MPCD - Middle Persian Corpus and Dictionary

1.0

šnāyišn dādār ohrmazd pad =iz spurrāfrīgānīh wispāgāhīhpēsīd dēn mazdēsn andar gēhān ,

2.0

haftom abar abdīh ī dēn mazdēsn mahist aštag spitāmān zarduxšt ān čē ōy warzāwand pad ohrmazd aštagīh u =š dēn pad gōwišn ohrmazd būd andar wištāspšāh kišwarīgān afrīgānīhistan az nigēz ī wehdēn

3.0

bē pēš az ān čē wehdēn čihr ud dahišn rawāgīh u =š padīruftār ī fradom pad mēnōy ud gētī ud az ān pas waxšwarān frēstagān āwardārān ī andar zamānag tā yaštfrawahr zarduxšt u =šān nihang =ēw az gōwišn ud warz kē pad =iš andar mardōm pad waxšwarīh wābarīhist hēnd nibištan čimīg ,

4.0

hād az dēn mazdēsn nigēz ī wehdēn čihr ohrmazd xēm

5.0

u =š dahišn pad hamniyāftīh ī fradom dām wahman amahrspand

6.0

ud rawāgīh fradom mēnōyīhā andar amahraspandān abārīg yazadān mēnōyān yazadān , ud gētīyīhā andar gayōmard ī fradom mard pad hangirdīg bowandag padīriftārīh ī az dādār ohrmazd

7.0

ud niyāzag wizārdārīh ī andar xwēš zamānag pad menīdārīh ud pad =iš wānīdārīh ī druz ī ān zamānag ud petyārag

8.0

u =š az dādār hammōg menišn hamāg ān ī ohrmazd dēn gōwišn fradom ,

9.0

az wehdēn paydāgīh abar bawišn dahišnīh ī spās ī ōy ī bawēnīdār ud dādār spennāgmēnōy

10.0

abar mardōm fradom niyāzag ēn kū nēk amāh ud ohrmazd dahišn hom ,

11.0

ud ān ī abdom abar bōxtagīh ī čār ī mardōm pahlom ēn kū gaiiąn kunišn

12.0

pahlom nūn ka =š wēmārēnīd axwān ī mardōm nūn ka ēbgad ō dāmān mad

13.0

mardōmān az paywand ī gayōmard tis =ēw ēn weh ka kār ud kirbag kunēnd

14.0

u =š kunišn ān ī xwēš hamēstār druz wānīdan

15.0

handāzag dahišnīg ō paywandīg kū =tān harw ēk frēzwānīg ast xwēš hamēstār druz wānīdan ān ī pad =iš bawēd apetyāragīh ud abēzagīh dām az ēbgad ,

16.0

ud ast ān kār kē dādār dahišn aw =iš dād ,

17.0

ud ēn =iz az wehdēn paydāg kū pad ān ī gōwišnīh aršuxt gayōmard ō ān ī amahraspandān huaxwīh mad kū garōdmānīg ,

18.0

ud pas az gayōmard andar zamān zamānag ī tā yaštfrawahr spitāmān zarduxšt hamē bahr az =iš čand dānišnāgāhīh ud kunišnbōzišn ī mardōm ī ān āwām kē pad =iš ō paydāgīh mad abāyišnīg būd

19.0

čē pad hampursagīh ī ō dādār ud čē waxš abarburdārīh ī abardarīg pad dādār framān az yazadān andar wehdēn paydāg nām parwastag waxšwar ud padīruftār rāyēnīdār ōšmurdag

20.0

čiyōn widard gayōmard didīgar az gētīyān ō mašī ud mašyānī ī gayōmard fradom zahag pad gōwišn ī ohrmazd paydāg kū guft ō awēšān ka =š dād būd hēnd kū mard =it dahem hēd pid ī , pid ī harwisp ī axw ī astōmand

21.0

ud ēdōn ašmāh mard ma dēwān yazēd čē =m bowandagmenišnīh dārišn ō ašmāh pahlom frāz dād kū kār ud dādestān bowandagmenišnīhā bē nigerēd

22.0

u =šān stāyīd dādārīh ohrmazd ud abar raft hēnd pad xwēškārīh

23.0

u =šān kird kām ī dādār fragānēnīd was kār ī gēhānsūd

24.0

warzīd xwēdōdah pad zāyišn paywandišn ud purrrawišnīh ī andar gēhān dahišnān ī mardōm kirbagān pahlom

25.0

nimūd dādār ō awēšān ǰōrdākārišnīh

26.0

čiyōn pad gōwišnīh ohrmazd paydāg kū ēd tō mašī ī gāw u =t ēd ǰōrdā u =t awēšān abzār ī abārīg ud az nūn frāz tō weh dānē ,

27.0

ēn =iz az wehdēn paydāg kū =š guft ohrmazd ō hadayōš pad ahlāyīh abararzānīg ēk az yazadān kū hadayōš ī pad ahlāyīh abararzānīg abar rawēš ō mašī ud mašyānī

28.0

ud zayēš ān ī ōy ǰōrdā nān az mašī ud mašyānī

29.0

ān awēšān āfrīnēnēš kū ul az ašmāh ēd ǰōrdā rasēd

30.0

čiyōn az ohrmazd ud amahraspandān bē ō ašmāh mad az ašmāh ō paywandān ī ašmāh ǰōrdā rasād

31.0

pad apetyārgārīh ī az dēwān srāyišn ahunawar dō pad abāzēstišnīh dēw ud druz

32.0

ud raft hadayōš pad ahlāyīh abararzānīg ō mašī ud mašyānī

33.0

u =š zast ān ī ōy ǰōrdā nān az mašī ud mašyānī u =šān dād

34.0

u =š awēšān āfrīnēnīd kū ul az ašmāh ēd ǰōrdāg rasād

35.0

čiyōn az amahraspandān čiyōn ohrmazd amahraspandān bē ō ašmāh mad az ašmāh bē paywandān ī ašmāh rasād

36.0

pad apetyārgārīh ī az dēwān u =š srūd ahunawar dō pad abāzēstišnīh ī dēw druz

37.0

ud az yazadān nigēzišn mad hēnd mašī ud mašyānī ō =z wastargkirdārīh ud šabānīh ud āhengarīh ud durgarīh ī hammist warzīgarīh wāstaryōšīh pēšīgān ud kirrōg =išān fradomīh

38.0

ud raft az awēšān pad paywand handāzag dahišnīg ud gēhān wistarišnīg ō pēšagān andar pēšagān purrīh , ,

39.0

ud pas az ān waxšabarbarišnīg mad ō sāmag ī awēšān pus ud hampaywandān

40.0

abar wihēz ī ō kišwar kišwar ud kustag kustag ī gēhān ān grōh ī kē dādār ō ān kišwar ud kustag wizīd u =š rawišn ud wistarišn

41.0

purrīh būd ī mardōm pad kišwar kišwar kustag kustag ,

42.0

ud pad any hangām mad ō wāygard ī hōšang ī pēšdād abar winnārdan ī andar gēhān dād ī dehgānīh gēhān warzīdārīh ud dahibedīh gēhān pānagīh

43.0

u =šān pad hamhāgīh ud dēndādī ud hamnērōgīh winnārd dahibedīh warzīdārīh

44.0

gēhān pad rawāgīh ud winnārišn paywandišnīh ohrmazd dāmān dēn dād ī ohrmazd

45.0

u =š zad hōšang pad ān xwarrah dō srīšwadag ān ī māzan dēw haft hammōxtšudag ī xešm ,

46.0

az ān pas mad ō tahmōrub ī zēnāwend

47.0

u =š wānīd pad ān xwarrah dēw ud mardōm ī wadag ǰādūg parīg

48.0

u =š abāz abgand uzdēsparistagīh ud rawāgēnīd andar dāmān niyāyišn ud paristišn ī dādār

49.0

u =š burd gannāgmēnōy frāzwašt ō aspkirb sīh zamestān ,

50.0

ud mad andar any zamānag pad ān ī ohrmazd hampursagīh ō ǰamšēd ī wīwanghānān

51.0

u =š az čahār pēšag ī dēn ast āsrōnīh ud artēštārīh ud wāstaryōšīh ud hutuxšīh padīrift čahār pēšag ī ast āsrōnīh ud artēštārīh ud wāstaryōšīh hutuxšīh

52.0

ud pad =iš frāxēnīd wālēnīd ud waxšēnīd gēhān

53.0

ud winnārd pad paymān ōz dām amarg ud azarmān asuyišn apuyišn ud frāx ud purršēdā

54.0

ud andar wehdēn pad gōwišn ī dādār ohrmazd ō ǰam paydāg kū ēg ān ī man gēhān frāyēn kū marag wēš bē gīrēnd

55.0

ud ēg ān ī man gēhān wālēn kū frabihtar bē gīrēnd ,

56.0

ud ēg az man padīrē gēhān srāyišn ud parwarišn ud sālārīh ud abarāgāhdārīh ēdōn bē kunē kas abar ōy ī did rēš ud zyān kirdan nē tuwān bawād

57.0

u =š padīrift ud kird ǰam čiyōn =iš framūd ohrmazd

58.0

u =š pad ham xwarrah frāxēnīd zamīg se srišwādag az ān meh čiyōn pēš az ān būd ,

59.0

u =š kird pad ān ī ōy xwadāyīh xwadāyīh amarg pah ud wīr ud ahušišn āb urwar ud xwarišnxwarān anabesīhišn ,

60.0

ud ēn =iz az wehdēn paydāg kū =š kird gēhān pad xwašīh čiyōn garōdmān

61.0

u =š az dādār wisp framān abar pādan ī dām az abesīhišn pad malkūsān zamestān kird ǰamkird war

62.0

ud any =iz was abdīh az wehdēn paydāg ,

63.0

ud mad andar any āwām az dādār framān ō frēdōn ī āspiyānān ka būd andar burdār uruspar az wāstaryōšīh bahr ī dēn pēšag pad baxšišn ī az ān ī ǰam xwarrah ud pad =iš pērōzgarīhīd

64.0

ud frēdōn pad ān pērōzgarīhīd passoxguftār būd dahāg az burdār uruspar

65.0

u =š dardēnīd ud stardēnīd ān wasōz druz

66.0

mad ō nōsālag frāz raft abar ān ī ōy zanišn

67.0

u =š pad ān pērōzgarīh wānīd dahāg bōxt ud āsānēnīd az =iš dāmān

68.0

wānīd māzandarān mādayān

69.0

spōxt ān ī awēšān wizend ud zyān az kišwar ī xwanirah

70.0

baxt xwanirah kišwar pusarān se

71.0

u =š az wāstaryōšīh ī dēn sidīgar pēšag āhuft seǰudxīndagīhspōztanbizēškīh

72.0

ud nimūd ō mardōmān

73.0

any =iz was kird abd gēhānsūdgarīh ,

74.0

ud mad andar frēdōn zīndagīh ī ō ēriǰ ī frēdōnān ham waxš az dādār abarbarišnīh

75.0

ud pad =iš pargand ud warzīd ērīh dād

76.0

dōšīd ān ī pahlom yān pad xwāyišn ī az pid ī frēdōn

77.0

u =š mad az dādār ān yān pad āfrīn ī frēdōn ,

78.0

ud mad andar ham ō wihēz ī frēdōn ēriǰ

79.0

ā =z raft abāg nērōsang yazad ō mānušēr

80.0

az =iš purrrawišnīh būd ī ēriǰān tōhmag ,

81.0

ud mad ō mānūšcihr ī ērān dahībed

82.0

u =š pad =iš kird was abdkird kār

83.0

ud wānīd salm ud tōz

84.0

pad ān ī ēriǰ kēn passoxguftār būd friyānān ī anērdeh

85.0

ud winnārd xwadāyīh ī ērān

86.0

frāxēnīd ud ābādēnīd ērānšahr

87.0

pērōzēnīd ēr deh abar anērān ,

88.0

pad any zamānag mad ō uzaw ī tōmāspān ī mānuščihr ī ērān dahībed nāf

89.0

pad ān waxš ud xwarrah hamist zāyišn mad ō purnāgārīh ud mardpaymānīgīh

90.0

andar aburnāyīh pad warzgārīh wišād ō ērān dehān wārānmād

91.0

abar raft ō zadan ī anērān spōxtan biyāwārēnīdan ī az ērānšahr

92.0

u =š zad ērānšahr anāgēnīdār dahīg ǰādūg kē dō ī ōy ham-hunušagān bīmēnīd frangrasyāg ī tūr

93.0

ud waxšēnīd ābādēnīd ērānšahr

94.0

ud abzūd andar ērānšahr was rōdān rōdestāgān ,

95.0

, , pad any zamānag mad ō sāmān garišāsp az artēštārīh bahr ī didīgar dēn pēšag pad baxšišn ī az ān ī ǰam xwarrah

96.0

u =š pad =iš zad gaz ī srūwar ī aspōbār mardōbār ud gandarb ī zāyrpāšnān dēw any =iz was dēwdahišn petyār ud dāmmurnǰēnīdār druz ,

97.0

pad any zamānag mad ō kay kawād ī kayān niyāg pad =iš winnārd ērān xwadāyīh

98.0

abar xwēš paywast xwadāyīh pad kayān tōhmag

99.0

was kird pad =iš warzāwendīh dāmān sūdgār , ,

100.0

ud mad ō pādhusraw ī irisfuzwān ī tāz ī tāzīgān šāh pad ašawahišt amahrspand aštagīh

101.0

u =š pazdēnīd pad =iš az xwēš warm āz dēw abāg hamāwādag pad murnǰēnīdan ī ān ī ōy ram ō ān ram dwārist ēstād pad ulīhfranamišnīh ī bahr ī ō rad ī buland az ašawahišt amahrspand nimāyišn

102.0

čiyōn ān bahr māhīg kirb pad rōd ōftīdan ud ō pih ī zarduxšt mad paydāg , ,

103.0

pad any zamānag mad ō kayarš brādarān kabād nāf

104.0

būd hēnd pad =iš harwisp arwand ud tagīg pahrēzōmand ud škeftkirdār kay

105.0

ud az awēšān ān ī meh brād kay us abar grift xwadāyīh ī haft kišwar būd waswarzān purrxwarrah , ,

106.0

ud ham zamānag mad ō ōšnar ī purrzīr būd ī az ān ī ǰam xwarrah ka būd andar mādar aškom u =š hammōxt ,

107.0

pad gōwišn ī az mādar aškom was abdīh ō mād

108.0

u =š pad zāyišn zad gannāgmēnōy pad passox x guftārīh frašnān mar ī frēbīh ī dēwēst

109.0

ud mad ō framādārīh ī kay us būd pad ān ī ōy xwadāyīh haft kišwar rāyēnīdār

110.0

u =š āhuft hammōxt wimandgōwišnīh any =iz was mardōm sūd frahang ud ēraxt hēnd anēr pad passoxguftārīh andarzēnīd ēr deh pad ān ī hufrahaxttom andarz ,

111.0

ud mad ō kay siyāwaxš ī bāmīg pad =iš dēsīd kangdiz ī abdkird pad andardārišnīh pānagīh waswarz xwarrah ud rāz ī dēn ī az =iš wirāyišn ī āwām ud abāzārāstārīh ērān xwadāyīh abāzpaywandišnīh ī amāwandīh pērōzgarīh ō ān ī ohrmazd dēn paydāg ,

112.0

mad ō kay husraw ī siyāwaxšān pad =iš wānīd ud zad frangrasyāg tūr ī ǰādūg u =š hamwišūdag X kirswazd ud any was gēhān murnǰēnīdār wattar ud āyōxt ō ān uzdēszār ī abar bār ī war čēčast zad škast ān ī škeft druzīh

113.0

abāyišnīgīh ī pad frašegird abzārīh rāy pad nam =iz ī az ān waxš ēwarzīd ō rāzīg gyāg kū pad =iš amargdāštār tan tā frašegird pad dādār kām , ,

114.0

ud mad az ān pas mad spitāmān zarduxšt ō dādār ohrmazd hampursagīh

115.0

u =š padīrift az wispāgāh dādār ohrmazd afragūdazišīhā hangirdīg ud ōšmurdīg āsrōnīh ud artēštārīh ud wāstaryōšīh ud hutuxšīh dānišn kunišn āgāhīh hāmbahr ī dēn mazdēst =iz

116.0

āwurd pad dādār framān ō kay wištāsp šāh

117.0

rōšnēnīd pad ān ī meh rōšnīh andar ōy abardom yazadān dahībed kišwar frazānagān

118.0

rawāgēnīd andar kišwar ī haft pad awisānišnīh ī az dām paywandišn ī ō frašegird

119.0

ud pad =iš kirdārīh ī ōy ī pusarān ušēdar ušēdarmāh ud sōšyāns frašegird andar axwān ī dāmān ī ohrmazd amarg ud § az =iš ud warz xwarrah abdīh nihang =ēw azēr nibištan niwist ēstēd

120.0

ud any =iz būd hēnd pēš az zarduxšt wāxšwar ī andar dēn mahist aguft nām

121.0

čē paydāg kū gāhīhā az mēnōyān and =ēw ō ōy ī pēšōbāytar ōh mad

122.0

mardōm pad xwāyišn pursišn ī ān tis ēdōn griftār būd hēnd čiyōn nūn pad xwāyišn pursišn ī dēn None

123.0

ān zamānag ōh abāstan nūn nē abāyēd čē harw mardōm pad dēn āgāh kird ēstēnd

124.0

ud niyāyišn zarduxšt ī spitāmān ahlawfrawahr , ,

125.0

nūn nibēsīhēd abar warz ud xwarrah ud abdīh ī dēn mahist waxšwar dahišnān pāhlom yaštfrawahr spitāmān zarduxšt ān ī andar gēhān paydāgīhist

126.0

ud paydāgīhist ēdar dar dah pad āgāhīh ī az abestāg wābarīgān dēn ī ohrmazd , ,

127.0

u =š ān ī pēš az zāyišn ī ēdar ō xwarrahōmand az mād , ,

128.0

u =š ān ī az zāyišn ī ōy ī warzāwend frāz madan ī =š ō ohrmazd hampursagīh ,

129.0

u =š ān ī az hampursagīh frāz tā āfrīgānīh ī =š abar waxšwarīh andar gēhān padīruftan burzāwand kay wištāsp dēn ,

130.0

u =š ān ī az ān frāz tā wihēz ī ōy abēzag ruwān ō ān ī pāhlom axwān ,

131.0

u =š ān ī $ pas =iz az ān andar xwadāyīh ī rāmšāh kay wištāsp

132.0

u =š ān ī az ān pas tā hanǰābišn ī ērān xwadāyīh ,

133.0

ud u =š ān ī pas =iz az ān tā hazangrōzim ī zarduxštān sar rasišn ī ušēdar ,

134.0

u =š ān ī pas =iz az ān tā hazangrōzim ī ušēdarān rasišn ī ušēdarmāh ,

135.0

u =š ān ī pas =iz az ān tā hazangrōzim ī ušēdarmāhān sar ud rasišn ī rasišn ī sōšyāns ,

136.0

u =š ān az rasišn ī sūdōmand pērōzgar abd frašegird tan ī pasēn

137.0

ǰud ǰud nihang =ēw ī az =iš , ,

138.0

abar abdīh ī paydāgīhistan pad =iš az zāyišn ī ōy zādān farroxtom az mād

139.0

ēk =ē ī paydāg kū dādār ān ī zarduxšt xwarrah tar mādišt ārag ō zarduxšt widārd

140.0

ka framān būd az ohrmazd ān xwarrah az mēnōy ō gētī ud ān ī zarduxšt mādišt madan paydāgīhist wuzurg abdīh ō wasān

