šnāyišn ī wispān dādār ohrmazd rāyōmand ī xwarrahōmand

xūbmurwāg nibēsīhēd zand wisperad u =š barxwardār bawād ōy kē rāy nibēsīhēd ōy kē xwānīhēd u =mān pad nēkīh ayād dād

fradom kardag bun

niwēyēnam ud hangirdēnam niwēyēnam kū yazišn bun kunam ud hangirdēnam kū =š sar be kunam rad ī mēnōyān ohrmazd ud rad ī gētīyān zarduxšt ud rad ī ābīgān karmāhīg ud rad ī gōspandān kāgomag ud rad ī wāyendagān karšift ud rad ī frāxraftārān zzz ud rad ī čaragarzānīgān xarbuz ī ahlaw ī ahlāyīh rad hēnd

niwēyēnam ud hangirdēnam gāhānbār ī ahlaw ī ahlāyīh rad maydyōzarem pēmēnīd ī ahlaw ī ahlāyīh rad ay pēm pad maydyōzarem mehmāntar

niwēyēnam ud hangirdēnam maydyōšem ī wāstarabdrūnišnīh andar ī ahlaw ī ahlāyīh rad

niwēyēnam ud hangirdēnam paytišahīm ī hahīm ī kē =š garmāg pad =iš andar āyēd ī ahlaw ī ahlāyīh rad

niwēyēnam ud hangirdēnam ayāsrim ī zzz frōdwašthamīnīh āyēd kē gušnhilišnīh pad =iš andar āyēd ahlaw ī ahlāyīh rad

niwēyēnam hangirdēnam maydyāreh sardag ahlaw ī ahlāyīh rad ay pad sard bawēd

niwēyēnam ud hangirdēnam hamaspatmaydaym ī pad yazišnkirdārīh ī ahlaw ī ahlāyīh rad ay andar frawardīngān andar āyēd

niwēyēnam ud hangirdēnam gēhānān bawišnīh ī ahlaw ī ahlāyīh rad kē ān hilišnīh zāyišnīh čē gušn ud gušnīh =iz zāyišn rāy andar abāyēd

niwēyēnam ud hangirdēnam stōdānyasnān hamdahišnīh sar ī hādān ī pad hufrāzyazišnīh X mehmān ī ahlawān ī ahlāyīh rad

niwēyēnam ud hangirdēnam stōdānyasnān hamdahišnīh ud hufrāzyazišnīh mehmān ī ahlawān ī ahlāyīh myazd ud mēnōy ī myazd ay čiyōn X , X myazd rāmišn ud yazadān az sar ī hādān

niwēyēnam ud hangirdēnam sāl ī ahlāyīh rad ahunawar ī pad frāzsrāyišnīh mehmāntar ī ahlaw ī ahlāyīh rad , čē az pāy abāyēd guftan ān yatāhūwayryō čahār ī pad frōd

niwēyēnam ud hangirdēnam ahlāyīh ī pahlom ī pad stāyišn mehmān ī ahlaw ī ahlāyīh rad ān ašemwohū se

niwēyēnam ud hangirdēnam yēngēhātām X hufrāzyazišnīh ahlawī ī ahlāyīh rad ān ī pad frōd

niwēyēnam hangirdēnam ahnwadgāh ī ahlawī ī ahlāyīh rad

niwēyēnam ud hangirdēnam mādagān ī purrsardagān wīrramagān ī ohrmazddādān ī ahlaw ī ahlāyīh rad

niwēyēnam ud hangirdēnam ahūōmandīhudradōmandīh ī ahlaw ī ahlāyīh rad ān mēnōy ka xwadāy ud dastwar dārēnd pad rāh ī ōy

niwēyēnam hangirdēnam yasn ī hafthād ī ahlaw ī ahlāyīh rad

niwēyēnam ud hangirdēnam ardwīsūr ī āb ī aniwast ī ahlaw ī ahlāyīh rad

niwēyēnam ud hangirdēnam uštwadgāh ī ahlaw ī ahlāyīh rad

niwēyēnam ud hangirdēnam garān ī ahlāyīhxwārīhān ud purrxwārīhān ī ohrmazddādān ahlawān ī ahlāyīh radān

niwēyēnam ud hangirdēnam spantumangāh ī ahlawī ahlāyīh rad

niwēyēnam ud hangirdēnam pērōzgarīh ī ohrmazddād wānīdārīh =iz ī pad abarrawišnīh warahrān yazad ahlaw ī ahlāyīh rad

niwēyēnam ud hangirdēnam wohuxšahrgāh ī ahlawī ī ahlāyīh rad

niwēyēnam ud hangirdēnam mihr ī frāxgōyōd ī rāmišn =iz xwārom ī ahlawī ī ahlāyīh rad

niwēyēnam ud hangirdēnam wahištōyštgāh ī ahlawī ī ahlāyīh rad

niwēyēnam hangirdēnam dahmān ī wehān āfrīn ud dahm =iz mard ī ahlaw ud ān =iz ī čēr tagīg dahmabarpadmenišn yazad ī ahlaw ī ahlāyīh rad

