud saxwangōwišnīh ud kunišn ān ī ō man abar abāz niwēyēd tā ō se bār andar ham rōz kē =iz ō tō rād spitāmān kē =iz ō tō arād ,

395.0

ud kōšīdan ī dēwān ō ānāftan ī hamāg nēkīh az mardōmān ud nē ayāftan ī =šān tuwān ō ān nēkīh ī mardōm pad tan ī pasēn bawēd , ud kū az harw anāgīh ī dēw ō mardōm handāzēnd anāgīh =ēw garāntar ka =šān az rāh ī yazadān āhrēnēnd ud druwandēnēnd u =šān wēštar pad ahlomōγān ud abārīg dahīg stāyīdārān ī ahlāyīh pad ahlāyīhstāyīdārīh ka =iz abēr was stāyēnd ,

396.0

abar raftan ī ārmad ud tarōmad hamē andar dām hāxtan ī ārmad mardōm ud ahlāyīh , ud tarōmad ō drōzišn niyōšīdan ī ān ī wattar tārōmad , ud dūrīh ī ahlāyīh az ān ī wattar čiyōn gōspand siǰd az mardōm ,

397.0

ud ēn =iz kū pad bowandagmenišnīh zanīhēd gannāgmēnōy starišnōmand kōšišn čiyōn ōzōmand ān ī yyy zanēd abēzag zardušt ud dād ī ohrmazd hordād ud amurdad zōr ī pattūgīhā ō frabīhišn ud winnārišn ī dāmān

398.0

abar ǰuddēwīh ī ohrmazd ud handāzišn ī mardōm kunišn ō mehdādestānīh ī ast wēšsūdīh ī hammis dahišn ī weh , ud andar warōmandīh =ēw yazišn ī yazadān kirdan ,

399.0

abar kū mardōm dēn ī weh wehkāmagīh ud bowandagmenišnīh mēnōy rasēnēd u =šān mēnōyīg urwāhm az yōǰdāsrēnīdan ī xwēš dēn pad frārōn kām ud kunišn bawēd ,

400.0

abar mizdkāmagīh ī kadāriz =ēw ud was sūd ī az mizdkāmagīh ī mardōm xwēšīhistan ī mizd pad kār ī yazadān pad =iz ān ī ašmāh xwadāyīh frašegird pad kāmag andar axwān daham man kē ohrmazd ham , ābādīh ast ahlāyīh pahlom ,

401.0

dwāzdahom pargard yast , abar paydāgīh ī humat hūxt huwaršt az dēn mehmānīh ī dēn pad humat hūxt huwaršt ud kē humat ud kē hūxt ud kē huwaršt xwēšēnēd ā =š ahlawīh ud ān ī ahlawān mizd xwēšēnīd bawēd ,

402.0

ud ēn =iz kū nē ōy zardušt ud nē zāyišn abar zayišn ī az pidarān kē nē ahlaw u =š nē ān ī ahlawān paydāgīh ,

403.0

ud ēn =iz kū šādmenišn ud kāmagox ud xwārtan ud nihādag ō awēšān menišn =iz dahē dēn kē ō tō man frāz guft kū az astān mahist ud pahlom ud nēktom ud kū ān ī gōspandān az mardōmān niyābag āb ud wāstar ud abēbīmīh , ud ān ī mardōmān az gōspandān ast xwarišn =iz ud wastarg ,

404.0

ud ēn =iz kū ān ī mardōm ō yazadān abāyēd dād tan ud tuwān pad bunīgīh ud xwēšīh , ud ān ī yazadān ō mardōmān abāyēd dād hamē ān ī =šān abar weh ,

405.0

ud ēn =iz kū awēšān yazadān ō ōy ī huxwadāytom xwadāyīh ud pāduxšāyīh bē =iz dahē ud bē =iz čāšē kē ohrmazd ud zardušt ,

406.0

ud ēn =iz kū ma ka =iz pad wiškar ka frāz az āškāragīh ud ma pad tangīh spitāmān ān ī dušwarštkunišn warzād čē ohrmazd ān āgāh ī harwistnigerīdār kun čiyōn kadāriz =ēw ox ī astōmand menēd ud gōwēd ud warzēd ēdōn ōy meh ast pādufrāh ,

407.0

ud ēn =iz kū pahlom yazišn ud niyāyišn mard ī ahlaw yazišn ud niyāyišn ,

408.0

ud abar zīyišnxwāyišnīh ud padīrišnīh kū az dō dar dastwarīhā ēk pad ahlāyīhsālārīh ān ī paydāg kū az frārōnīh ud ēk pad ahlāyīhwālanīh ān ī paydāgīh =ēw nēst kū az abārōnīh ,

409.0

ud abar kū frārōnīh abar rāstīh ud rāstīh abar uzwān pādixšāyīh kunē kū saxwan pad kāmag ī ohrmazd gōwē ,

410.0

ud ēn =iz kū an ham mēnōy ī abzōnīg kē fradom ud hamē bawam ud nē pad tis bē frēftom ,

411.0

abar dād ī ohrmazd ātaxš ō srāyišn ud ayārīh ud pānagīh ī mardōmān ud yaštan ud ayārēnīdan ī mardōm ud mēnōy ī ātaxš ō ōy kē =š urwāhmenīh az =iš urwāhm ud ō ōy kē =š niyāyišn kunēd niyāyišn kirdan ,

412.0

ud ān ī meh kār ī ast passāxt ī pad tan ī pasēn kē pad =iš dām abēzag bawēd pad ātaxš bawēd xwāst abāyistan ī mardōm az yazadān āyaft rāy ,

413.0

ēn =iz kū čē ēdōn tō zardušt šnāyēnīdārtom kū =mān wēš padrāmišn tuwān kirdan humatārīhātar hēm kū =mān weh tuwān madan ka az amāh xwāhē zardušt kē amahraspand hēm ,