141.0

čiyōn dēn gōwēd kū ēg ka ohrmazd ān ī zarduxšt dahišn frāz brēhēnīd būd xwarrah ēg pēšnēmag ī ohrmazd dahišn ī zarduxšt abar grād abar ō ān māh , ,

142.0

ud az ān māh grād abar az ān ī anagr rōšnīh

143.0

abar grād abar ō ān ī xwaršēd

144.0

az ān ī xwaršēd abar grād abar ān māh ,

145.0

az ān māh abar grād abar ō awēšān star ,

146.0

az awēšān star abar grād abar ō ātaxš ī pad xānag zōiš

147.0

az ān ātaxš abar grād abar ō ān ī frāhīm.ruuāną zōiš zan ka ān kanīg ul zād kē būd zarduxšt burdār

148.0

az ōy rōšnīh ō ham grād andarg zamīg andarg asmān

149.0

asūrāgīg frašn paydāgēnīd kū =šān guft ēstēd andar wis ī frahixtarwānān zōiš pad xwadsōzišnīh ātaxš sōzēd kū =š ēmag pad kār nē abāyēd

150.0

ēg ō ōy kēd abar raft hēnd

151.0

awēšān ōy =iz rāy čihēnīd kū =šān guft kū purrxwarrahīh ī axw ī astōmand ā =š az tan xwarrah kū hamāg xwēškārīh az im bē rawāgīh bawēd ,

152.0

ud paydāg kū dēwān zanišn ī =šān az ān xwarrah rāy pad kanīg petyārgārīh ō ān deh sē xēn abar barēnd zamestān wisp ud sēǰ ud dušmān ī stahmag

153.0

u =šān pad ān ī dehīgān menišn abgand kū ēd wizend az ǰādūgīh ī ēd kanīg ō deh mad tā dehīgān kanīg pad ǰādūgīh ī hanbasānēnīdan ud abar bērōn kirdan ī az ān deh ō zādēnīdārān škeft pahikārīd , ,

154.0

ud ān kanīg pid andar was čim ī abar abēdād guftan ī ǰādūgīh abar ān kanīg ō dehīgān ēn =iz guft kū ka ēd kanīg andar ān ī man ul zād ōy harwisp waxš ān ī ātaxš paydāg rōšnīh az pas frāz kird kū =š az hamāg abar rōšnīh bē āwurd pad ān ī tārīg šab

155.0

ka ēn kanīg andar ān ī andarōntar kadag kū =š ātaxš andar nēst nišīnēd pad sarāy ī ātaxš burz waxšēnēnd ānōh kū ka ēn kanīg nišīnēd rōšntar kū ānōh kū ātaxš burz waxšēnēnd

156.0

az rōšnīh ī az im tan bē tābēd nē ān ī ēdōn xwarrahōmand ǰādūg būd ,

157.0

ud ēg =iz az ān ī dēwān sārēnišn ud kawīg ud karab ī dehīg hunsand nē būd hēnd

158.0

pid ō kanīg raftan ī ō padērēdarāsp pid dūdag ī andar spitāmān deh ī abar arāk rōsdestāg framūd

159.0

ud kanīg ān ī pid framān padīruft

160.0

ān āšōb ī dēwān § pad uzdehīgēnīdan ī ān kanīg kird yazadānwarzāwendīhā ō madan ī ān kanīg pad zanīh ō pōrušāsp ī zarduxšt pid wihānagēnīd pad frēstīdan ī pid kanīg ō mān ī padērēdarāsp ī pōrušāsp pid , ,

161.0

ēk ēd ī paydāg kū ka ān kanīg pad raftan ī ō ān dūdag abar bālist gyāg ī andar spitāmān deh ēstād u =š nigerīd

162.0

ud paydāgīhist wuzurg abdīh ō ān kanīg

163.0

čiyōn dēn gōwēd hād awēšān ō ōy wāng bē burd az awēšān ō ān wis raw kē awēšān hād griftar pad bālā ud frāxtar pad pahnā kē andar ān ān ī zīndag ud gōspand frahist ō ham raftēnīd ō ayārīh ī tō ān wis bagtāšīδ ī xwābar , ,

164.0

ēg ān čarātīg ēstād u =š bē =z nigerīd kū ōšmārišn ud man ēd sahēd kū =m kunišn ēdōn ō man pid =iz bē framūd

165.0

, ēg ān čarātīg frāz dast šust

166.0

ud az awēšān ō ān wis abar raft kē būd padērēdarāsp

167.0

mad ān xwarrah ō pōrušāsp ī padērēdarāsp pus , ,

168.0

ēg ēd ī paydāg kū dādār ohrmazd ān ī zarduxšt frawahr tar hōm ō pidarān ī zarduxšt widārd pad abd warzkirdīg

169.0

any =iz dēn gōwēd kū ka ān ī sidīgar hazangrōzim brīn būd pad sehazār sāl ī mēnōyistišn anēbgadīg sar pas az dām pad mēnōyistišnīh pēš az druz abarrasišnīh ēg amahraspandān zarduxšt ō ham tāšīd

170.0

frawahr awēšān andarg nišast dahanōmand uzwānōmand ud frāzguftār

171.0

wyltw wktk’n

172.0

ēg zarduxšt se hazangrōzim ā =šān pad ān ī čašm nigērišn mar paydāg sahist pad hamkirbīh amahraspandān kū ēdōn būd čiyōn amahrspand =ēw , ,

173.0

ud ka ān ī sidīgar hazangrōzim brīn būd pas az zarduxšt ōhamtāšišnīh ud pēš az zarduxšt frōdbarišnīh ī ō gētī pad sehazār sāl gētīwāstišnīh ud ēbgadīg sar ēg ohrmazd ō wahman pahikārīd ašawahišt kū =tān ān ī ōy mād abar dīd kū zarduxšt bē dahēm

174.0

ud ašawahišt passox guft kū tō ān =iz āgāh hē abzōnīg abar zarduxšt bē dahēm

175.0

tō amāh =iz dād hēm

176.0

ohrmazd tō dānē kē ān ē

177.0

amahrspand hēm

178.0

tō paydāgēn gyāg čē =š paydāgīh abzōnīg mēnōy ohrmazd tō dānē ,

179.0

ud ēg ohrmazd pahikārīd ō wahman X ud ardwahišt ud šahrewar spandarmad hordād amurdad man nē zarduxšt frōdbarišnīh sahēd abar ō astōmandān gēhān dahanōmand uzwānōmand frāzguftār

180.0

agar zarduxšt frōd barēm abar ō astōmandān gēhān dahanōmand uzwānōmand ud frāzguftār ud girdkird ēd paydāgtōhmag ōy ī man mard ī ahlaw rāy awēšān gōwēnd

181.0

ān amāh ō ōy ō ham tāšēm andar āb andar zamīg andar urwar andar gōspand

182.0

u =š ānōh bē barēm ō ān ī pōrušāsp wis kē ōy zarduxšt harw dō ēwēnag hutōhmīh gōwēnd kē =z az amahraspandān nērōsang ud kē =z az mardōmān ǰam , , ,

183.0

ēg amahraspandān stūnag ō ham tāšīd ī hōm mardbālā xūb abargōntar kū tarr

184.0

u =šān ō ān stūnag ān ī zarduxšt frawahr bē burd

185.0

ud ān ānōh amahraspandān frāz rawēnīd az ān anagr rōšnīh

186.0

u =š ānōh bē dād pad asnwan gar abar

187.0

u =šān pērāmōn paydāg bē burd

188.0

u =šān pērāmōn dēwār bē astēnīd bē ahrām ,

189.0

hamēšag hōm dahanōmand kū abāyišnīg būd

190.0

hamēšag az hōm āb wašt kū tarr būd ,

191.0

ud ka sehazār sāl gētīastišnīh anēbgadīg sesadsīh sāl abāz būd ēg =išān frāzīh ō ham ārāst

192.0

wahman ud ašawahišt abar ō axw ī astōmand bē wašt hēnd

193.0

ānōh frāz mad hēnd kū dō murw pad pusxwāyišnīh nišast hēnd haft sāl pēš ān gazān § pus ǰūd

194.0

ō ān ī awēšān menišn abar šud hēnd wahman ašawahišt

195.0

ud ān murw hampursīd hēnd kū franāmišn amāh u =mān ān hōm xwāyišn

196.0

u =šān ēdōnīh pad frāzīh ō ham ārāst

197.0

u =šān ān hōm xwāst

198.0

dō arešn kaft hōm

199.0

az awēšān ān ī any pad harw dō pēteštān grift ēk ōy ī any

200.0

u =šān ān hōm burd

201.0

u =šān ān ānōh bē dād pad ān wan abar andar ādyān

202.0

ud abar gaz nihaxt hēnd kū šud hēnd abar ō ān ī murw pus

203.0

ēg franaft ān ī zarduxšt frawaš

204.0

ud $ =iz awēšān gaz pad ān wan abar tā šāxān dwārīd

205.0

ōy frawahr ī zarduxšt ā =š zafar frāz zad

206.0

be gaz ōbast hēnd be murd hēnd kē =iz awēšān andar § būd hēnd abar pad šusr ud ān srādāg =ēw bē abāstan

207.0

ān hōm andar ān draxt bē paywast

208.0

ud pad bālist ī ān draxt ānōh kū murwān ādyān būd hamēšag tarr zarrgōn waxšīd ,

209.0

pas az madan ī ān zarduxšt burdār ō pōrušāsp pad zanīh ēg =išān ēdōn pad frāzīh ārāst

210.0

wahman ašawahišt ānōh frāz mad hēnd ō pōrušāsp andar gāwyōd ī spitāmān

211.0

u =šān ō ān hōm āwurdan ān ī awēšān menišn bast

212.0

ēg frāz raft pōrušāsp pad mēnōykāmagīh čiyōn mēnōyān abāyistan mēnōysawišnīh kū mēnōyān hamēsūd abar ō āb ī dāyt

213.0

u =š čē ān hōm dīd ka rust ēstād pad ān wan abar andar āšyānag ēg =iš menīd pōrušāsp kū abar § =m rawišn

214.0

u =m ān čiyōn ul ō ān hōm nē handāzēd

215.0

ān wan brīnišn čē ǰuttar az ān ohrmazdān hōm tarr sahē kū nēkīh ī tis az tō weh

216.0

ēg frāz raft pōrušāsp

217.0

u =š awēšān wastarg abar šust payāsīg ,

218.0

ud ēdar abdīh wuzurg paydāg būd ō pōrušāsp

219.0

abar ēn gōwēd kū hamē tā ka pōrušāsp awēšān wastarg abar šust ēg hōm frāz raft az abardom srišwadag ān tā ō mayān wan kū kāmag abar barišn pōrušāsp

220.0

ēg ō ān abar raft pōrušāsp ul šust wastarg u =š ēg ān harwisp abar drūd u =š ēg ān harwisp pad abāgīh pad abāgēnīd mānāg ī ōy čiyōn kē pus ī dōst ī dōsālag sesālag pad tōšndārišnīh barē u =š sahist ōy az ān urwāhmenīh

221.0

u =š awēšān hōm frāz burd pōrušāsp ō nārīg ī meh u =š ēdōn guft kū ēdōn tō dugdōw awēšān hōm abar nigāh dārē hamē tā ka awēšān hōm kār ud dādestān rasēd

222.0

ēk =ēw paydāg kū dādār ān ī zarduxšt tan gōhr tar āb urwar ō pidarān tan widārd ka framān būd ān ī zardušt tan gōhr ō pidarān tan madan wuzurg abdīh paydāgīhist ō wasān

223.0

čiyōn dēn gōwēd ēg ka ohrmazd ān ī zarduxšt dahišn frāz brēhēnīd būd gōhr ī tan ēg pēšnēmag ī ohrmazd dahišn ī zarduxšt abar grād abar hordād ud amurdad abar ō abr

224.0

ēg abr āb frōd burd nōg nōg srešk srešk bowandag ud garmōg pad ēd šādīh ī gōspandān wīrān ān ī and šusr čand dō gāw ī kištār wardišn pad ān abar urwar rust hēnd harwisp ī az harwisp srādag abar pad ān zamān ka ān ī any urwar sist ud abar =iz hušk ud gōhr ī zarduxšt az ān āb ō ān urwar mad

225.0

ēk =ēw paydāg kū tā gōhr ī zarduxšt bē ō pidarān rasād ēg az ān ī amahraspandān nixwārišn ō awēšān urwar abar rawēnīd pōrušāsp šaš gāw ī spēd ī zardgōš

226.0

ud ēdar paydāgīhist wuzurg abdīh čiyōn dēn gōwēd kū awēšān gāwān dō azādagān pēm bē mad ud gōhr ī zarduxšt az urwar ō ān gāw mad andar gāw pēm gumēxtīhīd

227.0

u =š ān gāw abāz rawēnīd pōrušāsp u =š guft pōrušāsp ō dugdōw kū dugdōw awēšān gāwān dō azādagān pēm bē mad ud bē awēšān gāw dōš kē ān ī ōy gāw čēgāmiz =ēw ox ī astōmand rāy xwarrah az =iš

228.0

ul ēstād dugdōw u =š ān dēg stad ī čahrušwadag wizīhēd u =š az awēšān dōšīd ān ī =šān abar pēm u =š awēšān bē dād āb bē abyōxt ud gōhr ī zarduxšt andar ān pēm būd

229.0

ēk ēd ī andar kōšišn ī petyārag abar apaydāgēnīdan u agārēnīdan ī ān pēm paydāgīhist čiyōn dēn gōwēd kū ēg abar pad ān zamān dēwān hanǰamanēnīd u =š ǰōyīd dēwān dēw kū bē wanībawēd dēw tar ul =iz ān xwarišn dād kū sāxt ud bē nihād kē tā andar ān mard ō bawēd kē ahlaw zarduxšt kē az ašmāh ān padīrēd murnǰēnīdan hamē tā ka ān ast ’wmltwm kū xwārtar akār kirdan

230.0

ǰōyīd =iš čišmag ī dušdānāg kū man ān padīram murnǰēnīdan

231.0

ān dušdānāg bē dwārīd abāg sadpanǰāh dēwān ī čišmagkirbān u =š ān wis ham =iz kand ham =iz wašt ud ham dār škast ham paywar ud ān mahist hamahl nē frāz škast kē andar ān būd kū =š pad =iš abāz kird ēstād

232.0

paydāg kū pas pōrušāsp ān hōm az dugdōw abāz xwāst u =š ān kust u =š ō ān gāw pēm kē tan gōhr ī zarduxšt aw =iš mad ēstād gumēxt ēdar frawahr ī zarduxšt u =š tan gōhr āgenēn ōham mad

233.0

ēk =ēw paydāg kū ān hōm ud pēm ka āgenēn gumēxt ud ō ohrmazd niwēyīd ēstād pōrušāsp dugdōw frāz xwārīd ud ēdar hangirdīgīh ī būd xwarrah frawahr ud tan gōhr ī zarduxšt andar dō pid

234.0

ud paydāgīhist wuzurg abdīh ō =šān harw dō pad ān ī dēn gōwēd kū ēg harw dō ul fradom nibast hēnd pad pus xwāyišn ō awēšān dēwān pad margōwišnīh wināhgārīh abar bē xrōsīd/xrust kū ēw pōrušāsp ān ī čiyōn ēn čim kunē pad ān ul petīt hēnd čiyōn mardōm kē šarm

235.0

ud ul didīgar nibast hēnd pad pusxwāyišnīh ō awēšān dēwān pad margōwišnīh abar bē xrōsīd/xrust pad ān ul petīt hēnd čiyōn mardōm kē šarm

236.0

ud ul sidīgar nibast hēnd ēdōn pad pusxwāyišnīh ō awēšān dēwān pad margōwišnīh abar bē xrōsīd pad ān ul petīt hēnd čiyōn mardōm kē šarm

237.0

ud awēšān guft ēk abar abāg did abar ēstād hēnd ō ēn kār u =šān abar hārift kū =šān pad āgōš frāz grift kū nē ēdōn tis =ēw warzišnīh abar ēstēm nē ka ēdar harw dō ōham rasēnd rāg ud nōdar

238.0

ēg ān mard ōham būd kē ahlaw zarduxšt ud ēdar ōham madan tan gōhr frawahr ud xwarrah ī zarduxšt andar burdār mād

239.0

ēk ēd ī paydāg kū pas az hambawišnīh ī zarduxšt andar burdār mād dēwān nōg škeft kōšīd pad margēnīdan ī zarduxšt andar mādar aškamb u =šān wēmārēnīd ud pad ān ī tēztom ud tēzbēšēnīdār dard ān ī =š burdār tā =š kāmist bēšāzīh ī xwāyišnīh rāy ō ǰādūgbizeškān pursīd

240.0

ud ēdar paydāgīhist wuzurg abdīh čiyōn dēn gōwēd hād ēg =išān ō ōy wāng bē burd ānōh az abardar nēmag az ohrmazd ud amahraspandān kū čarātīg kē šawē mā ō ānōh rawē nē az ēn awēšān sez pad ǰādūgbiziškīh bēšāzišnīh frāz dast šōy ān dast esm stanē ud abar ōy aburnāyīg rāy gōšt barēš rōγn ī gāw ud frāz ōy rāy ātaxš barēš ud ham ōy rāy pad ātaxš tābēš ud frāz ōy rāy pad gāh nibaēmēš ud drust bawē

241.0

ēg =iš ōy čarātīg frāz dast šust u =š ēdōn kird čiyōn āšnūd ud drust būd

242.0

ēk ēd ī paydāgīhist ō wasān kū ka mānd ēstād ō =š zāyišn se rōz pad ēwēnag ī xwaršēd pad ulwaxšišnīh nazdīh ka =š fradom frāšm wistarīhēd pas tan paydāgīhēd čiyōn dēn gōwēd hād

243.0

ēg ka pad ān ī abdom se šab ka zarduxšt andar burdār būd kū se rōz abāz būd tā pas bē zād ān wis hamāg rōšn būd ī pōrušāsp

244.0

ēg =išān guft pad bētazišnīh spitāmān aspsālārān ud pahsālārān kū bē abāyēd abesīhād wis ī pōrušāsp kē ōy pad harwisp sūrāg abar wylm pad āyēbišn āyift ēstēd

245.0

ēg =išān guft pad abāzōhamtazišnīh kū nē bē abesist wis ī pōrušāsp nē ōy pad harwisp sūrāg abar wylm pad āyēbišn āyift ēstēd ul ō ān zād ō ān xānag mard ī rāyōmand

246.0

ēd =iz ēk az abdīh ka sraw ī zāyišn abdīh ōy mard wuzurgxwarrah az gōwišn ī ǰam ud anīz warzāwend pad wāxšabarburdārīh ī =šān az yazadān andar raft ēstād

247.0

kū ǰam ō dēwān guft kū ul ēdar zāyēd abēzag ahlaw zarduxšt kē ašmāh kē dēw hēd ā =tān ān ī kird axwāyišnīh dahēd kū ačārēnēd ī akirdārīh =iz ō ašmāh dahēd axwāyišnīh kū ašmāh xwēš rāy nē tuwān xwāst kas ašmāh rāy nē xwāhēd