niwēyēnam hangirdēnam ērmānxwāyišnīh ī ahlaw ī ahlāyīh rad

niwēyēnam ud hangirdēnam fšūšōmānsr ī ahlaw ī ahlāyīh rad

niwēyēnam ud hangirdēnam rad ī buland hadōxt ī ahlaw ī ahlāyīh rad

niwēyēnam ud hangirdēnam ān ī ohrmazd pursišn abestāg ud zand ud ān ī ohrmazd dādestān pēšēmālīh ud pasēmālīh ud ān ī ohrmazd deh pad ēwkardagīh ud ān ī ohrmazd zarduxštrōdom deh dehbed ī ahlaw ī ahlāyīh rad

niwēyēnam ud hangirdēnam hadiš mēnōy ī xānag ī wāstarōmand kū =š hanbār andar sāzēnd wāstarbarišnīh =iz ī gōspand ī hudahāg ud ān mēnōy ka gōspandān rāy hanbār abāz kund pad rāh ī ōy ud ān =iz ī gōspandān dāštār mard ī ahlaw pasušhorw

didīgar kardag bun

pad ēn zōhrag barsom =iz rad ī mēnōyān ohrmazd xwāyam ō ēn yazišn

čiyōn andar niuuaēδaiiemi nibišt tā

pad ēn zōhrag barsom gāhānbār ahlaw ahlāyīh rad xwāyam ō ēn yazišn pad ēn zōhrag ud barsom maydyōšem ī wāstardrūnišnīh andar ī ahlaw ī ahlāyīh rad xwāyam ō ēn yazišn

pad ēn zōhrag ud barsom paytišahī ī ahlaw ahlāyīh rad xwāyam ō ēn yazišn

pad ēn zōhrag ud barsom ayāsrim ī [frōdwaštzamānīh] āyēd kē gušnhilišnīh pad =iš andar āyēd ahlaw ahlāyīh rad xwāyam ō ēn yazišn

pad ēn zōhrag ud barsom gēhānān bawišnīh ī ahlaw ahlāyīh rad kē ān gušnhilišnīh ud zāyišnīh čē gušnīh zāyē zāyišnīh rāy andar abāyēd xwāyam ō ēn yazišn

pad ēn zōhrag barsom =iz harwistīn awēšān rad xwāyam ō ēn yazišn kē guft ohrmazd ō zarduxšt yazišnōmand ud niyāyišnōmand az ahlāyīh ī pāšom

pad ēn zōhrag ud barsom =iz tō rad xwāyam ō ēn yazišn kē ohrmazd mēnōy hē andar ān ī mēnōyān dāmān mēnōyān stī ud ahū rad kū xwadāy ud dastwar hē

pad ēn zōhrag ud barsom =iz tō rad xwāyam ō ēn yazišn kē zarduxštar ī spitāmān gētīyīg hē andar ān ī gētīyīgān dāmān gētīyān stī ud ahū rad kū dastwar hē

pad ēn zōhrag ud barsom =iz rad ī frāzōšmurdār xwāyam ō ēn yazišn kē mard ī ahlaw ī dārēnd ēd kū be nē ǰōyēd humatmenīdār pad menišn hūxtguftār pad gōwišn ud huwarštwarzīdār pad kunišn abzōnīg bowandagīhdāštār kē mānsr ī sūdōmandān kē pad ān ī ōy kunišn gēhān ī ahlāyīh frādahišnīh kū az kird ī ōy be abzāyēd

čiyōn nibišt tā

mādagān ī hubaxtān ī hupid ī hurust xwāyam ō ēn yazišn

pad ēn zōhrag ud barsom =iz ahūōmandīhudradōmandīh ahlaw ī ahlāyīh rad xwāyam ō ēn yazišn čē ān ast ahū rad kē ohrmazd

tā sar čiyōn andar niuuaēδaiiemi nibišt ,

sidīgar kardag bun

zōt gōwēd zand ēn kū hāwānīh ēstēn

rāspīg gōwēd zand ēn kū ā =m padīrift

zōt gōwēd zand ēn kū ādarwaxšīh ēstēn

rāspīg

ā =m padīrift

zand gōwēd frabardārīh ēstēn

rāspīg

zand gōwēd ā =m padīrift

zand gōwēd kū āburdīh ēstēn

rāspīg

zand ēn kū ā =m padīrift

zand gōwēd kū āsnadārīh ēstēn

rāspīg

zand gōwēd kū ā =m padīrift

zand gōwēd kū rehwiškarīh ēstēn

rāspīg

zand gōwēd kū ā =m padīrift

srōšāwarz ēstēn ī dānāgtom ī rāstgōwišntom

rāspīg

zand gōwēd kū ā =m padīrift

zōt ud rāspīg harw dō gōwēnd

āsrōīh ēstēnēm ratēštārīh ēstēnēm wāstaryōšīh ēstēnēm

mān mānbed ēstēnēm ud wis wisbed ēstēnēm ud zand zandbed ēstēnēm ud deh dehbed ēstēnēm