414.0

ud abar nimūdan ī ohrmazd ō zarduxšt dāmān pad tan ī pasēn ,

415.0

ud ēn =iz kū hamāgrōšnīh ōy āb sahist ud hamāgrōšnīh zamīg ud hamāgrōšnīh gōspand ud hamāgrōšnīh urwar , ud hamāgrōšnīh harwisp ābādīh kē az ahlāyīh paydāgīh ,

416.0

ud abar yaštan ī ohrmazd az yaštārān pad pēšrawišnīh pad ān ī ohrmazd paymān dēn kē =š gēhān ahlāyīh dād u =š xwadāyīh ud mehīh pad =iš ud hupānagīh az =iš ud xwadāy nām dānagīh ast u =š yazišn sūd ī dahišnān az ōy ka tanōmand ud gyānōmand zīyēnd ud hamāg gētīyān ud mēnōyān nēkīh

417.0

ud ēn =iz kū xwēš tō amāh hē ud ērmān =iz spitāmān ud abar =iz ō amāh rasē pad ān ī weh tarsagāyīh ān tō ast zarduxšt mehīh ud bowandagīh pad kirdārīh kū =t mehīh ud bowandagīh bawēd kū tō ān hād zardušt ud akanārag ud abar az mayān kū =t mizd ēdōn stabr dahēm kū ka pad mayān ēstā ō kanārag nē wēnē zamīgpahnā ud rōddrahnā ud xwaršēdbālā

418.0

xwāst =iš zardušt az ohrmazd kū dah ō man ān ī mardān ī tagīgān bawēd hāwišt ud pad abarmenišnīh ī ō dēn kē ēn ī man dēn ī mazdēsnān rawāgīh =iz dahānd kē =iz ō ēn ī man warzišn ī weh nigēzēnd frāz wābarīgānīh =iz kird ī man pad wābarīgān dārēnd ,

419.0

guft =iš ohrmazd kū daham ō tō ān ī any mardān ī tagīgān bawēd hāwišt awēšān tō hēnd xwēš ud awēšān ērmān u =t awēšān hamhāg ud awēšān wālan kē ēd ī tō dēn ī mazdēsnān rawāgīh dahēnd

420.0

was tō awēšān zardušt ēzēš u =šān franāmēš u =t pad ān ī awēšān yazišn ud niyāyišn dahīhēd ān ī īšt rādīh ahlāyīh tō ō ruwān abāg u =t gyān az amāh ast ud tan =iz zardušt

421.0

frāz ō tō andar harw dō axwān rasam ō ayārīh kē dādār ohrmazd ham arzānīg bawē zardušt pad awēšān harw dō hordād amurdad pad rāmēnīdārīh ī man kē ohrmazd ham pad awēšān saxwan ud kunišn kē ō tō man frāz guft ī az mēnōyān abzōnīgtom ham ,

422.0

guft =uš zarduxšt kū xwāstār pad ān ī tō amāwand bawān ,

423.0

guft =uš ohrmazd kū xwāstār ud amāwand bawē andar ox ī astōmand ,

424.0

guft =uš zardušt kū rāmēnīdārīh tō ō amāh pad dagrrasišnīh ī gyān astān hudahāgtom kū =mān dahē ,

425.0

guft =uš ohrmazd kū rāmēnēm tō zardušt andar ān ī pahlom axwān ahlaw ,

426.0

ābādīh ast pahlom ahlāyīh , ,

427.0

sīzdahom pargard uštawayt

428.0

abar wuzurgmizdīh ī ōy kē pad ān ī nēk rawišn mard ahlāyīh ud čiyōn nēkīh kunēd , ēn =iz kū ahlāyīh dārišn ud pad warzišn abar nišānag ī mard ī ahlaw kū =š paydāg franāmišn ī ō kār ud kirbag u =š apaydāg kastārīh kū =š wināh =ēw nē paydāg warzīdār ān ī wahman paymān humat hūxt huwaršt ud parwastagīh ī harw wehīh andar ahlawān šnāyēnīdārīh ,

429.0

ud abar mizd ī rād az kirbag ī kas pad ān ī ōy nērōgdahišnīh kunēd ud rōšnrāhīh ud bālistwāzišnīh ud andar ān ī pahlom axwān frāxpāduxšāyīh ud abartarrāyēnišnīh ud wuzurgburzišnīh ī rāst rādān ruwān kū dahišnān dādār ān gāh pad wuzurgīh ī =š ast bunīg ud menēnd ka frašegird ud tan ī pasēn ud gēhān hamāg rōšn ud dām amarg kunēd ,

430.0

abar dīd ī zardušt amahraspand pad ān ī čašmwēnišn , ud abar dād ī ohrmazd ō kunišngarān mizd , ud ēn =iz kū pad ān ī ōy xrad ud hunar dām abdom =iz wardēd ō abēzagīh ud bawēnd gēhān amarg ud hamēsūd

431.0

abar hunar ī zardušt ēn =iz kū andar axwān ahlāyīhkāmagtar ud āškāragbēšīdār wattarān čand tuwānīg ahlāyīh menīdār ud wasēnīdār ud ōy ī dawag ī druwand gannāgmēnōy

432.0

ud wizēn ī zardušt abar rōz ī hampursagīh , ud ēn =iz kū =m ān ī rōšn rōz hād ohrmazd , armēšt ud wād ī xwābar kē man nē az hōšāg nē az sarmāg ud nē az suy ud nē az tišn ud nē az rōz āštīh , hōm man hād nān kē =š bōrag pad ǰomā gōšt šīr ud hrang āb ka hampursēm ō ōy ī spennāg ī āgāh ī bē wizīdār ohrmazd , čē ēdōn ān ī ašmāh ham frāzguftār ud ka =m xward ēstēd ā =m dēn ī ašmāh weh tuwān guftan , ud ēn =iz kū mad ō ōy kadāriz =ēw ēwēnag =ēw ī =š zast u =š mad ān ī hōm urwāhmenīh ud māyišn ud sagrīh u =š mad xrad ī harwispāgāh ,