248.0

ud paydāg kū sraw ī abar zāyišn ī zarduxšt u =š waxšwarīh nē ēwāz az warzāwendān ī čiyōn ǰam ud frēdōn ud was frazānag mardōm uzwēyīhist bē yazadān pad =iz uzwān ī gōspandān srūd andar gēhān wisturd kū tā ān =iz gugā bawād abar =iš waxšwarīh

249.0

čiyōn ān ī paydāg kū andar xwadāyīh ī kay us ēw gāw =ēw būd u =š warz =ēw az yazadān ō tan mad ēstād ud hamēw ka ērān tūrān āgenēn pad wimand pahikār būd ān gāw āwurd u =š wimand ī mayān ērān ud tūrān rāst nimūd

250.0

ud az ān čiyōn ēr dādestān xwāstan pad tūr pad pahikār druz būd hēnd bāstān pad ān wimandnimūdārīh gāw tūr ud ēraxt hēnd u =šān az ērān zanišn mad hēnd az ān bē arešk =iz ī =šān abar kay us pad =iz xwēšīh u =š ān abd xīr rāy tūrān abar zanišn ud tabāhīh ī ān gāw raft hēnd u =šān pad ǰādūgīh ud parīgīh menišn ī kay us abar ān gāw wiškeft u =š ō artēštār =ēw srid nām būd framūd kū ān gāw ōzadan ud ōy mard pad zanišn ī ān gāw mad

251.0

ud ēdar paydāgīhist wuzurg abdīh az ān gāw čiyōn dēn gōwēd kū ō ōy gāw pad ān ī meh gōwišn abar guft kū ma man abar zanē srid ī haftom ī ēd ramān kēn tōzēd kē andar axwān ahlāyīh kāmagtar zarduxšt rasēd ud wad kirdan ī tō pad dēn bē gōwēd u =t pad ruwān dušwārīh ēdōn bawēd čiyōn az ān gyāg paydāg kū čiyōn =iš bawēd ān ī wadagan hāwand =iš bawēd margīh

252.0

paydāg kū ān mard ka =š ēd ōwōn abdīh az gāw wēnēd nē ōzanēd bē abāz ō kay us šud čiyōn =iš dīd guft

253.0

kay us pas =iz škeftag frēftagīh ī az dēwān ǰādūgān rāy ōham mard ān gāw zadan framūd ud ān mard did =iz ō ān gāw raft ka was =iz ān gōwišn burd gōš abar nē dāšt ōzad

254.0

gāw =iz ī ēkdād rāy paydāg kū =š padīrag zanišn ī az gannāgmēnōy wāng burd kū ka =š =iz im menē dušdānāg gannāgmēnōy kū harwistīn madār ham pad zanišn nē amāh ēg =iz harwistīn madār hē ō zanišn kū =t ēdōn nē tuwān abesīhēnīdan ī abāz nē bawēm frāz nūn =iz gōwam kū ān mard pad ān ī abdom wardišn rasēd zarduxšt ī spitāmān kē tangīh dahēd ō dēwān dēwayārān ud druwandān =iz ī dōzangān

255.0

ud abdīh ī zarduxšt zanišn ī dēwān az ān ī ōy xwarrah ud āgāhīh ī =š pēš =iz az zāyišn ō gēhān mad ēstād rāy ka frasyāb ī ǰādūg dēwkām/īhā pad xwāst ī ān ī ōy xwarrah škeft ranǰīhist čiyōn dēn gōwēd kū ēg bē padīd frāsiiā tūr ī waswarzān spitāmān zarduxšt ō zrēy ī frāxkard fradom didīgar ud sidīgar ǰār u =š ān xwarrah bē ayāftan xwāst kē =šān ērān mādagdān dehān zādān azādān =iz kē =iz ahlaw nē ō ān xwarrah ayāft

256.0

ud ēn =iz kū bē ō harwisp haft kišwar mar padīd frangrasyāg u =š xwāst xwarrah ī zarduxšt

257.0

ēdōn ōšmurdan sazāg tōhmag ī zarduxšt zarduxšt ī pōrušāsp ī padērēdarāsp ī urugaδaspi ī haēčat̰asp ī čixšnuš ī paētrip araǰaδaršn u harδar ī spitām ī vaēdišt naiiāzəm ēriǰ dūrāsraw ī mānuščihr ī ērān dahībed mānušxwarwar ī mānušxwarnāg ī nērōsang warzīd andar vīzak airiiak ī ÿritak ī bītak frazīšak zīšak fragµīzak èzak ēriǰ ī frēdōn xwanirah xwadāy ī purrgāw āspīyān ī nēkgāw ī āspīyān ī sōygāw āspīyān ī bōrgāw āspīyān ī kandārgāw āspīyān ī syāhgāw āspīyān ī spēdgāw āspīyān ī spargāw āspīyān ī ramaggāw āspīyān wanfrawišn ī āspīyān ī ǰam haft kišwar xwadāy ī wiwanghānān ī aiiaŋhā† anaŋhā† hōšang ī pēšdād haft kišwar xwadāy frawāg ī siyāmag mašī ī gayōmard fradom mard

258.0

abar abdīh ī paydāgīhist pas az zāyišn ī ōy zādān farroxtom az mād tā madan ī =š ō ohrmazd hampursagīh

259.0

ēk =ēw paydāg kū =š pad zāyišn bē xandīd az ōy bē tarsīd hēnd haft ǰeh ī =š pērāmōn nišast hēnd u =šān guft bē tarsišn kū čē ēn būd mehīh ayāb tarmenišnīh rāy ka čiyōn mard ī arzōmand kē az xwēškārīh rāmišn ēdōn mard aburnāyīg u =š pad zāyišn bē xandīd

260.0

u =š guft pōrušāsp kū bē ēd mard ō ān ī narmpah wistarg barēd tis tō rāy nēkīh ī tō rāy kē dugdōw hē kū ēd mard rasišn ī xwarrah ud rasišn ī xwārīh frāz dīd ka =š pad zāyišn bē xandīd

261.0

ēk ēd ī paydāg kū pas pōrušāsp ō karab =ēw dūrāsraw nām kē andar ān deh pad ǰādūgīh nāmīgtar būd raft u =š az zāyišn ī zarduxšt abdīh ī pad =iš paydāg būd āgāhēnīd dīdan ī zarduxšt rāy ō kadag āwurd

262.0

ān ǰādūg az ān ī zarduxšt andar ān xwarrah bēš mad ud anāg čyhyč ud dušfarragīhā kāmist tarrōg sar ī ōy purrxwarrah aburnāyīg pad gaw afšārdan margēnīdan

263.0

ud ēdar paydāgīhist wuzurg abdīh ī ō wasān čiyōn dēn gōwēd kū ēg ōy mar ā =š ō pasīh gaw abāz rānēnīd kū abāz hušk nē =iz pas ān mar pad ān gaw gōšt pad zafar abāz ǰūdār būd

264.0

ōy karab az =iz ān bē abar zarduxšt nišān daxšag ī anāg drāyīd ud pōrušāsp az zarduxšt pad wišōbišnazišīh škeft tarsēnīd ud ō wanī kirdan ī zarduxšt sārēnīd

265.0

ēk =ēw paydāg kū karab dūrāsraw ǰādūgīhā pad menišn pōrušāsp bīm ī az zarduxšt ēdōn abgand menišn ī pōrušāsp ēdōn wināhīd ī =š az ān bē tars =iz az xwad karab margīh ī zarduxšt xwāst

266.0

abar čē ēwēnag margēnīd kē rāy pōrušāsp az wišōbišn ī az =iš abēčār bawēd dūrāsraw pursīd ud ōy karab esm ī was ōham burdan ud zarduxšt mayān ān esm nibāstan ātaxš abar āyiftan ud abāg esm sōxtan darmān būdan drāyīd pōrušāsp hamgōnag kird

267.0

ud ēdar paydāgīhist wuzurg abdīh ō wasān čiyōn dēn gōwēd kū nē ātaxš andar urwar abar grād kū bē nē āyēd ud nē urwar ātaxš frāz grift bē tazīd pad ōš ān mād ī puskāmag ud frāz ō ōy mad ’wyōmand u =š stad u =š ān bē dād pad ān ī dašn dast abar pad ōstag

268.0

ēk ēd ī paydāg kū pas pōrušāsp ō karab dūrāsraw abar nē sōzēnīdan ī ātaxš guft nōg abar margēnīdan ī zarduxšt pursīd ōy karab zarduxšt andar tang widarg nibāstan ud gāwān ī was pad ān widarg rawēnīd tā gāwān pāy sparīhēd ō pōrušāsp darmān būd drāyīd ud pōrušāsp hamgōnag kird

269.0

ēdar =iz paydāgīhist wuzurg abdīh ō wasān čiyōn dēn gōwēd ān ōy gāw abar raft kē būd sōgōmand kū =š sōg meh būd az abārīg gāw ud pīlōmand ud ān ōy pēš raft pēš az gāw ī pēšōbāy ān ōy pēš tazīd kū pēš ī zarduxšt ul ēstād ōy az ōy pad hamāg rōz bē āmurzīd kū =š gāwān az =iš abāz dāšt fradom ō ānōh raft abdom bē raft bē tazīd pad uš ān mād ī puskāmag ud frāz ō ōy mad ’wyōmand u =š stad u =š ān bē dād pad ān ī dašn dast abar pad ōstag

270.0

ēk ēd ī paydāg kū ānōh did pōrušāsp ō ān karab mad abar =iz nē spurdan ī gāwān zarduxšt nōg abar ēwēnag margēnīdan ī zarduxšt pursīd ōy karab zarduxšt ābxwar =ēw ī pad gēhān nibāstan ud aspān ī was ō ān ābxwar tazēnīdan tā pad aspān sumb abar sparīhēd ud darmān būd drāyīd pōrušāsp hamgōnag kird

271.0

ud ēdar paydāgīhist wuzurg abdīh ō wasān čiyōn dēn gōwēd kū ān ī ōy asp abar raft kē būd sumbāwand kū =š sumb stabrtar būd zardgōš ud ān ōy pēš rawēd pēš az asp ī pēšōbāy ud ān ōy pēš tazēd kū pēš zarduxšt parestād ud fradom ō ānōh raft abdom bē raft bē tazīd pad ōš ān mād ī puskāmag ud frāz ō ōy mad ’wyōmand u =š stad u =š bē dād pad ān ī dašn dast abar pad ōstag

272.0

ēk =ēw paydāg kū did pōrušāsp ō ān karab abar =iz nē spurdan ī aspān =iz zarduxšt guft u =š nōg abar čē ēwēnag margēnīdan ī zarduxšt pursīd ud ōy karab zarduxšt andar sūrāg ī hunušagān ōzadag gurg abganēd tā ka gurg rasēd hunušagān ōzadag wēnēd zarduxšt pad ān ī hunušagān kēn xešmīhā darrēd ǰōyēd darmān būd drāyīd ud pōrušāsp hamgōnag kird

273.0

ēdar paydāgīhist wuzurg abdīh ō wasān čiyōn dēn gōwēd hād ka ān gurg bē mad čand yuǰyast ud ān zarduxšt pad ayārīh ī yazadān ōy gurg zad zanag kū =š dahan ēk abāg did frōd hušk

274.0

ēk ēd ī paydāg kū ō ōy abar raft hēnd ud srōšahlī ud wahman u =šān bē ō ōy kurušk ānīd u =š dāyagānēnīd hamāg tarist šab

275.0

ud bē tazīd pad ōš ān mād ī puskāmag ud frāz az hast ōy kurušk raft u =š guft zōyšān kū bē =t ǰūd pad sagrīh dwārē čē =š pad ēd dāšt kū gurg nēk ēdōn ō ān pus kū =m nēk hē ka tō pad wēnišn wēnēnd ast ayāb xōn

276.0

frāz ō ōy mad hēnd ’wyōmand u =š ān stad u =š bē dād pad ān ī dašn dast abar pad ōstag u =š guft zōyšān kū nē tō pas pus frāz daham nē ka ēdar harw dō ōham rasēnd rāg ud nōdar

277.0

ud paydāg kū pas karab dūrāsraw abāg ān ǰādūgān ōham deh mad ud abar rāyēnišn ī zarduxšt nigerīd u =šān čār ī abar wināhīdan margēnīdan nē bē tis ōy ōwōn purrnērōg abddīd čiyōn ēd ī paydāg kū ǰōyīd brādrōrēš ī karab kū

278.0

man ēg andar ān ī amāh deh az mardōmān pad ǰādūgīh dūrnigerišntom ham frāz awēšān deh wēnam huframānīh kū framān weh dānēd dādan abzōnīgīh kū abzōn az kē wēš bawēd kēmad ud kē =iz rasēd hupah kū gōspand weh dānēd dāštan huramag kū ramag ī abārīg weh dānēd dāštan ud huāyōzišnīh kū kār ī abārīg weh dānēd kirdan ud huartēštār kū kārēzār weh dānēd kirdan ud hurād kū rādīh weh dānēd kirdan ān ī pōrušāsp hunušag ī abar se šab tā az pidarān bē ul zād

279.0

bē ō ōy wahman rasēd abar ox ī astōmand kū wahman bē ō zarduxšt rasēd u =š bē ō hampursagīh nayēd bē ān ī ōy wehdēn rasēd abar ō haft kišwar damīg ud ān ēdōn pad menišn nē bē =iz dahēnam kū nē dānēd kū čiyōn ōy bē murnǰēnam ud daxšag ī ēd tis kū rāst gōwēd ēn ī ō pēš gōwam tēz pas az ēn gōwišn bē āšnawišnīh ka ašmāh ēn gōwišn āšnūd franāmēd

280.0

pōrušāsp pad ān ī čahārāyōzišn rahīg wāzīd ēg pad ān gōwišnāšnawišnīh ka awēšān ān gōwišn āšnūd būd franaft pōrušāsp pad ān ī čahārāyōzišn rahīg wāzīd

281.0

u =š guft pōrušāsp ō brādrōrēš karab kū brādrōrēš ī karab čē mard frāz wēnēnd ka pad zāyišn bē griyēnd ān =iz tanarmēštdahišnīh pad frāz wēnēnd margīh ka pad zāyišn bē griyēnd ud čē ōy ī zāyišn man pusar frāz dīd ka =š pad zāyišn bē xandīd

282.0

ān =iz ī tō pusar frāz dīd ka =š pad zāyišn bē xandīd

283.0

ka bē ō ōy wahman rasēd abar ox ī astōmand u =š guft abar abāz wašt pōrušāsp kū =t bowandag ēdōn karab ōy ī man pusar rāy frāz dīd kū =t dānāgīhā dīd

284.0

ud tūr ī brādrōrēš ī karab ka pōrušāsp az =iš pursīd kū =t čē ān būd ka =t ō ān ī man pusar pad abarbarišnīh aš burd u =t az ōy bē dagr pad ulīh ul nigerīd u =t az ōy bē dagr pad nigūnīh frōd nigerīd u =t az ōy bē dagr ǰudǰud bē nigerīd

285.0

passox guft kū ka =m ō ōy pusar pad abarbarišnīh aš burd u =m az ōy bē dagr pad ulīh ul nigerīd ēg az ōy bē rāy xwarrah ōham dāšt tā ō ān xwaršēd ōy rāy kanārag rāy xwarrah abar hambūd ham kū =m ēd dīd kū mardōmān pad guft ī ō ruwān bē ō xwaršēd pāyag rasēd ēd kū andar garōdmān dādestān čiyōn u =m nē dīd

286.0

ud ka =m ō ōy tō pusar pad abarbarišnīh aš burd u =m az ōy bē burd dagr pad nigūnīh frōd nigerīd ēg az ōy rāy ud xwarrah ōham dāšt tā ō asmān ī azēr ī ēn zamīg ud ōy rāy kanārag rāy ud xwarrah ēd kū =š andar ān asmān dādestān čiyōn bawēd ā =m nē dīd

287.0

ka =m ō ōy ī tō pusar pad abarbarišnīh aš burd u =m az ōy bē dagr ǰudǰud nigerīd ēg az ōy rāy xwarrah ōham dāšt pad ārāst ēn zamīg ōy rāy kanārag ī rāy ud xwarrah abar hambūd ham kū =m ēd dīd kū az kunišn ī im bē tan ī pasēn bawēd bē =m dādestān ī tan ī pasēn nē dīd

288.0

ēd ī tō pus menēd kū kunam meh az ān ī any ox ī astōmand ēdōn kunēd =iz men tō kū šawē ēd ī tō pus pad ōy ī mehpānag wištāsp mānēd nē pad tō

289.0

ēk ēd ī paydāg kū ka zarduxšt haftsālag būd ān dūrāsraw az brādrōrēš ī karab hamist dīd ī zarduxšt rāy ō ī wis ī pōrušāsp āyuxt hēnd u =šān pad ān nazdīkīh zarduxšt dīd ka =š abāg aburnāyīgān kādag kird u =šān dušfarragīhā nišast pad ǰādūgīhmenišn ī zarduxšt wināhīdan u =šān ān rāy abar aburnāyīgān bīm ud tars abgand

290.0

ēdar az zōrīg ōšīh ud pahrēzkārīh ud warz ī zarduxšt paydāg būd ō awēšān wuzurg abdīh čiyōn dēn gōwēd kū ka pad frāzīh ān ī any aburnāyīg frāz tarsīd hēnd ō dašnāragīh ī xwēš zarduxšt az =išān ān ī ōy dōysar ī pad menišn bē nē bast

291.0

ēk ēd ī paydāg kū ka ēd dō karab ō mān ī pōrušāsp mad hēnd pōrušāsp ǰōyišn ī awēšān rāy xwarišn framūd sāxtan u =š sāxt xwarišn frāz āšixt purr dōlāg ān ī asp pēm

292.0

u =š guft ō dūrāsraw kū tō andar ān ī amāh deh az mardōmān dēwēzagtom hē frāz ēn ī man yaz

293.0

wuzurg abdīh az dānāgīh ī zarduxšt pad ān ī aburnādādīh čiyōn dēn gōwēd kū =š guft zarduxšt kū man ēd pid frāz yazam nē ān ī man abāyēd yaštan ēd frāz yazēd

294.0

u =š guft pōrušāsp kū nē ān ī man tō frāz yazē ān ān ī man frāz ēw yazēd

295.0

tā ō se bār awēšān mardān ān gōwišn andarg būrd ul ēstād zarduxšt u =š awēšān rāy guft u =š pad ān ī dašn pāy frāz škast kū ahlawān mardān zanān yazam driyōšān mardān zanān yazam druwandān mardān zanān ka āyōzād čēgāmiz =ēw pōrušāsp kū yazišn kunād yazišn ō yaštārān hārispād kū ōy yazād kē abāyēd yašt

296.0

ēk ēd ī paydāg kū pas dūrāsraw karab ō zarduxšt drāyīd kū anāg tō būd marg kē =t man fradom az ox ī astōmand andar rāg ud nōdar az bahrbarišnīh aš baram frāz arzānīgēnīd ham kū =t bahr az man bē burd nūn fragān kē pad abarbarišnīh aš baram ud ēd bawēd kū =t duščašmīhā pad ān āhōg nigeram ī =t nēst