ǰuyān ī humenišn ī hugōwišn ī hukunišn ī hudēn ēstēnēm ud ǰuyān ī saxwangōw ēstēnēm ǰādaggōw ud xwēdōdah ēstēnēm

dehwaštār ēstēnēm āsrō ī ēstīdag huframān pad abarrasišnīh ēstēnēm ud mān mānbedīn ēstēnēm kadagbānūg

nāyrīg =iz ēstēnēm ī frāhumat ī frāhūxt ī frāhuwaršt ī huhammōxt ī radxwadāy kū šōy pad xwadāy dārēd ī ahlawī kē spandarmad kū ān wehīh ī mēnōyīhā pad spandarmad , ī šāyēd būd pad ōy ast kē =iz tō mādag ohrmazd kū tō xwēš ān spandarmad mard =iz ī ahlaw ēstēnam ka nāyrīg nē mad ēstēd ī frāhumat ī frāhūxt ī frāhuwaršt kē paydāg franāmišn ī ō kār ud kirbag u =š afrāzpaydāgkastārīh kū =š wināhgārīh nē paydāg pad ān ī ōy kunišn gēhān ī ahlāyīh frādahišnīh kū az kird ī ōy bē abzāyēd

ān ašmāh kadārizēw mazdēsn rad gōwēd ud rad ēstēd amehraspandān ī sūdōmandān kū dastwar =ēw ī az mēnōyān ud ēk =ēw az gētīyān frāz gīrēd u =š abar be ēstēd ud az mēnōyān amehraspandān šāyēd ud az gētīyān ān ī dānāgtom ī rāstgōwišntom abāz ay sūdōmandān ī amehraspand hamāg pad wahman ī abarmadārtom ō kār ud dādestān ud was xradkirdārtom kū kār dādestān ī pad xrad abāyēd kirdan wēš kird ēstēd

mahist amāwandīh gōwēd ī pad dēn yyy mazdēsnān ud mowbedān mowbed āsrōnān ud ratēštārān ud wāstaryōšān rad

ān pas guft bawēd kū =š abar harw kas frāhēn

tō ādarwaxš hē frāz ō man gōw

rāspīg gōwēnd zand ēn kū tō az amāh āsrō pad zōtīh ēst

zōt gōwēd an ēd zōtīh padīrift ī stōdānyasnān pad frāzsrāyišnīh frāzōšmurišnīh frāzwāngīh frāzyaštārīh

čahārom kardag bun

ān =iz menišnmenīdārīh ud ān =iz yazam ān =iz ī weh dahišn ud ān =iz ī weh tarsagāhīh ān =iz ī weh frazānagīh ud ān =iz ī weh drustrawišnīh ēdōn pad ān radīh ud ēdōn pad ān radīhrasišnīh

frāz gōspand rādēnam ō mazdēsnān ī zarduxšt

awēšān ō ēn niwēyēnam ō radīh myazd radīh ud radfranāmišnīh ī pad gāhānbār

harwisp =iz mar čēgāmizēw ān ī ahlawān stī ō yazeš ud niyāyišn ud šnāyēnīdārīh ud frāzāfrīgānīh

tā sar

panǰom kardag bun

padīram ān ī ašmāh amehraspand stāyišn ud zōtīh ud xwānišn yazišn frāzōšmurišnīh ud abarrasišnīh

tā sar

pad ān ī ašmāh yazišn ud niyāyišn ud šnāyēnīdārīh ud frāzwābarīgānīh kē amahraspand hēd pad ān ī amāh huaxwīh ud radfranāmišnīh ud ahlawīh ud pērōzgarīh ud huruwānīh kē sūdōmand ī ahlaw hēm

bē ō ašmāh amehraspandān huxwadāyān ī hudāgān daham tan ud ān =iz ī xwēš ǰān ud bē harwisp huzīwišnīh

frāz ēd ī tō wurrōyam ēn dēn ahlaw ohrmazd

čiyōn nibišt tā sar

šašom kardag bun

tis ī frārōn ī hammōxt ēstam zzz hammōxtišn pad ayārīh ī amahraspandān ud rāmišn ī xwēš pad ān ī āgāhīhā zōhr ud ān =iz ī rāst gōwišn bišāmrūd

amehraspandān pad ān ī weh ud nēk nām xwānam

amehraspandān pad ān ī weh ud nēk nām pad ahlāyīh frāz yazam pad ārzōg ī weh ahlāyīh ud pad ārzōg ī dēn ī weh mazdēsnān az ahlāyīhabāgīh

haftom kardag bun

gōwišn ī rāstsaxwan yazom

srōšīahlī yazom

aršišwang weh yazom

nērōsang yazom

āštīh hamwandīh yazom

astardīh ud amūdagīh mēnōy ī hōšyārīh [yazam]

ahlawān =iz ī frawahr yazom

činwadpuhl yazom

garōdmān ī ohrmazd yazom

ān ī pahlom axwān ī ahlawān yazom ī rōšn ī hamāgxwārīh

ān ī pahlom axwān ā =š ān ī pahlom āyišn yazom hamāg rāh ī ō ānōh

aštād yazom ī weh ī frāydādārīgēhān ī wālišndādārgēhān ī sūdēnīdārgēhān kē dēn ī mazdēsnān

rašn ī ristag yazom

mihr ī frāxgāwyōd yazom

ān ī frāx pārand yazom ī frāx ī frāxmenišn ī frāx ī frāxgōwišn ī frāx ī frāxkunišn kē frāz tan sabukīh