433.0

ud abar abdīh ī wištāsp ud zardušt , ud ēn =iz kū =m nimūd dēn ō ǰam ī huramag u =m nimūd ō rōšn ī buland frēdōn u =m nimūd ō kay arš u =m nimūd ō sāmān kirsāsp u =šān nē padīruft az stahmagīh ī druz ī aniyōšīdārīh ī =šān abar mehmān būd , ud ēn =iz kū āgāh būd ham kū rawāg nē bawēd pēš az ān tā ka ō man rasēd srōšahlī ī wištāsp kē =š abāg ān ī meh rād zardušt ,

434.0

ud abar agārēnīdan ī zardušt abāg abārīg dēnburdārān druwandān az anāgīh ud zyān ī dāmān ,

435.0

ud ēn =iz kū zardušt pursīd az ohrmazd kū čē ēdōn ō awēšān framāyēm kē nē pad dār sneh tuwānīg hēnd kū =šān zēnabzār nēst u =šān nē spāh ud nē abarpanāh u =šān was bēšīdār , guft =uš ohrmazd kū awēšān ī tuštmenišn mard waxšēnišn daxšag pad ōš kē nē ēdōn pad spāh tuwānīg hēnd u =šān was bēšīdār ,

436.0

ud ēn =iz kū ohrmazd pad astīgīh dōšīdan ud dēn pad menišn zōrōmand dāštan pad =iš xwaršēd paydāgīh mizd dahēnd kē xwadāyīh ī =š ast pad bowandagmenišnīh kē ahlāyīh pad kunišn ā =š wahman dahēd mizd ,

437.0

pahlom ahlāyīh ābādīh ast ,

438.0

čahārdahom pargard tattwāpers

439.0

abar stāyišn ī dēn

440.0

ēn =iz nō kū az dēn harw kas nēkīh ,

441.0

ud ēn =iz kū man zahag zardušt u =š man pid parwardār ahlāyīh ī weh man dād zardušt , xwaršēd ud star rāh ud man āgāh ham kū čiyōn waxšēd ud čiyōn nirfsēd

442.0

an pāyam zamīg asmān adārišn kū =š dāštār =ēw ī gētī nēst ud abēōftišn man āb ud urwar dād man dō arwand ā =m tēz ō ham āyōzēnd wahman ud wād kē hagriz pahlom mizd pad zamīg kunēnd kū mizd =ēw ēn weh ī awēšān dahēnd wārān

443.0

man dām dād zardušt pad wahman andar gēhān ka =m awēšān frāz dād ī purr ī purrsardag sīh sadōzim ān ī man dām būd azarmān ud amarg zardušt andar sīh sadōzim nē būd suy ud tišn ud nē xwēy tan ud nē zēnāwandīh ud nē zarmān būd ud nē margīh ud nē ān ī sard wād ud nē ān ī garm , amarg ān ī man gēhān būd hamāg rōšn ud ān ī ahlawān stī , ēg āhōgēnišn abar mad ō gēhān ī astōmand ī ahlāyīh , pas man dād xwēy ud zēnāwandīh u =m pas dād rōz ud šab u =m pas dād ōš ud rapihwin ,

444.0

man xwadāyīh abāg bowandagmenišnīh ārzōg ō ham tāšīd ō sūdōmandān man windēnišn dād pus rāy ō pidar ān windēnišn ī windēnīd gušn ud mādag gušn u =m andar windēnišn dād pus ō pidar zardušt , ud ēdōn gannāgmēnōy nigerīd u =š abar xwānd az ān ī zofr kū spennāgmēnōy ī dādār hē harwist dām kēnēnam tō spennāgmēnōy harwist dām ,

445.0

ud abar rawāg bawēd ī dēn pad harw kas ud pad =iš frašegird tan ī pasēn , ud ēn =iz kū ēd ī tō dēn zardušt pahlom ast az dēnān , ēd ī tō dēn zardušt gēhān frāxwēnēd ī ahlāyīh ud bowandagmenišnīh awēšān fradom bē dahīhēd andar wārom kē ēd ī tō dēn ī mazdēsnān ud ōšmurēnd zardušt ēd ī tō dēn ī weh ud pahlom kē pad ahlāyīh ō xwēš šāyēd kirdan frāz ēn gōwēš ō xwēšān ērmānān ud ō āsrōān ud ōy ī kirdārtom pad deh kē ēd ī tō dēn ī mazdēsnān bē padīrēnd abar ō haftkišwar zamīg frāz ēn gōwēš ō ōy ī frāztom az mānān ud wisān ud zandān ud dehān frāz ēn ī man dušdēn ud franām mazdēsnīh zardušt ī ǰuddēw ī ohrmazddādestān , guft =uš ohrmazd kū frāz =im ēd ī tō dōšīd ud dēn ī mazdēsnīh zardušt ī ǰuddēw ī ohrmazddādestān agar =im ēd ī tō nē frāz dōšīd hē mazdēsnīh ī zardušt ī ǰuddēw ī ohrmazddādestān pad wināhišn būd hē kū wināhīd hē franāmišn dēn ī mazdēsnān kū dēn rawāg nē būd hē ud nē kas pas az sūdōmandān az ān bē zardušt rawāg bawēd dēn ī mazdēsnān ēg =iz tā ō frašegirdkirdārīh ēg =iz tā axwān hamēzīndagīh ēg =iz ō rōstāgān uluzišnīh ēg =iz tā ō mēnōyān bēwizārišnīh , abar nikōhīd andar dušox druwandān ō druwandtarān az druwandān ast kē pas =iz az bōxtan ī abārīgān az dušox se šab dušox pazīdan pas az ān se šab dādār awēšān =iz az anāgīh bōzēnīdan ud ō nēkīh rasēnīdan , ud ēn =iz kū zardušt pursīd az ohrmazd kū čiyōn hagriz ud ohrmazd dēw āšnāg huxwadāy būd hēnd čiyōn =išān andar gēhān menēnd ay kū =šān nēkīh az =iš būd , u =š guft ohrmazd kū būd hēnd dēw zardušt dušxwadāy ud nē huxwadāy ud pad =iz mizd pad ān ī ahlāyīh kār frāz dahēnd , pahlom ahlāyīh ast ābādīh ,