297.0

ud ēdar wuzurg abdīh ī paydāg būd abar zarduxšt pad dānāgīhā passox guftan ī ō ōy mar pad ān aburnādādīh ī čiyōn ēd ī dēn gōwēd kū =š guft zarduxšt kū bē fragān az mar abar nigeram pad abzōnīgīh ud bowandagmenišnīh kū =t pad ān āhōg nigeram ī =t ast

298.0

ēk ān ī pas az ēd passox ī zarduxšt ō dūrāsraw abar ō karab paydāg būd čiyōn dēn gōwēd kū akār būd mar ud stard čand drang dah asp pēm dōsišn kē dōsīdār ēk bawēd

299.0

ēk =ēw paydāg kū ka az stardīh frāz būd ōy ǰādūg ēg =iš did ō zarduxšt hamēwēnag drāyīd zarduxšt passox ān guft nōg akār būd mar ud stard čand drang wīst asp ī purrpēm dōsišn kē dōsīdār ēk bawēd

300.0

ēk ēd ī paydāg bawēd kū did ka az stardīh frāz būd ōy ǰādūg ēg =iš ō zarduxšt hamēwēnag drāyīd zarduxšt passox ān ham guft nōg akār bawēd mar ud stard čand sīh asp ī purrpēm dōsišn drang kē dōsīdār ēk bawēd

301.0

ēk ēd paydāg bawēd kū did ka az ān stardīh frāz būd ōy ǰādūg ēg =iš ǰōyīd kū ān ō amāh asp wāzēnēd ud abar rahīg wardēd kū andar bandēd čē bē man ēd dawāg pad mānsrrasišnīh pad dādestānōmandīh murnǰēnēd u =šān ān asp wāzēnīd u =šān abar rahīg bast

302.0

ud ēdar paydāgīhist wuzurg abdīh ō wasān čiyōn dēn gōwēd kū ka bē mad pad az =išān čand yōǰyāst u =š dard andar ēstād pad sahmīhistan ēn būd ī ō pēš gōwam ān ōy wēxt šusr kū =š šusr pad pōst ul āmad u =š škast ud pahlūg az =iš wisist az rān ēg ān frōd murd ud ēg ān ī ōy hunušag ēg ān ī ōy hunušagān hunušag

303.0

ēk ēd ī paydāg kū pēš =iz az madan ī =š ō hampursagīh paydāgīhist abar =iš menišn ī frāxtar az hamāg gēhān abardar az harw gētī xīr abāg ān ī wisp wizēhīd ōz xōy ān ī hamāgayāb nērōg wīr ud ān ī harwwizīn pattūg xrad ud ān =iz ī was pahrēzdān kayān xwarrah ud ān ī hērbed xwarrah purrkāmagīh ī ō ahlāyīh

304.0

ud tuwān tuxšāgīhā ud pedīh ud abardarīh =iz ī pad tagīgīh ud arwandīh ud ān =iz ī tan hučihrīh ōz bowandagīh ī =š pad čihr ēn čahār pēšag ī ast āsrōnīh ud artēštārīh wāstaryōšīh hutuxšīh pahlom dōstīh ī ō yazadān wehān škeft hamēstārīh ō dēwān wattarān

305.0

ān čiyōnīh ī az mardōmān dōpadištān dādīh yazadān pahlomīh ud spurragīh pad ohrmazd dēsagīh u =š aštagīh pad =iš winnārīhēd

306.0

tā yazadān pad frāztarīh ī =š az harw astān būdān bawēdān kas rasišn ī =š ō aštagīh ohrmazd ud ahūradīh ī gēhān bōzāgīh ī aseǰ dahišnān az ēbgad pad uzwān ī wassrādag dānāg purrnēk ī āwām andar gēhān uzwēyīhīg sraw barēnd

307.0

ud dēwān pad ēd kū ēd ī was kayag karab ō stōwēnīdan ud tabāhēnīdan ī ōy sārēnīd ud wehān ēg =iz mihr dāšt ud dōstīh warzīd

308.0

u =š pad bowandagīh ī sīh sāl ī az zāyišn frāz wahman amahrspand pad aštagīh ī ohrmazd abar mad ka =š az rōd ī ēwtāg āb ī hōmīgān burd čiyōn ēd ī dēn gōwēd kū ka ō ān ī sidīgar bētazišnīh frāz mad ī ān ī ān wehdāytī frāz pad ān franaft ud ka az ān ul raft zarduxšt ā =š mard dīd ka raftan az rabihwagtar nēmag

309.0

ān būd wahman ud ān ōy sahist wahman pēškirb kū pad tan čašmtar bawēd ud pēš nēk kū pad harw tis pēš būd ān ōy sahist čand ān ī se mard nēzag bālā ud ān ōy sahist wahman kū =š ān ī ’lws tāg pad dast burd kē =š pad ān urwar bē burd u =š nē urwar bē rēšēnīd ān mēnōy tāg ī dēn būd u =š ēd nimūd kū pad dēn ēdōn arēšīdārīhā abāyēd raft

310.0

ast kē ēdōn gōwēd kū mēnōy aštagīh būd u =š ēd nimūd kū andar gēhān ēdōn arēšīdārīhā abāyēd raftan kū abar harw kas āštīh bawēd

311.0

ka ō ān ī tasom bētazišnīh frāz mad tā ān ī wehdāytī hōšān rōd ī ān nām būd ud andar ān zarduxšt ā =š az mayān āb ī hōmīgān burd ud pad ulīh andar ān zarduxšt ā =š ān ī dašn paitištān az hōšān rōd ī burd u =š abar warr nihuft ud andar ān ōy pēš nēmag wahman padīrag āyuxt

312.0

u =š az ōy pursīd ōy mard kū kē hē az kē hē zarduxšt ham spitāmān

313.0

saxwan ī wahman zarduxšt ī spitāmān pad čē tō frāz ranǰagīh kū =t pad čē abāyēd ka ranǰag bē bawē pad čē tō frāz tuxšagīh ud ō čē tō kāmagdahišnīh

314.0

passox ī zarduxšt kū pad ahlāyīh frāz ranǰagīh ud pad ahlāyīh frāz tuxšāgīh ud ō ahlāyīh man kāmagdahišnīh kū =m abāyēd ō ān tis ud ahlāyīh x čand xwāstār ham menam

315.0

ud gōwišn ī wahman zarduxšt ī spitāmān hastīg ud ān kē ahlāyīh kū tis =ēw ī hastīg čiyōn ān kē ahlāyīh tā kē ān x kē ahlāyīh kū kē xwēš

316.0

u =š guft zarduxšt kū ast ān kē ahlāyīh ud ān rāy rōšn bowandag ud āgāh ham kū čiyōn ān rāy kē ān kē ōy rasišn pad wahman

317.0

u =š ō ōy guft wahman kū zarduxšt ī spitāmān bē ēd ǰāmag ī dah kē barē čiyōn ō ōy ham pursēm kē tō dād hē kē man dād ham kē az mēnōyān abzōnīgtom kē hastān hudahāgtom kē ōy gōwāg ham kē wahman ham kū aštag ī ōy ham

318.0

ēg =iš ēdōn menīd zarduxšt kū weh ān kē dādār kē az ēd aštag weh

319.0

ēg awēšān bē raft hēnd pad abāgīh wahman zarduxšt =iz wahman zarduxšt pēš pas

320.0

abar abdīh ī paydāgīhist az hampursagīh fradom frāz tā abdom hampursagīh sar ī būd andar dranā ī dah sāl wābarīgānīh ī =š pad waxšwarīh andar gēhān padīruftan ī burzāwend kay wištāsp dēn čiyōn pas az dah sāl ī andar hampursagīh

321.0

pad dō sāl ēk ēd ī paydāg kū ka az hampursagīh ī fradom abāz būd ēg =iš pad fradom framān ī xwadāy dādār ohrmazd ēg ēwtāg andar kayagān karabān ram waxšwarīh ī =š dēn mazdēsn ud aštagīh ī ohrmazd xwānd čiyōn pad buland wāng srūd mardōm ō dēn ohrmazd xwānd

322.0

čiyōn ēd ī dēn gōwēd kū ēg =iš bē ōham ārāst zarduxšt ō ēn ī mānišnōmand gōspandōmand ān ī pad hāzišn ī ox ī astōmand bē nigerišnīh

323.0

ud ka ān ī awēšān wisān ō niyōšišn gōwišnīh bē mad ēg zarduxšt pad bulandrasišnīh abar bē xwānd ō gēhān ī astōmandān ī ahlāyīh stāyīdan ahlāyīh ud nigōhīdan dēwān

324.0

ud franāmišn mazdēsnīh ī zarduxšt ān ī amahraspandān ēzišn ud niyāyišn ō ašmāh pahlom gōwam ud ayazišnīh ō dēwān xwēdōdah ān =iz pahlom āgāhdahišnīh kū az āgāhīh ī dād ēstēd āstawānīh kirbag ī ān meh ’wyltom az awēšān pid duxt pus burdār ud brād xwāh

325.0

paydāg kū pad ān gōwišn anōšmār kayag ud karab dēwēzag ud abar zarduxšt sārīhīd ud ō =š ōš tuxšīd hēnd čiyōn ēd ī dēn gōwēd hād ēg mar bē niraxt hēnd kē pad nazdīkīh ī nišast hēnd ī tūr hunušag ud čardār ud brād ī tūr čiyōn mardōm kē šarm kū =šān az xwēdōdah ī ōy guft kū ōh kun andar šarm būd

326.0

ēn tūr tūr ī urwāytāsang ī usixšān čiyōn meh pāduxšā ī ān kustag būd u =š was spāh ud nērōg dāšt u =š guft mar u =š meh stad kē kahīhist

327.0

tūr ī urwāytāsang ī usixšān hunušag kū =š pad =iš ēn meh zanam kē amāh ān ī abzōnīg saxwan ōham gumēzēd kū tis =ēw ī pad =iš ēdōn abēgumān hēm kū nē abāyēd kirdan čiyōn xwēdōdah ā =mān gumān hamē gīrēd kū ōh abāyēd kirdan

328.0

u =š guft tūr ī urwāytāsang ī usixšān kū ma ōy mard zanē kē =m ēg az harwisp ox ī astōmand kāmag dōysartom dīd ān =iz rasēd čē nē man ēd rāy ka =š zanē dagr zamān dānāgīh būd sahist kū andar ēn damīg āhōg dānāgīh nē bawēd ī ēdōn hanǰamanīg čiyōn ēd ast kū ka mard =ēw ī hanǰamanīg zanēnd dagr dānāgīh nē bawēd

329.0

u =š guft tūr ī urwāytāsang ī usixšān hunušag kū man rāy abēzag kē hanǰamanīg hē

330.0

u =š guft zarduxšt kū nē ān hagriz afrāz guftār bawam kē =š ōy man guft ōy abzōnīgtom hāzišn ud andarg gōwišnīh ud hēm wirāstan xwēdōdah ud dastwar kird yazišn kirdan

331.0

ud ēdar huaxwīh ud xwarrah amāwandīh ī zarduxšt ān ī passazag ō aštagīh abardom xwadāy ud dādār ohrmazd paydāgīhist wuzurg abdīh ō wasān dīdārīgīhist wuzurg frāzīh ī =š abar waxšwar dāmān kē pad nōgīh rēzagōmand kas nihānrawišn ud frēftār gōnag xūb ’wk nihuftag rāyēnišn

332.0

ēg †axwēškārīh homānāg bīmāyōz ud ahlomōγ ēwēnag ēk ēk amaragānīg hāxtār ka ō wasgrōhīh rasīd andak andak =iz ōy nimūdār ud kōšīdār mehīhxwāstār bawēd paydāg kū =š pad ān nēwdilīh ud abardarmenišnīh pad xwarrah ī ān stabrgund hangadxīr ī waspus

333.0

pādixšā tūr urwāytāsang mayān xešmen ud ō ōš ī ōy sārdag hambōh ī kayagān karabān ō dēn ī ohrmazd xwānd čiyōn ēd ī dēn gōwēd kū u =š guft zarduxšt kū stāy ahlāyīh tūr ī urwāytāsang ī usixšān nikōh dēwān ud franām mazdēsnīh zarduxšt

334.0

u =š guft tūr ī urwāytāsang ī usixšān kū zarduxšt ī spitāmān ma man ō ēd anāgīh hāzē kē andar tō =iz hē

335.0

u =š guft zarduxšt kū pursīd az man ohrmazd kū zarduxšt ka ō amāh andar axwān bē mad hē ā =t kē andar ox ī astōmand az mardōmān yyy hutuwāngarān mardōmān ī artēštārān sūdxwāstārtom ud gōspandxwāstārtom ud dūrnāmīgtom ud wasfšūtom kū wēš bē dahēd wasdartom dar ī adēn uzēnag dīd man ō ōy passox guft kū tūr ī urwāytāsang ī usixšān

336.0

ud ōy man ō passox guft kū ān tō zarduxšt fradom az mardōmān artēštārān hāzē ō ēn dēn abarmenišnīh abargōwišnīh ud abarwarzišnīh kē ohrmazd ud zarduxšt

337.0

agar ān zarduxšt hāzēd u =š wurrawēd ud rawāgīh =iz ō ēd ī tō dahēd padīrag =iz nišīnēd pad hāwištīh ēd kū hāwištīh ī tō gōwēd kunēd ud dēn bē niyōšēd rawāg kunēd ān =iz hamē pas ast zarduxšt fradom az mardōmān artēštārān sūdxwāstārtom gōspandxwāstārtom ud dūrnāmīgtom ud wasdartom az awēšān kē ul zād ēstēnd nūn kē ul zāyēd az nūn frāz

338.0

ud agar ān zarduxšt nē hāzēd u =š nē wurrawēd nē ēd ī tō rawāgīh dahēd nē niyōšēd nē tō padīrag nišīnēd čē nē tō padīrag nišīnēd ay kū =m dānišnīg kē nē haxtēd abar ōy gōwē zarduxšt kū zad xwāstār ahlāyīh hē ud tanāpuhragān margarzān xrōsišn dādār ō ruwān čē ēdōn =iz ast ud ēd rāy margarzān bawēd čē =š hastīgīh ī dēn dānist

339.0

čē tō gōwam tūr ī urwāytāsang ī usixšān kū zad xwāstār ahlāyīh hē tanāpuhragān margarzān xrōsišn dādār ō ruwān

340.0

ēk škeft nišān paydāg kē harw čē yazadān dušmen karab =ēw waydwōyšt nām ahaxtān ohrmazd

341.0

u =š guft ohrmazd kū ašarm ēdōn ān mard zarduxšt kē =š pad man abar nām frāz dād ēstēd kē ’w’wyīh ohrmazd ham čē ān ham pad ahlāyīh ǰudbēš kū pad frārōnīh bēš az dāmān abāz dāram amahrspand ǰudbēšōmand

342.0

ēg bē raw zarduxšt man rāy az ōy xwāhē kū pad xwēšīh man dār sad tuštar ud kanīg ud āyōzišn čahār asp ēdōn ōy ō gōw kū waydwōyšt az tō ohrmazd xwāhēd sad tuštar ud kanīg ud āyōzišn čahār aspān agar ō ōy dahē tō rāy ud xwarrah pad ān dahišn ud agar ō ōy nē dahē tō dušxwarrahīh pad ān nē dahišnīh

343.0

ēg bē raft zarduxšt ān ō waydwōyšt ī ahaxtān u =š ō ōy guft kū waydwōyšt ahaxtān ān az tō ohrmazd xwāhēd sad tuštar ud kanīg ud āyōzišn čahār asp agar ō ō ōy dahē tō rāy ud xwarrah pad ān dahišn ud agar ō ōy nē dahē tō dušxwarrahīh pad ān nē dahišnīh

344.0

ud ān karab pad passox zarduxšt drāyīd kū =m nē az tō bēš kū =m tuwānīggarīh ast nē az kirdan ī tō ud nē ohrmazd baytar ān hēm pad tuwāngarīh frāztar hēm az ohrmazd =iz u =m was ān ī hazār xūg ramag windīd ēstēd

345.0

bē raft zarduxšt abar ō ohrmazd abar ō amahraspandān u =š guft zarduxšt kū ohrmazd mēnōy abzōnīg dādār ī gēhān ī astōmandān ahlaw ēdōn =iš ō man passox guft kū =m nē az tō bēš ud nē az ohrmazd baytar an hēm az ohrmazd =iz u =m was ān ī hazār xūg ramag windīd ēstēd

346.0

u =š guft ohrmazd kū az awēšān ī amāh rāy ud xwarrah ī zarduxšt ōy mard abarmenišnīh windīd ēstēd kū gōspand amāh dād ōy abarmenišnīh was gōspandīh

347.0

ēg =iz ōy ēn pad ān pāddāšn ud ka nē ān ī sidīgar šab frāz pad sar zīndag rasēd pad ān sidīgar šab ōy gyān az kustag bē ēstād hēnd kū =š az ayārōmandīh abāz ēstād hēnd haft ān ī rōšn ī spēd dōysar awēšān ān pad ulīh ul dawēnīd ānōh pad ulīh ul plw’ww’ frāz xward

348.0

ēk wuzurgbēšāzišnīh az āb hōmīgān zarduxšt az rōd ī dāytī ān rōz stad ī ka wahman ō hampursagīh nīd paydāgīhist

349.0

čiyōn pad gōwišn ī ohrmazd ō zarduxšt paydāg kū pad awēšān āb ī hōmīgān kē barē zarduxšt ma pad ān mardōm ī dēwēzag dēwēzēnd ayāb ō ǰašnčār ān abar āhenǰānd ō gāw ān frāz barē ī čahār sālag škast s’n ī siyāmōy ī yynōmand ud āb frāzxwarišnīh ān gāw az ān wēmārīh bē drust bawēd

350.0

bē pas raft zarduxšt fradom andar ox ī astōmand kē ō im paršēdgāw nām būd sy’st’n pad sar abar mānist

351.0

u =š ō ōy guft paršēdgāw kū zarduxšt spitāmān ō man ēd āb dah ī hōmīgān kē barē

352.0

u =š guft zarduxšt kū stāy tō ahlāyīh paršadgāw ud nikōh dēwān franām mazdēsnīh ī zarduxšt andarg wattarān gōw

353.0

stāyīd =iš paršadgāw ahlāyīh u =š nikōhīd dēwān u =š nē az ōy padīrift mazdēsnīh ī zarduxšt andarg ī wattarān guft

354.0

frāz ō ōy zarduxšt pad ān ahlāyīhstāyišnīh ā =š ān āb hōmīgān kē burd zarduxšt nē pad ān mardōm ī dēwēzag dēw yašt hēnd u =š ō ān gāw ān frāz burd zarduxšt čahār sālag škast s’n ī siyāmōy ī sūdōmand az ān āb frāzxwarišnīh ān gāw az ān wēmārīh bē drust būd

355.0

ēk ān ī az dwāristan ī gannāgmēnōy ō kušišn ī zarduxšt paydāg čiyōn dēn gōwēd kū az abāxtar nēmag frāz dwārīd gannāgmēnōy purrmarg u =š ēdōn dawīd ōy ī dušdānāg gannāgmēnōy ī purrmarg kū druz abar dwārēd ud murnǰēnēd ahlaw zarduxšt

356.0

druz ō ōy abar dwārīd hēnd but dēw ud seǰ ī nihānrawišn ī frēftār

357.0

ud zarduxšt ahunawar frāz srūd druz ō ōy stard abāz dwārīd hēnd but dēw ud seǰ ī nihānrawišn ī frēftār