ān ī mardān hammardābūgīh yazom ī frāxmard ī frāxmardwīr kē tēz ī tēztom ud kē tagīg ī tagīgtom kē ōy rasēd ān ī baγbaxt kē mardān ast ōham griftārtom ud ō tan bōxtagīh dahēd

xwēy ī ohrmazddād yazom ī pad āsānīh ī gōspandān ud wīrān dād ēstēd

awēšān dāmān ī ahlaw yazom kē hēnd kē pēš dād ud pēš frāz brēhēnīd az =iz asmān ud az =iz āb ud az =iz zamīg ud az =iz urwar ud az =iz gāw ī hudāg

zrēh ī frāxkard yazom

ud wād ī škeft ī ohrmazddād yazam

asmān ī weh yazam ī fradom dād ud fradom frāz brēhēnīd ō gētī az ān ī gētīyān stī

tō ātaxš ī ohrmazd pus ahlaw ī ahlāyīh rad yazom

abāg zōhrag abāg aybyānghan ēn barsom ī pad ahlāyīh frāz wistard ī ahlaw ī ahlāyīh rad yazam

ōy ī ābānnāf yazom

tā sar

haštom kardag bun

u =š pad ēd gōwišn mayīh u =š pad ēd gōwišn hunsandīh ohrmazd ī ahlaw abāg āgenēn wehīgān yazadān kē amehraspandān ī huxwadāyān ī hudāgān pad panǰāhgōwišnīh ud ēksad ud ēkhazār ud bēwar ud zzz ud frāy čēgāmizēw mar

pad =im ōy ī huxwadāytom kāmag ud bahr abarbarišnīh kū =m pādixšāyīh ī ōy abāyēd kē =m nēkīh az =iš daham xwad ud čāšēm ō kasān ō ān =iz windišn daham pad guft ī ohrmazd ud ašawahišt =iz ast kē zarduxšt gōwēd pad ān ī huxwadāytom

nohom kardag bun

pad hōm ī uldād ud zōhr ī uldād yyy pad yazišn kē hōm andar sāxt ēstēd ud zōhr andar dāšt ēstēd ī uldād tā nūn ud ul dahīhēd az nūn frāz ī pērōzgar ī ǰudbēš u =š ān ī aršišwang bēšāzišnīh abāg ud frazānagīh bēšāzišnīh abāg ohrmazd bēšāzišnīh abāg ud zarduxšt bēšāzišnīh abāg zarduxštrōdom bēšāzišnīh abāg u =š ān bēšāzišnīh abāg ōy ī huframān ahlaw ud ōy ī huframān pad abarrasišnīh kē dēn ī weh ī mazdēsnān ān čē =š ān ī ōy abāg kē dahmān ī wehān āfrīn ud ān =iz =iš ān ī ōy abāg kē dahmān ī wehān adrōzišnīh kē dahmān ī wehān arānag kū anērangīh

pad ānniwēyišnīh ka be niwēyēnam ud abarniwēyišnīh ahurahe mazdā̊ =iz gōwam ud pad abarxwānišnīh ān ī abārīg pad āhanǰišnīh ān ī haštdah ud pad abargīrišnīh ud hufrāzyazišnīh ud hufrāzōšmurišnīh kē hēnd hōm ī abzār ī abzōnīg ī ahlaw ā =š wizīr ō pēš kē pad =iz ahlāyīh uldād tā nūn ud pad ahlāyīh ul dahīhēd az nūn frāz kē pad =iz ahlāyīh abar niwist tā nūn pad ahlāyīh abar niwēyīhēd az nūn frāz kē pad ahlāyīh hunīd tā nūn pad ahlāyīh hunīhēd az nūn frāz

amāwand ōy amāwand kū =š amāwanddar be kund ud amāwand ōy pērōzgar kū =š pērōzgartar be kund amāwand ōy ī kirdār ud amāwand ōy ī tarsagāh ud amāwand ōy frazānag amāwand ōy pēšraftār hērbed ud amāwand ōy pasraftār hāwišt amāwand awēšān yazadān kū awēšān amāwandtar be kund kē amehraspandān ī huxwadāyān ī hudahīgān ā =iz =išān amāwandtar bē kund ī hamēzīwandagān ī hamēsūdān ud ēk =ēw kū nē mīrēnd ēk =ēw kū ōzadan nē šāyēnd kē pad wahman mānēnd kū =šān mehmānīh pad wahman ēdōn bawišn az wahman