446.0

pānzdahom pargard atfrawaxšī

447.0

abar haft pahlomīh dēn andarz ,

448.0

fradom abar hamīh ī abāg dādār spennāgmēnōy pad niyōšīdan ud hammōxtan ud warzīdan ī =š dēn , ēn =iz kū pad =iš bawēd bōxtagīh ī ān ī weh dahišn az ēbgad ,

449.0

didīgar abar ǰudāgīh ī az murnǰēnīdār gannāgmēnōy ud nikōhīdan ī =š az tarmenišnīh ud drōzanīh sar ī =š harw āhōg ,

450.0

sidīgar wirāstan ī xēm pad humat ud hūxt ud huwaršt , ud ēn =iz kū kē az ašmāh ēn mānsr nē ēdōn warzēd čiyōn ēn menišn gōwišn ā =š nē awēšān rōšnīh baxšēnd ud nē ān ī pahlom axwān anāg ast tā ō ān ī abdom ,

451.0

čahārom abar pahlomīh ī xwēdōdah čiyōn =iš kē ka xwadīhdahišnīh u =š dādestān dād ī xwēš zahagīg wehīh ō zahāgīg paydāgīh ud paywandišnīhīgīh ud kārīgīh ī sūdīgīh ud xwadīhdahišnīh

452.0

xwēdōdah fradom dādār ohrmazd pad pidarīh ī wahman ī fradom zahag warzīd ud az ān warzišnīh mēnōyīg ud gētīyīg dām rawāgīh ud waspaywandīg čiyōn az rōšn brāh h ud az brāh payrōg ud az payrōg bām būd purrrawišnīhā wistardan ud ō frašegird paywastan mardōm pad =iz mēnōyīg ud gētīyīg widāragīh ī andar mēnōy gētī spandarmad ān mādarīg xwarrah padīruftārīh wāspuhragēnīdan

453.0

panǰom abar kirdan dāštan ī ān ī ahūōmand ud radōmand dastwar niyōšīdan =iš hammōg ud pad =iš ō ohrmazd dastwarīh ud kirbag mizd ud ān ī pahlom axwān paywastagīh ,

454.0

šašom abar stāyišn niyāyišn ud yazišn ī dādār ohrmazd , ud ēn =iz kū pad wahman frāzhampursīh bawēd ud az =iš xrad ud sūd =iz waxšēd ud kū xwāstār tō hē tō hē ō ruwān amargrawišnīh zardušt kū ohrmazd dāmān xwadāy ud mardōm šnāyišn ud warzišn ān ī ōy niyāyišn framān paymān

455.0

ud haftom abar xwadāyīh ī ohrmazd pad =iz mizd ud puhl dād ī =š andar āwāmīhā ān ī gēhān wirāstār ī wattar wišuftār ī sūdōmand ,

456.0

ud ēn =iz kū pad bowandagmenišnīh tō ēn ī man ēzišn hamēšaggriftār bawē spitāmān ,

457.0

ud abar dād ī ohrmazd ō dāmān zōr ud ān ī zōr guxrūn ud tarmenīdan ī gannāgmēnōy u =š abzārān ohrmazd ud dahišnān ud ān tarmenīh abāz ō gannāgmēnōy ud dēwān hammis kē ān ī dēwān dād waštan ,

458.0

ud abar stāyišn ī zardušt ēn =iz kū tō hē sūdōmand tō hē dastwar ud ped ud pad tō ast ān ī abzōnīg dēn tō brād ud hamhāg harwist hē sūdōmandān dōst tō ēdōn ast wahman ,

459.0

pahlom ābādīh ahlāyīh ast ,

460.0

šāždahom pargard kamnamayz

461.0

abar franāftan ī ō kadāriz =ēw būm pad nōgxwāyišnīh ī xwarrah , ud ēn =iz kū ahunsandīhā mān zarduxšt nē pad dōšišn ī amāh ka nē tō šnāyēnd xwēš ud nē ērmān ud nē hamhāg ud nē wālan ud nē sāstār ī druwand kē =šān ān ī dēwān yazišn kāmagtar az ēd ī tō ēzišn niyāyišn ,

462.0

kū ka =iz az amāh dūr hē ēg =iz az tis ī amāh abāz ma ēstpunčt ud ka =iz =it tis ī gētī nē xūb ēstād ēg =iz amāh ēzēš u =mān franāmēš ,

463.0

ud ēn =iz ēdōn kū =š ast kāmag gannāgmēnōy kū ma kas ēzē ud ma franāmē ō amahraspandān ud ma ēdar ahūīh ud ma radīh kū xwadāy ud dastwar ma dārēnd u =šān nē kāmag ī ō ahlāyīh ī pahlom ,

464.0

ud ēn =iz kū =t kemgundīh ud kemxwāstagīh az kemrawišnīh ī mardān ī xwadramēnīdārān āgāh hē zarduxšt kē hē axwāstār ēn kū =t ēn atuwānīgīh čē nē dānē ud wēnam tō ān ī garzišnīg gōwišn ī az =it āmārag xwāham ,