358.0

ud druz ō dawīd hēnd kū tarnigerišn hē gannāgmēnōy kū tis pad čim bē nē nigerē ud ān framāyē kirdan nē šāyēd nē =mān ān ī ōy ōš abar dīd kē spitāmān zarduxšt

359.0

az purrxwarrahīh ahlaw zarduxšt pad menišn abar dīd kū dēw ī druwand dušdānāg pad ān ī man ōš hampursēnd ud ul ēstād zarduxšt frāz raft zarduxšt

360.0

ēdar paydāgīhist wuzurg abdīh ō wasān pad ān ī gōwēd kū u =š sang frāz dād dast dāšt ī kadagmasā būd ahlaw zarduxšt kē =š windīd ēstād az dādār ohrmazd mēnōy yatāahūwayryō

361.0

ēk ēd ī nē ēwāz andar ērānšahr ō ērān bē andar harwisp būm ud ō harw srādag paydāgīhist škastan ī dēwān kālbod frāzsrāyišnīh ī zarduxšt ahunawar

362.0

čiyōn ān ī gōwēd kū čār ī kayān xwarrah yazam kē =š abar abāg būd ahlaw zarduxšt pad abarmenišnīh abargōwišnīh abarwarzišnīh ī dēn kē būd az harwisp ox ī astōmand pad ahlāyīh ahlawtom pad xwadāyīh xwadāytom ud pad rāy rāyōmandtom ud pad xwarrah xwarrahōmandtom

363.0

ud pad wēnābdāgīh pēš az ān dēwān padīd hēnd u =šān pad wēnābdāgīh māyišn frawōyt u =šān pad wēnābdāgīh kīh bē kešīd az mardōmān pad snōyišn garzīd ā =šān stahmagīhātar darzīd dēwān

364.0

pad awēšān ahunawar ī ahlaw zarduxšt frāz srūd andar zamīg nigān wāzīd hēnd harwisp dēw kū =šān kālbod bē škast

365.0

paydāg kū =šān pas az škastan ī =išān kālbod pad dēwkirbīh andar gēhān paydāg būd wināhišn kirdan nē šāyīd hēnd ud yazadān xēmīh ō mardōmān paydāg būd hēnd mardōmān awēšān šnāxt kū nē yazadān bē dēw hēnd

366.0

zarduxšt az gōwišnīh ohrmazd ō mardōmān āhuft čiyōn andar ēd ī dēn pad gōwišnīh ō zarduxšt gōwēd kū čiyōn andar ox ī astōmand mardōmān dēw pad āfrāh pad dastwar dārēnd čiyōn hēnd kū gōwēnd kū pad dastwar abāyēnd dāštan

367.0

u =š guft zarduxšt ohrmazd kū čiyōn awēšān zarduxšt ī ō mardōm dēw pad āfrāh dārēnd ud čiyōn hēnd kū čē gōwēnd dēw kū =tān kird čē gōwēnd dēw kū =tān rasēd

368.0

u =š guft zarduxšt kū bē pad ān ohrmazd bē tazēnd mardōm ō ān ī amānišn ud y’kls’t\ =ēw kū kas nē mānēd az rōšnīh franāmišn ān tā ō hūwaxš rasēd ka šab dō hāsr ud abāz ayāb az hūfrāšmōdād ān tā ō hamwardišnīh ka šab dō hāsr šud kū ānōh nē gōspandān nē mardān nē sagān wāng āšnawēnd

369.0

ēg pad ān gōwēnd pad abāz rasišnīh kū ānōh ō dēwān hampursīd hēm ka sāstārīh pēšōbāyīh az awēšān zayēm ān ō amāh dahēnd ka yyyōmandīh ud tuwāngarīh az awēšān ǰayēm ān ō amāh dahēnd

370.0

čiyōn ēdōn tis pad awēšān zarduxšt kird kū =šān dād dād čiyōn rasēd =išān kū gōwēnd kū =mān mad

371.0

u =š guft zarduxšt kū ǰud pad ān ohrmazd ābādīh gōwēnd ast kē ēdōn gōwēd kū hamē pas ramagōmandtar būd ham tā ka ō dēwān hampursagīh ham ud ast kē ēdōn gōwēd kū hamē pas wadagtar ud dušxwarrahtar būd ham ham tā ka ō yazadān dēwān hampursīd hēm čiyōn pad awēšān az dēwān bēbawišnīh dārēnd kū ka az dēwān ǰud bē bawēnd čē gōwēnd

372.0

u =š guft zarduxšt kū ēdōn pad ān ohrmazd gōwēnd kū parrōn bē nigerēd kū kas az amāh abāz wardēd ayāb ōham mōyīhēd kū sar frōd ō kanār dārēd ayāb bē mōyīhēd kū kust =ēw bē nigerēd ayāb xwaš ōftēd ud andar ān az abāgīh bē ī mardōmān dēw bē wēzēnd

373.0

u =š guft ohrmazd kū čiyōn =it kāmag tō zarduxšt ast ī tō bē niger ulīh az sar nigūnīh az pāy ud ārag kust =ēw kust ud zahyā =ēw pēš ud pas harwist =iz nēmag čē nē amāh az tō bē pad awēnābdāgīh bē wēzīhēm čiyōn dēw az mardōmān bē dēw pad frāzbawišnīh ka bē dwārēnd bē pad awēnišnīh bē wēzēnd

374.0

abar =iz ō tō zarduxšt druz bē dwārēd mādagkirb zarrēn pusēn kū pestānbān dārēd ud hamhāgīh ī az tō zayēd ud duwārēd mādagkirb zarrēnpusēn hampursagīh az tō zayēd ud hamkirdārīh az tō zayēd

375.0

u =š ma hamhāgīh dahē ud ma hampursagīh ma hamkirdārīh framāyē ōy ōy pasī frōd waštan ān ī pērōzgar gōwišn frāz gōwē yatāahūwayryō

376.0

bē raft zarduxšt ō ān ī mānišnōmand dōstōmand gēhān ō hāzišn ī ox ī astōmand bēnigerišnīh rāy ēg ō druz frāz mad ka pad nazdīkīh ī ǰāmag nišast ān ī ǰāmag ī ka wahman bē ō hampursagīh nīd ā =š bē nihād mādagkirb zarrēnpusēn u =š hamhāgīh ud hamkirdārīh az ōy zayēd u =š ǰōyēd kū ān ham spandarmad

377.0

guft =iš zarduxšt kū bē =m ān nigerīd kē spandarmad andar ān ī rōšn rōz ī anabr ud ān man sahist spandarmad huōrōn ud huparrōn ud hutarist kū hamāg gyāg nēk būd pasī frōd ward šnāsam agar tō hē spandarmad

378.0

u =š ō ōy druz guft kū zarduxšt ī spitāmān kū awēšān amāh hēm kē mādagān nēkōg az pēšīh nēmag ud dušzišt az pasīh ma man ō pasīh framāyē

379.0

pas az sidīgar pahikārīd druz ō pasīh frōd wašt u =š ōy dīd zarduxšt pasīh andarg haxt ka hārift ēstād purr gaz ud udrā ud karabūg ud pazdūg wazag

380.0

u =š ān ī pērōzgar gōwišn frāz guft zarduxšt yatāahūwayryō ēg ān druz bē nigast ud čašmagkirb frāz dwārīd

381.0

u =š ǰōyīd pad bēnasišnīh kū anāgīh kē ēdar ēdōn čiyōn man windīd čē az tō menīd kū =t šēwanīhātar az gurdān čē kē pad zanišn ō dušox šawēnd man šēwanīhātar rawam abar pad tan gyān kū =t pad tan gyān bē frēbam u =m tō nē bē frēft hē

382.0

ud zarduxšt ēd rāz ō mardōm āhuft u =šān ōzmūd ud dēw pad =iš šnāxt paydāgīhist az =iz ham dar wuzurg abdīh ō mardōmān wēnābdāgdwārišnīh ī dēwān pēš az zarduxšt andar gēhān škast kālbod ī =šān pas pad frāzsrāyišnīh ī zarduxšt dēn az abestāg paydāg dahībed wištāsp ud mardōm ī ān zamān pad rāstīh padīruftan ud agar ēd ōwōn nē būd wištāsp awēšān āwāmīgān abestāg kē ēd ēdōnīh az =iš paydāg pad drō dāšt ud nē padīruft ō amāh nē paywast hē

383.0

ēk ēd ī abāg =iz ān ī zarduxšt az dēn abar wattarīh waštag dēnīh ī zahag ī purrmarg karabān ī wištāsp anīz was kay ud karab ī abar dar ī wištāsp hamīh ī =šān abar ōš ī zarduxšt wirāstan ī abar =iš garān anast ō wištāsp ud sārēnīdan ī wištāsp ō ōš ī ōy az framān ī wištāsp ō škeft band ud pādufrāh rasēd āgāh būd

384.0

pas =iz āgāhīh ī =š abar bōxtišn ī az =iš paydāgīh ī =š abdīh ud gugāyīh ī abar waxšwarīh madan rāy pas az ān ī abdom frašn ud dah sāl ī hampursagīh sazišn pad ān ī ohrmazd handarz framān ēwtāg ō dar ī wištāsp ud war ī ān ǰāmag ud razm franaftan

385.0

abar aspānwar ī wištāsp aštagīh ī ohrmazd amāwandīh ud pērōzgarīhā abar xwēš guft ud wištāsp ō dēn ī ohrmazd xwānd ud abāg ān ī wištāsp wuzurg xrad bowandagmenišnīh ud mēnōywirrōyišnīh ī xwēš rāy zarduxšt saxwan āšnūd pad waxšwarīh handāxtan rāy xwāst hē

386.0

ud pas =iz pēš kū =š saxwan ī zarduxšt āšnūd čiyōnīh ī zarduxšt šnāxt hē az sazēnīdan ī zahag ī purrmarg ud abārīg awēšān kayagān karabān spazgdānīhā waštagkārīhā wištāsp abar zarduxšt bē ēg =iš zarduxšt ō ān band pādufrāh abespārd ī čiyōn pad gōwišn ī zarduxšt gōwēd kū =šān se anast abar guft =am ud sīh u =šān bast ham man marān ī druwandān ī dēwāstān pad sīhse band

387.0

bē man sōy ī dušwīr ā =š ān ī pāy hangārd zōr bē man sōy ī dušwīrsōy ī dušwīr ā =š ān ī bāzā hangārd ōz bē man sōy ī dušwīr ā =š ān ī gōš hangārdan āšnawišn bē man sōy ī dušwīr ā =š ān ī čašm hangārdan wēnišn u =m bē kswwk ō pušt abar abyōxt kū =m pad pušt abāz ēstād az abarēstišnīh ī ān ī dušwīr sōy ī purrmarg

388.0

ud ēdar az tagīgīh ī zarduxšt pad ēwtāg ō kas ǰāmag ud razm raft ānōh pad ān ēwēnag nibišt paydāg būd pattūdan ī =š zīndagīh andar ān ōwōn pādufrāh az sōy ud tišn ud band ī garān abārīg anāgīh ī andar nērōg ī čihr ī mardōm pattā ī andar nē nihād paydāgīhist wuzurg abdīh ō wištāsp šāh u =š darīgān ka =šān windād purrxwarrah tan andar škeftīh ud bandīh ud nēw ōy padištagīh dagraxwardārīh zīndag

389.0

ēk ēd ī yazadān ō wihān ī bōxtišn ī ōy az ān škeftīh handāxt gyānōmand tan bahr az =iš azīndag ud apaydāg būd pas andar wuzurg nišast ī wištāsp ud hanǰaman ī gēhān zarduxšt pad ōz ud wābarīgānīh ān ī rāst saxwan im tan nōg abāz kird ud čiyōn ān ī abdīh ī abar asp ī šēd ī wištāspān andar yylwb’’yk

390.0

ēk menišn ī wištāsp šāh ud kišwarīgān anīz was ī nihuftag xīr pad mēnōywēnišnīh guftan ud āškārēnīdan

391.0

ēk čand tis ī widēmās ī dahāg pad ǰādūgīh andar bābēl kird ēstād mardōm pad ān wiyābānīh ō uzdēsparistišnīh mad ēstād hēnd tā =š murnǰēnišn ī gēhān būd pad ān ī pērōzgar dēn gōwišn ī zarduxšt ō padīrag ān ǰādūgīh frāz guft hamāg wišōbīhist ud akārīhist

392.0

ēk ēd ī abāg abdīh ī az zarduxšt paydāgīhist pad pahikār ī abar dēn abāg kišwar nāmīg frazānagān kē =š andar pad frazānagīh gēhān āšnāg sraw bābēlāyīgān andar awēšān škeft pahikārtar ān dwāzdah star gōwišn kē =šān nām az dwāzdah star dēn bōxtan u =š rāstīh dānišnīg paydāgēnīdan

393.0

ud wištāsp šāh hamist awēšān frazānagān pad rāstīh ī dēn abēgumānēnīdan frēstīd čand dādār ohrmazd wahman ašawahišt ud ātaxš ī abzōnīg pad aštagīh ud ō wištāsp abar rāst waxšwarīh ī zarduxšt kāmag ī ohrmazd pad padīruftan ī wištāsp dēn mazdēsn rawāgēnīdan ī andar gēhān

394.0

abdīh ī ō wištāsp kišwarīgān pad =iz frōd wāzīdan ī awēšān amahraspandān az asmān ō zamīg ud andar wāzīdan ō mān ī wištāsp paydāgīhist čiyōn ēd ī dēn gōwēd kū ēg =iz awēšān guft kē dādār ohrmazd ō wahman ašawahišt ud ātaxš =iz ī ohrmazd ī abzōnīg kū frāz rawēd amahrspand =ēd abar ō mān ī wištāsp ī abzārgōspand ī dūrfrāznāmīg abarēstišnīh ī ēn dēn rāy kū tā pad ēn dēn bē ēstād ud passoxgōwišnīh ī spitāmān ī ahlaw zarduxšt rāy ān =išān ī ān gōwišn padīruft

395.0

raft hēnd amahrspand abar ō mān ī wištāsp ī abzārgōspand ī dūrfrāznāmīg awēšān =iš rahīg ōy wištāsp andar ān bulandmānišn myn hamāg rōšnīh sahist az ān ī meh amāwandīh ud pērōzgarīh awēšān ēn kū ka =š ān ī ēdōn abar dīd burzāwend kay wištāsp larzīd ōy harwisp pēšag larzīd ōy harwisp ptwyl’’yt ōy az abardar nēmag čiyōn asp ī rahīg wāzēnīdār

396.0

u =š guft pad ān ī wīrān gōwišnīh ātaxš ī ohrmazd kū ma tars čē =t nē abar tarsišn burzāwend kay wištāsp nē =t ō mān tarist mad hēnd aštag ī abarkār payāmbar arǰāsp u =t nē ō mān tarist mad hēnd dō hāwand arǰāsp kē sāg ud bāz xwāhēnd u =t nē ō mān =it tarist mad ān ī harwisp tarwēnīdār duz ī xwastār gayg ī rāhdār

397.0

se hēm kē =tān mān tarist mad hēm wahman ud ašawahišt ud ātaxš =iz ī xwadāy ī abzōnīg ēn tō āgāhīh ristagtom dānāgīhātom

398.0

agar wēnāgīh abāgēnē kū =t dānāgīh bawēd abāyēd stāy weh dēn ī mazdēsnān kē abēzagīhā pad ōšmurišn rawēd kē spitāmān zarduxšt

399.0

srāy ahunawar stāy ahlāyīh ī pahlom ud ayazišnīh gōw ō dēwān čē =š kāmag tō rāy ohrmazd abarēstišnīh ī ēn dēn u =šān kāmag amahraspandān u =š kāmag tō rāy abārīg yazadān kē weh dahag ud ahlaw hēnd

400.0

ud pad ān yān pad ān pāddāšn agar ašmāh stāyēd weh dēn ī abēzag ī spitāmān ahlaw zarduxšt amāh ō tō dahēm dagrxwadāyīh ud pāduxšāyīh ud dagrzīndagīh ī ǰān sad ud panǰāh sāl amāh ō tō dahēm ahlišwang ud rahīgēstišnīh ī dagr pad kāmag pad hamēšag abāgīh ud xūb abar abāgīh pad hamēšag abāgīh ud afrāzsazišnīh ud amāh ō tō pus dahēm pēšotan ast nām amarg ast ud azarmān asuyišn ast apuyišn andar harw dō axwān zīndag ud pādixšā kē astōmandān kē =iz mēnōyān

401.0

pad ān ǰān pad ān pāddāšn agar ašmāh nē stāyēd weh dēn abēzag ī spitāmān ahlaw zarduxšt ā =t pad ulīh ul wāzēnēm u =t pasīh framāyēm kargās ī zarmānmenišn awēšān ēd ī tō frāz xwarēnd ast ī tō ud xōn ō damīg bē rasēd ud āb ō tan ī tō nē rasēd

402.0

ēk ān ī abāg wābarīhistan ī andar wištāsp dēn pad =iz ān rasišn ī gōwišn ī amahraspandān pas =iz padīsā handēšīšn ī =š az yl’w’y’n pad xōnrēzišn ī az arǰāsp xyōn pyslišn ī =š tar ham ox az dēn padīruftārīh gumēg

403.0

ān ī āgāhīg wēnābdāg =iz nimūdan ī ō wištāsp pērōzīh ī abar arǰāsp ud xyōnān xwad =iz abardar gāh ud asazišnīg xwadāyīh ud rāy ud xwarrah rāy frēstīd ī andar ham zamān dādār ohrmazd nērōsang yazad ō mān ī wištāsp pad aštagīh ō ašawahišt amahrspand xwārēnīdan ī ō wištāsp ān ī =š čašm abarwēnišnīh ī ō mēnōyān axwān rōšngar xwarišn kē rāy =iš dīd wištāsp wuzurg xwarrah ud rāz

404.0

čiyōn ēd ī dēn gōwēd kū u =š ō nērōsang yazad guft kē dādār ohrmazd kū bē raw wāz nērōsang ī hanǰamanīg abar ō mān ī wištāsp ī abzārgōspand dūrfrāznāmīg ud ēn gōwē ō ašawahišt kū ašawahišt pāduxšā stan tašt ī nēk ī abar nēktar az anyān taštagān ī kird kū ǰām ēdōn nēk pad xwadāyīh šāyēd kirdan abar hōm ud mang amāh rāy bar ō wištāsp u =š pad ān abar frāz xwārēn dahībed wištāsp ān =iš ī ōy gōwišn padīruftag

405.0

ašawahišt pāduxšā az =iš stad tašt ī nēk u =š pad ān frāz xwārēnīd ud dahībed ī =š ī ōy gōwišn padīruft ašawahišt pāduxšā az =iš stad tašt ī u =š pad ān abar frāz xwārēnīd dahībed burzāwend kay wištāsp ud nibast deh dahībed burzāwend kay wištāsp ka az wistar frāz būd u =š ō hudōs ī guft kū bawēd hudōs kē spitāmān zarduxšt tēz ō man bē ēw rasēd pad tuxšāgīh ī spitāmān zarduxšt tēz ud ō man ēw nigēzēd dēn ī ohrmazd ud zarduxšt