hordād amāh amurdād ud ān =iz ī amāh yazišn ud ān ī gōspandān tan ān ī gōspandān ruwān ud ātaxš =iz ī guftnām hadiš =iz ī ahlāyīhōmand kū =š kār ud kirbag andar kund ī wāstarōmand kū =š hanbār andar kund ī xwārīhōmand kū =š xwārīh az =iš ī āmurzišnōmand kū =š mardōm andar ōh āmurzēnēnd stōdyasn ud yazišn ud niyāyišn ud frāzwābarīgānīh ān ōy ī ohrmazd ud ān awēšān amehraspandān rad =iz ī ahlaw buland kē rahwōbirzad yazišn niyāyišn kē abardom rad ān ohrmazd kē madārtom pad ahlāyīh madārtom pad radfranāmišnīh kē mānsrspand kē dēn ī mazdēsnān ud kē stōdānyasnān kē harwistīn radān ud harwistīn radfranāmišnān harwist mar čēgāmizēw ān ī ahlawān stī yazišn niyāyišn ud šnāyišn ud frāzwābarīgānīh

niyōxšišn =ēw ast čiyōn fradom menišn andar ō yazišn ēstād ham u =š ēdōn abdom =iz ēdōn menišnīg sar be kunam

xwāyam ō ēn yazišn arzah ud sawah ud fradaduš ud widaduš waūrbaršt waūrǰaršt ud ēn =iz kišwar ī xwaniras

xwāyam ō ēn yazišn ān ī asēmēn hāwan ud ān ī āhenēn hāwan tašt ī zōhrbarān ud wars ī hōmānpālā zzz ud tō =iz barsom ī pad ahlāyīh frāz wistard

xwāyam ō ēn yazišn ahunawar ud ahūōmandīh ud radōmandīh ud stēndagrawišnīh ī dēn ī mazdēsnān

ohrmazd ō hōm niwēyēnam ī uldād kū sāxt ēstēd ī sūdxwāstār ān ohrmazd ī pērōzgar ī frāydādārgēhān kē huxwadāy ī ahlaw ī radxwadāy ī ahlaw

amehraspandān ō hōm niwēyēnam

āb ī weh ō hōm niwēyēnam

ān ī xwēš ruwān ō hōm niwēyēnam

harwist ān ī ahlawān stī ō hōm niwēyēnam

ēn hōm ud ēn hōmēn ǰāmag ī =š andar ēn wistarišnīh ud ēn myazd ēn asmān ī fradom dām ēn ān ī asēmēn hāwan ī abar burd ēstēd hōm ī zargōn kū sāxt ēstēd ēn ān ī āhenēn hāwan ī abar burd ēstēd hōm ī zard ēn āb ī hōmīgān ud ēn barsom ī pad ahlāyīh frāz wistard awēšān kirb ud tuwišn awēšān mad ēstēd zōhr ēn hōm ī ahlaw gōspand =iz ī hudahāg ud mard =iz ī ahlaw ān ī āsenīdag menišn ī ahlawān yazadān ud ān ī āsenīdag menišn ī sūdōmandān mardōmān bē =iz daham ud ān =iz ī niwēyēnam ud awēšān niwēyēnam ī =m guft ō ohrmazd ud srōšahlī ud rašn =iz ī ristag ud mihr =iz ī frāxgāwyōd amahraspandān ud ahlawān =iz frawahr ud ahlawān =iz ruwānān ud ātaxš =iz ī ohrmazd ud rad =iz ī buland rad =iz ī myazd ud rad =iz ī radfranāmišnīh mēnōy ī nask harwistīn mar čēgāmizēw ān ī ahlawān stī [pad] yazišn niyāyišn

tā

bē =iz daham ud ān =iz niwēyēnam ud awēšān niwēyēnam ī =m guft amehraspandān ī huxwadāyān ī hudahīgān ī hamēzīwandagān ī hamēsūdān kē weh hēnd ud kē =šān wehīgān dādār hēnd ud kē pad wahman mānēnd kū =šān mehmānīh ān gyāg kū wahman čē pad wahman mānēnd kē amehraspand ī huxwadāy ī hudahāg hēnd u =šān ēdōn mādarīh u =šān ēdōnbawišnīh az wahman