465.0

ud ēn =iz kū āgāh hē kāmagrāmēnīdārīh ī amāh kē amahraspand hēm ud dahēm ō tō rāmēnīdārīh ī zayē u =t dahēm ābādīh kē dōst ō ōy ī dōst dahēd ,

466.0

ud abar rasīd ī andar āwāmān arwandān kē sūdōmand hēnd pad hammōxtišn ud warzišn ī xrad u =šān wālīd ēstēd ān ī gušnān tuhišn ud awēšān az bowandagmenišnīh abāgīh frāxwēnēnd gēhān ī ahlāyīh ud tangīh ō druz dahēnd ud rasēd aw =išān sūd ī az frārōnīh ,

467.0

ud ēn =iz kū ān ī dušstahmag pad ān ī xwēš kunišn frōd murd bawēd ,

468.0

ud abar hamēstārēnīdan ī wattarān hamē pad and čand zōr ast , ud kū ān ī huxwadāy kē =š dastwar mānsrspand abar xešm pādixšā bawēd ,

469.0

ud abar stāyišn wirāstārān ēn =iz kū wābarīgān pad xūbšnāsagīh ud pad =iz mihr ān kē wināhgārān pādufrāh kunēd pad ēd dārišn kū šnāsag mihrbān ,

470.0

ud abar xwēšīh kadāriz =ēw dādestān , ēn =iz kū pad rašn zīyēnišn kē ahlaw kē =iz druwand kū harw kas pad dādestānōmandīh dārišn ,

471.0

ud ēn =iz kū pad nēk xwēš dārišn kē =š xwēš ruwān az druwandīh bōzēnīd ēstēd ,

472.0

ud ēn =iz kū ēdōn tō dastwar ān ī xwēš dēn abēzag ,

473.0

ud abar nišān ī druzxastag mānī ud druwandān ī =š niyōšāg zanišn ī =š az ōy ī dehbed mad ,

474.0

ud ēn =iz kū druwand kē ān ī man gēhān dahēd ō ān ī kēnīg ahreman ul =iš ēstēnīd bawēd ān ī xwad rēš dēw kū rawāg kird bawēd pad margīh ī ān ī ahlawīh gēhān

475.0

kē stāyēd ān ī ahlāyīh yazišn nē ēdōn ān zarduxšt stāyīd radīh ī gēhānān kū gōwēd kū pad radīh ud dastwarīh man weh šāyam ud nē ēdōn ān zarduxšt mwtlšn bē ǰōyēnēd ō mardōmān ud ān ō awēšān gōwēd hamēzīyišnīh kū =š hamēzīyišnīh az =iš bawēd awēšān kē bē ǰōyēnīd yyy ān awēšān pas menēnd ān dēwān yazišn pahlom

476.0

ud rasēd pad padīragrasišnīh srōšahlī yazam xwadāy ō ōy tan pad bēš ān xwadāy kē ēn pad huzīyišnīh pānagīh ud nē pad dušzīyišnīh ud pad kadāriz =ēw zamān bēšīdār druwandān ,

477.0

ud abar xwēšīh ī dēnhāxtārān kirbag ī hāxtagān

478.0

abar nišān ī abdom āwām ī zarduxštān az hazangrōzim ,

479.0

ēn =iz kū ō xwadāyīh abar ahrāmēnd kē kay ud karab hēnd ud ān =iz ī dušxwadāytom pad deh kē az ān ī wattar kunišn ān pad gōwišn murnǰēnēnd ān ī mardōmān axwān , ud murnǰēnēnd ān ī xwēš ruwān murnǰēnēnd ān ī astōmand gēhān kē =šān grāmag az ahlāyīh dōšagtar ud xwadāyīh =iz ī gišnag srāyišn andar axwān az ān ī wattar framān ka ī abārōn dahēnd ud hammōxtišn awēšān ō ān ī abdom abespārēnd ō druzōdmān

480.0

ud ēdar =iz abar stāyišn ī friyānīyān dūdag gōwēd kū ul rasēd ahlāyīh spitāmān az nāfān ud naftān ī tūrān ka uzīd pad friyānīyān guft ēdōn čiyōn pad tūrān būd awēšān pad bowandagmenišnīh abāgīh frāyēnēnd gēhān ī ahlāyīh ud tangīh ō druz dahēnd ham awēšān abar pad wahman menēnd zarduxšt ud awēšān rāmēnīdārīh pad gōwišn zayēš az amāh kē amahraspandān hēm kū bē xwāh

481.0

ud ēn =iz kū ēd ī tō rādīh ast kē amahraspand hēm kē ō tō rādīh kunēd ā =š ō amāh kird bawēd ,

482.0

ud abar stāyišn ī wištāsp ud ēn =iz kū šnāyēnēd tō andar axwān pad rāddahišnīh kay wištāsp kē =š ō tō pad tangīh frāzrasišnīh ast ud pad ān ī wahman xwadāyīh frāyēnēd ōy wištāsp gēhān ī astōmand ī ahlāyīh ud ōy menēš xūb hamēšag dōst abēzag zarduxšt kē kay wištāsp ēdōn ān kay wištāsp ī kārīg ī ka stāyēd dēn hamdamanān =iz wardēd kū =šān bē ō dēn āwarēd ,

483.0

ud abar hāxtan ī spitāmānān ō dēn , ēn =iz kū ēdōn gōwēš ō spitāmānān kū spitāmān =ēd ahlāyīh stāyēd pad franāmišn ī was ī abar pad menišn menišnīg u =tān dāšn bē wizīnšn ud kē =iz adāšnīh ud pad =iz awēšān kunišn ī ašmāh ahlāyīh ō ašmāh dād mizd kē =š dād was ohrmazd ān mizd ,