406.0

ēk ēd ī paydāg kū ka wištāsp dēn padīrift ahlāyīh stāyīd dēwān andar gōwišn ayārdīd hēnd ud xešm dēw ō xyōnān dehān mar ī xyōn arǰāsp čiyōn andar ān āwām az sāstārān ān mazantom būd dwārišn u =š andar xyōnān dehān zišttom wāng xrōsīd u =šān ō kōšišn sārēnīd

407.0

ud ēdar =iz paydāgīhist wuzurg abdīh ō =iz ērān ram ī ānōh abar dar ī xyōn arǰāsp madār būd hēnd čiyōn ēd ī dēn gōwēd kū ēg abar pad ym’w’y’ hanǰaman ǰōyīd mūdag xešm ī tanāpuhragān ōy garzīd čiyōn ’ylw’ u =š bē sparzīd čiyōn anāg ašmāh būd kē xyōn hēd pad apērōzgarīh pas āyōzēd

408.0

az nūn frāz nē ast kū pērōzīh ērān az anāgarān anyān tarist mad pad hamhāgīh ō mān ān ī tagīgtar zarduxšt ka =š ān zišt xwadāyīh abar āšnūd mar xyōn arǰāsp ō mar gaw āsuft kū =š ēk pad did frāz zad u =š hamrān ud pad hamxwarišnīh ōham xward

409.0

u =š bē ān ī taxl xūb saxt xyōn kū wēš bē ayārdīd ōy mar ī ān ī dašn gaw ō rān abar āsuft u =š ēdōn pad zišt xwadāyīh ǰōyīd kū tēz ō man ōham rasēd xyōn deh ēg tēz ō man ōham rasēd ēr mad ast

410.0

abar abdīh ī paydāgīhist az padīruftan frāz ī wištāsp dēn tā wihēzišn frawahr zarduxšt ō ān pahlom axwān ka uzīd ēstād az zāyišnīh frāz 77 sāl ud az hampursagīh frāz čēhelhaft sāl az padīruftan ī wištāsp dēn frāz sīhpanǰ sāl

411.0

ēk ēd paydāg kū ka zarduxšt andar mān ī wištāsp dēn srūd čašm paydāg kū āhumbīhist pad =iz pahān stōrān ātaxšān mēnōy =iz ī mān mēhan urwāhmenīh

412.0

az =iz bē paydāgīhist wuzurg abdīh čiyōn ēd dēn gōwēd kū harwist pah ud stōr ud ātaxš ī sōzāg ā =šān urwāhmenīh sahist ārustan ī xūb winnārd mēnōy mān ā =šān ōzōmandīh sahist kū mān az nūn frāz ōzōmand pad dēn kird ka =šān ān gōwišn bē āšnūd kē =š guft spitāmān ahlaw zarduxšt

413.0

ud ēk kirdan ī zarduxšt andar wizīr ud dādwar ān ī bōxt ēraxt nimūdār war passāxt ī abar dādestānīhā nihuftag ī andar dēn guft ēstēd čiyōn sīhse ēwēnag

414.0

ēd ī pas =iz az ān tā hanǰaftan ī ērān xwadāyīh hāwištān ī zarduxšt andar kār dāšt u =š āhang ēk ān ī widāxtag rōy abar yyy rēxtan čiyōn hufraward ādurbād ī māraspandān pad passāxt ī abar dēn pad =iš bōxt āgāhīh andar gēhān wistardag ud paydāgīhistan ī pad =iz ān wuzurg abdīh pad wehdēn abar hamdar ēn =iz gōwēd kū ān was ka nigerēnd ā =šān wurrawēd druwandān ān ī nērang ī war

415.0

ēk ān ī pas pas az pēš kēdīgīh ī zarduxšt abargōwišnīh ī dēn ō wištāsp ud kišwarīgān paydāgīhist čiyōn padīruftan ī wištāsp dēn ān ī zarduxšt pad bun rasišn aw =iš guft az dahībed dēn paydāgīh kū tō ēn xēm ēn dēn kē xrōhag ast xwāstag hangan ōham kunē kay wištāsp kū bē padīrē tō ēn xēm ēn dēn kē ast kū frahangān frahang ī bē dārē dahībed kū rawāgīh kunē ī tō ēn xēm abar dārē čiyōn stūnag nōg āsyā pad abardārišnīh abar dārēd čiyōn stūnag dāštār ī ēn dēn hē

416.0

ud pērōzīh ī wištāsp abar arǰāsp xyōn ud abārīg anērān pad ān škeft kārēzār čiyōn zarduxšt pad dēn bē ō wištāsp čāšīd was ī az dēn paydāg

417.0

ēk āhuftan ī zarduxšt andar purrwēnagīh ud biziškīh ud čihršnāsīh ud abārīg pēšag kirrōgīh rāzīgīhā bowandagīhā ī pad dādīgdānišnīh mēnōywēnišnīh šāyēd nimūdan ī az dēn nērangīhā ī abar spōxtan ī sez ud tarwēnīdan ī dēw ud parīg ud agārēnīdan ī ǰādūgīh ud parīgīh

418.0

bēšāzēnīdan wēmārīh ud hamēstārēnīdan ī gurgān xrafstarān wišādan ī wārān bastan ī tagarg ud tūn mayx ud sahm abārīg ǰōrdāgān urwarān gōspandān petyārag abd nērang ī abar =iz hordād amurdad ǰast ud anīz was nērang tā hanǰaftan ī ērān xwadāyīh pad kār dāštan ast ī nūn =iz pād ēstēd abāg andak ī az abdīh ī pad ātaxšān

419.0

ul paydāgīhist ud āškāragēnīdan ī ō mardōmān was ābīhā ī nēw muhragīhā ī abd ud darmān ī wēmārīh ī az bizeškān uskār pargūdag was mēnōyīg ud spihrīg ud wāyīg ud damīgīg ud anīz gēhān sūd rāz ī pad yazadānxradīh aw =iš šāyēd mad

420.0

ēk abdīh ī xwad abestāg ī pad hamāg pahlom ēwāzīh gēhān hangirdīgīh ī wisp dānāgīh gōwišnān abardom

421.0

ēk madan ī ō wištāsp ēd =iz ī amahraspandān pad pāddāšn ī dēn padīruftan niwēyēnīd čiyōn pišōtan dīd ī farrox dahībed ōy amarg ud azarmān aniyāz xwarišn wuzurg tan ud bowandag nērōg ud purrxwarrah amāwand ud pērōzgar ud yazadān hamtāg pus ēwarz ī pēšitan ō kangdiz xwadāyīh ī ānōh čiyōn dādār ohrmazd aw =iš baxt paydāgīhistan ī pad =iz ān wuzurg abdīh ō wasān

422.0

abar abdīh ī paydāgīhist pas az wihēz ī yaštfrawahr zarduxšt ō ān ī pahlom axwān andar zīndagīh ī wištāsp

423.0

ēk ēd ī az dēn paydāg abar wirāstan ī srid ī wisrabān rah ēd pad abdīh ī nāmīg ud madan ī sraw ī abar abdīh ī ān rah ō wištāsp ud xwāst ī wištāsp ān rah az srid ud srid pad passox ī wištāsp ān rah ō mard =ēw ī ahlaw kē ruwān ī srid pad zīndagīh ī srid tan ān ī ōy mard pad zīndagīh ī ōy tan āgenēn pad gētī wēnābdāg ōham rasēnd

424.0

ud ruwān ī srid pad rādēnīdan ī ān srid ān rah ō ōy mard ī ahlawīh čašm dīd pad =iš paydāg bawēd nistūd ēstād ud ān ēwēnag nē kirdan guft

425.0

burzāwend kay wištāsp čiyōn az dēn abar bawēdīh ī andar ān āwām ēd abdīh āgāh būd abērtar ēn =iz abdīh ō gēhānīgīh paydāgīhistan wābarīh dēn mazdēsn ud xwānāgtar būd rāy az kišwarīgān dīdārīg būd xwāst

426.0

hambadist paydāg būd wuzurg abdīh ō wištāsp ud gēhānīgān čiyōn gōwēd kū ēg ān ī ōy ruwān amahraspandān frāz hišt az ān ī rōšn garōdmān abar ō damīg ī ohrmazddād az rōšnīh ān raft ruwān wištāsp u =š andar rōšnīh ō padīrag raft wištāsp abar ō ān ī abzōnīg rapiϑβin

427.0

ān az niyābagān niyābagīhātar ud ān kē pursišnīgān pursišnīgtar harwist kē dīd ā =šān guft ud ēdōn kē guft ā =šān abar āšnūd ka =šān pad āgenēnwēnišnīh dīd bē ēstād hēnd ruwān kirb ī wištāsp u =šān niyāyišn andarg nimūd

428.0

pad ān abar tēz būd nē dagr ka frāz mad pad dwārišn ud ruwān ī srid ī wisrabān az abāxtar nēmag ī ērand ī ērandzadār kū xwad syā būd u =š kunišn =iz syā būd ērandtom az dēwān

429.0

u =š ēdōn xwadāyīd u =š ēdōn ǰōyīd ruwān ī srid ī kū dah ēd rah ī wāzēnīdār kē ī =t wištāsp pad xūb hamhāgīh abar ud wālanīh ud pad ān sazēd ahlāyīh abar abēzag ma pad tis ī sahīgōmand kū ma nīrmad ī gētī rāy ahlāyīh dōšāram rāy ī az astān pahlom

430.0

ka =š ān gōwišn abar āšnūd srid ī wisrabān pēš wāš bē ēstād u =š ēdōn pad gōwišn guft kū pad ahlāyīh ō tō daham ay tagīg kay wištāsp ēn rah ī bē wāzēnīdār ēwāz ahlāyīh rāy ī az astān pahlom

431.0

ud ēdōn pad ahlāyīh čiyōn pad ahlāyīh pahlom ud astān pad ruwān čiyōn ō ruwān pahlom ham =iš dāšn niwēyēnīd kū =š padīrišn paydāgēnīd tā ō se bār

432.0

ēg ān rah dō rah būd mēnōy any ud gētī any ud pad gētī frāz wāzīd burzāwend kay wištāsp abar ō wis ī nōdarān pad urwāhmenīh humenišnīh ud pad ān ī mēnōy frāz wāzīd ruwān ī srid ī wisrabān abar ō ān ī pahlom axwān

433.0

ēk ēd ī paydāg pad panǰāhhaft sāl ī az padīruftan ī zarduxšt dēn frāzbērasišnīh ī dēn pad haftkišwar paydāg andar zīndagīh ī wištāsp ēdōnīh paydāgīhist pad madan ī az kišwar pad dēnxwāyišnīh ō frašōštar ī hwōwān čiyōn dēn gōwēd kū dō kē ēdōn nām bawēnd spitōyš ud arzarāsp kē tazīd hēnd pad xradxwāyišnīh ī abar ō frašōštar ī hwōwān

434.0

ud ēd ān ī az madan ī amahraspandān pad gugāyīh ī abar rāst waxšwarīh zarduxšt az asmān ō damīg pēš wištāsp ud ān =iz ī abar pišōtan rah ī srid ud abārīg dar azabarnibišt dīd az abestāg paydāg ī ham ī awēšān zarduxšt pad wābarīgānīh ī ohrmazd gōwišnīh padīruft

435.0

ud agar ēd warz ud xwarrah abdīh ī azabarnibišt abar dīd ī awēšān kišwar frazānagān ī pad paydāgīh ī az abestāg paydāg nē būd wištāsp šāh awēšān kišwar frazānagān nē dīd hē ī =šān ēn abestāg kē paydāg būd ī ēd and warz ud abdīh ō awēšān az =iš paydāg ud abēwābar dāšt ud hišt ō amāh nē paywast hē

436.0

abar abdīh ī paydāgīhist pas az wištāsp tā hanǰaftan ērān xwadāyīh

437.0

hād abdīh paydāgīhist pas az wištāsp tā hanǰaftan ī ērān xwadāyīh ǰud az wābarīgānīh ī war ud passāxt ud abārīg abestāgīg nērang ud wuzurg ōz ī abar ātaxšān ī warahrān ān was dēnīg warzgārīh pad hāwištān ī zarduxšt paywastag būd

438.0

pas =iz az wišōbišn az aleksandar mad was ān ī xwadāyān ī az ān pas az pargandagīh abāz ō hamīh āwurd ast ī pad ganǰ ī šab’n dāštan framūd

439.0

wābarīhistan =iz ī ān ī abar xwadāyān dastwarān nām čiyōnīh andar zamānagīhā āwāmīhā ī pas pas ō ārāstārān dēn ud gēhān rasīd ud sāstār =iz ahlomōγ ī andar āwām āwām ō wišuftārīh dēn xwadāyīh ud gēhān padīd paydāg madan padīd mad hēnd

440.0

čiyōn az xwadāyān wahman spandyādān ī =š andar abestāg ēn =iz abar abar gōwēd kū wahman ī rāst ī hanǰamankirdārtom az mazdēsnān

441.0

ud az dastwarān saēn čiyōn =iš ēn =iz abar gōwēd kū sālag bawēd dēn ka saēn zāyēd ud sālag ka bē widerēd ān =iz fradom mazdēsn sad ’y’ būd kē pad hāwištīh frāz rawēd abar ēn zamīg

442.0

az wišuftārān aleksandar čiyōn =iš andar dēn ēn =iz abar gōwēd kū ay ān ī hamēābag zamestān ōy xešm abar pad apišmānnihānīhā mar kunēd ī dušxwarrah aleksandar

443.0

ud az dastwarān arzwāg ī =š wizārišn nām ī abēzag gōwišn ud srudōspādāg ī =š wizārišn ī nām srūd abzōnīg zraiiaŋhā̊ ī =š wizārišn ī nām zrēy axwān ud spəṇtō xratuuā̊ ī =š wizārišn ī nām abzōnīg xrad

444.0

čiyōn =išān ēn =iz abar gōwēd kū paydāgīh tō ōy āškāragīh daxšag =iz gōwam ka ēd tō dēn ī mazdēsnān čahārsad sālag bawēd andar ēn adēnšabīh bawēd ox ī astōmand pad mar paydāgīh wēnēnd abāxtar ud star =iz ud kē =iz man ō sadōzim pad mayān mānišnīh sīh zamestān ī mayān ī mard hēnd ahlaw arzwāg ān se ī did awēšān hēnd az astān ahlawtom ī andar ān zamānag awēšān abarradtom dastwartom

445.0

ud ēn =iz kū awēšān kē pad panǰom ud šašom sadōzim dēn ī mazdēsnān stāyēnd awēšān nē kas ruwān bōzēnd bē kē pad rasišn ī se wizārišn kū pad dastwarīh ēn čahār kas ēstēnd arzwāg srītō spāδā̊ zraiiaŋhā̊ spəṇtō xratuuō kē pad mānsr xwāhēnd menišn gōwišn kunišn awēšān harw čahār

446.0

ud rašnrēš ahlomōγ ī ān zamānag čiyōn =išān andar rašnuš ud was ud ēn =iz abar gōwēd kū az ān ī awēšān bēšīdārīh bišt hēnd harwisp kē hēnd spennāgmēnōy dām ō awēšān mardān abar ēmēdagēnēnd arzwāg ud ān se ī did

447.0

ud az āwām ārāstārān ardaxšahr ī pābagān čiyōn =iš ān =iz abar gōwēd kū kadār ān ī zōrīg kay ardaxšahr ī tagīg ī tan framānīh škeft zēn ī xwadāy kē ōy andar mān ahlišwang nēk ud rōšn frāz rawēd pad kanīg kirb ī nēk ī was amāwand ī hurust ī buland aybyāst ī rāst ī rāyōmandtōmag ī āzād

448.0

kē ast kū pad rasišn ī ardīg pad ān ī xwēš bāzā ō tan frāxwīh xwāhēd kē ast kū pad rasišn ī ardīg kū pad ān ī xwēš bāzā ō hamēmālān abar āyōzēd

449.0

u =š tansar pad abāgīh čiyōn =išān ēn =iz abar gōwēd abāz =iš az ōy pursīd zarduxšt kū kē deh bēšāzēnīdārtom kē dēwān abespārd az tis ī frārōn kē =š dastwarīh abar burd ēstēd ud druwand ud drōčāš

450.0

guft =iš ohrmazd kū sāstār deh abēšēnīd ī araftag kū wehān nē bēšēd ud huframān kū framān ī frārōn dahēd kē ast āzād tōhmag ud āsrōg =iz ī āgāh pahikār ī deh nāmīg ī ahlaw ān deh bēšāzēnīdārtom hēnd

451.0

ud ān ō tō gōwam kū zanišn ahlomōγīh čiyōn gurg čahār zang kē ān gēhān frāz dahēd ō wardag taxšīšnīh kū az kird ī ōy pad wardag bē nayēnd kē ast kū ōy =iz ī atuwānīg wēmārēnēd kū =š tis bē stanēd az ān ī ’wwšn dast ud abarmānišnīh xānag ud gēhān nayēnd pad wardagīh

452.0

bē abar ō ān deh ān ī abārōn anāštīh padēd bē ān abārōn snōhišn bē ān abārōn spazgīh ud nē =iz az ān deh ān ī abārōn anāštīh frāz abesīhēd ud nē ān ī abārōn snōhišn ud nē ān ī abārōn spazgīh tā ka ō ōy dahišn padīrišn āsrōn ī mēnōy sālār purrguftār rāstguftār ī ahlaw tansar

453.0

ud ka dahēnd padīrišn ō mēnōy sālār ī purrguftārīh rāstguftār ī ahlaw tansar ast kū awēšān deh ka xwāhēnd bēšāzišnīh windēnd ud nē anēnag =ēw az ān ī zarduxšt dēn

454.0

ud pad dēn ārāstār ādurbād ī mahraspandān friyān nāf čiyōnīh ī abar paywandišn ī xwarrah ō tōhmag ēn =iz gōwēd kū ka ul rasēd ahlāyīh az nāfān naftīyān ī tūrān ka uzīd pad friyānān guft kū =š ānōh padīrišn bawēd pad bowandagmenišnīh frāyēnēnd gēhān ī astōmand ī ahlāyīh ud tangīh ō druz dahēnd ud ham awēšān abar pad wahman mānēnd zarduxšt awēšān rāmēnīdārīh pad gōwišn

455.0

zayē zarduxšt az amāh kē amahrspand hēm amāh ēd ō tō rādīh ast kē amahrspand hēm ādurbād frašnwaxštom āwādag būd u =š ēn =iz abar gōwēnd kū ān āwām pōlābdīg kē andar ān mard zāyēd auuarəϑrabā̊ abzōnīgīh ārāstār ahlāyīh ārāstār hanǰamanīg ādurbād ī māraspandān

456.0

ēn =iz auuarəϑrabā̊ ārāstār =ēw ī ahlaw frawahr yazam waēdrōwīh ī mānuščihr āwādag ud ādurbād niyāg gōwēd kū az ōy bē auuarəϑrabā̊

457.0

ud ēd ī az dēn petyāragān ahlomōγān ahlomōγ ī =šān mazdakīg =iz xwānd hēnd čiyōn =šān ēn =iz abar gōwēd kū ēn ī man dēn pad axwmenišn nigerē was bē nigerē zarduxšt ka was ahlomōγ āgāh ahlāyīhkirdārīh ud āsrōgīh =iz gōwēnd awināhīh ud kem āškār warzīdār hēnd