ō awēšān niwēyēnam ī =m guft pad frāydahišnīh ēn mān ud rašndahišnīh ēn mān ud sūd ī ēn mān waxšišn ī ēn mān pad bētarwēnišnīh ī tangīh ī ēn mān ud pad bētarwēnišnīh ī bēš ī ēn mān pahān ud mardān ud zādān ud zāyišnōmandān ī ahlawān kē ēd hēnd kē ēd būd hēnd ud kē amāh hēm kē sūdōmand ī dehān hēm kē wehwarzīdār ahlaw hēm ud kē wehwarzīdār ahlawī hēm kē āškāragwarzīdār ī ahlaw hēm ud kē āškāragwarzīdār ahlawī hēm kē huwarštwarzīdār ahlaw hēm ud kē huwarštwarzīdār ahlawī hēm

awēšān niwēyēnam ī =m guft ō ahlawān ī wehān frawahr kē čēr ud abarwēz hēnd pad ān ī ahlawān ayārīh

awēšān niwēyēnam ī =m guft ō srōšahlī ud ašišwang ī weh ud nēryōsang ud āštīh ud amāwandīh ud ātaxš =iz ī ohrmazd ud rad =iz ī buland harwist mar čēgāmizēw ān ī ahlawān stī yazišn niyāyišn

čiyōn azabar nibišt tā

stēndagrawišnīh X ī dēn ī mazdēsnān

kē uldād ī niwēyist čiyōn =iš awēšān niwēyist ohrmazd ī ahlaw ud čiyōn =iš awēšān niwēyist kē ahlaw zarduxšt čiyōn =iš awēšān an kē zōt ham niwēyēnam āgāhīhā pad =iz ān ī awēšān yazišn niyāyišn āgāhīhā pad ān ī dādīhā niwēyēnišn ud āgāhīhā pad ān ī radīhā niwēyēnišn ān ašmāh yazišn niyāyišn ud šnāyišn frāzāfrīngānīh kē amehraspand hēd ōh kunam ān amāh zzz ud radfranāmišnīh ud ahlawīh pērōzgarīh ud huruwānīh ī kē sūdōmand ud ahlaw hēm

ēdōn ān ī az harwistīn mahist daham pad ahūīh ud radīh kū ahūīh ud radīh rāy az yazadān ān meh kē ohrmazd

pad ān ī hōm frāgām kē pad pālā =yist pad radīh ī buland kē ohrmazd ī ahlaw xwēš ān ī , kē zarduxšt ī spitāmān ā =iz =iš xwēš frāyramag ī frāywīr ān ī ohrmazd

ān =iz ān ī weh srōšahlī ud wištāsp kē =š ahlāyīh abāgēnēd ān ī meh rad abāg pad =iz dastwarīh ī zarduxšt ān =iz yyy az tō ud nēkīh =iz yyy az tō

huframānīh nēkīh čāšom ud kasān ēd gōwam kū huframānīhā rawēd ahunawar kē pad ahlāyīh frāz srūd tā nūn ud pad =iz frāz srāyīhēd az nūn frāz ān =iz ī hāwan hōmhunišnīh kē pad ahlāyīh frāz rawēnīd tā nūn pad =iz frāz rawēnīhēd az nūn frāz

ān =iz ī rāst gōwišn sraw =iz ī zarduxšt ud huwaršt =iz kunišn ud barsom =iz ī pad ahlāyīh frāz wistard ud hōm =iz ī pad ahlāyīh hunīd ud stōd =iz ī yasn dēn =iz ī mazdēsnān pad menišn ud gōwišn kunišn

ēdōn amāh huframāntar hēm kū =mān xūbtar kird bawēd ēdōn kunam

huframānīh ēdōn andar dāmān dahēm ud huframānīh čāšēm ō kasān ud huframānīh menēm xwad , kē =š dād ohrmazd ī ahlaw

ān dām u =š parward kū =š weh be kird u =š waxšēnīd ahlāyīh kū =š be abzāy[ēn]īd kē az astān mahist pahlom ud nēktom čē ēdōn amāh huframāntar ud abzōnīgtar hēm kē spennāgmēnōy dāmān ka awēšān huframānīh ud abzōnīg čāšēm

huframān amāh bawānd pad ān ī asēmēn hāwan ud zzz āmār ud ān ī āhenēn hāwan pad frōdwardišnīh kū frōd wardēnom ud frāzrawišnīh kū yazišn kār framāyēnam andar mān ud wis ud zand ud deh andar ēn mān ud andar ēn wis ud andar ēn zand ud andar ēn deh

amāh =iz kē mazdēsn ī frāzyaštār hēm abāg esm abāg bōy ud abāg radfranāmišnīh čē ēdōn amāh huframāntar hēm kū =mān xūbtar kird bawēd

ahlāyīh ī ohrmazd yazom

ud ahlāyīh ī amahraspandān yazom

ud ahlāyīh ī ōy ī rāst gōwišn yazom

ahlāyīh ī harwist mānsr yazom

zarduxšt abāg mānsr yazom

sūd ī ahlawān yazom

ud nēkīh ī amehraspandān yazom

se ī fradom yazom ī pad abēgōwišnīh kū =š tis andarg nē gōwam ud abēsūdagīh kū =š andarg be nē xufsam