484.0

ud abar abdīh ī čahār ī ohrmazddād gyāg ānōh kū wahman xwadāyīh ud ānōh kū ohrmazd mehmānīh ud ānōh kū dēn abāg bowandagmenišnīh ud ānōh kū ān ī rādān ruwān ,

485.0

ud abar andarz ī ō zarduxšt pad guftan ī ō mardōmān kird ī paymān hišt ī apaymānīh ud xwēšēnīdan ī rādīh abāg ērmenišnīh ud dānāgpaymānīh ī pad kirbag ,

486.0

ud ēn =iz kū kē menišnīg tan pad hāwištīh bē ō tō dahēd ō ōy tō =iz pahlom ān ī xwēš īšt bē dahēš ud anāstīh ō ōy dahēš kē ō tō dahād anāstīh čē ēdōn tō ō ruwān pahlom ay ahlaw zarduxšt ka ēdōn kunēd ,

487.0

ud ēn =iz kū ēn ī man dēn pad xrad pad =iz menišn bē wizīnēš ,

488.0

ud ēn =iz kū ān kē pad ahlāyīh abāyist wēš az kirdan ā =š pad kirbag kirdan dāšn weh bawēd ,

489.0

ud ēn =iz kū kē kirbag xwāhēd kirbag ud kē awināhīh h xwāhēd awināhīh ayābēd kē ō yazadān rād ā =š az yazadān rādīh awisinnišn ,

490.0

ud ēn =iz kū ēn ān mizd āgāh ham kē būd hēnd ud kē =iz bawēnd ud kē =iz hagriz bawēnd ,

491.0

pahlom ābādīh ast ahlāyīh ,

492.0

haftdahom pargard spandmayt , abar kū ohrmazd dām pad dānāgīh dād ud pad rāstīh dārēd

493.0

ud ēn =iz kū harw kas pahlom tis menišn pad dastwar ī ox ud uzwān pad dastwar ī menišn dāštan ud gētī dōšāram rāy ēč abzārān ī tan andar ox nē druxtan ,

494.0

ud kū ox hamē rāst ud uzwān ast ka drōzan gōwēd pad uzwān ān saxwan kē ōy nē wurrawēd pad ox ud az ēd =iz ka az harwist tan uzwān fradom mīrēd ,

495.0

ud ō tō gōwam spitāmān kū ēdōn pad uzwān gōwē čiyōn pad menišn menē ud pad bowandagmenišnīh pad harw dō dast kunišn warzēš ,

496.0

ud ēn =iz kū kē ēdōn kunēd ān frazānag ud ān pid ī ahlāyīh pad dānāgīh ud kē ān ī mad ēstēd kunēd ān ī nē mad ēstēd rāy bē nigerēd ,

497.0

ud ēd =iz kē ān ī dānēd kunēd ān ī nē dānēd abar abāz pursēd ā =š abzōnīgmēnōyīh dānāgīh pad tan mehmān bawēd ,

498.0

ud abar dād ī ō ayārīh mardōm gōspand ud ō ayārīh ī gōspand rāmišn ud wāstar =iz ,

499.0

ud ēn =iz kū wināhēnd wadag dēw ud druwand mardōm ud nē wināhēnd ahlaw mardōm ud hudānāg amahraspand ,

500.0

ud ēn =iz kū pad kōdag tuwānīgīh az kirbag ma mōšēd ud pad wuzurgtuwānīh was kirbag bawēd ,

501.0

ud ēn =iz kū nēkīh hamāg ō wehān dahēd ud wattar nē pad abāyist ī yazadān dārēnd

502.0

ud abar dād ī ō wizārišn ī pahikārgārān paydāgēnīdan ī bōxt ud ēraxt uzwān ī rāstguftār ud war ī nimūdār bōxt ud ēraxt kē ōy ī rāstuzwān padīruftag u =š gōwišn rawāg kunēd ā =š andar gēhān dādestān waxšēnīd ud must kāhēnīd bawēd ,

503.0

ud ēn =iz kū ātaxš wizārišn bē dahēd ō pahikārān kū bōxt ud ēraxt paydāg kunēd ka =š ān kē ān ī stabr bowandagmenišnīh ud ahlāyīh =iz pad =iš warsālār ud ān was ka nigerēnd ā =šān wurrawēd druwandān ān nērang ī war ,

504.0

pahlom ast ahlāyīh ābādīh ,

505.0

haštdahom pargard yezid

506.0

abar astīh ēwar ud warōmand paydāgīh ud daxšag ī abar bawēd ī tan ī pasēn ,

507.0

ud abar mehškōyīh ī kirbag mēnōy ud ān =iz ī kirbakkar mardōm pad padmehmānīh =iš ī ān mēnōy ,

508.0

ēn =iz kū pad frašegird zamān stāyēnd ud ōšmurēnd ud warzēnd dēn mazdēsn ud ān ī dēwān pad frēftārīh ud pas mardōm =iz ī druwand az ān ī dēwān frēftagīh guft kū nē rasēd ,

509.0

ud abar pērōzīh ī yazadān abar dēwān pad āwāmān frazām ,

510.0

fradom ān ī ka mardōm bōxtagīh ī az dušox rāy dēn mazdēsn stāyēnd ān ī ka yaštfrawahr spitāmān zardušt ō rāmšāh kay wištāsp mad

511.0

didīgar ka amāwandīh ud pērōzgarīh ī xwadāyīh nōg abāz ō dēn paywandīhēd , ud mardōm ān rāy abāz ō wehdēn rasēnd ud ēn bawēd pad nazdrasišnīh ī zarduštān ušēdar ka čihrōmēhan ī ahlaw rasēd ,

512.0

sidīgar ka mardōm hunsandīhā nōg dēn mazdēsnān stāyēnd , ud ēn bawēd pad ušēdarmāh ī zarduštān rasišn ,