458.0

pad dēn ī mazdēsnān ēd kū pad dēn bē niger u =šān čārag xwāh ud kē awēšān čēgāmiz =ēw petyārdār būd ēstēnd andar ox ī astōmand ud agriftār adēn hēnd ahlāyīh kē az astān pahlom ud ēdōn dēn ī mazdēsnān pad tōhmagbazišnīh baxšēnd kirdārīh xwēšān rāy gōwēnd ud bahr ō xwēšān dahēnd

459.0

xwarišn fšūnēnēnd kū xwarišn sūy paymān gōwēnd ud zahagīh xxx gōwēnd kū paywand pad mādarān gōwēnd ud gurgīh hunēnd kū tis gurgīhā kunēnd awēšān sāxtan ī pad kāmagrawišnīh čiyōn ān ī gurg zahag pas mādar

460.0

awēšān =iz paywand pad mādarān kunēnd awēšān nārīg ī gōspand xrīnēnd ān =iz ī zahag pus brād bē barēnd ō bar kū =šān ašmāh ō hamīh dād hēm nē pāduxšā hēd bē pad hamīh ēstād awēšān nē =iz wurrawēd war nē ka āškārag abar dahēd kū bē bōxtēd awēšān pad =iz frazendān druzēnd kū =šān mihrōdruǰ abar rasišn ud pad =iz ān ī xwēštan

461.0

ēdar abar dēn ārāstārīh ī anōšagruwān husrōy ī kawādān gōwēd kū pad ān ī awēšān abāzestišnīh mard ī dād ī ahlaw anōšagruwān uzwān aǰōyīdār ī dānāg ī kē =š hanǰaman az niyōšišn saxwan kū ān ī gōwēd pad dastwar gōwēd ān ka srōšīgīh frāz dahēd kū wināhgārān pādufrāh kunēd

462.0

bāstān pafšārēd ud kastārān ōy wīr bīm az ān hanǰaman ka az nazdīk pad abganišn abganēd kū zūd zūd nišast kunēd az ōy seǰd bawēnd dādār ān =iz ī ahlaw nūn mardōm čiyōn nūn ka ān ī seǰd ī xradstard az ašmāh seǰd spitāmān

463.0

anōšagruwān rāy pad wānīdan ī ox ī ahlomōγīh ēn =iz gōwēd kū harwistīn rāy ō tō gōwam spitāmān zarduxšt kū =šān hangām pad ōy kē āškārag madan awābar druxtārtom druwandān ahlawān =iz anōšagruwān āyuxtār dāmān afrāz kē dāmān hēnd ī ahlawān kū abāz ō kār ēstēd pad kirdan ī anōšagruwān kē paywastār kārān rāst passox guftār ān anōšagruwān

464.0

ud abar daxšag rasišn ī wišuftārān ī xwadāyīh ērānšahr dēn abēnām būd hudēn ēn =iz gōwēd kū ēg kū fradom daxšag ahlaw zarduxšt rasēd ī rēšīdār deh ēg kēnzadārtar ud anāmurzīdārtar deh bawēnd sāstār ud pad =iz ān rēšēnd mān pad ān wis ud pad ān zand ud pad ān deh pad ān harwist =iz deh ān paydāgīh čēgāmiz =ēw čāšišnīh ī rasēd ī rēšīdār deh ud ēdōn mard ī wēnāg ī frazānag abar nigāh ēw dārēd deh čiyōn =iš pad menišn āgāhīhišnīh

465.0

haft haft sīh empty

466.0

ēg ka sidīgar daxšag rasēd rēšīdār deh āsrōn mardōm awizīdār gōwišn bawēnd kū tis ī dānāgīhā nē gōwēnd hād ēd rāy čē †šān nē padīrēnd ud ān nē ka rāst gōwēd ā =šān wurrawēd ān ī rēšīdār deh ud pad =iz ān rēšēnd mān pad ān wis ud pad ān zand pad ān deh ud pad ān harwist =iz deh ān paydāgīh ud čēgāmiz =ēw čāšišnīh rasēd ī rēšīdār deh ud ēdōn =iz mard ī wēnāgīh frazānag abar nigāh ēw dārēd deh čiyōn =iš pad menišn āgāhīhišnīh

467.0

ēg ka tasom daxšag rasēd ī rēšēnīdār deh ul uzīd ān ātaxš hambarišnīh ud ul ān mardān ahlawān kū =šān pahrēz nē kunēnd zōhr =iz nē ēdōn ō ōy ī rad barēnd kū bahr radān bē kun nē dahēnd ān ī rēšīdār deh pad =iz ān ān rēšēnd mān pad ān wis ud pad ān zand ud pad ān deh harwist =iz deh ān paydāgīh ud čēgāmiz =ēw čāšišnīh rasēd rēšīdār deh ēdōn =iz mard ī wēnāg ī frazānag abar nigāh ēw dārēd deh čiyōn =iš ī pad menišn āgāhīhišnīh

468.0

abar hanǰābišn ī ērān xwadāyīh ēn =iz gōwēd kū ān =iz mar zarduxšt awēšān dehān abar rasēnēd ō wardagtaxšišnīh kū =šān awiškāftag bē kunēd kē ōy ast xwadāyīh ī tuwānōmand ud ēg ān bowandag zadār ahlawān ēg ān ast pad kāmag zadār ahlawān

469.0

ān =iz mar zarduxšt nē dagr pas girzēnēd bē ō nasēnd frazend kū bē abesīhēnd bē ān ī ōy ruwān padēd ō bun ī axwān ī tam kē ērand dušox ud abar awēšān tanān harwistīn az xwad rasēd hašt ašādīh az kirdan ī xwēš ī ka nē dahēnd padīrišn ō āsrōn ī mēnōy sālār purrguftār ī rāstguftār ī ahlaw

470.0

frāz ān mar pahikārēd zarduxšt pad harwisp ox ī astōmand axwīh radīh kū man weh šāyēm ud frāz dādestān tāšišnīh wizīr kirdan wad frāzbēdahišnīh pahikārdārān druwendān =iz ahlawān =iz kē ān ī dūrestišn wis dūdag ī bowandag ō wiyābān =iz kunēnd

471.0

ud damīg =iz kē ō tarist wardēd gannāg mēnōy awēšān būm bē murnǰēnēd pad sez abārīg =iz anāgīh ud bē abar ō ān deh ān ī guxrūn anāštīh padēd bē ān ī abārōn snōhišn bē ān ī abārōn spazgīh

472.0

nē =iz az ān deh ān ī abārōn anāštīh frāz abesīhēd ud nē ān ī abārōn snōhišn ud nē ān ī abārōn spazgīh pēš az ān tā ka ō ōy dahēnd padīrišn ō āsrōn ī mēnōy sālār ī purrguftār ī rāstguftār ī ahlaw ud ka ō ōy dahēnd padīrišn ast kū awēšān deh ka xwāhēnd bēšāzišnīh windēnd ud nē anēwēnag ī az ān zarduxšt

473.0

ud ēn ī ōšmurd nisang =ēw ī az was ud frāhīd tis ī az abestāg pad bawēdrasišn pas az wištāsp tā hanǰābišn ī ērān xwadāyīh az ērānšahr paydāg kū ēn ī nibišt mad gēhānīgān āgāhīh

474.0

ēn =iz abar gugā ast ī wābar ud agar ēd ī az abestāg pad rasēd ī pas az kay wištāsp tā frazām ī ērān xwadāyīh paydāg nē mad būd hē wābarīgānīh ī abestāg kē =iz ēn xīr ī nūn būd pad ōh bawēd ī andar ān u =š gāh az =iš paydāg andar awēšān xwadāyān dastwarān az wištāsp frāz wišuft ud wisist ō amāh nē paywast hē

475.0

abar abdīh ī paydāgīhist ud paydāg paydāgīhēd pas az hanǰābīhistan ī ērān xwadāyīh ērānšahr hazangrōzim sar zarduxštān sar ud rasišn ī ušēdar ī zarduxštān

476.0

hād ēd abdīh wābarīgānīhistan =iz ī pēškēdīgīhā āgāhīh abar ān ī nohom ud dahom sadōzim az abestāg paydāg ān ī nūn wēnābdāg ēdōnīh nimūdār ast čiyōn hanǰābišn ī ērān xwadāyīh az ērānšahr wišōbišn ī dād ēwēn ristag pāduxšāyīh ī wizārdwars bulandpēšag kilāsiyānīg

477.0

ud āgenēn āmēxtagīh ud paywandīh =iz ī awēšān harw čahār ud abarīhistan ō abardar pāyag ud madan ī abāg =išān nigūnān xwurdagān ud tēragān apaydagān ī āwām ud wišōbīhistan ud nigūnīhistan ī bunbaγ ud paydāg mardōm andar ān ī awēšān zamānag

478.0

ud frōd waštan ī xrad ud xēm az ērān dehān anērān ī dēn rāstīh ud šarm ud mihr ud spās ud āštīh ud rādīh abārīg wehīh kē =šān winnārišn mehmānīh abar xrad xēm

479.0

ud wasīh ud čērīh ī ahlomōγīh ud drōzanīh ud paristārīh ud spazgīh ud sturgīh ud druxtārīh ud anispāsīh ud anāštīh ud penīh ud abārīg wattarīh kē =šān band =iz ō xrad ud xēm ud hilēnd pahrēzīh ī ātaxš āb gētī amahrspand

480.0

ud stahmagīh ī agdēnīh uzdēsparistagīh ud kemīh ābādagīh wēšpāduxšāyīh ī āz pad tan ī mardōmān ud purrīh ī ǰuddādestānīh abar ǰādūgīh wasdrāyišnīh was abar yazadān dēn stōwīh

481.0

xwadāyīh abesīhēnīdan ī mardōm ēk abar did awērānīh ī gyāg rōdestāgān az must ī čērān ud dušpāduxšāyān ēwar ēk abar did ud garān rēš ud zanišn ī abar gōspandān ud pazāgīh mēnōy ī rāmišn az ērān dehān mehmānīh ī šēwan ud mōy ud snōhišn ud garzišn andar šahr awindišnkirdanīh nastzōrīh zadxwarrahīh ud kemzīyišnīh mardōm

482.0

ud wasīh ī hēn ī srādag srādag ud padīriftan ī ahlomōγ andar sāstārān apadīruftagīh ī ān ī huxēm ud dānāg ud zūd zūd rasišnīh ī niyāz ud sez ud abārīg petyārag ōškābišn ud wardagtaxšišnīh ī andar =iz dehān ud gyāg ī ērān dehān tar wānīdār

483.0

ud apandīh dāštagīh ī dēn ī yazadān nizārīh ud dardīh ud dušgōnīh hudēnān xrōsagīh ud xwastūgīh ī dēnburdārān druwandīh ud murnǰēnīdan kirbagīh ī frāyīh ērān dehān

484.0

anīz was anāgīh ī andar ēn dō sadōzim pad abestāg ōšmurd ēstēd ī az =iš widird az =iš nūn =iz ēdōn wēnābdāg az =iš rasēd paydāg

485.0

ud ēn =iz nihang =ēw az =iš dēn gōwēd kū ān āwām āhen abar gumēxt kū az hamāg kustag nigerēnd āhenēn kē andar ān ī sturg xwāstār ahlomōγ ā =š andar zāyēnd

486.0

hād sturgīh =išān ēd kū =šān passand āwēnišn harw dō ēk u =šān xwāstārīh ēd kū hamē ka =šān tuwān anāgīh pad kasān kunēnd ka pāb pad karag ǰuwānān pīr paydāg bawēd wad zamānīh rāy kē andar ān mard zāyēnd kē frazānag adōst hēnd kū hērbedestān dastwarān nē dōst hēnd

487.0

ud ābād gōwišn hēnd kū saxwan čarbīhā gōwēnd ud druwand hēnd ud purdagēnīdār gōwišn hēnd kū gōwišn ī hērbedān dastwarān akār kunēnd ud brīnēnd ahūōmandīh radōmandīh ud xwadāydastwarīh pad dušbarišnīh barēnd pad abārōn bē ēwtāgān ham barēnd

488.0

tis ān gōwēnd hagriz kas ud ōy deh ī dāšt dādwar ā =šān ō ān ī gannāg war abganēnd ō dušox hād ham =išān ēw anāgīh pad =iš kunēnd tā bē ō druwandīh rasēnd pad ōšmurišn abar ēstēnd ān ī dušzahag ī dušwīft ī ahlomōγ ān ī wattar gurg ī purrwōyγn purrwattarīh

489.0

zanēnd ēdar dōst ō ōy ī dōst u =š zinēnd az =iš ān ī xwēš kirdārīh kū hamē ka =šān tuwān ā =š xwāstag bē stanēnd ud ō ōy dahēnd kē =š az =iš abāz padēxēnēnd ka nē ōy ī wy’ywyw xwāhēnd ud driyōš ān ī any zinēnd kū =š xwāstag bē stanēnd u =š rēbēnēnd ka garzišn kunēd

490.0

abāz ast ud nē ō tō daham nē ēdar dōst ō ōy ī dōst ud nē brād ō ōy ī brād ud nē pus ō ōy ī pidar ud nē =iz pidar ōy ī pusar handarzēnēd ud man wurrawēnēd gyāg kāmagmānišn bawēnd kū harw gyāg =ēw kū =šān abāyēd bē mānēnd pad harw brahmag ī =šān abāyēd bē rawēnd ud abar rāh sigālēnīdan pad rāh wābarīgānīh ud abzōn frahang mwldānišnīh gōwēnd

491.0

ēd se abzōn frahang ī az ān ī amāh bē dānēm pad ulīh ān ī keh pad nigūnīh ān ī meh meh az ōy ī keh bēhammōxtišnīh kū pad harw tis =ēw pad pay ī ōy sāstār bawēd

492.0

menīmānāg menēnd sāstār mānāg kanīg bawēd wyywk xēm ud wyywk bawēd kanīg xēm xwad ō gušn haxtēd

493.0

ēg ka xēm ud xrad frōd wardēd az ērān dehān kū bē šawēd ēg abar ō ērān dehān az nazdīkīh ī wōyγn ōham dwārēd nēst tisīh ud zamestān =iz ī dēwāndād ī snōhišnōmand kū wārān =iz kem bawēd ud sez ī nihānrawišn ī frēftār kū margīh wēš bawēd ēdōn w’ltyštwk =iz ī druwand ud ahlomōγ =iz ī anahlaw pad hamhāgīh ōham dwārēnd

494.0

čiyōn ān ī dawēd awēšān dawēnd kū xwar ud zan dahībed čē =t xwarišn u =t zanišn ātaxš =iz zan pad =iz xwarišn xwar awēšān kē srōšāwarz hamīh pānag hēnd ud awēšān abar pad nayišn nayēnd driyōš ī ahlaw dādestān

495.0

kū =š awiškāftag bē kunēnd u =š zanēnd u =š arad ān barēnd xwāstag hād ka =šān xwāstag barēnd ā =šān arad burd bawēd

496.0

ud andar ān āwām tō rāy ham nē kāmag abēzag ahlaw spitāmān āyišn nē bēwirrōyišnīh šawišnīh ī waxš kū mihrēn āwarišn ud barišn nē abāyēd awēšān ī kirdag ahlomōγ ēd ī tō sraw nasēnēnd abestāg zand kū nizār bē kunēnd awēšān ī kirdag ahlomōγ ān ī xwēš ruwān āzārēnēnd ān ī kird xwāstag dōšāram rāy

497.0

ud abar nohom ud dahom sadōzim ēn =iz gōwēd kū ān āwām rawēd ēd kū rasēd spitāmān zarduxšt ka was ahlomōγ radīh dastwarīh ahlawīh gōwēnd ud kem druwandīh ud āwāsēnēnd āb ud hōšēnēnd urwar ud nasēnēnd harwisp ābādīh kē az ahlāyīh paydāgīh

498.0

abāz =iš az ōy pursīd zarduxšt kū čē ēdōn awēšān ohrmazd pad ān dahēnd ka ānāsēnēnd āb ud hōšēnēnd urwar ud nasēnēnd harwist ābādīh az ahlāyīh paydāgīh

499.0

u =š guft ohrmazd kū dahēnd ēdōn awēšān pad awēšān zarduxšt ka az ān meh gōwēnd hunušagān ud xwēšān rāy čiyōn xwēš ruwān kū nīrmad ī awēšān rāy wēš gōwēnd kū ān ī xwēš rāy

500.0

bē awēšān dahēnd ō kayagān karabān ō mardōm yyy ī wāstaryōš ō mardōm arwandasp artēštār ēwāz =ēw čiyōn =imān ēdar pad gōšt ī ān ī meh bahr kunēnd kū =mān pāduxšāyīh dahānd čiyōn ēdar pad gōšt bē dahēm ān ī meh grāmag gīrēm

501.0

xwāstag druwand =iz ēdar zarduxšt pad mēhan mānišnīh pad anārāstān bulandwirāyišnīh kū dādestān ī stabr kunēm padīrišn gōwišntar čiyōn driyōš ahlawdādestānīh abar arzānīg ahlaw kē =š paydāg ahlāyīh franāmišn ī ō kār kirbag

502.0

abāz =iš az ōy pursīd kū ast ēdōn ēdar andar āwām ī dēn ī mazdēsnān gētī paydāgīh pahlom kū dēn ī mazdēsnān mehmānīh pad kas ast

503.0

u =š guft ohrmazd kū ast ēdōn andar awēšān mardān abar zarduxšt čē ēdar hēnd āsrō ī guftār ud awēšān =iz mard hēnd xrōsag xwāstag andar ox ī astōmand seǰ dādār ud murnǰēnīdār wizend ud ǰādūgīh awēšān =iz rāy gōwēnd mardōm druwand ī sāstār awēšān az tō bē zarduxšt mehīhātar ōzōmandīhātar xruǰdōmandīhātar ahlāyīh ahlāyēnēnd

504.0

kōr awēšān druz hēnd kē ō tō hampursēnd anāgāh hēnd sāstār ud wēnāg awēšān =iz druz hēnd kē ō awēšān hampursēnd āgāhīh menēnd ud anāgāhīh hēnd ahlomōγ kē awēšān nazdīk petyāragēnēnd kū ēd gōwēnd kū =mān ēd ī tō gōwē paydāg kū nē ēdōn čiyōn tō gōwē kē awēšān gōwēnd kū nē man ēd ī tō mard kār kū =m nē abāyēd kirdan nē tō kū tō =iz nē abāyēd kirdan čē nē ēd ī ahlāyīh kū nē kirbag

505.0

čē ēn ō ēn ī tō gōwišn menišn dād ēstēd kē tō =iz āgāh hē ān ī menīdār pahikār ’w’šytl čēgāmiz =ēw ēdar spitāmān zarduxšt čē abar pad gumēzag ō āškārīh rasēd kē ahlaw ayāb nē būd ēstēd ān ī xwēš ruwān

506.0

ud ēn =iz gōwēd kū awēšān ō tō gōwam spitāmān zarduxšt kē pad ān ī nohom ud dahom sadōzim rasēnd kū druz azg bawēnd awēšān andar aškamb ast kū frōd kirrēnišn hēnd kē awēšān pad frāzīh pēšōbāyīh ayāb pad abāzīh ī pad pasōbāyīh ayārēnēnd ān ī abārōnīhā

507.0

u =šān ēn =iz abar gōwēd awēšān mardān zanišntar hēnd ēdōn =iš guft ohrmazd kū ēd ī ahlaw kē nasā bē kašēnd andar ēn gēhān pad harw wstwl awēšān ātaxš bēšēnd ud āb =iz ī dagrhutazišn awēšān tūn ī mayx ud hēn =iz ī čihragōmand ī sahmgen ī hazārgānag ayārīhišntar bawēnd kē nasākirrān druwand hēnd