ān ī az se ī fradom yazom pad abēgōwišnīh ud abēsūdagīh

se hamāg ī fradom yazom pad abēgōwišnīh ud asūdagīh ,

serīn hamāg ī fradom yazam pad abēgōwišnīh ud abēsūdagīh zzz ud gāh ud wezest ud wezestrawišnīh

tā sar

abāg gāh ud abāg wezest ud abāg šnāsagīh ī zand abāg pursišnīh abāg abāzpursīdārīh ī nērang abāg gōwišn ī pad paymān bišāmrūd pad xūbfrāzōšmurišnīh frāz ōšmuram pad xūbfrāzyazišnīh frāz yazam pad ān ī ōy dānišn pad ān ī ōy paydāgīh pad ān ī ōy kāmag pad ān ī ōy xwadāyīh pad ān ī ōy rad pad ān ī ōy ābādīh kē ohrmazd pad franāmišnīh ī was kū was bār ō ēn kār franaftam abarpad menišn menišnīg kē rawāgdahišnīh az ox ān menišn

ahunawar ī ahlaw ī ahlāyīh rad yazom

ahūōmandīhudradōmandīh ī ahlaw ī ahlāyīh rad yazom ī ān ast ahū ud rad ī kē ohrmazd

ahnwadgāh ī hamdahišnīh yazom

ud ahnwadgāh yazom

čiyōn azabar nibišt tā sar

bē pāy ud bē dast ud bē ōš dārēd mazdēsn hēd ī zarduxšt pad ān ī dādīhā ī frārōn ī huwaršt kunišn ud warzišn bē az ān ī adādīhā ī abārōn ī dušhuwaršt kunišn ud warzišn warzišn ēdar ān ī weh warzišn

bowandagīh ōy ī abowandag dahēd kū ōy ka =š tis nē hammōxt ā =š tis dahēd

niyōxšišn =iz ēdar =ēw ast ī ohrmazd ō ēn yazišn ī sūdxwāstār ān ahlaw kē amāh rāy xwāyēd nēkīh pad yasn ī hafthād frāzgōwišnīh ud abarpadīrišnīh ud padīragrawišnī ud rawāgdahišnīh frāzōšmurišnīh ud frāzwāngīh ī pērōzgar ud ahlaw ān ī yasn pad abēgōwišnīh ud abēsūdagīh

kē frāz guft tā nūn kē =iz frāz gōwīhēd az nūn frāz pad ān meh amāwandīh ud pērōzgarīh ī ǰudbēš awēšān gōwišnān =iz ī pērōzgar pad frāzgōwišnīh ātaxš ī ohrmazd pad stāyišn yazišn niyāyišn ud frāzwābarīgānīh kē =iz ēdōn ohrmazd ud kē =iz ēdōn amehraspandān ud rad =iz ī ahlaw ī buland pad yazišn ud niyāyišn

čiyōn azabar nibišt

ātaxš ēdar ī ohrmazd pus yazam

ān ī ātaxštōhmag yazad yazom mēnōy ī dahmag ī pad gāh ī rašn ēstēd ī ātaxš ān rāy kār weh tuwān kird

ud ān ī ātaxštōhmag rašn yazom

ahlawān =iz ī frawahr yazom

ud srōš =iz kē pērōzgar yazom

ud mard =iz kē ahlaw yazom

harwist =iz kē ahlawān stī yazom

zarduxšt ī spitāmān ī ēdar ī ahlaw ahlāyīh =iz frawahr =iz yazom

ud harwist =iz ī ēdar ī ahlaw ahlāyīh =iz frawahr =iz yazom

harwist frawahr ī ahlawān yazom

ādehīgān =iz ī ahlawān frawahr yazom ud uzdehīgān =iz ī ahlawān frawahr yazom

ud narān =iz ī ahlawān frawahr yazom ud nāyrīgān =iz ī ahlawyān frawahr yazom kē pad ān ī awēšān amāh ohrmazd ī ahlaw yazišn , ī weh āgāh kē awēšān zarduxšt ahū rad

ān ī šōysr ud āb =iz ud zamīg =iz ud urwar =iz yazom

yasn ī hafthād hamdahišnīh yazom

yasn ī hafthād yazom

čiyōn azabar nibišt

abargriftār hēm pad yasn ī hafthād

humat hūxt ud huwaršt ud abargriftār hēm

yyy

nēkīh ī ohrmazd yazom

nēkīh ī amehraspandān yazom

ud nēkīh ī mard ī ahlaw yazom

nēkīh ī ōy ī fradom ahlaw stī yazom gāyōmard

nēkrawišnīh =iz ī mard ī ahlaw yazom

hamē ēdōn nēkrawišnīh yazam ka mard widang ī druwand ān mizd pādāšn ī andar ān zamān dahēnd ka druwandān pādifrāh kunēd