513.0

čahārom ān ī ka harw kas pad kāmag dēn mazdēsn warzēnd ān zamān ka rasēd sūdōmand pērōzgar frašegirdkirdār sōšyans ī zarduštān ud ēn bawēd sarōmandīh abartom pērōzīh ī yazadān ,

514.0

ud abar pursīd ī dēn kē ōy ī dēnāgāh dānāg hērbed niyōšīdan ī az =iš ud uzwārdan ī pad dānāgīh ,

515.0

ud abar pahrēz ī az nihān saxwan frēftār wiyābāngar ahlomōγ ,

516.0

ēn =iz kū ma =iz tō pad nigūnālagīh pad hammōzišn frēbēnd kū =t ēdōn bē frēbēnd ī ō ālag ī nigūn ōbadē ī ast dušox ,

517.0

ud abar rasīd ī mardōm pad xrad ud hunar ud dēn pāyagīhā ō yazadhāwandīh ,

518.0

ud ēn =iz kū pad ān rāh ka =m andar dāmān wahman dādan ī widarg mardōm andar aw =iš wišād ud kū gannāgmēnōyīg tamēnāg abespārēnāg ud stardgar akōman rāy ka mardōm ō abērāhīh ud ān ī wattar dēn škarwēnd ,

519.0

ud ēn =iz kū pad ān ī frazānagīh xwadāyīh abdom harw kas ō ān rāh rasēnd

520.0

ud ēn =iz kū kē pad abēbīmīh kirbag ayāb wināh kunēd pad ēd dārišn kū =š menišnīg kird ud kū mardōm pas az zāyišn pahlom tis yōǰdāsrīh ī az wināh ,

521.0

ud ēn =iz kū xwarišn ud dārišn ī āsrōnān abar wāstaryōšān ,

522.0

ud ēn =iz kū ārzōg ud rāmišn ud zōr ī mardōmān az hordād ud amurdad gōspand ,

523.0

ud abar stahmagīh ī xešm ud arešk ud wisinnišn ī harw dō pad pad bowandagmenišnīh ud wahmandārīh ,

524.0

ud ēn =iz kū man kird ahlāyīh dēnwandag ī hāmdahišn hamāg mardōm xwēš tan andar ō ān wandag kunišn u =š amargīh ud akāmagxwāyišnīh ud kāmagxwadāyīh ud hamēsūdīh az =iš bawēd ,

525.0

ud ēn =iz kū ān gōspandān pahrēz tarsagāyīh ī ohrmazd ast ,

526.0

ud abar wuzurgīh ī ahlāyīh ud ēn =iz kū az =iš zāyīhēd xwāyišnān abartom pāduxšāyīh ī andar ān ī pahlom axwān xwāst ī mardōmān ān wuzurgīh ,

527.0

ud abar stāyišn ī frašegird zamān ēn =iz kū pad ān zamān ān ī pad =iš gumānīg hēnd hamāg ō āškāragīh wišāyīhēd abdom arzānīgān mizd ud puhl ,

528.0

ud abar dādīgīh ī ān ī pad wahmanīg wišōbišn ī xwad ast āhang ārāyišn , ud ēn =iz kū druwandān ān zamān az xwēš druwandīh āgāh bawēnd ka =šān tan wišuft ,

529.0

ud abar murnǰēnīdan ī druwandān kirbag ud ān =iz ī xwēš ruwān ud ān =iz ī mēnōyān axwān ud ān =iz ī astōmand tan ,

530.0

ud ēn =iz kū pad frašegird hangām nazdīh rasēd xwadāyīh abāg dānāgīh ō ōy ī wehtom az mardōmān u =š paymōzīhēd ān xwarrah kē pad =iš zadār ī wattarān ud waxšēnīdār ī wehān bawēd rasēd ō ān ī ōy ayārān frazānagīh ī pad wahman ,

531.0

ud ēn =iz kū awēšān hēnd sūdōmand ī pad deh , ud awēšān ēg kū būd ēstēnd hamēstār ī ōy ī xešmen mardōm ,

532.0

ēn =iz kū pad ān brād xwah pad hamkāmagīh ul gīrēnd kū pad hamdādestānīh xwēdōdah kunēnd ud pēšnēmag ī rōz ul zāyēnd rōšn pad mayān rōy bulandwēnīg ud arus ud rōšn ud frāzpaydāg ud se nēzag bālā pad dagrandīh se nāy pad ulīh waxšēnd ud pas az nēmag ī rōz rānagīh hammōxtēnd druz bē barēnd ī ēbgad pēš ,

533.0

ud abar aybyānghanēnēnd kū xwēškārīh kunēnd ud ēdōn harwist nēk hēnd pad dīd ,

534.0

pahlom ast ābādīh ahlāyīh ,

535.0

nōzdahom pargard atmāyaw

536.0

ud abar pānagīh ud pānag ō pānagīhniyāzān tā frašegird ,

537.0

ud abar wurrawēnīdan nē šāyistan ī awēšān kē ō bunčim ī wurrawišn nē mad ēstēnd pēš az dānišnīg ōstīgānēnīdan ī =šān abar astīh ī dādār ī ast bunčim ī wurrawišn ,

538.0

ud abar garān wēmārīh ī dēn az ōy druwand dādwar kē pad dādwarīh gāh rawēd ud adādestān wattarīhkāmag xrad dušmen u =š az rāstīh rēš ud az rāstān bēš u =š gannāgmēnōy pad =iš mehmān ud dēnsūdīh ud wuzurgmizdīh ī rāst dādwarān kāmag abarbarišnīh ī ō sālārīh ī pad frārōnīh ,

539.0

ud abar ǰudagīh ī az dōstīh ī druwand dušxrad ī afrazānag ud axwēškār kē xešm ud arešk pad =iš abarwēz ,