508.0

awēšān rāy ō tō gōwam spitāmān zarduxšt kū pad ān nohom ud dahom sadōzim rasēnd ō ī druz hunušag ēn ī ud riyahr ī gannāgmēnōy ēk =iz az awēšān zanišntar čiyōn dah dēwāst ud awēšān =iz ō ēn ī man murnǰēnišn dahēnd ō ēn ī man dēn kē zanišnōmandīh gōwēnd kē ka zīstan šāyēd pad rāh ī amāh ud druwand hēnd pad mehīh kāhēnd

509.0

ud tarīh =iz kū pad pēšōbāyīh ud pasōbāyīh kunēnd ud wināh kē tō dawāg halag gōwēnd abēzag spitāmān ud dawāg awēšān gōwēnd kē ēd ī tō dēn ī mazdēsnān ōšmārēnd

510.0

awēšān zarduxšt bē az tō ān =iz ī rēxn windišn apparēnd ud tar ēd tō ēzišn menēnd ud tar niyāyišn zarduxšt tar ān harw dō wābarīgānīh menēnd abestāg ud zand kē tō man frāz guft kē az mēnōyān abzōnīgtom hēm

511.0

rēš wattar srāyēnd pahlom kunišn ō mardōm apaymānkušišnīh kē az ān ī wattar kunišn urwāhmenīh gōwēnd ān =iz murnǰēnēnd ān ī mēnōyān axwān murnǰēnēnd ān ī xwēš ruwān murnǰēnēnd astōmandān gēhān awēšān xrōsišn dahēnd ō ruwān dēn =iz abar čē ēwēnag rāyēnīdan ī hudēn mardōm abāg wattarān ī ham zamānag

512.0

ud ēn =iz gōwēd kū zarduxšt pursīd az ohrmazd kū čē ēdōn awēšān framāyēm kē nē pad dār sneh tuwānīg hēnd kū =šān abzār nēst u =šān nē spāh ud nē abar pānag u =šān was bēšīdār

513.0

guft =iš ohrmazd kū awēšān tuštmenišn mard waxšēnišn daxšag ī pad ōš kē nē ast pad spāh tuwānīg hēnd u =šān was bēšīdār

514.0

ud abar sazīhistan ī pāduxšāyīh az wattarān ī ham zamānag ēn =iz gōwēd kū pursīd zarduxšt kū ān ohrmazd kē kay karab ān ī dušxwadāytom pad pāduxšāyīh abāz ō wehān gumēxtēd guft =iš ohrmazd kū ān =iz ō wehān gumēxtēd ēn čiyōn kēsar ud xāgān

515.0

u =š guft ohrmazd kū ān =iz zarduxšt

516.0

pursīd =iš zarduxšt kū ān =iz ohrmazd kē awēšān ī ān huxwadāyīh abāz ō wehān gumēxtēd ēn čiyōn kēsar ud xāgān

517.0

u =š guft ohrmazd kū ān =iz zarduxšt

518.0

abar ham wattarān ēn =iz gōwēd kū awēšān ka āgāh hēnd ud andar dānēnd grāmag az ahlāyīh dōšēnd kū =šān pārag weh sahēd az kār ud kirbag tam ān dōšēnd az rōšnīh ud ān ī wattom axwān dōšēnd az ān ī pahlom axwān awēšān abāgēnēnd dušwārīh

519.0

awēšān =iz rāy ō tō gōwam kū zanišntar hēnd az gaz ī šasp ī čiyōn gurg šēr ud awēšān pad kēn bēš hamē az ān franāmēnd tā ka ān mard rasēd kē čiϑrōmēhan ī ahlaw abāg wazr ī pērōzgar

520.0

abāg panǰāhse mardān raft ī hāwištān ī amāwand ī buland frāz nigerīdār kār ud dādestān ī frāx suft ī stabr bāzā ī was saxwan kū =šān stūn stabr ī seǰddēnīh kū =šān dēw wattarīh az =iš tarsēnd

521.0

ud ān zanēd gannāgmēnōy abāg dāmān ān se azg ī paydāg kū druz sazēd pad āgenēndazišnīh ēd =iz kē pad buland pēšagīh rawēnd pad asp tōrag/turk dēwīh =iz ī wizārd wars tāzīg ud šēdasp =iz ī kilāsāyīg hrōmāy

522.0

ud ān frahist pad dārhāzišnīh mardān ēg hāzēd ud awisandīhā ud anawisandīhā kē ōy nē hunsand kū pad ān ī gōwēd nē hamdādestān ā =š hunsandīhā franāmēd zarduxšt kū kū =š bē ō dēn āwarēd

523.0

ham ōy pad ān wazr mehēnēd ī huwēhm kū pad dast ī ō xwārīhēd xwār dāštan pad ān ī čēr bāzā ud pad ān ī ǰuwān tawišn

524.0

bē amāwandīh pērōzgarīh bandēd ō ān ī ōy dēn ī ohrmazd ud pad ān amāwandīh ud pērōzgarīh hamē az ān franāmīd bawēnd ka awēšān rasēnd kē pus ī zarduxšt hēnd kē kunēnd frašegird andar axwān azarmān amarg ud asōyišn ud apōyišn dagr hamētāōwisp

525.0

ud abar brīnag ī dah sadōzim ī andar ēk hazangrōzim ī zarduxštān āgāhīh ī ušēdar ī zarduxšt pus ēn =iz gōwēd kū ka ān sadōzim bē sazēd ī fradom pad dēn ī mazdēsnān az zarduxšt ō hampursagīh mad frāz čē fradom sadōzim brīn ast

526.0

u =š guft ohrmazd kū xwaršēd bē nihumbēd

527.0

čē pas didīgar ud sidīgar ud čahārom ud panǰom ud šašom ud haftom ud haštom ud nohom dahom sadōzim brīn ast

528.0

u =š guft ohrmazd kū xwaršēd abar nihumbēd

529.0

ēg ka ān ī dahom sadōzim sīh zamestān arānag kū sīh zamestān abāz kanīg āb abar rawēd kē nāmīg pidar =ēw kū hamē ōy ī nāmīg ušēdar u =š az ww’wrōz ī friyānīyān ī andar dūdag ī isadwāstar ī pus ī zarduxšt az arwač zād ēstēd frāz tōhmag

530.0

ēg andar ān āb nišīnēd ud xwarēd ud ōy ud awēšān šusr abar ul frōgēd kē būd kū ahlaw zarduxšt sidīgar abdom ō bun frāz hišt ud ān pus andar dahēd kē ast waxšēnīdār ahlāyīh nām

531.0

ka pānzdah sālag ast kanīg nē pēšag az ān abāg mardān bē nibast ud nē ka pas tā ka ābestan bawēd pēš az ān tā ka ān ul zāyēd

532.0

ka ān mard sīh sālag bawēd ān xwaršēd bē ēstēd pad bālist ī asmān dah rōz dah šabdrang ud abar ō ān gāh ān abāz bē rasēd kū ān fradom pad frāzbrehēnišnīh frāz brehēnīd kū čahār angust ēw angustandar kunēd harwisp kišwar abar tābēd kē haft

533.0

ēdōn =iz awēšān zarduxšt xwad ēdōn awēšān paydāgīh ast kū dānēnd kū hazangrōzim brīn kē ēn dēn abar pad āšnawišn āšnūd ēdōn awēšān kē nē ēg =iz dānēnd kū tis =ēw ī ǰuttar ast

534.0

ēg ka ān mard sīh sālag bawēd ān hampursēd ō amahraspandān ī huxwadāyān ī hudāgān fradāg andar rōz ān ī rōšn rōz bē paydāg ka ox ī ast amust ud akay ud akarab kū pad tis ī yazadān nē karr ud kōr ud awisānišn kū =š xwēštan tis ī yazadān ǰud nē kird ēstēd ud purr āšixt ēstēd kū wārān būd ēstēd meh gyāg gyāg abāz ēstēd andar ērān =iz kū weh dāytī

535.0

ēd daxšagīhā ī abar sadōzim ī dō ast nohom ud dahom drīstīh ī ān ī madan sazīhist ēn mad ēstēd ud paydāg harw dō abar drīstīh ī abar ān rasēd guft ēstēd ud abar gugāh

536.0

abar abdīh ī pas az hazangrōzim ī zarduxštān sar ud rasišn ī ušēdar tā hazangrōzim ī ušēdarān sar ud rasišnīh ušēdarmāh ud az āgāhīh ī ham zamānag

537.0

abdīh ī ušēdar pad zāyišn tan xwarrah ud saxwan ud kār estišn ī xwaršēd dah rōz mayān asmān abesīhišn ī čahār zang tōhmag druz dād ī se zlmyd˚ xwābargarīh ō urwarān nizārīhistan ī frāybūd aywibūd wēš zōrīhistan ī paymān rāmīhistan ī anērīh ud y’ywstīh āb waxšānīh ī wasn dānāgīh ud stāyīdan ī čand srādag m’lyn dēn ī mazdēsnān zad ī ušēdar

538.0

mazanwisīh ī čārān pad ān panǰom sadōzim az ham hazangrōzim paydāgīh ī haft srādag ǰādūg malkūs andar sāl ān ī sraw pad harwisp kišwar ake haft bē madan rasišn malkūsān zamestān abesīhišn ī frahist mardōm gōspand andar se zamestān andar =iz ān ī čahārom pad škeftīh ān zamestān ān ī malkūs ǰādūgīh ud frōdmīrišnīh ī gišnag zahišn malkūs andar ān ī čahārom zamestān pad ān ī dahmān āfrīn

539.0

āhumbišn ī ǰamkird war madan ī mardōm gōspand az =iš abāz purrrawišnīh ī mardōm ud gōspand az awēšān abērtar būdan

540.0

pas az ān zamestān was ud wuzurg abzōn abar ān ī gōspandān pēm ud wēšsrāyišnīh mardōm az pēm ud kem ōzēnagīh ī gōspandān tan purrīh ud frāxīh gēhān ud hangadīh ī hambāstag mardōm wuzurgwaxšišnīh ī rādīh

541.0

ud nizārīh škōhīh andar mardōmān čiyōn ān ī dēn gōwēd kū ēdōn =iz ān zarduxšt ka az ān ī padīruftār ywšw’tl ast čiyōn ān ī dādār ī ēdōn andar ox ī astōmand frāz rādīh bēdahišnīh ān pad mānišn mānēd

542.0

ud ēn =iz gōwēd kū ka ān zamestān bē sazēd kē guft kū sturg ud murnǰēnīdār ēg ō mazdēsnān dad abar rawēd seǰd ī frāxraftār ēdōn menēnd kū nē amāh pas mazdēsn kēnēnēnd wēš az ān čiyōn ān ī xwēš zahag ud pus ī ēdōn ēdar mazdēsn ō gōspand ī hudāg akēnīh dōšāram abar barēnd

543.0

ēg ašawahišt ō mazdēsnān az abardar nēmag abar bē xwānēd ēdōn gōwēd ō mazdēsnān kū ašmāh kē mazdēsn hēd ma kas ēdōn gōspand bē kuštār bawēd čiyōn ān pēš bē kuštār būd hēd

544.0

handarzēnēd waxšišn pad dād handarzēnēd wazdwarīh pad tan mazdēst =ēd gōspand bē kušēd ān az awēšān bē kušēd kē ō ašmāh ayārēnēd kē ō ašmāh gōwēd kū ayārōmandīh ī ašmāh rāy ō ašmāh gōwēd kū mazdēst hēd xwarēd man pad wazdwarīh pēš az ān tā ka man gaz ud udrā bē ǰōyēd

545.0

ud handarzēnīd waxšišn handarzēnīd wazdwarīh mazdēsn gōspand bē kušēnd ān =iz az awēšān kē ō awēšān ayārēnēd kū mazdēst hēd xwarēd man pad wazdwarīh pēš az ān tā ka man gaz udrā bē ǰōyēd

546.0

hunsandīhā mazdēsn gōspand kušēnd ud hunsandīhā mazdēsn gōspand burrēnd ud hunsand gōspand ka nē burrēnd ud hunsandīhā mazdēsn gōspand xwarēnd hunsand ka =š xwarēnd

547.0

ud ēg ka menišn bawēnd hambāst kuštār ud kē =iz =iš kušēnd ud brīdār kē =iz =iš burrēnēnd xwardārān kē =iz =iš xwarēnd

548.0

ud ēn =iz gōwēd kū ka ān sadōzim bē sazēd ī panǰom pad dēn ī mazdēsnān pad ān ī didīgar hazangrōzim ēg awēšān harwist kē abar pad zamīg hāwend bawēnd druwand =iz ahlawān =iz dō srišwadag ēr deh ahlaw hēnd ud ēk druwand ud ham ēdōn tūrān ān ī pērāmōn ērān ud anērān pērāmōn ērān mānēnd meh ēdar az ān āndar ox ī astōmand abzōnīgīh pad mānišn mānēd čiyōn nūn

549.0

ud ēn =iz gōwēd kū ka ān hazangrōzim bē sazēd ī fradom pad dēn ī mazdēsnān čē pas fradom sadōzim brīn ast

550.0

u =š guft ohrmazd kū xwaršēd abar nihumbēd

551.0

ud čē pas didīgar ud sidīgar ud čahārom panǰom šašom haftom ud haštom nohom ud dahom sadōzim brīn ast

552.0

u =š guft ohrmazd kū xwaršēd abar nihumbēd

553.0

ēg ka ān ī dahom sadōzim sīh zamestān arānag kanīg ō āb abar rawēd kē weh pid =ēw kū ōy ī weh ušēdarmāh ā =š mād u =š az wwp’wrōz ī friyānīyān ī andar dūdag ī isadwāstar ī pus ī zarduxšt az arwač zād ēstēd frāz tōhmag

554.0

ēg andar ān āb nišīnēd xwarēd ōy ān šusr abar ul frūd kē būd kū ahlaw zarduxšt didīgar abdom ā =š ō hwōw ān frāz hišt ud ān ān pus andar dahēd kē ast kū waxšēnīdārniyāyišn nām kū rādīh bē abzāyēnēd

555.0

ka pānzdah sālag zyānag nē pēš az ān abāg mardān bē nibast ud nē =iz pas ka ābustan bawēd pēš az ān tā ka ān ul zāyēd

556.0

ka ān mard sīh sālag bawēd ān xwaršēd bē ēstēd pad bālist ī ān asmān wīst rōz šabdrang harwist kišwar abar tābēd kē haft

557.0

ēdōn =iz awēšān xwad paydāgīh ast kū dānēnd kū hazangrōzim brīn kē ēn dēn abar pad ašnawišn āšnūd ēdōn =iz awēšān kē nē ēg =iz dānēnd kū tis =ēw ī ǰuttar ast

558.0

ka ān mard sīh sālag bawēd ān hampursēd ō amahraspandān huxwadāyān ī hudāgān fradāg andar rōz ān ī rōšn rōz ī bē paydāg ka ox ī astōmand ast amust ud akay ud akarab kū pad tis ī yazadān nē kōr nē karr ud awisānišn kū =š xwēš tan tis ī yazadān ǰuttar nē kird ēstēd ud purr āšixt ēstēd kū wārān būd ēstēd ud āb gyāg gyāg abāz andar ērānwēz kū weh dāytī

559.0

abar abdīh ī pas az hazangrōzim ī ušēdarān sar ud rasišn ī ušēdarmāh tā hazangrōzim ušēdarmāhān sar ud rasišn ī sōšyans az āgāhīh ud ham zamānag

560.0

abdīh ī ušēdarmāh pad zāyišn tan ud xwarrah ud saxwan ud kārestišnīh xwaršēd mayān asmān wīst rōzdrang ud ō abardom abzōn rasīd ī ān gōspandān pēm čiyōn ān ī gōwēd kū ēk =iz gāw az dōsēd ō hazār mard kū šīr and āwarēd čand hazār mard ud nizārīh ī suy ud tišn čiyōn gōwēd kū az ēk =iz pih sagr bawēd se šabag kē senagmasā =ēw xwarēd ā =š se rōzānšabān was

561.0

kamagīh zarmānīh ud wēšagīh zīndagīh waxšišn ī ērīh ud āštīh ud āštīh rādīh ud rāmišn andar gēhān

562.0

haft dah 4čiyōn ēd ī dēn gōwēd kū ka pad ān ī abdom hazangrōzim dah ān ī fradom zamestān bē sazēd ēg mazdēsnān hampursēnēnd kū dagrwirēztar amāh az ān gōspand ī hudāg čiyōn pēš bawēd kū =mān xwarišn ud wistarg kam abāyēd bowandagtar amāh az ān gōspandān dōšāram mad ēstēd čiyōn =imān pēš būd araxttar amāh az ān pēr andar wars abar waxšēd čiyōn pēš abar waxšīd frahixtar amāh ān nārīg ud aburnāyīg menišn ud gōwišn kunišn čiyōn pēš az ān būd

563.0

haft dah 5ud ēn =iz tis būd kū pad abdčihr ārāyīhēd ī pad kōdag ud lyd ud pyywlzy bē būd ēstēd tōzišn =iz ārāyīhēdkarabēwēnag druz menēd u =š pad ān ī wattom menišn bē marnǰenēd ǰud az ahlāyīh ǰud az ahlāyīh dōšišn

564.0

nazd ēdar andar axwān aseǰīh rasēd čiyōn =imān ān pad āšnūd āšnawišn az pēšēnīgān mazdēsnān rāst frāz guftārān nūn =iz ka =iz ēn dādestān ēdōn amāh mehdāštār marag xruǰdōmandīhātar tuxšāgīhātar ahlāyīh ahlāyēnam kū kār ud kirbag kunam

565.0

ēn =iz gōwēd kū čē nē pad ān ī abdom hazangrōzim any az ān bē widerēd kē pad dārsneh zanēnd kē =iz az zarmānīh bē widerēnd

566.0

ka az ān ī ōy hazangrōzim mānd ēstēd panǰāhse sāl šīrēnīh ud čarbīh andar pēm urwar ēdōn spurrīgīhēd ī mardōm abēniyāzīh ī az gōšt rāy gōštxwarišnīh hilēnd u =šān xwarišn pēm ud urwar bawēd

567.0

ka se sāl mānd ēstēd pēmxwarišnīh =iz hilēnd u =šān xwarišn xwārišn āb ud urwar bawēd

568.0

ud andar ān ī ōy hazārag rānagbandīh ī dahāg hangēzišn ī karišāsp ō zadan ī dahāg rasišn ī kay husrōy u =š hamhāgān ō ayārīh sōšyans pad frašegirdkirdārīh ud winnārišn ī frayist mardōm pad gāhānīg xēm ud dād anī =z was abdīh ud škeftīh andar ōy ān hazangrōzim būd paydāg

569.0

ud ēn =iz gōwēd kū ka ān hazangrōzim ī didīgar pad dēn mazdēsnān bē sazēd ud čē pas fradom sadōzim brīh ast

570.0

u =š guft ohrmazd kū xwaršēd abar nihumbēd

571.0

ud čē pas didīgar ud sidīgar ud čahārom ud panǰom šašom ud haftom ud haštom ud nohom ud dahom sadōzim brīn

572.0

u =š guft ohrmazd

Sections