nēkrawišnīh ī pad ān ī akanārag yazom ī pad tan ī pasēn

nēkrawišnīh ī harwistīn ahlawān kē =iz hēnd kē =iz būd hēnd kē =iz bawēnd

tā sar

abzōnīg ī ohrmazd yazom

abzōnīg ī amehraspandān yazom

abzōnīg ī mard ī ahlaw yazom

abzōnīg ī pēšxradīh yazom

spandarmad ī weh ī bowandagmenišn yazom

ān ī spennāgdād dām ī ahlaw yazom

dām ī menīdarīh ī ōy ī fradom ahlaw yazom andar gayōmard

xrad ī harwistāgāh yazom ī ohrmazd

ān ī xwarxšēd rōšnīh yazom ēwēnag

xwaršēd ī bālist az bālistān yazom

xwaršēd =iz ī amarg ī abzōnīg yazom

ān ī huwaršt framān yazom mēnōy ī kār ud kirbag

ān ī nēkkird warzišn yazom garōdmān

ud ān xwarrah yazom ī =m guft

ān ī ātaxšdād ramag yazom hamāg ramag kē ātaxš andar

ahlaw ī franāft sūd yazom

dām yazom kē spandarmad kē pad ān ī ōy dahišn ahlāyīh =iz ašawahišt ahlawān , ahlāyīh ī fradom dāmān ay paydāg kū fradom spandarmad dād pas abārīg dām =iz ī ahlaw

ān ī weh xwadāyīh yazom

ōy ī xwadāy kāmag yazom

āhen ī widāxt yazom

wohuxšahr yazom ud šahrewayr yazom ayōxšust yazom gōwišn ī rāstguft ī pērōzgar ī dēwān zadār yazom ī yatāhūwayryō

ān mizd yazom

ān druwistīh yazam

ān bēšāzišnīh yazom

ān frāydahišnīh yazom

ud ān wālišndahišnīh yazom

ud ān pērōzgarīh yazom kē ast andarg =iz wohuxšahr ud wahištōyšt pad frāzōšmurišnīh ī humatān ud hūxtān ud huwarštān kū tā =m kirbag bawād pad abāzēstišnīh ī dušmatān ud dušhūxtān ud dušhuwarštān kū tā =m wināh nē bawād pad ulwarzišnīh az man mihmenišnīh ud mihgōwišnīh ud mihkunišnīh kū tā =m wināh wizārd bawād

tā sar

ān ī pas yasn ī abzār ī hafthād ī ahlaw ī ahlāyīh rad yazom

abar ān ī ābān ī wehān ud urwarān =iz ī xwabrīr ud ahlawān =iz ī frawahr yazišn griftār hēm ud niyāyišn =iz

abar awēšān =iz kē weh hēnd kē āb kē =iz urwar kē =iz ahlawān frawahr yazišn griftār hēm ud niyāyišn =iz

abar ān ī gāw ud abar ān ī gayōmard ud abar ān ī mānsrspand ī ahlaw ī kāmagox yazišn griftār hēm ud niyāyišn =iz

abar ān ī tō ohrmazd yazišn griftār hēm ud niyāyišn =iz

abar ān ī tō zarduxšt yazišn griftār hēm ud niyāyišn =iz

abar ān ī tō rad buland yazišn griftār hēm ud niyāyišn =iz

abar ān ī amahraspandān yazišn griftār hēm ud niyāyišn =iz

niyōxšišn =iz ud āmurzišn =iz yazom ka be niyōxšēnd ud mardōm be āmurzēnd

niyōxšišn ī wahman yazam

āmurzišn ī wahman yazam

frāzrādīh ud bēdahišnīh yazom kē ast andarg xwēšdēnān ī ahlawī

niyāyišn ī weh ī adawag ī abēš yazam ī dēn

ān ī pas yasn yazom

ud ān ī pas yasn yazišn yazom ud ān ī pas yasn yazom

tā sar

pad ān abargīrišnīh ud pad ān abarrasišnīh ī amahraspandān ī hēnd sūdōmand ī ahlaw ka ō yazišn ī amehraspandān rasam X ēn =iz gīram

ān ī gōspandān dahišn āb ud wāstar ud ān ī awēšān kunišn , awēšān mardōm ī andar X ēn gēhān pahlom , kū =šān pahlom tis ēn zzz

ōy ī ahlaw framāyēm kē ān ī weh ahlāyīh āgāh

ōy ī druwand ī anāgāh bē ma ayābēnēm pad pēšrawišnīh ma pad menišn ud ma pad gōwišn ud ma pad kunišn ma pad kadārizēw zamān bē rasam

pahlomīh ī ohrmazd yazom

ud pahlomīh ī amehraspandān yazom

ud pahlomīh ī mard ī ahlaw yazom

ān ī pahlom ahlāyīh yazom

ud ān ī pahlom paydāgīh yazom kē stōdyasn

ān ī pahlom xwāyišn yazom ī ahlāyīh ī pahlom

ān ī pahlom axwān ī ahlawān yazom rōšn ī hamāgxwārīh

ān ī pahlom axwān ā =š ān ī pahlom āyišn yazom ay hamāg rāh ī ō ānōh ,

kardag ī ayryamān

čiyōn azabar nibišt tā

kē ast andarg ahunawar ud ayryaman pad frāzōšmurišnīh ī humatān

tā sar

frazaft pad drōd