540.0

ud abar hupādixšāyīh ī pahrēxtarān ī xwēš grīw az abārōnīh ud dušpāddāšnīh ī abāzāhangān ī az abārōnīh ,

541.0

ud ēn =iz kū druwandān xwad ō xwad druwandēnēnd ud dušoxīgēnēnd pad =iz ān ī ka =šān grāmag az ahlāyīh dōšagtar ud xwadāyīh =iz ī gišnag srāyišn ,

542.0

ud abar stāyišn ī zardušt ēn =iz kū tō šīrēnīh ud čarbīh ō gētīyān nimūd ēstēd tō ān ī dēn sālārīh pad wahman tō hē pad ahlāyīh xūb šnāsag ,

543.0

ud abar stāyišn ī frašōštar garmōgīh ī pad kirbag sālārīh ī pad frārōnīh ud hammōzišnniyōšišnīh ud rāstgōwišnīh ud pad fšēyīh gēhānwarzīdārīh ud sūdtāšīdārīh ud nē dād ī sālārīh ō wattarān ,

544.0

ud abar stāyišn ī ǰāmāsp kārīgīh =iz ud dastwarīh ,

545.0

ud abar pānagīh ī dahišnān ī weh kē wahman ud ān =iz ī ahlawān ruwān spandarmad =iz ,

546.0

ud abar pādufrāh ī ōy druwand kē =š pad xwadāyīh adādīhā tis stanēd ,

547.0

ud abar =iz garān pādufrāh ī druwand ī dušmenišn ī dušgōwišn ī duškunišn ī dušdēn ī dušxwadāy andar dušox ,

548.0

ud abar paywāzišn ī amahraspandān ō zardušt pad mizd ī =š xwāst ud hunsandēnīdan ī pad =iš ,

549.0

ast ahlāyīh ābādīh pahlom

550.0

wīstom pargard katmōyruwag ,

551.0

abar xwāst ī kadāriz =ēw ō ruwān tōšag , ud pad gōwišn ī šahrewar ō zardušt kū ēdōn menē spitāmān kū ohrmazd tō ayārēnēd ,

552.0

ud ēn =iz kū dāmān ī ohrmazd pad hordād zīyēnd ud pad amurdad amargīhēnd ud pad spandarmad ohrmazd bowandagmenišnīh u =š pad šahrewar pad xwadāy dārēnd ,

553.0

ud abar xwāst ī xwāstag az frārōnīh , ud ēn =iz kū kē az frārōnīh xwāhēd ān ī az stahmagīh ī wattarān ayāb any petyārag rāy aw =iš nē ayābēd ēg =iš pad mēnōy guharīg ān mizd dahēnd ī meh ud weh az ān xwāstag ,

554.0

ud abar gōspand arzānīgīh ōy artēštār kē dād frārōn ud ōz pad kām ī yazadān ayārīh ud sūd ī ērān ud zanišn ī kāstārīh ī anērān dārēd ,

555.0

ud abar griftārīh ī mardōm pad andarz ud framān ī yazadān rāyēnīdan and čand =išān az yazadān pad dānišn zōr ayārīh ast xwēšēnīdan ī =šān ān ī pahlom axwān pad rāyēnīdan ī ān andarz framān

556.0

ud abar ayārīh ī ahlawān pad widār ī ō ān ī pahlom axwān az mēnōy ī dānāgīh ud xwadāyīh ud rādīh ud rāstīh ud ahlišwang ud hōm yazad ,

557.0

ud abar čim ī gām se az zōtgāh abestāggōwišnīhā frāz raft ī zōt pas az yašt pad ātaxš sar pad parwāzišn ī ō ābzōhrbarišnīh ul uzīdan ī amahraspandān hamē hanǰaman ī hampursagīh ī zardušt sar pad se gām az zamīg ō xwaršēdpāyag pad humat ud hūxt ud huwaršt ,

558.0

ud andarz ī ō zardušt ud pad =iz ān ēwēnag amahraspandān ayād =iz ī pas az ǰudāgīh ī az wēnišn rāy yaštan ,

559.0

ud ēn =iz kū az =iš bawēd hamgriftārīh ī ōy ī hudānāg xōg ud čihr pad =iz passazagēnīdan ī xwēš kunišn ō ān ī ōy ēwēn ,

560.0

ud abar anhangōšīdagīh ī zardušt pad =iz wasīh ī kirbag , ud ēn =iz kū ēdōn awēšān kunišn ī warzīd ud kē =iz warzīhēd harwist tō pad awēšān ahlāyīhmizdīh ast zardušt ,

561.0

ud abar andarz ī ō zardušt , ud ēn =iz kū yazadān tarsagāy bāš kū =t mardōm tarsagāy bawēnd ,

562.0

ud abar handāxtan ī rōzān ud šabān zamān hamāg ō uzēnīh pad kirbag , ud ēn =iz kū kē hamē xwēškār hamē kirbakkar , ud kū kē čand =iš tuwān kirbag kunēd čand =iš kām mizd dahīhēd ,

563.0

ast ahlāyīh pahlom ābādīh ,

564.0

wīstēkom pargard wohuxšahr

565.0

guft =iš ohrmazd kū man dād zardušt ān ī weh xwadāy kāmag ud ēn =iz kū kē xwadāy ī wehkāmag pad bahr ī gēhān arzānīg az bahr ī =š dahīhēd ōy ud gēhān =iz abzōn , ud kē =š az bahrdahišnīh xwad ud gēhān =iz abzōn ā =š bahr dah wizīdārdahišnīh pahlom kunišn , ud abartarīh ī kunišn az menišn ud gōwišn ,

566.0

ud abar kū pahlom xwāstag bar ī āb ud zamīg ud urwar u =š pahlom xwāyišnīh pad dēngarzišnīgīh ud xwadāyīh rādīh ,

567.0

ud

Sections